ONCE UPON A TIME IN MIZORAM : SEASON 2 (Mizo zombie horror story) Written by : Aaron Malsawmdawngzuala Episode 2 : A Cold Rekoning

 ONCE UPON A TIME IN MIZORAM : SEASON 2

(Mizo zombie horror story)

Written by : Aaron Malsawmdawngzuala

Episode 2 : A Cold Rekoning

*******************************************

Zan thim chhah mup mai chuan ramhnuai chu a rawn tuam hlup tawh a. Zan dar 7 vel a pel âwrh chauh a ni a, chu ram pilril leh hnim pik tak karah chuan khawvar hun a hla vawng vawng hle a ni. Thlam chhungah chuan khawnvar eng fiah lo tak hnuaiah Pu Tea leh midang, hmeichhia ho leh Kimkima te chu an lo ṭhu khawm chial a. 

Chhun a Smuggler ho hnu chhui tura liam ta, Sawmtea leh mipa dangte thawm reng hriat tur a la awm loh avang chuan an boruak tawt lutuk chuan thawk lak a ti harsa hle mai. Hlimpuii phei chu a thla a phang takzet tawh a. A awm a dawm vawng vawng a, a mitmengah chuan hlauhthawnna hlir hi a khat a. "An va han lo let har tawh tak em... khang Burma misual  nunrawng ho khan ka u leh midangte kha an lo that vek ang tih ka hlau takzet." a ti chhen tawh mai. 

A khat tawkin thlam kawngkhar lam chu a thlir leh vawng vawng ṭhin a. Pu Tea chuan a rilru a hah ve em em tho nachungin, pa ber a nihna angin theihpatawpin hnem a lo tum hram hram a. "Hlimpui, hlauthawng suh. I u te chu tlangval huaisen leh fing tak an nih kha. Him takin an rawn let leh em em ang." tiin a lo thlamuan ve mawlh mawlh a.

Kil khatah chuan Fela nu, Pi Kungi chu chhuatah a ṭhu sawp nuai a, a fapa an hruai bo ta mai leh tlangval dangte chanchin hriat tur a awm bawk si lo chu beidawng lutukin a kun ngiai reng a. Thlam chhung chhuat laiah chuan Siama chu a tei kual sek tawh mai a. Hri kaiin a seh avanga a ban dinglam bul chhum hmawk tawh, la dam fel mang lo pawh chu a ngaihtuah thei tawh lo. 

A vei tawn sek a, "Pu Te... ka va zawng ve mai dawn em maw ni le? Hetianga awm reng chu a hrehawm emai, thil ṭha lo a thleng a ni ngei ngei ang." a ti deuh sek tawh a. Mahse a sira Kimkima lo kuah bet chial tu, Muani chuan hlauthawng takin Siama chu a lo khap vat a. "Ni lo e, Siama... kal suh. Nangmah chauh lehnghal, zan thim hnuaiah ralthuam ṭha pawh nei lovin i va chhuak a nih chuan i thihna tur i va pan a ni ringawt dawn a sin. Awmpuia leh Sawmtea te khan keini ho min veng turin an chah che kha. I kal ve leh zel chuan keini nufa leh hmeichhe ho hi tunge min veng tawh ang?" tiin ngenngawl takin a lo hrilh a. 

Siama pawh chuan Muani thusawi chu dik a tih avangin ngawi rengin bang kilah chuan a ṭhu sawp ve ta hnawk a. An vai mai chuan an dinhmun in a zir loh em avang chuan an mangang tlang takzet a ni. Smuggler ho khan eitur an hnutchhiah tlemte te chu buatsaih tumna reng an nei lo, an ngaihtuahna chu ramhnuai thim tak karah chuan a vak kual ruai a, tu a te mah chuan riltam lam reng an hre tawh lo a ni ber e. Pawn lamah chuan zan thli a rawn thaw heuh heuh a, thlam in chhe tawh tak chung rangva chu a chhem ri leh hruau hruau ṭhin a. Nungdama inhmuhkawm leh ngei beiseiin, thlam chhungah chuan thlaphang leh phawk ru takin hun an hmang liam mek a ni.

************************************************

Zan dar 8 a ri tawh a, ramhnuai pilril leh thim chhah mup hnuaiah chuan thâwm a reh tlawk tlawk a. Tlang chhip aṭanga thli rawn thaw thla heuh heuh in hnimhnah a chhem rik hlat hlat bak chu thawm dang hriat tur a awm lo. Chu ramhnuai hmun zawl lai deuh ah chuan Burma smuggler pali te leh an mi man, mipa naupang Fela chu meilum hualin an ṭhu ṭhap a.

Dawlliana chu a awm a nuam lo takzet a ni tih a hriat hle a, a khûr deuh dar dar a, a mitmeng te chu a dâva in a thlan fîm chuan a bual huh vek bawk a. Fela chuan Dawlliana dinhmun chu a chik hle a, hlauhthawn hmel takin a va melh leh zeuh zeuh ṭhin a. Lungthlir khuaa hri kai ho awmdan nen khan a inan chiah chiah avangin a thla a phang ru takzet a ni. 

Lungmuana chuan Dawlliana thlan tla nasa lutuk a hmuh chuan a rawn kâwk a, Burma ṭawngin, "Meilum kha i ṭhut hnaih lutuk a nih kha, i thlan nasa lutuk." tiin a lo fiam a. Luna pawh chuan Dawlliana chu a han melh ve vut a, meilum êng hnuaiah chuan Dawlliana vun chu a dâng var deuh pûp mai a, a mitmeng a dik lo tih a hmuh chuan Luna ngaih chu a ṭha zân lo.

Fela awmdan thlaphâng tak leh Dawlliana a melh leh zeuh ṭhin a hmuh phei chuan a rinhlelhna a zual a, a thaw chhuak hak a. Luna chu ding hluaiin Dawlliana lam chu a va pan a, "Engtin nge i awm a?" tiin a va zawt a. Dawlliana chuan a dar vuan chungin peih loh hmel tak hian, "Ka khua a sik deuh in ka hria... ka ṭha leh mai ang." tiin a lo chhâng mai a. 

Luna chuan ngun taka melh pahin, "Va mu hahchawl rih rawh." tiin thu a pe a. Dawlliana pawh chuan hnial hauh lovin meilum aṭanga hla deuh hlek, thim chinah chuan puan sinin mut zai a rel ta nghal a. Chutih lai chuan an zînga pakhat, Chunglura chu a rawn ding ve hluai a, "Ka pum a nuam lo hle mai, inthiar ka ngai a ni." a rawn ti chhuak a. 

Luna chu a lo nui huk a, "Sawtah hla deuh takah va ti ang che. A rim ka rawn hre phak a nih chuan i lu ah ka hlap nasa viau ang che." tiin Burma ṭawng vekin an inbia a. Chunglura chu rûm nghut in a revolver kawnga a zep chu a dâwm ṭha a, ramhnuai thim lam pan chuan a kal thla ta tuang tuang a.

A kal hla tawk tawh ni a a hriat hnuah, hnim pik kârah chuan a ding a. A kekawr a phelh tûr chiah chu a sîr hnim buk chhah tak aṭang chuan thâwm ri sat hi a hre ta tlat mai. Sazu emaw tiin a ngaihven lo dâwn a, mahse mihring pên ri ngei ni in a hria. Rang takin a revolver chu a phawrh nghal a, chu hnim buk lam chu a tin nghal rân a. 

Mahse thâwm chu a reh leh hmak si. Zâwi muang in thâwm dîm takin a va pan hnai a, "Tunge awm?" tiin a han au a, mahse chhangtu an awm lo. Thinrim deuh takin hnim buk chu a silai hmawrin a han keu thut a, mahse tumah a hmuh loh avang chuan a khi suk a, a inngaihbel mai mai ah ngaiin a inthlahdah leh ta a. 

Mahse, lehlam a hawi let leh chiah chu... thlahrâng ang maiin a hmaah tak chuan tlangval lian leh sa ṭha tak, Sawmtea chu a lo ding thut mai le! Chunglura phu nasa lutuk chu a ding ngîl zâwt a, mahse chet lâk hman a ni tawh lo. Sawmtea chuan a hreipui hum lai chu a theihpatawpa nâ in a vai pawp a, Chunglura bek, a beng bulah tak chuan hreipui hriam lam chu a chek bur ta chat mai!

Chunglura chu a nghing luih a, a meng phâwk nghal kâwk a, nâ ti a au tûr pawhin thâwk a la hman tawh lo, a khûr hluk hluk a. Sawmtea chuan dim baksak lo hian a bek aṭang chuan a hreipui chu a phawi ri leh hrâwk a. Chunglura chu leiah a thingṭhi nghal hnawk a, a bek kâk huam aṭang chuan thisen chu a chîk in a chîk chhuak zawih zawih a. 

Leiah chuan a bawk thlawp a, a thi chiang kher mai. Chutih laiin meilum bulah chuan Luna a lo la ṭhu a, a beng a chhi kâr a. Thâwm ri dawt awm ang deuh a hriat avang chuan a ding zâwk a, "Lungmuan... i lo hria em? Eng thâwm nge kha kha?" tiin a hawi kual nghal ruai a. Lungmuana lah chuan ngaihṭhat hmel takin, "Chunglura inthiar thâwm bak a ni lo ang." tiin a lo chhâng liam puat a.

Mahse a sawi zawh rual chiah chuan, meilum êng thlen phâk lo chin, thim kâr aṭang chuan Sawmtea chu rawn pên chhuakin meilum êngah chuan a hmel rawn lang ta thut mai. A kut lehlamin a hreipui thisen kâi hnuang chu a hum a, a lehlam in Chunglura revolver ngei mai chu a keng bawk a. 

A mitmeng chu savawm hliam tuar ang maiin a rûm in a rapthlak kher mai. Luna chu revolver chuan a rawn tin nghal chawt a. Sawmtea a hmuh rual chuan Luna chuan a piah lawka AK-47 chu a ban ve nghal a, Sawmtea chu a tin ve nghal a. Lungmuana pawh a rawn tho chhuak ve nghal zat a, Fela chu a ṭhâm tho nghal lawp bawk a, a pistol phawrh in Sawmtea chu a tin ve nghal bawk.

"Tunge i nih?!" tiin Luna chuan Sawmtea chu a vin ṭhawt a. Sawmtea chuan zam map lo hian chiang fek fawk in, "Naupang kha rawn kal tîr rawh. A nih loh chuan ka kâp ang che." a ti khur khur mai. Luna chuan ngeiawm zet hian a nuih vak vak a, "Hmela leh... pahnih kan nih hi. Tu emaw zawk zawk hi kâp mah la, keini pakhat zâwk zâwk hian kan kâp hlum dâwn tho tho che." mizo tawng pai deuh chuan a lo tih khum sak a.

Chutih lai tak chuan an sîr mau hmun aṭang chuan Valtea chu ulhbun lek kâwh va chungin a rawn chhuak ve leh ta hlawl mai. Valtea chuan hmanhmawh lutukin Lungmuana chu a rawn tin ve nghal a. Lungmuana phîlî chuan Sawmtea a tinna silai chu sawnin Valtea chu a tin let ve nghal bawk a. 

Boruak chu a sâng ta kher mai! Luna chuan an dinhmun a derthâwng ṭan tih a hriat chuan a sir lama Dawlliana lo mu kâwm ngâl chu a va au a. "Dawla! Dawllian! Harh rawh, buaina kan tâwk a nia!" tiin a au vak vak a. Mahse Dawlliana chu a harh eih lo, lehlam hawiin a mu khûr hlawk hlawk a, a thâwk lâk ri chu a ri hrawih hrawih mai.

Chutah le, an hnunglam aṭang chuan Renga chu a rawn pên chhuak ve leh ta! Silai ni lovin a thal siam chawp ngei mai chu theihpatawpa kâu mar in Luna âwmah tak chuan a rawn tin rân mai. Smuggler te chu tlangval pathum in an hual ta ṭhap mai le. Lungmuana chu a hlauthawng ta takzet a. 

A pistol ken chu Fela beka chuktuah pahin, Fela âwmah chuan hnungzâwngin a rêk bet ta tlat a. Mizo ṭawng pai deuh nawk nawk hian, "In lo kal hnaih vaih chuan he naupang hi ka kâp hlum chiang ngawt ang!" tiin a vau khûr khûr hlawm a. Tichuan, an vai mai chuan chêt la hmasa sa thihna tûr a ni tih hriain an reh ṭhap a, an inveh kual in an inmelh râm râm hlawm mai.

Mahse chu boruak ṭang ṭak mai chu thil beisei loh tak maiin a rawn thlak ta tlat. An hnunga Dawlliana, muhil mek tura an ngaih kha a rawn tho chhuak thut a! Mahse a mitmeng chu a var vek tawh a, a kâ aṭanga chil phuan baw chhuak nuai chungin ramsa kohâm ang mai hian a rawn rûm chhuak hrawih a. 

Rang lutukin a hma lawka ding Lungmuana chu hnunglam atang chuan a rawn bawh ta thut mai le! Lungmuana dârah tak chuan a rawn seh ta ngawng ngawng mai a. Lungmuana nâ ti lutuk leh phu nasa lutuk chu a eu awt a, "AAAI AHH!" tiin a ṭê tuar a. Chu a phu zawk leh a nâ tuar tal buai chuan a silai kahna trigger chu a hmer nat tîr palh a, a silai chu a puak ri ta ṭhuai mai! 

Chu silaimu dâwng tu chu Valtea a ni! Valtea bân dinglamah tak chuan silaimu a fu siah a, Valtea chu nâ tiin a eu nghal zâwt a, a ulhbun ken chu thlauhin leiah chuan a thal nghal tawp a. Fela chu a tal chhuak nghal phut a, rang lutukin Renga lam pan chuan a tlân phei a, Renga phênah chuan a bîru nghal chawih chawih a. 

Chuveleh Sawmtea chuan a revolver ken lai chuan Luna chu kah tumin a hmet puak nghal a, Mahse a la hman ngai loh vang nge, a kâp thelh ta hlauh mai. Renga pawh chuan a thal chu thlah tumin a han siamrem a, mahse a hma zâwnah tak chuan Dawlliana leh Lungmuana an inchai tak buan buan avang chuan kah sual hlauvin a thlah ngam ta lo.

Luna chuan chêt chhunzawm ngam ngaihna a awm tawh lo tih a hriat chian em avangin a AK-47 chu hmet puak lovin, thim tham hnuaiah chuan theihpatawpa chakin ramhnuai pilril lam pan chuan a tlânchhe ta daih mai a. Meilum bulah chuan Dawlliana chuan Lungmuana chu leiah a bawh tlu a, ramsa rilṭâm ang maiin a nghawng leh hmaiah te chuan a keih mial mial a. 

Lungmuana nâ ti chu a rûm in a ṭê vawng vawng a, mahse rei a ni lo, a hrawk bâwk a dâwt chah sak tâk hnu chuan a zâwi ta hnak a. Chutah, Dawlliana chu thisenin a bual sen nuai chung chuan a rawn hawi chhuak a, a rûm chhur chhur a. Sawmtea chu a rawn melh ta rûn mai le. Valtea pawh a bân a thisen chhuak hup chungin a rawn inbeng kâng ṭuih ṭuih a. 

Dawlliana chu ramsa kawlh ang maiin Sawmtea lam pan chuan a rawn dâwk phei ta thut mai! Sawmtea chuan zam map lovin a revolver chuan a lo kâp leh ṭhuai a. A hrawkah tak chuan a fuh a, Dawlliana chu hnunglamah a dâk âwrh a, thisen a chîk ṭhawt a. Mahse, natna hre tawh lo ramhuai a nih tawh miau avangin a rawn tlan chhunzawm leh thei tlat! 

Sawmtea  chu rawn zuanin leiah chuan an tlu dâwp a, an inbawh bet ta rân mai. Dawlliana chuan seh tumin a bei ngat ngat a, Sawmtea chuan a theih tawpin a nghâwngah a dâwm bet ṭang ṭang a. An inchai laih laih lai chuan Dawlliana lu ah tak chuan thal mu hriam tak mai a rawn bur tlâng ta zâwt mai! 

Dawlliana chu a zâwi nghal hnak a, a thal tawp mai. Sawmtea chuan rang takin chu ruang rit tak chu a nam sawn a, a tho chhuak nghal vat a. Renga chuan a thal hrui a lo thlah fel chiah a lo ni. Chutih lai vel chiah chuan thim kâr aṭangin Muanpuia leh Awmpuia te pawh hah hmel takin an rawn thleng ve chawpchilh nghal a. 

Boruak chu a reh ṭhuap a, thisen leh silai khu rim in an bul vel chu a tuam hlup a. Sawmtea chuan a hreipui lehtling zâwnga (a hriam lo lam) hûm nghet sauh chungin, rorum lutuk hian Muanpuia bulah chuan, "A tu ber hi nge Lungmuana chu... ka nau kut lo thlâk tu chu?!" tiin a zawt a.

Muanpuia chuan muangchangin leiah a hrawk thlêr huam aṭanga thisen chhuak la phul bawrh bawrh, thawk la hleithei lova lo vial mêk Lungmuana chu a kâwk a. Sawmtea chu muangchangin Lungmuana lamah chuan a pên phei a. Lungmuana chuan hlau leh mangang takin, "Min pui rawh... khaw... khawngaihin..." tiin a lo ṭawng chhuak ṭâwk ṭâwk a.

Sawmtea chuan rum lutuka melh chhuk rûn pahin, "Nang hian... ka nau kut i lo thlâk a maw?!" a ti vin ṭhawt a. Chutih rual chiah chuan a hreipui chu a theihpatawpa sânga lek kângin, a hriam lo lam (a blut end) chuan Lungmuana chalah tak chuan a chhû ta siah mai le! 

Ruh tliak ri ṭhawt in a zui a. Lungmuana chu a khûr nghal dâwt a. Mahse Sawmtea thinur lutuk chu vawikhat maiah a lung a awi zo lo. "Zawnga! Ka nau kut i lo thlâk a maw?!" ti a au vak vak chungin Lungmuana lu ah chuan theihpatawpin vawi hnih, vawi thum, vawi li, vawi nga a chhû ta siah siah mai a!

Lungmuana lu chu a hék sawm vek a, a hmel hmuhtlâk a awm tawh lo, a thluak chu a per chhawk chhawk a, a lu chu a sawm nawi vek hial tawh a. Mahse Sawmtea chuan a duh tâwk chuang lo, râpthlâk lutukin vawi sawm chuang tehmeuh a chhut nawn leh hnuah chuan, a hah  lutuk chu a thaw hluam hluam a, Lungmuana lu chu sa-sâwm nawi ang mai a ni tawh a, thisen in leichhuat a ti kawi zuih tawh bawk.

Sawmtea hmai leh kawrah te chuan thisen a kâi hnuang a. Chu a chetdan rapthlak lutuk avang chuan tlangval huaisen Renga meuh pawh mak tiin a kâ a hau mai a, Muanpuia phei Sawmtea chu a en tha ngam tawh lo hial, a hlau lek lek hial a ni. Sawmtea chuan a hreipui chu dah  thlain, a bân thisen kai hnuang chuan a hmai a han tuai puat a. Thâwk ala kâwk a, thim tham lama Luna tlân liamna lam thlir vung vung chung chuan aw thâm chhal hian a phun sup a, "Kha pa, tlanchhe ta pawh kha... a him rei chuang lo ang." a ti khur dar dar a.

************************************************************

Zan dar 11 leh a chanve vel a ni tawh a. Thlam chhung boruak chu a tawt in a ipik hle mai. Khawnvar eng fiah lo tak hnuaiah chuan Pu Tea, Pi Kungi leh Hlimpuii te chu beidawng hmel takin an ṭhu ngawi tlawk tlawk a. Pawn lamah chuan thliin thinghnah a chhem ri sur sur a, chu thawm ringawt pawh chuan an ti phu leh zuk zuk hlawm thin. 

Siama chuan chemte a hum ran a, kawngkhar lam chu mit khap lek lovin a melh ngawt ngawt a. Chutih lai tak chuan, thlam kawtah chuan pen thawm an hre ta thut mai. Thlam chhunga awm ho chu an phu chiang kher mai, an ding nghal suau a. Hlimpuii chuan a hmui a hup a, Pi Kungi chu hlauvin a khur nghal hlawk hlawk bawk a. 

Smuggler ho an rawn let leh ta emaw tiin Siama chuan kawngkhar bulah chuan inring takin awmhmun a lo siamrem vat a. Thawm chu a rawn hnai zel a, tu emaw hian kawngkhar chu a rawn kik ta kauh kauh mai le. "Keimahni... rawn hawng ru." rawn ti tu aw chu Awmpuia aw a ni tih an hre nghal a. 

Hmanhmawh takin Siama chuan kawngka kalhna chu a hawng rawk rawk a. Kawngkhar a inhawng chiah chu, Muanpuia leh Awmpuia te chuan Valtea, a ban dinglam thisen in a bual sen nuai mai chu rawn kuah lutin, leichhuatah chuan an rawn ṭhutpui nghal hnawk a. An hnungah chuan Renga a rawn lut ve nghal a, a hmel a dângin a thawk a la rang hle a. 

Chutah, kawngka biangah chuan pên ri rit tak a rawn awm a, thim kâr aṭang chuan Sawmtea chu a rawn pên lut ve ta. Fela a rawn pawm lut a, Fela chu a mutui kher mai. Mahse, Sawmtea landan erawh a rapthlak ru deuh tlat; a hmai leh a kawr awmah te chuan thisen ro lam tawh hi a kai hnuang a, a mitmeng chu ramhuai hmu ang maiin a ruak in a â huih mai bawk a.

Fela an hmuh rual rual chuan Pi Kungi chu a ṭap chhuak nghal hawm hawm a. "Ka fapa! Bawihte!" tih leh tlan phei a rual a. Sawmtea chuan zawi muangin Fela chu leichhuatah a nghat a, Pu Tea pawh chuan mittui tla chungin a fapa chu a pawm vawng vawng a. Naupang kum 16 mi lek, hah em em mai leh hlauhna in a tih chauh em avanga nikhaw hre lova muhil a ni a, a dam ṭha a ni tih an hriat chuan an nupa chuan lawm avangin an inkuah a, an ṭap dun hawm hawm a.

Hlimpuii pawh lawm lutukin a u lam pan chuan a tlan phei ve nghal a. Mahse Sawmtea bul a thlen dawn hnaih chuan a u hmel thim ruih leh thisen kai hnuang mai a hmuh chuan a ding chawt a. Sawmtea mitmeng chu a vawt raih a, a nau chu hmelhriat loh ang maiin a lo melh mawl tawp a. 

Tap pur chungin Hlimpuii chuan a u kawr awm thisen kai nuai maiah chuan va bawhin a kuah thlawp a. Sawmtea chuan a bân rít tak chu theih leh theih lovin a han lek chhuak a, a nau hnungzangah chuan a chul sak ve ta hram a. Chutih laiin kil khatah Muani leh Siama te chuan Valtea hliam chu an lo buaipui mek a. "Silai kahna a nih hi!" Siama chuan phawk takin a ti chhuak hluai a. 

Valtea ban puam lai chu silaimu in a tai thler huam a, a vanneih asiamin ruh a deng lo hlauh zawk a lo ni. Thlam chhungah chuan tui lum awmsa a lo awm hlauh a, Muani chuan puan fai la in thisen chu a hruk fai sak mawlh mawlh a, nâ a tih em avang chuan Valtea chu a lo ner sawk sawk a.

Pu Tea chu lawmthu sawi mawlh mawlh chungin tlangval ho bulah chuan a rawn kal hnai a. "In va han huaisen tehlul em... mahse, eng thil nge thleng a? Khang misual ho kha khaw nge an awm tâk?" tiin a zawt a. Renga chuan a hmai tuai puat chungin, "An zinga pakhat khan hri a lo kai a, a rawn che thut a, an buai nuai nuai laiin kan va hual a ni. Pathum an thi a, an hotupa ber kha thimtham hnuaiah a tlanchhe ta a nih kha." tiin thil thlen dan chu tawi fel takin a hrilh a.

Mahse Renga thusawi lai chuan Muanpuia nen chuan an inmelh leh ralh ṭhin a. Renga chuan a sawi lang lo na a, an pathuma thi zinga pakhat kha chu hri kai thah ni lovin, Sawmtea'n diriam tak leh rawng lutuka a lu a chhut sawm sak kha a ni tih an hre chiang lutuk tlat. Thlam kil khata mize danglam ta thut ang maia ṭhu ngawi ngul mai Sawmtea chu an han melh leh ṭhin a. 

A u in a phuba a laksak dan rawng lutuk chu Hlimpuii hian hre ta se engtin nge a awm ang tih Muanpuia chuan a ngaihtuah rauh rauh a. He ramhnuai thim tak hian an mizia a thlak ṭan mek a ni tih chu a hriat hle. Zan a rei telh telh a, Fela chu a nu leh paten hmangaih takin an mutpui a, Valtea hliam pawh an tuam fel ta. 

Mahse, tlangval ho erawh an mu thei mawlh lo. Luna a tlanchhia a, smuggler ho ralthuam erawh Sawmtea ten an rawn hawn ṭeuh thung. Silai ṭha AK-47 te, rifle, pistol, revolver te leh silaimu thahnem tak an lakluh tâk avang chuan naktuk khawvar hunah chuan ralthuam leh thawmhnaw lum la turin hremhmun tluk a hlauhawm, Lungthlir khua ngei chu an luhchilh a ngai dawn a ni. Chu thil huphurhawm leh rapthlak tak lo thleng tur chu ngaihtuahin, kawngka nghet taka kalh chungin ralveng turin Sawmtea leh Renga chu meilum bulah chuan an ṭhu tlaivar ta a ni.

****************************************************************

Khua a rawn vâr a, tlang chhip aṭanga favang dâifîm vawt tak rawn tla chuan ramhnuai chu a rawn tuam chûk a. Thlam hlui leh chul tawh tak chhûngah chuan chawhnu lamah thihna ruam, Lungthlir khaw pan tura inpuahchah thâwm a ri nak nak a. Chhuatlaiah chuan nizan lama smuggler ho laka an ralthuam lâk chhuah—AK-47 pahnih, revolver pakhat, pistol pakhate leh silaimu ip te chu Sawmtea chuan a lo chhawp darh ruih a. 

An hmelah chuan phûr hmel reng a lang lo, dam khawchhuah nan tih loh theih loh a nih vang chauhva he thutlukna râpthlâk tak hi siam an ni tih a chiang hle. Kil khatah chuan Muani'n tui lum tlem te hmangin Valtea bân dinglam, silaimu in a tai thlêrna lai chu puan fâi in a lo tuam sak mawlh mawlh a. 

Valtea chu nâ tiin a rawn ner leh sawk ṭhin a. "A ruh a khawih lo hlauh a, a vanneihthlak khawp mai." Muani chuan a ti zawi sap a. Valtea chuan thâwk lak hawk pahin a chu a han ti che chhin a, "A zia e. Ka bân veilamin silai chu ka hmet puak thei tho ang." tiin a lo chhâng a.  Chutih lai chuan Pu Tea chu rawn pên chhuakin, mangang hmel tak hian Sawmtea ralthuam lo endik mek bulah chuan a rawn ding a. 

"Sawmte..." Pu Tea chuan a aw a thiân kharh a, a hmelah chuan hlauhthawnna ai mahin thutlukna khauh tak a siam tawh tih a hriat zâwk hle. "Nizan aṭang khân ka ngaihtuahna ka kâwm char char a. Helai thlamah hian Pi Kungi te, Muani leh heng naupang ho hi kan kalsan thei lo ang. Nizanah smuggler hotupa kha a tlânchhia a, nungdamin a la awm tlat. Helai hmun hi a hrechiang tawh a, ralthuam leh a naute dang nêna a rawn lêt leh hlauh a nih chuan, keini mipa ho kan awm loh hlânin hmeichhia leh naupang lo awm hi theihpatawpin a rawn sawisa in a rawn that fâi vek mai ang."

A han chawl dat a, chhuatlaia silai let bal leh a fapa Fela, Pi Kungi'n a lo kuah chial lai chu a va melh vang vang a. Thâwk lak hawk pahin a sawi zawm leh a, "Bâkah, thlasik a rawn inṭan dâwn a, thawmhnaw lum leh eitûr mumal kan nei bawk si lo, hetah lo kalsan ta pawh ni ila vawt leh riltâmin an thi tho tho dâwn. Chuvângin kan vaiin Lungthlir khuaah chuan kan kal vek tûr a ni. Ramhuai hri kai ho chu hlauhawm viau mah se, in ralthuam chhuhsak hmang hian kan invêng tlang ang a. Khaw chhûngah chuan a rûka luh dân kan zawng ang. Concrete in lian leh him deuh, Biak In emaw YMA Hall emaw ah pawh ni se, kan theih ang angin kan inkhung hrang phawt ang a. Chumi hnuah nangnin silai, thawmhnaw lum leh eitûr chu in zawng chhuak zêl dâwn nia. Tumah kan in-kalsan tûr a ni lo, kan dam a nih pawhin kan dam tlâng ang a, kan thih pawhin kan thi tlâng vek ang." a ti nghet charh charh a.

Chu thutlukna rit leh khauh tak an hriat rual chuan thlam chhûng chu a reh ṭhuap a. Tuman an hnial lova, a chhan chu an dinhmun tlahniam zêl chu an hai bik lo a ni. "A sawi dik alawm," rawn titu chu Siama a ni. A bân dinglam bul deuh hmawk, hri kai sehna avanga an tan sak tâk tuamna puan pawr deuh hnuang chu pawisa lo tak hian a rawn pên hnai a. 

"Helai hmuna tawm tlawk tlawk a, rilṭâm a thih emaw, misual rawn lêt leh nghah ai chuan thih leh thih tiin beihpui thlâk a ngai. Bân dinglam nei tawh lo mah ila, ka vei lam hian chem chu ka la vai thei em em ang." a rawn ti chang ve fak a. Pi Kungi leh Muani te pawh chuan hnial rual a ni lo tih an hria. Pi Kungi chuan nizan lama thihna ruam aṭanga an lak chhuah hlim, a fapa Fela chu a kuah nghet sauh a. 

Muani pawh chuan a fapa Kimkima chu pawmin a hmai a chûl sak a, "Bawihte... kan kal chhung zawng hlau miah suh aw. Chuan ṭah miah loh tur, thawm kan siam chuan misual ho an lo kal dâwn a nia." tiin a beng bulah a hrilh ru mawlh mawlh a. Nu pahnihte mitmengah chuan hlauhna awm mah se, an fate himna tura hremhmun meuh pawh paltlang an inhuam zia a lang chhuak chiang hle.

Chutia an inrâwn khâwm lai chuan Hlimpuii chu a rawn kal hnai ve a, a la dâng bamin a mitmengah chuan hlauhna a la cham reng a. Sawmtea hmaah chuan a rawn ding a, aw khûr deuh dar dar hian, "U... ka hlau a ni. Khaw chhungah chuan khâng mi thi tho leh ho... rapthlak tak tak ho kha an lo la awm ṭhup dâwn si. Kan dam chhuak zo dâwn em ni?" tiin beidawng aw lek lek hian a zawt a. 

Sawmtea hmel rorum tak chu a nau a hmuh chuan a nêm ve ta deuh a. Hlimpuii dar ah vuanin, a mitah tak a melh a. "Hlimpui... min en rawh. Nizanah pawh ka hrilh che kha. Ka thâwk a chham hma loh chuan tuman an khawih nawn tawh lo ang che. Lungthlir chu kan khua a ni a, tu ramhuai hri kai mahin min dang dâwn lo. I kiangah ka awm reng dâwn alawm." tiin a thlamuan a. 

A ipte aṭangin nizan lama a chempui ken chu phawrhin a nau chu a pe a, "Hei hi invên nan i hûm reng dâwn nia." a ti sup a. Renga chuan silaimu dah ṭhat hlawm pakhata a ah ṭhat mawlh mawlh pah hian, "Ngawi teh u..Ruahmanna fel tak kan neih a ngai. Khaw chhung pan tûr hian ramhnuai kawng bumboh kan dâp chhoh a ngai dâwn a. Sawmtea, Valtea leh keiin ralthuam nên hma kan hruai ang a. Hmeichhia leh naupang ho a laiah in awm ang. Kan hnung lam chu Pu Tea leh Muanpuia te, Awmpuia ten an lo dâwl dâwn nia. Thâwm dîm thei ang berin kan pên ang a, lui dung zawh lovin ramngaw chhah lai ber kan hrût chho ang." tiin tlangval fing thiam leh ngaihtuahna hmang thei tih takah rem a rawn ruat zung zung a.

Tichuan, an inpeih chu a ni ta. Sawmtea chuan AK-47 chu a han load ri khap a, silaimu a luh leh luh loh a endik a. Midang ralthuam keng tûr ho pawh chu theihpatawpin an intintuah ṭha sauh sauh a. Sawmtea chuan a mitmeng thîp leh rorum tak chuan a ṭhiante leh anmahni rinchhantu chhungkuate chu a han melh kual a. 

"Tumah thâwm nei lo ula, tumah inkalsan loh tur. Kan invêng tawn ṭheuh dâwn nia." a ti hmuk a. Beiseina ai maha manganna in a tuam nungdam tlêmte te chuan an tawmhimna thlam chu kalsan in, nungdam zel tura ralthuam leh eitûr zawn hmuh ngei inbeisei takin, thihna ruam—Lungthlir khaw lam pan chuan thim hnuai, chhum zîng chûk kârah chuan an inzui chho ta hnak hnak a.

*****************************************************************

Nî a sâ in thlifîm chuan chhûnga thei kûngte chu a chhem rî heuh heuh a, Phulvar khaw dâifêm, khawchhung atanga hla ve tak a "Huan Pui" an tihah chuan boruak a reh vawng vawng a. Kar hnih lai liam ta a Phulvar YMA Hall aṭanga zan thim hnuaia a bihruk kual hrep hnuah, mikhual tlangval pakhat, Mapuia chuan he hmun hi a rawn thleng ve thei hram a ni. 

Serthlum hnah buk tak phenah chuan biru in a thlan fîmin a bual huh vek tawh a. A kutah chuan a ralthuam neih chhun—tuthlawh kâwm hlui tawh tak hi nghet lutukin a hum bawk a. A bihrukna aṭanga hla vak lovah chuan, patling pakhat, hri kai a chang tawh hi riltam hmel takin a lo vâk kual ruai a. 

A thawmhnaw chu thisen in a bual ro duk khak tawh a, a hmai leh a dâr vélah te chuan sehna  hnuhma a awm bawk a. Chu hri kai chuan a kâ aṭanga chil phuan var rawn tla bawrh bawrh chungin mihring nungdam seh tur a zawng ngei a ni tih a hawiher aṭang chuan a hriat hle a. Mahse Mapuia mit lâtû ber chu chu hri kai hmel râpthlâk tak chu a ni hauh lo; chu patling ipte puan ah lai puar lûk ah chuan serthlum hmin, lian leh tui hmel tak tak hi a khat ṭûn mai a ni!

Mapuia riltâm tawh lutuk chu a pum a rî ruih ruih a, a dang a ro huam huam tawh bawk si. Nî hnih ngawt chaw mumal a ei tawh lo a ni a, hetianga serthlum lian leh tui hmel em em mai a hmuh meuh chuan a riltâmna chuan a hlauhna chu a ti bo lek lek tawh. A chil a han lem khawlh a, chu hri kai lak aṭanga eitûr va chhuhsak theih dân kawng chu a ngaihtuah neuh neuh va.

A hmanraw neih chhun lah tuthlawh mai a ni si. Silai emaw chem pui sêi ṭha tak emaw nise chuan a thei mai ang a, mahse hetiang hmanraw tawi lutuk nena va beih chilh chu thihna cho chhuah a ni ringawt dawn bawk si. Mahse a ril a tâm tawh em a, a thâwk a chham hma ngeia eitûr eng emaw tal a ei loh chuan riltamin a thi vat dawn tho tho. 

Thutlukna a siam ta, a kut a tuthlawh chu theihpatawpa nghetin a hum nghet sauh a. Hri kai chu thing kûng pakhat bulah dingin, a sîr lam hawiin a rûm chhur chhur a. Mapuia chuan chu hun remchâng chu chuhin, thingkung phên aṭang chuan thâwm dîm thei ang berin a va chhuak phei ta zâl zâl a. 

A hnaih telh telh a, hri kai hnunglam chu pên nga vel lek in a hlat tawh a. Hri kai rimchhia leh uih huâm mai chu a rim a hre phâk ta hial a. Mapuia chuan thâwk a han lâ kawk a, a tuthlawh chu sâng taka lék kâng in a inring tawh hle. Mahse... thil a kal sual ta tlat mai! Mapuia a va pên hnaih leh hrut rual chuan, a ke in thing ṭang ro a rap tliak ri ta rak mai! 

Chu thawm ri rek a hriat rual chiah chuan, hri kai pa chu rawn hawi let thut in, Mapuia chu dâk âwrh khawp hian a rawn su ta siah mai le! Chêt lak hman a ni tawh lo, hri kai rilṭâm chuan a hmaa sa thar awm chu a rawn bawh thal nghal thlawp a. Mapuia chu leiah tukhum vaw chawrhin a tlu dâwp a, tuthlawh chu a thlauh nghal bawk. 

Hri kai pa chuan a bawhbet nghal rân a. Mapuia hrawk bul chêta rawn âng huau in a rawn hap nghal buan buan a. Mapuia mangang leh hlau lutuk chu theihpatawpin a ṭê chhuak rawng rawng a, a kut pahnihin hri kai pa nghâwngah chuan theihpatawpa nâ in a lo namsawn ve ṭang ṭang bawk a. 

A kâ in Mapuia biang a rawn si thawi fua fua tawh a, Mapuia chuan, "Min pui ru!! Min pui ru!!" tiin a theihpatawpin a au tuar tuar a. A thâwk a chham dawn hnai a, a bân tha te chu a zawi ṭan a. Chutih lai tak chuan hri kai rûm chhur chhur ri chu a tâwp hmak a, a zâwi nghal hnawk bawk. Hri-kai pa chhipah tak chuan chemte hriam tak mai hi a lo bur ta vû mai le!

Hri kai ruang chu Mapuia âwmah chuan a rawn bawk thlawp a, che zui tur a awm tawh lo. Mapuia chuan a thinphu rang lutuk a vânga thâwk pawh la hleithei lovin, rang lutuk leh ten hmel lutukin chu ruang chu sir lamah a namsawn nghal dâwrh a. Khûr dar dar chungin a rawn inbeng kâng ṭuih ṭuih a, amah rawn chhan chhuaktu chu tunge ni tih hriat tumin a dâk chhuak a. 

A hma zâwnah chuan Zauva a lo ding reng chu niin! Zauva chuan thaw halh halh chungin a chemte chu hri kai pa ruang lu aṭang chuan a phawi chhuak ri hrawk a. Zauva hnung lawkah chuan, YMA Hall aṭanga a rawn tlânchhuah pui, a ṭhiante pahnih, Bawihi leh Puii te pawh thlaphâng hmel leh hah hmel takin an lo ding ve reng bawk a. Mapuia chu mak tiin a hawi kual ruai a, Pathian in vântirhkoh a rawn tir ta emaw a ti hial a ni.

*************************************************************

Nî chu vana chhum chhah tak kârah a lang chhum hmawk hmawk a, ramhnuai chu fiah lo ruaiin a êng a. Hnim pik leh thingkung lian pui pui kârah chuan Sawmtea leh midang te chu an kal hnak hnak zel a. Hma an sâwn chak thei lo, a chhan chu hmeichhia leh naupang an tel ve  avângin an kal muang angreng hle.

Sawmtea chuan AK-47 hum in hma a hruai a, a hnung chiahah Valtea, a bân dinglam tuam lûk chungin pistol hûm ranin a zui bawk a. Renga chu a lai li ah awmin, a thal nêna inring rân in a hawi kual zak zak reng bawk a. Hmeichhe ho leh naupangte chu inkuah chial leh khûr dar darin an pên hnak hnak a. 

Hnung dâwltu Pu Tea leh Muanpuia leh Awmpuia te pawh chu an hmanrua te hûm in theihpatawpin an fîmkhur hle. Kawng a chho ṭan a, taksa a lo zawi ve ṭan tawh bawk nen, theihai kûng lian pui hnuaiah chuan tui in tûr leh thaw la tûrin an han chawl zawk a. Valtea chuan a chala thlan fîm lo chhuak chu hruin, leiah a ṭhu hnawk a. 

A bân hliam nâ chu tûar har a ti hle tih a hmelah a lang reng. Sawmtea chu a bulah rawn kal hnaiin a rawn ṭhu thla ve a, a silai chu a ke bulah a dah thla a. "I bân chu eng nge a an?" tiin Sawmtea chuan a aw thâm chhal hian a zawt zâwi sup a. Valtea chu a ner nâwng a, "A sa hut hut a ni mai. Hri kai seh ai chuan a la zia zawk tho tho." tiin a han nui vel suk a.

Sawmtea chu a nui ve lo, a mit fiah kalh mai chuan a hma zawn hla tak chu a thlîr vung vung a. "Khua kan luh veleh sub centre-ah emaw...damdawi leh tuamna tur kan zawn hmasak ber a ngai a nih chu." a ti nghet charh a. Chutih lai chuan Renga chu pên thâwm dîm takin an bulah a rawn kal hnai a, rawn ṭhut ve pah chuan, "Thil pakhat min mawlh tlat tu a awm." a rawn ti chhuak a.

Sawmtea leh Valtea chuan an han melh rual ṭhawt a. "Eng chu nge ni ta?" tiin Valtea chuan a lo zawt vat a. Renga chuan a thal hrui tuai neuh neuh pahin, "Khang Burma smuggler ho kha... engvângin nge helai ramhnuaiah, a bîk takin Lungthlir khuaah kher hian ralthuam rawn thuhruk an tum? Mizoram hmun dang, khaw pui lam emaw, kawngpui ṭha awmna lai a tam tehlul nen." tiin a ngaihtuahna chu a sawi chhuak a.

Sawmtea chu a bu nghut a, chu zawhna chu a rilruah a lo awm ve reng tawh a nih hmel. "A chhan chu helai ruam hi tu ma chim phâk loh, police emaw sipai pawhin an rawn luh ngai lohna a ni miau alawm. MNF hun lai khan sipai ho rawn luh theih lohna atâna hmun him an zawn dân i hriat vek kha. Khâng smuggler ho pawh khân ralthuam tawlh ruk nân a hmun bumboh lai ber an thlang a ni ngei ang." tiin a ngaihdan a lo sawi ve a.

Valtea chuan a bân na chu dâwm chungin, "A nih leh thil pawi ta ber chu... kan khua Lungthlira hri lêng hi khawi aṭanga rawn inṭan nge ni ta ang? Khâng smuggler ho khân natna thar hi an rawn phur lût zâwk emaw ni dawn le?" a lo ti ve nuah nuah a. Renga chuan a lu a thing a, "Ka ring chiah lo. Khâng misual ho khân hri kai an hmuh khan thlahrâng hmu ang maiin an mak tih hmelin an hlau em em a nih kha. An rawn thehdarh chu a ni thei lo ang." a lo ti ve thung a.

Sawmtea chuan a hmai tuai puatin a AK-47 chu a hûm nghet sauh a. "Natna hi tu rawn lak luh pawh nise, tûnah chuan buaina tur a awm tawh lo. Kan buaina ber tur chu khaw chhung kan luh huna heng hri kai tam lutuk tehi engtin nge kan hel dâwn tih a ni. Hawh teh u, kan kal leh a ngai. Khua a thim hmaa kan luh hman loh chuan kan tân a hlauhawm leh dâwn a nia." tiin a tho chhuak nghal a.

Valtea leh Renga te pawh chu an tho chhuak ve nghal a. Mipa ho an rawn din takah chuan hmeichhe ho leh naupang pahnihte pawh chu peih lo leh chauh hmel takin an rawn inbeng kâng ve ṭuih ṭuih a. Pu Tea chu rawn pên hnaiin, "Lui ral sâw kan kai chuan ramngaw aṭangin khaw dâifêm kan thleng mai dâwn e." a rawn ti ve bawk a. Tichuan, inbe zui tawh lovin theihpatawpa thâwm dîmin an inzui liam leh ta a.

*********************************************

Khua a thim thet thet tawh a, thimin ramhnuai a rawn tuam ṭan mek a. Phulvar khaw hnuaiah, khaw ên laia an hmuh phâk mang lohna 'Arbei mawng' an tih, serthlum leh theihai huan zau tak chhûnga thlam hlui te pakhatah chuan damchhuak pali te chu an ṭhu khâwm chial a. Mapuia chuan hri kai patling ipte aṭanga an lâk, serthlum tui tak mai chu a kawr pawh kheh hman ṭhak lovin thlâm kîlah chuan a keih bawrh bawrh a, a riltâm tawh lutuk chu ṭawng nachâng pawh a hre rih lo. 

Zauva erawh thlam kawngkhar awng  aṭang chuan pâwn lam chu en rengin ralvêngin a lo dâk chhuak reng a, Bawihi leh Puii chu chauh hmel takin chhuatlaiah an ṭhu sawp niai bawk a. Mapuia'n serthlum pum hnih a ei zawh meuh chuan a thâwk lâk a rawn pângngai chho ṭan a. A hrawk ro lutuk a hnâwm tâkah chuan a rawn khuh kharh a, chutah a hma lawka nula pahnih leh tlangval pakhat, hmel fiamthu lo tak mai te chu mak ti takin a han melh kual a. 

"In chungah ka va han lawm tak em... min chhan hman lo ula chuan kha ramhuai putar pui khan min thial zo vek tawh ngei ang." tiin lawmthu a sawi mawlh mawlh a. Thâwk han la leh hawkin, "Mahse... tute nge in nih a? Engtin nge khâng ramhuai ho lakah khân in lo damchhuah theih zawk? Khawi aṭanga rawn kal nge in nih reng reng a?" tiin a zawt ta phawng mai a.

Zauva chu rawn hawi lêtin, a chemte a thisen kâi a hruk fai mawlh mawlh lai chu a chawlhsan a. Mapuia chu uluk taka melh chungin, "Lungthlir khaw mi leh sa kan ni e. A tirah chuan natna hrik rapthlak tak hlauvin Phulvar khuaah hian kan rawn tlânchhia a, him tura inngaiin YMA Hall-ah min lo khunghrang a. Mahse... kan zînga pakhatin hri a lo kai reng chu niin, zân thim thâm hnuaiah hall chhûng chu thihna hmunah a rawn chang ta thut a ni." tiin an chanchin chu a sawi ṭan a. 

Bawihi chuan a khûp dâwm chungin chu zân rapthlak tak chu ngaihtuah let ang hrim in a mit a lo chhing sawk a. "Zun-in ah kan lût hman hlauh a, hmanhmawh lutukin kawngka kan inkalh hnan a..." Zauva chuan thâwk lak hawk pahin a han sawi zawm zel a. "Pâwn lama thâwm râpthlâk zia kha i mitthla thiam kher lo ang. Mihring mangang au thâwm leh ramsa kawlh ang maia inpet thlêr hawk hawk ri kha darkar khat dâwn kan ngaithla a. A hnuah chuan thâwm a reh ṭhuap a, mahse kawngka zâwnah khân hri kai rual ho rûm chhur chhur thâwm a la awm reng a. Chhuahna chi a ni tawh lo tih kan hria."

Mapuia chuan chil lem dâwk chungin, "A nih chuan engtin nge in rawn chhuah theih tâk a?" tiin a lo zawt vat a. Zauva chuan serthlum chu a han ei ve te te phawt a, "Zun in tûkverh (ventilator) tê tak tê, darthlalang awng aṭang khân a ni. Khua a rawn vâr dâwn hnaih khân pâwn lama thâwm a zia deuh avângin risk kan la ta a ni. Thâwm dîm thei ang berin tukverh darthlalang chu ka hawng a. Hmeichhe pahnih hi theih leh theih lovin ka hlâng chhuak hmasa a, a tâwpah chêp lutukin ka inhnawh chhuak ve hram a ni. Ka chhuak tûr phei kha chu ka tal rîk deuh avângin kawngka kha an rawn nek leh vak vak a, an rawn nek hawng ta hial a, ka vanneih a siamin min seh hman lo chiah chiah a, ka chhuak ve thei ta a ni." tiin fiah tak chuan a sawi chhunzawm leh a.

Bawihi chu a rawn ṭawng chhuak ve a, a aw chu a thâm in a zâwi hle. "Pâwn kan chhuak chu... Phulvar khua kan hriat thin ang kha a ni tawh lo. Kawtthlêr tinah mithi ruang a let phung a, ṭhenkhat chu an taksa a tet darh nuai a, an ril te a chhuak per pur hlawm mai. Khawvâr tirh a nih avâng khan tiau chhum a zîng mup a, chu chhum kârah chuan chung mithi tho leh ho chu an lo vâk kual ruai hlawm a. Phulvar khaw mite pawh nizan lama rawn buan chilh tu te lakah khân an lo tlawm zo vek tawh a lo ni. Thihna chuan khaw pum a tuam a ni ber mai." a lo ti vawng vawng a.

"Tichuan, in chhûngah pawh bîru ngam lovin, khaw dâi ramhnuai lam panin theihpatawpa thâwm dîmin kan tawlh thla ta hnak hnak a.." tiin Zauva chuan a lo tuihnih leh a. "Hêng hri kai ho hi a hma a hri kai ho ang khan an tlân chak thei teh chiam lova, an che erawh a ni phut thung a, thâwm an hre thei em em thung bawk. Thâwm ri hlek a awm chuan ui kawlh ang maiin an rawn dâwk phei nghal zawk ṭhin. Chuvângin chhun êngah pawh mau pui leh hnim buk phênah khûr ru dar dar chungin hun kan hmang a, an kiam deuh hnu, zân thim tak tak hnuaiah chauh helai huan, arbei mawng lam pan hian kan rawn insawn thla thei a ni." a lo ti ve leh a.

Puii chuan chauh hmel tak hian, "Kar hnih chhung tehmeuh hnim zung leh thei hmin hmuh theih ang ang kherin hringnun kan chhiar a nih hi." a lo ti ve bawk a. Mapuia chuan chu chanchin a hriat chuan heng tleirawl pathumte nungdama awm tuma an tawrchhelhna sâng lutuk leh an beiseina a chhah zia chu mak a ti hle a. 

A tuthlawh hlui tak chu hrûk fâi pahin, "Keipawh nî hnih liam ta khân Phulvara ka chhungte tlawh turin ka rawn kal a, khawchhung hnaih lamah kha chuan tumah an awm lo, a reh vek a. Ka kal thui zel a, heng ramhuai ho hi ka tawk ta hlawm a, ka rawn tlânchhia a, mi in hnuaiah te tawmin vawiin chu eitûr hmuh beiseiin helai hmun hi ka rawn hrût ve ngawt a ni." tiin a chanchin chu a han sawi ve a.

Zauva chu a ding chhuak a, thlam tukverh aṭang chuan ramhnuai thim ta mup mai chu a thlîr vung vung a. "Khua a thim ta. Zanin chu he thlamah hian thâwm nei miah lovin kan riak dawn nia. Naktukah chuan eitûr kan neih a ngai, he hmun pawh hi a him rei dâwn lo. Mipa pahnih hian eitur leh ralthuam dang zawn dân kan ngaihtuah dâwn nia." tiin thutlukna a siam zui ta a. 

*******************************************************

Zan dar 9 a ri tawh a. Ramhnuai thim chhah mup leh vawt ruih mai kârah chuan Sawmtea te rual chu hah takin an la inzui phei hnak hnak a. Tlang pang dâi deuh laiah chuan Pu Tea chu a ding chawt a, a thlan fîm chu a hru thuak a, "Sawmte... han chawl lawk ang u. Naupang ho hi an chau tawh emai, thâwk kan lâk deuh loh chuan an chau hlum dâwn takngial." tiin thâwk ala kâwk kâwk a.

Sawmtea chuan a AK-47 hum lai chu a hmer nghet sauh a, a nau Hlimpuii chau hmel leh hmeichhe dangte hah tawh hmel a hmuh chuan a bu nghat a. "A dik alawm, helai mual hi kan liam chuan Lungthlir khaw dâifêm kan thleng hnai dâwn tawh. Sâwng thingkûng hnuai hnim deuh laiah sâwn han ṭhu ila, thâwm dîm hle ang che u." tiin thutlukna a siam a. 

Tlangval rual leh midangte chu thâwm dîm takin an ṭhu thla sap sap hlawm a. Kimkima chu a nu Muani bânah a vuan ṭai a, Valtea chu a bân nâ dâwm chungin thlamuan hmel loh takin a hawi kual zak zak reng bawk a. An ṭhut hle hle lai chuan thâwm dîm takin an inbia a. "Kan thleng ṭêp tawh e." Renga chuan thâwk lak hawk pahin a han ti a. 

"Heta ṭang hian a hla tawh lo, mahse a pawi ber chu khaw chhûng kan luh rual ruala thil thleng tûr hi a ni. Kan chauh lutuk chuan kan chê a muang vek dâwn a nia." Valtea pawh chuan lo tuihnih in, "Tûnah phei chuan keimahni takngial pawh hi kan inpuak chhuah a ngai hial tawh a nih hi." a han ti ro leh halh a. 

Sawmtea erawh a ṭawng ve lo, a mit fîm tak chuan thim thâm kâr chu a thlîr kual reng a. Chutia an lo chawlh hahdam lai tak chuan, an piah lawk hnim buk chhah mup aṭang chuan thâwm ri deuh sat sat hi an hre ta tlat mai. Sazu emaw ramsa kal ri pângngai a ni lo. Thâwm a rîk rual chiah chuan Sawmtea chu phu zawkin a ding nghal a, a AK-47 chu thâwm rawn chhuahna lamah chuan a tin nghal rân a. 

Midang ho pawh chu an îp nghal chawih hlawm a, ralthuam keng ho chuan an hmanrua an hûm nghet nghal at hlawm a. Hnim buk chu a rawn che laih laih a, mihring rûm chhur chhur thâwm in a rawn zui nghal a. Chutah, thla êng hnuaiah chuan hri kai ruangam pakhat hi a rawn dâwk chhuak ta hlawl mai! 

A hmel vâr dâng pûp leh a mitmu vâr vek aṭang chuan hri kai a ni tih a chiang hle. Mahse, Sawmtea'n a silai hmawra tin mek chu hri kai satliah a ni hauh lo. Sawmtea chuan a thil hmuh chu a awih lo hial zâwk a, a taksa chu a khûr ta hlawk hlawk mai. Chu hri kai, a thawmhnaw têt hnuang leh thisen ro kâi nuai mai chu amah hringtu a nu, Pi Zari ngei a lo ni!

"Ka... ka nu?" Hlimpuii aw chu mak tihna leh rilru natna in a khat a, hriat hrehawm khawpin a rawn chhuak thâm ṭiak a. A nu ngei mai ramsa kawlh ang maia a rawn inlar leh a hmuh chuan a insûm zo tawh lo. "Ka nu!" ti a ṭap chhuak hlawp hlawp chungin a nu lo phei mêk va pan tum chuan a tlân ta thut a. 

Mahse Renga chu a rawn che vut a, Hlimpuii bânah chuan lo man bet chawtin theihpatawpin a lo pawt lêt a. Hlimpuii chu tal nawk nawk chungin a ṭap a, mahse Renga chuan a thlah duh bik hauh lo. Pi Zari chu hri kai pângngai dangte angin a kal chak thei tlat lo. A ke dinglam ruh chu a tliak tih hriat tak hian a kâwi zawi hnak a, vawikhat a pên apiangin a ke chu leiah a hnuk hruih hruih mai a. 

Chu thâwm, thinghnah ro nâwt ri hrawk hrawk chuan zan reh tak hnuaiah chuan Sawmtea thinlung a vit nâ ngut ngut a. An khaw chhung aṭanga tlan chhe tura a tirh liam lai leh, natna tuar chunga ramsa ang maia a rawn inthlak thut aṭang khân, tih theih a nei tawh lo tih a inhre chiang hle a ni.

Pi Zari chuan a fate leh midang ho awmna chu hmu in a rawn pan phei chhet chhet a. Sawmtea chuan a silai chuan a nu chu a la tin reng a, a kutzungpui chu trigger-ah a dah ngei a, mahse a theihna zawng zawng sâwmkhâwm pawhin a hmet puak thei lo. Burma smugler rawng tak tak, Lungmuana pawh pawisak nei lova a lu chhu sawm vek thei tlangval huaisen kha a hringtu nu ngei hmaah chuan a tlawm vawng vawng a. 

A kut chu a khûr dar dar a, a biangah mittui a luang thla zawih zawih bawk a. Chu boruak lungchhiatthlak leh manganthlak tak kârah chuan tu a te mah chuan Sawmtea chu, "Kâp rawh!" tiin an tur bîk lo. An vai mai chuan an khawngaih in, a fapa ngeiin a nu a kâp hlum tûr chu thlîr hrehawm an ti tlang takzet a ni. 

Kimkima phei chu hlau lutukin a nu Muani hnungah a bîru chawih chawih a, Muani pawh chuan a fapa mita hup sak chungin mittui tla purin chu thil thleng mek chu a thlîr reng a. Tuman chêt lâk nachâng an hre lo, thihna leh manganna chuan a uap hneh lutuk tlat. Pi Zari chu a rawn hnai telh telh a, a hmel râpthlâk tak phena a nu hmel kha hmuh tumin Sawmtea chuan a thlîr tlawk tlawk a. 

Mahse, natna bak hmuh tur a awm lo. Beidawng lutukin Sawmtea chuan thâwk a la hrawih a, a AK-47 a tin kâwh va chu zâwi muangin a dah thla ta riai riai a. Kâh theihna thinlung reng a nei lo. Lehlam hawiin a inher a, tlangval huaisen tak leh rorum em em ni ṭhin chu theihpatawpa insûm tumin a hmai a hup a, a khûr dawt dawt a, a ṭap ta tlawk tlawk mai a.

Chutah zet chuan, Awmpuia chuan tih theih pakhat chauh a awm tawh tih a hrethiam ta. Sawmtea chuan he thil hi a ti thei ngai dâwn lo, mahse an nunna chhan nan tu emaw tal chuan an tih ngei a ngai si. Ngawi rengin Awmpuia chu a rawn pên chhuak a, a kawnga a pistol pai chu a phawrh chhuak a. 

Muangchangin Pi Zari chalah tak chuan a tin a, ngaihtuahna fîm tak nen a hmet puak ta ṭhuai mai. Pi Zari chu silaimu na takin a dên rual chuan a dâk awrh a, leiah chuan a thal ta dâwp a. A taksa chu vawikhat a han phu uih a, a che zui ta miah lo. Thâwm a reh ṭhuap a, ramhnuai thim hnuaiah chuan Sawmtea leh Hlimpuii te unau ṭap inhnît hlâwp hlâwp thâwm chauh chu hriat tur a awm ta.

************************************************************

Tlang chhipah chhum a la zîng mup a, ramhnuai pilril tak, tu ma pal ngai lohna ruam thûk takah chuan khua a rawn vâr ṭan mek a. Mau leh hnimin a bawh khah tlat, a rûka sak tih hriat tak Assam-type thlam lian ve tawk tak kawtah chuan pên thâwm a rawn awm a. Hnim phên aṭang chuan Luna chu thâw hlawp hlawp chungin a rawn chhuak hlawl mai. 

A silai ken lai chu a hûm nghet tawh lova, a theihpatawpin hma lam a pan zel a, a hmelah chuan hlauhna leh chauh luat vanga dâng bâm hmel a lang chhuak a. Thlam kawngkhar chu a va sâwi rawk rawk a, "Pu Kham! Pu Kham... keimah, Luna!" tiin a theihpatawpin a au va. Reiloteah thlam kawngkhar chu a rawn inhawng ṭhuai a, tlangval lian pui pui pathum te chu silai kâh inpeih at in an rawn chhuak nghal a. 

Luna chauh hmel tak an hmuh chuan an silai chu an dah hniam leh a. Chutah, an hnung aṭang chuan pa pakhat, sa pan deuh, mahse hrawk bawk lian tak leh mitmeng val râm mai, rorum hmel tak hi a rawn pên chhuak a. Chu pa chu heng khawchhak ral ho hotu lian, Khama a ni. A kutah chuan meizial a zu khu hlat hlat a, a kekawr ipte zen chungin Luna chu dâk deuh vah hian a thlîr chhuk rûn a.

"Luna... nangmah chauhvin maw i lo kîr a?" Khama aw chu a vawt in a zâwi ruih a, mahse thupe ṭhang tih hriat takin a khauh hle thung. "Khaw nge Lungmuana te? Khaw nge Chunglura paw chu? Chuan a pawimawh ber... Lungthlir khuaa kan ralthuam dah ṭhat ho chu in la chhuak lo tih min hrilh miah suh." a ti chang fak a.

Luna chu leiah a ṭhingṭhi hnawk a, a khûr dar dar a. "Pu Kham... thil thleng kha a râpthlâk lutuk... tuman ka sawi hi in awih kher lo ang." tiin thâwk a han la kâwk a. A mitmeng chu a phî rûai a, "Lungthlir khua chu hremhmunah a chang tawh. Khaw mipuite chu an thi vek tawh a, mahse an rawn tho leh... Mi thi tawh an rawn tho leh a nih chu!"

Khama chuan a meizial zûk lai chu leiah theh thlain a rap hrual nghal nawk a, a ner nâwng a. "Zû i in em ni Luna? Nge ramhnuai a thei tûr nei i ei zâwk? Ramhuai thawnthu phuahchawp min hrilh tûrin heti chen chen hi i rawn tlânchhia a maw?" tiin a vîn ṭhawt a. "Ramhuai thawnthu lam a ni lo! A tak ngei a ni, Pu Kham!" Luna chuan theihpatawpa thutakin a lo chhâng lêt a. 

"Chûng thi tawh hnute chu an ruang a dâng vâr vek a, an mitmu a vâr pûp bawk. Na reng reng an hre lova, silai a kâh pawh nise an lu-ah tak a fuh loh chuan an thi thei lo! Riltâm lutuk ramsa kawlh ang maiin mihring te chu an seh thlêr hawk hawk a... Dawlliana ngei pawh kan hmuh laiin a dârah an seh a, a hnû ah phei chuan amah pawh chu ramhuai ah chang ve nghalin, Lungmuana zâwk rawn zuanin a rawn seh hlûm nghal a ni." tiin ṭap âw ṭuau chungin a thil hmuh dân râpthlâk tak chu a sawi mawlh mawlh a.

Khama chu a ngawi vung vung a. Luna hian ralthuam tawlh rukna kawngah thihna leh inbeihna tam tak a hmachhawn tawh ṭhin tih a hria a, hetiang em ema a thla phâng hmel hi a la hmu ngai lo. Mahse hotu lian a nihna angin a naute hmuhah thlaphâng hmel a pu ve duh lo. "A nih chuan, Lungmuana leh Dawlliana chu chûng hri kai ho kârah chuan an thi tihna a ni maw? Chunglura ve thung le?" tiin a zawt leh a.

Chutah zet chuan Luna mitmeng chu thinrimna in a rawn inthlâk a. "A ni lo, Pu Kham... ramhuai rualte bakah harsatna dang a rawn chhuak. Mizo tlangval, chûng hri lêng laka damchhuak ho an niang. Ramhnuai pilril ah sakawlh ang maiin min lo pél a. Chunglura phei chu thim thâm hnuaiah ka hriat loh hlânin an lo that a... Chuan, hri kai tawh Dawlliana'n Lungmuana a seh fel hnu khan, khâng Mizo tlangval zînga pakhat, rorum zet mai khân... ka mit hmuh lai ngeiin Lungmuana lu a chhû sâwm vek a ni!" a ti khur leh dar dar a.

Luna chuan leichhuat hnek dawt pahin a sawi zawm leh a, "Chûng Mizo tlangval ho chuan kan silai... AK-47 leh revolver te, rifle leh pistol te, silaimu kan phurh chhuah zawng zawng pawh min chhuhsak vek a ni. Hri kai hlauhawm tak an awm laiin, khatiang tlangval pawisak nei lo lutuk nêna inhmachhawn chu himin ka hre lova, kei pawh nungdama ka chhuah theih nan ka rawn tlânchhe ta tawp a nih hi." tiin a kun ta ngiai a.

Thlam kawt chu a reh ta ṭhuap a. Tlangval lo awm ve dangte pawh chuan Luna thu sawi chu mak tiin an inmelh hrek hrek hlawm a. Khama chuan muangchangin a kekawr ipte aṭang chuan a meizial a phawrh leh te te a, nawalh chuan a han tan a, a pak khu chhuak hlat hlat a. A mitmeng vâwt râm mai chuan ramhnuai chhum zîng chûk lam chu a thlîr vung vung a.

"Natna hrik lêng vângin mitthi an rawn tho leh a... chuan Mizo tlangval rualin ka silai min laksakin ka naute an that bawk a..." Khama chu a nui chhuak deuh huk a, mahse a nui hmelah chuan thinrimna hlîr a lang thung. "A ṭha e. Ramhuai pawh nise, hrikai natna pawh nise, kei Khama hian Mizo tlangval ho lakah ka thil neih ka chan dawn lo. Lungthlir khuaah sawn kan ralthuam ip 5 lai a la in-phûm a, sawng ralthuam tello saw chuan Burma ram lamah engmah tihtur kan nei lo."

Khama chu a rawn inher thut a, a tlangvalte lam chu hawiin, "In ralthuam leh silaimu ṭha ṭha kha phawrh chhuak vek ru! Grenade kan neih ang ang pawh ak chhuak vek ang che u. Vawiin la la hian Lungthlir khua chu kan luh chhuah ang. Ramhuai hri kai an lo awm a nih pawhin an that fai vek ang a... chuan, khâng Mizo tlangval, kan ralthuam rû a ka naute thattu te kha hmuh chhuah ka duh. An tlan bo hma ngeiin, kan ṭhiante phuba kan la dâwn a ni!" a ti ta chher chher a.

Luna pawh chu a rilru rawn huai thar lehin a silai chu a hrû fâi a, a ding chhuak ve ta tûah tûah a. Nichin lawkah mualpho takin tlawm mah se, Khama kaihhruaina hnuaia silai ṭha ṭha nêna an phuba an la dâwn a nih chuan, chûng Mizo tlangvalte chungah chuan a nâ thei ang berin phuba lâk a châk zek zek tawh a ni. Favang tiau chhum zîng kârah chuan beihpui thlâk tûrin Khawchhak ral rualte chu thihna ruam pan tûrin an insiamrem ta zung zung hlawm a.

****************************************************************

END OF EPISODE 2