ONCE UPON A TIME IN MIZORAM : SEASON 2 (Mizo zombie horror story) Written by : Aaron Malsawmdawngzuala Episode 3 : Blood and Dust

ONCE UPON A TIME IN MIZORAM : SEASON 2

(Mizo zombie horror story)

Written by : Aaron Malsawmdawngzuala

Episode 3 : Blood and Dust

***********************************************************

Khua a rawn vâr ṭan a. Ramhnuai pilril tak aṭanga nî rawn chhuak hmasa ber zung chuan hnim hnah ro kâr aṭangin Renga hmai chu a rawn chhun êng sêt sêt a. Renga chu a mit nuai neuh neuh chungin a rawn harh a, thâwk a han la halh a. A sir vêl a han hawi kual chu, nizan lama chauh luat vâng leh ṭah nasat luat vânga chau chhe der tawh, a ṭhiante chu leiah leh hnim buk phênah tui takin an lo la muhil bâm hlawm a. 

Renga chu thâwm dîm takin a tho ṭuih ṭuih a, hma lam a han hawi chhuak chiah chu a ding chawt a, a thaw huai a, a nui ta sak mai. Hmanhmawh deuh si, thâwm dîm tak siin Renga chu a pên phei a, Sawmtea, a AK-47 nghet taka kuah chunga lo muhil mêk dârah chuan a sâwi dawt dawt a. 

"Sawmte... Sawmte, harh teh," a ti sâ sâ a. Sawmtea chu phu zawkin a rawn harh hlawl a, hmelma beih inpeih at in a silai chu a lek kâng nghal vut a. Mahse Renga'n a dârah lo dâwm bet vatin, "Keimah... hahdam rawh. Sâw sâw han en teh." tiin hma lam chu a kâwk a. Sawmtea chuan a mit bui lûk mai chu a han nuai a, Renga kawhna lam chu a thlîr vung vung a. 

Hnim pik kâr aṭang chuan nî in a chhun tlet sur mai, in chung rangva ṭha hnem tak leh biak in chung te chu chiang takin a lo lang uar tawh a. Lungthlir khaw dâifêm chu an lo rap der tawh chu niin, khaw chhûng lût tûr chuan kawngpui lian an pawh a ngai tawh miah lo. Sawmtea chu a thâwk lâk a zâng nghal hawk a, nizan lama a nu a chân avanga a lungngaihna thûk tak kha beiseina thar in a rawn luahlan ve ta. 

"Lalpa, ka lawm e... kan thleng ta," a ti zâwi sup a. An ṭawng thâwm ah chuan midang ho pawh chu an rawn harh ṭan a. Valtea chu a bân nâ dâwm vawng vawng chungin a rawn inbeng kâng a, Siama pawh a rawn ṭhu chhuak ve bawk a. Pu Tea leh Muanpuia te chuan hmeichhe ho leh naupang chu an sâwi harh a. "Eng nge ni ta? Thil ṭha lo a thleng em ni?" Pu Tea chuan hlauthawng takin a rawn zawt nghal a. 

Renga chuan lo nuih lêt sâng pahin, "Pu Te, hlauh tûr a awm lo. Kan khua kan thleng tawh a nia, sâw han thlîr ve teh u." tiin a lo chhâng a. Chu thu an hriat rual chuan tuman nâ leh chauh an sawi thei tawh lo. Pi Kungi leh Muani te chu phûr leh thlaphâng ru tak siin an rawn ding chhuak a, Fela leh Kimkima te pawh an rawn dâk chhuak ve a. 

Lungthlir khua ngei mai chu thlîr vawng vawngin, Pi Kungi chuan a mittui a hru fap fap a. "Kan thleng ta hram e... " tiin Pu Tea bânah chuan a dâwm a. Pu Tea pawh chuan lawmthu sawi ni-âwm takin a lû a lo bu nghut nghut a. Awmpuia leh Valtea pawh chu an rawn pên hnai a, khaw chhûng reh ruih mai chu an thlîr vang vang a. 

Hlimpuii chu Sawmtea bulah a rawn ding a, a u kut ah chuan ava vuan a. Nizan lama an nu an chân avânga mit bui lûk leh dâng bâm chungin, khua chu a thlîr a. "U... khaw chhûngah chuan kan lût tak tak dâwn ta chu a ni sia. Tûnah chuan tumah inkalsan thei kan ni tawh lo a nia." a ti zâwi sap a. 

Sawmtea chuan a nau chu en in, "Tumah kan in kalsan dawn lo. Kan him tlâng vek dâwn alawm." tiin a lo thlamuan a. Sawmtea chu a rawn inher a, a ṭhiante leh a vên him tûr chhungkuate chu a han melh kual a. "In hmuh ang khân khua kan hnaih tawh hle a ni. Kawtthlêrah hri kai an lo vâk kual mek thei a, kâwngkhâr tin ah thihna in min hmuak thei bawk. Mahse helai ruama thih ngawt ai chuan, silai mu leh eitûr dap chhuaka invên himna tûr zawn hi kan beiseina awmchhun a ni. Fîmkhur ula, tumah in-hlat a kal miah loh tûr." tiin nghet takin thu a pe a. Tichuan, hlauhna in an khat ru ṭheuh na a, mahse an dam chhuak ngei ang tih beiseina vuanin, nî chhuak hnuai ah chuan thihna khawpui Lungthlir pan chuan an pên lût ṭan ta a ni.

*******************************************

Khua a rawn ên fiah tak hnu chuan, Zauva, Mapuia, Bawihi leh Puii te chuan an bihrukna Arbei mawng thlam chu an chhuahsan ta a. Boruak a vawt vawng vawng a, zankhuaa tiau chhum zîng in a hnutchhiah dâifîm chuan hnimhnah leh ramngaw chu a bual huh hlap bawk a. Nî zungin thing kûng lian pui pui kâr aṭanga a rawn chhun ên dêm dêm chu lang mawi hle mah se, hêng damchhuak tlêmte te tân hi chuan an thlaphânna tizualtu mai a ni rih tlat thung.

Zauva chuan a chemte chu nghet taka humin hma a hruai a, a mitmeng fiah leh fing tak chuan hma lam chu a hrût kual zak zak reng a. A hnungah Bawihi leh Puii ten invuan chial leh khûr ru dar darin, thâwm dîm theihpatawpin an zui a. An hnung dâwltu atan, Phulvar dâia an chhan chhuah thar Mapuia chu a tuthlawh kâwm hlui tawh tak hûm in a kal ve bawk a. 

An pên thâwm leh an thâwk la ri bâk chu thawm dang hriat tûr a awm lo. "Khawi lam nge kan pan ber dâwn a?" Bawihi chuan aw thâm deuh chhal, hlauhna avânga zâwi te si hian a rawn zawt a. Mapuia chuan hma lam thlîr ngar ngar pahin a hnung lam aṭang chuan a rawn chhâng a, "Helai aṭanga hla vak lo, mual hnih vel kan liam hian Pu Liana te huan, 'Sihpui mual' an tih chu a awm a. Tah chuan eizawng tura awm nghet te awmna, in lian pui a awm alawm. Chu in-ah chuan buhfai, chawhmeh leh silai leh thildang pawh a awm ngei ka ring. Sapêlh an hrat lutuk alawm." a rawn ti a.

Zauva chu a rawn hawi lêt zawk a, a bu nghat a. "A ṭha e, chu chu kan beiseina awmchhun a ni rih. Mahse chumi hmun pan tûr chuan ramhnuai kawng pângngai kan zawh a ngai dâwn a, hnim a pik in bihrukna tûr a vâng dâwn a nia. Thâwm siam miah loh tûr." a lo ti ve bawk a. Tlangval pahnihte chuan ralthuam ṭha an nei lova, hmeichhe pahnih chau tawh tak an hruai bawk si nen, fimkhur a ngai zual em em a ni.

Ramngaw chhah tak hnuaiah chuan an inzui phei zêl a. Mahse, thil pakhat ngaihṭhat thlâk loh em em mai a awm tlat. Thâwm a reh tlawk tlawk a, tlang pang dâi ah te chuan sava hrâm thâwm emaw, rannung ri neuh neuh tal hriat tûr a awm ṭhin. Tûnah erawh chuan thlânmual ang maiin a reh thiap a, chu ringawt pawh chuan an thla a ti phâng lawk êm êm a.

"Sava an hrâm lo reng reng..." Puii chuan hawi kual zak zak chungin a rawn ti chhuak hlawl a. A sawi zo chiah tîh chuan Zauva chu a ding chawt a, a bân a phar chhuak vut a, an vai chuan an ding nghal ṭhap a. "In hria em?" Zauva chuan a ti zawi sap a, a chemte ken lai chu inring takin a siam rem nghal a.

Hma lam hla deuh tak, hnim pik kâr aṭang chuan thâwm a rawn chhuak tlat! Hnah ro in rap ri hrâwp hrâwp leh, thâwk la hrawih hrawih thâwm a ni a, mihring pângngai pên rual loh tak hian a rawn ri chho dawt dawt a. Mapuia chuan a tuthlawh chu a hûm nghet ve nghal a, a chala thlan fîm rawn bawl ṭiam ṭiam chu tuai fâi nachâng pawh a hre tawh lo.

Zauva chuan a kutzungpuia an sîra hnim buk lian pui lam kâwkin, bihrukna tûrin zaizir midang ho chu a hrilh nghal zung zung a. Puii leh Bawihi chu hmanhmawh lutukin chu hnim buk phênah chuan an tawlh lût nghal rawk rawk a. Thâwm an hriatna lam chu an panna tûr kawng chiah a ni si, kawng danga hel tûr chuan kawng a khamin a awih hlawm lutuk tlat. Thâwm chu a rawn hnai tial tial a, hri kai hnar fîng tak te hian mihring nungdam rim an rawn hria a nih ngat chuan, heng nula leh tlangval, hriamhrei ṭha pawh nei lo te hian thihna chu hmai chhanah an hmachhawn ngei a ngai dâwn si.

************************************************************

Sawmtea te rual chuan Lungthlir khua chu an thleng ta ngei a. Mahse, khaw luhna pângngai, motor kawngpui aṭang chuan an lût lo. Hri kai an tam an hlauh avângin, khaw mawng lam, huan kal kawng bumboh leh hnim pik kâr aṭang chuan thâwm dîm thei ang berin an tawlh chho zâl zâl hlawm a.

Kawtthlêr an han chhuah chhoh chuan, an ralthuam ken te chu nghet takin an hûm a, ramhuai rual, hri kai rapthlak tak tak te chuan an lo bawh nghal huk an ring a ni. Mahse, an rin loh lutuk tak maiin, khaw chhûng chu a lo reh tlawk tlawk a. Hri kai rûm thâwm emaw, mihring au thâwm emaw pawh engmah hriat tûr rêng a awm lo.

A aiah chuan, kawtthlêr leh in kawt velah chuan mithi ruang hlîr hian a lo khat a! Kar hnih lai a liam tawh avângin nî leh ruahin a nan a, rannung chi tin rengin an eizawh tawh an taksa pângngai hmuh tûr a awm tawh lo. Ruhro dâng bâm te, sam in zial hnawk nuai te leh an thawmhnaw hak hmuar leh ro tawh tak tak te bâk hmuh tûr a awm lo a, khaw chhûng pum mai chu mitthi rim leh sa tawih uih hâm mai chuan a tuam chuk hi a ni ber mai.

Tual zawlah leh in bangah te chuan thisen ro kawi nuai leh hmuh hrehawm khawpa râpthlâk hnuhma te chu a awm nual a. Sawmtea te rual chu mak tiin an hawi hû hû hlawm a. Hri kai ho khân ei tûr an hmuh loh vângin an in ei zo ta vek zâwk emaw ni dâwn le tih hial a ngaihtuah a. "Fîmkhur ru aw..." Renga chuan a thal kâu sa rân chung chuan a rawn ti zâwi sap a. 

"Hêng hi chu thi sa an nih hi. In hnuai thim lai leh in chhûng velah hian hri kai dam, riltâm tak tak an la awm maithei a nia." tiin midang ho chu a hrilh a. Thâwm dîm takin an pên lût zêl a. In ṭhenkhat, kawngkhâr inhawng huau te chu an han bih dâk dâk a, mahse mihring nungdam hmel rêng hmuh tûr a awm lo. 

Chu mai pawh a ni lo, hri kai pakhat lek takngial pawh an awm miah lo a ni. Khaw chhûng chu thlânmual ang maiin a thi ṭhiap a, mi zawng zawng chu an thi vek tawh emaw tih tûr hian thâwm a reh tlawk tlawk mai a ni. Sawmtea chuan a AK-47 chu a dârah a pu a, beidawng leh hrilhhai hmel tak hian Pu Tea lam chu a hawi a. 

"Pu Te... engtin nge kan awm tâk ang? Khaw nge mi zawng zawng hi an awm zawh tâk ang? Hri kai pakhat pawh hmuh tûr an awm bawk si lo?" tiin a zawt a. Pu Tea chu a ngawi vung vung a. Kawtthlêra ruhro let phung te, khaw reh dân em em te chu uluk takin a thlîr kual a. Thâwk a han la hawk a, "Khaw chhûng luh ṭanna lam, khaw tawn tirh lam sâw kan pan phawt a ṭhain ka hria." a ti ta a.

Chu thu a hriat rual chuan Muani chuan Kimkima chu a lo kuah nghet vat a, hlauthawng tak hian, "Ngati maw? Khaw tawn tirh lamah te chuan hri kai rual lo awm khâwm ṭhup ta se engtin nge kan tih ang?" tiin a lo zawt vat a. Pu Tea chuan hnim phên aṭanga êng rawn lût chu a thlîr a, "A landan en hian, hêng hri kai ho hi anmahni a thi ral mai an ni lo. Chhanchhuaktu tlangval rual, khaw dang aṭangin an lo kal ang a, damchhuakte chu chhanchhuakin hri kai ho hi an that vek a ni ngei ang. Keini hi Tuival lui bula huanah khân kan bîru tih an hre lova, min hnutchhiah a ni ngei ang. Chuvângin, khaw tawn tirh ah sâwn duty te pawh an lo awm maithei a sin, kan va en a ngai a ni." tiin a ruahmanna leh a ngaihdan chu fiah takin a sawi a.

Chu thu an hriat chuan beiseina sâng tak an nei ta a. Sawmtea chuan a revolver pái lai chu phawiin Valtea chu a pe a. "A ṭha e. Kei, Awmpuia leh U Renga te kan va kal ang. U Valte, nangin midang ho hi sîkul tlâng lamah sâwn lo han bihruk pui la, in lo bîru tlat dâwn nia. Kan lo lêt leh vat ang." a ti nghal zung zung a.

Hlimpuii chuan a u chu a lo en reng a, a mitmengah chuan hlauhthawnna a lang chhuak chiang hle. Sawmtea chu va kal pheiin a nau dârah chuan a vuan a, "Ka lo lêt leh vat dâwn alawm, lo lungngai suh." tiin dam takin a hnêm a. Hlimpuii pawh chuan hmel dâng bâm chungin a lu a lo bu ve nghat a. 

Valtea chuan kal ve chu duh hle mah se, a bânah silai kahna hliam a nei bawk si, ṭangkaina aiin hnawksakna a thlen tam dâwn tih a hria. A thâwk a han la hak a, "Darkar khat hnua in lo la lêt lo a nih chuan, ka rawn kal ve dâwn a nia." a ti chang ta fak a. Sawmtea chuan, "Kan lo lêt leh vat ang, tûnah kal rawh u." a ti a. Tichuan, beiseina leh hlauhna kârah chuan an inṭhen hrang ta hlawm a.

***************************************************************

Ramhnuai kal kawng bumboh leh pilril tâka an inhnuh chhoh ṭuih ṭuih hnuah, Khama leh a naute chuan Lungthlir khaw dâifêm theutu, "Zawmthang ruam" mual kâwn chu an han thleng chho hlawl a. Nî pawh a tlangsâng tawh viau a, tlang chhip aṭanga nîin ramhnuai a chhun tlang sêt sêt chuan boruak a ti zângkhai ve deuh. 

An piah lawkah chuan bal leh ṭawp hmel taka lang, huan thlâm hlui pakhat hi a lo ding bam a. Hei hi kar hnih liam taa Sawmtea, Awmpuia, Siama leh Pu Tea ten hri kai rual laka an him theih nana an lo ṭawmna thlâm ngei kha a ni. Khama chu a ding chawt a, a hnunga rawn zui tu a naute pawh chu inring takin an ding ve nghal ṭhap a. 

Khama chuan thlâm lam chu a kâwk a. "Tâhsawn chawl lawk ang u. Helai mual kan liam chuan khaw chhûng kan thleng har tawh lo vang." tiin aw thâm leh zâwi ruih hian thu a pe a. Khawvâr tîrh aṭanga kal ngar ngar tawh an nih avângin tlangval ho pawh an thlan in a bual huh deuh hlap tawh a, chawlh hahdam lawk chu ṭûl an ti hle.

Luna chu hma hruaitu a nihna angin inti huai fahran hian hma lamah a pên chhuak nghal vut a. Mahse kar hnih liam taa a chunga thil thleng râpthlâk takte avâng khân thlâm emaw, in ruak pângngai ang maia lang pawh a ringhlel zo tawh a, a AK-47 chu thlâm kawngkhâr inhawng huau lamah chuan a tin rân a. 

Thâwm dîm takin thlâm chu a pan phei zâl zâl a, a bih lût tûr chiah chu a ding thut a, "Pu Kham..." Luna aw chu a rawn tial ruai a, "Rawn en teh... Thlâm chhuat hi a awng huau mai." tiin a au phei a. Khama chu a ner nâwng a, a meizial zuk lai chu leiah theh thlain a va pan phei ve nghal a. 

Thlâm kawngkâ aṭanga a va dâk lût chu Luna sawi ang ngeiin, thlâm dâp chhuat chu pawh sah chhiat tih hriat tak hian a lo awng huau a. Chu chu Sawmtea ten hri kai ho laka an tlânchhuah nana an sah chhiatna hnuhma ngei kha a ni. Chu mai a ni lo, thlâm chhûng bangah te chuan thisen ro kâi hnuang te chu a la lang kalh a, buaina lian tham tak a lo thleng tawh tih hai rual a ni lo.

Khama chuan a mitmeng thîp tak chuan thlâm vêl chu a han hrût kual leh ngât a. Thlâm sîr, hnim buk kârah chuan thil eng emaw hi a va hmu fûh ta tlat mai. Thâwm dîm takin a va pên hnai a, hnim chu a silai hmawr chuan a han hnawl kiang a. Tah chuan, kâr hnih liam taa Sawmtea leh Pu Tea ten an lo thah tawh, hri kai ruang, ruhro vek tawh hi a lo let bal a, a kâ ang huau ah te chuan lung leh vut a khat lûk a, hmuh a hrehawm hle a ni.

Chu mitthi ruang râpthlâk tak leh thlâm banga thisen kâi hnuang, tûkverh thing keh nuai te a hmuh kual hnu chuan, Khama chu a han thâwk la kâwk a. "Eng emaw tak chu... Lungthlir khuaah sâwn a thleng ngei a ni." a ti thum chhak a, a aw ah chuan fiamthu a tel hauh lo. A rin ai daihin Luna thawnthu sawi hi a tak a ang chho tlat.

Luna chuan rang zet hian, "Dâwt ka sawi lo ka tih kha, Pu Kham! Ka mit hmuh lai ngeiin khâng mithi tho leh an tih pakhat khân min rawn bei alawm. Dawlliana ngei pawh a dârah a seh a, rei lo teah ramhuai ang maiin a rawn inthlâk danglam nghal alawm." tiin uar fahranin a lo sawi zung zung a.

Khama chu a han maimitchhîng vang vang a. He ruamah hian awm khawtlai chi a ni lo tih leh, hri kai an tih te chuan an rawn bei ve mai ang tih pawh a hlau ve ta hnuhnawh hle a. Thâwk a han lâ hawlh a, a rawn meng chhuak a. "Umm... kan chawl lo vang. Kan kal zêl ang," a ti ta hmiah a. A naute lam chu hawiin, "In silai load ṭheuh ru, khaw chhûng panin kan pên lût nghal dâwn." tiin thu a pe a. Tichuan, hlauhna leh phuba lâk duhna inchawhpawlh nuai hnuaiah, khawchhak ral rualte chuan thihna khawpui Lungthlir pan chuan hmalam panin an inzui ve leh ta a.

********************************************************************

Lungthlir khaw chhûng, thihna in a uapna hnuaiah chuan, Sawmtea, Renga leh Awmpuia te chu theihpatawpa fîmkhurin khaw tawn tirh lam pan chuan an inzui phei hnak hnak a. Kawtthlêr tin chu mithi ruang hlirin a khat a, kar hnih dâwn lai liam tawh a nih avângin an ruhro leh sam bal tak te bâk chu hmuh tûr a awm tawh lo. 

Chûng thil riruang te kâr chu hrui pal ang maia pêlin, thâwm rîk hlau rân chungin motor kawngpui pângngai ah chuan an chhuak chho ta a ni. Khaw luhna tak, 'Welcome to Lungthlir' tih inziahna thing phek keh nuai hnuaiah chuan an va ding a. Tah chiah chuan an thil hmuh chu mak an ti hle mai. 

Khaw chhûng luh theih lohna tûrin luhkâ zawng zawng chu thingtluang lian pui pui hian a lo inkhamphei thap mai a! Motor emaw, mihring pângngai pawh awlsam taka luh rual a ni lo. Tlangval pathumte chu inmelh ralh ralhin, thil thleng mek chu a pângngai lo tlat tih an hre thei nghal a ni.

Sawmtea chuan thing khamphei chu theihpatawpa na in a nem a, Renga leh Awmpuia ten vuan ve bawk in an vaia ṭang rualin an nemsawn thei ta a. Thing chu a ri deuh ṭhuai a, mahse an tawlh luh theihna tur tawk vel chu a awng a. Thâwm dîm takin chumi awngah chuan an lût a, an silai chu vuan nghetin an inring ran hlawm bawk a.

Mahse, Pu Tea'n a lo beisei ang duty emaw, duty lo awm ṭhin awm rêng rêng an hmu lo. Kawtthlêr reh ruih bâk thil dang hmuh tûr a awm lo a ni. Mahse, ngun taka an han bih chian chuan, chu hmun chu sorkar in emaw, vêngtuten an lo hmang ṭhin ngei a ni tih a hriat theih a. Thingbul pakhatah chuan mei chhemna hnuhma a awm a, a sîrah chuan chaw funna changel hnah hlui tawh tak leh, police duty tiang (lathi) ngul ro ṭha tak pakhat a lo let bal bawk a.

Chûng hnuhma tlêmte chuan helai hmunah hian tute emaw an lo duty ṭhin tih a târ lang chiang hle a ni. Awmpuia chuan tiang chu a han chhar kâng a, a endik vang vang a. "Hri an kai a nih loh pawhin, thil râpthlâk tak hmachhawnin an tlânchhia a ni ngei ang. Helai hmun chu a him lo tih an hriat avângin an kalsan ta a niang. Mahse chiang tak pakhat chu... chhanchhuahna chu helai hmunah hian an lo thleng tawh ngei a ni." a han ti nuah nuah a.

Mahse Sawmtea erawh a meng phâwk ru deuh tlat thung a. Khaw chhûnga mitthi ruhro in-khat thup te leh, khaw luhna thâwm reh tlawk tlawk te chu a thlîr lêt leh a. "A nih leh, chhanchhuahna chu a lo thleng tawh a, hri kai ho pawh an that mang vek tawh a nih si chuan, ngati nge heng duty te hi an awm tawh miah loh?" tiin Awmpuia chu a zawt let a.

Renga chuan thâwk a han la halh a, a thal hrui tuai neuh neuh chungin, "Sawmte, chiang fâk chuan engmah kan la hre hleinem. Chhanchhuaktute chu tanpuitu dang ko tûrin khawiah emaw khaw dâifêmah an chhuak lawk te pawh a ni thei tho a sin. Kan rindân ringawtin thutlukna a siam theih loh a nih hi." tiin zaidam takin a lo sawi ve bawk a.

"Engtin nge kan tih tâk ang? Helaiah hian ngawi rengin duty ho lo lêt hun emaw, tute emaw rawn kal hun nghâkin kan lo ṭhu reng ringawt mai dâwn em ni?" Sawmtea chuan phûr lo hmel takin a han ti chhuak hlûai a. An thâwm erawh an la dìm hle thung a. Tlangval pathum te chu khaw tawntir bula lamlian sirah chuan an han inhnial rak rak a. 

A tâwpah chuan Renga chu a rawn tawng chhuak hluai a, "Ngawi teh u, inhnial vak vak hian awmzia a nei lo. Tûnah chuan sîkul tlângah Pu Tea te hnenah i lêt leh phawt mai ang u. Kan chhoh pahin in tinah lût den den ila, ei leh in tûr, damdawi leh thawmhnaw lum pawimawh ho kan dap chho nghâl dâwn nia. Chumi hnuah chuan inrâwn khâwmin, Lungthlir ngei hian hringnun thar min pe leh dâwn nge tih chu ro kan rêl ṭha zâwk dâwn nia." tiin thutlukna a rawn siam ta hmiah a. Sawmtea leh Awmpuia te pawh chuan a thu chu an hnial ta bik lova, thâwm dîm takin khaw pui pan tûr chuan an inher lêt leh ta a.

**************************************************************

Hnim buk chhah pui mai phênah chuan Bawihi leh Puii te chu thâwk pawh la ngam mang lovin an ṭawm rân a. An thinphu ri dup dup chu anmahni ngei pawhin an hre phâk hial a ni. An hma zâwn, pên sâwm pawh tling lovah chuan Zauva leh Mapuia te chu an hmanraw neih chhun hûm ran leh inring at in an lo ding khawng lah a. 

Rannung thâwm takngial pawh awm lohna ramhnuai reh tlawk tlawk kârah chuan, hnim hnah ro inrap ri hrâwk hrâwk leh patling nâ tuar rûm ri chhur chhur thawm chu a rawn hnai tial tial a. Mapuia chu a khûr ru dar dar a, a thlan a tla bawrh bawrh mai. Chutah le, an hma lawk mau hmun aṭang chuan hri kai pahnih hi an rawn dâwk chhuak ta hlawl mai le! 

Nî êng hnuaiah chuan an landan chu a râpthlâk kher mai. Pakhat chu pa lian ṭha tak, sâpêl thawmhnaw (camouflage) hlui ha a ni a, a hmai aṭanga a âwm thlengin thisen ro dâng bâm hian a bual hnuang a. A hnunga mi chu tlangval sa ṭha ve pangngai tak, a kâ aṭanga chil phuan rawn tla bawrh bawrh a ni thung. 

Hêng hri kai pahnihte hi an la tharlam (fresh) hle a, khaw chhûnga mitthi chhe tawh tak takte ang kha an ni lo—an mitmeng chu ramsa kawlh tak ang maiin a pual râm a, mihring nungdam rim an hriat rual chuan an rawn rûm chhuak nghal hrawih a. Zauva leh Mapuia an hmuh rual chiah chuan theihpatawpa chakin an rawn dâwk phei nghal ta zawk mai. 

Zauva chuan a chemte hriam tak chu nghet taka humin a lo inring nghal at a. "Mapui, fîmkhur rawh!" tiin au ṭhawt a. Hri kai pa lian zâwk chuan Zauva chu rawn bawhthlûk nghal rawk a tum a, a bân lian pui chu a rawn vai phei fua a. Mahse Zauva chu pên khatin a sîr zawngin a lo tawlh sawn hman hlauh a. 

Hri kaiin a rawn pelh fua rual chiah chuan, theihpatawpa sânga a chem chu lék kângin a nghâwng hnung lamah chuan a va sat ri ta chawrh mai. Thisen a per nghal chhawk a, ruh tliak ri hrâwk in a zui nghal bawk. Mahse chu hri kai chu a tlu mai lo, a dâk âwrh a, nâ hre lo tih takah a kâ âng huau chungin Zauva lamah chuan a rawn inher leh nghal a.

Chutih lai mek chuan, hri kai pakhat zâwk chuan hlauhlawpa lo ding Mapuia chu a rawn zuan ve nghal zat a. Mapuia chu a phîlî lutuk a, a thil tum pawh ngaihtuah hman lovin a tuthlawh hlui tak chu theihpatawpa nâ in a lo vai pawp a. Tuthlawh kâwm zum lam chuan hri kai chu a a darah tak a lo chek bur ta chat mai! 

Hri kai chu a phu uih a, mahse a tlu lo tlat. Mapuia'n tuthlawh phawi a han tum chu a theih ta miah lo, hri kai ruh khauh tak kârah chuan a tuthlawh chu a tâng ta tlat mai. "Ka phawi thei lo!" tiin Mapuia mangang chuan theihpatawpin a pawt ṭang ṭang a. Mahse hri kai tha chu a chak lutuk tlat. 

Tuthlawh invuah bur chung chuan rawn pên hnaiin, Mapuia chu a rawn bawh ta thlawp a. Mapuia chu te ṭhawt leichhuatah a tlu dâwp a, tuthlawh pawh a thlauh nghal a. Hri kai chuan bawhbet nghal rân in, a kâ uih leh ṭawp lutuk chuan Mapuia hrawk bul chêtah a rawn hap ta thuak thuak mai. 

Mapuia chuan theihpatawpin a bân pahnihin hri kai hrawk bâwkah leh a hmaiah chuan a lo nam ve ṭang ṭang a, a thâwk a chham dâwn hnai a, a tha in a tlin lo ṭêp tawh. Chu thil râpthlâk tak mai hnim buk aṭanga lo thlîrtu Puii chu hlauvin a mit a chhing a, a beng a hup tlat a. Mahse Bawihi erawh chuan Mapuia mangang chu a thlir reng thei lo. 

A kuta thîr tiang tlâwn, Phulvar khua atanga a rawn ken chu hûm kâwh va chung chuan hnim buk aṭang chuan a rawn zuang chhuak ta thut mai! "Kal bo rawh, tenawmpa!" Bawihi chuan a rawn ti vîn ṭhawt a. Tlân phei in, hri kaiin theihpatawpa nâ in a thîr tiang hmawr zum chuan hri kai nâk-nêmah tak chuan a va vit ta sawk mai. 

Hri-kai chu a rûm chhuak hrawih a, a beih lai mek Mapuia chu thlahin thîr tiang a rawn vit tu Bawihi lamah chuan a rawn hawi thut a. Hri kai rorum lutuk chuan a nâk nêma thîr tiang bur vu chung leh tuthlawh a dâra bur vu chungin a rawn hawi chhuak a hmuh chuan Bawihi chu a khûr nghal dar dar a, a tawlh hnung dâwrh a. 

Hri kai chuan Bawihi bân a rawn ban tûr chiah chu, a sir lam aṭang hian thâwm a rawn ri fua a. Hri kai mit atangin thisen a rawn pût nghal zâwih aa beng zâwnah tak chuan Zauva chem chu a rawn bur tlâng ta hlâwk mai! Thisen a per nghal chhawk a. Zauva chuan thaw hluam hluam chungin a chemte chu theihpatawpin a pawt phawi leh hrâwk a. Hri kai pa, sa ṭha tak chu leiah chuan a bawk thlawp a, a taksa chu a khûr hlak hlak a, a che leh tawh miah lo.

Boruak chu a reh leh ta ṭhuap a. Mapuia chu leiah bawk khup in a han khuh kharh kharh a, a thinphu su dup dup dawm chungin a rawn in beng kâng ṭuih ṭuih a. Zauva chuan a piah lawka a thah tak, hri kai lian pui pa ruang chu chemtea a thil luh nawn leh sak hnuah a rawn hawi chhuak a. Hnim buk aṭangin Puii pawh mittui tling piau in a rawn chhuak ve bawk a.

Zauva chu Bawihi bulah rawn kal hnaiin, a darah a rawn sâwi dat dat a. Bawihi chu a la dâng sâp a, thil thlengin a ṭhâwn luat vângin a khûr dar dar a. "I ti ṭha lutuk Bawihi... nangmah vângin kan him a ni." Zauva chuan fiah fakin a ti a. Mapuia pawh chu thei leh thei lovin a rawn ding chhuak a, a thawmhnaw bâl nuai chu beng fai pahin, "Bawihi... ka lawm lutuk. Rawn che chhuak lo la chuan saw ramhuai sawn min pawr darh vek dawn anih kha." tiin lawmthu a sawi mawlh mawlh a.

Zauva chuan a chemte thisen kâi chu hri kai let reng kawrah chuan a tat fâi nawk nawk a, "In inpeih hunah kan kal nghal a ngai ang. Kan thâwm hian ramhuai dang a rawn hip khâwm leh dâwn a nia. Thin thi a hahchawl hman kan ni lo, Sihpui mual lam pan chuan hmanhmawh takin kal nghal ang u." a ti nghal zung zung a.

******************************************************************

Khaw dâifêm leh kawtthlêr thim mup mai, mitthi ruhro intlar khat dûl mai an pal tlang hnu chuan, Pu Tea leh midang te chu Lungthlir khaw 'Sîkul Tlâng' panin an inzui chho hnak hnak hlawm a. Nî a sâng ṭan tawh a, chauh luat vângin an thlan a tla phung tawh a. Sîkul tlâng chu khaw chhûng aṭangin a fal deuh bawk a, naupang nui thâwm leh zirlai ten an zirlai chhiar ri in a luah khah ṭhinna hmun kha, tûnah chuan thlânmual ang maiin a reh thiap a.

Valtea chuan a bân hliam nâ dâwm chungin hma a hruai a, a pistol hûm lai chu inring takin a siam rem deuh reng a. Sîkul kawtzawl an han thlen chhoh chuan, tual zawlah thisen ro hnuhma tlêm a zâwng a awm tih loh chu, khaw chhûng anga mithi ruang râpthlâk tak hmuh tûr a awm velo hlauh. 

"Thâwm dîm ula... tah sawn office a awm a, tukverh aṭang sâwn luh a theih ang. Sâwtah sâwn kan bîru dâwn nia." Valtea chuan thaw hluam hluam chungin a han ti a. Pu Tea leh Muanpuia te pawh chuan theihpatawpa fîmkhurin hmeichhe ho leh naupangte chu an hruai lût ta a. Sîkul corridor-ah chuan an pên thâwm a khâwk raih raih a. 

Office kawngkhâr chu a lo inkâlh lova, tlemte hian a lo inhawng a. Valtea chuan nghet taka a pistol hûmin kawngkhâr chu muangchangin a han hawng zau deuh a, beisei loh takin a chhûngah chuan mihring emaw hri kai hmuh tûr an awm miah lo. An theih ang anga tawt in an inhnawh lût nawk nawk a. 

Mahse office chhûng an luh rual chiah chuan thil dik lo a awm tih an hre nghal. Hmeichhe ho leh naupang, kil khata an din khâwm lai chuan, Muanpuia leh Valtea te chuan office chhûng chu an han bih kual a. Chhuat ah leh dawhkân hnuaiah te chuan thil eina nawi, chhang kawr leh nepnawi kawr hlui tawh tak tak a lo let darh nuai mai!

Pu Tea pawh chu a rawn pên hnai a, dawhkân pakhata tui bottle ruak lo let bal chu a han la kâng a. "Ngawi teh u... helai hmunah hian mihring an lo awm tawh ngei a nih hi." a ti chang fak a. A aw ah chuan mak tihna leh beiseina a inpawlh nuai a. Chu hmun ngei chu kar hnih lai liam taa Bawihi, Marema, Chaka, Puii leh Zauva ten hlauhawm laka an lo tawmhimna, Phulvar YMA Hall an pan hmaa nungdama an lo khawsak ve ṭâwk ṭâwk na ngei kha a ni si a. Mahse chu chu Pu Tea te rual hian an hre hre lo.

Hlimpuii chuan kil khata lehkhabu hlui kâr aṭanga rawmawl bal tak pakhat lo tla bal chu a chhar a, "Hêngte hi... a la hlui miah lo a nia." a lo ti ve sap a. Muani pawh chuan a fapa Kimkima chu ṭhut tîrin, chhuatlaia an thil hmuhte chu beiseina mitmeng nen a thlîr ve ngawih ngawih bawk a.

Valtea chuan thâwk a han la halh a, a pistol chu a kekawr kâwngah a zep ṭha a. "A nih chuan, kan khaw mi leh sa ngei, damchhuak thenkhat te chu he hmunah hian an lo inkhulh khâwm tawh ṭhîn ngei a nih dawn hi. Mahse khawiah nge tûnah an awm tâk ang?" a rawn ti ve nuah nuah a. Hlauhna kârah, tu emaw nungdam an la awm ve mai theia rinna sâng tak nen chuan, Sawmtea te pathum, khaw tawn tirh lama kal ta te lo let leh hun chu an nghak ta tlawk tlawk a.

*****************************************************************

Chhun a ni a, tiau chhum a kian ṭan mêk lai chuan, Khama leh a hote chu thâwm dîm tak leh inring rân chungin Lungthlir khaw dâifêm chu an rawn lawi lût ve ta a. An ralthuam ken chu an ak ri rawk rawk a, khaw chhûnga hri kai emaw, khâng Mizo tlangval huaisen tak takte khân an lo lambun thut ang tih an hlau ru ve hle. 

Luna chu a thlanin a bual huh deuh hlap tawh a, a AK-47 hum ran chunga hma lam thlîr kual zak zak pahin a pên dîm hle a. Chutah Luna chu a ding chawt a, a hma zâwn chu a kawk a. "Pu Kham... saw...rawn en teh u," a ti zâwi sap a. Khama leh a naute chu inring takin an rawn pên phei a, theihai kûng lian pui hnuaia hnim hmun zawl laiah chuan thil tharlam tak hnuhma an va hmu ta tlat mai. 

Hnim chu lo invial hnawk nuai in, mihring eng emaw zat ṭhutna leh mutna hnuhma tih hriat tak hian a lo bel han hlawm a. Khama chu a ṭhu hniam a, chûng hnim bel han mai te chu a han khawih a. "Helai hmunah hian tute emaw chu an lo chawl hahdam ngei a nih hi... nizan mai emaw, tukin zîng kâr mai chauh kha a la ni ngei ang." a ti nghet charh a. 

A mitmeng thîp tak chuan a sira thing ṭang tuai, tu emaw ṭhut fûh vânga kawi ngul mai chu a han bih chiang a. "Naupang emaw, mihring rit lem lo tak thutna hnuhma pawh a awm. Tlangval rual chauh an ni lo tawp mai." a ti chhunzawm a. Luna chuan a chil a lem dâwk a, "Khâng Mizo tlangval... ka naute thattu te kha an ni thei ang em? Khâng ho pawh khân naupang pakhat, kum 10 bawr vel awm mi chu an hruai tel ngei alawm," tiin hlauthawng ru takin a lo sawi ve vat a. K

Khama chu a ding chhuak a, a ralthuam ah chu siam rem pahin, "An nih ngei a rinawm. Helai aṭang hian khaw chhûng luh dân an ngaihtuah a ni ngei ang," tiin a lo chhâng a. Tlangval zînga pakhat, sa pan ve tak, mitmu lian deuh chuan a chem pui phawi pahin, "Pu Kham, anih chuan min lo luhkhalh tawh tihna a ni maw? Kan ralthuam thuhrukte kha an lo han khawih hman a nih vaih chuan... sa nawi ah kan chhuah vek mai dâwn a nia." a rawn ti chher chher a. 

Khama chuan chu tlangval chu a han melh a, "Kan dahthatna an hre hauh lo vang. Mahse kan chet ran a ngai thung ang." a lo ti a. Khama chuan khaw chhûng luh chhohna kawng chho tak mai chu a han en vang vang a. "A kawng pângngai ah sâwn an chho lêm lo a nih hmel. Hei, huan kal kawngah an hnuhma a awm zeuh zeuh... hetiang zêl hi chuan kan nangchîng har lo vang," a ti a, a hmelah chuan phuba lâk duhna a lang chhuak nasa hle.

Luna pawh chu a rawn phûr thar leh a, "Kan man rual rualin kha Mizo tlangval râwng tak, Lungmuana lu chhu sâwmtu kha... a nung chungin a vun ka lîp dâwn chiang khawp" a ti thum chhur chhur a. Khama chuan a naute chu a han thlîr a, "Hri kai rualte pawh an la inlar rih lo va, kan la vannei rih a nih hi. Silai kau sa vek ula, engpawh tawk thei kan ni tih hre rân chungin thâwm dîm theihpatawpin hma lam pan ang u." tiin thu a pe leh ta a. Tichuan, Khawchhak ral rualte chuan mithi khawpui a chang tawh, Lungthlir lam pan chuan phuba la tûrin an inzui chho ta tham tham a.

********************************************************

HALF AND HOUR LATER

Lungthlir khaw kawtthlêr reh ruih leh rimchhe tak hnuaiah chuan, Sawmtea, Renga leh Awmpuia te chu theihpatawpa fîmkhurin dâwr hrang hrangah an lût kual den den a. Mitthi ruang, ruhro awm lohna lai dâwr thim deuh ruih an luh chhuah hnuah, eitûr ṭha hnem tawk tak—buhfai, dal, chhangbân leh thildangte chu an hmu nual a. 

Chûngte chu an buara kenah chuan an khung zung zung a, an hmabâk a la ko hle tih hriain an chêt pawh a rang hle a, a theih ang ang chu kûngkhâwm a. Dâwr pakhat an chhuahsan a, a dawt leh pan tûra an insiamrem lai chuan Renga chu a ding chat a. Khawlai kâwn (junction) lam kâwh pahin, "Sâw lam dâwr sâw ka lo va en ang e. Nangni pahnih khân he lam tlar hi lo hrût ula, reilote hnuah sâw lai kâwnah sâwn kan innghâk khâwm dâwn nia." a ti zâwi sap a.

Tichuan, Renga chuan a thal hûm rân chungin thâwm dîm takin a kalsan ta a. Renga a liam hnu chuan, Awmpuia leh Sawmtea te chu in dang pan tûr chuan an kal ve leh nghal a. An buara ah lai chu a rit ve ṭan tawh a, fîmkhur tak leh thâwm dîm taka pên pahin a rûkin an titi sep sep a. "Hei chu kan dâih rei pui khawp ang, naupang ho ril a lo tâm tawh ngawt ang." Awmpuia chuan a han ti nuah nuah a.

Chutia titi lai tak chuan, an hnung lawk aṭang hian thâwm a rawn chhuak ta thut mai le! Mihring pên thâwm ri a ni a, chutah aw thûm leh rorum zet mai hian, "In silai kha dah thla nghâl rawh u!" a rawn ti ta chher chher mai. Chu thâwm chuan Sawmtea te pahnih chu a ti ding chat a.

Rang lutukin an inher nghal a, an silai hûm lai chu an lek kâng nghal vut bawk a. Mahse an thil va hmuh chuan an beiseina a va vaw chhe chiang kher em! An hmâah chuan Khama leh Luna, leh Khawchhak ral panga (5) lai mai chu an lo ding kual ṭhap a. Silai ṭha pui pui, M-16 rifle leh AK-47 tihte, ralthuam chi hrang hrang kengin Sawmtea te pahnih chu an lo tin khup tawh a lo ni.

Sawmtea leh Awmpuia te chuan an silai chu inring takin hûm ve bawk mah se, an intam hleih lutuk tlat. Mipa pahnih, silai mu pawh nei tam lo leh, misual rual pasarih (7), silai kau sa veka rawn tinte chu beih ngam rual an ni lo. Khama chuan a meizial fâwp kawk kawk chungin a mitmeng sen râm hmak chuan a han en dun vang vang a, "Silai kha in dah thla lo a nih chuan, in taksaah khan silaimu in bu a khuar nghal ang. Ka fiamthu miah lo a nia." tiin a rawn vau chhunzawm nghal khûr khûr a.

Tihngaihna a awm tawh si lo. He kawtthlêrah hian kah rawn in an thi dâwn nge, silai dah thla in dam khawchhuah theihna chance beithâm tak chu an vuan zâwk dâwn? Hreh tak chungin Sawmtea chuan a AK-47 chu muangchangin leiah a nghat a, Awmpuia pawh chuan beidawng takin a pistol chu a dah thla ve ta a. 

An pahnih chuan chêt la ngam tawh lovin an bân an phar ta hluai a. An silai an dah thlâk rual chiah chuan Luna chu ngeiawm taka nui sûng chungin a rawn pên chhuak a. Silai chu rawn chhar mai a tum emaw an tih laiin, a hmaa a lo tlawm tawhna avânga phuba lâk châknaa khat liam tawh Luna chuan, Sawmtea chu theihpatawpa nâ in a rawn hnek ta siah mai le! 

Sawmtea chu leiah chuan a thal tawp a. Luna chuan silai pahnih chu a chhar a, Khama bulah chuan a va ding lêt leh nghal a. Khama chu a rawn pên hnai a, a M-16 rifle hmawr dâwt vawt ruih mai chuan chhuata let Sawmtea chalah tak chuan a rawn tin ta rân mai. "Tûnah sawi rawh le... khawiah nge i ṭhiante dang leh naupang te kha an awm?" a ti fiah kâk mai a. 

Sawmtea chuan a kâ aṭanga thisen rawn chhuak chu tuai fâi puat pahin, huaisen tak hian Khama chu a han melh chho râm a, "Ka hre lo." a lo ti lêt hmuk a. Khama chu a nui chhuak hak a. "I huaisen hle mai maw... Mizo tlangval huaisen chu keipaw'n ka ngaihlu alawm." a han ti vel a. 

Mahse a sawi zawh rual chiah chuan a silai kâwm hnunglam lian leh rít ṭha tak chuan Sawmtea dulah tak chuan theihpatawpin a chhu ta pawp mai! Sawmtea chu nâ tiin a ûak ṭhawt a, a pum dâwm in a vial ngawng ngawng a. Khama chuan a silai chu Awmpuia lamah a lek phei leh vut a, "Khawiah nge an awm ka tih chu?" a ti vin leh ṭhawt a. 

Awmpuia pawh chu a ngawi tlat a, a ha chang a lo ṭhial rap rap ringawt a. Chutih lai chuan Sawmtea chu rawn khuh bawrh bawrh chungin theih leh theih lovin a rawn ding chhuak leh tûah tûah a. Thâwk ala kâwk a, Khama mita han melh râm râm pah chuan, "I duh chuan... keimah zâwk hi min that rawh. Ani pawh khân khawiah nge midang an awm a hre bîk chuang lo." a rawn ti leh a. 

Khama thinrim chuan insûm a tum tawh lo. A M-16 rifle chu vân lamah kâwh tîr in a hmet puak ta ṭhuai ṭhuai mai a! Silai rî in khaw pui chu a fan hneh hle. Chutah, a silai kâw hmawr khu hlat hlat chu Sawmtea chalah bawk chuan a chuktuah leh a. "Tûn ṭum chu vân lam a ni tawh lo vang... i chalah zâwk hian ka kâp tawh ang. Sawi rawh, khawiah nge i ṭhiante chu an awm?!" tiin Khama chuan a zawt leh a. Mahse, Sawmtea chu a la ngawi ngar ngar mai!

****************************************************************

Lungthlir khaw kawtthlerah buaina lian tham a chhuah mek lai chuan, a chhak Sîkul tlâng office pakhatah chuan Pu Tea te ho chuan hlauthawng leh inngaihtuah muk takin Sawmtea te chu an lo nghak tlawk tlawk a. Boruak a uap in a ipik hle a, hun kal muang lutuk te chuan an thla a ti phâng zual hle a ni. 

Chutia ngawi renga an ṭhut ṭhap lai chuan, khaw chhûng lam aṭang chuan silai puak ri ṭhuai ṭhuai thâwm chu a rawn khâwk chho ta raih raih mai le! Chu thâwm chuan sîkul office chhûnga biru te thinphu chu a ti su nghal dup dup a. Silai ri an hriat rual chiah chuan Valtea chu a phu zawk a, a ṭhutna aṭang chuan a ding chhuak nghal zawt a. 

"Sawmtea te an ni... buaina an tâwk chiang lutuk!" a ti chhuak nghal hrawih a. A bân dinglam hliam intuam lûk chu ngaihsak tawh miah lovin, a kekawr kâwnga a zep a revolver chu a chuh nghal thut a, inring at in a siam rem nghal a. A hmelah chuan hlauhna aiin a ṭhiante chhan chhuah duhna a rawn lang lian zawk.

Hmanhmawh taka kawngka lam a pan tûr chiah chu Muani chuan a lo dang nghal vat a. Muani hmel chu a dâng sâp a, a khûr dar dar a. "Ni lo, U Valte, kal suh! Nangmah chauh lehnghal, i bân a la nâ si. Eng buaina nge an tawh pawh kan hre lo, i va kal ve ngawt hian engmah i va thlâk danglam dâwn lo. Helai hmunah hian min awmpui zâwk rawh." tiin ngenngawl takin a lo dang a.

Pu Tea pawh chu a rawn pên chhuak ve nghal a, Muani thusawi chu a rawn pawmpui hle.  "Muani sawi kha a dik a ni, Valte. Khatiang hliam pû chung lehnghal khân thil i va ti thei kher lo vang. Thâwm ngai thla in helai hmunah hian lo la nghâk rih zâwk ang u. Sawmtea te chu tlangval fing leh huaisen tak an ni a, an rawn inchingfel thei mai ang, hri kai dang an hmu te pawh a ni mahna." tiin zaidam takin a lo dang ve bawk a.

Mahse Valtea thutlukna chu a sawhsawn theih tawh loh. A thaw hak a, Pu Tea chu fiah taka melh chungin, "Pu Te, silai vawikhat lek puak a ni lo, a puak nawn ṭhuai ṭhuai a nih kha. Hri kai pahnih khat lek theh darh nân mai mai chutiang zâzata tam silai an hmet puak lo vang. Sawmtea bulah khân darkar khat hnua an rawn lêt loh chuan ka rawn zui dâwn tiin ka intiam tawh a, ka kal ngei a ngai a ni." a ti chang fak a. 

Kawngka lam chu pan luih a tum ta tho a. Chutih lai chuan Muanpuia chu a rawn che ve phut a. A thal (bow) a dah thlâk tawh chu a la kâng a, a thal-mu dahna chu a ak ṭha sauh sauh a. "A nih chuan kei pawh ka lo kal ve ang. U Valtea chauh a kal chuan a him tawk lo, ka theih ang angin ka va ṭawiawm ve ang e." a rawn ti ve tlat mai. 

Pu Tea chuan a thâwk a han la hawk a. Tlangval pahnihte chu a han en tawn a, chutah chiang leh fiah takin, "A ngai lo, Muanpui. Hetah hmeichhia leh naupang ho hian vêngtu ṭha an mamawh a ni. Keimah zâwk ka lo kal ang e." a rawn ti ta a. Siama pawh chuan a chem pui hûm chungin chhuah ve a rawn tum a, "Kei pawh ka lo kal..." a rawn tih lai mêk chuan Pu Tea chuan a dârah a lo dâwm sak a. 

"Siama, Muanpuia nen hian helai hmun hi lo nghâk ula, hmeichhe ho hi theih tawpin in lo vêng zâwk dâwn nia. Chu chu tûnah hian in hna pawimawh ber a ni." tiin fiah leh chiang takin thu a pe ta zâwk a. Siama leh Muanpuia te chuan Pu Tea thutlukna chu hnial rual a ni lo tih hriain an bu nghat a. 

Pu Tea chuan an ralthuam ken zînga rifle pakhat chu a la kâng a, a load ṭha nghal rap rap a. Valtea bulah chuan pheiin, an pahnih chuan an inmelh a. A fapa Fela leh a nupui Pi Kungi te chu ngaihtuah hmel takin a han melh leh zâwk a, mahse an ṭhiante dinhmun derthâwng laka chhan chhuah chu tûnah hian an thil tih hmasak ber tûr a ni miau si.

Tichuan, inbe zui tawh lovin Valtea leh Pu Tea te chu sîkul office aṭang chuan an pên chhuak ta a. Kawngka an pêl chiah tih chuan Muanpuia chuan hmanhmawh lutukin kawngka chu a nem phui a, a chhung lam aṭangin nghet takin a kalh nghal rawk rawk a. Pâwn lama pên thâwm chu a hla tial tial a, office chhûng thim ruih ah chuan hmeichhe ho, Hlimpuii, Pi Kungi leh Muani te chu an inkuah chial a. Kimkima pawh a nu âwmah hlau thlaphâng takin a bîru a, hlauhna leh manganna chuan office chhung chu a uap hneh kher mai.

*********************************************************

Kawtthlêr reh ruih, mithi ruhro leh tiau chhum zing in a uap mup hnuaiah chuan, Khama chuan a M-16 rifle hmawr vawt ruih mai chuan Sawmtea chalah tak a la tin reng a. Sawmtea chuan a theihpatawpin hlauhna thup tumin Khama mit sen râm ah chuan a melh lêt ve ngar ngar a, mahse a chhûngril erawh a thlaphâng ru hle a ni. 

Awmpuia pawh chuan beidawng takin an hmabâk thihna chu lo thlir tlawk tlawk bâk tih theih a nei bik der si lo. "Vawi thum ka chhiar ang a... i la sawi duh lo a nih chuan, ka kâp darh vek ang che." Khama chuan a ti chher chher a, a ha a ṭhial ri rap rap bawk a. Chutah, a silai chu Awmpuia lamah a hmawr her in, "Chumi dawtah, nangmah hi i ni ang." a han ti zui leh hmiah a. 

Sawmtea chuan a ṭhiante himna a ngaihpawimawh em avâng chuan zam hmel a pu eih lova, hlau hauh lo hian Khama chu a la melh kal reng a. Khama chuan a sawi ang ngeiin, thinrim insehruh ṭeuh chung chuan a chhiar ṭan ta. "Khat..." a ti zâwi fiah kalh a. Sawmtea chu a la ngawi tlat. 

"Hnih..." Khama kutzungpui chuan silai trigger chu a si tawh. Mahse Sawmtea chuan a kâ a la  chip tlat. Khama thinrim lutuk chu a insûm thei tawh lo. "Hrep tak che u hian... thi rawh u!" tiin kah chu a tum ta tak tak mai a. Mahse, a silai a puah hma chiah chuan... Thal mu rawn thlâwk fûa hian Khama veilam sîra Khawchhak ral pakhat lo ding ngawi rûn tukhumah tak a rawn thil tlang ta zâwt mai le! 

Chu tlangval chu a rûm chhuak hrawk a, a silai thlauhin leiah chuan a bawk khup nghal dâwp a. Kawtthlêr thim kâr aṭanga Renga'n theihpatawpa fîmkhura a rawn kâp a ni tih an hriat rual chuan Khama leh a naute chu an phu zawk a, an tal buai phili nghal hle mai. Chutia an buai lai chu remchangah chuhin, Sawmtea chuan chêt rân a ngai tih hriain Khama silai chu a va chuh nghal thut a. 

Chumi rual chiah chuan Awmpuia pawh chu midang inrâl ring lo leh hawi buai lai chuan a tlân thut a, a ding hnai ber Luna chu theihpatawpa nâ in a va bawh thal nghal ṭhuai a! Leiah chuan an pahnihin an let ta tual tual a. Khawchhak ral dang la awm pali te chuan an silai an lek kâng suau a, Awmpuia chu kah hlum nghal theih ngei an beisei a. 

Mahse, leiah chuan Awmpuia leh Luna te chu theihpatawpa silai inchuhin an inchai buan buan a, tu zâwk nge tih pawh thliar hran har khawpa an inleh thal tawn sek avângin, an ṭhianpa Luna zâwk an kâp fûh palh ang tih hlauvin silai chu an hmet puak ngam mai bik si lo. Chutih lai tak chuan a rawn ri leh fua a. 

Thal mu tluang ṭha zet mai hi tlangval pali lo intin rân te zînga pakhat âwmah tak chuan a rawn bur leh ta chat mai le! Ani pawh chu phu uihin, leiah chuan a thal ve leh tawp a. Tûnah zet chuan a la bâng pathum te chuan thal mu rawn chhuahna lam chu an va hawi a. Kawtthlêr kil thim lai chu an tin a, an AK-47 chuan an kâp ta siah siah hlawm a.

Renga chu dawr pakhat phên ah a bîru kual zak zak a, silaimu in bang a rawn dên per chhawk chhawk ri kârah chuan a awmhmun a sawn kual zel a, an kâp fuh thei bik lo. Chutih rual vel chiah chuan Sawmtea leh Khama te pawh chu Khama M-16 rifle inchuh in an lo la inchai ngat ngat a. 

Mipa tha chak tak ve ve inchai tih takah an thawm a ring kher mai, an piah lawka dawr hlui tawh tak pakhat ah chuan an innawr lût ta rawk rawk a. Chutia Khawchhak ral pathum la awm ten Renga an kah mêk lai chuan, beisei loh lutuk thil a thleng leh ta tlat mai. Tlangval pathum  te zînga pakhat zâwk lu ah tak chuan silaimu hi a rawn fuh leh ta siah mai a! 

A thal ve leh tawp a, chutih rual chuan pakhat zawk kutah chuan silaimu dang a rawn fu leh a. Chu pa chu nâ tiin a eu zâwt a, a silai chu a thlauh nghal a. Rawn kâp tu te chu tu dang ni lovin, sîkul tlâng aṭanga an ṭhiante chhan chhuak tura rawn tlân thla ve ta, Pu Tea leh Valtea te ngei an ni! 

Khawchhak ral pahnihte chuan hmelma thar an rawn pûn rual chuan an dinhmun a derthâwng tih hriain, theihpatawpa chakin kawtthlêr thim lam pan chuan an tlânchhe ta ringawt a. Pu Tea leh Valtea chuan hmanhmawh lutukin chûng misual pahnihte chu an ûm zui nghal dâwr dâwr a.

Kawtthlêr laiah erawh Luna leh Awmpuia te chu thisen kâi hnuangin an lo la insual buan buan a. Luna silai chu kawngsir ah a per sawn dâwrh a, Luna chuan theihpatawpa ranga chhar lêt tumin ban mai a han tum a. Mahse Awmpuia chuan a thil tum hria in silai chu a lo chhir phei sak dâwrh a. 

Chutah zet chuan Luna thinrim insum zo lo chu a au vak vak a. Awmpuia bek ah chuan a hnek ta siah siah mai a. Awmpuia chu a taksa a lo chau tawh bawk nen, Luna chu a hneh lo kher mai, Luna chuan a sawisa a ni ber e. Dawr chhûng thim ruih ah chuan Sawmtea leh Khama pawh an lo la buai dun nasa mai a. 

Khama chuan Sawmtea dulah chuan a theihpatawpin a tlawh pawp a! Sawmtea chu a zâwi nghal hnak a, dawr chhuatah chuan a thal tawp mai a. Chu veleh Khama chuan M-16 rifle chu lek kângin Sawmtea chu a tin ta! Mahse Sawmtea che a râng tlat. A bula lo let reng, theitui ûm(glass bottle) ruak chu a ban a, Khama hmaiah tak chuan a vawm phei pawp mai a. 

Khama chuan silai chu a hmet puak hman lo, a hmaiah chuan a ri nghal chawrh a, a dâk âwrh a, a thal ve ta tawp a. Sawmtea chu theih leh theih lovin a rawn inbeng kâng a, M-16 let bal mai va chhar a tum chu, Khama'n a lo man hman tlat!  Khama chuan Sawmtea ke rêk ah a vuan a, theihpatawpin a pawt lêt hrawk a, Sawmtea chu leiah a tlu bawk leh thlawp a. 

Chutah Khama chuan a kâwnga a zeh chemte hriam tak chu a phawi nghal a. Sawmtea hnungzânga vih luh tumin a ṭhingṭhi kâng a, a tin ran ta mai a. Mahse Sawmtea chu a theihpatawpin a rawn leh hawi zâwk a, Khama pawh chu a buai a, a awmhmun a siam rem hman loh avângin a vih thelh a. 

Chemte chu a per sawn dâwrh a, kawngka bul sîrah chuan a tla ta daih a. Sawmtea chu a thlanin a bual huh vek tawh a, thâw chham lek lek chungin a rawn tho leh hram a. Mahse Khama chuan theihpatawpa nâ in Sawmtea chu a rawn pawm thut a, dawr bangah chuan Sawmtea tukhum ri chawrh khawpin a va nawr bet ta mai! 

Khama chuan Sawmtea hrawkah chuan theihpatawpin a rêk bet ta mai a. Sawmtea chuan a bânin Khama bân lian pui chu pawh sawn a han tum a, mahse a tha in a tlin ve tawh lo, a thâwk a chham hman ṭep a, a khaw hmuh te chu a thim ṭan ta. Mahse, Khama chu a phu uih a. A bân chu a zâwi nghal hnak a. Sawmtea chuan mak tiin a han en chiang chu, Khama tukhumah  chuan chemte hriam tak hi a lo bur vu mai a lo ni! 

Khama chu a dâk âwrh a, a khûr hlawk hlawk a, chhuatah chuan a thal ta tawp a. Sawmtea chuan a hrawk thip nâ ngut ngut dâwm chung chuan thâwk a la hrawk hrawk a, a rawn hawi chhuak a. Kawngka bulah chuan Renga chu a lo ding rân mai a! Renga chuan Khama thlauh chemte kha chharin a rawn vawm a lo ni. 

Renga chu rawn pên lûtin, Khama tukhum aṭang chuan chemte chu a han phawi ri hrawk a. Sawmtea chuan theih leh theih lovin a hrawk dâwm vawng vawng pahin, "Awmpuia... kha..." a rawn ti chhuak ṭâwk ṭâwk a. Renga chuan Khama M-16 let bâm chu a chhar lawk a, Sawmtea pawh chu dâwm in, an pahnih chuan Awmpuia chhan tûr in kawtthlêr lamah chuan an tlân chhuak nghal ta a.

***********************************************************

Kawtthler chhum zing mup mup karah chuan, Awmpuia chu leichhuatah thal tawpin a dul dâwm in a vial ngawih ngawih a. Luna, phuba lâk duhnaa khat liam tawh, thinrim rûm chhur chhur chuan dim baksak lo hian na tuar let reng Awmpuia chu a nâk nêm ah a rawn chhir pawp pawp mai a. 

Awmpuia chu thâw chham dâwn dâwn khawpin a khuh bawrh bawrh a, a tha in a tlin ve tawh lo a ni ber e. "Ti kha chuan i cho loh val i tawn tih i inhre chiang tawh ang maw, tlangval?" tiin Luna chuan ngeiawm tak leh thîp taka melh chhuk rûn chungin a han nuih vel a. Thâwk a han la halh halh a, a thlan fîm ina a bual huh vek, a hmai mawm hluam mai chu a bânin a han tuai puat a. 

A piah lawka kawtthlêra a silai (AK-47) lo let bal lam chu theihpatawpa chakin a va pan nghal vut a, a va chhar nghal a. Awmpuia lam hawi chuan muangchang leh intithei fahran hian a va lêt leh a. "Tûnah chuan... i thih a hun ta, a tâwk zo zai e." tiin a han khi suk a. Awmpuia erawh chu a chê hleithei tawh lova, nâ a tih luat avânga thâwk la hrawih hrawih in, chu thihna tualzawla a hringnun tâwpna tûr ni a a rin ngei chu beidawng takin a lo thlîr tlawk tlawk ringawt mai a ni. 

Luna chuan a silai chu a lek kâng ṭan ta. Mahse chutih lai tak chuan Luna kawtthlêr leichhuata a dinna bul chêta lungte chu silaimu in a rawn dên per chhawk chhawk avâng chuan, phu zawkin a zuang sawn nghal dawrh a. A hma lam kawtthlêr thim kâr chu a va melh rual chuan dâwr kawt aṭang chuan Sawmtea ngei mai chuan, Khama M-16 rifle hûm kâwh va in a rawn tin lêt rân chu a va hmu ta hlawl mai.

Sawmtea'n a rawn kap fu mai ang tih hlauvin a silai chu hmet puak ngam ta bîk lovin, theihpatawpa chakin kawtthlêr sîra in hlui pakhat phênah chuan a zuang lût nghal zawk a. Thâwm dîm theihpatawpin dawr bang leh in kâr vel thim laiah chuan a bîru kual ta zak zak a. Mahse, Sawmtea pawh chuan chutia kah vak vak ringawt chu hlawkna a awm dâwn lo tih hriain, a M-16 rifle chu a dârah a nghat a.

Hmanhmawh lutukin Awmpuia lam panin Renga nen chuan an tlân phei nghal dâwr dâwr a. Renga chuan Awmpuia nâ tuar khuh bawrh bawrh chu a kai tho vat a, a thawmhnaw bâl nuai chu a bên fâi sak mawlh mawlh a. "I ṭha em Awmpui? Hliam i nei em? Silai mu in a dêng fûh che em?" tiin hlauthawng takin a zawt nghal chûk chûk a. 

Awmpuia chuan thei leh thei lova thâwk lak hawk pahin, "Ka... ka ṭha e. Mahse min that teuh hle mai." tiin a lo chhâng a. Sawmtea chuan inring takin a M-16 rifle chu a lek kâng deuh a, kawtthlêr thim ruih mai chu en kual in a han hawi kual zak zak a. "Khawiah nge maw kha ramhuaipa kha a tlân bo hman le?" a ti nûah nûah a. 

Renga chuan Sawmtea dârah a va vuan a, "Sawmte, khapa kha chu theihnghilh rawh. Tûnah chuan thil pawimawh zâwk a awm tlat. Nichin khân, Pu Tea leh Valtea te kha sîkul tlâng aṭangin min pui tûrin an rawn tlân thla a sin. Ka hmu chiang a ni." tiin a hlauhthawn hmel hle. "Chuan, thil pakhat leh chu... Khawchhak ral pahnih hliam tuar lovin an tlânchhe bawk a ni." Renga bawk chuan a tih chhunzawm a. 

"Tûnah hian Pu Tea te chuan chûng mite chu an ûm zui in ka hria. Khawchhak ral hriam hrei nei ṭha, sâpêl thiam te kârah chuan an him rei dâwn lo tlat. Kan zawn chhuah vat an ngai a ni." tiin thutlukna a siam zui nghal a. Sawmtea leh Awmpuia te pawh chuan Renga thusawi chu a dik a ni tih hriain an lu an lo bu nghat a. 

Tichuan, hmanhmawh takin kawtthlêra Khawchhak ral ho, Renga kah hlum tak ruang bulah chuan an va kal a. An ralthuam ken, AK-47 leh pistol, puak-ruk silai bâkah an silaimu ah ṭhat te chu an la zung zung a. Tlangval pathum te chu theihpatawpa fîmkhur leh thâwm dîmin, an thiante te pahnih nungdama an hmuh lêt ngei beiseiin, thihna kawtthlêr thim kârah chuan an chêt chhunzawm ve leh ta a ni.

*******************************************

END OF EPISODE 3