ONCE UPON A TIME IN MIZORAM : SEASON 2 (Mizo zombie horror story) Written by : Aaron Malsawmdawngzuala Episode 1 : Sanctuary Lost

ONCE UPON A TIME IN MIZORAM : SEASON 2

(Mizo zombie horror story)

Written by : Aaron Malsawmdawngzuala

Episode 1 : Sanctuary Lost

************************************************

Favang thli vawt tak chuan Phulvar khua a rawn chhem heuh heuh a, Lungthlir khua aṭanga thihna rapthlak tak tlânchhiatsan a, rawn damchhuak mi sawmpanga velte tân chuan he khua hi beiseina thar a ni ngei ang. Phulvar khawtlang leh YMA hruaitute chuan khawngaihna leh lainatna thinlung nêna lo dawngsawngin, chaw lum tui takin an lo hrai puar a. 

An khaw YMA Hall lian lem lo tak, mahse him tura an ngaih hmunah chuan mutbu te  phahsakin thlamuang taka chawl hahdam turin an riah tîr ta hlawm a ni. Hall chhûngah chuan chauh hmel tak leh thlaphâng tak hmel pû in Lungthlir khaw mipui tlemte, damchhuak awmchhunte chu an mu thap a. 

An mitmeng aṭang chuan hlim hmel hmuh tur a awm lo, thihna hlauhawm takin a ûm phâk loh tura an tlânchhiatna lamah an taksa leh rilru a chau chhe zo tawh a ni ber mai. Meichher leh khawnvâr êng ruih hnuaiah chuan, 'Kan him ta e.' ti a inhnem chawp chungin muthilh tumin an inpuahchah mêk a.

Chutiang dinhmun khirh leh beidawnthlak kârah pawh chuan Pu Rina erawh a nungchang ngai a la thlah thei chuang lo. Lungthlir YMA President a nihna ang khan, chung damchhuakte zîngah chuan a la inla thu in ro a la rêl zut zut a. "Kha lamah khan in mutbu kha han thên rawh u, tawt deuh khan mu ula a lum a ni mai." tiin a thla a phân loh hmel bîk hle. 

Mite laka a thuneihna a la hloh lo tih târ lan tum ni âwm fahrin, thu a la pe kual zung zung reng a. Zân dar 9 a ri a, hall chhûng chu thâwm a reh ṭhiap tawh a. Pâwn lamah erawh chuan Phulvar YMA hruaitute leh tlangval rualte chuan ralvêngin meilum an âi a, meizial zu khu hlat hlat chungin an titi a. 

Heng an khaw mikhualte hi engtin nge an awm zêl dâwn a, khawilamah nge hma an lâk pui zêl ang tih chu an sawi ho laih laih a. Mahse, Lungthlir khuaa thil thleng rapthlak tak kha a tak takin an la hrethiam lova, thihna chuan a la rawn ûm zui mêk dawn a ni tih rêng an ngaihtuah pha lo.

Hall chhûng kil khatah chuan Bawihi, Puii leh Zauva te chu an la mu hil thei bik lo. Puan lum hnuaiah chuan inhnaih te in an mu a, hlauhthawnna leh beiseina inawm pawlh nuai kârah chuan zâwi tê tê in an titi ru sep sep a. An ṭhiante leh an chhungte theihnghilh harsa an ti in, an mitthlaah a la châm reng a ni.

Puii chuan beiseina sâng tak la nei chungin, "Kan khaw mi zawng zawng kha chu an thi vek lo tawp ang. Huan lamah te lo riak an awm ang a, ramhnuai leh daifêm pilril lamah te, a nih loh pawhin khaw dang panin keimahni ang bawkin an tlânchhia ang a, nungdamin an la awm hrim hrim ang." tiin zâwi sapin a sawi mial mial a. 

Bawihi erawh a thiltawn rapthlak tak avâng khan a ngaihtuahna a la pêng thei lo. A biangah mittui a luang ngiai ngiai a, aw khur dar darin, "Chaka leh Marema te kan chan ta mai kha... ka la ring thei lo. Ka mit ngeiin Marema an phih sawm lai kha ka hmu a, ka mangchhiaah hian min rawn ûm zui reng mai dâwn nimai hian ka hria." a ti vawng vawng a. 

An ṭhiante thih dân râwng lutuk khan a rilru a la tina ngawih ngawih a ni. Zauva chuan thâwk a han la hak a, a ṭhiante hnêm tum takin, "Ngawi teh u, inngaihtuah lungpuam lutuk lo teh ang u. Thil thleng chu a thleng vek tawh a, siamṭhat theih a ni tawh lo. Engpawh nise, Pathian khawngaihna zarah thihna lak aṭangin kan tlânchhuak a, dama kan la awm hrim hrim pawh hi thil lawmawm tawpkhawk a ni. Naktuk nî chhuak hi hmuh han beisei phawt teh ang." tiin thutak deuh hian a lo chhang a.

Chutih lai mek chuan, inthiar tura chhuak Zuia chu Hall chhûnga zun in aṭang chuan zâwi muangin a rawn chhuak a. A awm dân chu a dik lo tih a chiang hle. A thlan fîm a tla zawih zawih a, a pen zawng te chuan a tlu lo chauh va. A hmel ah chuan nâ tuar hmel ai mahin, hlauhthawnna râpthlak takin a man bet tlat tih a lang theiin, midang awmna aṭanga hla thei ang ber, hall sîr thim lai berah chuan a va mu kâwm ta ngal a.

Khûr dar dar chungin, midang hmuh loh tûr chuan a puan sin hnuaiah a kut phah chu a han bih thla a. A kut sîrah chuan mithi tho leh ho ha (teeth) hnuhma, thûk leh chiang lutuka kaw huau mai chu a lang kuau a. Khaw chhûnga an tlânchhiat lai khan hri kai pakhatin a lo seh hman chu niin, chu thil chu midang hriat hlauin a lo zêp ṭang ṭang a lo ni. 

Rei lo te-ah amah pawh chu chung ramhuai ho ang chuan a chang ve vat dâwn a ni tih a inhre reng a. A luhai chu a rawn zual zel a, a mar phu a muang tial tial a, a khua a sik hluah hluah bawk. A vun pawh chu a rawn var tan der mai, mahse a rilru erawh a la fim, hrehawm ti tak chung chuan mut luih tumin a han chhing a, mahse a taksa chu a dik tawh mawlh lo.

***********************************************

Phulvar YMA Hall kawtah chuan mei lian vak lo an chhem a, favang thli vawt takin thinghnah a chhem rik sur sur bâkah chuan, tlangval rual titi ri bâk hriat tûr a awm lo. YMA President, U Sangtea chu thingfâk hmangin meiling chu a hawlh kual a, a hmelah chuan ngaihtuahna thûk tak a sêng tih a hriat hle. 

A sîrah chuan Secretary Valpuia, leh tlangval ṭhangthar lam deuh Kima leh Ruata te an lo ṭhu ve bawk a. Meizial zu khu hlat hlat chungin, an khaw ṭhenawm Lungthlir khuaa thil thleng râpthlak tak chungchang chu an sawi ho mial mial a. "Kan hriat dân kha chuan Zova kha ramhnuaiah a kal a, a lo haw leh chuan ramhuai hri rapthlak tak a rawn hawn an ti a ni lawm ni?" tiin Kima chu a rawn ṭawng chhuak hmasa ber a. 

"Lungthlir khaw ho sâwi dân phei chuan, thi tawh hnu, ruang an khuh fel tawh te thlengin an rawn tho leh a, mihring nungdam sa an pet thlêr hawk hawk an ti a nih chu.." tiin a sawi zawm leh a, a thil sawi rapthlak lutuk avang chuan a hmulthi a ding sung sung hial a. Valpuia chuan a meizial zûk lai chu lei lamah a theh thla a, a boot in a rap hrual zui nghal a. 

"Thawnthu phuahchawp a nih ka ring e." a lo ti hmuk a. "Ramhuai phei chu ka ti lo, mahse hri hlauhawm tak, thisen aṭanga inkaichhâwn theih chu a ni ngei ang. Khâng damchhuak rawn tlânchhia te mitmeng kha in hmu em? An daw lo tawp ang. Zohmingthanga khân Burma ramri vel aṭangin natna hrik thar, Mizo ten kan la hriat ngai miah loh a rawn hawn lût a ni ngei ang. Chuvâng a lawm heng rawn tlânchhia te pawh hi hall chhûnga kan khunghran (quarantine) tlat ni." tiin a han sawi chhunzawm a.

U Sangtea chuan khuh kharh kharh chungin aw a rawn thian a, midang chu an ngawi nghal ṭhap a. "Ramhuai pawh nise, natna hrik pawh nise, tunah chuan kan khaw dâiah ral lian a rawn hnai tawh tlat. Kan ṭhenawm khaw lian ve tak Lungthlir meuh pawh ni khat lekah a tlu chhe vek a nia. Heng kan mikhualte hi kan khawngaih a, nungdama an lo la awm hi kan lawmpui rualin, Phulvar khua hi dinhmun hlauhawmah kan dah thei lo." a ti nghet deuh charh a. 

A awki aṭang chuan khawtlang himna tura mawhphurhna sâng tak a phur tih a lang reng. "Naktuk aṭang chuan khaw luhna kawngpui zawng zawngah duty kan indah nghet ang." U Sangtea bawk chuan a han tih zawm leh a. "Ruata, nangin naktuk zîngah Valpuia nen silai nen khaw dâi in va hrût ang a, Lungthlir lam aṭanga rawn kal an awm leh awm loh in va thlithlai dâwn nia. Tin, tlangval dangte pawh hmanraw awm ang ang, silai, hreipui leh chem nen lo inring reng sela. Tumah khaw dâia chhuah phal a ni rih lo ang." tiin Ruata chu a hrilh a.

Ruata chuan a lu a bu nghat a, "Anih leh heng YMA hall chhûnga damchhuak ho hi engtin nge niang? Pu Rina lahin thu rawn pêk zut zut a ching si, an inla thu leh lutuk hi a buaithlak ṭep a ni." a han ti ve a. Valpuia chuan, "Naktukah an taksa kan endik (check) vek ang. Hliam emaw, sehna hnuhma emaw an nei a nih chuan, khawngaih viau mah ila kan khua aṭang hian hnawhchhuah an ngai ang. Pawi ka ti, mahse kan khua leh tui, kan chhungte an him theih nan tih hreh kan nei tur a ni lo." tiin a chhang a.

An titi laih laih lai chuan, ramhnuai thim zâwng aṭang chuan ui hi a rawn bauh vak vak a, mahse reiloteah thâwm chu a reh zui leh nghal mai a. U Sangtea chuan a silai chu a han ban a, ngun thlûk takin tlangval ho chu a melh kual a. "Inring rengin awm ang u. Zanin hian engmah a thleng lo a nih pawhin naktuk lamah chuan boruak a inthlâk thut thei a nia." tiin a tlangvalte chu a fuih a. An meilum chu ai lai chu a la inchhem alh hluah hluah a, pâwn lam boruak a daih ruih laiin, Hall chhungah erawh chuan thihna mângchhia a inṭan dawn mêk tih rêng an hre der mai si lo.

**************************************************************

Zan dar 10 leh a chanve a ri a, YMA hall chhung chu a reh in a reh tlawk tlawk mai. Pâwn lam boruak chu vawt ruih mah se hall chhung boruak erawh a tawt in a uap churh thung a. Lungthlir khaw mipuite pawh an chau bawk a, tui takin an muhil deuh vek tawh a, thâwm hriat tur dang awm lovin an thaw ri sâk sâk chauh chu hriat tur a awm a ni.

Chutih lai chuan, pa pakhat Pu Lura chu a zun a chhuah em avangin a rawn harh hlawl a. A mutna aṭanga tho tuah tuah chungin a mit a nuai nawk nawk a, hall chhung thim deuh ruih hnuaiah chuan zun in lam pan tum chuan a phei chhat chhat a. A kal phei mek lai chuan hall kil bera mutbu pakhata lo mu kawm chial, khur beuh beuh mai, Zuia chu a va hmu fuh ta a.

Pu Lura chuan ngaihṭha lo deuh tak hian a han pan hnai a, "Zuia, i dam lo em ni? Vawt i ti viau elaw?" tiin a han bia a. Mahse, lehlam hawi tlat chung chuan Zuia chuan a chhang hauh lo; a khabe chu a inkhawng ri dawt dawt a, a ha a thial ri bap bap bawk. Chutiang em ema a han khurh takah chuan Pu Lura ngaih chu a ṭha thei ta zân lova, hmanhmawh takin bang kil thim zinga light chu a va hmet êng ta phut mai a.

Chu light rawn êng thut avang chuan thim hnuaia lo la meng kar Zauva, Puii leh Bawihi te pawh chu an rawn hawi chhuak nghal a. Pu Lura'n Zuia a lo buaipui mek lai chu fiah takin an va hmu a, an ṭhianpa Zuia awmdan maksak tak chuan an mit a la nghal chat mai. Zauva phei chu mipa fing leh fîmkhur tih takah, a tukhum sam a hit nghal mup a, thil ṭhalo tak leh hlauhawm tak a thleng dawn tih hriatna (instinct) a rawn neih avang chuan a inring nghal vat a.

Pu Lura chuan Zuia dar a va khawih chiah tih chuan, Zuia chu a rawn eu ngawng ngawng a, a rawn rûm chhuak ta hrawih hrawih mai. "Eng nge awmzia Zuia... i ṭha em?" mak ti taka Pu Lura'n a tih rual chiah chuan Zuia chu a rawn tho thut a. A mitmu var vek tawh leh a hmel dang dâwp mai an hmuh chuan, hri a lo kai fel der tawh a ni tih chu Pu Lura chuan a hrethiam nghal a, mahse chet lak hman a ni tawh lo.

Rang lutuk leh mihring pangngai chakna piah lam hian Zuia chuan Pu Lura chu a bawh thlu ta thut mai a. Chhuatah chuan a theh tlu ṭhuai a, Pu Lura hrawkah tak chuan a seh ta ngawng ngawng mai a. Thisen a per nghal chuai a, Pu Lura nâ ti leh mangang au thawm rapthlak tak mai chuan YMA Hall chhung reh tak mai chu a ti khawk rum rum mai. 

Chu thâwm râpthlâk tak avâng chuan midang zawng zawng pawh chu an rawn harh nghal sup sup a, Zauva, Bawihi leh Puii te pawh chu hmanhmawh lutukin an tho chhuak nghal a. Zuia'n chhuata Pu Lura thisen chhuak phung chunga a lo seh ri bawrh bawrh an hmuh chuan, hall chhunga awmte chu an au ta chûl mai a, hlauhna namen lovin a tuam ta hlup hlup mai. 

YMA President Pu Rina pawh chu a mutna aṭangin a rawn tho chhuak a, a thil hmuh rapthlak tak avang chuan zun cheh lo chauhvin a khur nghal hlawk hlawk a. Midang ngaihtuah lêk lovin, "Min pui ru! Min pui ru! Hrikai an awm a nia!" tiin a au vak vak a, hall kawngka pui lam pan chuan tlan pheiin kawngka chu a chum vak vak a.

Pu Lura chu a zawi ta hnak a, chutah Zuia chuan a thisen dawt lai chu chawlhsanin, hall chhunga kîl tin aṭanga tlânchhiat tuma che buai nuai nuai mipui lam chu a rawn hawi ta a. A kâ aṭanga thisen far tlawk tlawk chung chuan, a hnaih ber bera awmte chu a rawn phih thlu pawp pawp a, ramsa rilṭâm sa pel ang maiin a seh zui ta hmiah hmiah mai a. 

Chutih lai tak chuan, second sâwm vél âwrh chauh a liam ang tihah, thi tawh tura an ngaih Pu Lura ngei mai pawh chu a rawn inbeng kang tuih ṭuih a. Hri chu lo kai ve tawh in a hrawk thlêr hnuang aṭanga thisen chik puat puat chung chuan midang seh tur zawngin a rawn tlân phei ve ta buan buan mai.

Hall chhung chu thisen rimin a khat nghal mup a, au thâwm leh na tuar ṭap thâwm chuan a luah khat zo ta. Pâwn lamah chuan Phulvar YMA hruaitute leh tlangval ralvênga lo awm mek te chuan hall chhunga mangang au thawm chu chiang takin an lo hria a. Hmanhmawh lutukin kawngka chu an han hawng a. Mahse, kawngka a inhawng zo chiah tihah chuan Pu Rina chu khur hlawk hlawk chungin a rawn zuang chhuak nawlh a. 

YMA President U Sangtea chu nêk thal tawp in, hnunglam hawi lék lovin ramhnuai thim lam panin bak lengin a tlanchhe zui nghal vang vang a. Chu veleh, Pu Rina rawn chhuah rual rual chuan kawngka inhawng huau ah chuan hall chhunga hri kai rual ho chu an rawn baw chhuak ta huk mai le! 

U Sangtea leh tlangval dangte chuan silai meuh pawh chuh hman lék lovin chûng hri kai rualte lakah chuan inbeihna rapthlak tak an hmachhawn a ngai ta. Hall kawt chu thisen chhuahna hmunah a chang nghal a, an buai ta nuai nuai mai. Chutih laiin hall chhung lamah erawh, Zauva chuan theihpatawpin Bawihi leh Puii chu a véng a, hri kai hovin an rawn hnaih theih loh nan indang kualin, hall chhunga zun in lamah chuan thiam takin a tlân luh pui a, an inkalh hnan thei ta hram a ni.

Pâwn lama hlau mangang au thawm leh hri kai rûm thâwm nasa lutuk chu zân thim reh tak hnuaiah chuan a khâwk rum rum a. Chu thâwm ring lutuk avâng chuan YMA hall bul hnai leh ṭhenawm khawvêng, mu tawhte pawh chu an rawn harh hlawm a. 'Eng thil nge nita ngai?' tiin kawngka rawn hawngin pawn lamah chuan an rawn chhuak sap sap hlawm a. 

Mahse, in aṭanga an rawn pên chhuak chiah chu, hall aṭanga rawn pût chhuak hri kai hovin an lo ûm darh mek te nen intawkin, a lo chhuak hmasa sa chu thim tham hnuaiah hri kai ho chuan an lo zuan in an seh nghal chawt chawt a. Hlauhna rapthlak tak chuan khua chu a tuam mek zel  a, ralmuang taka mu ṭhin Phulvar khua pawh chu Lungthlir ang bawk khan thihna khurah tla in, a buai ve ta nuai nuai mai a ni.

**********************************************************

Zan dar 11:30 a pel duai tawh a. Ramhnuai pilril leh thuk tak, mihring ke hniak in a chhui phak mang lohna hmunah chuan, kalsan tak Lungthlir khaw tlangval Sawmtea leh a ṭhiante chu an la tâng khâwm ṭhap mai a. Chu assam-type thlam hlui leh chul tawh tak chhungah chuan Sawmtea, Pu Tea te nupa, Fela, Valtea, Siama, Renga, Muanpuia, Muani leh a fapa Kimkima, Hlimpuii leh Awmpuia te chu an tawm khur tlawk tlawk a. 

Khaw chhung lamah chhanchhuahna a thleng tawh tih leh Phulvar khua lamah hri a pung chho mek tih vel te chu engmah rêng an hre ve lova, khawvel aṭanga paih bo hmak ang mai an ni. Thlam kawtah chuan zan thli vawt takin thinghnah a chhem rik sur sur bak thâwm hriat tur a awm lo. 

Valtea chu thlam kawt meilum bulah chuan mut pawh mu thei lovin a ṭhu ngawi tlawk tlawk a. A hma zâwna meiling vam ham mai chu khap miah lovin a melh vung vung a, a rilru chuan thil tam tak a ngaihtuah tih a hriat hle. Thihna lak aṭanga damchhuak chu an ni ngei a, mahse an hma hun chu a thim in a pik ngawih ngawih si a ni.

Chutia Valtea'n meilum a lo âi ngawih vung vung lai chuan, thlam kawngkhar chu zawi te in a rawn ri ṭhawt a. Renga chu chauh hmel tak hian a rawn pen chhuak chhat chhat a, Valtea bulah chuan rawn kal hnaiin, ngawi rengin meilum kiangah chuan a rawn ṭhu ve a. Thingfâk tawi te hi a chhar a, meiling chu a han hawlh tha ve satliah a, an ngawi dun rauh rauh a.

"Naktuk lamah hian eng nge kan tih zel ang, Valte?" tiin Renga chuan aw zawi leh chau takin a rawn ṭawng chhuak hmasa a. "Helai hmunah hian engtiang fako in nge kan tawm reng theih ang, engtin nge hma kan lak zêl ang? Khaw dang pan in kan chhuak dâwn nge, helaiah hian kan lo inbengbel rih dâwn?" tiin a awki atang chuan beiseina ai mahin beidawnna awki a lang tel mah zawk.

Valtea chuan a lu a tuai puat a, a thaw chhuak hawk a. "Ngaihdan pawh ka la siam thiam mai lo a ni e, Renga. Helai hmun aṭang hi chuan kan khua Lungthlir chu sawi loh, khaw dang hrim hrim hi nî hnih nî thum kea kal ngat ngat hnu pawhin a la hla vang vang lutuk. Ramhnuai kawng bumboh leh sa pelhna hnu chauh a awm a, hetiang dinhmunah hi chuan khaw lam pan a chhuah leh chuk chuk chi a ni dawn em ni tih ka ngaihtuah a ni." tiin beidawng aw lek lek hian a chhang a.

Renga chuan a hmai a tuai pawk a, a mangang ru takzet a ni. "Ni e, i ti dik ang. Eitur leh in tûr te chu nî hnih nî thum chhung atan chu helai thlam aṭang hian kan la hmu thei mai ang a. Mahse khua a rei ang a, eitur kan hmu reng dâwn lova. Chutah, thlasik a hnai tial tial tawh si a, khua a rawn vawt chho ṭan tawh nen, lum taka inthuamna tur thawmhnaw lum kan nei bawk si lo. Kimkima, mipa naupang chumchiap tak kan la kawl tel bawk si nen, helai ramhnuaiah hi chuan kan la buai chho hle dawn in ka hria." tiin a ngaihtuahna pik lutuk chu a sawi chhuak mawlh mawlh a.

An titi mawlh mawlh lai chuan Pu Tea chu puanlum pan te sin in thlam aṭang chuan a rawn chhuak ve leh hlawl a. A hmelah chuan a thla ala phângin a mu hleithei bik lo tih a lang reng. Tlangval pahnih te bula rawn ṭhut ve pah chuan, meilum chu a han ai ve a. Pu Tea chuan Valtea chu a melh vung vung a, "Valte, thil pakhat ka zawt ang che aw. Engtin nge helai ramhnuai pilril lutukah hian hetiang thlam, assam-type lian ṭha tak a awm tih i hriat reng reng a?" tiin a rawn zawt deuh thut mai.

Valtea chu a ngawi deuh vang vang a, mei khu in a hmai a ur vang nge a mit chu a chhing deuh sawk a. "Keima hmuh chhuah a ni lo, Pu Te. Ka Putea khân a sawi ṭhin a. Helai hmun, Tuivai lui kama ram tial, tu ma chim phak lohna ruam ah hian inthupna tur in ṭha tak a awm tih min hrilh fo ṭhin alawm." tiin zawi sup hian a chhang a.

A thusawi chu rawn sawi chhunzawm lehin, "Kum 1966 a Mizo hnam in Vai laka zalenna kan sual lai, Rambuai kan tih mai hun lai vel khan... MNF sipai ten an bihrukna tur leh ralthuam dah ṭhat nan, sipai hovin he thlam assam-type hi a rûkin an sa a ni. Vai sipai hovin an rawn luhchhuah mai mai theih loh nan kawng pawh tuipui dâna kal zel ngai tur leh, a kual thei ang bera riruam an zawnna hmun a ni a. MNF sipai bang ho khan helaiah hian an nunna chhan nan hun rei tak an lo tawm ve tawh a ni." tiin a sawi a.

Pu Tea chuan chu thu a hriat chuan a bu nghat nghat a. "A va han mak ve le! Chutiang khawpa hmun him leh thuruk chu a lo ni maw. Anih leh i Putea chu... khaw nge tunah a awm tak a? Hemi buaina, hri hlauhawm tak a rawn len hma hian a boral tawh nge ni a, he natna hrik rapthlak tak hian a man ve tawh zawk?" tiin a zawt zui nghal a.

Chu zawhna a hriat rual chuan Valtea hmel chu a rawn inthlak thut , a mittui rawn tling chu thup tumin a nui lui sak a, mahse a nui hmelah chuan natna a lang chiang hle tho. "Ka Putea ngei pawh khan kha hri râpthlak tak kha a kai ve a ni. Amah ngeiin helai hmun hi min kawhhmuh a... mahse pawi ta ber chu... ramsa kawlh ang maia a rawn inthlak takah khan, keima kut ngei hian ka sah hlum a ngai ta a ni." a ti zawi raih a. Chu thil a sawi zawh rual chuan, zan thli vawt tak chuan thlam kawt chu a rawn chhem vawt zual sawt a, tumah rêng an ṭawng chhuak thei tawh lo.

**********************************************************

Thlam chhung boruak chu a reh in a reh tlawk tlawk a, ramhnuai thli thaw heuh heuh leh zan ramsa hrâm ṭhiak ṭhiak thawm tih loh chu thawm dang hriat tur a awm lo. Chhuatlaiah chuan ni lenga tlân chhia leh thlaphang taka hun hmangtu, Lungthlir khaw damchhuakte chu chauh luat vangin puan hlui leh chul tawh tak hnuaiah chuan an mu kâwm chial hlawm a. 

Chu thlam chhung uap leh pik tak karah chuan, Sawmtea chu a mutna aṭangin zawi muangin a rawn tho tuah tuah a. A mitmengah chuan muthilh theih lohna leh thlaphanna a inlar pawlh nawk a, midang tih harh hlau takin thlam tukverh lam pan chuan a phei chhat chhat a. Tukverh bulah chuan ṭhu in, pawn lam boruak chu a thlir vung vung a. 

Zan thla êng mawi tak mai chuan thlam thlang lawka Tuivai lui luang ri her her chu a rawn chhun tle sar sar a, chu hmun reh leh pilril tak chu a thlamuanthlak hmel ruih mai. Mahse Sawmtea thinlung erawh chu chu tui luang lai ang chuan a dam ve thei tlat lo. Khawvel a reh poh leh a chhungril a buai a, nî danga hetiang thla êng hnuaia an chhungkua hlim taka an titi ho ṭhin laite chuan a rawn deng thar awn awn a.

A mit a han chhing a, mahse thlamuanna hmuh ahnekin a thil tawn rapthlak takte kha chiang lutukin a mitthlaah a rawn inlar zut zut zawk si. Nî lengin a hmangaih, amah hringtu a nu ngei mai kha nungdama hmuh beiseiin a zawng a nih kha. Mahse, beiseina nena a va hmuh chhuah meuh chuan, a nu kha a nu a lo ni tawh lo! 

Hri tihbaiawm leh natna rapthlak takin a man ve tawh avangin, a mitmu var vek leh kâ aṭanga thisen luang ngiai ngiai chungin, a fapa ngei mai chu seh tuma ramsa kawlh ang maia a rawn pan lai kha a hmu lêt leh uar uar a. Chu mângchhia rapthlak tak avang chuan Sawmtea biangah mittui lum a rawn luang thla ta zawih zawih a, mipa puitling tak ni ṭhin mah se, a nu a ngaihna leh a chan dan rapthlak lutuk chuan a thinlung a vit ngut ngut a ni ber mai.

Chutih lai chuan, a mutna piah lawk aṭangin thawm zawi te a rawn awm a. Hlimpuii chu a mutna puan sin lai theh hlimin a rawn harh ve hlawl mai. A u, puitling leh innghahna tlâk tak, tukverh bula mal tak leh khawhar taka lo ṭhu tlawk tlawk a va hmuh chuan a lainat em em a. 

An chhungkaw chunga thil thleng rapthlak takte avanga a u in mawhphurhna sâng tak leh hrehawm tak a phurh ziate chu a hriatthiam pui a. Khawngaih lutuk avangin a biangah mittui a rawn hnam ve nghal sawk a. Zawi tein Hlimpuii chu a tho chhuak a, a u bulah chuan va kal hnaiin, ngawi rengin a hnunglam aṭang chuan a nghawngah a va kuah thlawp a. 

A nauin a rawn kuah takah chuan Sawmtea pawh a insûm zo tawh bik lo, a nau kut vawt thler mai chu a lo hum ve vawng vawng a. He khawvelah hian inhnemna tur leh innghahna tur chu an pahnih chauh, an unau chauh chu an ni tawh tih inhriain chu thlam tukverh bul, thla êng mawi tak hnuaiah chuan aw rawl chhuah ngam si lovin an inkuah a, an ṭap dun tlawk tlawk mai.

***************************************************

2 WEEKS LATER

Kar hnih ngawt a liam ta. Kha ramhnuai pilril leh thim tak, MNF sipai ho bihrukna thlam hlui takah khan Sawmtea te rual inkulh ta tawpin, lungngaihna leh manganna kârah an dinhmun mil zela khawsak dân an thiam chho ve ta zêl a. Silaimu an neih tlêm tawh em avângin an inrên a ngai a, chuvâng chuan sâpelh nân mipa hovin thal (bow and arrow) te an siam chawp a. 

Nî lengin mipa ho chuan eitûr ngaihtuahin theih tawp an chhuah a, sazu thang te, sakhi thang te leh ramsa dang awh theihna tûr thang hrang hrang te an kam thin a. An tlânchhiat ni a an thawmhnaw hak ngai char char te kha an ha tawh bîk lo. Mipa ho chu nitin inchhâwkin, thlam aṭanga hla vak lo 'Zawmthang ruam' lamah an han chho ṭhîn a; tah chuan hri kai an lo thah takte ruang aṭangin an thawmhnaw hak lai te chu an han hlihsak a, ṭûl leh mamawh hun atâna hman tûrin an rawn hawn ṭeuh ṭhîn a ni. 

Thlam thlang lawkah khan insûkna tûr lui tui thianghlim tak a lo awm hlauh bawk nen, chu'ng an thawmhnaw hawnte chu an lo su fai zêl a. Tin, thlam chhûngah khan MNF sipai ho hman hnu bêl hlui tlêm azawng a lo awm sa hlauh bawk a, eitûr chhuan lum nân leh sa rep nân hmangin, riltâmin awm em em lo mah se, hetiang ringawt hi chuan hun rei a daih dâwn lo tih erawh an chhûngrilah an hre vek tho a ni.

Tûk khat chu, zîng dâifîm tlâk laia ni chhuakin tiau chhum a rawn chhun ên phêt phêt lai chuan, ramchhuak tûrin mipa pathumte chu an inpeih leh ta at mai. Sawmtea chuan a thal siam chawp chu nghet takin a ak a, a hreipui pawh a kawngah a zep ṭha sauh sauh a, Valtea leh Renga pawh ralthuam neih ang ang nên sa zawng tûrin an inpuahchah mêk bawk a. 

Renga chuan a sam sei tak chu a tawn tâwm mawlh mawlh a, thlam kawtah chuan Pu Tea chu rawn chhuakin, chhuak tûrte chu ngun takin a rawn thlîr a. "Fimkhur hle ang che u aw... sa pêl in ni tih inhria ula, mahse nangmahni pêltu ramhuai ho pawh kha ramhnuaiah hian an la vâkvai reng maithei a nia. Thâwm dâm ula, in kal hla lutuk tûr a ni lo." tiin a thlaphâng ru tak chung chuan a chah ngun mawlh mawlh hl. Tlangval pathumte chuan an lu an bu nghat a, chhan pawh chhâng zui lem lo chuan ramhnuai thim chhah mup lam pan chuan thâwm dîm takin an pên liam ta a.

**********************************************************

Chhun pachang a ni a, tiau chhum zing mup ṭhin pawh kha tlemin a kian ve deuh tawh avângin, ni êngin ramhnuai hnim pik tak chu a rawn chhun êng ve ṭan a. Ramhnuai pilril tak aṭanga damchhuakte chuan hun kal tawh boruak rit tak te kha theihnghilh tumin thlam kawtah chuan an ṭhu khâwm laih a. 

Pu Tea te nupa, an fapa Fela, Muanpuia, Muani leh a fapa Kimkima, Siama, Awmpuia leh Hlimpuii te chu eng eng emaw sawiin an lo titi a. An hlim nui ri pawh ni tam tak hnua a vawikhatna atân ramhnuaiah chuan a ri ve raih raih a. Mahse, chu an thlamuanna chuan rei a daih dâwn lo tih rêng an hre lo.

An titi laih laih lai chuan, ramhnuai kil khat, hnim pik tak kar aṭang chuan mipa pali, ralthuam famkim nena inthuam hi an rawn lang ta thut mai! An silai ken lai—AK-47 leh Revolver ṭha mi hlîr leh a dang tam tak ak bawk te chuan thlam kawta ṭhu ho chu an rawn tin nghal ṭhap mai a. Heng mite hi an landan aṭang rengin Mizo tlangval pangngai an ni lo tih a hriat nghal a. 

An hmel a hriam in a rorum em em a, 1980s bawr vela Mizo ten hlauh en a kan en ṭhin, Burma ramri aṭanga ralthuam tawlhru ṭhin 'khawchhak ral' an tih ngei mai kha an ni tih a hriat theih nghal hle a ni. Hmeichhe ho chu an phu chiang kher mai, hlauhna in a ṭhâm nghal a, theihpatawpa an kâ hupin an tawm chawih chawih a. 

Kimkima phei chu hlau lutukin a nu Muani hnungah a biru nghal a, a khur dawt dawt a. Siama leh Awmpuia te pawh rang lutukin an inperh tho nghal a, an inring nghal at na in, ralthuam leh hmanrua zawng zawng thlam chhûngah a awm vek avangin chet han lâk ngaihna rêng a awm si lo. 

Pu Tea chu pa ber a nihna angin theihpatawpa hlau lo ang taka lan tumin a rawn ding chhuak a. "Tute nge in nih a? Eng nge in duh?" tiin a han zawt a. An hotupa ber, pa sa ṭha tak leh hmel rorum tak, Luna chuan a silai hmawra Pu Tea tin pahin, Mizo ṭawng pai deuh hlek hian, "Tute nge kan nih in hriat a ngai lo, tute nge in nih zâwk?" tiin a zawt lêt khur khur a. 

Pu Tea chuan aw thian kharh in, "Keini hi Lungthlir khaw mi kan ni a. Kan khuaah hri rapthlak takin min rawn luhchilh avangin kan rawn tlânchhia a ni. Mi zawng zawng an thi tawh a, keini chauh hi he ramhnuaia damchhuak kan ni tawh." tiin a han hrilh a. Chu thu an hriat rual chuan Luna leh a naute chu za em em hian an nui chhuak ta vak vak a. 

Thawnthu phuahchawp emaw tiin an nuihzat kher mai. Luna nauten anmahni ṭawng (Burma/Lai ṭawng) a thil eng emaw sawia an han nuih zui bawk bawkte chuan thlam kawta awmte hlauhna chu a tizual hle a, an ṭawng hriatthiam loh an hman avang chuan an dinhmun chu a ralkhel zual ngawih ngawih a ni tih a chiang reng. 

Luna chuan a nui hmel chu a thlâk thut a, a silai chu Pu Tea awmah tak rawn chuktuahin, "Dâwt min hrilh suh! Thudik min hrilh nghal rawh!" a ti vin ta ṭhawt a. Chutah Siama chu rawn pên chhuakin, "Thudik a sawi a nih chu. Ramhuai an ni nge, natna hrik kan hre lo... mahse mi thi tawh an rawn tho leh a, mitdang seh kualin hri chuan khaw pum a tuam vek a ni." a rawn ti ve fak a. 

Luna chuan Siama chu a melh vung vung a, a va pan hnaih deuh hnuah Siama ban dinglam bul  chu a va hmu fuh a. "Ngati nge i kut kha? Engati nge a bun a?" tiin a zawt a. Siama chuan a kut bul chu a melh a, "Hri kai pakhatin min seh a. Hri a darh zêl loh nan a rang thei ang berin ka ṭhianten min tan sak a nih hi." tiin hlauhna nei miah lovin a chhâng a.

Chu thu a hriat meuh chuan Luna pawh a hmel a tak nghal rûn a. A nau te zinga pakhat, mitmeng hur hmel leh tenawm hmel tak pu, Lungmuana chuan Burma ṭawngin a boss chu a rawn bia a, Luna chuan Mizo ṭawngin, "A nih chuan Lungthlir khuaah chuan min hruai rawh u. Tah chuan in dâwrna tûr ralthuam kan thukru a, chu chu kan la dâwn a ni." a rawn ti chher chher a. 

Mahse Pu Tea chuan, "A theih loh! Hri-kai hlauhawm tak tak an tam lutuk tawh a, naupangte leh hmeichhia kan ni hlawm si a, a him lo..." tiin a lo hnial a. Pu Tea'n a sawi zawh hma hauh chuan Luna chu a che ta thut mai. A AK-47 chu thlahin a kawnga a zep Revolver lian tak chu a phawi zawk a, Awmpuia ke bul chhuatah tak chuan a kâp ri ta ṭhuai mai! 

Thâwm a ring in a thleng thut bawk a, hmeichhe ho chu an ṭê ta tuar a. Chu veleh Luna chuan rang lutukin a AK-47 silai kawm (rifle butt) chuan Awmpuia bekah tak chuan a rawn chhu  dâwp a, a thal tawp mai. Awmpuia chu nâ tiin leiah a vial nghal ngawih ngawih a, a lu aṭangin thisen a rawn pût nghal zung zung a. 

Luna chuan silai la khu vat vat chungin, "Ka fiamthu emaw in ti em ni? Lungthlir khuaah chuan min hruai dâwn nge dâwn lo?" tiin a vîn leh ta khur khur a. Chutah zet chuan hmeichhe ho chu an ṭap chhuak ta hial a. Lungmuana chu a rawn pên chhuak a, ramsa kawlh ang maia rawn che thutin Fela chu a kawr âwmah a rawn ṭhâm a, dim lo lutukin a rawn pawt phei nghal hlawk hlawk a. 

Pi Kungi chuan beidawng ṭap aw ṭuau chungin, "Ni lo... khawngaihin ka fapa kha chu khawih suh u..." tiin puih tumin a rawn tlan phei a. Mahse Luna chuan a silaiin Pi Kungi hmaiah tak chuan a lo tin chat a, "Ngawi hmak rawh!" a ti vin ṭhawt a. Pi Kungi chu hlauin a tawlh hnung leh nghal dâwrh a.

Luna chuan fiah fakin, "He naupang hi kan bulah a kal ang. In sa rep te leh in hmanraw neih ṭha zawng zawng kan la bawk ang. Naktukah eitur ṭha tak in peih sa ang a, chuan Lungthlir khua atangin kan rawn let leh ang. Thu in awih lo a nih chuan, he naupang hi a thi ang." a ti khauh fak a. 

Tichuan, a naute pahnih chu thlam chhûngah luh tîrin, an silaimu neih chhun tlêmte, chem ṭha leh sa rep an lo dah that te chu ip ah thunin an lak tîr ta vek a. Mahse eng emaw chen an la dam khawchhuah theih nan ti ni awm takin eitur tlêm leh hmanraw chhia erawh an hnutchhiah a. 

Smuggler ho kal tûra an inbuatsaih mêk lai chuan, Lungmuana chuan a thil ruhte phur chhuah pahin Hlimpuii lo hlauthawng ding kâwm chial chu a va pel a. Hlimpuii hmelṭhatna chuan a mit a la nghal zar a, Lai ṭawnga thil eng emaw  tenawm tak sawi sup pahin Hlimpuii banah chuan a va man ta chawt a. 

Hlimpuii chu hlau lutukin a ṭê tuar a, theihpatawpa tal chhuah tumin Lungmuana âwmah chuan a namsawn nghal dâwrh a. A beisei loh taka Hlimpuiin a lo namsaw ve khanglang avang chuan Lungmuana chu a thinur ta phut a, a kut lian leh hrawl tak chuan Hlimpuii biangah tak chuan na lutukin a beng let ta siah a, Hlimpuii chu leiah a tlu thal nghal dâwp a.

Chu thil an hmuh rual chuan Siama leh Awmpuia chu thinrim lutukin Lungmuana khawih let tumin an rawn dâwk chhuak nghal zawk a. Mahse smuggler dangte chuan an silai chu kâh inpeih at in an lo lek kawh nghal ṭhap a. Luna chuan Lungmuana chu a rawn pawt sawn dâwrh a, Burma ṭawngin a rawn hau hrep a. 

Lungmuana chu phun hluk chungin a silai nên a kalsawn ta hmuk a. Luna chuan Pu Tea a melh leh rûn a, "Naktuk zingah kan lo kal leh ang. In fapa in hmuh let duh chuan min lo nghak ang che u." tiin a vau zui a. Fela chu hruaiin ramhnuai pilril lamah chuan an liam pui ta a. Pi Kungi chu leiah ṭhu hnawkin a ṭap zawih zawih a, Muani leh Siama ten Awmpuia leh Hlimpuii chu an buaipui zui nghal a.

****************************************************

Ramhnuai hnim pik leh mau tlawn lian pui pui kârah chuan Sawmtea, Valtea leh Renga te chu thâwm dim thei ang berin an pên chhat chhat a. An chhehvelah chuan rannung hrâm chiah chiah thâwm leh ni êngin thinghnah a chhun tlet sar sar bak hmuh tûr a awm lo. Hla vak lovah chuan nimina Renga sazu thang kam chu an va hmu a, vanneihthlak takin sazu lian ve tawk tak hi a lo inawk hlauh mai a. 

Renga chuan phur ru tak, mahse thâwm dîm tak siin a va la chhuak a, a ip-te ah a thun nghal a. Thingkung lian pui pakhat bulah chuan chawl hahdam in an ṭhu khawm a. Valtea chuan a thlan fîm hruk pahin, "Sazu pakhat leh sava pakhat... hengte hi chu pum khat puar nan pawh a tling lo a nia. Kan mi zavaia eitûr atan phei chuan, ha pui pawn a ṭhial hman mang lo ang." a ti nuah nuah a. 

Renga pawh chuan a thal thal ngul tuai neuh neuh pahin, "Ni e, nî a ral ang a, eitûr a vâng tial tial dâwn. Favang a liam dâwn hnai a, thlasik khawvawt kan hmachhawn a ngai tawh dawn. Thawmhnaw lum kan neih mang si loh chuan, naupang leh hmeichhe ho phei chu hri kai hovin min seh hmain vawtin min hmet hlum vek dâwn." a lo ti ve bawk a.

Sawmtea chu a ngawi reng a. A hreipui hriam tak mai chu a kutin a tuai hluah hluau a, a mitmeng thuk leh fiah tak chuan hla tak, an khua Lungthlir awmna tlang lam chu a thlir vung vung a. Thâwk a han la hak a, a ṭhiante pahnih en pah chuan, "Helai hmunah hian kan awm reng thei lo. Lungthlir-ah kan chhoh leh a ngai a ni." a ti ta nge nge a.

Chu thu a hriat rual chuan Valtea leh Renga chu an phu deuh zawk a. Valtea chuan mak ti lutukin, "I â ta em ni, Sawmte? Lungthlir te chu thihna hmun a nih tawh saw. Khaw pum khan ramhuai natna hrik in a tuam chhuak vek tawh a, in tin leh kawtthler tinah khan mitthi tho leh rual an khat vek tawh ang chu. Chutah chuan engtin nge luh leh i ngaihtuah theih zawk?" tiin a zawt hluai a. 

Renga pawh chuan a lo tuihnih vat a, "Ni e, silai mu pawh kan neih tawh mang loh hi. Thal leh hreipui nen chauh chuan thih kan va inpeih sa dâwn a ni ringawt a sin." a lo ti ve bawk a. Sawmtea hmelah erawh chuan hlauhna a lang ve hauh lo. Puitling tak leh thutak zet hian, "Ka hria alawm... hremhmun tluk a ni tawh tih chu. Mahse, khawchhung ah sawn thlasik kan hmachhawn theihna tûr thawmhnaw lum tam tak a awm a, in tinah buhfai leh sa rep a awm bawk. Chuan a pawimawh ber, pa ho inah khan silai ṭha leh a mu tam tak a awm. Chung chu kan lak chhuah loh chuan, hetah hian vawt leh riltamin kan thi vek dawn. Khaw chhung thim laia kan luh rûk theih chuan, a theih mai ka ring a ni." a ti nghet charh a.

Valtea leh Renga te chu an han ngawi vang vang a. Sawmtea thusawi chu a dik tih an hria. Hmeichhe ho leh Kimkima ngaihtuah phei chuan, ramhnuaia lo tawm tlawk tlawk ai chuan nunna thap pawha ralthuam leh eitûr va zawn chhuah chu mipa tih tur dik tak a ni. Renga chuan thâwk lak hawk pahin, "A nih leh le... kan theih ang angin sâpêl tûr awm ang ang i zawng phawt ang u. Chumi hnuah ruahmanna fel tak nen Lungthlir chu kan luh chhuah dâwn nia." a ti ta nge nge a, Valtea pawh a lo bu ve nghat a.

Chutia thutlukna an siam fel chiah tih chuan, anmahni chiah an awm emaw an tih laiin, chumi ramhnuai reh leh pilril tak chu thâwm pakhatin a rawn ti khawk ta rum rum mai. Hla tak aṭanga rawn ri a ni a, lui mawng lam atang chuan a rawn khâwk chho raih raih a. Thing tliak emaw, lung lum thâwm a ni lo. 

Tlangval pathumte chu an ding khawng nghal awt a. An inmelh kual a, an mitmengah chuan rinhlelhna leh hlauhthawnna a rawn lang chhuak nghal zawt zawt bawk. Silai puak thâwm a ni! Chutah pawh an neih ang silai satliah lovin, revolver ri ngei a ni. Chu thâwm rawn chhuahna lam chu khawi dang ni lovin, an chhungte leh an ṭhiante an kalsanna, Assam-type thlam awmna ruam lam aṭang ngei a ni tlat.

Sawmtea tukhum sam chu a hit nghal mup a. "Thlam lamah thil dik lo a thleng!" tih leh, thâwm dim pawh ngaihtuah tawh lovin a hreipui hum nghet sauh sauh chungin an rawn kalna lam pan chuan a tlân thla ta nghal hlawk hlawk a. Valtea leh Renga pawh chuan rang lutukin an um zui ve nghal a. An thin phu a rang in, an ṭhiante chunga thil ṭha lo thleng tura an ngaihtuahna chuan sâpêlh rêng ngaihtuah tir thei tawh lo, hmanhmawh lutukin hnim pik kârah chuan an tlan thla ta buan buan a.

********************************************************************

Ramhnuai hnim pik leh thim chhah mup hnuaiah chuan nî chu sâng viau tawh mah se thing lian pui pui hnah chhah takte avângin êng chuan lei a chhun thleng pha mang lo. Chu ram pilril leh bumboh tak kârah chuan, Burma smuggler rual, 'khawchhak ral' râwng tak takte leh an man tâk mipa naupang Fela te chu an kal hlawk hlawk a. 

Lungthlir khaw lam pan chuan an chho mek a ni a, mahse chu khua chu tlang liâm leh ruam thûk tak tak kân ngai a nih avângin kâr lova thlen theih rual a ni lo. A la hla vawng vawng hle a ni. Fela chu a hah tawh kher mai. Kawng laka hnim hriam tak tak te leh hlingte chuan a ke leh a ban te chu a tai pilh hnuang tawh a, a kawr te chu a têt hrup tawh bawk. 

Lungmuana chuan Fela chauh tawhzia leh hahzia chu ngaihtuah lêk lovin, a kawr âwmah thamin a pawt kal dâwr dâwr a. Fela chu a ṭap chhuak ngam lova, a biangah mittui a luang ngiai ngiai a, a nu leh pate kianga awm rih chu a chak vawng vawng ngei ang tih a rinawm. Mahse, a tlu sual palh a nih chuan hnung lam aṭanga nâ taka rawn pet pawp tu tûr a hnungah an kal tlat si avângin a theihtawp chhuahin a pên ve ṭang ṭang a.

Smuggler ho erawh chu ralthuam rit tak tak—AK-47, silaimu ip lian pui pui leh chem hriam tak tak phur chung pawhin an thâwk a buai ve eih lo. Hetiang tlangram pilril te hi chu an tân chuan khawlai kal mai mai ang vel a ni a, Mizo ramhnuai hrût chu an hna ber a nih avângin an pên a zâng vah mai a ni. 

An hotupa Luna chuan hma a hruai a, a mitmeng chu a fîm in, sâpel tûr chhuak ang maiin a beng a chhi kâr a. An chhehvel mawi leh hlauhawm inawmpawlh nawk chu fîmkhur takin a thlithlai ru reng bawk a. Tlang pang sâng deuh tak, thlifîm in a rawn chhem heuh heuhna hmun an thlen chuan Luna chuan a kut a han phar chhuak a, an vai chuan an ding ta thap a. 

An tui paipawn te phawrhin an in khawlh khawlh a. Chutih lai chuan Lungmuana chu a rawn phun hluk a, Fela chu leiah a theh thla ṭhuai a. Lai ṭawnga thil eng emaw sawi pahin, Mizo ṭawng pai deuh hian, "He naupang phiangsen hi a kal muang lutuk! Min tikhawtlai mai mai. That daih ila, kawng te chu kan hre tho alawm." tiin Luna chu a han râwn a, a chemte hriam tak chu a phawi chhuak nghal bawk a.

Fela hlau lutuk chu leiah a ṭawm chawih a, khûr dar dar chung hian a kâ a hup tlat a. Mahse Luna chuan rum lutuka Lungmuana melh pahin, "I chemte kha ak ṭha nghal rawh, Lungmuan! I â ta em ni? Khâng mite khân thawnthu phuahchawp theh thang kual tûrin khatiang ramhnuaiah khân an tawm lul lo ang." a ti khauh fak a. 

A sawi zawm leh a, "Lungthlir khuaah chuan thil eng emaw hlauhawm tak, eng natna hrik emaw tak chu a awm ngei a ni mahna. Harsatna kan tawh thut pawhin he naupang hi kan hmanrua, kan hmatheh tur leh min chhantu tur a ni dâwn alawm. Chuvangin a thâwk a tâwp hma chu kan hnuk thleng ngei ngei tûr a ni ringawt." tiin thu a pe ta zâwk a.

An inbiak laih laih lai chuan, an awmna tlang hnuai ruam thûk tak, ramhnuai pik tak aṭang chuan thâwm mak tak hi a rawn chhuak ta tlat mai. Ramsa thâwm pangngai a ni lova, savawm rûm ri a ni bawk hek lo. Mihring nâ tuar rûm chhur chhur te, ha inthial ri bawp bawp te pawh a ang mah zâwk. 

Chu thâwm chu tlang thli chuan a rawn chhem phei heuh heuh a, chawhnu lam nî sâ in a em lum ramhnuai chu a rawn vawt nghal sûk in a hriat hial a ni. Smuggler ho chu an inring nghal at a. Dâwihzepna nei lo, pawisak nei lo ni ṭhîn mah se, chu thâwm mak leh rapthlak tak chuan an awm a ti nuam bik hauh lo mai. 

An silai chu ri rawn chhuahna ruam lam hawi chuan an tin nghal ṭhap a, an inmelh hrek hrek a. Pu Tea'n 'mi thi tawh an rawn tho leh' a tih dawt hulhual anga an lo ngaih kha a dikna chin a awm a ni tih an thinlung chhûngril ah chuan an hre fiah ṭan ta. Chu ruam chhûnga lungpui lian tak piahah chuan awmze nei lova vâkvai, thisen châka riltâm hlauhawm tak chu a tawm ru reng a ni tih thawm atang chuan hrilh fiah kher an ngai tawh lo.

Luna chuan a chil a lem dâwk a, mahse a thla a phâng tih a naute hmuhah a tilang duh lova. A kut a han zâp a, "Kal ang u. Khua a thim hmain lui ral saw kan kai a ngai. Zanin chu ramhnuaiah meipui chhep lova kan riah a ngai dawn tlat mai." a ti chang fak a. Lungmuana chuan Fela chu a kawr âwmah bawk ṭhâm leh in, dim lo takin a pawt tho leh lâwp a, ruam thim lam aṭanga thâwm mak tak rawn chhuahna lam chu a hla thei ang bera hel kual tumin kawng harsa zawkah chuan an inzui liam ta a.

Lungthlir khua thleng tûr chuan zan khat chu an riah a la ngai dâwn a, chu ramhnuai thim ah chuan Fela te, Smuggler rualte, leh sâpêl tura chhuak Sawmtea te pathum mai bakah... hri kai riltâm leh ramsa kawlh tak tak te an awm khawm tlat a. Favang thliin thinghnah a chhem rik sur sur kârah chuan, thisen chhuahna rapthlak tak chu a thleng har tawh dâwn lo tih a chiang hle a ni.

**************************************************

Sawmtea, Renga leh Valtea ten thlam kawt an rawn thlen thlak chuan, an thil va hmuh avâng chuan an ding nghal chawt a. Thlam kawt chu a lo hnawk nuai a, an bungbel leh an thil neih tlemte te chu a lo let rem rum a. Pi Kungi ṭap mek leh hmeichhe ho hlauhthawn hmel taka lo inhnit fap fap chu an va hmu bawk a. 

Hlimpuii chuan a u a hmuh rual rual chuan ṭap pur chungin a va tlan phei a, Sawmtea âwmah chuan rawn bei thlawpin, a kuah nghal thlawp a. "U... u Sawmte, ka hlau lutuk! Engtin nge kan tih tak ang?" tiin a inhnît nghal hlawp hlawp a. Sawmtea chuan a nau chu lo kuah letin mangang takin, "Eng nge awmzia? Eng nge thleng a, hetiang hian engati nge in lo awm nuai a?" tiin a zawt nghal chûk chûk a.

Pu Tea chu hmel dâng bâm hian thlam kawtah chuan a lo ṭhu khawm chial a, a mitmengah chuan beidawnna thuk tak a lang chhuak chiang hle. "Sawmte... Fela an hruai... kan fapa min laksak a ni." aw khur dar darin a rawn ti chhuak a. Pi Kungi phei chu a ṭap nasa lutuk a, a âwm a dâwm a, a ṭawng chhuak thei tawh lo hial a ni.

"Tute nge an nih? Eng thil chiah nge thleng a, tute nge Fela chu hruai bo tute chu?" tiin Valtea chuan thlaphâng takin a lo zawt ve bawk a. Renga pawh thinrimna in a rawn tuam ṭan a, a hreipui hum lai chu a lo hmer nghet sauh va. Pu Tea chuan thâwk lak hawk pahin, "Burma ramri aṭanga ralthuam tawlh ru ṭhin, 'khawchhak ral' an tih ho kha an ni. Pali an ni a, AK-47 leh revolver nêna inthuam rual, pawisak nei lo an ni. Kan eitur ṭha neih ang ang te min laksak vek a, naktukah hetah hian kan lo awm lova, kan lo tlanchhia a nih chuan Fela an thah tur thu min hrilh a ni." tiin thil thlen dan rapthlak tak chu tawi fel takin a hrilhfiah a.

Chutih lai chuan Sawmtea chuan a nau, a âwma bei a la inhnit fap fap chu zâwi te in a han namsawn deuh a. A hmai a hmuh chian theih nan a han kuai dak deuh chu, a phu zawk mai. Hlimpuii mit dinglam chu a lo vûng lian in a duk kual ruih a, a hmui sîr aṭangin thisen tlem a lo chhuak bawk a. 

"Tunge hetiang hian ti che?" tiin Sawmtea chuan a zawt nghal vat a, a hmel aṭang chuan a thinrimzia leh mi that mai hreh lo hmel a lang chhuak hial tawh a. Hlimpuii chuan hlauh hmel takin, "An hotupa kha chu a hming ka hre lo, chuan hetianga min khawihtu hi  chu Lungmuana tiin a ko, an hotupa khan. Min rawn khawih luih a tum a..." a tih rual chiah chuan Sawmtea chu puih rual lohvin a ding chhuak ta hluai a. 

A nau bianga mittui luang chu a hruksak a, engmah dang sawi tawh lovin thlam chhûngah chuan a lut zui nghal a. Reiloteah Sawmtea chu thlam aṭang chuan a rawn chhuak leh nghal a. An silai hlui neih chhun, mu tlemte chauh awm tawh chu a rawn hum chhuak a, a thal ngul leh a thal mu chu a ak nghal sawk sawk bawk a. 

A inpeih at tawh a, ramhnuai thim lam pana a chhuak tur chiah chu Pu Tea chuan a banah a lo man chawt a. "Sawmte, inbengdai phawt rawh!" tiin Pu Tea chuan a lo dang a. A aw chu a mangangin a khûr deuh hlek a, "I hneh zawh rual an ni lo. An ralthuam neih leh kan neih hi a inthlau lutuk, lei leh van ang vel a ni! AK-47 leh silai ṭha mi hlir an kawl a, nangin thal leh silai hlui mu tlem tawh tak i hum thung a. Nangmah ngawt chuan i dam chhuak lo ang, thah tura va inpe i ni ringawt dâwn a sin! Ruahmanna fel zawk kan siam hmasak a ngai a nia!" a ti mawlh mawlh a.

Mahse Sawmtea chuan Pu Tea kut chu a lo thehthla lawp a. A mitmengah chuan pawisak neih lohna leh thihna hlîr a lang tawh a, tuma dan rual a ni tawh lo. "Ruahmanna kan siam chhungin Fela kha an that hman ang! Chuan, ka nau kut thlâktu leh in fapa ru botu kha nungdamin ka chhuah dawn lo. Fela chu him takin ka lo hruai haw leh ang." tih leh ramhnuai pilril, Smuggler ho kal liamna lam pan chuan thli chhem ang maiin a tlân liam ta nghal a.

Renga leh Valtea te chuan inrawn buai pawh ngai lovin, an hmanraw neih ang ang nen an ṭhianpa um zui chuan an dâwk chhuak ve nghal hmiah bawk a. An liam chiah tih chuan, thlam aṭangin Awmpuia leh Siama chu an rawn chhuak ve a. Awmpuia chuan thîrtiang rit leh lian ṭha tak mai hi a rawn hum chhuak a. 

Siama bulah chuan kal hnaiin, "Siam, nangin heta tang hian hmeichhe ho leh naupang te hi theihpatawpin lo veng him ang che. Tumah lo chhuah tir suh." tiin thu a pe fiah fak a. Tichuan, ralthuam neih ang ang nen Sawmtea te hnu hma chu chhuiin, theihpatawpa chakin ramhnuai thim lamah chuan a lût ve ta nghal a.

************************************************************

Tlai lam ni a lo ni a, chhun pachanga ni êng sen phût pawh kha tlang karah a pil ṭan ta. Ramhnuai pilril takah chuan thim a rawn inṭham ṭan a, thing lian pui pui hlimthla chu a rawn sei duai duai tawh a. Hnim pik leh mau hmun kârah chuan Burma smuggler rual palite leh Fela chu chawl miah lovin an la kal tluang zel a. 

Fela chu a ke a kham tawh lutuk chu a pên hleithei tawh lova, a thlan tuiin a bual huh vek tawh a, mahse ralthuam nena hnung lama rawn vil reng tu an awm avangin a theih ang angin a hma lam a pan ve hram hram a ni. Smuggler ho pawh ram hrût ṭhang nimah se, ni lênga ralthuam rit tak nena tlang lawn chu an hah ve tawh hle a. 

Mahse an hotupa Luna erawh a rorum in a chhel bik a, hma a hruai ngar ngar a. Chutia thawm dang awm lova an kal mial mial lai chuan, an hma lawk mau hmun pik tak aṭang chuan thawm mak tak hi a rawn ri ta hrawk mai. Sazu emaw sakhi thâwm a ni lo, ramsa lian tak hliam tuar thawm a ang mah zawk. 

Luna chuan a kut a phar chhuak nghal a, an vai chuan an ding thap a, an silai chu thawm rawn chhuahna lamah chuan an tin nghal ṭhap a. Hnim chu a rawn che laih laih a, chutah le... mihring ruangam ngei mai hi theihpatawpa chakin a rawn dâwk chhuak ta zawk mai! Chu thil chu mihring pangngai a ni hauh lo. 

A thawmhnaw hak lai chu a têt hrup a, thisen hlui leh thar in a bual sen nuai a, a vun chu a dâng var vek bawk a. A mitmu a var vek a, a rum chhur chhur bawk. a kâ aṭanga chil phuan rawn tla bawrh bawrh chung chuan chu hri kai chuan a hmaa mihring nungdam a hmuh te chu a rawn pan nghal vat a.

Smuggler ho chu an phu chiang kher mai. An meng phawk hrû a, mak an tih lutuk avang chuan an silai hmeh puah nachang pawh an hre lawk lo. Pu Tea khan dâwt a lo sawi hauh lo mai, 'mi thi tawh an rawn tho leh' a tih thawnthu phuahchawp emaw an tih kha a tak ngei a lo ni tih an mit ngeiin an hmu ta. 

Mahse inngaihtuah buai hman a ni lo, chu hri kai riltam chu a rawn thleng chawpchilh nghal der mai. Hri kai chuan hmahruaitu Luna chu rawn zuan pêlin, a sîr lama lo ding, an zinga pakhat Dawlliana chu a rawn zuan thlu ta dâwp mai a. Dawlliana chuan a silai a thlauh nghal a, leiah chuan an let dun ta nawk nawk a. 

Hri kai chuan ui kawlh riltam ang maiin Dawlliana hrawk chu seh tumin a ṭhâm nghal buan buan a. Dawlliana chuan a tha neih zawng zawng sawm khawmin chu mithi tho leh chu theihpatawpin a namsawn ve ṭang ṭang a, a au chhuak rawng rawng bawk a. Mahse chu hri kai tha chu mihring tha pangngai let hnih vel a chak a ni miau si a. 

Dawlliana'n a hrawk a ven tlat avang chuan, hri kai chuan a beih dan thutin Dawlliana dar ah tak chuan theihpatawpa nâ in a hap ta siah mai a. Dawlliana nâ tuar chu a ṭê tuar a, a dar aṭang chuan thisen a rawn pût nghal zung zung a. Chutih lai tak chuan Luna leh Lungmuana te chu an rawn harhchhuak zawk a, an AK-47 chuan chu hri kai, an thianpa dar lo la seh bet ngar ngar tu chu an kâp ta dawt dawt a.

Silai ri ring lutuk chuan ramhnuai a luahkhat vek a, sava te chu an thlawk darh nghal chuai chuai a. Hri kai chu silaimu in a den dawt dawt rual chuan a thal nghal ṭhuai a, che chang tawh lovin leiah chuan a let ta reng a. Thâwm a reh leh tlawk tlawk a, silai khu in boruak a tuam a, Dawlliana na tuar rûm ri chiah hriat tur a awm ta. 

Luna chuan fîmkhur takin hri kai ruang chu a va chhir vel a, a thih chian leh chian loh a fiah hnuah thawk a la hawk a. Dawlliana chu a dar dawm chungin a rawn tho ṭuih ṭuih a, a hliam aṭang chuan thisen a luang nasa hle a. Fela chuan sir khat aṭangin hlauh vanga khur dar dar chungin chu thil thleng rapthlak tak chu a lo thlir reng a. 

Chutah, Dawlliana dar aṭanga thisen chhuak a hmuh chuan, an khua Lungthlira thil thlengte kha a mitthlaah a rawn lang uar uar a. Dawlliana lam chu en kiau chungin, aw tham chhal hian, "Reiloteah i rawn danglam ang a... khatiang chiah khan i awm ve dâwn. Nangpawh ramhuai ah i chang dawn." tiin chiang takin a rawn sawi chhuak ta a.

Chu thu a hriat rual chuan Dawlliana mitmeng chu hlauhna leh thinrimnain a inthlak nghal hlawk a. A hliam tuar nâ leh thlaphâng bawk si chuan a awmna bul lawka lungtum lian ve tak chu chharin, "Zawng phiangsen! Nangmah vang vek a nih hi!" tih leh Fela chu khawih tumin a rawn tlan phei ta mai a. 

Fela chu hlauin a lo kâwm chawih a, a mit a hup nghal bawk a. Mahse Dawlliana'n Fela a khawih hman hma chiah chuan, Luna chuan a kut tha chak tak mai chuan Dawlliana banah chuan a lo man chawt a. Na lutuka theh sawn pahin, a mitmeng rorum leh vawt ruih mai chuan a melh khui a. 

"Kan hria ang chu... nghak phawt ila." a ti zawi raih a, a aw ah chuan khawngaihna chhete mah a lang lo. Dawlliana dinhmun chu a chik ve phawt dawn a ni tih a chiang hle. Tichuan, tu mah inbe zui tawh lovin, khua a thim chian hmaa hmun him zawk zawn tumin ngawi rengin an kal  chhunzawm leh ta a, Fela pawh chuan hlau tak chungin an hnung chu a zui ve leh ta hnak hnak a.

*********************************************************

END OF EPISODE 1