ONCE UPON A TIME IN MIZORAM : SEASON 2 (Mizo zombie horror story) Written by : Aaron Malsawmdawngzuala Episode 6 : Divided We Fall

 ONCE UPON A TIME IN MIZORAM : SEASON 2

(Mizo zombie horror story)

Written by : Aaron Malsawmdawngzuala

Episode 6 : Divided We Fall

*****************************************************************

Thim tham hnuaiah chuan Bus hlui tak mai chu a nghîng dawt dawt a. Pâwn lam aṭanga hri kai sawmhnih (20) chuang laiin bus bâng leh dârthlalang an rawn chûm dawt dawt thâwm chuan boruak a ti ṭihbaiawm zual hle. An rûm ri chhur chhur te, an chil phuan thisen nêna inpawlh nûai dârthlalang a an rawn tih kâi lûai mai te chu hmuh hrehawm tak a ni.

Driver seat ah chuan Renga chuan a chabi chu theihpatawpin a han herh leh nawk ṭhin a. "Nung hrâm teh! Nung hrâm rawh!" tiin a phun mawlh mawlh a, mahse engine chu chik vak vak in a ri khur khur a, a thi zui leh hmiah ṭhin. Renga beidawng leh thinrim chuan a steering chu a chum vak vak ringawt a.

Bus chhûng chu manganna hlîrin a lûah khat a ni ber e. Hlimpuii leh Muani chu seat pakhatah theihpatawpa nghetin an inkuah khâwm chial a. Fela pawh hlauhna vângin a khûr dar dar a, a pa Pu Tea chuan a fapa chu a theih ang angin thla a lo muan ve bawk a. Chutih lai tak chuan an ding lam tukverh dârthlalang chu a rawn ri ṭhawt a! 

Hri-kai pakhat, tlangval sâ ṭha tak hian a lû in theihpatawpa nâ in dârthlalang chu a rawn tauh rî dup dup mai hi a lo ni! Dârthlalang chu a rawn keh ṭhawt a, a khi ta rûak mai! "Lalpa leh! A keh dâwn!" Muanpuia chuan a ti chhuak tuar a. Sawmtea chu a dinna ngaiah a la ding khawng luah a, a M-16 rifle chu a kau ri hrak a, inring takin a awm bawk a. 

Dârthlalang keh a hmuh rual chuan, he bus chhûng zîmte ah hian an tawm reng thei dâwn lo tih a hrethiam nghal a. "Dârthlalang saw a rawn keh darh chuan kan vaiin thihna rûamah kan tâng dâwn. He motor chhûngah hian kan awm reng thei lo." a ti fiah ta kâk a. Valtea chuan a pistol hûm chungin, "Engtin nge niang Sawmte? Pâwnah sawn an tam lutuk, kawngkhâr pawh saw kan hawng ngam dâwn em ni?" mangang hmel tak hian a lo ti ve bawk a.

Sawmtea chuan Bus hnung lam (back emergency door) chu a kâwk a, "Bus chung ah khian kan lawn chho ang! Hnunglam kawngkharah sawn lawnna tur thir leihlawn a awm a, chhuak ila thâwm dîm leh rang theihpatawpin hmeichhe ho leh naupang lawn chho hmasa rawh u!" tiin mipa huaisen tak leh hruaitu tih takah thu a pe nghal zung zung a.

Renga chu driver seat aṭang chuan a rawn chhuak ve nghal vut a, a chempui hriam tak chu a rawn phawi chhuak a. "Sawmtea sawi chu a dik, hnung lam kawngkhâr bula lo awm ho saw chu ka va buaipui ang e, Muanpui nangin kawngka lo kâr hawng ang che," a lo ti ve nghal zat a. Hreh tak leh khûr hlawk hlawk chungin Bus hnung lam emergency door chu Muanpuia chuan a va tlawh hawng ta ṭhuai a. 

Pâwn boruak vawt tak a rawn thaw lût huk a, chutih rual chiah chuan kawngka bula lo awm hri kai pathum vel chuan chil phuan tla bawrh bawrh chungin rawn luh an lo tum nghal a. Renga chu a zuang phei zawk a, insiam rem in a theihpatawpa nâ in hma hruaitu ber tukhumah chuan a sât ri chawk mai! 

Thisen a chik thawt a, a theh thlâk rual chiah chuan Sawmtea'n a rifle in pakhat dârah a rawn kap thal ve leh dâwp bawk a. "Kal rawh u! Tûnah!" Sawmtea chuan a ti vîn ṭhawt a. Muani chu pên chhuak hmasa berin, hlau leh khûr chung chuan Bus hnunga leihlawn thir vawt thler mai ah chuan a lawn chho ta ṭâwk ṭâwk a, carrier ah chuan a bawk kai nghal thlawp a. 

A hnungah Hlimpuii leh Fela ten an zui nghal a. Pu Tea, Siama leh Valtea ten hnung dâwlin, Awmpuia pawh nâ tuar then chawk chawk chungin a chho ve bawk a. Chutih lai mêk chuan pâwn lama hri kai dang rawn tlân khâwm te chuan hnunglam kawngkhâr chu an rawn nek hawng tan ta! "U Reng, lawn rawh!" Muanpuia'n a ulhbun kau sa hûm ran chungin a lo ti tuar a. 

Renga'n hri kai pakhat lo luh tum a tlawh thlak rualin Muanpuia chu a lawn a, Renga pawh a zuang kâi ve nghal a. Sawmtea chiah a bâng ta! Hri kai pakhat, hmai chhe vek tawh hian Sawmtea bân rawn man a tum thut a! Sawmtea chu a pên hnung dâwrh a, a silai kâwm in chunu hmaiah chuan a chhu chawrh a. 

Mahse ding lam aṭangin mipa lian pui hri kâi a rawn zuang tel bawk si. Sawmtea tân hun a awm tawh lo. A M-16 silai chu lék kangin a mu hnuhnung ber chu hri-kai lu ah tak a kâp a, a thal ṭhuai a, a chhuak ve nghal a. A theih ang angin leihlawn ah chuan uai in a invawrh chho a. Hri kai pakhat chuan a kuta rawn ṭhâm hman hrâm in Sawmtea pheikhawk-ah a rawn man ta chawt mai le! 

Sawmtea a tlûk dâwn rual chiah chuan, chung lam aṭangin Renga'n theihpatawpa nâ in a chempuiin hri-kai bânah tak chuan a rawn sât bung hmiah mai a! Hri-kai chu a tla thla dâwp a, thâwk lak rualin Sawmtea chu Bus chungah an pawt kâi ve thei ta a ni. An vaiin Bus chung (carrier) thîr vawt takah chuan an mu tlar thap a. 

An chau lutuk chu an thaw halh halh hlawm a, tumah chu an tawng mai hrih lo. Bus hnuai leh sîr velah chuan hri kai rual ho chu an rawn rûm chhur chhur hlawm a, Bus bâng chu an rawn ham ri hrâwk hrâwk reng a. Tlân chhiatna tur an nei tawh lova, lêt theih a ni tawh hek lo. Zan thim hnuaiah, hri kaiin an hual mek Bus chung vawt leh ralti takah chuan chhungkaw thar te chu an tang leh ta ran mai a ni.

********************************************************************************

Zan lai a pêl tawh a, Sihpui mual cement in chhûng chu a reh ṭhiap tawh a. Chauh luat vângin naupang leh hmeichhe ho pawh chu leichhuat vawt takah chuan an mu kawi ngiai hlawm a. Meipui an chhem chu a vam tan tawh a, a êng pawh a fiah tawh lo hle. An piah deuh, a thim chinah chuan Zauva chu a muhil ve hauh lo. 

A mit chu fiah takin a meng kâwk a, theihpatawpa thâwm dîmin a lo thu ngawi reng a. Pu Rina leh Pu Ruala te inbia a, thâwm dîm taka an phun sep sep thâwm kha a hre pha vek a ni. Amah rinhlelhna leh a laka inrâlrin a ngaihna thu, puitling pahnih in an sawi dunte kha a bengah chuan a ri nawn tluk tluk a. 

Pu Rina'n fing phakar taka khawtlâng hmangaihtu ang hrima a insawi fiah vel dante kha Zauva chuan tenawm a ti in, a haw hluah hluah a ni. A chemte chu a hum nghet sauh a. Helai in chhûng zîmte ah hian a him tawh lo tih a inhre chiang ta hle. Pâwn lama hri kai rual ai pawhin, mahni hmasialna vânga mi pawisawi lo pawh thuak per chhawka kâp hlum ngam, an hotu inti pa hi a hlauhawm zâwk tlat. 

Nakin zêlah chuan buaina a awm palh a, amah hi hnawksak a ti a nih ngat chuan 'hri a kâi e' tiin dâwt a sawi anga, awlsam takin midang a hmin anga, a rawn kâp hlum ve duh mai dâwn tih a hre thiam nghal vek a. Zauva chuan a piah lawka thlamuang taka muhîl Bawihi leh Puii te chu a va melh a. 

An dinhmun in a zir loh êm avânga tualthattu kianga tâwm him rih mai ṭha an ti kha a demin a haw ngawt thei lo. Mahse pawi a ti a ni; dâwt hmanga thlamuanna der chu a tawpna a râpthlâk ṭhin tih an hrethiam lo a ni. Tûnah chuan ṭanpuitu leh rinchhan tûr a nei ve tawh lova, a theih ang anga a inhai kuak ve a ngai tih a inpawm thlap a.

Muangchangin, leichhuat vawt takah chuan thâwm chhuah miah lovin a inbeng kâng ṭûah ṭûah a. In hnung lam, a thim lai ber, tukverh pawh awm lohna lam chu dîm te in a pan phei a. Chutah chuan leichhuat awng, thîr phek a inkhuh, inhnuai emaw ruam lam panna ni âwm tak, kawngkhâr tê a awm tih a lo hmu ru reng tawh a ni. 

Chu chu hawng a, chuta ṭang chuan ramhnuai thim thamah a theih ang anga pil bo san a tum a ni. Mahse, chu thîr phek a va dâwm chiah tih chuan, inhnuai lam aṭang ni lovin, pâwn lam... kawngkharpui bul chiah aṭang chuan thâwm a rawn ri ta dawt mai! Zauva chu a phu zawk a, a che chu a tâwp nghal chawt a. 

In chhûng chu a reh zual sauh emaw tih tûrin a reh tlawk tlawk a. Chutah eng thil emaw rûm ri chher leh râpthlâk zet mai hi pâwn aṭang chuan a rawn rik chhunzawm ta mai! Ramsa kawlh nge ni a, thisen rim hria a rawn kal khawm hri kai dang ho thâwm zâwk? Kawngkharpui chu pâwn lam aṭangin an rawn nêm ri nghal dawt dawt a!

Pu Rina chu a ṭhutna aṭangin a rawn ding chhuak nghal zawk a, a silai a chuh nghal rawk rawk a. Pu Ruala leh midang muhîl chu an rawn tho ve nghal hlawm bawk a, hmeichhe ho chu hlauh vangin an kâ hupin an thaw hlawp hlawp a. Zauva erawh thim zîngah bîru in, kawngka dang tûra Pu Rina te phili buai mek chu thawmdîm takin a en reng a.  Pâwnah hri kai an tam leh tam loh a hre lo, mahse a bîrukna tûr thîr phek inhawng kâra thli vawt rawn thaw heuh heuh chu, pângngai taka nungdama a chhuah theihna awmchhun a ni tih a hre chiang hle.

************************************************************

Bus chung thîr vawt thler mai ah chuan an bawk thap a. Hnuai lamah hri kai rual rûm chhur chhur leh bus an rawn sawi ri hluk hluk thâwm kârah chuan beisei a bo tawh hle mai. Renga chuan a thal hrui a kau a, a kut a khûr hauh lo. Sawmtea pawhin a silaimu hnuhnung ber chu a thun a, tlawm mai chu a tum hmel loh, mahse a hmel erawh a chau tawh takzet a ni.

Hlimpuii leh Fela chu hlau takin an inkuah chial a, Pu Tea pawh a chau tawh hle a, a fapa chu a theih ang angin a hnem ve bawk a. "Lalpa... min pui hrâm rawh." tiin Muani chuan ṭap chhuak ngam si lovin a ṭawngtai mawlh mawlh a. Tlai atang tawh khan tui thianghlim tur reng an la hmu lova, riltâm leh chauh nen, nungdama Phulvar khua luh chu thil theih loh tluk a ni tawh. 

Thihna ruamah an awm mek chu a ni si a. Chutia beidawng taka an awm lai chuan... an piah deuh hla vak lo, tiau chhum zing chhah kâr aṭang chuan motor engine ri hi a rawn awm ta thut mai le! Chu thâwm chu a rawn hnai tial tial a, thâwk leh khatah motor horn ring lutuk hi a rawn ri ta tuar tuar mai! 

Chu thâwm zet chuan an beiseina mei mit dawn tawh chu a rawn chhem alh leh ta hluai a. Chu horn ri ring tak chuan Bus hual tu, hri kai ho  chuan an lo hre pha chiang kher mai. Sa thar hmuh inbeisei niawm tak hian horn rawn rikna lamah chuan an hawi nghal ṭhap hlawm a. Chu thâwm lam pan chuan hri kai rual chu an tlan phei ta pur pur hlawm a.

Tiau chhum kâr ah chuan motor headlight êng lutuk lo hian hmalam a rawn chhun phei ruah mai a. Chu chu Pick Up truck hlui lutuk lo a ni a, a hnungah chuan mipa an chuang tih a hriat theih a. An awmna lam pan chuan theihpatawpa chakin a rawn tlân hnai zêl a. Chutah zet chuan Sawmtea te chu an lawm lutuk a, an thaw huai hlawm mai.

Pick Up chu a rawn hnai zel a, a hnungah chuan tlangval rual panga (5) vel lai hi inring takin an lo bawk ran a. An zînga pahnih chuan thal an lo keng a, pathum erawh in silai, ulhbun leh mizo silai an lo keng thung. Hri kai rual lo tlan phei ho chu Pick up a chuang tlangval ho chuan hla deuh tak aṭang chuan an rawn kap ta ṭhuai ṭhuai mai le!

Silai puak thâwm chu a ri chhunzawm a, hri kai hma hruai ho chu an thal tawp tawp a. Thal hmanga an kah ho pawh an thal nual bawk. Hri kai pasarih (7) vel rawn tlan tlang hrâm ho chu pick up khalhtu chuan a lo su leng nghal lawp lawp mai a! Pick up hmalam in a sut rual chuan hri kai ho chu an leng lawp lawp mai. 

Driver leh a bula chuang tiamin heng tlangval, Sawmtea leh a pawlte rawn chhan tu te hi pasarih (7) lai an ni. "Chhuk ru! Rawn lawn nghal rawh u!" Pick up driver chuan tukverh a rawn dâk chhuak in Sawmtea te awmna Bus chung hawi chhoh pah chuan a rawn au ta tuar tuar mai! 

Tlangval pick up aṭanga rawn chhuk pathumte'n hri kai rawn tho leh tûr ho chu lo dang a. "Hmanhmawh ru! Hmeichhia leh naupang kha chhuk hmasa rawh u!" Sawmtea chuan a rawn ti nghal zung zung a. Hmanhmawh lutuk leh khur hlawk hlawk chungin Fela chu a pa in a hlang thla nghal a. Muani leh Hlimpuii pawh Bus hnung a leihlawn aṭang chuan an rawn chhuk thla a, Pick up ah chuan an lawn nghal zung zung a. 

Awmpuia leh Valtea pawh nâ tuar chungin an lawn ve nghal a. Sawmtea chuan a M-16 silai nen inring takin a hnung a dâwl a, Renga nen chuan Pick up ah chuan an lawn kai ve ta hlawm a. Mahse, hri kai la thi ve lo paruk (6) vel rawn tho leh ho chuan an rawn bawh zui leh nghal ta mai a! Pick Up-a an lawn lai chuan hri kai pakhat hian Renga ke ah tak a rawn man ta chawt mai! 

Renga chu a tlu ṭhelh a, mahse Sawmtea chuan a silai hmawr in chu hri kai mitmu veilamah tak chuan a vit tlum pawk mai a, a phawi leh rual chuan Renga chu an pawt chho nghal a. "Tlân nghal rawh!" Sawmtea'n a tih ṭhawt rual chiah chuan Pick Up chu theihpatawpa chakin a tlan chhuak nghal zawk a. Hri kai rual thâwm chu hnungchhawnin an tlân liam ta vang vang a.

************************************************************************

Sihpui mual cement in chhûngah chuan boruak a la ṭang ṭha kher mai. Pâwn lamah chuan hri kai ho in kawngkharpui lian tak mai chu an rawn nêm dawt dawt reng a. Bâng awng aṭang chuan Zela chu dîm te in a bih dek dek a, "Pu Rin... an tam em em lo, paruk vel chiah a nih hmel." tiin thâwm dîm tak hian a han hrilh a.

In chhûnga tlangval pathum leh Pu Rina te chu an han inrâwn khâwm a. "Kan hneh thei mai ang." Zela chuan a han ti leh a. Pu Ruala chuan, "Pu Rin, kawngka hnunglam, tukina sâ pêl tûra kan chhuahna lamah khân chhuak ila. Kan pahnihin kei nin kan lo va chhaih buai dâwn nia... an tlem tho." tiin silai chu a pe a. 

Ani chuan chempui a keng thung a. Pu Rina chuan hlau hle mahse, hlau lo anga lan a duh ve bawk si a, a zui ve ta a. Hmeichhia leh naupang, leh tar chak tawh lo ho chu hlau in bâng kilah an tawm khawm chial a. Mahse, in chhûngah chuan Zauva hmuh tur a awm tawh miah lo! A lo chhuak ru fel der tawh a ni. 

Chutah, hri kai ho chuan kawngkharpui chu an rawn sawi nasa tulh tulh a, thingpheka an kilhna te pawh chu a rawn tliak ri thawt thawt tawh mai. In hnung lamah chuan Pu Ruala chu kawngka aṭangin a zuang thla hmasa a, Pu Rina pawh chu a rawn zuang thla ve nghal a. An meichher ken an han chhi eng chiah chu, an hma zawnah chuan hri kai pathum ngawt hi an lo awm reng mai le!

Pu Ruala chuan ring tak hian, "Pu Rin, kâp rawh!" a ti tuar a. Mahse, Pu Rina chuan a hlau takzet, chung hri kai rawn tlan phei ho chu a kâp ngam ta tlat lo mai. Pu Ruala chu a bânah a vuan thut a, hri kai ho lamah chuan a va theh phei ta a! "Eng thil nge maw i tih le?" a ti tuar a. Mahse hri kai pathumte chuan  an hma lawka rawn tlu bawk thlawp mai, Pu Ruala chu an lo man bet nghal a. 

Pu Rina erawh thei leh thei lovin kawngkhar hnung lam, an chhuah thlakna lam pan chuan a tlân let leh a, a lawn chho ta tuih tuih mai. In chhûngah chuan thlaphâng lutukin a lût rawk rawk a, midang chuan an lo en ṭhap a. "Pu Ruala.... Pu Ruala an man hman! Chhan ka tum a, mahse an tam lutuk tlat.." a ti nghal zuah zuah a, dâwt sawi chu a thiam kher mai.

Chutih lai chuan, Zauva chu hri kai ho hmuh theih loh turin thlam aṭanga hla vak lovah chemte hum ran chungin a lo biru mek a. Kalsan hmak mai chu a han tum zet a, mahse ni thei ngangin a hre si lo. Hri kai ho chuan kawngka kilhna chu an nek chhe ṭan tawh tih pawh a va hmu thei a, kawngka bul cement pawh chu a khi ruah tawh bawk. 

A chhûngah chuan a ṭhiante pahnih, Bawihi leh Puii an awm tih a hre ve reng bawk si. "Mai mai chuan.." ti a phun hlukin a va chhuak phei a. Hri kai ho chu ring takin ava au vak vak a, "Helam hi sa thar lam tak ka awm e...min rawn man ru." tiin ban a vai lauh lauh va. Chutah, an rawn hawi a, hri kai ho chu an rawn tlân a, Zauva lam chu an rawn pan ta mai. 

Mahse thim thamah Zauva chu chak lutukin a tlân bo ta daih a, hri kai ho chuan an ûmzui bawk. In chhûng boruak rit tak mai pawh chu a reh ta ṭhiap mai. Mahse, in hnung lam huanah chuan hri kai rûm ri an hre leh tlat mai. Fimkhur takin Zela leh Chhingpuia chuan in hnung lam kawngka chu tlem hawngin an zu bih thla a. 

Hri kai pathumte chuan Pu Ruala taksa chu riltam hmel tak hian an lo la ei mial mial mai hi a lo ni. Zela chuan zâwi te hian Chhingpuia beng bulah, "Pathum chiah an ni bawk sia.... Pu Rina khan an tam lutuk a ti bawk sia..eng nge maw awmzia le?" a ti zâwi sap a. Mak an ti dûn hle a, an inen hu ringawt mai.

**********************************************************************

Ramhnuai pilril deuh taka bawng in hlui, thing leh dî hmanga sak ṭawp tawh takah chuan an tâwm khâwm chial a. Bawng rêng hmuh tûr an awm tawh lova, leichhuat hnawm chap leh bawng ek hlui rim a la nam hâm hâm tih loh chu a ruak huai mai a ni. Pick-up truck erawh chu a sîr hnim phên thim laiah hmuh mai theih loh tûrin an thukru a. 

Hri kai rual lak aṭanga him tâwk tawha an inngaih hnu chuan, an theih ang angin leichhuat chungah chuan an ṭhu thla hlawm a, hah leh rilṭâm vângin an thaw hlawp hlawp a. Hmeichhe pahnih chu bâng kilah an ṭhu a, Muani leh Hlimpuii chuan hlauh avânga khûr dar dar Fela chu an theih ang angin an kuah bet a. 

Valtea leh Awmpuia pawh na tuar chungin an rawn thu thla ve hnawk bawk a. Mahse Sawmtea leh Renga erawh an la ṭhu ve lo. An dam chhuahna tûra theihpatawp chhuahtu te ni ngei mah se, zan thim hnuaia rawn lang thut, hmelhriat loh tlangval pasarih te lakah chuan inthlahdul nghal mai chi a ni lo tih hriain an hmanraw neih chhun chu inring rengin an la hûm ran a.

Chhanchhuaktute zinga an hotupa ber niawm tak, pian inphut tâwk tak, lian thelh thawlh leh hmel rorum lam lek lek hian a silai chu in bângah a tung a. Pick-up aṭanga an rawn lâk thlâk tui ûm lian tak mai chu a rawn theh phei a. "In rawh u, tui thianghlim in tur in neih lohna a rei tawh tih pawh in hmelah a chiang reng mai. Zothana ka ni a, heng hi ka naute an nih hi." tiin thâm deuh chhal, puitling tak si hian a rawn inhmêlhriattîr nghal a.

Sawmtea chuan tui-ûm chu a lo man chawt a, mahse a in hmasa lo. A hnunga chauh luat vânga dang ro hâm tawh hmeichhe ho lamah chuan theh pheiin, Muanpuia chu sêm tûrin a mitmei a. Chumi hnuah fiah leh uluk takin Zothana chu a melh a, "Kan lawm e. Mahse... khawi aṭanga rawn chhuak nge in nih? Tinge zanlaiah khatiang hmunahte in rawn tlân chhuah ngawt a?" tiin a zawt nghal khauh a. 

A rinhlelhna mitmeng chu a thup lêm lo. Zothana chuan thâwk a han la hawk a, a hmelah chuan rilru hahna leh beidawnna thûk tak a rawn lang chhuak a. "Phulvar aṭanga rawn tlân chhuak kan ni. Phulvar chu a him tawh lo... kar hnih liam ta aṭang khân an rawn lût a, kan ṭang zo ta lo a ni. Kawtchhuaha lirthei lo inhung hnawk nûai te, thingtûm inkhang phei te kha luh theih loh nana kan danchahna a ni a... mahse in chhung aṭangin min rawn ei chhe hmasa ta zâwk a ni." a ti zâwi sup a.

Renga chu a rawn inrawlh vat a, "A nih chuan... khawiah nge himna a awm ang? Heta ṭanga hla vak loah Assam Rifles camp emaw, sorkar lam thâwm a awm hnai em?" beiseina tlem tak nen  a lo zawt nghal a. Zothana naute zinga pakhat, Hriata chuan beidawng hmel takin a lu a lo thing a. 

"Awm lo... engmah a awm tawh lo. Aizawl pawh a chhe vek tawh an ti. Champhai leh Lunglei lam aṭang pawhin phone signal leh radio signal a rîk lohna a rei tawh. Tûnah chuan tûmah  rinchhan tûr an awm tawh lo... keimahni leh heng ramhuai hri kai ho chiah hi kan ni tawh." a ti chuai raih a.

Chu thu an hriat meuh chuan Pu Tea chu a ṭhu hnawk a, a lu dâwmin leichhuat chu a bih ngawih ngawih a. A nupui a chân a, Phulvar chu him tâwkah ngaiin thih leh thih tiin an pan ve tawk tawk kha a ni a, tûnah chuan himna khawvêl rêng a awm tawh lo tih an hriat chian meuh chuan manganna dik takin an thinlung a ṭhâm a. 

"A tawp ta... khawvêl chu a tawp ta a nih hi." tiin a phun zawi sap a. Boruak chu a reh ṭhiap a. Chutih lai chuan Zothana chu a rawn hawi chhuak a, a mitmeng chu a rawn tak nghal hle mai. "Zaninah ṭanpui ngei che u ka duh a, theihpatawp kan chhuah bawk. Mahse he zawhna hi ka zawh ngei che u a ngai... In zîngah hian sehna tuar, emaw hamna hnu pem nei te in awm em?" a rawn ti fiah kak mai. 

A hnunga tlangval rualte pawh chuan an silai chu hûm nghet sauhin an rawn inring nghal at hlawm a. Sawmtea chuan a M-16 rifle, silaimu pakhat chauh awm tawh chu a hum nghet sauh va, boruak a ṭang nghal at mai. "Tûmah kan awm lo," a ti nghet charh a. Valtea leh Awmpuia chu a kâwk a, "He pa nâk hliam hi chu insualna avang a na a ni a, a piah a mi bân kha silaimu kahna hnu a ni. Hri kai sehna hnuhma engmah kan nei lo." tiin luhlul leh huaisen takin a chhang lêt a. 

Zothana nen chuan thimtham hnuaiah an inmelh rân mai a. Rei vak lo an inmelh hnu chuan Zothana chu a thaw huai a, a naute chu a mitmeiin a inthlahdul tîr ta a. "A ṭha e. Inrinhlelh a na em a, min hrethiam dâwn nia. Zanin atân chuan he bawng inah hian hahdam ula, a vêngtu tûr chu keimahni lamin kan lo ruat fel ang. Naktuk varṭianah kan inbiak chhunzawm dâwn nia." tiin ro chu a han rel zung zung a. 

Amah pawh rorêl thiam leh mipa puitling tak a ni tih a hriat theih hle. Sawmtea chu a bu nghat a. Muanpuia rawn pêk lêt tui ûm chu a la a, a han in ve ta khawlh khawlh a. Bawng in hlui bang awng aṭang chuan pâwn lam thim mup mai chu a thlîr vang vang a. Thihna kâra rawn chhanchhuaktu an tawng chu vannei inti hle mah se, ram pângngaia kîr leh theihna tûr beiseina a bo tawh zia an hriat fiah tâkah chuan, an theihna theuh rinchhana nungdama an khawsak zui a ngai tawh dâwn tih a inhre chiang telh telh a ni.

**************************************************************

Khawvâr lam a rawn inṭham chho a, Phulvar tlang leh Sihpui mual kâr ramhnuai chu a thim chhah in a vawt hle. Chhum a zîng chhah em em a, hnah ro leh hnim kâr aṭang chuan dâifîm a rawn far fap fap a. Chu thihna ramhnuaiah chuan Zauva chu theihpatawpa chakin a tlan kawi zawk zawk a. 

A thâwk a rangin a hah tawh hle a, a thlan fîmin a bual huh vek tawh bawk. A hnung lawkah chuan hri kai rual sawm dawn lai chuan theihpatawpa chakin an rawn umzui zel a. An rûm ri chhur chhur te, an thisen thâng rim nâm huam te chuan Zauva chu a ti thlaphâng zual em em a. "Min kalsan teh u..." a ti chhuak hlâwk hlâwk a, mahse chung hri kai ho chuan a thusawi chu hrethiam hek lo, seh tumin an um zel a.

Lungpui lian pui pui kârah te, thingkung lian pui pui hnuaiahte chuan a biru kual zak zak a. A châng leh hnim kârah tawmin a biru kual nasa tawh hle a, mahse an hnâr a fingin mihring rim an hre thei em em mai bawk si, reilotêah an rawn hnai chilh leh ṭhin. Zauva thâwk a chham dâwn hial tawh a, a khûp leh ban te chu hnim hriam tak tak leh hling zum tak tak tai pilhna  avângin a thi hnuang tawh bawk.

"Lalpa..." a ti rilru vawng vawng a, a chemte ken hriam tak chu ala hum ve reng a. A beidawng thawkhat tawh takzet. Chutih lai chuan hri kai zinga a tlan chak zual pahnihte chuan an rawn zuan fu ta hlauh mai! Zauva chu a let tawp a, a chem kenna lam zawk ban chu hri kai pakhat zawk chuan a rawn man fuh ta hlauh mai! 

"Ai!" a theih ṭhawt a, hri kai chuan seh tumin a rawn ang ta zuau zuau mai a, phih thlak mai a tum a, mahse hri kai chuan a man nghet lutuk tlat! Chutih lai tak chuan thil ri hrawk hi a hria a! Chu hri kai lû ah tak chuan muzuk zum tak mai chu a rawn bur ngut mai a! Chu hri kai chu a zawi thla dâwp a, a awmna chuan la rawn bawk thlawp zui. 

Zauva chu rawn thawh a tum a, mahse hri kai dang pakhat in a rawn zuan leh tûr chu muzuk hmawr zum lutuk mai bawk hian a hrawk ah a rawn thil tlang nghal hrawk mai a! "Va hawi lêt suh! Rawn tlân nghal rawh!" tiin mipa aw ngei mai chuan a rawn ti a. Zauva chu chak takin a va tlân nghal a. Amah chhanchhuaktu awmna hmun thim chin a va thlen phei chuan, Mizo patling pângngai tak, thinchhiat hmel zet leh muzuk sei tak hûm, ral beih inring rân mai hi a lo ni a, thal a lo nei ve bawk.

Chutih lai tak chuan hri kai panga dâwn lai chu rûm chhur chhur chungin an rawn tlân phei leh hlawk hlawk mai a. Chu patling chuan fîmkhur leh hmanhmawh takin a thal mu chu thun in theihpatawpa chakin a thal a, hri kai pathum ngawt mai chu thim zîngah chuan a kâp thal nghal dâwp dâwp a. 

"Min rawn zui rawh!" a ti sup a, hri kai dang rawn thlen belh hma chuan ramhnuai pilril lam panin an tlân liam nghal a. Reilotêah hri kai ho thâwm chu a hla tial tial a, ramhnuai thim mup hnuaiah chuan a reh ta ṭhiap a. Zauva chu lung pui phên, ruam thim laiah chuan a ṭhu thla nghal hnawk a. 

A thlan tuiin a bual huh hnâp a, a hah leh hlau chu a la khûr dar dar bawk. Chu patling, amah  chhanchhuaktu pawh chu thâwm dîm takin a rawn thu ve nghal a. "I ṭha em?" chu patling rorum hmel tak chuan zâwi sup hian a rawn ti a. Zauva chu a bu nghat a, a thaw hlawp hlawp a, "Ka... ka lawm e," a ti chhuak thâm ṭuak a. 

"Khawi aṭanga rawn kal nge i nih a?" tiin a zawt lêt nghal a. Chu patling chuan thâwk a han la halh a, a muzuk chu leiah a dah a, "Phulvar aṭanga rawn tlân chhuak ka ni... Rova ka ni e." tiin a chhang a. A hmel chau leh beidawn hmel tak kârah chuan lungngaihna thûk tak a inphûm tih a hriat hle a, "Phulvar khua ah khân hri kai an rawn lût a, a chhe vek tawh... ka nupui leh fanau te bo zawnga ramhnuai rawn hrût ka ni e... nungdama an la awm hrâm beisei in..." a ti thâm  ṭuak a, a aw ah chuan patling meuh pawh a rilru hah zia a lang chhuak thei a ni.

***********************************************************************

Khawvâr êng chuan ramhnuai a tiau chhum chhah tak te chu a rawn chhun kiang ṭan a, dâifîm a tla nasa in boruak chu a vawt vûk mai a. Bawng in hlui, thing leh dî hmanga sak rawp lek lek tawh chhûngah chuan damchhuak te chu chauh luat vângin an la mu hlawm a. Hmeichhi pahnih te chu inkuah lum tumin theih ang angin an tawm chial bawk a, a ṭhen chu vawt tih vângin an khûr dar dar bawk a. 

Zân lama thihna kut vawt tak laka an dam chhuak hram chu mumang ang mai a ni. Sawmtea chu a muhil ve lova, kawngka sîrah ṭhu in a silai (M-16 rifle) chu uluk takin a lo hru fâi mial mial a. Nungdama an la awm avânga a lawm rualin, a ngaihtuahna erawh a thui hle. Chhanchhuaktu pasarih te nen hian an vaiin mi sawmparuk (16) lai an ni tawh a. 

Pick-up truck pakhata chuang chhunzawm zel tûr chuan an tam mah mah a, hliam tuar Awmpuia leh Valtea te bakah rawlthar leh hmeichhe sâwngnâwi tak tak an awm bawk si. Kawng tluanin pick-up ah hian an inphur zo dâwn lo tih a chiang reng. Zothana, pick-up khalhtu leh chhanchhuaktu te hotu ber chu a rawn phei a. 

Sawmtea bulah chuan rawn ṭhu thla in meizial a ṭan khu nghal hlat hlat a. A hmel ngui bar leh a mit bui chuk atang chuan nizan an mut tlem zia a lang reng a. "Nizana silai kan hmeh puah nasat em avang khan hri kai ho hian min rawn chhui theihna chance a lian hle a nia. Tûnah tak phei chuan an kal darh ve hlawm anga, helai hmuna awm reng hi a him dâwn lo." a rawn ti sup a.

"I sawi dik alawm." Sawmtea chuan a silai endik pah chuan a lo ti a. "Helai hmun aṭang hian chhuak pawh ni ila, i pick-up truck hian him takin min phur zo vek dâwn lo. Hliam tuar leh sâwngnâwi kan ngah si a. Hri kai rualin kawng lakah min rawn nêk thut a nih chuan theihpatawpa chaka tlân chhiatna tûr lirthei dang kan mamawh belh ngei a ngai a ni." tiin thutak zet hian a lo ti ve bawk a.

Zothana naute zînga pakhat, Hriata chu a rawn inrawlh ve vat a. "Mahse khawi lam nge kan pan ang? Phulvar lamah emaw, kawngpui pangngai lamah chuan kan kîr thei tawh lova, an awm khat vek tawh dâwn. Kawng pângngaiah chuan motor chhia a tlar pût dâwn bawk si a, tih theih nei lovin kan tâng khâng palh ang tih a hlauhawm khawp mai." a lo ti ve bawk a.

Renga chuan a thal mu khung tha chungin chu an ti ti chu a lo ngaithla ve rân a. "A nih chuan khawi aṭangin nge motor dang chu kan neih tâk ang? Ramhnuai pilril a ni tawh a, keini tlangval ho chuan ke pawhin kan kal kual theih mai rualin, heng naupang leh hmeichhia te hi kea kalpui chi an ni tawh lo, an theihna in a tlin tawh dâwn lo." a rawn ti charh charh a.

Zothana chu a ngawi vang vang a, a meizial zûk bâng chu leiah nawr hlum in a inngaihtuah mûk hle a. A mitmengah chuan thil hriat chhuah thut a nei tih a hriat theih a. "Hmun pakhat chu a awm a lawm." a ti ta hlawl mai. Sawmtea leh Renga te chu beiseina nen an rawn en nghal a.

"Sihpui mualah khuan Pu Liana te huan a awm a. Huan mai pawh a ni lo, cement hmanga sak thlam lian tak, bâng chhah leh him tha tak a nei a ni. A hausa a, a huan kalna atân bolero camper emaw, lirthei ṭha tak a dah reng ṭhin. Arbai mawng tawp a awm a ni a, a hla bawk a, hri kai ho pawh an tam ka ring lo." Zothana chuan a han ti fiah fak fak a.

Sawmtea hmel chu a rawn êng deuh a, a ngaihtuahna pawh a kal thui hle. "Motor chauh a ni lo, a hmun sawi dânah chuan a him hmel hle mai." Renga en pah chuan a lo ti sup a. Zothana chuan a lu a bu nghat a, "Chu mai a ni lo. Phulvar khua hri kai hovin an rawn luh chhuah ṭan tirh khân, mi tlem azawng chu Sihpui mual lam pan khân an tlân chhia a. Kha cement thlamah khân damchhuak dang tâwm khâwm an lo awm ka ring tlat a ni." a ti leh a.

Chu thu an hriat chuan beiseina thar in an thinlung a rawn chhun êng a. Sihpui mual cement in ah chuan an mamawh lirthei bâkah, hmeichhe ho awm himna tûr hmun fal leh ralthuam an hmuh theihna a nih ngat chuan pan ngei a ṭul a ni. Sawmtea chuan a silai chu nghet takin a hûm a, "A ṭha e. Awm thawveng thei kan ni lo, theihpatawpa rangin chhuah kan ngai e. Inti harh ula, inpeih ru. Sihpui mual cement thlam pan chuan kan chhuak ang." tiin thu a pawt chat ta a. Midang ho pawh chu theih ang angin an rawn intintuah ve nghal a.

**************************************************************

Sihpui mual cement in chhûng chu thlanmual ang mai hian a reh ṭhiap a. Pâwn lamah hri kai ho thâwm a awm tawh rih lova, buaina thleng tûr a awm rih lo bawk. Meipui êng dâl ruih hnuaiah chuan damchhuak ho chu thlaphâng takin an ṭhu ngawi ṭhap a. Pu Ruala theihnghilh thihna râpthlâk tak khân an thla a ti bârin, a bîk takin hmeichhia leh tar chak tawh lo ho chu an la khûr ru dar dar a.

Chutih lai chuan, Pu Rina chu in lâiah, meipui êngin a chhun theih chinah tak chuan a rawn ṭhu ṭha sauh sauh a. A aw chu a han thian kharh a, hruaitu inngaitlawm leh khawtlâng tâna inpe zo tak hmel a pu lui tlat a. "A râpthlâk a ni... Pu Ruala chhan tumin theihpatawp ka chhuah a sin." tiin a hnuk chu a han ulh der vel a.

A kut, hlauh vânga la khûr ru dar dar chu a han bêng thak a. "Mahse, thim tham aṭang khân an rawn bawh huk a, pakhat emaw pahnih chauh an ni lo, an tam lutuk tlat. Ka theih ang angin ka bei lêt ve a, mahse ka ṭhianpa, Pu Ruala ngei mai chuan, 'Pu Rin, tlân rawh... in chhûnga hmeichhia leh naupangte sâwn chhan ngaiin an nghâk che a nia, lêt rawh!' tiin min rawn au lêt tawk tawk a ni." a han ti vel zuah zuah a. 

A dâwt sawi chu amah ngei pawhin a âwih ta hial emaw tih mai turin a lu a han bu nghat nghat a. Chu thu an hriat chuan in chhûnga nutling leh tar chak tawh lo ho chu an inhnît hlap hlap a. Pi Dâri phei chuan a mittui hru mawlh mawlh chungin, "Aw... a va pawi tak em. Mahse Pu Rin, i ti ṭha lutuk a nia, nang ber i awm loh chuan keini ho chuan tih theih kan nei dâwn lova, Pu Ruala pawhin thil thlîr thiam takin a ngen che a nih chu. I thiam loh a awm rêng rêng lo ania." tiin a lo thlâwp nghal thlap a. 

Midang ho pawh chuan Pu Rina hlauh vânga tlân chhe mai a ni tih leh, a sahim nan hri kai ho bulah a nam phei a ni tih hre lek lovin, pa huaisen leh an innghahna awmchhun ang hialah an ngai nghet ta hmiah a. Mahse, in kil khata thim chinah chuan, Zela leh Chhingpuia chu ngawi rengin an ṭhu dûn a. 

An mitmeng erawh midang ang a ni ve lo. In hnung lama awng aṭanga an thil va hmuh—Pu Ruala sâ ei tu hri kai te kha pathum lek an ni tih leh Pu Rina dâwt sawi inmil lo lutuk chu an hre chiang dûn hle. Pu Rina'n dâwt a sawi a ni tih an hriat chian miau avângin, an sahim nan Pu Ruala chu hri kai ho bulah a theh phei a ni thei mai ang em tih thlengin an rinhlelhna chu a lian tawh a ni.

Zela chuan Chhingpuia chu a va melh a, Chhingpuia pawh chuan thil awmzia hrethiam takin a lo melh lêt ve bawk a. Tûna thu dik phawrh chhuah a, Pu Rina thlâwptute laka buaina siam chu a hun rih lo tih an hrethiam a. Chuvângin, Pu Rina insawi thei leh pa huaisen ber awm ang zia zanga a han hawi kual vel lai chu rinhlelh hmel tak leh ten hmel takin, ngawi rengin an melh dûn ta tlawk tlawk a.

In chhûng thim dâl ruih ah chuan hlauhna thla a la zâr mup rualin, Pu Rina'n dâwt sawi hmanga a inlak pa kual velna thâwm pawh chu a reh zui ve ta a. Hmeichhe ho chu theih ang angin bâng kil theuh ah an tawm khâwm a. Puii leh Bawihi pawh puan hlui tak sinin theihpatawpa nghet in an inkuah chial a. 

Chutih lai chuan, Puii chu a rawn hawi chhuak a, an awmna in chhûng zîmte, meipui êngin a chhun phâk loh chin thim lam chu uluk takin a melh kual a. Zauva, thinrim leh ngawi renga chemte hûm chunga a ṭhutna ṭhin bâng kil thim lai chu a va en a. A ruak huai mai! A mitvai emaw tiin a mit a han nuai a, a han dâk kâng deuh a, a en nawn leh a, mahse Zauva hmel rêng hmuh tur a awm miah lo. 

Puii chuan a bula muhil mang lova hlau leh thlaphânga mek, Bawihi dârah chuan dîm te in a va sâwi a. "Bawihi... Zauva a awm miah lo a nia." tiin a beng bulah chuan a va phun sap a. Bawihi chu a rawn inbeng kâng rang kher mai, phâwk hru in a mit a len kual ve nghal a. Bawihi chuan an piah lawk, in hnung lam thim chin a leichhuat awng thîr phek inkhuhna chu a va hmu ta a. 

A inkhâr phui lo deuh a, chuta ṭang chuan pâwn lam thli vawt a rawn thaw lut heuh heuh tih a zuk hrethiam a. Chutah chiah chuan thil awmzia an man thiam nghal vek a ni. Zauva, Pu Rina thil tih rawng tak avânga theihpatawpa inpet ruh tang tang khân, he tualthattu kianga dâwt hnuaia tâwm him ai chuan, ramhnuai hri kai ho laka a theih ang anga a sahimna zawn chu a lo thlang zâwk tih a chiang ta hle.

Bawihi mittui chu a rawn tling pam a, ramhnuai thim mup leh hri kai riltâmte hnuaia a ṭhianpa, mahni chauhva thihna rûam hrût tûr a han ngaihtuah chuan a lainatin a awm a nuam lo takzet a ni. Mahse, Puii nen chuan an inmelh rân a, Pu Rina hmuh a thâwm siam chhuah chu an ngam lo. 

Pu Rina'n a hriat chhuah vaih chuan Zauva chu tlangval luhlul, hnawksak leh hri kaia inlet mai tûr angin a dawt a phuah chawp thiam leh dâwn tih an hriat chian miau avângin, ngawi rengin an hmui an chip a. Rilru na leh mangang rû tak chungin Zauva chu nungdama a la awm theih hrâm beiseiin a rûkin an ṭawngṭai sak ta ngawt mai a ni.

*********************************************************

Bawng in hlui an chhuahsan aṭang khân dârkâr khat lai a liam ve tawh a. Sihpui mual lam pan chuan Sawmtea pawlte leh Zothana pawl te, mi 16 lai mai chu theihpatawpa thâwm dîm leh fîmkhurin an inzui thla hnak hnak hlawm a. Kawng chu a chhukin a rûam thûk tial tial a, kawng pângngai awm tawh lovin ramhnuai pilril tak a ni. 

Tiau chhumin ngaw pui a bawh chhah luk a, dâifîm thing hnah a far ri te pawh chu a khat tawkin a hriat leh zeuh zeuih theih a, hnah ro pal ri lo tûra thawm an dim theuh avângin an kal pawh a muang hle. Awmpuia leh Valtea te chuan hliam tuar dun mek mahse tha an thlah ngam lova, naupang leh hmeichhe ho pawh theih ang angin an pên ve hrâm hrâm a ni. 

Pick-up truck erawh kawng lian dâiah theihai kung hnuaiah an thukru a, a tul thut huna pan leh mai theih turin ruahmanna an siam a ni. Zothana chu hmâ hruaitu Sawmtea sîrah a rawn kal thla ve zel a. A mitmeng fîah tak chuan Sawmtea te ralthuam chu uluk takin a lo thlîr ru reng a. Sawmtea'n inring tâwk taka M-16 rifle a ken mek chu a melh vang vang a.

A hnunga chau chung chung a kal lui hram hram Pu Tea kuta Pistol pângngai tak awm te, leh Renga'n a hnungzânga AK-47 nghet taka a ah te, Valtea'n Revolver a pai vâng mai te chu a hmuh hmaih lo. A naute Mizo silai (SBBL) leh ulhbun an hûm te nen chuan a inthlauin a inang lo hle tih a hria.

Lugthlir khua atanga damchhuak, mi pângngai ve mai maiin hetiang ralthuam hlauhawm leh ṭha lutuk, sipai ralthuam an nei chu mak a ti ru hle a. Engtia an neih nge tih chu a hre chak ta talt mai, "Sawmte..." tiin a rawn be ṭan a. "Khang in silai ken te kha.. ralthuam pangngai a ni hauh lo mai. Khawi aṭanga in neih nge ni a?" a ti ta nge nge a.

Sawmtea chu a kal ngaiin a kal reng a, ramhnuai hma lam thim mup bih ngur ngur chungin a hawi sawn eih lo. "Burma ral ho laka kan chhûh sak a nih hi." a ti tawi hmuk a. Zothana chuan mak a tih hmel zual sauh a, a pên chu a tâwp dâwn hman hial a. "Eng a? Burma ral ho in tih chu... khawchhak lam ral ho nen in lo inbei tawh tihna em ni?" tiin a zawt zui leh a.

Sawmtea chuan thâwk a la hawk a, theihnghilh theih loh thihna ruam Lungthlir sîkul kawtzawl, Luna te rual nena an inbeihna leh thihna te kha a ngaihtuahnaah a rawn thar leh a. A na nghal vawng vawng a. "Thawnthu thui tak a ni," a ti zâwi sup a. "Tûnah rih chuan ka sawi peih lo a ni e." a ti bung leh hmuk a.

Zothana chu tlangval puitling tih takah, thil thleng râpthlâk tak tuar tawh an ni tih a hrethiam a. A nui sak a, engmah a zawt zui ta lem lo. Mahse a hnung lawka rawn kal ve Hriata, Zothana naute zinga mi chuan phûr hmel leh mak ti hmel takin, "Heng in silai ken theuh hi em ni in laksak theih zawng chu?" tiin a rawn zawt ve leh hrâm a.

Renga chuan Hriata chu a rawn lehhawi a, thâwk la halh in a thal hrui a tuai zeuh a. "A dang pawh a la tam mai. Silaimu bawm 10 vel leh kan eitur tlem a zawngte pawh kan la nei a lawm. Mahse... nizan khân kan sa him nan a pick-up a rawn chuan ve kan ngaih tak avâng khan, Bus chhûngah khân kan kalsan ta vek a ni." a lo ti hnual rawih a. Tûma'n engmah an sawi zui tawh lova, ngawi rengin sihpui mual lam pan chuan chhum kârah an pil thla ta hnak hnak hlawm a.

************************************************************

Chhun ni êngin ngaw pui thim mup mai chu a rawn chhun fiah riai riai a. Tiau chhum vawt tak karah chuan thing zâr aṭangin dâifîm a rawn far fap fap a. Thihna kâra rawn tlan chhuak hlim hlawl, Zauva leh Pu Rova chu ramhnuai pilril taka thingkûng lian pui hnuaiah chuan thâwk la hlawp hlawp in an ṭhu sawp nûai a. 

An thlan tuiin a bual huh vek a, an thawmhnaw ah te chuan thisen leh chirh diak a kai hnuang bawk a. Hri kai rual thâwm a reh tâkah chuan, ramhnuai boruak uap churh kârah chuan an awmna hmun chu a him deuh ta ah ngaiin an inthlahdul ṭan a. Pu Rova chuan a ipte pui aṭangin tui ûm bal tawh tak hi a rawn phawrh a, a han in khawlh khawlh a. 

Chumi hnuah tuihâl tawh lutuk vanga chau hmel tak, a piah lawka ṭhu Zauva lamah chuan a va theh phei a. Zauva chuan lo dawng vatin a dâwt nghal khawlh khawlh a, a dang ro lutuk a han hnawm takah chuan a thaw huai mai. Tui ûm a pêk lêt leh hnu chuan an pahnih chuan an inmelh vang vang a, an inhre ngai lova, sawi tur a vang duh khawp ang.

"I la naupang mai siah, nangmah in i awm bawk sia, i huaisen hle aniang maw?" tiin Pu Rova chuan a muzuk hmawr tuai neuh neuh pah chuan zâwi sup hian a rawn ṭawng chhuak a. "Engtin nge heng lai ramhnuai ah hian mahni chauhva i awm theih a?" tiin a zawt a. Zauva chu a thaw hak a, lei lam chu a bih ngur ngur a. 

A chemte chu a hum nghet sauh a, thinrimna in a rawn tuam leh ṭan a. "Tukin zîng te thleng kha chuan ṭhen leh rual ka nei ve a lawm." a ti zâwi fâk a. "Lungthlir khua leh Phulvar khaw tlâk chhiat hnuah Sihpui mual cement thlam hlui ah kan tâwm khâwm a. Mahse... hri kai ho ai pawhin, mihring, mahni sahimna atâna theihpatawp chhuah inti te zâwk hi an lo hlauhawm tih ka hmu chhuak ta a ni." a han ti zawi sap a.

Tichuan, Zauva chuan thil thleng zawng zawng chu Pu Rova hnenah chuan a sawi chhuak ta vek a. Tukin zînga Pu Rina'n patling pakhat hri in a sehna hnuhma a hmuh vâng ngawta khawngaihna nei miah lova hnung lam aṭanga a kâh hlum thu te, leh in chhûnga a dâwt sawi kual vel dante chu hnuk ulh lek lek in a hrilh a. 

"Tualthattu, inti hotu leh chapo tak lakah khân ka sahimna tur ka hmu zo dawn lova. Nakin zêlah hnawksak min tih rualin a dâwt sawi thiamna hmangin min la rûn ve dâwn tih ka hriat avângin dâwt hnuaia tâwm reng ai chuan rawn chhuah rûk mai ka thlang ta a ni. Mahse, ka ṭhiante pahnih, hmeichhe awmnem takte kha chu ka kalsan a ngai ta si a." Zauva aw ah chuan inthiamlohna thûk tak a rawn lang chhuak a. 

A ṭhiante hnutchhiah a, a tlân chhe ta mai chu a inthiam thei lova, mahse tih theih dang a nei bawk si lo. "Hruai chhuak theih ka ni si lova... nungdama an lo awm theih hrâm ka beisei a ni." a ti ngui raih a. Pu Rova chuan a lo ngaithla uluk hle a. Tlangval huaisen leh rilru ṭha tak a ni tih a hrethiam nghal a. 

Thâwk a han la hawk a, a dârah chuan a rawn vuan a. "Khawvêl pângngai chu a liam tawh a ni, Zauva. Tûnah chuan dân thar pakhat chiah a awm tawh... chu chu 'dam khawchhuah' hi a ni. Tualthattu kianga tâwm ai chuan, mipa i nihna ang leh i dinhmun en chuan thutlukna dik tak i siam a ni. Mahni hmasial tualthattu kiangah chuan tûmah an him tak tak ngai lo." tiin a lo hnem ve mawlh mawlh a.

"A nih nang le, Pu Ro?" tiin Zauva chuan a han zawt lêt ve a. "Phulvar aṭanga rawn chhuak ka ni i ti a... i chhungte chu i zawng mêk a ni a. Phulvar khawchhungah chuan an awm tawh lo tihna nge, beiseina insiam chawpin helai ramhnuaiah hian i rawn zawng risk tawp zawk?" tiin a han zawt ve a. 

Pu Rova hmel chu a rawn ngui nghal riai riai a, a mitmengah chuan hmuh hrehawm tak ngaihtuah chhuak ang hrim hian rilru natna a rawn lang a. "Kar hnih liam ta khân a rawn inṭan a ni." a ti thâm ṭuak a. "Khaw luhna kan dâl a, kan khaw tlangval huaisen te nen kan inrâwn khâwm a... mahse hri kai te kha an tam lutuk a, ramsa riltâm ang maiin thim tham aṭangin an rawn dâwk chhuak sup sup mai a. Silai hmeh puah in awmzia a nei lova, thâwm khân a ko khâwm tam zâwk ting emaw tih mai tûr a ni."

A muzuk hmawr hriam tak mai chu a tuai neuh neuh va. "Khaw pum chu ṭap thâwm leh thihna rûamah a inthlak nghal a. Ka nupui leh ka fapa, kum 12 mi lek chu tlân chhe ve tûrin ka kaitho rawk rawk a. Mipui phîli buai hlau lutuk insûl pel nûai nuai kârah khân kan tlân chhuak ve a... mahse, thim zîngah khan kan inhloh ta ani ngei ang... tun thlengin ka la hmu lo chu a nih hi." tiin a chhang a. 

A mittui chu a tling ve pam a, mahse patling tih takah a tap chhuak duh bik miah lo thung. "Zânkhua in ka theih chin chinah ka zawng a. Ka au eih thei miau lova, ralthuam theih ang ang kengin helai ramhnuai mual hi ka rawn hrût ve tawp mai a ni. Thi tûrin ka phal lova, an ruang ka hmu a nih loh chuan nungdam ngain ka ngai tlat dâwn a ni tawp mai." a ti nghet charh a.

An pahnih chuan ramhnuai pilril takah chuan an ṭhu dûn tlawk tlawk a. A hrang ve ve in an thinlung a keh chhe mek a. "Kan kal zêl dâwn em niang?" Pu Rova chuan a rawn ti thut a, a rawn ding chhuak a, a muzuk chu a han siam ṭha sauh sauh a. Zauva pawh a bu nghat a, rawn ding chhuak ve in, he thihna ruamah hian mi rinawm pakhat tal a la hmuh belh chu a la beisei fan a, tichuan beiseina thar nen hmalam panin an pên chhuak ve leh ta a ni.

***************************************************************

Meipui êng dâl ruih hnuaiah chuan Puii leh Bawihi chu theihpatawpa thâwm dîmin an inhnaih chial a. In hnung lama leichhuat awng inhawng huau an hmuh aṭang khân Zauva tlân chhuah dân an hrethiam tawh kan tih kha. Bawihi chuan Puii beng bulah chuan zâwite hian, "Zauva tih dân ang chiah khân... tah sawn chhuak ru ve mai ang. Pu Rina'n a hriat chhuah hma leh pâwn lama mi nung lo ho in kawngkharpui an rawn nêm chhiat vek hma hian, chumi lo chu tih theih dang kan nei lo." a han ti zawi sap a.

Puii chu a lo thaw halh a, Zauva tlân bo na thîr phek inkhâr lo thim ruih chu a melh vang vang a. Chhuah rûk chu thihna aṭanga an him theihna awmchhun a ni tih a pawm pui thlap. Mahse, a piah lawka hlauh vânga khûr dar dar chunga mu tawm chial mai, a nu (Nu Hriati) chu a va thlîr a. "A dik alawm, hetah chuan thihna chiah hmabâk a awm tawh. Mahse Bawihi... ka nu hi ka kalsan thei dâwn lo a nia, ka hruai chhuah ve ngei a ngai ang." tiin a lo chhang a. 

A mitmengah chuan nu kalsan phal lo fanu hmangaihna a lang chhuak hial a. Bawihi chu a phâwk deuh hrâ a, mangang takin a thaw chhuak hawk a. "I â emai Puii! Thim thamah theihpatawpa chaka kan tlân chhiat a ngai dâwn a, i nu chu a upa in a chak tawh lo a, min tlân pui ve thei nang. Thâwm kan dîm ṭha thei dâwn lova, pâwnah sâwn hri kai tam tak an la awm bawk si. Tlân chhia pawh ni ila, min ûm phâk anga, kan pathum in min manin min seh hlum vek zâwk dâwn a sin." tiin a vin lek lek mai.

Mahse Puii chuan Bawihi kutah chuan a hûm nghet sauh a, a mittui a tling pam a. "Ka kalsan dâwn chuang lo. Tualthattu hnuaia hnutchhiah a, heng ramsa ho chaw atâna kalsan ai chuan... tlân chhiat pui ka tum anga, kan tlin loh leh ka nu rualin ka thi ve mai ang." a ti ta tlat mai a. Bawihi chu a ngawi vang vang a, a ṭhiannu rilru chu a hrethiamin hrehawm a ti hle a. Tlân chhiat rûk mai theihna tûr kawng a inhawn sa reng laiin, an thutlukna siam tûr khauh lutuk avâng chuan an buai dûn ta map mai.

*************************************************************

Sihpui mual lam pan chuan ngaw pui thim mup leh hnawm chap hnuaiah theihpatawpa thâwm dîmin an inzui thla hnak hnak hlawm a. Kawng chu a rual rem lohin hnim a pik hle a, tiau chhum a zîng chhah bawk nen an hmalam pen sawm pawh a lang fiah hleithei lo. Zothana leh Sawmtea chuan hma an hruai a, a laiah sâwngnâwi leh hliam tuarte kal tîrin, Renga leh Zothana naute chuan hnung an dâwl a. 

Engkim mai chu a reh vawng vawng a, chawhnu her boruak uap churh chuan an thâwk lak a ti sa phat hlawm a. Chutia fîmkhur tâwpkhâwka an kal lai chuan, an hma lawk hnim pik kâr aṭang chuan hnah ro pal ri sawk sawk thâwm a rawn chhuak ta thut mai! Sawmtea chu a ding chawt a, a ban a phar chhuak nghal vut a. 

Mahse an inring hman lo, an vei lam leh ding lam ngaw pui chhum zîng kâr aṭang chuan rûm ri chhur chhur hi a rawn ri chhuak nghal tuar tuar a. Thâwk leh khatah, ramhnuai hnim kâr aṭang chuan hri kai rual—sawmhnih, sawmthum dawn lai mai chu an rawn dâwk chhuak ta zawk zawk hlawm mai le!

"Min hual a nia! Kâp rawh u!" tiin Zothana chu theihpatawpa ringin a au ṭhawt a. A silai a hmet puak nghal ṭhuai thuai a. A hnunga a naute panga pawh chuan an silai leh thal te chu an theih ang angin an hmet puak ve nghal ṭhuai ṭhuai bawk a. Silai thawmin ngaw pui reh tak chu a luah khat vek a ni ber e. 

Mahse hri kai ho chu an tam lutuk tlat, thing bul leh hnim kâr atang chuan ramsain an sa seh tur an ûm ang mai hian theihpatawpa chakin an rawn bawh lût huk mai a. Zothana naute zinga pakhat chu a silaimu thun lai takin hri kai palian zet pakhat hian a sir aṭangin a rawn bawh thlu nghal ṭhuai a. 

Chu tlangval chu a au ṭhawt a, a nghâwngah tak chuan hri kai chuan a rawn seh ta bawrh bawrh mai a! Thisen a chik ṭhawt ṭhawt a, a ṭhiante chuan chhan an tum lai takin hri kai dang an rawn tlân ve nghal a. Thlaphânna leh thihna chuan second reilotê chhûngin chu ramhnuai thuk tak mai chu thawk leh khatah a rawn tuam hlup a ni ber mai.

Sawmtea te pawl leh Zothana te pawl, hnaih chilh taka kal ho mek te pawh chu an darh huk a. Zothana naute pali la bâng te chuan an ṭhianpa chhan tumin silai an hmet puak mawlh mawlh a, mahse hri kai ho chuan natna an hre tawh der si lova, silaimu in a thelh ṭhenkhat, hri kai rual te chu an rawn zuang thuak thuak ta mai a. 

Chung tlangval pali te chu hri kai ho chuan an beih rawn a, an seh ta sup sup hlawm mai. Zothana ngei pawh a naute thih dân râpthlâk lutuk a hmuh chuan a au vak vak ringawt mai a, mahse tih theih a nei tawh si lo. An vai mai chuan an darh ta nuai mai. Awmpuia, a nâk hliam la duk chur mai vânga tha thawh hlei thei lo chu hri kai pahnihin an rawn ûm a. 

Siama chuan a bânah vuanin theihpatawpin a pawt dawr dawr a. Hri kai ho in an rawn hnaih tak em avângin, Awmpuia leh Siama chu kawng thlang khâm deuh lamah chuan an zuang thla a, an lum thla ta rawk rawk mai a, chhum zîng kârah an pil bo nghal vang vang a. Pu Tea chu a phîli buai vek tawh a, hri kai rawn inbarh lût nûai kârah chuan a fapa a zawng ruai a. 

"Fela! Fela!" tiin a au tuar tuar a, mahse hri kai ho rûm thâwm leh silai pûak ri chuan ngaihtuahna fim a put tir hlei thei lo a ni ber mai. Hri kai pakhatin Pu Tea rawn bawh a tum lai takin Muanpuia'n a ulhbun chuan a rawn kâp leng lawp a. Valtea chuan Pu Tea dârah rawn manin, "Pu Te, tlân ang! Fela chu midangin an kâi hman ang, helai chu a him tawh lo!" tiin a pawt dawr dawr a. 

Muanpuia te pathum chu thing lian pui pui kârah an tlân hrang ta a. Chutih laiin, Hriata (Zothana naute zinga pakhat damchhuak) chuan a sir lawka Fela hlau bawk khûr dar dar chu a va hmu a. Hri kai pakhatin Fela chu a rawn zuan dâwn chiah tih ah Hriata chu a tlân phei a, a silai kâwma lo chhut thluk pahin Fela chu a pawt kâng lawp a. 

"Min rawn zui rawh naupang!" tiin an pahnih chuan theihpatawpa chakin vei lam ngaw pui chhah laiah chuan an tlân ve bo ve ta a. Renga chu theihpatawpa insiam remin a chempui hriam tak chu a vai fua fua a. Hri kai a hma a rawn ding apiang chu a lo sat ṭhuai ṭhuai hlawm a. A sîr lawka Hlimpuii hlauh avanga khûr ngawt ngawt chu a kutah a va man chawt a, 

"Kal ang!" tiin a pawt lawp a. Sawmtea te awmna lam panna tûr kawng a pin vek tawh avângin, Renga chuan Hlimpuii chu lûngpui bumboh kârah a hruai chho a, kawng chho lam, hnim puk ruih mai lamah chuan a pawt chho dawr dawr a. Sawmtea chu thlan tui in a bual huh vek tawh a, silaimu a nei tawh lova, mahse a silai chu lék kângin hri kai rawn hnai apiang chu a theihpatawpa nâ in a lo chhu thal tawp tawp hlawm a. 

A bulah Muani chu hlau in a ding khawng reng a. Zothana pawh a silaimu a zovin, a naute panga ngawt mai ramhuaia inlet mek lai a hmuh meuh chuan a huaisenna zawng zawng a bo dâwn hial a. "Zothan! Tlân ang! I chhan thei tawh lo!" Sawmtea chuan a bânah theihpatawpa nâ in a va pawt ṭhawt a.

Zothana chu a rawn inthing harh a. Hri kai la bâng sawm chuang lai chuan theihpatawpa chak in an rawn hnaih chilh mêk a ni. Sawmtea chuan Muani chu theihpatawpa nghetin a kâi a, Zothana'n hnung a dâwl a, ramhnuai chhum zîng mup karah chuan hmâ lam panin an pathum chuan theihpatawpa chakin an tlân chhe ve ta a. 

Hri kai ho chuan hnim leh thing tang pal ri rawk rawk in an rawn ûm zui dawr dawr a. Hun rei tak chhung hri kai ho lak atanga lo tlanchhe tawh, damchhuak tlemte ho chu an beiseina tlem te an neih chhun chu nuai bovin a awm leh ta a, ramhnuai pilril tak hnuaiah chuan an kal darh ta vek mai! 

Thihna thlazar hnuiah ah mi panga in nuna an chân a, a la dam chhuak te pawh chu mahni theihna theuh rinchhanin ramhnuai hmun hrang hrangah, in hloh vek leh inhmu thei tawh lo tûrin an tlân bo darh ta vek a. Tiau chhum zîng chhah tak kârah chuan mangang au thâwm leh hri kai riltâm rûm ri chiah chu hriat tûr a awm tawh a ni.

********************************************************************

END OF EPISODE 6