ONCE UPON A TIME IN MIZORAM : SEASON 2 (Mizo zombie horror story) Written by : Aaron Malsawmdawngzuala Episode 4 : What We Have To Do

 ONCE UPON A TIME IN MIZORAM : SEASON 2

(Mizo zombie horror story)

Written by : Aaron Malsawmdawngzuala

Episode 4 : What We Have To Do

*****************************************************

Kawtthlêr thim kâr leh hnim pik hnuaiah chuan Khawchhak ral pahnih, tlânchhe ta te chu thâwk pawh la ṭha ngam mang lovin an lo bîru rân a. Pu Tea leh Valtea ten an ûm zui tih an hriat avâng chuan an thlaphâng ru hle a. An silai hûm chungin, an bul vêla thâwm ri hlek chu an tin leh thut thut thin.

Chutia thlaphâng ru tak leh inring taka an ṭhut ngawih kar lai chuan, an piah lawk thim tham, in hlui phên aṭang chuan thâwm a rawn ri ta sat sat mai le. Sazu thawm emaw thli thaw satliah a ni lo, mihring pên thâwm leh hnah ro inrap ri ngei a ni. Chu Khawchhak ral pahnihte chu an inmelh zawk a, thâwm rawn chhuahna lamah chuan an silai chu an tin nghal rân a. 

An kutzung tang chuan silai trigger chu an dek hman tawh a. Mahse, hnim kâr aṭanga rawn pên chhuak chu an beisei loh leh an rin loh lutuk a ni tlat. A hmai dâng bâm leh thlan tuiin a bual huh vek, a thawmhnaw thisen leh vaivut bal kâi hnuang chungin Luna ngei mai chu a rawn lang ta hlawl mai. 

Amah pawh chu a rawn hawi kual zak zak a, a hlauthawng ve hle tih a hriat theih. A naute pahnih la dam, silai nêna lo bîru a hmuh rual chuan a thaw huai a, a bân a vai zauh a. Tlangval pahnihte pawh chuan an hotupa a ni tih an hriat veleh an silai tin lai chu an dah thla ve nghal thuai a.

Luna chu an bulah chuan theihpatawpa thâwm dîmin a va tawlh lût ve nghal a. Thâwk a la hlawp hlawp a, a mitmengah chuan hlauhna aiin thinrimna leh phuba lâk duhna a lang lian zâwk. Burma ṭawng chuan aw thâm deuh leh zâwi sap si hian, "Khawiah nge Pu Khama a awm? In hmu em?" tiin a naute chu a zawt nghal vat a.

Tlangval pahnihte chu beidawng hmel takin an inmelh a, pakhat zâwk chuan a lu a thing nar nar a. Burma ṭawng bawk chuan, "Kan hre bîk lo. Chhum zing kâr aṭang khân thal mu a rawn thlâwk fua fua a, kan ṭhiante an tluk tâk tawpah khân theih ang angin kan rawn tlânchhia a ni. Silai hmet puak ri kha chu kan hria a, mahse Pu Khama chu a thi nge a la dam kan hre zui tawh lo." tiin thil thlen dân chu a lo hrilh zung zung a.

Luna chu thinrim lutukin a han rûm deuh nghut a. Pu Khama chu thi tawh tura a ngai nghal hmiah a, Mizo tlangvalte lakah chuan thungrûl lova let mai chu a tum lo bur a ni. Thâwk a han la halh a, an bihrukna in hnung lam leh an piah tlang chho deuh ruih chu a han thlîr vang vang a. 

Chhum zîng kârah chuan chu tlang chhipa in lian tak tak awmte chu a lang ruai a, chu chu Lungthlir Sîkul Tlâng a ni tih erawh an la hre hauh lo. Chutia tlang lam a thlîr vung vung lai chuan, a bula mi Khawchhak tlangval pakhat zâwk chuan chu tlang chhohna kawng bumboh tak chu a han en ve a. 

A hmelah chuan thil hriatchhuah thut nei hmel hi a rawn pu a. "Hotupa... helai hmun vel leh he tlang chhohna hi... Dawlliana leh Lungmuana ten ralthuam kan dah ṭhatna hmun an sawi kha a ni lawm ni? He tlâng chhip bula thelret kung hnuaiah an ti tlat a ni." a rawn ti chhuak hlawl mai.

Chu thu a hriat rual chiah chuan Luna mitmeng chu a rawn phawk nghal hru a. Dawlliana'n thil thlen hmaa a hnena a lo report dân kha a mitthlaah a rawn lang uar uar a. "Dawlliana sawi dân kha chuan... tlang lamah a ti tak e." a ti zawi sap a. "Ngawi teh, a ni ngei ang. Kan vanneih a siamin kan ralthuam chheh ruk awmna bulah kan lo tlânchhe reng a nih hi." tiin a khi ta sâwng a. Tichuan, khaw chhûnga Mizo tlangvalte chunga phuba lâk ngei tum leh ralthuam ṭha zawk tam tak lâk chhuah tumin, Khawchhak ral pathum te chu Sîkul tlâng lam pan chuan thâwm dîm takin an pên chho ta ṭham ṭham a.

*************************************************************

Lungthlir khaw dâifêm lam kawtthlêr thim leh dur mup kârah chuan, Pu Tea leh Valtea te chu theihpatawpa fîmkhurin an pên phei zêl a. Khawchhak ral pahnih tlânchhe ta, an umzui mek te kha an hma lawkah an awm reng amaw an tih laiin ramhnuai hrût ṭhang tih takah, an phâk tlat lo a ni ngei ang. 

Tiau chhum a zîng nasa si bawk nen, silai kâu sa rânin an veh dûn chhet chhet a. "Pu Te... an liam hman ta a ni ngei ang. Khawilai in pakhatah emaw ah hian an bîru tawh a nih ka ring." Valtea chuan a sir lam thlîr kual zak zak pah chuan a han ti a. A bân hliam nâ chu a sa hat hat tawh a, a thlan fîm in a bual huh deuh hlap bawk. 

Pu Tea pawh chuan thâwk a han la hawk a. "Ni e, ui fîng ang mai an nih hi. An himna tûr chu an hria alawm. Mahse anmahni rêng rêng pawh khân khaw chhûnga kan dinhmun hi a ralti tih an hre ve tho ang." tiin a lo chhâng a. Chutia hma lam pan theih a ni dâwn nge, lêt theih a ni dâwn ti a an ngaihtuah buai mêk lai chuan, an hnung lam hla deuh, kawtthlêr awih thla lam aṭang chuan thâwm a rawn ri a. 

Pu Tea leh Valtea chu an phu zawk a, inring takin an silai chu thâwm rawn chhuahna lamah chuan an tin nghal rân a. "Pu Te! U Valte!" aw thâm deuh chhal, mahse chiang tak mai hian a rawn ti ri an hriat rual chuan an thla a muang nghal suai suai a. Tiau chhum kâr aṭang chuan Sawmtea, Renga leh Awmpuia te chu silai leh buara inhûng bâwr lûk chungin an rawn chhuak hlawl mai.

"Sawmte! In tha maw?" Pu Tea chuan theihpatawpin a lo au lêt ve lau lauh va. Silai dah thla in a pan hnai nghal a. Renga chuan Awmpuia chu a vuan nghet hle a, Awmpuia erawh chu nâ tih vângin a kal pái deuh chhet chhet a. "In kap thâwm khân min ti thlaphâng hman lutuk alawm. Chuan Awmpuia chu eng nge a an? Hliam pawi deuh a nei em?" Valtea chuan a lo zawt nghal chûk chûk a. 

Sawmtea chuan a M-16 rifle a dâra pu pahin, "A nâk nêm leh a bek hi an chhirna leh an hnekna a vual deuh a, silaimu erawh chuan a deng fuh lo hlauh e. Khâng Khawchhak ral ho khân helai thlêng hian min ûm zui dâwn tih tûman kan hre lâwk bîk si lo a ni." tiin a han thaw halh a. Renga chu rawn tawng chhuak ve in, "Khawiah nge mi pahnih te kha?" a lo ti ve thung a.

Pu Tea chuan lû thing nar nar pahin, "Kan umphâk ta lo a ni. An râng lutuk a, bihruk an thiam sâ bawk nen, khawilai in hnuaiah emaw an lût bo hman a niang." Chu thu a hriat rual chuan Sawmtea chu a ding deuh chawt a. A mitmeng chu a phîlî nghal hle a. "In hmu hman lo a maw?" a ti deuh hrâwk a. 

A ṭhiante chuan mak tiin an han en hû a. "Eng nge nita Sawmte?" Renga chuan a lo zawt vat a. Sawmtea chuan thlaphâng takin sîkul tlâng lam chu a han hawi chho a. "Sîkul tlângah khân... Hlimpuii leh naupang dang, midang zawng zawng an awm a ni lawm ni? Khâng misual pahnih te khân khaw chhung aṭanga hla deuh leh him tûra ngaih, sîkul lam khi an lo pan ve thei reng ania, an hotupa pakhat zawk lah kha a tlanchhe daih lehnghal." tiin a meng phi nghal chung mai.

"Lalpa leh... a pawi lutuk. Muanpuia leh Siama chauh vêngtu an awm a sin. Kan chhoh vat a ngai!" Valtea chuan a rawn ti hluai a. Renga chuan thâwm dîm tûra a kuta zaizir pahin, "Inbeng  dâi ru. Hmanhmawh in, mahse thâwm kan siam vak tûr a ni lo. An lût dâwn a nih pawhin thâwm dîm theihpatawpin an veh dâwn a, an la thleng kher lo thei. Ei tûr leh silai kha insêm ila, sîkul tlâng panin theihpatawpa rângin kan chho nghal dâwn nia." tiin thutlukna a siam zung zung a.

****************************************************************

Zauva leh Mapuia leh hmeichhe pahnih te chuan Sihpui Mual ram thui tak chu an zawh chhuak thei ta hram a. Lungthlir lam ang lo takin helai hmunah hi chuan chhum zîng hmuh tûr a awm tawh lova, chhun pachang a nih avângin nî pawh a sa vawng vawng hle. Ramhnuai pilril leh thim ruih aṭanga an han chhuah hlawl chuan, nî sa chuan an mit a ti vai deuh rum rum hial a.

Mual vawm fiah tak, hnim hnah hring dup kârah chuan cement-a sak in, a chung rangva thar deuh nî-in a chhun tle sur mai chu hla deuh aṭang chuan an va hmu pha ta! Chu in chu ramhnuai thlam satliah ni lovin, a sak dân a khauh hmelin a him hmel hle a. "Sâw... sâw ngei saw a ni! Sihpui mual thlam kan tih chu!" Mapuia chu a lawm lutuk a, a hmel dawih dâk kârah chuan hlimna a rawn lang ve ta. 

A thau deuh avângin a thaw hluam hluam a, a kuta tuthlawh a hûm pawh chu a thlahdul deuh a. Beiseina nei mang tawh lo khawpa chau an nih tawh avângin, chu cement in an han hmuh meuh chuan an vai mai chuan thihna ruam aṭanga chhuak hlawl ang mai hian an thaw huai a, an kalsan tâk khuaa an thil tawn râpthlâk tak tak te kha reilotê chhung chu an theihnghilh hman hial a ni.

Mahse, hlim taka chu in lam pana tlân phei an tum mêk lai chuan, an hma zâwn hnim buk kâr aṭangin tlangval pahnih hi silai hûm rân hian an rawn dawk chhuak ta thut mai le! An pahnih chuan an silai chu kau sa vekin Zauva te ho lamah chuan an rawn lek kâng nghal vu mai a. "Khata khân ding rawh u! Tute nge in nih?" pakhat zâwk chuan a rawn ti vin thawt a.

A ṭhianpa zâwk, tlangval hmel rorum deuh chuan a silai hmawrin Mapuia, nichin lawka hlim luat avânga lo pên hma deuh bik chu a tin rân a, "Seh in tawk em? In taksaah khan sehna hnuhma a awm em? In rawn pên leh a nih chuan kan kâp dâwn che u a nîa!" a rawn ti ve leh khûr khûr a.

Mapuia chu a dawih bawk a, a phut zawk rualin a kuta tuthlawh a ken chu leiah a thlauh nghal  a, a bân pahnih a phar nghal hluai a. Zauva erawh chuan a chemte hûm nghet sauh chungin tlangval pahnihte chêt dân chu fîmkhur takin a lo thlîr reng thung. Chutia tlangval pahnih ten rinhlelh hmel taka an lo vau mêk lai chuan, cement in chhûng aṭang chuan hmeichhe pakhat, nu valai lam deuh, hmel phîlî tak mai hi a rawn tlân chhuak ta thut mai le!

Chu nu chuan tlangval silai kengte vaukhanna pawh chu ngaihsak lovin Puii lam chu a rawn pan phei dâwr dâwr a, "Puii! Ka fanu!" a rawn ti chhuak tuar a. Puii pawh chuan a nu aw a hriat rual chuan a  va en ve nghal a, tlangval pahnih silai kengte chu pêlin an ava tlan phei a, a hmu leh tawh ngai dâwn lo emaw a tih tawh hnuah anu chu a hmu leh ta, a kuah thlawp a. 

An tap dun hawm hawm a, chutah zet chuan tlangval pahnihte pawh chuan hmelma an ni lo tih hriain an silai chu an dah hniam ta deuh a. Silai keng pakhat zâwk chuan a ṭhianpa lam hawiin, "Kha... hmelma an nih loh kha. Khuaa damchhuak tlêmte zinga mi an nih dawn kha. Leader va ko rawh, he mite hi lo endik deuh an ngai ang." tiin thu a pe a. 

A ṭhianpa chu hmanhmawh takin in chhûngah chuan a tlân lût nghal a. Reilotê hnuah chuan cement in kawngkhâr lian tak, thing khauh tak hmanga siam chu a rawn inhawng leh a, mipa pakhat, rorum hmel leh puitling hmel deuh mai, hmel zahawm tak hi a rawn chhuak ta a. Zauva chuan a han en chiang a, mak tiin a meng phâwk a, "Pu Rina!" a ti chhuak sup a.

Pu Rina hnungah chuan damchhuak dang pasarih (7) vel lai mai, hmeichhia leh naupang pawh telin, chu in chhûng thim ruih aṭang chuan hlauhthawnna leh beiseina inpawlh nuai hian an rawn chhuak ve bawk a. Sihpui mual a cement in rest house chu thihna ruam aṭanga damchhuak tlêmte te tân chuan bîrukna hmun him leh in thar, beiseina thar lo inṭanna hmun a ni ngei ang le.

*************************************************************************

Sîkul tlâng reh ruih mai chu chhum chhah tak hian a rawn tuam chho mêk a. Lungthlir sîkul classroom hlui tawh tak, a darthlalang keh nuai tawh sîrah chuan Luna leh a naute pahnih chu thâwm dîm takin an pên chhet chhet a. An AK-47 hûm lai chu inring takin an hun ran a, classroom tin chu hmuh hmaih hlau ni âwm takin an bih den den a. 

Luna hmel rorum tak, thisen leh chirhdiak kâi nuai tawh chuan sîkul office lam chu a thlîr leh  zeuh ṭhin a. Sîkul office chhûng thim ruih maiah chuan, Siama leh Muanpuia te chuan an beng lo chhi rân a. Pâwn lama hnah ro rap ri leh mipa aw ang tak ṭawng thum bul bul thâwm an hriat rual chuan an thinphu a rawn rang nghal a. 

Muanpuia chu fîmkhur takin tukverh parda hlui tawh tak lam chu a va pan a. A kuta parda a han keu dek dek chiah chu, a thil va hmuh chuan a thau ah a man nghal dawt mai! Luna leh a naute pahnih, ralthuam ṭha tak nêna inthuam, kawtzawl laia an rawn veh kual mêk chu fiah takin a va hmu ta. 

Muanpuia chu a meng phâwk nghal kâwk a, mahse thil pawi tak a thleng ta tlat! Luna chu office lam rawn hawi thut pahin tukverh parda kâra lo dâk mêk Muanpuia chu a rawn hmu hman ta tlat mai le! Rang lutukin Muanpuia chuan parda chu a zar phui nghal rawk a, bang phênah chuan a bîru nghal chawt a. 

"Hrep tak chuan!" a ti vawng vawng a, a thlan fîm a rawn bawl ṭiam ṭiam a. Siama chuan phâwk hrâ hian, "Tinge? Tute nge?" a lo ti ve nghal bawk a. Muanpuia chuan thâw hlawp hlawp chung hian, "Khawchhak ral ho kha... an lo kal! An hotupa khân min hmu hman a ni." a ti ta a. Chu thu an hriat rual chuan office chhûng boruak chu a vawt nghal ruih hi a ni ber e. 

Hlimpuii leh Pi Kungi te chu hlauh vângin an inkuah nghal chawt a, an khûr nghal dar dar a. Muani pawh chuan a fapa Kimkima chu a âwmah kuah betin, a hmui a lo hup sak nghal vat a. Tuman ṭawng chhuah ngam miah lovin, thihna thla zâr hnuaiah an ṭhu ngawi ṭhap a. Pâwn lamah chuan Luna chu a ding chawt a, office kawngkhâr lam chu a thlîr vang vang a. 

A han nui sak a, "A chhûngah sawn awm an awm chiang a ni." a ti thum chhak a. A naute pahnih chuan an rinhlelh hmel deuh hian, "I chiang maw, hotupa?" an lo ti a. Luna chuan a AK-47 her rem sauh pahin, "Aw, mi pakhat a rawn dâk alawm." tiin a chhâng a. An silai kengin office kawngkhâr lam chu an va pan ta a.

Office chhûngah chuan Siama leh Muanpuia te chu thih leh thih tiin an lo inring ve at a. Siama chuan pistol pakhat, silaimu tam tawh lo tak chu a hûm nghet hle a. Muanpuia erawh chuan Ulhbun (single-shot gun) pakhat a keng ve bawk a. Ralthuam dang ṭha zawng zawng kha Sawmtea te khân khaw chhûng luh nân an lo keng vek tawh si a, tûnah chuan an dinhmun a derthâwng takzet a ni.

Chutih lai chuan Hlimpuii chu a rawn che phut a. A huaisenna zawng zawng sawm khâwmin, a thal (bow) chu a mu nêna kau sa at in, thiam leh thiam lovin kawngkhâr lam chu a lo tin ve rân a. A kut a khûr nasa viau a, mahse a mitmengah chuan a chhungte vên him duhna a lang thung. 

Luna te rual chu kawngkhâr bulah an va ding a. "Kawngka hi rawn hawng rawh u, tichuan tuman hliam in tuar lo vang!" Luna chuan a ti vîn ṭhawt a. Mahse chhûng lam a mi te chu an ngawi thiap a. Chutah zet chuan Luna thinin a tuar ta tlat lo. A naute zînga pakhat kawnghren (webbing) a Hand Grenade lo intlar dal zînga pakhat chu a va phih thla ta hrawk mai le! 

Grenade chu a han lek chhuak a, "Tûnah hian in rawn hawng lo a nih chuan... he office hi ka bomb darh vek dâwn a nia!" tiin a vau nawn leh khûr khûr a. In chhûnga biru ho tân pawh chuan thutlukna siam a ngai ta. Grenade a puah vaih chuan tumah an dam chhuak dâwn lo tih an hria. 

Siama leh Muanpuia chu an inen a, chutah hmeichhe ho hlauthawng hmel chu an va en leh a. Muanpuia chuan a hnuai lam deuh melh pahin, "Lungngai suh u, kan him em em ang." a ti zâwi sup a. Tichuan, hreh tak chungin kawngkhâr chu a va hawng ta a. Kawngkhâr a inhawn rual chiah chuan Luna chuan a AK-47 chu dârah a ak ṭha vut a, tlangval pahnih chu a rawn nam lût nghal rawk rawk a. 

Muanpuia kuta Ulhbun leh Siama pistol lo ken te chu rang lutukin a laksak nghal a. "Rawn chhuak vek rawh u! Tûnah!" tiin a hmet phawi mai dâwn emaw tih tûr hian grenade pin chu a kutzungpuiin a han pawt ran a. "He grenade pin hi ka phawi vaih chuan in vai hian in thi vek dâwn tih hria ula, fîmkhur hle ang che u." tiin a vau zui leh a. Tichuan, hlauhna leh manganna hnuaiah, Siama, Muanpuia, Pi Kungi, Muanite nufa leh Fela te chu office aṭang chuan kawtzawl lam panin an rawn chhuak ta hnak hnak hlawm a.

***********************************************************************

Sîkul tlâng tualzawl reh ruih mai chu Sawmtea, Renga, Pu Tea, Valtea leh Awmpuia te chuan thâwm dîm theihpatawpin an rawn chuangkâi ve ta a. Office kawt an thleng dâwn chiah tih chuan an pên lai an ding chawt mai. An hma zâwn lawka an thil hmuh chuan a thawng hlawm takzet! 

Luna leh a naute pahnih chuan an ṭhiante, hmeichhia leh naupang te pawh telin, silaiin an lo tin ṭhap mai a. Chu thil an hmuh rual chiah chuan Sawmtea, Renga leh Awmpuia te pawh chu rang lutukin an silai lek kang vatin, Luna te rual chu an rawn tin lêt ve nghal a. Mahse Luna chu a zam hauh lo. 

A naute silai rinchhanin a kuta Hand Grenade pin phawi a lo tum  tawh sâ chu rawn lek chhuak lehin, "Silai kha dah thla nghâl rawh u! In dah thla lo a nih chuan he thil hi ka phawi ang a, in zavaiin in darh vek a ni mai." tiin a lo vau chhunzawm nghal khûr khûr a. Mahse Sawmtea chuan a M-16 rifle chu dah thlâk a tum lo bur. 

A ṭhiante pawh chuan dahthlak tum bik lovin an hmelmate chu an tin ngar ngar a, sikul kawtzawlah chuan an intin rân ta hlawm mai. Chutah Luna thinrim insûm zo tawh lo chu a rûm chhuak hrawih a. "Ka fiamthu emaw in ti a ni maw? A ṭha e..." tih pahin a chê ta thut mai. A AK-47 chu a dârah akin a kâwnga a zeh pistol chu rang lutukin a phawi zawk a, engmah sawi set set lovin an hnaih bera ding Pi Kungi chal dârah tak chuan a kâp ta siah mai le! 

Silai puak ri ṭhuai in a zui a, Pi Kungi chu a dâk âwrh a. A tukhumah chuan a thluak leh thisen a per nghal chhawk a, nâ pawh hre hman lovin leiah chuan a thal nghal dâwp a, a thi nghal chiang kher mai. Chu thil râpthlâk lutuk an mit hmuh ngeia a thleng thut mai chu an phu dâwrh hlawm a. 

Muani leh Hlimpuii hlau leh thlaphâng chu theihpatawpa ringin an râk chhuak nghal chel chul mai a. Muani chuan ṭap chungin Pi Kungi let reng lam pan chuan tlân a tum a, mahse Khawchhak ral pakhat zâwk chuan a samah lo ṭhâm betin a bêng thal ta pawp mai a. A nupui duh tak mai, a mit hmuh ngeia râwng taka kah hlum a ni ta mai chu Pu Tea chuan a tuar thiam lo takzet a ni. 

A fapa Fela pawh chu mittui tla zâwih zâwih chungin, "Nu!" tiin leiah chuan a ṭhingṭhi nghal hnawk a. Pu Tea chuan a rifle ken lai chu lek kâng vutin, thinrim vânga a hmui khûr dar dar leh mittui tling teuh chung chuan Luna chu a tin a, a hmet puak dâwn chiah tihah... Luna chu a che leh phut a. 

Muani fapa Kimkima, kum 9 mi lek hlau thlaphâng chu a hnunglam aṭangin a theihpatawpa dim lovin a pawm kâng ta nawlh mai! Kimkima nghâwngah chuan a rek titih ta mai a, a kuta grenade pin phawi in-peih sâ at mai chu a hmai zâwnah a rawn lek kang leh a. "Kâp rawh! Min kâp rawh! Mahse he naupang pawh hi a thi ve nghal dâwn a nia." tiin a vau leh khur khur a. 

Pu Tea chuan thinrim lutuk chuan a ha chang a ṭhial ri rap rap a, mahse Kimkima nunna thâp tel a ngaih miau avângin a kâp ngam ta bîk lo. Sawmtea thinrim insehruh lutuk chu a thaw halh halh tawh a, a hmai a sen vek bawk. Renga pawh chuan chêt lâk mai ngaihna hre lovin leichhuata Pi Kungi ruang tlu hlawm bal mai chu a en tlawk tlawk ringawt a. 

Luna chuan vin tak hian, "Midang thih belh in duh loh chuan in silai kha leiah dah thla nghâl vek rawh u." tiin a vau zui leh a. Tihngaihna dang a awm tawh lo tih hriain, Sawmtea chuan thinrim tak chungin Renga leh midangte chu signal a pe a. Tichuan, hreh tak chungin an silai chu muangchangin leiah an nghat thla ta hlawm a. 

Chutih lai mêk chuan Siama leh Muanpuia te pawh chuan ṭap rawih rawih chunga kawtzawla lo tlu mek Muani chu an lo kai tho ve mêk bawk a. Luna chuan a naute pahnih lam chu hawiin, "Va kal ula an silai saw va chhar khâwm rawh u." tiin thu a pe nghal a. Tlangval pahnihte chuan silai chhar tûra an pan phei lai tak chuan, thil beisei loh lutuk a thleng ta tlat mai. 

Kimkima, hlauh vânga khûr dar dar emaw an tih kha, Pi Kungi an thah avâng leh a nu an sawisak avângin a thin a rim ve tlat ni ngei tur a ni! Amah pawm bet tlattu Luna bânah chuan theihpatawpa nâ in a seh sak ta thut mai le! Luna chu a phu zâwk a, "Aiah! Hrep tak chuan!" tih leh a kut thin thlâk a rual a, a phut nasat lutukna lamah a kuta a grenade ken lai chu leiah a thlauh ta palh hlauh mai!

Luna'n grenade a thlauh rual chiah chu remchangah la in, Sawmtea chu a dâwk chhuak nghal zâwk a. A hma leichhuata a silai nghah chu chhar thutin a kâuh sâ a nih avângin a lek kâng a, a lam rawn pan mêk Luna nau pakhat zâwk chu a âwmah tak a kâp thal nghal ṭhuai mai! Thisen a baw hawk a, chu pa chu a let nghal tual a. 

Chutih rual chiah chuan hlauhlawp a tlân chhe mek Kimkima chu sîkul office kawtzawl dâi, kham awih lutuk lo lamah chuan  a zuang thla nghal daih mai! Rang lutukin Luna, thinrim a alh phat phat lo chauh tawh chuan Kimkima chu umzuiin kham thlangah chuan a zuang thla ve nghal a. 

Renga chuan a thal a lo chuh ve vat a, Luna zuang liam tûr chiah chu theihpatawpa nâ in a kâp zui ve a, mahse a kâp thelh ta hlauh. Luna nau pakhat la bâng erawh chu a ṭhianpa kah hlum a nih rual khân a inthing harh ve vat a. A AK-47 chu kau ri hrâkin Sawmtea kâp tûrin a insiam rem nghal a. 

Mahse a hnung lawk aṭangin Siama chu a rawn dâwk phei thut a, chupa chu a hnunglam aṭangin a rawn bawh tlu ta thlawp mai le! Leiah chuan an let dûn nghal a. Chutih lai tak chuan Valtea chuan a revolver chu lek chhuak ve nghalin chupa rawn inbeng kâng tûr mitmu ah tak chuan a kâp ta siah mai a. 

Thisen per chhawkin chupa pawh chu a bawk nghal thlawp a, a thi ve nghal a. Boruak chu thihna leh silaia in kap thawm rî in a khat nuai tawh a. Chutah kawtzawl sîr aṭang chuan Muani chu a fapa dinhmun hlauhthawnawm lutuk vâng chuan a insûm thei tawh lo. "Ni lo! Kimkim! Ka fapa!" tiin ring lutuka râk ṭhawt chungin kham dâi lam pan chuan a tlân ve ta thut mai.

Tûman an va dang hman lo. Pu Tea leh Fela lah chu theihnghilh rual loh thihna tuarin Pi Kungi ruang bulah chuan an ṭhingṭhi a, rilru na takin an ṭap hawm hawm a. Sawmtea chuan a silai hûm chungin Muani chu umzui vatin a va tlân phei a, mahse a thlen phei hma chiahin Muani chu a fapa ûm in kham awih hnuaiah chuan a zuang thla ve ta tlat mai. Kham tlângah chuan Sawmtea chu a ding vawng vawng a, a mang ang takzet. Tualzawl thihna rim nâm huam leh uap mup kârah chuan boruak chu a va han ipik in, a va han râpthlâk tehlul em!

*******************************************************************

Pâwn lam nî sa lutuk leh thihna kâra nungdama an tlanchhiat luh hnu chuan, cement in kawngkhâr pui lian leh rit tak chu an khar phui a, a chhûng lamah chuan thingtluang lian puiin an kalh zui nghal hmiah a. Pâwn lama sava hrâm ri leh thli thaw ri thâwmte chu a reh nghal hmâk a.

In chhûng chu tukverh dâp-a an chhut phui deuh vek avângin a thim ruih a, mahse thim chhah mup erawh chu a ni lo. Rangva kâr leh tukverh kâk aṭanga nî zung rawn lût sêt sêt te chuan in chhûng boruak bal leh vaivut leng chiai chiai chu a rawn chhun êng deuh ruih a. Chu hmunah chuan thihna rim a nam ve lova, mahse mihring tui in tûr ṭha hmu lo leh inbual lo rei tawh rim, mei khu rim leh thlan rimte chu a nam hum hum thung a.

Tlan chhiat nasat lutuk avânga an tha in a tlin tawh loh luat avângin, Mapuia chu cement chhuat vawt raihah chuan a bawk nghal thlawp a. A kuta nghet taka a hûm a tuthlawh hlui tak chu a sîrah a dah ri thlawp a, hawi pawh a hawi chhuak peih rih lo. Bawihi pawh in bang nghêngin a ṭhu hnawk a, a mit chhîngin hlauhna in a la kiansan loh a taksa chu a khûr ru der der a.

Puii nu (Nu Hriati) chuan a fanu chu theihpatawpa nghetin a âwmah a pawm bet tlat a. "Mambawih... ka fanu... i thi tawh emaw ka ti a sin..." tiin aw khûr hlawk hlawk chungin a ṭap chhuak hawm hawm a. Puii pawh, hlauhawm kâra huaisen taka rawn damchhuak kha, a nu âwm a han dek leh meuh chuan a huaisenna neih ve chhun te kha a nem tial tial a, naupang hlau thlâphâng tak ang maiin a tap chhuak ve a, a nu kawrah chuan a ṭhâm ngawt ngawt a.

Nu Hriati chuan mittui tla zâwih zâwih chungin a fanu hmai bal leh khem nuai mai chu a tuai sak a, thlaphân hmel takin a fanu nghâwng, bân leh a ke vel chu a en kual a. "Sehna a awm em? Bawihte, nâ i nei em?" tiin mangang takin a zawt a. Puii chuan ṭap hliam hliam chungin a lu a thing nar nar a.

Zauva erawh chu tlangval puitling tih takah, chhuatah chuan a ṭhu ngil ran a, a chemte hûm lai chu a kâwngah a zep a. A chala thlan fîm luang ngiai ngiai chu a bânin a han tuai puat a. A hma zâwnah chuan an khaw YMA President zahawm tak leh an rinchhan ber ṭhin, Pu Rina chu a rawn pên hnai a. 

Pu Rina chuan a kekawr ipte aṭangin vaihlo (meizial) a phawrh a, a ṭan khu nghal hlat hlat a. "Zauva, nungdama in lo thleng thei chu a lawmawm khawp mai. Helai cement in hi kum hnih kal taa Pu Liana'n a huan thlai dah ṭhat nâna fêh rêl a sak a ni a, hri kai hnar fîng takte paw'n mihring rim an rawn hriat theih lohna tur kgawpa him tawk a ni e." tiin a meizial fâwp kâwk chung chuan a han sawi a. 

Tlangval pakhat hian tui ûm bal ve tawh tak kêngin Zauva te ṭhian ho chu tui a rawn pe kual nghal zung zung a. Mapuia chuan a lo in nghal khawlh khawlh a. Zauva chuan tui tlem a in zawh hnu chuan thâwk a han la hawk a. A hmel chu a rawn thutak nghal ngul a. "Pu Rin, kan han dam khawchhuak chu a ni ve mai a. Mahse helai hmunah hian kan him reng angem, damchhuak dangte hi rawn kal belh zel ta se, eitur nei lovin kan tang reng dawn tho ania." a han ti a.

Zauva thil sawi avâng chuan inchhûnga damchhuak dang lo ṭhu mek te pawh chu an rawn dâk chhuak hlawm hu mai a, chu zawhna chu an rilru a lo awm ve reng tawh ṭhin a ni mahna. Tui a in zawh hnu chuan a no chu chhuatah a nghat a, Zauva chuan Pu Rina chu a han en leh kar a.  Pu Rina chu a han ngawi vang vang phawt a, "Zauva... i sawi dik chiah, Lungthlir YMA President ka nihna angin, khawtlang leh mipui te himna hi ka ngaihpawimawh ber a ni ṭhin a. Mahse... tûnah chuan khawtlang rorêlna leh YMA tih vel a awm tawh lo. Sawi tlang tawp ila, in rawn thlen hma pawh khân kan indâih tawh lo a ni. Kan chawhmeh neih chhun thlai rah te pawh inrên takin kan ei tawh a ni a..."

Pu Rina chu a hawi kual zak zak a, "Chuvângin... tûn aṭang chuan tumah he inah hian luh tîr an ni tawh lo vang." a ti ta hmiah mai a! Chu thu an hriat rual chuan Zauva an phu deuh dâwrh hlawm a, an zinga an rinchhan ber, YMA President chu mak tiin an thlîr tlawk tlawk  hlawm a. "Mahse Pu Rin... khaw chhûngah khân khawchhung mi damchhuak nupui fanau engzat nge la awm kan hre lo a sin. He in pan hian beiseina sâng tak nêna rawn tlân chhia an awm a nih chuan, kawngka kan lo kalh khum hmak dâwn i tihna em ni?" Zauav chuan a ti chhuak hlûai a. 

Pu Rina chu a inseh ruh a, a hmelah chuan mahni hmasialna leh thih hlauhna a rawn inlar chhuak nasa ta kher mai. "Zauva! Hrethiam ta che! Ka nupui fanaute pawh ka chhan chhuak zo bîk lo a nih hi!" tiin a rawn vîn deuh ṭhawt a. "Hri kai pakhat lek pawhin emaw, misual khawilai emaw aṭanga rawn tlân chhuak pawhin min rawn zui lût se, he in chhûnga damchhuak awm zawng zawngte hi kan thi vek dâwn a sin. Eitur kan insem daih loh chuan nî hnih thum hnuah tûmah hian ralthuam lék kâng tûr takngial pawhin tha kan nei tawh lo vang. Hlauhawm laka inven hun a nih hi, khawngaihna lantîr hun a ni tawh lo!" a ti ta phiar phiar a.

Chutih lai chuan Mapuia chuan, "A... a dik chiah. Pu Rina sawi chu a dik a n.," a rawn ti ve hlawl mai. Hlauh hmel taka in bang nghênga ṭhu chung chuan, "Keini min lâk luh hnu hi chuan tu dang mah lak luh tawh miah loh tûr. Hri kai pakhat paw'n min nang chîng se min pawt sâwm vek a ni mai." tiin Pu Rina thutlukna dawihzep tak chu a theihpatawpin a lo thlâwp nghal zung zung a.

Zauva chuan Mapuia chu ngei hmel tak hian a han melh ralh a. Chutah Pu Rina, mahni nunna chhan him nâna ṭhian leh vêngte phatsan hreh miah lo hotupa chu a en leh a. Hmeichhe awmnem leh sâwngnâwi zâwk tûr a ngaih, Puii leh Bawihi ngei pawh khân thih thâpin an ṭhiante chhan hna kha an lo thawk ve tawh kha a ni a.  Mahse, mipa puitling hotu lû bera an lo neih Pu RIna dawihzep hmel a hmuh takah chuan Zauva beiseina chu a bo chiang kher mai. 

Pu Rina chuan tlangval silai keng pakhat zâwk chu a kâwk a, "Ngurte... tah sâwn thing phek lian pui a awm kha, rawn la ula, kawngkharpui chhung lam aṭang sâwn kheng phui nghal hmiah rawh u. Tûman an rawn nêm hawng thei tawh tûr a ni lo." tiin inti hotu hmel pu tak chungin thu a pe zui a.

Perek khen bur bur riin cement in chhûng chu a luah khat a, pâwn lam nî êng rawn lût ve ṭâwk ṭâwk pawh chu thingphel hlai tak takin an hliah phui ṭan ta. Zauva chuan a chemte bal tak chu a kutin a tuai fai a, kawngka kalh phui mêk te chu beidawng takin a thlîr a. He hmunah hian hri kai lakah chuan an him rih ngei ang, mahse ei tûr indâih loh vânga riltâma an awm vat tur leh mipa dawihzep tak tak kâra rorêlna hnuaiah hian an hma khua a êng dâwn lo hle tih a hre chiang ta kher mai.

********************************************************************

Boruak uap leh ipik tak mai chu ṭap thâwm hlîrin a luah khat a. Muanpuia, Siama leh Awmpuia te chuan Pi Kungi ruang chu kawtzawl aṭangin office chhûngah an zâwn lût a. Chhuata puan an phah ah chuan Pi Kungi ruang chu dim tein an mut tîr a. Pu Tea leh a fapa Fela chu Pi Kungi ruang bulah chuan an ṭhu a, inhnêm thei bik pawh awm lovin an ṭap hawm hawm a. 

Hlimpuii pawh ṭap hliam hliam chungin a rawn kal hnai a, Pi Kungi puan sin chu theih ang angin an khuh tha a. Zîngkâr ah lawk te kha chuan an khaw lama let tumin beiseina sâng tak an nei a, tûnah erawh an chhûngkaw nu ber Pi Kungi in a dampui zo ta si lo. Tu a te mah chu han inthlamuan theihna thu chhak chhuak tûr rêng an awm lova, Awmpuia pawh bang nghêngin Luna sawisakna hliam tuar vânga rûm ngawih ngawih in a ṭhu ngawi reng mai.

Chutih lai chuan Sawmtea chu a rawn inthing harh a. A kuta AK-47 chu a dârah nghet takin a bat ṭha sauh sauh a, a kawnga a zeh hreipui chu a la chhuak nghal bawk a. "Helai thleng himna zawngin kan kal tawh a, mahse Pi Kungi kan chan der chu ania, Muani te nufa lah an bo bawk, a tawk zozai tawh e." a ti thum dût a. 

Chutah a ṭhiante chu a en kual a, "U Muani leh Kimkima rawn let leh hma loh chu... an him tih ka fiah hma loh chu ka awm mai mai thei lo. Sîkul tlâng hnuai ah sâwn ka va zawng dâwn." Renga pawh chu tual thah pawh pawisa thei tawh lo tih hriat takin a thal a rawn la kâng a. A mit a hnawm deuh chap a, mahse a aw chu a fiak ṭha hle. 

"I rualin ka lo kal ve ang. Khapa (Luna) thil tih man kha... thi lovin Lungthlir khua hi a chhuahsan tûr a ni lo." a rawn ti ve nghal a. Sawmtea chuan a lu a lo bu nghat a. Siama leh Muanpuia te chu a en zui a, "Hei, M16 leh AK-47, bakah an magazine-te aw. Fîmkhur ula, office chhûng aṭang hian chhuak miah suh u. Pu Tea te pafa leh Hlimpuii hi in kutah a innghat tlat a nia." tiin nghet takin a chah thlap a. 

Siama leh Muanpuia te chuan inrâl ring takin silai chu an hûm a, "Lo ngaihtuah su, theihp tawp chhuah in kan lo vêng dâwn nia." tiin an tiâm a. Tichuan, Sawmtea leh Renga te chu office aṭangin an chhuak a. Muani, Luna leh Kimkima te zuan thlak na lam, awih deuh tak lam chu panin fimkhur takin an chhuk thla ve ta a.

************************************************

Mau leh ngaw chhah tak hnuaiah chuan Luna, hmai bal leh hliam nuai mai chu thlan in a bual huh vek chungin a rawn chhuak hlawl a. "Khawiah nge maw a rawn bîruk tlat le?" a ti nuah nuah a. Ramhnuai pilril, hnim pik kârah chuan Kimkima chu a put liam chiah avâng chuan kal kawng pângngai pawh a inhriat pawh theih tawh mang lova.

Sîkul kawtzawlah khân Kimkima'n a seh ruala a thlauh tâk avângin a grenade leh a AK-47 lah kawtzawlah khân a tlânsan daih mai si a, a ralthuam neih chhun chu a kawnga a pâi chemte hriam tak pakhat chu a ni deuh tawp mai. Mau kâr thim deuh ruihah chuan thâwm ngaichângin fîmkhur lutukin a pen dim hle a. 

Hnunglam mau kârah chuan thâwm a rawn ri dawt mai! Luna chu rang lutukin a inher thut a. A chemte chu a kâwng aṭangin a phawi nghal bawk a. A hma zâwn mau hmun thim ruih aṭang chuan chak lutukin thil eng emaw hi a rawn tlan ri hlawk hlawk a. A rawn hnaih chilh zêl takah chuan, mihring thawm ngei a ni tih a hrethiam ta! 

Mahse a rawn lang chiah chu mihring pangngai a ni hauh lo, Police uniform ha, a kawr âwma thisen kâi hnuang mai hi a lo ni a. A mitmeng chu a sen râm a, a kâ aṭang chuan a chil phuan a tla bawrh bawrh a. Chu hri kai riltâm tak mai chu Police duty, Lungthlir khua chhanchhuah a nih hnu a, khaw tawn tirh a lo duty thin zinga mi a nih ngei a rinawm.  

Luna chu a mangang hle mai a, "Hrep chuan le.." a ti hlur ringawt. Chutah police hri kai chuan Luna chu a ngur chhur chhur a, chak takin a rawn tlan phei thut a. Luna zawn a thlen dawn chuan a zuang vak a, Luna chu a bawh thlu ta rawp mai le. An awmna atanga hla vak lovah chuan Muani chu a lo awm ve mek bawk a, Luna leh police hri kai inbei thawm chu a hre pha a, "Kimkim, Bawiha.." ti a au vak vakin thawm lo chhuahna lam chu a va pan phei a.

******************************************************** 

Nî chu a liam dâwn ruai tawh a, Sihpui mual cement in chhûng pawh chu a thim chhah tial tial a. Tukverh dâpa an chhilh phui kâr aṭanga nî êng rawn lût ve sêt sêt te pawh chu an dâi zo tawh a, in chhûnga damchhuak awmkhâwm te chuan thâwm siam leh êng siam an hlauh avângin mei pawh an chhem ngam lo. 

Riltâm leh tuihâl in a hmet chau hlawm viau tawh a, naupang ṭap inhnit feih feih leh patling ho thaw leh deuh hak thin thâwm tih loh chu thâwm dang hriat tûr a awm mang lo. Boruak chu a ipik in, tlai lam khawthim rawn inṭham chho mêk chuan hlauhna a rawn thlen thar leh a ni ber e. 

Chutih lai chuan in kil khata ṭhu, Phulvar khaw tlangval pakhat, Chhingpuia chu a rawn inbeng kâng ṭuih ṭuih a. A pum ri râk râk chu a dâwm vang vang a, thâwk la hawkin Pu Rina ṭhutna lam chu a pan phei ta chhat chhat a. Pu Rina hi in sîr thim laiah chuan meizial a lo zu hlat hlat a. Chhingpuia chu a bulah va ṭhu hniamin, "Pu Rin... thil pakhat kan sawi ho a ngai tlat mai." tiin thutak hmel zet hian a va bia a.

Pu Rina chuan a zial zuk lai chawl meuhin a lo melh ralh a, "Eng nge ni ta Chhingpui? Thawm dim hunlai ber a nih hi, i hriat kha..." a lo ti thum dût a. Chhingpuia chuan, "Ei tûr leh in tûr kan nei tlêm tawh lutuk, midang luh belh tir tawh loh tur thu chu i sawi ngei a, mahse hetiang zêl chuan naktuk nilêng pawh kan daih mang tawh dâwn lo. Hmeichhia leh naupang ho phei sâw chuan an tuar zo lo hrim hrim ang." tiin an dinhmun chhe tawh tak chu a han hrilh a.

"Chuvângin," Chhingpuia chuan a han ti chhunzawm leh a, "Naktuk hian khaw vâr rualin tlangval tlawmngai tlêm a zâwng ei tûr zawngin kan chhuah mai a ngai dâwn a ni. Saw in hnunglam kawngkhâr in khâr phui ve loh ah sâwn kan chhuak ru theiin ka ring, mahse leilâwn a awm loh avângin theihpatawpa fîmkhurin inhnuai lama zuanthlâk a ngai dâwn a. Chuta ṭang chuan ruam lam pan thla in tui intur te la in, sa pêl tûr tal pawhin kan chhuah ngei ngei a ngai a ni." a han ti leh a.

Pu Rina chuan a khabê hmul tuai vut vut chung chuan a ngaihtuahna a han sêng ve vang vang a. Ei tûr a awm loh chuan a tâwpah chuan amah ngei pawh in a tuar dâwn tho tih a hriat avâng chuan a lu a bu ta nghat nghat a. "A ṭha e, ruahmanna ṭha tak a nih chu. A nih chuan naktuk zîngah tlangval panga vel inruat ula, in ralthuam neih ang ang nen fîmkhur theihpatawpin in kal dâwn nia..." tiin tlangval tlawmngaite chu ama himna leh dul puar nân tiin tirh chhuah leh chu a tum a.

Mahse Pu Rina a ṭawng chhunzawm mêk lai chuan, thim tham kâr aṭangin Zauva chu thâwm dîm takin a rawn lang ve hlawl mai! Pu Rina sîrah chuan inring tâwk takin a rawn ding a, "Pu Rin... tlangval hlang ngawt chhuah chu a fû lo vang." Zauva chuan a rawn ti daih mai a. Pu Rina chuan mak ti hian a han melh chho hû a, "Engtia fû lo maw?" a lo ti lêt hû a.

Zauva chuan a thil ruahman rûk chu a sawi chhuak ta, "Pâwn lam dinhmun kan hre lova, hri kai mai bâkah misual ralthuam ṭha tak tak nei hlauhawm tak an awm maithei bawk. Chuvângin... nangmah ngei hian min ho la, naktukah chuan min hruai chhuak la kan lo ti deuh a ni." a ti ta mai a! 

Chu thu a han hriat rual chiah chuan Pu Rina chu a lûngphu a ri nghal dawp dawp a, a chil a lem dâwk a. Chhingpuia pawh chuan Zauva thusawi, thutak hmel lutuk chu phûr takin a lo thlâwp ve nghal vat a. "Ni e Pu Rin, hruaitu ṭha kan va mamawh dâwn êm! Min ho ngei la kan ti khawp mai. Nang patling huaisen, tawn hriat ngah leh kan hotu ber i awm bawk a, i hnung kan rawn zui a nih chuan thla a muang deuh ang." tiin a lo tuihnih ve bawk a. 

Hlauhawm laka tawm rûk duh vânga he cement in rawt chhuak tu Pu Rina hian ramhnuai pilril tak leh ralthuam nêna misual tawh thut chu a hlau kher mai, mahse hnial fithla ṭhak tûr chuan a intih hotuna te, a zahawmna leh mipa a nihna khân a dâl ve tlat bawk si. Dawihzep anga lan chu hlau ru ve viau si nen, a lûngphu râng lutuk leh a chala thlan fîm rawn bawl chhuak ṭiam ṭiam chu a thup hlei thei lo. 

A han khuh kharh a, tlangval pahnihte hmel fiah kâk mai chu en tawn zak zak in, "Nia... a... ni e. Ei tûr a awm dawn miau loh chuan kan inzui chhuak mai a niang chu... kan kal dâwn nia." tiin a aw khûr ru deuh bâh nûai chung chuan inring tâwk lo zetin a ti chhuak ve ta hrâm a. Chhingpuia a lâwm rualin, Zauva chu ngawi rengin a inher zui a. Mapuia leh Bawihi te awmna lama a lêt phei leh pah chuan, a beisei ang chiahin thil a thleng tih hriain thim tham kârah chuan a nui ru sak a.

*********************************************************************

Tiau chhum dum leh thli vawt takin ramhnuai a chhem vawh ruih hnuaiah chuan, nî chu liamin thimna in ramngaw chu a rawn tuam chho ta a. Thlânmual ang maia reh, sava hrâm pawh awm lohna mau kâr thim em em mai ah chuan Sawmtea leh Renga te chuan Muani leh Kimkima te nufa chu an la zawng mêk a ni. 

Hnuhma leh thâwm rêng hriat tûr a awm lova, theihpatawpa fîmkhurin an inṭhen hrâng a, reilotê hnuah chanchin inhrilhin an intawk kual leh ṭhin a. Sîkul tlâng hrût tu Ṭawitê Lûi hnâr kawr thim laiah chuan a vawi thum nan Sawmtea leh Renga te chu an innang chîng leh a. An pahnih chuan chauh luat vâng leh thlaphân luat vângin an thlan fîmin a bual huh deuh hlap tawh a. 

"U Reng... hnuhma tal i hmu em?" Sawmtea chuan aw thâm chhal hian a lo zawt vat a. Renga chuan beidawng hmel deuh hian a lu a thing nar nar a, "Hmu lo Sawmte... khawiah mah hnuhma eih hmuh tûr a awm lo." a ti zâwi fiah kâk a. An mangang ru ta hle mai. Renga chuan thâwk a han la hawk a, "Sawmte... lêt phawt mai ila. Tûnah chuan êng a awm lova, kal chi rual a ni lo. Sîkul office lamah i kîr zâwk teh ang. Naktuk zîng khaw vâr hunah, nî êng hnuai ah kan zawng leh zawk mai dâwn em ni?" tiin rawtna a han siam a. 

A sawi dik rêng a, mahse Sawmtea thinlûng chuan khawvâr hma pawh ni se Kimkima te nufa chu hruai lêt ngei a duh a ni. Chutia an inbiak lai chuan, an sîr lawk mau tam tak kâr aṭang chuan hnah ro inrap ri hrâwk hrâwk thâwm a rawn awm ta thut mai! Tlangval pahnihte chu an ṭawng lai an chawl dawt a, inring takin thâwm rawn chhuahna lam chu an silai chu an tin nghal rân a. 

Thimtham kâr aṭang chuan rûm ri chhur chhur an hriat rualin, ruangâm pângngai lo zet mai hi a rawn in pen phei chhut chhut a. A lang fiah lutuk lo na a, a rawn kal danah chuan Police form, khâkhi rawng ha a ni a, a hmai erawh thisenin a bual vek tih a hriat theih. Hei pawh hi Lungthlir khuaa chhanchhuahna a thlen hnu a, khaw tawn tirha duty zînga pakhat, an hnuhma an lo hmuh tâkte zînga mi ve tho kha a nih hmel hle. 

Mahse tunah chuan lungphu a nei tawh lova, ramhuai ah a chang ve tawh a ni. Chutih rual chiah chuan, an piah thlang lam, lûi hrût ruam thim tak aṭang chuan hmeichhe râk ṭhawt ri an hre ta thut mai! "NILO... KIMKIM!" ti a beidawng leh mangang tih hriat tak mai, Muani aw ngei mai chu ramhnuai zâwlah chuan a rawn khâwk chho ta rawih rawih mai a! 

Chu aw an hriat rual chiah chuan Sawmtea thinlung chu vih sawk ang mai hian a nâ nghal zâwk a. Renga chuan a thal hrui kau chungin Sawmtea chu a rawn nek dâwt a, "Sawmte! Zuk kal rawh! Hei chu keimân ka lo buaipui ang." a lo ti nghal vat a. Sawmtea chuan a AK-47 hûm nghet sauh pahin, Muani aw rawn chhuahna ruam thim thuk tak lam pan chuan hmanhmawh lutukin a tlân liam thla nghal dâwr dâwr a.

Sawmtea a tlân liam hnu chuan Renga chuan fîmkhur theihpatawpin hri kai Police rawn tlân phei chu a lo veh dan dan a. A thal mu hriam tak chu a kâu mar nghal at a. Hri kai chu a rawn thleng dawn chiah tihah, Renga chuan theihpatawpa kâu vakin, a lu ah tak mai kâh tum chuan a thal hrui chu a thlah ta pawk mai! 

Mahse thim tham a nih vâng nge hri kai chu a chet rân lutuk vâng zâwk, thal mu chuan a chalah niovin, a beng dinglamah thawi fua in hnunglamah thingkung pakhatah zawk chuan a bur ta va mai le! Hri kai chu a thlêk sawk a, nâ hre lo tih hriat tak hian rûm hrawih chungin theihpatawpa chakin Renga lamah chuan a rawn dâwk phei ta zawk mai.

Renga chuan a thal mu bawm aṭang chuan thal mu dang ban a han tum leh nghal vut a, mahse... a lo ruak vek tawh tlat! A thal mu neih zawng zawngte chu an inbeihna hmasa velah khân a lo hmang zo vek tawh hi a lo ni. Hri kai chak lutuk chuan a rawn bawh thlu ta dâwp mai! Leichhuatah chuan inleh thal zak zakin an inbuan ta buan buan a.

Hri kai riltâm chuan Renga nghâwng bul chêtah chuan a hap thawi thuak thuak a, a chil hnang leh ṭawp zet mai chu Renga hmaiah a far fap fap a. Mahse Renga chuan a tha hrui zawng zawng sawm khâwmin hri kai chu a leh thal thei ta hlauh mai, amah zâwk chu chung lamah atang thei ta! 

Renga chuan a kut vei lamin hri kai hrawkah chuan theihpatawpin a rêk bet a. A kâwng aṭangin a chemte hriam tak mai chu a phawi ri nghal hrak a. Hri kai Police chalah tak chuan a vit tlum ta pawk mai! Thisen a chik ṭhawt a, hri kai chu a khûr nghal hlawk hlawk a, reilotê ah a tha chu a zâwi tial tial a, a che tawh eih lo. Renga chu thâwk la hrawih hrawih chungin a rawn inbeng kâng ṭûah ṭûah a, a chemte thisen kâi chu tuai fâi puatin, Sawmtea tlân liamna ruam thim tak ah chuan a theihpatawpa chakin a tlân thla ve ta nghal a.

*********************************************************

Thla êng dâng tak chuan chhum dum in a hliah loh chin, thinghnah hlai tak takte chu a rawn chhun tle ser ser a. Ramhnuai pilril, kham kâwr thim laiah chuan Sawmtea chu inring rân chungin theihpatawpa fîmkhurin a pên hret hret a. A M-16 rifle hûm lai chu inkau sa at in a lek kâng a, a mit chuan thim tham chu a hrût kual zak zak reng a.

Mahse, hnah ro pakhat a rah rik khep rual chiah chuan, a sîr lawk thingbuk thim kâr aṭang chuan patling rorum leh lian tak, chak lutuk mai hi a rawn dâwk chhuak ta thut mai le! Chu chu tu dang ni lovin Luna, a ruka lo veh rân tu ngei mai chu a ni. Sawmtea'n silai a hmeh puah hman hma hauh chuan theihpatawpa chak in, sîr zawngin Luna chuan a rawn bawh thal tawp mai a! 

Sawmtea chu a thal nghal dâwp a, a silai (M-16 rifle) chu lei awih lamah chuan a per sawn nghal dâwrh a, thim kârah chuan a bo ta daih mai. Leichhuat vut nêm lai leh hnawm chhap ah chuan an let dûn ta tual tual a. Luna chuan a chemte lian tak chu a phawi zawk a, theihpatawpa nâ in Sawmtea âwmah tak chuan vih a tum ta mai. 

Sawmtea chuan a tha neih zawng zawng sâwm khâwmin Luna ban rêkah tak chuan theihpatawpin a bân pahnihin a lo dâwm bet ve ṭâng ṭâng a. Luna, pa rorum leh chak lutuk tih takah a bân puam thâ rawn inphiar chhuak ṭâwk ṭâwk khawpin chemte chu a rawn nem nâ leh vak a.

"Ka duh ai chuan i dam rei ta e, tlangval! Ka that tawh dawn khawp che." Luna chuan a ha ṭhial ri rap rap chungin a ti khûr khûr a. Sawmtea chu a thâwk a chham dâwn hnai a, chemte hmawr hriam tak mai chuan a âwm a rawn hnaih tial tial a. "I duhthusâm chu... a thleng ngai lo vang," Sawmtea chuan a lo ti lêt hram a. 

Chutah Luna mitah chuan a kawm ta vak mai a, Luna na ti chu a ding chhuak nghal a. A mit chu a dawm vawng vawng a, chemte chu leiah a thlauh ve nghal bawk a. Mahse Luna a che râng leh zawk tlat. Sawmtea rawn tho tûr chu a hmaiah tak theihpatawpa nâ in a lo hnek ri siah mai! 

Sawmtea chu a lû a hai nghal muai a, a pei dâwrh a. Chu chu remchângah la in Luna chuan Sawmtea pumah tak a theihpatawpa nâ in a tlawh leh siah a. Sawmtea chu nâ tiin a au ṭhawt a, leiah chuan a ṭhingṭhi hnawk a. Luna chuan rawng tak maiin Sawmtea  sam ah chuan ṭhâmin a pawt kâng lawk a, "Heh... Nepa, ding teh." a ti chhur chhur a.

Mahse Sawmtea chuan a tha awm zawng zawng hmangin theihpatawpa nâ in a kiu chuan Luna nâk nêmah tak chuan a nghawk chawrh mai! Luna chu nâ tiin a Sawmtea chu a thlah nghal zawk a. Luna rawn inbeng kâng chu theihpatawpa nâ in a âwmah a va bawh thal leh rawk a. Leiah chuan thal dun tualin an inchai leh ta buan buan a. 

Luna chuan Sawmtea mit kawm ve tumin a bei ngar ngar a, mahse Sawmtea chuan chu kut chu lo dâwm betin Luna hrawkah tak chuan a kut pahnihin a rêk bet ta tlat mai le! Luna chu a meng kawk kâwk a, thâw chhamin a rûm hrawih hrawih a. A bân sek tha tak chuan Sawmtea bânah thelh tumin a rawn ṭhâm a, a hmer nâ in a ham khem nûai bawk a. 

Mahse Sawmtea, Pi Kungi a thah sak avanga phuba lak duhna thâ chu phih sawn rual a ni lo. A rêk nghet tial tial a, "Hei hi... Pi Kungi tân a ni!" ti vat that chungin theihpatawpa nâ in a kutzungpui chu Luna hrawk bâwkah chuan a nem lût pawk a. Luna chu a tâl khûr hlawk hlawk a, a mitmu a pual vek tawh. 

Reilotê ah a zâwi tial tial a, chu Khawchhak ral nunrâwng tak mai chu a thi ve ta a ni. A tâl tawh lova, a kut a thlah a, a zawi hnawk rualin Sawmtea chuan a thlah ve ta a. Sawmtea chu a nâk dâwm in a thaw hluam hluam a, khur dar dar chungin a theih ang angin a ding chhuak a. A silai thlauh pawh chu a hmu fuh leh hlauh mai, tichuan chharin a hma zawnah chuan a kal zel a.

Chutah hma lawk aṭang chuan ṭap ri... ṭap ri ruah ruah ni lovin, beidawng thlaphâng, rilru na tak chunga ṭap hliam hliam thâwm chu a hre ta a. Thâwm dîm takin a va veh phei a.Thingkûng lian pui hnuaia hnim buk kârah chuan... thil pawi thui lutuk leh theihnghilh rual loh a va hmu ta!

Muani chu leiah chuan lo ṭhu sawp nûaiin, a mal chungah a fapa neihchhun, Kimkima chu theihpatawpa nghetin a lo kuah bet tlat a. Thla êng dâng ruai hnuaiah chuan Kimkima taksa chu naupang pângngai taksa ang a ni tawh lo tih a lang chiang hle. A vun chu mitthi ang maiin a dâng vâr pâp tawh a, a hmaiah chuan thisen zam duk kulh mai te chu a awm thuah tawh a. 

A bân pûamah chuan, a hmaa hri kai (Police) in a sehna hnuhma, thisen kâi hnuang chu a lang fiah hle bawk. Kimkima chu ramhuaiah a chang ve ṭan ta tihna  a nih chu. A taksa chu a khûr hlawk hlawk a, a mitmeng pawh chu a rawn inthlâk ṭan mêk a. Muani erawh chuan a fapa h reilote chhungin a rawn inthlâk danglam dâwn a ni tih a hre reng na a, a pawm thei thlawt lo a ni. 

"Bawiha... ni lo... Lalpa ka duh thei lo..." tiin a âwmah a kuah bet tlat a, a mittui chuan a fapa hmai dâng vâr vek tawh chu a far huh fap fap a. Zawi sap hian, "Tuâr hram hram rawh bawihte, anu a awm e..." tiin beidawng vawng vawng vawng chungin a ṭap hawm hawm a. A inhnît hlawp hlawp a.

Sawmtea chu a ding khawng lah ringawt a. A hrawk a thip vawng vawng a, khawngaih luat vângin engmah sawi lovin a thlîr tlawk tlawk ringawt a. Chutih lai chuan a hnung lam aṭangin thâwm dîm takin Renga chu a rawn lang ve nghal a. A chemte hum ran chungin a rawn pên phei a, mahse an thil tawn a han hmuh ve meuh chuan a chawl dawt a. 

Renga, tlangval huaisen tak pawh chu a mit a rawn hnâwm ve ta chap mai. Hrehawm a ti ve takzet a ni. Sawmtea chu a va kun hnai a, "U Muan..." a aw a hnâwk ṭuak a. "A sâwt tawh lo... awh i kal teh ang." a ti tham ṭiak a. Muani chu ṭap hawm hawm chungin Sawmtea chu a en a, "Sawmte..ka fapa...ka fapa hi..". 

Sawmtea chuan a silai chu a darah bat liamin Muani bulah chuan a ṭhu thla a, dim te si, mahse nghet takin Muani chu a pawt tho lui a. Muani chuan ṭap au râwng râwng chungin a fapa, ramhuaia chang mêk, a chil phuan rawn tla buah buah tawh chu kalsan hreh ngawih ngawih a ni.

Renga chuan Sawmtea chu a melh a, "Sawmte... keimân ka lo ti mai ang. Han chhoh pui vat rawh, he hmun hi a him lo." a ti fiah kalh a. Sawmtea chuan a lû a bu nghat a, Muani ṭap hawm hawm mai chu theihpatawpa fîmkhura dâwm in Sîkul tlâng pan in a hruai chho ta nghal a. Muani te an liam hnu chuan Renga chu a thaw halh a. 

A Leiah chuan a ṭhingṭhi a, Kimkima, naupang chum chiap tak mai, hri kai  tan mek, dang var vek tawh, ramsa riltâm ang maia rawn rûm chhuak hrawih hrawih chu khawngaih hmel takin a han thlîr a. A aw a khûr a, a mittui a rawn lûang chhuak ngiai ngiai a. 

"Min ngaidam rawh aw... Kimkim..." a ti thâm chhal a. A kâwng aṭangin a chemte chu a phawi a. Hreh ngawih ngawih chung siin, theihpatawpa nâ in Kimkima chalah tak chuan a vit tlum ta pawk mai le! Naupang chu a phu deuh uih a, a che a tâwp a, a thi ta. Renga chuan chemte chu phawi ri hrâwk in a chem chu a tuai fai a.  Ri chhuak si lovin a insûm theihloh vângin a inhnît deuh hrâwih a, a thaw halh halh a. A mittui chu a luang zawih zawih mai, muang chang chuan tho chhuakin sikul tlang lam chu a pan chho ve leh ta a ni.

**************************************************************

END OF EPISODE 4