ONCE UPON A TIME IN MIZORAM : SEASON 2 (Mizo zombie horror story) Written by : Aaron Malsawmdawngzuala Episode 5 : The Devil You Know

 ONCE UPON A TIME IN MIZORAM : SEASON 2

(Mizo zombie horror story)

Written by : Aaron Malsawmdawngzuala

Episode 5 : The Devil You Know

***********************************************************

Zan a rei tan ta. Lungthlir sîkul office chhung thim leh vawt takah chuan lungngaihna leh thina in thla a zâr mek a ni. Dawhkân banga bati lo inchhi êng phet phet hnuaiah chuan damchhuak la awm zawng te—Pu Tea, Fela, Sawmtea, Valtea, Renga, Hlimpuii, Muani, Awmpuia, Muanpuia leh Siama te chu hmel ngui burin in an ṭhu ngawi ṭhap a. 

Thâwm dang rêng a awm lova, pâwn lama thli thaw vûk vûkin a rawn chhem rîk thâwm bâk hriat tûr a awm lo. Boruak chu a rit in, nungdam ni mah se, an rilru erawh a thi mek chu a ni si. Chhuat laiah chuan Pi Kungi ruang chu an theih ang angin puan in an khuh ṭha a, a let bal a. Chu ruang bulah chuan Pu Tea leh a fapa Fela chu an ṭhu kun ngul a, an mita mittui rawn lûang chhuak ngiai ngiai chu hruk sen pawh a ni tawh lo. 

Zîngkara beiseina sâng tak nêna an luh theih ngei inbeisei tlâng kha tûnah chuan mithi sun an lo ni ta si a. Kil khatah Muani chu bang nghêngin a ṭhu sawp a. A fapa neihchhun Kimkima a chân ta mai chu a la pawm thei lo a ni ber e. Hlimpuii chuan a bulah ṭhu in a kutah a lo vuan a, mahse hnêm ngaihna a hre bik lo. 

An pahnih chuan chhuat lam bih ngawt ngawtin an inhnît hlap hlap reng a. Tûn dinhmunah chuan hri kai ho chu hlauhawm ber an ni tawh lova, an mihringpui vek chu an hmelma lian ber a ni tawh si. Tlangval ho—Awmpuia, Muanpuia leh Siama te pawh an beidawng tawh em em a, tu emaw thaw chhuak leh hawk ṭhin tih loh chu tûmah an ṭawng lo. 

Renga chu a sîrah ṭhu in a thal mu (arrows) la bâng tlêm tê te chu ngawi rengin a han nâwt fâi a, a mitmeng chu a tak ngul mai. Valtea pawh a bân hliam, thi rawn chhuak deuh ṭîam ṭîam tuam ṭhat pahin a inseh-ruh ṭeuh a. Beiseina aiin beidawnna in office chhûng chu a luah khat vek hi a ni ber mai.

Chutia thihna thlazâr hnuaia ngawi renga an awm lai chuan, Sawmtea chu a rawn thaw chhuak hawk a. A ṭhutna aṭang chuan a rawn ding chhuak ta hluai a! A ralthuam, a M-16 rifle chu a dârah nghet takin a bat ṭha a. A hmelah chuan lungngaihna leh beidawnna chhum zîng chu a kiang ṭan a, beiseina leh huaisenna thar, meipui ang maia alh chhuak a rawn lang ta tlat mai.

Midang lo ṭhu kun ngiai ho chu a han melh kual hlawm a. "Helai hmun hi kan chhuahsan ang." a rawn ti thum chhak a. A aw chu a ring lo na a, a fiah in a chiang hle thung. "He sîkul tlâng office-ah hian kan tawm reng thei lo. Tah hian kan thih hun nghâk a kan awm reng a nih chuan khua reiah riltamin emaw, hmelma dang emaw, hri kai la awm ho vangin kan thi vek dawn tho tho."

"Pâwn lamah sâwn eng thil pawh tâwk dâwn ila, kan hmachhawn zêl ang. Hri kai chauh ni lo, Khawchhak ral leh misual dang, hmelma lian zâwk pawh kan neih belh zêl maithei. Mahse, tlawm mai lovin kan pên zêl ang." tiin a sawi chhunzawm a. A aw kâ chhuak reng rengah chuan tlawm a tum tawh loh zia a lang chiang hle.

A aw thian kharhin, a mitmeng chuan Pu Tea te pafa leh Muani, ṭah nasat lutuk avanga hmel ngui bam mai te chu a han melh a. "Tûnah hian Lungthlir khua aṭanga damchhuak mai mai, tlânchhia leh hlau thlâ phâng ho ringawt kan ni tawh lo. He hrehawmna leh thihna râpthlâk tak kan tuar tlâng zeln min thlun zawm tawh a... chhûngkua kan ni tawh a ni." a ti leh a. 

Chu thu, mipa huaisen Sawmtea kâ aṭanga an hriat chuan in chhûnga mite chu an rawn hawi chhuak hlawm a. Chu ṭawngkam chiah chu a ni, tûn huna an mamawh ber chu! Pu Tea chu a rawn inbeng kâng ṭuih ṭuih a. A mittui hru fâi in, beiseina sâng tak nen Sawmtea chu a en a. A aw chu thian ve kharh in, "A nih leh... khawiah nge kan kal zêl ang?" tiin a rawn zawt a.

Sawmtea chuan a mitmeng thîp leh fiah fâk chuan kawngka lam chu a hawi a. "Phulvar kan pan ang," a ti fiah ta kâk mai le! Sawmtea thusawi a zawh rual chiah chuan, a sîra lo ṭhu Renga chu a chemte hlui tak chu a pai a thun luh rîk hrak pahin a rawn ding chhuak ve nghal a. A hmel rorum takah chuan hlauhna eih a awm lo. "A nih chuan, naktuk zîng khawvâr veleh kan kal dâwn nia." a lo ti ve ta bawk a.

***********************************************************

Zîng boruak vawt vur mai hnuaiah chuan, dâifîm in hnimhnah a bual huh deuh hlap a, tiau chhum a zîng chhah hle bawk a. Sihpui mual cement in aṭang chuan Pu Rina, Zauva, Chhingpuia, Zela leh Thasanga te chu sa pêl tûr leh ei tûr zawngin theihpatawpa thâwm dîm in ramhnuai pilril lam pan chuan an inzui thla hnak hnak hlawm a.

"He huan pui hi chu ka pa nen pawh kan kal ve fo tawh a. He mual liam ruamah hian tun hma chuan sazaw an tam ṭhin a sin." tlangval pakhat zâwk, Zela chuan a SBBL silai hum ran pahin a ti nûah nûah a. Pu Rina, an hruaitu ber tûra an ngaih, hmâ pawh hruai ngam lova a lai lûm bera kal chu a hawi kual zak zak a, a hlauh rûkna theihpatawpa thup tumin, "Kal hla lutuk lo vang u. Khua a chhum in khaw hmuh a tawi si a, kalkawngte hi kan bo palh hlauh ang e." a lo ti chhen a. 

Chutia an inzui phei them them lai chuan, an hnung lawkah hnah ro thing tang tliak ri dawt thâwm an hre ta thut mai le! An panga chuan an hawi lêt rual ṭhawt a. Pu Rina lah chu sahimna zawngin rang lutukin Zauva, chempui pângngai chauh hûm tu hnungah chuan a bîru rawk rawk a. Mahse an rin loh leh beisei loh lutukin...

Patling pakhat, hmai dâng bâm leh thlan tui in a bual huh vek, chabet kâi nuai hi hnim kâr aṭang chuan a rawn dâwk chhuak hlawl mai. A mangan hmel takzet a. Tlangval pathum silai keng ho—Chhingpuia, Zela leh Thasanga te chuan inring rân in an Mizo silai theuh chuan an lo tin ṭhap a.

Chu patling hlau thlâphâng chu ṭhingṭhi hnawkin a bân a phar nghal hluai a, "Min kâp suh u... min pui ru, khawngaihin... min that suh u..." tiin a ṭap nghal pur mai a. Chutah zet chuan Pu Rina chuan hlauhawm a ni lo tih hriain Zauva hnung aṭang chuan inla huai fahran hian a rawn pên chhuak a. 

Chhingpuia silai chu a va laksak rawk a, chupa lam ah chuan tin in a va hnaih sauh va, "An seh che em? Khâng mi nung lo ho khân an seh che em?" a ti khûr khûr a. A mitmengah chuan khawngaihna pakhat mah a lang lo. Patling chuan a mittui luang chu tuai pûatin, hriatthiam loh hmel tak hian a rawn hawi chho a, "Eng nge mi nung lo chu ni a...?" a lo ti hû a. 

Vîn zet hian Pu Rina chuan a sillai hmawr a va hnaih zual sauh pah hian, "Hri kai ramhuai ho kha maw le! An seh che em sawi nghal rawh!" a ti leh vîn ṭhawt a. Tlangval ho chuan, an khaw pa rinchhan ber, hotu nilai meuhin chutianga patling mangang leh hri kai ho laka damchhuak , tanpui ngai ngawih ngawih a vîn hrep mai chu mak an tiin an inmelh hrak hrak hlawm a.

Patling chu ṭap zâwih zâwih chungin, hlau leh hreh hmel tak hian a ding lam kekawr hmawr chu a bân khûr dar dar chuan a han hlim chho a. A chawnah chuan sehna hnuhma chiang tak, thisen la huh hliam mai chu a lo awm ngei mai! Chu sehna an hmuh rual chuan an thâwk an îp deuh ṭhap a. 

Mahse Zauva chuan pên hnaiin, "Helai aṭanga hla vak lo ah hian tawmna in, hmun him deuh kan nei a. Tah chuan kan hruai ang che... hri (virus) i kâi hma in kan theih ang angin kan tih fai sak che nga, kan enkawl dâwn nia." tiin thlamuan tumin a va bia a. Pu Rina ngaihdan a ni lo kher mai. "Zauva..." tiin hnial a tum a, mahse a sawi zo hman lo. 

Chhingpuia pawh chu va phei ve in, "Ni e, lo kal rawh... lungngai suh ka pu, helai hmunah hian kan kalsan dâwn reng reng lo che a nia." tiin a va pui a. An lâiah kal tîrin, a dar lehlam lehlamah chuan Zauva nen chuan nghet takin an kuah tho a. Tichuan, Pu Rina thinrim leh phîlî hmel, silai hum ran chunga lo ding reng chu an kal pêl a.

Pu Rina chu a maimitchhîng vang vang a, a thinphu chu a rang dup dup hle bawk. A ngaih a ngam thei ngang lo. Thâwk leh khatah a rawn hawi lêt a, rum takin a meng a. A silai ken lai chu a kau ri nghal hrak a, chutah patling hliam tuar an kuah phei mek tukhumah tak chuan a kâp ta siah mai le!

Silai puak rik ṭhuai rual chuan chu pa thluak leh thisen a per nghal chhawk a, a lu chu a dâk âwrh a, a khûr nghal hlawk hlawk a,a  thi chiang kher mai. Silai ri khâwk raih raih kârah chuan Zauva leh Chhingpuia te chu phu dâwrhin chu patling chu an thlah nghal a, an hnung lawka silai hmawr khu hlat hlat lo hum mêk tu Pu Rina chu mak tiin an en hu hlawm mai.

Zela chuan chil lem dawkin, "Pu Rin... tinge?" a ti thâm ṭiak a. Zauva erawh chu a thinrim nghal em em mai a, "Eng thil phiangsen nge i tih kha?!" tiin Pu Rina chu a theihpatawpa ringin a vîn ta ṭhawt mai. Pu Rina chuan silai a ken chu la vuan reng chungin, a aia vîn hian, "In hmu lo em ni?! Sehna hnuhma a awm kha! Hri a kâi thuai dâwn. Kan tawm himna hmun zîmte ah sâwn hri rawn ti pung a, rawn seh vek turin i duh em ni? Engtin nge kan enkawl theih ang a? Damdawi in a ni lova, tui chhuan so mai mai in a hliam kha in tihdam theih in ring a mi?" a lo ti lêt hrep mai a.

Zauva thinrim lutuk chu a inseh ruh a, a hmai a sen vek a. "Hri pawh a la kâi em loh kha... hun a la nei a sin! I mihringpui, hri a kai dâwn nge dawn lo pawh fiah mang lo leh i hmelma pawh ni lo chu rawng takin... hnung lam aṭangin i that a maw?" a han ti lêt leh khûr khûr a. Pu Rina chu a thaw hak a. 

A aw ah chuan mahni inthiam chawpna a lang chiang hle, "Ka tih tûr dik tak ka ti a ni, naupang... min hnial rêng rêng suh! Kha pa kha mihring pângngai a ni tawh lo, hri kaiah... mi nung lo ah a inlet ṭan mêk a nih kha. A nih leh hruai haw ta ila, khilai khâr phui theih mang loh in chhûng zîmte ah khian... zânah ramhuaiah rawn chang thutin, lo tho chhuak ta se... rawn seh kualin, hri rawn ti pung vak se... kan vai hian zân khatah thi vek ila i ti em ni?" a lo ti lêt leh hrep a.

Zauva chu a thinrim hle na a, mahse sawi tûr a hre tawh bîk lova, a ngawi ta rûn a. Pu Rina bawk chuan tlangval dang te chu a han melh kual a. "Ka thil tih kha a dik lo in ti em ni? A dik lo in tih chuan tûnah hian in silai khân min kâp hlum ve nghal rawh u! Mahse he pa hi hruai haw ila chuan... hmeichhia leh naupangte, nutling ho chak lo tak tak te leh khilai in chhûnga nungdama beiseina nghâktu, kan chhan chhuah te saw an vaiin an thi vek dâwn a sin..." a han ti leh zuah zuah a. 

Tlangval dangte pawh chuan sawi tur reng an hre lo, an ngawi reng ringawt a. Pu Rina chuan leia a chempui theh thlâk chu a chhar a, a kuta silai chu Chhingpuia a pe lêt nghal a. "Kal ang u... helai hi a him lo. Silai thâwm rîk hnu phei hi chuan... Kal hla lutuk lo vang u ka tih mawlh mawlh kha, khulai chin bâk khu kan kal tawh lo vang." a han ti leh zung zung a. 

A tlangval hruai te chu râwn eih pawh tum tawh lovin hma a hruai vut a, tlangval pathumte chuan an theih ang angin thâwm dîm tak in an zui a. Zauva erawh chu a ding ngaiin a ding reng a, chu patling, theihnghilh theih tawh loh tûra rawng taka an YMA President in a kah hlum tak  ruang chu a en vung vung a. "Mihring nunrâwng lutuk..." ti a a hriat tâwk lêka phun chhuak hlukin, hmabâk duhawm lo tak kârah Pu Rina hnung chu insit tak chungin a zui ve leh ta hnak hnak a.

******************************************************************

Zîng khawvâr in Lungthlir sîkul tlâng a rawn chhun ên ṭan mêk lai chuan, boruak chu nî dang ang lo takin a vawt zualin a uap chuarh a. Sîkul kawtzawl dâi, thingkûng lian pui hnuaiah chuan tiau chhum zîng chhah tak kârah lei la hnawm hlap mai, vut thar invur khâwm mûm al pahnih hi a awm a. 

Chu chu Pi Kungi leh Kimkima te ruang, theihnghilh theih ni tawh lo tûr, an zalhna thlân  siamchawp chu a ni. Khawchhak ral ho kuta chempui leh suahdur an neih thar ho hmangin, zîng khawvâr hma aṭanga theihpatawpa an lo laih sa a ni. Pu Tea chu a nupui thlân chungah chuan ṭhingṭhi in, a kuta lei bal kâi hnuang chu tuai fâi pawh a tum lo. 

A fapa Fela nen chuan thlân vut hnawm hlup mai chu an chûl heuh heuh a, an mita mittui rawn lûang chhuak ngiai ngiai chu an hru chhen a. Zîngkara beiseina sâng tak nêna sîkul tlâng an pan theih ngei inbeisei tlâng kha tûnah chuan thlanmual a lo chang ta si a. A sîr lawkah chuan Muani chu a fapa Kimkima thlân bulah chhuat leiah a ṭhu sawp nûai a. 

A khûp ah a khabê a nghat a, a bân pahnihin a inkuah tawm chial a. A ṭap thâwm chu a ring tawh lova, mahse a taksa khûr dar dar leh a mittui lûang ngiai ngiai aṭang chuan a fapa a chân tâk avânga a tawrhna thûk zia chu a lang reng mai. Hlimpuii chuan a hnungah lo chûl heuh heuh in a lo inhnît ve hlâwp hlâwp bawk a.

Tlangval ho—Awmpuia, Muanpuia leh Siama te pawh an ngui hle a, thlân piah deuhah chuan ngawi rengin an lo ṭhu ṭhap a. Awmpuia chu Khawchhak ral nunrawng lutuk, Luna'n a nâk nêma a tlawhna avâng khân na a la ti hle a, dawm vawng vawng chungin a thaw leh kâwk ṭhin a. 

Renga erawh chu thlân aṭanga hla deuh hlekah, thingkûng nghêngin a ding ngul a. A thal mu ak ṭha in a mit a chhîng vang vang a. Kimkima chunga a thil tih tâk—naupang pawisawi lo tak a chemte ngeia a vit hlum ta mai khân a thinlung a deng nâ in a vilh ngut ngut miau a, Muani hmel a hmuh ringawt pawh chuan a inthiam lohna chuan a ti hrehawm zual hle a, mahse a tih ngei a ngai si a nih kha.

Chutia ngawi renga dârkâr chanve dâwn lai an ṭhut ngawih ṭhap lai chuan, Sawmtea chu a rawn thaw chhuak hawk a. A ṭhutna sîkul kawtchar aṭang chuan a rawn ding chhuak ta hluai a! A ralthuam, a M-16 rifle chu a dârah nghet takin a ak ṭha sauh sauh a. Thlân bula ṭhu kun ngawih ngawih te chu a va pan hnai a. 

"Kan ṭap zo tawh e... Pu Te," a ti thum chhak a. A aw chu a ring lo na a, a fiah in a chiang hle thung. Pu Tea chu a rawn inbeng kâng ṭuih ṭuih a, a hmel chauh hmel tak leh lang upa deuh thut mai chuan Sawmtea lam hawiin a rawn dâk chhuak a, ni e...a chauh tawh em avang leh a thil tawn zawng zawng te, a nupui a chan ta mai te chuan a hmel a ti tar zual bawih a ni ta ve ang.

"He sîkul tlângah hian kan tawm reng thei tawh lo. Ei tûr kan nei lova, Khawchhak ral dang an rawn thlen belh emaw, hri kai riltâm rualin he tlâng hi an rawn luh chhuah hma ngeia kan chet a ngai a ni." Sawmtea bawk chuan a han ti leh a. Muanpuia chu a rawn inrawlh ve vat a, "Mahse khawiah nge kan kal ang? Kan ram a buai vek a, khawilai pawh thihna ruam hlîr a ni tawh si a, Lungthlir lah a la hla si, dam takin kan va thleng zo dawn em ni?" beidawng aw tak hian a lo ti a.

Sawmtea chuan a aw a thian kharh a, Pu Tea te pafa, Muani, Hlimpuii leh tlangval chauh hmel tak tak te chu a han melh kual hlawm a. "Chhûngkua chu dinhmun chhiat ber lai pawhin an inthlahthlam ngai lo. Pâwn lamah sâwn eng thil pawh tâwk dâwn ila, kan hmachhawn zêl ang. Tlawm mai lovin kan pên ang."

Pu Tea chuan a mittui chu a bânin a tuai hul pûat a. Patling a nihna leh a fapa nungdama la awm a chhanhim zel theih nan chuan tlawm hun a ni lo tih a inhre thar ve ta. "A nih leh... khawiah nge kan pan zêl ang?" tiin a rawn zawt a. Sawmtea chuan a mitmeng thîp leh fiah fâk mai chuan sîkul kawtzawl dâi a tlang lo lang ruai lam chu a hawi a. 

"Phulvar chu kan pan tho ang." a ti hmiah mai le! "Insiam ru, thâwmhnaw leh ralthuam theih ang ang inpuahchah ula. Tûma'n silai mu pakhat pawh theihnghilh suh u." tiin Sawmtea bawk chuan thu a pe zui nghal zung zung a. Tlangval ho chu an phu nghal suau a. Khawchhak ral ho aṭanga an chhuhsak—AK-47 pahnih, M16 pakhat, leh an pistol neihsâ te chu fîmkhur lutukin an insêm a. Magazine la âwm ang ang te chu an ak ṭha mawlh mawlh hlawm a.

Dârkâr chanve hnu ah chuan an insiam peih ta. Mipa ho chuan hma an hruai a, hmeichhia leh hliam tuar, sâwngnâwi zâwk te chu a lâiah an kal tîr a. Sîkul tualzawl an chhuahsan dâwn chiah chuan, an vai mai chuan an inher a. Sîkul kawtchar a thlân thar pahnih awmna lam chu ui vawng vawng chungin an thlîr lêt leh ṭhap a. Muani chu a fapa thlân lam hawiin a insût ri hrâih a, mahse Renga'n a dârah dîm te a a rawn dâwm takah chuan a inthing harh ve ta.

"Mangṭha u le," Pu Tea chuan zâwi sâp a tiin, an inher a. Thihna ruam Lungthlir sîkul tlâng chu hnungchhawnin, tiau chhum dum leh chhum zing chhah mup kârah chuan chhûngkaw thar te chu beiseina thar nen Phulvar khaw pan tûrin hmalam panin an pên chhuak ta hnak hnak hlawm a.

****************************************************************************

Sîkul tlâng thihna ruam hnutchhiah a, kawng chho leh ramhnuai hnim pik an kal pelh hnu chuan nî pawh a rawn sâng ve hret hret tawh a. Tiau chhum zîng chhah takte pawh kha nî êngin a rawn thlak tial tial a, thli thaw vawt tak pawh a ziaawm chho ve ta. Ngaw pui kâr aṭanga chhuakin, Lungthlir leh Phulvar inpawhna lamlian pângngai (black-top road) ah ngei mai chuan an chhuak thei ta.

Ramhnuai hnah ro rap ri leh diak pal nawk nawk thâwm kha a reh a, alkatra kawng rual rem zâwka an pheikhawk inpên ri thâwm chuan boruak a ti danglam tawh hle a ni. Sawmtea leh Renga'n an hmanraw hûm inring rân chungin hma an hruai a, a lâiah hmeichhe ho leh sâwngnâwi deuh te chu kal tîrin, Pu Tea leh Valtea ten hnung an dâwl thung a.

Valtea chu thâwk la hawkin, kawtthlêr thui tak lo inpharh phei ruah mai chu a thlîr a. "Hetiang lamlian pângngaia thlamuang deuh taka kan kal theih lohna chin pawh hi a va han rei tawh tehlul em... Ramhnuai pilril, hnim pik leh thihna hlîr in min hual a, hetiang kawng awlsam pawh hi mangram a thil ang mai a ni tawh chu a nih hi maw..." a ti nûah nûah a. 

Sawmtea chu rawn inher lêt vutin, "A kawng chu a nuam ngei alawm Valte, mahse hei chiah hi a hlauhawmna a ni bawk." a ti thutak ngul a. "Kawng pui a nih avâng hian khawi lam aṭang pawhin kan lang tlang vek a. Min hliah tu tûr thingbûk leh lung pui lian tak tak te a awm tawh lova, hri kai riltâmte mit la tu kan ni mawl tawp thei a nia. Tûma'n thâwm siam lova fîmkhur tâwp-khâwk a kan kal a ngai ang." a han tih chhunzawm leh a.

A sir a silai a dâra pu chunga kal ve mêk Muanpuia chu a rawn tawng chhuak ve a, "U Sawmte... Phulvar chu damin thleng pawh ni ila, rin ang hian lo him lo ta se, engtin nge kan tih zêl ang le? Khaw pum chu hri kai hovin in an lo luh chhuah leh hman vek tawh a nih ngat chuan lêtna tûr kan nei tawh dâwn miah lo a nia." a rawn ti chhuak hlawl a. 

Beiseina aiin an thil tawn tawh hnu in a sawp chauh luat vângin, thil ṭha lam a suangtuah thiam tawh meuh lo a ni ngei ang. Renga chuan a thal hrui siam tha chungin a rawn chhâng vat a. "Hmabâk chu hunin a rawn hril zêl mai ang. Tûnah rih chuan khawi hmunah nge tawm himna kan neih theih ang tih ngaihtuah buai aiin, kan hmabâk, Phulvar khua thlen hi a pawimawh hmasa ber. Dam tlâng ila, remruatna chu kan nei leh zêl dâwn alawm." a lo ti awlsam et a.

Chutianga an titi melh melh hnu chuan ṭawng zui lêm lovin an ngawi ta ṭhap a. Pu Tea leh Fela pawh ngawi rengin an pafa chuan an inzui chhet chhet a, Muani pawh ṭap tawh bik lem lova, insût leh fuih fuih chungin Hlimpuii vawnna bân rinchhan in a pên hrâm hrâm bawk a. Nî lo sâng zêl hnuaiah chuan tuihal leh riltâm in ṭhâm ṭan mah se, kîr lêhna tûr rêng a awm tawh loh avângin chu alkatra kawng thui takah chuan hma lam panin an kal ta zel a.

*************************************************************

Sihpui mual cement in chhûng thim ruih chu riltâm leh ṭap thâwm in a hmet chau chhe zo tawh a. Rangva pawp aṭanga nî zung rawn lût sêt sêt te chuan a chhûnga damchhuak mangang, hmeichhia leh naupang te hmai dâng sâp chu a rawn chhun eng riai riai a. Tuihal vânga dang ro  leh riltâm vânga pûm na ngut ngut karah chuan, pâwn lam thâwm a rawn ri ta hrâk hrâk mai le.

Kawngkhâr pui lian tak chu a rawn in kîk ri dawt dawt a, "Keimahni... rawn hawng ru," tih aw thâm chhal an hriat rual chuan in chhûng a mite chu an phu nghal suau a. Kawngka khâra an kilh beh thing phek chu an la sawn a, a rîk hrâwk rualin pâwn lam nî êng dul riai chuan Pu Rina, Zauva, Chhingpuia, Zela leh Thasanga te hmel chu a rawn ti lang chiang ta a. 

An hmel chu nî in a em chauh emaw ramhnuai hrût hah vâng aiin, thil râpthlâk leh lûngchhiatthlâk thleng  avâng khan a ngui ru hle hlawm a. Zela leh Thasanga te chuan sazaw lian vak lo pakhat leh thehlei pahnih an rawn ken luh rual chuan, in chhûnga damchhuak ho chu mithi tho chhuak ang mai hian lawm hmel takin an rawn dâwk chhuak ṭawng ṭawng hlawm a.

"E khai! Pathian hi chu a va ṭha êm... sa in rawn hawn a ni maw?" pitar pakhat, Pi Dâri chuan a ti tham chhal a. Naupang pahnih pawh chu thehlei an rawn ken luh chu an kâwk a, "Apu... saw a lian e, saw saw kan hmeh tur a mi?" tiin an lo rak ve chel chul a. Pu Rina chu inti hotu leh an chhandamtu ni awm fahrana aw rawn thian kharhin in laiah tak chuan a han ding a. 

A kekawr ipte aṭangin meizial (vai-hlo zial) a phawrh a, a ṭan khu nghal hlat hlat a. "Kha le, Mizo kan ni a, Mizo pa dik tak te tan chuan kan ramah engmah hlauh tur a awm hleinem. Sazaw pakhat hi naktuk zînga chhum atân buaitsaih ula, thehlei hi a lian vak lova, naupangho hi chu zanin tlai atân rêp ro emaw hem hmin i la, a theih ang ang in buatsaih sak dâwn nia," a han ti vel a.

Mapuia chu thehlei ruang an theh thlâk na lamah chuan inthlahrun hmel takin a rawn bawk vâk phei ṭûah ṭûah a, "Khaw... khawi ka lo chan ang e, keimân... a vun pawh ka lo lip nghal vek ang." tiin a tuthlawh nen a lo phei a. Bawihi leh Puii te nufa erawh chuan Zauva hmel ngui leh inpet ruh ṭeuh an hmuh chuan thil dik lo a awm tih hrethiam nghalin ngawi rengin kil khatah an ṭhu thung.

Zauva chu a ngawi ngul a, a kuta chemte hûm lai chu in bâng sîr ah dahin chhuatah chuan a ṭhu thla hnawk a. Engvangin nge kha pa kha, hri kai sehna hnuhma lo awm pawh nise, khawngaihna nei miah lova Pu Rina khan a kâh hlum ngawt theih le? Zauva thluak chu a buai nuai mai.

Pu Rina chu Zauva ṭhutna lam chu hawiin a va pan hnai a, "Zauva, tlangval... hotu ber leh patling lung fing zawk thu awih chu a hlawk zia i hmu thiam tawh mai alawm kha..." a han ti elhsen kher a. Chhingpuia te ho chu an rawn meng hra hlawm a. Chu ṭawngkam zet chuan mei a nei tlat, an lungawi vak lo hlawm hle. 

Zauva chu a rawn hawi chhuak a, a mitmengah chuan aia upa zahna hmel hmuh tûr a awm tawh lo. "Ramsa rep nge ei in duh, mihring sa rêp?" a ti zâwi fiah kâk mai le! In chhûng chu a reh nghal hmâk a. An vaiin Zauva leh Pu Rina chu an en ta ṭhap a. Pu Rina chuan a meizial zûk lai chu leiah a theh thla a, "Eng thil phiangsen nge sawi i tum naupang?" a ti vin that a.

Zauva chu chhuat aṭang chuan thinrim hmel takin a rawn ding chhuak ta lûah mai! "I thil tih kha a dik i ti a nih chuan mi zawng zawng hriat ah hian han sawi chhuak ta che!" a lo ti let ve ta thak mai. "Tukin khân sapel tura kan chhuah khan... helai tlang hnuai mai ah patling hlau thlâphâng, damchhuak rawn au lawm lawm, ralthuam neilo leh na tuar... puih ngai ngawih ngawih chu a thluak per chhawk khawpin kan hotu, YMA President ti a in-chhal Pu Rina ngei hian hnung lam aṭangin a kap hlum asin."

Zauva thil sawi meuh chuan in chhûng chu a reh ṭhuap a. Hmeichhe ho chu an thu hriat chuan an thâu ah manin an inhup chawt a. Pu Rina hmel chu zahna leh thinrimna avangin a sen tawn tawn a. A han thaw hak a, "Hri a kai a ni, kha pa khan. Ka kah hlum mai lohvin, nangni pawh ni ula ka tih ang khan in ti ve tho dawn lawm ni?" tiin midang te chu a han melh kual hlawm a, inchhung chu a reh hian a reh tlawk tlawk mai.

*******************************************************************

Nî a sa sâng tial tial a, alkatra kawng ro leh uap lum takah chuan Sawmtea te chu hmalam panin an kal hrâm hrâm zel a. Tuihal in a hmet chau ṭan a, nî sa in a em nat em avângin an thlan tui in a bual huh deuh hlap hlawm a. Mahse kîr lêtna tûr a awm tawh loh avângin theihpatawp chhuahin hma lam pan in an pên ngat ngat a. 

Hlauhawm laka invêng reng renga dârkâr hnih dâwn lai thâwm siam lova an kal hnu chuan kawng phei raih, ngaw pui in a hual-vel ah an chhuak chho ta. Kawng kawi lian deuh pakhat an va thlen chuan, an hma lawk kawng sîrah chuan lirthei pakhat hi a lo inhung hlauh mai a. Chu chu khual zin phurhna Bus hlui tawh tak, 1980s hun laia thing tlang service ṭhin ngei mai kha a ni. 

A bâng chu rawng pângngai pawh nei tawh mang lova hlui leh ṭawp hle tawh a ni a. A chung bungrua phurhna (carrier)-ah chuan zin bungrua, thingrem leh ip-tê bâwr hlui tawh tak tak te, leh silpaulin lian pui hi invet kual nûai in a lo insuih hnawk nûai bawk a. Sawmtea chuan a ban rawn phar chhuak in an ding thap a. 

An vai chuan thâwm dîm theihpatawpin kawng sîr hnim hnaiah chuan an inkhuâp khâwm nghal a. Bus kawt sîr leh a bul vel an han thlîr chian chuan, bus chhûng leh pâwn vel aṭang chuan thisen ro dum khâk tawh hi a lo luang kâi hnuang a, a kawt hnai velah chuan patling leh nutling sawm (10) rual teh meuh hi an lo let phung mai!

Chung mihring ruang-âm pu te chu mi pângngai an ni tawh lo. Bus aṭanga rawn tlân chhuak hman lo, emaw ramhnuai aṭanga rawn chhuak khâwm ni âwm takin an hmai a dâng bâm a, an kawr ah te chuan thisen leh chirh diak a kâi hnuang a. An kâ aṭanga chil phuan baw nuai in kawng-puiah chuan a tal vak vak hlawm a, a ṭhen Bus kâwngkhâr zâwnah an lo thu bawk a

Lungthlir leh Phulvar inkâra Bus service hrikai ho luh-chhuahna tâwk an ni tih achiang kher mai. Renga chuan a thal hrui vuan chungin Sawmtea chu a va pan hnai a, "Kan pêl thei dâwn lo, he khâm kâwrah hian kawng a zîm si a, hnim kâra hel luh theihna a pawh awm lo." a ti zâwi sap a. 

Sawmtea chuan a lû a bu nghat a. "Hmeichhe ho leh Fela, Siama leh Muanpuia ho khân he kawng kawi thingbûk phenah hian lo bîru tlat rawh u. Tlangval ho in thâwm dîm theihpatawpin kan va sâm kûak a ngai a ni." tiin rem a ruat zung zung a. Hlimpuii, Muani leh midang ho an bîruk that hnu chuan Sawmtea, Renga, Pu Tea, Awmpuia leh Valtea te chu fîmkhur takin an chhuak phei ta a. 

Renga chuan a thal hmawr hriam tak chu kâuh nghet sauhin, hri kai pakhat Bus ke bula ding chu a va kap siah a! Chu hri kai chu a thal nghal dâwp a. Mahse a tlukna ah chuan Bus hnuai a  thîr-bêl hlui lo let bal mai chu a delh ri ta dâwp mai! Chutah hri kai dang pakua (9) vel lai chu an rawn hawi rual ṭhawt a, ramsa riltâm tak sa seh tur thar hmu ang maiin theihpatawpa chak in an rawn tlân dâwk ta zawk zawk hlawm a!

"Kâp rawh!" Sawmtea'n a tih ṭhawt rual chiah chuan a M-16 rifle chu a puak ri nghal ṭhuai ṭhuai a. Kawng-pui laiah chuan hri kai rawn tlan phei ho zinga pahnih chu a lo kâp let tâwp tawp a. Pu Tea leh Valtea pawh hnim kâr aṭang rawn che chhuak thutin an silai theuh in an rawn kah pui nghal a. 

Kawng-puiah chuan silai rî leh hri kai riltâm rûm chhur chhur ri inpawlh nuai in, boruak chu a buai nghal nuai nuai mai le! Hri kai rual ho chu an ril ṭâm tawh lutuk vâng nge an che hraw hle mai a, kawng rual rem tak a ni bawk nen an rawn dâwk chak hlawm kher mai. Silaimu in a thelh ṭhenkhat te chuan Sawmtea te awmna hmun chu an rawn thleng dâwn ta mai! 

Renga chu a thal mu a awm tawh loh avângin a chempui hriam tak chu a phawi ri nghal hrak a, hri kai rawn zuang tûr chu insiam rem in theihpatawpa nâ in a lo sât thal nghal ṭhuai a. Awmpuia pawhin a Ulhbun ken lai chuan pakhat chal ah a rawn kâp ve siah bawk a. Valtea erawh a bân a hliam miau avângin a silai a load tha hman lo, hri kai nutling pakhat chuan a rawn zuan thut mai a! 

Mahse vanneih thlâk lutukin seh a tawh hma chiah in Pu Tea chu a rawn dâwk phei ve leh zawk mai a, chunu tukhumah tak chuan a silai kawm chuan a rawn chhu thlu tâwp mai a. Hri kai chu a bawk thlawp a, Pu Tea chuan a kap zui nghal bawk a. Sawmtea pawhin a silaimu a hmeh zawh rual rualin, hri kai hnuhnung ber rawn inbarh lût chu a silai hmawr hmangin theihpatawpa nâ in a lo dêng thlu ve dâwp bawk a.

Boruak buai nûai nûai thâwm chu a reh chawp chilh ta hmâk a. Kawng pui lai tak, alkatra sa vawng vawng chungah chuan hri kai ruang sawm (10) vel lai chu a let nûai hlawm a. Sawmtea te ho chu silai khu hlat hlat hûm chungin an thaw hlawp hlawp a, an inmelh kual a. Vanneih-thlâk lutukin tûmah seh tuar leh hliam pawi tak tak tûar an awm lo hlauh mai! Thihnain a hual vel kârah an dam khawchhuak leh thei chu an thaw huai hlawm mai.

********************************************************************

"Zauva sawi kha a dik e. Kha patling hlau thlâphâng tak kha keimân he ka kuta silai ngei hian a tukhumah ka kâp hlum a ni." In chhûng chu a reh thiap a, "Mahse, nunrawn vang emaw pawi ti miah lova that ka ni lo a sin. Ka zân mut theih loh chhan tûr leh, ka dam chhûng pawha ka theihnghilh theih tawh loh tûr thil râpthlâk tak kha... tlangval te u, intih ai ka ti ta nih kha."

Pu Rina chuan a thusawi chu chhunzawm zelin a mitmeng fîng phakar tak chu a lén kual a. "In hmu vek a ni lawm ni? A ngal puamah sehna lian tak a awm a, thisen a rawn chhuak a. A mitmengah khân hri a kâi ṭan tih a hriat theih vek tawh a sin. Hliam enkawlna tûr damdawi hnawih tûr pakhat pawh kan nei lova, in zîngah hian Pathianin thilmak a tih nghakin hri kai hliam kha kan tih dam theih ring in awm em? Awm lo! Khapa khân mihring pângngai ang in dârkâr tlêmte bâk hun a nei tawh lo."

Chutah Nu Hriati te nufa leh Pi Dâri te awmna lam chu a kâwk a, a aw ah chuan tlawmngaihna leh hmangaihna dik tak lang ang hrim hian a ṭawng chhunzawm leh a, "Hmeichhia leh naupang hlau thlâphâng, sâwngnâwi tak tak he in chhûng zîmte ah hian an awm a. Kha patling kha rawn hruai lût ta ila, zanin la la hian heta naupang te, Nu Hriati te, Pi Dâri te hi an mut hlanin rawn bawh chilh ta se, engtin nge in tih dâwn? Pâwnah ramhuai rual in min hual mêk bawk si! He pindan chhûng zîmte a sahimna tlêmte in beisei hi mipakhat hri in a ei zawh mêk tâk vângin that chhe vek ila i ti em ni, Zauva?"

Zauva chu a han en a, thinrimna aw kâ ni lovin, naupang thil hrethiam lo zilh ang mai hian a melh a. "Zauva, i huaisenin ṭhiante chhan i pe na a, YMA tlangval chhuanvawr leh kan innghahna chu i ni ngei mai. I ngaihtuahna pawh a thianghlim e. Mahse hotu nihna leh mipui humhimna in a kên tel, thutlukna râpthlâk leh hrehawm... mahni nunna ai pawha zahawmna hloh phah hial theihna tûr thutlukna puitling hi i la siam ngai lova, i la hrethiam lo a ni. Kha patling kha that lova rawn hruai luh kha tlangval huaisen tih atân chuan a mawi in a ṭha ngei ang; mahse in vai hian, nangmahni dam khawchhuah nan zâwk hmingchhiat huamin ka ti ta a nih kha." tiin thiam tak leh ngaihnawm takin a insawifiah ta zuah zuah a.

Chu ṭawngkam mawi tak leh 'khawtlâng tâna tuar' ang hrima a han insawi kual takah chuan, in chhûnga damchhuak ho thinlung chu a hneh kher mai. Pu Rina dâwt sawi chu dik an ti hle a, chu thutlukna râpthlâk tak piah lama an sahimna tur an thlakhlelna chuan an ngaihtuahna a luah hneh ta zâwk tlat. 

Pi Dâri phei chu a rawn bu nghat nghat a, a hmelah chuan Pu Rina thusawi a thlâwp zia a lang chiang hle. Zauva chu a mangang ta, thil dik lo lakah huaisen takin a ding ngei a; mahse mipa puitling, khawtlâng rorêl ṭhang kam chhuak thiam tak lakah chuan a huaisenna chu mi â leh thil thlîr thiam lo ah an rawn chantîr dâwn ta tlat. 

"Mahse a la thi hleinem... dârkâr khat tal pawh mihring ang a kan thlah liam theih nân hun ṭha i pe theilo em ni?" tiin a han hnial lêt hram a. Mahse a aw ah chuan mipuite thinlung chu Pu Rina, tawngkam thiam tak in a khâlh pên sak vek tawh tih a inhai lo. Nu Hriati chu a rawn ṭawng chhuak ve ta hlawl mai. 

"Zauva, a tâwk e. Pu Rina sawi kha a dik a ni. Chu patling insawi pawh chu ka lainat lutuk, mahse ka fanu leh helai hmuna damchhuak tawk tawk te thihna thlen theitu lakah chuan lainatna lantîr thei kan ni tawh lo. I thil thlîr dân kha chu a dik e, mahse Pu Rina khân huaisen takin kan chhiatna tûr a lo hmet mît zâwk a nih chu." a rawn ti ve a. 

Nu puitling leh an zînga upa ber pawl, Pi Hraiti meuh in Pu Rina thil tih rawng tak chu finna leh huaisenna ah a rawn chantîr tâkah chuan, damchhuak dang zawng zawng pawh chuan Pu Rina chu thil dik tak ti ah ngaiin an thla a muang huai hlawm a. Zauva chuan a tlangval pui Chhingpuia leh Zela te chu beiseina nen a han melh a, thudik tana ding tûrin a mitmeng chuan a ngen ngawih ngawih a. 

Mahse Chhingpuia te chuan Pu Rina dinhmun a nghet leh dâwn tih an hriat veleh an meng khup zâl zâl a, Zauva mita en ngam lovin thehlei an hawn ho chu thel fâi tûrin an buaipui san ta daih a. Tûman Zauva lamah ṭan an la ngam lo. Pu Rina chuan Zauva chu a rawn pan hnai leh deuh a, a dârah mipa zâwk leh hotu zâwk a nihna târlan nân a va ben sak thak a. 

"Tlangval fel tak i ni a, i la puitling chho ve mai ang." tiin a han khi vel suk a. Zauva chu a ngawi ngul a, a chemte hûm ran chungin kil khatah a va  ṭhu phei daih a. A thiante ngei, Bawihi leh Puii pawh chuan an rawn tan eih lo chu a hnual rawih a, Mapuia ber lah chuan Pu Rina chu a tlawn em em a, a bulah a awm deuh chawt zel a.

**************************************************************

Hri kai ho ruang alkatra kawnga let phung mai leh thisen thang rim nam huam kârah chuan Sawmtea te chu an chawl hahdam a. Nî a sâ in an chauh a zual hle a, kawng pui nî in a em sat vut vut hnuaiah chuan pên khat pên leh ringawt pawh rit tak a ni tawh. Chu Bus hlui tak, a hmaa hri kai ho in an bawh khah vek hnu chu an beiseina awmchhun a ni tih Sawmtea chuan a hrethiam nghal a. 

Ke-a kal zel chu hmeichhe pahnih leh hliam tuarte tân tuar chhuah zawh rual a ni tawh dawn lo. Bus hmâ lam panin Sawmtea leh Muanpuia te chu an phei a. 80s hun-laia Tata Bus hlui, hma zûm put mai, a rawng pâwh pawl da tawh tak a ni a. A engine awmna hood hma lam rit tak chu an han hawng a, a chhûng thîr hlui tawh leh hriak kâi nûai mai te chu an bih kual nghal zung zung a. 

Vanneihthlâk takin a battery a la inthun a, a lian tham deuhte pawh a la awm kim thlap e, mahse rei tak hman tawh loh leh start nung tawh loh a nih tawh hmel avâng chuan a nung mai dâwn lo tih erawh a hriat hle. Tlangval ho in nî sa hnuaia thlan tla bawrh bawrh chunga Bus an buaipui mêk laiin, hmeichhe ho leh naupangte chu kawng sîr thing hlimah an lo chawl hahdam a. 

Muani pawh a fapa thihna in la dêng na hle mah se, midangte tân leh an hmahun atân a intih pachan hrâm hrâm a ngai tih hriain a mittui a hru hul a. Hlimpuii chuan tui ûm an neih chhun a tui tlêm tê awm chu a theih ang angin a sêm kual den den bawk a. Dârkâr a liam a, siam ṭhat a harsa in an buai rei tial tial a. 

Wire inzawm ṭha lo leh diesel leak rawn lûan dante chu uluk takin an endik a. Vawi tam tak tih nun an han tum a, a ri khur khur a, a thi leh hmâk ṭhin. Silai thâwm an neih hnu leh engine thâwm a rîk nawn sek avâng chuan hri kai dang ramhnuai aṭanga rawn kal khâwm palh hlau in an thla a phâng ru hle tawh a. 

Pu Tea leh Valtea ten silai humin inring takin an lo vêng ran bawk a. Mahse, rei fê nî in a em chauh hnu ah, beidawn dâwn lamah chuan beiseina meichher a rawn inlar ta! Sawmtea'n a hnuai lama wire pawimawh lai chu a han khawih rem leh a, "Renga... han try leh chhin teh le!" ti a theihpatawpa a au rual chuan, driver seat a ṭhu Renga chuan chabi a han herh leh a. 

Bus hlui tak mai chu a rawn rûm in a ri vut vut a, a tâwpah chuan meikhu dum chhah tak a silencer hlui tawh tak aṭanga phuh chhuak ṭhawt thawt chungin a rawn nung ta vut vut mai le! Engine ri chher leh bengchheng tak ni mah se, an tân chuan chu aia rimawi mawi chu a awm kher lo vang. 

Hlim vângin an au chhuak hluai a, hahdam takin thâwk an la suai suai hlawm a. Mahse hna a la zo lo, Bus chhûnga hri kai ho thisen ro khâk kâi nûai leh rimchhe tak te chu theih ang angin an tifai a, seat hlui tak taka hnawm hnawk awmte chu theh chhuakin an inbuaipui zui mual mual hlawm a. 

Fela, a nak a hliam tuar mek Awmpuia, Muani leh Hlimpuii te ho chu dîm takin an hlâng lût nghal zung zung a. Renga chu driver seat têt phung tawh ah chuan a ṭhu rem ta at a. Tûn hma aṭanga ramhnuai leh Ṭawitê ruama thing phur motor lian (Shaktiman leh a dangte) khalh ṭhang a ni bawk a, a tân chuan hetiang motor lian khalh chu thil thar a ni lo. 

A kâwnga a chempui chu phelhin a sîrah dah a, steering lian pui, a hûmna hrui chhe tawh tak chu hûm in a gear rit tak chu theihpatawpin a han thlâk ri hrâwk a. Bus engine hlui chu a rawn rûm chhur chhur a, vut châr per chhawkin zawi muangin kawng bumboh leh phei raihah chuan Phulvar khaw lam panin an tlân chhuak ta a. 

Tukverh dârthlalang inhawng aṭanga thli vawt rawn thaw heuh heuh te chuan an thlan chu a chhem dâi a, an theihnghilh theih tawh loh tûr thihna ruam Lungthlir chu an hnungchhawn zêl a. An hma lawkah eng thil in nge lo hmuak dâwn hauh hre lo mah se, tûnah rih chuan he Bus hlui leh t(r)awng tak chhungah hian an him rih a ni.

************************************************************

Tlai lam nî a her liam dâwn ruai tawh a, Sihpui mual cement in chhûng thim deuh ruih ah chuan thehlei sâ rawh hmin rim a nam chem chem tawh a. Midang ho chu mei ênna bul hnaiah chuan thlamuan hmel takin an ṭhu khâwm a, mahse in kil khata thim chinah chuan Zauva chu tumah pawh lêm lovin a mal ṭhu ngawi ngul a. 

A mitmengah chuan thinrimna leh beidawnna a inpawlh nûai a, a khûpah a khabê nghatin a chemte hûm lai chu a melh ngawt ngawt a. Bawihi leh Puii te chuan Zauva awm dân chu an lo hmu ru reng a. Tukin zînga sa pêla an chhuah hma leh tûna a rawn lêt leh hnua a mizia chu inang lo tak a ni tih an hrethiam nghal a. 

Pu Rina nêna an inhnial zawh hnu phei kha chuan biak ngam pawh a ni tawh lova, a thu tum bur reng mai. Inhûm him tawn leh inring tawn tûr an nih miau avângin, an pahnih chuan thâwm dîm te in Zauva ṭhutna lam chu an va pan phei a. Zauva bul chêtah chuan an va ṭhu hniam a. 

Midang, a bîk takin Pu Rina leh a thusawi zawntu tu tlangval dawihzep pathum ten an rawn hriat phâk hlau takin Bawihi chuan a aw a han thian kharh a. "Zauva..." tiin dîm tê in a dârah a va vhuan a. "Eng thil chiah nge thleng a? Nichina Pu Rina nêna in inhnialna piah lamah khân, thil dik lo thleng a awm a ni tiraw?" tiin thutak zet hian a va zawt a.

Zauva chu zawimuang hian a rawn dâk chhuak a. Thâwk a han la hawk a, inchhung a mei an chhem êngin a chhun phâk loh chinn ah chuan a hmel chu a lang chang chang a, "Thil thleng dik tak in hre duh a maw? Kan Pu Rina sawn thil thleng a sawi te kha a sawi kim hauh lo." a han ti chang fak a.

Tichuan, ramhnuaia an thil tawn zawng zawng chu thup lêm lovin a hrilh ta vek a. Patling pakhat hlau thlâbar takin ṭap chunga ṭanpuina a rawn ngen dân te, sehna hnuhma a neih vâng ngawta Pu Rina'n khawngaihna nei miah lova hnung lam aṭanga a kap hlum ringawt mai te chu chiang takin a sawi chhuak a. 

"Hri chu lo kâi ngei dâwn pawh ni se, khatiang teh thlâwt khân ramsain sa a sêh rual pawh in rawng takin a ti ngai lo... min chhanhimtu ni lovin, tualthattu dâwt sawi thiam tak zâwk a ni, Pu Rina hi" tiin a sawi chhunzawm a. Chu thu an hriat meuh chuan Bawihi leh Puii chu an phu dâwrh a. 

Hlauhna leh mak tihna in an khat a, Puii phei chuan a kâ a hup chawt a. Damchhuak ho te huikhawm a, a hotu bera an lo ngaih thin Pu Rina'n chutiang thil râpthlâk a ti thei chu âwih har an ti hle a. Mahse Zauva mitmeng leh a leh a hnek thutak ran mai an hmuh chuan dawt a sawi lo tih an chiang hle bawk si.

Rei ngial an ngawih hnu chuan, Puii chu a rawn inthing harh hmasa a. A mitmengah chuan Lungthli khaw nula huaisen a nihna a rawn lang chhuak leh ṭan a, mahse an dinhmun erawh a hre chiang hle. "A râpthlâk hle mai, Zauva... mahse..." tiin zâwi sâp hian a rawn ṭawng a. "Tûnah rih chuan he in chhûngah hian amah saw kan hotu leh thuneihna chelh tu ber a ni miau si a. Kan himna atân a thu kan zawm rih mai a ngai dâwn a ni. Kan hel a nih chuan kan chunga a chêt dân tûr kan hre lawk bîk si lo." a han ti a.

Bawihi pawh chuan , "Puii sawi chu a dik a ni, Zauva. Kan duh emaw duh lo emaw, tûnah chuan duhthlan tûr dang kan nei rih si lo a ni. Khawngaihin, i thinrimna kha la thup hrâm hrâm la, kan tân helai hmun kan chhuahsan hma chu insûm rih hram rawh." a lo ti ve bawk a. Zauva chu ngawi rengin a insehruh tun a, a ṭhiante pahnih in an himna atâna tlawm an thlang chu a hrethiam a, a insum hram hram a ni.

*****************************************************************

Khua a thim mup tawh a, thla a êng lo bawk nen ramhnuai chu a thim chhah hle. Bus hlui leh rî tuk tuk mai chu alkatra kawng chhia leh bumboh takah chuan dârkâr li dâwn lai Phulvar khaw lam panin a insawh thla mêk a. Driver seat-a ṭhu Renga chuan an bus chuanna chuan rei a daih pui dawn lo tih a hre ru reng a, mahse hmabâk a ko in Phulvar thlen nân dârkâr chanve bâk a ngai tawh lova, theihpatawpin a tlân luih tîr hrâm hrâm a ni ber mai. 

Bus headlight dim ruai mai in hmalam a chhun fiah lo ruai mai chu chhum zing zawng zawng nen hmuh chiah a har kher mai chutah Renga chuan a break a han râp ri ta tuar mai a! Bus chhung a ṭhu chauh luat avânga lo muthlu mek te chu hmalamah an bu dâwrh a. Sawmtea pawh kawngkhâr bula inring tâwk taka lo ding sa, a silai hûm ran mai chu a intauh lo chauh a.

"Tinge i din?" Sawmtea chuan a ti vîn nghal thawt a, a silai chu inring takin a lek kâng nghal vut bawk a. Renga chuan thâwk a la hawk a, steering bawh thlawpin bus hmalam, headlight ên phak chinna lam chu a kawk a, "Kan hma lamah sâwn... kawng lêng lo tawk lekin in thingkûng a tlu ruah mai, kal ngaihna a awm lo." a ti zâwi sap a.

Sawmtea chuan a M-16 rifle hûm rân chung chuan bus kâwnkhar chu a  hawng hrâwk a, pâwn thim zîngah chuan a pên chhuak a. Kawng sîr, motor headlight in a chhun ên phak chunah chuan theihpatawpa fîmkhurin a pên phei a, thil awm dân a va endik nghal zung zung a. Reilotê hnuah bus ah chuan a rawn lêt leh nghal a, a hmel chu thinrimna in a khat a.

"Thingkûng rawn tlu chawp a ni lo." Sawmtea chuan thutak zetin a rawn ti lût a. "Kawng an dang a ni. Pâwn lam aṭangin Khawchhak ral emaw misual tu emaw ten  helai hmunah hian Bus emaw Lirthei dang tlan thei lo tûrin an dang a ni ngei ang." a han ti thum chhak a. Renga pawh chu a ṭhutna aṭang chuan a han dâk kâng ve a, dârthlalang hlui tawh tak aṭang chuan a han en chiang ve a. 

"Phulvar YMA ho ruahmanna pawh a ni mahna. Kan khaw lam Lungthlir aṭanga hri-kai ho an khaw lama an rawn luh loh nân tiin an tlangval tlawmngai ho in kawng dâl nân lûng leh thingtum an lo chhek khâwm a ni ngei ang." a lo ti ve bawk a. Pu Tea pawh chu Bus hnung lam aṭang chuan a rawn ding chhuak a, riltâm leh chauh vânga pên hlei thei lova innam kâng in hmalam chu a rawn thlîr ve a. 

"A pawi hle mai. Anih chuan engtia han tih chi nge maw ni dâwn le? Phulvar khua luh hma in kan tâng khang dêr dawm tihna em ni?" a han ti nûah nûah a. "Kan sawn ang," Sawmtea chuan a lo ti bung hmuk mai. "Tlangval ho kha rawn chhuak ru. Kan theih ang ang in thing zar leh bung hnawksak zual te saw sâwn thlâ in lîr thei lenna tûr chin kawng kan siam dâwn nia." tiin rem a han ruat a.

Tichuan, tlangval rual—Sawmtea, Renga, Muanpuia, leh a nâk hliam tuar mêk Awmpuia te chu bus aṭang chuan an chhuak a. Pu Tea leh a bân hliam nâ tuar mêk Valtea te erawh in bus chhûng aṭang in hmeichhe pahnih—Hlimpuii leh Muani te bâkah Fela chu an lo vênghim thung a.

Kawng dâltu thing zâr rit leh lian pui pui te chu nî danga YMA hnatlang ang vel chu nise an zawn sawn zung zung mai tur a ni a. Mahse an dinhmun in a zir lo nen, khaw thim, riltâm leh ṭâm, tam chhawl lek lek tawh leh chau lutuk an nih tawh avâng chuan an pawt sâwn hlei thei lova, an tha a tlin tawk tawh lo bawk. 

Tiau chhum vawt zîng chhah kârah chuan dârkâr chanve dâwn chu an bei tawh. Chutia kawng hnawm hnawk seng fai mêk lai tak chuan... an piah lawk hnim kâr aṭang chuan rûm ri chhur chhur thawm hi a rawn chhuak ta tlat mai! An chawl ṭhap a, an hawi kual nghal hrâ hlawm a. An hma zâwn thim chin, motor headlight chhun ên phak lohna dâi chiah aṭang chuan hri kai rual panga (5) vel lai hi chil phuan tla bawrh bawrh chungin an rawn chhuak hlawl mai le!

An hmanraw ken in a zir miau lova. Sawmtea'n M-16 rifle a âk a, Renga in thal mu hlui tawh tak panga vêl a hum bawk a. Muanpuia'n Ulhbun, Awmpuia'n Revolver mu tlem te chauh a kêng bawk si. Tlânchhiatna chi a ni miau lova, Mizo tlangval huaisen ṭan rual angaih hun ngei a ni leh ta.

Sawmtea chu a che chhuak nghal vut a, "Inhnaih tîr suh u!" tih leh a silai a kau rîk hrâwk rualin hri kai amah hnaih ber chu a kâp pawp a! Silai a rik ṭhuai rual chuan hri kai pakhat chu a bawk nghal thlawp a, a thi chiang hle, mahse silaimu chu a lo enfiah hmasa lo nge ni, mu hnih chuah a lo awm tawh! 

A han kal leh a, ala kah thleh zui. Mahse chu aia thil pawi zâwk chu, chu silai puak ri ring tak khân kawng sîr hnim bûk kâra lo tâwm mek, hri kai dang te chu a rawn kai tho tlat mai. Vei lam leh ding lam aṭang chuan rûm ri leh hnah ro rap ri thâwm a rawn ri nghal hrawp hrawp a, hri kai dang paruk (6) vel lai mai chu an rawn chhuah belh leh ta.

Muanpuia chuan a Ulhbun inkau sâ chu a kâp puak ve ṭhuai a! Thisen per chhawk in pakhat chu a kap thal ve tawp mai, mahse thun in silaimu dang a thun chawp leh phawt angai bawk si! Awmpuia pawh chuan a revolver ken lai chu a han hmet puak ve nghal thuai thuai a. Valtea pawh chu Bus aṭanga rawn chhuak ve in, a kut na lo lam a Pistol hûm in hri kai, bus lam lo pan mekte zîng a mi pakhat chu a kâp thal tawp a. 

Mahse, khaw thim leh tiau chhum chuan khaw hmuh a ti tawi si, bus headlight in a chhun tlang phak lohna lam aṭangin hri kai dang an rawn pun belh zel bawk nen, silai mu an sêng ral hnem ta malh malh hle mai, "Lût rawh u! Bus chhûngah lût vek rawh u!" Sawmtea chuan a theihpatawpa ring in a ṭhiante a au khawm a. 

Muanpuia, Valtea leh midangte chu Bus lamah tlân letin thâwk pângngai thelh lût khawm a. Hri kai pakhat phei chuan Renga kut rawn man hman ṭep a rawn ban thuak a, vanneih thlak takin a man hman lo hlauh! Bus kawngkhar chu Sawmtea chuan a khar phui nghal vat a! Hri kai ho chuan kawngka chu an rawn nek nasa mai. 

Hri kai tam tak chuan bus chu an hual a, an rum chhur chhur hlawm mai. Renga chu Bus driver seat ah thu leh nghalin bus chu start a han tum a. Mahse a nung thei ta hauh lo, a han tum ngat ngat a, mahse awmzia a awm lo. Pawn lama hri kai chu an pung zel a, 20 dawn an ni ta mai. "Renga, kal vat ang.." tiin an tur nasa hlawm tawh kher mai, mahse bus erawh chuan nun a tum tawh hauh lo, hri kai rual chuan hual in bus chhungah chuan an tang chu a ni ta ber mai.

***************************************************

Zan dar 10 a pêl tawh a. Sihpui mual cement in chhûng chu a reh ṭhiap tawh a. Chauh luat vângin naupang leh hmeichhe ho pawh chu leichhuat vawt takah chuan theih ang angin an mu kawi ngiai hlawm a. An piah deuh, a thim chinah chuan Zauva pawh bâng nghêngin a mit a chhîng ve ta riai riai a.

Meipui an chhem tlêm êng dâl ruih mai sîrah chuan, Pu Rina chu bâng nghêngin a ṭhu rûn a. A meizial zûk khu chu thim thamah chuan a zâm chhuak chiai chiai a. Chutih lai chuan a bul lawkah Pu Ruala, an zînga upa lam deuh tawh chu a rawn tawlh hnai hrut hrut a. Midang mutui lai tih-harh hlau tak leh thâwm dîm zet hian a aw rawn thian kharh a.

"Pu Rin... i la meng alaw?" Pu Ruala chuan a rawn ti zawi sap a. Pu Rina chuan a meizial chu a lû a lo bu nghat a. "Ka mu thei lo a nih hi Pu Rual... kan dinhmun in a zir miau lova, ngaihtuah tûr a tam êm a ni." a han ti thâm tuak a. Pu Ruala chuan a ṭhutna a siam rem a, "Tlaia Zauva thusawi kha chu la thutak lûtuk duh rêng rêng suh aw. Tlangval fel leh tlawmngai tak chu a ni ngei mai, mahse rorêlna kuta la vuan ngai lo, thil thlîr thiam lo naupang mai a la nih saw." tiin a rawn tlawn vel a.

Pu Rina chu phakar leh fing tih takah, a hmelah chuan inthiamlohna hmel reng reng a lang lova, khawtlâng tâna inpumpêk hmel tak hian a lu ahan bu nghat nghat a. Thâwk a han la hawk a, "Na lo ve, Pu Rual. Zauva te ang tlangval sâ ṭha leh huaisen hi chu an tlawmngaihna a sâng a, mahse an thluak a fîm rawk lo ṭhin a ni. Tukin zînga kha patling... ka kâh hlum dâwn lai khân ka rilru hi a na lutuk a sin. Mizo pa dik tak tân chuan thil hrehawm tawpkhâwk a ni. Mahse helai hmuna kan nupui fanau, hmeichhia leh naupang tam tak te nungdama an chhuah theih nan chuan, kut tih balh a ngaih châng a awm tlat si a ni." a han ti vel luam a.

Pu Ruala chuan a lû a lo bu nghat nghat a, "I ti dik chiah. Hruai lût pawh ni ila, damdawi kan nei lova, hri in a ei chhiat hnuah keimahni bawk min rawn seh leh se engtin nge kan tih ang? Mipa puitling ngaihtuahna a ni a, tlangval ho in an lo hrethiam loh a nih pawh in keini patling rual hi chuan kan hrethiam che a nia." a lo ti vei hluam hluam a.

Pu Rina chu a thlêm fuh tih hriain thimtham kârah chuan a nui ru sak a. "Kha chiah kha a ni, Pu Rual. Khatiang patling thih ngam lova ṭap pûr tawh kha chu a tawpah an thi tlangpui reng a ni. Mahse Zauva hi a inlâ huaisen leh lutuk a, a tlawmngaih luat ah hian keini ho hian kan la tuar ang tih a hlauhawm. Nakin zêlah pawh tlangval ho hi chu thunun an ngai dâwn a nia, kan inhriatthiam tawn a ngai ang." tiin Zauva muthlu mek chu ava melh zeuh va. Pu Ruala chuan a thusawi chu ṭha a lo tih hmel khawp mai.

*********************************************************

END OF EPISODE 5