ONCE UPON A TIME IN MIZORAM : SEASON 2 (Mizo zombie horror story) Written by : Aaron Malsawmdawngzuala Episode 7 : Blood And Brotherhood LAST

 ONCE UPON A TIME IN MIZORAM : SEASON 2

(Mizo zombie horror story)

Written by : Aaron Malsawmdawngzuala

Episode 7 : Blood And Brotherhood

LAST

*****************************************************

Ramhnuai thim chhah mup hnuaiah chuan theihpatawpa chakin an tlân a, kawng a bumboh in a rual loh êm avâng chuan an inpal nawk nawk reng a. Mahse hri kai ho rûm thâwm leh silai puak ri a reh tak hnu chuan Sawmtea, Zothana leh Muani te chu thâwk la hlawp hlawp in an chawl hahdam a. 

An thlanin a bual huh vek a, an thawmhnaw ah te chuan ramhnuai a hnim hnahthel leh chirh diak a kâi nuaih bawk a. Hri kai rual tam tak lak atang khan an him ta rih niin a lang. Sawmtea chu inthing harh thutin a hawi kual nghal ruai a. Thim tham kârah chuan a naute dang an awm ve em tih a zawng a, mahse an pathum chiah an ni. 

"Khawiah nge Hlimpuii?" a rawn ti chhuak ṭhawt a, a aw ah chuan manganna thûk tak a inphûm a ni tih a chiang hle. Hlimpuii an bula a awm tel ve lo chu a thla a phâng takzet a ni. Muani chuan a khûp dâwm meuhin a lo thaw hlawp hlawp a. Sawmtea zawhna a hriat chuan rawn dâk chhuakin, theih leh theih lovin a rawn chhang a. 

"Ka hre chiang lo... mahse kan darh tak huk khân, Renga khân a kutah a pawt a, tlâk lam mual... hnim pik awmna lamah khân a tlân thlâk pui in ka hria." tiin khûr dar dar chungin a lo hrilh a. Chu thu a hriat rual chuan Sawmtea chu a meng kâwk a. A nau te an him leh him loh ngaihtuah lêk lova mahni lu huma a lo tlân hrang chu a inthiam lo nghal kher mai. 

"Lalpa leh... Ka zawng dâwn!" a ti chang nghal fak a, a silai chu a dârah pu ṭha in, Renga te tlânna lama a ngaih mual thim lam pan chuan phei a tum nghal vut a. Mahse Zothana chu Sawmtea hma ah tak chuan a rawn ding tlat mai. "Ding rawh Sawmte!" a rawn ti vîn thak a. "I â ta em ni? Ramhnuai chhah leh thim mup ah hian khawiah nge i zawn hmuh teh lul ang? Tûnah  hian hri kai ho in min rawn la zawng mek thei a nia. Pu Liana cement thlam lam chu pan zâwk ang. Chuta ṭang chuan ruahmanna dang kan siam ṭha leh zâwk dâwn nia." tiin a lo dang a.

Sawmtea chuan a mitmeng thîp tak mai chuan Zothana chu a melh rân a. A ṭhiante, a nau Hlimpuii chhan nan chuan a nunna thâp pawh a huam a ni. "Lo thi hman ta se engtin nge niang? Renga khân silai a nei tawh lo. Hri kai in an ûm phâk keiman ka va zawng hmu dâwn a ni. Min dang suh," a ti bung hmuk a, a nêk phei nghal sawk a.

Zothana pawh chu a luhlul in, tlangval huaisen leh puitling tak ve bawk a ni a, Sawmtea banah chuan theihpatawpa nâ in a lo man bet a. "Tualzâwla awm i ni lo! Ramhnuai thuk tak kârah hian nangmah chauh chuan i dam rei lovang, ka thusawi chu awih mai rawh. Ka kal tir dâwn chuang lo che." a ti ve ta fak mai.

Sawmtea thinrim chu a insum zo tawh lo. "I thu ka zawmna chhan tur ka hre lo." tih leh Zothana hmai ah chuan theihpatawp a nâ in hnek a rual a! Zothana chu hawi sawk in a pai khut khut a, rawn thawi let ve nghalin Sawmtea bekah chuan a rawn hnek lêt ve nghal ṭhuai a! Chutah tlangval pahnihte chu an insual ta buan buan mai a, Muani chu a lo mangang kher mai.

Tlangval sâ ṭha tak ve ve an ni bawk a, thim tham hnuaia an insual thawm leh an au thawm chu a ri khawk ruah ruah mai. Mahse, tha-ah chuan Zothana chu a lo chak deuh zâwk tlat, a lo upa zawk bawk nen. Zothana chuan theihpatawpa rawn bawh tluttu Sawmtea chu theh lêngin a hnek thlu leh nawk ṭhîn a, Sawmtea tân pawh harsa tak chunga thawh hram hram a ngai a, a châu in a tlawm dâwn lek lek ṭhîn, mahse a tlawm mai dawn lo tih erawh Muani ngei pawh hian a hre chiang khawp ang.

Chutih lai mêk chuan, hlauh avânga lo thlaphâng ru tak Muani chuan leia an silai thlauh pakhat a hmuh chu a lo chhar ta hlauh a. "Duhtawk rawh u!" tiin theihpatawpa ring hian a rawn au ta tuar a! Mipa pahnih, an thih hma a insual tum ang mai te pawh chu phu zawkin an tâwp nghal chat a. 

Muani chuan theihpatawpa nghetin chu silai chu a hûm khûr dar dar a, a kâp mai dâwn emaw tih tûrin an pahnih hma ah chuan a lek kâng va mai a, "Sawmte... U Renga bulah a awm a lawm, Hlimpuii chu a ngaihtuahawm loh ang. U Renga te chu mipa rinchhan tlâk leh theihna ngah tak a ni a, a theihpatawpin a vêng him dâwn a, an him em em ang." tiin aw khûr dar dar chung chuan Sawmtea chu a han thlamuan a. Chu thu a hriat meuh chuan Sawmtea thinrim inpet ruh ṭeuh tawh pawh chu a rawn inthlahdul ve ta deuh a. Thâwk la hlawp hlawp chungin Sawmtea leh Zothana te chu an inthlah a, nâ ti taka innam kiangin, an indin chilh ta rân mai a.

Zothana chuan Sawmtea dâr a vawnna chu a thlah riai riai a. Thâwk a han la hawk a, a hmelah chuan thinrimna ai mahin natna thûk tak a rawn lang chhuak ta zâwk a. "Sawmte... i hrethiam lo a ni. Ka naute, ka thisen zawmpui ang maia ka en, panga ngawt mai kha ka mit hmuh ngeiah, khang hri kai riltâm te khan an seh a, an pawtsawm vek lai kha ka hmu asin. Thlaphâng taka chhan ngena min rawn au tuar tuar te kha theih tawp chhuah dawn pawh ni ila ka chhan thei bawk si lo... ka ngaihtuah lêt ringawt pawh hian mipa puitling meuh pawh hi ka â thei hial dâwnin ka inhria. Chutah, ka naute zinga damchhuak awmchhun Hriata lah kha, thlaphânga kan tlân chhiat darh nûai kârah khân ka hloh zui ve nghal bawk a... an hotupa leh an 'U' ka nihna angin, humhim zo lo leh mi tlâktlai lo tak niin ka inhria a, hrehawm ka tiin ka inthiam lo tak zet a ni." tiin zâwi leh beidawng aw lek lek, mipa thinlung nâ thûk tak aṭanga rawn chhuak tih hriat tak hian a rawn ti thâm ṭuak a.

*****************************************************************************

Khua a thim ṭan a, ni pawh tlâng karah a liam ta ruai ruai a. Ramhnuai pilril takah chuan dâifîm a tla ṭan in boruak a rawn vawt vûk a, thli vawt tak a rawn thaw heuh heuh bawk a. Renga leh Hlimpuii te chu tiau chhum zîng chhah tak kârah lûngpui lian pui pui kâr phênah, meipui te tak tê chhemin an ṭhu kûn lap a. 

An awmna hmun a him leh him loh pawh an hre lova, Zothana te sawi Pu Liana cement thlam panna kawng tur rêng chu chhui ngaihna an hre bawk hek lo. Zan thim mup leh uap churh hnuaiah chuan, sahimna zawngin an pahnih chauh chuan an tâwm dun a. Hlimpuii chu a khûr dar dar a, a u Sawmtea chunga thil pawi a thlen palh a hlau chu a rilru a hah in a ṭap chhuak lo chauh a ni. 

A hlauthâwng hmel chu meipui êng dâl ruih ah chuan Renga'n a hmuh hmaih lova, patling leh mipa rinchhan tlâk tih takah a theih ang tawkin a lo hnem ve mawlh mawlh a. "Hlimpui, hlauthâwng suh aw. I u te chu mipa theihna ngah leh huaisen tak a ni a, Zothana nen khân an inkâwi hrang thei em em ang. Hêng hri kai rual mai mai lakah hian an tlâwm dâwn lo a nia. Naktuk khua a lo vâr anga, kan pahnih hian hnim leh lûng kâr zawng zawng pawh hrût chhuak vek dâwn mah ila, i u chu kan zawng hmu leh em em ang." tiin a thla a muan hrâm hrâm a.

Meipui aṭanga thingṭang ro per chhuak ṭhat ṭhat thawm tih loh chu ramhnuai chu a reh vawng vawng a. Renga chuan a kianga ṭhu, hmeichhe thlaphâng tak mai Hlimpuii chu a en vang vang a. He nula te reuh hian karhnih chhung lekah thil râpthlâk a tawn hnem zia a ngaihtuah chuan a khawngaih hle a. 

A titi chhunzawm zel a, "I lo nula ve ta hle mai tiraw... Hmana Biak inah, Sunday School-a Junior in nih laia i zirtirtu ka nih ṭhin kha i la hria em?" tiin zaidam takin a zawt a. Hlimpuii pawh chu lunglên hmel deuhin a rawn hawi chhuak a, tawi te hian a rawn nui ve sak a, "La hria e a... inkhâwm dâwn a ka ṭah chang pawha lapawchini emaw sweet emaw min pe ziah tu kha i ni sia lawm." a lo ti let ve sap a.

Renga chu a nui ve suk a. "Biakinah zaia i din ṭhin laite kha ka mitthlaah a la cham reng mai. I aw a mawi si a, i solo lai ngaihthlâk kha a nuam ka ti ṭhîn teh a nia. Han zai chhin teh a, i la zaithiam reng ang ka ring..." a ti ta hlawl mai a. Mahse Hlimpuii chu a meng phâwk hrâ a, "A chiloh lutuk, u Reng! A hun lo emai. Thâwm kan siam a nih vaih chuan khang ramsa ho khân min rawn hre phâk palh ang, kan thih phah a ni mai." tiin a lo hnial vat a.

Mahse Renga chuan a ngen tlat a. "A ho lutuk, an hre phâk lovang. Helai ramhnuaiah te chuan keimahni chiah kan ni tawh a. Tûkin zîng aṭang tawhin thisen leh natna hlîr kan hmu a, ka mitthlaah hian thil hrehawm tak tak hlîr a cham a, ka rilru hi a hahin a na takzet a ni. Khawngaihin, ka lunglên hnem atan tal pawh han zai hrâm teh." tiin a ngen leh tlat a. Renga mitmenga beidawnna leh natna thûk tak awm a hmuh chuan Hlimpuii chuan a hnial hreh ta deuh a, muangchangin a thut hmun a siam rem a. Aw kûr mawi leh fiah, fân raih mai hian zân thim tak hnuaiah chuan a han zai ta a:

"Hlimte'n pâr ang kan vul, kan chhuahtlâng mual dâiah,

Ṭhenna tuipui a fâwn dâwn tih dâwn lovin hmanah khân;

Mahse râlkhel a zîng, hri pui râpthlâk a rawn luh tâkah,

Thisen lûang rûamah mihring fa, mangangin kan rûm ta.

Zân thim leh ṭahna kârah, thlaphângin rûam kan hrût,

Khawngaihna rêng a awm lo, he thihna mual vawt ah;

Aw... ka chûn nu nêm leh, lûn-di lungkham hlui te,

Hri pui kut nunrâwng tuarin, fam mual min liam san ta.

Khuanu rêl dâwn thiam a har, hringhniang lei hmunah hian,

Hlauhna thla zâr hnuaiah, mittui nen hringnun ka chhiar;

Nghâkhlel te'n ka thlîr e, pialrâl ram êng mawi chu,

Hri pui thihna fâwn leh inṭhen, awm tawh lohna tûr chu."

Chu hla mawi leh lungkuai tak mai, hmeichhe aw no leh tlâwm tak aṭanga rawn thâm chhuak chiah chu, ramhnuai reh leh thim mup karah chuan a khâwk chhuak raih raih a. Renga chu a ṭhu ngawi tlawk tlawk a, meipui êng chu mittui tling pamin a thlîr ngawt ngawt a. Hlimpuii zai ri chuan theihnghilh a lo tum ṭhin, a hun kal tawh chu a ti thar leh a. 

A mitthlaah chuan Lungthlir khuaa hri an la luh hma, hmana a u te nupa nena hlim taka an awm lai te a rawn lang uar uar a. A u in vawt ti taka meilum a ai pui lai te, an chhungkua nui bâwk bâwk chunga varṭiana thingpui an in lai te kha nizan lawka thleng ang maiin a la chiang a. 

Tunah chuan a u te chu an boral tawh a, amah ngeiin an nupa khan a that ta kha  a ni a. Chu ngaihtuahna chuan a thinlung a vit ngut ngut a, insum zo lovin a biangah mittui a rawn luang thla ngiai ngiai a. Hlimpuii pawh chu zai chhunzawm thei lovin a aw chu a tham tiak a, a hrawk a rawn inhnawh phûi tlat a, a mittui a sur zung zung a. 

A hla thu te chuan a thau ah a man a, a mitthlaah a u Sawmtea nen hlim taka an nuih dun ṭhin lai te a rawn lang a. A bîk takin a nu, Pi Zari nena an hun hman liam ta te kha a ngai vawng vawng a ni. A naupan laia a nu in duat taka a sam a khuih mâm sak lai te, hah pawh sawi lova eitur tui hnâi tak tak a u Sawmtea nena an ei tur a siam sak ṭhin lai te. 

Khawpui rîk nasat emaw, hlauh a neih chang pawha "Ka naute, anu a awm alawm, hlau suh aw.." tia nghet taka kuah lum ṭhintu a nu hmel chu a mitthlaah a dâi thei lo. Tûnah chuan a nu chuan fam khua a lawi tawh a, a nu hmangaihna chuan thlamuan turin a ur lum theih tawh der mai si lo.

Hlimpuii chu a zai zo thei lo, a kâ a hup a, a inhnît ta hlawp hlawp a. Zân thim hnuaiah, ramhnuai ralti tak karah chuan meipui kiangah tlangval leh nula, hrehawm tuar nasa tak te chu an pahnih chuan an ṭap dûn ta tlawk tlawk a. Hri kai rual leh khawchhak ral ho lakah inthukru in him rih deuh mah se, an hmangaihte leh an hun hlimawm liam ta, an thlakhlelh em em lakah chuan an him ve thei lova, lunglênna leh chhungte ngaihnain an thinlung a hrual nat luat vângin an kehsawm mek a ni. 

Renga chuan a mittui hru mawlh mawlh chungin, hrehawm ti takin Hlimpuii chu hnêm in a ṭap hawm hawm a. Mipa inti pa ve tak, theihna ngah leh hri kai hlauhawm pui pui pawh chem hmanga sât thlu hmawk hmawk ngam tu, Renga meuh pawh chu naupang chhia ang maiin a ṭap khûr ve ta dawt dawt a. 

He khawvel nunrâwng takah hian an hmangaihte chu tui lianin a len bo ang hmawk an ni a, damkhawchhuah tumin bei ṭang ṭang ṭhin mah se, a châng hi chuan bâng lova thlaphân reng a  ngai a, dam ve reng pawh hi a ninawmin a hahthlâk ngawih ngawih a ni. Rei fê meipui êng bula an ṭah tlawk tlawk hnu chuan, an rilru tawt ipik lutuk pawh a rawn thawveng ve ta deuh a. 

Renga chuan a mittui chu a bân a hru fâi in, "A mawi lutuk e Hlimpui... I zai ka ngaithla a, ka natna tam tak a chhawk a ni. Kan dam anga, i nu in min kalsan tawh mah se, naktukah i u chu kan hmu leh ngei ngei dâwn a nia." a ti thâm ṭuak a. An dam chhuak zel a nih phawt chuan beiseina a la awm tih hriain, ṭang dûn takin zân khaw vawt leh thim mup mai chu an hmachhawn zawm ta a.

*******************************************************************

Ngaw pui pilril leh thim chhah mup hnuaiah chuan, Siama chu khâm rual rem lo tak leh hnim pik kâr aṭang chuan thâwk la hlawp hlawp chungin a rawn inbeng kâng a. Hri kai rualin an rawn bawh huk laia an phîli buai nûai kârah khân, theih ang angin Awmpuia chu a pawt chhuak ve ngial a. 

Mahse an kal thui hman lova, khâm awih ve tak leh thim laiah chuan an lum thla ta ngawt a ni. An lumnaah an insawh na hle a, Siama ngei pawh a lu a hai chhuih a, a bân puamah hnim hriam tai thlerna a thi sêr sêr a, an thawmhnawah chuan chirh diak leh thisen a kâi nuaih bawk a. 

Siama chu inthing harhin, a theih ang angin a hma zâwna a ruala lum thla ve a ṭhianpa, thim zînga kûn tlawk tlawk chu a va pan phei rawk rawk a. "Awmpui... Awmpui, i ṭha em?" tiin mangang takin a va sâwi nawk nawk a. Awmpuia chu a hliam nâ zual hle a ni tih hriat takin a rawn rûm chhuak hrâwk a. 

Zân thim dâl ruih hnuaiah chuan a hmel dâng lap leh, thlan fîm in a bual huh vek chu Siama chuan a hmu thei a. Awmpuia chuan a nâk, Luna'n dim lo taka a chhuihna hnu chu theihpatawpa nghetin a lo dâwm a. "Siam... ka.. ka kal thei tawh lo ang. Ka nâk hliam hi a puak keh mai dawnin ka hria... a pemah hian thisen a chhuak nasa lutuk..." tiin harsa ti tak leh thâwk la hlawp hlawp chung hian a rawn chhang a. 

Siama chuan phâwk hrâ in a va dâwm vât a, Awmpuia'n a nâk a dâwmna kut chu thisen tharlâm takin a lo chiah piah nuai tih a hriat rual chuan a mangang ta kher mai. "A theih loh... hetah kan awm reng thei lo a nia Awmpui. I ti thei, tlem chiah kan hmabâk tawh... tlemin han sang mar leh hrâm rawh." tiin Siama chuan a han pawt kâng lûi ṭâwk ṭâwk a. 

Mahse Awmpuia chuan a tlin tawh lo takzet a ni, rawn tho chhuak tûr in tha rêng a nei tawh lova, nâ a tih em vângin a khur tlawk tlawk a, a thaw hlawp hlawp ringawt mai. "Siama... min kalsan mai rawh." Awmpuia chuan a rawn ti chhuak ta phawng mai. Siama chu a han thaw hak a, "I â emai! Engtin nge ka kalsan theih teh lul ang che? Ka unaupa leh ka ṭhianṭha ber i nih hi..." tiin Siama chuan theihpatawpin zâwi te si, fiah fâk hian a han vin deuh hlak a.

Awmpuia erawh beidawng hmel takin a rawn dâk chhuak a, theihpatawpa zâwi hian a rawn sawi chhunzawm leh a. "Ka ti tak tak a nia, Siama. Thâwm kan siam nasa si a, khang hri kai riltâm ho khan ka thisen chhuak rim hi hla tak aṭangin an rawn hre vat dâwn a nia. Nangmah in tlân chhia la, Zothana sawi cement thlam, himna tûr hmun a sawi kha va pan vat zâwk rawh. An rawn thlen hmain tlân la, in saseng vat rawh." a ti khur hlawk hlawk a.

Siama chuan Awmpuia chu a khawngaih bawk si. Tlangval fel leh huaisen, hlauhna rêng nei ngai lo beidawng ta tlat mai a hmuh chuan a rilru a na takzet a ni. "Ka fiamthu lo Awmpui, ngawi hmak la, han insang mar leh hrâm rawh. Ka rualin i kal anga, kan thi dâwn a nih pawhin kan pahnihin kan thi ang. Tihian ka kuah che ang a, theihtawp chhuah in hma lam kan pan dâwn nia, zawimuangin...." a lo la ti ve tlat a.

"A ni lo Siam... Zothana naute panga ngawt pawh ramsa ang maia an pawh sawm lai i hmuh vek kha... tûnah chuan hliam na tak ka tuar tawh a, ka hliam hian rei tak min daih dawn lo. Ka tlin tawh lo chu a nih ber hi, min ti muang mai mai dâwn." Awmpuia chuan chau takin a rawn ti chhuak hrawih a, a khuh zui bawrh bawrh a. 

Siama chuan Awmpuia khuh bawrh bawrh mai chu lainat takin a en reng a, a âwmah dâwmin a theih ang angin a lo chûl hliau hliau ringawt a. Siama pawh hian Awmpuia chu heti hian pawt lui tlat pawh nise thui a thlenpui thei dawn chuang lo tih a inhre chiang takzet. Mahse a ṭhianṭha ber thihna ruama hnutchhiah a, mahni damna tûr zawn ngawt chu a thei thlâwt lo a ni.

"Ka kalsan dâwn lo che... ṭang hrâm hrâm rawh. Zân thim a nih hi, himna tûr hmun khawi lai emaw a awm em em ang... he thihna mualah hian kan inphatsan dâwn lo, ka thian." Siama chuan mittui tling teuh chungin a ti a, hlauhawm hlirin hual vel mah se a ṭhianpa laka a rinawmna chu tih chhiat a tum lo hle.

*****************************************************************

Zân a lo rei a, ngaw pui thim chhah mup mai chu hlauhawmin a khat a ni ber e. Thla êng dâl ruih in thing zâr kâr aṭanga leilâm a rawn chhun ve chang chang tih loh chu hmâlam pên sawm lek pawh hmuh theih a ni lo. Thing lian pui pui kâr, hnim pik tak phênah chuan Valtea, Pu Tea leh Muanpuia te chu thâwm chhuah hlau takin an ṭhu kûn tlawk tlawk a. 

An thâwk lak a rangin an châu hle a, khawvawt bawk si leh thlaphânna in a tuam mup avângin an khûr ru dar dar hlawm a. Valtea chu thing bul nghengin a ṭhu sawp nûai a, a ban hliam chu a dâwm vawng vawng a. Nâ a ti in a thlan fîmin a bual huh vek tawh a, a chângin a theihpatawpa zâwi hian a rawn rûm chhuak leh hrâwk ṭhîn. 

A piah lawkah Muanpuia chuan a ulhbun (shotgun) kau sâ chu nghet takin a hûm a, mit khap lêk lovin an hmâlam thim tham chu a melh ngawt ngawt a. Hri kai thâwm hriat tûr a awm tawh lova, mahse ramhnuai a rannung hram chiah chiah thâwm te chuan an thla a ti muang thei thlâwt lo a ni.

Chu thim tham leh hlauhawm kârah chuan, a ruka inhnît hlap hlap thâwm a rawn chhuak a. Pu Tea chu a khûp tawm chial a thu in theihpatawpin a lo ṭap khûr dar dar mai. A fapa, Fela, hri kai rualin an rawn bawh darh huk ruala a hloh tâk kha a mitthlaah a châm reng a. Kha thlaphânna kârah khân a fapa mangang hmel kha a theihnghilh thei lova, Valtea'n rawn pawt chhuak lui lo se chuan a fapa rual khân a ni pawh an pawtsawm vek mai dawn si.

Thâwk leh khatah, Pu Tea chu a rawn inbeng kâng thut a. "Ka fapa... ka kalsan thei lo. Ka let leh dâwn..." tiin mangan hmel tak hian a rawn ding chhuak a, an tlân chhiatna lam pana let leh chu tum ta mai a. Valtea chu nâ tuar in ner nawng reng mah se, theihpatawpa chakin a rawn ding chhuak ve nghal a. 

Pu Tea chu a va kuah bet nghal chawt a. "Pu Te! Harh chhuak teh! Kan let leh theih tawh loh kha... an tam lutuk, let leh pawh ni ila hri kai bak hmuh tûr an awm tawh dâwn lo." tiin a lo dang nghal a. Pu Tea chu a tal buan buan a, patling pui tawh si chu naupang ang maiin a tap hawm hawm mai a.

"Min thlah rawh! Ka nupui ka chân tawh a, tûnah ka fapa neihchhun... ka thei lo Valte! Ka kal dâwn." tiin Pu Tea chu a inhnît hlawp hlawp a. A mittui a sur zung zung a, a hmelah chuan  lungngaihna leh beidawnna thûk tak a lang chhuak a ni. "A nu bulah khân theihpatawpa vênghim tûrin thu ka tiam a sin... engtin nge mahni sahimna zawngin ka kalsan theih ang? Engtin nge Fela tel lovin ka dam theih ang?" tiin a rum vawng vawng a, a hmelah chuan dam thlakhlelhna rêng a awm tawh lo tih a chiang hle.

Muanpuia chu a silai hûm chungin a rawn tawlh hnai ve vat a. Pu Tea mangang lutuk leh rilru na chu a lainat hle a. "Pu Te... inbeng dai hrâm rawh. Khatia kan tlân darh nûai lai khân Zothana naute zinga mi Hriata kha Fela bul chêt ah a awm a sin, ka hmu alawm. Hriata kha tlangval huaisen tak a ni ngei a rinawm a, a chhan chhuak hman em em ang." tiin beiseina siamsak tumin a rawn tawng chhuak ve a.

Chu thu a hriat chuan Pu Tea tal buan buan pawh chu a rawn dâi ve deuh a. Valtea chuan lo thlâwp vatin, "Ni e, Muanpuia sawi chu a dik a ni. Hriata khan a hruai hran hman ka ring tlat a ni. Pu Te, helai hmunah hian thâwm kan siam a, hri kai ho kan inhmuh tîr a nih chuan... Fela'n damin i hmel a hmu leh tawh ngai dawn miah lo a nia. Tûnah chuan kan theih ang anga himna kan zawn hmasak phawt a ngai a ni." tiin a dârah chuan a beng thek thek a.

Pu Tea chuan thâwk a la kâwk kâwk a, patling inti pa ve tak pawh beidawnna in a hmeh chauh meuh chuan  a zawi hnawk mai. A ṭhingṭhi thla hnawk a, a hmai hupin a ṭap khûr ta tlawk tlawk mai a, "Fela... ka naute..." tiin a phun sap a. Valtea leh Muanpuia te pawh chuan an theih ang tawkin an lo hnem ve bawk a. 

Hetiang khawvêl, hri kai rapthlak tak te leh natna hlîra khat liam ah hian hmangaihte hloh aia na a awm thei kher dâwn em ni? Rei vak lo hnuah, Pu Tea pawh a rawn inbeng dâih ve theih tâkah chuan, Valtea chuan a ban hliam dâwm ngawt ngawt chungin ruahmanna a siam ta a. "Zothana thlam sawi, Sihpui mual cement in ngei kha kan pan tûr a ni. Kan ṭhiante dang nungdama an la awm a nih chuan, chulam pan chuan an kal vek ngei dawn tih a chiang," a ti nghet charh a.

Muanpuia chuan a lu a lo bu nghat a, a silai chu a han hum nghet sauh va, "Kawng awm dân chu ka hre nual in ka hria, helam phei zêlah hian a kawi thlâkna tûr a awm ngei ang. Mahse kan thâwm dîm erawh a ngai hle ang." a han ti a. 

Pu Tea pawh a theihna sawm khâwmin a rawn ding chhuak ve a leh ta a, a fapa a la dam a nih hlauh chuan chhanchhuah leh ngei a duh vângin beiseina thar a rawn nei leh ta. Tichuan, mipa pathum te chu theihpatawpa thâwm dîmin, hnim pik leh thim hnuaiah chuan hmalam panin an pên chhuak ve leh ta a.

**********************************************************

Ngaw pui thim chhah mup leh vawt vûk hnuaiah chuan, Hriata chuan theihpatawpa nghetin Fela chu a kai a, hnim pik leh lungpui hriam tak tak kârah chuan theihpatawpa chakin a tlân pui hlawk hlawk a. An hnung lawkah chuan hri kai rual rûm ri chher chher thâwm chu hriat tûr a la awm a, chu chuan Hriata theihna leh huaisenna zawng zawng sâwm khâwmin chak takin a pên hlawk hlawk mai. 

A thâwk a rangin a thinphu a su dawt dawt a, mahse a bula awm mek tleirawl kum 16 mi lek,  khûr hlawk hlawk hi thihna ruamah hian a kalsan thei lova, mizo tlangval a nihna ang leh a mihring pui a nihna angin a theih chin chinah chhanhim a tum tlat a ni. Rei fê chhum zîng kâra thâwm chhuah hlau taka an tlân kual hnu chuan, an hnunga thihna thawm râpthlâk tak pawh chu a hla ve ta tial tial a. 

Hriata chuan an hmâ lawka thing lian pui pakhat, thli in a chhêm tlûk ni awm tak hnuaia leikhi tuar mai awm chu a hmu a, chu chu a theih ang anga bihruk nan a pan pui ta rawk rawk a. Thing zung lian pui pui in a hual vel leikhuarah chuan theihpatawpa dîmin Fela chu a nghat thla dawp a, amah pawh chu thaw hlawp hlawp in a ṭhu lut ve nghal a.

Boruak chu a reh vawng vawng a, dâifîm far ri fap fap bak hriat tur a awm tawh lo. Hriata chuan a silai chu nghet takin a hûm a, thim thamah chuan inring takin hri kai rawn lang thut palh thei lakah chuan a invêng rân a. A sir lawkah Fela chu khûp suih meuhin a ṭhu khûr dar dar a, a kâ chu a kutin a hup a, theihpatawpin ṭap ri lo tûrin a insûm ve ṭang ṭang bawk a. 

Tleirawl, la naupang tak, kum 16 mi lek tâna hetiang theihnghilh theih loh thihna râpthlâk mit ngeia hmuh zui reng mai chu a rapthlak mah mah a ni. "Thâwm dîm rawh aw Bawiha," Hriata chuan a theihpatawpa zâwi hian a zu hrilh ru sâ sâ a. Fela chu a rawn hawi chhuak a, a mitmeng paw ram mai ah chuan mittui a tling pûam a, hlauhna leh mangangna hlîrin a lûah khat a ni. 

"U Hriat... ka pa... ka pa bulah ka kal duh. Ka pa kha an seh ve em le?" tiin a rawn inhnît fêih fêih a. Chu zawhna chu chhan a va han har tak em, Hriata ngei pawh khân zawn ngaihna a hre lova, phîli buai nûai kârah khan chhan theih anih loh zia a hre chiang hle si a. Hriata chuan a kut lian leh thap ṭha tak chuan Fela mittui luang ngiai ngiai chu a zu hrûk sak a. "I pa chu an seh miah lo ang. I pa te chu patling a nia, pa huaisen leh chak tak a lawm a nih. Tunah te hian him takin a tlân chhuak ve ngei anga, min rawn zawng hmu leh em em ang. Chuvângin mi huaisen fapa i nih kha hria la, hlau miah suh aw, i pa i hmuh leh hma chu keiman ka vêng tlat dâwn che lawm." tiin a thlamuan hram hram a.

Mahse chu thu a sawi lai chuan Hriata chu natna in a hnawh tawt up up a. A mitthlaah a ṭhiante panga, a unaute ang maia a ngaih, kha thihna rûama hri kai rualin an seh rawn lai leh an pawh sawm lai theihnghilh theih loh kha a rawn lang uar uar a. Tih theih nei lova an thlaphâng au thâwm hre pha reng chunga a kalsan a ngai kha a theihnghilh leh thei tawh ngai lovang. 

A mittui chu a biangah a rawn lûang ve ngiai ngiai a, he khawvêl hi a ninawmin dam hi a hahthlâk hluah hluah in a hre hial a. Chutih lai chuan Fela bawk chuan zâwi te hian, "U Hriat... kan thi ve dâwn em?" tiin a rawn zawt leh phawng mai a. A aw ah chuan naupang pawi sawi lo, thihna in a um zui mek thlaphang tak leh beidawnna a ri chhuak tel a. 

Hriata chu a rawn dâk chhuak a, a mittui luang chu a khap per sak a. Tlangval a ni a, he naupang hmaah hian a tlâwm tur a ni lo tih a inhria. "Thi dâwn lo e Fela, kan thi dawn lo." Hriata aw chu a rawn nghet ta charh a. "Mizo mipa kan nih hi. pasaltha huaisen te thlahtu kan ni a, hri kai ho mai mai lakah hian kan tlâwm dâwn lo. I pa in a fapa neihchhun hi hri kai ho chaw atân a phal dawn miah lova, i dâm a ngai a ni. Keipawhin ka unaute chhan theih loh ba rulh nan i hnung ka dâwl tlat anga, ka thi hmasa te a nih ngawt loh chuan tumahin an khawih lovang che." a ti fiah fâk a.

Fela pawh chuan chu thlamuanna thu a hriat chuan beiseina thar a rawn nei ve nual a, a mittui chu hru fâi in a bu ve ta nghat nghat a. Hriata chuan thâwk a han la leh halh a, Zothana ruahmanna sawi lâwk kha a hre chhuak a. "Zân a rei deuh anga, thâwm a reh hnuah helai aṭang hian kan chhuak anga, Sihpui mual lam kan pan ang. Chutah chuan cement thlam him tak a awm a, U Zothana leh i pa te pawh an la dam a nih chuan chumi hmun ah chuan an rawn kal vek dâwn." a han ti leh a.

Khua a vawt tulh tulh a, ramhnuai hnim pik hnuaiah chuan thli vawt takin a rawn chhêm leh vûk vûk ṭhin a. Hriata chuan a jacket lum tha tak chu a phelh a, vawt tih vanga khûr dar dar Fela kokiah chuan a va bat a. "Tikhan lo sin lum la, lo mu lum rih rawh. Thâwm ka lo ngaithla ang e." a ti zui sup a. Tleirawl leh tlangval, thihna kutvawt atanga him hram te chu thimtham hnuaiah an theihna tlem te rinchhanin an hun ṭha her chhuah hûn nghâkin an ṭhu ngawi dûn ta rân a.

***********************************************************************

Khawvâr êng chuan ngaw pui chhah mup mai chu a rawn chhun fiah ṭan a, nî pawh tlâng sâng zâwkah chuan a rawn sen phût tawh a. Hnim leh thing hnah aṭanga dâifîm far fap fap kârah chuan Renga leh Hlimpuii te chu chauh hmel tak leh thlaphâng ru takin, theihpatawpa thâwm dîm chuan an hmalam an pên theih chin chin ah an rawn inzui phei hnak hnak a. 

Nizan lamah meipui kiangah lungkuai taka an ṭah nasat lûat vâng khân an châu tawh bawk a, rei pawh an mut theih loh vângin an mit te chu a sen râm mai a. "U Reng... ka u chu him takin a awm i ring tak tak em?" tiin Hlimpuii chuan Renga chu a zawt a. Renga chuan a chempui a lek kâng deuh a, a kuta Hlimpuii kâi chung chuan, "A awm dâwn chiang lutuk! Sawmtea te chu mipa kawlhrawng tak alawm, khang hri kai ramsa riltâm ho lakah te chuan an inveng zo lutuk ang. Pu Liana cement thlam panna tur dik tak hi zawng hmu hlauh ila, kan intâwk khâwm leh vat turah i ngai phawt teh ang." tiin a theih ang tawkin a hnêm a.

Chutih lai tak chuan, an hma zâwn lawk hnim puk kâr aṭang chuan hnah ro pal ri rawk rawk thâwm a rawn awm ta thut mai! Renga chu a ding chawt a, a chempui hriam tak chu invên nan a lek kâng nghal vut a. Hlimpuii pawh theihpatawpa nghetin Renga hnungah a bîru rawk rawk a. 

Hri kai riltâmte emaw tiin thâwk pawh la ṭha ngam lovin theihpatawpa inringin an ngaichâng rân a. Hnim pik chu a rawn ri buan buan a, chutah... mipa pahnih hi chau hmel tak leh inring hle tih hriat tak hian an rawn dâwk chhuak ta hlawl mai le! Pakhat chu tlangval, chemte hûm a ni a, a hnungah patling, muzuk zum ṭha tak kêngin a rawn zui chhuak ve nghal bawk.

Renga chu theihpatawpa insiam rem in, "Tunge in nih?" a ti khauh fâk a. Chu tlangval rawn dâk chhuak chu Renga leh Hlimpuii chuan an hmu chiang ta! Mak tih lûat vângin an meng phâwk ta hrâ mai. "Zauva!" tiin Renga chuan a ti hu mai a. Hlimpuii pawh a rawn hawi chhuak ve vat a, "Zauva... nangmah maw?" a rawn ti ve bawk a.

Zauva chu rawn pên hnaiin, mak tih hmel takin a rawn meng fiah ve kâwk a. "U Reng... Hlimpui... nangni maw! Kan khua ah khân in thi vek tawh emaw ka ti a sin..." a ti tham ṭuak a. A theihpatawpin thâwk a han la hawk a, a chemte hûm chu a thlah hniam ta riai riai a. "Keini pawhin i thi tawh turah kan lo ngai asin... kan khaw mi ho zawng zawng an thi tawh ngei ang kan tih laiin, hetiang hmunah nungdamin kan inhmuchhuak leh chu a nia, a mak hle mai." Renga chuan a ṭhian hlui damchhuak a hmu leh chu a lawm kher mai. 

Lungthlir khua aṭanga damchhuak an awm ve theih an ring tawh lova, nungdama an inhmu leh hlawl chu mak an ti tlang in, an hnuk a ulh lek lek hial a ni. Zauva hnunga ding Pu Rova pawh chu a rawn pên hnai ve a, a muzuk ken pawh chu tlem in a dah hniam ve ta deuh a. "Phulvar aṭanga rawn tlân chhuak, Rova ka ni e. Nizan aṭang khân Zauva nen hian kan intawng a, helai hmun hi kan rawn thleng ta a nih hi." tiin a rawn inhmêlhriattîr ve nghal a.

"Ka u... Sawmtea te in hmu mial em?" tiin Hlimpuii chuan Zauva chu beisei nei takin a lo zawt nghal a. Zauva chuan a lu a thing nar nar a. "Hmu lo... Sihpui cement inah khân Lungthlir leh Phulvar aṭanga nungdam tlem a zawngte chu Pu Rina te nen kan tâwm khâwm a. Mahse Pu Rina dâwt sawi leh phakarna tenawm tak ka hriat chhuah tâk miau avângin nizan thim thamah khân ka theih ang angin ka tlân chhuah san ta a ni." Zauva chuan thu dik chu a hrilh ta vek a.

Renga chu a bu nghat nghat a, "A nih chuan... Pu Liana thlam, cement in ah ngei chuan Sawmtea leh midangte pawhin min lo nghâk ngei dâwn a nih chu... Zothana nêna kan inṭhen darh hma khân chumi hmun ngei chu pan tûrin ruahmanna an lo siam lawk thlap tawh a ni ngei ang." a ti a. Tichuan, mipa pathum leh nula pakhat chu inthurualin, beiseina thar nen Pu Liana cement thlam lam pan tûr chuan theihpatawpa fîmkhur chungin an kal chhuak ho ta a ni.

***********************************************************

Ramhnuai pilril leh reh tlawk tlawk hnuaiah chuan Valtea, Pu Tea leh Muanpuia te chu thihna thla zâr hnuaiah theihpatawpa thâwm dîmin an inzui phei hnak hnak a. Boruak chu a uap churhin a pik hle a, hnah ro pakhat pal rîk ringawt pawh silai puak ang maia fiah a nih vângin an pên a muangin an fîmkhur hle a ni. 

Pu Tea phei chu a fapa, Fela chunga thil thleng ngaihtuahna nen a châu tawh takzet a, Valtea'n hliam tuar chungin tha thlah ngam lovin hma a hruai ve ṭâwk ṭâwk a. Chutia fîmkhur tâwpkhâwka hnim puk kâra an inhnawh luh lai tak chuan, an hma lawk hnim kâr aṭang chuan rûm ri chher hrâwk thâwm a rawn chhuak ta thut mai! 

An pathum chuan an ding khawng nghal lah a, phâwk hrâ in thâwm lo chhuahna lam chu an melh ṭhap a. Thâwk leh khatah, patling lian thelh thawlh, hri kaia inlet tawh ngei mai, a hmaia thisen hlui kâi lûai leh mitmeng sen râm mai hi an hma zâwnah tak chuan a rawn dâwk chhuak ta hlawl mai le!

Chu hri kai chuan chil phuan tla bawrh bawrh chungin rawn zuan a han tum nghal a. Mahse Muanpuia chu a lo inring hman hlauh. Rang lutukin a ulhbun kau sâ chu a lek kâng a, a theihpatawpa nâ in a hmet puak ta ṭhuai mai! Silai mu chuan hri kai lu ah tak chuan a dêng dâwp mai a, a leng lêt nghal tawp a, thâwm chhuah zui tawh miah lovin leiah a thal ta der a.

Ngaw pui reh takah chuan silai puak ri chu a khâwk chhuak rawih rawih a. Muanpuia chuan  thâwk la hawkin a ulhbun chu a han dah thla a, silai puak khu rum rum kârah chuan an him ta emaw tiin a thaw huai a. Mahse chu thlamuanna chuan second hnih pawh a daih lo. A hnung chiah, thing lian pui phên thim tham aṭang chuan hri kai dang, tlangval lian leh rorum zêt mai hi a rawn zuang chhuak ta thut mai! 

Muanpuia tan chuan inrin hman ngaihna rêng a awm lo, hnunglam aṭang chuan a rawn bawh tlu nghal dâwp a, lei chhuat ah chuan an lum dun ta nawk nawk a. "Muanpui!" tiin Valtea chu theihpatawpa ringin a au ṭhawt a. Pu Tea pawh mangangin a phili buai nghal hle mai a, chhan turin hmanraw ṭha neih a ni bawk si lo, an tlanchhiatna lamah an silai leh hmanraw dangte an thlauh bo vek tawh bawk si. 

Chu hri kai chuan Muanpuia chu a bawh bet ran mai a, Muanpuia'n a silai kâwma lo dan a tum ngial pawhin a theihna in a tlin dâwn lo tlat. Rilṭâm tih hriat lutukin chu ramsa kawlh, mithi tho leh chuan Muanpuia hrawkah tak chuan a seh ta bawrh bawrh mai le! Muanpuia nâ ti lutuk chu a ṭê chhuak nghal ṭhawt a.

Valtea chuan rilru fîm put a ngai tih a hria. Phîli buai vakin awmzia a nei lo tih hriain a mit a len ruai a, a piah lawka thing tang tliak, a hmawr zum hriam hmel tak chu a hmu fuh ta hlauh mai a. Va pan pheiin chu thing zum chu a va chhar nghal a. Hri kai in thisen tharlâm a dâwt bawrh bawrh lai tak chuan theihpatawpa chakin a tlan phei a, "Thlah rawh, Zawnga!" tih leh chu hri kai tukhumah, a lû ah tak chuan chu thing zum lian tak chuan theihpatawpa nâ in a vit tlum ta hrawk mai! 

Hri kai chu a zawi nghal hnawk a, Muanpuia chungah chuan a bawk thla zui ve ta nghal a. Theihpatawpa hmanhmawhin Valtea leh Pu Tea chuan hri kai ruang chu an theh sawn lawp a. Mahse an tlai tawh lutuk tlat. Muanpuia hrawk chu a lo thler dûai tawh a, a thisen lum chu a chik chhuak ṭhawt ṭhawt a, kut ngawta hup beh rual a ni tawh lo. 

Muanpuia chu nâ ti in a rawn khuh kharh kharh a, a kâ aṭangte chuan thisen a rawn baw chhuak hawk hawk a, a meng â ruai tawh a. "U Val... U Valte..." Muanpuia chuan a kâ aṭanga thisen rawn chhuak bawrh bawrh chung chuan harsa ti lutukin a rawn phun chhuak a. A mitmeng chu a chauvin beiseina a bo tawh takzet a ni. 

"Ka... ka dam chhuak dâwn lo... min that rawh... hri kaiah min inleh tîr suh..." tiin a theih ang tawka zâwi leh ngenngawl hian a rawn ti chhuak hram hram a. Ramsa nunrâwng tak anga a inlet ve mai tûr chuan thihna ai pawhin a ti nâ zâwk tih a hriat theih a ni. Pu Tea chu Muanpuia  dinhmun rapthlak tak chu thlîr ngam lovin a kâ a hup a, a sir lam hawiin a inhnît hlawp hlawp a.

Valtea mittui chu a biangah a rawn lûang ngiai ngiai a. Tlangval huaisen leh nungdam tûra a theihpatawpa an kal pui, an ṭhianpa ngei mai ramsa hlauhawm anga a rawn inlet ve thut tûr chu thlîr liam mai a ngam bîk lova, mahse ama kut ngeia a nunna a lak a ngai ta mai chu a nâ ngawih ngawih a ni. 

"Ka tihpalh ṭhianpa..." ti a inhnît feih feih chungin, Valtea chuan a thing tang hmawr zum  ken mek chu a han lek kang a. Muanpuia mit chhing riai riai aṭanga mittui rawn lûang chhuak chu lainat takin a melh a, taksa khûr dar dar chung chuan Muanpuia chhipah tak chuan a vit tlum ta pawk mai. Ngaw pui chhah tak hnuaiah chuan Pu Tea leh Valtea te chu rilru nat avangin an inhnit hlawp hlawp mai.

************************************************************************

Khawvâr êng mawi tak hnuaiah chuan Sawmtea, Zothana leh Muani te chu thâwm dîm leh fîmkhur takin Sihpui mual lam pan chuan an inzui thla hnak hnak a. Nizan thim tham leh hlauhawm kâra an tlan kual nasat luat vângin an chau tawh hle a, an thawmhnaw te chu thisen leh chirh diakin a bual bal vek tawh a. 

Chutih rualin, khua a rawn vâr a, nî a rawn tlângsân takah chuan an thlaphânna pawh tlêmin a ziaawm ve deuh a, an naute zawn chhuah tumin theihpatawp chhuahin hmalam an pan hrâm hrâm a ni. Chutia fîmkhur theihpatawpa ngaw pui hnuaia an pên lai tak chuan, an hma lawk kâwi, hnim pik tak kâr aṭang chuan thâwm a rawn ri ta thut mai! 

Zothana chuan a kut a phar chhuak nghal vut a, Sawmtea pawh a silai, mu khat chiah awm tawh chu inring taka hum chungin a rawn pên hma nghal a. Muani pawh theihpatawpa thâwm dîmin thing bul lian tak phênah a bîru nghal rawk rawk a. Hnim pik chu a rawn inkeu hawng a, chutah... mipa pakhat, chempui hriam tak lek kâng uaih chungin a rawn pên chhuak ta hlawl mai le! 

Mahse chupa chu hri kai a ni lo, Renga ngei a ni! A hnung chiahah chuan Hlimpuii chu hlauhthâwn hmel takin a rawn dâk chhuak ve nghal bawk a. Chutah, an hnung deuhah Zauva leh patling lian thelh thawlh, muzuk keng Pu Rova te chu an rawn inzui chhuak ve nghal bawk a.

"Lalpa leh..." Sawmtea chuan a silai chu thlahin a theh thla nghal hnawk a. A nau neihchhun, ramsa leh hri kai laka a chân tawh emaw a lo tih ngei mai chu a hmaah nungdamin a rawn lang leh ta! "Au Sawmte!" Hlimpuii chuan theihpatawpa ringin a rawn au chhuak ṭhawt a, a hlauhna leh a chauhna zawng zawng theihnghilh ṭhakin a u lam pan chuan a tlân phei nghal hlawk hlawk a. 

Sawmtea pawhin a farnu chu theihpatawpa nghetin a lo kuah vawng vawng a. Nizan zankhuaa a nau chan hlauva buai tlaivar thak Sawmtea meuh pawh chu a insûm zo tawh lo, a farnu samah chûlin a ṭap chhuak ta hawm hawm mai a. Renga chuan a chempui chu dahthla in, taksachau leh thlanin a bual huh vek chung chuan a rawn nui chhuak ve suk a. 

Sawmtea chu rawn hawi chhuakin Renga mitah tak chuan a rawn melh a, "Ka lawm e U Reng... ka nau him taka i lo awmpui avângin, ka theihnghilh ngai lo ang." Sawmtea chuan aw thâm ṭuak hian a han ti a. Renga pawh chuan a lu a lo bu ve nghat a, "Ka tih tur alawm, ka venghim dâwn ka tih kha..." a lo ti lêt ve sup a.

Chutih lai chuan Zothana pawh chu mak tiin a rawn meng fiah ve kâwk a. "Zauva? Phulvar khua atang khan i damchhuak ve a maw?!" tiin a rawn pên hnai a. Zauva pawh chuan Zothana hmel a hmu chu beiseina thar hmu ang maiin a hlimin a thaw deuh huai a. Zauva leh Zothana hi khaw hran ve ve mah nise, an lo inhmelhriat sa a ni ngei ang.

"Aw U Zothan, nangni pawh in him chu a lawmawm e. Pu Rina dâwt sawi leh phakarna tenawm lutuk vângin nizan thimtham ah khân ka rawn tlân chhuakhsan a nih hi." tiin thil awmdan chu tâwi fel takin a lo hrilh zung zung a. An inhmukhawm leh chu an hlim in an inkuah vawng vawng hlawm a, Muani pawh Hlimpuii bulah rawn kalin an inkuah a.

 Mahse chu hlimna chuan rei a daih lo. Khawvâr êng hnuaiah chuan an inchhiar a, tûnah hian pasarih chauh an ni tih an inhre chhuak ta. Ngaw pui reh ruih mai chu an thlîr a, an hmelah hlauhthâwnna thar a rawn lang chhuak leh ta. "Khawiah nge midang?" Renga chuan a rawn zawt ta phawng mai a. 

"Khawnge Siama te, Valtea leh Muanpuia te? Chuan Pu Tea leh a fapa Fela te kha, engtin nge an awm tâk?" tiin an kim lo tih a hriat rual chuan a rawn sawi chhuak nghal a. Zothana hmel hlim ve deuh tawh chu a rawn inthlâk leh riai riai a, beidawnna leh natnain a rawn thlâk leh nghal a. 

"Nimin tlaia kan buai nuai nuai hnu khan kan kal darh hlawm a, ka naute panga an thi bawk. Thimtham kârah theih ang angin kan tlân darh nûai a... kha bak kha chu ka naute,\ leh in ṭhiante kha ka hmu leh tawh miah lo." tiin inthiam lo tak chung chuan a chhang a. Sawmtea pawh chuan a lu a lo bu ve nghat a, "Khâm lamah pawh lum thla an awm in ka hria, a thim em a, theih chin chinah kan kal hrang ta nuai a nih hi" a lo ti thâm ve ṭuak bawk a.

Boruak chu a reh leh ta tlawk tlawk a. An inhmukhawm hlimna chu hlauhthâwnna lian zâwkin a rawn hliah leh ta mup mai. Zothana chuan thâwk a han la hawk a, hruaitu a nihna ang in puitling taka a awm a ngai tih a hria, "Heta kan din reng chuan awmzia a awm dawn lo. Pu Liana cement thlam lam pan chuan theihpatawpa chakin kan kal tûr a ni. Kan ṭhiante nungdam an la awm a nih chuan, chulam chu an rawn pan ve ngei dâwn tih a chiang. Pu Rina'n thlam a lo luah a nih pawhin, kan tlâwm dâwn lova, kan ṭhiante himna tûr chuan eng pawh tawk ila kan laksak mai tûr a ni." a ti ta charh charh a. Zothana thuthlukna nghet tak avâng chuan an vai chuan an insang mar a, himna tûr zawngin hmalam panin an pên chhuak ho leh ta a ni.

****************************************************************

Nî a rawn sâng a, khawvawt lutuk pawh tlêmin a rawn ziaawm chho ve ṭan a. Hriata leh Fela te chu theihpatawpa fîmkhur leh thâwm dîmin ngaw pui kârah chuan an inzui chho hnak hnak a. Nizan aṭanga hah leh hlau ngawih ngawiha an rawn tlân tlang avângin naupang tân phei chuan a chauh thlâk tawh hle ta ve ang. 

Mahse tlâng mual pakhat, thing lian pui pui kâr aṭanga an han dâk chhuak chu, an piah tlâng pâng hnim puk deuh phênah chuan Pu Liana cement thlam lian tak, inchung rangva, ni ina a chhun tlet sar sar mai chu a rawn lang ta va va mai le! Chu in an hmuh rual chuan, an thlaphânna leh an chauh zia zawng zawngte chu an theihnghilh ṭhak hial a. 

Hriata chuan thawveng takin thâwk a han la hawk a. "Saw le Bawiha... kan thleng ṭêp tawh e. U Zothana sawi himna hmun tur chu saw ngei saw a ni." tiin nui hmel pu sang in Fela chu a hrilh a. Fela pawh chuan a mitmengah beiseina thar a rawn lang a, a pa pawh himin chu inah chuan a lo awm tawh ngei ringin beiseina sang tak nen a khi ve suk mai.

Chutia tlâng aṭanga an chhuk thla, theihpatawpa thâwm neih loh tuma hnim kâr an pal liam lai tak chuan, an hma lawk hnim pik mup mai aṭang chuan hnah ro rap ri hruap hruap hi an hre ta thut mai! Hriata chuan rang lutukin Fela banah a man chawt a, a pawt ding nghal a. A silai chu hûm nghet in, thâwm lo chhuahna lam chu mit khap lêk lovin a tin nghal rân a.

Hnim chu a rawn inkeu hawng a, thâwk leh khatah... mipa pahnih chau hmel lutuk hi an rawn pên chhuak ta hlawl mai le! Pakhat chu tlangval, a nâk hliam dâwm meuhva kun deuh chhal a ni a, pakhat zâwk chu patling upa lam tawh, thlaphâng leh sam hnawk nûai mai hi a ni. Hriata chuan chu mi te pahnih a hmuh chuan a silai chu dahthla nghal ruai ruai in, "Lalpa leh... Pu Te... U Valte..." a ti chhuak hlawl mai a.

Chu aw hriat a hriat rual chuan Pu Tea chu phâwk hrâ in a rawn hawi chhuak nghal vut a. A mitmenga beidawnna leh natna thûk tak awm kha second khat lek chhungin mak tihna leh lawmna mittui in a rawn thlâk nghal a. "Fela! Ka fapa!" tiin theihpatawpa ringin aw khûr dar dar, mahse hlimna in a pawlh si hian a rawn au chhuak ta ṭhawt a. 

Fela pawh chuan a pa a hmu thut chu a tlân phei nghal a, "Ka pa!" tiin mipa naupang tuar chhel tak angin lang mah se, tunah chuan a insûm zo tawh bîk lo, a pa âwmah chuan bawk thlawpin a ṭap chhuak ta hawm hawm a. Pu Tea chuan a fapa, nizan aṭanga a ngaihtuah em em leh, a thi tawh ngeia a lo ngaih chu a theihpatawpa nghetin a kuah vawng vawng a. 

A biangah mittui lûang nghal zung zung chungin a fapa chalah chuan a fawp vawng vawng a, a ṭap khûr ve ta tlawk tlawk mai. Hetiang hri kai riltam leh thihna nunrâwngin a hual vel ramhnuaiah pawh hian, pafa inhmu let leh te hlimna tap thawm aia mawi a awm kher dâwn em ni? 

Hriata leh Valtea te ngei pawh chuan lainat leh lungchhe takin an pafa inkuah chu an thlîr vawng vawng a. Hriata chuan a theih tawp chhuaha he naupang a humhim theih avângin Pathian hnenah lawmthu a sawi mawlh mawlh bawk a. Rei fê an inkuah hnu chuan, Fela chu a rawn dak chhuak a. 

A pa hmel chu nui sen sen chungin a en a, chumi hnuah a mit a len kual a, kim lo an awm tih a hrethiam nghal mai. "Ka pa... khawiah nge U Muanpuia?" tiin a zawt ta phawng mai a. Chu zawhna tawi tê chu, nizan aṭanga mithi tho leh ho tlân chhiatsan a, hmalam pan ho tlangval pahnih leh patling pakhat tan chuan chemhriama vih sawk ang maia nâ leh hriat hrehawm a ni ngei ang. 

Pu Tea chuan a fapa zawhna chu chhang thei lovin a kun ngal a, a inhnît zui nghal hlawp hlawp a. Fela pawh chuan thil ṭha lo tak a thleng tih hrethiamin hlauhthâwn hmel tak hian Valtea chu a va melh a. Valtea hmel thlan fîmin a bual huh hnap chu a rawn dâng ta lap a. A theihpatawpa chhanchhuah a tum ṭhin a ṭhianpa Muanpuia, hri kai hovin a vun an seh thler hawk hawk laia a thisen chhuah nasat zia te, a tawp bera amah Muanpuia ngeiin 'min that rawh' tia a ngen lai te kha a mitthlaah a rawn lang leh uar uar a. 

Valtea chuan hreh tak chungin, theihpatawpa a mittui dâng lêt hrâm hrâm chung chuan aw thâm ṭuak hian, "Muanpuia chu... kan chhan hman ta lo a ni, Fela. Kan rawn kal lamah khân, hri kai kan tâwk thut a... an seh ta a ni. Ramhuai a rawn inlet ve tur a duh loh lutuk vângin... hreh tak chungin ka chawlh hahdam tir ta a ni." tiin thudik râpthlâk tak chu a hrilh ta a.

Chu thu a hriat meuh chuan Fela chu a phu deuh zawk a, a hmel chu a ngui nghal rawih rawih a. Pu Tea pawh chuan inhnît hlap hlap chungin a fapa chu a bânah a kâi nghet sauh sauh a. Hriata chuan thâwk a han la hawk a, Valtea dârah chuan va dâwmin, "Tlangval huaisen a ni. Khang ramhuai anga a chan ve ai chuan, mizo mipa diktak a nihna anga kalsan a thlang zawk a nih dawn chu... i thil tih kha a dik a ni." tiin theih ang tawkin a hnêm ve bawk a.

Thihna leh natnain tuam mek mah se, Hriata chuan theihpatawpa fuih phûr a ngai tih a hria. "Heta indawm kun reng hman kan ni lo. Pu Rina leh a pawlte, leh hri kai dang tam tak lakah fîmkhur kan ngai a nia. Pu Liana cement thlam saw kan hma lawkah sawn a awm tawh a, theihpatawpa chakin pan vat ang u. U Zothana leh midangte pawh nungdama an awm a nih phawt chuan, saw thlam saw an rawn pan ve ngei ang." a ti ta charh charh a.

Valtea leh Pu Tea te pawh chuan Hriata thusawi chu dik an ti in, mipa puitling tih takah beiseina thar nen an lu an bu nghat nghat a. Muanpuia thihna in tina viau mah se, hun liam tawh chu an kohlet theih tawh loh ang bawkin, nungdam zel tur chuan hma lam an pan zel a ngai. Tichuan, thâwm dîm takin, pafa inhmukhawm te leh tlangval huaisen pahnih te chu beiseina thar nen Pu Liana cement thlam lam pan chuan an pên chhuak ho ta ṭham ṭham a. 

***************************************************************    

Ngaw pui pilril leh thim chhah mup hnuaiah chuan, thlaphânna leh natnain a tuam hlup hlup kârah Siama leh Awmpuia te chu an theih ang tawkin hmalam panin an pên ve hrâm hrâm a. Awmpuia hliam chu a nâ tulh tulh a, Luna nen an insualna vânga a nâk hliam pem aṭanga thisen chhuak pawh a la reh hleithei lova, an sulhnu ah chuan thisen tharlâm tak a far thla fep fep zêl a ni. 

A taksa chu a khûr dar dar a, thâwk a la hlawp hlawp a, pên khat lek pên tûr pawhin a theihna zawng zawng sâwm khâwm a ngai tawh hial a ni. A bulah chuan tlangval huaisen leh rinawm tak Siama'n a theihpatawpin a lo dâwl ve hrâm hrâm a. Siama hi sawisêlbo a ni bîk lo, a bân dinglam a bul tawh a, kut vei lam chauh nei a ni a. 

Kut pakhat chauh neih chu hrehawm tiin a insit phah hauh lo nain, tûnah tak hi chuan a ṭhianpa, a unaupa ang maia a en, hliam tuar mêk dâwm kâng tûrin kut pakhat chauh a nei chu tih theih a neih tlêm zia a inhriatna chuan a ti beidawng thlâwt a ni. A kut vei lam ṭha neihchhun chuan Awmpuia kâwngah a kuah, theihpatawp chhuahin a kal pui hnak hnak a.

Chutia chau leh beidawng taka an kal mêk lai chuan, an hma lawk hnim pik mup kâr aṭang chuan thâwm râpthlâk tak, hnah ro inpal ri sawk sawk leh mihring rûm hrâwk hrâwk ri hi a rawn chhuak ta thut mai! Siama chu a ding nghal chawt a, Awmpuia pawh rawn dâk chhuak ṭâwk ṭâwkin an hma lam chu a melh ran a. 

Thâwk leh khatah, an piah lawk thing lian pui phên aṭang chuan hri kai pathum ngawt mai hi chil phuan tla bawrh bawrh leh mitmeng vâl kuau hian an rawn dâwk chhuak ta hlawl mai le! Awmpuia thisen rim tharlâm tak hria in an rawn umzui a nih hmel hle. An hmai ah te chuan thisen hlui a ro kâi nûai a, an inhrosa ri te chu a tihbaiawmin a rapawm takzet a ni.

Siama chuan insasengna hun a awm lo tih a hria. "Awmpui, helai thing bulah hian lo awm rawh... theihpatawpin thâwm dîm ang che." tiin hmanhmawh takin Awmpuia chu a nam phei  nghal rawk rawk a. A kiangah chempui lian leh hriam ṭha tak a dah chu a kut vei lam awmchhun chuan theihpatawpa nghetin a hûm chhuak nghal vut a. 

Mipa a ni a, Mizo pasaltha hluite thisen kâi a nihna chu he ngaw pui thim hnuaiah hian a lan chhuah tir a ngai ta. Kut dinglam nei tawh lo mah se, a theihna awmchhun sâwm khâwmin thihna a hmachhawn dawn a ni. Hri kai rawn tlan hmasa ber chu tlangval sa ṭha nelh nawlh, a kawr hâk pawh thlêr nûai tawh hi a ni a. 

Siama nghawng seh tumin theihpatawpa chakin a rawn zuang phei nghal ta mai! Siama chu lo kun hniam hman hlauhin, a kut vei lama a chempui hûm ngei mai chuan theihpatawpa nâ in chu hri kai âwmah tak chuan a lo sât ri nghal pawp mai a! Hri kai ruh tliak thâwm a ri rawk a, thisen a chik nghal ṭhawt a. 

Mahse mithi tho leh, nâ hre lo a nih miau avângin rawn thawh leh nghal tumin a rawn rûm chhuak hrâwk a, chumi rual chiah chuan Siama chuan theihpatawpa ngheta a chempui vuanin a tûkkhum zâwnah theihpatawpa nâ in a sât zui leh nghal ta siah a! Hri kai chu rûm  pawh rûm zui tawh lovin a thal ta der mai a.

Mahse hahdamna hun pawh a la awm lo.Chu mi rual chiah chuan hmeichhe hri kai pakhat, a sam phelh phung leh rapawm zet hian a rawn zuan ve nghal a. Siama chuan a kut vei lam chuan lo vai leh a tum a, mahse chem chu a thlauh palh tlat. Mahse lo indanna tur kut dinglam a neih tawh miau tawh loh avângin a lo inring hman ta lo. 

Hri kai nu chuan a rawn bawh tlu nghal dâwp a, chirh diak zîngah chuan an inbawh let ta tual tual mai. Hri kai nu in Siama seh tumin a chil phuan nen a rawn hap thuak thuak ṭhîn a, Siama chuan  a theih ang angin a lo nêk kîr ve hrâm hrâm a. Harsa ti lutuk leh thlan fîma bual huh vek chung chuan a theihpatawp chhuahin a kut vei lamin chemte chu chhar leh thei hlauhvin hri kai nu hrawkah tak chuan a vit tlum ta pawk a. 

Thisen lum rawn baw chhuak ṭhawt kârah chuan hri kai nu chu a vial ngawih ngawih a. Siama chu thaw hlawp hlawp chungin harsa ti tak chung in a rawn inbeng kâng a. A tha zawng zawng  sêngin a rawn tho chhuak leh tawk tawk a, a lû te chu a hai mup mup tawh a. Mahse, a khaw hmuh fiah lo ruai kârah chuan... a thil hmuh a vang chuan a phu ta zawk mai! 

Hri kai pathumna, pa lian leh sa ṭha thelh thawlh tak mai chu, amah a rawn pan ve leh dâwn emaw a tih laiin, Siama chu kal kân in Awmpuia, tha rêng nei tawh lova lei a let hlawm reng lam chu a pan ta tlat mai! Thisen rimin a hip miau a ni ngei ang. Awmpuia chuan hri kai rawn hnai mek chu tlân chhiatsan ngaihna a hre lova, hlauin a khûr zawih zawih a, a hmai a lo hup tawp ringawt.

"NILO! Kal bo rawh, Hmela!" Siama chu theih tawpa ring hian a au vak ringawt a. A theihna tlêm te chu awm sâwm khâwmin, ngaihtuahna fim hman hun a awm tawh lo tih hriain a tlân phei a. Hri kai in Awmpuia hrawk a seh dawn chiah tih ah chuan Siama chu a va thleng phei a, a va bawh tlu nghal rawp mai!

An lian dun bawk a, lei chhuat ah chuan an thum thla dâwp a. Mahse pawi ta ber chu, leia an inbawh tlak rual chiah khân hri kai chuan a zuantu Siama chu rawn leh hawi thutin, Siama dârah tak chuan a seh fu ta tlat mai le! Siama chu nâ tiin a ṭê chhuak nghal ṭhawt a, a nghawng vel aṭang chuan thisen lum a chik chhuak nghal ṭhawt ṭhawt a. 

Mahse thâwk a thlah hma ngeia a ṭhianpa a chhan a ngai tih hriain a kut vei lam chuan a chemte nghet taka hûm in hri kai tukkhumah tak chuan theihpatawpa nâ in a vit lût ta hrâwk a! Hri kai chu a rûm chhuak hrawih a, a zawi nghal hnawk a. Siama chu thisen chhuah hnem lûatah tuar zo tawh lovin hri kai ruang sirah chuan Awmpuia bul hnai tê ah chuan a bawk ve nghal hnawk a. 

A nghawng aṭang chuan thisen a rawn baw chhuak zung zung a, kut pakhat chauha a dâwm a ngaih miau avângin dan theih rual a ni lo. Awmpuia, tha rêng nei lova let reng chuan khur hlawk hlawk chungin thil thleng chu a hmu vek a. Siama bulah chuan a rawn tawlh phei hrawk hrawk a. 

"Siam... nilo... Siam!" tiin ṭap chhuak hlawp hlawp chungin a ṭhianpa, thisen kâi hnuanga let reng chu a dawm a. "Engati nge... engati nge khatia i tih... min kalsan mai tur a nia..." Awmpuia chuan inthiam lo tak chung chuan a ti vawng vawng a. Siama chu a theih ang tawkin a rawn hawi chhuak a. 

Nâ tawrh vanga theihpatawpa a rawn khuh chhuah hrawih hrawih in a ka a tang chuan thisen a per chhuak ṭhawt ṭhawt a. Mahse a ṭhianpa hlauthâwng taka inhnît hlawp hlawp a hmuh chuan, a theih tawp chhuahin a rawn nui lui sak a. A kut vei lam thisen kai nûai chuan Awmpuia kut chu a dâwm a.

"Ka... ka tiam tawh che kha... ṭhianpa," Siama aw chu a ri chhuak tawk tawk a ni ber mai. "Kut... kut pakhat chauh pawh nei ila... ka thlah dâwn lo che ka tih kha... Hliam ka neih vângin... min hnutchhiah ngai lova... tûnah chuan ka hun tawp a thleng ve ta, Awmpui, kan thiante kha va zawng la, va chhanchhuak ngei ang che." tiin theihpatawpa harsa hian a rawn ti chhuak hrawih hrawih a.

Awmpuia chu naupang chhia ang maiin a insûm zo lo, a ṭap khûr tlawk tlawk a. "Ka lawm e Siama... ka lawm e." tiin Siama kut chu a hûm vawng vawng a. Siama chuan vawi khat thâwk a han la leh kâwk a, a theihna in a tlin tawh thlâwt lo. Mizo mipa, tlangval huaisen leh rinawmna tak chuan a thianpa kut chu a hmer na zual sauh va, a mitmeng fiah leh huaisen tak ṭhin chu a rawn chhing riai riai mai. Awmpuia mit hmuh ngeiah Siama chuan a thâwk chu a thlah ve ta a ni. Ngaw pui chhah tak hnuaiah chuan Awmpuia ṭap hlawp hlawp ri chu a khawk ruah ruah mai.

************************************************************

END OF SEASON 2