SICHANGNEII : THE GUARDIAN ANGEL (Mizo Fiction Story) Written by : Aaron Malsawmdawngzuala Chapter - 4

 SICHANGNEII : THE GUARDIAN ANGEL

(Mizo Fiction Story)

Written by : Aaron Malsawmdawngzuala

Chapter - 4

******************

Zan a lo ni a, inkawtah chuan Alice-i leh Benate pafa chuan mei an chhem a, an hlim tlang kher mai. Bena chuan a Alice-i chu a han en vang vang a, a mitthla ah a nupui Mamuani a lo lang zawk mai. A lung a leng nghal em em a, "La dam se chuan tiang hian Tluangtea nen, kan chhungkaw thumin hlim takin kan awm ho tur a nia." tiin a rilru chuan a inbe mawlh mawlh a.

Tluangtea leh Alice-i chu an infiam dun nasa mai a, Tluangtea pawh chuan nuam a ti ngang mai. Alice-i chu a nelin a kawm ngeih em em a, chutiang bawkin Alice-i chuan Tluangtea pawh chu a duat ve hle bawk. Chutia nufa ang maia an han infiam vel chu Bena chuan hmuhnawm a ti ngang mai, thingpui chu a in zova.

Ketli an chhawp chu a zu ban a, mahse thingpui a lo awm tawh hauh lo. "Ehe a lo zo daih tawh a nih hi.." tih pah chuan ketli chu leiah chuan a dah thla leh a. Thawk deuh huai pah chuan, "Ka la kham lo asin le.." a ti nuah nuah mai. Alice-i chu a rawn hawi a, "Engmaw i kham loh?" tiin a rawn zawt a.

"Thingpui hi mawle..a lo awm tawh miah lo ketli ah hian. Ka la kham chiah lo asin mawle, ka lum peih tawh bawk silova." tiin Bena chuan a lo chhang a. Alice-i chuan ketli chu a zu en vang vang a, "A khat vek khu..a la tam alawm." a lo ti sam et mai. Bena chu a khi suk a, "A awm tawh lo, nichin lawk pawh khan ka zu en alawm." tiin a lo chhang a.

Alice-i chuan ngaihsam hmel zet hian, "Ketli khu zu khai leh chhin la, a ruak nge ruak lo i hre mai ang." a lo ti sam leh et mai. BEna chuan a chhang tawh lem lo, mak ti angreng tak chung chuan ketli chu a zuk khai leh chhin a. Mak tak maiin a lo rit nulh mai, "Ahh.." a ti deuh thut a, Tluangtea chu a lo la nui zui.

Bena chuan Alice-i chu a en hu a, "Nangma tih em ni?" a ti deuh hu mai. Alice-i chu a nui har har a, "Engmah ka tih loh kha...a zo amaw i ti mai mai a nih kha, i ngaihtuah chian loh vang a nih kha." tiin a han fiam zui nghal a. Bena chuan a chhang zui ta lo, a no ruakah chuan ketli-a thingpui chu a han thli chhuak a.

A han in chhin a, a maimitchhing vang vang mai. "Eheu, ava tui ngai ve le...eng thingpui nge, ahma a mi nen khan a in ang tawh lo." a ti nghal chiam chiam mai a. Alice-i lah a nuih a lo za tulh tulh mai, "Vanram thingpui em ni?" BEna chuan ala ti ta deuh deuh a, Alice-i chu a nui tawp hleithei lo.

Chutah BEna chu a ding deuh thut a, "Alice, ding lawk teh." a han ti nghal chung chung a. Alice-i pawh chu a ding ve mai a, "Enge i tih dawn?" tiin a lo zawt a. Bena chuan a han en vang vang a, "Enge thildang i tih theih? Khawi maw..han show teh." a ti nghal chung chung mai. Alice-i chu a nui huk a, "Engtin vak nge ka show anga?" a lo ti hu mai a.

"KA hre lo, ihh...heim magic shoe ang deuh hian..." tiin Bena chuan a chhang leh a. Alice-i chu a ngawi vang vang a, a han hawi kuala . Tluangtea bulah chuan va kalin, "Enge i duh? Eng toys nge i duh ber?" tiin a zawt a. Rang lutukin Tluangtea chuan, "Cycle..cycle...a rawn sen." a lo ti nghal vat a.

Alice-i chu a nui sak a, "Sawlaia mi saw mi i sawi?" tiin in bula cycle thar hlak, a rawn sen ngei mai lo inhung chu a va kawk a. Tluangtea chu ava hawi phei a, "Yesss..cycle." tiin a tlan phei nghal. BEna pawh chuan mak a ti kher mai, "A hma khan a awm miah silova..." a ti nuah nuah ringawt a.

"Nia, i thiltihtheihna show rawh i tia. Kha..tikhan ka show a nih kha. Ka tan i pawimawh a, chutiang bawkin i fapa pawh ka tan a pawimawh. Khawvela ka rawn chhuk tirh atanga min buaipuitute in ni a, ka thiantha tak in ni bawk. Chuvang chuan nangni venhim hi ka hna a ni a, in duh tihsak che u pawh ka hna a ni." tiin Alice-i chuan a chhang a.

Bena chu  a khi suk a, "Kan mamawh tawk chu kan nei ve chuan ka hria, ka duh awmchhun chu kan bulah hian awm ve reng la ka duh  ani. A bak hausakna, thil ropui leh man to engmah ka duh lo." tiin a chhang a. Alice-i hmel chu a ngui ta bar mai, "Ka thei lo...he khawvela cheng tura lo kal ka ni lo." a ti zawi sap mai.

Bena chuan lungawiloh hmel tak hian, "Engvangin..he khawvel venghim tura lo kal i ni lawm ni?" tiin a zawt let nghal a. Alice-i chuan ava pan hnai a, "Bena chutiang a ni lo, he khawvel chhanhim tur chuan mihringte in awm alawm, chuvanga Pathian siam in ni. Keichu kan Lalpa Pu Vana kawrkilh la tur chauh va lo kal ka ni a, ka let leh thuai angai." tiin a kutah chuan a vuan a.

Bena chuan a lo paih thlak sak a, "Nilo Alice, tinge chutiang tur chauh va i lo kal. Vantirhkoh i ni lawm ni..ka duh min pe ang i tih kha.." tiin a thinrim ta lek lek mai. "Vantirhkoh ka nih vang reng chuan alawm i bulah ka awm theih loh, keichu helai hmun hi ka chenna tur a ni lo. Vanchung nula ka ni a, ka tan chuan van khi ka in a ni." Alice-i chuan a ti dam diai a.

Mahse BEna chuan a chhang lo, "Bena..hrethiam rawh. Tunah khan i awmdan ka hria, engkim i ngaihtuahna ka hre vek. Min hmangaih a ni tiraw?" tiin Alice-i bawk chuan a zawt a. Bena chuan a zep thei ta ngang lo, "Aw...a chhan chu Mamuani kha he leia mihring hian an tluk zo lo, tu hmeichhia mah tluk zawh rual a ni lo. Vantirhkoh chauh lo chuan, vantirhkoh i ni a..i hmelah hian a hmel ka hmu thei a ni." tiin a chhang ta nge nge a.

Alice-i chu a han ngawi vang vang a, "Bena, mihring chuan mihring bawk a hmangaih tur a ni. Lei leh van siamtu chung Pathian leh a fapa Lal Isua Krista, i mihringpuite leh he leia thil nungte chauh i i hmangaih turte chu an ni. Vantirhkoh i hmangaih tel a thiang lo, hriatthiam tum rawh." tiin a hnem hram hram a.

Bena chuan a lu a thing a, "Aih...ka pawm lo. Alice, ka hmangaih che." a ti tlat mai a, a mittui pawh a tla phung tawh. Alice-i hmel pawh chu a ngui takzet, "Bena, Alice-i hi ka hming tak tak pawh a ni lo. Ka hming diktak chu Lailah a ni a, paradise angel te zinga naupang ber ka ni." tiin a chhang leh a.

Bena chu a ngawi leh vang vang a, a mittui chu a hru a. Za lo tih hriat tak hian a nui khi suk a, "Ni e, ka tisual a ni. Ka tihpalh, ka dik lo hulhual. Engmah min pek a ngai lovang, ka fapa cycle i leisak tawh a, a tawk tawh e." a ti deuh ta hmuk hmuk mai. "Bena..khati khan awm suh, i feelings ka thlak danglam duh lo ania." Alice-i chuan a lo ti ve leh a.

MAhse BEna chuan a lu thingin, "Nilo..engtin mah ka awm lo. Ka tha alawm, tumah...tuma bulah ka sawi lovang. Lungngai suh...ka zep ang. Chuan naktukah chuan kawrkilh zawng chuan i chhuak tawh dawnnia." a han ti leh zung zung a. A fapa Tluangtea chu ava en a, ani lah nuam  alo la ti nasa mai.

Cycle chu khalhin an inkawt velah chuan a lo la tlan kual vak vak a, Bena chu a nui suk mai. Alice-i chu ava en a, "Tluangtea saw chuan a ngai ngawt ang che, a tap nasa ngawt ang." a han ti zawi sap a. Alice-i chuan Bena mitah tak chuan a en a, "Anih nangin min ngai ve dawn lo em ni?" tiin a zawt ve ta thut mai.

Bena pawh chu a ngawi hmak a, sawi tur pawh a hre lo. "Bena..hrethiam turin ka duh che.." Alice-i tawng zawh hma hma chuan Bena chuan  alo pawt chat nghal vat a, "Mu tawh ila, naktuk hna kal a ngai awm sia." tiin a kalsan nghal daih. Alice-i chu a ding ngawi reng a, Bena chu a enzui vawng vawng mai.

Bena chuan a fapa chu ava pan a, "Hawh le..mu phawt ang. Nangpawh naktuk sikul i kal a ngaih kha...dah tawh rawh le." a han ti a. Thu awih takin Tluangtea pawh chuan a dah ve mai a, inchhung an luh dawn chuan TLuangtea chu a ding a. Hnunglam hawiin, "Pa, Anu Alice-i saw?" tiin ava kawk a.

"Nakinah a lo lut ve mai ang." tiin Bena chuan a chhang a. Tluangtea lah chuan, "A thlawk bo ange, Sichangneii a nih saw.." a lo la ti zui a. "Thlawk bo dawn lo, lut rawh le." tiin a luh luih pui a. Alice-i erawh ala ding reng a, a inthiam loh hmel kher mai. Bena te in chu a en ngawih ngawih a, a mittui a rawn tla hial mai.

*****************************

Bena te in atanga hla ve tak, ral khat thingkung hmun thim lai atang chuan Jenet-i chuan thingkung pakhat phen atangin a lo thlir reng mai. "Umm...saw ngei saw maw Lailah chu, ka vawikhat hmuhna a la ni lo zui. Umm..a tha e, a nuam dawn e." tiin  alu a bu nghat nghat mai. Chutia amah leh amah a inbiak mual mual lai chuan a hnung lamah chuan thawm a hria a, rang takin ava hawi phei nghal.

A rawn lang chiang chu tudang nilovin Dustin Malsawmzuala a lo ni a, "Helai hmun berkher, tun ang zan rei dawn tawh ah." tiin a rawn phun phei nuah nuah mai. "Bengchheng suh, saw en rawh...sawnu saw i hmu em?" tiin Jenet-i chuan ava kawk a. Dustin-a chuan a han en a, "Hmm...a awm hla e, i hmu pha bik dawn mi?" a lo ti hmuk mai.

Jenet-i chu a thaw hak a, "Khawi i mit ka lo dawi fiah ang." tiin Dustin-a mit chu khawih a tum ta mai a. Dustin-a chu lo indangin, "Nilo nilo, hehe..Pi Onos..ka intum ve alawm." tiin a coat chhung lam chu a zen a, enlenna (binocular) hi a rawn phawrh chhuak a. Intihtheih hmel tak hian Jenet-i chu a han siai zeuh va, Jenet-i chuan a lo ei vak lo ni tur a ni.

Rum zet hian a melh a, "Hmela leh...hrehmun lal fanu hi min siai ngam animaw? Tunah hian ka duh chuan i thluak kha khawih miah lovin ka ti puak darh vek thei tih hre rawh, tikhan mihring ang lekah min ngai reng reng suh." tiin a vin khur khur mai a, a mitmeng chu a rawn sen eng vut leh ta nghal a.

Dustin-a chu nui vur vur chung chuan, "Sorry..Soryy, Jenet..vantirhkoh hmai sawh zawnga tla ho zingah chuan i thinchhe ber ang, sorry sorry.." a lo la ti hram a. Jenet-i chuan a melh rum kher mai, mahse zawi zawi chuan a mitmeng sen chu a reh tial tial a, mirhing pangngai mitmeng a rawn ni leh ta a.

Dustin-a chuan a enlenna hmang chuan a han en a, Alice-i hmel chu chiang takin ava hmu thei ta. A nui var var a, "Ummka hmu tawh. Ka hria, vawiin inkhawm ban khan ka hmu." a han ti a. Jenet-i chuan mak tih hmel tak hian, "I hmu maw? Chuan i bia em?" tiin a lo zawt a. "Aih be lo, a bialpa nen amawni an kal a, mipa naupang pakhat nen." tiin Dustin-a chuan a lo chhang a.

Jenet-i chu a nui sak a, "Chu mipa naupang pakhat leh a bialpa amaw i tih te kha pafa an ni a, tun lawk khan inchhungah an lut chiah. Thil awmzia ka man thiam nghal vek, an tawng ri pawh ka ngaithla vek alawm." a han ti a. Dustin-a chuan Jenet-i chu a en deuh hu a, "Ehe..khawi atangin nge i ngaihthlak a?" tiin a han zawt daih a.

"Aw....hetah hian ka awm."

"E..nichina an titi chuan an rawn kal hnai tihna ami?"

"Kal hnai lo...kal hnai lo."

"Anih khawi laiah nge an titi?"

"Saw..tuna Lailah-i dinna ah sawn."

"Ehee..engtin nge i hriat phak a?"

"Huiham..ka beng dar ka va dah."

"I va dah tak tak maw?"

Jenet-i chuan a tin hial a, "Mawla, angel ve tho ka nih hi...ani ai sawn ka chak zawk bawk. An thusawi heta tanga lo ngaihthlak te chu ka theih loh i ring em ni, Mawla?" tiin a vin hrep mai. Dustin-a chu a tum deuh hmuk a, "Aww aw..anih chu. Thinchhe lutuk, anih enge an sawi?" tiin  a zawt leh a.

An thilsawi te chu Jenet-i chuan Dustin-a chu a hrilh fai ta vek a, Dustin-a pawh chuan a lu a bu nghat nghat mai. A aw a han thian kharh kharh a, "Ka hmuh tirh khan ka hmu ngai lo ka ti reng a..ka vawi hnih hmuhna chiah tunah hian.." tiin a han khi suk a. "Keipawh ka vawikhat hmuhna a ni lo." Jenet-i chuan a lo ti ve nghal a.

Dustin-a chuan a han en leh hu a, "Animaw? Khawnge i hmuh ve tawh a?" tiin a han zawt leh a. Jenet-i chuan ngei hmel tak hian a melh a, "I hriat ve zel angai lo...enge i thil tum chu min hrilh vat rawh." a lo ti hlur mai. Dustin-a pawh a nui huk ringawt, "Awle awle...Bena saw ka lo belchiang ang. Chuan saw Sichangneii saw chu keimah ngei hian ka kidnap anga, i hnen ka rawn thlen pui ang." tiin a chhang a.

Mak tih hmel deuh huan Jenet-i chuan, "Enga? Sichangneii a? Tu chu maw?" tiin a zawt hu mai. "Aa..Sichangneii chu mizo thawnthu a vantirhkoh ania...ihh, pa pakhat hian.." a tih lai chuan Jenet-i chuan vin lek lek hian, "AW a tawk..thawnthu sawi angai lo. Chuan engtin zel, "Saw vantirhkoh thiltihtheihna tam tak nei saw nang mihring satliah khan i kidnap ang maw?" tiin hmuhsit hmel tak chuan a han nuih sak kher a.

Mahse Dustin-a hmelah chuan zamna chhete mah a awm lo, "Vantirhkoh a ni maithei, mahse kei chu mihring ni mah ila, mi engzat nge ka bum tawh a, engzat nge ka thah tawh a, engthil nge ka paltlang i hre lo thung alawm. Hremhmunah kan thiltihsualte an lo chhinchhiah ve thin a nih chuan duh leh Satana zu zawt rawh." a lo ti ve hmak mai.

Jenet-i chuan a ngaihnep hmel takzet, "Awle, kan hria ang chu. Ka ring ang che, police zawn lai chu ni lo ila chuan keimah pawn ka ti thei, ka mamawh lo che. Mahse khawvelah buaina thlen tel kher lo turin Kan Lal Belzebula'n min chah a, chuvang chuan i puihna ka la mai chauh a ni." a han ti ve leh a.

Dustin-a chu a lo nui huk mai, "Engmaw? Belzebula'n khawvela buaina siam a duh lo maw? A va fel ve, a piangthar a mi?" tiin a nuih tiah tiah mai. Chutah Janet-i thinrim chuan a kawr awmah thamin thingkung ah chuan a nam bet a, "NGaithla rawh Dustin, han hlawhchham vaih teh...ka that mai che nilovin i thlarau pawh hremhmun thleng ka hnuk ang." tiin a vau khur khur mai.

"Aww..min thlah teh, i chak si. Ka tiam a che, ka tiam a che. A hlawhtling ang, engkim ka kutah dah rawh." tiin a thaw tawk tawk mai. Jenet-i chuan a thlah a, Dustin-a chu a thingthu hnawk mai. A khuh vak vak a, "Khai aw...min khai zai titih alawm le." tiin a aw te chu a thian vak vak a. Hnuailam la melh reng pah chuan, "Tunah chuan pangngai taka chet angai, ramhuai i ni tih hi he khawvel mipuite hriattir a ngai hrih lo." tiin a tho tuah tuah a.

"Puih ka duhna chhan che chu.." tia a han hawi chhuak leh chu Jenet-i chu hmuh tur a lo awm tawh hauh lo, Alice-i lam av aen leh a, ani pawh inchhungah a lo lut chiah a. A thaw hak a, "Naa...va han haw peih lo tak. A thim si, khawnge ka car ka dah pawh ka hmu thei nang." tia phun nuah nuah chung chuan a kal ve ta a ni.

********************************

A tuk zing hma takah chuan Alice-i chu a tho leh a, zing dar 5 pawh ala ri lo. Khua pawh chu ti lutukin a la var tha thum lova, pawnah chuan a chhuak a. Boruak chu a thiang tha kak kak hle mai, tui haw ri herh herh te chu ngaihnawm tak a ni. Rannung an hram chuah chuah bawk a, a vawt deuh rui bawk nen.

Alice-i chuan nui sang chung chuan a bul vel chu a en kual a, a nui var var mai. Khawvel chu nuam a ti angreng hle mai, a han zi mar talh talh a. Ramhnuai lam chu a pan phei a, a han fang kual vel a. Nuam a ti bawk aniang, a kal thui tulh tulh mai. Khua pawh a rawn var chiang cho tan tial tial a, Alice-i chu a kal thui zel a.

Chutih lai tak chuan thingkung pakhata hmeichhia niawm tak, sam sei hnuang mai, kawr dum vek ha hi a hmu thut mai a. A ding nghal, thingkung zarah chuan chu nula chu a lo thu a. Alice-i chuan a han en vang vang a, "Tunge i nih?" tiin a han au va. Chu nula chu rang lutukin a rawn hawi nghal a, a hmel chu a tha takzet.

Alice-i a hmuh rual rual chuan thingkung atang chuan a rawn zuangthla nghal a, kawrfual dum, a puan nem tak mai, khup chen vel a sei hi a lo ha a. Pheikhwk engmah a bun lo, kelawngin a awm bawk. A ngo bawk a, a vun a nalh em em bawk. Mahse a hmelthat dan chu a mah mah tlat, khatiang em em khan mihring a hmelthat theih loh tih chu Alice-i chuan a hre reng a.

Mihring a ni dawn lo tih a hre lawk thei bawk, mahse eng chiah nge a nih erawh a hre thei lo. A hmeltha viau angin a mit hmul erawh a dum kuk bik a, dark circle ang deuh a nei bawk. Huat hmel tak leh thinrim hmel tak hian Alice-i chu a en a, "Tunge i nih zawk?" tiin a lo zawt let a, a aw lah chu aw ngaihnobei tak niin a nu hnap mai.

Alice-i chuan ava pan a, "KA zawt hmasa che..tunge i nih?" a sawi zawh hma hma chuan rang lutukin chu nula chu a rawn phit thut a, a rawn zuang ta vak mai. Alice-i zawn a thlen dawn hnaih chuan a hmel zawng zawng chu a rawn danglam thut a, nula hmeltha tak kha pitar hmel rapawm tak leh hmelchhe takah a rawn chang thut a.

A vun ngo nalh tak te chu a rawn dum vek a, a kuttin te chu a rawn hriam vek bawk. Mahse Alice-i chuan rang takin a thla a lo kap parh vat a, a thla hlai tak chuan a in khuh a, chu nula chu Alice-i thla a khawih chiah chu thawk leh khatah a leng lawp mai a, a thlawk let vang vang mai. Alice-i chuan a thla chu a zar parh vak a, a va thlawk phei leh nghal.

Chu nula chuan nula hmel pangngai a lo pu leh der tawh, "Van....vantirhkoh maw?" tiin a hlauh hmel kher mai. "Tunge i nih ka tih chu? Engthil chiah nge i nih?" tiin Alice-i chuan a zawt leh a, a hmaah tak chuan a thlawk kang a. Nula chu a rawn tho leh a, rum zet hian Alice-i chu a en a. A ban chu a han phar a, a hnung atang chuan thil khu dum zet mai hi tam tak a rawn zam chhuak a.

Chung khu karah chuan a denglam leh veilam atang chuan rul dum lian zet, ft 30 dawn vela sei chu 20 chuan an rawn chhuak ta mai a, boruakah chuan an thlawk kang hlawm a, chumi rual chuan meikhu dum niawm tak pawh chu a reh ve nghal. Alice-i chuan mak a ti kher mai, chung rulpui, ki pahnih nei leh ha hriam tak nei te clah chuan an lei sei zet mai chu an chhuah khum nasa mai.

Chutah an rawn bei ta, an rawn thlawh hual a. Alice-i chu rawn chuk an tum a, mahse an pawh ngam chiah bik lo. Alice-i chuan a thla chu a khan khup a, rang takin a vir ta vak vak mai a. A virna lai bik chu a thaw vak a, thawngaleivir ang mai chuan a hnim leh vaivut te chu a vir nuai nuai mai.

A vir lian telh telh a, chung rul ho chu tawnga leivir chuan a la tel a. An bung remrum mai a, leiah chuan an tla bung rum mai. Zawi zawiin an ral tial tial bawk, nula chuan chuti taka awmsama a lo hneh mai chu mak a ti hle a. A han zuan leh a, mahse Alice-i chuan a lo rek chat mai. Rum zet hian a melh a, "Engthil nge i nih, sawi rawh." a han ti vin leh khur a.

Mahse chu nula chuan ala sawi duh hauh lo, Alice-i thinrim chuan a bula dil ah chuan a pai thla ta mai a, a tla ri burh mai. Rang takin dil lamah chuan a zu thlawk thla leh nghal a, dil kamah chuan a ding ran mai. Chutah nula chu muang chang hian tui atang chuan a rawn chhuak a, Alice-i hnungchhawn zawng chuan a awm a.

Alice-i chuan vin deuh tak hian, "Tun chiah ka zawt tawh ang che, tunge i nih?" a han ti vin leh thak a. ZAwimuang hian nula chu a rawn hawi a, "Khawngaihin, khawngaihin min tina tawh suh, ka tlawm, ka hneh lo che a ni." a han ti zawi leh sap a. Alice-i chuan a en vang vang a, "Engthil nge i nih, sawi rawh." a han ti leh a.

Chu nula chuan inthiamloh hmel tak hian, "Ka tihpalh a ni...buaina siam tuma lo kal ka ni lo. Zingkar tun ang hun hi hmun hnai deuh va kan awm ve ngam awmchhun a nia, mihring amaw ka ti che a, mahse vanchung nula zawk i lo nia, ka tihpalh a ni. Kei hi Lasi ka ni..Lasi." tiin a chhang a, "LASI a?" tiin Alice-i chuan mak a tih hmel kher mai.

*******************************

Dustin-a leh Detective Adama pawh waiting shed pakhatah chuan thu dunin an lo titi dun leh nasa tawh khawp mai, "Tichuan Onoskelis i tih chu ramhuai a nia, tulathattu chu a ni tihna maw?" Adama chuan a han ti hu mai a. "Aw ni e, chuvang chuan man mai mai chi a ni lovang." tiin Dustin-a chuan a chhang a.

Adama chuan awih har a ti takzet, "Dustin, min bum mai mai a ni lo maw? Enteh, ramhuai kawchhunga lut te a ni zawk lo maw..chutia hremhmun Lalnu tih vel chu ka awih thei lo a ni." a han ti nuah nuah a. Dustin-a chu a thaw deuh hak mai, "Adam, i awih dawn lo tih ka hria alawm. Mahse hei hi thudik a nih hi, i tawn aia tam ka tawng tawh. He khawvelah hian mihring nilo, ramhuai leh mi mak tak tak an tam lutuk." tiin a chhang leh a.

"Anih tualthattu chu kan man lovang maw?"

"Aw man lovang, kan tan tih chi zia zang a ni lo."

"Anih Detective lar ve tak hian tualthahna pakhat lek pawh ka chhui chhuak thei dawn lo tihna a ni maw?"

"Aww i chhui chhuah der tawh hi...ramhuai nula in a that...i hre reng alawm, kan sawi mek hi."

"Dustin, fiamthu lo teh. A serious ania aw...ka chhuichhuak thei lo a nih chuan mipuiin min dem nasa dawn ania, chubakah chhuichhuah awl ber chi ala ni zui a, crime scene leh victim saruaka a awm avang khan...ka zahawmna a chhe dawn asin."

"Chuvang renga ka puih dawn che...mahse i hriat kha. A thlawnin ka tihsak dawn lo che a nia, hre reng rawh."

"Engtia min puih nge i tum? Enge i plan ni reng reng a?"

Dustin-a chu a han thu tha sauh sauh va, "Midang tih angin kan siam ang, chumi tur pawh chu ka hmu tawh." tiin a chhang a. "Enga? Pawisawi lo kan tawrh tir ang maw?" Adama chuan a lo ti hu mai. "Aih nilo..hehe..ih, ka hmelma a nia. Lungngai suh, lo buai suh. Misual turu lutuk ve tho ania, ka kutah dah la a nimai.

Adama chu a ngawi vang vang a, "Awle a tha e, a nih chuan ka ring ang che. Chuan i thusawite hi a dik a ni nge ni lo pawh ka thliar hrang thiam lo, min bum chu a lo lo ang tiraw?" a han ti leh hram a. Dustin-a chu a han chek deuh hlur a, "Detective Adam, min hrechiang ani lawm ni? Tualthah ching, mi na tuar lai hmuh nuam ti thin..SADIST ka nih hi. Ka fing tih i hria a, ka hausa tih i hre bawk." a han ti ve deuh hlur a.

"Anih..chuan.."

"Chuan..engvak nge niang? Ramhuai tih vel mai mai a ka bum duh che i ring ami? Kawng dang a tam lutuk, thuduk ngei alawm ka hrilh che."

"Umm a tha e, ka ring ang che. Anih engtin nge kan chet zel dawn? Enge kan next move ni dawn?"

"I hmingtha ang, i hming tha khawp ang. KA pui dawn che alawm, mahse tunah hrih chuan a tawk tawh e."

Adama chu a ner suk a, "Hmm..anih chuan kan duhtawk hrih dawn tihna maw?" a lo ti hu mai. "Aw ni hrih phawt rawh se. Tikhan chhui awm ang deuh khan nuam lo chen zel la, ka rawn call mai ang che a hunah chuan..." tiin Dustin-a chuan a chhang a. Adama pawh chu a khi suk a, a kal ve mai bawk.

A kal hnu deuh lawkah chuan Jenet-i chu a rawn lang ve chiah a, jeans kekawr bul, a tlang t(r)et pawr deuh hnuang leh tawnzau senno hi a rawn ha a, a vun a nalh mai bakah a sexy takzet. Dustin-a pawh chuan a lo en ngawih ngawih mai, a bulah chuan Jenet-i chu a rawn thu a. "Kha kha maw Detective..min chhui mektu chu?" tiin a rawn zawt a.

Dustin-a chuan Jenet-i hmel en miah lo chuan, "Aw..DEtective Adam Lalchhanhima a nih kha." tiin a lo chhang a. Jenet-i chuan Dustin-a chu ava melh a, a lo melh let ve awzawng lo. A awmbawr hlir chu mit khap miah lo hian a lo en reng a, "Dustin..ka hmel chu helam aw.." a han ti chu Dustin-a pawh a phu zuk mai.

"E aw...nia, ramhuai hnute pawh a lo lian ve tho a nih hi." a han la ti hram a. "Enge i plan chu ni ta?" tiin Jenet-i chuan a han zawt leh a. Dustin-a chuan a aw a han thian te te a, "Bena chu ka kawm nel phawt anga, tichuan amah chu tualthattu ah kan puh thei ang. A finger print rawn neih ka tum anga, tichuan abak chu nang pawhin i thiltihtheihna mak tak leh ropui tak kha i hman ve zeuh zeuh angai maithei ania." tiin a chhang a.

"Anih leh Lailah-i chu?"

"Ani pawh plan ka siam vek tawh a...ka lo buaipui vek ang."

"A tha e, anih chuan ka kal dawn."

"LAwks lawks, thil zawh duh che ka nei."

Jenet-i chu a ding a, "Enge ni leh ta?" a ti vin hlur mai. Dustin-a pawh chu a ding ve a, "Tinge nizan kha i haw daih a, min hrilh lovin. A thim ropui si, thla pawh ka neih ve loh hi...thosi tam zia kha.." tiin a phun nuah nuah mai. Kuan kuah meuh chuan Jenet-i chuan a han melh a, "I bialnu ka ni phiangsen lo, min tihtauh khum suh." tiin a kalsan daih mai.

********************************

Bena pawh chu a tho ve ta a, sana a han en chu dar 7 a lo pel der tawh. "Ehe..ka duh aiin ka tho tlai." tiin a inperh tho nghal a. "BAwiha, Tluangte...hei dar 7 a ri tawh. Va inphih harh la, rawng kan bawl dun vat angai ania." tiin a fapa chu a sawi vak vak a. Tluangtea pawh peih loh hmel tak hian a rawn rum tuah tuah a, a rawn tho ve mai bawk.

Room atang chuan an pafa chuan an chhuak a, mahse inchhung zawng zawng chu a lo faiin engkim mai chu a lo inrem fel thlap mai. A hma ai zawngin a bungrua te leh a inchhung hrim hrim chu  alang thar vuk mai a, Alice-i lo tih a ni tih BEna chuan a hrethiam nghal. Choka lamah a va phei a, chawhmeh tuihnai tak tak te chu engkim a lo insiam sa diam bawk.

Mahse Alice-i ber hmuh tur a awm hauh lo thung, "Naktuk zing atang chuan i kawrkilh zawng turin min kalsan thei tawh ang." tia a hma zan lawka a sawi chu a hrechhuak a. A inthiamlo kher mai, "A kal...a kal ta nimaw?" a ti zawi sap a. Tluangtea pawh chuan, "Pa khawnge Anu Alice-i?" tiin a lo zawt ve nghal chiah bawk.

"Aa.BAwih, BAwihte..a chhuak a, a lo...a lo let leh mai ang." tiin a chhang bah deuh nuai mai. A rilru tak chuan a mangang tan der a, Alice-i chu vantirhkoh ni mahse a lo hmangaih hman tawh avang chuan a thusawi tak te kha a inchhin hnuhnawh kher mai. "Bawiha, lo va inphih fai rawh le." tiin a fapa chu bathroom ah chuan a luh tir a.

Pawnah a tlan chhuak nghal a, Alice-i chu a zawng kual nghal vak vak a. Hrehawm a ti kher mai, a han au chiam chiam ngam chiah bik si lo. A lu dawmin, "Nilo..ka thiamloh vek. Tinge min kalsan tura ka tih kher?" tiin a phun vak vak ringawt mai. Inchhung lamah chuan a lut leh a, thutthleng ah chuan a fapa school uniform te chu fai tak leh thar sut mai hian a lo inbang thlap a.

Pheikhawk lah nise a lo innawt tle em em em bawk a, engkim mai chu a thar ang vek a ni. An in chhungah pawh chuan a hma a awm lo a awm nual bawk, fridge pawh a hma aiin a lo lian a, TV pawh a thar a lo ni. Mahse chu chuan Bena a ti lawm zo lo, a chhan chu a duh ber erawh Alice-i  a ni tlat.

*********************************

TO BE CONTINUE