SICHANGNEII : THE GUARDIAN ANGEL (Mizo Fiction Story) Written by : Aaron Malsawmdawngzuala Chapter - 3

 SICHANGNEII : THE GUARDIAN ANGEL

(Mizo Fiction Story)

Written by : Aaron Malsawmdawngzuala

Chapter - 3

*****************

Bena chuan Alice-i hming diktak chu Lailah a nih thu leh vantirhkoh tak tak a nih thute, khawvela a lo kal chhan zawng zawng leh a lo chhuk lama Onoskelis-i'n a tihbuai thute, Daniel Lalhriathlua chu keimi a nih thute leh Pu Vana kawrkilh kawl mektu a nih thute chu a hre ta vek a, mak a ti kher mai.

Chaw ei dawhkan chu kilin Alice-i nen chuan inhma tawnin an thu a, an ngawi dun ker mai. Tluangtea erawh TV a en thung, "Keimi an awm tak tak amaw?" BEna chuan a han ti leh hu mai a. "Aw awm e." tiin Alice-i chuan a lo chhang a. BEna chuan a lu thingin, "A theih loh, thawnthu mai mai a ni...a takah a awm thei lo hrim hrim." a ti deuh tlat a.

Alice-i chu a thaw deuh hak a, "Thawnthu mai mai maw? Anih keimi aia mak pawh tunah i hmu a, i bulah vantirhkoh ka thut reng hi.." a han ti deuh hlur a. BEna chu a rilru a buai kher mai, "Anih leh..anih leh eng ti turin nge min duh?" tiin a han zawt leh a. Alice-i chu a ngawi vang vang a, "Hun reilote chu in bula ka awm hrih angai ang, Onoskelis hi he khawvelah hian a awm ve reng tih ka hria a ni." tiin a lo chhang a.

"Onoskelis i tih chu...tu chiah maw  anih a?"

"Vantirhkoh ve tho a ni, vantirhkoh ve tho...mahse dan a bawhchhiat avang leh a duham em avangin kan PAthian, Pu Vana chuan paradise atangin a hnawtchhuak ta ani."

"Anih tunah khawnge Onoskelis chu a awm?"

"Chu chu ka hre bik lo."

"Engtin nge i hriat loh theih? Vantirhkoh i nih kha..."

"Vantirhkoh zingah pawh a naupang ber ka ni a, Pu Vana angin thiltihtheihna kan nei ngah ve lo. Bena, Onoskelis hi he khawvelah hian a awm a, kawrkilh chu a zawng ve mek a ni."

Bena chu a han thaw deuh huai a, "Kristian chu ka ni a, Pathian pawh a awm ka ring a, vantirhkoh pawh an awm ka ring. Mahse hetiang em em a, a hring a hrana ka tawn hi ka ring ngai lo." a han ti nuah nuah a. "Kei aia a hmu hmasa a nih chuan, Belzebula hnenah a thlen anga. Belzebula chuan he khawvel tihchhiat nan hian a hmang dawn, a hmang dawn chiang lutuk." Alice-i chuan a han ti leh a.

"Onoskelis chu i zawng dawn tihna nge? Daniel-a chu i zawng zawk dawn?" tiin BEna chuan a han zawt leh a. "Daniel-a ka zawng phawt ang, kawrkilh chu ka laksak ngei tur a ni, Onoskelis-i'n a hmuh hma ngeiin." tiin a lo chhang a. "Onoskelis chuan lo hmu hmasa ta se?" BEna chuan a lo ti leh vat a.

"Ani nen chuan kan inhmachhawn angai a ni tawh mai."

"Ngati nge? I huphurh em ni?"

"Hneh theihna chance ka nei tlem lutuk."

"Engvangin maw? Ani te chu ramhuai a ni a, nangchu vantirhkoh i nih kha.."

"Hremhmun lalfanu a ni a, thiltihtheihna tam tak a nei a ni."

"Chuan i hneh lovang maw?"

"KA hneh ka ring lo."

BEna chu a han ngawi vang vang a, "Puih theihna che ka nei mial lo maw?" tiin a han zawt leh a. "I nei maithei, engpawh chu nise he inah hian reilote chu ka awm ve angai a ni." tiin Alice-i chuan a chhang a. An ngawi dun leh vang vang a, "Onoskelis chu hmel mumal pawh neilo, rannung ang mai a hmel mak leh rapthlak a ni a. Sakawlh ke ang maia lian ke a nei a, thla zum leh hriam tak, lian em em mai a nei bawk." Alice-i bawk chuan a han ti leh a.

"Anih chaklohna te a nei em?" BEna chuan a lo ti leh vat a. "JEwish ramhuai a ni a, ri leh rim hriatna tha tak a nei a ni. Chaklohna a neih ka hre lo, ka hriat awmchhun chu vantirhkoh thiltihtheihna sang zawk nei te a hneh lova, kum tamtak liamta pawh khan paradise an rawn run tawh a ni." tiin a chhang a.

"Anih chuan chutah chuan hnehna in chang em?"

"Aw chang e, mahse beih mai mai chi chu an ni lo."

"Amahin em ni  a rawn run?"

"Ni love, hremhmun gate vengtu Lalpa Belzebula leh ramhuai chak tak pakhat Asmodeous leh amah nen, an pathumin ramhuai te nen an rawn kal a, van indona a thleng a ni."

"Anih anni pathum chu tuin nge hneh?"

"Vantirhkoh Joel-a'n Onoskelis a hneh a, Vantirhkoh Raphael-a'n Asmodeous a hneh leh bawk a, BElzebula chu Vantirhkoh Emmanuela'n a hneh a ni."

"Chung vantirhkoh chak tak tak te hnen atang chuan puihna i la thei mai lo em ni?"

"Aih thei lo, a chhan chu Onoskelis hian phuba lak a lo tum reng a ni tih tuman kan hre lo, Pu Vana thleng pawn.."

"Anih nangin engtin ng ei hriat si?"

"A chhan chu ka tawk tlat a ni, khawvela ka rawn chhuk lamin.."

Chutia an titi lai chuan Bena phone chu a rawn ri a, Pu Ruata a lo ni. "Hello, Pu Ruat?" tiin rang takin a chhang nghal a. "Bena, khawnge i awm daih a? I fapa chu enge a an?" Pu Ruata chuan a rawn ti nghal chiam chiam mai. "Aww..ihh, a tha..a tha tawh e. Ka lo kal, ka lo kal nghal." a ti bah nuai mai.

"Hei hna ala tam si, nang ber i awm loh daih ten...lo let leh vat rawh, min ti mangang hman alawm." lungawilo deuh tak chuan Pu Ruata chuan a rawn ti leh a. "Awle ka pu, ka lo kal nghal e." tiin a dah a. "Alice, ka let leh angai...hnathawh ka la zo lo." BEna bawk chuan a han tih zawm leh nghal a.

"Min ring rawh...i fapa chu ka lo awmpui ang. Hlau suh, vantirhkoh ka nih hi..." tiin Alice-i chuan a lo chhang a. Bena chu a tho va, "AWle..ka kal ange." tiin a fapa Tluangtea chu a hmaiah a fawp a, "Thu lo awih rawh aw...ka lo haw har lovang." tiin a chhuahsan ta a. Alice-i chuan Bena chu a en vang vang a, a thaw deuh huai mai.

*******************************

Tlang pakhat, hmun nuam tak maiah chuan Dustin leh Adama chu an awm dun a, Adama chu thil ngaihtuah muk hmel tak hian a vei kual deuh reng a. Dustin-a erawh thingkung nghengin Adama chu a en hruk hruk ringawt, "Chuan i sawi awmzia chu....tualthattu chuan hmanrua engmah a hmang lo amaw?" tiin Adama chuan a han zawt a.

"Aw...hmanrua paina tur pawh a nei lo." tiin Dustin-a chuan a lo chhang a. "Chuan saruakin a awm bawk maw?" Adama chuan a han ti leh a. "Aw..engmah a ha lo, kekawrte tak ngial pawh a ha lo." tiin a lo chhang leh a. Adama chuan a lu a han bu nghat nghat a, "A kut a tuai vir a, chupa chu a thi der amaw?" a han ti leh a.

"Mihring a ni lo tihna a nimai, boss...chubakah keichuan mak ka ti lo, mihring nilo hi ka hmu hnem tawh lutuk. Kha hmeichhia kha eng ramhuai emaw tak chu a ni ngei ang, kil khat atangin ka en reng a, ka hmu vek alawm." tiin Dustin-a chuan a lo chhang leh a. "A va mak awm ve...mihring nilo ka hmu hnem tawh i tih chu enge awmzia?" Adama chuan a han ti leh a.

"HE khawvelah hian thil engemawni tak a awm ani, chu chu duhin an lo kal a ni. A enga pawh chu nise, chunu chu kan man dawn anih chuan kan fimkhur viau a ngai ang."

"Anih leh engtin tak nge a ruang a sawngbawl?"

"Ka leng haw kha ka zun chhuak lutuk bike ka tiding ringawt a, kawngsirah ka th(r)eh thuai a. Chutah chuan an lo ding dun lai ka va hmu a ni, tichuan a ruang chu a pu nawlh a, building thim lamah a kal pui a. Reilote hnuah khapa thawmhnaw ha chung khan a rawn chhuak leh a, chuzawng chu animai."

"A hmu miah lo che amaw?"

"Min hmu nise ka dam tawh bik nang."

"I sawi awmzia ka la man chiah loh chu maw...he khawvelah hian an thil duh a awm aniang i tih kha...kha kha enge awmzia?"

"Thla 2-3 vel kal ta khan mi mak deuh deuh pathum ka hmu a, chung ho chuan thil zawn an neih thu an sawi a ni."

"Engtia mi mak maw? Alien ang deuh i tihna ami?"

"KA sawi thiam lo, mihring pangngai chu an ni lo."

"A tha e...Dustin, he case ah hian ka mamawh che. I puihna ka mamawh a ni, ka thian...min ring zo angem?"

Dustin-a chu a nui suk a, "Keimah pawh ka inring zo lo ania, engtin nge ka rin theih ang che?" fiamthu deuh reuh chuan a han ti a. Adama pawh chu a lo khi ve suk a, "Ka mamawh i hria." tih ringawt hian a chhang a. Dustin-a chuan thawk a han la te te a, "I hmingthat theih nan a ni tiraw?" tiin a han zawt ve deuh kher a.

Adama chuan a lu a bu nghat a, "Ni e..ka zep lem lo." a lo ti ve bawk a. Dustin-a chuan a chibai a, "Anih enge min tihsak ang? Enge ka lawmman ni tur?" tiin a han zawt ve leh a. Adama chu a ngawi vang vang a, "Min puih dana zir a nimai...sum phei chu kei aiin i ngah zawk daih alawm. MAhse ka tiam ache, a thlawn lovang." tiin a chhang a.

*********************

Zan a lo ni a, Bena te pafa leh Alice-i chuan chaw an ei mek a. An pathum chuan an ngawi kar hlawm mai, BEna chuan sa hrang khat chu suakin Alice-i thlengah chuan ava dah a. Inthlahrung hmel tak hian, "Kha ei leh rawh." a han ti dam diai a. Alice-i chu a khi suk a, "Ka lawm e." a ti zawi sap mai.

Bena chuan a han en vang vang a, "Bible ah kha chuan zu leh sa kha ei phaloh a ni te khan ka hria a, mahse vantirhkoh berin i ei leh bawk sia.." a han ti thut pek a. Alice-i chu a thaw deuh hak ringawt, "Bena, biblical angel kan ni lo..keini chu Paradise-a awm, vantirhkoh zawk kan ni." tiin a chhang a.

Bena chu a hawi a nghal hru mai, "Biblical a? Enge awmzia? Chuan...paradise chu vanram tihna a ni mai lawm ni?" a han ti leh hu a. Alice-i chu a khi suk ringawt, "Paradise chu Pu Vana enkawl, Pu Vana ta..VAnram erawh chu lei leh van siamtu, engkim tithei Pathian ta a ni. Vanrama angel te hi keini ang hian mihring pian an nei ve lova, an danglam hlak a ni." tiin a chhang a.

Mahse BEna chu a bo tulh tulh mai, "Enge awmzia? Pu Vana chu PAthian a ni mai lawm ni? Mizo ho chuan Pathian hi Pu Vana kan ti mai zel a, tette atanga kan hriat dan pawh a ni." tiin a chhang a. Nui var var chung chuan Alice-i chuan, "In mizo thawnthu ah em ni?" tiin a han zawt a. "Thawnthu chiah pawh a ni lo, ka hre thin alawm, Pu Vana hi chu.." tiin BEna chuan a lo chhang a.

"Nia..in mizo thawnthu chu a rapthlak emai, Sichangneii thawnthu ah pawh pa berin a tilmu a chhu keh ania." tiin Alice-i chu a nui nasa mai. Bena chuan chhan ngaihna pawh a hre lo, "Ka thawnthu phuah pawh ni hlei lo." a ti hmuk ringawt. An han ngawi leh vang vang hlawm a, "Naktuk chu i inkhawm ve ngei ngei a ngai ang." BEna chuan a ti leh thut mai.

"Inkhawm a? Khawiah?"

"Ele Biak Inah a niang chu.."

"E aw...nia, ka hre leh si...mahse miin min hrechhuak ta se.."

"Engvang ngawtin nge an hriat chhuah ang che?"

"Min hmu ngai awm silova, chubakah i bulah ka awm dawn a...min ringhlel ang."

"Tuman vantirhkoh ini tih an hre dawn lo."

"Vantirhkoh ka nih leh nih loh ai mah chuan...tunge ka nih an chhui nghal char char dawn..ka sawi awmzia i hrethiam lo em ni?"

"Eng ang pawn chhui che mahse, vantirhkoh i ni tih tuman an hre lovang."

"Amah e aw..BEna, vantirhkoh ka ni pawh ti ila tuman min awih lovang. Onoskelis hi tunah hian khawvelah a awm ve tawh tih hriatna ka dawng a ni, kawrkilh chauh nilovin keipawh min zawng mek tih hre rawh."

Bena chuan nuam lo a ti kher mai, "Nia..kan hriatdan ve mai chauh ania...in khawvel ka hre ve lo a ni." a ti chuai raih mai. "In bulah hian awm reng pawh ka tum lo, a chhan chu keichuan hmelma ka nei. Nangni pafa hian i tawrh ka duh lo, mahse tunah chuan in bula ka khawsak rih a ngai a ni." Alice-i chuan a han ti leh a.

Tluangtea chu a kham a, sil hmunah chuan a thleng ruak chu ava dah a. Bena tawng hma hma chuan, 'Min kham san suh aw...ka zak ve tho ania." Alice-i chuan a lo ti leh thawt thawt mai. BEna chu a che hrut hman, "Awle, vantirhkoh an zak ve thei ami?" a han ti leh hram a. "Vantirhkoh chu ka ni ngei alawm, mahse khawvela ka rawn chhuk hnu hian mihring nihna ka nei ve tawh a ni. I hrethiam chuang lovang, ka sawi zui peih lo." a ti hmak mai.

****************************

A tuk zing a ni a, Jenet-i (Onoskelis) chu tlang chhipah thu in a hawi vauh vauh mai a. A inngaihtuah muk hmel hle mai, "Zeros-a'n min phatsan tawh a, nang chuan min ti beidawng ve tawh suh ang che." tia BElzebula'n a hrilh lai te chu a bengah chuan  a cham reng a. Chutia a inngaihtuah muk lai tak chuan a hnungah chuan thawm a hria a, a hawi let nghal vat.

Tudang nilovin Alice-i a lo ni reng mai, mahse Jenet-i chuan Alice-i chu mihring hmel a put tawh avangin Lailah-i a ni tih a hre lo, Alice-i chuan kham lam chu a lo hawi ve vauh vauh mai. Jenet-i chuan ava pan a, "Ehe..zing zing ah hetah enge i rawn tih ve a?" tiin a han zawt a. Alice-i pawh chu a lo hawi a, a hmelma lian ber Onoskelis nen an intawng ta tih reng a hre lo.

A chhan chu Jenet-i chu mihring hmel pangngai pu ve tho a nih avang chuan Onoskelis a ni tih reng a hre bik lo, "Nia, ka rilru a hah deuh va..nang enge i tih ve zawk a?" tiin a lo zawt let a. Jenet-i chu a han thaw deuh hak a, "Kan in ang..hna hautak lutuk mai ka nei a, kan pu in ti turin min ti a, ka confi viau nangin ka huphurh ve det." tiin a lo chhang a.

"Anih chu mawle, kan pu i tih awmzia chu office a in director emaw, manager a niang chu maw?" tiin Alice-i chuan a han zawt leh a. Jenet-i chu a nui suk a, "Umm..nia, ni deuh mai. Nang zawk, zing walk hrim hrim nge i rilru hah vanga rawn chhuak hma..han sawi ve la?" tiin Jenet-i chuan a han zawt let ve leh a.

Alice-i pawh chu a han khi suk a, "Nia..i harsatna ang chiah kha keipawh ka harsatna..chubakah ka tumpui tur hi ka huphurh deuh mawle..." a han ti zawi sap a. Jenet-i chuan a han melh deuh hraw a, "Tumpui tur a? Hmelma i nei em ni?" tiin a zawt nghal a. MAhse Alice-i chuan za lo deuh chunga nui huk chung hian, "Ka sawi vek a rem lo, engpawh nise..Alice Lalrintluangi ka nia, nang tung ei hming ve?" tiin a han zawt a.

Jenet-i chuan lo chibai let in, "Jenet-i ka nia..Jenet...aa..ka hmingpum chu ka sawi lo mai ang." tiin a lo chhanglet a. Alice-i chuan a ngaihna a hre lo kher mai, "Umm..nia, awle..ka..kal phawt mai ange." tiin a kalsan ta daih a. Jenet-i chuan dik lo a awm tlat hian a hria a, a en uluk kher mai.

******************************

Sunday a ni bawk a, inkhawm tur pawh an kal khawm hnem leh tawh khawp mai.  Bena te pafa leh Alice-i pawh an rawn thleng ve ta, Alice-i chuan BEna nupui thi ta, Mamuani kawr hlui, a chhuan ber leh mawi a tih em em thin chu a rawn ha a, a nalh kher mai. Chumi khaw tlangval thenkhat ho chuan Alice-i chu la hmu ngai hek lo, an en duh hlawm kher mai.

An ni chauh an ni lo, a hmei apa in an veng pathlawi rethei ve tak mai, BEna'n chutiang em em a hmeichhe chhe lo a rawn kal pui chu mak tiin an en hru hlawm a. Then khat lahin a rukin thla an lo laksak thul, mahse Alice-i chuan engah vak a ngai lo. A vun no chuk mai leh ngo em em mai, a pian dik zaih mai te chu mipa nupuineih tawh ho mit thlengin a hip chiang kher mai.

Inkhawm naah chuan a tel ve ngei a, mahse thusawi chhung zawngin Alice-i chu a muthlu thung. Mipa leh hmeichhia  athut dun theih loh avang chuan BEna chuan mipa thutna lam atang chuan a khat tawk hian a va melh leh thin a, chutia vantirhkoh ber a lo muthlu bawrh bawrh mai chu a hrethiam lo kher mai.

"Thusawi ngun taka ngaithla awm zawk tak...a vantirhkoh ber pawh a muthlu bawrh bawrh mai chu ania.." a ti nuah nuah a. Thusawi tu chu a han en a, "Kan thusawitu ber hi a piangthar lo tihna em mawnile?" te a han ti thul. Darkar khat a liam leh hnu chuan thusawi chu a zo ta a, Alice-i chu a bula thute chuan an la kai tho zui.

Ban hla an sak lai pawh chuan a zai ve miah lo, inngaihtuah muk hmel tak hian a melh ngai a melh vung vung ringawt. Inkhawm chu an bang ta ngei a, Alice-i hmuh leh chakin thenkhat chu an lo awmkhawm leh der tawh. Alice-i lah BEna bulah kher a awm deuh tlat bawk si, mipa thenkhat, BEna aia hmeltha inti ve tawk tak te tan chuan a tlawm lak thlakin an thik ve khawp chuan a rinawm.

BEna chuan scooter a keng lo tlat, ke chuan an haw ho ta a. Kalkawng ah te pawh chuan Alice-i chu an lo endun nasa mai, tunge a nih tih zawt turin BEna chu tuman an nel bawk silo, a hma pawhin an be ngai lo bawk. KAwngsir pakhatah chuan tlangval panga hi an lo thu a, weed an lo zu khu luih luih mai.

Chung tlangval ho zinga  ahmel upa deuh ber, lian deuh ber chu tudang nilovin Dustin Malsawmzuala, Pu Chhuma'n SADIST tia a koh thin ngei mai kha a ni. Alice-i chu Dustin-a chuan a hmu ve ta a, a en ta vang vang mai. A thian dangte ho chuan an lo chhaih deuh sap sap a, mahse Dustin-a chuan engtin mah a chhaih ve lo.

A nui deuh suk suk ringawt a, BEna lah chuan a rawn melhrum hlawm khawp mai. An thian zinga pakhat chuan, "Mi melh ve chule, a pawr deuh amawni?" tih pah chuan va thawh a tum a, mahse rang tak hian Dustin-a chuan a lo dang nghal. A pawt thu lehnghal a, "Mi inkhawm bang khatin an lo ti ngai lo." tiin a hau zui a.

Chu tlangval pawh chu a ngawi ve mai bawk, Alice-i chuan chung zawng zawng chu a lo hmu vek a. Dustin-a nen chuan an in en a, Dustin-a chuan a mit a han sisi zeuh va. ALice-i chuan a ngei hmel kher mai, lehlam a hawi san nghal hmak. Dustin-a erawh chuan a en vung vung a, a tawp a tawpah chuan Alice-i chu a rawn hawi let ve leh hram a.

************************************

Dawr pakhata JEnet-i'n thingpui a in mek lai chuan a bul hnaiah chuan engemaw thil pawimawh tak, a hna thawh mek nena inkungkaihna nei awm tak hi a hre tlat mai. A hnunglama police officer pahnih in misual chungchang an sawi chu a hre pha a, rang takin ava hawi let nghal vat a. Chu police pahnih te chu Melody pa Pu Chhuma leh Inspector pakhat te an ni.

Dustin Malsawmzuala chungchang an lo sawi mek a, party naa mualpho taka police force rual a lo hnawh kiang thute chu sawiin Pu Chhuma chu a thinrim hmel kher mai, "Lungngai reng reng suh, Sir..ka kutah dah rawh. Hetiang misual ho man dan hi chu ka hria alawm, eng eng emaw technique hi hman ve angai a." tiin Inspcetor chuan confi tak hian a han ti vel a.

Jenet-i chuan a lo ngaithla reng a, Dustin Malsawmzuala...ka mi zawn chu Daniel Lalhriathlua..an hming ava in ang reuh ve." tiin a khi deuh suk ringawt. "Chutiang mai a ni lo, he misual hi nang aiin ka hre hmasa a, a duh chu neih ngei ngei a tum thin. A nei thei lo a nih chuan tualthah pawh a hreh hauh lo ania, mi hlauhawm tak a ni." tiin Pu Chhuma chuan a chhang a.

Inspector chu a nui deuh sak a, "Keipawh tunge ka nih min la hre hleinem, Sir..ka kutah dah rawh, ka ti beidawng lovang che." tiin a lo chhang leh a, he inspector hi a hming chu Kima a ni. Pu Chhuma chu a han thaw deuh hak a, "Ni e, a tha e..anih chuan i kutah ka dah anga, puih i ngaih hunah min lo hrilh dawnnia." tiin a chhang leh a.

"Awle Sir, reiloteah ka man vat ang. Ka tiam a che,  hun rei ka mamawh lovang." tiin Inspector Kima chuan a chhang leh a, an inkalsan ta a. Pu Chhuma kal liam mek chu Jenet-i chuan a thlir zui vang vang mai, "Tinge maw saw Polcie Officer chu...engemaw taka hriatna ka neih tlat le." tiin ama hriat tham lek chuan a phun leh nuah nuah a.

A hma zawn a en leh chiah chu a bul, a hma chiah ah chuan Dustin-a chuan a dawhkan a lo kil pui ve reng chu niin. Jenet-i chuan a han en vang vang a, "Ka interest lo, bialpa ka nei...i kal thei." a lo ti deuh hmak mai. Dustin-a chu a khi suk a, "Ka bem dawn reng reng lo che, thil hrilh tur che a lo kal ka ni." tiin a lo chhang daih mai.

Jenet-i chuan a han en deuh hu a, "Eng maw i sawi? Thl min hrilh tur i nei amaw? Min hria em ni?" tiin a han zawt leh a. Dustin-a chuan a lu a thing a, "Ka hre ngai miah lo che, thiannu...mahse ka hmu tawh che a ni." tiin a lo chhang leh a. Jenet-i ngaih chu a tha lo tan a, a thiltihtheihna hman mai pawh a inring nghal hle mai.

"Tunge i nih?" a han ti chang deuh fak a. Dustin-a chu a han thu tha te te a, "Englo ania, thiannu...kha police pahnihte thusawi kha i lo ngaithla uluk viauvin ka hria a.." a han ti phawt a. "Hria e, chuan enge?" Jenet-i chuan  alo ti leh hlur mai. "Dustin Malsawmzuala...keimah hi ka ni." a ti ta mai a.

Jenet-i pawh chu a meng phawk ve deuh hru mai, "Enga? Kha criminal kha..nangmah maw?" a ti hu mai. "Aw ni e...tualthah hmang, mi kahwngaihna neilo...rukru leh smugling ti thin...keimah Dustin MAlsawmzuala ngei ka ni e." tiin Dustin-a chuan a lo chhang leh a. Jenet-i chu a ngawi vang vang a, a rawn nui huk mai.

A aw a han thian kharh kharh a, "Umm a nih chuan..min rawn vau deuh tihna em ni?" tiin a han zawt leh a. Dustin-a chu a nui ta huah huah mai, "Ni lul love...ka vau lo hce. A chhan chu nangpawh tualthah hmang ve tho alawm i nih." tiin a lo chhang let leh ta mai a. Jenet-i pawh a nui tawi leh ta suk mai, "Engmaw i sawi?" a han ti vin leh deuh hlur a.

"AW..saruakin i awm a, chuan kha addict kha..nizan hmasa a mi kha..i thah a ni."

"Engtin nge i hriat? Enge proof-na i neih?"

"Tuman min hmu lo, mahse eye witness ka ni. Tunah hian Mizoram Detective lar ber pakhat, Detective Adam Lalchhanhima'n a chhui mek che."

"Dustin, tunge ka nih hi i hre lo a ni. Fimkhur rawh, anih loh chuan.."

"Anih loh chuan enge? I thiltihtheihna hmang khan ka ringruh hi khawih miah lovin zaizir hmang ringawtin i thuai chhum ve dawn em ni?"

Jenet-i chuan mak a ti tawh kher mai, "Nang hian min lo hmu tak tak amaw?" tiin a han zawt leh a. "AW hmu e, ka hmu chiang khawp mai che u. Chuan ruak veka i awmna chhan kha hre duh viau mah ila, a aia hriat duh zawk ka nei. Engtin nge i tih? Eng thiltihtheihna nge i neih bik? Chuan khawilam ramhuai nge i nih?" tiin Dustin-a chuan a zawt leh ta siah siah mai.

Jenet-i chu a thaw hak a, "MIn vau em ni? Ka duh phawt chuan tunah hian ka that ve thei che asin." a han ti deuh khur khur a. MAhse Dustin-a chuan a hlauh loh hmel kher mai, "KA vau lo che ka tih kha...min that thei reng tih pawh ka hria." tiin a lo chhang leh a. "Anih chuan enge i duh?" Jenet-i chuan a ti vin leh hlur mai.

Dustin-a chu a ngawi vang vang a, "An chhui mek che a, Detective Adama hi mi fing tak a ni bawk. A man vat ang che, mahse i hlau lo tih ka hria. Ani chauh nilo, Mizoram pumpui pawh hi i duh chuan i nuai bo vek thei tih pawh ka hria. Mahse chu chu kei hian ka duh lo, chuvang chuan puih che ka duh a ni." tiin a chhang a.

Jenet-i chu a khi suk mai, "Mihring ka ni lo tih i hria a, chuan thiltihtheihna tam tak ka nei tih i hre bawk. Chuvang chuan min pui duh a, min rawn tlawn a ni tihna aniang maw? I fing hle mai, mahse nanga puihna ka mamawh lo." tih pah chuan kal a tum a. Lehlam a hawi chiah chu chiang fek fawk hian Dustin-a chuan, "Eng ramhuai ber nge i nih? Moloch, Chemosh, DAgon, BElial, Belzebula...tu ber nge i nih?" a ti ta vak vak mai.

Jenet-i pawh a ding a, a rawn hawilet a. A rawn kal hnai a, "Engtin nge khamite hming kha i hriat?" a ti vin hlur mai. Dustin-a chuan rum tak hian a en a, "Ka vawikhat hmuhna  ani lo, chuvangin hmanzan pawh khan ka hlau miah lo che a nih kha. Sawi rawh...tunge i nih?" tiin zam hauh lo chuan a lo zawt nawn leh sak mai.

Jenet-i chu a ngawi vang vang a, "ONOSKELIS ka ni...Onoskelis..mahse ka mihring hming erawh Jenet-i a ni." tiin a chhang ta nge nge a. "Eng ti tura lo kal nge i nih?" tiin Dustin-a chuan a han zawt leh a. "Lailah-i bei tur leh Pu Vana kawrkilh la turin." tiin a chhang leh a. "Ka pui ang che." tiin Dustin-a chu a nui var var a, an inchibai ta a.

*************************

TO BE CONTINUE