SICHANGNEII : THE GUARDIAN ANGEL (Mizo Fiction Story) Written by : Aaron Malsawmdawngzuala Chapter - 2

 SICHANGNEII : THE GUARDIAN ANGEL

(Mizo Fiction Story)

Written by : Aaron Malsawmdawngzuala

Chapter - 2

************************

Zing a lo ni a, Alice-i pawh a rawn harh a. A han zi mar talh talh a, a awmna in chu a han hawi kual a. A hma zana van atanga a tlak laite chu a ngaihtuah chhuak zawk mai, rang takin a tho vut a. "Enge..enge hetah ka tih?" tiin a han ngaituah let vang vang a. Onoskelis-i'n a finna chanve ai tam daih a lo laksak avang chuan hun kal tawh chu a hre chhuak mai thei lo, a han maimitchhing vang vang a.

Chutah a hrechhuak ta, "Bena..a fapa, Tluangtea...aw..chuan ka hming chu Alice-i." tiin a hrechhuak leh ta. Chutih lai tak chuan tu emaw hian hnunglam atang chuan, "Tunge i nih? Enge hetah i rawn tih?" a rawn ti thut mai. Alice-i chu ava hawi phei nghal vat a, room kawngka bulah chuan mak tih hmel tak hian BEna chuan a lo en reng a.

Sawi tak ang khan Bena pawh hian Onoskelis anchhia a dawng ve kan tih tawh kha, thil a theihnghilh hma em em a, Alice-i chu tunge a nih a hre leh tawh lo a ni. Alice-i chuan a rawn pan a, "Bena, min la hria em? Ni..nizan ami kha..keimah Alice Lal..Lal..aw..Alice Lalrintluangi." a han ti bah nuai a.

Bena pawh chu a ngawi vang vang a, a hrechhuak leh ta. Za lo tih hriat tak chuan a nui lui suk a, "Aaa..englo, ka rawn ti vel mai mai a nih kha. Ihh..i mutui em?" tiin a han zawt let a. "Umm ka mutui a ni mai...nang zawk?" tiin Alice-i chuan a lo zawt veleh a. "Aww..mutui khawp mai. Saw Tluangtea pawh ala tho lo, a la hnar kuk kuk mai." tiin BEna chuan a lo chhang a.

Chutia an titi lai chuan kawngka a rawn inkik dat dat a, Bena chuan ava hawng a. Chanchinbu sem a lo ni a, "Kha aw..in chanchinbu tur." tiin a rawn pe a. BEna chuan, "Ka lawm e." tiin a lo la mai a. Chanchinbu semtupa chu kal leh mai a han tum a, mahse Alice-i chu ava hmu fuh ta tlat mai le.

Hmeltha a ti lutuk chu a ding reng a, mit khap lek lo chuan a en vung vung ringawt mai. Bena pawh chuan mak tiin chamchinbu semtupa chu a en hu a, "Ka pu, mamawh ila nei em ni?" tiin a han zawt ringawt a. Chupa pawh chu harh chhuak zawk niawm tak hian a phu zuk a, "Aw..ihh..neilo, chaw ei tui u." a ti bah nuai a.

A kal ve leh mai bawk, Alice-i chu chawei dawhkan bulah chuan a thu a, a melh ngai a melh vung vung mai. Bena chuan thingpui a siam sak a, dawhkanah chuan ava chhawp a. A bulah chuan thu ve in, "Anih chuan Alice, khawi lai nge in in? Khawi venga awm nge i nih? Engtia awm zel nge i tum?" tiin a han zawt a.

"Ka sawi tawh kha, mihring ka ni lo. Vantirhkoh ka nia, mihring angin he khawvelah hian ka lo chhuk thla a ni." tiin Alice-i chuan a lo chhang a. A hma zana an thil sawi te chu Bena chuan a hrechhuak leh nghal uar uar mai, "E aw..ni tak. Ihh..anih chuan he khawvelah hian eng ti tura lo kal nge i nih?" tiin a han zawt leh a.

Anihna takah chuan BEna hian a bawl deuh reuh a ni mah zawk, a chhan chu vantirhkoh tak tak a nih a ring thei hlawl lo a ni. "Daniel Lalhriathlua zawng tura lo kal ka ni ka tih tawh kha, ani khan ka mamawh a kawl, lam turin ka lo kal." tiin Alice-i chuan a chhang leh a. BEna chu a han ngawi vang vang a, "E ka hre leh si..Pu Vana kawrkilh kha maw.." a han ti deuh hluai a.

"Aw ni e, Pu Vana'n la turin min rawn tir a ni." tiin a lo chhang leh a. Nui ru deuh put put chung chuan Bana chuan, "Umm..anih tak chu." tiin a chhang a. Chutih lai chuan Tluangtea pawh a rawn tho va, "Eheu, good morning Bawiha..i mutui bawk maw?" tiin BEna chuan a lo zawt a. Mit nuai nuah nuah pah chuan, "Umm...good morning, Anu Alice." tiin Tluangtea chuan Alice-i chu a rawn wish ve nghal bawk.

"Alice, anih chuan engtia awm zel nge i tum? Tihian kan bulah hian i awm ve tawp dawn nge, hmundangah kalna tur i nei zawk?" tiin Bena chuan a han zawt leh a. Alice-i chu a ngawi vang vang a, "Kawrkilh....kawrkilh kha ka lak ngei angai." tih ringawt chuan a chhang a. Bena chuan han tih ngaihna vak pawh a hre bik lo, "Rawng ka'n bawl phawt ange." tiin rawng chu a bawl a.

*************************

Thawnhnaw dawr zawnah chuan Janet(Onoskelis) chu a ding vang vang a, a thawmhnaw hak lai, mipa thawmhnaw, a hma zana a thah tak thawmhnaw a hak mek chu a han en a. Hmeichhe dang ho, kawnga kal mek hote thawmhnaw hak chu a han en leh a. Tichuan dawr chhungah chuan a lut ta a, "Eng lampang nge i zawn a, lo lut rawh..lo en kual rawh." tiin dawr neitunu chuan a lo chhawn vat a.

Mahse Janet-i chuan a chhang lo, thawmhnaw chu a en kual zel a. A nalh nalh, a to to leh a branded ber ber te chu thlangin a han ha chhin vel hlawm a. Dawr a lo awm ve dang, abik takin mipa ho chuan an en duh in chhelo an ti tlang kher mai. Inthlakna room a awm reng a, mahse a zak hauh lo.

A inphelh bawrh bawrh mai a, dawr chhunga lo awm ve ho chu a hmei a pa in an ka hau ringawt hlawm mai. Tichuan cheng sing chuang man fe a thlan khawm hnuah chuan dawr neitute chuan an pack sak hlawm a, "Cheng sing sarih leh sanghnih...a vaiin." tiin a nghaktunu chuan a han hrilh a.

Jenet-i chuan pawisa engmah a nei hauh lo, mahse a lungngai lo kher mai. Dawr zawna ATM booth chu ava en a, a maimitchhing vang vang mai. Dawr nghaktunu pawh chuan mak a ti angreng hle a, "Thiannu, thiannu ka thusawi i hria em?" tiin a han be mawlh mawlh a. Second 5 vel hnuah chuan Jenet-i chu a rawn meng leh a, a ipte chu zenin pawisa tam tham zet mai hi a rawn phawrh chhuak ta mai a.

"Kha le, sing sarih sanghnih.." tiin pawisa chu Jenet-i chuan a pe a. Dawr a lo awm ve tlangval pahnihte chuan Jenet-i chu an en duh kher mai, "A money bawk sia, a pa in a eiru a ni chiang mai." tiin pakhat zawk chu a han nui suk a. "I tawng ring lutuk, a hre pha anga sin." tiin a thianpa chuan a lo khap vat.

Mahse chu tlangval chuan a aia ring deuh hlek hian, "Engeee..a ho emai. Gold digger bak va ni suh, ka ngaisang lo nasa, chhe lo viau mahse a inlak hmel emai, la khuaikhem chi a nih hi." a han ti leh deuh kher a. Jenet-i chuan a lo hre pha teh meuh mai, a va melh nghal a. Chupa lah chuan a mit a lo la siai zui, mahse Jenet-i chu a nui suk ringawt.

Pawnah chuan a chhuak a, "Kha maw...a mitmeng atang khan a lerh tih a chiang reng mai." tiin tlangval chu a intithei kher mai. Mahse JEnet-i chhuah rual rual chuan chu tlangval chu a hrawka thil tang niawm tak hian a khuh ta vak vak a, a thaw tha thei ta reng reng lo mai. "BAwiha, hey..bro..ngati nge? Engtin nge i awm?" tiin a thianpa chuan a zawt nghal chiam chiam a.

Mahse chupa chuan a chhang thei lo, a tawng thei reng reng lo. A hrawk chu a dawm a, a uak thawt thawt mai. Midang ho pawh chuan an buaipui nghal sup sup a, chu tlangval chu a thingthi hnawk mai. A vun te chu a duk vek tawh a, chutia a na tuar lai chu pawn atang chuan Jenet-i chuan a lo thlir reng mai.

Chupa chuan JEnet-i chu a en reng a, Jenet-i lah chuan a lo la nuih sang zui. Chutah Jenet-i hmel chu second thum vel a rawn danglam zawk mai, ramhuai hmel rapthlak lutuk ah a rawn chang thut mai. Mahse tuman an hmu ve thei lo, chu tlangval chauh chuan a hmu thei a ni. Mahse a reh leh nghal vat a, chupa pawh chu a chatthla zui ve nghal bawk.

******************************

Alice-i chuan chaw chu a ei thei kher mai, BEna te pafa pawhin an en ngawih ngawih ringawt. An kham san hial a, ani lah chuan ala ei tui nasa mai. Hnathawk tur chuan BEna chu a insiam mawlh mawlh a, Tluangtea pawh school form a ha ve mek bawk. Alice-i chaw ei lai chu a kham ve ta a, "Khawiah nge in kal dawn?" tiin a han zawt a.

"Keichu hnathawk turin ka kal dawn a, Tluangtea hi chu school a kal dawn." tiin Bena chuan a lo chhang a. "Anih kei hi...inah hian ka lo awm reng dawn tihna em ni?" Alice-i chuan a lo ti hu mai. Chutah Tluangtea chu a rawn hawi chhuak thut a, "Pa..vawiin inrinni...inbua ni, school chawlh." a rawn ti lauh lauh mai.

Bena pawh chu a hawi hai hle mai, "A ni em mawni le?" tih nuah nuah pah chuan an calendar bal tak mai chu a han en a, "E..a ni leh si." tiin a khi suk mai. "Engtin nge maw ka theihnghilh theih zawk le?" a la ti nuah nuah zui. Tluangtea chu a inthlak leh a, "Mahse Bawiha, keichu ka kal tho angai ania aw..kan chawl ve lo." Bena chuan a han ti leh a.

Alice-i pawh chu a kham ve ta, silhmunah chuan a chaw ei thleng chu a dah ve mai a. "Engmah lo khawih suh aw, ka lo sil vek ang." Bena chuan a lo ti vat. Alice-i chu a rawn hawi a, "Engmaw? Engmah ka khawih dawn lo maw? Ka kut te hi ka sil duh asin, tinge engmah khawih suh min tih?" a han ti deuh luam a.

Bena chu a khi suk a, "Aaa..ihh, ka sawi awmzia chu thleng kha sil duh suh ka tihna a nih chu." tiin a han sawi fiah leh a. Alice-i chuan kut sil pah chuan, "Sil ka tum lo hrim hrim alawm." ala ti zui a, ala nui miah lo lehnghal. "Bawiha, thleng ka sil hlanin i nu Alice-i kha TV te lo chhuah sak rawh." Bena bawk chuan a han ti leh a.

An TV chhe ve tak leh tawng ve tawh tak, ben nun ngai ang chi chu Tluangtea chuan on a han tum a. On chu a on thei ngei mai, mahse a chiang lo tlat. "Ngati nge maw ni ziah le aww...kan TV hi chu a hlui ve tawh lutuk a." tiin BEna chuan a lo sawi mawi zung zung a. Alice-i chu a rawn tho chhuak a, TV chung chu a kut chuan ava khawih a.

A khawih rual rual chuan TV chu a rawn tha nghal a, Bena te pafa chuan mak an ti dun kher mai. Bena chu a nui suk ringawt a, "I va...i va thiam ve..magic aniang aa.." tiin a han fiamthu titih deuh va. Tluangtea lah naupang tih takah mak a lo ti nasa mai, "Eng..engtin nge i tih theih?" a lo ti hu mai a.

Alice-i chu a nui sak a, "Sichangneii ka nih hi." tiin a thut hmunah chuan ava let leh a, a thu tha leh a. Bena pawh chuan sawi tur vak a hre tawh bik lo, thleng chu a sil leh mawlh mawlh a. Tluangtea lah chuan cartoon ala en pui zui, "BAwiha a duh zawng en tir ve la, tinge cartoon te i enpui mai mai." tiin BEna chuan a han hrilh a.

Mahse Alice-i chuan, "Aih, a hmuhnawm alawm." a lo ti tlat mai. Bena chuan a sil zo va, a hmanruate chu a la khawm a. "Anih ka kal ania aw, Bawiha..Alice..tikhan inah lo awm reng ang che u." tiin a chhuahsan a. A scooter tawng tak mai chu a han rap nung a, "Tunge maw kan ina awm ve saw le..tinge ka ngaihtuahna hi  abuai nuai mai le.." ti nuah nuah chung chuan a chuang a, a hna lam pan chuan a kal a.

*************************

Drugs addict pakhat ruang, Jenet-i'n a thah tak, saruak veka lo mu chu an hmu chhuak ta. Mipui tam tak chuan an en sap sap hlawm a, buiding rauh san tawh, chhe ve tawh tak chhunga awm a nih avang leh chumi building chhungah chuan an kal ngai lem loh avanga hmu har mai chauh an ni.

Police te pawh an lo thleng thuai a, a chhuitu tura Police ten an thlan, Detective Adam Lalchhanhima pawh a rawn thleng ta. Press mite chuan an lo bawr nghal tuau tuau a, zawhna an rawn zawt nghal chiam chiam bawk. Adama chu a ding zeuh va, "Keipawn chanchin ka hre ve chiah, inzawhna engmah ka la chhang thei rih lo." tiin a kal tlang leh a.

Media ho chuan an camera nen an la zui nasa mai, police constable ho chuan an lo dang hlawm bawk a. Adama chuan ruang chu a han en vang vang a, "Tinge maw a thawmhnaw a hlihsak vek kher le, tiin a taksa te chu a han en kual a. Ngun taka a en kim vek hnu pawh chuan hliam engmah a hmu lo, "Ehe...hliam engmah a nei silova, engemaw awmzia le?" a ti nuah nuah mai.

Chutah mipui zinga pakhat chuan, "A ringruh herh tliah a ni." a rawn ti lauh mai. Mipui ho leh press mite chuan an en thap a, mipui kar atang chuan mipa pakhat hi a rawn chhuak a. Chupa chu tudang nilovin Dustin Malsawmzuala, mita lo hmu ngeitu kha a ni. MAhse face mask a vuah a, cap a khum bawk.

Adama chu a ding a, "Hetah hian lo kal teh." tiin a ko va. Dustin-a pawh chu ava phei ve mai bawk a, "Tunge i hming?" tiin Adama bawk chuan a han zawt leh a. "Adam..Adama ve tho ka ni." tiin Dustin-a chuan a lo chhang a. "Anih leh engtin nge a ringruh herh tliah a ni tih i hriat?" tiin a han zawt leh a.

"Hliam engmah a nei lova, thisen pawh engmah a awm lo."

"Damdawi hmanga chiu hlum pawh a lo ni thei asin."

"Damdawi hmanga chiu hlum a nih chuan a banah invihna hnuhma tharlam tak a awm tur a ni. Mahse engmah a awm lo, ahmaa a inchiuna hnuhma vek a ni."

"Huh..i va hre ve..anih leh inchiuna hnuhma tharlam lo awmlo pawh nise, addict ania, a inchiuna zawng zawng a ni vek i tihna em ni?"

"Addict ho hian insulin an hmang tlangpui a, a inchiuna hnuhma ho pawh hi han en la...tereuhte tak tak vek a ni. Lethal injection anih chuan syringe lian a ngai a, insulin hriau aiin a hriau a lian zawk dawn a, a hnuhma pawh a lang chiang bik ang."

Adama chu a nui suk mai, "Anih leh a tura hrai ni ta se, a in turah an pawlh te lo ni zawk tase?" tiin a han zawt leh a. Dustin chu a han thaw hak a, "Tura hrai hlum a nih chuan a chil phuan te pawh a tla ve bawk ang chu...ani lawm ni?" a lo ti let zek mai. Chutih lai chuan ruang enfiahtu zinga pakhat, Forensic doctor chuan, "Sir, a nghawng ruh zawng zawng pawh a tliak vek a nih hi." a rawn ti a.

Adama chu a ngawi vang vang a, Dustin-a chu a han en leh a. ZAm hauh lo hian Dustin-a chuan a lo melh ran mai, Adama chuan a aw a han thian kharh kharh a. "Lo en fiah ula, minute 1 lek min lo hrethiam lawk teh u." tih pah chuan Dustin-a chu a en a, "Ka be lawk thei che angem?" a han tih zawm leh nghal zat a.

"Thei tehreng e." tiin Dustin-a chuan a lo chhang vat a. Mipui awmna atanga hla vak lovah chuan an inzui phei a, "Engthilah nge min biak duh a?" tiin Dustin chuan a han zawt a. Adama chuan a han en vang vang a, "Ka hria che em? Nge..inhmuh tawhna kan nei em?" tiin a han zawt leh a. Dustin-a chuan a face mask chu a phelh thla a, "Tihian min hria em?" tiin a lo zawt let a.

Adama chuan a en vung vung a, "Aih...ka hre leh lo che." tiin a chhang a. "Mahse kei chuan ka hria che asin, Detective." Dustin chuan a ti ta mai a. Adama pawh a meng deuh nghal kawk mai, "Engmaw? Min hria amaw?" a ti nghal hu mai a. Dustin chu a nui sak a, "Aw hria e, ka hre lutuk che. I chanchin engkim ka hria, ka hria che alawm Detective Adam." a ti leh ta sak sak mai.

Adama ngaih chu a tha lo tan, "Tunge i nih? Engtin nge min hriat?" tiin a han vin deuh hlek a. Chu veleh Dustin-a chu a nui deuh huk a, "Sir, chutiang lam a ni lo. Detective lar lutuk i nia, Mizoram chuan kan hre deuh vek che alawm." a ti leh daih mai. Adama pawh chu a thaw huai a, Um a nih chu, ka lawm e." a ti ve mai a.

"Anih enge min biak duhna chhan chu ni a?"

"Engtin nge i hriat? Engtia thleng nge?"

"Enge awmzia?"

"Tualthahna hi.."

"Engtin nge ka hriat anga?"

"I hria tih a lang vek alawm."

"Engtin?"

"Engtin nge i rawn hriat chat theih?"

"A rinawm ber a.."

Chutah rum zet hian Adam-a chuan a melh ta khur mai, "SADIST.." a ti thut mai chu Dustin-a chu a meng phawk nasa kher mai. "Eng..enge awmzia?" a ti khur deuh dar dar a, a hlauthawng tan. Adama chu a nui sak a, "Detective Adam Lalchhanhima, detective lar tak min tih zawh chiah kha...tunge i nih hi ka hriat loh i ring reng reng em ni?" a han ti leh a.

Dustin chu a ngawi reng, engmah a sawi tawh lo. Chutah Adama chuan chiang fek fawk hian, "Dustin Malsawmzual, engtin nge jail atanga i tlan chhuah theih zawk a?" a han tih zawm leh nghal zat a. Dustin pawh chuan a hlauh hmel vak bik lo, "Ka vawikhat tlan chhuahna chauh pawh a ni hleinem..ka tan chuan kail te chu in ang a ni." a lo ti ve sak mai.

"Animaw? Mi nunrawng tak, mi dimna neilo. Mi natuar hmuh nuam ti tak, smuggling lord an tih hial kha ini tiraw?"

"Nangpawh Detective corrupt, dawt pawh thudika chan tir thei. Lemchan thiamte ai pawh a lemchan thiam kha ni ni lawm ni?"

Adama chuan a kut chu a lek chhuak a, "Ka hmu che chu ka lawm e, ni e..corrupt detective ka ni." a han ti a. Dustin pawh chuan chibai let ve in, "Enge i duh?" a han ti a. "I duh duh min hrilh zawk rawh, ka tihsak ang che. MAhse sum erawh ka inchhiar hnem ang, ka vau che a nilo..mahse tunah hian ka hmaah jail tang tlanchhuak an zawn mek a awm tih theihnghilh lo la." Adama chuan a han ti deuh kher a.

Dustin pawh chu a lo nui a, "Min vauna pawh nise nga tan mah ka ti lo, mahse ni e...ka pui ang che. He tualthattu hi ka hria a, man ka duh a ni. Mahse a awlsam lovang, mihring pangngai ang ngawt a ni lo." a han ti a. "Enge awmzia?" tiin Adama chuan a lo zawt nghal vat a. "Nakinah kan inhrilh dawnnia." tiin Dustin-a chuan a chhang a, inbiak pawh dan tur te inhrilhin an in kalsan ta a ni.

***********************

Alice-i chu a muhil bawrh bawrh a, Tluangtea erawh TV ala en mek a. Chutah a rawn tawngvai a, "Ka tihpalh Lalpa, ka hria e..ka hria e." a rawn ti nuah nuah mai. Tluangtea pawh chu ava hawi phei a, mahse engmah chu a sawi chuang lo. Alice-i chu a thle vak vak a, chutah a rawn harh thut mai.

Tluangtea pawh chu a phu zawk a, "Nilo..nilo..Lalpa.." tiin Alice-i chu a hamhaih hle mai. Tluangtea chuan hlauh hmel tak hian a lo en a, Alice-i pawh  a rawn harh chiang ta. A inthiam lo kher mai, "Ka tihpalh aw, Tluangte..ka tihpalh." tiin ngaihdam a dil nghal a. Pawnah a tlan chhuak nghal a, a lu chu a dawm vang vang mai.

"A dik lo, kei hi..ka dik lo. Tinge engmah hi ka hriatthiam theih loh...enge awmzia?" tiin a inbe vak vak a, Onoskelis-i'n a finna a laksak nual avang khan ala dik hlei thei lo a ni. Chutah khawvel lama a tlak tirh a, Onoskelis-i'n a rawn tihbuai chu a hrechhuak leh ta a, "Lailah, harh chhuak rawh." tia Pu Vana'n a mumanga a zilh laite chu a bengah chuan a rawn ri nawn awn awn mai.

A thingthi hnawk a, a lu chu na a ti kher mai. Chutah a rawn meng kuau va, a mit te chu a var vek mai. Tichuan a finna zawng zawng chu a nei let leh ta vek a, a au vak vak mai. Thli te chu a thaw vak vak a, khawpui a ri dum dum bawk. Tluangtea pawh chu a rawn chhuak ve a, chutia Alice-i na tih hmel taka a kun ngawih ngawih chu mak a ti kher mai.

Rei fe hnuah chuan boruak chu a rawn ziaawm tan a, thli thaw te pawh chu a reh ta. Khua chu a hma ang bawk chuan a thiang leh kak tawh a, Alice-i pawh a pangngai leh tawh. Tunah chuan engkim a hre ta, a hming chu Alice-i nilovin Lailah zawk a ni. Tichuan khawvela a tlak tirh a, a awmdan zawng zawng te chu a hre leh vek tawh bawk.

Kawnga phen atang chuan Tluangtea chuan ala en reng a, a hlau ru angreng khawp mai. Chutah Alice-i chuan a kawr a phelh a, a bra zawng zawng pawh a phelh vek. "Hetah enge ka tih? Kawrkilh la tura lo kal ka ni..." tiin a maimitchhing vang vang a, a hnungah chuan Tluangtea'n a en reng tih a hre hauh lo.

Chutah le, a hnungzang vun chu engemawni lian tak hian a rawn do pawng fan vak vak mai. Chutah a vantirhkoh thla chu muangchang hian a vun atang chuan a rawn chhuak a, muang chang chuan a rawn lian telh telh bawk. Reilote hnuah chuan a rawn chhuak kim a, a kap parh ta mai a.

Lian tak a ni, lian tak, Tluangtea pawh chuan mit khap lek lo chuan a en vang vang a. Chutah Alice-i chu thlawh a tum ta mai, Tluangtea chuan Sichangneii thawnthu a hre chhuak zawk. Sichangneii faten a thla a thuhrukna an hrilh hnu a, a thlawh bo san te leh a hnua an pa a inthah ve leh thute chu a hrechhuak ta zawk zawk mai.

Chutah a tlan chhuak a, "Nilo..kal suh, Anu Alice, kal suh." tiin a tap titih ta mai a. Alice-i pawh a rawn hawi a, rang lutukin a thla chu a thukru leh nghal vek. "Tluangte, i hrethiam lo a ni. Hna ka nei a, ka kal angai alawm." tiin hrilhfiah a tum a. Mahse Tluangtea chuan a phal tlat lo, "Aih, min thlawh bo san daih chuan apa a thi a ni mai." tiin a tap ta mai a.

Alice-i chuan a hrethiam chiah lo, "Engati maw, ka kal avanga i pa a thih ngawt ang?" tiin a han zawt a. Inhnit feih feih pah chuan, "Ih..i kal chuan a tilmu a chhu keh ve mai ang." TLuangtea chuan a la ti zui. Alice-i chu a ner deuh nak mai, "Eng a? Engvangin nge a chhut anga?" tiin a han zawt leh hu mai a.

"Ihh..thawnthu, thawnthu ah pawh a inziak vek alawm." a han ti leh a. Alice-i chu a khi suk mai, "Eng ang naupang thawnthu nge ni ngai chutiang." a ti nuah nuah a. A han thaw deuh hak a, "Awle...ka kal dawn lo. I pa kan lo nghak dawnnia, engpawh nise." tiin a chhang a, inchhung lamah chuan an inzui lut leh ta a.

***********************

Bena hnathawk pawh chu a chau kher mai, chhun thil an ei zawh chuan an insakna bula thingkung buk hnuaiah chuan a thu sawp deuh tual a, meizial chu a han zu vang vang a. Chutah a taksa chu a rawn khur dur dur a, harh chhuak zawk ni awm tak hian a phu deuh zuk mai. A meng kawk a, a thil theihnghilh hma em emna zawng zawngte chu a bo ta vek a, engkim a hrechhuak leh ta.

A ding a, "Khanu kha..nilo, thla..thla a nei." tiin a phun bul bul mai. Zanrei tawh lama a rawn tlak lai te, a thla a zap parh a, sava huh inti hul tura in thing vak vak ang maia a thla a han thing per sawk sawk te chu a hre leh ta vek mai. "Nizanah kan inah a riak a, tukin zinga chaw a ei bawk a..chuan..tunah..tunah..." a ti nuah nuah a.

A meng phawk hru a, "Tunah ka fapa nen...inah ka kalsan. Khanu kha mihring pawh a ni lo, enge ka tih tak?" tiin a tlan nghal vat a. In neitupa Pu Ruata chuan a lo ti ding a, "Hey hey hey, Bena..khawnge i kal dawn?" tiin a lo zawt a. "Ihh..ka pu, englo, ka fapa. Inah ka fapa, min rawn phone a...ka damlo a tia, ka va kal lawk ange." tiin Pu Ruata'n a chhan hma hma chuan a tlan leh nghal a.

A scooter chu rah nun a han tum a, a nung thei lawk lo lehnghal. Pu Ruata chu a rawn phei leh a, "A na viau em ni, i fapa chu? Damdawiinah te kan kalpui dawn em ni?" a rawn ti a. "Aih angai lo ka pu..hei a nung mai ang." tiin Bena chuan a lo chhang a, a thaw hlawp hlawp mai. "A ngailo tak tak ang maw? Ka ngaih i va ti tha lo ve, Bena?" tiin Pu Ruata chu a hlauthawng ru kher mai.

"A..a tha mai ang, ka va haw phawt ange.." a sawi zawh rual rual chuan a scooter chu a rawn nung nghal a. "Ka kal ange, ka lo thawk leh ang." tiin a tlan nghal vang vang a. "Engemaw ni thut le...ngaih a ti tha lo hle mai. Dawt a sawi nge, dawt a sawi chu ka ring silova." tiin Pu Ruata chu a inbe mual mual a, a enzui vawng vawg ringawt mai.

****************************

Bena chuan in chu ava thleng a, rang lutukin a tlan lut nghal. Kawngka chu a hawng ri deuh bu ra, "Bawiha, BAwiha..khawnge i awm?" tiin a au nghal chiam chiam mai. Choka lamah chuan Tluangtea chu a lo awm a, "Enge apa? I van bang hma em em.." a lo ti a. Chuveleh pindan atang chuan Alice-i chu a rawn chhuak ve leh a, chuveleh Bena chuan choka lam a pan nghal a.

A hnungah chuan a fapa chu awmtirin Alice-i chu chemte chuan a tin nghal a, "Lo kal hnai suh...nang hi mihring i ni lo. Eng ramhuai nge i nih...ka fapa nen hian min chhuahsan nghal rawh." tiin a vin nghal khur khur mai. Alice-i pawh chuan a hrethiam nghal vek, "I finna leh i hriatna te a rawn let ve tawh animaw?" a lo ti sam et a.

"Min dawi a ni, nang hian...enge i duh? Sum leh pai engmah kan nei lo, pek tur che kan nei lo. Min tina suh, min chhuahsan rawh." BEna chuan a lo ti leh khur khur mai. "Nilo Bena, i hrethiam lo a ni. Kei hi ramhuai ka ni lo, angel ka nih hi. Nizanah pawh ka sawi tawh kha, angel ka nih hi." tiin a lo hrilh fiah a.

Chutah vin zet hian Bena chuan, "DAwt sawi suh, nang hian min bum lul lovang. Ramhuai i nih kha...eng vantirhkoh mah i ni lo." a ti hrep mai. "Pa, Sichangneii alawm...nichinah pawh thlawh bo a tum a, mahse ka lo dang a." TLuangtea chuan a lo ti ve bawk a. "Bawiha lo ngawi rawh." tiin apa chuan a hau nghal.

Alice-i chu a thaw deuh hak a, “A tha e, Bena..thudik engkim, thil awmzia ka hrilh ang che. Pawnah min lo zui chhuak rawh.” tiin pawnah chuan a chhuak a. Chemte chu la hum ran chung leh hlau rilru deuh tak chung chuan muang chang hian Bena chu a chhuak ve a, a fapa chu a kai reng bawk.

Tichuan Alice-i chu a hawi kual a, a fimkhur hmel hle mai. Bena te pafa chu a en a, “Mak i ti dawn ania, mahse hlau suh ang che. Tunge ka nih ka entir dawn che, hlau suh ka tina lovang che.” tiin a han hrilh hmasa te te a. Chutah a thla chu a zar pharh ta hluai mai a, Bena mak ti lutuk chu a ka hau mai.

A tawlh hnung nghal a, a chemte ken lai pawh chu a thlauh hial mai. “Eng..engthil nge ni ngai?” tiin mit khap lek lo chuan a en reng a, a hlau takzet. “Hlau suh, BEna...hlau reng reng suh. Kei hi Vantirhkoh Lailah ka ni a, chu chu ka hming diktak a ni.” tih pah chuan a taksa te chu a rawn eng vak mai a, a hmel te pawh chu a rawn danglam a.

Alice-i hmel ni tawh lovin Lailah-i hmel diktak zawk chu a rawn lang a, “Pu Vana, kan Pathian..Pathian tamtak zinga chak ber leh thiltithei ber pawl, Kan Lalpa in a kawrkilh la turin min rawn tir a ni.” zaidam tak chuan a han ti leh a. Mahse Bena chuan mak a la ti tawp thei lo, a mumang ni mai hian a hria.

Chutah zawi zawiin a taksa eng te chu a rawn thim riai riai a, a thla te chu a thukru leh a. A hmel pawh Alice-i hmel ang bawk a ni leh ta a, “Tumah tina turin ka lo kal lo, Pu Vana min tirhna awih a lo kal mai chauh ka ni.” a han ti leh a. “Ka..ka..ka...ka hlau..hleinem.” Bena chuan a ti bah nuai mai.

Alice-i chuan ava pan hnai a, “Bena, angel diktak ka ni. Ramhuai ka ni lo, nang hian awmna tur, ei leh in tur min lo pe a, chuvang chuan i duh apiang min dil rawh ka pe ang che.” a han ti leh a. “Keichu JCB tamtawk leh Spiderman-a hmaikawr ka duh.” Tluangtea chuan a lo ti leh hman pek a.

************************

TO BE CONTINUE