SICHANGNEII : THE GUARDIAN ANGEL (Mizo Fiction Story) Written by : Aaron Malsawmdawngzuala Chapter - 1

 SICHANGNEII : THE GUARDIAN ANGEL

(Mizo Fiction Story)

Written by : Aaron Malsawmdawngzuala

Chapter - 1

************************

Chhum tam tak karah chuan Keichala chu a phei zel a, chulai hmun chu a eng em em bawk. A sirah chuan angel tam tak an lo awm bawk a, Keichala chu an en kar hlawm mai. Chu hmun chu paradise a ni a, van angel te chenna hmun a ni. Lal thutthleng lian tak, rangkachak leh lunghlu hlira khat hi a laiah tak chuan a lo awm a.

Mahse hnungchhawn zawngin a awm thung, Keichala chuan inthlahrun hmel tak hian ava pan zel a. Lal thutthleng chu muang chang chuan a lamah a rawn inher a, chutah chuan palian tak mai, a kawr pawh rangkachang ang maia tle vur mai leh lal lukhum lian tak, lunghlu hlira khat khum chu a lo thu a.

Khabehmul sei tak, var buk chhup mai a nei bawk. Chupa chu Pu Vana a ni a, Pathian hrang hrang zingah chuan a thiltithei ber pawl leh a chak ber pawl a ni. A hmel chu nisa ang maia eng a ni a, a hmuh that hleih theih loh hial bawk. Keichala chuan en pawh a en ngam lo, Pu Vana hmaah chuan a thingthi a.

A tap nghal zawih zawih mai, ngawi reng hian angel te chuan an lo thlir thap bawk. A hmaah chuan kunin, "Lalpa, min ngaidam rawh. Thu ka tiam che a, hun min pe a, min pui bawk. Mahse kei i chhiahhlawh hian ka hna ka hlen zo ta lo, eng hremna pawh min pe la lawm takin ka tuar ang." tiin kutsuih meuhvin ngaihdam a dil a.

Pu Vana chu a ngawi vang vang a, "Helai hmun hi Paradise a ni a, tahna awm tawh lohna hmun a ni. Engvanga tap nge i nih? Tho rawh, ka fapa. I thil tihsual chu ngaihdam a ni a, hrem i ni lo bawk ang." tiin a chhang ta hlauh mai. Keichala chu a lawm takzet, a tho kang nghal vat a. "Ka lawm e, Lalpa..ka lawm e." tiin lawmthu a sawi nghal mawlh mawlh mai.

Keichala chu Pu Vana chuan Paradise atang chuan vanram tak tak zawkah a thawn chho va, a thlarau chu a hahchawlh tir ve ta a ni. Tichuan a vantirhkoh ho chu a ko khawm a, "Tunah hian lei lamah kawrkilh kha ala awm a, kha naupang, keimi khan ala kawl a ni. Keichala a hlawhchham tawh a, midang ka mamawh a ni." a han ti dap dap a.

Chuveleh vantirhkoh te chuan la tur nih chu inchuhin khawvel lama chhuk thlak chu an chak ngang hlawm mai, Lalpa, keimah min tir rawh." tiin tawng an inchuh nak nak hlawm a. Pu Vana erawh a ngawi reng a, a angel te chu a han enkual den den a. A sir lama lo ding, lo ngawi reng mai, Lailah-i chu ava hmu ta a.

"Lailah, hetah hian lo kal teh." tiin Pu Vana chuan a kova, midang ho pawh chu an ngawi nghal thap mai. "Enge ni, Ka Lalpa?" tiin Lailah chu ava phei a. "Ngati nge i ngawih reng a? Engmah i sawi ve bawk si lo, nang hi thlang ta che ila i pawm angem?" tiin Pu Vana chuan a han zawt a. Lailah-i chuan inthlahrung tak hian, "I mi tirhna apiangah ka kal ang, ka Lalpa..mahse kei kher hi chu i kawrkilh thianghlim la tur chuan ka tling zo ve lovang." a han ti zawi sap a.

Pu Vana chu a Lal thutthleng atang chuan a rawn chhuk a, Lailah-i hma takah chuan a va ding a. "Lailah, nang hi ka thlang che. Ka kawrkilh lam turin khawvel lamah zu chhuk la, ka hnenah ngei min rawn pe ang che." a ti ta mai a. Lailah-i pawh a phu zuk mai, "Engmaw? Keimah maw?" tiin a zam chhe nghal der a.

"Aw nangmah...nangmah hi ka thlang che a ni. Mahse Keichala ang kha chuan min ti lungngai ve suh ang che, nang chu ka ring che. Keichala kha chu mihring a ni a, hmelma leh ral laka an him nan keimi ah ka siam mai chauh a ni. Nang chu vantirhkoh i ni a, thiltihtheihna tamtak nei i ni." tiin a han fuih a.

Hreh hle mahse Lailah-i chuan a pawm ta a, Pu Vana chuan a hna chu a han hrilhfiah chhunzawm mawlh mawlh a. A inrin thlap hnuah chuan van zawl lai takah chuan Lailah-i chu a ding vang a, Pu Vana chuan a lu a han bu zauh va, Lailah i chu a bo ta daih mai. Vantirhkoh dangte pawh chuan chutia Pu Vana'n an zinga naupang ber leh tawng tlem ber, Lailah-i a hmang chu mak an ti angreng hle.

Lailah-i chu van chung sang tak atang chuan a rawn thlawk thla ta vang vang a, mahse chutih lai chuan engemawni mak tak, mihring pianzia ni si, thla sei tak nei, ramsa hmel niawm tak nei hian a rawn la thut mai. Chu thil chu hremhmun ami niin, vantirhkoh lo ni ve tawh thin, Pu Vana'n a thil tih sual avanga a paih thlak tak, hrehmun lalfanu Onoskelis a lo ni reng mai.

Khawvel pawh a la thlawk thleng lo, Onoskelis chuan man betin a thlawh kual pui ta hrep mai. Thei leh thei lo hian Lailah chuan a han en a, Onoslekis hmel rapawm tak mai a hmuh chuan a hlau kher mai. "Tunge i nih?" tiin a zawt a. "I lo dam maw unaunu...inhmuh a kha thle mai." tiin Onoskelis chu a nui thler duai duai mai.

Lailah chuan Onoskelis a ni tih a hrethiam nghal, a theih ang ang chuan a bei let a. Mahse Onoskelis chu a chak lutuk tlat, Lailah-i chu khawvel lamah chuan a vawmin a vawm thla ta a, "Kawrkilh kha kan Lalpa Belzebula ta a ni, engtikah mah i nei chuang lovang. Kei hi ka lo kal ve dawn, ka lo kal ve dawn." tiin a au zui lawm lawm mai.

***************************

Kum 1 liam ta a, a nupuiin a boral san tawh, kum 35-a upa, fapa kum 6 mi nei mek, Benjamin Lalfakzuala chuan a fapa chu thawnthu hrilhin tih mut a tum mek a. Sichangneii thawnthu a hrilh a, a fapa Tluangtea pawh chu a maimitchhing diar diar tawh. Bena nupui Mamuani hi accident vanga thi a ni a, Tluangtea chauh hi fa an la nei a ni.

Bena hi a khawngaihthlak em em a, a chhan chu Mamuani nen khan an chhungte ve ve hian inneih an phal lo a ni. Mahse an inhmangaih em avangin an inru a, an chhungte ve ve chuan an tuithlar ve ve bawk a ni. Inhlawhfa in Bena hian a nupui chu a chawm ve tawk tawk a, sum nei tam lo mahse nupa hlim tak an ni.

Fapa an nei a, rethei hle mahse an nghei hran lo. An in pawh assam type ah pawh a thehlep chu niin chupawh mi in an luah a ni a, veng mawng kil khawr tawpa awm ala ni zui bawk. Bena chhungte leh Mamuani chhungte chuan an fapa, Tluangtea chu an la inchuh zui a, BEna chu ngatan mah an ngai chuang lo, an la haw reng tho.

Mahse BEna chuan a fapa chu amaha enkawl a thlang zawk ta a, a thianpa, LAwyer Remruata puihna hmangin court ah pawh hnehna a chang nghe nghe a ni. A thianpa Remruata hian kawng engkimah a pui nasa thin hle a, inhlawhna tur leh hnathawh tur pawh a zawn pui nasa thin hle bawk.

"Tichuan Sichangneii chuan a thla chu vuahin, van chung sang lamah a fate chu a thlawh bo san ta a ni." tia a sawi lai chuan TLuangatea pawh a hnar ta bawrh bawrh mai a, Bena chuan a nuih sak a. A chalah chuan a fawp a, puan a sin that tir a. Sana a han en a, dar 10 a lo ri dawn tawh mai.

"Zanin chu duh aiin a mu tlai mah mah a ni." tia phun sup chung chuan mut ve a han tum a, chutah an inbula tuihawk kawr ah chuan engemawni hi a rawn tla ri dup mai. Tui per chuan an room tukverh pawh a rawn theh huh thawt a, Bena chu a phu nasa kher mai. Tluangtea pawh chu a rawn harh ve nghal a, "Apa enge a?" tiin a zawt nghal a.

Mi zawng zawng kawmthlanga awm an ni bawk nen, zan a lo rei ve tawh nen, midang thawm hria an awm ve lo hlauh. "Bawihte, bengchheng suh." tiin a hmui a hup sak a, fimkhur tak chuan tukverh lam chu ava pan a. Kawr bula lungpui lian deuh phen atang chuan hmeichhe pakhat hi a rawn chhuak a.

A hnugnah chuan engemawni ah nei ang tak hian thil lian tak a awm bawk, Tukverh chu a hawng a, chutah chu hmeichhe hnung atang chuan sava thla ang mai, lian tak hi a rawn in kap pharh ta mai a. Bena mak ti lutuk chu a mit a nuai vak vak a, mahse a thil hmuh chu tak tak a ni bawk si. Chu hmeichhia lah chu a inthing ang nawk nawk lehnghal a, Tluangtea pawh chuan a lo hmu ve reng bawk.

Ani naupang a tih takah hlauh nachang em em pawh hrelovin, "APA..saw..SICHANGNEII." a ti ta vak mai. Chuveleh chu hmeichhia chu a rawn hawi phei a, a thim em avang leh thla eng hnuaia lang thei chauh a nih avang chuan a hmel chu a hmu chiang thei lo. BEna chuan a fapa hmui chu a hup a, "BEngchheng suh BAwiha..au tawh suh." tiin a khap nghal a.

Chuveleh chu hmeichhia chu lungpui phenah chuan a biru leh ta daih mai, "Bawiha, khumah sawn lawn la. In lukhup la, ka rawn let leh hma chu lo che sawn miah suh aw.." Bena chuan a han ti a, thuawih tak chuan Tluangtea pawh chu khumah chuan a lawn kai a, a inlukhup ve mai bawk.

Bena chu tukverh atang chuan a chhuak a, a khar leh thlap bawk. Leia tiang pakhat lo awm chu a chhar a, fimkhur tak chuan lungpui chu ava pan hnai a. Hlauh hmel taka mihring thaw ri hlawp hlawp ri hi a hria a, a tiang ken lai chu a hum nghet sauh sauh va. Inring ran chung chuan a va dak dek dek a, a ding chat mai.

Lungpui phenah chuan hmeichhe pakhat hi saruak vekin a lo awm a, vawt tih hmel tak hian a lo khur bauh bauh mai. Chu nula, saruak ngal ngata awm, Lailah-i chuan a han en chho va, a rawn ding a. Bena tihngaihna hrelo chu sawi mai tur pawh a hre bik lo, a ngawi reng ringawt. "Tunge i nih?" tiin Lailah chuan a zawt a.

Mahse Bena chuan a hrethiam lo, a chhan chu Lailah-i hian tawng dang daih a hman vang a ni. Chutia BEna ka hau mai a hmuh chuan Lailah-i chuan a tawng hman chu  a hrethiam lo tih a hria a, ava pan hnai a. Bena chu a lo tawlh hnung deuh hrut a, Lailah chuan a kut chu a phar chhuak a, ngawi reng chuan BEna chuan a en reng ringawt.

Bena awm zawnah chuan a kutphah chu rawn dah in a maimitchhing vang vang a, second 5 vel hnuah chuan a rawn meng leh a. "Helai hi khawi hmun nge? Eng tawng nge ka hman hi?" tiin a zawt leh a, tunah chuan mizo tawng a rawn hmang ve ta. "Engmaw? Engtin maw?" Bena chuan a ti deuh hu mai.

"Eng tawng nge ka hman hi?" tiin Lailah-i chuan a vin deuh lek lek a. "Ih..mi..mizo tawng.." Bena chuan a ti bah nuai mai. Saruak ngalngat a awm a ni bawk nen, Bena chu a lai laklawh tlat tawh. Lailah chuan mak tih hmel tak hian, "A dik..ka awmna hi a dik..mizo tawng tho an hmang. Mahse..mahse hei hi khawilai hmun nge?" a ti nuah nuah a.

Bena chuan a kawrlum chu a phelh a, "Kha..hei hi ha rawh." tiin a va tuam lum a. Lailah-i pawh a ngawi reng, inchhunglamah chuan Bena chuan a hruai lut vat a. Thuthlenga shawl chu ban vatin a taksa te chu a khuh sak a, "Tah hian thu rahw...a vawt i ti em? I ril a tam em?" tiin a zawt mawlh mawlh a.

Lailah chuan a lu a thing ringawt, a ngaihtuahna a la buai deuh tlat. Thingpui a siam sak a, "Tunge i hming?" tiin a han zawt leh a. Lailah chuan sawi mai tur a hre lo, inchhung chu a melh kual a. Banga lo intar, Bena fapa Tluangtea lem ziah, ALICE IN WONDERLAND tih chu a han hmu fuh a.

"Ihh..Alice..Alice. Aw nia, ka hming chu Alice-i a ni e." tiin a chhang a. Bena chuan thingpui chu a thli a, "Min lo nghak lawk aw.." tiin thingpui chu a pe a, an roomah chuan ava lut a. A fapa chu a lo la meng reng a, "Bawiha, lo tho teh..saw mikhual kan nei ania." tiin  akai thova. Tluangtea pawh chu a rawn tho ve mai a, "Apa..tu mikhual nge?" tiin a lo zawt a.

"Ihh...ka thiannu, ka thiannu ania..lo kal rawh, rawn hmu ve rawh." tiin a chhang a, room atang chuan an chhuak dun a. "Alice, hei hi ka fapa a nih h. Lalnuntluanga, Tluangtea a nih hi." tiin Lailah chu ava hrilh a. Lailah chuan a lo en hu a, nuih pawh a nui lo. A bulah chuan Tluangtea chu ava thu a, a en vung vung mai.

"Khawi lam mi nge i nih? Khawi atanga lo kal nge i nih?" tiin Bena chuan a han zawt leh a, Lailah-i, Alice-i ni ta chuan a en vung vung a, "Ihh...englo, van..van atangin." tih ringawt chuan a chhang a. Bena chuan mak a ti kher mai, mi ang chiah lo, an in atanga tlan bo a nih a ring ta deuh hial a.

"Umm..anih chu...tikhan lo awm rawh aw...i thawmhnaw tur ka va zawng ang." tiin BEna chuan room ah a luh san a. Alice-i chuan thingpui chu a han in leh zauh zauh va, TLuangtea chuan mak ti tak hian a la en vung vung mai. An ngawi dun vang vang a, "Sichangneii em ni i nih?" tiin TLuangtea chuan a zawt tawl mai.

Alice-i chuan a en vang vang a, "Enga? Tunge Sichangneii chu?" tiin a lo zawt let a. "Ihh..van chung nula, vantirh koh anga thla nei a nia.." a han ti chiah chu Alice-i chu a meng kawk mai. "Engmaw? Van..vantirhkoh a? Engtin nge i hriat?" a ti hu mai a. Tluangtea lah chuan mak a lo ti nasa, "I ni maw? Sichangneii i ni maw?" a han ti leh a.

"Aw..vantirhkoh ka ni..mahse engtin nge nang naupang hian i hriat?"

"Apa in min hrilh.."

"Ipa khan maw? Engtin nge ka chungchang a hriat?"

"Thawnthu ah..thawnthu ah min hrilh."

Alice-i chu a bo hle mai, mahse a zawt zui tawh lem lo. Chutih lai chuan Bena chu a rawn chhuak a, a nupui Mamuani thawmhnaw hlui chu rawn la chhuakin, "Kha..hei hi ha rawh..room ah sawn va inthlak rawh." a han ti a. Thawmhnaw chu Alice-i chuan a la a, room ah chuan a lut ve mai a.

A lut fel chiah chu Tluangtea chuan, "Apa, kha kha..sichangneii chu a nih kha. Amah pawn a sawi, vantirhkoh ka ni a ti." a lo ti chiam chiam mai. Chutah Vena chuan a hrechhuak zawk, ava hmuh hma khan chiang takin thla eng hnuaia a thla a zap parh lai kha a hmu ve ngei a ni. A taksa mawi tak, engmah inbel bawk silo a hmu rei lutuk khan a lo theihnghilh tir pawh a ni mahna.

A ngaih chu a tha lo leh hnuhnawh kher mai, "Engtin maw a sawi? Sichangneii ka ni a ti maw?" tiin a fapa chu a han zawt leh a. "Aw..vantirhkoh ka ni, engtin nge min hriat te a ti alawm." tiin Tluangtea chuan a lo chhang leh a. Bena chuan mak a tiin a ngaih chu a tha mawlh lo, mahse engtin mah tih a tum chuang lo.

************************

Alice-i chuan thawmhnaw te chu  aha ve mawlh mawlh a, chutah darthlalang ah chuan ava inhmu thut mai. A ding chat a, a che eih lo. Darthlalang chu a en reng a, a hmel te chu a tha in mihring pangngai pian ang chiah a nei a, a pian a mawiiin a vun  a no nalh em em bawk. Mahse a hmel chu Lailah-i hmel  ani tawh lo, hmel thar a nei tawh thung.

Thawmhnaw chu a ha zo va, darthlalang bawkah chuan a in en leh a. A ban te chu a en a, a han chul a. A taksa chu a khawih a, mihring ang chiah chiah a ni ve ta mai chu a hlim kher mai. A nui sen sen a, a kawr te chu phelh leh in a hnungzang te chu a han en a, mahse thla engmah a lo awm tawh lo.

Mahse chutia hlim taka a taksa thar a chhuan em em lai chuan Onoskelis a ngaihtuah chhuak thut mai, a nui lai pawh a tawp chat. Khawvel lama a thlawh thlak lai khan a rawn bei thut a, chuvanga hmun dik lo zawka tla a ni tih pawh a hrechhuak leh ta. "Ka lo kal ve dawn, kha kawrkilh kha i la lovang. Khawvelah ka lo chhuk ve dawn, ka rawn zui ang che." tia a sawi te chu a hrechhuak leh ta vek mai.

A fimkhur hle a ngai tih a hria a, theihtawp a chhuah a ngai tih a hre bawk. Chutih lai chuan room kawngka chu a rawn inkik karh karh a, "Alice, i inthlak zo tawh em?" tiin Bena chuan a rawn au lauh lauh va. Rang takin a inha tha leh a, room atang chuan ava chhuak ve ta a. An pathum chuan an thu hova, "Alice-i i ni tak tak amaw?" tiin Bena chuan a han zawt leh a.

"Aw..aw ni e."

"Anih leh enge i hming pum?"

"Ihh Alice..Tluang..Tluangtei."

"ENgmaw Tluangtei a?"

Tluangtea chu a nui vur vur a, "Aahh..kan hming a in ang, keipawh Tluangtea." a lo ti ve chiam chiam a. Alice-i chu a khi suk a , "Aw..nia, a dik alawm." a han ti bah leh nuai a. "Anih..Alice Tluangtei ni ringawt lovin, enge i hmingpum ila hria em? Lalnuntluangi ami? Nge Lalrintluangi?" tiin Bena chuan a han zawt leh a.

"Aw..Lalrintluangi ni e...Hehe, Alice Lalrintluangi." tiin Alice-i chu a nui leh sen sen mai. Bena chuan a han en leh vang vang a, hmeltha a ti kher mai. "Mi ang lo ti dawn ila, mi anglo tur chuan a hmeltha in a fin hmel bawk si. Tluangtea thusawi khan min tibuai hle mai, kha mihring thla nei kha amah hi a ni tak tak dawn em mawnile..." tiin a rilru chuan a inbe mawlh mawlh a.

Chutihlai chuan Tluangtea chu a rawn ham bai bai a, "Apa, ka mut a chhuak tawh." a rawn ti tham tiak a. "Bawihte, nangmahin va mu la, hei ka thiannu nen hian kan lo inkawm leh lawk ang aw..ka rawn mu vat ang." tiin Bena chuan a chalah chuan a chul a, a fawp bawk a. "Awle..muttui aw, Anu Alice." tiin Tluangtea chu room lam panin a va mu ve mai bawk.

Alice-i chuan a hrethiam leh tlat lo, "Anu Alice a? Anu ka ni em ni?" a ti leh hu mai. Bena chu a khi suk a, "Nilove..nang aia naupang, i nau rual daih ania..tikhan anu mai mai che a nih kha." tiin a lo chhang vat a. An han ngawi dun leh vang vang a, "Chuan Alice, van atangin maw i lo kal?" tiin a han zawt leh a.

Alice-i chuan a lu a lo bu nghat mai, "Anih leh vantirhkoh i ni tak tak amaw?" tiin BEna bawk chuan a han zawt leh a. Alice-i chuan a lu  alo bu leh nghat ringawt, Bena chuan zawhna zawh leh ngaihna pawh a hre tawh lo. Alcie-i chu rawn tawng chhuak ve in, "Tunge i hming?" tiin a rawn zawt ve ta nge nge a.

"Bena ka nia, Benjamin Lalfakzuala."

"Nang leh TLuangtea chauh hi em ni he hmunah hian awm?"

"Ihh..he hmun tih ah..aw..kan inah hi chuan kan pafa chauhvin kan cheng a. KA nupuiin min thihsan tawh a, chuan..khi lai deuh ah khian in pali panga vel chu a awm bawk."

"Nupui i nei amaw?"

"Aw nei e, chu..accident vangin min thihsan tawh a."

Alice-i chu a ngawi leh vang vang a, "DAniel Lalhriathlua i hria em?" tiin a zawt leh a. Bena chu a bo kher mai, chutia mihring, mizo hming lehnghal, a zawt ta nulh mai chu mak a ti kher mai. "Tumaw? Daniel Lalhriathlua a?" a ti hu mai a. "Aw ni e, i hre ngai em?" tiin a lo zawt leh a. "Ka van hre lo..chupa chu tunge? Engatan nge i tih a?" tiin Bena chuan  alo zawt let a.

"Ka thil mamawh a kawl a ni, ka hmu duh a ni."

"Eng thil maw?"

"Kawrkilh."

Bena chu a nui suk mai, "Kawrkilh a? Eng kawrkilh nge?" tiin a zawt leh hu mai a. Alice-i chuan thutak zet hian, "Kawrkilh hlu tak a ni, i hrethiam pha lovang." tiin a lo chhang a. Bena chu a han thaw hak a, "Ka hriatthiam theih turin min han hrilh fiah la." a lo ti ve leh a. "Thiltihtheihna tam tak nei a ni a, chumi la tur chuan he khawvelah hian ka lo kal a ni." tiin Alice-i chuan a chhang leh a.

Bena chu  anuih aza tulh tulh mai, mahse a insum hram hram a. A aw a han thian kharh kharh a, "Um..anih leh chu kawrkilh chu tuta nge ni a?" tiin a han zawt leh a. "Pu Vana..Kan PAthian..Pu Vana ta a ni." tiin a lo chhang leh a. Bena chu a ka hau mai, "Pu Vana a? Tunge Pu Vana chu.." a ti leh hu mai a.

"Pathian zinga chak ber pawl, Paradise neitu..Pu Vana. Kei hi a vantirhkoh zinga naupang ber, Lailah-i ka ni." tiin a lo chhang leh a. Bena chu a bo nasa tawh kher mai, "Lai..engmaw..Lailah a? ALice Lalrintluangi ka ni i ti emaw tia.." tiin a han zawt leh hu a. Alice-i chu a han ngawi vang vang a, "Umm nia, chu chu ka mzio hming ania, ka vantirhkoh hming chu Lailah a ni." tiin a chhang ta ringawt a.

Bena chu a thaw huai mai, "Umm..englo, hei..zan a rei tawh si a. Thutthlengah hian i mu hrih mai dawnnia, naktuk atangin i chhungte kan zawng dawnnia...DAniel Lalhriathlua chu in chhungte em ni ni reng reng?" tiin a han zawt leh hram a, Bena pawh hi pa fing tak chu a ni bik chiah lo ni tur a ni.

"Nilo..chuan..enge chhungte chu?" tiin Alice-i chuan a lo zawt leh hu mai. Bena pawh chu a nui suk a, "Engmah nilove..mu phawt la, naktukah kan sawi tha dawnnia." tiin room lamah chuan a luhsan ta daih a. Alice-i pawh chu a mu ve mai bawk, reiloteah chuan a muhil nghal bawrh bawrh mai.

A awmzia chu Onoskelis, kha hremhmun lalfanu kha thiltihtheihna ngah tak, vantirhkoh a nih lai pawh a thiltithei ber leh chak ber a ni a. Khatia Lailah-i (Alice) khawvel lama a thlawh thlak laia a lo man khan, a thiltihtheihna hmangin anchhia a lawh hman a. Lailah-i kha khawvel a tlak rual rualin a vantirhkoh finna zawng zawng deuhthaw a laksak hman a, chuvanga BEna te pafa bulah pawh mi a ang maia awm a ni.

Tin kha anchhia kha Lailah-i taksa ah a bet tawh a, Lailah-i'n Bena awm a khawih chiah khan kha anchhia khan Bena chu a thluak a khawih buai veleh a ni. BEna kha thil theihnghilh hma takah a siam phah a, chuvanga a thil hmuh hmasak zawk, Lailah-i thla zap lai a hmuh te pawh kha a theihnghilh leh vek tawh tihna a ni.

****************************

Zanlai dar 1 leh a chanve a pel tawh a, ruah a sur deuh cherh cherh reng mai. Van sang tak atang chuan engemawni hi chak tak mai hian a rawn thlawk thla a, arsi tla ni awm tak a ni, a sen hian a rawn sen thla chuai chuai mai. Chutah kham sang tak pakhata pukah chuan chu thil chu  arawn thlawk lut a, a ri rum rum mai.

Puk chhung chu a khu rum rum a, mei alh si per ni awm tak tak a leng chuai chuai bawk. Chutah leh, puk atang chuan ramsa ni awm tak, mihring pian nei bawk si. Vantirhkoh thla ang maia lian, thla hrawl tak, dum vek mai chu a rawn chhuak ta a. Puk hmawrah chuan a rawn thu vang mai, ki(horn) pahnih a nei bawk.

Chu sakawlh chu tudang nilovin, hremhmun lalfanu Onoskelis ngei a ni. Chu khawchhe tak mai, chhum zing ruai mai chu a han thlir kual a. Puk atang chuan a zuang thla a, a sang bawk aniang, a tla thla vang vang mai. Mahse lei a thlen dawn tep tih ah chuan a thla chu a han ti parh a, a zap hluap hluap mai.

Tichuan van chung sang lamah chuan a thlawk chho leh vang vang a, Mizoram chu a fang kual ta. Tlang sang tak lam pan chuan a thlawk chho leh vang vang a, lungpui lian tak hmawrah chuan a han t(r)um chat a. Zawimuang chuan a ding kang a, lian tak a ni lian tak. A lo berah ft 10 vel chu a ni ngei anga, kg 200 aia a zan a rinawm loh bawk.

A ban a phar a, zau takin a ang vak a. A thiltihtheihna hmang chuan hring pangngai ah a insiam ve ta, zawi zawiin amah chu a te rawih rawih mai. A taksa te chu a danglam tial tial a, a ki te chu rawn tawi tulh tulhin a sam te chu a rawn sei tial tial bawk. Minute 5 vel lai mai a taksa a inthlak danglam hnu chuan mihring pian ang chiah chiah neiin hmeichhe no nalh tak, chhelo em em mai leh a mitmeng atang pawha lerh tih hriat reng reng.

Pian thiam tak leh sam ngil siau mai, zei hmel takah chuan a rawn chhuak ve ta. A mitmeng te chu a pawl ram mai a, chhelo tak a ni. Saruak vekin a awm a, a nui var var mai. Chutah a hnungzang chu a ruh chuan a rawn tawn pawng a, a ri tuah tuah mai. A taksa atang chuan vantirhkoh thla chu a ti chhuak a, a rawn pawh a dum a ni tawh bik lo, a var a ni ve ta.

A thlawk leh ta vuk vuk mai a, lui pakhat chu zu hmuin chumi lam pan chuan a thlawk thla nghal a. Lui bulah tak chuan a zu tum chat mai, khawchhia pawh a rawn ziaawm tan a, boruak pawh rawn thiang tanin chhumzing pawh a kiang tan ta. Thla a eng em em a, tuiah chuan a thla zu a zu en a.

A hmel a zu hmu chu a lungawi hliah hliah kher mai, a nui var var a. Tichuan a thla chu zap leh hluau hluah vin khawpui lam pan chuan a thlawk chho leh ta vang vang mai. Zan a rei tawh bawk a, khawlaiah pawh mi an awm tawh lo. Lamlian te chu a huh dup a, mahse chhum zing erawh a awm tawh lo.

Kawngsirah chuan a tum a, rang takin a thla chu a vun chhungah chuan a thukru leh nghal vat a. Chutih lai chuan drug addict pakhat, KS dawr zo hlim, rui em em mai chuan a rawn hmu fuh hlauh mai. Onoskelis-i a han hmu chu chu tlangval chuan a it ta ngang mai, chutiang em em a nalh leh pianthiam chu mizo hmeichhia ah a la hmu lo.

Chutah saruak ngal ngatin ala awm zui, KS tho a nih ringin a rui phur bawk si nen chuan ava pan nghal a. "Ehem..kha, ava lum awm deuh ve.." tiin a han chhiah phei nghal a. Zawimuang chuan Onoskelis chu a rawn hawi phei a, tlangval chuan a hmel a han hmu leh chiah phei chu tha hi a han ti em em khawp a, a thidang lo chauh.

Phurna nasa tak a neih belh phah a, a hlim kher mai. Va panhnaih pah chuan, "Tunge i hming ni a, i va in ready em em ve...ka lo dawr dawn che em ni?" a han ti leh vel a. Mahse Onoskelis chuan a chhang lo, a en reng rinngawt. Chupa chuan a hmaiah chuan a han chul a, "Tinge..i chak tawk lutuk a i tawng hleithei tawh nange.." tiin a han nui vel huah huah a.

Onoskelis chuan chupa awm zawnah chuan a kut ava dah a, mizo tawng a thiam chawpchilh ve nghal. Hetiang hi vantirhkoh tawh phawt chuan an ti thei vek a, Keimi thawnthu a Zeros-a'n a tih ve theihna chhan chu Pu Vana kawrkilh thiltihtheihna a hman vang chauh a ni. Vantirhkohte tan chuan a ngai ve lova, an thiltihtheihna tamtak zinga pakhat ve mai chauh a ni.

A nui suk a, "I thawmhnaw ka mamawh...phelh nghal rawh." a han ti chang fak a. Tlangval chu a nui vak vak a, "Oh my God, ava Terminator deuh ve..hawh..sawlai building phenah sawn animai lawm." a lo ti leh vel a. Mahse Onoskelis erawh a nuih a za lo, "Tunge i hming?" tiin tlangval chuan a zawt leh a.

Chutin Onskelis chuan sawitur a hre mai lo, a hawi kual deuh va. Kawngisira dawr pakhat chunga inziak, JANET VARIETY STORE tih chu a han hmu a. "Jenet..Jenet-i ka n." tiin a chhang a. Chutah tlangval chuan inla hlauhawm zet hian, "Anih chuan Jenet, pawisa i duh a, thawmhnaw hak tur i duh chuan ngawi reng khan min lo zui rawh." a han ti vel khur khur a.

Onoskelis chuan a hlau lo khawp mai, "Mangtha phawt le, hremhmunah kan puten an lo hmuak ang che." tiin a ban a phar chhuak a, a kut chu zawi te hian a han tuai vir keuh va. chuveleh chu tlangval chu a thle sawk a,a ringruh a ri tuar mai. Kawngsirah chuan a thal nghal tawp a, a thi chu a ni nghal mai.

Tichuan chupa chu a pu nawlh a, building thim lam chu ava pan pui a. A thawmhnaw zawng zawng chu a phelh sak a, tichuan mipa thawmhaw chu a inbel a. A rawn chhuak leh a, mipa thawmhnaw mah nise a inhmeh kher mai. Nalh tak a ni, a kal te reng reng pawh a confi khawp mai.

Kawng lai takah chuan a han ding vang vang a, "Ka lo thleng ve tawh e, Lailah..khawiah pawh awm la ka zawng hmu tho tho ang che." tiin a hma zawn chu  apan zel a, a kal chak telh telh a, a  tawpah phei chuan a phe zeuh va, a ving phei fua mai. Chung zawng zawng chu lo hmu ru rengtu an awm, building pakhat sir ah chuan Dustin Malsawmzuala, SADIST chuan meizial zu chungin a lo thlir vek chu niin.

*****************************

TO BE CONTINUE