KEIMI (MIZO FICTIONAL CHARACTER STORY) Written by : Aaron Malsawmdawngzuala Chapter-9 (LAST)

 KEIMI

(MIZO FICTIONAL CHARACTER STORY)

Written by : Aaron Malsawmdawngzuala

Chapter-9

(LAST)

***********************

Zinglam dar khat a ri tawh a, Daniel-a te inah pawh an zai thup thup tawh mai. Verahdah-ah chuan DAniel-a chu a thu ngui bar mai a, a bulah chuan Melody a awm ve bawk. "I tha maw?" tiin Melody chuan a han zawt a. Zawi te hian, "Ka tha e." Daniel-a chuan a lo ti sup mai. "A pawi ka ti khawp mai." Melody chuan a han ti leh a.

A mittui te chu hru hulin Daniel-a chuan, "I nu enge a an?" tiin a han zawt let ve a. "A tha a nimai, a ngai reng." tiin a lo chhang a. "ICU ah chuan an dah lut leh ta em ni?" tiin DAniel-a chuan a han zawt leh a. "Umm..biak theih a ni leh tawh lo. Rei a daih pawh ka ring tawh lo, mang a ti ang takzet." tiin Melody chu a inhnit feih feih mai.

"Chutih sawi mah ta che, a tha chhuak leh em em ang...lungngai suh, i bulah ka awm dawn alawm." tiin DAniel-a chuan a hnem a. Melody chuan Daniel-a chu a en vang vang a, a kuah thlawp mai. "Tinge Melo, tinge khatia i awm?" tiin DAneil-a chuan a zawt nghal a. Tap chung hian Melody chuan, "I tap hnemtu tur zawk ka nih laiin, ka va han nep tak. Daniel, ka khawngaih che emai." tiin a bianag chuan a fawp vawng vawng a.

Za lo taka nui lui sak chung chuan, "Ka tha mai ang, i nu kha enkawl tha viau ang che." tiin DAniel-a chuan a kuah vawng vawng mai. Chutih lai chuan Melody pa, Pu Chhuma chu a rawn kal a. "Bawihte, haw..haw tawh ang le." a rawn ti a. Daniel-a pawh chuan, "Va haw tawh rawh u...naktukah kan inhmu dawnnia." a lo ti a.

"Umm anih ka kal phawt ange, min lo be ngei ngei ang che. NAngmah a i tuar ka phal lo ania, min lo biak loh chuan i chak lo viau ang." Melody chuan a han ti nghal deuh khur khur a. "Ka be em em ang che, anih muttui phawt le." tiin Daniel-a chuan a chhang a. Melody chuan apa pawh a zah zo tawh lo, a kal hma chuan DAniel-a chu a kuah leh vawng vawng a.

Motor-a an kal liam thleng chuan Daniel-a chuan a en zui a, chutih lai chuan inspector pakhat hi a lo kal a. DAniel-a bulah chuan rawn dingin, "Post mortem result chu ni 2 hnu velah chauh a lo chhuah theih hmel a, a mak i ti maithei a..mahse Mama, i nu leh pate hliam en hi chuan ramsa beih an ang mah zawk." a rawn ti a.

Daneil-a chuan chhang miah lo hian police pa chu a en deuh hu ringawt a, "Ngaihdan te i nei em?" tiin inspector bawk chuan a han zawt leh a. Daniel-a chu a thaw hak a, "Sir, vanduai vang a ni mahna. An thih chhan chu engpawh nise, hei hi ka tana khuanu ruat a ni." a tizawi sap mai. Inspector chu a hawi hai hle mai, "Awle." tiin a kal ve leh mai bawk a.

***************************

Ni engemaw zat a liam leh a, DAniel-a pawh class a kal ve thei ta. Amah chauh chuan inah a awm thin a, a khua a har thei kher mai. Zan tin Zeros-a leh LAzarus-a zawngin keimi ah intichangin a vak kual thin a, mahse hmuh tur an awm der mai si lo. A mal em em a, mMelody chu a inhnemna a ni ber mai.

Mahse Melody ber lah a nu damlo vangin a buai ve thin si a, Pu Chhuma lah SADIST zawngin a buai a buai reng maibawk si. Tum khat phei chu Melody a rawn kal thei lo, anu awmpui a ngaih vang bawk a ni. Amah hnemtu ber a rawn kal bawk si lo, a thianpa Robet-a lah hrisello tih takah, a lo dam lo ve leh zel bawk nen.

Daniel-a chu a mal khawp mai, tum bur chung chuan groud ah a thu a, lehkhabu a chhiar a. Mahse a rilru erawh a pe hlawl lo, anu leh pa chu a ngai em em a. A rilru ah chuan Zeros-a leh Lazarus-a thah bak a leng mawlh lo a ni, phuba lak chu a tum ruh takzet. Chutih lai tak chuan Dawnga leh Peka an rawn kal a, mahse buaina siam leh tum chu an ang tawh lo khawp mai.

Dawnga chu va kal hnaiin, "Daniel, i tha maw?" tiin ava zawt a. Daniel-a chu a rawn hawi chhuak a, "Tunah chuan ka peih lo, U DAwngte.." tiin a lehkhabu ken lai chu a khup a, a bag ah chuan a khung daih mai. A bag chu a ak leh a, "Daniel, chungtiang lam a nilo.." Dawnga chuan a han ti leh a.

DAniel-a chu a tho vut a, "Intihbuai ka peih hrih lo ka tih chu.." tih pah chuan kal a tum a. Dawngtea chuan a kutah lo man betin, "Daniel, chutiang lam a ni lo ka tih chu. Biak che ka duh, englo ania.." a sawi zawh hma hma chuan DAniel-a chuan a keuh thal tawp mai, ground ah chuan DAwnga chu a ri thum dut mai.

Vin zet hian Daniel-a chuan, "Ka peih lo ka tih chu...vawi engzat nge sawi ngai dawn?" tiin a vin khur khur mai a. DAwnga chuan hlauh hmel tak hian, "Ngaih...ngaihdam..ngaihdam dil tum che a lo kal kan ni." tiin a thaw hlawp hlawp mai. DAniel-a pawh chu a inthiam leh chiah lo, zawimuang chuan a thlah a.

DAwnga pawh chu a rawn tho va, "I chhungte chungchang kan lo hria a, a pawi kan ti khawp mai. Chuan..a hma a thil thleng te avang khan kan tihpalh aw..kan tihpalh takzet." inthiam lo tak chuan  ahan ti a. Daniel-a chuan a chhang lo, en pawh en lo chuan a lu chu a bu nghut nghut ringawt a, a kalsan daih mai.

**************************

Zan a lo ni a, Zeros-a leh LAzarus-a chu DAniel-a te inbulah an awm leh der tawh. DAniel-a in chu an en vang vang a, "Zanin chu a tawp kan khar tawh ang, he keimi hi kan dahthat a hun tawh takzet a ni. Tunah chuan BElzubula ramhuai rawn tirh ho pawh ka hnawt kiang vek tawh, keimi tawpna  ani tawh ang." Zeros-a chuan a han ti charh charh a.

LAzarus-a chuan zawi sap hian, "Ka Lalpa, keimi hi lo that ta pawh ni ila...Keichala thlarau kha hremhmunah kan thawn chhoh theih phah dawn em ni?" tiin a lo zawt a. Zeros-a chu a nui suk a, "Lazarus, he Pu Vana kawrkilh hnathawh dan leh Pu Vana'n Keichala thiltihtheihna a pek dan hi, a hnathawh dan i la hre chiang lovin a lang." tiin kawrkilh chu a phawrh a,

Van lamah chuan a lek kang a, "Hei hian engkim, thiltih theihna min pe a ni. Mahse  apawi ber chu...Vanram atanga siam a ni a, a thitltihtheina hi a vaiin kan hmang ve thei lo a ni. Mahse a hman dan tawk ka thiam alawm, chuan keimi hi kan that a nih chuan Keichala chu a thlarau a thlawk chhuak ve nghal a nimai, he khawvel atang hian.." a han ti a.

"Ka LAlpa, ka va la hrethiam chiah lo ve."

"A awmzia chu maw..Pu Vana khan huna pe leh a ni, Keichala kha hun a pe leh a ni. Tichuan Keichala khan Daniel-a hi anchhia a lawh a, a phuba lak duh vangin..chuvang chuan keichala thlarau hi keimi kutah a awm a ni."

"Anih chuan keimi hi kan that a nih chuan...Keichala thlarau pawh a chhuak ve nghald awn tihna em ni?"

"Ni chiah e, nilo se helai keimi satliah hi ka buaipui peih reng teuh lo mai."

Chutih lai chuan an hnungah chuan thawm an hria a, rang takin an hawi phei nghal. Mahse tumah an hmu hauh lo, "I hre ve tiraw?" tiin Zeros-a chuan a han zawt a. "Hre ve e, ka Lalpa." tiin LAzarus chuan a lo chhang vat a. Thawm a awm leh tak silovah chuan an ngaih chu a tha leh mai a, "Kan che dawn em ni?" Zeros-a chuan a han ti leh a.

Lazarus pawh a lu a lo bu nghat mai, tichuan bakah inti changin DAniel-a te in lamah chuan an thlawk phei dun ta. Ventilation inhawngah chuan an thlawk lut dun a, mahse inchhung chu a lo reh huai mai. Hmun tinah an thlawk a, mahse DAniel-a chu hmuh tur a awm lo. Room te chu a lo inhawng tlang vek a, inchhung chu a reh thup mai.

Zeros-a leh LAzarus-a te chu mihring ah an inti chang leh a, a aia nasa zawk chuan an zawng leh ta a. Mahse Daniel-a hmel reng reng hmuh tur a awm ta hauh lo mai, mak an ti dun angreng khawp mai. LAzarus-a chuan a hnar chu a han len deuh va, "Ka Llpa, chu rim chu enge...amak lutuk?" a han ti nuah nuah a.

Zeros-a pawh chuan inchhung rim chu a hre ve ta, "Khawnvar tui, engkim hi  ahuh vek. Min hal a tum, he keimi hian a ruahman lawk vek a ni." a ti ta mai a. Chuveleh kawngka pui chu a ri rawk a, pawnlam atang chuan a inkalh daih mai. Zeros-a te pahnih chuan kawngka pui lam chu an va pan vat a, an hawng thei ta tlat lo.

Lazarus-a chu rang lutukin a phe zeuh va, ventilation lamah a han zuang nghal. MAhse a rawn let thla rang hle mai, dawhkan bawh chhe rum rum khawp chuan a rawn thal thuai mai. Zeros-a chu ventilaition lam a han hawi chho va, Daniel-a chu a lo bet tai mai. Rum tak hian an pahnih chuan a rawn melh a, mahse keimi ah erawh ala inti chang bik lo.

VEntilation chu a khar a, tichuan a zuang bo leh daih mai. Chutah choka lama gas bur pakhat chu a rawn puak dur mai a, in pum chu  aalh ta hluah hluah mai. Lazarus lah hliam a lo tuar mek bawk nen, a che hleithei lo. Zeros pawh bakah a inti chang nghal a, thlawh chhuahna tur a zawng nghal.

Mahse tukverh zawng zawng pawh a lo inkalh vek, pawn lam atangin a lo indo vek bawk. Mei a khu rum rum a, mei alh lah a nasa tulh tulh bawk. Thenawm khawveng te an rawn kal a, mei alh chu thelh tumin an rawn bei nasa. Zeros-a magnang chu Lazarus-a chu a kai tho vat a, tichuan kawrkilh chu a phawrh leh nghal.

A hum vang vang a, a rawn eng pawl leh ta vut mai, tichuan an pahnih chuan an bo daih mai a, him dam tak chuan an chhuak leh thei ta. Ral khat atang chuan an inkang chu DAniel-a chuan a lo en reng a, a mittui a tla zawih zawih mai. Thenawm khawveng te pawhin an thelh mit thei ta, "DAneil..Daneil.." tiin an au vak vak hlawm mai.

Daniel-a chu va phei a tum a, mahse a hnungah chuan tu emaw a awm tih a hria. A va hawi phei a, Keichala a lo ni. DAniel-a chuan rum tak hian a en a, "Eng thu nge min rawn hrilh leh dawn tak?" a ti deuh hlur a. Zaidam tak hian Keichala chuan, "I in i chan mai mai a ni...an thlakw bo leh daih tawh." a ti ta mai a.

"Engmaw? Enge i sawi awmzia?"

"Daniel, i that lo...an pahnihin an dam."

"Engtin nge i hriat?"

"Kawrkilh, Pu Vana kawrkilh a kawl tlat, Zeros-a khan.."

"Chuan..kawl pawh nise...enge an tih theih? An pahnihin ka hal hlum, midang thah belh hi ka duh tawh lo."

"I hal hlum lo, an thlawk chhuak lai pawh ka hmu a ni. Pu Vana kawrkilh khan thil tam tak a ti thei, chu chu i hre ve lo a ni."

DAniel-a chu a ngawi vang vang a, "Anih leh engtin nge ka thah ang?" tiin a han zawt a. "Ka sawi tawh kha, phuba min laksak rawh. I thiltihtheihnate, i chaknate, i tha hrui te..engkim hi a bik a ni. Pu Vana siam che i ni, DAniel. I tha chakna hmanga i beih angai, i hneh thei." tiin Keichala chuan a han fuih leh a.

Chutih lai tak chuan Melody chuan a rawn call a, "La suh...theihnghilh hrih rawh. Tunah hian an kalna ka hria, mahse kei erawh ka taksa a ral leh tep tawh a, ka pui thei lo che." Keichala chuan a lo ti leh a. Daniel-a pawh chuan a phone chu a hmet tawp ve mai bawk. A mittui a tla phung mai, "I duh chuan kawrkilh chu va laksak la, mihring pangngai min nih tir leh rawh." a han ti vin hlur a.

"Ka tihpalh, DAniel..mahse phuba min laksak angai. Kei hian i keimi nihna kha ka ti tawp thei lo, kawrkilh saw kan mamawh a ni. KA sawi tak ang kha....ka tiam a che, kawrkilh i lak leh hunah chuan i keimi nihna hi ka hlihsak ang che." tiin phuba lakdan tur chu a hrilh chiang a, keimi ah inti chang ve ve in ramhnuai lamah an tlan lut dun ta a.

****************************

Zeros-a chuan ramhnuaiah chuan Lazarus-a chu a tum pui a, a khu vut vut mai. Lazarus-a chu a lo inhliam hman chu niin, a lo kang nual mai,. A kang te chu plastic kang sawr ang mai hi a ni a, hmuh a nuam lovin a rapthlak takzet. A na a ti em em a, a then chawk chawk mai. Zeros chuan kawrkilh chu a phawrh chhuak leh a, Lazarus-a hliamah chuan a han hmeh hnan vang vang a.

Tichuan a hliam zawng zawng chu chawp leh chilhin a rawn dam nghal vek mai, amah pawh a thaw huai mai. Zeros-a chu a thu hnawk a, "Chu naupang mai mai chuh...mei alh hmanga min thah a tum amaw? A luhlul takzet, a tlawm dawn bik lo a nih hi." a han ti nuah nuah a. A hliam a dam tawh bawk a, pawr tak hian Lazarus chu a rawn ding chhuak a.

"A chak dawn lo....min hal hlum a tum ve amaw? Tunge kan nih a hre lo a nih hi...a chak lo khawp ang." tiin a inhrosa tun tun mai. "Insum rawh, Lazarus...khawiah emaw chuan a biru ve khanglang a nih dawn hi. Tunah tak phei chuan kan thi amaw a ti tawh ngei ang, ho takin a in neihchhun a hal phah ringawt ania...khawngaihthlak lutuk." tiin a nui huah huah mai.

"A in mai nilovin, a nunna pawh a chan dawm alawm." tiin Lazarus lah a lo la pawr ngang mai. Chutih lai chuan an hnungah chuan tu emaw hi  arawn t(r)um thum dut mai a, rang takin an hawi let nghal. Keichala a lo ni reng mai, "NAng..nang maw?" tiin Zeros-a chuan mak a tih hmel kher mai.

Lazarus-a chuan a thiltihtheina hmang nghalin rang takin a phe leh zeuh mai, Keichala chu va hnek a tum a. Mahse a sir atang chuan keimi a rawn lang thut a, a rawn zuan tlu nghal. An insual ta chiam mai a, an inhneh tawk khawp mai. Chutia keimi leh Lazarus-a an insual mek lai chuan Zeros-a leh Keichala chu an lo la inveh reng a, an inmleh no lo dun kher mai.

"Taksa thar..taksa thar i lo nei leh tawh animaw? Nang sakei putar kha, in pafa hian ka that law law dawn che u." tiin Zeros-a chuan a vau khur khur mai. Keichala chu a nui suk a, "Kan en ang chu...i thiltitheihna chu lan tir ta che. Ka sawi kha ila hria em? Phuba..phuba chu ka la rawn la khawp ang ka tih kha...hei tunah chuan ka fapa a lo thleng ta a lawm." tiin a lo chhanglet ve ngat a.

Zeros-a chu a nui huah huah mai, "Enga? Engmaw i sawi a? I phuba latu tura i ngaih chu saw keimi satliah saw maw..Keichal, i theihnghilh ta em ni? Keichuan kawrkilh ka nei, he khawvela thil nung awm zawng zawng hi ka thuhnuaiah ka dah thei. Chuan i sawi, i fapa, phuba rawn laksatu tur che i sawi, i chhuan ve em em, saw keimi saw chu kan tan chuan zawhte satliah mai a ni." a lo ti let hrep mai.

Keichala chu a nui var var a, "In tan engmah a ni lo amaw? Anih chuan i naute zinga pahnih, Silas-a leh Magnus-a kha tu thah nge? Vampire 30 chuan chakna belh bawma i siam te an ni lawm ni? Kawrkilh thiltihtheihna chhete mah hmang lovin awlsam takin DAniel-a sawn a that, chuan tunge la bang..Lazarus-a chauh a ni...tunah an inbei mek, hnehna a chang em..saw va en ta che." tiin Lazarus-a leh keimi insual lai chu ava kawk a.

Zeros-a pawh a va hawi phei a, Lazarus-a chu theih ang tawkin che rang ve mahse, keimi chuan a lo man hman zel mai. A tawpah chuan thingkungah a rek bet a, a lu chu a keih bun ghmawk mai. Tichuan Lazarus-a pawh a thi ta, keimi lah chu thirim meng sen rum chung chuan a rawn hawi phei a.

Zeros-a chu a thinrim hle mai, kawrkilh chu phawrh chhuakin a awmah chuan a nam bet a, bak lian em em leh rapthlak tak maiah a rawn chang ta. "In duh tak tak ani lawm ni? Khawnge lo kal ta che u...i inbei ang hmiang. In pafa khan ka that dawn che u..lo kal rawh u." a ti khur khur mai. Keimi chuan a han zuan nghal a, mahse awlsam tak hian Zeros-achuan a lo vei leng lawp mai.

Thingkung a deng dawt a, a tla ri thum dup mai. Han thawh leh mai a tum a, mahse a thei tlat bik lo. Keichala chuan a han pui ve leh a, mahse Zeros-a chuan Keichala rawn zuang chu a lo man chat mai. Hla takah chuan a vawm leng dawrh mai a, a rum phei vang vang mai. Keichala chu a rawn tho leh a, a rawn tlan phei lehnghal.

Mahse kawrkilh chu Zeros-a chuan a han hmet leh zeuh va, keimi chu Zeros-a bul a thlen hma hma chuan tuma khawih loh hian engemawni hian a paih leng leh dawr mai a, kawrkilh thiltihtheihna vek a ni. Keichala pawh rang takin a rawn tlan thleng ve leh nghal, keimi nen chuan an han beihrawh chiam a, mahse an hneh thei nang lo.

A tawpah phei chuan Keichala phei chu a tho thei tawh lo, keimi pawh a hliam nasa tawh mai. Zeros-a lah engtin mah ala awm lo, hliam pakhat te mah ala nei lo. ZAwi zawiin a rawn te tial tial a, "A va han harsa lo berkher em...in thi dun pafa dawn chiang alawm." tiin a han nui vel huah huah a.

Keimi chu rawn thawh a tum leh a, mahse Zeros-a chuan a lo rapbet nghal. A khi suk a, "I pa ang chiah ini...i pa ang chiah. Keichala pawh a tawpna kha tiang chiah chiah hi a ni, zawhte hmaibal. Tunah chuan i hun a thleng ve ta..Moon Monster ka nih hi..engtikah mah min hneh thei chuang lovang." tih pah chuan a hrawkah a han ram leh a.

Keimi chu zawi zawiin mihringah a rawn chang a, Daniel-a a rawn ni leh ta. Zeros-a chuan hmuhsit hmel tak hian, "Zeros ka nih hi...engtikah mah min hneh chuang lovang." tih pah chuan Daniel-a chu a hnek leh hrep mai. Daniel-a chu a thi phung tawh a, men pawh a meng thei mang tawh lo.

Chutah hnai takah Zeros-a chuan a en a, "Thu hnuhnung sawi duh te i nei em?" a han ti vel a, Keichala lah a che thei der tawh mai si lo. Chutah DAniel-a chu a maimitchhing vang vang a, a pa in a thih dawna a thusawi hnuhnung ber kha  a hrechhuak ta zawk mai. Thei leh thei lova apa in, "Bawiha, i thei..i chak, i chak zawk a ni." a tih lai chu a bengah chuan a rawn ri nawn tluk tluk mai.

Chutah a rawn meng thut a, a mitmeng chu a hring nghulh mai. Keimi ah a rawn chang leh nghal a, Zeros-a ke chu a hmer ta vak mai. Zeros-a na ti lutuk chu a per nghal at a, chu chu remchangah la in keimi chuan a awm zawna kawrkilh chu a va ban nghal, mahse a lo bei nghet lutuk tlat.

Zeros-a chuan theihtawpin lo dan a tum a, mahse keimi chuan a man bet ve tlat mai si. A tawp a tawpah chuan keimi chuan kawrkilh chu a phawi thei ta, a kutah chuan a hum nghet sauh sauh va. A rawn eng pawl ta pup mai, kawrkilh hum reng chung chuan Zeros-a chu a han hnek pawp a, vanah a chho dawrh mai.

A rawn tla leh lampang chu Keichala chuan a lo man ve thung, a hrawkah rekin a vaivir vak vak a, boruakah chuan a paih leng leh dawr a. Chu chu keimi chuan lo zuan veleh in a duhtawk chuan a sawisa ve ta, lei charah chuan a vawm pawp pawp hi a ni ber. Zeros-a chu a hliam nasa kher mai, a hma zawnah chuan keimi chu kawrkilh hum chung chuan ala ding reng a.

Chutah lir a rawn nghing a, an awmna chu a rawn che ta dut dut mai, Keimi chu DAniel-a a rawn ni nghal vat a, a hrethiam lo kher mai. Mahse Keichala erawh chuan a hrethiam, "Nilo..Bel...BElzebula." tih pah chuan DAniel-a chu a pawt phei vat a, thingkung phenah chuan a bihruk pui nghal a, amah pawh chu mihringah a inti chang ve nghal.

Zeros-a hnung lei chu a rawn khi a, mei alh so bawrh bawrh ri niawm tak chu a rawn ri nghal bawk. Lei khi chu a rawn zau zel a, mei alh a rawn khu chhuak so bawrh bawrh mai. Chutah ramhuai ku sei tak nei, lian em em leh rapthlak em em mai chu a rawn chhuak ta mai a. DAniel-a chuan mak ti tak hian, "SAw..saw saw..saw saw tunge?" a ti hu mai.

"BEngchheng suh..BElzebula  anih saw?" tiin Keichala chuan a lo chhang a, chu ramhnuai Belzebula chu a rapthlak em avang leh a len em avang chuan Daniela pawh a tawng zui ngam tawh lo. Zeros-a chuan hlauh hmel tak hian a en a, "Ka..Ka Lalpa, ka tih..ka tihpalh." a ti nghal vak vak a.

Thum chher chhur hian Belzebula chuan, "ZEROS...khawiah nge kawrkilh? Nang hian hmelma ah min siam amaw?" a ti ta chhur chhur mai. "Ka..Ka Lalpa, ka pe ang che..hun min pe rawh.." tiin Zeros-a chuan ngaihdam a dil mawlh mawlh a. Mahse Belzebula ngaihdan a ni tawh lo, "Thiamloh chantir i ni e...meidil ah min rawn zui rawh." tih pah chuan kei khi karah chuan a pawt lut ta daih mai.

ZAwi zawiin lei khi pawh chu a rawn ping leh mai a, Keichala leh DAniel-a te pawh an bihrukna atang chuan an rawn chhuak ta. Keichala chu a han thaw hak a, "Khawi le..kawrkilh chu min pe tawh rawh le." a han ti a. Daniel-a chuan kawrkilh chu a han en vang vang a, "Engtin nge i tih dawn?" tiin a han zawt a.

"Pu Vana hnehah ka pe let ang. Ka venhim sak a, mahse ka venghim tlaun zo si lo. Tunah chuan i zarah kan nei let leh thei ta e. Min pe la, nangpawh keimi i ni tawh lovang." tiin Keichala chuan a chhang a. DAniel-a chu a han ngawi leh vang vang a, "I phuba phiangsen vang khan ka nu leh pate ka chan a, tumah neih ka nei tawh lo. Chuvang chuan he ka keimi nihna hi i la kiang tawh lo anga, he kawrkilh pawh hi i nei tawh hek lovang." tiin a chhang ta daih mai.

Keichala chuan mak a ti hle mai, "Daniel, engmah i hrethiam lo. Kha kawrkilh kha mihring kawl chi a ni lo, Pu Vana thil hlu neih te zinga mi a ni. Thiltihtheihna tam tak a nei a, i hmang thiam ve lovang." tiin a hrilhfiah nghal. Daniela chu a nui suk a, "Umm..a tha e, mahse ka kawl dawn. Nang hian fahrah ah min siam a ni...Pu Keichal, he kawrkilh hmanga kha milim chhunga ka dah let leh hma che hian thlawk bo rawh." tiin kawrkilh chu a lek kang a, a tin ta ran mai.

Keichala pawh tih ngaihna a hre lo, "DAniel, a pawi dawn ania. I tan a pawi dawn...ka sawi chu ngaithla.." a sawi zo hman lo, chu kawrkilh thiltihtheihna hmang chuan Keichala chu a dawi bo daih mai a, boruak pawh a reh thuap mai. Daniel-a chu a zawi kher mai, thlanmual lam pan chuan a kal thla hnak hnak a.

A nu leh pate thlanah bulah chuan a thu a, a tap zawih zawih mai. A phone a en a, Melody miss call a lo awm teuh mai. Text message pakhat a lo awm a, "Ka nu a thi..Daniel, tinge min chhan loh?" tih hi a lo ni. Phone chu a dah leh nghal a, a chhang ta chuang lo. Pu Vana kawrkilh chu a en vang vang a, a nui suk ringawt.

****************************

ONE WEEK LATER

Zan khat chu Pu Chhuma chuan Dustin-a awmna a hre hlauh mai, reprot a dawn dan atang chuan CS farm ah party naah a awm tih a ni. Rang takin police force, 10 rual nen CS farm lam pan chuan an chhuk ve nghal a. A hmun chu an thleng a, mipui an lo tam khawp mai. An lo lam mup mup mai a, police ho chuan Dustin-a chu an zawng nghal.

Rei fe an zawn kual hnuah chuan swimming pool bula nula a lo chhai lai chu Pu Chhuma chuan ava hmu fuh ta, chung lamah silai chu a hmet puak nghal a. Music a reh a, mipui pawh an ngawi nghal thap mai. Dustin-a chu a rawn hawi a, Pu Chhuma hmel a hmu chu a khi sak mai. A thuthmun atang chuan a rawn tho chhuak a, "Wow..Officer Pu Chhuma a lo kal e, enge i duh ve tak mial a?" tiin ava pan a.

Pu Chhuma chuan a pistol chuan lo tinin, "Dustin Malsawmzual, man i ni e." a han ti chang fak a, police dangte pawh chuan an lo tin ve nghal. Dustin-a chu a nui vak vak a, "Jail atangin ka rawn haw ve chuauh a, ka tang peih tawh hleinem. Pu Chhum, i mak ve ngawt mai." tiin a nui huah huah a.

Thinrim tak hian Pu Chhuma chuan, "Min rawn zui rawh, a nih loh chuan ka kap hreh miah lo che ania." a han ti khur khur a. Dustin-a chu a khi suk a, "Hmm..Lal Pu Chhuma han over zia hi chu...mi hi a duat lo thei ania. Tiraw duat...nang chuan min duat tiraw?" tiin a bula nula, hnunglam hawi reng chu ava kheuh zeuh va.

Chu nula chu a rawn hawi a, tudang nilvin, keimi hmu hmasa bertu, SAngtei kha a lo ni. Dustin Malsawmzuala bialnu a lo ni reng chu niin, "Dik chiah mai." a rawn ti ve nghal a. Pu Chhuma thinrim lutuk chu a thlan fim a luang zawih zawih tawh mai, "Dustin, ka kap hre lo che ka tih chu." a han ti khur leh dar dar a.

Chutah Dustin-a hmel chu a rawn danglam a, a rawn thinrim ve ta. Rum zet hian Pu Chhuma chu a en a, "Min kap hreh lo maw? Anih chuan helai hmun ami zawng zawng te pawh hian an kap hrep bik lo che." tiin a chhang let a, chu veleh party naa awm zawng zawng, a hmei a pa chuan pistol an rawn phawrh ta vek mai.

Pu Chhuma leh police dang ho chu an tin ta thup mai a, "Ka hnauai thawk te vek an ni. Party a, han intih thawven ve te kan duh a. Mahse i rawn kal dawn tih kan hria a, kan lo inring lawk ve anih hi." Dustina chuan thawveng tak chuan a han ti leh a. PU Chhuma chu a ding ngawi reng ringawt.

Zawi sap hian, "Lo ngai reng rawh...kei hian ka kut ngeiin ka man leh dawn che a ni." a ti khur dar dar a. Dustin-a chuan nui chung hian, "AWle, i thi vek alawm..boss, kan han lam leh ange, kal vat mai teh u." a lo ti hmak mai. Lungawi lo tak chuan Pu Chhuma chu a let leh a, a naute chuan an rawn zui ve bawk a.

*******************************

THE END