THE CURSE (MIZO : ANCHHIA) Story by : Aaron Malsawmdawngzuala MIZO FICTION HORROR STORY WARNING : 18+ CHAPTER - 5

 THE CURSE

(MIZO : ANCHHIA)

Story by : Aaron Malsawmdawngzuala

MIZO FICTION HORROR STORY

WARNING : 18+

CHAPTER - 5

***************

Mka chuan in chu a thleng a, car atang chuan a chhuak a. A arsa lei chu khai in kawngka lam ava pan phei a, chahbi a han phawrh a. Tala hawn a tum lai tak chuan a darah chuan engemaw tuihnang hi a rawn far a, a phu deuh zuk mai. A han enchiang a, chirh niawm tak, hnang thluar mai, dum nguk mai hi a lo ni.

Chunglam chu a han hawi chho vat a, mahse engmah chutiang far tur awm ang a hmu der si lo. A ramawlh chu phawrhin a han hru a, mahse a kawr hak chu a var a ni bawk nen, a reh thei ta reng reng lo mai. Chutah rim ala nei zui a, a rimchhe em em mai lehnghal. "Eng thil nge mawni le?" tih nuah nuah pah chuan tala chu a hawng a.

Inchhungah chuan a lut a, "Michael..Bawiha, ka lo haw tawh ania." a han ti lauh lauh va. Mahse Michael-a chuan a chhang hauh lo, inchhung chu a lo reh tlawk tlawk mai. A hawi kual a, a fapa chu a hmu hauh lo. Inchungah a awm a nih ringin kawngka te chu a han kalh fel leh a, a hawi let leh chiah chu a phu zuk mai.

A fapa Michael-a chu lehkhabu dahna chhuar bulah a lo ding reng mai a, a la tum ang hmuk zui a. "Khai...nichin khan ka hmu silo che a. Engtik laiin nge khatah khan ilo awm hman a?" Mka chuan a han ti a, mahse a fapa chu a ngawi reng mai. Mka bawk chuan, "Vawiin chu hun ilo hmang nuam maw?" a han ti leh a.

Michael-a chuan chhang lo chuan  alu a bu nghat ringawt a, "I lo hlau em?" tiin a han zawt leh a. Chhang lo chuan a lu a thing leh ringawt, Mka chuan mak a ti angreng kher mai. Choka lamah chuan a phei a, "Hei vawiin tlai chu arsa kan hmeh dawn ania, a tui ngawt ang." tih pah chuan sa chu dawhkanah chuan a dah a.

"Chhun ah enge ilo ei?" tiin lehlam a hawi leh a, mahse Michael-a chu a lo awm tawh miah lo. Mka chuan mak a ti kher mai, "Bawiha..Bawiha.." tiin a au vak vak a, mahse a reh tlawk tlawk mai si. "Khawnge maw a lo kal hman le?" ti nuah nuah chu chuan a lu thak lo pui chu a hian nauh nauh va.

Inchung lamah chuan a chho va, room ah chuan ava lut ta. A ding chat mai, a fapa Michael-a chu khumah a lo muhil bawrh bawrh mai a. Mka chuan a hrethiam lo hle mai, "Ehe...hetah a lo mu leh daih amaw?" a ti nang nang mai a. Michael-a pawh chu a rawn harh a, "Ilo haw tawh elaw." a lo ti heu mai.

Apa chuan a en vung vung a, "I harh chiah ami?" tiin a han zawt a. Mit nuai nauh nauh pah chuan, "Um..ilo haw lai pawh ka hrelo reng reng." tiin a lo chhang ta mai a. Mka chu a hrilh hai ngei mai, ngawi reng chuan a inthlak a. A fapa pawh chu a han zi mar al al a, "Ihmaw pa..vawiinah kan tukverh tu emaw in a rawn vawm a." a ti ta mai a.

Phawk hru hian Mka chuan a fapa chu en in, "Enga? Tuin maw rawn vawm?" a ti nghal vat a. "Ka hre biklo, a hmel pawh ka hmu thei lo." tiin a lo chhang leh a. A ngaih a thalo zual kher mai, "Amah chu i hmu em?" a han ti leh a. "Hmu e, puan dum a sin a. Naupang aniin ka hria, hmeichhe naupang." a lo ti leh a.

Mka chuan a hma zana hmeichhe naupang niawm tak, puan dum sin a hmuh kha  a hrechhuak zawk mai. A fapa chu a en leh a, "Chu naupang chu tunah khawnge a awm?" a han ti leh a. Ham bui bui chung chuan a fapa chuan, "Ka hrelo..ramhnuai lam pan sawn a kal leh daih a." a lo ti sam leh et mai.

Mka chuan a fapa kum 9 mi lek chu office kalsan a, inah amah a awm tir chu a tum tawh lo nghal bur. "Bawiha, naktukah phone dawrah kal ila...i phone khawih ve tur kan lei dawn nia." a han ti a. Michael-a chu a lawm hle mai, "Yes, tak tak maw, apa?" a lo ti nghal chul a. "Umm..tak tak e, mahse ka thu i awih angai ang." Mika chuan a han ti a.

"Awih dawn chiang, enge ka tih tur?"

"Inah nangmahin i awm tawh lovang."

"Mahse...office-a lo awm ve reng kha chu a boring e."

"Phone i nei tawh dawn alawm, car ah ilo awm anga. Mamawh i neih changin min rawn phone anga, i duh leh games te ilo khel anga."

"Min lei tak tak dawn te chuan."

"Lei tak tak dawn e a, naktuk zingah kan chhuak hma anga. Phone dawrah kan kal anga, kan lei dun ang."

Michael-a lawm lutuk chu a nui ver ver reng mai, mahse apa erawh ngaihthat lohna hlir chuan a khat tawh a. A inthlak zo va, "Hawh...chhuk ang le. Laptop kha keng thla la, sitting room ah ka rawng bawl chhungin games ilo khel dawnnia." a han ti leh a. "Enge kan hmeh dawn?" a lo ti vat a.

"Arsa ka rawn lei alawm, ka siam tui ngawt ang."

An pafa chuan an inzui thla a, Michael-a chuan sitting room lam a pan nghal a. Laptop ah chuan games a khel a, chutih lai chuan apa chuan rawng a lo bawk bawk a. Mka ngaihtuahna chu  a kal thui tan ta khawp mai, a in luah lai mek a hrang tia an hrilh thute chu a ngaihtuah let leh a.

Mahse inla pa ve tak, huaisen inti ve tawk tak kha ani miau va. Ngaih tha lo chung chung chuan a ngaih a ti tha lui hi a ni ber mai, a khat tawk chuan a fapa chu a va melh leh zauh zauh zel a. Eng thil danglam mah chu a thleng zui lem lo, chaw an eikham hnu chuan sitting room ah chuan hna  a thawk mawlh mawlh a.

Thutthlengah chuan a fapa chu a muthlu bawrh bawrh a, "Tlaiah a tho choh kha ania, mut ava duh ve mawle." tiin a khi suk a. Ruah a rawn tla cherh cherh a, boruak chu a rawn vawt tan ta viau mai. A rei zel a, a sur hnem ta telh telh mai. Khawpui ri leh kawlphe te chuan an rawn chhunzawm a, boruak chu vawt tawh tak a ni.

Thutthlenga a fapa lo mu khur bauh bauh chu a pawm a, room lamah chuan a chhoh pui a. Khumah chuan a mut fel a, chutih lai tak chuan inhnuai lamah chuan thawm a hre ta tlat mai. Chu thawm chu TV ri a ni, mahse TV an nei der si lo. Mka chu muang chang chuan a zu chhuk a, thawm chu a ring tulh tulh mai.

TV STar chhiat avanga ri sur sur ang mai chuan thawm chu a ri sur sur reng a, "Eng thil phiangsen nge maw ni le?" tiin Mka chuan mak a ti kher mai. Inhnuai chu a zuk thleng ta, a rin ang ngeiin bang kila an dah, TV chhia chu a lo in on a, an khuhna puan var atang chuan a screen eng pawh chu a hmu thei a ni.

A va pan hnai a, mak a ti kher mai. A wire te chu khawi plug ah mah a in connect si lova, mahse TV chu a ri reng tho bawk si. Puan chu a la thla a, screen chu a var paw phuk ringawt a. Han off a tum a, mahse awmzia a awm bawk silo. A han beng thin, mahse TV chu a in off thei thak lo mai.

Chutah ri sur sur mai chu a rawn tawp hmak a, screen chu a rawn dum vek mai. Mka ning lutuk chuan a han tlawh pawp a, TV chu a tla ri rup mai. Chuveleh screen chu a thim ve mai a, thawm a awm zui ta lo. A laptop chu khawih lehin hna chu a thawh chhunzawm leh a, a zawh meuh chuan dar 12 a ri der tawh mai.

A tho va, silhmun lam chu ava pan a. A mit chu a han nuai a, a hmaa a thil tawnte chu a han ngaihtuah let a. A luah luh hmaa khaw mipuiten a hrang tia an lo hrilh te chu dawt a nih a ring tawh bik lo, mahse a luhlul ve em avang leh pa huaisen tak a nihna chuan a inluah lai mek chu a hrang a ni tih ala pawm tir thei thlawt lo.

A thil hmuh leh hriat te kha a tak ngei niin a hre si, a taksa chauh vangah te chuan a han ngai thul. An office toilet-a mihring mit ni awm tak a hmuh te, arsa zuar tunu chetdan leh a hnu lawka a hmel inthlak ta daih te, a haw hnua a fapa lo awmdan te chu a ngaihtuah let a, a rilru a hah kher mai.

A han thaw hak a, "Ka mutna damdawi ei vang te hi ani mai angem aw?" a han ti nauh nauh va, tichuan chawhtawlh lian lenglawng chu a la chhuak a. Silhmunah chuan dah in tui a dawh khat vek a, a maimitchhing vang vang a. Chawhtawlh a tuiah chuan a lu chu a han hnim a, thaw lovin a awm vang vang mai.

Second 6 vel hnuah chuan a rawn dak chhuak leh a, a han thaw hrawih hrawih a. Tichuan thawk a han la leh a, a inhnim leh a. Second 10 vel hnuah chuan han dah chhuak leh a tum a, mahse a lu chu tu emawni hian a rawn nem ta vak mai. Mka chu chu kut chuan tuiah chuan a hnim tihna  a nih chu, Mka pawh a che buai ta.

Second 20 dawn mai chu chu kut tha chak tak mai chuan Mka lu chu a hnim lui zel a, Mka chu a tal vak vak ringawt mai. A tawp a tawpah chuan a lu chu a kan thei ta, chhuatah chuan a tlu tawp thei hial. Tui chu a hak bawrh bawrh mai a, a thaw a chham hman teuh kher mai. RAng takin a hawi kual a, mahse tumah a hmu der silo.

Rang takin dawhkana laptop chu a la a, choka light chu off vatin hmanhmawh tak hian inchung lamah chuan a chho va. Choka sirah chuan pa pakhat, hmai vun thler nuai mai leh mitmu var pup mai chuan room lama Mka chho lai chu a lo en reng a, mahse Mka erawh chuan a hmu velo thung.

Ruah chu a la sur bur bur mai a, khawl lah chu a phe zawk zawk bawk. Current a la thim hmak zui, Mka chu room ah a lut a. A fapa chu a lo hnar suk suk mai a, a thaw huai mai. Amah pawh chu a inhru hul a, khumah chuan thuin a khur ve deuh ta dar dar mai. A thaw halh halh a, "Engthil nge? Engthil khe ka lua min rawn man tu kha? Tunge a nih ang?" tiin a inbe mawlh mawlh a.

Thil lah chu a thaw vuk vuk mai si, an room tukverh pakhat chu a rawn inchhem hawng a, a invaw ri thuai mai. Mka chu a phu nasa kher mai, a tho zawk thei hial. Tukverh lam chu ava pan a, khar mai a han tum chu a tawp leh ta chat mai. Hnuailam a zu melh zeuh chu mihring a hmu tlat, chupawh ahmaa a hmuh thin tho, a fapa Michael-a ngei pawh ina a sawi, kha hmeichhe naupang niawm tak, puan dum sin kha a ni.

Mka chuan a zu en char char a, chu naupang pawh chu a lo hawi chho ve reng bawk. Mahse a hmel erawh a hmuchiang thei lo, puan dum chuan a la intuam reng bawk. Chutah a tlan leh thut a, ramhnuai lamah bawk chuan a tlan lut leh ta daih mai. Mka chuan police phone mai chu tha in a hre ta a, a phone chu a phawrh a.

Mahse a han inngaihtuah tha leh a, zan a rei tawh nen, khua a chhe bawk nen. Police chu phone leh loh chu a thlang ta zawk a, mahni tawka huaisen inti ve tak chuan chutia hmeichhe naupang mai mai vanga police call chu a tum leh ta lo. Khum lam apan a, a fapa kuah chung chuan a muhil ve ta a.

**************************

A tukah chuan hma takah chuan an pafa chuan an chhuak dun a, phone dawrah chuan kalin a fapa phone tur chu a lei ta a. Sim card te leh memory card te chu a buaipui sak nghal vek a, tichuan office lamah chuan a tlang pui ta a ni. Office chu an thleng a, "Carah hian lo awm la, chuan hei i pawisa hman tur aw.." tiin pawisa chu a pe a.

"Thil i lei a nih pawhin dawr hla ah kal suh ang che, chuan mamawh i neih chuan minlo phone mai dawnnia." Mka bawk chuan a han ti leh a, tichuan a chhuahsan ta a. Mka chuan a en zui leh deuh vawng vawng thin a, a fapa a lo hruai ve ta kher kher chu a inchhir tan ta hle mai, chu mai nilovin a inluah lai mek chu chhuahsan vat a duh rum rum bawk.

Office chhungah chuan a lut a, a dawhkan ava thleng chu a ding chat mai. A dawhkanah chuan samzai thahnem tak, hrawh hrup leh dum tliang nghul mai a lo awm a. Mak ti tak hian a en reng a, "Tu lo dah nge mawni le?" tiin a han hawikual a. A dawhkan bulah chuan hmeichhia tumah thu an awm ve silo, a bula bawlhhlawhbawm teah chuan a pai mai a.

Chutih lai chuan a bula mi, a thawhpuipa, Papuia chu a rawn thleng ve a. "Ekhai, min lo thlen khalh a nimaw?" a rawn ti lut a. "Keipawh ka thleng deuh chiah." tiin a lo chhang a. Papuia chuan Mka bawlhhlawh bawm chu enin sam zai chu a zu hmu ve a, "Ehe..khu khu samzai a ni em?" tiin a han zawt a.

"Aw anih khu....ka dawhkanah alo awm ringawt a."

"Nang hi hmeichhe sam zai i hmu thei riau mai, tumah ka awmpui lo i ti bawk sia."

"Ka awmpui lo reng alawm, hmanni a ka kawr nghawng a lo awm pawh kha tute nge ka hrelo."

"Kan thawhpui hmeichhe ho zingah hian star tu i nei anilo maw?"

"Nei pawh ni ila sam zai han dah kher, chubakah hetiang khawpa hraw leh dum sam nei an awm pawh ka hrelo."

"Ti daih ila MK, khawi ah nge in i luah a? Khawi veng berah nge?"

"Saw..khawi daia in saw..a fap deuh a awm saw."

"Khawi khaw dai maw?"

"Saw...ramhnuai lam hnaih ber saw...sihpui pan pheina...dai ah sawn..i hrelo mi?"

Papuia mit meng chu a dik ta hauh lo, "Saw in saw maw i luah a?" a ti ta hu mai. "Aw...neitu awmlo in a ni bawk a, a remchang em alawm." tiin a lo chhang leh mai a. Mahse Papuia chu a serious hle mai, "MK...saw in saw a hrang tih i hrelo em ni?" a han ti leh a. Mka chu a thaw hak a, "Hrilh chu min hrilh ngei a, a tir chuan ka awih vak lova, mahse tunlai chu ka hmusual nge, thil mak deuh deuh hi ka hmu thin a." a han tih takah chuan Papuia chu a meng phawk nasa kher mai.

"Thiana, enge i hmuh thin?"

"Mihring a ni chuan ka hria, hmeichhe naupang niin ka hre bawk. Hman zan khan kawngka a rawn kik a, ka va hawng a, mahse a tlanchhe daih a."

"Engtin nge a inthuam dan? A hmel i hmulo em ni?"

"Aw hmu thei lo, puan dum hi a sin tlat zel a. Nimin khan ka fapa inah amahin ka awm tir a, a lo hmu ve bawk a ni awm e. Kan tukverh a lo vawm a ni awm a, mahse engtin mah chuan a che chhunzawm lemlo. Nizan mut dawn khan ka hmu bawk, kan inbulah."

"Police call vat rawh...chuan a rang thei ang berin in luah tur dang zawng bawk rawh."

"Chu chu keipawn ka duh, a hrang tak tak chu anih hmel."

"Nizan chuan engtik velah nge i hmuh?"

"Dar 1 chu ala ri lo deuhvin ka hria, ruah kha a sur hnem bawk sia. Police call pawh ka tum ve tho va, mahse khua a chhe bawk nen. Hmeichhe naupang mai mai a ni bawk a, keimah ngei hian fiah ka tum dawn."

Papuia chuan hriatthiam loh hmel tak hian, "Nizanah ruah a sur lo hrim hrim." a ti ta daih mai. Mka chuan phawk zet hian, "Eng a? A sur lo a?" a lo ti hu mai a. "Aw sur lo, khua a thiang that em kha." tiin a lo chhang leh a. Mka chuan mak a ti kher mai, "Ava mak awm ve, ka awmna laiah sawn a sur bik tihna em ni?" a han ti nuah nuah a.

"Thianpa, inluah tur dang zawng vat rawh. Anih loh chuan a buai telh telh mai ang, he khua ami hi ka nia, saw in saw chu kan hnaih lo viau nangin eng eng emaw sawi thawm hi ka hrehnem teh ania." Papuia chuan a han ti leh a. Mka pawh chuan, "Nia...nakinah kan sawi leh dawnnia." tiin hna chu an thawk tan ta a.

Lunch Break ah chuan Mka chuan a fapa chu a zu awmpui zuai a, ani pawh a phone chu a lo la tleipui kher mai. Eitur te chu a han eipui zuai zuai a, "Tihian lo awm leh la, ka'n bang har lovang. Lo kal hla suh aw, ka kal ania." tiin a kalsan leh ta a. Mka car ah hian phone charge-na tur a awm sa a, chu chu Michael-a chuan a hmang pah bawk a ni.

**************************

Tlai a lo ni a, Mka te ban pawh a hun hnai ta. Pawnah chuan Michael-a chu car chhungah a la awm reng a, a zun a chhuah changa kawngsira zun in a ava zung tih loh chu a chhuak lo hrim hrim. A phone thar chu a tlei pui hle a, Mka te office bul hnai velah net a lo chak tha bawk nen. A mit chu a na thum tawh hial zawk a, phone chu a han dah ve ta rih a.

A mit a han nuai nawk nawk a, a tui in a hal deuh avang chuan tui a han dap kual a. MAhse bottle zawng zawng chu a lo ruah vek avang chuan a pa pek pawisa chu la in tui lei tur chuan a chhuak ta a, dawrah chuan ava kal a. Chutia dawr nghaktu in pawisa kir tur a han chhiar melh melh lai chuan dawr sira step chhukthla chu a en a, step tawpah chuan thlanmual hi a lo awm a.

Step mawngah chuan a hma ni lawka a hmuh, kha hmeichhe naupang, puan dum sin bawk kha a hmu leh ta. Michael-a chuan a en reng a, chu naupang pawh chuan a rawn en ve leh reng tawh mai. Dawr nghaktu chuan pawisa chu pe in, "Kha le." a han ti a, mahse Michael-a chuan hriat pawh a lo hre lo.

"Mama...kha i pawisa kir." a han ti deuh vak takah chuan Michael-a pawh a phu zuk mai, "E..aw..ka lawm e." a ti bah nuai mai. PAwisa kir chu ala a, a kekawr ipteah chuan a ak mai a. Step chu a zuk en leh a, hmeichhe naupang chu a lo la ding reng. Michael-a chu stepah chuan a chhuk a, chu hmeichhe naupang chuan a lo la en reng a.

Michael-a chuan a zu pan hnai zel a, chutah chu naupang chu thlanmual lam pan chuan a tlan thla ta daih mai. Michael-a chuan a zui ve zel a, chu nu lah chu a kal chak tawlh tawlh mai. A tawpah chuan a bo ta daih mai a, Michael-a pawh chu a ding chat mai. A awmna chu a han en a, thlanmual chu a lo thleng ve der tawh a.

Mahse khawi ber nge a chhuk thlakna step kha a hre ta hauh lo, step pasarih vel lai mai hi alo awm a. Khawi emaw ber chu a ni tih hre mahse, a khawi ber nge kawngpui pawh chu a hre ta hauh lo mai. Step lai tak chu a nih ringin a han pan chho vang vang a, mahse step chu a lo tawp daih mai.

Thlanmual lamah chuan a chhuk leh a, step dang zawkah chuan a han chho leh a. Mahse chutah pawh step chu a lo tawp leh daih mai a, a mangang tan ta hle mai. A phone lah motor chhungah a dah daih bawk si, a tap deuh nghal pur mai. Thlanmual ah lah chuan tumah midang an awm ve der silo, a hmeichhe naupang zui thlak ber lah kha hmuh tur a awm tawh der bawk silo.

**************************

Mka te pawh chu an bang ta, bathroom lamah panin zun ram ava thiar a. Chutih lai chuan a thianpa Papuia chu a rawn lut ve a, "Thianpa, ka sawi kha aw...inluah tur dang chu zawng vat rawh." a rawn ti leh a. "Um nia...nangpawn min zawn pui la aw.." a lo ti a. "Tehreng mai, ka zawn pui em em ang che." tiin Papuia chuan a lo chhang a.

"Diktak chuan maw...in luah tur dang kha a vang em a ni."

"Nia...covid vang hian inluah tur zawnga kal kual pawh hi a inthlahrun awm em a ni."

"He hripui hi chu a khamawm ngawt mai, tiraw?"

"Chu chu lawm, mahse kan khua ho chu kan vannei zawk a. Nikum pawh khan hri kai kan tlem a, thihpui phei chu kan awm miah lo."

"E taka...chawhma lama i sawi kha, enge i hriat chu min han hrilh ve la."

Papuia chuan zawite hian, "Englo ania maw...1994 nge 95 an tih kha ka chiang ta lo. Saw inah sawn nupa an cheng thin a, fanu pakhat an nei bawk. Chuan an pathum chuan an inah thi in an chhar vek a, chumi hnu chuan tlangval pakhatin 2008 khan a luah leh a. Ani pawh kar 3-na velah a thi a, mahni inthat ni ngeiin an hre bawk." a han ti te te a.

Mka chuan a ngaithla uluk kher mai, "SAwi zel rawh." a lo ti a. "Chuan khata ruang buaipuitute kha, police ho kha..chumi zan chuan Police Station ah an inkap chiam a, an thi vek. In lama lo awm te pawh ahnuah natna mak tak tak neiin an thi leh vek bawk a, khaw mipui thenkhat, ruang buaipuitute zinga mi pawh a hnuah an thi leh vek bawk." a han ti leh a.

"Chu tih lai chuan i awm ve em?"

"AWm nang..keite chu khaw dangah ka awm char char alawm, kum 10 chhung. 2017 khan ka rawn haw chiah a, tichuan kan company hi ka join ve chauh alawm."

"Anih chu...nihleh chumi lo chu thildang thleng a awm em?"

"Aw awm tehreng e, ka rawn haw kum lehnghal khan mawle. 2017 khan..pawl 10 zirlai hmeichhe pathum te chu mak deuh deuhvin an thi ringawt a, mahse pakhat kha chu a inawkhlum a. Chuan pakhat chu saw inah sawn a ruang chhar a ni a, a taksa a bung hmawk an ti lehnghal. Chuan tleirawl pakhat a bo bawk a, tun thleng hian hmuh ala ni lo."

"Nia...ruang an chhar fo tih te, eng eng emaw chu ka hria alawm. Engmah kha ka awih lem lova, a lo thleng tak tak anih pawhin thil thleng satliah ve maiah ka ngai a, ka lo uksak vak lova."

"Chung tleirawl te chu an vaiin school khata lut vek an nia, pali an thi a, pakhat chu a bo tihna a nih chu."

"Naktuk hi ka day-off a nia, inluah tur zawn hun tak a nih chu. Nangpawhin min lo ngaihtuah pui la, kan inbe leh dawnnia."

******************************

Mka chu pawnah chuan a chhuak a, a car lam chu ava pan a. Tukverh a dah pah chuan, "Ilo ning tawh em?" a han ti nghal ringawt a. Mahse a fapa hmel reng reng a hmu ta lo, motor chhung chu a lo ruak vek mai. "Ehe..kawhnge a kal le?" tiin a zawng kual nghal a, "Michael..Michael.." tiin khawlaiah chuan a a tlan kual ta vut vut mai.

Dawr pakhat ah chuan va lutin, "Ka pi...saw car atang sawn naupang pakhat lo chhuak lai i hmu em? THil te a rawn lei mial em? Kum 9 mi..mipa naupang, ngo lampang...sam buk deuh.." a han ti nghal chel chul a. Dawrnghaktunu chuan, "E..aw...thlanmual lam pan khan a chhuk daih a. Tui a rawn lei kha mawle..tinge a?" tiin a lo zawt let a.

Mka chuan a chhang lo, rang lutukin stepah chuan a chhuk ve nghal a. Reiloteah thlanmual chu a zu thleng a, "Michael...Bawiha.." tiin a au vak vak a. Minute 10 dawn lai mai a zawn tawh hnu pawh chuan a hmu hauh lo mai, "Khawnge i awm, Bawiha?" tiin a mittui a tla teuh tawh mai a, a mangang kher mai.

Chutia a zawn buai lai chuan thlanmual mawng, thingkun phena tu emaw ina a lo bih kur mai a hmuh chuan a ding chat a. A han enchiang chu kha hmeichhe naupang, puan dum sin bawk kha a lo ni. Mka chu thinrimna hlirin a khat nghal a, "Hey..nangnu kha..tunge i nih?" tih pah chuan a pan thla nghal a.

Chuveleh chu naupang chu a tlanchhe nghal daih mai, "Ding rawh...ding nghal rawh." tiin a au zui vak vak a, mahse a tlan chak tawlh tawlh thung. A umzui zel a, mau hmun ah te chuan an inum lut a. Mahse a hloh ta tlat mai, chu naupang chu hmuh tur reng reng a awm ta lo. Mka chu a mangang kher mai, thlanmual lam pan chuan a let chho leh a.

A han zawng kual leh a, chutah thlanmual mawng lam thovah chuan ava hmu ta. Mahse a hmuh dan erawh chuan a rap takzet, mitthi ang mai hian a fapa chu thlan chhuatah chuan a lo mu zangthal a, a lo maimitchhing bawk. Rang takin ava pan a, "Bawiha...harh teh.." tiin a sawi nghal vak vak a.

Michael-a chu a rawn meng a, apa  ahmuh veleh chuan tapin a kuah nghal. "Pa..ka hlau..ka hlau." a ti nghal vak vak a, apa chuan lo kuah letin, "Tinge ngawi renga i kal bo daih a? Lo chhuak hla suh ka tih kha.." tiin a hnuk a ulh ve hial a. Thaw hlawp hlawp hian a fapa chuan, "Hmeichhe naupang..kan in rawn vawmtu kha..khanu khan min hruai a ni." a ti ta mai a.

*************************

TO BE CONTINUE