THE CURSE (MIZO : ANCHHIA) Story by : Aaron Malsawmdawngzuala MIZO FICTION HORROR STORY WARNING : 18+ CHAPTER - 1

 THE CURSE

(MIZO : ANCHHIA)

Story by : Aaron Malsawmdawngzuala

MIZO FICTION HORROR STORY

WARNING : 18+

CHAPTER - 1

****************************

(Thu hma tlem nei leh lawk teh ang aw, a pawimawh emai. Keia story ve teh lul in lo chhiar ve duh hi ka lawm a, min fak derna te pawh ka tan chuan hlu tak a ni. Mahse ka story hi a tlangpuiin hlauhawm lam, tualthah leh rilru buai chungchang vel a ni tlangpui a, mipat hmeichhiatna leh chhungte nena han ngaihthlak emaw, chhiar rik ngam chiah loh chi a ni thin tih ka hria. Hei vang tak hian WARNING ka dah thin a, kum naupangte tan chhiar loh hram nise ka ti thin. Thawnthu tui zawng leh ziah duh zawng hi a in ang lova, a thenin LOVE STORY an tuipui em em laiin kei chuan hetiang lam hi ka tui ve thung tlat lawi si a nih hi. Comment-na lamah leh FB inbox thlenga rawn inkhak hi a awm thin a, an fate mut theih loh phah ah min puh hial te pawh an awm. A pawi ka ti takzet a, ka inthlahrun phah hle bawk. Mahse ka thiamthu sawi ve theih chu a chunga ka sawi ang tho khi a ni mai, WARNING ka dah tawh chuan kum 18 chunglam chauh chhiar theih tihna a ni. Kum 18 ila tling lova, i chhiar lui duh anih chuan kha chu ka rawn control theih pawh a ni lo. Mahse inkhak phah nan emaw, fate leh tute ti dawihtu ah hi chuan inpuh tawh lo ila, kan za atan pawh a tha awm e. Ka lawm em em e, a bik takin...in vaiin.)

***********************************

(2008)

Ruah a sur nasa em em a, khawpui a ri dur dur bawk. Kawl lah chu a phe zuai zuai reng bawk a, pawn boruak chu rapthlak tak a ni. Thingmawi Khaw daia in lian tha vek tak pakhat, fal ang reng takah chuan Lalrinsanga, Rsa chu amahin a cheng mek a. Rsa hi kum 36-a upa niin he khuaah hian a rawn awmna ala rei lem lova, kar 3 vel bak ala luah lo.

Chu zan khawchhe tak mai chu Rsa tan chuan zan duhawm loh ber a ni hial ang, a chhan chu amah chauhvin chu inah chuan a awmin a inhre tlat lo, a inhre lo mai nilovin, midang awm ve an awm tih a hrechiang hle zawk. Rsa hi anihna takah chuan Champhai mi daih a ni a, Thingmawi Khuaah hian hna vangin amahin in a luah ta a ni.

A tir chuan luah tur a hmu mai lova, Tourist Lodge ah leh Hotel ah te riak kualin hna chu a zawm ve nghal mai a. Mahse chutia zan khat lek riah man pawh cheng fe chawi zel a ngaih takah chuan inluah tur chu a han zawng ngun leh deuh va, khaw mipuite zinga mi thenkhat chuan he in hi an lo kawh hmuh ta a ni.

Chumi zan chuan Rsa chu sitting room thutthlengah chuan a thu ngawi reng a, puan sin chungin a hawi kual zek zek reng mai. T(r)ek rawn tla ri leh dum thin chuan a ti phu nasa thei em em a, "A lem vek a ni...a tak a nilo...a lem vek.." tiin ama hriat tham leh chuan a phun sep sep reng bawk.

Choka lam ah te chuan mihring tlan ri niawm tak te chu a hre bawk a, amah chu tu emaw hian a rawn kal hual leh thut thin ang tlat hian a inhre bawk. A beng a hup a, "Duhtawk rawh, khawngaihin...duhtawk hram rawh." tiin a aw chu a ri chhuak tawk tawk a ni ber. Patling thinrim rum chhur chhur ri chu minute tin deuh thaw in a bengah chuan a ri sek bawk a, a thlan a tla zawih zawih mai.

Naupang nui ri niawm tak te chu inah chuan a khawk leh rum rum thin a, nupa inhau vak vak ri niawm tak te chu Rsa tan chuan thil thar a ni lo. Zantin a hria, mahse ngaiah a nei thei lo. A mit te chu a sen vek a, a hmel en reng reng pawhin a mu tlem takzet a ni tih a hriat hle. A phone a rawn ri a, an manager a lo ni.

Mahse a chhang lo, a reject leh nghal zel a. Hei hi a chhan chu engdang vang nilovin, Rsa chu hna a kal ngai loh vang leh chanchin engmah a sawi ngai loh vang a ni. Chutah ahma a TV chu amah in a rawn in on a, thlanmual hi a lo lang a. Rsa chuan  a hlau kher mai, khur zawih zawih chuan a en reng a.

Chu thlanmual ah chuan tumah an awm lo, thli a thaw vuk vuk ringawt. Chutah TV screen ah chuan rannung te tak te, tam tak hi an rawn vak ta sup sup mai. Thlan lung pakhat phen atang chuan hmeichhe naupang pakhat, kum 6-8 mi vel lek hi a rawn chhuak ta mai a. Kawr fual uk lam, bal zet mai hi a ha a.

A kal dan atang reng reng chuan hmeichhe naupang pangngai tak chu a nilo tih a chiang reng, a kal khur hlawk hlawk mai. Hnuailam melh reng chung chuan a rawn kal hnai zel a, chutah TV screen ah chuan chiang em em hian a lang a. Muangchanga rawn hawichhuakin Rsa chu a rawn en ta run mai, a hmai lah chu a dang var pup leh nghal.

Tap pur chung chuan Rsa chuan khur zawih zawih hian a en reng tho va, chu naupang chuan a kut chu phar chhuakin ama ka(mouth) chhung chu a zen ta mai. A lei(toungue) chu vuanin a pawt ta ngawng ngawng mai a, Rsa chuan a rap hle mai. Chutah chu hmeichhe naupang chuan a lei chu a pawt na telh telh a, a thler ta duai mai.

Rsa chu a lo t(r)e thawt a, "Nilo...nilo.." tiin a au vak vak ringawt. Chu naupang ka atang chuan thisen a baw chhuak zawih zawih a, Rsa melh reng chung chuan a ka chu zau takin a ang a. Mihring pangngai tan chuan kha tiang em em a zau khan a an theih hauh lovang le, a lei thler duai mai te chu a lang chiang em em mai lehnghal.

Chutah light a rawn phe leh zawk zawk a, Rsa chuan awm ngaihna pawh a hre tawh lo. Tlangval senior ve tak tawh si chu aw rawl chhuah meuhvin a tap ta vak vak mai, "Kal bo rawh...min kalsan rawh...ka duhlo." tiin a au tuar tuar a. "Min pui ruuu.." tiin tanpuitu ko mahse, tuman an hre pha silo.

Sawi tak ang khan he in hi khaw daia awm a ni a, a fal em em bawk. Ramhnuai lam hnaih a awm a ni a, he in atanga in hnai ber chu km chanve vel laia hla a ni. Chutah TV chu a rawn thim ta hmak mai a, light pawh chu a rawn eng pangngai ve leh ta. Mahse a eng nep em em a, inchhung chu a thim deuh ruih mai.

Hlauh hmel tak hian Rsa chuan a phone chu a han en vang vang a, muang chang chuan a han ban leh a. A la kang a, a han hmet eng a. Engkim chu a pangngai vek, police phone tuma number a han chhu lut chiah chu a phone mawnglam atang chuan rannung an rawn vak chhuak leh ta sup sup mai.

A au vak vak a, a phone chu a theh thla leh nghal. Chu chu zan dangah pawh a thleng fo, heivang tak hian a phone pawh hi a khawih tha ngam ngai lo a ni. A ril a tam em avang chuan a pum chu a ri rawih rawih mai a, kar 1 chuang chu engmah a ei mumal tawh lo.  A thingthi a, tawngtai tumin a maimitchhing a.

Mahse engmah a chham hman lo, patling aw thum tak, nui ri huah huah chu a maimitchhin rual rual chuan a hre nghal a. Chupawh chu zandanga thleng fo tho a ni a, a tan chuan chu a inluah chu hremhmun diktak a ni. "Ka chhuak duh...he in atang hian ka chhuak duh." tiin chhuatah chuan a bawk thlawp a, a tap zawih zawih mai.

A han ngawi deuh vang vang a, chutah chiang em em hian a rawn meng kawk mai. Thinrim hmel tak hian, "A tawk e...a tawk zozai tawh e." tiin a tho chhuak a. Choka lam pan chuan ava kal a, pawhdawh a hawng a. Chemte hriam tak mai chu  ala chhuak a, a hrawkah chuan a chuktuah ta mai.

A mittui a tla a, "Ka tihpalh ka nu...ka pa...in thu ka awih lova...ka hmangaih che u...min ngaidam hram rawh u." tih pah chuan a hrawk chu a zai ta, thisen a chik tuar tuar mai. A khur ngat ngat a, chhuatah chuan a thal der mai. Thisen chu a luang kawi nuai mai a, reiloteah chuan Rsa chu a thi ta der mai.

*****************************

(2017)

Thingmawi Khia High School exam zawh ni a ni a, zirlai naupangte pawh an exam zo chu mahni inah haw mai lovin an lengkual nghal sap sap hlawm a. Chung zinga chuan thian ho pakhat, pawl 10 zirlai, Remremi te thian ho pawh haw mai bik lovin an lengkual ve hlawm a. An khuaah hian chutia han intihhlimna tur, park emaw, thildang eng vak mah a awm loh avang chuan han lenna mai tur chu an van angreng hle.

Remremi te thian ho hi 4 an ni a, hemi tlai hian an class-a mi pakhat, tawng tam lem lo tak, Jenny chu an kawm ve bawk. Mi inhnuaiah meizial te zu ru in ngaihzawng chungchang sawiin an nui nasa hlawm hle a, mahse Jenny erawh a ngawi reng thung. Hemi tlai hian Jenny hi a thutpuinu, Remremi te thian zinga mi tho, Rosy chuan exam zawh  ani tho bawk a, an bula lo kal ve turin a sawm a ni.

Remremi te thianho hming hi han tarlang lawk ila, Remremi hi a hmingpum chu Lalremruati a ni a, an thian ho zinga an boss ve deuh ber a ni a, a nasa ve thawkhat hle a, an thian ho hi an nasa ve hlawm hrim hrim niin an sawi. Duhsaki hi Remremi best friend a ni a, an inzui deuh chawt a, midang pahnih te chu Rosy leh Bsi te an ni.

Chutia an titi mawlh mawlh laia Jenny lo ding ngawi reng chu Remremi chuan ava en a, "Jenny, tawng ve bawrh bawrh ta che." a han ti a. Nuih suk pah hian Jenny chuan, "SAwi tur ka hre ve hleinem." a lo ti mai a. "Aww..i bialpa chungchang te pawh. Hmeichhia vek kan nih hi, engkim in share vek tur..mawh han sawi teh." Duhsaki chuan a lo ti ve bawk a.

Jenny chu a lai angreng kher mai, "Bialpa ka nei lo." a ti zawi sap a, midang ho chu an nui deuh huk mai. Awih loh hmel tak hian Bsi chuan, "Tak tak em ni? I zep mai mai a nilo maw?" tiin a lo zawt vat a. "Aih zep lo. Ka nei lo tak tak, chubakah ka chhungten bialpa neih an phal lo hrim hrim." tiin Jenny chuan a chhang a.

Midang ho chu an han nui vak vak a, "Awiii keini pawh an hre hleinem, a rukin kan nei mai alawm. Duh deuh te i nei reng reng em? Kan tihpui ang che, i chhungte hriat kher angai hleinem." Remremi bawk chuan a han ti leh a. Jenny chhan hma chuan Rosy chuan, "Keichu kan class ami Ricky-a melh dan che kha a diklo deuhvin ka hria, a star chiang che alawm." a lo ti ve bawk a.

"A awihawm loh...chubakah tumah ka duh lo."

"Hmm...nangchu kawm i nuam lo e, i cool si." tiin Remremi chuan a meizial zuk lai chu a han fawp leh vang vang a. "Kha zu ve reng reng teh.." tiin Jenny chu va pek a tum a. Mahse Jenny chuan lo hnarin, "Aih..ka zu ngailo." tiin a lo chhang a. "Han fawp ve hrim hrim teh." tiin an hnawn lui tlat a, Jenny chuan a ban ve ta nge nge a.

A han fawp ve a, a khuh ta vak vak mai. An nui dar dar hlawm a, "Awii sorry lutuk aw Jenny, ka fiamthu mai mai anih kha.." tiin Remremi chuan a hnung a chum sak a. Jenny chu a mittui a tla phung mai, "Kei chu haw mai ka duh tawh." a ti tham tiak a. "AWiii...ala hma emai. Hei dar 3 pawh ala ri lo, ho lutuk." Bsi chuan a lo ti vat a.

"Anu ten lo haw nghal rawh an tia, ka haw har chuan min hau animai."

Rosy chuan ngaihsam hmel zet hian, "Lungngai reng reng suh, keiman in in thleng ka rawn thlah che anga, ka rawn sawi fel sak vek ang che. Chubakah exam zawh ni te a ni ve a, haw nghal a peihawm hlei nem." a han ti a. Jenny chu a ngawi vang vang a, "Khawnge kan la kal dawn?" a ti deuh hu mai.

Remremi chu a han ngawi vang vang a, "Ka hria.." a rawn ti chhuak deuh thut mai. "Khawiah maw?" tia midang hovin an zawh chuan Remremi chu a han hawi kual a. Chutah zawi te hian, "In hrang an tih ah khan va kal ang u." a ti ta mai a. Midang ho chu an meng phawk nghal hru hlawm mai, "In hrang a?" tiin Jenny chuan a hlau nghal em em a.

"Dai ami kha em ni i tih?" tiin Bsi chuan a lo zawt vat a, "Aw ni e, awii ka kal chak thin zia chu." tiin Remremi chuan alo la chhang ta deuh deuh. Remremi hi tleirawl danglam tak a ni ve hrim hrim a, naupang te e tilo chuan mipa pawh nise tumah a hlau ngai lo. An zirtirtute pawhin lehkha thiam thei viau lo se chu hnawhchhuah tlak a ni ti hial khawpa an lo sawi ve thin kha a ni.

A huaisen hle a, an class a mipa tam zawk te chu a insual pui vek tawh bawk a ni awm e. Tin, thlahrang leh ramhuai tih vel hi engmah a awihin a ring ve ngai lo bawk. A rilru a nat chang emaw, a mangan chang chuan an kawmthlang huan mawngah amah ten a lo zu kal thin a ni awm a, chutian khawpa hmeichhe luhlul leh kawlhrawng chu a ni.

"A hrang a nih te chuan kei chu ka kal ngam teuh lo mai." tiin Jenny chu a khur titih nghal a, ngaihnep hmel zet hian Remremi chu a lo nui suk mai. "Tlawhpawh an phal vak loh kha...chubakah a reh si. Keichu zep lo chuan ka kal ngam vak lo, mahse midang ho hian in ngam a nih chuan ka kal ve ngam tho." Bsi chuan a lo ti ve bawk a.

Duhsaki pawh chuan, "Awii hlauhna chhan tur pakhat mah a awm lo, an sawi uar mai mai aniang." tiin a phur angreng hle. Mahse Rosy chu a lo ngawi vang vang mai a, "Tinge Rosy, nangpawh i hlau em ni?" tiin Remremi chuan a han zawt a. Thutak hmel zet hian Rosy chuan, "Rem...i patea pawh kha.." a ti chiah chu Remremi chu a meng dur nghal khup mai.

Bsi leh Duhsaki te chuan Rosy chu an lo melh hrawk a, Jenny chuan a hrethiam lo hle mai. Remremi chu a en a, "Tinge Remrem? Enge i patea chungah chuan thleng a?" tiin a zawt nghal a. Bsi chu za lo tak hian a nui a, "Engmah a nilo..hawh u..kal ang u." a lo ti vat a. Mahse Remremi ber chuan, "A ho lutuk, ka'n sawi ange." a ti ta a.

A han thaw deuh hak a, "Saw inah sawn 2008 kum khan mitthi an chhar a, chu chu saw mi in luahtu ber a nia. Tichuan midangin an luah leh hnu pawhin a hrang tiin an chhuahsan zel a, chu chu ka patea hian a awih lova. Amah ngeiin fiah tumin zan khat chu ava riah chilh a, a tuk zingah chuan pangngai takin a lo haw veleh mai a.." a sawi lai chuan  ahan ngawi deuh vang vang a.

Chutah sawi zawm leh in, "Tichuan kan bathroom ah a in awkhlum ta a ni." a ti ta mai a, Jenny tih loh midang pathum erawh chuan an hriat hnu a nih avangin mak an ti lem lo. Mahse Jenny erawh chuan a vawikhat hriatna a ni tlat, "Ngati maw? Ngati nge a in awh hlum a?" a ti nghal chel chul mai a.

Rosy chuan, "Saw in sawn huai a nei an tia, a luah tute apiang chu an thi zel an ti." tiin a lo chhang a. "Anih chuan engvang teh lulin nge kan va kal anga? Keichu ka duh lo, ka kal dawn lo." Jenny chuan a ti ta hmak mai. Mahse Remremi chuan rum zet hian Rosy chu a melh a, "Ka patea kha kha ina a va riah vanga in awkhlum a nilo, khatih lai khan an nu nen an inthen lai ania, a rilru nat vang zawk a ni." a lo ti vin hlur mai.

"Keichu hlauh vang ni miah lovin, a hlat em vang zawkin ka kal peih vak lo." tiin Bsi chu a khi deuh suk a. Rosy lah chu ngawih mai a tum lo, "Ka chhungte phei chuan kal hnaih an phal lo hrim hrim...an sawi dan chuan sawmi inah sawn kan pian hma daih tawh khan inthat an awm tawh a, chumite thlarau chuan an la chenchilh reng a ni an ti." a han ti ve leh a.

AWihloh hmel zet hian Remremi chuan, "Awi awi awi....dawt muhlum hlak a nih chu. Khawiah hian a hrang lo ange...chubakah ka patea inthahna chhan a lo ni a nih tak tak chuan va fiah ka duh hrim hrim, keimah chauh pawhin ka kal ngam." a la ti tan tan mai. "Remrem, i inla huai sual ange aw.." Rosy bawk chuan a han ti leh a.

"Enge ka huai sualna tur? Saw ina thlahrang te sawn kei hi min lo that dawn tihna em ni?"

"Chutiang lam pawh a nilo, keini hriat ve loh thil hi ka chhungte hian an hre hnem lutuk. 2008 kuma mitthi ruang an chhar pawh kha, a buaipuitu police zawng zawng te kha a tuk zanah Police Station ah an mahni leh mahni an inkap chiam a, an thi vek an ti asin. Chuan khaw mipuite zinga ruang buaipuitute pawh natna mak tak tak neiin an thi vek bawk an ti."

Remremi chuan vin lek lek hian, "Phuahchawp vek anih kha, engmah kha awih tur a awm lo. Chutiang thil thleng tak tak ni se khawvel pumah kan khua hi a lar ngawt ang, mahse Mizoram chhungah pawh kan khua hrelo an tam lutuk. Thil hi an sawi uar leh lutuk a, va kal ila, a hriat mai ang chu." a la ti deuh hlar mai.

Nin hmel zet hian Duhsaki chuan, "A tawk, inhrang tih vel mai mai vanga inhnial a ngai lo. A kal ve ngamlo chu kalloh mai tur, kei chu ka kal dawn." a han ti hlur a. Bsi pawh chuan, "Keipawh ka kal ve dawn." a lo ti ve bawk. Remremi chuan Jenny chu a en a, "Ilo kal ve dawn em?" a han ti a, mahse Jenny chuan  alu a lo thing a.

Bsi chuan nui chung hian, "AWii i dawih emai Jenny, kan kal ho vek ang chu. Chubakah chhun pachangah thlahrang an inlar ngai lo, hawh u..khua a tlai hma hian kal vat ang u." a han ti leh a. Rosy erawh a ngawi reng thung a, "Hma kan hruai ange.." tiin Remremi chu a kal ta a. Bsi leh Duhsaki chuan an zui a, hreh tak chung chuan Jenny leh Rosy te pawh chuan an zui ve ta nge nge a.

**********************************

Rei fe an kal hnu chuan a mala in lo ding, hlui ve lampang tak mai chu an va hmu ta. "Saw saw ania." tih pah chuan Remremi chuan a han kawk a. Jenny erawh in a hmuh rual rual chuan a hlau tith nghal der mai, gate bulah chuan an panga chuan an ding thap mai. "Keichu pawnah ka lo nghak ang che u." Jenny chuan a ti ta tlat mai a.

"A fair lo, lo lut ve rawh." Rosy chuan a han ti a, mahse Jenny chuan a duh tlat lo. "A pawi lo, a ngam loh te chuan tih luih angai lo, hawh u lut ang u." tiin hma a hruai leh ta a, midang ho chuan an zui a. Jenny erawh chu gate bulah chuan a ding reng a, "Ka lo zui ve kher kher a ni." a ti nang nang mai.

Tala chu an han chhu vak vak a, mahse a sak em avang chuan hmeichhe awmnem zawk an lo ni bawk nen, an chhu hawng thei mai lo. An beidawn tep hnuah chuan amahin tala kalhna chu a rwn inhawng ri ta khep mai, mak an ti hlawm hle a. MAhse Remremi erawh chuan, "Hlau nghal ngawt zel suh u, kan chhut kan chhut vang a nih kha." tih pah chuan kawngka chu a hawng a, a lut nghal a.

Midang ho pawh chuan an zui lut ve a, inchhung an lut chiah chu a lum deuh huk mai. REmremi chuan kawngka chu a han khar leh kher a, tichuan inchhung chu an enkual ta. Maimawm ril te chu a inzam nuai hlawm a, sazu tlan rek rek thawm a awm leh thin bawk. "Inchungah ka han chho chhin teh ang." tiin Remremi ber chu a chho ta daih mai.

Midang ho pawh chu an inthen darh a, Bsi chu choka lamah chuan ava phei a. Duhsaki erawh Sitting room lamah a kal phei thung a, Rosy chua Duhsaki chu a zui ve bawk a. Inchhung chu a reh hian a reh tlawk tlawk mai, lehkhabu dahna chhuar chu Duhsaki chuan a han en vang vang a, mahse lehkhabu erawh engmah a awm lo thung.

Thutthleng bal tak mai te chu Rosy chuan a lo enkual ve thung bawk a, a then chu puan varin a inkhuh nual a. Chutia an enkual lai chuan choka lama awm mek, Bsi chu a rawn t(r)e thut mai a, thil engemaw ri deuh rawk in a chhunzawm nghal bawk. Rang takin Duhsaki leh Rosy chu choka lamah chuan an va phei nghal a, Remremi pawh inchung atang chuan a rawn chhuk ve nghal bawk.

Choka an va en chu Bsi chu a lo nui tiah tiah mai, "Enge ni Lal BS?" tiin Duhsaki chuan a zawt vat a. Nui chung hian Bsi chuan silhmun lam chu kawkin, "AWiii he zawhte hi..min ti phu nasa lutuk." a lo ti daih mai. Chuveleh hlauhthawn hmel tak hian Remremi chu a rawn thleng thla ve a, "Enge..tunge au kha?" a rawn ti ve leh hnuhnawh a.

"A mawl ania, hei...zawhte hi a hlau  anih chu." tiin Duhsaki chuan zawhte chu a kawk a. "Khawi atangin nge a lo luh a?" tiin Remremi chuan a han zawt leh a. Bsi chuan, "Ventilation atang khian.." tiin silhmun chunga ventilation chu a kawk a. "Ho lutuk...thil ho te te ah t(r)e vak vak suh." tih pah chuan inchung lamah chuan Remremi chu a chho leh ta daih mai.

Pawna lo awm mek, Jenny pawh chuan Bsi t(r)e ri chu a lo hre ve a, a hlauh tawh sa nen, a hlau zual kher mai. Haw mai chu a duh rum rum tawh a, mahse ngawi renga lo haw bik daih chu a thiante chuan an ngei a hlau si. Chubakah thil engemaw lo thleng ta se, a tel ve tho si a, a ngaihtuah thui hman kher mai.

A thinphu chu a rang ngang mai, a awm chu a dawm vang vang a. "Engtin nge ka tih ang? Ka va lut ve mai dawn nge?" tiin a rilru chuan a inbe mawlh mawlh a. Mahse inchhunga va luh ve erawh a ngam chiah silo, a thlan a tla zawih zawih mai. An lo chhuak har em em mai si a, a vei kual sek tawh mai.

Inchhung mai chauh nilo, a hmunhma vel te chuan Jenny chu a ti hlau der tawh. Ramhnuai panna kawng nen a inhnaih bawk si nen, khua lah chuan thim lam a hnaih tawh bawk si. Sana a han en a, dar 4:30 a pel der tawh. A kalkawng a thui bawk nen, an kal chhung lah kha  arei bawk si.

A haw na tur la hla bawk si, a nu leh paten an lo hauh a hlau bawk nen. Ama tawkah chuan a lo buai ve em em a, a tawpah chuan haw san mai a tum ta a. In chu en vang vang pah chuan a kal ta a, mahse a rilru erawh ala nuam chiah lo. Rosy-i'n Remrei patea thihdan chungchang te leh ahma a thil lo thleng tawh a sawi te chu a bengah a ri nawn mawlh mawlh a, in chu ava en leh thin a.

A rilru  a nuam thei ngang ta lo a ni ang e, a ding chat a. A thiante chungah chuan engemaw lo thleng ta palh se, amah a tel ve tho bawk si nen. Lo thi ve ta se, police a hmachhawn ngei a angai dawn tihte chu a hre ve vek bawk si. Haw tura va sawm chhuah chu a tum ta a, hreh tak chung chuan ava let leh ta a ni.

**************************

Remremi te thian ho chu inchhungah chuan an la awm reng a, Remremi ber erawh inchung lamah chuan ala awm reng thung. Puan vara khuh thutthleng sei ah chuan Duhsaki, Bsi leh Rosy te chu an thu khawm a, an titi nasa ngei mai. Chutia an titi lai chuan chhuar chung ber a cricket ball, hlui ve tawh tak, pawr fer fur mai chu amahin a rawn tla nawlh mai.

An phu nasa ngei mai, ball lah chu an ke zawn takah chuan a rawn lir tawp chat lehnghal. Bsi chuan a lo chhar a, "Awii a hlui tawh zia hi." tiin a khi suk a. "Amahin a rawn tla ringawt, thli a thaw miah silova." tiin Rosy erawh chuan mak a lo ti kher mai. Duhsaki chuan vin lek lek hian, "Amak e aw...Rosy, engkim hi i hmu hrang vek tawh a nih hi." a lo ti hlur a.

Chutih lai chuan Remremi chu inchung lamah chuan amahin a lo la vei kual ngat ngat a, a hlauh lemloh hmel kher mai. Thil engemaw tak hmuh a tum zawk amaw tih mai tur hian pindan te chu a en kual den den a. Mahse engmah thil danglam leh hlauh tur a hmu lem lo, inhnuai lama chhuk leh mai a tum lai tak chuan pindan pakhat atanga tui baw hawk ri niawm tak chu a hre ta.

A ding chat a, pindan lam chu ava pan nghal a. ZAwi muang chuan kawngka chu a han hawng riai riai a, a chhunglam ava en chuan tumah chu a hmu lo. Mahse chhuata thisen niawm tak, dum nguk mai lo luang chu a zu hmu ta a. A zu panhnai a, a han enchiang a. A kuta han khawih mai chu a hreh deuh a, a rawmawl phawrhchhuakin a han hru a.

A han hnim chhin leh a, a lo rimchhe em em mai lehnghal. Chutih lai chuan inhnuai atang chuan BSI chuan, "Remrem...a ho emai, haw ang. Lo chhuk rawh, khua a thim dawn." a tih ri chu a hria a. "Awle, ka lo chhuk." tiin a tho va, rawmawl pawh chu a hnutchhiah nghal daih a. Mahse a chhuak chiah chu bang kilah chuan hmeichhe naupang, kawr fual bal zet mai ha, hmaidang vel mai hi a lo ding reng mai a nih chu, mahse Remremi erawh chuan a hmu lo.

******************************

An rei em avang chuan Jenny ngaih chu a tha tawh lo kher mai, inchhung lama luh ve mai chu a tum ta. A rawmawl hum ranin a kut chu a awmah a dah a, in chu ava pan ve ta. Kawngka chu a hawng a, a ri tuar tuar mai. Inchhung chu a lut ve ta a, a lum deuh huk lehnghal. A lo reh diak mai a, "Remrem..BS..khawnge in awm? Rosy...Duhsak?" tiin a au vak vak hlawm a.

Mahse tumah chuan an chhang lo, inchhung lah chu a reh em em mai lehnghal. A en kual a, tho thlawk ri a ri leh zuai zuai tih loh chu thawm dang engmah a awm lo. Choka lamah chuan ava phei a, silhmunah chuan zawhte dum lian lemlo tak chuan a lo melh kur mai. Chutah a hnung atang chuan kut pakhat hian a dar a rawn vuan thut mai, a hlau lutuk chu a t(r)e vak a.

Hnunglam a hawi nghal a, mahse REmremi a lo ni. A hnungah chuan midang an lo awm vek bawk a, an lo nuih vak vak mai. "In mawl lutuk...nge in lo chhuah vat loh?" tiin Jenny chu a tap nghal pur mai. "AWiii bawihte, engmah hlauh tur a awm lo. In ruak satliah a nih hi, hawh u i haw ang u." tiin Remremi chuan a chhang a, an panga chuan chu in chu an chhuahsan a, an haw ta a ni.

********************************

TO BE CONTINUE