THE CURSE (MIZO : ANCHHIA) Story by : Aaron Malsawmdawngzuala MIZO FICTION HORROR STORY WARNING : 18+ CHAPTER - 4

 THE CURSE

(MIZO : ANCHHIA)

Story by : Aaron Malsawmdawngzuala

MIZO FICTION HORROR STORY

WARNING : 18+

CHAPTER - 4

*************************

Ni 3 vel chu Mka chuan engvak mah a tawng lem lo, a fapa nen chuan hlim takin chu inah chuan tlei tawk em em a. A fapa hi kum 9 mi a ni a, hripui vangin school a kal theih chuang lo bawk nen, kum tir anih avangin school an la tan chuang lo bawk tiin amah chauhva awm ai chuan a bulah a hruai ve a ni.

Mka nu te lam pawhin an lo buaipui thei tho nangin, amah Mka ber hian a duh tlat avang leh a fapa Michael-a pawhin a ngaih em avang chuan a hruai ve ta nge nge a ni. He ina a inthiar luh khan Mka hian puitu a nei lo tawp chu a nilova, inluah tur a zawn lai hian anmahni khaw lama a thiante pahnih in an pui a ni.

Mka hi palian ve tak mai, sa tha lampang a ni a. A rilru a puitlingin a taima a, a nupuiin a thihsan hnu phei chuan nupui dang chu sawiloh, ngaihzawng takngial pawh a nei leh tawh lo a ni. An nu thih hma khan a fapa hi tha taka lo enkawl a intiam a, chu chu vawng rengin nupui dang nei tawh lova, a thih thlenga a fapa enkawl chu a tum nghet bur a ni.

************************

Zan dar 10 a rik chuan Mka fapa, Michael-a chu a mu ta a. Mka erawh chu phone khawihin sitting room ah chuan ala awm a. TV chu awm mahse a chhia a, bang sirah puana khuhin a dah ve mai mai chauh a ni. Tin, chu TV chu he ina hman atanga awm tawh, 2008 kum daih a mi tawh kha a ni.

Hripui len lai ni mahse Mka hi office-a a kal zauh zauh tho a ngai thin a, chutih hunah chuan a fapa chu a hruai ve mai zel. Tin, hemi zana thil thleng kan sawi tur hi an luah luh atanga zan li an riahna chiah chiah a ni. Mut ve mai tuma a han tho chu a phone a rawn ri ta tlat mai, a han en chu a nu a lo ni.

"Bawiha...i buai em?"

"Buai love..enge ni ta?"

"I thiante pahnih kha...tun lawk khan an pahnihin an accident a"

Mka chu a meng kawk a, "Enga? Tu ka thiante?" a ti nghal chel chul mai.  "Robert-a leh Sena..tunah lawk khan." a rawn ti leh ta mai a. Mka chuan a lu a dawm vawng vawng mai, "Engtin nge an awm? Mawh nu....an tha tiraw?" tiin a tah a chhuak nghal hle mai. "An serious hmel khawp mai, Sena te inkawta step ah khan an tlan liam a." a rawn ti leh a.

Mka chu a thu hnawk mai, "Nilo..avan pawi tak. An la dam ang tiraw, nu? Thih chu an thi em lo tiraw?" a han ti leh a. "Aw...i pa nen an inah kan leng a. Kan haw tur chiah kha an rawn tlan liam a, hei kan la awm mek." a rawn ti leh a. "DAmdawiinah in kalpui nghal lovem ni?" a ti chel chul mai.

"Sena zawk hi an la la chhuak thei lo, uii a pawi ka ti emai. Motor chhungah a tang a, Robert-a chu an la chhuak..mahse nikhaw hrelovin a awm." a rawn ti leh a. Mka chu a mangang kher mai, chutih lai tak chuan kawngka a rawn inkik thut mai. "Nu..chanchin min rawn hrilh leh zel ang che aw.." tih pah chuan phone chu a dah a.

Kawngka lam chu ava pan a, "Tunge ni?" a han ti vak a. Mahse engmah chhanna a dawng lo, kawngka chu a han hawng a. Gate bulah chuan tu emawni hi puan dum a inkhuh hlun hian a lo ding reng mai a, mahse mipa nge hmeichhia a nih a hre thei lo. Ring leng lawng hian, "Enge i duh?" a han ti vak a.

Mahse chu puan duma inkhuh hlun mai chuan a en reng ringawt, Mka pawh chuan a en ve reng bawk a. A aw a han thian leh kharh a, "Enge i duh a? Tunge i nih?" a han ti leh a, mahse a tlan daih mai. A tlan dan atang chuan hmeichhe naupang niawm tak a ni, mipa a nilo tih chu a chiang khawp mai.

Mak ti tak chuan a en vung vung a, kawngkawi a tlan liam thleng chuan a en a. Ngaih tha lem lo tak chuan a lut leh a, chutah a phone a rawn ri nghal vak vak mai. A han en chuan a hmelhriat leh a thiante atang te, group message leh a chhungte message a lo ni hlawm a. Sena leh Robert-a accident thu an rawn hrilh sup sup mai, thutthleng lam chu ava pan leh a.

A thu hnawk a, "Engtin nge an awm ang le? Avan pawi tak.." a ti vawng vawng a. A chang leh, "Ruih chintawk an hre leh pek lo a ni hrim hrim." tiin a thinrim thul. A thlan te chu a tla zawih zawih a, chutah kawngka lam ava en chuan nichin lawka rawn kik tu, tlanchhe ta daih kha a ngaihtuah chhuak leh zawk mai.

A rilru chu a hah thuah hnih kher mai, "Kha naupang kha tunge ni ang? Helai velah hian tumah an awm silova." a han ti leh nuah nuah a. Minute 10 dawn a liam hnu chuan a phone chu a rawn ri leh a, anu bawk a lo ni. "Hello, nu..enge chanchin?" a han ti nghal vat a. Mahse anu chuan zawi sap hian, "Bawiha, an chhan hman ta lo." a ti ta mai a, midang tap ri te pawh chu a hre zui nghal bawk.

Mka chuan a phone a dah a, "Nilo...avan pawi tak." a ti vawng vawng mai. Message chu a dawng leh nghal zut zut a, mahse tumah chu a chhang duh lo. Phone call te chu a thiante atangin a dawng zui bawk a, mahse a switch off hmak mai. A mittui a tla a, "Ka thiante zingah pawh min duhsak tute, ka inluah min inthiar luh pui peih awmchhun in ni asin le. Thiante u, a va han pawi tak." tiin a kun tlawk tlawk mai.

*************************

(Minute30 liam ta a thil thleng)

Mka thianpa, a in luah thar a pui tur ringawt a va zin ngat, a thiante zinga a rin ber te pahnih, Robert-a leh Sena te chuan zu an la a. An haw lam chu zu in kawi phawt tur chuan mi inrel lam chu an pan a, an indun ta a. An titi dun nasa em em a, Mka an ngaih thute chu an sawi bawk a. Chutia an titi lai chuan Sena zawk chuan, "E taka...Mka in luah kha a hrang an ti tih vel khan Mka khan a sawi tlatin ka hria." a han ti zauh va.

Robert-a chu a lo nui suk mai, "An sawi thin alawm..khami in kha..mahse mi ka atanga ka hriat ve tho ania." a lo ti sam et a. "Engtin nge an sawi thin a?" tiin Sena chuan a lo zawt vat a. Robert-a chuan no khat chu a han tlak leh pap a, "Saw mi inah sawn 1995 kum khan inthahna a thleng tawh a, nupa pakhat leh an fanu, an vaiin an thi vek. Chuan khami hnu khan a ruak char char a, tichuan 2008 khan tlangval pakhatin a luah leh a, a thi leh bawk." a han ti charh charh a.

"Ehe..anih chuan ava ngaihthat thlak loh ve? A hrang tak tak tihna anih chu, Mka tan pawh ava hlauhthawn awm ve." Sena chuan a ti nuah nuah mai. Robert-a chu a khi leh suk a, "Chumai ala nilo ania aw.." a la ti ta deuh deuh va. Sena chuan phawk hru hian, "Enge la awm?" a lo ti leh vat a.

"Chupa ruang buaipuitu police te pawh chumi zan chuan Station ah an inkap chiam a, an thi vek bawk. Station-a awm velo, inlama haw te pawh ahnuah dam lovin an thi vek bawk. Chuan 2017 khan ruang an chhar leh a, chu hmeichhia chu an khua ami tho, tleirawl kum 16 mi a nia. Chuan tleirawl kum 15 mi pakhat chu ruang an chhar ni chuan a bo daih bawk. SAw khua sawn chanchin a ngah areng lutuk, chumi hun lai bawr vel chuan hmeichhe pahnih chu mak deuhvin an thi a, pakhat a inawkhlum bawk an ti." a han ti leh a.

Sena chu a ngaih a tha ta chiah lo, "Anih te chuan Mka tan a thalo dawn hle mai, nangpawh tinge hre reng si i sawi vat loh?" a han ti deuh hlur a. Robert-a chuan ngaihsam zet hian, "I va han dawih tak, an khaw tlangval pakhat sawi vek ania. I dawih emai, thudik a ni em tih pawh hriat va ni suh." a lo ti mai a.

"Thudik ni ta se, aaa..thudik a ni awm emai. Tlangval pangngai ve meuhvin dawt a sawi dawn mi?"

"Khai mai mai ache, thlingtlang khaw tinah hian an veng sawi hrang em emtu mi pahnih pathum vel chu an awm ziah. Sumo driver ho pawn tawng miah lo mahse an insawi tawng chawp vel mai mai thin alawm, mi ngaihsak nih hlawh nan te, miin anmahni kha huaisen ti se an duh a, chu vel mai mai chu a lawm."

Sena pawh chu a khi suk a, "I ngaih te lah hi a sam mai siah...haha. Tak tak ana ka ngaih a tha chiah lo alawm, 1994-a thil thleng pawh chu a tak tak pawh lo nise kha chu thuhran. Mahse hman kum lawk, 2017 kum lawka chutiang ala thleng a nih phei chuan tunah pawh ala reh dawn miah lo tihna ania." a han ti leh a.

"I va han dawih tak..ka la sawi zo vek lo zawk anih hi."

"Enge la awm cheu va?"

"Saw in saw khaw mipuite chuan anchhe dawng in an tia, mahse an awih vek kher lo. Saw inchhunga pen lut tawh chu an thi zel an ti, i awih em?"

Sena chu a awm a nuam tawh hauh lo, "Kan luh ve kha...ava thlamuan thlak lemloh ve...i thil min hrilh mai mai chuh." a ti nang nang mai. Nui chung hian Robert-a chuan, "Aww...engmah kan chungah a thlen lo hi. Dawt bak va ni suh, hei...ni 4 a liam tawh." a lo ti leh mai a. Sena chuan zu chu a han thli leh a, a in tur a han hawichhuak chu an awmna inrel sira, bang phena hmeichhe naupang niawm tak kal phei zuai hi a hmu ta tlat mai.

"Ehe.." tih pah chuan  a phu zawk a, a zu chu ala ti baw zui. Robert-a chuan mak tih hmel tak hian, "Enge...enge i phut zuk a? Kha ila ti baw zui, van mah nak laia." a lo ti nuah nuah mai. Sena chuan a hma zawn thim mup mai chu a kawk a, "Tah sawn..hmeichhe naupang ka hmu." a ti ringawt a.

"Aaa...a va han awihawm loh thei tak."

"Thianpa, ka fiamthu lo. Ka hmu alawm, ka hmu tak tak."

"Ka thil sawi vang khan engkim hmuh hran nghal ringawt i tum anih kha, ahma zawnga engmah hmu mang silo."

"Ka ti tak tak..dawt ka sawi lo."

Robert-a chu a thaw deuh hak a, "Anih va kal chhin ila..." a han ti a. Hreh tak chung chuan Sena pawh chu a tho ve mai a, an va kal ta a. Light chuan an han enkual a, tumah an hmu lo. Robert-a nuih chu a za kher mai, "Hei..tumah an awm lo." tiin Sena chu a han melh a. Mahse Sena chu a ngaih ala ngam chuang lo, a hmu chiang bawk em a ni.

"Haw ang." a ti hmuk mai. "Ava mak e aw...i va dawih ve a..." tiin Robert-a chu a lo ner nung a. Sena chuan sana a en a, "Hei..dar 10 a ri dawn tawh." a ti leh ringawt a. "Zan dangah pawh dar 1 te kan thleng alawm le, tlangval kum 35 i nih ve tawh kha, val senior...i dawih lutuk." a lo ti hrep mai.

"Kan rui tawh tho...haw ka duh." a ti leh hmuk a, Robert-a pawh chuan a hnial zui peih ta lem lo. "In inah ka jacket ka dah daih, min thlah leh mai dawnnia." tiin RObert-a chu a kal nghal a, Sena chuan a zui ve nghal a. Motor-ah chuan an lut a, an tlan ta a. Sena chu a ngawi reng a, Robert-a chuan dawih a ti takzet.

"Ka thil sawi kha i hlau ami?"

"I thil sawi vang pawh kha a nilo."

"Anih leh enge?"

"Ka sawi tawh kha..ka hmu alawm."

"Tumah an awm loh kha..i mitvai mai mai a nih kha."

"Anilo chiang emai, ka hmu ka tia lawm mawle."

Sena chu a thinrim tawh tih  a hriat avang chuan Robert-a pawh chuan a hnial duh ta lova, "Hla ngaithla ang aw..." tiin car tape chu a play a. Robert-a chu a han zai deuh al al a, mahse Sena chu ala ngawi reng thung. An tlan zel hnu chuan an veng an thleng ta a, Sena pawh a thaw deuh huai mai.

Chutia Robert-a tui taka a zai lai chuan an hla play chu a chiang ta tlat lo mai, a tawp deuh chut chut a, a ri deuh nuai nuai bawk. Chutah ring em em mai hian a rawn kiu vawng vawng a, a phu dun nasa kher mai. Chutah hla reng reng a in play tawh lo, hmeichhe hlau, na tuar thawm chu a rawn ri ta vak vak mai a.

Sena chuan mak ti tak hian, "Eng hla nge a? A dang ti teh, a bengchheng lutuk." a han ti vak vak a. Mahse Robert-a chuan a hrethiam bik hauh lo, "Ka tih anilo...amahin a rawn ri a nih chu." tiin a lo chhang a. Chutah patling aw thum tak mai hi a rawn tawngchhuak ta mai, "Engvangin nge in rawn luh? Ka in anih kha....engvanga lo lut nge in nih?" a ti ta chhur chhur mai.

Mak ti tak chuan Sena leh Robert-a te chu an in en hu ringawt mai a, chutah Robert-a chuan hma lam ava en chu a phu nasa kher mai. Ring tak hian, "Sena en rawh.." a ti vak a, Sena ava hawi phei ve chu an hmaah tak chuan hmeichhe  naupang, kawr fual uk, bal khak em em mai ha hi a lo ding run mai.

A vun chu a dang var pup mai a, a mit a dum kuk bawk. Sena chuan a motor steering chu a cut vak a, kwngsir lamah chuan an tlan a. An in an thleng tep tawh, an inkawta a thianpa Mka nu leh pa leng, lo haw tur chiah te pawh chu a mit sir chuan a hmu hman vek. Mahse a motor chu a control hman ta lo, an inkawta stepah chuan an tlan liam ta.

Stepah chuan motor chu a lum ta a, step mawng ah chuan a letling zawngin a ri thla ta rup mai. Rang takin mipui an lo pung khawm a, step ah chuan an chhuk nghal sap sap hlawm a. He an lumna step hi step 60 vel lai a thui a ni a, an veng tuikhur kalkawng a ni. An zu thleng thla chu Sena leh Robert-a te chu an lo che tawh eih lo, nikhaw hrelo chuan an lo awm ve ve a.

Mka nu Pi Thangi chuan a fapa chu a phone nghal a, chanchin a hrilh nghal thuai a. Tichuan Robert-a chu awlsam takin an la chhuak thei mai a, mahse a ruh chu a lo tliak nasa em em a, a khabe a uai hnawp bawk. Mahse ala thaw tih an hriat avang chuan an zawn chho nghal vat a, Sena erawh lakchhuah a har ngang mai.

A letling zawngin motor chu a awm tlat mai bawk si, Sena chu driver seatah chuan a letling zawngin a awm a. A ke te chu a thlep vek a, a keruh a rawn lawr bawk. Motor Steering ah chuan a a ban pahnih chu a tang tlat bawk a, mahse ala khap fuk fuk mai. Minute 20 dawn an buaipui hnu chuan ani pawh chu an la chhuak thei a, damdawiin an panpui ve ta nghal a ni.

Sena zawk an zawn chhoh lai hian a phun ri sap sap a, "Hmei..hmeichhe naupang..naupang kha.." tia a sawi chu a zawntute zing ami, Mka pa, Pu Lura chuan a hre hman tlat mai. Mahse boruak chuan a zir loh em avang leh mangan nen, a lo ngaihtuah zui lemlo aniang chu, engmah a sawi zui ta lo a ni.

***********************

A tuk zingah chuan rilru nuam lo tak chuan Mka chu office kal turin a insiam mawlh mawlh a, thildang reng a ngaihtuah thei lo. Chutih lai chuan a fapa a rawn lut a, "Pa...inah ka lo awm tawh mai ang. A nuamlo thei e, boring si.." a rawn ti nuah nuah a. Mka pawh chuan a han ngaihtuah chiang a, a fapa chu kum 9 lai a ni ve tawh a, mipa naupang dik tak a ni ve tawh.

Chubakah a sawi ang deuh khan office-a lo awm ve reng emaw, cara lo awm tir reng chu a khawngaih ve ta deuh va. A lian ve tawh a, naute ang maia hnathawhna a hruai hruai rual pawh a ni tawh bik lo tih chu a hre ve reng a. A han ngawi vang vang a, "Mahniin i lo awm ngam a mi?" a han ti a.

"Ngam e..ngamlohna tur awm hleinem."

"Enge i lo tih anga?"

"Aw laptop a awm tho lawm, internet a chak tha tho va."

"I hlau lovang maw?"

"Hlau lo rapthlak."

"Kawm tur naupang dang an awm bawk silova...kan awmna hi a fal si a. Chuvang chuan ka ngaihtuah thin che alawm, anih chuan ka kalsan ang che aw?"

"Umm...keimah pawh in ka awm ngam."

Mka chu a han ngawi vang vang a, a hma zana kawngka rawn kik tu kha a hrechhuak zawk mai. "Anih chuan kawngka hi pawn lam atangin ka kalh hnan mai ang che aw, a pawi i ti em?" a han ti leh a. "Um pawi lo...ka awm ngam." tiin a lo chhang leh a. Ngaihtuah viau mahse, ama tan pawh hna thawh a awlsam deuh phah dawna a hriat avang chuan ina lo awm tir mai chu a tum ta a.

Tichuan Michael-a chu a chhuahsan a, "Anih Bawiha, ka kal aw...i ril a tam hunah chhang ka leisa kha ilo ei mai dawnnia aw..ka lo haw tlai lovang." a han ti a, a fapa chuan a lu a lo bu nghat a. Tichuan pawn lam atang chuan tala in a kalh hnan a, a motor lam chu a pan ta a. An gate bul ramhnuai panna kawng, thingkumg lian tak bulah chuan a hma zana a hmuh, hmeichhe naupang niawm tak, puan duma inkhuh tlat kha a lo ding leh run mai.

Mahse Mka chuan  ahmu ve lo, chu naupang chuan a lo en char char a. Mka car a luh lai te chu a en reng a, a tlan liam thleng chuan a en a. A tlan liam veleh chuan thingkung phen atang chuan a rawn chhuak a, puan dum sin chung leh a hmel hliah tlat chung chuan in chu a pan phei ta.

*****************************

Office chu Mka chuan a thleng ta, computer hmaah chuan thuin hna chu a thawk tan ta a. Chutia a buai em em lai chuan a nghawng vel chu za a ti tlat mai a, a hiat leh nauh nauh thin a. MAhse engemawni hian a zar buai deuh tlata a hriat avang chuan a neck tie chu a phelh thawl a, a kawng nghawng chu a han zen a.

Chutah hmeichhe sam zai niawm tak, dum hraw hrup mai a kawr nghawng atang chuan a pawt chhuak ta mai a nih chu. A han enchiang a, mak a ti kher mai. "Kan inah tumah hmeichhia an awm silova, tu sam nge maw ka kai rikngawt le?" tiin a phun nuah nuah a. Chutih lai chuan a hnathawh pui, a dawhkan bul lawk ami chu a rawn dak phei a.

"Tunge i biak a?" a rawn ti a, Mka chu a phu zuk mai. Za lo taka khik suk pah hian, "Aaa..tumah be love...hei hi ka ngawngah a lo awm a, mak ka ti deuh mawle." tiin samzai chu a hmuh a. A thianpa chu lo nuiin, "Eheu...nizan lam iva che na awm ve." tiin a han chhaih a. "Hmeichhia ka awmpui lo, ka fapa nen chauh kan awm." tiin a lo chhang a.

A thianpa chu a khi suk a, an inbe zawm ta lem lo. Mka chuan samzai chu a paih mai a, hna chu a thawh chhunzawm leh mai a. Lunch ei a lo hun a, canteen ah chuan a chhuk ve ta a. A thil ei zo chu zung turin Office bathroom lam chu a pan a, a chhungah chuan lutin a han zung ta a. Bathroom ah chuan tumah midang an awm lo, amah chauh chuan a awm.

Chutah inthiarna lam atang chuan tui inherh haw ri hi a hria a, inthiar an awm a nih ringin engah vak a ngai lem lo. Wash basin lam panin a kut chu a silfai leh a, ngaih tha tak chuan a awm reng a. Mahse tui in herh haw ri chu a tawp thei miah lo mai, a ri atang chuan bucketah a in dawh khat tawh tih pawh a hrethiam nghal.

Mak ti tak chung chuan chhuah mai a han tum a, mahse tui chu kawngkhar hnuai atang chuan a rawn luang chhuak ta hial mai. A ngaih tha lo chu ava let leh a, "Thianpa...i tui dawh kha  aliam tih i hmu lo em ni?" a han ti a. Mahse chhanna a dawng ta tlat lo, "Thianpa, thianpa...tui kha a liam ania." a han ti leh a.

Mahse eng chhanna mah a la dawng chuang lo, mak a ti kher mai. Tui chu a rawn luang hnem zel a, "Awmin awm em?" tiin a han kik a. Mahse mak tak maiin a kik chiah chu a rawn inhawng ta mai a, chhunglamah a lo in kalh miah lo tihna a nih chu. Kawngka chu a han hawng thuai a, mahse tumah an lo awm lo.

Mak a ti kher mai, "Ehe...tumah an awm bawk silova." tiin a phun nuah nuah a. Chutah comode chu a han en a, tui chu a lo dum nguk mai. A rawn puar leh pup thin chuan a mak tihna a ti zual kher mai, tui inherh haw chu a off a. Tichuan comode a tui tling, dum nguk mai chu a han enchiang a.

A hmu sual amaw tiin a mit a han nuai a, mahse a hmu sual bawk silo. Tuiah chuan mihring mit niawm tak, mahse maimitchhing tlat niawm tak hi a hmu a. A han enchiang deuh va, ni ngeiin a hre bawk si. Chutah chu a thil hmuh, mit ang tak mai chu a rawn meng thut mai a. A phu nasa kher mai, a hnung tawlh dawrh hial a.

Chuveleh kawngka chu a rawn inhawng thuai a, mahse office bathroom tifaitu a lo ni hlauh mai. Mka chu ava hawi phei a, a thaw huai mai. Comode chu a  han en leh a, mahse tui lo tling pawh chu a lo fim leh vek tawh. Cleaner chuan chhuat chu enin, "Ehe..tinge a?" a han ti a. "Aaa..an off theihnghilh aniang." a ti bah nuai ringawt.

"Aww..ava ho thin tak." tiin cleaner chuan chhuat chu a han nawt leh mai a, Mka chu a chhuak nghal a. Mak a ti kher mai, a chhan chu kha tui inherh haw kha off theihnghilh nilovin amah bathroom-a a awm lai ngeia amaha rawn inherh haw a ni tih a hre chiang miau a ni. Chu mai nilovin kha mit, mihring mit niawm tak, rawn meng kuau mai pawh kha a mitvai emaw, a hmuh sual mai mai a nih chu a ring thei mawlh lo.

*******************************

Michael-a pawh chu laptop khawihin youtube ah cartoon a en a, ama tawkah chuan a tlei hle. Apa nena an room hi inchung lam a ni a, khumah chuan bawkkhupin a thil en lai chu a en tui kher mai. Chutih lai chuan inhnuai lam tukver ri deuh dawt chu a hre ta, apa a lo haw tawh a nih ringin a thil en lai chu a pause a, a chhuk nghal a.

"Pa...pa..ilo haw tawh em ni?" tiin a au thla nghal a, mahse inhnuai a thleng chu a lo reh thiap mai. Kawngka chu hawn a tum a, mahse pawn lam atang chuan a lo la inkalh tho va. Choka lamah a phei a, choka tukverh a chirh hlawm lo bet chu ava hmu ta. A va kal hnai a, tukverh chu a hawng a.

A han dak chhuak a, mahse ramhnuai kalkawng thim phei khup tih loh chu tumah a hmu lo. Ngawi reng chuan puanchhia a la a, tukverh chu a tifai melh melh a. A tifai zo khar a han tum leh chiah chu tukverh zawn, ramhnuai panna kawng bul hla deuh taka hmeichhe naupang niawm tak, puan dum sina lo ding run mai chu ava hmu ta.

A hmel erawh a hmu thei lo, mahse a pian a tang chuan naupang kum 9 mi lek mah nise hmeichhia ngei a ni tih chu a hai bik lo. A en reng a, chu hmeichhe naupang pawh chuan a lo en let ve reng a. Chutah lehlam a hawi thut a, ramhnuai lam pan bawk chuan a tlan leh ta daih mai. Michael-a lah chuan han hlauh em em na chang pawh a hrelo, room lam panin a chho ve leh mai a.

**********************************

Tlai a lo ni a, Office pawh chu an bang ta. Mka chu haw pah chuan a bazar nghal a, chawhmeh eng eng emaw chu a lei a. Arsa zawrhna ah chuan a lut a, "Khawimaw kg khat leh min lo sah ve.." nui chung chuan a han ti a. DAwr nghak tunu chuan ngawi reng hian a lo sah sak a, chutih lai chuan Mka chu a han hawi kual a.

Arsa puah sa, bang kila an lo rem tlar thap maite chu a han en kual hlawm a. Thovin an lo bawm nuai nuai mai a, arsa te chu a tuihnai lo riau chuan a hria a. Sa sattu nu lah chuan dim baksak lo chuan a sat hmawk hmawk a, a tum hmuk lehnghal. Ngawi reng chuan a han buk a, polythene ah chuan a khung mawlh mawlh a, Mka chu a pe leh a.

"Ka lawm lutuk e." tih pah chuan pawisa chu a pe a, chunu chuan ngawi rengin a lo la leh a. Mka chu a melh run mai a, Mka chuan a ngaihna a hre lo kher mai. Mahse engmah sawi bik lemlo chuan a let leh a, a car lam chu ava pan a. Car chhungah chuan a lut a, a mak ti deuh chu ava hawi let leh kher a.

Mahse khanu, sa sattu kha a ni tawh pawhin a hrelo. Hmeichhe hmel dang daih a ni tawh, a sam chu a lo thur bum mai a. A kawr hak ah te chuan thisen a kai deuh nuai mai, ahma khan thisen a kai awm pawh a hre silo nen. Midang ho lah chuan hmu ve awm pawhin an lang lo, an kal pel ve mai mai bawk si.

Mak ti rilru tak chung chuan motor chu a start a, a tlan ta a. A arsa lei te chu a ten deuh reuh hial a, motor ti ding meuh chuan arsa chu a han enchiang leh a. A han lek kang a, mahse rin ai tak chuan a lo thianghlimin a lo sen suah hlawm mai. "Ka hah deuh vang anih dawn hi...mut tlem nen." tia phun sup pah chuan a tlan leh a, inlam panin a haw ve ta.

**********************************

TO BE CONTINUE