THE CURSE (MIZO : ANCHHIA) Story by : Aaron Malsawmdawngzuala MIZO FICTION HORROR STORY WARNING : 18+ CHAPTER - 3

 THE CURSE

(MIZO : ANCHHIA)

Story by : Aaron Malsawmdawngzuala

MIZO FICTION HORROR STORY

WARNING : 18+

CHAPTER - 3

***********************

Zan hnih a liam leh a, Jenny mumang chu a tha lo tulh tulh mai. Zantin mai chuan a mumangah thil rapthlak tak tak a hmu thin a, mahse a takah em chuan engmah chu a la tawng ve chuang lo. Sunday a lo ni a, khaw mipuite pawh Biak In lam an pan sup sup mai. Jenny, Remrei leh Duhsaki te pawh chu an inkhawm ve a, an vai hian Senior Department vek an ni.

An khua hi mipui an tam lutuk lem loh avang hian Sunday School zirlai hi naupang department ah pawh an khaikhawm fo thin a, hemi ni pawh hian zirlai chu an khaikhawm a. Zirlai zirtirtu chuan thu a sawi mawlh mawlh lai chuan Duhsaki chuan pawn lam a melh vauh vauh mai a, zirlai pawh chu a ngaihsak thei lo.

Chutiang bawkin Jenny leh Remremi te pawh rilru nuam lo tak chuan an thu ngui dun bar mai a, a kun tlawk tlawk mai. Chutia Duhsaki'n pawn lam a melh reng lai chuan tukver bulah chuan hmeichhe pakhat hi a rawn lang thut mai a, Duhsaki chuan mak a ti kher mai. Mahse chu hmeichhia chuan hnunglam a hawi deuh tlat a, a hmel a hmu thei lo.

Duhsaki chuan a en reng a, chunu lah chu a su ang dulh dulh lehnghal a. A zang a kul em em lehnghal, a khat tawk chuan a phu leh uih uih thin bawk. Duhsaki ngaih chu a tha ta hauh lo, midangin an hmu ve em tiin a hawi kual a, mahse tumah chuan an hmu ve lo a ni ngei ang. Chutah chu nu chu a khur hlawk hlawk mai a, muang chang chuan a rawn hawi phei ta.

A thiannu, hmanni lawka thi ta, Rosy ngei kha a ni. A vun chu ahmaa tleirawl vun no tak leh sen suah mai kha a ni tawh hauh lo, pitar vun ang mai hian a chuar em em a, a khawbe vun phei chu a uai titih hial. A mit velam lah chu a hnar zawn thleng vel chuan a uai thla a, a hmui a sawi vek bawk.

Duhsaki hlau lutuk chu a thaw rang kher mai, tukverh lam chu en rengin a meng phar awn awn ringawt a. Chutia hlauh hmel tak leh mangang taka a awm lai chu Jenny chuan ava hmu fuh ta, Duhsaki hawina lam tukver chu ava en ve a, mahse engmah a hmu ve si lo. Duhsaki chu a thaw rang tawlh tawlh a, a mittui a tla hial tawh.

Chutah an thutna hnuai atang chuan kut vawt thlur mai hian a ke pahnih chu a rawn man thut mai a, Duhsaki chu a phu nasa kher mai. Hnuai lam a zu melh vat a, chutah hmeichhe naupang, hmaidang vek leh mit dum kuk mai chu a kap kar zawnah tak chuan a lo mu meng kuau mai a nih chu.

Duhsaki hlau lutuk chu maimitchhingin a t(r)e vak mai a, thusawi mektu pawh a ngawi chiang kher mai. Naupang dang ho chuan an va melh thap hlawm a, "Tinge...ngati nge a?" tiin a bula thu te chuan an zawt a. Duhsaki chu a meng a, a ke chu a zu en leh a. Mahse engmah a hmu tawh lo, tukveh lam chu a hawi leh nghal a.

Mahse tumah an lo awm tawh lo, zirtirtu te pawh an lo tlan phei vat a. "Ngati nge, Duhsak?" tiin an zawt nghal chiam chiam hlawm a. Duhsaki chu a zak angreng kher mai, "Aa.ihh..engmah." tiin pawnah chuan a chhuak daih mai. Mipa ho lah chu an nui dar dar hlawm a, zirtirtu dang te chuan an lo khap bawk.

An zirtirtute zing ami, Chhuanga chuan ava zui chhuak a. Duhsaki chu a lo thaw hrawk hrawk mai, "Duhsak..i tha maw?" tiin ava zawt a. "Aw ka tha." tiin a lo chhang ringawt a. "Tinge i au vak a?" tiin a han zawt leh a. Za lo deuh chuan Duhsaki chu a khi suk a, "Ka chawnah chukchuk a rawn vak chho a." tiin dawt a sawi ta ringawt a.

"Aww ava ho tak, hawh lo lut leh rawh." tiin Chhuanga chuan a sawm leh a, mahse Duhsaki chuan a duh hrih ta tlat lo. "Nakina animai, U Chhuang...ka zak rih tlat." tiin a chhang a. "A tha e, ka luhsan che aw.." tiin Chhuanga chu a lut a. Duhsaki chuan zunin lam a pan ta daih a, zuninah chuan department dang naupang te pawh an lo awm ve a.

"Engthil nge ka hmuh kha? Ka mit vai chu a ni silo.." tiin a phun sap sap mai a. Chutih lai tak chuan Jenny a rawn lut ve thut mai, "Enge i hmuh?" a rawn ti lut nghal a. Duhsaki chuan tum hmuk hian, "Engmah.." tih pah chuan kal leh mai a tum a. MAhse Jenny chuan a banah a lo pawt a, "Sawi rawh...enge i hmuh?" a ti vin leh thak mai.

Duhsaki chu a tah a chhuak ngei mai, "Rosy...Rosy ka hmu a ni." tiin a chhang ta a. Jenny chu a meng phawk nasa ngei mai, "Rosy maw? Tukverh ah khan em ni?" tiin a han zawt leh a. Mak tih hmel tak hian Duhsaki chuan, "Aw...engtin nge i hriat? I hmu ve em ni?" tiin a lo zawt ve nghal a.

"Aih hmu love...tukverh lam i en reng lai kha ka hmu alawm."

"Chumai ala ni lo, Jenny. Ka keah a rawn man bawk....kha hmeichhe naupang khan."

Jenny chuan mak a ti kher mai, "Naupang a? Tu naupang?" tiin a zawt lehnghal a. "Ka sawi thiam lo, hmeichhe naupang ania. A rapthlak lutuk, a sam a thur vek a..a kawr a bal em em lehnghal. A mit te kha..." a tih lai chuan, "A mit a dum vek, a vun a dang var vek bawk. A dik em?" Jenny chuan a lo ti vat a.

"Aw..mahse..engtin nge i hriat?"

"Ka hmu ziah...zantin ka hmu ka mumangah.."

"Anih atakah i hmu tawh em?"

"Aih la hmu lo, ka mumangah chiah ka hmu thin."

Duhsaki chuan a hmui a hup a, "Tinge keiin ka hmuh bik? A dawt leh chu keimah ka ni tawh ngei ang? Ka duhlo...ka duh theilo." tiin a tap hawm hawm mai. Jenny chuan a kutah chuan vawn sakin, "Duhsak, kan chhungte hrilh mai angai ang. Anih loh chuan keini pawh kan thi ve mai ang, puitling kan hriattir angai a ni." tiin a hnem a.

Chutih lai chuan Remremi a lo lut a, "A tul lo, tuman an hre tur a ni lo." a rawn ti vin hlar mai. Rum zet hian Jenny chuan a melh a, "Luhlul chhuah a hun tawh lo, Remrem. Hetia kan awm reng ringawt chuan min that ve mai ang, midang kan hrilh a ngai a ni." tiin a lo chhang let a. "Hrilh pawh ni ila enge an tih theih vak anga? Chubakah min hau hrep dawn asin, i mawl a mi?" Remremi chuan a lo ti let hrep mai.

"Chhungte vawi hnih khat hauh mai mai te chu tuna kan thil tawn mek nen chuan a inthlau lutuk, hauh hlauh vang mai maiin kan nunna kan chan dawn em ni?" Jenny chuan a han ti vin leh hlar a. "A reh mai ang, engtin mah kan awm lovang. In zung rei lutuk a va ko rawn min ti ania, U Chhuanga'n min rawn tir." Remremi chuan a han ti leh a.

Duhsaki chu a chhuak daih mai a, Remremi leh Jenny chu an la in en reng a. "Tih tawp dan dang i hria em ni? I hriat chuan min hrilh ve la.." Jenny chuan a han ti vin leh hlar a. Zawi sap hian Remremi chuan, "A reh mai ang, engtin mah kan awm lovang." a lo ti leh ringawt a. "Kan thi ve dawn..kan pathum chiahin kan bang tawh." tiin Jenny chu a tap pur tawh mai.

Rum zet hian Remremi chuan a melh a, "Ka thi lovang...thlahrang pawh nise, ramhuai pawh nise...ka thi ve awmlo emai." a la ti fan a. Jenny chu a thaw hak a, "A tha alawm...keichuan ka hrilh mai ang. Lungngai suh, ka sawi tel ve lovang che. Kei leh Rosy leh Bsi chauh kan kal angin ka sawi mai ang." tih pah chuan a kalsan ve ta a.

****************************

Zan a lo ni a, Duhsaki awm chu a nuam mawlh lo. A khumah chuan thuin a melh ngai a melh reng mai a, inkhawm laia a thil tawn te chu ngaihtuah letin a tap leh feih feih thin a. Chutia a inhnit hlawp hlawp lai chuan a tah ang chiah chiah chuan khum hnuai atang chuan hmeichhe naupang tap thawm a hre ve ta tlat mai.

A tawp chat a, khum hnuai lama tap ri pawh chu a tawp ve chat mai. A ding nghal a, a hlau lutuk chu a thaw nghal hlawp hlawp mai. Mahse a thaw ri ang chiah chiah chuan khum hnuai atang chuan a lo ri chhuak ve zel mai, a chil a lem ri dawk a. A ding khur nghal zawih zawih mai a, "Nilo...ka ngaihtuahna mai mai a ni." tiin a maimitchhing vang vang a.

Muang chang chuan a khum lam chu ava pan leh a, fimkhur tak chuan khum hnuai chu a han bih dek dek a. Mahse a lo thim vek mai, a han enkual leh deuh va. Chutah thim zing atang chuan mit var pup mai hi a rawn meng kuau mai, Duhsaki hlau lutuk chu a t(r)e vak a. Bang kil lamah chuan a tawlh phei a, "Nu..pa.." tiin a au nghal tuar tuar mai.

Chu veleh rang lutukin a nu leh pate chu an rawn tlan lut a, "Enge..enge ni a?" tiin apa chu a mangang kher mai. Duhsaki chuan a khum hnuai chu a kawk ringawt a, "Enge...enge awmzia?" tiin anu chuan a lo zawt ve bawk a. Khur hlawk hlawk hian, "Khum hnuaiah sawn tu emawni a awm." a ti tham tiak a.

A pa chuan khum hnuai chu a han bih a, chutah rawn hawi let lehin a khi suk mai. Tichuan khum hnuaiah chuan a kut chu a han rawlh lut a, an zawhte hi a rawn pawmchhuak a. "Bawihbawihi a ni hi...iva han dawih tak." a han tih zawm nghal zat a. A nu pawh chu nuiin, "AWii...min tih mangan hman zia hi.." tiin a chhuak lehnghal daih.

Mahse Duhsaki erawh a nuih a za ve hauh lo, a chhan chu a khum hnuaia thawm a hriat kha zawhte thawm a nilo tlat. Chu mai ala nilo, mitmeng var pup mai a hmuh kha an zawhte mit meng a ni hauh lo. Kha tiang em em a mitmu lian kha zawhte in an nei ve lo hrim hrim tih pawh a hria, a mittui a tla phung mai.

"I hlau ho emai a, TV ka en leh dawn." tiin apa pawh chu a chhuak ve ta daih a. Kawngka chu ala khar hmak zui, Duhsaki chuan khum hnuai chu ala en reng a. Rilru nuam lo tak chuan khumah chuan ava thu leh a, a ke pawh a dahthla ngam tawh lo. Khumah chuan a lawn a, zawhte chu a pawm bawk a.

Darkar khat vel chu engmah ti lo chuan a melh ngai melh reng chungin a thu ngar ngar a, thawm ri hlek ah chuan a phu leh zawk zel bawk. Amah a mut chu a hreh takzet, apa chuan TV a la en mek tih hriain ava chhuak ve ta ringawt a. A pa bulah chuan ava thu a, chhuanlamah chuan phone a khawih a.

"Tinge ila rawn thawh a, dat 10 a pel tawh ania."

"KA mut ala chhuak lo."

Apa chu a khi suk a, "I hlau nimaw?" a han ti a. "Hlau love." tih ringawt chuan a lo chhang a. Apa pawh chuan a be zui tawh lemlo, TV chu a en leh ngar ngar a. DAr 11 thleng pawh chuan Duhsaki chu ala thu ve ngar ngar mai a, a room lam chu melh pawh a melh eih lo. Chutah apa chuan TV chu a off ta daih mai, "Ka mu dawn....nangpawh mu ve tawh rawh." tiin a thawh san ta daih mai a.

Plug te chu a han off kual a, an room lamah a luhsan ta daih mai. Hreh tak chung chuan Duhsaki pawh chu a tho ve a, room ah chuan a lut ve leh mai a. Light pawh a off ngam lo, khumah chuan a mu meng kur reng ringawt mai. Engemaw thawm dang a hriat leh a hlau em em a, "Khawngaihin kal bo rawh...khawngaihin..." tiin a phun ri sap sap reng a.

Chutah a hlauh ang ngei ngeiin khum hnuai atang chuan engemawni hi a rawn ri leh dawt mai, a phun lai pawh chu a tawp nghal hmak a. A hlau lutuk chu a khur nghal zawih zawih a, mahse boruak chu a reh leh daih mai. Second 5 vel hnuah chuan a rawn ri leh rawk mai a, a thu chhuak ta nge nge a.

Hlau chung chung chuan khum hnuai chu a zu bih leh dek dek a, mahse a lo thim mup mai. Han thawh san a tum chiah chu kut dum vek hi khum hnuai atang chuan a rawn lawr thut a, Duhsaki samah chuan a rawn tham ta mai a. Duhsaki chu a au hman eih lo, chu kut dum nguk mai chuan khum hnuaiah chuan a pawt lut a, boruak chu a reh nghal hmak mai.

************************

Remremi pawh chu a mu tha thei hauh lo. Khumah chuan a in let a in let reng ringawt a, a rilru chu a nuam bik hauh lo. Sana a han en a, zinglam dar 2 a ri tep tawh. Chutia mu thei lova a chet sek lai chuan a khum sir tukverh hma taka mihring niawm tak, lo ding run mai chu a parda zar phen atang chuan a lang chiang kher mai.

A thu chhuak nghal a, "Tunge...tunge i nih?" a han ti vin deuh hlak a. Mahse chu thla ding reng mai chu a che eih lo, a din ngai chuan ala ding reng. Ngawi reng chuan a han en ngun deuh va, a pian atang chuan hmeichhia a ni tih a hre phawt a. A han enchiang leh deuh va, a thla mai mai pawh ni mahse a thiannu Duhsaki ngei a ni tih a hre thei nghal.

A va pan phei a, parda zan chu a va hlip kiang a. A rin ang ngeiin Duhsaki a lo ni a, thinrim hmel em em hian a lo melh kur mai. Remremi chuan mak a ti kher mai, "Lalduhsak, enge i rawn tih dawn?" tih pah chuan tukverh chu a hawng a. Mahse Duhsaki chu ala che eih lo, "Enge i rawn tih ka tih chu?" a han ti leh a.

Chutah Duhsaki chuan chiang kek kawk hian Remremi chu a melh a, a lu chu a thle leh deuh zauh zauh thin a. Amah lah chu a huh dup mai a, a mawm deuh hluam bawk. Remremi chuan a hnar a hup a, "Chirh ah i tla em ni, i rimchhe em em lehnghal." a han ti nang nang a. Mahse Duhsaki chu a meng rum tulh tulh mai, "Duhsak...lo lut teh...enge i din reng?" tiin a han be leh a.

Chutah Duhsaki chu at hmel tak hian a nui vur vur a, "A dawt leh chu nangmah....nangmah i ni." a ti ringawt mai a, a ha te chu a bal em em mai lehnghal. Remremi chuan a hrethiam lo kher mai, "DAmdawi i rui em ni a?" tiin a vin lek lek tawh mai. Chutih lai tak chuan a room kawngka a rawn inhawng thut a, a phu nasa kher mai.

A va hawi phei chu a u Joshua a lo ni a, "Remrem..ehe tunge i biak a?" a rawn ti hu mai. Remremi chuan tukverh lam chu a han hawi leh a, mahse Duhsaki chu a hmu tawh hauh lo. Joshua bawk chuan, "I thiannu kha...Duhsaki kha, a inawkhlum an ti." a ti ta mai a. Remremi chu a meng phar nghal awn awn mai a, "MAW...Duh..Duhsaki maw?" a ti chel chul mai.

***********************

A tukah chuan Duhsaki pawh chu vui a ni ve leh ta a, Remremi chuan a thiannu ruang chu a thutchilh deuh chawt mai. A biangah chuan a chul reng a, a tap nasa kher mai. Jenny erawh chuan kil khat atang chuan a lo en reng a, a phone phawrhin Remremi chu ava phone a. A mittui hruk mawlh mawlh pah chuan Remremi chuan phone chu a la a, "Pawnah lo chhuak rawh." tiin Jenny chuan a dah leh hmak mai.

Jenny chu pawnah chuan a  chhuak nghal a, REmremi pawh chuan a zui chhuak ve nghal a. Jenny chuan rum zet hian a en a, "Tikhan i awih tawh em? Ti khan i hlauthawng ve tan tawh em?" a han ti vin deuh thak a. Inhnit hlawp hlawp pah hian Remremi chuan, "Engthil mah kan tisual silo va, tinge hetia min umzui reng le?" a ti zawi sap a.

"Duhsaki kha nizanah ka mumangah ka hmu a, in thi ve dawn tiin min hrilh a ni." Jenny-i'n a han ti chu Remremi chuan mak a ti kher mai. "Eng maw? I hmu ve maw?" a ti nghal hu mai a. Jenny pawh chuan mak a lo ti kher mai, "Aww..hmu e..i hmu ve zawk em ni?" tiin a lo zawt let vat a.

"Aw...ka hmu..ka hmu chiang lutuk."

"I mumangah ve tho maw?"

"Aih...a takin..ka room tukverh bulah a lo ding."

"Sawi a nei em?"

"Aw nei e."

"Enge a sawi?"

Remremi chu a ngawi ta daih mai, "Remrem, enge a sawi? Mawhh.." tiin Jenny chuan a zawt nawn leh a. Mahse a ngawi tlat mai, a tah a chhuak em em bawk. "Remrem...enge Duhsaki chuan a sawi?" tiin a han zawt leh a. Hreh hmel tak hian, "A dawt leh chu nangmah...min ti." a ti khur dar dar a.

Jenny chuan hlauhthawn hmel tak hian, "Anih chuan nangmah i ni anga, a dawt leh chu keimah tihna." a ti zawi sap mai. Mangang tak hian Remremi chuan, "Engtin nge kan tih ang? Mawh...engtin nge kan tih ang?" tiin a tap pur tawh mai a. Jenny chuan thinrim tak hian, "Tunah i hlau ve chauh amaw? Ahma kha chuan engtin mah kan awm lovang i ti ani lawm ni?" a ti hlur mai.

"Jenny...engtin nge kan tih ang? Khatia inhauh kha a hunlo, zan a ral hma ngei hian engemaw kan tih vat angai a ni." a han ti leh chul a. Jenny chu a ngawi vang vang a, "Hal ang." a ti ta mai a. Phawk zet hian REmremi chuan, "Engmaw? Enge awmzia?" a lo ti hu mai. "Saw in saw...hal ral angai." a lo ti leh a.

"MAhse...engtin nge kan hal ang?"

"I scooty i la chhuak thei em?"

"Aw thei e."

"Tuma hriat lovin kan kal angai, galon bur ruak keng ila...petrol kan la anga..tichuan kan va hal ang."

"A chi dawn em ni?"

"A bak tih dan kawng ka hre lo."

Remremi chu a ngawi vang vang a, "Awle.." tiin a chhang ta a. Thlanmual lamah pawh chuan an kal ve ta lova, ngawi reng chuan Remremi scooty hman chuan an chhuak ta a. Petrol pump ah chuan petrol an va la a, tichuan an kal rukna in ngei lam pan chuan an tlan leh ta a. Rei fe an tlan hnu chuan an thleng ta, gate bulah chuan an ding dun a.

Remremi chu a hawi kual a, "Tuman min hmu em lovang chu maw?" a han ti a. Jenny pawh chu hawi kualin, "Ti vat vat ila..min hmuh hma in...chubakah a fal emai, tumah an lo kal lovang." a han ti a. "Jenny, kan hal tih hi midangin hre ta se.." Remremi chuan a han ti leh a. "Hre mahse pawilo...kan nunna a pawimawh zawk." tiin a lo chhang a.

"Anih hemi hi hal ta ila, engkim a tawp vek angem?"

"KA hre lo...kawng ka hriat awmchhun a ni."

An ngawi dun leh vang vang a, "Anih chuan tan ila." tiin Remremi chu a kal hmasa a. Tichuan in chu petrol chuan an han leih puat puat a, a chhungah chuan an lut leh bawk a. Petrol galon bur lian 2 zo thak chuan an han leih ta a, chutih lai tak chuan hmeichhe naupang aw hian, "Anu..ka duhlo." a rawn ti thut mai.

An ding dun chat a, "Ilo hre ve em?" tiin Jenny chuan a han zawt a. Mahse Remremi chuan a chhang lo, a hma zawn chu a kawk ringawt. An awmna atanga pen 30 velah chuan hmeichhe naupang, ahmaa an hmuh thin tho kha a lo ding reng mai a. Muang chang chuan a rawn pan chhet chhet mai a, "Nilo..Jenny lighter kha phawrh vat rawh." tiin Remremi chu a rak nghal chel chul mai.

Naupang chu a lo hnai zel a, Jenny chuan lighter chu a phawrh a, lehlamah chanchin bu hlawm chu a hum ran bawk. Mahse a talh alh thei ta tlat lo mai, naupang lah chu a rawn phei zel a. "Jenny, ti vat ta che." tiin Remremi chu a mangang tawh kher mai. "Ka talh alh thei lo a nih hi.." tiin Jenny pawh chu a lo vin hlur mai.

A tawpah chuan Remremi chuan, "Tlanchhe mai ang.." tiin Jenny chu a pawt a. kawngka lam pan chuan an tlan phei a. Mahse Remremi zawk chu inchhuih in a bawk thlawp mai, chhuatah chuan a hnar a la sawh zui a, a thi zawih zawih mai. Jenny chuan kaih thawh tumin ava let leh a, mahse Remremi bulah chuan nu pakhat, Bsi leh Rosy thattu ngei mah kha a lo ding run mai a nih chu.

Jenny pawh chu a ding chat mai, Remremi lah chu a lu a hai muai muai mai a, a tho thei mai lo. Chu nu rapthlak tak chuan Jenny chu a rawn pan ve leh a, chutah Remremi tlukna sir a thing atanga siam, almiriah lian tak mai leh rih hmel em em mai chu a awn ti ruai ruai mai. Jenny chuan a hmu a, "Remrem....awm sawn rawh." a ti vak vak a.

Remremi chu a rawn harh chiang a, a bula almiriah lian tak, lo awn ruai ruai mai chu a hmu ta. A au vak a, "Jenny, min chhan rawh." a ti vak vak a. Thawh a tum a, mahse a keah chuan hmeichhe naupang chuan a lo man bet tlat mai. Kha nu rapthlak tak mai khan Jenny chu ala pan mek bawk si a, Remremi chu a chhan ngam mai bik silo.

An pahnih chuan tapin an au dun vak vak ringawt a, almiriah lah chu a buk nasa tulh tulh mai a. Chutah a tlu ta ruah mai a, Remremi hnute hnuai zawng chu a delh pherh vek a, a taksa chu a bung hmawk mai. A taksa la bang zawng, a hnute atanga chunglam zawng chu Jenny ke bul thleng chuan a rawn thleng phei a.

Jenny ke bulah chuan Remremi ruang, a kawng achin chunglam zawng chu a let reng mai a, ala meng kur zui. Jenny rap lutuk chu a t(r)e vak vak a, pawnah chuan a tlan chhuak a. A bawk thlawp a, a luak nghal bawrh bawrh mai. A luak te chu a dum nguk mai a, vangvat ang tak tak hi ala luak chhuak zui.

Scooty lam pan chuan a tlan phei a, a in chhui phei nawk nawk mai. Khua lah chu a thim tan der tawh mai a, ruah a rawn tla ser ser bawk. Scooty bul ava thlen dawn tep chuan gate bulah chuan pa pakhat hi amah hnung chhawn zawng hian a lo ding run mai a, a rawn hawi phei thut mai chu Jenny hlauh a zual kher mai.

A hmai chu a lo dang var pup mai a, a hmui te chu a lo sawi bawi bawi mai. Jenny hlau lutuk chu khawi lam nge pan tur pawh a hre tawh lo, thlanglam ramhnuai panna kawngah chuan a tlan lut ringawt a. A tlan chhiat lai pawh chuan naupang tap ri te, patling nui huah huah ri leh na tuara t(r)e vak vak thawm te chuan a um zui zel a, hemi hnu hian Jenny hi a bo ta daih a ni.

****************************

(2021 - January)

Lalmuankim, kum 35 a upa, Mka tia an koh thin chu a hna avangin Thingmawi Khuaah chuan in luah a ngai a. Hripui len lai a ni bawk si nen, tupawh mai chu an inhlau them thum mai avang chuan in han luah mai tur pawh a hmu zo lo. A tawp a tawpah chuan khaw dai lama fal deuh taka in lo awm chu a hmu fuh ve ta a, mahse chu in chu in satliah mai mai a nilo tih a hre ve hauh silo.

Mka hian fapa pakhat a nei a, a hming chu Michael-a a ni. A nupui erawh car accident avangin a boral tawh a, a fapa chawm nan tiin hna a zawng hram hram thin a. Tichuan hna  ahmuh hnu chuan khaw dangah a post chu sawn sak niin, Thingmawi khuaah hian in a luah a ngai ta a ni. Tichuan chu in chu luah mai a tum ta a, mahse an khaw hruaitute chuan luah lo turin an ti nasa kher mai.

Mka hi pa huaisen ve tak a ni a, thlahrang leh ramhuai tih vel ringlo tawp chi kha a ni a. Engmah ala tawn ve ngailoh vang te pawh a ni mahna, chu in chu luah mai  a duh ta a. A hran thu an sawi te chuan a nuih a za lek lek zawk hial a, mitthi ruang an chhar an chhar thin thu an sawi hnu leh hun kal tawha thil thleng an hrilh hnu pawh chuan chutia a neitu pawh awmlo, inruak chu luah a duh tlat tho mai.

Khawtlang hruaitute chuan luah lo hram tura an hrilh hnu pawh chuan a hnial tlat zel a, a tawpah chuan a chungah engpawh thleng se ama mawhphurhna vek a ni dawn tih pawm thlapin in chu a luah ta nge nge a. Bungraw thiar luh velah pawh tuman an pui duh lova, amah chuan tifel vekin chu in ruak chu a fapa nena an chenna turin a lah fel thei ta a ni.

*****************************

To be COntinue.