THE CURSE (MIZO : ANCHHIA) Story by : Aaron Malsawmdawngzuala MIZO FICTION HORROR STORY WARNING : 18+ CHAPTER - 2

 THE CURSE

(MIZO : ANCHHIA)

Story by : Aaron Malsawmdawngzuala

MIZO FICTION HORROR STORY

WARNING : 18+

CHAPTER - 2

**********************

Ni 3 a liam a, Remremi te thian ho chuan engthil danglam mah an tawk lem lo. Zan khat chu Bsi nu Pi Rovi chuan Bsi chu dawr kal turin a tir a, Bsi chu a kal ve mai bawk a. Dawrah chua kuhva a lei a, let leh mai a han tum chu meizial zuk rukna hun remchang tak niin a hre ta. Haw mai lo chuan a han kal hla leh deuh va, kawng sir zun in kilah chuan a va phei a.

Meizial chu a han t(r)an a, a zu ta hlat hlat mai. A phone a han phawrh a, group message te chu a han enkual vel a. Chutih lai chuan a hnung lam atang chuan tu emaw phun sep ri niawm tak chu a hre ta thut mai, rang takin hnunglam chu a hawi vat a. Mahse tumah a hmu lo, chubakah a thim em bawk avang chuan engmah a hmu chiah thei lo.

A phone torch chu on in a han enkual leh a, bawlhhlawh t(r)awp deuh deuh bak engmah dang a hmu lo. A khi suk a, a han zuk zawm leh hlat hlat a. A zuk zawh dawn tep ah chuan a hnunglam thim lai atang bawk chuan phun sep ri a hre leh ta, a hawi leh nghal vat a. A phone torch chu a han on leh a, a ngai te bawkin bawlhhlawh bak engmah a awm lo.

Meizial chu a zu zo ta a, chhoh mai a han tum chu hmeichhe naupang aw hian, "BS.." a rawn ti leh ta sap mai. A phu zuk a, a phone torch chu on lehin a en leh nghal a. Chutah bawlhhlawh tam tak kara hmeichhe naupang pakhat, amah hnungchhawn zawnga lo thu reng chu a hmu ta. Bsi chuan mak a ti kher mai, "Hey...tunge i nih?" tiin a han au deuh vak a.

Chutah chu naupang chu muangchang hian a rawn hawi a, a mit chu a dum han a dum kuk mai. A hmai chu a dang var vek bawk a, a sam pawh a hraw rup mai a, a thawmhnaw bal hle bawk. Chutah a hnar atang chuan thisen tamtak a lo chhuak a, amah chu tho leh khuai tamtakin an bawm sup sup reng bawk.

Bsi rap lutuk chuan, "Ka duh thei lo." tiin kawngpui lamah chhoh a tum a. Mahse engemawni nal deuh mai hi a rap pial a, a hma zawng chuan a thlu bawk thlawp mai. Step ah chuan a hnar a sawh a, thisen tamtak a rawn chhuak a. A na ti lutuk chu tah pawh a tap hlei thei lo, a lu a hai chhawk mai.

"Aah..ana.ana." tih bak a sawi thei lo, chutah kut vawt thlur mai hian a ke chu a rawn vuan ta thut mai. Thei leh thei lo hian hnunglam chu a zu hawi a, kha hmeichhe naupang te bawk kha a lo ni. Zau em em hian a ka a lo ang a, a chhungah chuan rannung an rawn vak chhuak sup sup ta mai.

Bsi hlau lutuk chu au vak a tum a, mahse chu naupang te chuan rang takin a pawt vak a. Bawlhhlawh awmna kawrah chuan a pawt lut ta daih mai a, mahse a t(r)e ri deuh thawt hman tho. Chutih lai tak chuan kawngsirah tlangval pakhat hi a lo kal phei mek a, Bsi t(r)e deuh thawt thawm chu a hre hman hlauh.

"Tunge maw?" tih pah chuan zunin bulah chuan a zu chhuk ve a, mahse ani pawh chuan bawlhhlawh bak engmah a hmu lo. A han chhuk hnai leh deuh va, light te chuan a han enkual leh a. "Awm in awm em ni?" tiin a han au ring deuh va, mahse tuman an chhang lo. "Ka hriat sual aniang.." ti nuah nuah chung chuan kal leh mai a tum a.

Mahse thawm a hre leh ta tlat mai, "Tunge? Awm in awm em ni?" a han ti vin leh thak a. Light chuan a en kual leh a, chutah bawlhhlawh tam tak karah engemaw che det det chu ava hmu ta. A han enchiang a, a lo che leh zauh mai. A va kal hnai ta a, "Engthil nge maw ni le?" a ti nauh nauh mai.

Tiang lian tha ve tak mai chu a bul lawkah chuan  alo awm hlauh mai a, a chuh nghal vat a. Chu bawlhhlawh kara engemaw lo che leh thin chu a zu hawlh a. Chutah a tiang chu pawttu an awm ta tlat, chu tlangval chuan thlah mai a tum bik lo. Na tak chuan a han pawt let a, a thil hmuh chuan a barakhaih hle mai.

Chu tiang lo pawt let tu chu a hnuk chhuak titih a, kawr tui bal rimchhe thang huam mai leh bawlhhlawh eng eng emaw kai berh nuai chung chuan Bsi chu a rawn vak chhuak ta hlawl mai. Chupa mak ti lutuk chu a tlu thelh nghe nghe, "Ehe..tunge i nih?" tiin a zawt a. BSI chu a thusawp hnawk a, a thaw hlawi hlawi mai.

Chutah a luak ta vak vak mai a, a luak te chu a dum hian a dum nguk mai. Chupa chu a han en leh a, hlauh hmel em em hian an in en tlawk tlawk mai. Tap pur chung chuan Bsi chu a tho vat a, a tlan ta daih mai. Chu tlangval chu a hrilhhai hle mai, "Enge maw awmzia ni?" a ti nuah nuah a, ngaih tha lo tak chuan a kalsawn ve mai a.

****************************

Bsi chu in lam panin tap chungin a tlan zel a, khawlai lo kal te chuan an en hu hlawm mai. An inah chuan a tlan lut a, anu Pi Rovi chuan a lo hmu chuan mak a ti kher mai. "Ehe...Bs, enge awm zia? I tawlhthlu em ni?" tiin a lo zawt a. Bsi chu a ding ngawi reng a, a hlauhna kha a la reh mawlh lo a ni.

A pa a lo chhuak ve a, "Ekhai...khawnge i kal a? Khawnge kan kuhva turte chu?" a lo ti ve bawk a. Bsi chuan a chhang lo, rang takin bathroom ah chuan a lut a. A nau Mama erawh a u Bsi chu tawlhthlu in kawrah a tla palh a ni ngei ringin a lo nui nasa mai, "Ava buaithlak tak...kha Mama..va kal mai teh. A kuhva rawn lei pawh a thlauh bo aniang, thlauh lo pawh nise ei pawh a ei tlak nang." tiin Mama chu pawisa a pe a.

Mama pawh chu a chhuak ve mai a, "Inchhung i rawn ti rimchhe vek alawm le..khawiah nge i tluk reng reng a?" tiin a han zawt leh a. Mahse bathroom chhunga awm mek Bsi chuan chhan pawh a chhang lo, a thawmhnaw phelh sawk sawkin shower chu a on a, tui chu a inkhawh tir nghal char char a.

Zawi tak si, chhuak em em si chuan a tap hawm hawm mai. Inchhung a luh tirh khan a hmui a hup tlat avang chuan  ahnar thi te pawh chu a chhungte chuan an hmu lo va, a hnar thi chu a lo la reh reng reng lo va. A rawn thi leh ta zawih zawih mai, a na a ti bawk si, a tah a chhuak bawk nen, a ner leh sawk sawk zel a.

Kha hmeichhe naupang a hmuh kha a mitthla ah chuan a rawn lang leh thin a, a hlau takzet a ni. A khup leh a kiu te chu a lo sawh pil nual bawk a, na a ti kher mai. Tichuan a inbual zo ta, bathroom-a lo awm sa anu towel chu a la lawk a, a taksa chu a hru hul a. Chutia a inhruk mawlh mawlh lai chuan a hnunglam atang chuan phun sep ri bawk chu a hre leh ta, rang takin a hawi vat a.

Chutah le, hmeichhe puitling pakhat vun dang vek. Saruak veka lo awm, sam pheng em em mai chu a hma zawn takah chuan a lo ding run mai. Bsi hlau lutuk chu au vak a tum a, mahse chunu chuan a ka ah a hup sak a. Bangah chuan a nambet a, rum zet hian a mitmu var pup mai chuan a melh te run mai.

Chunu hmai chu dang var vek mahse a hmaiah chuan thisen zam niawm tak mai te chu maimawm ril ang mai hian a rang nuai mai. Chutah aw mipa aw thum tak ang mai hian, "Engvangin nge inlo kal? Lo kal tur in ni lo asin." a ti ta chhur chhur mai a. Chutih lai chuan Bsi nu, Pi Rovi chuan a fanu chu a rawn ko mek a.

"Bs, iva inbual rei em em ve? Bathroom kha ka hmang ve duh a nia, duhtawk tawh teh." a lo ti tuar tuar a. Mahse Bsi chuan  a chhang thei lo, chu nu mak tak mai chuan a ka  ala hup beh sak tlat. "BS...BS...engemaw mi chhan duh miah loh le?" tiin Pi Rovi chu a ngaih a tha lo tan ta hle mai a, Bsi pa Pu Tetea pawh a room atang chuan a rawn chhuak ve hial a.

Chu nu rapthlak tak mai chuan BSi sam chu a han kek vak a, bathroom bang char ah chuan a tauh tir ta siah siah mai le. A ri dup dup mai a, anu leh pate chuan enge thleng an hre der silo. Vin deuh tak hian Pu Tetea chuan, "BS..Mami..enge i tih rik dup dup kha?" tiin a han zawt ve leh a, kawngka chu kan kik mai pawh  ani tawh lo, a chumin an chum dup dup tawh a ni ber.

Bsi lah chu chawl lo chuan chunu chuan bangah chuan na em em hian a tauh tir chawrh chawrh zel mai bawk si, bangah chuan thisen a luang nasa tawh mai. Bsi phei chu a char vn a thler nuai tawh, nikhaw hrelovin a awm der tawh. Mahse chu nu mak tak chuan ala duh tawh lo, a aia na hian a tauh tir chhunzawm zel a.

Bsi berin a chhan theih tak silovah chuan an ngaih a tha tawh lo takzet, Pu Tetea chuan kawngka chu tihchhiat mai a tum ta. A tlawh vak vak a, an thawm a nat em avang chuan thenawmte pawh an lo lut hial mai. Bsi lah chu chu nu rapthlak tak mai chuan chawl miah lo chuan bangah chuan a lu chu a la tauh tir char char mai a, Bsi chuan engmah a hre tawh lo.

A tawp a tawpah chuan kawngka chu an tichhe thei ta a, chutah an thil hmuh chuan a ti hrilhhai hlawm ngei mai. Bsi chuan bang chu amahin a lo tauh chawrh chawrh mai a, thisen la chu a luan kawi nuai tawh lehnghal. Rang takin Pu Tetea chu ava tlan lut a, "Bawihte..engthil nge maw i tih le?" tiin a va pawm sawn vat a.

Mahse Bsi chuan a chhang thei tawh lo, a chhan chu a thi daih tawh a ni. A chan vun chu a thler vek mai nilovin a luh ruh a lo lang hial tawh, bangah chuan vun them a kai nual bawk. Bsi nu chu a au vak vak a, thenawm khawveng ho pawh an lo lut sap sap hlawm tawh mai. Pa ho chu an va lut ve bawk a, mahse Bsi chu chhan theih a ni tawh lo, a thi tawh tlat a ni.

*****************************

A tuk Bsi vuinaah chuan a thian dangte, Duhsaki, Remremi leh Rosy te pawh an kal ve a, Jenny pawh a tel ve bawk. Bsi hmai chu hmuh theih loh khawp hian an tuam nasa a, thil thleng chuan khaw pum mai chu a ti hrilhhai takzet a ni. Ngaihdan hrang hrang a piang chhuak hnem hle a, a in ang lo nuai bawk.

A then chuan Bsi chu a rilru a hah avangin amahin a inthat angah an ngai a, a thenin a kawchhungah ramhuai a lut angin an ngai bawk. A then chuan a nu leh paten an ti duhdah anga, a rilru na a in that aniang te an lo ti ve bawk a, thenkhat chuan damdawi a rui angah te an lo ngai bawk.

Hemi ni, an vui ni pawh hian kawra a tlak tuma amah hmutu ber, kha tlangval pawh kha a tel ve thova, mahse mitthi chu Bsi a ni tih a hre lo. A chhan pawh he tlangval hian amah Bsi hi a hre lo hrim hrim chu thuhran nise, khami zan khan Bsi hmaiah khan chirh a kai nasa em a, khua a thim tawh bawk nen a hmel kha a hrechiang lo hrim hrim a ni.

Bsi chu an vui zo ta, thlanmual lamah chuan an kal ta sap sap hlawm a. Bsi te class hian a school ang zawnga an vui avang chuan school naupang pawh an tam hle a, an tap nasa hlawm kher mai. Mahse chung zinga tap ve thei miah lo khawpa hlauthawng an awm tlat, chungte chu tudang nilovin a thiante, kha in a a kalpui te, Jenny, Remremi, Duhsaki leh Rosy te an ni.

Pastor-i'n thlan bula hun a hman lai chuan Jenny chu a hawi kual a, thlan pakhat bula Remrei, Duhsaki leh Rosy te lo ding ho chu ava hmu a. A va pan ve a, Jenny ava thleng chu midang ho chuan an lo melh thap hlawm mai. "Kha ina kan kal vang vek kha a ni." Jenny chuan a han ti nghal thawr a.

Remremi chuan rum tak hian a lo melh a, "Khatia i rawn sawi kha ka ring reng a ni...kha in leh Bsi thihna hian engmah inzawmna a nei lo." a lo ti hmak mai. Jenny chuan Rosy chu a en a, "Rosy..nangmah ngei pawhin i sawi kha, saw ina pen lut tawh te chu an thi zel i tih kha. Bsi atang hian a intan dawn a ni ngei ang, keini pawh kan bang bik hauh lovang." a han ti leh a.

"Chutiang hetah rawn sawi suh, Bsi kan chan mek a ni a, kan rilru ana takzet asin." Remremi bawk chuan a lo ti leh a. Duhsaki leh Rosy erawh an la ngawi reng, "Bsi thih chhan hi anih leh enge ni anga? An sawi dan te kha i hre ve lo em ni? Amah leh amah a inthat an tih kha...nangpawhin a chhan i hre vek, Remrem...i hre duhlo lui a nih kha." Jenny chuan a ti ve ta sak mai.

Remremi chu a sa deuh phat mai, "Engmah i hrelo, i ngaihdan atthlak lutuk kha paih bo teh. Bsi khan damdawi a rui bak a ni lovang, chubakah a ruih apiangin mawl deuh deuhvin a che ziah alawm." a lo ti leh hrep mai. "Bsi'n chutiang a ti lovang." tiin a lo chhanglet ve leh a. Remremi chuan Jenny chu a melh hrawk mai, a va pan hnai a.

Chiang fek fawk hian, "Bsi hi kan thiannu a ni a, nang chuan i hmelhriat satliah ringawt. Nang aiin kan hrechiang, a thil tih thin leh a mizia pawh engmah i hre ve lo." a ti ta khur khur mai a. Mahse Jenny chuan ngawih mai a tum bik lo, "Kha inah khan ka duh lo chung min hruai lui a, tunah chuan keini pawh kan thi ve vek dawn a nih hi. Nangmah vang vek, kha ina kan kal vang vek." a ti ve ta sak sak mai.

REmremi bawk chuan, "Kha ina kan kal vang kha a nilo, thil thleng palh ve mai chauh a ni. Kha ina kal apiangte hi thi zel ni tase, Bsi chauh hi a thi nang. Keini pawh Bsi thih rualin kan thi ve vek ang chu, i dawihzep lutuk vang a nih kha." a han ti leh a. "Kha inah khan kan kal tih hi midangin hre ta se, khaw mipui zawng zawng hian ka rin ang chiah hian an ring ve vek ang." Jenny chuan a lo ti leh a.

Remremi chuan rum zet hian Jenny chu a melh a, "Kha ina kan kal thu kha han sawi vaih teh." tiin a vau ta khur khur mai. Mahse Jenny chuan a lo hlau bik hauh lo, "Anih loh chuan enge i tih anga? Ka hlau lo che." a lo ti ve sak mai. Duhsaki chu va inrawlh vatin, "Hey, in mawl a mi? Mipui an tam em hi, min ringhlel ange." tiin Remremi chu a pawt sawn a.

Rosy pawh chuan Jenny chu pawt sawn ve in, "Khatin awm suh, Jenny. Engmah kan chungah a thleng ve dawn hleinem, i la dam a, keipawh ka la dam hi. Chuan hei, Duhsaki leh Remremi pawh an la dam a..thi vek tur alawm kan nih. Mihring te hian kan thih hun tur kan hre lo, Bsi pawh a thih hun a thleng a, a kal a nimai. Buaina tur a awmlo, tikhan awm tawh su." alo ti ve bawk a.

Remremi chuan Jenny chu ala melh rum ngei mai, "Min hlau lo chiah maw, Jenny? A tha e, kan en ang chu. Min hlau ngei ang, ve khanglang che chuan.." tih pah chuan a kal daih mai. Rosy leh Duhsaki chuan an zui a, mahse Jenny erawh a dinna ngaiah ala ding reng thung. Kal ve mai a han tum chu thlanmual pakhat, a mawng lam deuh chu a zu melh zeuh va.

A thil hmuh chuan a tiding chat mai, hmeichhe naupang vun dang vek, bal zet mai leh mit dum kuk mai chu a zu hmu a. Chu naupang lah chuan a lo en reng mai, Jenny chuan a hlau nghal der mai. Mahse a en reng tho va, chu naupang bul deuh lawkah chuan tlangval pahnih hian meizial an zu bawk.

Mahse chu tlangval pahnih te chuan an bul lawka ding hmeichhe naupang chu an hmu awm pawhin an lang lo, an titi dun mial mial a. Chu naupang chu a chang leh a thle deuh bawi bawi zel a, Jenny ngaih chu a tha lo takzet. Chutah a zu pan hnai a, chuveleh rang lutukin thlan lung phenah chuan naupang chu a pil bo ta daih mai.

Jenny chu a zu chhuk zel a, a zu thleng ta. Thlan lung phenah chuan tumah an lo awm lo, mak a ti kher mai. Kha naupang kha biru pawh nise khawiah mah kalsawnna hman a awm lo. Lo kal sawn pawh nise Jenny khan a hmu hman ngei ang, mahse thlan luh phena a pil zuk bak kha chu hmuh tur a awm der mai silo.

A bula tlangval pahnih lo thute chuan chutia Jenny hawi deuh vual vual chu mak an ti deuh va, "Mami enge i zawn a?" tiin pakhat zawk chuan a zawt ta nge nge a. Jenny chu a phu deuh zuk lehnghal, "Aa..ihh..hmeichhe naupang kha khawnge..heta ding reng kha?" tiin a han zawt deuh tawp a.

Mahse anni chuan, "Hmeichhe naupang lo kal awm kan hre lo reng reng." tiin an lo chhang ta tlat mai. Jenny chuan mak a ti kher mai, "Ka hmu reng sia...in hmu miah lo maw?"  a han ti leh a. Tlangvalte chuan an hmuh hauh loh thu bawk chu an lo hrilh leh a, "Ngati nge a? I nau em ni?" tiin pakhat zawk chuan a han zawt ve leh a.

Mahse Jenny chuan a lu a thing ringawt, a ruk tak chuan a hlau kher mai. Chutih lai chuan anu a rawn kal a, "Jenny, hawh...haw ang le." a rawn ti a. Jenny chu a phu deuh zuk lehnghal, "Aw ka lo chho." tiin a chhang a. Anu nen chuan an inzui chho va, Jenny chu a zu hawi thla leh thin a. Mahse engmah chu a hmu tawh lem lo, tichuan in lam pan chuan a haw ve ta a ni.

*****************************

Zan dar 12:30 a ri a, Rosy chu a muhil thei reng reng lo mai. A ril a tam em avang chuan a tho leh a, eitur chu a zawng ta a. A chhungte dang erawh an mu vek tawh a, amah chauh chuan a meng tawh. Chhang han hmawm mai tur lah chu a hmu thak lo lehnghal, "Hmm..chaw ei mai teh ang." tiin fimkhur tak chuan thleng a la a.

Tichuan chaw ei a insiam mawlh mawlh a, "Ka thau leh vek dawn a nih hi." tiin nui suk chung chuan a han phun sap a. Chutah a nui rik huk ang chiah chiah a nui ri ve huk chu a hre ta tlat mai, a chaw khawrh lai chu a tawp nghal chat. A han hawi kual a, mahse inchhung chu a reh diak mai si.

Ngaihtha tak chuan chaw ei chu a siam chhunzawm leh mial mial a, tichuan chaw chu a ei ta. Spoon-in a ei a, a eitui lemlo kher mai. A melh ngai chu melh reng pah chuan a inngaih tuah nauh nauh va, a khat tawk chuan a hawp leh zauh zauh thin a. Chutia a chaw ei lai pawh en mang lo leh ngaihtuah miah lova a hawp mawlh mawlh lai chuan a thil ei mek, a ka chhung ami chu a che tlat hian a hre ta.

A chaw ei mek a zu en chu chaw a lo ni tawh reng reng lo, hlit niawm tak dum lian pui pui mai chu a thleng khat vek hian an lo che ngual ngual hlawm mai a nih chu. A rap lutuk chu a tho thut a, a chhak leh nghal a. Sil hmunah va kalin a va uak vak vak mai, tui herh haw in a kam a thuah nghal char char bawk a.

A mittui a tla phung thei hial, chutah a pum a rawn na ta vak mai a. "Ana lutuk.." tiin a dawm vawng vawng a, a kun ta tlawk tlawk mai. Rang takin bathroom lamah chuan a lut a, toilet european type chu vuan meuhvin a luak ta bawrh bawrh mai. A luak lah chu a dum hian a dum nguk mai a, a rimchhe em em mai lehnghal.

A ziaawm deuh hnu chuan a ding a, a taksa chu a chau vek mai. "Enge thleng? Enge ka chungah hian thleng?" tiin a inbe mawlh mawlh a, a tap pur tawh mai. Bathroom atang chuan a chhuak a, mahse han hawi kual chu a ding ta chat mai. A awmna hmun chu an in a ni tawh hauh lo, hmun dang daih a ni.

Inchhung tho a ni a, inchung chhohna a awm bawk. A enkual a enkual hnuah chuan khawilai nge tih a hre ta, kha in an kalna, in hrang tia an sawi ngei kha a ni. "Nilo...ka duhlo." tiin chhuah a tum a. Kawngka lam ava pan chu kawngka zawn takah chuan pa pakhat hi a lo ding run mai a, a palian em em mai lehnghal.

Rosy chu a ding chat a, "Tu..tunge i nih?" a han ti tham tiak a. Chupa chu a lo hawi a, a hmel chu a rapawm takzet. A hmai te chu a thler nuai mai a, a lung(maggots) nuai nuai bawk. Chutah enge a sawi pawh hriat theih loh khawpa thum leh rapthlak hian, "Vawikhat i pen lut tawh, i chhuak thei tawh lo." a ti ta chhur chhur mai.

Rosy hlau lutuk chu ring takin a au vak vak a, tlan chhiat tuma lehlam a hawi chiah chu a hmaah chuan hmeichhe pakhat a lo ding leh vung mai. Chu nu chu a hriat hnu a ni tlat, a thiannu, a hma ni lawka thi ta, Bsi kha a ni. Mahse Bsi hmel chuan a rap takzet, a thih laia a hmel awmdan chiah chiah chuan a lo awm a.

A chal vun chu a thler nuai mai a, a luruh khi thawt pawh a lang chiang hle. Chutah light te chu a phe zawk zawk mai a, Bsi lah chu a la then thu lehnghal. Rapthlak tak hian a nui huah huah mai a, "Rosy...keimah chauh chuan ka kal dawn biklo. Ka rualin ka hruai ve vek dawn che u...min lo zui rawh." a ti ta khur khur mai.

Tap chung hian Rosy chuan, "Ka duhlo...ka duhlo..min kalsan ru..khawngaihin min kalsan ru." a ti a, a khur zawih zawih mai. Bsi chuan a pan zel a, mahse Rosy chu a tlanchhe thei tawh lo. A ke leh chhuat chu a inchar emaw tih mai tur hian a che thei ta hauh lo mai a, a taksa zawng zawng chu a khawng ut mai.

Chutah in sir thim lai atang chuan kha naupang, Bsi kawra pawt luttu leh Jenny-i'n thlanmuala a hmuh ngei mah kha a rawn lang ve leh a. An pathum chuan Rosy chu an hual a, an melh run hlawm mai. Chutah Rosy hnunglam atang chuan kut vawt thlur mai hian a sam chu a rawn tham ta thut mai, muangchang chuan Rosy dar zawna chuan a lu a rawn tilang a.

Nu pakhat, vun dang var pup mai hi a lo ni a. Chunu chu Bsi inbual laia bang tauh tir vak vak tu, Bsi thattu tho kha a ni. Chu nu rapthlak tak mai chuan Rosy chu na takin a samah chuan a han kek leh vak a, Rosy chu a eu dawr a, a ruh a tliak rawp rawp mai. A chhip chuan chhuat chu a si hial a, a dul vut a tet hawk mai.

Chutah a ke chu a han thlep leh hnawk a, a mal vun a thler leh a, chuta tang chuan a ruh a rawn lawr thei hial. Thisen chu a chik hian a chik puat puat mai a, Rosy chu a rum tuah tuah thei chauh tawh. Boruak chu a reh hmak a, Bsi thlarau leh midang pathum te chu an bo ta hmak mai.

*********************

Zinglam dar 2 velah chuan Rosy u, Maengi chu a zun chhuak chuan a ti harh a. Peih lo tak chuan khum atang chuan a tho tuah tuah a, "Ninawm..zan lai lai ah.." ti nuah nuah pah chuan a siliper chu a han thawlh a. Room atang chuan a chhuak ta a, Bathroom lam ava pan chu a ding ta chat mai.

Bathroom kawngka bula a nau Rosy, nasa em em a lo eu vak mai, thisen nena lo inchiah piah nuai chu ava hmu ta. A chhip chuan chhuat a si hial a, a dulvun te chu a thler bawk. A ke te chu a lo inthlep vek a, a ruh te chu a rawn lawtr fer fur bawk a. A awmdan chu rapthlak tak a ni, a thle bawi lehnghal.

Chumai ala nilo, a la meng kur tho va. Amah chu ala rawn melh kur lehnghal, a ka a ang phuau bawk. Maengi hlau lutuk chu ring theih patawp hian a t(r)e ta vak vak mai a, inchhung chu a khawk rum rum thei hial. A thawm chu hria in anu leh pate pawh an rawn harh ve a, an fanu ruang an han hmu chu anni pawh an hrilhhai kher mai.

Rosy nu pawh hlauvin a au vak vak bawk a, apa erawh che chang lovin a ding reng ringawt. An thawm hria in thenawm te pawh an lo lut a, anni pawh chuan an rap kher mai. Rosy nu leh pa leh a u Maengi te chu buaipui ngai khawpin an awmdan a diklo nghal a, Rosy pa phei chu a thidang thelh hial a ni.

*****************************

(2 days later)

Chhun dar 1 a ni a, Jenny chu khawlaiah chuan a tai kual mai mai a. CHutia  ateikual lai chuan kawngsir waiting shed a Duhsaki leh Remremi, ngawi renga an lo thu chu ava hmu a. Rang takin ava pan nghal a, Remremi chuan a lo melhrum lehpek hle mai. A tawng hma chuan Duhsaki phone chu a rawn ri a, "Phone kan hmang lawk ange." tiin a kal daih mai.

Jenny chuan Remremi chu a en a, mahse Remremi erawh chuan en pawh a lo en ve lo. "Tinge ka message engmah min reply duh loh?" tiin Jenny chuan a han zawt a. MAhse Remremi chu ala ngawi reng, "Tunah min han chhang teh...kha ina kan kal vang a nilo tiin ila sawi ngam em?" Jenny bawk chuan  a han ti leh a.

Remremi chuan zawi sap hian, "Kal bo rawh..ka be peih lo che." a lo ti hmak mai. Jenny chu a thinrim takzet, "Remrem, nangmah vang vek a nih hi. Zantin mang tha lo ka nei ziah asin, nangpawn eng engemaw chu i tawng ve chiang. I zep mai mai a ni, nangmah vang vek." a han ti leh a.

"Enge keimah vang vek anih na?"

"Kha inah khan kal lo turin ka ngen che a, mahse min kal luih pui a ni."

"Tunge lo kal ve rawh ti a? I duh chuan i haw thei ka tih kha...i thu ngeia lo lut ve i nih kha.."

"Ni e, ka ngaihtuah vang che u a ni. Mahse a bul tan tu ber chu nangmah vek a ni, keini pawh hi kan la thi ve ngei ang."

Remremi chuan a melh ngai a melh vang vang a, "Ka thi lovang...ka thi ve dawnlo hrim hrim." a ti khur khur mai. Duhsaki chu a rawn let leh a, "Rem, hawh...kal ang." a rawn ti a. Jenny chuan vin zet hian, "Tinge min kalsan zel in tum a? Kan sawi ho angai, pathum chiah kan awm tawh. Engemaw kan tih vat angai, saw inah sawn annchhia a awm a ni. Khawi hmunah pawh kal ila, min zui reng dawn. Remrem, i patea chunga thil thleng te kha ngaihtuah rawh." a ti vak vak mai a.

Remremi chu a ding a, Jenny chu ava pan hnai a. A hma zawnah tak chuan va din chilhin, "Eng anchhia mah a awm lo, Jenny. I thi emaw, thilo emaw..keichu ka thi ve dawn chuanglo. Eng thlahrang mah ka hlau velo, chu chu hria ang che. Chuan ka patea chungchang kha vawi khat pawh han sawi leh teh, thlahrang nilovin keimah zawk hian ka that ang che." a ti khur khur mai.

"Duhsak, kal ang." tiin Duhsaki chu a melh zeuh va, Duhsaki pawh chuan a zui ve mai a. Jeny chuan, "Duhsak...nangpawn engemaw chu i tawng ve a ni tiraw?" a han ti chu Duhsaki chu a ding chat mai. Jenny chu a en vang vang a, "Thudik sawi rawh....i thla a muang bik lo a ni tiraw?" tiin Jenny bawk chuan  a han zawt leh a.

Mahse a chhan hma chuan Remremi chuan, "Duhsak..kal ang ka tih chu." a lo ti vin leh hlur a. Duhsaki chuan zawi sap hian, "Kan kal phawt ange." a ti ringawt a. Remremi nen chuan inzuiin an kalsan ta daih a, Jenny chu a thinrim kher mai. Waiting shed-ah chuan a thu a, "Lo lut ve lo tawp ila tha tur." tiin a hmai  a hup a, a tap zawih zawih mai.

****************************

TO BE CONTINUE