SICCIN-4 (Islamic Horror) Written by : Alper Mestci Translated by : Aaron Malsawmdawngzuala (Based on a true story)

 SICCIN-4

(Islamic Horror)

Written by : Alper Mestci

Translated by : Aaron Malsawmdawngzuala

(Based on a true story)

**************

"Kan in chhuahsan a, ka pi te ina kan insawn atangin ni 3 lai a lo liam ta. Ka nu chuan kan insawn phei nachhan chu ka pi tan chauh chuan in chu a lian lutuk a ni tiin min hrilh a, mahse ka nu leh ka pa titi ka ngaihthlak ruk kha chuan chutiang vang ni hauh lovin ka pa sumdawnna a tlakchhiat vang zawk a ni tih ka hre ta a. Ka pu phei chuan tunge ka nih pawh a hre tawh lo hrim hrim, vawiina an room-a ka luh khan ka pi khan mak tih hmel takin min en reng ani tih pawh ka hria. Kei ngei pawh hian ka pu damthat lai kha ka hrechiang tawh lo, ka pi khan a damthat lai khan nautelem min pe a, ka pu min leisak ani tiin min hrilh a, kha thil kha chu ka hre ve hman. Mahse, chiang tak erawh chuan ka hre chuang lo, ka pu kha ka hre hman lo hrim hrim ti ila ka sawisual lovang. A boral khan kum 5 chauh ka la ni a, ka pu boral hnu khan ka pi hi a damlo ve tan nghal a ni. Khami hnu atang khan ka pi chu kan tlawh ngai ta miah lova, a chhan pawh ka pa khan ka pi damlo leh bawrhsawm em em mai chu kan hmuh  aphal lo ni berin ka hria. Ka nau Omer-a hian a hlauh a rin vang pawh a ni mahna, achhan chu ka nau hi kum 2 chhung teh meuh a tawng tha hleithei tawh lo a ni. Doctor kan rawn a, mahse a tawngtheih takloh chhan hi a hre thei mai bik silo, ka nau hi ka khawngaih takzet a ni."

"Mahse Omer-a hi a tawng theilo nachungin kan game khelh thin avang hian a thilsawi tum te chu ka hrethiam ve zel a, kan unau hi chuan inzawmna nghet tak kan nei niin ka hria. Vawiin khan Omer-a chuan kan in hi a hlauh em em thu a sawi a, zep lo chuan kei pawh hi kan in kawt maia ka pu thlan lung chuan min ti hlau ve thin khawp mai." tiin  Halil Yilmaz-a fanu Hiyat-i chuan a diary chu a ziak mawlh mawlh a.

****************

"Awi, ala hnawk ropui sia maw...kan insawn atangin ni thum lai aliam tawh a, engmah pawh kan la dah fel tak tak hman lo chu a nih hi." tiin Halil-a nupui FEyza-i chu inchhung hnawk hnuai mai tihfai pah chuan  a phun nuah nuah a. A unaunu, a bula lo remfel pui mek tu chuan, "I ho emai, bungrua in ngah em atin nih hi." a lo ti a. "Kan buai zia te hi i hre ve em?" Feyza-i chuan  ahan ti deuh hlur a.

"Awww...mi zawng zawng hian buaina an nei ve vek. Nang phei chu vannei tak i ni, in neilo pawh i nilova. Pasal i nei a, fa pahnih i nei bawk a." a unaunu chuan a han ti leh a. "Kan hma hun hi tuman kan hre hleinem, hetiang em em a ka pasal lungngai leh mangang hi ka la hmu ngailo." tiin FEyza-i chuan a lo chhang let a.

****************

Halil-a chuan a thianpa, company lian tak Manager chu a puihna dil turin an office lam panin ava kal a, manager room ah chuan ava lut a, "Ehe, Halil...ka office ah i rawn len ngailoh tehlul nen...enge ni ve teh mial a?" Manager chuan a lo ti a. "Englo nia, thil dil che ka duh a. I hnena lo kal hi a dik chiah em chu ka hrelo, mahse duhthlan tur dang ka neilo a ni. I puihna ka mamawh a ni, thianpa." Halil-a chuan a han ti a.

"Sawi ta che.." tiin manager chuan a lo chhang a. "Ka tlachhia  ani, ka employee te pawh thla hnih chhung tehmeuh an hlawh ka pe thei tawh lo. Tax fine payment vang hian sum lamah kan buai lutuk a, i puihna ka rawn dil tawp mai che. Englo...ih, loan puk mai ka duh a, i reti a nih chuan..." a tih lai chuan Manager phone chu a rawn ri a. "Lawk aw.." tiin phone chu a biak san daih a.

Chutih lai chuan Feyza-i leh a fate pahnih, Hiyat-i leh Omer-a te chuan tukthuan an lo ei mek a. Chawhmeh vel te chu an awmpuinu pitar, Rahim-i chuan a rawn chhawp kual a. Rum em em mai hian Omer-a chuan Rahim-i chu a en run reng mai a, a chaw chu a chawk kual vak vak a.

"Kha tia khal kual reng lo khan i chaw kha ei mai mai rawh, tinge tunlai hi chaw iva ei tha duhlo ve." tiin anu chuan a hau a. Rahim-i inchhung chho mek chu Omer-a chuan a han en ren rawn a, chutah a fork kenlai chuan thleng chu a vaw ri ta vak vak mai. Anu chuan  akutah man sakin, "Omer, engtizia nge?" tiin mangang tak chuan a zawt a. 

Anu kut chu phih thlak sakin room lamah a phei daih mai, "Omer.." tia umzui a tum lai tak chuan Hiyat-i chuan, "Nu..keiman ka lo buaipui ange." a lo ti vat a, Omer-a chu ava zui ta a.  Halil-a thianpa chuan loan puk tir chu ka lo phallo nasa mai, lawm lo tak chuan Halil-a chuan a chhuahsan a, a motor ke chu a han chhuih vak vak a, "Phallo ve khanglang, enge maw nia a inhriat ni?" tiin a thinrim kher mai. 

***************

An awmpuinu Rahim-i chuan Halil-a nu Saadet-i, khum beta damlo mek hmaah chuan chiang taka a hmuh thei turin a pasal boral ta, Muhsin-a thlalak chu a han en luih tir a. Hlau hmel em em hian Saadet-i chuan mitmu bial kawk kawk khawpin a pasal thlalak chu a lo en a, Rahim-i lah chuan a melh rum em em mai lehnghal a.

"Nu, Omer-a chuan Pi Rahim-i rawngbawl a eiduh loh thu min hrilh a ni." tiin Hiyat-i chuan anu Feyza-i bulah chuan a hrilh a. Feyza-i chu a rilru a hah ngang mai, a thaw hak ringawt a. Halil-a leh Feyza-i te nupa hi sum lama harsatna an neih avangin an in chu an chhuahsan a, chuvang chuan Halil-a nu Saadet-i, kumbeta damlo mek, an awmpuinu Rahim-i'n a enkaw mek inah chuan an insawn ta tawp a ni.

Zan a lo ni a, Hiyat-i chuan a nau Omer-a, hlauh avanga paper-bag hmanga a lu khuh tlat mai chu a be mawlh mawlh a. "Tinge he in hi i hlauh em em a?" tiin a zawt a. Thei leh theilo hian Omer-a chuan, "Kha..khanu kha, chuat..chuatah a let reng a..chuan..chuan min..min en reng a." a ti tawk tawk a.

"Api hi i hlau em ni?" tiin Hiyat-i chuan a zawt leh a. Mahse Omer-a chuan angaite bawkin, "Khanu kha....min..min en reng a..a mu ngai bawk silo....min..min en reng a ni." a ti leh hlawp hlawp a. "Tuin min en che?" tiin a zawt leh a. "Hmeichhia...Api...thim...ramhuai...naute..." a ti ta deuh nuai mai.

Hrethiamlo tak chuan Hiyat-i chuan, "Api bula pitar saw i hlau em ni?" tiin a zawt leh a. "Apu...khanu kha...a lo hruai let leh...a en reng a ni....thlanmual ah...api'in..min en." a ti leh nuah nuah mai a. A lu khuhna paper bag chu Hiyat-i chuan a lakthlak sak a, "An hlauhawm hleinem, pitar an ni tawh a, an hlauhawm loh. Api hian min hmangaih lutuk alawm, chuan Pi Rahim-i hian api damlo hi a enkawl a ni. Mu tawh rawh, hlau reng reng suh." tiin  a mut that tir a.

"I duh chuan ka lo kuah lum ang che.." a han ti leh a, mahse Omer-a chu a che eih lo. Khumah chuan mu in  amelh ngai a melh reng a, "I hlauh chuan min lo kai tho mai dawnnia." tiin Hiyat-i chuan a mutsan ve ta a. An room ah hian khum inhnaih tak pahnih  a awm a, dinglam zawkah chuan Hiyat-i chu a mu a, veilam zawkah chuan Omer-a a mu thung a ni.

******************

Halil-a pawh chu a rawn haw ta a, anu roomah chuan ava lut a. "Ehe, ila meng animaw Pi Rahim?" ava ti a. Rahim-i chuan ngaihthatloh hmel tak hian, "I nu hi vawiin chu a nuamlo leh zual a ni." tiin Saadet-i ha-lem chu phawi sakin dawhkana burah chuan a dah a. Halil-a chu a hawi kual a, "Ka nu wardobe vel te hi ka han enfiah ve hrim hrim ange." a ti a.

A thawmhnaw vel a han hai lai chu khuma mu mek, tawngthei lo leh che theilo Saadet-i chuan a lo en reng a, Hilai-a chuan bawm lian tak mai hi a hmu ta a. Bawm chu a la chhuak a, a han hawng a. Achhungah chuan chahbi hmuar tak tak leh thlalak hlui tlem azawng bak chu engmah dang a awmlo.

Bawm chu a dah let leh a, "Pi Rahim, ka nu hian pawisa dahthat a nei ngei anga, a dahna i hria em?" tiin a zawt a. "Engtin gne ka hriat ve tehlul ang, pawisa chungchang engmah min sawipui ngailo hrim hrim." tiin a lo chhang a. "Awle, a pawi loh chu." tiin Halil-a chu a chhuak ta a.

A chhuak chiah chu Rahim-i chu ava kun hniam a, Saadet-i beng bulah chuan thinrim hmel tak hian, "Khanu i pek tak pawisate kha a awmna min rawn zawt asin, i hrethiam tawh em? I fapa chuan khanu hnena i pek tak, pawisa te kha a awmna min zawt asin..i hria em?" tiin a vin khur khur mai.

***************

ZAn a lo rei a, Halil-a te nupa chu khumah chuan an titi a. "Ka mitah chiang takin min en a, dawt a han sawi zat zat anih kha. Zawngsena kha...fanancial problems nei angin a insawi ve vel a, nuai 2 lai ba ka nei chuti khati a han ti vel a, tenawm lutuk." tiin Halil-a chu a phun nuah nuah mai.

"Ring reng reng suh ka tih mawlh mawlh kha.." a nupui chuan  alo ti a. "Ka pawisa pawh ka puk tir ziah ania, eng ang mi nge maw anih le? Tanpui angaih changin engmah ka ui ngailo, a duh zah zah ka puk tir thin ania." tiin a han vui leh nuah nuah a. Feyza-i chuan, "Hetiang mi duhawm ho hi chu an in ang vek, pawisa hian an mit a ti del a ni." a lo ti ve bawk a.

"Hlawh pek chu postpone hrih mai rawh tiin thurawn te chu min la pe ve khanglang lehnghal a, a zaklo ania." a han ti leh khur khur a, "Lungngai suh, tihdan a awm mai ang." tiin a nupui chuan a lo thlamuan a. "Ka pawisa puk ho te bulah ka va kal leh anga, ka va dil ve leh chhin ange." Halil-a chuan a han ti leh a.

"Anni pawh kan hrechiang hleinem, mi phakar leh duhawm tak an lo ni ve thei tho asin." Feyza-i chuan a lo ti a. "Apawi lo, vawiin khan ka phone lawk vek tawh a, naktuka lo kal turin min ti a ni. Duhthlan tur dang ka nei lo a ni, Feyza." Halil-a chuan a han ti leh a. FEyza-i chuan, "Umm..mu phawt teh ang." tiin light a off a, an mu ta a.

****************

Zanlaiah chuan Omer-a chu a harh thut a, hmeichhe phun sep sep ri niawm tak hi a hria a. A tho chhuak a, room atang chuan a chhuak a. Ahma zawn chu a pan zel a, kawngka bulah chuan an awmpuinu Rahim-i chu a lo thu khur mai a, apu (Muhsin-a) ruang tawih dum vek mai chu a malchungah a lo pawm bawk.

Mahse Omer-a chuan a hmulo, a hmazawn chu melhin a pan phei zel a. Chutah hnunglam atanga lo en rengtu, Rahim-a hmel chu rawn inthlak in ramhuai dum lian zet mai, sam hraw tak leh thur bum maiah chuan a rawn chang ta thut mai. Mahse Omer-a chuan a la hmu chuang lo, a hma zawn chu a pan zel a.

Chutah api room lam ava pan ta a, a pi room atang chuan hmeichhe phun bul bul ri chu  ahre leh ta. Kawngka chu a han hawng a, a thil hmuh chuan a ti ding chat mai. Khumah chuan api chu a lo thu a, a hnugah chuan Rahim-i chu thingthi in api luah chuan a lo vuan bet a. Api mit chu a keu kau a, an hmazawn takah chuan apu boral ta chu a lo veikual bawk.

Apu vun zawng zawng chu a dang var pup mai a, chutia a veikual reng pah chuan a zun an siakna sarang chu kengin Saadet-i chu huat hmel em em hian a melh run bawk. Rahim-i lah chu a phun ring tulh tulh a, atawpah phei chuan a au titih ta mai. Omer-a chu a meng kawk kawk a, a hlau takzet a ni.

Chutah Rahim-a chu a lo hawi thut a, a mit a lo var vek mai. Omer-a au thawmah chuan Hiyat-i chu a harh zawk mai a, rang takin light a on nghal vat a. Omer-a khum lam ava hawi a, Omer-a chu paper-bag a lu khuh chung bawk chuan a lo thu leh a. Abulah chuan va thu in, "Omer, tinge a? Mumang thalo i nei leh ta em ni?" tiin  ahan zawt nghal vat a.

Omer-a chuan a lu a lo bu nghauh a, "Anu ka ko dawn mi?" a han ti leh a. Omer-a chuan a lu a lo thing leh a, "Mutthilh tum rawh." tiin Hiyat-i chuan a muttir leh a, abulah chuan a mu ve ta a. Chutih lai chuan Halil-a muhil lai pawh chu a phone ri chuan a ti harh zawk mai, a han en chuan a thianpa, Company manager ngei kha  alo ni.

Room atang chuan a chhuak a, "Enge ni ta...zan zanah?" tiin a zawt nghal a. "In inbulah ka awm, kawngka lo hawng teh." a thianpa chuan a rawn ti a. Kawngka chu a zuk hawng a, suitcase nen a thianpa chu a lo ding a. "ZAn zanah ka rawn kai tho che a, min hrethiam dawnnia. Vawiina i rawn kal khan, i harsatna te i rawn sawi khan ka ngaihtuah lutuk che a. Pawisa i mamawh takzet tih ka hria, chuvang chuan hei pawisa pe tur che in ka lo kal a nih hi. Kha la rawh, i theih hunah min rul leh mai dawnnia." tiin suitcase chu a pe a.

Halil-a chuan mak a ti kher mai, "Aw..awle..ka lawm e, thianpa." a ti hu ringawt mai a. "Ka kal ange." tiin a thianpa chuan a kalsan a, Halil-a chuan suitcase chu inchhung lamah chuan a keng lut ta a. Dawhkanah chuan a han thutchilh a, suitcase chu a hawng ta. Achhungah chuan pawisa tam em em mai hi a lo awm a, a lawm lutuk chu  anui var var mai.

Chutih lai chuan pawn lama thawm chuan a ti phu zawk mai a, rang em em hian a tho nghal vat a. Tukverh lam ava pan a, parda a han hlim chian chu a thin a phu nghal dup dup mai. Afapa Omer-a chu apu Muhsin-a (Halil-a pa) thlan bulah chuan a lo ding reng a, lei chu thuk takah a lo inlai sa vek bawk.

"Nilo, Omer.." tiin pawnah a tlan chhuak nghal a, thlankhur a zu en chuan a fapa chu lei chuan a lo eizo hman tawh. Thlankhurah chuan zuang lut ve nghalin lei chu a hai chiam mai a, "Omer..nilo.." tiin a au vak vak a. Chutah ramhuai dum lian leh hmelchhe zet mai hi thlankhurah chuan  arawn zuangthla ve thut mai a, Halil-a hlau lutuk chu a t(r)e nasa ngang mai.

Chutah chu ramhuai chuan a rek thut mai a, a banah chuan a seh sak vak mai. Halil-a chu a harh zawk mai a, a mumang vek a lo ni. A ban chu a han en a, engtin vak mah a awm lemlo. Mahse a ngaih a thalo takzet, bathroom ah a lut nghal a. A ban chu sahbawn nen a sil nghal char char a, chutia a sil mawlh mawlh lai chuan engthil emaw inhlep(cut) ri hlawk hlawk hi  a hre leh ta tlat mai.

A bul lawka bualkuang (Bath-tub) chu  a han en a, ava phu chiang teh kher em. Bualkuangah chuan anu Saadet-i ngei mai chu amah hnunchhawn zawngin saruak vekin a lo thu khur mai a, a vur chu a dang vek a, a dum thleh thluah bawk a. Saadet-i chuan ama sam chu bakcheh hmangin a lo tan hmawk hmawk mai a, Halil-a chuan a hlau kher mai.

Anu hnungzang te chu kutphah tiat tiat hian a pilh pheng phun mai a, "Ka...ka nu.." tiin a thaw hlawp hlawp mai. Chutah anu chu a rawn hawi ta a, a hmel chu rapawm tak a ni. A ha  adum vek a, a vun lah chu a chuar em em mai lehnghal. Chutah aw rapthlak zet hian, "Hetah pawisa engmah a awmlo, khanu kha ka pe vek a ni." a rawn ti ta chhur chhur mai.

Halil-a chu a harh leh zawk mai, a mumang bawk a lo ni leh a. A tho chhuak a, aban chu a en leh nghal vat a. Mahse engtin mah a lo la awm chuanglo, a thaw huai mai a. A mumanga pawisa a dahna dawhkan lam chu ava en leh a, purun sen khehna khawr a lo awm nuai mai. A va pan a, a mumang mai mai a ni tih a hria chu a hnuk a ulh lek lek a, a thaw hlawp hlawp mai.

******************

Khawvar thleng chuan Rahim-i chuan Saadet-i muhil lai chu ding meuhvin a en reng mai a, a ding tlaivar thak tihna a nih chu. Zingah chuan Omer-a chuan an room bang a plug an fit chu screw driver hmangin a hawng a, bang chu kuttum leng velin a kaw bial ta huau mai. Bang kua ah chuan a kut chu a han rawlh a, chutah bang chhung atanga lo pawt tu an awm ta tlat mai.

Hiyat-i chu a rawn harh a, Omer-a lam a va en chu Omer-a chu a lo khur cher cher mai a. "Omer...enge i tih?" tiin ava pan nghal a. Omer-a chuan bang kua chu a lo la zen reng a, "I kut kha phawi chhuak rawh." tiin Hiyat-i chu  arak chel chul mai a. Omer-a chu a meng bial kawk kawk a, tichuan akut chu a phawi a, nikhawhrelovin a let der mai.

"Nu..Pa....lo kal vat ru, Omer hi.." tiin Hiyat-i chu a au vak vak a, Halil-a te nupa pawh chu an rawn lut ve ta nghal a. Halil-a chuan Omer-a chu pawmin khumah a mut nghal vat a, "Omer..harh teh." tia an sawi vak vak hnu chuan a rawn harh ve ta a. "Electric shock vang a nih dawn hi." Halil-a chuan a ti a.

"Enge saw tah sawn ava tih reng reng a?" vin deuh tak chuan FEyza-i chuan a han ti a. "Ka hre biklo, ka lo muhil alawm." tiin Hiyat-i chuan a chhang a. Chutih lai chuan Rahim-i a lo lut a, Omer-a chuan a lo melhrum lehpek kher mai. "Enge ni ta? Buaina a awm em ni?" a rawn ti a. Feyza-i chu ava phei a, "Awmlove Pi Rahim, lo buai ve vak duh suh." a lo ti hmak mai.

Omer-a plug hawn leh screw driver let rum mai te chu Rahim-i chuan  ahan en a, lehkha them-a thil inziak hi a lo awm tel bawk a. "Hei hi khawi a mi nge?" Feyza-i chuan  a ti hu mai a. "Ka hrelo, socket kua atanga a rawn lakchhuah a niang." tiin Hiyat-i chuan a lo chhang a. "He thil hi enge a nih ka hria, nakinah ka hrilh dawn che nia." Rahim-i chuan a lo ti a, a chhuak ta daih mai a. Feyza-i ngaih chu a tha lo kher mai, Rahim-i chu a enzui vawng vawng mai a. "Leng chhuak ang aw...motorin kan round anga, i ziaawm sawt mai ang." tiin Halil-a chuan a fapa Omer-a chu a thlamuan a.

*****************

"Tukin zing chu Omer-a hian min ti hlauthawng takzet a ni, nizan khan ka pu thlarau an chhuah thu leh ka pi an hmuh lui tir thute min hrilh bawk nen. Ka nu pawh a mangang hle mai, ka nau Omer-a tan hian ka tawngtai nasa thin hle bawk. He inah hian..he in tihbaiawm takah hian lo insawn lo tawp ila tha tur." tiin Hiyat-i chuan a diary chu a ziah chhunzawm leh mawlh mawlh mai.

*****************

Hayat-i chuan tape ah hla a play a, chutih lai chuan choka lamah Rahim-i chuan Saadet-i halem chu grinder ah a lo her sawm mek a. Chu halem sawm nuai mai, grinder chhunga mi chu Omer-a chuan khur dar dar hian chiang takin hnai takah a lo en kur mai. Feyza-i erawh bualkuangah chuan a lo inchiah mek a, a muhil veng veng mai.

Thawm ri in a ti harh zawk a, a hmazawn a han en chu a phu chiang kher mai. A fapa Omer-a chu bualkuang mawngah chuan alo ding run mai a. A pi halem hersawm chu a lo keng bawk a, "Omer.." tiin anu chu a au vak mai a. Omer-a hmel chu a dang vek a, a ha a dum vek bawk. Chutah thinrim tak hian, "Rahim-i rawngbawl engmah ka ei dawn lo." tiin a au ta chel chul mai.

Chutah chu halem sawm nuai mai, tui nena inchawhpawl nu phut mai chu anu inbualna kuangah chuan a leih ta mai a, tui chu a so bawrh bawrh mai. Feyza-i hlau lutuk chu a au chel chul mai a, a tal vak vak bawk. Mahse boruak a rawn reh thut a, Omer-a pawh a lo awm tawh lo. Chuveleh Hayat-i chu room atangin a lo chhuak a, a hla play lai chu a va off a.

Saadet-i room ah chuan Rahim-i chuan Saadet-i chu chaw a lo barh mawlh mawlh a, peihlo hmel tak leh thle nguai chung chuan Saadet-i chuan a lo ei ve mial mial a, a melh ngai a melh reng mai. Omer-a'n socket kua atanga a lakchhuah, paper them a chhunga thil inziak chu Feyza-i chuan a unaunu lo leng chu a han en tir ve a.

Khawi nuap nuap pah chuan, "Hei hi engthil nge a?" tiin a unaunu chuan Feyza-i chu a zawt a. "Ka hre biklo, Pi Rahim-i sawi dan chuan hetiang puithuna lamah hian ka pu kha a lo inrawlh ve nasa hle a ni awm e. Khatiang paper them, a chhunga symbol mak deuh deuh inziak kha inchhung hmun kil tinah hian a zep nual a ti bawk. Tam tak chu kan hmu chhuak a, kan paih teuh tawh." tiin a lo chhang a.

Feyza-i unaunu chuan paper them pakhat chu a bag ah chuan a thu zauh a, "Envanga ti nge a nih pawh ka hre bik lo, a rilru a buai a ni ngei ang." Feyza-i bawk chuan a han ti leh a. A lo kal phei a, paper them te chu a rawn thian fai a. "Ka u, ka tlereuh te kha pawisa in ka va thleng a." tiin pawisa chu ala chhuak a. "Awww...chutia tih a ngai hleinem." inthlahrung tak chuan a lo ti a. A unaunu chuan, "Ka u, tanpui i ngaihna ah chuan ka pui zel ang che. Unau kan ni a, kan inpui tawn zel tur alawm." tiin Feyza-i chu a kuah a. 

******************

Orhan-a (Siccin-3 ami kha) chuan a inhnuaiah chuan hna a thawk mek a, thir tlawn sei tak hi meiah chuan a rawh a. Reivak lo hnuah chuan  ala chhuak leh a, a hmawrh chu a ling sen ta vat mai. Chutah chu thir ling chu theihpatawpin tuboh lian tak chuan  ahan chu ri leh bur bur a, abula tuiah chuan a chiah a, a ri ta sur sur mai.

Orhan-a chenna bulah chuan Halil-a te pafa chu an va kal a, "Motor chhungah hian lo awm rawh aw, ka lo let leh vat ang." tiin Halil-a chuan a fapa chu a chhuahsan ta a. Orhan-a chu a lo chhuak a, car lo ding chu a han en vang vang a. Car chhunga awm mek Omer-a chu a han en vang vang a, Omer-a pawh chuan a rawn en let ve a.

Orhan-a chuan a rilru in, "Lalpan awm pui mawlh che rawh se, Lalpan venghim mawlh che rawh se." tiin ama hriattham leh chuan a phun mawlh mawlh a. Chuveleh Halil-a chu a lo let leh a, car chhungah chuan ava lut a. "Lalpan venghim che rawh se.." tia la phun mual mual chung chuan Orhan-a chu a kal sawn ta a.

Paper bag ah chuan pawisa tam tak hi Halil-a chuan a rawn hum lut a, seat hnung lama dah pah chuan, "I lo ning hman em? Bazarah kal ila, i toys tur va lei ang aw?" Omer-a bulah chuan a han ti a, mahse Omer-a chuan a chhang lo. Motor chu a start a, bazar lam pan chuan an pafa chuan an kal liam ta a.

********************

Pawnah chuan Feyza-i te unau chu thingpui in pahin an titi a, chutih lai chuan Hiyat-i a rawn kal a. "Anute.." tiin Feyza-i nau malchungah chuan  arawn thu a. "E taka ka u, Hiyat-i nen hian kan lengchhuak dawnnia." a han ti a. "Nia Anu, nangpawh lo kal ve la..." Hiyat-i chuan a lo ti ve bawk a. 

"In pahnih khan va lengchhuak ru, rawng ka lo bawl ang. I duh leh i diary kha keng chhuak tel la.." tiin Feyza-i chuan a lo chhang a. "Nia, i nu hian rawng lo bawl se, kan pahnihin kan kal mai dawnnia. Va insiam rawh le.." a unaunu chuan a han ti a, Hiyat-i chu phur takin ava insiam nghal sawk sawk a. "Enteh, pawisa hi hmang vak vak thin teh suh." Feyza-i chuan a han ti a. "Aww..lungngai suh ka u..." tiin a unaunu chuan a lo chhang a.

**************

"Saw beramno te saw Lapa hriak thih te an ni a, thil thalo lama thuruk inthup zawng zawngte lwh an Lalram zawng zawngte hi awlsam takin an hre thei vek  a ni. An chaklohna awmchhun erawh hmun thim a awm a ni, anmahniah hlauhna a thleng hma em em bawk. An mitmeng pawisawi lo tak atangin tute nge an nih hriat an awl em em a, chhinchhiah an awl bawk." tiin a inthawina pindan ah chuan Orhan-a chu lehkhabu hlai tak keng chung chuan  a phun mual mual a.

Zan a lo ni a, rilru hah hmel tak hian Feyza-i chu an chawei dawhkanah chuan thu in a indawm kun ngawih ngawih mai. Chutih lai chuan anu Saader-i room atanga thawm rawn ri chhuak chu a hre ta a, a han tlan chho vat a. Kawngka  ahan hawng chiah chu a hmui a hup nghal, anu chu dingin a lo luak bawrh bawrh mai a, a luak lah chu a dum vek lehnghal.

"Ka nu..Ka nu.." tiin a tlanchhuak lehnghal a, "Pi Rahim.." tiin an awmpuinu Rahim-i chu a au vak vak mai a. A hmu zo mai silo, room ah chuan ava lut leh a. Chhuatah chuan luak dum nguk mai te chu a lo pherh nuai mai a, khumah chuan anu chu  alo mu meng kur mai bawk a. Feyza-i chu tlanchhuak lehnghalin, "Pi Rahim, khawnge i awm?" tiin Rahim-i chu a zawng ta chiam mai a.

Inhnuai lamah a chhuk a, Rahim-i room chu a han en a. Mahse a lo awm chuang silo, a let leh a, bathroom bul vel chu a enkual leh a. An la luh ngai miahlona basement, a awm tih pawh  ahriat miah loh chu a hmu chhuak ta. Luh a han tum chiah chu a bula chhuar atang chuan bur pakhat a lo tla thut a, a phu nasa lutuk chu a per dawr a.

Thingphek a perek lo bur va mai chu a rap tlum ta thawih mai, ana a ti lutuk chu a thu hnawk a. A slipper chu phelin a kehnuai chu a han en a, a lo thi zawih zawih mai. Chutah a kehnuai pilh atang chuan sam zai dum nguk mai hi a rawn tleng chhuak ta tual tual mai, a hlau lutuk chu a au vak vak mai a.

Mahse chawp leh chilhin a bo nghal daih a, a ke pawh chu a lo dam hmak. Engmah pilh a awm tawh lo, mak a ti em em a. A rerek rah chu ava en leh a, perek ah chuan thisen a lo la kai nuai mai bawk si. Rahim-i alo kal a, "Feyza, enge ni ta?" a rawn ti a. Feyza-i chuan Rahim-i chu lo enin, "Ka koh mawlh mawlh che kha, i hrelo mi?" tiin a lo zawt a.

"Inchungah ka awm reng alawm, i nu bulah ka awm char char." tiin a lo chhang ta mai a. MAk ti tak hian Feyza-i chuan, "Ka hmu reng reng lo che, ka han lut alawm. A luak vak vak a, ka mangang hman lutuk." tiin a thaw hlawp hlawp a. "Ka awm reng alawm, chutiang thil engmah a thlenglo. A muhil a, ka rawn chhuahsan deuh chiah alawm." Rahim-i chuan a lo ti leh a.

*************

Bathroom-ah chuan Omer-a chu amah chauhvin a awm a, darthlalang hmaah chuan a in en vung vung a. Rahim-i a lo lut a, Saadet-i zun an siakna plastic sarang chu a rawn khai a. Omer-a chu a han melh a, "Ka paih vat loh chuan i pa hian min hau nasa dawn sia, ka'n paih lawk ange." a han ti a.

Toilet ah chuan Saadet-i zun dum sen nguk mai chu  a han paih a, kawngka phen atang chuan Omer-a chuan a lo en reng a. Rahim-i chu a lo chhuak leh a, bualkuanga sam lo tla nuai mai chu a hmu a. "Aww..i pu chuan ama sam a lo tan leh ta nimaw?" a han ti nuah nuah a. Mahse Omer-a chuan en pawh a lo en duhlo, ngawirengin a chhuak ta daih a.

*************

Pawnah chuan Halil-a chu rilru hah hmel takin a lo vei kual a, a nupui chuan ava pan a. "Halil, vawiinah ka nau a lo leng a, pawisa min rawn pe a. A telreuh te kha a hralh a, pawisa i nei veleh i rul leh dawnnia." a han ti a. Meizial zuk khuk hluah hluah pah chuan Halil-a chuan, "A lawmawm e." a lo ti ringawt a.

"Pawhdawhah sawn ka dah a, i duh hunah i hmang mai dawnnia. Enteh Halil, kan fate hian helai hmun hi chhuahsan vat an duh a ni." a han ti leh a. "Ka hria alawm, mahse tihtheih kan nei chuang hleinem. Pawisa kan nei silo, khawnge kan awm chuan ang? I nau pawisa min rawn pek saw chu a beitham lutuk, ka hnathawkte hlawh ka pe thei chuanglo. Tihdan dang kan ngaihtuah angai a ni, pawisa tam tak ka ba bawk si." a lo ti hlur mai.

A han tei kual leh a, "Attorney ka bia anga, he in hi ka nu damlai ngei hian hralh mai ka duh. " a han ti leh a. "Athat chu, bankrupcy lakah kan him thei bawk anga." tiin anupui chuan a lo pawmpui thlap mai. Mahse Halil-a chuan, "Mahse engtin nge ka pa thlan hi ni ta ang, hralh mai chu a huphurhawm khawp mai. Chubakah, tuin nge lei duh ang?" a han ti leh nuah nuah a.

"A hrim hrimin tinge inhnuaia basement khu a inkalh tlat a?" tiin Feyza-i chuan a han zawt a, "Eng room maw?" Halil-a chuan a lo ti hu mai. Chutih lai chuan an roomah chuan Omer-a chuan a water pistol chuan an wardrobe chu a lo kap vak vak a, wardrobe chu a huh vek mai a. Omer-a chu phawk em em hian a meng kur mai a, hlauh a nei a ni tih a hriat hle bawk.

Halil-a chu a nu room ah chuan a han kal leh a, "Pi Ramhim, tinge inhnuaia basement khu a inkalh a?" tiin Rahim-i chu a zawt a. "Lut reng reng suh u, inu hian a kalh a ni." tiin a lo chhang a. "Tinge? A chhungah enge awm a?" tiin Halil-a chuan a han zawt leh a. "I pa kha a thih hma deuh khan khu basement ah khuan a inkhung hrang thin a, chuvang chuan amah hriat reng nan leh a thlarau zahna lantir nan i nu hian tumah kal a phallo a ni." tiin a lo chhang leh a.

Mak ti tak chuan Halil-a chuan, "Ka van hre ve silo ve..." a ti bul bul a. Anu wardrobe bawk chu ava hawng leh a, bawm chu hawng lehin a chhunga chahbi chu a la chhuak a. "Nilo, zu hawng reng reng suh. I nu hian tuma luh a phallo ania, kal suh." Rahim-a chuan a lo ti lawm lawm a. Anu en pah chuan Halil-a chuan, "Ka lut dawnlo ania, ka nu. Chahbi hi ka lo kawl tha ange." tiin a chhuahsan ta a.

*************

Halil-a chuan chahbi hmang chuan basement chu hawn a han tum a, mahse a thei hauh lo. An room ah chuan ava lut a, a nupui chu darthlalang hmaah thuin a sam a lo khuih mawlh mawlh a. "Ka hawng theilo, chahbi diklo a ni ngei ang. Naupang an mu tawh si a, kawngkhar khu ka tichhia a nih chuan ka thawmah an harh awm si a. Naktuk lamah kan tum dawnnia, khua han var phawt se." tiin a nupui chu a hrilh a.

"Halil, i nu hi amahin a ding thei em?" tiin Feyza-i chuan a lo zawt daih mai. Mahse Halil-a chuan, "Mu tawh rawh...naktukah kan titi zawk dawnnia, a tlai tawh emai." a lo ti a, an mu ta a. Plate inkhawng ri vak vak thawm chuan Hiyat-i muhil lai chu a ti harh a, a han tho chhuak vat a.

A nau Omer-a mutna lam chu ava en a, alo awm miah lo. Thawm lo chhuahna lam chu a ngaithla chiang a, wardrobe chhung atanga lo chhuak a ni.  Wardrobe chhung chu a hawng a, a nau Omer-a chu paper bag a lu lo tuam lehin plate leh fork a lo keng a. Fork chuan plate chu a khawng ri vak vak mai a.

"Omer, tinge hetah i awm a? Enge awmzia, hlauh i nei em ni?" tiin a han zawt a. Thei leh theilo hian Omer-a chuan, "A U...ana lutuk...hawng rawh...hawng vat rawh...ana lutuk.." tiin a lo tap hluam hluam mai. Hiyat-i chuan a lu tuamna chu a han lakthlak sak a, chutah Omer-a awzawng alo ni lo.

Apu boralta Muhsan-a a lo ni reng mai, a hmai ala dum vek zui. Chutah a rawn meng bial kawk kawk a, amit te lah chu a sen vek mai. Hiyat-i phu nasa lutuk chu a t(r)e vak a, a hnungtawlh dawr mai a. Omer-a khum lam ava en leh a, Omer-a chu a lo thu reng mai. Mak a ti em em a, wardrobe lam ava melh leh a, engmah a lo awm lo.

*****************

A tukzingah chuan Hiyat-i chuan a diary chu a ziah chhunzawm leh a, "Nizana ka thil tawn rapthlak tak kha tumah ka hrilh ngam lo a ni, ka nu lah chu Omer-a vang hian a rilru a hah thin em em a. Zanah a mu thei ngailova, mutduhna damdawi a ei hial phah ta a ni. Ka thil hmuhte kha hre ta se, a at phah hial thei ang. Tukin zing khan Omer-a chuan mipakhat hming a lam ri a, chu chu tunge a nih pawh  ka hre velo. Omer-a chuan chupa hming chu Orhan-a  a ni tiin min hrilh a, nizanah an inbiak thu min hrilh bawk." tiin.

***************

"Chutiang thi chu a ni thei dawn em ni?" tiin Orhan-a chuan Hodja pakhat bulah chuan a thil hriatthiamloh te chu a han zawt a. Hodja chuan, "Thlarau leh mihring, hmun hla tak atanga inbiak pawhna, rinna leh ngaihtuahna hmang chuan theih tehreng e. Thinlung tha tak leh rilru tha tak an nei a nih phawt chuan an thinlung leh thinlung chu a inthlunzawm thei lutuk alawm, Chu chu Pathian malsawmna a ni a, atan chuan chhandamna a ni. Omer-a hming hi Islamic dan buah chuan Caliph(KALIF) pahnihna ah khan a inziak a, 643 AD kuma ziah a ni. Omer-a chuan a sipaite puihna hmangin a hmelma te chu a beilet a, an sipai commander hming chu Sariye-a a ni. Omer-a chu zirtawpni apiangin Madinah Temple ah a tawngtai ziah a, vawikhat chu a tawngtai lai chuan ring takin a au vak a, AWWW SARIYE, TLANG LAMAH ICHHO ANG U tiin vawithum a chham a. Tichuan sipai huaisen zualte chu an lo let leh ta a, Omer-a'n a ko a ni. Aww..nangni Caliph ringtute u, kan hmelma te hi an tam em a ni. He indona tualzawlah hian hnehna kan chang dawnlo tiin mangangin an au va. Chutah thawm an hre ta a, AWW SARIYE, TLANG LAMAH I CHHO ANG U tiin Omer-a chu a rawn au ta vak vak mai a. Tichuan tlan lamah chuan an chho a, tlang atang chuan hmelma te chu an bei ta a. A tawpah chuan Pathian tanpuina hmangin hnehna an chang ta a ni. Pathian hian lei leh van a siam a, a thilsiam te zawng zawng chungah thuneihna a nei bawk. Khawvel leh a chhunga thil awm zawng zawngte leh Vanram thleng khian Pathian siam vek an ni a, a ta vek a ni. Chuvang chuan PAthian tan chuan thil theihloh a awm lo, engkim a ti thei a ni." a han ti charh charh mai a.

Orhan-a chuan ngaihnawm a ti hle mai, a lu a lo bu nghauh ngauh a. "Ka lawm e, Hodja..." a ti a. Heta Hodj-a thilsawi hi thawnthu a ni a, Omer-a..Feyza-i leh Halil-a te fapa chungchang a sawi lo. Islamic thawnthu a Caliph pakhat, Omer-a thawnthu zawk a hrilh a ni. Orhan-a hi khatia a bo vang vang hnu khan amaha in luahin dawi thil lam chu ala buaipui chhunzawm reng a, a hriat belh zel theih nan tiin Hodja tam tak te pawh a rawn kual thin bawk.

********************

Halil-a chuan basement chu hawn a han tum leh ta a, screw driver leh tuboh hmang chuan a han chhu ri bur bur mai a. Chu chu Rahim-i chuan hriain Saadet-i mu lai chu hnai takah a han en a, "I fapa chuan buaina a duh a ni ngei ang, khu room ah khuan pawisa i dahthat a ring a ni." tiin a phun ri sur sur a.

Atawpah chuan Halil-a chuan a hawng thei ta, a chhungah chuan a lut a. A lo thim ruih mai, light a on a. Mahse bulb pakhat chiah a ni a, a eng nep hle. Room chhung chu a hnawk remrum hle mai a, a chul hian a chup rup mai bawk a. Mannequin tam tak a lo aw a, thil a lo inziak rang nuai bawk.

Chutah kawngka a rawn inkhar thut mai, a hlau lutuk chu a zuang zawk mai a. Va hawn a tum a, a thei ta hauh lo. Chu basement thim reih ruih leh rimchhe zet ah chuan a tang ta reng mai, thawm mak tak tak ri a hre nghal bawk a. Light a rawn thim leh ta, a phone light hmang chuan a enkual vak vak a.

Bawm pakhat a en fuh ta hlauh mai, ava kal hnai a. Chu bawm chu a han hawng a, a chhungah chuan pawisa tam tak leh rangkachak a lo awm teuh mai. Mak a ti lutuk chu a ka hau mai a, a phone light chu a rawn thim leh ta hmak mai. On a han tum a, mahse a phone chu a nung thei ta hauh lo.

A lighter a phawrh chhuak a, a alh mai thei silo. Chutah mannequin te chu an rawn che ta tual tual hlawm a, a thlan a tla buah buah tawh mai. Chutah le, a hnug atang chuan ramhuai dum lian em em mai, sam buk chhur mai hi a rawn lang thut mai a. Aw rapthlak zet hian, "He in hi hralh tum hauh suh ang che." tiin a t(r)e ta ruai ruai mai a.

Halil-a hlau lutuk chu a au chel chul mai a, kawngka lam ava pan leh a. A han pawt vak a, a hawng thei hlauh mai. Rang takin a chhuak a, kawngka chu a khar leh nghal hmak. A thaw hlawp hlawp a, a thlanin a bual huh vek tawh. A thil hmuh khan a ti hlau takzet a, rei fe chu che miahlo chuan a ding reng ringawt mai.

***************

Zan a lo ni leh ta a, Feyza-i chuan eitur a siam mawlh mawlh a. A phone a lo ri a, a unaunu a lo ni. "Hello, enge ni ta?" a han ti a. A nau chuan, "Ka u, kha lehkhathem te kha, tlem ka kawl ve a. A thuziak te kha hriatchian tumin ka han bei ngat ngat a, KAWNGKA HAWNG RAWH tih a inziak a ni. Khang lehkhathem te kha inchhungah khan a awm tur a nilo, thlarau sual nen inkungkaihna an neiin ka hria." a rawn ti a.

"Awle, ka lo hria ange." tiin Feyza-i chuan phone chu a dah a, a eitur siam chu a siam chhunzawm leh malh malh a. Bawlhhlawh bawma ahmaa a lehkhathem paih te chu a han la chhuak leh a, dawhkana ashtray ah chuan a dah a. Lighter a chuh vat a, a hal ta a. Chutih lai chuan choka lama artui pakhat chu a rawn tla a, chhuatah chuan a pherh ta luai mai.

Feyza-i chuan ava en a, mak a ti kher mai. Choka door-mat hnuai atang chuan sam dum hrawk tak mai hi a rawn lawr a, chutah sam chu a che ta ngual ngual mai a. Hlau rilru deuh tak chuan ava pan hnai a, sam chu a han la kang a. A ban chu kut dum vek hian a rawn man thut mai, a hlau lutuk chu a t(r)e vak mai a.

A tawlh hnung nghal a, a thaw hrawk hrawk mai. Muang chang chuan a tho chhuak a, "Feyza.." tia amah kotu thawm a hre leh ta. Hnunglam a han hawi chu kha ramhuai bawk kha  alo lang leh ta, Feyza-i hmai zawnah chuan zau tak hian a rawn ang sawi bawi bawi mai a. A hlau lutuk chu a thal tawp mai, mahse chu ramhuai chu a bo leh nghal daih.

A pasal Halil-a a lo kal vat a, "Feyza..enge ni ta?" tiin a rawn kai tho a. Feyza-i chuan a lo kuah nghal a, "Halil, ramhuai ka hmu a ni." tiin a tap nghal a. "A tawk e, hlau suh...ka awm alawm." tiin Halil-a chuan a lo hnem vat a. Kil khat atang chuan mak ti tak hian Hiyat-i chuan  alo en reng a, a rilru a nuamlo kher mai.

************

Orhan-a chu a muthmunah chuan a rilru in a inbe mawlh mawh a, "Ramhuai sualte lak atanga ka him theih nan Pathian hnenah ka tawngtai thin a, thim zinga kawng ka bo mai loh nan Lalpan eng min pe thin a ni. Thalrau sualte lak ata min chhandam ang che, aw Lalpa..Heng ramhuai, nangma siamte ngei lakah hian min venghim ang che, ramhuai te Lalpa thlenga ka hneh theih nan chakna tharin min thuam ang che." tiin a ban chu a phar a.

Chutia a rilru-a  a sawi ang chiah chuan a mut hmunah Omer-a chuan Orhan-a sawi ang chiah chuan a rilru in a lo sawi ve char char a, a ban a lo ti che ve khur khur bawk. An pahnih chuan hmun khatah awmlo mahse, inzawmna an nei tlat a ni. An mu meng kur mai a, an rilrua an thil sawi te pawh a in ang zel a ni.

***************

Halil-a chu a muhil thei hauh lo mai, a thil tawn rapthlak tak te chu a ngaihtuah let a. An awmpuinu Pi Rahim-i hnena anu in pawisa dahthat a neih leh neihloh a zawh lai te, Rahim-i'n engmah a hriat loh thua a chhan laite chu a bengah chuan  a ri nawn mawlh mawlh a. A mumanga a nu in, "Pawisa ka nei lo, khanu kha ka pe vek tawh." tia hmel rapawm zeta a chhan lai te chu a mitthla chuan a hmu a, a rilru  a hah kher mai.

Khum atang chuan a tho a, anu room lamah chuan ava kal a. Ava lut a, "Pi Rahim, i roomah zu mu rawh. Zanin chu ka nu hi ka lo awmpui ange, kal tawh rawh." a ti a. "I awmpui thei lovang." tiin Rahim-i chuan a lo chhang a. "Ka thei ang, min ngaihtuah suh." Halil-a chuan a han ti leh a, Rahim-i pawh chu hreh hmel tak chuan a chhuak ta a.

Chutah Halil-a chuan a nu muhil lai chu a zu rek ta thut mai, anu pawh chu a rawn harh a. Theih pa tawp chuan a rek a, a rek hlum dawn ta mai. Chuveleh Halil-a chu a harh zawk mai a, a mumang bawk a lo ni. A awmna chu a han enkual a, anu room tho chu a lo la ni a. Anu room-a thutthleng ah chuan a lo muhil chu niin, a tho nghal vat a.

Room atang chuan a chhuak a, pawnah chuan Rahim-i a lo awm a. "Pi Rahim, engtia rei nge ka nu room ah sawn ka awm?" tiin a han zawt a. "Nichin lawk khan....i awmpui theih tur thu min hrilh zo chiah a nih kha." tiin a lo chhang a. Halil-a chu a ngawi vang vang a, "Awle, va lut leh tawh rawh.." tiin a kalsan ta a.

*************

Nui ri vak vak thawm chuan Hiyat-i chu a ti harh zawk mai a, Omer-a khum lam a va hawi vat a. A hlauh ang ngeiin Omer-a chu a lo awm hauh lo mai, nui ri lah chu a ring telh telh mai a. Chutah anu aw ngei mai chuan, "Hiyat Bawihte, lo chhuk rawh. Nangmah chiah kan nghak che ania, inhnuaiah ka awm e." a rawn ti lauh lauh mai.

Mak a ti em em a, muang chang chuan a tho chhuak a. Inhnuai lam chu zawimuangin a pan thla a, nui ri lah chu a chiang tulh tulh mai bawk si. Mi pakhat chauh nui ri a ni lo, chhungkua hlim taka titi pah a nui ri a ni tlat. "Hiyat, lo chhuk vat rawh." tiin anu chuan  arawn au leh a. Mahse Hiyat-i erawh chuan a hlau takzet a, a khur zawih zawih mai a ni.

"Hiyat, heta hi chaw ei dawhkan hi lo kil ve rawh, zawhte kan that a, asa kan ei dawn mek." ala rawn ti zui, Hiyat-i thlan chu a tla buah buah tawh mai. Chutah choka lam chu ava bih dek dek a, a thil hmuh chuan a ti hrilh hai ngei mai. Apu boral ta, Muhsan-a chu chhungkaw pa ber thutna ah chuan lo thuin a zawn chiah ah chuan paper bag khum chungin Omer-a chu a lo thu ve bawk a.

A sirah chuan Rahim-i, api Saadet-i leh a nu leh pate an lo thu ve bawk. An hlim hmel em em a, an nui har har reng mai lenghal. Dawhkanah chuan bati a inchhi fur a, sa ril hel niawm tak, dum nguk mai te chu dawhkan khat chuan a inzam nuai mai bawk a. Hiyat-i chu a thuhniam a, bang phen atang chuan a chhungte chu a enthla a.

Feyza-i chuan a pasal Halil-a chu a han melh a, "Huana i pa thlanlung sawn kan fapa Omer-a hi a ti hlau a ni." a han ti khur khur a, Halil-a chuan a han melh ve run a, "Tihtheih vak a awmlo, saw saw a chenna hmun a ni, chaw eikham veleh tah sawn a let leh thin a ni." tiin a lo chhang a. Chutah Feyza-i chu a kun a, a nui ri leh ta chur chur mai.

Inchung lam a han melh leh a, "Hiyat Bawihte...i lo kal tawh em?" tiin a han au leh ruah ruah a. Halil-a chuan apa chu a melh leh a, "Ka pa, Hiyat-i chu va hruai mai ta che." a han ti a. Chuveleh apu chu a tho a, a dulah chuan a zun siakna pipe leh a zun khawlna plastic sarang pawh chu zun(urine) khat vekin a lo la awm a.

A zun chu khaiin Hoyat-i lam chu a rawn pan ta mai a, a vun lah chu a var hian a var chhuak vek mai lehnghal. Hiyat-i chuan a hlau kher mai, a khur zawih zawih a. Chutah apu chuan a rawn pan hnai zel a, a kalna chin te chu a huh chiau pur mai bawk a. A pu ke bulah chuan Omer-a a lo lang thut mai, a rawn ang phuau a, a ka atang chuan thil tui hnang niawm tak chu a rawn fan thla duai duai mai a.

Hiyat-i chu a harh zawk mai a, a mumang vek a lo ni. Light a on a, Omer-a chu paper bag khum bawk chuan  alo thu leh vung tawh a. "A U...ka hlau..." tiin thei leh thei lo hian a lo phun leh nuah nuah mai a. Hiyat-i chuan a lu a dawm a, tih ngaihna a hre lo kher mai. A mumang rapthlak tak te chu a ngaihtuah let a, a tap ta hawm hawm ringawt mai a ni.

*************

"Ka nau Omer-a hetia maksak tak taka a awm atang hian mumang mak tak tak ka nei a, min ti mangang takzet a ni. Ka lo thanlen deuh hnu khan ka nu leh pate hi engtik niah emaw chuan an la thi ve ngei dawn tih ka hraitthiam ve tan lai khan, zan ka mutna ah hian hmel mak pui pui hi ka suangtuah thin a. Ka khum hnuaiah te ka biru a, anni erawh ka khumah thuin an tawng ri sep sep thin. Mahse an thilsawi chu enge awmzia ka hre hauh lo thung, he in hi ka hua, ka haw ngawih ngawih." tiin atukah chuan Hiyat-i chuan a diary chu a ziah chhunzawm leh a.

************

Tukthuan ei lai chuan Halil-a chuan a phone chu a khawih mial mial a, "Ka kal a hun." tiin a tho thut a. A coat hak that pah chuan, "Fel deuh khan lo awm ru aw..fate u." tiin a kal nghal a. A nupui chuan va zuiin kawngka bul thleng chuan ava thlah a. "Ka car lei duhtu tur ka hmu tawh a, to deuhin hralh ka lo tum dawnnia." a ti a.

Chutih lai chuan an awmpuinu Rahim-i chu Saadet-i room lam panin a lo chho mek a, Halil-a chuan a melh no lo kher mai. Pawn a chhuak chiah chu a ding chat mai, an in lam thlir vawng vawng chunga Rahim-i lo ding reng chu a hmu ta a. Mak a ti kher mai, nichin lawk khan Rahim-i te chu inchungah a chho mek kha a ni si a.

"Pi Rahim.." tiin a ko a, Ramhim-i chu a lo hawi a. Rang takin lehlam a hawi a, a kal nghal daih mai. Halil-a chuan a phone a phawrh a, a nupui chu a call nghal a. "Hello Feyza, inah khan Pi Rahim-i a awm em?" tiin a han zawt a. "Awm e, ka nu roomah a awm." tiin a lo chhang a. "Ehe..tun lawk khan pawnah ka hmu a, kan in hi a lo thlir vung vung a.." a han ti leh a.

"A chhuah lai awm ka hre lo reng reng." tiin Feyza-i chuan a lo chhang a, "Awle, nih phawt aw." tiin Halil-a chuan phone chu a dah ta a. Halil-a chuan a ringhlel kher mai, Rahim-i chu a umzui ta zel a. Rahim-i lah chu a kal chak tulh tulh a, Halil-a pawh chuan a zui ve zel a. Tichuan in pakhat ah Rahim-i chu a lut ta daih mai, Halil-a chuan chu in chu ava pan ve nghal vat a.

***************

"Pi Rahim, Pi Rahim...lo hawng teh.." tiin Halil-a chuan kawngkhar chu a chum vak vak a, mahse Rahim-i chuan a rawn hawng hauh lo. Minute 5 vel dawn lai a han nghak hnu chuan kal mai a tum ta a, chuveleh Rahim-i chuan kawngka chu a rawn hawng a. "Tinge i rawn hawn duh miah loh a, Pi Rahim?" tiin Halil-a chuan a han zawt a.

Rahim-i chuan chhang lovin a luhsan daih a, Halil-a chuan a zui lut ve a. An thudun a, Rahim-i chuan tap tep hian, "Thil sual lian tak kan ti a ni, Pu Hilal. Tuna ka thil hrilh tur che hi a rapthlakin a hlauhawm viau maithei ania, mahse i hriat ngei a ngai a, engpawh thleng mahse ka tuar ngam vek. Chhungkaw pa ber i ni a, i fate lah naupang pawisawi lo tak an ni bawk. Ngaithla teh, i nu hi tunah hian thlarau sualten an tibuai mek a, an chenchilh a ni. Tanpui tur leh amah inhlan thianghlim turin min rawn pan thin a, keipawn ka theih tawpin ka lo pui thin. Psychic adviser ka ni thin alawm...i pa kha a zual telh telh mai si a, i nu chu ka bulah lo kalin doctor te pawhin tih ngaihna an hriat tawhlo thute min hrilh ta a. Tichuan kan enkawl ta a, a natna tihdam tumin kar li lai hun kan hmang a ni. Ahnu deuhah chuan i nu chuan i pa chu a ziaawm thu a sawi a, mahse a mizia mak a tih em em thu min hrilh bawk. I nu chuan  atir chuan engah vak angai lova, mahse i pa chu a che mak tulh tulh mai si. Tichuan inhnuai a basement ah chuan nitin mai chuan nilengin a inkhung hrang ta tlat mai thin a, i nu chuan mannequin tam tak te kenglut in chung mannequin te chu a biak thin thu leh an taksa ah chuan thu mak pui pui a ziah ran thin thute chu min hrilh ta a. I nu chuan i pa chu mi rilru buai leh mi a anih ngei a ring nghet bur mai a, tichuan zan khat chu enthlak ruk a tum ta a ni. Tichuan i nu chuan a enthla ta a, thawm mak tak tak te chu a hria a. A chhung a han en chiah chu i pa chu thutthlengah a lo thu a, a bulah chuan hmeichhe pakhat, mit dum vek leh hmui dum vek, a chal a chhinchhiahna mak tak awm a hmu ta a, chu hmeichhia chuan i pa chu hnai takah enin thu mak pui pui a lo chham khum zawt zawt mai anih chu. Tichuan i pa chuan i nu hnenah chuan nupui dang, ramhuai a lo neih ve reng thute chu a hrilh a, tichuan chu rahuai lakah chuan fa te hial a lo neih thute chu a hrilh ta vek a ni." a ti ta mai a, Halil-a chu a meng phar awn awn mai.

Rahim-i chuan sawizawm zelin, "I pa chuan a duh vang renga nei a nih loh thu leh tihluihna avanga chu ramhuai chu a neih thu a hrilh tel bawk a, chu chu a damna tura ka hnathawh ai awh a an rulhletna niin a sawi bawk. I nu chu  athin a rim em em a, chu ramhuai lak atanga i pa chhanchhuah nan chuan ka puina a rawn dil leh a, mahse ka pui ngam ta lo a ni. Ka theihloh thuin ka chhang a, mahse ka pui a nih phawt chuan a pawisa khawl zawng zawng pawh min pek vek a tiam ta a. Tichuan i pa chu kan hrai rui ta a, tichuan a mutthilh hlan chuan inthawina kan neihpui ta a ni. Mahse kan tisual a ni, khawvar hma hret chuan a boral ta a ni. I pa chu keimahni vangin a thi ta a ni...khami ni atang khan i nu chu ramhuaiin an tibuai ta char char a ni. I pa nupui, ramhuai chu zantin mai a lo inlar thin a. Tichuan i nu chu tibuaiin KA PASAL MIN THAH SAK A NI...KA NAUTE I THAT...RUALBANLOVAH MIN SIAM tiin a ankhum hrep zel mai a ni. I nu chuan a damchhunga hrehawm leh natna hlir a tuar ang tiin chung ramhuaite chuan anchhia an lawh a, i nu pawh a rilru a buai phah ta hial a ni. I nu khan tumah tihnat a tum lo, kan pahnih khan engthil sual mah tih kan tum lo. Mahse khami ni atang khan i nu leh kei hi ramhuaite chuan min tibuai chhunzawm zel a, ka dawi hman vanga i pa a thih avang chuan ka chungah phuba an la ta a ni. Hei..ka ban hi han en teh." tiin a kawr ban chu a hlim a.

Halil-a chuan a han en a, Rahim-i ban chu a lo duk thleh thluah mai a. "Dawi thil min ziah lui tir a, tichuan chung ka thil ziah te chu inchhung kil tina zep turin ramhuaite chuan min hrilh a ni. Tichuan in chu chhuahsan turin min ti a, kha mi ni atang khan saw inah sawn ka lut leh tawh lo hrim hrim." Rahim-i bawk chuan a han ti leh a. Halil-a chuan mak a ti hle mai, "Enge maw i saiw le, Pi Rahim? Saw inah sawn ka nu i enkawl a, tun thleng pawh hian i la enkawl mek si a. Kan bulah pawh i awm ve reng thin kha? Enge awmzia?" tiin a zawt a.

"Nilo, saw inah sawn ka kal leh tawh lo hrim hrim.  I nu kha saw inah sawn jail tang ang maiin an awm tir a, chhuah tir an phal lo  a ni. Nitin mai chuan an tibuai a, an sawisa thin a ni. I pa ruang pawh saw in inkawta an phum nachhan pawh ramhuaite chuan i nu chu ti tura an tih vang a ni, i nu thil tih te laka phuba lak nan an ti a ni. I pa thlarau chu an ko chhuak a, tichuan i nu chu zantin an hmuh luih tir thin a ni. Heng ramhuaite hian saw ina in awm ve saw an phallo, i nu saw a thih hma chu sawtia sawisak reng saw an duh a ni." a ti ta mai a, Halil-a chu  a mangang kher mai.

**************

Halil-a chu a haw a, a nupui biak pawh chu ngaihsak lovin anu room lamah a chho nghal a. A nu chu a lo mu meng kur mai, hnai takah a zu en a. Thinrim hmel tak hian, "Ka nu, engthil nge maw i tih le?" tiin a vin ta khur khur mai. Chu veleh Rahim-i chu ama awmhmunah chuan a lo au ta tuar tuar mai, "Min chhuah ru...ka hlau ania." tiin a hawi kual vak vak a. Chutah a ruh a rawn tliak ri tuar tuar a, a thi der mai. 

Halil-a chu inhnuai lamah chuan a chhuk leh a, choka lamah chuan pheiin a thu hnawk mai. Feyza-i chuan ava pan a, "Tinge a? I va chauh hmel ve?" tiin a zawt a. "He in hi kan chhuahsan vat angai." a han ti ringawt a. "Khawnge kan chen anga?" tiin a nupui chuan a lo zawt leh a. "Ka hre biklo, naktukah kan ngaihtuah dawnnia. In luah tur kan hmuh hma chu i nu te in lamah naupangte nen hian lo va awm mai rawh u, abak chu ka lo buaipui ang." tiin a lo chhang a.

Feyza-i chu a ngaih a thalo takzet, "Halil, enge i chungah thleng a? Motor chu i hralh ta em ni?" tiin a han zawt leh a, mahse Halil-a chuan a chhang lo. Feyza-i bawk chuan, "Pi Rahim-i chu i hmu ta em?" tiin a han zawt leh a. "He inah hian Pi Rahim-i hi a lo let leh tawh ngai lovang" a lo ti hmuk mai.

***************

Zan a lo ni leh a, Halil-a chu a muhil thei reng reng lo mai. "Engthil nge thleng a? Min hrilh ve la.." tiin Feyza-i chuan a han zawt leh a. "He in hi kan chhuahsan angai, ka nu pawh hi kan hruai ve ang. He inah hian amah chauhvin a awm tur a nilo, kan kal bo san thei lovang." tiin Halil-a chuan a lo chhang a.

Saadet-i pawh chu a buai leh ta, a hmazawnah chuan ramhuai dum lian em em mai chuan a thutchilh leh ta run mai. Ramhuai chuan hnai takah a melh a, "Khawiah mah an hruai lovang che, i thih hma chu he inah hian i awm reng ang. Ka kal tir dawnlo che, ka kal tir dawn lo che." tiin a vau khur khur mai.

Chuveleh Halil-a a lo lut thut a, ramhuai chu hmuh tur a awm leh tawh lo. Anu chu puan a rawn sin that tir a, "Hlau suh aw, ka nu. Kan chhuak em em ang, ka hruai chhuak ang che." a ti zawi sap a. A bulah thutthlengah chuan a thu a, a nu chu a en ngawih ngawih mai. Chutah Halil-a chu a phu zuk a, a mintmeng a rawn dik lo tan tlat mai.

A ding a, rum zet chuan a nu chu a en a. Room atang chuan chhuakin an nupa room lam chu ava pan a, coat suit a ha a. Tichuan a fate room ah a kal leh a, Omer-a khum lam chu ava pan a. "Omer, tho rawh...kan chhuak dawn e." tiin a sawi vak vak a, Omer-a chu a lo harh a. Chuveleh amah awm hmun atang chuan Orhan-a pawh a lo harh ve zawk mai, a tho chhuak nghak vat a.

Hiyat-i lam ava pan leh a, "Bawihte, tho rawh le..kan kal dawn e." tiin a kai tho ve leh a. Hiyat-i chuan a mit a nuai nauh nauh a, "Pa, khawnge Omer-a?" tiin a zawt nghal a. "Inhnuaiah a awm mek, min nghak mek." tiin a lo chhang a. "Tinge inhnuaiah a awm a?" tiin a han zawt leh a. Halil-a chuan, "Bengchheng suh, i nu kan ti harh hlauh ange." a lo ti a, an chhuk dun ta a. 

Inhnuai basement ah chuan a chhuk pui a, "Pa, enge kan tih dawn? A chhungah enge awm a?" tiin hrethiam lo tak chuan Hiyat-i chuan a han zawt leh a. "Bengchheng suh, lut phawt rawh." tiin an lut dun ta a. Chuveleh Hiyat-i chu a t(r)e vak mai, Halil-a chuan kawngka a khar nghal bur mai. Orhan-a pawh chu a insiam sawk sawk a, a in chu chhuahsan in Halil-a te inlam chu a rawn pan ta a.

******************

Halil-a chuan a nupui Feyza-i chu a kai tho veleh a, "Duhtak, tho rawh. Kan chhuak dawn, naupangten min nghak mek." a han ti a. "Khawnge kan kal dawn, Halil?" tiin Feyza-i chuan a lo zawt a. "Lo kal vat rawh, nakinah kan sawi dawnnia. Basement ah naupang an awm a, an khua  a har lutuk ange." a ti ta mai a.

Chuveleh vin zet hian FEyza-i chuan, "Halil, i mawl em ni? Tinge naupangte chu basement ah i awm tir a?" tih pah chuan a tlanchhuak nghal a. A fate room ah chuan ava lut a, "Hiyat..Omer.." tiin ava ko a, mahse an lo awm lo. "Basement ah min nghak ka tih mawlh mawlh chu.." Halil-a chuan a lo ti leh a.

Halil-a chu a chhuk a, Feyza-i chuan a zui a. "Halil, enge tih i tum a?" tiin a zawt leh a, a hlauthawng kher mai. "Lo kal rawh...min lo zui phawt mai teh." tiin Halil-a chuan a lo chhang a, basement lam chu an pan thla dun ta a. Chutih lai chuan Orhan-a pawh a lo thleng ta, Halil-a te in chu a han en vang vang mai a.

Basement chhung chu an lut ta, Feyza-i chu a phu zawk mai. A fate pahnih, Hiyat-i leh Omer-a te unau chu thutthlengah nghet taka phuar beh an lo ni a, an hmui chu tuam sak an ni bawk. Feyza-i chu a au ta chel chul mai a, "Halil, engthil nge i tih tak?" tiin a tap a. Mahse Halil-a chuan a ngaihpawimawh loh hmel khawp mai, kawngka chu a khar hmak mai.

***************

Orhan-a chuan kawngkhar chu a beng vak vak a, "Lo hawng rawh..khatah khan i awm tih ka hria?" tiin a au vak vak bawk a. Halil-a pawh chuan Feyza-i chu thutthlengah chuan  aphuar bet ve a, a hmui a tuam sak bawk a. Hiyat-i leh Feyza-i chu an tap a, an tal vak vak mai. "Helai hmunah hian kan awm ve an phal lo a ni, ka nu hruai chhuah chu ka duh viau nangin heng ramhuai ho hian min phalsak lo a ni. Engpawh chu nise, a tellova kan kal mai angai a ni." a ti a.

A bula tiang chu la in gas pipe chu a han chhu ri ta bur bur mai a, atawpah chuan a chhu pawp ta. Chu room ipik zet leh phui mup mai chhungah chuan gas rim a nam ta rum rum mai a, Feyza-i te nufa chuan an hlau kher mai. GAs chu a nam ta rum rum mai a, Omer-a erawh a che ve eih lo thung.

***********

Orhan-a chuan kawngka chu a tichhia a, a rawn lut ve ta. A hawi kual a, "Khawnge i awm? Rawn inlan ta che. Kha naupang lak atang khan enge i duh? Helai hmunah hian i awm tih ka hria, lo chhuak rawh. Pathian hmingin ka hrilh ache, thilsual lian tak i ti a ni. Pathian chuan a ngaidam hauh lovang che, a hrem ngei ang che." a ti khur khur mai a.

Hiyat-i leh Feyza-i te chu an tal nasa mai a, an tap vak vak a. Mahse Halil-a lah chu a nui vur vur reng mai a, "Kan chhuak dawn ta e, a tawp atawpah chuan.." tiin afate pahnih chu a han en a. An hmaiah chuan a chul a, chumi hnuah chuan a nupui lam chu ava melh ve leh a. Ava pan hnai a,a  a biangah chuan a chul sak bawk a.

************

Khawnge i awm? Kha naupang lak atang khan enge i duh? Pathianin a hre dawn che, a ngaidam hauh lovang che. A chunga hetiang ti tur hian dikna i neilo, Pathianin a hrem ngei ang che. Chutah thawm a hria a, thawm lo chhuahna lam chu ava pan vat a. Mahse tumah a hmu lo, "Ka mit chu i bum thei a ni mahna, mahse ka thinlung hi chu i bum ve hauh lovang." tiin Orhan-a chu a hawi kual leh hrek hrek mai a.

"Ka nu hi hruai ve thei ila ka ti khawp mai, mahse an phal silo. Ka nu tellova kan kal mai angai a ni, apawi ka ti." tiin Hilal-a chuan a nupui leh a fate chu a en ngawih ngawih a. A mal te te chuan an lu ah a fawp a, tichuan an bulah chuan a ding a, bang a ngheng a. Room chhungah chuan gas rim chu  a nam nasa tulh tulh mai a, an rui tan ta.

**************

Orhan-a chu Saadet-i roomah a han lut a, Saadet-i chu a lo mu meng kur mai. Hnai takah hian a han en a, "Min chhang rawh...he pitar kawchhungah hian i awm tih ka hria. He pitar lak atang hian enge i duh? Min chhang rawh..he taksa chhungah hian i awm tih ka hria. Hemite chhungkua hi engvanga tibuai nge i nih? Engvang nge? Min chhang rawh." tiin a vin khu khur mai a.

Saadet-i chuan  a hlauh hmel kher mai, a khur dar dar mai a. Chutah Orhan-a chuan Saadet-i chu a pawm lawk a, thutthlengah chuan a thuttir a. Ahma zawnah chuan bati a chhi a, "He pitar lak atanga hian engthil nge i duh a? A ka hmang ngei hian min chhanglet ve ta che. Kha naupang chungah khan engvanga hetiang thil hi ti nge i nih? Kha naupang khan i chungah enge a tih? Hemite chhungkua hi engvanga tibuai nge i nih?" tiin a han vin leh khur khur a.

Room chhung chu gas rim hlirin a khat tawh a, Halil-a te chhungkua pawh chu nikhawhrelovin an awm vek tawh. Orhan-a chuan Saadet-i chu a han en leh ren rawn a, "Min chhang rawh...min chhang vat rawh." tiin a han vin leh tuar a. Chutah Saadet-i chu a rawn hawi chhuak a, "Natna...natna an tuar mek a ni." a rawn ti t(r)ial ta ruai ruai mai.

"Enge i duh?" tiin Orhan-a chuan  a zawt leh a, Saadet-i chuan, "An phutawk chiah an hmu a nih hi, an phutawk chiah." a lo ti leh khur khur a. "Enge kha naupang lak atang khan i duh a?" tiin Orhan-a chuan a zawt leh a. Thinrim tak hian Saadet-i chuan, "He ka chenna taksa hi kal sawn an tum a, ka phallo a ni." tiin a lo chhang a.

"Kal tir rawh, pawisawi lo an ni. I tihnat ka phallo, chhuah vat rawh." tiin Orhan-a chuan a han vau leh khur khur a. Chutah ringzet hian Saadet-i chuan, "Kal bo rawh...kal bo rawh." a lo ti vak vak mai. Orhan-a chuan, "I tihnat ka phallo." tiin Saadet-i chu a rek ta vak mai. "Rawn inlan rawh, he taksa hi chhuahsan rawh...lo chhuak rawh, anih loh chuan he pitar hi ka rek hlum ang. Pathian lalram te hi a nghing ve ngailo, ani chu lal ber a ni. Lei leh van siamtu a ni a, amah lo lal dang an awmlo." tiin a han vau leh a.

Tichuan chunglam en pah chuan, "Rawn inlan rawh, min rawn hmachhawn ta che. Dikna i nei lo, rawn inlan rawh." tiin a han au leh vak vak a. Chutah Orhan-a chu a han meng var ta pup mai a, a maimitchhing a. Chutah Orhan-a ngaihtuahna/mitthla ah chuan chu ramhuai chu a rawn inlan ta, Orhan-a hma takah chuan a rawn vak phei a.

"Min chhuah rawh....he pitar hi ka ta a ni tawh." tiin Orhan-a chu a ngen a. "Nanga hrem theih ngawt a nilo, dikna i nei lo. Kan Pathian tih loh chuan tuman hrem theihna dan an neilo, dikna i neilo. Tunge i hming? Tunge i nih sawi rawh." tiin a zawt leh a. "Ka hming chu Shufyezin-i a ni a, ka naute min hal hlum sak a ni. Ka taksa chhunga ka pai mek ka naute chu min thah sak a ni, an mahni vangin nau ka pai a ni. An mahni thuin kha putar kha an rawn tir a ni, an lalram a ka luh ve theihna chhan pawh anmahnin min hawnsak a ni. Anmahni khan anchhia min lawh a ni, anmahni vangin fa ka pai a, mahse an mahni thovin ka fa chu an tihlum leh si a nih hi." tiin hnunglam hawi chung chuan a tawng thum bul bul mai.

Chutah a rawn hawi thut a, a hmai chu a dum vek a, a rapthlak ngei mai. Thinrim tak hian, "Anni saw ka ta an ni, min chhuah rawh." a han ti leh vak vak a. Chutah Orhan-a chuan, "Hremna chu an hmu ang,  hrem an ni ngei ang." a lo ti a. Ramhuai chu a rawn ding chhuak a, boruakah chuan a kang ta ur ur mai.

"Min chhuah rawh, keiman ka hrem dawn." a han ti leh khur khur a. "A teuhlo, PAthian chauhvin a hrem ang, nang nilovin." tiin a lo chhang a. "Min chhuah rawh.." tiin ramhuai chuan a han vau leh a, mahse Orhan-a chuan a lo hlau lo nasa mai. A amulet ken lai chu a han lek kang a, "Kan Pathian hi hneh theih a nilo, ani chu thiltihtheihna a khat a ni. A thil duh chu a thlen tir mai thin, tuman an dang thei lo." tiin a au ta vak vak mai a.

Chuveleh an hma takah chuan mei alh sang em em mai hi a rawn awm thut mai a, chu ramhuai chu a kang ral ta vek mai. Orhan-a chu a harh zawk mai a, Saadet-i hrawk a rehna chu a thlah ta a. An bul lawka bati inchhi pawh chu a thi hmak mai a, Orhan-a pawh a thaw huai mai. Basement kawngka pawh chu a rawn inhawng a, Omer-a pawh a rawn harh ta.

*************

THLAKHAT TAMTAK HNUAH CHUAN...

"Kha thil rapawm tak kan tawn hnu atang khan thla engemaw zah a lo liam leh ta, ka diary pawh ka ziak leh thei ta. Khami zan khan in kha kan chhuahsan nghal a, hmundangah kan insawn nghal a ni. Thla hnih liam hnuah ka pi chuan min boral san ta a, ka pa chuan in kha  a hralh ta a ni. Ka pu thlan pawh chu tihchhiat a ni a, a ruang pawh thlanmual pangngaiah kan phum tha leh a ni. Tunah chuan engkim a tha leh ta, ka chhungte pawh an hlim takzet tawh. Ka pa pawh a sumdawnna lamah a tluang leh tan ta hle a, pawisa pawh pangngai takin a la lut thei leh ta a ni. Ka nu ka en chang hian khami zana a mangan zia kha ka hrechhuak leh thin a, hriat reng tawhloh ka duh takzet a ni. Ka nau Omer-a pawh a tawng pangngai leh thei tawh a, tunah chuan chhungkaw hlim tak kan ni leh ta." tiin Hiyat-i chuan a diary chu a ziak zo ta.

***************

ENGE A THAWNTHU AWMZIA HI NI TA?

Halil Yilmaz-a chu a sumdawnna a tlakchhiat avangin pawisa a nei lova, a hnuaia hnathawkte hlawh pawh a pe thei ta lo. Chuvang chuan an inluah lai pawh chu luah chhunzawm thei lovin anu Saadet-i te inah chuan an chhungkua in an pem ta a, mahse chu inchhungah chuan ramhuai a lo cheng ve reng mai a lo ni.

Chu ramhuai chu tudang nilovin an awmpuinu anga lo awm ve char char, Rahim-i kha a ni. Rahim-i kha ramhuai chu a ni e tihna nilovin, kha ramhuai kha Rahim-i anga insiamin a lo cheng ve reng zawk a ni. Rahim-i tak tak zawk chu Saadet-i inah hian luh ve phalsak a nilo, ramhuai ten an phallo a ni.

Saadet-i hi ramhuaiten an tibuai thin hrim hrim a, mahse an tihbuai chhan erawh he thawnthu hian a tarlang ta lem lo a ni. Saadet-i chuan psychic adviser pakhat, Rahim-i tih hmingpu chu ava pan ta a, Rahim-i pawh chuan a lo pui ve mai a. Chutih lai karin a pasal Muhsin-a lah a natna a lo zual ve telh telh bawk nen, kar 4 chhung teh meuh chu Rahim-i chuan a enkawl chhunzawm ve bawk a.

Muhsin-a pawh a ziaawm ve telh telh a, mahse a chezia a mak tulh tulh mai. Inhnuai basement ah chuan a hun tam zawk chu  ahmang ta fo mai a, Saadet-i chuan mak a ti thin hle. Tichuan atawpah chuan thil awmzia a hrechhuak ta a, a pasal Muhsin-a chuan nupui dang a lo nei reng mai hi a lo ni a.

Chu a nupui pawh chu mihring nilovin, ramhuai a lo ni. Chu ramhuai hming pawh chu Sufyezin-i a ni a, Muhsin-a nen chuan fa te hial an lo nei tawh bawk a ni. Chu thu a hriat chuan Saadet-i chu a mangang em em a, Rahim-i bawk chu a pan leh ta. Rahim-i chuan a lo hnial a, mahse Saadet-i chuan a pawisa khawl zawng zawng pek vek a tiam avangin a pui leh ta a ni.

Muhsin-a chu an hrai rui a, tichuan dawi hmangin chu ramhuai chu hnawhchhuah an tum ta a. Mahse an thei ta lo, Muhsin-a zawk chu an dawi hlum ta daih mai a ni. Muhsin-a nupui, ramhuai Sufyezin-i chu a thinrim ta em em a. Rahim-i chu inchhunga lo luh ve pawh an phal talova, Saadet-i pawh chu mi rilru buaiah an siam ta a ni.

Ramhuaite chuan an veng reng a, zantin an sawisa thin. Mahse Halil-a te an rawn awm tak siah chuan Sufyezin-i chu Rahim-i angin a insiam danglam a, mihring angin a awm ve ta a ni. Rahim-i tak tak zawk chuan Saadet-i chu a ngaihtuah thin em em a, chuvang chuan Saadet-i in chu pawn lam atangin a thlir reng thin.

Rahim-i thih chhang kha chu ramhuaite thah a ni a, a chhan pawh thudik engkim Halil-a hnena a hrilh vang a ni. Orhan-a erawh kan la hre theuh anga, SICCIN-3 ami Orhan-a ngei kha a ni. Khatia a kalbo hnu khan amahin in a luah a, dawi lam chu ala chhunzawm reng a. Motor chhunga Omer-a ava hmuh khan Omer-a chu ramhuaiin a ti buai mek tih a hrethiam nghal a, chuvang chuan puih a tum ta a ni.

A dawi lam hriatna te hmang chuan Omer-a nena inthlunzawm a duh ta a, Omer-a thil tawn apiang chu a lo hre ve ta zel a ni. Halil-a'n in chhuahsan a, anu hruai tel a duh thu chu ramhuai Sufyezin-i chuan a lo hre ve leh ta a, tichuan Halil-a taksa chu a thunun ta a. Basement-a a nupui leh fate gas rim hmanga hrai hlum a tum nachhan pawh kha Sufyezin-i tih tir vek a ni.

A hun takah Orhan-a a lo kal a, a rawn chhanchhuak ta hram a ni. Rahim-i leh Saadet-i'n Sufyezin-i hnawhchhuah an tum khan ti fuh lo mahse Sufyezin-i fa pai lai mek erawh an that hman a, mahse tumloh takin Muhsin-a pawh an that tel ta a nih kha. Halil-a mumanga Saadet-i'n PAWISA HETAH A AWMLO, KHANU KHA KA PE VEK..a tih laia, KHANU a tih chu RAhim-i tak tak zawk kha a ni.

***********

A TAWP TA