WHO AM I? (MIZO FICTION PSYCHOLOGICAL THRILLER/HORROR STORY)

WHO AM I?

(MIZO FICTION PSYCHOLOGICAL THRILLER/HORROR STORY)

Written by : Aaron Malsawmdawngzuala

*************

"Khawnge i awm?" tiin Sangtei chuan message chu ava thawn a, "Ka lo kal mek e." second 5 vel hnu lekah chuan reply a dawng nghal vat a. "Lo kal vat rawh, ka nu leh pate pawhin an nghak reng tawh che ania." tiin a thawn let leh a. "Awle, duat..", Sangtei chu a nui sak a. Sangtei leh a nu leh pate chu restaurant ah chuan thu in Sangtei thil sawi tur chu an nghak thap mai a, tu emaw hmuh tir tur a neih thu a sawi a ni.

"Tunge a hming ni reng reng a?" thil ei mawlh mawlh pah chuan Sangtei pa chu a rawn tawngchhuak hlawl mai a. "Ihh..." a sawi zawh hma chuan apa bawk chuan, "Engtik atang khan nge in inngaihzawn reng reng a?" tiin a zawt leh nghal a. Sangtei chuan hrilhhai hmel zet hian, "Pa, tinge chu chu min zawh kher a?" tiin a lo zawt let a.

"Minute 10 lai kan nghak tawh a, nanglah chuan phone i khawih reng bawk si." a fanu en chuang miahlo chuan a thil ei lai chu a ei chhunzawm mawlh mawlh a. Inthlahrun hmel tak hian Sangtei chuan, "Office lam thil te pawh a ni thei a." a ti ringawt a. Apa chu a nui suk a, "Umm...a ni thei teh meuh mai. Mahse a khat tawkin kawngka lam saw i melh zeuh zeuh a, tinge?" tiin a zawt leh a.

"Awww...ka thiante ka hmu pawh a ni thei asin." Sangtei chuan a ti leh a. Apa chuan, "I thiante chu nise kan inah pawh min hmelhriat tir thei reng, khawpuiah hna ka thawk duh i ti a, khata tang daih tawh khan hetiang thil hi chu a thlen ka ring sa reng a ni. Thingtlang a seilian chu ka ni maithei e, mahse i nu anga awm mawl tawp ka nilo ania." a han ti deuh kher a.

Sangtei nu chuan a han melh hrawk mai a, "Tinge khatia mi melh vak a, sawi ve duh i nei em ni?" a lo ti let hrep zui. Sangtei pa bawk chuan a fanu chu enin, "Enteh bawihte, naupang chhia i ni tawh lo. Ka ring che a, thudik min hrilh ngei bawk ang che. Sawi rawh le, tunge a hming ni a?" tiin a zawt nawn leh a.

Zawi sap hian Sangtei chuan, "Ihh..Joseph.." tih ringawt chuan a chhang a. Apa pawh chuan a lu a lo bu nghat a, "Umm...Joseph-a maw, ti mai tur kha alawm. A hming chauh em ni min hrilh dawn a? Eng hna nge a thawh?" a han ti leh nghal zung zung a. Phur tak hian Sangtei chuan, "Ihmaw, a fel lutuk. Mi punctual tak mai ania, a hunah tak a thleng thin." a tih lai chuan message a lo thleng a, "Ka rawn tlai dawn, chhuanlam minlo siam sak mai teh." a rawn la ti zui.

A lo fak laklawh tawh bawk si a, sawi chhunzawm zelin, "A fing lutuk bawk." a tih lai bawk chuan message a lo thleng leh a, "Ehe...duat, kawng ka bo daih ania." a rawn ti leh a. Sangtei chu a lungawi tawhlo kher mai, mahse a nu leh pate chuan a thusawi lai chu ngun takin an lo la ngaithla reng bawk si.

"Ihh..chuan mi huaisen tak a ni bawk.", a phone a han en leh a, "I nu leh pate chu ka hmu hreh khawp mai, ka hlau deuh tlat." tih a dawng leh nghal. Apa chuan, "Engtin zel?" a lo ti hmuk a. Sangtei chu za lo tak chuan a nui sen sen a, "A polite lutuk bawk." a tih lai tak chuan message dang a dawn leh ta. "F**k...traffic hi a ninawm lutuk." tih a rawn thawn leh a.

Apa chu a han thu tha sauh sauh a, "Umm...atha e." a han ti deuh hmuk a. "Pa, ihmaw...ka chunga in thinrim ka hlau a." inthlahrun hmel tak chuan a ti a. Apa chuan, "Nilove, thuthlukna mawlmang tak leh atthlak tak chu i siam dawnlo tih ka hria alawm. Mahse...i nu ber zawk hi ania." a han ti leh zeuh chu Sangtei nu chu a mengrum leh pek kher mai.

Sangtei chuan anu chu a en a, "Nu khawngaihin, khawngaih hriatthiam tum hram teh." a tih lai chuan apa bawk chu rawn inrawlh lehin, "A teuhlo mai, i pian tirh atang khan i pasal tur te chu a hual daih tawh alawm. A hrim hrimin bawihi, Joseph-a chu eng kohhran nge an nih reng reng a?" a han ti leh deuh kher a.

"Pa...engemaw.." a sawi zawh hma chuan apa bawk chuan, "Nilove...i nu tana zawt zawk che ka nia, keite chuan eng kohhran pawh nise ka pawm vek alawm." a han ti leh zung zung a, Sangtei nu chuan a ngei kher mai. "Kan kohhran a in ang." a tih takah chuan an nupa chuan an thaw huai mai.

Sangtei pa chuan zawhna dang a zawt hreh tawh bawk si, ala zawt duh bawk si chuan a nupui chu a melh a, "Enge?" a han ti ringawt a. Sangtei nu pawh chuan a hrethiamlo kher mai, "Enge a?" a lo ti hu mai a. "Awle..ka'n zawt ange." a han ti zaih a. A aw a han thian karh karh a, "Eng hna nge a thawh a?" tiin a zawt leh a.

"Pa, doctor ania, a buai thei lutuk. Inhmuh ka duh ve pawhin kei ngei pawh hian appointment ka siam a ngai thin alawm." tiin a nui har har a. Sangtei pa chu a han meng kual leh zeuh zeuh a, "An hausa em?" a han ti leh zauh pek a. Sangtein a chhan hma bawk chuan, "Ahh..ihh..i nu vang ania ka zawh che, i nu hian mi hausa nei turin a duh em che a." tiin a insawi thiam leh nghal zung zung a.

"Business lian tak an nei a, in rin aiin an hausa ang." tiin a chhang a, Sangtei pa pawh a nui leh ta var var mai. "Unau pianpui dang a nei em?" tiin a zawt leh a, "Aih neilo, fa mal a ni e." tiin a chhang a. Intithei ru tak hian Sangtei pa chuan, "Kei chuan ka pawm vak lo, mahse ka fanu in i duh miau chuan ka hmangaih em che avangin ka pawmsak ang che." a han ti vel a.

Sangtei pawh a lawm kher mai, "Ka lawm e, ka pa." tiin a pa kutah chuan a vuan a, a hlim kher mai. "Engtikah nge a lo thlen dawn a, ava rei reng reng ve?" a tih lai chuan Sangtei chuan message a dawng leh ta, "Ka lo thleng e." tih hi alo ni a. Sangtei chuan kawngka lam chu ava en a, "Ehe...lo kalrawh..helamah." a ti vak a.

Phur takin an makpa tur, Doctor ngat, hausa em em mai bawk si chu Sangtei nu leh pate chuan an va en a, mahse an nui hmel chu mak tihna hlirin a thlak nghal. An lam pana helmet full face rawn pawm phei mek, Sangtei ngaihzawng, an makpa ni ngei tura an rin chu mipa nilovin hmeichhia, samkir, vun ngo tak, ft 5'2 vela sang, hmeltha zet leh tituai nalh zet mai hi a lo ni a.

Chu hmeichhe chhelo zet chuan an dawhkan chu a rawn kil ve a, polite tak chuan, "In dam maw?" a rawn ti vel ham ham a. "Nu, pa...hei hi ania, Josephine-i a nih hi." a ti ta daih mai. Sangtei nu leh pate chuan tawng nachang reng an hrelo, an ka hau ringawt mai a. An lo nghahhleh em em, an makpa hausa tak ni tura an ngaih chu mipa ni lovin an fanu neih ang tho nei ve, hmeichhia vek a lo ni ta mai chu an hrethiamlo kher mai.

*************

"Englam nge i siam thiam ve a?"

"A tam mai, Chinese, Korean, Thai.."

"Awle awle, nileh khawi restaurant ah te nge i thawh ve thin?"

"Ka thawk ve nual mai."

"Khawi restaurant ah nge i thawh hnuhnun ber?"

"A lar ve lutuk, i hre kher lovang."

"Tinge i ban daih a?"

"An thil siam a tui lo lutuk a."

"Mahse eisiamtu ber i ni lawm ni?" restaurant neitu ber Pi Mabiaki'n a han zawh chuan Sawmtea, chef na dila interview nei mek chu aphu zuk mai, "Aaa...ka sawi awmzia chu...ka thawhna a eiturte hi a to thin si a, chuvang chuan a bula hotel lian vaklo ah thil ka ei zawk thin a.." a ti bah nuai mai a.

"A tha e, enchhin ila, veg fried rice, minute 10 i nei.." tih pah chuan chef thuamhnaw chu a pe a, a kal tur chiah chu Sawmtea chuan inthlahrung tak hian, "Ka pi...Password?" a han ti ringawt a. "Eng Password maw?"..."Wifi Password...eitur ka siam lai te hian music ka ngaithla thin a..". a han ti vel a.

"NO PASSWORD." a lo ti hmak mai, "Mahse...wifi a awm sia.." a tih lai chuan Pi Mabiaki chuan, "Password chu...NO PASSWORD." Sawmtea chu a han nui suk a, "Eee..awle awle. Kan siam nghal ange...". "Minute 9 chiah i nei tawh...i siam zawh veleh hmunhma vel kha tifai ang che." tiin a kalsan ta a.

Sawmtea chu a inthlak a, chef thawmhnaw chu ha in thiam ber awm ang zia zang chuan a han hawi kual zeuh zeuh a, a phone chu a phawrh a. Wifi password te a chhut zawh hnu chuan youtube ah a lut a, HOW TO COOK VEG FRIED RICE tih chu a zawng nghal a. Video en pah chuan a han siam tan ta a, a video ang thlapa a siam zawh hnu chuan Pi Mabiaki chu a lo let leh ta a.

Rice chu a han tem chhin a, a tui a ti hle mai. Mahse a hmelah chuan a tilang duh miahlova, Sawmtea chu hire nghal mai pawh ala duh lo. "A tha e, chow mein lo siam leh rawh...minute 15 hun i nei." tiin a kalsan leh ta daih mai. Lehkha thiamlo leh saptawng thiam em em lo Sawmtea chu a hawi a hu mai a, "Enge Chau MIN chu ni ang awww?" a ti heu mai.

Youtube ah chuan lutin CHAU MIN tiin a han zawng thuai a, mahse Youtube chuan a dik thlapin Chow Mein siamdan video chu a rawn tarlang hlauh mai. Nui vur vur chung chuan, "Aw...noodle soup maw...haha, ni tak e." tiin video chu a han en leh a. Mahse wifi a rawn chhe thut mai, video chu a tawp ta hmak mai a.

A mangang kher mai, "Engtin nge ka tih tak ang?" tiin a tap titih nghal der mai a. A chang leh a tawngtai thul, awmzia a awm chuang bawk silo. Chutia mangang taka a awm lai chuan aw(voice) mak zet hian, "Hey..nangkha.." a rawn ti thut mai a, a phu chiang kher mai. A hawi kual a, choka chhungah chuan amah chiah mihring a awm bawk si.

Chu aw bawk chuan, "Hawi kual vak vak suh, mawl lutuk." a rawn la ti ta deuh deuh a. Sawmtea chuan a hlau tan der mai, "Tu..tunge?" a ti vak vak a. Chu aw lah chuan, "Thatchhiat thlak lutuk, engmah thiam neilo. Mawla, nep lutuk mai." a rawn ti thum leh chhur chhur mai a. Sawmtea chu a thlan a tla buah buah tawh mai a, a hawi a hru mai.

Chutah chu aw bawk chuan, "Eisiamtu hrang hrangte eisiam dan hi helai tui tlem tak hnuai atang hian ka lo thlir reng thin a, nang ai chuan ka thiam hnem fe zawk ang." a rawn tih takah chuan ahma zawna aquarium chu a en a, sangha sen (gold fish) lian ve pangngai tak, mit meng bial pup chuan a lo melh reng mai.

Awih har a ti si, mahse ni ngeiin a hre bawk si, chu sangha aquarium ami ngei chu a ni rawn tawngchhuak chu. Zawi muang chuan ava pan hnai a, sangha lah chuan, "Tuifinriat a ka awm lai kha ka ngai mange, helai hi chu tui a tlem si...mihring ho lah hi an mawl hlawm si..ka ning." a la ti nuah nuah zui.

Sawmtea chuan chiang takin sangha chu a han bih a, sangha chuan lo en let ve in, "Tunge maw i nih le? Aquarium ila hmu ngailo em ni?" a lo la ti zui. Chu sangha ngei chu a ni takzet em tih fiah nan sangha chu va man a tum a, chuveleh ringzet chuan chu sangha chuan, "Hey..i mawl em ni?" a lo ti tuar mai a, Sawmtea pawh chu a hnungtawlh dawr mai.

A hlau lutuk chuan a inhaler (asthma pump chu a phawrh chhuak a, chu sangha bawk chuan, "A diklo zawngin i hum ania.." a rawn la ti zui. Sawmtea chuan a inhaler kenlai chu a han en a, a diklo zawngin a lo keng tak tak lehnghal. Sangha chu ava pan hnai leh a, "Sangha...sangha tawngthei maw?" a ti hu mai a.

Sawmtea chuan hlau deuh chung si chuan, "Ka..ka hming chu Sawmtea a nia.." a han ti ringawt a. Sangha chuan lo chhangletin, "Sawmtea a? Sawmtea tih hmingpu ka hriat chu an ngo vek a, iva hang thel thul ve..haha, ka fiam mai mai che a nih kha.." a lo la ti zui. "Tunge nang i hming ve?" tiin a zawt a.

"Ka hming chu Nelson-a ania, sangha ka ni e." tiin a lo chhang mauh mai. "Ihh....chow mein siamdan i hria em?" a han ti thawr a.

"Tui hlauh i thiam em?"

"Thiam nang."

"Engtin nge chow mein siam dan ka hriat bik teh lul ang? Sangha eisiam thin i hre ngai mi? Mawl lutuk, doctor va hmu la, i chiang mai ang." a lo ti let hrep mai. Sawmtea pawh chuan mak a ti tawh lemlo, a nui suk a, "Doctor va hmuh dawn chuan pawisa a ngai sia lawm, pawisa nei ila hetah hian hna ka rawn dil teuhlo mai." tiin sangha chu a vin hrep mai a.

Thutthleng ah chuan a thu a, "Kar khat chhung chu engmah ka ei mumal tawh lo, hna ka dil lahin tuman min la duh si lo. Hetah hian hna ka rawn zawng ve tawp mai ani, hre tak hian.." a ti nuah nuah a. "Anih chu...ava zialo ve. Ka nun ai chuan i nun chu a hrehawm zawk dawn a nih chu mawle..." sangha chuan a lo ti a.

 

Sawmtea chuan chhanglet lovin a lo nuih suk ringawt a, sangha bawk chuan, "Chow mein te chu siam a har hleinem." a rawn ti ta zeuh mai. Rangtakin a zuang tho a, "I thiam em ni?" tiin sangha chu ava pan hnai a. "Thiamlo, ka la siam ngailo. Mahse an siam lai chu ka hmu hnem tawh mai, vawi 100 chuang ka hmu tawh." a ti ta mai a.

Phur tak chuan, "Min pui thei angem?" a han ti nghal vat a. "Enge ka tan hlawkna awm ve ang?" tiin a lo zawt let keuh mai a. "I duh duh animai." Sawmtea chuan a lo ti leh vat a. "Tuifinriat lamah min hruai haw leh thei angem?" phur hmel tak chuan a ti a. Sawmtea chuan a ngaihna hriatloh hmel zet chuan, "Kha aquarium ah khan i him daih zawk lo em ni? Tuifinriat ah te chuan hmelma tam tak i nei awm si a?" tiin a lo zawt a.

"Ka buaina alawm...enge minlo ngaihtuah viau a?" a lo ti let leh zek mai a. Sawmtea chu a thaw huai a, "A tha e, min pui thei e." a ti a. "Ahmasa berin chow kha la la, carrot la leh la, purun sen nen. I thiam ang tawkin fimkhur takin chan rawh le." a ti a, chow mein siam chu an tan dun ta. Sangha chuan tihdan tur hrilh zelin, "Tel kha han ti hmui em em phawt mai la, mushroom tlem telh bawk la." a han tih chuan Sawmtea chuan, "Mushroom a?" a ti leh ta hu mai.

"Huiham, pa(mushroom) kha...pathum vel la rawh." a ti a, zak ru deuh chung chuan a la a, "Soy sauce, chilli sauce...chuan vinegar chhete nen..tui kha tam vaklo leih bawk la." tiin a hrilh ta zel a. Sawmtea pawh nuam a ti kher mai, thian thar a tawng nghal bawk nen, nui var var chung chuan a siam chhunzawm zel a.

A tawpah chuan a siam zo ta a, pi Mabiaki pawh a lo let leh ta. Soup chu a han hawp chhin a, tui a ti kher mai. Mahse a hmelah chuan ala ti lang duh chuang lo, "Hei, order thar aw.." tih pahin paper them chu a pe a. "Ehe...min hire tihna ami?" phur tak chuan a lo ti vat a. "I hmanhmawh anih kha..kha kha siam leh phawt rawh." tiin a kalsan leh ta daih mai.

Sawmtea chu a hlim kher mai, "Thian duhtak Nelson.." tih pah chuan aquarium chu a va fawp vak vak a. Sangha chuan, "Hey...kal teh, tenawm lutuik." a lo ti hrep a. "Ka lawm e, ka lawm takzet." tiin a nui huah huah a. "I ninawm, eitur min pe vat teh." a lo ti vin leh hlur mai a. Sawmtea chuan sangha chaw chu tuiah chuan a thlak a, tui ti tak hian chu sangha, Nelson-a a lo hap nghal buan buan a.

Order chu a rawn luhbelh zel a, Nelson-a chuan siamdan tur chu a lo hrilh zel a. Sawmtea pawh chuan a siam zel a, a siam tui thei em em mai lehnghal. "Hriatthiamloh pakhat ka nei, engtin nge hetiang siamdan zawng zawng hi i hriat theih bik a?" tia a han zawh chuan Nelson-a chuan, "Chef tamtak an lo kal a, an bang leh a. MAhse kei chu khawiah mah ka kalsawn ve lo, helai hi ka in a ni tlat." a lo ti hmak mai.

Restaurant ah chuan pa pakhat a lo lut a, a hming chu Pu Zothana a ni. Pi Mabiaki chuan ava pan a, "Ehe Pu Zothan, nang i nimaw? Enge i ei duh ang?" tiin ava pan vat a. Nui sang hian Pu Zothana chuan, "Engmah ka duhlo, ka puar e." a lo ti a. "Nilove, chef thar kan nei a, a thiam lutuk asin...engemaw tal i eitur a ni." a ti tlat mai si a. "Ummm..a nih chuan bourride a awm ang tiraw?" tiin a zawt a. "E..tehreng mai, lo nghak rawh aw." tiin choka lamah chuan a phei lehnghal a.

"He hna hi ka hmu a nih hlauh chuan pawisa te ka nei ve anga, inhaler thar ka lei ve thei tawh ang." hlim hmel tak chuan a han thaw deuh halh a. "Hmmh...engtikah mah chef i ni theilo ang." Nelson-a chuan a lo ti hmuk mai. "Engvangin maw?" a han ti nghal khur khur a. Nelson-a chu a nui huk a, "Chef asthma nei an awm ngailo, Pi Mabiaki hian a hria a nih vaih chuan a hire chuanglo ang che."

Chutih lai chuan Pi Mabiaki chu alo lut thut mai, Sawmtea phu nasa lutuk chu a inhaler ken lai chu a vawr vak a, aquarium ah chuan a tla ta daih mai a. "Bourride i siam thiam em?" a rawn ti lut nghal a. Sawmtea chuan Nelsona chu a va melh zeuh a, Nelson-a chuan, "Ka thiam..ka thiam.." a lo ti vat a.

Intithiam tak hian, "Ka pi, cricket game ah reng reng bowling i thiamloh chuan bowler tha tak i ni thei ngai lovang. Chutiang chiah chuan bourride siam thiam lo te chu chef diktak an nithei ngailo." a han ti vel a. "Sawi vat mai teh, i thiam em?" a lo ti vin hlur mai. "Aw thiam e.".. "A that chu....mikhual pawimawh tak mai kan nei a, bourride a duh a, siam sak vat rawh." a ti a.

Sawmtea chuan, "Tunge chu chu?" a lo ti a. "I hriat ve a ngailo, siam vat mai rawh." a lo ti hmuk a. Inthlahrung tak chuan, "Awle...minute 5 chhungin tui tawkin ka lo buatsaih hman vek ang." a ti a. "Umm...hemi hi i siam zo a nih chuan ka hire ang che.." a ti a, a kalsan ta a. Chuveleh Sawmtea chuan Nelson-a bulah chuan, "Lee...ingredients te chu?" a han ti nghal chung chung a.

"Tomato, limbu, olive oil...chuan salmond." a lo ti nghal zung zung a. Sawmtea chuan salmond chu enge a nih a hre leh ta tlat lo, "Chu chu khawnge a awm?" a ti chel chul mai a. Nelson-a chuan, "Fridge ah." a lo ti sam et a. Fridge chu ahan hai chiam a, "Engtin nge salmond chu a awm a?" a han ti vak a.

"Cheese ang deuh ania, a nem lutuk." a lo ti a. "Ka hmulo....chutiang engmah a awm lo." tiin Sawmtea chuan a lo chhang a. Nelson-a chuan, "Anih chuan Pi Mabiaki bulah i siamthiamloh thu va sawi la nimai lawm." a lo ti ta daih mai. Thinrim tak hian Sawmtea chuan, "I fiamthu em ni a? He hna hi ka hmuh hma chu he choka hi ka chhuahsan lovang." a ti khur khur a.

Nelson-a chu a nui suk a, "Sangha tello chuan bourride a siam theih hleihnem, Mawla." a ti leh ta hrep mai. Chuveleh Sawmtea chu a ding ngil zawt a, Nelson-a chu a melh ta run mai. Nelson-a lah chuan, "Ahmaa eitur i siam ho ah khan cheese hmanna tura salmond i hmang char char a, i hmang zo daih alawm. Pi Mabiakin a hriat vaih chuan...hna i hmulo chiang ngawt ang." tiin a lo nuih vak vak mai.

Sawmtea chu a thinrim kher mai, a ngawi reng ringawt a. Nelson-a bawk chuan, "Wifi pawh a that tawh kha, min mamawh tawh lovang chu. Mahse sangha a awm der silo, engtin nge bourride i siam tak ang?" tiin a han chhaih vel a. Chutah le, Sawmtea chuan Nelson-a chu a en ta vang vang mai a, Nelson-a chuan hlau rilru deuh tak hian, "Ehe..sangha chungchang sawi veleh a min rawn melh kher ni...enge tih i tum a?" tiin a au chel chul mai a. Sawmtea chu a nui sak mai, Nelson-a lam chu a va pan ta chher chher mai a.

***********

Kathy Lallawmkimi, kum 26 mi...rilru mangang em em leh beidawng em em mai chu restaurant pakhat ah a kal a. Bathroom ah chuan lutin a hmai a phih a, darthlalagah chuan a in en vang vang a. A bag chhung chu a han hai vak a, chanchinbua thil intuam tun mai chu a la chhuak a, chanchinbu chu a han la sawn a, silai hi a lo ni a.

Silai chuan darthlalang hma chu a han tin vang vang a, mahse engemawni hrechhuak zawk niawm tak hian a phu zuk a. Rang takin chanchinbu chu a chhar leh a, silai chu a tuam tha vat a, bang ah chuan khung lehin bathroom chu a chhuahsan nghal a. Thutthlengah chuan thuin a melh ngai a melh reng a, a bul vela inngaizawng lo chawl ve te chu a en leh zeuh zeuh thin a.

***********

Ramnghaka, restaurant security guard pakhat chuan time travelling machine a siam chhuah theih a inring tlat mai. Hunrei tak chhunga a lo buaipui tawh a khawl (machine) pakhat, lehkhakhawng bawm tiat vel lek dawhkanah dahin a siam chhunzawm leh malh malh mai a. Chutih lai chuan a boss Pu Zahminga chu a lo kal a, Ramnghaka bula lehkhabu chu a han en a, scientist ropui tak tak Albert Einstein, Stephen Hawkings te leh Charles Darwin te thuziak a lo ni hlawm a.

"Engthil nge maw i tih reng le?" tiin ava zawt a. "Han ka thawk anih hi, ka pu." tiin a lo chhang mai a. "Enghna nge i thawh a?" tia a han zawh leh chuan Ramnghaka chuan, "I hrethiam velo ang." a lo ti hmak mai. Hmuhsit hmel tak chuan a nui suk a, "Animaw...nileh hetiang thil hlir i buaipuite chuan tuin nge i hna tak tak zawk hi thawk ta anga?". tiin a zawt a.

Ramnghaka chuan a boss chu en chuang miahlo chuan, "CHARLIE." a han ti vak a. Chuveleh a dawhkan sira robot tereuhte chu a rawn inher kual a, Pu Zahminga lam chu a rawn pan chhet chhet a. Pu Zahminga erawhin a ngaihnep hmel kher mai, "Hmmh..Charlie maw? I siam em ni?" hmuhsit hmel tak chuan a ti a.

Ramnghaka lah chuan intihtheih hmel zet hian a lu a lo bu nghauh a, "Atha e, Ramnghak...anih chuan i duh duh chu tila, he i robot hi i hlawh tur pawisate chu ka pe zawk mai dawn tihna em ni?" tih pah chuan a kalsan daih a. Chuveleh Ramnghaka chuan va umzuiin, "Ka pu, nihleh ka lehkhabu sawi kha ilo en ta em?" ava ti leh a.

"I lehkhabu sawi apiangte hi ka leisak zel che chuan hun reilote chhungin kei hi nangmah angin watchmen bak ka ni lo ang, fahrah i ni a, ka kahwngaih ve em em che a. Mahse i hna ngaihtuah lek lovin scientist nih i tum tlat a, time travelling machine ka siam dawn e te chu i han ti vel a..." tih pah chuan thinrim takin a kalsan daih mai.

Pawnah chuan a machine keng chung chuan Ramnghaka chu a chhuak a, a lungawilo leh thinrim bawk si chuan a machine chu a paih thuai mai. Kawngka bulah chuan a thu a, chuveleh restaurant lam pan chuan hmeichhe chhelo zet mai, sap nula ngat lehnghal, vun ngo tak leh pian nalh zet mai chu a rawn kal a.

Heta Ramnghaka thawhna restaurant hi a chhungpui ber nilovin, restaurant library zawk a ni. Chu nula chu kawngka a lo hawnsak a, chu sap nula chuan anmahni tawng chuan lawmthu a hrilh a. Inchhungah chuan lutin lehkhabu vel chu a han enkual a. Lehkhabu zinga mi MORSE CODE tih chu a va thlang chhuak nalh a.

Ramnghaka chuan a lo en reng a, chu nula chu a thu a. Lehkhabu chu keuvin Morse Alphabet chu a han enkual a, a bula Morse hawnrawp chhutna chu abulah chuan a la hnai a. Lehkhabu en chung chuan Morse Alphabet hmang chuan a han chhu chhin a, I AM THE RAPIST tih a chhu kauh kauh mai.

 

Ramnghaka chu a lo nui suk a, tukverh zawnah chuan a torch light hmang chuan ava en a. Chu sap nula chuan a lo hmu a, a ngaihna a hrelo kher mai. Ramnghaka chuan a torch light hmeh en zeuh zeuh pah chuan morse code hmang tho chuan, "I chhu diklo ania." tiin ava hrilh a. Chu nula chuan morse code hmang vek chuan, "Enge diklo a?" tiin a lo chhanglet a.

Ramnghaka chuan torch light hmang tho chuan, "The Rapist a nilo, therapist zawk a ni e." tiin ava hrilh leh a. Sap nula chuan, "Ka hming chu Iva ania.." tiin morse code hmang tho chuan ava hrilh ve leh a. Ramnghaka chuan morse code hmang vek chuan, "Ramnghaka ka ni e." tiin a lo chhanglet a.

Iva-i mit chu a han en vang vang a, torch light chu hmet de leh keuh keuhin, "MAC Waterproof Mascara i hmang chiang mai." ava ti a. Iva-i chuan mak a ti kher mai, Ramnghaka bawk chuan, "Revlon nailpolish i hmang bawk a, a ti hmeltha zual kher mai che." a va ti vel a, Iva-i chu a lai kher mai.

Chutih lai chuan Ramnghaka chuan library chhunga nupa pakhat leh an fapa ni awm tak, hlim taka anlo awm chu a hmu a, a hnuk a ulh hial a. Morse code hmang tho chuan Iva-i chuan, "Tinge a? I va lungngaih hmel ve?" tiin a va zawt a. Torch light chu a han hmet de leh zeuh zeuh a, "Naupang te ka nih laiin ka nu leh pate lak atangin ka bo a, khawnge an awm pawh ka hre tawh lo." tiin a chhang a.

Iva-i chuan a khawngaih hmel hle mai, "I ngai thin ngawt ang tiraw?" a va ti a. Mahse Ramnghaka chuan, "Ka hmu vat dawn alawm." tiin a lo chhang mauh mai. Iva-i chuan, "Engtin maw?" a lo ti vat a. Ramnghaka chuan a machine, nichin lawka a paih tak kha va chhar lehin Iva-i chu ava hmuh a, "Hei hi ka siam ania, time machine tur a nih hi. Ka siam zawh veleh ka activate anga, ka nu leh pate ka hmu thei dawn a ni." a ti a.

Iva-i chuan mak a ti hle mai, "Wow, i machine chu ka lo en ve thei angem?" tiin a zawt a. Ramnghaka lah chuan beisei nei tih hriat tak hian, "Anih leh enge ka hlawh ve ang?" tiin a han zawt let vel a. Iva-i chuan, "Enge i duh a?" a lo ti vat a. Ramnghaka chuan a robot siam Charlie chu pangpar ken tirin Iva-i chu a va pek tir a, Iva-i chu a lo nui sang a.

A light on det leh zeuh zeuh pah chuan, "Indate ila.." ava ti vel a. Mahse Iva-i chu a tum ta hmuk mai, rose chu dawhkanah a dah a, lehkhabu chu a chhiar chhunzawm leh daih mai. Ramnghaka chu a zak angreng kher mai, a machine pawm chung chuan kawngka bul thutthlengah chuan a thu leh a.

Chutih lai chuan hmeichhe pakhat, sam var vek, kum 45-50 vel inkar niawm tak, hang lampang hi wheel chair-a chuang chung chuan a lo kal a. Ramnghaka'n a lo hmuh veleh chuan kawngka a lo hawn sak nghal a, mahse chunu chuan, "Nangmah hmu tur che a lo kal ka nih hi." a ti daih mai. Mak ti tak hian Ramnghaka chuan, "Kemah maw?" a lo ti hu mai a.

"Lo thu rawh, biak duhna che ka nei." a ti leh a, Ramnghaka pawh chu a thu ta a. Inhma tawn chuan an thu a, an hmaah chuan dawhkan a awm a. Ramnghaka chuan dawhkanah chuan a machine chu a dah a, "Thingpui i in duh angem?" a ti a. Chu nu a nui suk a, "Duh love, kan inzo chiah alawm." a lo ti a.

"Kan a? Tunen maw?"... chu nu chuan a chhang lo. "Umm, nihleh enge i sawi duh chu ni a? Sawi vat rawh, hna ka la ngah a nia." tiin a zawh chhunzawm leh nghal zat a. Chunu chuan machine chu a en vang vang a, "Lungngai suh, i siam zo vat dawn lawm." a lo ti a. "Tunge i nih a?" mak tih hmel tak chuan Ramnghaka chuan a zawt hu mai a.

Chu hmeichhe aw thum zet mai chuan, "Hun lo la awm tura nangmah ka ni." a ti ta mai a. Phawk hru a melh pah chuan, "Engmaw i sawi a?" a ti vak a. Chunu lah chuan, "Ka sawi kha, kan pahnih hian mi pakhat kan ni." a ti leh a. Ramnghaka chu a nui ta vak vak mai, "I fiamthu a thing emai." a lo tih khum hrep a.

Chunu chuan Ramnghaka screw driver chu lain a machine chu a han herhkual sak vak a, hrilhhai zet hian Ramnghaka chuan a lo en tlawk tlawk ringawt a. Machine siam pah chuan, "He time machine siam zo tur chuan kum 20 dang ila mamawh dawn, chumi ni ah chuan hun kal tawhah i kir leh anga, i nu leh pate chu i hmu thei ang. Keipawh hi hun kal tawh a ka lo let leh nachhan chu i thil tih lai mek ti tawp tura lo let ka ni.

Ramnghaka chu a nui uar sauh sauh a, "A tawk e, ka man thiam e. Khawnge an awm...khawnge cameraman?" tiin a nui huah huah a. "Enge i sawi awmzia?" tiin a lo zawt a. Ramnghaka chuan, "Prank a ni tiraw, youtube ami tur?" a han tih chuan thinrim hmel tak chuan chunu chuan machine chu a han herh vak a, chuveleh machine chu a vir ta chuai chuai mai.

 

Machine chhunga hour glass a dah pawh chu a chhung a vaivut te chu alet zawng chuan a inkhawh chho puat puat mai a, Ramnghaka chuan mak a ti kher mai. "Ehee...ihh..aw..awle a tha e, kum 20 ala ngai amaw? Anih chuan chumi hunah chuan kalin ka nu leh pate chu ka hmu ang..a tha e. Mahse thil theihloh anih hi...mipa ka ni a, nangchu hmeichhia i ni." a ti vin hlur tawh mai a.

Chunu chuan chhang lo chuan a kawrban a hlim a, a banah chuan Ramnghaka tattoo ang chiah, rinbial pathum chu a lo awm a. Bial pathumte chu a mal te te a kawh pah chuan, "Ka nu, ka pa, chuan Ramnghaka...mahse tunah chuan Partei ani tawh." a ti a. Ramnghaka chuan a tatto chu a han en ve a, alo in ang chiah chiah mai si.

*************

Kathy chuan a bag chu a han en vang vang a, a chhungah chuan pistol a awm reng tih pawh chiang takin a hria. A dahtu pawh a mah ngei a ni a, a hma lawkin pawhin bathroom ah a phawrh nghe nghe kha. Chutih lai chuan waiter pakhat a lo kal a, "Ka pi." a rawn ti thut mai chu Kathy phu nasa lutuk chu a zuang tho lo chauh a, a thin a phu nghal dup dup a. A bag chu a kuah nghal a, "Aw..aw...enge?" a ti bah nuai mai.

Waiter chuan, "Mi nghak mek i nei em ni?" tiin a zawt a, "Aih neilo.." tiin a lo chhang vat a. "Ka pi, darkar chanve lai i thu tawh a, engmah i chah dawnlo em ni?". Menu chu a han keu a, chocolate category ah chuan a mit chu a fu chat mai. Waiter chu en pahin, "DEATH BY CHOCOLATE." a ti zawi sap a.

(DEATH BY CHOCOLATE hi chocolate chikhat hming aw..)

**************

Restaurant Chocolate room pakhat ah chuan naupang kum 6 mi lek, Mary chuan dawr a nghak a. Nu pakhat chu counter ah chuan va kalin, "Ehe Mami, nangmah em ni dawr nghaktu..khawnge i nu?" tiin ava zawt a. "Anu chu a buai lutuk a, vawiin ah chef thar an la a, interview a neihpui mek a. Chuvang chuan dawr nghaktu ah ka tang hrih angai ta anih hi, tunah rih chuan ka thu ber." nui sen sen chung chuan Mary chuan chu nu chu a lo bia a.

Chunu chuan a lawm reuh kher mai, "Umm a nih chu...grilled sandwich ka lo duh ange." a ti a. "Cheng 180 man a ni e." fel thlap chuan a lo ti leh a. Chunu chuan mary chu cheng 500 tlang a pe a, Mary chuan a han en vang vang a. Chuveleh chu pawisa tlang chu pen hmang chuan a chhuntlang pawp a, pen chu a thai pehi leh vak a.

Mahse mak tak maiin chu pawisa chu a thler hauh lo, a pangngai ang chiahin a lo awm leh a. "Awiii...engtin nge i tih theih zawk?" mak ti tak chuan a zawt a. MAry chuan intithei tak hian, "Magic a nih kha.." ahan ti vel a. Chunu chuan kut bengin, "Awiii i van thiam em em." tiin a fak chiam mai a.

PAwisa kir pek pah chuan Mary chuan, "Khale...ihmaw ka pi, donation kan ti ve a, bawm kan dawh a. Chunu pawh chuan phal takin bawmah chuan cheng 100 chu a thlak a, Mary pawh a lawm hle mai. Mary chuan customer dang lo lut te ho pawh chu magic a lo show sak zel a, thiam an ti ngang mai.

Vawikhat chu customer pakhat hma a lehkha them, boruaka a lo tih kan vel lai tak chuan Palian em em mai, hmelchhe zet hi a lo lut a. Bakcheh rawn phawrh thutin Mary'n magic trick atana a hman, khawl la var sin zet mai, chu lehkhathem boruaka leng vel anga a siamna ber chu a rawn chep chat hmawk mai.

Lehkha them pawh chu a tla ta daih a, Mary chuan ava en a. Chu palian chu a nui suk a, "Blue berry Mojito pakhat aw.." a rawn ti khur khur a. Customer pawh chu a kal ta daih a, Mary chu a tap teuh kher mai. Chu pa chu a en a, "Tinge khatia i rawn tih kher a?" tiin zaidam tak leh hlauh hmel tak chuan a zawt a.

Chu palian chuan hnai takah a rawn en a, "Magic hi naupang infiamna tur a nilo, blue berry mojito...engzatman nge sawi vat rawh." ati leh ta khur khur mai. Hlau tak chung chuan Mary chuan, "Ihh..cheng 160 man." a ti tham tiak a. Chupa chuan pawisa chu a pe a, Mary chuan bawm chu hung hnaiin, "Ka pu, donate vela, khawngaihin.." a han ti chu chupa chuan a ngaihsak lo kher mai.

Kal a tum chiah chu Mary chuan, "Ka pu, i mojito hi.." a han ti dek dek chu vin zet hian, "Enge ka mojito chu? Nangman ka dawhkanah i rawn dah ang..i hrethiam em?" a ti hrep mai. Mary chuan inthlahrung tak hian, "Mahse self-service alawm kan dawr hi chu.." tiin hlau chung chung chuan a lo ti leh a. Chupa chuan rum zet hian a melh a, "Tunge ka nih i hria em? Johnny-a Mizorama thiam ber.." a tih lai chuan Mary chuan, "Engmaw i thiam ber?" a lo ti zauh mai.

Johnny-a chu a thinrim kher mai, a rawmawl a phawrh a, donation bawm chu a khuh a. "KHAI LE." a ti vak a, rawmawl a han la sawn leh chiah chu bawm chhunga pawisa zawng zawng chu a lo bo vek mai. Mary hlau bawk si chuan, "ANU.." a ti vak a, mahse Johnny-a chuan lo khap vatin, "Bengchheng reng reng suh...i au leh anih vaih chuan i ha zawng zawng kha ka phawi vek ang." tiin a vau leh ta khur khur mai.

Johnny-a kal tur chiah chu Mary chuan thinrim tak hian, "Magic chu i thiam a ni maithei, mahse a thiam ber chu i nilo tih hria ang che." a rawn ti let ve ta sak mai. Rum zet chuan a rawn hawilet a, "Engmaw i sawi a?" a han ti vin tuar a. "I thiam ber kher lo." a lo ti leh sak mai a. Johnny-a chuan ava pan hnai leh a, "Anih leh tunge thiam ber chu ni a?" tiin a va zawt a.

Mary chuan toys bawm pakhat rawn phawrh chhuakin, "He magic box min petu hi a thiam ber." a ti a. Thinrim tak chuan, "Khawnge chupa chu a awm?" a ti vin leh khur khur mai a. Mary chuan dawhkan pakhat a kawk a, "Tah sawn." a ti ringawt a. Chu dawhkan chu ava melh a, magician te khum ang chi lukhum parh sei tak mai chu dawhkanah chuan a lo awm a.

Johnny-a chuan ava pan hnai a, mahse lukhum neitu ber erawh bathroom ah a awm mek thung si. Chutia amah aia magic thiam an awm chu a ngaithei thak lo, a chang ta ran mai a. Chutih lai chuan putar tawh tak mai chu a lo kal a, Johnny-a bul lawkah chuan rawn thu in chhang a rawn ei tuam tuam a. Chu putar chuan achhang eite chu a kawr hmaah te chuan a titla nuai mai a, Johnny-a chuan ten hmel em em hian a lo melh a.

A hnu deuhah chuan waiter pakhat a lo kal a, sandwitch leh tomato sauce hi a rawn keng a. Dawhkana dah pah chuan, "Khale Sir, i order a lo thleng e." a ti a. En mang hleilo chuan Johnny-a chuan tomato sauce bur chu la in a han in ringawt a, a uak nghal tuar mai. Chil chhak pherh pherh pah chuan, "Mawla, enge i rawn ken hi?" tiin waiter chu a hau hrep mai a.

Inthlahrung tak hian waiter chuan, "I order...sandwich." a lo ti mai a. "Ka order te chu blue berry mojito zawk asin, i mawl em ni?" tiin a lo vin leh vak vak mai. Waiter chuan inthiamlo tak chuan, "Sorry Sir, wrong table." a ti a. Johnny-a thinrim laklawh si chuan, "In manager lo ko teh, ka be duh a ni." a ti vin leh khur khur a.

Minute 2 vel hnuah chuan Mary chu lo kalin mojito chu a rawn keng a, Johnny-a dawhkanah chuan a dah a. "Min ko em ni, ka pu?" a va ti a. Hmuhsit hmel zet hian Johnny-a chuan, "Tinge nangmah ilo kal a?" a lo ti a. Mary chuan rum zet hian a lo melh a, "Manager chu keimah ka ni." a ti mauh mai.

Johnny-a chu a han nui huk a, "Nangmah maw? Tinge school kal lova heta i awm mai mai a, naupang chimawm?" a ti deuh kher a. Chiang fek fawk hian, "VAwiin hi GOOD FRIDAY a ni a, school kan chawl." a lo ti let ve sak mai. Johnny-a chuan a bula putar bal angreng tak, chhang ei t(r)awp zet mai chu ava kawk a, "Sawpa saw tinge i luh tir phal zawk a?" tiin a zawt leh a.

Mary lah chuan, "ENge ilo buai vak a?" a lo ti leh khut mai. Thinrim tak hian, "Kutdawh a nih saw...a tenawm, chhuah tir rawh." a ti vak vak mai a. Mahse Mary chuan Johnny-a thusawi chu a zawm duh hauh lo, "A eiman a pe a, engmah tihsual a neilo. Buaina i nei a nih chuan nangmah zawk kha chhuak mai rawh." a lo ti let hrep mai.

Johnny-a thinrim lutuk chu a sa pup pup tawh mai, a bula tomato sauce chu a han ti tlu lui a, dawhkanah chuan a kai pherh luai mai. A han nui suk a, "Naupang chimawm, tifai rawh le.." a han ti vel a. Mary chuan ngawi rengin a hrufai a, kal leh mai a tum chu Johnnya bawk chuan, "Hey...ala failo." a ti a. Mary chu a va hawiphei a, dawhkanah chuan a hma ang chiah chuan sauce chu a lo kai leh a. Tomato sauce bur chu a la a, a hrufai a. Kal leh mai a tum chu Johnny-a bawk chuan a ko leh a, "Ala fai lo." a ti leh a.

Tomato sauce chu a lo kai leh a, mak a ti kher mai. Vawi 10 vel dawn lai chu Johnny-a chuan a ko let a, atawpah chuan MAry ngaihdan a ni ta lo. Tap tuau chung chuan, "Mi phakar tak i ni, ka tifai tawh lovang." tiin kalsawn a tum a. Mahse nghet zet hian Johnny-a chuan a banah a lo man a, "Tikhan magician thiam ber leh ropui ber ka nihzia chu i hre tawh em?" a ti khur khur mai a.

Mahse MAry chuan ala pawm duh chuang hauh lo, tap chung chuan, "I nilo, magician te chuan naupang an tihlim thin, sawpa ang sawn.." tih pah chuan abula dawhkana magician lukhum chu ava kawk leh a. "Nang chuan min tihthaih a, min ti hlim ve lo. Magician pawh inilo, misual i nih kha.." tih pah chuan a kalsan daih mai.

Johnny-a chuan chu magician chu hmuh a chak takzet mai a, mahse chu magician erawh chu bathroom ah chuan ala awm reng mai si. Bathroom lam chu ava pan a, kawngka chu a va kik dat dat a, bathroom ami chuan, "Enge ni?" a lo ti thum bul bul mai. Johnny-a chuan, "Engtia rei nge awm i tum a?" a ti vin deuh hlak a. Chupa chuan, "Minute 10 aw..." a rawn ti sam et mai.

"Minute 10 a? Enge i tih em em a?"

"Petrol chhia ka paih chhuak.."

"Engmaw i tih a?"

"Mawla, engvak nge tise min tih a?"

(Vin zet hian..)

"Lo chhuak vat la nimai, bathroom ka hmang ve duh alawm."

"Lo lut ve tawp mai la.."

"Enga? I mawl em ni? Lo chhuak teh, thil sawipui duh che ka nei ania."

"Tikhan sawi mai la.."

"Aih, lo chhuak phawt rawh."

"Awle, minute 15 chiah minlo nghak leh rawh."

"Minute 15 a? Minute 10 i tih kha...min fiam kual mai mai em ni?"

Chutih lai chuan bathroom kawngkhar mawnglam a tawng chuan kut pahnih hi arawn lawr thut mai a, chu kut chuan palying card tam deuh hi a rawn lek chhuak tel bawk a. "Card i duh ber pakhat hi la chhuak rawh." a ti a. Johnny-a chu a han hawi kual zeuh zeuh a, card chu pakhat a la chhuak a.

Chu a card thlan chhuah chu Toka 2 a ni a, "Dah let leh rawh." a rawn ti leh a. Johnny-a pawh chuan a dah let ve mai a, chupa chuan card chu a han shuffle vak vak a. Tichuan Johnny-a card ngei mai, Toka 2 chu a rawn thlang chhuak nalh mai a. Mahse Johnny-a erawhin a ngaisang teh chiamlo hle mai, card chu lak pahin a han nu vur vur a.

"Awl lutuk, he card hi a letling zawngin i dah bik a, chuzawng chu nimai." a lo ti vel a. Chu kut bawk chuan tissue paper hi a rawn pahwrh a, a nuai vak vak a, a han ti pharh leh chu cheng 500 tlang a lo ni daih mai. Johnny-a chuan nui chungin chu cheng 500 tlang chu a lo la a, a nuai vak vak a, tissue paper ah bawk chuan a chang leh a.

"Kha le...thiam nei thing lutuk." tih pah chuan a pe let a. Chu kut chuan paper chu a hal a, ball ah a rawn chang daih mai. Ball chu lak pahin Johnny-a chu a nui huah huah a, "I hal zawk kha tissue paper nilovin flash wool zawk a ni, huiham...thiamlo emai, nang JOKER mai mai kha..ka hun i khawhral mai mai a ni." tih pah chuan a tho a.

"Kha hmeichhe naupang kha chu i bum a ni maithei e, mahse kei magician turu tak hi chu min bum lul lovang. Nang ang kawngkam magician mai mai khan ka hun i khawral a, saw naupang lah sawn a thiam ber a ti lehnghal che si a, nep dun lutuk. Ka thiam ber, ka tha ber..ve mai mai a che." tih pah chuan kalsan a tum a.

Bathroom a mi chuan, "Lawk aw...last trick chiah.." a rawn ti leh hram a. Johnny-a chuan vin zet hian, "Kal mai teh." a lo ti hlur a. Chupa chuan, "He ka magic hnuhnung ber hi i hrechhuak thei a nih chuan i thiam ber angah ka ngai ang." a tih takah chuan Johnny-a pawh chu a ding chat mai. "A tha e, han show leh la." a ti vel ham ham a. "Bathroom chhunga i rawn luh a ngai ang." tih pah chuan batroom chu a rawn inhawng a.

Bathroom chhungah chuan Johnny-a chu a lut a, mahse tumah an lo awm lo. Bathroom chhung chu zimte mai hi a ni a, mihring 4 pawh an lenglo ang tih tur khawpa zim a ni. A han hawi kual a, inchung lam te chu a melh kual a, mahse tumah a hmu silo. Chuveleh kawngka chu na tak mai hian a rawn inkhar thuai mai a, a inkalh nghal hmak bawk.

*****************

Kathy phone alarm chu a rawn ri ral ral a, phone a han en chu tlai dar 5:30 chiah chiah a lo ri a. A alarm ah chuan "DAMDAWI EI A HUN E." tih a lo inzia a, alarm chu a off mai a. A bag chhunga damdawi chu a han la a, a chhin chu a hawng a. Mahse a inngaihtuah deuh vang vang phawt a, a nui suk a.

Damdawi bur chu a chhin leh a, a en vang vang a. A tho thut a, bawlhhlawh bawm ah a paih ta daih mai.

****************

Locker room ah chuan restaurant waitress pakhat, tattoo nalh tak mai nei, kum 24 mi, sam nalh taka phiar, hmel chhe lemlo leh ngo dan pawh tawk chiah Emily chu hmanhmawh takin a lut a. Ama locker bik, Iron Maiden poster intarna ngei mai chu a han hawng thuai a, a chhunga bag chu ala chhuak a.

Bag chhungah chuan a thlawh veng vengna tur number 4 (drugs) chu syringe nen chuan a la chhuak hlawm a, syringe te chu bag pengah chuan a dah khawm a. Damdawi dip var tha em em maite chu lehkhabu pakhatah chuan a bun chhuak a, tichuan a purse ami a ATM card chu a la chhuak leh a. Card hmang chuan damdawi dip chu a han thai khawm vel a, chutah a hnar chu a han tuai deuh nawk nawk a, damdawi chu a hnar kawchhungah chuan a hip lut vek mai.

Chutih lai chuan a phone a rawn ri a, a bialpa Muanawma alo ni a. Phone pick-up pah chuan, "Hello, duat.." a han thluk kual deuh raih mai a. Mahse Muanawma erawh a aw atang chuan a serious hmel angreng hle mai, "Plan kha ka thlak danglam ania, zaninah zawk." a rawn ti thum deuh bul bul mai a.

"Maw? Tinge?" Emily chuan a lo zawt vat a, "Duat, investor kha tunah in restaurant lam pan khan a lo kal mek, alo thleng tep tawh ang." tiin a lo chhang a. A phur teh chiamlo kher mai, "Ava han ni deuh teh thut awm ve..." lungawi chiah lo chuan a han per deuh tarh tarh a. Muanawma chuan vin lek lek hian, "Hei bak chance kan nei lo, i ngamlo anih chuan sawi tha rawh." a rawn ti deuh khur khur a.

Emily chu a han maimitchhing vang vang a, damdawi chu a thluakah chuan a han thawn chho leh hrawk hlawm a, a hnar a tuai leh vut vut a. "I ngam nge ngam lo?" Muanawma lah chuan a rawn ti sek tawh mai, mahse Emily chu ala ngawi reng a. Second 10 vel hnuah chuan a rawn meng kawk a, "TI CHIAH ILA.." tih pah chuan phone a dah a, locker room chu a chhuahsan ta a.

 

Emily thawhna mek hi restaurant ah pawh coffee counter lam niin Chocolate room bul chiah a ni a, menu pawh cold drinks leh hot drinks vel chauh a awm a ni. Coffee Machine ah chuan no chu a dah a, coffe chu a rawn inthli ri karh karh a. An counter hnung lama basement chhukthlakna chu a han melh zeuh a, tichuan tray chu la in coffee chu a dah a.

Confi zet chuan chu nula, a hmel en reng reng pawh a fel lemlo tih hriat tak, hmeltha vur si chu a nalh thei ang berin ava cat walk titih phei ta a. A kal pah chuan CCTV lam chu ava melh zeuh bawk a, chutah a confi mah mah vang nge ni, a tlusual thelh a. A hnar chu a han tuai leh deuh nawk nawk a, customer chu coffee a pe a.

A let leh lam chu an restaurant a chhuat nawttu, hman atanga lo thawk tawh Pu Rama chuan a sualna zawng zawngte hre vek niawm fahran chuan Emily chu a lo melh run mai. Emily pawh chuan a lo melh let ve a, a ngaih atha teh chiamlo kher mai. Emily thawhna restaurant counter hi Open-Air a ni a, customer te thutna erawh inchhung lam a ni thung.

 

Customer thar lo lut pakhat a awm a, Emily chuan MENU va pek a tum chu an counter bula thingkung mawi em em mai, restaurant cheimawitu atana an dah chu ava su palh a. Chu thingkung chu a lo rei tawh vang leh a lo mawih ve deuh tawh avang chuan thing kawr chu patling kutphah tiat vel lawih mai a tray hmang chuan a su tla hlawk mai a.

Emily chuan tray chu chhar leh mai a han tum a, mahse chu thing hek huam karah chuan rangkachak chain sinte hi a lo lawr vung mai. Emily chu a hawi kual a, chain chu a pawt vak a. MAhse a tang tlat mai, enge a nih hriat a chak tlat pek a, thing kawr chu a hik zau zel a. A tawpah chuan a pawtchhuak thei ta a, a rinloh lutuk maiin thi(necklace) a lo ni hlauh mai.

Chu thi chu a nalh em em mai lehnghal a, a chain chu rangkachak rawng niin a locket chu LOVE sign a ni a, lunghlu a ang em em a, a sen lar vet mai bawk si a. Emily chuan locker room ah chuan a luhpui nghal a, a hru fai a, a han awrh chhin vel a. Darthlalangah chuan a in en a, inhmeh a inti kher mai. A phone a phawrh a, a in selfie pui nghe nghe.

 

Pawn lamah chuan Muanawma chuan car chhungah thu in chanchin a lo ngaichang reng a, a hmanhmawh tawh kher mai. A phone arawn ri zeuh a, phur takin a hawng nghal. Mahse a rinloh takin Emily chuan chu a thi chhar a awrh lai thlalak a rawn thawn daih mai, Muanawma chu a thinrim kher mai.

Chutih lai chuan car bulah chuan mipa pakhat a lo kal a, paper bag a rawn pe a. Paper bag chu Muanawma chuan a han hawng a, a chhungah chuan pistol a lo awm a. Pistol chu a dahtha vat a, chupa chu pawisa a pe a, a kalsan ve leh mai a. A phone a phawrh a, Emily chu a call nghal a. "Hello duat, thlalak kha ilo hmu em, ka nalh em?" Emily chuan ala rawn ti zui.

"Vin deuh tak hian, "I nalh khawp mai....enge ila tih reng a? Mawl viau suh, tun bak hi chance kan nei tawh lovang." tih pah chuan a motor horn chu a hmet t(r)e tuar a, phone chu a dah nghal hmak bawk a. Lungawilo tak chuan EMily chu a chhuak a, a hna chu a thawk leh tan ta a. Chutih lai chuan Pu Rama chuan mitkhap miahlo hian a lo en leh reng mai, a thi awrh lai chu a en ngun zual bik lehnghal a.

Emily chuan a thi chu a kawr chhungah a thukru nghal vat a, chutih lai chuan customer pakhat chuan, "Thiannu, engzat tur nge?" a rawn ti lauh mai a. Bill chu siam sawk sawkin ava pe a, pawisa vel an inpek fel hnu chuan customer te chu an chhuak ta a. Chuveleh putar smart tak mai, kum 60-65 inkar vel sam tuak var vek mai hi a rawn lut a, Emily dawhkan hrukfai mek ah chu a rawn kil chat mai.

Emily chuan inla polite fahran hian, "Ka pu, sawlai dawhkan pawh saw a awl tho asin." a han ti vel luam a, mahse chu putar chuan, "He table hi ka duh alawm." a lo ti tlat mai. Emily pawh chuan thildang a zawt tawh lemlo, dawhkan chu a hrufai leh mial mial a. "Vawi engzat nge ngaihdam ka dil dawn che, i thinrim hma thei si, engtia rei nge tihtauh i tum a?" tiin putar chu a rawn tawng chhuak thut mai.

 

A tir chuan Emily chuan mak a ti kher mai, mahse chu putar beng dinglama blue-tooth earphone invuah mek a hmuh takah chuan midang nen an inbia a ni tih a hrethiam lehnghal vat a. Kalsawn a tum chiah chu putar chuan lo ko dingin, "Mami, cold-coffee no 2 aw, cream telin.." a ti a, Emily chuan a lu a bu nghauh a, a kalsan ta a.

A phone a rawn ri a, Muanawma a lo ni. A pick up vat a, "Tihpalh aw duat, nichin khan ka ti thinrim che a. Nakinah thil tha deuh ka lei ang che, chuan zanin ah ka roomah ilo riak dawnnia." tiin a rawn thlem a, mahse a chhanglo. Muanawma bawk chuan, "Investor chu a lo kal tawh em?" tiin a rawn zawt leh a.

"Kal lo, ihh..min man lovang tiraw?" hlauthawng ru tak chuan a ti a, "Teuhlo mai, ka sawi ang thlapin awm la..chhuak rawh ka tih hma chu basement chhungah khan i awm char char dawnnia. I hnungah ka awm, lo hawi teh.." a ti a. Emily chuan hnunglam tukverh chu a hawi a, tukverh bulah chuan Muanawma chuan a lo nuih sang a.

"Kan hlawhtling ngei ang." Emily chuan a nuihlet a, Muanawma chuan kalsawn pah hian, "Awle, investor lo thlen veleh min hrilh dawnnia." tiin phone chu a dah ta a. Emily chu a kai deuh mah mah ni ngei tur a ni, "Saw putar thil chah kha enge kha awwww?" a ti nuah nuah a. "Cold Coffee no 2, cream telin..." a bula ngawi renga lo ding Pu Rama chu a rawn tawngchhuak thut mai.

"Engtin nge ilo hriat ve ngawt a?" tiin a lo zawt vat a. Pu Rama chuan zawi sap hian, "Saw dawhkanah kher sawn a rawn thu ziah a, a thil order pawh a ngai reng, kum 12 liam ta atang khan nitin deuhthaw lo kalin tiang sawn a rawn awm ziah." tiin a lo chhang a. Hrethiamlo tak chuan chu putar chu ava melh leh a, "I titau rei emai, bawihte.." tiin chu putar lah chuan a hmaa thu awm ve niawm tak chuan boruak chu a lo la be mial mial a.

Ngaihthat lohna em em nei chuanglo chuan EMily chuan no pahnih ala a, coffee chu thlir a tum a. MAhse Pu Rama chuan, "No 2 khan thlit angai lo, no khat kha thli la, no pakhat zawk kha chu a ruakin va pe rawh." a lo ti leh a. "Engvangin maw?" a lo ti leh hu mai. Emily chu a rawn melh hrawk a, "I rawn thawh atangin kar khat a liam tawh a, ilo chik ve ngai miahlo em ni? No hnih a order ziah a, mahse no khat chiah a in a, no pakhat zawk chu a in ngailo." tih pah chuan a kalsan daih mai.

Pu Rama sawi ang chuan EMily chuan no pakhat zawk chu a ruakin a keng phei a, tichuan putar chu ava pe ta a. Chu putar chuan a biak mek, tunge anih pawh hriatloh leh hmuh theih bawk siloh chu a lo la be reng a, "Tinge a? Min fiam kual mai mai em ni?" a lo la ti nuah nuah mai. EMily kal leh tur chiah chu, "Mami, chini ka van duh ve.." a lo ti leh a.

Emily chuan suger free pack hnih ava la a, "Khami no ah khan.." tiin no ruak zawk chu a lo kawk a. Mak ti rilru angreng tak chung chuan EMily chuan no ruakah chuan chini chu a han chhunglut ve mai bawk a, chu putar mizia chu mak a ti kher mai. Putar chuan a wallet a phawrh a, wallet-a thlalak chu enin, "I hmelthat zia te hi i hria em?" tih pah chuan Emily chu ava hmuh tir ve a.

"Mami, a hmeltha tiraw?" a han ti ringawt a. Emily pawh chuan hawihhawm takin, "Um...a hmeltha lutuk." a lo ti ve mai a. "I kum ang rual vel a nih laia a thlalak a nih hi, khatih hunlai khan helai hmunah hian kan cheng thin a." a ti ta mai a. "Hetah hian maw?" alo ti hu mai. "Ni e, midangte tan chuan helai hmun hi coffee shop satliah mai mai pawh a ni mahna, mahse ka tan chuan chenna in, ka in a ni." a ti leh a.

Emily chuan mak a ti kher mai, "Saw saw kan study room a ni thin a.." tih pah chuan an bul lawka chocolate room chu ava kawk a, counter ah chuan restaurant neitunu fanu Mary chu mood off hmel takin a lo thu ngui bar mai. "A zaithiam lutuk bawk, tah sawn music zirin hla te kan sa dun thin." tih pah chuan restaurant-a a hmunpui ber chu ava kawk a, chutah chuan customer tam tak an lo awm a, an zingah chuan Sangtei leh a bialnu Dr Josephine-i leh Sangtei nu leh pate an lo thu ve bawk a.

"Saw lai deuhah sawn inches 17 laia sei TV kan nei thin bawk a, a hunlai kha chuan kan TV kha Mizoramah chuan a changkang ber ang." tih pah chuan library lam ava kawk leh a, chutah chuan sap nula Iva-i chuan lehkhabu a lo chhiar mek bawk. Hrethiamlo tak chuan Emily chuan, "Nihleh he dawhkan hi.." a tih lai chuan rangzet hian, "Hei hi chu kan pahniha kan thutna bik a ni thin a, nitin kan thudun a, kan inkawm thin. Tun ang hunah chiah hian coffee kan indun thin a, kan hlim thei lutuk." a lo ti leh zung zung a.

"Aaa..anih chu.." a ti bah nuai a, coffee no ruak chu dawhkanah chuan a dah a. Kalsawn a tum chiah chu putar bawk chuan, "Amah hi pe rawh." tih pah chuan a hmazawn chu a kawk a. Chutah le, putar hma zawnah chuan pitar pakhat, sam thur vek leh hmel dang vek, mitmu var pup mai chu a lo thu reng mai. Emily lam chu a rawn hawi a, Emily phu nasa lutuk leh hlau lutuk chu a hmui a hup a, a tawlh hnung dawr mai.

*************

Kathy dawhkanah chuan DEATH BY CHOCOLATE chu waiter chuan a rawn dah a, "Thildang chah duh ila nei em?" tiin a zawt a. "Neilo, bill i rawn lak pahin bati lo la tel rawh aw, khawngaihin." a lo ti a. "Thil special deuh a awm em ni?" tiin waiter chuan a zawt a.

Kathy chuan a melh ngai melh reng pah chuan, "VAwiin hi ka birthday a nia." a lo ti zawi leh sap a. "Ehe, Happy Birthday ka pi..hmanpui turte i nei em?" tiin a zawt leh a. "Nei e, ka nu leh pa leh reilote hnu a ka kawppui ni mai tur nen." tiin a lo chhang leh a.

*****************

"Ahma a i sawi char char kha..henu hi maw ni a?" hrilhhai tak chuan Sangtei pa chu a hawi hu ringawt mai. Josephine-i ber lah chuan, "A nih chiah dawn chu." a lo la ti ham ham zui. Sangtei pa bawk chuan, "Joseph-a i ti sia..." a han ti dek dek chu Sangtei leh Josephine-i te pahnih chuan, "JOSEPHINE.." an lo ti rual a.

"Hmeichhia maw?" Sangtei nu pawh chuan mak a ti kher mai, chutah Josephine-i chuan, "Ni e, hmeichhia ka ni. A la sarhu em a, mak inla ti mai mai a nih kha. Engpawh nise, eitur ka han order ve ange." tih pah chuan thawveng zet hian waiter chu a au vel a. Chutah Josephine chuan Sangtei chu chilli chicken a chah sak ta mai a, an fau, vegetarian anga an lo ngaih ve char char chu Sangtei nu leh pate chuan an en hu ringawt mai.

 

"Arsa...arsa maw?" Sangtei nu chuan a hmui a hup tawp, inthlahrung tak hian, "Nu..ihh.." Sangtei'n a lo tih lai chuan Josephine-i bawk chuan, "Nitin a ei kherlo, zirtawpni ah chauh a ei thin." a lo ti leh zung zung a. Sangtei pa chuan, "Sa hrim hrim kha i ten vek amaw tia..." a lo ti ve hu mai bawk a.

Sangtei nu pawh chuan mak ti tak hian, "Zirtawpni kher maw? Tinge?" tiin a zawt leh a. Josephine-i bawk chuan, "Ka pi, zirtawpni te chu free night ania, party zan ber alawm. No 2-3 vel kan in a, eng sa nge kan ei pawh kan hre tawh thinlo.." ala ti zui a, Sangtei chuan a sik vak vak ringawt a.

Sangtei nu mak ti lutuk chu a tap tep tawh hial a, "Nangni pahnih hi....in pahnih hian...in pahnih hian.." a ti vak vak ringawt a. Chutah chiang fek fawk hian Sangtei chuan, "Kan inhmangaih a ni, ka nu." a rawn ti ta. Sangtei nu chuan tui a han in khawlh khawlh a, Sangtei leh Josephine-i te chuan an lo en reng ringawt.

"Engtin nge in intawn theih reng reng a?" Sangtei nu chu a vin lek lek tawh a, Josephine-i lah chuan, "Ilo la hrilh nange? Keiman ka'n sawi mai ange aw...Sangtei hi ka clinic ah a rawn in entir a, chu chu kan vawikhat intawnna a ni. Jeans pawl dal deuh lam tawh hi a rawn ha a, t-shir var a ha bawk a. A sam a tawn fel thlap a, make-up a hmang tlem hle bawk. Ka clinic chhunga a lo luh khan a nervous em em a, ka hmuh tirh atang khan ka vei bur a ni mai. Restaurant a kalpuiah ka sawm a, a lo duh ve mai bawk a." a han ti ta zuah zuah mai a.

 

Mak ti em em hian Sangtei nu leh pate chuan an lo ngaithla ringawt mai a, sawi tur pawh an hrelo. Josephine-i lah chuan Sangtei chu enin, "Khami ni khan hetah tho hian tiraw kan chawlh khah?" ala ti ta deuh deuh a, Sangtei chuan phur fahran lo hian, "Aw.." tiin a lo nui lui suk a.

Sangtei nu leh pate chu an ngawi dun vang vang a, "Chuan engtin zel?" Sangtei nu chuan a han ti leh ringawt a. Josephine chu a nui sang a, "Enge ka sawi lai khah...e ni tak e. Beer tlem kan in a, tichuan kan inah ka hruai haw a, zankhua in kan awmdun a. Khami zan kha chu zan special tak a ni, tunah chuan a tello chuan ka awm thei tawhlo a ni ber mai." ala ti ta deuh deuh a.

Sangtei nu tawng leh hma chuan Josephine-i bawk chuan, "E chuan, khami hnu khan kan inngaizawng ta a, tichuan flat khatah kan awmdun ta a.." a ti leh a. "In awmdun amaw, in khatah maw? Inneih hma lehnghalin maw?" Sangtei nu chuan a ti vin hlur tawh mai a. "Chuti chu kan inneih i phal tihna em ni?" Josephine-i chuan a lo ti leh zauh pek a.

**************

Kathy dawhkan hmaa cake ah chuan waiter chuan bati chu a rawn chhawp a, bati hal alh pah chuan, "Ka pi, midang ho chu i lo nghak dawnlo em ni?" tiin a zawt a.

Mahse Kathy chuan a lu a thing ringawt a, a tawngchhuak lo. A rilru chuan a inbe mawlh mawlh a, "Lo nghak turin huaisenna engmah ka nei lo, vawiin hian ka thi ngei dawn e." a ti a.

**************

Chawhmeh chu Sawmtea chuan a chan mawlh mawlh lai chuan auarium chhung atang chuan Nelson-a chuan, "Hey..hangdumlian, a fairlo emai aw...thil diklo tak a nih hi, ka chhan che a, mahse min thah i tum leh sia, i sual kher mai. Eisiam dan kha hrilh lo che ila chu tunah chuan kawngsirah kut i dawh mek tawh ang, i thiltih man hi i hmu khawp ang, Pathianin a hrem ngei ngei ang che." tiin a hau mawlh mawlh a.

Sawmtea erawh chuan a ngaihsak lo kher mai, youtube a eisiam dan video en pah chuan chawhmeh chu a chan mawlh mawlh a. Chutah aw ring zet hian, "Hey...a bengchheng. Darkar 10 em pawh ka la muhil lo, enge i tawng vak vak kher a?" a rawn ti thut mai. Sawmtea chuan Nelson-a aw a nilo tih chu a hre reng a, mahse tunge rawn tawng a hre silo.

 

A hawi kual vak vak a, chu aw lah chuan, "Tui min pe teh u, ka tui in a hal ania." a la ti vak vak zui. Nelson-a chuan thinrim zet hian chu aw chu lo hnialin, "Lo tawng suh, nang ve kha...mut leh tui in bak tihtur i neilo." tiin a lo vin hrep mai. Chu aw chuan a aia vin hian, "I lo va inla pa tawh ve a, sanghate..." a lo ti let ve leh a.

"Mipa diktak ka nih hi, nang anga mawl ka nilo." tiin a lo chhang let ve leh sak a. Sawmtea chuan mak ti tak hian, "Tunge rawn tawng chu?" a ti hu mai. Chutah Nelson-a chuan zawi sap hian, "Thlarau anih chu..." a ti ta mai a. Sawmtea chu a thlan nghal bawrh bawrh mai, "Thla..thlahrang a?" a ti nghal hluam hluam a.

"Aw ni e, helai hmunah hian eisiamtu pakhat chu a lo inthat tawh a. Amah rawn thlak tumtu apiangte chu a lo that veleh thin a ni...a thlarau hian helai hmun hi ala chhuahsan lo." a han ti leh a, Sawmtea chuan a hlau kher mai. Chutah chu aw bawk chu lo tawng chhuak lehin, "A ninawm, hetah tui hal em emin ka awm a, nang lah chuan thlahrang thawnthu i lo sawi mai mai a." a rawn ti leh khur khur a.

Nelson-a chuan zawite hian, "Hey, lo bengchheng suh...tihthaih ka tum mek a ni hi." a lo ti su su a. Chu aw lah chuan hmuhsit hmel tak hian, "Tunge hepa hi? Mi thar em ni?" a lo ti vel a. Sawmtea chuan a lu a dawm vang vang a, "Tunge tawng kha.." a han ti vin hlur a. Nelson-a chuan nui chung hian, "I hnunga mi kha mawle." a lo ti a.

Sawmtea chuan hnunglam a han hawi chiah chu chhuar chung bera Bonsai Tree (thingkung te, pot-a an khawi thin) a lo ni reng mai a, "Hei hi maw?" a ti hu ringawt mai. Chu aw neitu chu mihring nilovin thingkung zawk a lo ni reng mai, "Ehe, i sawi ang apiangin ala awm zui." a lo la ti zui a.

Nelson-a chuan, "Han tir ve chhin teh, i thu a awih leh awihloh chu i hre mai ang." a lo ti vin hlur a. Bonsai Tree chu a nui vak vak a, "Hey Mama, lo kal teh, ka hnung hi han hiat teh." a han ti vel a. Sawmtea chu a ka hau mai, "I hnung maw?" a ti leh hu mai a. Bonsai Tree chuan vin zet hian, "Enge, mak i va ti awm ve? Hnung kan nei ve lo angah i ngai em ni?" a lo ti vin hlur mai.

 

Sawmtea chuan chemte a la a, thingkung chu a va hawlh a. "Anuam lutuk...aw khalai kha.." te a lo ti vel ham ham a. Chu Bonsai Tree bawk chuan, "Ka mutthilh hlan khan hepa nen hian inlo inbe char char em ni? Engtin nge kan tawng hi a hriat ve theih zawk a?" a han ti leh a. Nelson-a chuan, "Mi zawng zawng chuan an hre theilo, he mimawl chauh hian a hre thei." a lo ti hmuk a.

"Engpawh chu nise kan privacy kan hloh chu a ni der mai, heng mihring suaksual ho hian kan tawng ri te hi hrelo tawp mahse a pawilo asin mawle." a ti nuah nuah a. Nelson-a pawh chuan alo pawm pui ngang mai, "Ni chiah e, vawiin chu ni nuam tak zawng a nilo chiang kher mai." a lo ti ve bawk a.

"Mahse hepa hi ka enge maw duh riau tlat mai." Bonsai Tree chuan a ti leh a. Nelson-a chuan thinrim zet hian, "Mai mai ache, hei tunah pawh min thah a tum mek a nih hi." a lo ti a. "Chuti chu ka ngaina lehzual sawt mai." tih pah chuan a nui a. Nelson-a chu a lung nilo kher mai, "Hey Tommy, ka thihna tur hi fiamthu thawh nan i hmang amaw?" tiin a tap lek lek a.

****************

Bill chu waiter chuan Kathy chu a hmuhtir a, Kathy chuan a en a. PAwisa chu pek pahin cheng 2000 lai mai chu tip atan a pe tel bawk a, waiter chuan mak a ti kher mai. "Ehe...ka pi, ava tam em em ve.." phawk hru chuan a ti a, Kathy chuan zawi sap hian, "Nei vek rawh." a lo ti mai a. "Ka lawm e." tiin lawm takin pawisa chu waiter chuan a la a, a kalsan ta a.

Cake chunga bati inchhi chu Kathy chuan a en vang vang a, a nui sak a, "Happy Birthday to me...tun atang chuan zu ka in tawh lo anga, damdawi pawh ka ti tawh lovang a, hlauhna tur engmah a awm tawh lovang." a ti a, a mittui chu a tla zawih zawih bawk a.

************

Hlau leh khur zawih zawih chuan Emily chu a ding ngawi reng a, a mitsir chuan putar chu ava melh a. Chu putar lah chuan boruak bawk chu alo la be char char mai a, chuveleh a phone a rawn ri thut a. A phu nasa kher mai, phone a han en chu a bialpa Muanawma a lo ni a. Phone chu a lak rual rual chuan, "Alo kal tawh em?" Muanawma chuan a rawn ti nghal vat a.

Emily chuan a chhang mai lo, "EMILY...investor chu a lo kal tawh em?" a ti vin leh tuar mai. Emily chu a han hawikual a, anmahni opposite counter a Pu Zothana lo thu chu ava hmu a. "Aw, a lo thleng tawh e." a ti a. Muanawma chuan phur zet hian, "Alo thleng tawh maw? Khawi dawhkanah nge a thut?" a rawn ti nghal chel chul mai a.

"Counter B, table number 7." a ti leh a, Muanawma chuan, "A tha e." tih pah chuan phone chu a dah nghal a. Emily ngaih chu a tha thei thlawt lo, Pu Rama chhuat lo nawt mek chu ava pan hnai a. Khur dar dar hian, "Pu Ram, saw..saw mi table ah sawn, putar bulah sawn midang thu ve angin i hmu em?" ava ti ringawt mai a.

Pu Rama chuan ava en a, chu putar lah chuan, "He sana min pek lai kha ila hria em? Thilpek min pek hmasak ber kha a nih hi." tih pah chuan sana chu lek kangin boruak chu a lo la be mial mial mai. Pu Rama chuan, "Hmulo." tih ringawt chuan a lo chhang leh a, Emily chuan a hlau takzet tawh a ni.

A lu a dawm vawng vawng a, "Huiham...ka damdawi tih vang mai mai a ni." a ti rilru nuah nuah a. Coffee machine ah chuan coffee a lo awm tawh lo a, coffee beans thun tur chuan a bawm chu a han ban a. Coffee bawm a hawng chiah chu a chhungah chuan mihring mitmu pahnih a lo awm reng mai, a hlau lutuk chuan a thlauh a, coffee beans te chu a tla darh nuai mai.

Emily chu a pangngai thei tawh lo, locker room lam chu a pan a. Tichuan a locker chu hawngin damdawi a la chhuak a, a kut chu mar takin rawmawlin a tawn a. A kut chu a han beng thak thak a, syringe chu a han phum lut hrawk a. A nuam leh ta chiai chiai mai, a nui suk a.

Damdawi te chu locker chhungah chuan a dah a, chutih lai chuan locker chhung atang chuan kut var vek hian Emily chu a rawn rek thut mai. Emily chu a phu nasa kher mai, rang takin locker room chu a chhuahsan nghal a. Thaw hlawp hlawp in a dutyna bula dawhkan phenah chuan a thu a, a khur zawih zawih mai.

A phone phawrhin Muanawma a call nghal a, "Aw enge ni ta?" Muanawma chuan a lo ti vat a. Thaw hlawp hlawp hian, "Mi...mi tu emawni an awm?" a ti hluam hluam a. Muanawma lah chuan a hrethiam silo, "Tumaw? Police maw?" a ti hu mai. "Nilo duat, min awih lo maithei hial a ni. Helai hmun hi a hrang a ni ngei ang, eng thlarau emawni tak chu a awm a ni." tiin a tap lek lek tawh a,

Thinrim tak hian, "I va kai awm ve a.." Muanawma chuan a lo ti vin khur khur a. Emily chuan, "Nia, ka kai lutuk. Mahse ka kai vang anilo, ka hmu tak tak." a ti leh a. "Thil atthlak deuh deuh rawn sawi tawh suh, i thil tih tur kha hre chiang rawh." a rawn ti vin leh vak mai a. Tap tep hian, "Tinge min awih loh?" tiin a mangang lutuk chu a maimitchhing tawp.

Muanawma chuan, "Enteh duat, cheng nuai 5 lai anih kha awww..kan hma hun atan vek ani. Ka buaina te hi kha pawisa khan a ti bo vek dawn, hre reng rawh. Kan plan kha ka sawi leh ang, lo ngaithla chiang rawh. Basement ah i kal anga, main power i off ang. Second 40 chhung tal i off tur a ni, tichuan kei chu Night Vision glass vuahin ka rawn lut ang. Bag lak ruk nan khan second 20 tal ka mamawh anga, 30 hnuah pawn ka chhuak fel hman bawk ang. Chuvang chuan a lo berah second 40 tal chu power kha off reng ang che, ka rawn call hma che chu basement ah khan awm char char ang che." a ti a.

Emily pawh chu a han dak chhuak a, "Umm a tha e. Min tiam tawh ang khan tumah tina suh ang che, pawisa chauh kha la ang che." a ti a. Muanawma chu a han nui var var a, silai chu a han lek kang a, "Um tehreng mai, ka tiam a che." tih pah chuan phone chu a dah a. Silai chu a han en vang vang a, "Tak tak ana, ka hrelo le." tih pah chuan meizial chu a zu khu hluah hluah a.

***************

Kathy chuan a bag atang chuan paper hi ala chhuak a, paper ah chuan ORGAN DONATION FORM tih a lo inziak a. Hming leh address vel fill up tur chu a han ziak nghal a, a hming zawnah chuan ama hming, Kathy Lallawmkimi tih chu a ziakthla hmasa ber a.

Nu leh pa hming zawnah chuan a thai phei ringawt thung a, a mittui a tla zawih zawih mai a. A rilru chuan, "Engmah chan tur pawh ka nei tawh lo, ka chhe vek a ni ber mai." tiin a inbe mawlh mawlh a.

******************

Johnny-a chuan kawngka chu hawn a han tum a, mahse a thei lo. A han hawi kual vel a, "A tha e, mahse a ropui lemlo khawp mai." tih pah chuan wash basin lam a pan a, a hmai chu a phih a. Mahse a hmai phina chu a han en chiang a, wash basin nilovin european type toilet chhunga tui hmang chuan a hmai a lo phih reng mai.

A ten lutuk chu a uak tuar a, wash basin lam pan nghal vatin a hmai chu ava phih leh a. Mahse a ngai ang bawkin a hmai phihna chu toilet chhunga tui tho chu a ni. Vawi engemaw zat a va phih pawhin toilet ah tho chuan a lo phih leh zel mai a, mak a ti kher mai. Ala tlawm duh mai chuanglo, toilet paper chu la in a hmai chu a hru a.

A magician lukhum chu khum pahin chuan, "Ho emai, mangtha..ka kal dawn." tih pah chuan a hmai hrukna toilet paper chu dustbin ah chuan a paih a. Mahse a han enchiang chu a toilet paper paihna chu dustbin nilovin ama lukhum zawk a lo ni reng mai a, darthlalanga a han in en leh chu dustbin zawk a lo khum reng mai.

Rang takin a la thla vat a, toilet paper hman hnu a rawn tla nuai nuai mai. Thinrim tak chuan a hawi kual a, "Hei hi magic a nilo, in nghaisakna zawk a ni." tih pah chuan chhuah a tum a. Mahse kawngka chu a hawng thei thak lo, a beng vak vak a. Mahse pawnlama mite chuan engmah an hrethei miah lova, a tang ta der mai.

Toilet bul lawka dawkan pakhat chu Pu Zothana leh Pi Mabiaki chuan an lo kil dun a, "Enteh, ka restaurant hi chu a reh a, a nuam bawk asin. Aizawl khawpui chhunga restaurant ah chuan kan restaurant hi a lian ber a, a reh nuam ber bawk hial ang chu." intithei deuh tak chuan Pi Mabiaki chuan a han ti vel a.

 

Johnny-a erawh mangang em emin bathroom chhungah chuan ala tang reng a, kawngka chu hawn ala tum nasa mai. Mahse a hawng theilo, a thinrim lutuk chuan a chhir vak vak ringawt a. A tawpah chuan a hawnna handle chu a kuai bal ta hlawk mai a, a thinrim kher mai. Chu handle chu thinrim takin a en vang vang a, darthlalang zawnah chuan a vawm pawp mai.

Mahse maktak maiin a thil vawm chu darthlalang chhungah chuan a pil daih mai a, them te pawhin chu darthlalang chu a keh eih lo. Mak a ti em em a, va enfiah tuma a kalhnaih lai tak chuan darthlalang chu a rawn che ta dur dur mai. Chuveleh darthlalang atang chuan ahma lawka a vawm door-handle chu a rawn thlawk let leh a, Johnny-a mitah tak chuan a fuh a.

*************

Kathy chu engemaw hriatchhuah nei niawm tak hian a phu zuk a, a maimitchhing vang vang mai. A rilru chuan thil a sawi leh mawlh mawlh a, "Ka naupan tet lai atang tawhin zaipui (Operation) neih hi ka hlau thei em em a, mahse ka inngaihtuah chiang a, tunah chuan hlauhna chhan tur ka nei tawh lo." tiin a inkawm mawlh mawlh a.

***************

Zan a ni der tawh a, restaurant pawn lamah chuan Ramnghaka leh hun lo la awm tura amah anga insawi Pari nen chuan an la thu duh reng a. A machine dahthat pah chuan, "I warning min pek avangin ka lawm e, mahse eng operation mah ka ti dawn chuanglo." ahan ti ringawt a. "Eng operation maw?" Pari chuan a lo ti a.

"Kan thil hi mawle, ka thlak phal teuhlo mai." tih pah chuan hnuai lam chu a han melh zeuh zeuh a. Pari chu a nui sak a, "I mawl em ni? Hmeichhia i ni tihte chu a chiang reng alawm." tih pah chuan library-a lo thu mek sap nula Iva-i chu ava en a, "Engtin nge saw nu mascara hman te kha a hming i hriat theih? A nail polish hming zawng zawng nen?" tiin a zawt a.

 

"Aww..khate chu ka hre ve hrim hrim alawm." a lo ti mai a. Chiang tak hian Pari chuan a en a, "Ngaithla rawh, rawn be tur che a ka lo let leh nachhan hi i rinphak bak thil daih a ni ang. I tan leh ka tan, kan pahnih tan thil engemaw i tih angai a ni. Time machine hi siam hlek suh ang che.." a ti ta mai a.

Mak ti tak hian Ramnghaka chuan, "Engvangin maw?" a ti vak a, chuveleh current zawng zawng chu a rawn thim ta vek mai. Ramnghaka chuan a torch light chu a on eng a, Pari hmai zawnah chuan chhunin, "I mawl em ni? Engvangin maw?" a ti vin deh hlur mai a. Chutih lai chuan a boss Pu Zahminga chuan, "Ramnghak..Ramnghak, generator on vat rawh." a rawn ti lauh lauh a.

Ramnghaka chuan Pari chu ala en reng a, "Min chhang ta che.." a ti leh a, Pu Zahminga bawk chuan, "Ramnghak...on vat teh." a lo ti chhen bawk a. Pari chuan zawi sap hian, "Va on rawh, ka lo nghak ang che." a ti a. Ramnghaka chu a lung nilo kher mai, "Awle ka lo kal..." a ti vak a, a kalsan ta a.

Ramnghaka chuan generator lam pan pah chuan a rilruin, "Thudik a ni angem...hmeichhia maw ka nih a? A ni theilo, mahse ka time-machine kha a khawih thiam ve tho bawk sia, thudik a ni angem?" a ti phei nuah nuah a. Chuveleh current chu a rawn eng leh a, Ramnghaka pawh chu a ding chat a.

A han hawi kual a, inchhungah chuan Iva-i leh Pari lo titi mawlh mawlh chu ava hmu ta a. Rang takin ava lut nghal a, Iva-i chuan Ramnghaka chu a lo en a, anmahni tawng chuan a bia a, Ramnghaka chuan a hrethiamlo kher mai. Pari chuan, "Tinge min hrilh mai loh...tiin a zawt che a nih kha." a rawn ti mauh mai.

Ramnghaka chuan mak a ti em em a, "Enga?" a ti vak ringawt. Iva-i bawk chuana engemaw chu a rawn sawi leh a, Pari bawk chuan, "Kum 10 hnua i nih tur i hrilh lo kha enge a chhan a zawt che a nih chu." a lo ti leh a. "Ih..englo..ihh.." a ti vak vak ringawt a, Iva-i chuan nui sang hian, "Scientist i ni em ni?" a lo ti a. Pari bawk chuan, "Mangang vak suh, thu phawt teh." a ti a, Ramnghaka pawh chu a thu ve ta a.

****************

"Sawi tur tamtak a awm, pakhatna ah chuan monu thuamchhawm tih vel ah kha chuan lungngai lo phawt ula, kan pahnih hi chuan kan pheikhawk atanga kan shampoo thlengin kan inhman tawm thei vek. Tin, fa kan la anih pawhin ka hnam, Ralte hi an put kher angai lovang, ama hnam Khawlhring zawk pawh hi nise pawi ka tilo. Sawitur tam tak chu ala awm anga, mahse sawi vek chi erawh a nilo." Josephine-i chuan a han ti zuah zuah a.

Waiter a lo kal a, an thil order chu a rawn dah a. Chuveleh current a rawn thim thut mai a, an reh thiap mai. Current thim lai chuan Sangtei te dawhkan atang chuan sa ruh khel ri bawp bawp ri hi a rawn awm a, "Josh...Josh...i thing lutuk." Sangtei chuan Josephine-i nghawk vak vak pah chuan zawi te hian ava hrilh ru a.

 

Josephine-i lah chuan, "Ka nilo, kan bul amite aniang." a lo ti sam et a. Mahse current a rawn eng leh thut mai a, Sangtei nu leh paten Josephine-i an han en chiah chu saruh a lo pet kawh vu mai. Sangtei nu leh pate chu an mengno lo tawh kher mai, "Tihpalh ka pa, Josh-i hian arsa a ngaina lutuk a, a insum zolo a nih kha." Sangtei chuan inthlahrung takin a ti a.

Rum zet hian Sangtei nu chuan a fanu chu a han melh a, "Saw a saruh khel nen lam sawn nangpawh hi a eizo vek duh ang che, mawli." a ti hrep a. Waiter chu a lo let leh a, "Thil dang chah duh inla nei em?" a rawn ti a. Sangtei nu chuan vin zet hian, "Mawl lutuk lohna damdawi te a awm em? Ka fanu hian a ti bo a, finna plate khat rawn pe rawh u." a lo ti hrep mai.

Waiter chuan a hrethiamlo hle a, Sangtei nu bawk chuan a fanu en hru pah chuan, "He i hmeichhiatpui ai thlawt hi chuan he waiter pawh hi ka duhpui zawk che, ani chu mipa ala ni tal a." a han ti leh khur khur mai a. Waiter pawh chuan inrawlh vena chi anilo tih a hria a, rang takin a kalsan nghal a.

****************

Pi Mabiaki chu kitchen ah chuan ava lut leh a, "I zo dawn tawh em?" a han ti lut nghal a. Sawmtea chuan a thil kan lo chawh mek pah chuan, "A zo tep e, ka pi." a ti a. "Zo vat teh aw.." tih pah chuan Sawmtea bulah chuan Pi Mabiaki chu a thu ve ta tlat mai. Nelson-a lah chuan, "Pi Mabiak...Pi Mabiak, hepa thil tih hi i hria em? Cottage Cheese telh turah Salmond a telh daih ania, ban nghal vat rawh." a lo ti ve vak vak a.

Tommy (Bonsai Tree) lah chuan nui chung hian, "I sawi peih mai mai e a, i tawng a hre ve theilo." tiin a lo nuihzat a. Pi Mabiaki chu a han hawi kual a, "Tu emaw tawng ri i hre ve em?" tiin Sawmtea chu a zawt ta thut mai. Phawk hru hian Sawmtea chu a va hawi a, "I hre ve thei elaw?" a han ti nghal vak ringawt a.

 

Chu veleh rang takin Tommy-a chuan, "Hey Mawla, i phone-a video inplay kha pause vat ta che." a lo ti a. Sawmtea chuan dawhkana youtube video a play chu a lo la in on reng a, rang takin a off vat a. Thinrim zet hian Nelson-a chuan, "Mawla, tinge i lo hrilh a? A man chhuak dawn asinle.." a lo ti vawng vawng mai.

Sawmtea chuan Pi Mabiaki bulah chuan, "Ka pi, hei hi ilo chan(cut) thei angem, khawngaihin.." a han ti ringawt a. "Keimah hian maw..." alo ti hu mai. Inla fing zet hian Sawmtea chuan, "Kan special guest tan...kei ai chuan i chan nalh zawk ang." a han ti vel a. Pi Mabiaki pawh chuan, "Awle.." tih pah chuan chawhmeh chu a chan ve mai bawk a.

"Eheu, phakar deuh ve..." tiin Tommy-a chu a lo nui vak vak a. Nelson-a chuan, "Video i en thei tawhlo bawk a, engtin nge i siam dawn ilo en ang hmiang." a lo ti ve chhen bawk a. Sawmtea chuan rum zet hian Nelson-a chu ava en a, zawite hian, "I chak dawnlo.." a ti bul bul a. Tommy-a lah chuan, "Ani te chu a fing alawm, Pi Mabiaki bulah hian chhuanlam siamin a chhuah tir leh keuh mai dawn ni." a lo ti leh zauh pek a.

"Ka thih hi i duh tak tak a ni tiraw?" tap tep chuan NElson-a chuan a ti chuai raih mai a, Tommy-a chu a lo nui nasa mai. Sawmtea chuan Pi Mabiaki bulah chuan, "Ka pi, i mood a fuh vaklo niin ka hria." ava ti ringawt a. Pi Mabiaki chuan hrethiamlo tak hian, "Keimah maw? Enge ka mood a off nachhan tur?" a lo ti hu mai.

"Nilo ve...i chauh hmel ka ti." a han ti leh vel a, Pi Mabiaki lah chuan, "Ka tha alawm...tinge min zawh a?" a lo ti leh a. Sawmtea chuan, "An sawi angin customerte hi kan ngaipawimawh tur a ni a, chuvang chuan va buaipui zawk rawh. Ka lo ti mai ang, va kal rawh ka pi." a han ti leh vel a.

Chuveleh Sawmtea inhaler, aquarium-a lo lang nalh nalh chu Nelson-a chuan a hmuiin ava nawr a, "Pi Mabiak...Pi Mabiak..enteh hei, inhaler.." a lo ti vak vak a. Sawmtea'n a hmu chiah chu a phu nasa kher mai, Pi Mabiaki hmaah chuan a va ding leh a, "Ka pi..." ava ti tuar ringawt a. Pi Mabiaki chuan mak ti tak hian, "Enge.." a lo ti hlur mai.

Sawmtea chu za lo deuh chuan a han nui hui a, "Ihh..hihi..i kawr a bal." a ti ringawt a. Pi Mabiaki chuan a hrethiamlo hle mai, "E." a ti a, a chhuahsan ta a. Tommy-a chuan Sawmtea chu lemchan thiam a ti ngang mai, "Eheu lehh....lemchan thiam tak i ni e." a lo ti vak vak a. Nelson-a erawh chu a lo tap pur tawh mai a, "Nilooooo.." a ti vawng vawng mai.

Chuveleh Sawmtea chuan thimrim zet hian Nelson-a chu a en a, "Nang Sangha chimawm, Nelson hmelchhepa.." tih pah chuan chem ala a, Nelson-a chu zu sah a tum lai tak chuan current a rawn thim ta thut mai. "Enge...enge awmzia?" Sawmtea chuan a ti hu mai a. Tommy-a lah chuan, "Awmzia i hrelo amaw? Current a thim tihna anih hi." a lo ti vin hlur mai a.

"Khawnge ka phone?" tih pah chuan Sawmtea chu a indap a, "Tah khan..i veilamah..dawhkanah i dah." Nelson-a chuan a lo ti zuah zuah a. Tommy-a chuan, "Hey...dawt a hrilh che a nih kha..." a sawi zo hman lo, Sawmtea chu a t(r)e tuar mai."Ka hrilh che kha...tinge sangha thu mai mai i awih vel ni?" tiin Tommy-a chuan a lo nuih leh tiah tiah mai.

"A saaaa....ka kut a kang.." tiin Sawmtea chu a tap titih der mai, "Haha....chawh lutuk." Nelson-a chuan nui chungin a lo ti a. Tommy-a pawh nui vein, "A hmaiah ni zawk se ka ti." a lo ti ve bawk a. Nelson-a lah chuan, "A hmelchhiat dan a ngai reng thovang." a lo ti leh a. Sawmtea chu a thinrim kher mai, "Nelson, i chak dawn lo, current awm leh veleh.." a tih lai chuan Tommy-a chu lo inrawlh lehin, "Current awm hmain i thi hman ang" a lo ti leh zuah zuah a.

Sawmtea chu a au leh tuar mai a, bel te chu a tla ri rum rum mai. "Nilooo..ehe hei chu chi(salt) a nimaw? Avan pawi tak.." a ti nuah nuah mai a. "Chi anih loh chuan enge ni vak ang?" TOmmy-a chuan a lo ti leh a. Sawmtea chuan na tih hmel tak hian, "Mahse...a al silova.." a ti a. Tommy-a chu a nui vak vak a, "Anih chuan chi a nilo tihna anih chu, sazu tur a nih chu.." a la ti zui.

SAwmtea chu a uak nghal tuar a, bungbel chu a tla ri leh rum rum mai. Chuveleh current a rawn eng a, Sawmtea taksa pumah chuan maida a kai ta nuai mai a, a hmai pawh a var vek mai. Nelson-a lam chu ava hawi a, mahse aquarium ah chuan eng sangha mah a lo awm tawh lo. A hmai a maida kai chu a han nuai fai a, "Nuai fai duh suh, tikhan i hmeltha zawk..." Tommy-a chuan a lo fiam zui nghal a.

Thinrim tak hian Sawmtea chuan Tommy-a chu a kawk a, "VE mai mai ache...thingkung mai mai, thlai mai mai i nih kha..ka duh chuan i zung nen chawp khan ka phawi daih thei che tih hre rawh." a han ti chiah chu Tommy-a ngaihdan a nilo kher mai. "Ve mai mai a? Ka'n hrilh ang che, nangni mihringte hian kan hnah pakhat lek pawh zuah lovin min pawt kawlh thin a. Kan pangpar te, kan thlai rah chhuah te, kan zung(root) te, kan zar te leh kan chi(seeds) zawng zawng te hi in hmang tangkai a. In sa ei, vawksa te, bawngsa te leh arsa te pawh an chaw atan keimahni tho min mamawh leh a, chuti chung chuan ve mai mai min ti amaw?" a ti ta siah siah mai.

Mak ti tak hian Sawmtea chuan a en heu ringawt a, Tommy-a chuan sawi zawm zelin, "Engkimah min mamawh, i pian tir atanga i thih ni thlengin min mamawh dawn. Tikhawp hian in tan kan pawimawh a, nangni lah chuan min zunkhum mai mai a. Tunlai thang thar ho lah hian indiet nan tiin vegetarian ka ni e an ti sup sup a, keimahni bawk min ei leh a. Bawng te, Lawi te leh Sial te hi en ta che u, thlai an ei char char a, an cher chuang em ni? Keini hi awmlo ila he khawvelah hian sava te, ramsate, meialh te leh khawvel mawina te hi a awm miah lovang. In boruak hip luh te hi khawi atanga lo kal nge i hria em? Kan vawih a nih kha...kan vawih hmanga nung mai mai khan ve mai mai min ti tawh reng reng suh." a ti leh phiar phiar mai a, Sawmtea chu a ngawi chiang teh asin.

Pi Mabiaki chuan Pu Zothana chu ava pan a, "Kha le.." tih pah chuan paper pakhat a pe a. Pu Zothana chuan a han en vang vang a, "A tha e, advance in pawisa pawh a cash nen thlap ka rawn keng a. Engkim a tluang chho zel a nih chuan he partnership deal hi kan close mai dawn em ni?" a ti a. Pi Mabiaki chu a lawm kher mai, "Awii..tehreng mai." a lo ti a. Pu Zothana chuan, "E..ka bourride tur kha.." a tih chuan Pi Mabiaki chuan, "E, kava check ange." tiin a kalsan a.

Kitchen ah chuan Pi Mabiaki chu ava lut leh a, Sawmtea chuan a lo hmu veleh chuan, "Ka pi, tinge ilo kal leh a? Keiman ka lo ti mai ang ka tih kha..." a lo ti zung zung a. Pi Mabiaki chuan cheng singkhat cheque hi a hmuh a, dawhkanah chuan a dah a. "Bourride kha siam zo la, he cheque hi i ta a ni mai." a ti a, a chhuahsan ta a.

**************

Johnny-a chu a la tang reng mai, european type toilet ah chuan a thu a, tih ngaihna a hrelo a ni ber mai. A phone a phawrh a, signal engmah a awm bawk silo. Chutah a bula mawng silna pipe chu amah in a rawn kang a, Johnny-a hmai zawn takah chuan tui a in phuh ta vak mai. Johnny-a chu a huh vek a, a thinrim ngei mai.

Pipe chu a la a, chhuatah a paih thuai a. A rap nghal vak vak bawk a, "Hrep taka.." tiin a au vak vak mai. Chutih lai chuan engemaw hram ri hi a hria a, bang a han melh chho chu bang daidep lek hi a lo ni a. Daidep chu chhuatah chuan a rawn tla a, Johnny-a chu ala tlawm mai lo. Nuih suk pah hian, "He daidep vang hian ka hlauh i ring amaw?" tiin a hawi kual a.

 

Chutah chhuat a zu melh leh chu a hmaa daidep a hmuh kha daidep a lo ni tawh hauh lo mai, awle (crocodile) lian em em mai hi a lo bawk run mai a. Johnny-a hlau lutuk chu a zuang zawk a, toilet ah chuan a lawn chho nghal. A hmui a hup a, thawm chhuah lo hram a tum a ni. Chutah a phone ken lai chu a thlauh palh hlauh mai a, a phone chuan toilet flush tak a zu fuh lehnghal a.

Toilet chu a in flush ri ta rum rum mai a, awle chu a rawn che hrut mai. Current a rawn la thim thut zui a, Johnny-a chu a mangang kher mai. Thawm a ri deuh nak nak a, reilote ah chuan current a rawn eng leh ta. Awle chu a lo awm tawh lova, a thaw huai mai. Mahse a han in enchiang a, ahmaa a thawmhnaw hak lai kha a lo ha tawh lo.

Rang takin darthlalang hmaah chuan ava in en vat a, JOKER ang chiah hian a lo inchei a. A hnar a sen tur a, a lukhum pawh a lo par chhap mai. A ban a phar a, "Awle, awle, a tha e. Magician bawn tak i ni e, ka kal thei tawh angem?" tiin a hawi kual leh a. Chu veleh light chu a rawn de ta zawk zawk mai a, bang lehlam ve ve chu a rawn tawlh hnai ta vak mai.

Johnny-a chu a mangang kher mai, a au vak vak a. Bang lah chu a rawn tawlh zim tulh tulh mai si a, "Ka tlawm e, ka tlawm e, kei aiin i tha, kei aiin i ropui e." tiin a rak chel chul mai. Thawm chu a reh ve nghal mai a, bang pawh chu a tawlh tawh lo. Johnny-a chu a thu hnawk a, a tap pur mai.

*******************

"Hmeichhia ve ve in ni si a, thil dik a nilo." hnuk ulh lek lek chuan Sangtei nu chuan a fanu chu a en a. "Thil sual a ni, ka pawm theilo." tiin a mittui a tla hial a. Josephine-i chuan, "Enteh ka pi, a tlangpuiin a tam zawk chuan kan kut dinglam kan hmang nasa zawk a, mahse veikhawr hi an awm ve tho a ni tih hriat a tha. Chutiang chiah chuan keimahni a biological inthlak danglam avang hian kan anpui te pawh kan duh thei a, species dangah pawh tiang hi chu a thleng ve thin alawm. Hei pawh hi Pathian in min siamdan ve tho a ni a, Pathian thilsiam chu thil diklo a ni thei dawn em ni?" a lo ti a.

Sangtei nu chuan lungawilo zet hian, "Tiang khan a ni maw kan fanu hi ilo zirtir a?" a lo ti hlur mai a. A pasal chu en pahin, "Engemaw tal sawi ve teh." a ti a. Sangtei pa chuan rum zet hian Sangtei chu melhin, "A a zo tawh a nih hi, abak sawi tur a awmlo..doctor hnena hruai mai a ngai dawn nih hi." a lo ti ve bawk a.

 

"A ngailo, a tha alawm." Josephine-i chuan a lo ti leh vat a. Vin lek lek hian Sangtei pa chuan, "Tunge i nih a? Enge ilo sawi ve vak vak a? Ka fanu ka be mek a nih hi.." a ti ta khur khur mai. Zam hauh lo hian, "Kei pawh doctor alawm ka nih, psychiatrist ka nih hi." alo ti leh a. "Ngawi mai teh." Sangtei pa chu a thinrim tawh takzet.

"KA PA.." Sangtei chuan apa chu a lo khap vat a. Mahse Sangtei pa chu a thinrim laklawh tlat, "Nang pawh kha...i aw key san reng reng suh. I naupan lai kha chuan hetiang hian i awm ngailo, i fel theih tehreng nen..mikhual kan neih chang pawhin i zak a, room ah i tlan lut daih zel kha a nia, mipa hrim hrim chu i hlau vek a nih kha. I patea ngei pawh i be ngailo a, mahse ilo danglam t ahle mai. Ka fanu Sangtei ka hriat thin kha i ni tawhlo, midang i ni tawh. Thei leh thei lovin kan enkawl che a, tiang hian maw min rulhlet dawn?" a ti ta hrep mai a.

Josephine-i chu a lo inrawlh ve vat a, "Ka pu, i hrethiamlo a ni.." a tih lai chuan Sangtei chuan a lo dang a. Tichuan amah Sangtei ngei chuan apa chu a chhang ta a, "Ni e, ka pa...min enkawl seilian a, min duat hle tih pawh ka hria. Kum 8 ka nih a music ka zir tan tirh kha ila hria em? Music min zirtirtu ber khan min pawm thin a, a malchungah te min thuttir thin a. Ka chawn te, ka mal te zutin min duat hle thin." a ti ta mai a, anu leh pate chuan mak an ti kher mai.

Sangtei chuan sawi zawm zelin, "Kan chhungte...kan family doctor Pu Hmangaiha kha..ka lungphu a check duh thu a sawiin stethoscope nen min khawih a, a duh duhna laiah min khawih thin asin. Pawnlam mi pawh a nilo, kan chhungte ngei, ka chenpui ngei ka patea a ni. A fanu ang rual lek, kum 12 mi chu mutthilh tir turin engvangin nge min zut kher nachhan? Tinge min khawih kher kha a ngaih a?" tiin a tap ta zawih zawih mai.

A fanu thuruk chu an lo hre ngai hauh lo, an khawngaih em em a. Josephine-i chuan lo hnemin a lo kuah a, Sangtei chuan sawi chhunzawm zelin, "Nangni chauh hian mak inti lo, keipawhin mak ka ti asin." tiin a tap nasa tulh tulh mai. Sangtei pa chuan, "Tinge a hmain min hrilh loh?" a lo ti a.

"Khatih hunlai kha chuan a awmzia ka hrelo a ni, a hnu deuh khan hrilh che u ka tum a. Mahse school kal min phalsak loh phah ang tih ka hlau a, ka rawn len deuh hnuah pawh khan ka sawi duh talo a, achhan chu pasal min neihtir ka hlau a ni. Chuvang ania khawpuiah ka insawn a, khang mi bawlhhlawh te kha ka tlachhiat san ta a ni. Mahse hetah pawh....inthah ka tum phah hial asin. Mahse Josephine-i hi ka tawng ta a, ani hian min dang hram a ni." a ti a.

 

Josephine-i pawh chuan lo sawi zawmin, "Mi tupawh depreesion a neih avanga a mangan a, mut duhna damdawi a ei thin a nih chuan chutiang mi chu ka hnena lo hruai turin ka pharmacy staff te hi ka hrilh thin a. Tichuan Sangtei hi an rawn hruai a, a harsatnate hi ka hriatchian theih nan ka chhuahpui thin a ni. Mahse zan khat chauh chu engkim hriat nan a tlem em a, counselling class pawh ka neihpui nasa.A hlauhna te chu zawi zawiin a reh a, mahse mipa a huatna hi amah ah hian a bet tlat tawh a ni. Mipa nen an inchibai hlek pawhin a haw nghal em em a, Sangtei chauh pawh hi anilo, hmeichhe naupang tamtak Sangtei ang chiah a an naupan laia hetiang thil tawngte hian an len hnuah harsatna tamtak an neih phah thin a ni. Nu le pate hian rilru zau tak puin an fate hi titi pui thin se, engkim hriat sak thin se chu hetiang thil hi a thleng ngai lovang." a ti a.

Sangtei nu chu a mittui a tla zawih zawih a, "Mipa a hua chu ka hrethiam thei mai a, mahse hmeichhia a duh tlat hi ka hrethiam thei lo a ni." a ti a. "Hetiang case hi chu genetics an ti thin a, Sangtein a harsatna a pal tlang zawng zawngte avang hian a sexual orientation a affect phah a ni." tiin a lo chhang a.

Sangtei pa chuan, "Engtin nge a nih theih?" tiin a lo zawt a. "Thil theih a nia lawm, ka pa. Keimahni ang chiah hian neih inang inkawp hi he khawvelah hian mi tamtak an awm asin." a lo ti a. "Mahse...fate in duh ve awm sia.." Sangtei nu chuan a lo ti ve leh a. Sangtei chuan a phone a phawrh a, naupang pakhat thlalak hmet chhuakin a nu leh pate chu a hmuhtir a, "He naupang hi a hming chu Felfela a nia, chanchinbu a semkual thin." a ti a.

Josephine-i pawh chuan, "Zirtirna tha tak dawn se chuan scientist hial pawh a ni thei a, he naupang hi kan adopt dawn a ni." a lo ti ve bawk a. "Mahse kan society hian a pawm thei chuang lovang." Sangtei pa chuan a lo ti ve leh a. Josephine-i chuan, "Kan duh zawng chu in malsawmna a ni." tiin a lo chhang a.

Sangtei pa chu a han ngawi vang vang a, "Pa tha tak ni turin ka tling lo a ni e, ka hlawhchham a ni. He mualphona hian ka damchhung a daih tawh anga, miin mi pangngai hmuhin min hmu thei tawh lo bawk ang...chuvang chuan in inhmangaihna hi ka pawm thei hlawl lo a ni." a ti ta mai a.

********************

"Engthil nge i lo hrilh a? Mawwwhh?" tiin Ramnghaka chuan Pari chu a zawt a. Pari chuan, "I nutei ka nih thu ka hrilh." tih ringawt chuan a lo chhang a. Iva-i chuan anmahni tawng bawk chuan engemawni a rawn sawi leh a, "In in ang hle mai...a ti a nih chu." Pari chuan a lo ti leh a. Chutah Pari chuan Iva-i chu belehin tawngdang chu a han hmang ve leh a, Iva-i chu a nui vak vak mai.

"Time machine kha siamtha lo turin min duh a..." tia Ramnghaka a phun sur sur lai chuan Pari chuan, "Iva-i hian mizo tawng a thiam lo, khatia phun sur sur kher angai lo." a lo ti a. Ramnghaka chu a tum hmuk mai, chutah ring tak hian, "Time machine kha siamtha lo turin min duh a, mahse tinge min puih si?" tiin a zawt a.

 

Pari chuan amitah tak chuan a en a, "Min awih theih nana pui che ka ni...tunah khan Iva-i te tawng, Persian tawng ka thiam zia i hmu a, amah vang liau liau hian i zir a, keiin ka lo thiam ta a nih hi..thil tam tak atan hian i ti a ni. Mahse thudik han hre vaih teh se, a kalsan nghal ang che. I rilru a na anga, time machine siamthat nan chuan kum 20 dang ila mamawh ang. I mal ngawih ngawih anga, thian tumah i neilo bawk ang. Tichuan a tawpah, hetiang hian wheel chair ah thuin i nun pum i hmang tawh ang." a ti ta mai a.

"Time machine hi ka siam zo lo a nih chuan engtin nge ka nu leh pate ka hmuh theih ang...ka sawi awmzia chu engtin nge kan nu leh pate ka hmuh ve theih ang?" tiin a zawt leh a. "Zawn buai vak an ngailo, an thi tawh alawm." a ti ta mai a. "Chhan i tum miahlo em ni?" tia a han zawt chu vin zet hian PAri chuan, "Ka tumloh i ring em ni? Vawi tamtak chhanhim ka tum asin. Mahse chhan ka tum apiangin, mi pakhat..he restaurant ngei ami hian ka nu leh pate chu thah a tum zel a ni." a ti khur khur mai.

Ramnghaka chuan engmah a hrethiam lo, "Engvangin nge ka nu leh pate chu an thah anga?" tiin a zawt leh a. "Ka sawifiah thiamlo, tun atanga darkar khat a liam leh hunah helaia mi awm zawng zawngte hian pawnlama an thil tih apiangah kan nu leh pate chungah thihna an thlen dawn a ni." a ti leh a. Ramnghaka chu beidawng tak hian a kun a, "Engtin nge ka chhan him theih ang?" mangang tak chuan a ti a. Chutah Pari chuan, "Kawng pakhat chu a awm.." a rawn ti ta thut mai.

***************

Cheng singkhat cheque en vang vang pah chuan Sawmtea chu a nui suk a, "Hey Nelson, aquarium chhungah khan i briu tih ka hria ania aw...a tul a nih chuan aquarium pawh kha ka tichhe vek mai ang. Tun chiah min pui la, tichuan hna ka nei thei tawh ang." a ti a. Chutah hreh tak chung chuan a bihrukna atang chuan Nelson-a chu a rawn chhuak a, thih chu a hreh takzet a ni.

"Awle a tha e, min thah i tum bawk a. Anih chuan thil pakhat chiah min tihsak ve ang che aw..video kha off la, ka sawi apiang i lo ti zel dawnnia. A tawpna atan, i han siamdun leh ang hmiang." a ti tham tiak a. Tommy-a chuan vin zet hian, "I mawl ami...aquarium sangha i nih kha...engvangin ngei i thu a zawm tehlul ang?" a lo ti a.

NElson-a chuan zaidam tak hian, "Hepa hi mifing tak chu ni se he hna hi a hmu daih tawh ang." a lo ti a. Tommy-a pawh chu a ngaih a tha ta hauh lo, "I uang mai mai amaw ka ti a, Nelson-a hi i that tak tak dawn em ni?" tiin Sawmtea chu a zawt a. Nelson-a chuan, "A pawilo, Tommy...nang chu enkawltu neilo mah la kum 100 dang ila dam thei alawm. Mahse keini ang sangha te hi chu alo berah kum 10 bak kan dam ngailo, hetiang aquarium ah phei hi chuan kum 4 vel bak kan dam ngailo. Nang nen hian nitin mai kan inkawm a, kan inhnial fo a, tunah chuan kan in mangtha angai ta. Kei chu ka thih hnuah ka ruhte chu bawlhhlawh bawmah an paih anga, chuzawng chu a ni mai. Damchhan vak tur ka nei hleinem, chuvang chuan ka nunna hlanin Sawmtea hi ka pui dawn a ni. Thi dawn mah ila, mi riltam ti puartu ka ni dawn tal a, ka lawm tho tho." tiin a tap lek lek a.

Sawmtea chuan a lo en reng a, "Khai le...gas kha on rawh le." Nelson-a chuan a ti a, Sawmtea chuan a on ta. TOmmy-a chuan, "Thianpa, Nelson-a tello chuan ka awm thei lovang, khawngaihin chhuah hram rawh." tiin a ngen mawlh mawlh a. "Nilove Tommy, hetiang em em hian min lo ui ang tih ka ring ngailo, ka lawm e aw...ka ngai ngawt ang che." rilru na tak chuan a lo ti a.

Sawmtea chuan a siam zel a, Nelson-a chuan lo hrilh zelin, "Saffron tlem telh la...telh hnem deuh hlek mahla a pawilo, tuihmel takin ka thi duh a ni." tiin za lo tak chuan a nui suk a. "Tuifinriata let leh hun i nghahhlelh thu i sawi reng a, mahse i thei dawn silo...i hlim dawn chuang em ni?" tiin Tommy-a chuan a lo zawt a.

"Ka hlau ve lutuk asin, ka mittui pawh a tla nasa...mahse tuiah ka awm reng a, i hmu theilo mai mai a ni." a lo ti a. "Thih i hlalo lovem ni?" tiin Tommy-a chuan a lo zawta leh a.Nelson-a chuan, "Hlau lutuk e, ka hlau ngawih ngawih. Maimitchhin tawp mai ka duh, mahse Pathian hian kan mi hi khap ve theilo turin min siam miau si a." tiin a lo chhang a.

Chu veleh Sawmtea chu a lo kal a, aquarium chu zenin Nelson-a chu a la chhuak ta mai. Nelson-a chuan boruak a tlachham tan a, a thaw hrawk hrawk mai. "Nilo, chhuah rawh...ka ngen ache.. ka thiantha ber a ni asin." tiin a lo ngen lawm lawm a. Nelson-a chu a khur ta zawih zawih mai, a thi ta mai tur chu a hlau em em a, a khur zawih zawih mai.

Chopping board ah chuan Sawmtea chuan Nelson-a chu a dah a, a man bet a. Nelson-a chu a thaw hlei thei tawh lo, boruak a hip thei tawh lo. Tommy-a chu a mangang hle mai, "A thi dawn ania, chhuah hram rawh." tiin a lo ngen a. Sawmtea chuan Nelson-a chu a man bet a, chemte chuan a tin ta ran mai.

Sawmtea chuan chutia mangang taka Nelson-a thaw hlawp hlawp a hmuh chuan han thah mai chu a hre ve khawp mai, a mitthla chuan inhaler hmanga a han thaw hlawp hlawp te chu a ngaihtuah chhuak a. A maimitchhing vang vang a, tichuan chemte chu a han lek kang va a. Hreh tak chung si chuan, "Ka tihpalh.." a ti a, Nelson-a chu a tin ta run mai.

************

Emily chu basement ah chuan a zu chhuk ta a, light chu zu off a tum a ni. Basemnet step tawp ber a thleng chiah a, engemaw ri rek a hria a, a ding chat mai. Thawm dang a han ngaichang leh vang vang a, tichuan light off-na main plug lam chu zawi muang chuan hlau chung chung hian a va pan leh ta a.

Plug awmna bul chu ava thleng ta a, tichuan dawhkan lo awmah chuan a thu a, Muanawma rawn text hun chu a chang ta ran mai. Muanawma chuan a rawn text ta, "Off rawh le." tih message chu a dawng a. Hreh tak chung chuan a tho a, tichuan plug chu a off ta a, engkim mai chu a thim ta mup mai.

 

Chuveleh Muanawma chuan Night Vision glass a vuah a, restaurant lam chu a silai nen chuan a pan phei ta. Kawngka bul ava thlen chuan Ramnghaka chuan Pari bulah chuan, "Engthil maw i sawi a? Enge awmzia?" a lo ti vak vak a. Ramnghaka bossn Pu Zahminga lah chuan, "Ramnghak, generator va on vat rawh." a lo ti chhen mai bawk a.

Midang zawng chuan engmah an hmu theilo, mahse Muanawma erawh chuan chiang takin a hmu vek thei a. Pu Zothana leh Pi Mabiaki te thutna chu ava thleng ta ngei mai a, pawisa bag pawh chu a lo awm vang mai. Muanawma chuan bag chu a han ban zuai a, chuveleh current a rawn eng leh ta thut mai.

Ala hman lo chiah chiah a, a night vision glass chu a phelh vat a, a thinrim ngei mai. An rinhlelh loh nan tiin a bula dawhkan ruak chu ava kil vat a, "Hrep taka.." tiin a inseh ruh tung mai. "Second 40 chhung off rawh ka ti mawlh mawlh a, second 30 chiah a la liam si a." a ti nuah nuah a.

**********

Second 30 chiah Emily-i'n a off nachhan chu engdang nilovin a hlauh em vang zawk a ni a, thawm mak tak tak a hriat vang a ni. Light a off tirh khan Emily chuan, "One, two, three, four.." tiin a chhiar nghal char char a. Mahse chutia a chhiar malh malh lai chuan a lam lo pan phei mek niawm tak hian ke pen ri a hria a.

Mahse hlau chung chungin a chhiar lui zel a, a khur zawih zawih mai. "11. 12, 13.." tiin a chhiar chhunzawm reng a, mahse thawm chu a rawn ring tulh tulh mai si. Dim baksak lova insat ri chawrh chawrh te, hmeichhe rawn au leh thut ri te chu a hre ta a, a tap pur tawh mai.

 

Chutah chak em em a rawn tlan phei ri chu a hria a, "27....28.." a tih lai tak chuan thawm chu a lo hnai zel a. A chhiar chhunzawm ngam ta lo, light chu a on leh tawp a. A hawi kual nghal a, mahse abul hnaiah chuan maimawm ril inzam nuai tihloh chu midang tumah a hmu lo. A thaw huai mai a, mahse a thla a la muang hauh lo.

Muanawma chuan thinrim tak hian phone phawrhin Emily chu ava call a, mahse a la tlang theilo zui. A inseh ruh a, "Engthil phiangsen nge maw i tih le, Emily?" tiin a phun bul bul a. Dawhkan bulah chuan rubix cube hi a lo awm a, a la kang a. Rubix cube chu a han en vang vang a, thim zingah chuan a vawm bo ta daih mai a.

Chuveleh thim zing atang chuan rubix cube remdik tuma herh vak vak ri a hre leh ta tlat mai, chutah a hma zawn takah chuan rubix cube chu a rawn in vawm phei leh a. Emily chuan a han en a, a lo inrem dik thlap mai. Chuveleh light te chu a rawn de zawk zawk a, thim zing atang chuan pitar cher tak mai, kawr bal tak ha, sam thur vek leh hmai dang vek chu a rawn bawkvak phei ta ruah ruah mai a.

Emily chu a meng phar awn awn a, a hlau kher mai. A zawnah tak chuan chu pitar chu a rawn thingthi a, muang chang chuan a ding tual tual mai. A ban a phar a, Emily lam chu ava pan hnai ta mai. Emily hlau lutuk chu a au vak a, maimitchhing chungin a tlan ta chiam mai a. Vanneih thlak takin basement chhung atang chuan a chhuak thei hlauh mai a, a hawi kual hru hru ringawt mai a.

Putar lo thutna dawhkanah chuan wallet hi a lo awm a, Emily chuan a chhar a. Chutih lai chuan Pu Rama lo kalin, "Kha kha Pu Laldenga ta a nih kha..." a rawn ti thut mai. Mittui tla phung hian Emily chuan, "Pu Laldenga...leh a nupui hi..engtin nge an chanchin i hriat theih?" tiin a khur dar dar a.

"Pu Laldenga hi Pi Vanhlui nen an inngaizawng thin a, helai hmun hi an in a ni thin. Mahse accident vangin Pi Vanhlui chu kein a kal thei ta lova, tawng pawh a tawng thei talo a ni. Chuta tang chuan Pu Laldenga chuan a sumdawnna te chu a bansan a, a nupui bulah nilengin a awm ta thin zawk a. Mahse tuman Pi Vanhlui hi..kha inah khan a awm tih an hrelo. Sumdawng thenkhat ten in chu leisak an tum thin a, mahse Pu Laldenga chuan a phallo. Tichuan a kalbo hlanin a in chu an lo thiah sak ta a, khatih lai khan Pi Vanhlui chu inchhungah a awm reng a, tanpuitu tur tumah a neilo a ni. Tichuan he thingkung hnuaiah hian a nung chungin an phum a, tun thlengin a ruang chu ala awm ang." a ti ta mai a.

 

Emily chuan a hrechhuak a, thingkung kawr chhunga thi(necklace) a hmuh pawh kha Pi Vanhlui ta ngei chu a ni. A thi awrh lai chu a han en chiang a, wallet-a Pi Vanhlui thlalak chu a en leh a, chu thi ngei mai chu thlalak ah chuan a lo awrh ve a. Chuveleh Pu Denga chu lo kalin wallet chu a rawn la a, "Ka ta ania, ka lo theihnghilh a nih hi." tih pah chuan a kalsan leh nghal a. Chuveleh a thi awrh lai chu a rawn mar tulh tulh a, a hrawkah tak chuan a rek thut mai. Emily chu a tawlh dawrh a, basement lamah chuan chu thi(necklace) chuan a hnukthla a, kawngka pawh a inkalh nghal hmak mai a.

****************

Zawi muang hian kawngka chu a rawn inhawng a, chuveleh rang lutuk chuan Johnny-a chu ava chhuak ta nghal a. A chhuak chiah chu a thawmhnaw hakte chu a han en a, Joker thawmhnaw a lo ha tawhlo, ama thawmhnaw pangngai kha alo ni leh daih tawh. Ahmaa a ten em em putar thutna bulah chuan ava kal a, putar tui lo inchhawp chu a in ta khawlh khawlh mai a.

Putar pawh chuan mak a lo ti kher mai, a en vung vung ringawt a. Johny-a chuan counter lam ava hawi a, Mary chuan a lo en reng a. Ava pan hnai a, "Tunge..tunge saw saw?" tih pah chuan bathroom chu ava kawk a. MAry chuan a chhang lo, banga ISUA thlalak intar chu a kawk ringawt a.

*************

Kathy chuan a diary a la chhuak a, a ziah mawlh mawlh pah chuan a rilru in a inbe mawlh mawlh a, "Hei hi ka diary-a ka thil ziah hnuhnung ber a ni tawh ang, tuna ka thil tih tur hi thilsual tak pawh a lo ni thei e. Mahse he thil chauh hi ka manganna ti tawp theitu a ni si a, ka va han vanduai bik tak em." tiin.

************

Sawmtea chuan a thawmhnaw te chu a thlak a, kitchen atang chuan a rawn chhuak a. Sarang lian tak hi a chhunga tui thun in a rawn keng chhuak tel bawk a, tui ah chuan Nelson-a chu a lo tleng ve del del bawk a. Kitchen ah chuan Tommy-a chu ala awm reng a, "Nelson ka thian, ngai dawn viau che mah ila i lo suangtuah thin chu a thleng dik dawn ta a, ka lawm tak zet a ni." a ti a.

"Ka lawm e aw...Hangdumlian.." Nelson-a chuan a han ti leh deuh kher a.Rum zet hian Sawmtea chuan a melh a, "Vawikhat pawh ti khan mi han ko leh teh....bourride siam nan ka hmang ang che." a ti khur khur a. Nelson-a chu lo nuiin, "Ka tihpalh, ka sawi tawh lovang." a lo ti a. Sawmtea chu a kal zel a, Pu Rama chu ava bia a.

 

"Ka pu, helai hnai ah hian dil a awm em?" tiin Sawmtea chuan a zawt a. Nelson-a chuan, "Dil nilo...tuifinriat zawk.." a lo ti ve chhen a. Neson-a chu khai kangin Sawmtea chuan, "Lo tawng ve chhen suh.." a ti hrep mai a. Pu Rama chuan mak ti tak hian, "Tunge i biak a?" a lo ti hu mai a. Sawmtea lah chuan Nelson-a chu kawk in, "He sangha hi mawle." a lo ti a.

Pu Rama chuan a en vang vang a, "Ehe..hei chu kan sangha kha a nilo maw?" alo ti vat a. Sawmtea chu inthiamloh hmel tak chuan a nui lui suk a, "Nilove...hei chu ka ta ania." a ti zawi sap a. Nelson-a lah chuan, "Chhuanlam dang engemaw siam la, chhuak vat teh ang.." a lo ti ve sek mai a.

************

Muanawma chuan a bul lawka bag, pawisa hlira khat mai chu a en reng a. A bulah chuan Pu Zothana leh Pi Mabiaki an awm reng bawk si, mahse lak ngei chu a tum tlat a ni. Nui sang hian Pu Zothana chuan, "A tha thawkhat e.." tih pah chuan file chu a remtha a. Chutih lai chuan Mary a lo kal a, "Hei hi ka fanu a nih hi..Mary anih hi.." tih pah chuan Mary chu a kuah a.

"Ehe, i va hmeltha reuh ve Mary.." Pu Zothana chuan a biangah a lo piai sak a. Pi Mabiaki chuan, "Bawihte, i magic kha i pa Zothana bulah hian kan show ve ta che." a lo ti a. Mary chuan Pu Zothana bulah chuan a magic thiamte chu a han show vel a, chutih lai chuan Muanawma pawh chuan remchang a lo zawng ve reng bawk a.

Chutia Pu Zothana'n hmundang a hawi lai tak chuan bag chu Muanawma chuan ava la a, kal a tum chiah chu Pu Zothana chuan lo hmu hmanin bag chu ava pawt ve a. Chuveleh Muanawma chuan pistol a phawrh a, "Thlah rawh..." tih pah chuan a tin a. Pu Zothana chuan, "Teuhlo mai." tiin a lo hlau lo nasa mai.

Muanawma chuan silai chu chunglam hawiin a kap ta vak vak mai a, Pu Zothana chuan a thlah ta a. Silai ri chu hria in library lama Ramnghaka, Pari leh Iv-ai te chu a rawn hawi rual thawt a. Chutiang bawkin Johnny-a te, Sangtei te leh customer dangte ho pawh chu an ding nghal suau hlawm a.

Muanawma chuan bag chu a ak a, tichuan midang ho chu silaia tin pah chuan Mary chu a pawm thut mai. Mary chu a tap nghal chiam chiam a, "Nilo..ka fanu.." tiin Pi Mabiaki chu a t(r)e chel chul mai a. Sangtei te awmna lama a pawm phei lai chuan Mary chuan Muanawma kutah chuan a seh sak vak a, Muanawma thinrim lutuk chuan a samah a kek a, "Min seh ngam amaw?" tih pah chuan silaiin a tin a.

Pi Mabiaki leh Pu Zothana te pawh chu an lo tlan phei leh a, chutih lai chuan Ramnghaka pawh a lo mangang khawp mai. Pari chu a lo nui suk a, thinrim tak hian Ramnghaka chuan, "Naupang nunna derthawng takah a awm a, engvangin nge ilo nuih vel a?" tiin a vin hrep mai a. Pari chuan thil thleng mek en reng chung chuan, "Lungngai suh, engtin mah a awm lovang." a lo ti sam et a.

"Khawngaihin ka fanu kha chhuah rawh, i duh duh ka pe ang che." tap chungin Pi Mabiaki chuan a ngen mawlh mawlh a. Josephine-i chuan Muanawma chu a en a, "Thianpa, ngaithla teh. Hetiang rual lek naupangte hian rilru no tak an nei a, a len hnu thlengin a rilru a buai phah thei ania. Tunah pawh khan i ti mangang tawh ania, kal tir rawh." a lo ti a.

 

Thinrim tak hian Muanawma chuan, "Nanga min hrilh ka ngailo, khanglang ache." tiin silaiin a tin a. Nelson-a pawh chu a lo mangang kher mai, "Sawmte..thil engemaw tal han ti teh." a lo ti ve chel chul mai a. Johnny-a pawh chu va inrawlh vein, "Thianpa..ngaithla teh.." a ti dek dek chu Muanawma chuan a lo tin ve leh a.

"Nilo...tihnat che ka tumlo, ka experience atangin ka hrilh che a nih chu...ti tap suh, naupang kha ti tap suh." tih pah chuan a ipte a zen a. Chu chu Muanawma chuan lo hmuin, "Hey...hey...enge phawrhchhuah i tum?" a ti vak vak a. Johnny-a chuan rawmawl phawrhchhuakin, "Engmah anilo, hei...rawmawl mai mai alawm." a ti a.

Johnny-a chuan ava pan hnai a, "Lo kal hnai suh.." Muanawma chuan a lo ti vak vak a. Johnny-a chuan, "Nilo...engtin mah ka ti dawn lo che.." a ti a, chutah ringzet hian, "Hey watchman, kawngka khar rawh le." a ti vak a. Chuveleh Ramnghaka chuan kawngka chu khar a tum a, mahse Pari chuan lo dangin, "Angailo, khar duh suh, saw misual saw a tihbuai duh vang mai mai a ni." a ti a.

Muanawma chuan Ramnghaka te lam chu ava melh a, chuveleh Johnny-a chuan a rawmawl cjhu a vai vak a, a alh pup mai. Mary chu a tlan chhuak thei ta a, anu bulah ava kal nghal a. Thinrim tak hian Muanawma chua rawn hawilet leh a, "Zawnga leh.." tih pah chuan a pistol chuan Johnny-a chu a tin a.

Hnunglam atang chuan Josephine-i chuan Muanawma kut chu a rawn man thut a, Johnny-a pawh chuan a pui ve nghal a. Silai an inchuhna lamah chuan silai chu a puak dur mai a, Kathy pawh ama awm hmunah a lo phu ve zuk mai. An han in enkual a, Sangtei dul atang chuan thisen a lo chhuak zawih zawih mai.

Sangtei nu leh pate chuan an fanu chu an bawihsawm nghal a, "Engthil nge maw i tih le?" Sangtei nu chuan tap chungin Muanawma chu a hau a. Chuveleh bag chu ak tha sawk sawkin Muanawma chu a tlan thut mai a, "Engemaw tal ti teh." tiin Nelson-a chuan Sawmtea chu a lo tur ve chhen bawk a.

Sawmtea chuan Pu Rama chhuatnawhna chu a la lawk a, Muanawma rawn tlan phei chu a keah a lo hlap sak a.Muanawma chu a inchhuih a, dawhkanah a lu a sawh a, pistol chu thlauhvin nikhawhrelovin a awm ta der mai. "Hospital ah kalpui vat kan ngai.." tiin Josephine-i chuan Sangtei chu a kai tho a, Sangtei chu a chau tawh kher mai.

Pu Zahminga a lo kal a, "Khai le Ramnghak, kawngka hawng rawh le." a ti a, mahse Ramnghaka chuan a duh ta tlat lo mai. Johnny-a te, Mary te nufa, Sawmtea leh midangte chu an rawn tlan khawm bawk a. "Hawng ta che...hawng vat rawh." tiin Pu Zahminga chuan a vin vak vak tawh mai. Mahse Ramnghaka chu a ngawi reng a, pistol chu a chhar a.

 

"Tumah inchhuak dawnlo." tiin silai chuan a tin ta hlawm a, mak an ti kher mai. "Chhuah luih tum apiang chu ka kap ang, ka ti tak tak ania." a ti khur khur a. Vin zet hian Pi Mabiaki chuan, "I mawl em ni nangkha? Awm sawn vat rawh." a lo ti vak vak a. Mahse Ramnghaka chuan, "Mi pakhat lek pawh helai hmun atanga in chhuak a nih chuan ka nu leh pate an thi dawn a ni." a ti ta mai a.

"Kan chhuah avanga i nu leh pate an thihna chhan tur a awm em ni?" tiin Josephin-e chuan a zawt a. Beidawn hmel tak hian Ramnghaka chuan, "Sawi mah ila in hrethiam dawn chuanglo, darkar khat tal min nghak rawh u." a ti a. "I mawl em ni? Emergency anih hi.." Josephine chuan a ti leh a.

Mahse Ramnghaka chuan a la phal tlat lo, "Min ngaidam rawh u, mahse in chhuak theilo. Khawngaihin, darkar khat chiah min nghak ru." a ti tlat mai si. Josephine-i chuan Sangtei kuah pah chuan, "Enteh Ramnghak, a hmel hi en teh. Minute 10 chhunga damdawiin kan hruai thleng hman lo a nih chuan a thi ngei ngei ang, i nu leh pte dam khawchhuah nan ka thiannu hi a thi ang maw?" mangang tak chuan a ti a.

Kut suih meuhvin Sangtei nu chuan, "Khangaihin bawiha, i nu ang tho ka nih hi...ka fapa, ka ngen ache, khawngaihin min kal tir rawh." tiin mittui nen a ngen a. Ramnghaka chuan zawi muan chuan silai chu a dah thla a, chuveleh Pari chu wheel chair nen chuan lo kalin Ramnghaka silai ken chu a chuh thut a, Ramnghaka ke ah chuan a kap ta mai.

Thisen a per chhawk a, Ramnghaka chu a tlu nghal a. Pari chuan silai chu lek kangin midang ho chu a tin a, "Kah loh hram che ka tum a, kha kha ka ke ani ve tho, ka hliam a ni ve tho asin. I nep hle mai, an thusawi vang hian i nem nghal duai duai a. An vai hian chhuah tir i duh em ni? Pakhat lek pawh hi chhuak se chu kan nu leh pate chu an thi ngei ang...a bulpui ber chu nangmah vang a ni." tih pah chuan Sawmtea chu a tin ta daih mai.

"Chumi hnuah nangmah.." tih pah chuan Sangtei nu chu a tin leh a. "Chuan ahnuah nang.." tiin Josephine-i chu a tin leh a. "A tawpna berah...nangmah.." tiin Ramnghaka chu a melh a. Midang chu a melh kual leh a, "A tawk e, ka tisual nawn tawh dawnlo. Ka thah vek che u pawh ngai mahse, pawi ka tilo." a ti ta khur khur mai.

************

Kathy chuan a diary chu ziah chhunzawm malh malh in, "Vawiin hian thilsual lian tak ka ti dawn ani...tual ka that dawn a ni." tih chu a ziak thla a. Chuveleh current a rawn de ta zuk zuk mai a, thei leh theilo hian Ramnghaka pawh chu a rawn ding a. Mak an ti hlawm em em a, current lah chu a dim tual tual mai lenghal a.

Chuveleh Basement kawngka chu a rawn inhawng ri tual tual a, an va hawi thap mai. Chutah light de zuk zuk hnuaiah chuan hmeichhe pakhat kawr bal zet ha, sam thur vek mai leh cher em em mai hi basement atang chuan a rawn bawkvak chhuak ta mai a, an hlau hlawm kher mai. Chu hmeichhia chu a rawn ding a, light de zeuh zeuh hnuaia a hmel a rawn lang chiah chu Emily a lo ni reng mai.

Mary chuan a hlau em em a, anu chu kuahin a au vak vak mai. Ama awmhmunah chuan Kathy chuan a lu a lo dawm vawng vawng a, alo phu ve zuk zuk mai. Dawhkan chu a chum vak vak a, a tap zawih zawih mai. A lu dawm vang vang pah chuan Kathy chuan thu a chham ta malh malh mai a, "Ngaihsaklohna karah pawh kawng dikah min hruai la.." a tih lai chuan Josephine-i, Johnny-a, Sangtei, Sawmtea leh Mary te chuan Kathy chu an lo chham pui a.

An chham rual ta thup thup mai, "Thim zingah pawh eng min hmuhtir zel ang che." tiin Kathy chuan tap chungin a han chham leh a, chuveleh midang ho chuan an melh ngai melh rengin an lo chham rual ve thup thup a. An thu chham zawh apiang chuan rapthlak tak hian Emily chu a au vak vak mai a, a lu te chu a thing vak vak a.

Kathy chuan a lu chu a puakkeh mai dawnin a hre hial a, a thaw vak vak mai. Thei leh theilo hian, "Thihna ata, min kaitho leh ang che." tiin a chham leh a, midangte chuan anlo chham ve zel a. Chutah Emily chu a t(r)e ta vak vak mai a, restaurant chhung chu a khawk ta rum rum mai. Kathy chuan a tuar thei tawh lo, a bag chhunga pistol chu a phawrh a, amah leh a mah chu a intin ta mai.

Chutah an vai chuan an chham rual ta, "KAn zaa chungah remna lo thleng rawh se." tiin. Chuveleh Kathy chuan silai chu a hmet puak a, thisen a per chhawk mai. Customer dangte chuan an rawn en a, zawimuang chuan Kathy chu a tlu riai riai a. Thli a rawn thaw lut huk bawk a, thli chuan Kathy diary chu a rawn chhem a, diary-ah chuan hetiang hian a lo inziak a...

"Kum 6 mi lek ka nih atangin chhaihnawmnah ka ni a, tin tleirawl ka nih khan pawngsual ka tawk bawk. Ka nu leh pate hi accident vangin an thi a, ka tuar dam thei lo a ni. Ka thluak a buai a, engthil emaw hlek a tawh chang pawhin mi pakhat aia tam niin ka inhre tlat thin. Mize hrang hrang ka pu a, ka taksa hi ka thunun zo lo a ni. Mipa ka huat em avangin hmeichhia ka ngaina telh telh a, ka nu leh pate hi hmuh leh pawh ka ngam tawhlo a ni. Hun kal tawhah kan kir leh thei a nih chuan thihna chu kan pumpelh thei an ti a, mahse tuman hna min pe thei silo, mi hmantlak loh mai chauh ka ni. Ka nu chuan fel taka awm tur leh thian sual kawmlo turin min fuih thin a, Pathianin min tanpui a tum lai hian Satana hian min thlem ve reng bawk thin a ni tiin min hrilh bawk thin. Beiseina ka tlachham a, tichuan ka nawm nan tiin drugs ka ti ve ta a, pawisa te ru in tual thah hial ka tum bawk. Mahse tunah chuan ka buaina te hian min kiansan tawh anga, ka zalen ve tawh ang. Khawvela ka chenna mek leh keimah a khawvel te nen hian kan zalen tawh anga, thlamuang takin ka chawl tawh ang.".

Zawi muanga Kathy a tluk riai riai pah chuan anmahni awm hmun theuh ah chuan Sawmtea, Johnny-a, Josephine-i, Sangtei, Mary, Emily, Ramnghaka leh Pari te pawh chu an lo tlu ve riai riai bawk a. Chhuatah chuan Kathy chu a thal der mai a, Waiter te chuan anva pan hnai nghal vat a. Midang ho pawh chu an rawn tlan khawm a, Kathy ruang chu an kil bial luih mai.

Dawhkana a paper fill up mek chu an han chhiar a, ORGANS DONATION FORM ah chuan NATNA LO NEIH TAWHTE tih zawnah chuan Multiple Personality Disorder tih a lo inziak a. Thli a arawn thaw leh vuk vuk a, lehkha bu chu a rawn chhem leh a, a inkhup a. Diary hma takah chuan Kathy naupan lai, kum 6 a nih laia a thlalak a lo in tar a.

A awmzia chu Kathy hi khang mi 8, buaina hrang hrang nei, Sawmtea, Johnny-a, Mary, Sangtei, Josephine-i Pari, Ramnghaka leh Emily te kha amah vek a lo ni. Restaurant-a thil thleng zawng zawngte kha a ngaihtuahna vek a ni a, Nelson-a leh Tommy-a pawh tawngthei tak tak nilovin Goldfish pakhat leh Bonsai Tree pakhat ve mai chauh an ni.

***********

A TAWP TA.