SICCIN-3 (Islamic Horror) Written by : Bekir Acar Translated by : Aaron Malsawmdawngzuala (Based on a true story)

 SICCIN-3

(Islamic Horror)

Written by : Bekir Acar

Translated by : Aaron Malsawmdawngzuala

(Based on a true story)

****************

"Ka nau Kader leh ka thiantha ber Orhan-a leh kei hian kan tet te atang tawh hian ka pi leh pute thlahrang thawnthu sawi hi kan ngaithla nasa thei em em a, ka nau Kader-i hian a hlau thin hle. Ka thiam ang tawkin hlau lo turin ka hrilh thin a, blanket-a inlukhupin duat takin ka kuah thin. Mahse kum tamtak a lo liam a, hetiang em em a thil rapthlak hi ka tawn ka inring pha ngailo. He ka thil tawn te hi ka ziah a ngaih ka ring ngai lo bawk, a rapthlak takzet a ni. Writer thiam tak chu ka ni lo, mahse ka thil tawn te ka ziah chhuah hian kum 7 chhung a ka nun hrehawm tak leh rapthlak tak takte khan min kiansan ve deuh mahna tiin thiamlo chung chungin ka han ziak ve mai a ni e. Kum 7 kal ta a anchhia rapthlak zet a tawp tak hnu khan, ka thil tawn te chu midang bulah ka sawi ta a. Mahse a tam zawk chuan thil thleng mak tak ve maiah an ngai a, a then chuan dawi a nih an ring. Keichuan an thusawite kha a dik ve ve niin ka hria a, ka pawm ve ve a ni. Engtin nge kha anchhia kha a tawp tak ka hre ta mai lo, a intan dan pawh ka hre chiang tawh lo. Orhan-a hi ka thiantha ber a ni a, kum 4 ka nih khan ka nau Kahder-i hi a lo piang ve ta a ni. Orhan-a nen hian kan inkawm chho char char a, Kahder-i hi a rawn thanglian ve deuh a, kan bulah a rawn tel ve ta a ni. A tir chuan Orhan-a hian lo tel ve  aphal ngailova, mahse hun a lo kal zel a, an inngaina ta tial tial a. A tawpah phei chuan an inhmangaih ta em em a, an inhmangaih nasa mah mah em aw tih tur khawp a ni ta hial a. Kan rin phakbak in an inhmangaih a, kum a lo vei zel a, an innei ta nge nge a ni." tiin Sedat-a chuan kum 7 kal taa a thil tawnte chu a diary ah chuan meizial zuk khuh hluah hluah pah chuan a ziak mawlh mawlh a.

***************

"Halil, i tisual leh ta a nimaw? Employee zingah pawh  a thiam ber pawl i ni a, helai hmunah hian meizial zuk hi khap tlat a ni tih pawh i hria. Kang thei thil leh puak thei thil hlirin kan hnathawhna hmun hi a khat a, i mawl em ni?" tiin Factory lian ve tak phakhat a an Supervisor strict tak, Orhan-a chuan a hnathawkte zinga mi, a ruka hnathawhna hmuna meizial lo zu ru, Halil-a chu a hau hrep mai a.

"Ka tihpalh a ni, Supervisor..ka thiamloh a ni, tun atang chuan tha takin hna ka thawk tawh ang, thinrim tawh lo hram rawh." tiin Halil-a chuan ngaihdam a dil a. Orhan-a chu a thaw hak a, "Ka hrethiam e, i awm ve chhung hi chuan thlamuang takin hna ka thawk thei tawh dawn lo a nih hi. Bang rawh, i bungrua te la vat la, chhuak nghal ang che." a ti ta mai a.

Halil-a chuan a hrethiamlo kher mai, "Engmaw i sawi a? Bank ah pawisa rulh tur tam tak ka la nei asin." tiin a tap nghal lek lek mai. "Duhthlan tur dang ka neilo, a pawi ka ti khawp mai." tiin Orhan-a chuan a lo chhang a. Halil-a rilru chu a na takzet, lungawilo tak chuan a chhuak ta a. A chhuak chiah chu a nupui Kahder-i unaupa, Sedat-a chu a rawn lut ve nghal a.

"Meizial a lo zu leh ta em ni?" tiin Orhan-a chu a zawt nghal a. "Ka ban ta mai anih kha.." Orhan-a chuan a lo ti zawi sap a. Sedat-a chuan a khawngaih hmel kher mai, Halil-a kal liam en vawng vawng pah chuan, "Ba rulh tur ala nei tam asin." a han ti a. "Sedat, ka hre ve tho alawm, mahse engtin nge ka tih chuan ang? Kan hna hi kan chan vek mai dawn em ni?" a lo ti a.

"Nilove, chutiang ka sawi hleinem. I ti tha lutuk alawm, i tihtur diktak i ti a ni. Ka khawngai khawp mai, an harsa ve si a." a han ti leh a. Orhan-a pawh chuan a chhang tawh lemlo, Sedat-a bawk chuan, "Bazar lamah ka va kal teh ang, ka fapa hi school ami tur eng engmaw ka leisak a ngai dawn a. Kahder-i pawhin khawchhung lamah thil tih tur a nei a, naktuk zing dar 9 velah ka rawn lam dawnnia." a han ti leh a.

"A tha alawm." tih ringawt chuan alo chhang a. Sedat-a chuan, "I rilru ti hah lutuk suh, thianpa." tiin a han hnem leh a. "Awle..kan inhmu leh dawnnia." tiin an pahnih chuan an inthlah liam ta a. Halil-a hi Orhan-a thianpa ve tho a ni a, chutia a han ban tawp mai chu nuam a ti chiah bik lo. Mahse Halil-a hian meizial zuk a hrat em em a, an hnathawhna hi lung alhthei siamna factory a ni bawk nen a hlauhawm bawk si, Orhan-a chuan duhthlan tur dang a nei bik ngang lo a ni.

**************

Zan a lo thleng a, Orhan-a chu a tawng tlem hle mai. A nupui Kahder-i ngaih thalo chuan, "Engthil nge thleng a?" tiin a han zawt a. "Engmah anilo, duhtak. Englo ania, vawiin ah employee pakhat ka ban a, ka awm a nuamlo deuh mawle. Ka tha e, min ngaihtuah suh. Ka bula i awm chhung chu ka hlim animai, bawihte." tiin a lo chhang a. 

"Umm..i ril a tam em? Chaw ei ang aw?" tiin Kahder-i chuan a han zawt leh a. "Um..ei ila.." tiin alo chhang a, chaw chu an ei tah a. Chaw an ei pah chuan Orhan-a chuan, "Kan lengchhuak mai mai dawn mi niang?" a han ti a. "Sawi ka lo tum chiah a, chaw ei kham phawt ila. Kan Hmangaihna Thingkung ah khan kan zu kal dawn em ni?" a lo ti a.

"A tha alawm, kan kal dawnnia." tiin Orhan-a chuan a lo chhang a. Chaw an ei kham a, an inkawta thingkung lian tak, an nupa pawhina an ngainat em em, HMANGAIHNA THINGKUNG tia a hming an vuah ngat hnuaiah chuan inkuah rial hian an thu dun a. "Mi hian hetia thingkung hnuaia kan thu dun hi min hmu ta se, mi a emaw min ti ngei ang." Kahder-i chuan a han ti a.

Orhan-a chu a lo nui suk a, "Tuman he thingkung hi kan tan a pawimawh zia an hre ve hleinem, he thingkung hian kan mamawh engkim min pe a ni. Kan hlimna te min hriatpuia, vanneihna min pe bawk a ni." a lo ti a, Kahder-i chu a lo nui sak mai. Orhan-a bawk chuan, "I u khan naktuk zing dar 9 ah a rawn lam tur thu che a sawi a, khawchhung ah tih tur i neih thu i hrilh bawk si a." a han ti leh a.

"Kal hma vak angai hleinem, doctor hmuh ka ngai a, chuzawng chu a nimai." Kahder-i chuan a lo ti a. "Engthil ah maw?" tiin a zawt vat a. "Eng vak mah anilo, check-up satliah mawle." tiin a lo chhang leh mai a. "Eng check-up maw?" tiin Orhan-a chuan a zawt leh a. Kahder-i chu a thu tha sauh sauh a, "Chuvang chu alawm hetah hian kal ang ka tih...he thingkung hian vanneihna chu min thlen tak tak a ni. Naktukah chuan doctor chu ka va hmu anga, ka rawn haw hunah chuan thu lawmawm deuh ka rawn hrilh maithei che a ni." a ti a.

A nupui Kahder-i chuan nau a pai ve ta tih a hriat chuan Orhan-a chu a lawm ngei mai, "Duhtak, ka hmangaih che." tiin a kuah ngawih ngawih mai a. Chumi zan vek chuan Halil-a chu an kudam ah chuan hruihrual hrawl tak kengin a lut a, hrui chu a han suih mawlh mawlh a. A nghawng ah chuan a han vet a, a in awkhlum ta der mai.

***************

A tuk zingah chuan Halil-a nupui chu Orhan-a te Factory bulah chuan thingthi a awrawl tawp chuan a tap vak vak mai. Mipui an lo kal khawm a, Halil-a nupui chu an rawn en sup sup mai a. Orhan-a erawh hnathawkin a lo buai kher mai, an employee zinga mi chu hmanhmawh takin a rawn tlan lut a.

Thaw hlawp hlawp hian Orhan-a bulah chuan, "Supervior..Halil-a nupui..pawnah sawn a tap vak vak mai. Ihh..Halil-a kha...nizanah a inawkhlum a." a rawn ti ta mai a. Orhan-a chu  ameng phar nghal awn awn mai a, "Nilo...ani theilo." tiin a tlanchhuak nghal a. Halil-a nupui chu a lo la tap nasa mai, Orhan-a chuan ava pan a.

Halil-a nupui va hnem a tum chu vin zet hian, "Nangkha..min khawih reng reng suh. I thiamloh ani, nangmah vanga intihlum a ni. Thi rawh..thi ve nghal rawh." a lo ti hrep mai. Orhan-a chuan a hmai a hup tawp a, a rilru a hah ngei mai. Midang chuan Halil-a nupui chu an lo man bet vat a, "I tluang bik hauh lovang, ka pasal ang chiah hian hma hun thim tak nei la, a tawpah thi ve ang che. He lei ang mai hian i hma hun chu a thim vek tur a ni, i tluang bik hauh lovang." tiin anchhia a lawh ta chiam mai a.

Orhan-a pawh chu a tap ve nasa hle mai, "Hruai haw rawh u." tiin a kalsan ta a. Chutih lai chuan Sedat-a leh Kehdar-i te unau chuan khawpui lam an pan mek a, Sedat-a chuan afa Mehmet-a chu a hruai ve bawk. Mehmet-a chu a seat hnungah thuin thil lem a ziak mawlh mawlh a, "Mehmet, class 4 lai te ilo ni ve tawh dawn a, i lo upa ve tawh hle mai." tiin Kehdar-i chuan  ahan nuih vel a.

"Engineer a ni dawn lawm, thlawhna a siam chhuak dawn mawle." tiin Sedat-a chu a lo nui huah huah a. "Awi animaw? Ani hi chu naupang lehkhathiam tak a ni bawk a, college a kal thleng pawhin a ngaihtuah awm lovang." Kehdar-i chuan  alo ti leh a. Mehmet-a chu lo hawi chhuakin, "Ka len hunah chuan ka nu Melek-i bula kal nan thlawhna ka siam ang." a ti a. Melek-i hi Sedat-a nupui a ni a, a thi tawh a ni.

Sedat-a te unau chu an ngawi hmak mai, "Ani Kehdar." tiin Mehmet-a chuan Kehdar-i chu a au leh a. "Umm, enge ni?" a lo ti vat a. "Ka bulah hian lo thu la, ka thlawhna lem ziah hi ka entir ang che." Mehmet-a chuan a han ti a. "Awle...ka u, ding lawk teh. A hnungah sawn ka va insawn ange." a ti a, Sedat-a pawh chu a ding ta a.

Kehdar-i chu a insawn a, chutih lai chuan Sedat-a phone chu a lo ri a, Orhan-a  alo ni a. "Hello...Orhan, engmaw i sawi a? Enga? Awle...kan lo kal nghal e." tiin phone chu a dah leh nghal a. "Engthil nge thleng a, ka u?" tiin Kahder-i chuan a lo zawt vat a, mahse a chhang lo. Sedat-a chu  a han in-turn a, mahse truck lian tak a lo tlan thut a, Sedat-a te motor chu a su pawp mai.

************

"Melek-i, ka nupui boral ta khan Mehmet-a a neih dawn khan ka mitah tak hian min en a, a thih hma khan kan fapa Mehmet-a chu tha taka enkawl turin min hrilh a, chu thu chu a damlaia a thusawi hnuhnung ber a ni. Ka fapa thusawi hnuhnung ber erawh PA, MIN TANPUI RAWH tia thlaphang taka a au kha a ni. PAthian hnenah pawh ka tawngtai nasa, kha thu kha ka fapa thusawi ka hriat hnuhnung ber nilo turin. Chuan...a tawpna ber chu...ahma ami te ai pawhin a rapthlak maithei. Ka nau Kahder-i, accident thlen hnu deuh lawk, zirtawp ni a an ina ka va hmuh kha a ni. Zirtawpni thlenga ka thil tawn rapthlak tak tak te kha midangin tawng ve ta se, an tuar zawh ve pawh ka ring lo." tiin Sedat-a chuan diary chu a ziah chhunzawm mawlh mawlh a.

************

(MONDAY)

Zan a ni a, Orhan-a chuan a hma thutthleng seia tui taka muhil mek, a nupui Kahder-i chu a en ngawih ngawih a. A mitthlaah chuan an inneih laite, hlim taka an lendun lai te chu a rawn lang zawk zawk mai a, a mittui a tla zawih zawih mai. Chutah Kahder-i chu a rawn harh a, muangchang chuan a rawn meng a. Light eng chu a en thei ta tlat lo, a meng hleithei lova, a mit a hup ta tlat mai.

Rang takin Orhan-a chuan light chu a off a, tukverh atanga thla eng lo lut bak eng dang a awm ta lo. Kahder-i pawh chu a meng ngam ve ta, Orhan-a chuan khawnvar a chhi eng a. Kahder-i hmaiah chuan chulin, "Bawihte..ka hmangaih..min kalsan hi ka hlau takzet a ni. Engkim a tha leh vek dawn alawm, hlau suh aw.." tiin a han hnem nghal mawlh mawlh a.

Chutih lai chuan an land-line phone chu a rawn ri ral ral a, Sedat-a'n a rawn call a ni. Mahse Orhan-a chuan a la duh hauh lo, Sedat-a pawh chuan a call zui ta bik lemlo a. Anu bulah chuan, "Nu..ka chhuak dawn ania, Mehmet-a kha lo awmpui reng ang che." a ti a. Anu chuan, "Khawnge i kal dawn?" tiin a lo zawt a.

"Ka chhuak mai mai dawn, boruak thianghlim ka va dawng lawk ange." a lo ti leh mai a. Anu bawk chuan, "Lo haw har suh aw.." a han ti leh a. "Reilo ang, darkar khat hnu velah ka lo haw leh ang." tiin a chhuahsan ta a. Mehmet-a hi accident vang khan wheel-chair a hman angaih phah a, a aw bawm chhia in a tawngthei tawhlo bawk.

Sedat-a chuan thlanmual lam a pan a, a nupui thlan bulah chuan ava thu a. A tap zawih zawih a, "Min ngaidam thei angem? Kan fapa chu tha takin ka enkawl thei ta silo, ka veng him zo ta silo...a that chhuah leh vat ka beisei, Pathian hian min tanpui ngei ka beisei...Melek..awww..Melek." tiin a nupui thlanlung chu a chul a, a tap zawih zawih mai.

*************

Orhan-a chuan an in tukverh vel chu a han khar tha hlawm a, tukverh pakhat a khar leh tur chiah chu an inkawta Sedat-a lo ding reng mai chu a hmu a, rang em em in tukverh chu  akhar a, parda a zar hnan leh hmiah mai. Thutthleng seia mu mek, Kahder-i lam chu ava pan a. Orhan-a chuan kawrfual par mawitak mai chu kengin, "He kawr i hak thin lai kha ka ngai thei khawp mai, i awmbo lai khan he kawr i haklai kha ka lo ngaihtuah let thin a, ka ngai thei khawp mai che." tih pah chuan kawrfual chu bangah chuan a khai a.

Hriatthiam loh hmel tak chuan Kahder-i chuan, "Enge ka chungah thleng? Engmah ka hre tawhlo, enge thleng?" tiin a zawt a. Orhan-a chuan, "I hre leh mai ang, ka pui ang che. I bulah ka awm reng ang, ka tiam ache." tiin a chul a. Mahse Kahder-i ngaih chu a that loh hmel takzet, phawk hru hian Orhan-a chu a melh run reng mai.

**********

'

Sedat-a chu a haw a, anu bulah chuan, "Mehmet-a chu a mu tawh em ni?" tiin a han zawt a. "Khumah ka mut chiah, a muhil tep ang." tiin a lo chhang a. Room ah chuan lutin a fapa chu a han en a, a lo muhil bawrh bawrh mai. A chalah chuan a fawp a, mut ve a tum ta a. Mahse inchhung lam atang chuan thawm a rawn ri ta rek rek mai a, room atang chuan a chhuak a.

Inchhung a han en chu a lo hnawk rum mai a, thutthleng te chu a lo tlu rem rum mai. Chhuatah te chu meihawl-a ziah niawm tak hian thu mak pui pui leh hawrawp mak pui pui te chu a lo rang nuai mai, chutah a hnungah chuan mi pakhat a lo lang thut a. A darah chuan  arawn vuan thut mai a, Sedat-a chu a phu chiang kher mai.

Mahse anu a lo ni hlauh mai a, "Enge ni a, bawiha?" tiin a han zawt a. Sedat-a chuan inchhung vel chu a han en leh a, engkim mai chu a lo inrem fel leh thlap mai si a, a hrethiamlo kher mai. "Aa..engmah anilo..va mu rawh, ka nu." a han ti a. Anu pawh chuan, "Awle..nangpawh mengrei suh aw.." tiin a kalsan ta a.

************

Zanlaiah chuan Kahder-i chu a harh zawk mai a, Orhan-a erawh ala mutui kher mai. Khum atang chuan a chhuk a, inhnuai lamah chuan a chhuk ta a. Sitting room bula kawngkhar te reuhte a puan lo in zar chu a en a, kawngka lu chungah chuan seki pakhat, hruia intawn hi a lo inkhai a. Maimawm rilin a zam nuai a, lehkha zial a inkhai telh bawk.

Kahder-i chuan a han en vang vang a, chutah kawngkhar chu a chum tak vak vak mai. A chum pah chuan a t(r)e vak vak a, pawn light te chu a de zawk zawk mai bawk a. Rang takin Orhan-a chu a lo chhuk vat a, Kahde-i chu a rawn kuah nghal a. "Hlau suh, a tawp tawh e...hahdam rawh." tiin a thlamuan nghal mawlh mawlh a.

Thaw hlawp hlawp hian Kahder-i chuan, "Engtin nge ka chhuk pawh ka hrelo, ka hlau lutuk.." tiin a khur zawih zawih a. Orhan-a chuan a samah chulin, "Hetah hian kal tawh reng reng suh, helai hmunah hian i hun kal tawh duhawmloh tak tak leh rapthlak tak tak a awm a, hriatchhuah leh pawh i duh tawh hauh lovang. I hrechhuak leh a nih chuan nangma tan a pawi zawk ang,  chuvang ania he kawngka hi ka kalh tlat ni. Kal tawh suh aw, luh pawh tum reng reng suh ang che. En pawh i en tur a nilo, min tiam thei angem?" a han ti a.

Kahder-i chuan  alu a lo bu nghauh a, "Hawh le, mu leh tawh ang." tiin inchung lamah chuan a hruai chho leh ta a. Kahder-i muthilh hnu chuan Orhan-a chu inhnuai lamah chuan a chhuk ve leh a, Kahder-i luh ve a phallohna room ah chuan  alut ta a. A inthawina pindan a lo ni reng mai a, tuma hriatpui lohvin Orhan-a chu a lo inthawi thin reng a lo ni.

Vaivut niawm tak, var vek mai chu a kut khatin a tham a, eng thu emaw chham melh melh pah chuan dawhkana lehkhabu chhah tak mai ah chuan a phul ta a. A bula meiling ah chuan a phul thet thet bawk a, chutah meiling chu a han chhem vak vak a. Pawnah chhuakin an inkawtah chuan chu thil bawk chu a han phul kual leh hlawm a, zawite te hian a phun melh melh reng bawk.

**************

Zingkar atang chuan Orhan-a pawh hna lamah a buai lehnghal khawp mai, tukthuan ei a lo hun a. Kahder-i u Sedat-a pawh hi Orhan-a factory ah hian a thawk ve a, Orhan-a hnuaiah a thawk tihna a nih chu. Factory kawtah chuan employee ho chuan tukthuan an ei mial mial hlawm a, Orhan-a lo kal phei chu Sedat-a chuan a lo hmu a.

Orhan-a chuan a melh rum kher mai, biak pawh belo chuan a kal pel hmak a. Sedat-a bula thu, a hnathawhpui pa chuan, "Sedat, enge i fapa chu a an a?" tiin a han zawt a. "Chet pawh ala che tha theilo, a la tawng eih lo bawk. A kutzung tang hi chu a tiche ta zeuh zeuh chuan ka hria, chuzawng chu animai." tiin a lo chhang a.

A thianpa chuan, "Anih chu mawle, Pathianin awmpui mawlh teh se." a han ti a. "Amen, thleng mawlh teh se." tiin Sedat-a chuan a lo chhang leh a. "Kan supervisor Orhan-a hi tunlai chu a buai khawp mai, a thil tawn te avang khan a tuar na hle aniang." Sedat-a thianpa chuan a han ti leh a.

"Nia, kan pahnih hian kan tuar na ve ve alawm, a hrehawm khawp mai." tiin a lo chhang leh a. "A be tha vak duh tawhlo che niin ka lo hria a.." tiin a thianpa chuan a han melh zeuh a. Sedat-a chu a tho a, "Tui deuhin i ei dawnnia.." tiin a kalsan ta daih a. Factory-a employee te hian zing atangin hna an thawk thin a, breakfast leh lunch hi an hnathawhna hmunah an ei mai thin a, chawhnu shift lam ho erawhin zanriah pawh an ei nghal mai thin.

***************

Inlamah chuan amah chauhvin Kahder-i chu a awm a, ahma zan lawka a pasal Orhan-a'n kal lo tura a tihna hmun, inhnuaia Orhan-a inthawina pindan lam bawk chu a pan leh ta a. Pindan bula darthlalangah chuan a han in en vang vang a, chutah tukverh a rawn inhawng thut mai. Tukverh ah chuan a han dak chhuak a, an inkawtah chuan pitar pahnih hi titi pahin an lo kal dun a. Kehdar-i chuan tukverh chu a khar thuai a, parda chu a zar nghal bawk a.  

Orhan-a nu leh pa te hi tar ve tawh tak mai an ni a, Orhan-a nu hian a fapa nupui, a monu Kahder-i chu a haw em em mai a ni. Orhan-a pa chuan eitur a siam mawlh mawlh a, chutih lai chuan Orhan-a nu chu thutthlengah thuin a rilruin a inbe mawlh mawlh mai. "Pawnah, kawngkhar bulah...an that ngei ang. Ngaihtuahna sual an puttir anga, that turin an lo kal ang. Rapthlak takin....an lo kal ang. I fapa chu an hrai anga, manganna khurah an hnuk lut ang. He mihringnu hian i fapa chu zawimuangin a that mek zel a ni, a thisen a in zawh sak vek dawn." ti a phun sep sep pah chuan Kahder-i leh Orhan-a inneih thlalak, banga intar chu a en vang vang a.

Orhan-a pa chu a eitur siam nen chuan sitting room lam ava pan ta a, mahse a nupui Hatice-i (Orhan-a nu) chu a lo awm ta hauh lo mai. "Hatice..Hatice.." tiin a zawng kual nghal chiam mai a, pawn ah chuan a tlan chhuak nghal a. Hatice-i chu pawnah chuan a lo awm a, kawngpui lam pan tumin muang chang chuan a lo kal chhet chhet a.

Orhan-a pa chu ava tlan vat a, "Hatice, engemaw i tih le? Lo kal rawh, i haw vat teh ang." tiin a banah chuan a vuan a. Hatice-i chuan tap tep hian, "Nilo, lo va haw rawh. Kalna tur ka nei, ka rei lovang." a lo ti a. "Nilove..lo kal rawh, i haw phawt teh ang." tiin inlam pan chuan a kuah lut leh a. "Orhan-a ka hmu duh, biak ka duh a ni." a ti lawm lawm a, mahse Orhan-a pa chuan, "Nakinah...nakinah aww..haw phawt ang." tiin a hruai lut lui ta tho a.

****************

Kahder-i chuan dawhkan-a an inneih thlalak chu a han en vang vang a, "Achang chuan kan mit chauh hmangin kan inbe thin, ka mita min en hian i hmangaihna ka hmu thei a, ka kuta i vawn changte hian min hmangaihna i lantir thin a ni. Tuman min then hrang thei lovang tiin kan sawi fo thin, chutiang khawpa inhmangaih chu kan ni. I tello chuan ka awm theilova, ka tello chuan i awm thei biklo bawk. Kan inhmangaihna hi thu in a sawifiah zo lo asin, Kahder. I hriatna te i nei let leh anga, hmana min hmangaih ang chiah khan min hmangaih leh em em ang." tia Orhan-a'n a hrilh lai te chu abengah chuan a ri nawn mawlh mawlh a.

Sitting room lama Orhan-a'n kawrfual mawi tak mai a khai, "He kawr i hak thin lai kha ka ngai thei khawp mai, min awm bo san lai khan he kawr i hak lai kha ka mitthlaah a cham reng thin asin." a tih lai te chu a hre chhuak a. Chutah room lamah a chho a, pawhdawn chunga khawnvar hnungah chuan thil var kil thum nei (triangle), hruia intawn hi a hmu a.

A la a, a han en vang vang a. Chutah a paih thut a, wardrobe te chu a hai chiam mai a. Thinrem te chu hawngin thawmhnaw te chu a paih darh nuai mai a, a mangan hmel kher mai. Pawhdawh te chu a hawng leh a, thlalak te chu a hai vak vak a. Room chhung chu a hnawk ta nuai mai a, chhuatah chuan thlalak leh thawmhnaw a darh nuai bawk.

Zan a lo thleng a, Orhan-a pawh a lo haw ta. Room a han lut chiah chu a lo hnawk nuai mai a, chhuatah chuan Kader-i chu lo thu in thlalak pakhat hi a lo en vung vung mai a. "Kader, enge thleng a?" tiin a bulah chuan ava thu ve a. A thlalak kenlai chu a han en a, an inneih thlalak a lo ni a. An bulah chuan Orhan-a nu leh pate chu an lo lang ve bawk a, "Ka nu leh pate an nih hi, ka nu hian kan inneihna hi a pawm duhlo a, chuvang chuan tun thleng hian kan la inbe tha thei lo a ni." a ti a.

Kader-i chu a tap a, "Ka nu leh pa thlalak a awm velo em ni?" tiin a zawt a. Chutih lai chuan Orhan-a chuan pawn lamah thawm a hre ta tlat mai, rang takin inhnuaiah chuan a chhuk a. Pawnah a chhuak a, hawi kual pah chuan ama hriat tham lek chuan a phun mual mual bawk a. Suahdur la in an inkawt chu a lai a, thil var kilthum nei pahnih, hruia intawn te chu leiah chuan  a dah a.

Lei chuan a vur leh a, a phun mawlh mawlh reng bawk a. Chutih lai chuan Sedat-a alo kal thut a, "Orhan.." a rawn ti chu Orhan-a chuan a lo melhrum kher mai. Chhan pawh chhang lo chuan a kalsan daih a, mahse Sedat-a chuan a umzui a. "Orhan, engtia rei nge min biakloh i tum a?" a han ti chu Orhan-a chu a ding chat mai.

"Sedat, thlawk bo nghal rawh..vawikhat mah lo kal tawh suh ang che. Kal rawh...kal bo rawh.." a lo ti hrep mai. Rilru na tak chuan Sedat-a chu a kal ta a, Orhan-a pawh chu inchhung lamah chuan a lut ve ta a. A nupui bulah chuan, "Khawiah mah ka thulo chuan chhuak bo reng reng suh ang che, tumah i be tur a nilo." a ti a.

"Awle Orhan.." tiin Kader-i chuan a lo chhang a, an in en ngawih ngawih mai. "Vana arsi te zinga mi khi ni ve ta ila, i tan chauh hian ka eng thin ang. Lir te hial pawh lo nghing mahse, i tan chuan ka nghing ve ngai lovang." tiin a tap lek lek mai a. Kader-i erawh chuan ngaihnawm a ti kher mai, a pasal chu a en ngawih ngawih mai a ni.

Zanrei ah chuan Orhan-a chu a inthawi leh ta, kader-i thlalak chu dawhkanah chuan a dah a. Thu mak pui pui chham leh malh malh pah chuan Kader-i mit zawnah tak chuan bakcheh hmawr zum hian a chhun pawp a, thlalak hnung lamah chuan anmahni Turkish tawng chuan SICCIN tih chu a ziak kuau mai. Tichuan thlalak chu a la kang a, a hal ta a.

***************

Sedat-a te pafa hi room pakhat ah an riak dun a, khum hrangah an mu thung. Sedat-a chu a harh zawk mai a, a fapa khum lam a va hawi chu Mehmet-a a lo awm ta hauh lo mai. Inchhung lam atang chuan thil ri ret ret hi a hre ta a, room atang chuan a chhuak vat a. A phu zawk mai, inchhung thim reih ruih karah chuan ama nu ngei mai, Mehmet-a wheel chair-a a lo thu chu a hmu ta mai a.

Anu chuan wheel chair ke chu a lo nawr ri rek rek hi a lo ni a, muangchang chuan ava pan hnai a. Ventilation atanga thla eng rawn lut chuan anu hmai chu chiang tak hian a rawn chhun a, a rapthlak ngei mai. Anu hmai chu a dang var pup mai a, a khem deuh nuai bawk. A hmai chu phuhlip amaw tih mai tur hian a pawr fur mai bawk a, chutah chiang zet hian Sedat-a chu a rawn melh thut mai.

A rawn ding thut a, a ban pharin alamah alo phei ta chhut chhut mai. Chuveleh hmeichhe au vak ri a hre leh a, "Min chhan ru.." tiin a au a,  a phu chiang kher mai. Thawm lo chhuahna lam a han hawi chu a nau, Kader-i ngei mai chu hmelrap awm zet hian a lo lang thut mai a. Thinrim hmel tak hian Sedat-a chu melhin a ban a phar a, a au vak a, a rawn pan phei ta mai a.

Sedat-a chu a harh zawk mai a, a mumang vek a lo ni. A thaw hrawk hrawk mai a, a fapa khum lam ava en vat a. Mehmet-a chu a lo muhil bawrh bawrh mai a, a thaw huai mai. Room atang chuan a chhuak a, inchhung vel chu a en kual a, engmah diklo a awmlo. Anu room ah ava lut leh a, anu pawh chu a lo muhil a. A thla a muang ta sawt mai, a room lamah let lehin a mu ve leh ta a.

***************

Atuk zingah chuan Sedat-a pawh chu hna thawk turin a chhuak leh ta a, a phur lemlo kher mai. Supervisor room ah a va lut a, Orhan-a chu amah hnungchhawn zawngin  alo ding a. Inthlahrung tak hian, "Orhan, inbe lawk teh ang." a va ti a. Orhan-a chu a lo hawi a, a melhrum kher mai.

Sedat-a bawk chuan, "Ka awm anuamlo takzet a ni, Orhan. Ka thla a muang hlawl lo, nizan ah pawh mumang mak tak tak ka nei a. Zanah ka mu thei ngailo, ka mangang a ni." a han ti leh a. Mahse Orhan-a chuan ala chhang chuanglo, "Orhan, i nupui saw ka unaunu a ni. Ka tette atanga ka thian a ni a, nangpawh ka thian i ni. Kan pathum hian thian kan ni vek thin a, khawngaihin min kalsan bik suh u." a han ti leh a.

Orhan-a chuan a sana a han bih zauh a, "Hnathawh a hun tawh ania, va thawk leh tawh rawh." a lo ti hmuk mai. Orhan-a chu kalsawn a han tum a, Sedat-a chuan lo manbetin, "Nilo, Ohran. Min ngaithla teh, ka thiamloh vek angah i ngai a ni tiraw? A dik alawm, ka thiamloh a ni. Mahse Kader-i hi ka tan hian a pawimawh ve tho asin, i nupui hi ka nau a ni tih i hria anilawm ni? Ka fapa ka en apiang hian kha accident kha ka ngaihtuah chhuak ziah thin asin, ka mumangah Kader-i ka hmu ziah bawk. Nizan khan ka mumangah Kader-i ka hmu a, puih a ngaih thu a sawi a ni. Ka nau Kader-i hi ka ngai takzet a ni, ka fapa lah ramtuileilo a ni der bawk si. A che sawn thei lova, a tawng thei heklo. Enge ka tih ang ka hrelo, ka mangang a ni. Hun hi her let leh theih se ka ti takzet, mahse tihtheih ka nei silo. Ka tih theih zawng chu Pathian hnena tawngtai animai, mahse nang lah chuan min haw em em bawk si." a han ti leh a.

Chutah Orhan-a chuan Sedat-a chu a rek thut a, bangah a nam bet ta mai a. Thinrim tak hian, "Nang phiangsen hian ka Kader-i min laksak a ni, ka bul hnaiah hian rawn kal tawh suh. Min hnaih hlek tawh suh ang che, anihloh chuan ka that hreh hauh lo che a nia..." a ti khur khur mai a, a chhuahsan ta daih mai. Sedat-a chuan mak a ti em em a, a rilru ana hle bawk.

***************

Kader-i chuan thlalak dang a hmu chhuak leh ta, naupang pathum thlalak hi a ni a. Chutah bel inkhawng ri vak vak ri hi a hre leh ta a, thawm lo chhuahna lam chu ava pan leh ta a. Puana thil intuam, tetak te mah leh chahbi chu Orhan-a inthawina pindan bulah chuan a lo inkhai a.

Lak a han tum chiah chu phun ri sep sep hi a hre leh ta tlat mai, choka lam ava hawi a. Bowl lian tak pakhat ah chuan saruh tam tak, lian pui pui hi a lo awm a. Muangchang chuan ava pan hnai a, saruh te chu a en a. Saruh karah chuan chukchu lian tak tak, pathum vel hi an lo vak neuh neuh bawk.

*************

Sedat-a leh Mehmet-a chuan dawhkan an kil dun a, "Milem ziak ang aw.." tiin ahmaa Mehmet-a thlawhna lem ziah chu dawhkanah chuan Sedat-a chuan a dah a. A fapa chu pencil hum tirin a vawn pui a, thlawhna lem chu a ziahpui ta a. Chutih lai chuan kawngka a rawn inkik a, "Ti hian lo awm rawh aw.." tiin a fapa chu a kalsan a.

Kawngka ava hawng a, a han enkual a, tumah an lo awm bawk silo. A han chhuak a, mahse tumah a hmu chuang lo. A lut leh a, anu room chu a va bih leh a. Anu chuan lehkhabu a lo chhiar a, rawn hawi chhuakin, "Enge ni ta, ka fapa?" tiin a lo zawt a. "Kawngka kik ri ka hria a.." a lo ti a.

"Ka hre ve lo reng reng." tiin a nu chuan a lo chhang a, Sedat-a pawh chu a kal leh ta a. Choka lam ava hawi phei chu Mehmet-a chu wheel chair ah chuan a lo thu tawh hauh lo, wheel-chair chu a letling zawngin a lo awm a. Mehmet-a erawh bang bulah lo dingin bangah chuan ramhuai lem niawm tak, dum vek mai chu a lo ziak rang nuai mai a.

Chutah a phu zawk a, chhuatah chuan  alet tawp mai. Sedat-a chuan va pan vatin, "Ka fapa, Mehmet." tiin a buaipui nghal vat a. A fapa chu a pawm kang a, banga lemziak chu a han en a. Hmeichhia ni awm tak, kawrfual ha, sam thur vek leh mit dum vek lem hi a lo ni a. Mak a ti kher mai, Mehmet-a chu room lamah a luh pui ta vat a.

***************

Orhan-a chu a inthawi leh ta, dawhkanah chuan a nu leh pate thlalak chu a han dah a. Thlalak chu a zial a, hruiin a tawn a. Hruia a tawnna chu bati tui chuan a far kauh kauh a, eng engemaw hi a chham melh melh bawk a. Chutih lai chuan Orhan-a nu, Hatice-i pawh chu sitting room ah thu in purun sen a lo kheh mawlh mawlh a.

Orhan-a te nupa thlalak chu a han en vang vang a, a tho thut a, banga thlalk chu a khup hmak mai. "Tenawmnu, lepchiahnu..zakthei lo lutuk." tih nuah nuah pah chuan a thutna lamah chuan a let leh a. Thinrim tak hian, "I mitmu te kha ka phawrh chhuak anga, ui ka ei tir ang. Zaktheilo nu, tenawm nu." tiin ama hriattham lek chuan  a phun sep sep a, purun chu a chan chhunzawm mawlh mawlh a.

Orhan-a pa chu a lo kal a, banga thlalak chu a han en a. "Awhaww...i lo khup leh ta nimaw, ava han tullo thin tak." tih pah chuan thlalak chu a tar tha leh a. Lungawilo tak hian Hatice-i chuan, "Mahse khanu kha thlalak atang khan a rawn chhuak thin alawm, ka hmu peihlo  ani." a lo ti a.

Kawngka a rawn inkik a, "Tunge ni?" tiin Orhan-a pa chuan kawngka lam chu ava pan vat a. Kawngka a han hawng chu an fapa Orhan-a a lo ni a, "In dam maw?" tiin apa chu chibai a han buk a. "Lo lut rawh, bawiha." tiin apa chuan a lo kuah a, inchhung ah chuan an inzui lut ta a.

Anu bulah chuan va kalin, "Nu, i dam maw?" a han ti a, "Awi, lo leng rawh ka fapa." tiin anu chuan a lo kuah ve bawk a. An pathum chuan an thu khawm a, "Tinge innu i rawn hruai veloh? A lo kal ve duhlo em ni?" tiin anu chuan a han zawt a. "A dam that veleh ka rawn hruai dawnnia, ka nu." Orhan-a chuan a han ti zawi sap a.

Hatice-i hi a beng a ngawng deuh tawh a, tun lawka Orhan-a thusawi pawh kha a hre tha theilo a ni. Orhan-a pa chuan, "A nupui chu a damlo a nih chu, a dam hunah a lo hruai dawn a nih chu.." tiin Hatice-i chu a lo hrilhfiah a. "Aww...lo hruai vat rawh. Kan hmu chak alawm, ka duat ngawt ang." anu chuan a han ti vel a.

"Thingpui ka'n lum ange.." tiin Orhan-a pa chu choka lamah a phei a. Orhan-a pawh chuan, "Keipawh ka kut ka'n sil ange." tiin anu chu bathroom lamah a phei san ve ta a. Orhan-a chu  a han meng kual zeuh zeuh a, tichuan a coat atang chuan anu leh pate thlalak a zial chu a phawrh chhuak a, bathroom darthlalang hnungah chuan a  han zep zauh a.

**************

Mehmet-a chu tui takin thutthlengah a muhil a, abulah chuan api (Sedat-a nu) chuan la phiar pahin a awmpui a. Sedat-a erawh pawnah meizial a zu a, a inngaihtuah nasa hle mai. Anu chu a rawn chhuak a, "Bawiha, tunlai chu i rilru a hah hmel khawp mai. Keipawh ka rilru a nuam thei biklo, Scholar Veysel-a kan va be mai dawn em ni? Min pui thei em em ang." inthlahrung tak chuan a han ti a.

"Tunge Veysel-a chu? Ka fapa hi tih hlauh ka duh reng reng lo, tha taka kan enkawl a ngai. A mamawh zawng chu ngaihsak leh duat animai, chutiang pan angai lo. Tinge i rawn chhuah san reng reng a, lo kal rawh, lut ang." a lo ti hmuk a, inchhung lamah a luhsan ta daih a. Sedat-a chu sitting room lamah chuan ava kal leh a, a ding chat mai.

A thin a phu nghal dup dup mai a, anu..nichin lawka pawna a biak mek chu sitting room ah chuan la alo phiar leh mawlh mawlh tawh. Mit khap leklo hian a en reng a, abulah chuan ava thu a. "Va mu rawh, ka lo awmpui ang." tiin anu chu a hrilh a, anu pawh chuan a la phiar lai chu dahfelin room lam  a pan ve mai bawk a.

**************

Kader-i muhil chu a harh zawk a, inhnuai lam atang chuan, "KADER...KADER.." tia rawn ko ri a hria a. Inhnuai lamah chuan a chhuk a, kawngka chu ava hawng a. A pasal Orhan-a  alo ni a, "Minlo zui rawh.." tiin Kader-i chu a kai a, a chhuahpui ta a. "I muttheihloh chang hian pawna tei chhuah hi i duh thin a, tichuan kan chhuak dun thin. Zan khat chu nu pakhat hi helai hmunah hian a lo tap a, a fate pahnih chu an awm ve bawk. Engthil nge thleng tia ka zawh chuan afanu a bo thu chu min hrilh ta a, engtia bo nge tia ka zawh chuan mi pakhatin a rukbo thu a sawi a ni. Chu a rubo tu chuan thingkung bulah a ru bo a ti a, a sawi pah chuan he kan HMANGAIHNA THINGKUNG hi a kawk a ni." tiin Kader-i chu kalpui reng pah chuan a hrilh mawlh mawlh a.

"A fanu chu chhuah hram tura a ngen thu a sawi bawk a, chutia a thusawi kan ngaihthlak lai chuan chumite nufa thum chu chawp leh chilhin an bo daih mai a ni." a han ti leh a, Kader-i chuan a lo ngaithla uluk kher mai. Chutia a pasal Orhan-a, abula kal ve reng chu a bo ve ta thut mai a, a mangang takzet.

"Orhan, Orhan.." tiin a au chel chul mai a, mahse Orhan-a reng reng hmuh tur a awm silo. Chutah an HMANGAIHNA THINGKUNG phen a tang chuan mei alh eng a hmu ta a, ava pan nghal a. Phun sep sep ri a hre bawk a, thungkung phen atanga lo chhuak a ni. A va kal hnai a, a thilhmu chuan  ati hlau ngei mai.

Thingkung bulah chuan ruang niawm tak, puan var veka intuam pathum hi an lo let reng mai a. An bulah chuan Orhan-a a lo awm ve bawk a, ruang pakhat chu Orhan-a chuan a han tham vak a. A lu zawn chu a han pawtthler a, chutah mitthi ruang lu chu a rawn lang ta. A dum vek a, a mawm hlup mai bawk a, sam engmah a neilo bawk. Chutah chu ruang chu a rawn meng thut a, Kader-i chu melhin a au ta vak mai.

Orhan-a chu a mumang ram atang chuan a harh zawk mai a, a thaw hrawk hrawk mai. A bula mu Kader-i lam chu a han hawi a, Kader-i pawh chuan a awm a dawm a, a lo thaw hrawk hrawk mai a. Kader-i pawh chuan mumang a nei ve mek a ni. Chu a mumang pawh chu Orhan-a mumang ang tho kha a ni a, ani erawh a harh veloh avangin ala chhunzawm zel a ni.

A mumangah chuan ruang chuan Kader-i chu a lo la melh reng a, a ang sawi bawi bawi mai. Chutah Orhan-a mit chu a rawn sen vek a, tawng mak tak tak chuan a au vak vak a. Kader-i pawh chu a rawn harh ve ta, a thu chhuak hlawl mai. Orhan-a chuan a kuah a, "Hlau suh, a zo tawh e..a tawp tawh e, engmah hlauh tur a awm lo, duhtak.." tiin a hnem mawlh mawlh a.

**************

(THURSDAY)

A tukah chuan Sedat-a pawh Factory lamah hna thawkin a buai lehpek kher mai, lungalh thei tam tak chu meiah a lo rawh mek a. Chutih lai chuan athianpa, a hnathawhpui pa Kadir-a chu a lo kal a. "Sedat, mamawh te i nei em? I tha maw?" a rawn ti a. "Tha e, engmah ka mamawh lo." tiin a lo chhang a.

"I awm a nawmloh hmel sia, mamawh i neih chuan ka awm reng ania." Ka dir-a chuan a han ti a. "Mut ka khamlo ani, Kadir. Tunlai chu insomnia ka nei a, ka ngaihtuahna hi a buai mup mup reng mai. Mehmet-a lah a dam thei bawk silo, engkim a that leh vek ka beisei." tiin a lo chhang a.

"Nikum lawk khan kan nu pawh hi a mu theilo ve thin a, i buaina ang chiah chiah kha a nei ve thin. Inah a tawm reng a, chhuah pawh a chhuak ngailo. Ziaawm lam a pan theih tak silo avang chuan scholar pan mai chu tha in kan hre ta a, scholar chuan ka nupui chu ramhuaiin a tihbuai thin thu min hrilh ta a ni. A tawpah chuan Pathian tapuina hmagin ramhuai chu kan beilet a, ka nupui pawh a rawn tha chhuak leh ta a ni. Quran bu chhunga thute hmang chuan Scholar Veysel-a chuan ramhuai chu  a hnawtchhuak a, engkim a tha leh ta a ni." tiin Kader-a chuan a han hrilh a.

"Scholar Veysel-a maw?" Sedat-a chuan a lo ti hu mai. "Aw ni e, va pan ve mai rawh. I duh anih pawht chuan an nu ka lo biak tir ang." tiin a lo chhang a. "Awle, ka lo ngaihtuah ange." Sedat-a chuan a han ti a, "Ka nupui chu ka lo bia ange, i kal dawn chuan i fapa Mehmet-a pawh i hruai tel ve dawnnia." tiin Kadir-a chuan a kalsan ta a.

*************

Tlai a lo ni a, Sedat-a pawh chu a haw veleh ta a. Anu chuan kawngka  alo hawn sak a, "I lo tha maw, ka nu?" a han ti a. Anu chuan, "I thianpa Kadir-a nupui a lo leng a, Veysel-a bula kal i ngaih thute a sawi a." a han ti a. Sedat-a chu a meng phawk hru mai, "Engtik khan nge a lo kal?" tiin a han zawt nghal vat a.

"Ilo haw hma chiah khan a chhuak chiah, Veysel-a address pawh min hrilh nghe nghe alawm. Mehmet-a pawh hi hruai ve turin min hrilh a, va kal ngei chu a tha ka ti." tiin a lo chhang a. "Inah lo awm zawk rawh, keiman ka va hruai zawk ange." Sedat-a chuan a lo ti a. Sitting room lamah ava phei a, Mehmet-a chu ngawi rengin a lo thu a.

**************

Zan a lo thleng leh ta, Orhan-a pawh a haw ve ta a. Inchhung a lut chiah chu a ding nghal chat mai, ahma zawn chu mit khap leklo chuan a ena a, "Kader.." tiin a mittui a tla hial a. Kader-i chu ahma zawnah chuan a lo ding a, kawrfual par mawitak mai, Orhan-a ngei pawhina mawi a tih em em mai chu a lo ha a, a hmeltha ngei mai.

"I mawi lutuk, bawihte.." tiin Orhan-a chuan a nupui chu a en ngawih ngawih mai a ni. Chumi zan chuan Orhan-a leh Kader-i te chuan hunrei tak chhunga an hman tawh loh, nupa nun chu an hmang leh ta. An zawh hnu chuan Kader-i chu Orhan-a chuan a bual fai a, duat atakin a chul hliau hliau a.

Nui sang hian Kader-i chuan, "Nang ang pasal ka nei hi chu ka vannei takzet a ni, min kalsan miah suh aw, Orhan?" tiin a pasal chu a en ngawih ngawih mai a. "Ka kalsan ngai lovang che, ka veng him ang che, i bulah ka awm reng ang. I tello chuan ka awm theilo, nang chauh hi ka hmeichhe hmangaih awmchhun i ni." tiin Orhan-a chuan a lo chhang a.

***************

Sedat-a chuan afapa chu hruaiin chumi zan chuan VEysel-a in lam chu ava pan ta a, kawngka a han kik karh karh a. Hmeichhe naupang hian a lo hawng a, "Mami, hei hi Pu VEysel-a te in a ni em?" tiin Sedat-a chuan a han zawt a. "Aw ni e.." tiin naupang chuan a lo chhang a. Mehmet-a chu a melh a, "Lo lut rawh, Mehmet." a han ti leh nghal a.

Mak ti tak chuan, "Engtin nge ka fapa hi i hriat a?" tiin a han zawt a. "Keimah chuan ka hrelo, apu hian min hrilh a." tiin a lo chhang leh a. Veysel-a pawh chu a lo kal a, "Lo kal rawh, Sedat. Ka lo nghak reng che u alawm, nangpawh ka lo lawm ache, Mehmet." zaidam tak chuan a rawn ti a.

A tunu bulah chuan, "Bawihte, i room ah va kal tawh rawh le." a ti a, hmeichhe naupang pawh chu thuawih takin a kal ta a. Veysel-a inthawina room ah chuan Sedat-a te pafa leh Veysel-a te chu inhmatawnin an thu a, alaih takah chuan plate hlai tak mai hi a awm a, plate chhung lai takah chuan glass bur hi a awm bawk.

VEysel-a chuan paper ah hian thil a ziak a, paper chu thlep tha in ahma zawna burah chuan a thun a. Tui a thun khat leh a, fian lian tak hian tui chu a han chawk a. Paper te chu a sawm ta nuai nuai mai a, tui chu a nawi ta vek mai. Veysel-a chuan Sedat-a chu enin, "Sedat, nang hian min hre ngai hauh lo. Mahse keichuan i fapa nen hian nimin lawk khan ka bulah inlo kal tih ka hria a ni." a han ti a.

Sedat-a chuan mak a ti hle mai, "Enge awmzia? Kan lo kal lo reng reng." a lo ti hu mai a. "Ka hmu thei a ni, in pahnih hian ka hmu che u a ni. Ngaithla rawh, kan Quran Bu thianghlim a bung hmasa bera lo lang chu FAtiha a ni.Fatiha awmzia chu a bul tanna, atir(the beginning) tihna a ni. Kha chang(verse) ah khan Pathian chuan 'Lei leh van siamtu, engkim siamtu chauh hi Pathian in nei a, chu chauh chu in fak tur a ni. He khawvel hi a lal ram a ni a, engkima thuneitu a ni.' tiin a sawi a. Prophet pakhat sawi leh dan chuan, 'Quran bung leh chang reng reng ah LAL RAM an ziak lang a nih chuan mifing tak tak te, chhia leh tha hria te chenna hmun angin a sawi theih a ni.' a lo ti ve bawk. Chung mite chu chi 4 in a sawi theih a, mihringte, vantirhkohte, Setan-a leh ramhuai djinns te an ni. Nang leh i fapa hi ramhuai in a chenchilh che u a ni, i fapa hi nang aia chaklo zawk a nih avangin an tibuai nasa zawk bawk. Hetia an tihna chhan chu Mehmet-a hi ka bula i rawn hruai theih nan a ni, mahse an thil tum ber zawk chu nangmah nena inzawm reng an duh vang a ni thung. A chhan chu hna an pe duh che a ni, an cho che a ni." a han ti charh charh mai a.

Sedat-a chu a mangang hle mai, "Ka pu, khawngaihin min pui rawh. Keimah vanga ka fapa in a tuar hi ka duhlo a ni, kan thi dun mek zel chu  anih hi. KA fapa neih chhun a ni asin, ka pu." tiin a tap a. Veysel-a chu a han thaw hak a, "Ka theihtawp ka lo chhuah ange, nangpawhin i rinna lo ti nghet zual sauh saih ang che. Heta hna an pek che hi enge a nih ka la hrilhfiah ang che, mahse tunah chuan midang ka rawn ve hmasak phawt angai a ni. Awle, in kal thei tawh e. Naktuk chhunah inlo kal leh dawnnia, mangtha phawt ule." a han ti leh a, Sedat-a te pafa pawh chu an haw ta a.

****************

Orhan-a chuan duat taka Kader-i sam khuih sak pah chuan, "Naktukah i u Sedat-a te pafa chaw eiah kan sawm dawnnia, hmana inngeih taka kan inkawm ho thin ang khan inkawmh ho leh ka duh a ni. Zan a lo rei a, mut zai an rel ve ta a. Zanlaiah chuan Orhan-a nu, Hatice-i chu khum atang chuan a tho a.

Bathroom lamah kalin darthlalang hnunga a fapa Orhan-a dah, an nupa thlalak inzial, hruia intawn chu a la chhuak a. Sakawr bakcheh la lehin toilet lamah chuan a phei pui a, thlalak inzia chu a chep sawm vek mai. "Davut, Duhtak...tho teh." tiin a rak chiam chiam a, Orhan-a pa pawh chu a rawn harh a.

A bulah chuan a nupui Hatice-i chu a lo thu a, a lo tap hluam hluam mai. A tho vat a, "Tinge duhtak? Tinge i tah a?" tiin ava zawt a. "Ka mumangah Orhan-a ka hmu a, ka ngai emai. Va ko rawh, hetah lo kal tir rawh." tiin a tap vak vak mai a. "Nilove, mu phawt rawh. Hahdam rawh, duhtak." tiin Davut-a chuan a mut tir leh ta a.

***************

(FRIDAY)

Atukah chuan Orhan-a pawh hna lamah a buai leh ngei mai, employee te chuan hna an thawk sup sup mai a. Sedat-a hnathawk lai chu ava pan a, "Sedat, ka ziaawm ve deuh tawh a. Ahma khan ka lo ti lungawilo che a nih chuan ka tihpalh lutuk, min ngaidam dawnnia. Naktuk ah Mehmet-a nen chaw lo ei ula, ka ngai lutuk che u." inthlahrung tak chuan a han ti a.

Chutia a mize inthlak thut chu Sedat-a chuan mak a ti hle mai, "Awle Orhan, Mehmet-a pawn a ngai lutuk che alawm." tiin  alo chhang ve mai a. "Engkim hi a pangngai angin awm leh se ka duh ani, Mehmet-a enge a an?" tiin a han zawt leh a. "A tha e, a dam tha leh thuai ang." tiin Sedat-a chuan a lo chhang a.

"Ni e, kan hun tawn khan a zir lo bawk em a ni. I thin ka lo ti rim a nih chuan min ngaidam dawnnia, ka ngai thei khawp mai che. Sedat, naktukah Mehmet-a nen chaw lo ei ta che u?" tiin a zawhna ngai bawk chu a  han zawt leh a, Sedat-a erawh a ngaih a thalo takzet. "Hman ang khan inngeih takin awm leh ang, ka ngai lutuk che u." a han tihzawm leh nghal a.

Ngaih tha lo tak chuan, "Awle thianpa, Mehmet-a pawhin a ngai che alawm. Pawi i tih loh chuan lunch zawh ah ka chhuak lawk dawn a, i phal em?" tiin a han dil a. "Tehreng mai, i kal dawnnia. Pathian zarah kan tha leh mai ang, nih phawt le.." tiin a kalsan ta a, Sedat-a chuan a en zui vawng vawng mai.

****************

Nu pakhat, a hming Kevser-i chu Scholar Veysel-a te inah chuan ava kal a. Kawngka a han kik a, Veysel-a tunu chuan  alo hawn sak a. "Lo leng rawh, Api Kevser." a lo ti a, Kevser-i chu  alut a. Veysel-a inthawina room ah chuan Veysel-a nen chuan an inzui lut a, an thu dun a. Kevser-i chuan a hma zawn chu a han melh run mai a, "An lo kal.." a ti zawi sap mai.

Chuveleh kawngka a rawn in kik dat dat a, Sedat-a te pafa an lo ni a. Kevser-i nen an pali chuan an han thu khawm a, Kevser-i chuan meilingah chuan thir bel chu a han chhuang a. Thir bel chhungah chuan thir lang hi a dah a. Veysel-a chuan Sedat-a bulah chuan, "Ka sawi ang zelin lo sawi ang che." a ti a.

Thu mak pui pui chu an chham dun a, chutah Kevser-i pawh chuan rawn chham ve in a rawn phun ri su su mai a. A thu chham pah chuan Kevser-i chuan ahma zawn taka thu, Mehmet-a chu a en reng bawk a. Mehmet-a pawhin chiang takin  a lo en ve a, an chham ring telh telh mai lehnghal a.

Chutah zau tak hian Mehmet-a chu a rawn ang vak a, a au ta ruah ruah mai. Sedat-a mangang chuan va ban a tum a, mahse Veysel-a chuan a lo phal tlat lo. Veysel-a zawk chu a tho a, Mehmet-a khabe chu a va dawm chho a, Mehmet-a pawh a ngawi ta. An thir tlang chhuan pawh chu a lo sawr vek tawh a, a phek hian a phek vek mai.

"Keini aiin an taksa a chak lova, hmuh theihloh chu kan awih ngailo ang hi a ni velo. Anni chuan engmah an hrethiam velo a ni, SEdat. He buaina chingfel tur hian a mal te te a kan biak hi a remlo maithei, min hrilh ru a, hriatthiam kan lo tum mai thin a ni. Zantina i kal ziahna, mahse i luh thei miah lohna in(house)a awm a ni. Chumi hmunah chuan hna chu thawh tir che an tum a ni, zanin hian zanlai a thlen hma chu Mehmet-a room ah i nghak tur a ni. Hriattir i nih hunah chauh va kal ang che, hetiang amulet ang chiah hi i hmu anga, mahse hei ai hian a lian zawk ang. Chu thil chu hal la, engkim a tawp a nimai. Mahse thil rapawm leh hlauhawm tak tak i hmu dawn ania, hlau reng reng suh ang che. I chunga thleng tur hi i rinphak bak a ni dawn ania, Pathianin awmpui che rawh se." Veysel-a chuan a ti a.

*************

Zanlai ah chuan Hatice-i chu a tho leh a, pawnah chuan a chhuak a. Pawna lung lian tak pakhat chu a han pawm nawlh a, "Ka denghlum dawn che, i ruh ka deng tliak vek dawn. Ka that vek dawn che u, in vaiin in thi ang." tia phun nuah nuah chung chuan an ar in lamah chuan a luh pui a.

Chutah an ar vulh lai te chu an vai mai chuan chu lungtum lian tak hmang chuan a deng hlum ta vek mai a, thawm pawh a ring ngei mai. Reilote hnuah chuan thisen kai hnuang hian a lo chhuak leh a, a hmel chu a rapawm tawh ngei mai. A hmel pangngai a ni tawh hauh lo, a mit te chu a dum run mai a.

Chutah lungtum pawm chung bawk chuan an inlam chu a pan leh ta a, an nupa room ah chuan a lut a. A pasal Davut-a chu a lo la mutui nasa mai, a han en vang vang a. Phun sep sep pah chuan lung chu a han chawi kang a, a pasal Davuta hmai zawnah tak mai chuan a han deng dawt mai a, thisen a per chhuai mai.

Orhan-a chu a harh zawk a, a thu chhuak hlawl mai. A tho a, inhnuai lamah a chhuk a. An landline phone chuan a nu te chu ava phone vat a, mahse tuman an la thei lo. A ngaih a thalo takzet, a insiam nghal mawlh mawlh a, anu te inlam pan chuan a chhuak ta nghal a. Chutih lai chuan Kader-i erawh a harh ve eih lo, tui tak chuan a la muhil bawrh bawrh mai.

*************

A fapa tui taka a muhil lai chu Sedat-a chuan a en ngawih ngawih a, "Thil hlauhawm tak tak i hmu dawn a, hlau miah suh ang che. Hriattirna i dawn hunah va kal la, amulet chu va hal ral vek ang che." tia Veysel-a'n a hrilh chu abengah chuan a ri nawn mawlh mawlh mai. A khum lam a pan a, a mu ve ta a.

A mutthilh lai chuan pawn lama baltin(alluminium bucket) in khawng ri karh karh chuan Sedat-a chu a ti harh a, a meng kawk mai. A fapa mutna lam chu ava hawi a, muhil reng tho si chuan Mehmet-a chuan a kut chu khum hnuai lamah dahthla in a kutzung tang chu a lo ti che a. A kut zung tang a tih chet rual zel chuan pawn lama baltin chu a lo inkhawng ri ve zel mai a, mak a ti kher mai.

Chutih lai chuan anu a lo lut thut a, "A hun a thleng ta e, ka fapa. Kal rawh..Kader-i chu va chhanchhuak rawh le." a rawn ti ta mai a. A fapa pawh chuan, "Va chhanchhuak rawh, Apa.." tiin a rawn phun ve sup mai. Sedat-a chuan mak a ti ngei mai, kawngka lam ava hawi leh a, anu chu a lo awm leh tawh miah lo.

Anu room lamah chuan ava phei a, anu chu a lo muhil tui nasa mai. A kai tho a, "Nu, Orhan-a te inah ka kal dawn. Mehmet-a bulah sawn lo awm la, lo mutpui ang che." a ti a, "Fimkhur ang che." tiin a nu chuan a lo chhang a, Sedat-a chu a chhuak ta a. Pawna a han chhuak chiah chu a ding chat mai, an inkawtah chuan baltin chu a lo awm tak tak a.

***************

Orhan-a pawh chuan anu te in chu a thleng ta a, kawngka chu a lo inhawng huau mai. A lut a, "Ka pa?" tiin a han ko vak vak a, mahse chhangtu an awm lo. Inchhung vel chu a han enkual a, an land-line telephone te chu chhuatah chuan a lo kehdarh nuai mai. Apa te room ah ava lut leh a, a thil hmuh chuan a ti mangang kher mai.

Apa chu khumah chuan a lo mu a, a lu zawnah chuan lung lian em em mai hi a lo awm bawk a. A hmai chu hmuh tlak a awmlo, thisen hlirin a lo khat a. "Ka pa.." tiin a en ngawih ngawih ringawt a, khumah te chuan thisen a kai nuai mai. Anu chu a zawng leh ta a, mahse a hmu bawk silo.

Bathroom lamah kalin darthlalang hnunga a hma zan lawka a thil thuhruk chu a han en leh a, a lo awm tawh miah lo. Choka lamah ava phei leh a, thleng silna bulah chuan anu chu amah hnungchhawn zawngin a lo thu khur mai. A bulah thutthlengah chuan baltin a lo awm a, a khaina chu a mahin a lo in vaw ri khep khep mai a.

"Nu..Ka nu.." tiin ava bia a, mahse a lo chhang let hauh lo. Chutah a hmel ava en chiah chu a rap ngei mai, anu hmai chu a lo sawr vek a, a dum thluah thluah bawk. Asam te chu a lo tla nuai a, nunna a nei tawh lo tih a hriat hle bawk. A bul velte lah chu a rimchhe em em a, Orhan-a chu a hrilhhai takzet a ni.

*************

A thleng tep tawh tihah chuan Sedat-a chuan Baltin inkhawng ri thawm a hre leh ta tlat mai, thawm lo chhuahna lam chu ava hawi phei vat a. Kawngsirah chuan pitar hmai dum run pahnih hi an lo thu a, pakhat zawk chuan baltin chu a lo khawng ri vak vak mai. Chutah pakhat zawk chu a rawn hawi thut mai a, Sedat-a hlau lutuk chu a kalsawn nghal vang vang mai.

Orhan-a te in chu ava thleng a, "Orhan..Orhan.." tiin a ko vak vak a. Inchhung lamah chuan a nau Kader-i a lo awm a, Sedat-a aw a hriat veleh chuan a tho nghal vat a. Kawngka chu a kik a, "Orhan, Orhan lo hawng teh." a ti vak vak a, mahse chhangtu an awm silo. Atawpah chuan kawngka chu a ti chhia a, alut ta a.

Inchhung a han lut chiah chu a rimchhe ngei mai, Kader-i la chuan a lo en reng a. A rimchhiat em avang chuan Sedat-a chu a ner nung mai, "Orhan..Orhan.." tiin a ko leh vak vak a. Ahma zawn takah chuan Kader-i chu ava ding a, mahse Sedat-a chuan a nau Kader-i chu a hmu lo amaw tih mai tur chuan a ngaihsak miah lo.

Chutia a hawi kual vak vak chu ahma zawna ding, a nau Kader-i chuan mak a ti em em a. A va kal hnaih deuh pawh chuan Sedat-a chuan en pawh a lo en miah lo, Orhan-a chu a la koh chhunzawm reng a. Chutah Orhan-a inthawina pindan lam chu ava pan ta a, Kader-i chuan  alo hlauthawng ngei mai.

Pindan chhungah chuan luh a han tum a, mahse a lo inkalh tlat mai. Chutah a han tlawh hawng thuai a, a uak thawt mai. Inchhung rim ai mah chuan chu pindan chhung chu a lo rimchhe zawk a, mitthi ruang tawih rim a nam rum rum mai. Hnar hup chung chuan a lut a, a hnungah chuan Kader-i chuan a rawn zui ve bawk.

Pindan chhung chu a thim ruih mai a, bati a lo inchhi thluah mai a. Chhuatah te chuan inthawina hmanrua niawm tak te chu a let rem rum mai a, bangah te chuan Orhan-a leh Kader-i te thlalak a lo intar teuh mai bawk a. Dawhkan sei tak maiah chuan ruang niawm tak, puanduma inkhuh hi a lo mu zuar mai bawk a.

Sedat-a chuan puan chu a han hlim a, puan hring(green) in a lo intuam hnan leh hi a lo ni. Puan hring chu a han hlip leh a, puanvar ina lo la inkhuh hram a. A awm zawnah chuan amulet chu a lo awm a, hruiin a lo intawn bet a. "Amulet i hmu anga, chu chu i hal tur a ni." tia Veysel-a'n a hrilh chu a hre chhuak zawk mai.

Chutah puan var chu a han hlip leh a, a phu chiang kher mai. A nau neihchhun, a duat em em Kader-i ruang a lo ni reng mai. Ahmai chu a dum hian a dum vek a, a tawih vek tawh bawk. A mit chu a eng bial pup mai a, a rimchhe em em lehnghal. "Nilo..Bismillah Bismillah..Lalpa min venghim rawh...anitheilo.. Orhan, engthil nge maw i tih le?" tiin Sedat-a chu a rak chel chul mai.

Kader-i chuan ama ruang ngei chu a hmu ve ta, mak a ti lutuk chu a meng bial kawk kawk mai a. Tap chungin Sedat-a chuan amulet chu a la a, meialhah chuan a paih ta a. Chuveleh mei chu a rawn alh sang vaka, a t(r)ek ta chuai mai. Kader-i chu a dak awrh a, a au ta vak vak mai a. Chutah zet zawng, Kader-i chu Sedat-a chuan a hmu ve thei ta.

A hlau lutuk chu a thaw hrawk hrawk a, inchhungah chuan thli a rawn thaw vak vak mai. Pindan chhung chu a nghing lawih lawih mai a, Kader-i hnungah chuan ramhuai lian em em mai, sam thur vek hi a lo lang thut a. Kader-i chu hnunglam atang chuan a rawn kuah thut a, Kader-i hmel pawh chu a rawn dum tial tial a.

Thim zingah chuan chu ramhuai dum lian zet chuan Kader-i chu a hnuk liam ta, boruak chu chawp leh chilhin a reh nghal diak mai bawk. Chuveleh Orhan-a chu a lo lut a, "Sedat, engthil nge i tih tak hi?" tiin a rawn au vak vak mai a. KAder-i ruang hmaah chuan a thingthi a, "Sedat..engthil nge i tih tak hi?" tiin a tap zawih zawih mai a ni.

***********

ENGE A AWMZIA NI TA ANG?

"Ka hlau em em a, chet pawh ka che tha theilo hial a ni. Mu leh mal pawh ka nei thei lo, ka thluak chu a buai vek mai niin ka hria. He thil thlen hnuah Orhan-a thil min hrilh te kha, tun thleng hian awih harsa ka la ti a ni. Ka nuna thil thleng ah te hian hriat reng ka duh tawh loh, mahse ka theihnghilh theih siloh chu he thil pathum te hi an ni. Ahmasa berah chuan ka nupui Melek-i'n mittui tla zawih zawih a ka fapa tha taka enkawl tura a thih hma lawka min chah lawm lawm lai kha a ni a, a pahnihna chu ka fapa Mehmet-a'n APA MIN CHHAN RAWH tia mangang taka a au kha a ni. Tin, a pathumna chu hei hi a ni, he thil rapthlak tak hi a ni. Kader-i, accident thlen hnu atanga thla hnih liam ta a anmahni inchhung ngeia ka va hmuh kha  a ni. Kader-i kha kan accident khan a thi daih tawh a, keimah ngei hian ka phum a ni. Mahse Orhan-a chuan a pawm thei lova, Kader-i ruang chu a lai chhuak leh a ni. Tichuan a ruang chu inlamah a haw pui a, a chenpui chhunzawm ta a ni.  Mahse Kader-i ruang chu chenpui ringawt a duh tawk ta lova, KAder-i chu mi nunga siam leh a tum a. Ramhuai hnenah inthawiin a nupui chu lo tho leh turin engpawh a huam thu sawiin a dil ta a ni. Tichuan Kader-i ruang chu a thukru ta a, Kader-i aiah ramhuai pakhat chu Kader-i anga awm luih tirin nupuiah a nei ta a. A bual fai thin a, nupa nun a hmanpui thin bawk. Kader-i nunhlui te chu hriatchhuah tir a duh ngai lova, a nupui Kader-i angin a awm tir ta zel a. Achhan chu a hmangaih em vang a ni, chu thlarau pawh chuan Kader-i amaw a inti ta hial a ni. Hun alo kal zel a, Orhan-a chuan a ramhuai awmpui chu Kader-i maw a ti tak tak hial tawh a, amah hmu turin chaw eiah te min sawm ta hial a ni. Mahse ramhuaite chuan an fanu, Kader-i anga awm mek chu laklet leh an lo tum ve reng bawk a, dawi thil a hriatte hmang chuan Orhan-a chuan a lo beilet thin a, an in pawh chu ramhuaite kaltlang theihloh nan a hlan thianghlim ta hial a ni. Ramhuaite chu an thinrim a, phuba lak nan Orhan-a nu leh pate chu thah an tum ta a. Chu chu hria in Orhan-a chuan a theihtawp chhuahin a nu leh pate chu venhim a tum a, mahse a venghim zo ta lo a ni. Keipawhin ka hrethiam ta, khang thil rapthlak tak tak te, ka mumang rapthlak tak tak te kha Orhan-a dawi hman vang vek a ni. Heng ramhuaite hian Orhan-a thiltih lai chu ti tawp a, an fanu, Orhan-a'n Kader-i anga nupui a neih chu an hnena pe kir leh turin min duh a ni tih ka hrethiam ta. Orhan-a Lalram atanga an fanu chhanchhuak tur chuan Scholar VEysel-a hnenah min hruai thleng a, an hna min pek pawh chu an fanu chhanchhuah a ni tih ka hrethiam ta. He ka thil tawnte zinga mak ka tih ber erawh chu Orhan-a dawi ka tihchhiat hnu kar hnih lek a ka fapa Mehmet-a dam ta hmak kha  ani, a kal thei a, a tawng thei tawh bawk. Pathian vang liau liau a ni, Lalpan min pui a ni tih ka hria. Nitin mai chuan PAthian hnena lawmthu sawina chang ka hriat ve phah ta a, ka lawm takzet. Orhan-a erawh a reh hmak a, kar engemaw zah a liam hnu chuan chin hriat lovin ka bo ta hmak a ni. Kan inhmu leh ta miah lo, mi thenkhat chuan a zin bo an ti a, thenkhat erawh chuan a hmangaih, Kader-i nena intawng leh turin a inthat ve ta a ni an ti bawk. Orhan-a hian he dawi a hman chhan hi mi tihnat a tum vang leh a rilru chhiat vang a ni hauh lo, a nupui Kader-i a hmangaih em vang zawk a ni. Ramhuai fate zinga mi, ramhuai hmeichhe pakhat chu dawi hmangin a ko chhuak a, ramhuaite lenna ram atangin khawvel ah a hruai lut a. Mihring anga siamin a nupui Kader-i angah a ngai ta a, chu ramhuai pawh chuan KAder-i angah inngaiin Orhan-a chu a hmangaih ve hman hial a ni." tiin Sedat-a chuan a diary chu a ziak zo ta a ni.

*************

THU BELH :

A thawnthu hrethiam chiah lo in awm maithei a, a letlingtu ngei hian ka thiam ang tawkin ka han sawifiah ve lawk ange. He thawnthu hi a tak tak a ni a, mahse a hmuhnawm nan te, a ngaihnawm nante leh mi ina an hlut theih nan a ziaktu diktak te hian an phuahbelh nual a, dawt vek a ni e tihna a nilo. A thawnthu tir lama Sedat-a te pafa leh Kader-i te an accident khan Kader-i chu a thi daih tawh a, a phumtu pawh a u Sedat-a ngei a ni.

Chutia a nupui a thi ta mai chu Orhan-a chuan a hrethiamlo hle a, a pawm thei mawlh lo. A nupui thih chhan chu Sedat-a thiamloh angah ngaiin a thiantha ber Sedat-a chu a haw ta em em a, biak pawh a be duh ta hauh lo mai a. A nupui tellova awm chu a thei ngang bawk silo, a ruang chu a lai chhuak leh ta tawp mai a ni.

Orhan-a hian sakhuana lam leh dawi lam thil hi a lo hre thui angreng phian a, tichuan Kader-i ruang chu a kaihthawh leh theih takin tiin ramhuai hnenah chuan a inthawi ve ta a ni. Mahse kan hriat theuh angin mitthi kaitho thei awmchhun erawh kan Lal Isua Krista chauh a ni a, ramhuai chak ber pawhin a thei ve miau silo.

Tichuan ramhuaite tanpuina a dil a, ramhuaite pawh chuan a dilna chu lo pawmsakin an fanu pakhat an pe ta a ni. Chu an fanu ramhuai chu midangin an hmu ve thei lova, Orhan-a chiahin a hmu thei a ni. Mahse ramhuaite nena an inremsiamna chu bawhchhia in Orhan-a chuan an fanu ramhuai chu nupuiah a nei ta a, Kader-i angin a awmtir tawp mai a ni.

Chu ramhuai pawh chuan a tir chuan Orhan-a chu tunge a nih a hrelova, ramhuai a ni tih pawh a inhre hek lo. Orhan-a chuan a nupui Kader-i a nih thute a hrilh a, a awmzia chu dawt a hrilh tihna a ni. A bual fai thin a, nupa nun te a hmanpui bawk a. Chu ramhuai pawh chuan mihring amaw a inti hial a, Kader-i angah a inngai hmak tawh.

Ramhuaite chuan an fanu chu laklet leh an rawn dil ta a, mahse Orhan-a chuan a phal ta hauh lo mai a. A dawi hriat ang ang hmang chuan an in chu a hlan thianghlim a, ramhuaite chuan theihtawp chhuah mahse an fanu chu an hruai let thei ta lo a ni. Orhan-a chuan chu ramhuai chu a thuhnuaiah a dah a, tumah be lo tur leh chhuak lo tura a tih nachhan pawh midangin an hmu ve thei dawn silova, a nupui ramhuai chuan a hrethiamlo ang tih a hlau a ni.

Sedat-a a rawn luh pawh khan kha ramhuai khan tunge a nih a hre hauh lo, Sedat-a'n a hmu ve thei miahlo te pawh kha mak a ti em em a. Khatia a hnung atanga rawn man tu ramhuai dum run mai pawh kha ama nu tak tak, ramhuai Lalnu ber a ni. Ramhuaite chuan Orhan-a chu an hneh tak silovah chuan phuba lak nan tiin Orhan-a nu leh pa, Hatice-i leh Davut-a te chu thah an tum ta a.

Chu chu Orhan-a chuan a lo hria a, theih tawp chhuahin venhim a tum a. An thlalak zial an bathroom darthlalang hnunga a zeh te kha anu leh pate ramhuai laka chhan a tumna vek a ni a, mahse ramhuaite chuan anu chu an dawi a, thlalak chu an cheh chhiat tir vek ta a nih kha. A pasal DAvut-a chu an thah tir a, a hnuah amah leh amah an inthah tir ta bawk a ni.

Mahse an thil duh ber erawh Orhan-a lak atanga an fanu chhanchhuah chu a ni a, anmahni pui turin Kader-i u Sedat-a chu an pan ta tawp a. Tichuan Sedat-a pawh chu a mumang thleng thleng chuan an tibuai ta a, Puithiam Veysel-a hnenah an hruai thleng hial ta a nih kha. He thawnthu ah bik hi chuan ramhuaiten Orhan-a hi an hneh ngang lo zawk a, mahse Sedat-a puihna hmangin an hneh hram ta thung a ni.

************

THE END