SICCIN-2 (Islamic Horror) Written by : Alper Mestçi Translated by : Aaron Malsawmdawngzuala (Based on a true story)

 SICCIN-2

(Islamic Horror)

Written by : Alper Mestçi

Translated by : Aaron Malsawmdawngzuala

(Based on a true story)

**************

Zanrei lam deuh tawh a ni a, pa pakhat hi an inkawta tuikuah bulah chuan a insil mawlh mawlh a. A kut leh ke te chu a silfai a, a phun bul bul bawk a. Bowl pakhat la in tuikuah sira acid tui bur chu a la a, bowl ah chuan a thli chhuak a. Inchhungah a lut leh a, chutah naute a rawn tap ta vak vak mai.

Pawnah chuan bowl ruak nen a rawn chhuak leh a, acid tui bawk chu a thli chhuak leh a. Tichuan ngil takin a ding a, bowl chu a lek kang a. Eng engemaw chu a han chham ri leh bul bul a, chutah bowl chhunga acid tui chu a in ta mai a. Bowl chu a thlauh nghal, a kawchhung a rawn sa ta pup pup mai.

A hrawk a dawm vawng vawng a, a hmui te chu a rawn kang tan ta a. A thingthi hnawk a, a thaw tha hleithei lo. A hrawk te pawh chu a rawn kang tan a, a chil phuan a tla zawih zawih mai. Ana ti lutuk chu a lu a dawm vawng vawng a, a taksa pum mai chu a na chhuak vek tawh. Chutah a uak ta tuar tuar mai, a tawpah chuan a tlu hnawk a, a thi ta der mai.

****************

Turkey rama Cannakalle district huam chhunga khaw pakhat, Yenice khuaah chuan nupa inhmangaih tak mai, Hicran-i leh Anand-a te chu an awm a. Fapa thla 10 vel mi an nei a, an duat hle. Tuk khat chu an fapa Birol-a chua a tlei lo hle a, Anand-a lah a hna vangin a buai em em a, inlamah a awm ve hman meuh lo.

Nu ber Hicran-i chu a buai hle a, in tih fel ngai bawk, Birol-a lah a lo tap reng bawk nen. A fapa chaw eitur chu a siam mawlh mawlh a, Birol-a chuan a lo ngen ve sek bawk nen. Anand-a hi Hotel-a thawk a ni a, receptionist a ni. Ani pawh chu a buai em em a, a duty pui tur a thianpa lah a lo la thleng thei bawk silo.

Rei fe hnuah chuan a lo thleng ve ta, "Khawnge i awm daih a?" tiin Anand-a chuan a lo vin nghal hlur mai a. Thaw hluam hluam hian a thianpa chuan, "Ka chau lutuk a, ka alarm in min ti harh zolo alawm." tiin chhuanlam a rawn siam nghal a. "Thil pakhat chiah min tihsak turin ka dil che a, mahse engthil nge i tih tak hi? Ninawm lutuk, room no 207 khan blanket thar a duh thu a sawi a, lo buaipui ang che." tiin Anand-a chu a insiam nghal sawk sawk a.

A duty shift a zo tawh bawk a, a haw thei tawh. Night shift a ni a, a thianpa hian a rawn thlak chiah tihna a ni. Anand-a chuan, "Ka kal ania aw.." tiin a thianpa chu a chhuahsan ta a. In lamah chuan Hicran-i chu a la buai ngei mai, Birol-a chu a tap reng mai bawk si. Bed-room lamah chuan a pawm phei a, a fapa chu chhuatah dahin toys a khalh tir a.

"Bawihte, tah hian lo awm la, i chaw tur ka va siam ange.." tiin a kalsan ta a. A pasal Anand-a chu a phone a, "Hello duhtak, enge i tih?" a han ti a. "Hotel ka chhuahsan chiah.." a lo ti a. Nui sang chung chuan Hicran-i chuan, "Cake hi a tui hmel tehmai ania.." a han ti vel a. "I siam ania, a tui dawn tih chu a chiang reng alawm." a lo ti leh a.

"Nia, ka lawm e, duhtak." tiin a nui sen sen a. "Enge Birol-a a an?" tia a rawn zawh chuan, "Room ah a awm, toys a khalh mek. A hahthlak khawp mai, tukin zing atang khan a tlei lo lutuk a, engmah pawh ka ti hman lo." a han ti nuah nuah a. "Lo awmpui reng rawh, tlaiah ka lo haw anga, ka rawn chhawk ang che." a ti a.

"Thingpui tui tawk ka lo lum ang che..anih phawt le." tiin phone chu an dah ta a. Thingpui fe a han ban chu a tibaw palh a, "Awii leh.." tiin a huikhawm nghal mawlh mawlh a. Chutih lai chuan Birol-a au ri a hre tlat mai, "Birol.." tiin a tho nghal vat a. Birol-a awmna bula almirah lian tak mai chu a che ta luih luih mai, chu almerah lian tak mai chu a tlu ta ruah ruah a, birol-a chu a delh ta.

A delh chiah chu anu chuan a rawn hmu hman a, "Birol..nilo.." tiin a t(r)e chel chul mai a. Almerah chu laksawn tumin a han nam vak a, mahse a tha neihin a tlin ve silo. Thisen a rawn luang zawih zawih a, "Min pui ru..Lalpa..min pui rawh." tiin Hicran-i chu a tap hawm hawm a. Almirah lah chu a la sawn thei silo, kum em pawh la tlinglo Birol-a chuan a nunna a chan ta der mai.

*************

(THLA THUM HNUAH CHUAN...)

An fapa delh hlumtu Almirah chu an paih nghal vang vang a, an hunna bang chu a val kulh mai a. Hicran-i chuan Almirah an hunna bang val kulh mai chuan puanchhia chuan a hru mawlh mawlh a, chutah Anand-a a rawn lut thut mai. Rum zet hian a nupui chu a melh a, Hicran-i chuan a lo hlauh hmel kher mai. Thinrim tak hian, "Khatia a val hruk reh i tum avang khan ka fapa hi ka theihnghilh theih i ring em ni?" a ti khur khur a.

Mittui tla zawih zawih hian Hicran-i chuan, "Engemaw i sawi le, duhtak?" a lo ti tham tiak a. Anand-a chuan va panhnaiin a aia vin hian, "Ka theihnghilh mai i ring em ni?" tiin a vin leh khur khur mai. Tap chungin, "Anand, chutiang sawi suh..sawi tawh suh, ka ngen ache." a lo ti zawi sap a. Hicran-i ban ah chuan a tham vak a, "Enge Anand Anand..i tih vak vak a? Ka zawhna che chu chhang rawh.." tiin a vin vak vak mai a.

Hicran-i chu a tap ta hawm hawm mai, "Anand, thil thleng tur kha hre lawk ila ka kalsan phal i ring em ni?" tiin a kun ngawih ngawih a. Anand-a pawh chu a tap a, "Ka thinlung hi i tichhe vek a ni, min ti na a ni." a ti a. "Keipawh ka na alawm..ka na ngawih ngawih asin." Hicran-i chuan a lo ti ve bawk a.

Anand-a chu a au tuar a, bang chu a chum vak a. Tap chung hian, "Min that ani...kei hi min that a ni. Nang ang nu fimkhurlo lutuk hi lo piang velo tawp la tha tur, thi ve tlak i ni." a ti ta hrep mai a, chil chhak khumin a chhuahsan ta daih a. Chhuatah chuan thuin chhuak em em hian Hicran-i chu a tap zawih zawih mai a, "Lalpa..Lalpa...min la ve mai rawh..min that ve mai rawh." tiin a maimitchhing a.

Chutah bang chu a beng vak vak a, "Hre lawk ila ka kalsan bik lovang, hre lawk ila ka fapa kha ka kalsan bik lovang. Lalpa, a hrehawm emai...a hrehawm emai." tiin a au chel chul mai a. A fapa, a thih hma lawka a thutna lamah chuan ava bawkvak phei a, "Birol..min ngaidam rawh. Hre lawk ila chu ka kalsan miah lovang che, Bawihte...ka fapa. Aww..ka fapa duat, i nu hian hre lawk ila chu ka kalsan miah lovang che." tiin a fapa thutna puan phah chu a kuah ngawih ngawih mai.

Zan a lo ni a, Anand-a pawh chu Hotel-ah chuan a duty leh mek a. Customer te awmloh lai tak a ni a, boruak pawh a reh hle mai. A lung a leng em em a, a fapa chu a ngai takzet a ni. A phone a phawrh a, a fapa thlalak te chu enin video-a an lakdun te chu a en a. Birol-a hian "APA" tih a thiam hman a, apa a ko lai video chu enin chhuatah chuan a thu hnawk a.

A tap zawih zawih a, "Bawiha, ka ngai che...ka ngai lutuk che." tiin a phone chu a awmah dahin a tap hawm hawm mai. "Ka fapa, ka fapa...ka ngei che, lo let leh hram rawh." a ti a, a mittui chu a tla zawih zawih mai. In lamah chuan Hicran-i pawh chuan Birol-a thawmhnaw te chu a thlep tha a, a tah nasat em avang chuan a mit pawh a bui vek tawh.

Kawngka a rawn inkik karh karh a, a mittui te chu hru hulin kawngka chu ava hawng a. Mak tak maiin Anand-a chu thawveng zet hian a rawn nui lut vur vur mai a, "I tha maw, duhtak.." tiin Hicran-i chalah chuan a fawp a. Hicran-i chu a hrilhhai hle mai, chhan pawh chhang lo chuan a lo en hu ringawt mai a.

Sitting room lam pan pah chuan, "Ka rawn haw lamin ka unaupa nen kan inhmu a, a ngaihawm khawp mai." tiin a thu a. Hicran-i pawh chu a bulah chuan a va thu ve a, "A hming chawiin ka fapa hming Birol-a hi ka phuah thute ka hrilh a, a lawm teh asin." a ti ham ham a. Hicran-i erawh chuan mak ti tak hian a pasal chu a en reng a, sawi tur reng a hrelo.

Nui var var chung chuan Hicran-i chu a en a, "Hmu vela chu mak i ti ngawt ang, naupang chhia ang maiin min kuah chiam lehnghal. Lo leng turin ka sawm a, naktuka alo len tur thu min hrilh bawk a. Nangpawh minlo biak rawh a tih che kha....a hrim hrimin khawnge Birol-a hi? A mu tawh em ni?" a ti ta mai a.

Hicran-i chu a phu zuk mai, phawk hru hian a pasal chu a en a. Chu veleh kawngka a rawn inkik leh dut dut mai a, "Va hawng ta che.." Anand-a chuan a han tih chhunzawm leh zat a. Muangchang chuan kawngka lam chu ava pan a, chutah a pasal Anand-a aw ngei mai chuan vin zet hian, "Hicran, rawn hawng vat ta che mawle." a rawn ti tuar mai.

A phu zawk a, a thaw nghal hlawp hlawp mai. Sitting room lam ava pan lehnghal a, Anand-a hmel reng reng hmuh tur a lo awm tawh lo. A khur nghal zawih zawih a, kawngka hawnna chang pawh chu a hre tawh lo. A hawi kual a, inchhungah chuan tumah an awm der mai silo. "Hicran, lo hawn i tum lo em ni?" tia a rawn vin leh vak vak takah chuan Hicran-i pawh a harh zawk mai.

Kawngka chu ava hawng a, thinrim tak hian Anand-a chu lo lutin, "I va rawn hawng har ve?" a ti vin hlur a, a pindan lam chu a pan nghal a. A pasal kha a lo haw tawh reng si a, mahse a hnuah kawngka a rawn kik leh tho bawk si. A ngaih a thalo em em a, a hlau takzet a ni. Ahmaa lo lut kha a pasal damlai thla nge ni anga, thlarau sual zawk?

***********

"I mumang chu a nilo tiraw, Hicran?" tiin a thiannu Aynur-i chuan mak ti tak hian a zawt a. "Nilo, Aynur..ka mumang nise ka ti ngawih ngawih zawk asin. "A unaupa chu a thi tawh reng si a, avan mak ve...anihleh a unaupa thih hnu khan hetiang hian a awm ngai hrim hrim em?" tiin a zawt leh a. "Anand-a hi school a kal lai daih tawhin a unaupa hi accident vangin a thi tawh, kum 15 a liam tawh." tiin a lo chhang a.

"A unaupa hming chu Birol-a ve tho em ni?" tiin a zawt leh a.  "A unaupa hriatreng nan tiin a phuah a lawm." tiin a lo chhang a. Aynur-i chu a han ngawi vang vang a, "Enteh thiannu, ka kutah pangtichawr ka neih thin kha ila hria em? Kha kha keiman ka tidam reng reng hleinem, ka nu in Hodja pakhat, Abdullah hnenah min hruai a, a tidam daih a lawm." a han ti a.

Mahse Hicran-i chuan a lo ngaihsan vak hmelloh kher mai, a lo ner sak a. "I awih lo a ni maithei, mahse va kal ve chhin ila, thil engkim i hrilh anga." a han ti chuan Hicran-i chuan, "Engthil nge maw i sawi le, Aynur? Ka thil tawn mek te hi min hriatthiam pui velo em ni? Ka fapa hian vawt a tih hlauvin keimah zawk pawhin puan ka sin loh phah hial thin asin, a thawnhnaw te ka suk sak a, chutiang khawp chuan ka hmangaih asin. Khawngaihin chutian Puithiam chungchang mai mai chu sawi tawh lul suh, ka ring velo." tiin a kalsan daih mai.

**********

Hicran-i nu hi Nevruz khua ami a ni a, anu (Hicran-i pi) nen chiah an chengdun a ni. Zan a lo thleng a, Hicran-i chuan inlam a pan mek a. Chutia amah chiah a a kal lai chuan ral lehlamah chuan thawm a hre tlat mai, ava hawi phei chu a phu zawk a. An fapa delhhlumtu Almerah ngei mai chu kawngsirah chuan a lo ding a, a che luih luih mai lehnghal.

Chutah Almerah chu a rawn tlu ri dup mai a, a phenah chuan nun (catholic sister) niawm tak, puan dum veka inthuam, hmel rapawmzet mai pahnih te hi an lo ding run mai. An hmai chu a sen vek a, an ha a dum vek bawk. Hicran-i chu an lo melh run mai a, Hicran-i chuan a hlau ngei mai.Chutih lai chuan Motor lian tak pakhat hi a rawn tlan tlang fua a, chu ramhuai pahnihte chu an bo lehnghal daih.

Hlau tak chung chuan Hicran-i chuan a hijab chu a khum tha sawk sawk a, "Lalpa, min pui rawh. Min venghim rawh, min awmpui rawh.." tiin a phun mawlh mawlh a, a thaw hrawk hrawk mai. Hmanhmawh tak chuan a kal leh nghal vat a, kha ramhuai pahnihte pawh kha hmuh tur an awm chhunzawm ta lemlo.

In a thleng chu a pasal Anand-a, inkawta meizial lo zu khu hluah hluah mai chu ava hmu a. Anand-a'n a nupui a han hmu chu a melh rum lehpek kher mai, inthlahrung tak chuan Hicran-i pawh chuan a han melh ve a. Mahse thinrim hmel tak hian Anand-a chuan inchhungah a luh san ta daih a, hrehawm ti tak chung chuan Hicran-i pawh chuan a zui lut ve nghal a.

Hmeichhe na tuar a au vak vak ri chuan Hicran-i chu a ti harh zawk mai, a mit a han meng chu a harh chiang kher mai. A khum bul lawkah chuan hmeichhe pakhat hi chhuatah na tuarin a lo rak vak vak a, a bulah chuan haw lama a hmuh, hmeichhe pakhat, puandum sin chunga lo thu chu a hmu bawk a.

Chunu dul chu zau tak hian a thler duai mai a, chu ramhuai chuan a dul thler chu a lo la zen zui. Thisen a baw nuai bawk a, Hicran-i chu a thu chhuak hlawl mai. Chunu dul atang chuan ramhuai nu chuan nausen pakhat hi a rawn phawrh chhuak hlawl mai, thisen chu a chik hian a chik zawr zawr mai a.

Chunu na ti lutuk chu a au tuar tuar a, chutah Hicran-i chu a melh ta run mai. A kut rawn pharh chhuakin, "Ka naute..ka naute min pe let rawh." a rawn ti ta chhur chhur mai. Hicran-i hlau lutuk chu a t(r)e chel chul mai a, a tal ta vak vak mai. Hmanhmawh zet hian Anand-a chu rawn lutin light a rawn on a, "Enge ni ta?" a rawn ti a.

Hicran-i chu a thaw hlawp hlawp a, a hawi kual a, tuman hmuh tur an awm tawh lo. Rum zet hian Anand-a chuan a han melh leh khur a, a chhuahsan leh nghal daih. An fapa thih atang khan Anand-a hian Hicran-i hi a haw em em a, khum khata mutdun pawh a duh talo a ni. Hicran-i chuan a hmui a hup a, a tap zawih zawih ringawt mai a ni.

***********

Hicran-i nu zing bazar haw chuan, "Ava vawt ve mawle, kan thing tuahtur te pawh hi an vawt thlur mai." a ti lut nuah nuah a. Anu (Hicran-i pi) chuan puan a lo thui mawlh mawlh a, ava pan hnai a. "Ehe, ka nu, i zo tawh em ni? Kum 35 chhung zet chu mo ah ka lo tang ve tawh a, hetiang thil hi tuman min la tihsak ngailo. Ni e, Hicran-i erawh ka sawi tello ania." tiin a nui a. Hicran-i pi hi a tawngthei lova, a biangah hian ser chiang takin a awm bawk.

*************

Hicran-i chuan a fapa Birol-a thawnhnaw te chu a su a, pawnah chuan a zar chhuak a. Anand-a chuan chokaah meizial zuin a mekh ngai a lo melh reng a, Hicran-i chuan ava pan hnai a. Inthlahrung tak hian, "Anand, thingpui i in duh em?" a va ti dek dek a. Mahse Anand-a chuan a lo chhang duhlo, a bulah chuan ava thu a.

"Anand, khawngaihin min be ve la...min biak i tum tawh lo em ni?" a han ti leh a, Anand-a chuan en pawh a lo en duh lo. Rilru na tak chuan a tho leh a, a room lamah a phei a. A insiam sawk sawk a, tichuan a fapa thlan ah ava kal ta a. Birol-a thlan bulah chuan thu in, "Bawihte, i nu ka lo kal ania." tiin a tap a.

Thlan lung chu a chul a, "Ka fapa, bawihte..a vawt i ti thei ngawt ang tiraw? Vawt i tura thei ngai silova, awww..ka va han khawngaih tak che em..min ngaidam tiraw? I nu hi min ngaidam thei tawh ang tiraw?" tiin a tap hawm hawm mai. Chutih lai tak chuan a hnung lam atang chuan thawm a rawn awm tlat mai.

An thlanmual hi ramhnuai tak mai a ni a, thingkung tam tak a awm bawk. Lehlam a hawi vat a, "Ka naute min pe let rawh.." tia phun sep sep ri a hre leh ta. Chutah thingkng kar atang chuan kha ramhuai puandum sin pahnihte kha an lo lang leh ta, an mitte chu a vung luk a, an hmai te chu a sen tulh mai. Chiang tak hian Hicran-i chu an rawn melh run mai a, an thle sawi vak vak lehnghal.

Hicran-i chuan a hlau ngei mai, rang takin a tlanchhe nghal vat a. Nilenga a kal kual hnu chuan a haw ve ta a, khua  athim ta der mai. Pawna Birol-a thawmhnaw a zar ho chu a lo bo vek mai, mangang takin inchhungah a lut ta nghal a. A roomah kalin Birol-a thingrem chu a han hawng a, a phu chiang kher mai.

Thingrem chhungah chuan thisen hlir hi a lo khat vek mai a, Birol-a thlalak a lo lang nelh nelh bawk a. Thlalak chu fimkhur tak chuan a han la a, "Nilo..ka fapa.." tiin a tap pur mai. Chutah thisen atang chuan nautelem bal tak leh hlui tawh tak (voodoo doll) chu a rawn lang leh ta nalh mai, Hicran-i chu a zuang tho zawk.

Rang takin room chu a chhuahsan vat a, pawn lamah a tlanchhuak nghal a. Tlangban a han en chu Birol-a thawmhnaw tamtak te chu a lo inzar leh vek bawk si, mak a ti kher mai. A thil tawn mek te chu a hrethiam lo hle a, a thla a muang mawlh lo. A thiannu Aynur-i thil hrilh chu  ahre chhuak zawk a, a phone ta nghal a.

*************

A tuk zingah chuan Aynur-i nen chuan Hodja inah chuan an kal ta a, Hicran-i chu a zam hle mai. "Engkim ka hrilh vek tawh, nizanah Hodja Abdullah nen hian phone in kan inbia a, engkim a tha vek mai ang." tiin a hnem mawlh mawlh a. Abdulah chu a lo kal ta, Muslim mipa-ina an khum thin, lukhum tereuhte chu a khum a, khabehmul var nalh tak a nei bawk.

"Lo lut rawh,  Aynur..nang erawh hetah hian lo awm hrih ang che." tiin Hicran-i chu a tawngtaina room lamah chuan a luhpui ta a. Pindan an han lut chu a thim ruih mai, tawngtaina bul sirah chuan naupang kum 10 mi vel, vun dang vek leh sam eng(yellow) vek hi a melh ngai melh rengin chhuatah chuan ngil at hian a lo thu ve reng bawk a.

Paper them chu lain, "Hetah hian i hming vawi thum ziak rawh le." tiin Hicran-i chu a pe a. Hicran-i pawh chuan chu paper them ah chuan a hming chu vawi thum a ziak thla a, tichuan Abdullah chu a pe leh a. Abdullah chuan Hicrani kutzung chal chu chelhin blade chuan a han zai sak a, thisen a rawn chhuak a.

Hicran-i thisen chu paper ah chuan a tat a, tichuan paper chu thlep tha in glass no ah hian a dah a. No chhungah chuan tui a thlit hnan leh a, tichuan maimitchhingin eng engmaw a han chham mual mual a. Tichuan kil khatah mipa naupang lo thu chu ava pan a, tui chu ava in tir a. A rawn let leh a, Hicran-i bulah bawk chuan a rawn thu leh a.

"Ka fanu, engtik atangin nge he buaina hi i neih?" tiin a han zawt a. "Kar hmasa atangin." a lo ti khur dar dar a. "I thiannu Aynur-i sawi dan chuan thlarau sualin a tihthaih che a ti a, hetiang thil hi chu a thleng tawh a nih chuan a tawp mai mai ngai lo ania." a han ti leh a. Zawite hian Hicran-i chuan, "Ka tawng hnem lutuk, Hodja. Anihna takah chuan ka naupan lai atang tawhin hetiang hi ka tawng thin, mahse ka hrechiang tawh lo..chubakah tun ami nen hi chuan a inang lo lutuk." a ti sap a.

"I thunlung kha inring reng rawh se, kan Pathian hian he i buaina hi a tihreh sak ngei che ka beisei. Ngaithla rawh, mi thianghlim Sumeyye kha kan sakhaw tana hmeichhe tuar hmasa ber a ni. Mi tenawm tak Ebu CEhil khan Sumeyye-i kha tan inah khungin nasa takin a sawisa thin a, kan PAthian Allah hi phatsan turin a vau thin a ni. Mohhamad-a hi i ngaizawng a, chuvang chuan a hnung i zui mai a ni...tiin a deuh sawh ngam hial a ni. Chutih lai chuan Sumeyye erawh chuan alo chhanglet a, tichuan Ebu Cehil-a hmaiah chuan chil a chhak a, chu chu a chil chhah hnuhnun ber a ni ta  a ni. Tichuan Cehil-a thinrim chuan a hriamhrei hmang chuan Sumeyye-i chu a that ta a a ni....min han hrilh teh ka fanu, Ebu Cehil-a kha nilo ta se, Sumeyye- hi tunge a nih kan hre kher angem? Eng angin nge kan hriat ang? Pathian hian ramhuaite hi a siam tel ve a, thil tha leh thalo kan hriat nan a siam a ni, min enchhin nan..a hnana thlamuang taka kan chawlh hma chu Pathian hian rinawm tak leh thu awih taka awm turin min ti a ni." a han ti dap dap mai a.

"Amen.." tiin Hicran-i chu a lo bu nghat mai. Tichuan Abdullah chu a han maimitchhing leh a, thu mak tak tak chu a han chham leh ta ruah ruah mai a. An hma takah chuan plate hlai tha tak, a chhunga tui tling puau mai chu a awm bawk a. Chutah naupang an bula lo thu ve reng chu a rawn tho thut a, Abdullah hmaah tak chuan a rawn thing thi a.

An hmaa plate chhunga tui tling puau mai chu a rawn che tan ta, chu naupang pawh chu a thaw rang ta tulh tulh mai. Hicran-i chuan  a hlau kher mai, plate chu a han en a. Plate-a tui tling chu a han en chuan tuia naupang thla lo lang chu a hmel a pangngai ta hauh lo, a mit a var vek a, a hmaiah te chuan thisen zam ang tak tak hi a kawm kual ruah mai. Mahse chu chu tuia athla ah chauh a ni, atakah erawh chuan a hmel ala pangngai reng.

Chutah naupang chuan ama thla chu a zu be ta a, mahse eng tawng(languange) nge a hman erawh Hicran-i chuan a hre thei lo. Chutah an tawng ring tulh tulh a, Abdullah pawh chuan a thu chham chu a chham ring tulh tulh a. A tawpah chuan boruak a rawn reh ta diak mai a, an ngawi ta thup mai.

Mak tih hmel tak leh hlauh hmel tak hian Abdullah chu a meng hrawk mai a, chu naupang pawh chu a chau kher mai. Abdullah chu a tho a, naupang chu kuahin room atang chuan a chhuah pui ta daih a. Reiloteah a lo lut leh a, Hicran-i bulah bawk chuan a thu leh a. "Ka tawrhpui tak zet che a ni." a han ti a. Hicran-i chuan a lu a lo bu nghat a, "Umm.." a lo ti sap a.

"I fapa chu vantirhkoh ten an awmpui mek e, thlamuang takin a chawl tawh e. Kan PAthian chuan vanramah, hmun nuam takah a dah e. Ka fanu, i ni te leh i nutei te nen hian in inbe ngai em?" a ti ta daih mai. "Ka nu te lam atangin Ni(aunt) pakhat ka nei a, a thi tawh a. Ka pa te lam atangin Ni pakhat ka nei leh a, mahse kan inbe ngailo." tiin a lo chhang a.

"Ngati maw?" a lo ti vat a. Hicran-i chuan, "Hmandeuh khan ram inchuh vangin ka nu nen an inhnial vak a, kha ta tang khan an inbe leh tawh lo." tiin a lo chhang a. "I pa ala dam em?" tiin a han zawt leh a, "Ka nautet laiin a thi..a intihlum a, ka hre ve hmanlo." a lo ti leh a. Abdullah chu a thaw hak a, "Hicran ka fanu, engkim ka hrilhfiah ang che." a ti ta a.

"Mahse hlau miah suh ang che, ngun takin lo ngaithla rawh. Natna engkim damdawi leh damna chu lei leh van siamtu awmpuina chauh a ni a, tunah hian nang hi tuten emaw anchhia an hlawh che a, i lakah dawi an hmang a ni. He dawi hming hi 41 Stitch Spell tiin an sawi thin a, hman a har rualin sut leh pawh a har em em a ni. Dawithiam nazawngin an ti thei lo, he dawi i laka hmangtu hi mi thiamtak leh hrezau tak mai nilovin, misual tak leh mi khawngaihna neilo a ni ngei ang. He dawi hi dawi zawng zawngah chuan a chak ber pawl a ni hial ang, ramhuai sual tak, hremhmun ami te nen an inthurual tihna a ni." a ti ta mai a. Hicran-i chuan a hlau kher mai, "Hodja..tunge ni ang? Tinge ka chungah kher?" a lo ti tham tiak a.

Abdullah chuan, "Nangmah hnaih tak ani, i thisen zawmpui. I pa te lam ami emaw, i nu te lam ami, i nutei(aunt) te zinga tu emaw ber thil tih a ni, chuvang ania nichin khan ka zawh che. He dawi 41 th(r)uikhawm (41 Stitch Spell) te hian tum bik an nei a, chu an thil tih tum zat pawh chu 41 tho a ni. Keichuan ka hrelo, eng ber hi nge i chungah hian an tih tum tih hi Pathian chauhvin a hria. Pathian remtihna ngeiin ka pui ang che, tunge he dawi hi hmang tih hi kan hriat hmasak ber a ngai. Eng ber nge ilakah hian an tih dawn tih ka hrechhuak vatlo a nih chuan he dawi hi kan sut thei lovang a, he dawi hmangtu kan zawnna lamah hian keini ngei pawh hi an thih phah thei a ni. Vanram leh hremhmun siamtu kan Pathian hian min venhim chhung chu heng ramhuaite hian min hneh thei ngai lovang, kan PAthian Allah hi kan innghahna awmchhun a ni. He ramhuai thiltihtheihna hi PAthian venhimna tello chuan kan hneh thei dawnlo, kan hneh ngei a ngai." a han ti leh dap dap mai a.

Hicran-i chuan  a huphurh hle mai, "Lalpa ropui ber rawh se." a lo ti chuai raih a. Abdullah chuan chiang fek fawk hian, "Hicran ka fanu, Ayat-Al-Kursi i vawn mek hi thlak thleng ang che." a ti ta mai a, Hicran-i chu a meng phawk ngei mai. Ayat-Al-Kursi hi Muslim Quran bu a chang pawimawh tak mai a ni a, kawchhungaramhuai hnawhchhuah nan an hmang nasa hle.

************

ZAn a lo thleng leh ta a, Hicran-i chu sitting room ah thuin puan a thui mawlh mawlh a. Bed room bula mannequin an dah chu a rawn ri leh rek rek zel a, Hicran-i chuan ava en a. Tumah an awm siloh avang chuan sazu vel an nih ringin ngaihtha tak chuan a thui zawm leh mawlh mawlh a, mahse a rawn ri leh ta.

Ava hawi phei leh chiah chu a au tuar mai, anu (Hicran-i nu) ngei mai chu a lo ding run mai a, a hmai a var vek a, a mit a sen vek bawk a. A hmaah chuan a pi tawngtheilo chu lo thingthi in Hicran-i nu chuan a lei a lo pawh sak vak vak mai, "KA NU.." tiin Hicran-i chu a au vak a. Chutah a rawn hawi ta, a hmel chu rapawm tak a ni.

Hicran-i chuan a lu a thing a, a hlau kher mai. Anu lah chu a phun bul bul mai a, enge a sawi erawh Hicran-i chuan a hretheilo mai pawh nilovin a hrethiam lo. Chutah a pi lei(tongue) chu a pawt leh ta vak vak mai a, thisen a chik zawr zawr mai. Hicran-i chuan a mit a hup a, a au vak vak a. Chutah boruak chu a reh diak a, a mit a han men leh pawh chuan tumah hmuh tur an awm tawh lo.

*************

Hicran-i nu chuan thleng a sil mawlh mawlh a, chutih lai chuan kawngka a rawn inkik karh karh a. "Tunah hunah tunge mawni?" tih nuah nuah pah chuan kawngka chu ava hawng a, a fanu Hicran-i a lo ni reng mai. "Ehe Hicran, nang maw? I dam thin maw?" a han ti nghal luam a. "Dam chiah lo.." tiin Hicran-i chuan a lo chhang a.

"Awhaw..lo lut phawt teh bawihte." tiin a nu chuan inchhunglamah chuan a luh tir ta a, "Chahbi hi a ngai tho inla hmang animaw..hmana kan khua ang kha a ni tawhlo ania, fimkhur tur alawm." Hicran-i chuan a han ti a. Anu chuan, "Tunge maw kan in tlawm tak  ah hian lo lut ru duh ang le? Chahbi vang mai mai a chutiang sawi, a ho emai.." nui suk hian a lo ti a.

"Khawnge ka pi?" tiin a zawt leh a. "Pindan lamah Qadaa tawngtaina a nei mek, a damlo bawk sia, ka tawngtai pui talo mai." tiin anu chuan a lo chhang a. Hicran-i chu a pi room ah chuan ava lut a, api chu a lo tawngtai zo chiah a. "I tawngtaina te chu chhan in a awm ngei ka beisei, ka pi." tiin a pi darah chuan ava vuan a.

Api chuan a lo kuah nghal a, "Hawh le...mu rawh le, ka pi." tiin anu nen chuan khumah an mut tir ta a. Sawi tawh ang khan Hicran-i pi hi a tar tawh em em a, a taksa a chak tha tawhlo a ni. An pathum chuan an thu khawm a, "Ka ngai lutuk che u, in lo dam maw?" Hicran-i chuan a han ti a. "Kan dam e, Pathian zarah kan la nung ve tawk tawk e." tiin anu chuan a lo chhang a.

"In pahnih hian ka mumangah ka hmu thin che u a, ka ngaihtuah deuh che u mawle. Tlai tawh viau mahse, ka ngai bawk si che u a, ka lo kal tawp alawm." a han ti leh a. Anu chuan, "Bawihte, i mumangah chuan engtiangin nge min hmuh a? A thalo lam em ni?" tiin a lo zawt vat a. "Thalo love, ka ngaihtuah hrim hrim che u alawm." tiin a lo chhang a.

Api chu a mu ta a, Hicran-i te nufa erawh chokaah an awmdun a. Hicran-i nu chuan a chhang kan hmui tak mai chu Hicran-i hmaah chuan ava chhawp a, "Ka pi eitir hmasa ila.." a han ti a. "Ei rawh ei rawh...keimah ka va pe mai ang." tiin anu chuan a lo chhang a. Hicran-i chuan inthlahrun hmel tak hian, "Nu...ka nutei nen in inbe ngai em?" tiin a han zawt ta a.

"Be ngai lo, kumtawp velah te leh nipui lai velte hian an lo kal ve thin a..tinge min zawh a?" tiin a han zawt let a. "Ngati mah...hmanni ah Aynur-i nen kan titi a, kan sawi chhuak a, chuvang chuan ka zawt mai mai che." a lo ti a. Anu chuan, "Hmanni khan hnute cancer a nei tih an hmuchhuak a, Pathian hian enge maw min entir a tum thin ni?" a han ti nuah nuah a.

"Nu, Aynur-i nen chuan ka nute Zehra-i chungchang pawh kan sawi chhuak a, min han hrilh teh...Ramadan lo thlen apiangin ka nute Zehra-i tan hian Ya-Sin tawngtaina kha ila hmang reng thin a ni tiraw?" tiin a han zawt leh a. Anu chu a hnuk a ulh nghal der mai, "Ni e, bawihte..ka la tawngtai sak fo thin alawm." tiin a mittui a rawn tla a.

Inthiamloh hmel tak hian Hicran-i chuan, "Ka nutei chungchang hi i sawi ngai silova, mahse min hrilh duh lo a nih chuan min hrilh kher ka phutlo ania...mahse a pasal khan engvangin nge khatiang thil kha a tih ka hre duh a ni." a ti a. Anu chu a tap ta mai a, Hicran-i chuan va kuahin, "Nu, tihpalh aw...ka sawi tawh lovang." tiin ngaihdam ava dil a.

Tap chung hian anu chuan, "I nutei pasal, mi hlauhawm leh sual tak khan pawisa khelin a neih zawng zawng a chan a. Ahnuah zu te ruiin a nupui chu a fate enkawl zolo angah a puh leh daih a, tichuan zankhat chu....a fate pahnih leh ama nupui, i nute Zehra-i te chu an vaiin a that ta a ni. A fate ngei pawh enkawl a zuamlo a, mitenawm tak a ni. Keini hian enkawl sak kan chak tehreng nen, a pawi takzet." tiin a tap hawm hawm a.

Hicran-i chuan, "Nihleh a fate chu kum engzat nge an nih?" tiin a han zawt leh a. "Gulbahar-i kha kum 9 a ni hman a, a nau Gulizar-i erawh kum li a ni." a ti a. Anu chalah chuan Hicran-i chuan a fawp a, "Tap tawh suh nu...ka rawn sawichhuak kher a, min ngaidam rawh." tiin a inthiamlo hle mai.

"Nilove bawihte, kum 25 chhung zet chu ka lo tap char char tawh alawm."  alo ti a. "Tap tawh suh, hawh teh..ka pi bulah va kal tawh ang, chhang te pawh hi a ei ve duh ang." a ti a. Anu chuan chhang chu  ala a, "Nu, tikhan lo va lut la, Anand-a kan be lawk ange, ka chhuak tih ka hrilh silova." a ti a, anu chuan a luhsan ta a.

Anand-a pawh Hotel ah chuan a lo la duty reng a, night shif a ni kan tih tawh kha. A phone rawn ri chu a en a, a nupui Hicran-i a ni tih a hriat chuan a la duh ta hauh lo mai. A lak theih loh avang chuan Hicran-i pawh chuan call nawn a tum bik ta lemlo, anu te ina riah ve nghal mai chu a tum ta a.

Hicran-i chu a pi bulah a mu a, a pi chu kuahin a tap zawih zawih mai. "Pi, ka fapa hi ka theihnghilh thei ngang lo a ni, theihnghilh ka tum nasat poh leh ka na tulh tulh mai zawng a nih hi. Mahse maw, a chang chuan ka fapa Birol-a hmel awmdan te pawh hi ka hre tawhlo hial thin, ka a zo vek hian ka hre thin. Tinge ka vanduai bik em em le? Tinge Pathia hian hetiang natna hi kei kher min pek? Tinge Pathian hian ka nutei, ka pa leh ka fapa hi min laksak tak mai le? Engtin nge i tawrh reng theih zawk le, ka pi? I tawngtheihloh vang hi em ni? I ngawih reng hian engkim a tha vek tihna em ni? Anih leh ngawi ve ta reng ila ka na hi a ziaawm phah ve angem? Pi..ka ngai ani, ka fapa hi ka ngai ngawih ngawih." tiin a tap a.

Anu pawh chuan room lehlam atang chuan a fanu thusawi chu a lo ngaithla ve reng a, a khawngaih kher mai. Amah pawh chu a tap ve ta hawm hawm mai a, an nufa chuan chhuak em em hian an tap a. Zan a lo rei zel a, mutzai an rel ve ta. Zanlai a lo ni a, Hicran-i nu chu a muhil thei ta tlat lo mai.

A luhkham chu a che det det reng mai a, chutah a han tho kang chiah chu a thil hmuh chuan a ti mangangin a ti hlau kher mai. A lukham lai tak atang chuan thisen a rawn chhuak a, chutah a rawn pawp ta. A lukham pawp atang chuan chukchu an rawn chhuak ta sup sup mai a. Chutah a pawp zau zel a, a lung ta nuai nuai mai.

A hlau lutuk chu a au vak a, a hnungah chuan puandum sin ramhuai pahnihte chu an lo ding dun leh ta khur mai. Chutah a room kawngka  arawn inhawng a, na em em hian a inpawt khar leh thuai mai. Boruak chu a reh nghal diak a, lukham pawh chu engmah pawp a awm tawh lo. A pangngai ang chuan a lo awm leh vek tawh, Hicran-i nu chu a hrilhhai ngei mai.

*************

Zing a lo ni a, Anand-a thawhna hotel ah chuan Anand-a thianpa Cemal-a nupui chu rawn lutin a fapa kum 1 mi vel chu a rawn pawm a. Anand-a bulah chuan, "Cemal-a hi khawnge?" tiin ava zawt a. Anand-a chuan, "Bank ah a kal lawk a, a lo haw tep ang." tiin a lo chhang a. "Aww..avan pawi tak. In entir ka duh a, Arda (an fapa) hi lo awmpui se ka ti mawle." a han ti nuah nuah a.

"A lo let tep tawh ang, ka bulah lo dah mai rawh." a ti a. Lawm tak hian Cemal-a nupui chuan, "A tihzai hlauh chu.." a ti a. Anand-a chuan Arda chu pawmin, "I pa lo let leh hunah kan lo tihthaih vak dawn em ni?" tiin a han fiam vel a. Cemal-a nupui chuan, "Ka lawm khawp mai, ilo awm hlauh chu..ka kal ange." tiin a chhuahsan ta a.

Hicran-i pawh chu haw a tum ta a, kawngka bul thleng chu anu chuan a thlah a. "Lo leng ziah rawh aw...mangtha phawt le." tiin an inthlah liam ta a. Hicran-i pawh chu a kal ta a, anu chuan a thlir zui vawng vawng mai. Hicran-i te khua leh anu te khua hi a in ang lova, mahse khaw inhlat tak erawh an ni lemlo thung.

Anand-a chuan Arda chu a han en vang vang a, a fapa Birol-a a hrechhuak zawk mai. Arda mitah chuan chiang takin a han en a, "Birol tiin ka ko theih che angem? Tun chiah ka ko chhin ang che aw.." a han ti a, mahse Arda erawh chuan a hrethiamlo kher mai. Chutah Anand-a chuan Arda chu kuahin a fawp ta ngawih ngawih mai a, "Ka fapa, Birol..ka fapa, ka ngai lutuk che." tiin a kuah ngawih ngawih mai.

Anand-a chu a tap ta hial a, "Bawihte...khawngaih takin APA tiin min ko thei angem? Vawikhat chuan APA tiin min han ko teh. Tun chiah, ka ngen ache.." tiin Arda hmaiah chuan a fawp a, chutih lai chuan Cemal-a a rawn lut thut mai. Chutia a fapa Anand-a'n a lo kuah a, a lo fawp chiam chiam mai chu a ngaih a thalo hman hle mai.

Arda chu  a tap ta vak vak mai a, "Arda, hetah lo kal rawh..bawiha." tiin Cemal-a chu a rawn phei a, Arda chu a pawm ta daih mai. Anand-a chu a inthiam lo kher mai, Cemal-a hmel chu en pawh a en ngam lo. Ngawi reng chuan a insiam a, a chhuak ta daih mai. Cemal-a pawh chuan a thianpa chu a en zui vawng vawng a, a khawngaih ve takzet a ni.

Hicran-i chu in pakhat ah ava kal a, kawtah chuan putar pakhat hi a lo thu a. Hicran-i chuan va panhnaiin, "Chibai le, Pu Cevdet." tiin chibai ava buk a. Cevdet-a chuan, "Nangpawh le..tunge i nih aw?" tiin a lo zawt a. "Necmiye-i fanu Hicran-i ka ni e." tiin a lo chhang a. Cevdet-a chuan, "Lo thu rawh, kan nu in thingpui a lum mek a, kan in dawnnia." a lo ti a.

Cevdet-a nupui chu rawn chhuakin thingpui chu a rawn keng a, an in ta a. "Enge ilo kal chhan?" tiin Cevdet-a chuan a han zawt a, "Pu Cevdet, he khua ah hian kum engemaw zat chhung chu hruaitu ber ilo ni tawh thin a. Ka thil zawh duh che hi nangpawhin a chhanna i hriat ngei ka beisei...ka pa farnu Cevher-i kha..khawnge a awm tak i hre mial em? Ka nu leh ka pi te chu ka zawt tawh a, mahse an inbiak lohna  a lo rei tawh si a, engmah an hre silova." tiin a han zawt a.

"Hman ah tawh khan he khua hi an chhuah san daih tawh alawm, bawihi..thisen zawmpui chhungte dang an neilo, i nu leh i pi te saw an nimai. Anihna takah chuan, kan hmu leh tawh ngailo hrim hrim. Ka hmuh hnuhnun ber kha chu kum 15 emaw, kum 20 liam ta daih kha  ani tawh ang." a lo ti a.

*************

Anand-a chuan thlanmual lam apan a, a fapa thlan bulah chuan ava thu a. Thlan lung chu a chul a, "Ka fapa..ka fapa.." tiin a tap zawih zawih mai a. A phone phawrhin a fapa nena an video chu a en a, video-a Birol-a'n, "Apa.." a han tih rual chuan Anand-a pawh chuan tap chungin, "Apa..Apa...bawiha, heta hi ipa chu ka awm asin." tiin a tap hawm hawm mai.

Chutah pistol a la chhuak a, a luah chuan a tin ta mai. A kap hman tep a, mahse a ngam chiah bik silo. Tap zawih zawih chung chuan zawi te te hian, "Apa alo kal ania, apa alo kal...Birol..ka fapa.." a ti a, a mittui chu tla zawih zawih mai. Chutah pistol chua hum nghet sauh a, a bekah chuan a tin a, a hmet puak ta. Thisen a per chhawk a, a fapa thlan bulah chuan abawk thlawp a, a thi ta der mai.

*************

Hicran-i chu Cevdet-a te in atang chuan a chhuak leh ta a, a kal leh ta ngat ngat mai a. In pakhat zawn a thlen chuan ui lian tak mai hian a rawn bauh vak vak mai a, a phu nasa kher mai. A bula hmeichhe pakhat puan lo zar mek chuan, "Hlau suh thiannu, mi a seh ngailo. Khawnge i kal a, tunge i hmuh duh?" tiin a lo zawt a.

"A atthlak pawh i ti maithei a, keipawhin ka hrethiam biklo." a han ti ringawt a. Chunu chuan mak tih hmel tak hian, "Enge i sawi awmzia, thiannu?" a lo ti hu mai a. "Zehra-i tih hmingpu i hre ngai em? Helai hmunah hian thil mak tak a thleng tawh thin a, i hre ve lo maithei." a han ti leh a. "Engthil nge thleng thin a?" tiin chunu chuan a lo zawt leh a.

"Ka nutei pasal hi mi rilru kimlo a ni a, ka nutei leh a fate pahnih chu a that a ni."  ahan ti leh a. Chutah chunu hmel chu a thutak tan ta hle mai, "Saw inah sawn kal reng reng suh, thiannu." a ti ta mai a. Mak ti tak hian Hicran-i chuan, "Tute inah maw?" a lo ti hu mai. "Ramhuai ten an chenchilh a ni." a lo ti leh ringawt a.

"Tute in nge i sawi a?" tiin Hicran-i chuan  a han zawh leh chuan, "Ramhuaite chenna in a ni..chu ramhuaite chuan i nutei pasal chu tualthat turin an tilui pawh a ni maithei asin. Hodja tamtak an lo kal thin a, saw inah pawh sawn an va kal thin. Mahse a chhungah tak chuan tumah an lut ngam ngailo, beidawngin an lo let leh tawp zel."  ahan ti leh a.

"Khawi laiah nge a maw?" tiin Hicran-i chuan a zawt leh a. Chunu chuan, "Thiannu, va kal duh suh. In hrang satliah ang a ni velo, a hlauhawm lutuk." a han ti leh a. Mahse Hicran-i chuan, "A awmna ka hre duh hrim hrim alawm." a ti tlat mai a. Hreh tak hian, "Saw laia Biak In saw i hmu em? Biak In bula Tower saw..sawmi bul leh deuh lawkah sawn a awm." a ti ta a. 

"Ka lawm e." tiin chu in hrang lam pan chuan Hicran-i chuan kalsan a han tum a. Chunu pawh chuan apuanpho te chu seng felin inchhung lam a pan ve ta nghal bawk a, Hicran-i chu a va hawilet leh hram a. A ding chat mai, chunu sir lehlam lehlamah chuan kha ramhuai pahnih, puandum sin te kha an lo awm ve reng mai.

*************

Helaia inhrang awmna hi Namazgah khua  a ni a, khaw lian lemlo tak a ni. In hrang awmna chu Hicran-i chuan a thleng ta a, a chul reih ruih khawp mai. A bang te chu a pawp nasa hle a, inchung te pawh a tla bal remrum tawh. A bul vel chu a reh hle mai a, in bulah chuan kawt zau tak a awm bawk.

In bul lawkah chuan thing hmanga siam CROSS lian tak mai hi a inphun bawk a, CROSS chu puan duma khuh a ni bawk. CROSS an khuhna puan hmawrah chuan  eng enge mawni mak tak tak hi a bet thuah mai bawk a, nelawmloh tak a ni. CROSS hnung deuhah chuan thingkung sang vaklo, hnah tla kawlh vek tawh hi a awm bawk a.

Chu thingkungah chuan nautelem (Voodoo dool) tam tak a in khai thluah mai bawk a, chahbi hlui zet pakhat a inkhai tel bawk a, naute pheikhawk ni awm tak tak te a inkhai bawk. Hicran-i chu a zam hle mai, mahse a lo tum ve laklawh tawh bawk si. Inchhungah chuan a lut a, a chhung chu  alo bal kher mai.

A hnawk nuai mai a, bangah te chuan thisen a kai nuai mai bawk a. Thuthleng leh dawhkan te chu a tlu rum rum mai bawk a, engkim mai chu a chul rup vek mai. Chutah kawngka chu amah in a inkhar thuai a, Hicran-i phu nasa lutuk chu a bag (hand-bag) kenlai pawh a thlauh tawp mai.

Bangah chuan thisen hian thil a inziak rang nuai mai bawk a, a rimchhe em em lehnghal. Hlau tak chunga inchhung a han enkual lai chuan banga puan inkhai pakhat chu amahin a rawn tla thut mai a, Hicran-i chu a zuang lo chauh  a ni. Chutah pindan atang chuan afapa boral ta Birol-a aw ngei mai chuan, "ANU.." a rawn ti ta mai a.

Hicran-i chuan muangchang hian pindan lam chu va panin, "Bawiha..ka fapa.." a han ti ve ngawt mai a. Pindan chhungah chuan a han lut a, inchhung ai mah chuan a lo hnawk a. Khum pakhat a lo awm a, rizai bal tak leh pawp fer fur mai pakhat a lo awm bawk. Darthlalang bal tak, thisen kai nuai mai hi a lo awm bawk a.

Darthlalangah chuan ahma zana a nu sawi, a nute Zehra-i fanute pahnih thlalak te chu a lo intar nual bawk a. Chutah khuma rizai chu a rawn che ta tual tual mai, Hicran-i chuan halu chung chung chuan rizai chu a han hlim thut mai a. Nautelem tho a lo lo ni a, mak a ti ngei mai. Nautelem chu a la kang a, chutih lai chuan a hnug atang chuan hmeichhe naupang aw hian, "Min infiam pui duh angem?" a rawn ti thut mai.

Rang takin hnunglam a hawi nghal vat a, a nute Zehra-i fanu pahnih Gulbahar-i leh Gulizar-i te an lo ni a. Thawmhnaw var vekin an inthuam a, hijab varin an lu an tuam bawk. An unau chuan phawk hru hian Hicran-i chu an lo melh a, chutah aw rapthlak zet hian, "Kan inbihruksiak dawn em ni, ka fanu?" a rawn ti thum bul bul mai.

Kil khat atang chuan mipakhat, hmai dum vek leh kawr thihnuang mai chu rawn lang thutin Hicran-i hrawkah chuan a rawn rek ta vak mai a. Hicran-i hlau lutuk chu a t(r)e vak vak a, rang takin a tlanchhuak nghal a. In pawh chu a chhuahsan a, hawi pawh a hawi let ngam tawh lo.

**************

Zanah chuan Hicran-i chu haw talo chuan a nu te in lam bawkah chuan a let leh a, kawngka chu a han kik dat dat a. Anu chuan a lo hawnsak a, "Ehe, bawihte..khawnge i kal a? Ka phone che a, i la thei bawk silova." tiin a lo zawt nghal a. "Nu ka chauh lutuk, ka tlu zal lawk dawn." tiin mit bui luk hian Hicran-i chuan a lo ti a.

"Va mu  rawh, damdawi ka lo laksak dawn che em ni?" a nu chuan a han ti a. Hicran-i chuan, "Aih, ka mu anga...adam mai ang..khawnga ka pi hi?" tiin a han zawt a. "A roomah a awm, mu phawt la, i lo harh leh hunah in inbe zawk dawnnia." a ti a, Hicran-i pawh chu room ah chuan a lut ta a.

Kha in hrang atanga a lak naute lem khawro zet mai chu a bag atang chuan a la chhuak a, a en vang vang a. Chutih lai chuan a nu chuan pawn atang chuan, "Lukham thar ka rawn keng ania, ka lo lut thei angem...bawihi?" a rawn tih chuan nautelem chu dahtha vatin, "Lo lut rawh.." a ti a.

Anu chu  alo lut a, luhkham chu a rawn dah a. "Nu, ka nute Zehra-i thlalak i nei em?" tiin a han zawt a. Phurlo tak hian, "Aih, ka nei miahlo." tiin a lo chhang a. "Ka hmu chak emai, a hmel pawh ka hre mumal ve hman silova. Album velah a awm lo em ni..ka lo en teh ang." Hicran-i chuan a han ti leh a. 

Anu chuan pawh dawh chu a hawng a, bawm pahnih a rawn la chhuak a. Hicran-i pek pah chuan, "Kha aw...a awm maithei..awmlo maithei..ka hre chiang biklo." a ti a, a chhuahsan ta a. Bawm chu hawngin Hicran-i chuan thlalak te chu a han la chhuak hlawm a, a nautet lai te, anu leh api leh apa thlalak te chu a han en a.

Chutah thlalak pakhat ah chuan anu bulah hmeichhe pakhat a lo ding ve ta tlat mai, a ngaihtuah vang vang a, hmanzana a khum bula hmeichhe na tuar, ramhuaiin a pum atanga naute a phawrh chhuahna nu nen khan an in ang em em mai lehnghal. Rindan anei nghal a, chunu chu  anute Zehra-i ngei a nih a ring nghet ta tlat mai a.

Hicran-i chu  anu bulah chuan a mu ta a, zanlaiah chuan anu chu a tho a. Hicran-i erawh ala mutui ngei mai, mahse mumang hlauhawm tak mai a nei ta. A mumangah chuan a nute Zehra-i fate pahnihte, a fapa Birol a, mit var vek leh vun dang veka lo awm te, puan dim sin ramhuai pahnihte leh chhuata thisen baw nuai mai te chu a hmu a.

A rawn harh zawk mai, a thaw hlawp hlawp mai a. Anu chuan, "Bawihi..halu suh....i mumang mai mai a nih kha.." tiin a lo hnem nghal vat a. Hicran-i chuan a nu chu a en hu mai, "Ka tawngtai dawn a, ka tho mai mai anih hi. Mu leh rawh, engmah hlau suh." a ti a, Hicran-i pawh chu  amu ve leh ta mai a.

Anu chu a tho chhuak a, Hicran-i pi room ah chuan ava lut a. Ward-robe atang chuan puan a la chhuak a, tichuan Hicran-i pi chu ava kai tho ta a. "Ka nu, tho rawh le..tawngtai a hun." a han ti a, Hicran-i pi pawh chu a rawn tho ve ta a. Mahse wardrobe chhung atang chuan hmeichhe aw hian, "Unaunu..." a rawn ti ta tlat mai.

An nufa chuan an in en hu ringawt a, chutah aw bawk chuan, "Fapa zawk neitur ka ni asin, khawnge ka naute? Khawnge a awm? Min pe let leh rawh u." chiang em em hian a rawn ti ta mai a. Hlau tak chung si chuan Hicran-i nu chuan ava pan hnai a, wardobe chu ava hawng thut a.

Mahse achhungah chuan tumah an awmlo, puan thlehfel sa bak chu hmuhtur dang a awm lo. Puan te chu a han keu a, mahse engmah a hmu chuang lo. Wardrobe chu a khar leh a, a kal leh tur chiah chu aw bawk chuan, "Ka naute, ka naute.." a rawn ti leh ta mai. An nufa chuan an hlau ta hle mai, chu aw lah chuan thinrim hmel tak hian, "Min ruk sak ani...min ruksak a ni." a rawn la ti ta deuh deuh a.

Muang chang chuan Hicran-i nu chuan ava pan hnai leh a, kawngka chu ava hawng leh ta thut mai. A tawlh hnung dawr mai a, a hmui a hup nghal. Wardrobe chhung chu freezer chhung vawt tak ang mai hian a lo pawl(blue) phut mai a, meng kuau hian Zehra-i leh a fanu te pahnih chu che miahlo hian an lo tawm reng bawk a.

Chutah Zehra-i chu a rawn ding thut a, chiang em em hian Hicran-i nu chu a rawn en a. Rapthlak tak leh ring tak hian, "Khawnge ka naute?" a rawn ti ta chhur chhur mai. Hicran-i nu hlau lutuk chuan kawngka chu a khar vat a, chutah lehlam ava hawi leh chu a t(r)e nasa kher mai.

Hicran-i pi khumah chuan Zehra-i chu a lo thu run mai a, hijab var a khum a, a hmai a eng(yellow) vek bawk. A mal chungah chuan naute a lo pawm a, chu naute taksa zawng zawng chu thisenin a bual khat vek bawk. A sir dinglam leh veilamah chuan mi pahnih, puan dum veka inkhuh hi an lo ding khur mai bawk a.

Chutah Zehra-i chuan a mitmu liam em em mai chuan a rawn melh leh khur mai a, "Ka naute..khawnge ka naute.." tiin a naute pawmlai chu a rawn lek kang a. A naute pawm lai chu Hicran-i nu chuan a hmu chiang kher mai, a rap takzet. Mihring hmel a pu lo, ramsa kawlh tak ang mai a ni.

A hlau lutuk chu a au ta chel chul mai a, chuveleh room kawngka a rawn inhawng thut mai a. Hicran-i chu hmanhmawh em em hian a rawn tlanlut nghal a, a nu chu a rawn kuah nghal a. "Nu..tinge? Enge awmzia?" tiin mangan hmel tak chuan a zawt a, anu chuan a chhang thei mai lo.

Room chu a han enkual a, an pathum tihloh chu tumah dang an awm silo. A pi chu a zu en a, "Pi, i tha em?" tiin a zawt ve bawk a. A pi pawh chu a lo hrilhai kher mai, a lo hawi hru hru ringawt a. Thaw hlawp hlawp hian anu chuan, "Bawihi, engmah anilo...thil ka hmusual aniang." tiin dawt a sawi ta ringawt a.

Zing a lo ni a, Hicran-i pawh chu an mahni in lama haw tak tak tawh tur chuan a insiam mawlh mawlh a. Api bulah chuan, "Pi, ka haw tawh ange aw..lo in enkawl tha ang che aw.." a han ti a. Api chuan thlah ve tum niawm tak hian thawh a han tum ve ngawt a, "Pi, tho duh suh. I hresel loh em kha, thlah ka ngai lo." a lo ti vat a,

Mahse a pi chu a tho lui ta tho a, chutih lai chuan anu pawh chu a rawn kal ve a. "Bawihi, zan khat tal chu lo riak leh ta che.." tiin  a han sawm leh a. "Nu, Anand-a engmah ka hrilh ve silova, min ngaihtuah lutuk ang. Chanchinte ka va hrilh ve phawt anga, tichuan ka lo let leh ang." a ti a, an inthlah liam ta a.

***************

Anand-a hotel thawhna ah chuan Hicran-i chu ava kal a, inchhung a han luh chuan reception counter ah chuan Cemal-a chauh a lo awm a. Cemal-a'n Hicran-i  ahan hmuh chuan, "Ehe..khawnge in pa?" tiin a lo zawt a. "Chu chu alawm ka lo kal chhan..ka call a, min chhang thei silova. Text ka tum a, a tlan thei bawk silo." tiin Hicran-i chuan a lo chhang a.

"Ehe..avan zialo ve. Tunlai phei chu a mood a fuhlo thei bawk si a, a mizia a zawi thei khawp mai." a lo ti ve bawk a. "Awle, ka haw phawt mai ange." Hicarn-i chuan a ti a, a chhuahsan leh ta a. Hicran-i chu a haw ta a, inchhung a lut chiah chu thawm a hre nghal vat a. Naute tap ri a ni tlat, a fapa boral ta Birol-a tap ri ngei a ni tih chu a hai lo.

Mak a ti em em a, "Birol..ka fapa.." tiin a hawi kual nghal vak vak a. Chutah tap ri chu a ring tulh tulh a, room atanga lo ri chhuak a ni tih a hre ta. Room chhung a han lut chu a hma zawn ah chuan mi pathum, puan dum sin a, amah hnungchhawn zawnga lo ding run mai chu  ahmu a.

Hicran-i hlau lutuk chuan, "Lalpa, aww...ropui ber. Min venghim rawh, min pui hram rawh." tiin a awm dawmin a phun nghal char char a. Chutah chung mi pathumte chu an kal sawn ta a, an kalsawn chiah chu a fapa Birol-a thlan lung ngei mai chu  alo awm reng mai.

Thlan chungah chuan a nute Zehra-i ngei mai chu a lo thu run mai bawk a, thlan chhuat a vaivut dum vek mai te chu a lo khal nuap nuap a. A kut lehlam chuan nautelem dum vek leh khawro zet (voodoo dool) a lo keng bawk a. ZAwi te te hian  azai ri ret ret a, chutah Hicran-i lam chu a rawn hawi thut a, ruh tliak rawp ri ang mai hian a ri tuar mai bawk a.

"Hicran, fapa zawk nei tur ka ni asin. Mahse ka nei ta silo, ka nei ta silo.." tiin a hmui chu a ti sawi vak vak a. A tho a, zawimuang chuan Hicran-i chu pan hnaiin thu mak tak tak, eng tawng nge pawh hriat loh chu a chham phei mual mual mai a. Hicran-i hlau lutuk chu a au vak a, pawnah chuan a tlan chhuak nghal vat a.

***************

Hicran-i chuan Hodja Abdullah chu ava pan leh ta tawp a, nautelem (voodoo doll) pawh chu Abdullah hnenah chuan a pe a. Abdullah chuan nautelem chu a han en vang vang a, a dul zawnah chuan a lo inthui a. A thuina chu a phelh a, tichuan a chhung chu a han hai a. Lehkha zial pakhat hi a rawn la chhuak a, chu lehkha zial chu a han phelh leh a, eng engemaw a lo inziak teuh mai.

Abdullah chuan Hicran-i chu a han en vang vang a, "Hethil hi dawi atan khan an hmang a ni, ka fanu. He nautelem hi vawi 41 lai mai an thui a, an thiltum 41 te hi khawngaihna tel miah lova i laka tih an tum vek a ni. Ramhuaite nen inthurualin in chhungkua tihchhiat vek an tum a ni, he dawi hian nangmahni chhungkua mai nilovin i thlah kal zelah pawh nghawng a nei thei a ni. He dawi hi i lakah i nu unaunu ngeiin a hmang  ani, anchhia  ahlawh che a ni. I nu te in atang ngei sawn a ni bawk, he thil hi i nu i la hrilh lo em ni?" tiin a zawt a.

"Ka nu leh ka pite hi an tar tawh si a, ka hrilh ngam lo a ni." tap chung chuan a lo ti a. Abdullah chuan, "I hrilh vat a ngai ania, ka fanu. Heng thlarau sualte hi an dawhtheiin mi an nghak rei thei phian ania, an kalsan mai mai lovang che. Hremna na ber an pek hma che chu an awm reng ang, an kalsawn lovang." a ti leh a.

Mittui tla zawih zawih hian Hicran-i chuan, "Hodja, ka nutei thih atang khan kum tak aliam tawh. Engtin nge he dawi hi a hman nachhan te leh tuvang nge tihte chu kan hriat theih tak ang? Ka nu hian ka nutei boral khan ka pa boral ai mah khan  a tuar nasa zawk asin. Engtin nge hetiang thu lawmawmloh leh runthlak tak hi ka hrilh ngam tak ang?" a ti a.

Abdullah chu a han ngawi vang vang a, "Ka fanu, i nu chu heta lo kal ve turin kan sawm mai dawnnia. Pathianin rem a tih chuan..sawi tur tam tak pawh  anei ngei ang, a hriat ang ang te sawi se, kan tan pawh hnathawh a awlsam sawt mai ang. He dawi hi kan sut hma chu nang hian thlamuanna i nei ngai lovang, ka fanu." a ti a.

**************

Hicran-i nu chuan damdawi chu la in anu (Hicran-i pi) chu ava pe a, "Nu..kha ei rawh. Hicran-i i ngaihtuah lutuk vang vek anih kha hetiang thil hi a thlen tak ni.." tiin khumah chuan a thu a. Hicran-i pi chuan thingpui chu a in a, "Nu, Hicran-i mit te kha ilo hmu ve em, a chauh hmel zia kha. Engtin nge a tawrh theih zawk le?ZAntin mai khan.." a tih lai chuan a tawp thut a.

A dak vak a, a thaw hrawk mai. Chutah a hmui te chu a rawn sawi bei bui mai a, a hmai a var nghal pup bawk. Khumah chuan a let tawp a, a hmei chu hnahthelh ro ang mai hian a chuar nuk mai. Hicran-i pi hlau lutuk chu thei leh theilo hian a inbeng kang a, room chu a chhuahsan vat a.

Sitting room ah chuan thuin a melh ngai a melh reng a, zawi te te hian  a lu a bu nghat nghat mai. Chutih lai chuan Hicran-i chu a rawn lut a, "Nu..nu khawnge i awm?" tiin anu chu a rawn au nghal vak vak a. Ngawi renga api lo thu reng chu ava hmu a, "Pi, khawnge ka nu?" tiin a zawt a.

Api chuan room lam chu melhin a thu bu luk luk mai a, a mit chu a khap eih lo. Chutah api tawngtheilo chu a rawn tawng chhuak ta thut mai, "Necmiye-i hian a unaunu Zehra-i hi engtik lai mahin a hmangaih ngai lo." a rawn ti ta mai a. Hicran-i chuan mak a ti em em a, a hmui chu a hup a.

"Pi..Pi...i tawngthei amaw?" a ti a, a hlau lek lek mai. Chutah api bawk chuan a melh ngai melh reng chung chuan, "Zehra-i fanute pahnih hi a thik em em a, Zehra-i hian a fate pahnih hi rose-season hun lai in a nei ve ve a ni. Pakhat chu Gulbahar tiin a hming a phuah a, pa khat leh chu Gulizar tiin a phuah bawk.  A pasal Ramazan-a chuan fapa neih belh a duh ta a, a sawi reng thin. Tichuan chu tak chu Necmeye-i (Hicran-i nu) chuan remchangah a hmang ta a, a unaunu Zehra-i chu bum a tum ta a ni." a han ti leh a.

Hicran-i chu api hmaah chuan a thingthi a, uluk tak chuan a lo ngaithla a. Api chuan sawichhunzawm zelin, "Necmeye-i chuan Zehra-i bulah chuan a pasala nu(amah Hicran-i pi) in dawi hmangin Zehra-i chuan fapa ngei a neih tur thu chu a hrilh ta a, Necmeye-i chuan min ngen ta a ni. Tichuan kan nufa chuan dawi chu kan siam ta a, Sazupui thisen hmangin kan siam a ni. Zehra-i leh Ramazan-a te nupa chu kan in lamah kan ko phei ta a, an thihna tur an rawn pan mek a ni tih an hre der silo. Fapa an neih theih nan ka inthawi mek niin an ring a, mahse chutiang a ni hauh silo. Dawi zawng zawnga hlauhawm ber pawl 41 Stiches spell zawk ka hmang tih an hre hauh lo. Chu nautelem chu pein a lukham hnuaia dah turin ka ti a, chu chuan an chhungkua ah chhiatna namen lo a thlen dawn a ni. Nautelem kha fapa an nei dawn tih entirna turah an ngai a, mahse anihna takah chuan kha nautelem kha Ramazana thlarau nen ka thlunzawm zawk a ni. Tichuan a ni telin kha nautelem chhunga thlarau sual khan Ramazan-a chu a ti buai nasa telh telh a, a tawpah chuan an zingah an telh ve ta hial a ni. A tawpah chuan Ramazan-a chuan a fanute pahnih chu hreh chung chungin a that ta a, Ramazan-a tual thah luih tirtu thlarau sual kha keima tirh a ni. A bul ber chu keimah  ani, ka thil tih vek a ni. Mahse Ramazan-a chuan Zehra-i chu a that ve ta lo, achhan chu Zehra-i kha Pathian ringtu tha tak a ni a, Vantirhkoh ten an venghim tlat a ni. Tichuan Ramazan-a chu pawnah a chhuak a, a inhal hlum ve ta nghal a ni." tiin engkim a sawi ta vek mai.

Mak ti tak hian Hicran-i chuan a pi chu a en a, "Engtin nge in tih theih zawk? Anni lak atang khan enge in duh a? Pi..engthil nge in tih tak? Khawnge ka nu? Khawnge ka nu a awm?" tiin a zawt leh a. Mahse api chuan a zawhna tak pawh chu a chhang chuanglo, a thil sawi lai chu sawi zawm zelin, "Tichuan Zehra-i chu kan in lamah kan hruai phei ta a, kan in a luh veleh chuan nau a vei tan ta a. Tih ngaihna reng kan hrelo, darkar reiloteah chuan nau chu a nei dawn ta mai a. Nau chu kan inah ngei chuan a nei ta a, hmeichhia a ni. A thi put chu a tawp thei lova, khum chu thisen hlirin a khat a. A tan chuan thil har tak a ni, a chhan chu thla sarih lek a vei che a, a nei nghal ta mai si che a." a ti ta a.

Hicran-i chuan mak a ti kher mai, "Enga? Keimah maw? Ka pi, enge i sawi awmzia?" tiin a han zawt leh a. Chutah api chuan, "Nang hi Zehra-i fanu zawk i ni." a ti ta mai a. Hicran-i chuan a hmui ahup a, a tap nghal char char a. Api bawk chuan, "Necmiye-i hian fa a nei ve theilova, tichuan nang hi kan ru che a, kan fanu ah kan siam che a ni." a han ti leh a.

Tap chung chuan Hicran-i chuan, "Enge maw i sawi tak mai le, ka pi? Tumaw ka nu diktak chu ni a? Hman atanga KA NUTEI tia ka lo koh char char thin chu ka nu diktak zawk maw lo ni a? A nih chuan ka nu kha engvanga thi nge? Min neih lai khan a thi ve nghal em ni?" tiin a zawt leh a.

Api chuan a lu a thing a, Hicran-i chu a la melh eih chuang lo. A melh ngai chu a la melh reng a, "I nu kha chuvanga boral a ni lo, a mutthilh laiin Necmiye-i nen inthurualin kan that a ni." a ti ta mai a. Hicran-i chu a rilru a na kher mai, "In that ani...tualthattu in ni..ka nu leh pa, ka unaute nen..nangni pahnih hian in that vek a ni. Awww..Lalpa, enge ka chungah hian thleng ta?" tiin a au vak vak a.

Chutah thinrimna hlirin a khat ta, api hmaiah chuan a beng ta siah siah mai a. Tap zawih zawih chung chuan, "Tualthattute zinga seilian maw ka loh nih a? Ka nu min thah saktu chu KA NU tiin ka lo ko char char amaw? Ka unaute rawng taka thattu chu KA PI tiin duat takin ka lo ko thin animaw? I zak em? I zak em? Min en teh.." tiin api chu a beng leh thuai mai a.

Hicran-i chuan a khabe ah chuan va vuanin, "Min en rawh..ka mitah hian en rawh...nang tualthattu tenawm." a ti ta phiar phiar mai a. Mittui tla teuh chung chuan api chuan Hicran-i chu a en a, "A chhanna chu kei leh Pathian hnenah i pek angai ang, i thil tih chhan hi i saiw ngei angai ang, i hria em? Khawnge a awm? Khawnge Necmiye-i chu a awm? Khawnge kha tualthattu kha a awm?" tiin a vin vak vak a.

Hicran-i chu a tho a, room ah chuan ava lut a. Necmiye-i chu khumah chuan a lo let reng a, a hmai te chu a sawi vek a, zau em em hian a ka a lo ang huau mai bawk a. A vun te chu a khawro vek a, a mita  var vek bawk. Hicran-i hlau lutuk chu a au vak vak a, "Lalpa, ka a zo takngial dawn...Lalpa, min venghim mawlh teh." tiin a tlanchhuak ta daih mai a.

Api erawh ala chesawn eih lo, Hicran-i chu chhuak tawh mahse a thil sawi lai chu a sawi zawm zel tho. "Ka fapa chuan min haw ta em em a, fa nei ve tawh si chuan midang fate a that ta mai chu a hrethiam lo hle. Tual ka that tih a hriat chuan a thinrim em em a, tichuan ka zan mulai chu min kai thovin ka hmaiah chuan acid tui a rawn theh a, ka hmaiah hian ser lian tak a awm phah ta a ni. Tichuan PAthianin min hrem a, ka fapa neihchhun chu min laksak leh ta a ni. Acid tui chu a in a, a thi ve ta a ni." a ti leh a. Chutah a ngawi vang vang a, "Bawiha, ka sualzia ka hria e. Min ngaidam rawh, ka fapa. Khawngaihnin i nu hi min ngaidam rawh..." tiin a tap zawih zawih mai a.

Hicran-i chu in lamah chuan a haw ve ta a, inchhung a lut chiah chu a hma zawn takah chuan a pasal Anand-a chu a lo thu reng mai a. Anand-a chuan Hicran-i chu a lo en a, mahse Anand-a tak tak nilovin a thlarau zawk a ni. Zawi sap hian Hicran-i chuan, "Anand, min ngaidam rawh." a ti tham tiak a. Sitting room lamah chuan A nu leh pa, Zehra-i leh Ramazan-a thlarau te chu an lo thu ve reng a, a u te pahnih, Gulbahar leh Gulizar-i te pawh an lo awm ve bawk a. Tichuan kil khatah chuan mipakhat, puan dum sin, hmai khuh tlat hian a fapa Birol-a chu a lo pawm bawk a.

****************

A HNUA AN SAWI LEH DAN :

Hicran-i hian Abdullah bulah a pasal thi tawh thlarau leh an fapa Birol-a thlarau nen chuan thla hnih chhung zet chu an chen ho thu a hrilh a, dawi an sut hnu, thla 15 ral hnuah chuan Hicran-i pawh chuan pasal a nei ve leh ta a ni. Tunah hian Turkey rama Biga, Canakkale khua ah a cheng mek niin an sawi a ni.

Nitin mai hian Turkey ramah hian black magic hi hmangin nunna chan phah pawh an tam hle a, hetiang dawi hi thil thalo tak a ni. Black Magic hman hi Turkey Sawrkar chuan a khap tlat a, Islamic dan pehi chuan a phallo bur a  ni. Black magic hman hi Quran lehkhabu thianghlim chuan sual a ni tiin a sawi a, Muslim sakhaw zawmtute tan phei chuan dan bawhchhiatna a ni a, damchhung lung in tan theihna a ni an ti bawk.

******************

THE END