SICCIN-1 (Islamic Horror) Written by : Ersan Ozer Translated by : Aaron Malsawmdawngzuala (Based on a true Story)

 SICCIN-1

(Islamic Horror)

Written by : Ersan Ozer

Translated by : Aaron Malsawmdawngzuala

(Based on a true Story)

(A then chuan a film te pawhin kan en tawh maithei a, he thawnthu hi Turkey rama thil thleng tak tak a ni a. Itsikna avang te, inbumna avang te, hur sualna avang te leh duhamna avang te in tun hma khan Turkey ramah hian balck magic an hmang nasa em em a, Mosolman puithiam hovin harsatna leh buaina tam tak paltlangin chu magic spell te chu an tichhe ta hram thin a ni. Ahmasain keini Mizo erawh Kristian kan ni deuh vek a, he ka thawnthu ziah tur pawh hi Kristianna nen a inmil dawn lemlo. Siccin/Sijjin thawnthu hian zirtirna tha tak chu nei mahse Muslim Sakhua fakna a tam dawn a, chhiartute pawhin min hrethiam dawnnia. Request vang liau liau a letling ka ni a, tu rilru mah hruai kawi ka tum hek lo. Kristian kan ni emaw nilo emaw, kan rinna ah hian chiang ila. Kan thawnthu chhiarte hian kan nun kaihurai danglam kher lo se, thawnthu ngaihnawm tak angin kan chhiar hram hram zawk dawnnia.)

*************

Oznur-i leh a thiannu chu Muslim Hodja pakhat inah chuan ngawi reng chuan an thu a, bang vela thil intar te chuan an thiandun chuan a ti thlamuang lo kher mai. Oznur-i thiannu zawk chuan banga thlalak intar pakhat chu a kawk a, Oznur-i pawh chuan a han en a. Thlalak ah chuan mi pakaht hi mu chungin boruakah a lo kang a, a bulah chuan mi pathum an thu bawk.

"Khawi hmunah nge min hruai tak hi? Hmun nuam tak chu a ni hauh lo mai." a thiannu chuan Oznur-i chu hlauhna avang chuan a melh rum kher mai. Chutih lai chuan pitar kum upa ve tawh tak mai hi a rawn chho a, puan var pahnih hi a rawn keng a. Oznur-i te thiandun pek pah chuan, "Hei hian in lu kha khuh rawh u, Ihsan Hodja-a'n a nghak reng tawh che u ania." a rawn ti a.

An thiandun chuan puan var chu an luah tuamin pitar chu an zuithla ta a, pitar chuan room thinruih maiah chuan a luhpui a. Hodja hmaah tak chuan an thingthi a, chu Hodja, ahming Ihsan chuan tawngtai phawt turin a lo hrilh a. Oznur-i te thiandun chu zawite chuan an tawngtai nghal malh malh a, Ihsan pawh chuan ringzet hian eng engemaw alo chham ve nghal char char bawk a.

A thu chham malh malh pah chuan a hmazawna dawhkana meiling tamtak chu a kutlawng chuan a tham a, a bula bowl chhunga tuiah chuan a dah a. Ihsan-a chu a han maimitchhing vang vang a, "Aw Lalber, mei alh ang maia ropui, min chhandamtu leh min veng thintu...kan tawngtaina hi chhang mawlh ang che. Vaivut mai atanga i siam mihringte hi thu min pe la, i chhiahhlawh kan ni e." a ti a, a rawn meng ta a.

Oznur-i chu a en a, "Tunge i hming?" tiin a zawt a. "Oznur-i ka ni e." a lo ti khur dar dar a. Ihsan-a chuan, "Engvanga lo kal nge i nih?" tiin a lo zawt leh a. Hlauh hmel tak hian, "Mipa pakhat chungchang ania, ka pasal tur a ni dawn nge ni dawnlo tih hriat ka duh a." tiin a chhang a. "Tunge a hming?" tiin Ihsan-a chuan a lo zawt leh nghal a.

"Ihh..Kudret-a ania." a han ti leh a, "A hmangaih ve che em?" tiin a lo zawt leh nghal vat a. Oznur-i chuan a lu a lo thing ringawt a, "A hria che em?" tiin Ihsan-a chuan a zawt leh a. A thiannu va melh zeuh pah chuan, "Ka nutei fapa ania...nupui atan min nei duh angem tih hriat ka duh a. Chu chu min chhang thei anih chuan zawhna dang ka zawt lo ang che..khawngaihin." a han ti khur leh dar dar a.

Chuveleh Ihsan-a chuan tawng mak tak chuan a chham leh ta zawt zawt mai, reilote hnuah chuan, "Amah ngeiin a chhang dawn che anih chu." a rawn ti ta mai a. Chutah Oznur-i bula thu, a thiannu ngei mai chuan lehlam a hawi thut a. Thinrim hmel tak hian, "Kudret-a hi i nutei fapa a ni a, i unaupa anih angin pasala i neih a thianglo. Fa pawh in nei theilo anga, i tan chuan chhiatna a ni ang.." a rawn ti ta mai a.

Oznur-i chuan mak a ti kher mai, a thiannu chu a en reng ringawt a. A thiannu lah chuan lehlam a la hawi tlat bawk si. Chutah ama lam chu a rawn hawi thut a, a mit a lo var vek mai. A hmaiah te chuan thisen zam a lang thuah mai a, a ha pawh a dum vek. Ringzet leh aw rapthlak zet hian Oznur-i hmai zawn takah chuan, "I tan chuan i chhiatna tur a ni, i thihna tur a ni." a rawn ti ta vak mai. Oznur-i chuan a hlau kher mai, a meng phar awn awn a. Ihsan-a chuan, "Hmeichhia...ani chu i kalsan a ngai a ni. Hnai reng reng suh ang che, i thihna tur a ni." a lo ti ve bawk a.

**************

Thinrim tak hian Oznur-i chu Kudret-a sa dawr ah chuan kawngka pawh kik lovin ava lut tlang tawp a, Kudret-a chuan a lo en rum kher mai. Rang takin kawngka chu a khar a, Oznur-i chu rum zet hian a melh a, "Lo kal lo turin ka hrilh che ani lawm ni?" a ti khur khur a. Vin zet hian, "Kudret, kar hnih chhung...kar hnih chhung teh meuh i reh hmak a. Ka phone call pawh i chhang duh bawk silo, engtin nge ka tih vak chuan anga?" a lo ti hlur a. 

Kudret-a chuan thinrim tak hian, "Heta lo kal tur hi i nilo, kar hnih mai pawh nilovin, kum hnih chhung pawh nise, ka hmu duh tawh lo che." a lo ti hrep mai. Rilru na tak hian Oznur-i chuan, "Min kalsan thei lovang, chu chu hre rawh.Min tlanbo san pawh tum mah la ka pum chhunga naute hi chu i tlanbo san thei chuang lovang, eng ang pawhin min dan tum mah la, he ka fa pai lai hi ka hring chhuak tho tho ang." a ti ta mai a.

"Oznur, ka thin ti rim suh aw...min ti thinrim reng reng suh." a lo ti leh hrep mai a. Oznur-i chuan ring tak leh vin zet hian, "I mawl em ni? Nau ka pai tih ka hriat atangin thla 2 leh achanve a liam leh tawh, engti kawng mahin ka ti tla dawn chuanglo. Ka hring chhuak ang, i hria em...ka nei ngei ang. Birth Certificate-ah pawh i fa ngei a nih thu ka ziah tir bawk ang, i hria em?" tiin Kudret-a awmah chuan a chum vak vak a.

Kudret-a chuan a rek thut a, "Hmeli, nangman min thlem a, ka chakna tichhuak turin min zutkual vel a nih kha. Ka thiamloh ani amaw? He i naute pai hi ka fa anih thu ka puangzar ang maw?" a ti hrep mai a. A rehna kut chu a namthla sawk a, "Ahma khan lo ngaihtuah chiang hmasa la tha tur ania...ka fa lo piang tur hi a pian hma atangin mi zawng zawngin naute bawlhhlawh tia an nuihzat i phal em ni?" tiin a zawt let a.

Kudret-a thinrim insum zo lo chuan Oznur-i chu a beng thal tawp mai, "Tenawmnu..i tum reng a ni tih ka hai lo. Min thlem a, min mutpui a, ka fa i pai hi i thil tumlawk vek a ni tih ka hria. Ka neih theih nan che leh ka bula awm reng i duhvangin i tilui a ni, tenawmnu.." a ti hrep mai.

Na tih hmel em em hian Oznur-i chu a rawn tho a, a pum a dawm vawng vawng mai. Chutah a pawnfen ah chuan thisen a lo kai a, a kap atang chuan thisen a rawn far ta zawih zawih mai. Kudret-a mangang leh thinrim bawk si chuan, "Buaina dang min thlen i tum em ni a?" a ti vak ringawt a.

Mahse Oznur-i chuan a chhang theilo, a tlu sawp nuai mai. Rang takin Kudret-a chuan phone a phawrh a, number pakhat hmetchhuakin a be nghal a, "Hello, aw..keimah...khawnge i awm? Tazi Stand bulah khan lo kal vat teh, tunah...ka fiamthu lo...damdawiin kal vat angai." a ti vin tuar tuar a, phone chu a dah ta a.

*************

Nisa-i chuan a nu damlo, hun rei tak chhung coma-a awm tawh chu thil a ei tir mek a. Anu hi biak theih pawh a ni tawh lova, mit khap miahlo hian chunglam melh rengin khumah a mu reng mai a ni. Duat tak hian, "Ei teuh rawh aw, ka nu.." tiin fiante chuan a barh mawlh mawlh a.

Chemte hmanga chhang a ziah nawi pah chuan Nisa-i bawk chuan, "I rihna pawh i hlauh nasa tawh kher mai, hemi chhang nawi tal hi chu ei teuh thei la ka ti ngei mai. Soup ringawt hi chu a tlem deuh a ani.." tiin chhang nawi a ziah thlak chu anu soup inlaiah chuan a telh sak a.

Khum bulah chuan a fanu Ceyda-i, a pian tirh atanga mitdel tawh chuan nautelem a lo khal mek a. Nisa-i chuan afanu chu ava en a, "Ceyda, i ril a tam em?" tiin a zawt a. "Tam hrih love..." tiin a fanu chuan a lo chhang a. Nisa-i chu a tho a, khum bul dawhkana tape chu a play ri ral ral a.

"He hla hi chu nalh i ti ve tih ka hria alawm, ka pa pawh khan a play reng zel." tih pah chuan a nu chu soup intir pah chuan a be mawlh mawlh a. Ceyda-i chu rawn tawngchhuakin, "Anu, kan hmui hi eng rawng nge?" tiin a hmui khawih chung chuan a zawt a. Nuih suk pah chuan, "A sen." tiin Nisa-i chuan a lo chhang a.

"Anih leh ka naute lem hi a hmui a sen ve em?" tiin a zawt leh a. Nisa-i chuan, "Khawi maw...minlo hmuh le.." a lo ti a. A naute lem chu Ceyda-i chuan a han lek kang a, Nisa-i chu a nui deuh hak a, "I nute Oznur-i hi a inlak changkan tehreng nen, naute lem hmel neilo a rawn leisak che ania, hmui pawh a nei hleinem. A lo len leh hunah i naute lem kha hmui lem kan siam tir anga, kan hnawisen tir dawnnia." tiin a lo chhang a.

Ceyda-i chuan phur tak hian, "Tak tak maw? Ka hmui pawh ti ve ila.." a lo ti vat a. Zaidam tak hian anu chuan, "Ila naupang emai, i len hunah kan hnawihsen ve dawnnia." a ti a. "A Ni Oznur-i chuan rawng senno pawh a nalh lutuk atia, eng tin nge a awm le...rawng sen hi eng rawng nge le?" a ti nauh nauh a. Nisa-i chu a tho a, "Hawh teh...chaw ei ang le." tiin afanu chu a pawm a, choka lamah a phei pui ta a.

************

Oznur-i chu damdawiinah chuan ala awm reng a, a chau kher mai. Kudret-a chu a rawn lut a, inthlahurng tak hian, "Oznur...doctor ten i naute chu a thi tih min hrilh zo chiah a ni. Ihh..i pum chhunga a awmlaia thi a ni a, doctori'n min ngen angin i pum chhung atangin a thi sa in lachhuak turin min dil a, ka pawm ta mai a ni." a ti zawi sap a.

Oznur-i chu a tap a, "Engtin nge khatia dam diai a i tawng theih zawk a? Ka naute chu nang hian i that a ni." a ti hluam hluam a. Thinrim insum tih hriat tak hian, "Oznur, inhnial buai ka peihlo ania. Vanduai vang ani..Pathian remruat a ni." a ti a. Oznur-i chu a thinrim kher mai, a mutna khum chu a chum vak vak a.

"Inhnial buai ka peihlo e...i ti maw? Eng ang mihring nge maw i nih le? Ka naute min thahsak a ni." tiin a au vak vak a. Rum tak hian Kudret-a chuan a melh a, "Enteh, hei bak chu min hmu leh tawh ngai suh ang che. Hei hi kan inhmuh tawpna ber ni rawh se, min tibuai tawh suh." a ti khur khur a.

Theih leh theilo hian Oznur-i chu a rawn thu chhuak a, Kudret-a banah chuan a vuan a. A kut chu a fawp ngawih ngawih a, mittui tla teuh chung chuan, "Kudret, min ngaidam rawh. Ka tihpalh a ni, tihbuai che ka tumlo. Min kalsan suh, khawngaihin min kalsan suh." a ti lawm lawm a.

Mahse Kudret-a chuan a ngaihsak lo kher mai, "Min kalsan lo a nih chuan, min tibuai zui zel a nih chuan engkim hi i pa ka hrilh ang. I pa hian pa fel tak angah min ngai a, a hria a nih vaih chuan i u te khuaah a thawn chho che anga, hrehawm ti takin i awm reng tawh ang." a ti leh khur khur mai.

Kudret-a chu a nam vak a, "Misualpa...tenawmpa." tiin a an khum ta vak vak mai a. Kudret-a chuan a chhuahsan ta daih mai a, Oznur-i chu a tap zawih zawih mai. A pum chu a dawm vawng vawng a, a mittui a tla zawih zawih bawk. "Min kalsan thei lovang, ka ta chauh i ni." tiin a tap hawm hawm a.

**************

Zan a lo ni a, Ceyda-i chu sitting room ah thuin a sam a khal neuh neuh a. Kawngka rawn ri rak chu a hria a, "Nu, apa alo haw." tiin a va tlanphei a. A kalna tur te chu a han dap chawp a, "Fimkhur rawh aw." tiin Nisa-i chuan a rawn au zui a. Kudret-a chu a lo haw a, Ceyda-i chu a kuah a.

"Bawihte...ila mu nange?" tiin Kudret-a chuan a fanu chu a zawt a, Nisa-i pawh chu a lo kal phei ve a. "I lo haw hun ka nghak a, anu pawhin a phal vek. Ka mut hma chuan ilo haw tlai ziah bawk sia, chuvang chuan ka lo nghak che." a ti a. Ceyda-i hi a mit a del kan tih tawh kha, mitmu dum lai a neilova, a pahnihin a var pup mai a ni.

"I ril a tam em?" tiin Nisa-i chuan a pasal chu a zawt a. Kudret-a chuan, "Tam love, ka lu ana deuh a, engmah ka ei peih lo. Ka v amu hahdam zawk teh ang, ka chau emai." a ti a, Ceyda i hmaiah chuan a chul heuh heuh a, "Bawihte, nangpawh va mu tawh rawh le." a ti a, Nisa-i chuan Ceyda-i chu bedroom lamah a hruai phei a.

Keini mizote tihdan lo ang takin, ramdang ho hi chuan an fate hi mipa emaw hmeichhia pawh nise, kum 5-6 vel lek an nih lai atang hian room hran an neih tir nghal thin a. Chutiang chiah chuan Nisa-i leh Kudret-a te nupa pawh hian an fanu mitdel, Ceyda-i hi an room bul deuh lawk ah chuan room hran an neih tir ve a ni.

Zanlai ah chuan Ceyda-i chu a nu leh pate khum lam pan chuan a rawn kal phei chhet chhet a, an kum bulah chuan ava ding a. A pa chu kovin, "Pa..pa harh teh." a ti vak vak a. Kudret-a chu a harh a, chutah Ceyda-i chuan, "Pa, hei hi ka mitah vuah la, nangmah angin ka hmu ve thei tawh dawn asin." tiin a kuta a thil ken chu a rawn lek kang a.

Kudret-a chu a phu chiang kher mai, a fanu kut pahnih ah chuan mihring mitmu niawm tak hi a lo awm a, thisen a la kai nuai zui. Kudret-a chu a harh zawk mai, a mumang mai mai a lo ni. Nisa-i pawh chu a rawn tho a, "Tinge? Enge awmzia?" tiin a lo zawt vat a.

Kudret-a chuan chhang lovin khum atang chuan a thawh san a, a fanu room lam chu ava pan a. Ceyda-i chu tui takin a lo muhil a, a biangah chuan ava chul a. Kudret-a chuan Ceyda-i pian hma a thil thlengte chu a ngaihtuah let a, "Kudret, damdawiinah kal vat ang. Ka tui bawm hi a keh tawh aniang, ka na chhuak vek tawh. Ka neih a hun tawh, ana emai." tia a nupuiin a ngen lawm lawm laite chu a ngaihtuah chhuak a.

Mahse khatih hunlai khan Kudret-a chuan hruai duh lovin, "A la hunlo, thla ruk leh a chanve chiah ala ni. La nghak hrih rawh, i pumna satliah mai mai anih kha." tiin a lo hnial tlat kha a ni a, a inchhir kher mai. Khami zan khan a nupui na ti lutuk khan hospital pan pui turin a ngen lawm lawm a, a kap atanga thisen a rawn chhuah hnuah chauh Kudret-a hian a kalpui ta chauh a ni.

"A mit chhunga nerve awm te hi a chhe hneh hle a, chuvang chuan in fanu hi a mit a del phah ta a ni. I nupui hi  ahun takah rawn hruai nila chu, hetiang thil hi a thleng lo tur." tia doctor i'n a hrilh laite chu a bengah chuan a ri nawn mawlh mawlh a, a inchhir takzet a ni.

Zawite hian chhuak em emin a tap a, "Lo hria ila...lo hria ila chu...avan pawi tak." tiih amah leh amah chu a in beng vak vak a. Amah vang liau liau in a fanu neihchhun, Ceyda-i chuan khua  ahmu ve tawh dawn silo. A fanu chu a en a, "Min ngaidam rawh aw, bawihi.." tiin a chal ah a fawp a, a kalsan ta a.

**************

Oznur-i pawh hian pasal a nei ve tawh a, mahse a thi tawh a ni. Zing a lo ni a, Oznur-i pasala nu chuan  a fapa thi tawh thlalk chu a hrufai a. Oznur-i chu lo kalin, "Ka thiannu fapa a damlo a, an khuaah kalin ka va kan ve teh ang." a ti a. "I nu in lo kan mai se, chutiang te chu. Pasal sun mek i ni a, mahnia hmun hla taka chhuah daw daw chu a him lo." tiin anu chuan a lo chhang a.

Vin lek lek hian, "Ka nu chu a damlo, amah pawhin lo va kan rawh atia lawm. Ka vawikhat kalna tur pawh a ni hleinem, ninawm lutuk. Pasal sun tawh ka nih avang hian ka chhuak ve thianglo tihna em ni? Zalenna te chu ka nei ve alawm, ka kal dawn." a ti hlur mai a, a room lamah chuan  akal ta daih a.

A fapa thalak chu a en a, "Awww...Ali Ismail, ka fapa duat...la dam chu nila, la awm ve chu nila ti hian i nupui hian min vin ngam biklo tur a nia." tiin a tap hawm hawm a. Oznur-i pawh chu a insiam sawk sawk a, tichuan a chhuak lui ta tho a.

******************

Zing tawngtai inkhawm naah chuan Kudret-a pawh chu a kal ve a, a peihlo chung a thianpa in a sawm a ni. Thusawitu chuan thu a sawi mek a, "Min hmanngaih a min enkawl thintu, kan Pathian Allah hmingin chibai ka buk a che u. Thil sual tihte, duhvang renga tisual lui emaw tihpalh thil vang pawh nise, kan tihsual man chu he khawvelah a ni emaw, khawvel dangah pawh nise kan hmu dawn tho tho. Mihring reng reng chu kan thil tih ang zelin a dan thianghlim tak hmangin kan Pathian hian ro min relsak vek dawn. Quran 83-na ah khan Pathian khan enge a sawi in hria em? Enge Siccin hi? Sualna a ni, Siccin chu sualna tihna a ni. An thil tihsual te, an bawhchhiatna te chu chhihchhiah vek a ni. Hrethiamlo te chu hrilhfiah rawh u, pawm ve duhlo te bulah chuan Rorelna ni a lo thleng leh dawn tih hi hrilh ang che u. Tuman an pawmlo thiang lo, dan bawhchhe thintute chauh lo chuan." a ti a, Kudret-a chuan a ngaithla tui lemlo kher mai.

Inkhawm an bang a, Biak In pawnah chuan an pheikhawk leh chapal te chu an bun sup sup hlawm a. Kudret-a thianpa chuan a pheikhawk chu a zawng a, "Ehe...ka pheikhawk a awm velo. Avan ho thin tak, ka inkhawm kha tehreng nen inkhawm ve chhunah ka pheikhawk an la ru zui a nia." a ti nuah nuah a. Ngaihsam zet hian Kudret-a chuan, "Inkhawm ka peihlo chung chung min sawm lui a, sakhuana lam ka ngaihsak lemlo tih pawh i hria. Min hruai luih vang a nih kha, i phu ve hrim hrim." a lo ti deuh zek mai.

Biak In chu an chhuahsan ta a, Kudret-a chuan a thianpa bulah chuan, "Enteh thianpa, Oznur-i nena kan inkar kha zep tlat ang che." a han ti a. A thianpa chuan, "Awle, mahse tinge khatia i chet reng reng a? Nupui i nei tawh a, fanu i nei tawh bawk a, chutih laia lo va CK pui kha a thalo asin." a lo ti a. "Nia a dik alawm, haw teh ang." tiin Kudret-a chuan a lo chhang a, an haw ta a.

Oznur-i pawh chuan motor a chang mek a, a phone phawrhin Kudret-a chu ava phone ta a. Kudret-a pawhin in a lo thleng tep tawh, a phone a rik avang chuan a ding chat a. A phone a han en chu Oznur-i a ni tih a hriat chuan, "Lo va kal rawh." tiin a thianpa chu a hrilh a. A thianpa a kal liam chiah chu phone pick up in, "I mawl em ni? Ka sawi tawh kha, engkim a tawp tawh, min lo be tawh ngai suh." tiin phone chu a dah nghal hmak mai. Oznur-i chu a sa kher mai, "Tenawmpa leh...i thil tih sual man chu i hmu khawp ang." tiin phone chu a ak tha a, bus lo kal mek chu a phar ding a, a chuang ta a.

Ceyda-i chu khumah chuan thuin a hmai a hup a, a tap kerh kerh mai a. Nisa-i chu lo kalin, "Ceyda, tinge i tah a?" tiin a rawn zawt a. Tap chung hian, "Nu, thil thalo tak a ni." a lo ti ringawt a. Anu chuan hrethiam lo tak hian, "Eng thil nge? Min hrilh ta che." tiin a zawt leh a. Ceyda-i chuan, "Apa bulah sawi suh aw....a hrethiamlo palh ang." a ti leh a. Nisa-i chuan a fanu chu kuahin, "Min hrilh rawh bawihte..min ti mangang ania." a ti a, Ceyda-i lah chu a tap nasa tulh tulh mai.

**************

Oznur-i chu ahmaa athiannu nena an kalna, Hodja pakhat Ihsan-a in lam pan chuan a kal leh ngat a, inchhungah chuan a lut a. Ihsan-a inthawina roomah chuan a lut a, Ihsan-a hma takah chuan a thu a. "A hmaa ka thusawi te kha i hre tawh nange? I va zawm si love. Lo ngai reng rawh, thil thalo tak chu i chungah hian a thleng ngei ang." tiin Ihsana chuan a hau a.

"Ka tihpalh, i thusawi ka zawm loh avangin..mahse Kudret-a ka duhna hian min kiansan thei ngang lo a ni. Khawngaihin min pui rawh, keimah chauh hi min duh se ka ti ani, min hmangaih se ka duh a ni. Ka tan a pawimawh a, thih leh dam inkar a ni asin." Oznur-i chuan  ati a. Ihsan-a chu a ngawi vang vang a, "Um..ka hrethiam e. Ka pui thei ang che, mahse a hautak deuh dawn ania." a lo ti a.

Oznur-i chuan a bag chhung chu a zen rak rak a, tichuan pawisa a rawn phawrh a. Ihsa-a pek pah chuan, "Hei hi ka neih zawng zawng a nih hi, tunah chuan bus fare tur chiah ka nei tawh. Ka ngen ache, min pui rawh." tiin a ngen leh a. "Ngaithla teh, hmeichhia....ka hnena lo kal thinte chuan ka thiltihtheih zia an hria. Ka tiam ache, he Kudret-a hi i ta chauh a ni ang. Mahse, nangmah pawhin engemaw tal min pek belh angai ang." tiin a lo hrilh a.

Oznur-i chuan  arangkachak ngun te chu a phelh sawk sawk a, "Hei hi rangkachak a nih hi, nei vek rawh. Ka ngen ache, min puih ngei angai ang." tiin a ngun te chu a pe a. Ihsan-a chuan, "Tunge a nupui hming?" tiin a lo zawt a. "Nisa." tiin a chhang a. Ihsan-a chuan, "An inchhungah tu tute nge cheng?" tiin a zawt leh a.

"Ceyda-i...an fanu ania. Chuan, a nu tawngtheilo, khum beta damlo nen a nimai." tiin a lo chhang a. Ihsan-a chuan chiang tak hian Oznur-i chu a en a, "Ngun tak khan lo ngaithla teh, Nisa-i chungah chuan dawi ka hmang dawn a, vawk nen ka dawi khawp ang. Chu dawi chu dawi chak tak a ni a, keimah chauhvin ka ti thei. Ramhuaite hi Kristian emaw, Muslim ang te pawhin an nung ve thin a, mihring ang chiah hian an awm ve thin. Heng ramhuaite zingah hian sual leh nunrawng tak mai a awm a, a hming chu Anzar a ni a, Muslim sakhua hi a haw takzet a ni. An zinga ramhuai pakhat chu biak pawh ka lo tum ang, Nisa-i kawchhunga lut turin ka lo hrilh ang." a ti a.

Oznur-i chu a lo nui sak mai, "Nihleh a kawchhungah chuan lut ta se, enge thleng ang?" tiin a zawt a. "Ramhuai chuan a tibuai reng anga, zan 5 chhung a tihbuai hnuah a that ang. A thisen zawmpuite pawh chu ramhuai chuan a tibuai zel ang." a ti ta mai a. Oznur-i chu a phu zawk mai, "An thi vek dawn tihna mi?" a lo ti vat a.

"A thisen zawmpuite chauh an thi ang." tiin Ihsan-a chuan a lo chhang a. "An fanu Ceyda-i saw.." a tih lai chuan Ihsan-a chuan, "Nangpawhin i fa i chhiat phah kha...i fa pai, i hrinchhuah loh kha tuman an ngaihsak biklo. He dawi ka hman theih nan hian ramhuai chu ka biak angai dawn a, Islamism do leh sawichhiat hi phal a ni. Chuvang chuan Quran bu-a chang thenkhat te chu ruhro ah ka ziak anga, chu ruhro neitu pawh chu a thihna a la rei tur a nilo. Tichuan chu ruhro chu vawk rilin ka tawn anga, a dik vek a nimai. Mahse Nisa-i thil engemaw tal ka mamawh ang, a chil emaw, a samzai emaw, a thisen emaw tal ka mamawh dawn. Tin, a thlalak pawh ka mamawh ang." a ti a.

Oznur-i chuan, "Thildang tihtur ala awm chuan min hrilh zel rawh....Duhtlan tur dang ka nei chuanglo.." a lo ti zawi sap a. Chutah a rawn hawi chhuak a, "I tihtur chu ti rawh, Pathianin awmpui zel che rawh se." a ti a, a chhuahsan ta a. Ihsan-a pawh chu chumi zan la la chuan an vawkin lam a pan a. A pitar awmpui chuan a rawn zui ve bawk a, Ihsan-a chu vawk inchhungah chuan a lut a.

Chem hriam tak hi a keng a, vawk pakhat chu a man bet a. A chul hliau hliau a, thu eng enge mawni chu a chham bul bul reng bawk a. Chutah vawk chu a vin ta siah siah mai a, thawm a ring kher mai. Vawk chu a thi fel ta, a pum a zai hawng a, a ril te chu a la chhuak a. Pitar chuan vawk rilte chu a plate kenah chuan a lo thun lut zel a, dawi thu niawm tak chu an chham malh malh reng bawk a.

Ihsan-a leh pitar chuan thlanmual lam an pan leh a, thlan pakhat, la tharlam tak leh an phumna la reilo tih hriat tak mai bulah chuan an va ding chat a. Pitar zawk chu  a bula thingkung lian tak hnuaiah chuan a thu a, hla mak tak sa in a zai ul ul mai. Chutih lai chuan Ihsan-a chuan thlan chu a lai a, rei fe hnuah chuan ruang chu a lai chhuak ta.

Ruang chu ala chhuak a, an tuamna puan chu a phelh sawk sawk a. A mawng lampang chu a phelh thei ta a, mitthi ke chu a lo lang a. Chutah a hreipui ken chuan mitthi ke lehman zawk chu a chek siah mai a, a bung hmawk mai." Chu ke chu la in ataksa dang zawng chu an phum leh a, an kalsan ta a.

***************

Zing a lo ni a, Kudret-a pawh a dawr lamah sa a sat leh mawlh mawlh tawh. Nisa-i te in kawngka chu a rawn inkik dat dat a, Nisa-i'n ava hawng chu Oznur-i a lo ni a. "Ehe lo leng rawh, Ceyda-i pawh a tawngvai nasa mai, nichin lawk khan i hming lamin a tawng vai char char alawm." tiin Oznur-i chu a lo welcome tha kher mai. "Ka thiannu te ina kal hmain rawn tlawh ve hrim hrim che u ka duh a.." Oznur-i chuan a ti a.

Ceyda-i pawh chu a lo harh tawh a, a ngaih em em a Ni Oznur-i nen chuan an in awm nghal chat a. "A Ni Oznur, thuruk ka hrilh ang che aw.." Ceyda-i chuan a han ti a. Oznur-i chuan nuichung hian, "Ummm..sawi ta che." a lo ti a. Chutah Ceyda-i chuan, "Efe-a hian min hmangaih a ni." a ti ringawt a.

Hrethiamlo tak hian Oznur-i chuan, "Tunge chu chu? In school ami em ni?" tiin a lo zawt a. Ceyda-i chu a nui a, "Um..kan class a mi." a ti a. "Ekhai, han thang lian leh deuh phawt la, mipa chu i chhai thei chauh ang." tiin a fiam a. Chutih lai chuan Nisa-i chu thingpui leh chhang keng chungin a lo kal a, "Gulsum-i nen min rawn tlawh thei ula ka ti khawp mai." a rawn ti a.

Nui lui tih hriat tak hian Oznur-i chuan, "Gulsum-i chungchang hi a sawi pawh sawi tawh lo teh, min ti a zo vek dawn." a lo ti hmuk mai. Gulsum-i hi Oznur-i pasal Ali-a nu a ni a, an hming hian an inko deuh tawp thin a ni. Nisa-i chuan zaidam tak hian, "I pasala nu a ni a, chutin an sawi ngailo." a lo ti dam diai a.

"Ka ning tawh lutuk, ka pasal hlui Ali Ismail vang chauh a ni ka la awmpui ni. Nilo se chu e, ka chenpui peih tawh teuh lo." a lo ti leh hlur mai. "Chutin aia upate an ti ngailo, Pathian pawhin mal a sawm lo mai ang che. I pa nen khan chengdun zawk ta ula chuan maw, hei ai hian i ning zawk ang. Ipa pawh kha a hahthlak ve khawp mai, kan pa Kudret-a nen hian an in ang chiah, an thinchhe si." a ti zauh mai.

Oznur-i chu a sa leh ta zak mai, "Nia...ka kal phawt ange..chumi hma chuan in bathroom ka lo hmang lawk ange." tiin inhnuai bathroom lam chu a pan a. Bathroom a lut chiah chu 

Nisa-i samzai a zawng nghal chiam mai, a dap a dap hnuah chuan samkhuih pakhat a samzai lo awm teuh chu a hmu ta a.

Samzai chu a la a, toilet paper chuan a tuam a. Mahse a inngaihtuah a, Ceyda-i sam zawk pawh a lo nithei si a, chuvang chuan paih tumin dustbin lam chu ava pan a. Chutah dustbin-a hmeichhe part hmanhnu, thisen kai nuai mai chu a hmu leh bawk. A bengah chuan Ihsan-a'n, "A chil emaw, a samzai emaw, a thisen emaw tal ka mamawh." a tih chu a hrechhuak zawk mai a, chu part hmanhnu chu toilet paper chuan a fun a, a ak tha ta a.

Chutih lai chuan Bathroom kawngka chu a rawn in kik thut mai a, a phu chiang kher mai. Nisa-i a lo ni a, "Oznur, shelf ah khan towel a awm ania, i hman duh chuan..." a rawn ti a. "Awle...ka lawm e." tiin a lo chhang a. Bathroom atang chuan a chhuak a, "Ka kal ange." tiin a chhuak a. Pawn thleng chuan Ceyda-i te nuda chuan an thlah a, "A Ni Oznur, lo leng leh thin rawh aw..." Ceyda-i chuan a ti a.

Oznur-i chuan Ceyda-i na tuar ve tur chu a khawngaih kher mai, a hnuk a ti ulh hial a. Tap tep hian Ceyda-i chu a kuah a, Ceyda-i chuan a lo nuih sen sen a. Nisa-i chu enin, "Ka hnuk a ulh deuh thut mai, ka kal ange." a ti a. Nisa-i chuan, "Kudret-a pawh a lo thleng tep ang, lo nghak law law la tha tur." a ti a. Mahse Oznur-i chuan, "Angailo mai..nidangah ni rawh se." tiin a kal ta a.

Kudret-a pawh in lam pan chuan a lo haw mek a, khua a thim der tawh. An in a thlen dawn tep ah chuan Oznur-i a tawk thut mai, thinrim tak hian abanah a pawt vak a, "Enge i rawn tih?" a ti nghal khur khur a. A kut chu lo paih thlak sakin, "In chhungkua in hlim nge hlimlo tih ka rawn en duh mawle..in lo hlim khawp mai. I nupui pawh a fel e, a pasalin ka fa pai lai a thah thu ka rawn hrilh hman tep a ni. Mahse ka duhlo, a rilru ka tina ve duhlo." tih pah chuan Kudret-a chu a nam sawk sawk a.

Kudret-a thinrim chuan Oznur-i chu a kek vak a, "Hmeli, lo kal tawh ngai suh. Ka nupui pawh hi rawn hmu tawh suh, min tibuai tawh suh ang che." tiin a kalsan ta daih mai. Oznur-i chu a thinrim kher mai, "Hmela, tenawmpa..uichopa." tiin a au zui vak vak a, mahse Kudret-a chuan a ngaihsak lo kher mai.

****************

A tuk zingah chuan Oznur-i chu Ihsan-a bulah chuan ava kal leh a, chibai a han buk te te phawt a. Tichuan Nisa-i thlalak te leh a hmeichhe part hman hnute chu a pe a, Ihsan-a chuan a lo en vang vang a. "Umm..i ti tha lutuk e. Kan Pathian hian Adama kha vaiviut atangin a siam a, a hnarah nunna thaw a thaw lut a, nunna a pe a, ramsa zawng zawngte chungah thuneihna a pe bawk a a ni." a han ti a.

A pitar awmpuinu bulah chuan, "Blade hriam tak lo la rawh, bowl ah tui rawn chhungkhat la, lo keng phei bawk ang che." a ti a, pitar chu a kal ta a. Oznur-i chu a han hawi kual a, dawhkanah chuan vawk lu ringawt hi thisen kai nuai hian a let reng a, nuam a ti lemlo kher mai. Reilote hnuah chuan pitar chu a lo let leh a, blade leh tui chu a rawn keng a.

Ihsan-a chuan blade chu la in Nisa-i part hman hnu chu a zai t(r)et a, engemaw chham bul bul pah chuan part chu tuiah chuan a chiah a. Tui chu a rawn sen ta vek mai, chu tui sen chu a bula bel pakhat, achhunga vawk ril lo awm ah chuan a chhung lut a. Vawk ril chu a han la chhuak leh a, mihring ke ruh, a hma zan lawka an tan bun tak chu a la chhuak leh a, chu keruh ah chuan vawk ril chu a tawn bet ta a.

Nisa-i thlalak chu a la leh a, a hnungah chuan SICCIN tih chu anmahni Turkish hawrawp chuan a ziak a, tichuan vawk lu an dahna plate-a thisen ah chuan a chiah a, alai takah chuan blade hriam tak hmang chuan a zai thler a. Hmun li ah a zai thler a, tichuan boel pakhat ah dahin, "Hei hiui chaw thlengah va dah rawh, nitinin a them panga vel pawtthla zel la, zanah chauh eitir thin ang che." tiin pitar chu a hrilh a.

Tichuan Ihsan-a chuan keruh vawk rila in zam nuai chu a la kang a, ring tak tak hian thu a chham a. A chham ring tulh tulh a, Oznur-i pawh chuan a lo chham pui vek bawk a. Chutah in chu a rawn nghing dur dur a, an awmna te chu a rawn insawi ta vak vak mai. Oznur-i hlau lutuk chuan a chham zui ngam tawhlo, mahse Ihsan-a erawhin a chham uar tulh tulh thung.

Lirnghing ang mai hian inchhung chu a nghing dur dur mai a, banga thlalak intar te chu a tla keh hial a. Chutah Ihsan-a chuan chu keruh chu a ulh bung ta hmawk mai a, boruak chu chawp leh chilhin a reh nghal hmak mai. Oznur-i chu a thaw huai mai a, a mittui a tla phung hman hial a ni.

"Zan 5 a ral hnuah i thil duhte chu a thleng dik ang, Setana chuan kan tawngtaina alo ngaithla a ni..Pathianin min ngaidam mawlh rawh se." a ti a. Oznur-i pawh chu a tho a, inlam pan chuan a haw ve leh ta a.

****************

ZAN KHATNA (May 10th, 2009)

Ihsan-a awmpuinu pitar chuan Nisa-i thlalak cheh sawm chu la in a them pangate chu ui chaw ah a pawlh a, ui chuan tui ti tak hian a lo hap nghal buan buan a. Ceyda-i pawh in lamah a pi damlo mu meng kur mai chu a sam a khalh sak mial mial a, chutah api chu a rawn ang vak a, a rawn thaw hrawk mai. Ceyda-i, mitdel ta na na na chuan a harh zawk mai mai emaw tiin, "Shhh..." tiin a pi chu a chul hliau hliau a, api pawh chu a ziaawm veleh nghal mai a.

Tuipui kamah chuan Kudret-a leh a thianpa chuan motor chhungah beer an indun a, Kudret-a pawh a kai tawh khawp mai. "Ka pa hian a sawi fo thin a, pa nih dawn hi chuan thingkung ang mai kan ni a. Mahse rah neilo, eitur pe chhuak ve theilo. Mahsela an hlimthla ringawt pawh a tangkai a, chawlhhahdamna nuam tak ang mai hi a ni tiin min hrilh thin. Ka pa thih hnu khan hlimthla pawh ka nei ve tawhlo, ka ruak vek hian ka hria. Ka hlim lova, ka lung a leng thin a ni." a ti nuah nuah a.

A thianpa chuan, "theihnghilh rawh thianpa, hun kal tawh a nih chu. Tute pawh hi hun kal tawh vangin kan na ve vek ang chu, theihnghilh tum rawh." tiin a lo hnem a. Kudret-a pawh chu a khi suk a, "Umm...engkim theihnghilh vek teh ang. Heng rilru hahna te hian min thlawhbo san vek teh se, an ninawm emai. Kan inchhung boruak te pawh min hriatpui a, ka thiantha ber, ka neih awmchhun tak meuh meuh i ni e, thianpa." tiin beer chu an in cheers a, an in dun leh khawlh khawlh mai.

In lamah chuan Nisa-i chuan apasal chu a lo nghak reng a, Ceyda-i erawh a mu tawh thung. A lo haw har em avang chuan mut zai a rel ve ta a. Zing tawngtai ziah thin a nih avangin a mut hma chuan alarm a set a, tuk tina a tih thin a ni. Kudret-a pawh chu a rawn haw ve ta a, rui zet hian inchhungah chuan a lut a.

An khaw lam pan chuan Oznur-i pawh chu a haw leh mek a, bus-a chuan pah chuan thil a ngaihtuah nauh nauh a. "Zan 5 a ral hma ngeiin a thisen zawmpui zawng zawngte chu an thi vek ang...i naute i pum chhunga thi ta pawh kha tuman an ngaihsak lo a, an tawrhpui biklo che." tia Ihsan-a'n a hrilh laite chu a bengah chuan a ri nawn mawlh mawlh a.

Alarm chu a lo ri ta, khua erawh a la var lo. Nisa-i chu a thi vat a, a inphih harh a. Fai takin a inbual a, an inneih zungbun te chu a phelh a. Tichuan a Muslim Hijab (lu tuamna) chuan a lu chu a tuam tha a, a tawngtaina room ah chuan puan phahin a thingthi a, a tawngtai ta a. Chutia a tawngtai mawlh mawlh lai chuan a hma zawn takah chuan vawk lu niawm tak, thisen kai nuai mai chu a rawn tla thut mai.

A phu nasa lutuk chu a tho nghal vat a, inchung a han en chu sahel tlang lian tak tak hi inchungah chuan a lo bet thup hlawm mai. A mal te te chuan an rawn tla phuk phuk hlawm a, Nisa-i hlau lutuk chu a au nasa kher mai. Chhuatah chuan thisen a kawi nuai mai a, a rang thei angberin Nisa-i chuan a tawngtaina room chu a chhuahsan nghal a.

******************

Khua a lo var a, Nisa-i chuan anu khuma mu mek chu thutchilhin a be mawlh mawlh a. "Ka hlau ani, ka nu. Ka chungah hian engemaw tak a thleng ani, mahse enge a nih ka hre silo. Nu, min tawngtaisak thei angem? I rilru-a i tawngtai anih pawhin a pawilo." ati a, a mittui chu a tla zawih zawih mai.

A fanu bedroom lamah chuan ava kal a, khum hnuai atanga thawm rawn ri rek rek chu a hria a. Khum hnuai chu a bih a, a fanu naute lem hi a lo awm a. Naute lem chu a la chhuak a, a mitah tak chuan a en a. Chuveleh naute lem chu a rek ta chiam mai a, amah pawh chu reh beh ang mai hian a thaw hrawk hrawk mai a.

A uak tuar tuar a, nautelem chu a thlah vat a. Chutah bakcheh a la lawk a, naute lem sam chu a chep nawi ta vak vak mai. Naute lem sam tla nuai te chu a chhar khawm a, a ka(mouth) chhungah chuan a hnawh mawlh mawlh bawk a. A thaw rang tulh tulh a, a uak vak vak bawk. A tawpah chuan chhuatah a mu tawp a, a chilthli te chu a tla nuai tawh mai.

****************

Mitdel hawrawp lehkhabu chu Ceyda-i chuan a kuta khawihin a rilruin a lo chhiar ve malh malh a, "Ui beng neilo a hmu a, chu ui chuan uhli leh mei(tail) takngial pawh a neilo. An zavain chuan a rualin an haw khawm a, chumi hnuah ramdanga zinturin a thawn bo hlawm ta a. An landord chu alo kal a, tha takin a lo lawm lut ta a." tiin ama tawk chuan a tlei ve em em a.

Chaw ei dawhkana Kudret-a coofe in pah a, lo thu tum bur mai chu Nisa-i chuan a va pan a, "Kudret, coffee i in zawh hunah titi lawk ang aw?" inthlahrung tak chuan ava ti a. "Sawi duh i neih chuan sawi vat mai teh." a lo ti hmuk a. Nisa-i chu a tho a, "Angailo mai." tia kal a tum chian chu Kudret-a chuan, "Nisa, sawi rawh..enge ni?" a lo ti leh a.

"Tukin zing khan hma takah ka tho a, ka tawngtai a. Ihh..inchung atang khan thil engemaw mak deuh a lo tla thut a.." a han ti chu Kudret-a chuan, "Engthil mak deuh maw?" alo ti hu mai. "Engchiah nge a nih ka hre lo, a mak lutuk, ka hlau lutuk a." a ti leh a. Kudret-a chuan, "I mawl em ni? I phu tawk chiah a nih chu..puithuna i buaipui leh lutuk vang a nih kha." a lo ti hrep mai.

Nisa-i chuan Ceyda-i va melh zeuh pah chuan, "Naupang hriat laiin chutiang sawi suh, ka thil sawi nen pawh a inzawmlo hrim hrim." tiin a lo khap vat a. Chutah vin zet hian, "I sawi zawh chiah kha, i tawngtai laiin thil mak deuh a thleng i tih kha..a inzamw reng chu." a lo ti leh hrep mai. Lungawilo tak hian Nisa-i chu a tho a, a kal ta daih mai.

"Thilmak deuh alo tla tih vel mai mai, mi mawl kan lo kawl reng che a nih hi. Ka hne takzet, min tibuai reng mai." tiin Kudret-a chu a ang chhunzawm mawlh mawlh a. Ceyda-i chuan a nautelem mit leh beng chu hupin nautelem beng bulah chuan, "Ngaithla suh, keimah ang hian engmah hmulo zawk rawh. A chang chuan hmuhtheihloh te hi a tha zawk ania, keimah ang hian." a lo ti su su a.

*****************

ZAN HNIH-NA (May 11th, 2009)

Thinrim tak hian Kudret-a chu a rawn chhuak a, thingkung phen atang chuan Oznur-i chuan a lo enthla reng a. Kudret-a a kal liam chiah chu in lam a pan ve nghal a, in ava thleng chu a pasala nu Gulsum-i chu a lo la meng a. La  alo phiar mawlh mawlh a, "Ila mu nange?" tiin Oznur-i chuan a zawt a.

"Tun ang hunah khawnge i kal a?" tiin a lo zawt leh a. "Nisa-i te inah ka leng a, kan titi a." tiin a chhang a. Gulsum-i tawng leh hma chuan Oznur-i bawk chuan, "Ka mu dawn, mangtha aw." tiin a room lamah a luhsan nghal daih a. Ngei hmel zet hian Gulsum-i chuan a melh hraw a, a la phiar lai chu a phiar chhunzawm mawlh mawlh a.

Thil ri dut dut chuan Oznur-i muhil lai chu a ti harh a, a mit a han meng chiah chu a phu chiang kher mai. A pasal thi tawh, Ali Ismail-a ngei mai chuan a room bang chu a luin a lo tau vak vak a, bangah chuan thisen a kai nuai tawh mai. Oznur-i hlau lutuk chu a thu chhuak a, "Ali..Ali.." tiin a thaw nghal hlawp hlawp mai.

Chutah Ali-a chu a rawn hawi a, a hmai zawng zawng chu thisenin a bual khat vek a. Thinrim hmel em em hian, "Nangmah vangin ka thi..nang hian min hmangaih hlawl lo. Kei mah leh keimah ka inzai asin, nang chuan kha pa chauh kha i hmangaih a ni." tiin blade hriam tak mai chuan a ban chu a zai ta mai, thisen a rawn baw hawk hawk a.

Chutah a ban a phar a, Oznur-i lam rawn pan pah chuan, "Nangpawh hi ka zai ve dawn che, ka zai thler vek dawn che." a ti ta chhur chhur mai. Oznur-i hlau lutuk chu a au vak vak a, light a rawn eng pup mai. Gulsum-i chu a rawn lut a, "Oznur, enge ni ta?" a rawn ti vat a. Oznur-i chu a hawi kual a, Ali-a hmel reng hmuh tur a awm tawh lo.

A thaw huai a, "Mumang ka nei a.." a ti tawk tawk a. "I tha em?" tiin Gulsum-i chuan a zawt leh a, chutah vin zet hian, "Aw ka tha, i khumah va mu leh tawh rawh." a lo ti hrep mai. Gulsum-i pawh chu a chhuak ve leh mai a, Oznur-i chu khum atang chuan a tho a. A khum bulah chuan blade a lo awm reng mai a, a chhar a, chu blade ah chuan thisen a lo kai a.

**************

A tuk zingah chuan Nisa-i chuan Ceyda-i chu an school ah chuan a hruai a, a haw pah chuan a pasalin na tak taka a tawngkhum dan te chu a ngaihtuah chhuak a, a rilru a na kher mai. In a thleng a, a nu damlo mek chu puan huhin a hru fai a. "Nu, i ziaawm ve telh telh ania." tih pah chuan duat takin a nu chu a chul hliau hliau a.

Puan a sin tir a, tape chu play sakin, "Tihian lo ngaithla la, tui hi paih pahin thinpui tui tawk ka han lum ange." tiin a kalsan ta a. A nu a hruk faina tui bal tak mai chu a khai chhuak a, dawhkanah dahin choka lam a pan a. Thingpui chu a lum a, tichuan ui chu khai lehin inhnuai bathroom lamah a chhuk pui ta a.

Chutih lai chuan anu, kum upa tawh tak, kum tamtak chhung kea kal thei tawhlo, chet pawh che theilo leh tawn pawh tawng thei tawhlo chu khum atang chuan a chhuk ta mai a. Choka lam chu a pan a, Nisa-i thingpui lum chu a thlek ta vang vang mai. Nisa-i pawh chuan tui chu toilet ah a paih a, a thingpui lum mek va en tur chuan choka lam a pan leh a.

Choka  alut chiah chu a ding chat mai, a nu chuan thingpui sa ver vawr tak mai chu a bel chawpin a lo keng run mai a. Nisa-i mak ti lutuk chuan a hmui a hup a, a nu chu a en char char ringawt. Chutah anu chu a dak vak a, a au ta vak vak mai. A thingpui bel kenlai chu a chawi kang vak a, a chhip a tang chuan a leih ta mai a.

Chu thingpui sa tak chuan a vun te chu a ti sawr vek a, a tlu tawp mai. A hmai zawng zawng chu a kang sawr vek a, a thi zui nghal bawk. Nisa-i rap lutuk chu a t(r)e vak vak a, a tap nghal zawih zawih bawk a. A nu lah chu a thi meng kur mai si a, a taksa pum chu a khu rum rum mai. Nisa-i tap hawm hawm lai chu anu chuan ala melh reng tho a, chhuatah chuan thingpui chu a bawk nuai bawk.

************

Anu ruang puan vara tuam chu Nisa-i chuan a en ngawih ngawih a, a mittui chu a tla reng mai bawk a. Pawnlamah chuan Kudret-a leh a thianpa chuan Nisa-i nu ral tura lo kalte chu an lo dawngsawng a, nuho chuan inchhung lamah ruang chu a kil luih mai bawk a. Oznur-i leh Gulsum-i te pawh chu reilo teah anlo thleng ve a, "A pawi khawp mai, kan tawrhpui takzet che a ni." tiin Gulsum-i chuan Nisa-i chu a kuah a.

"Inlo kal chu ka lawm hle mai." tap chung chuan a lo ti a. "A pawi ka ti khawp mai." tiin Onzur-i pawh chuan a rawn kuah ve a. Inhnit hlawp hlawp chung chuan Nisa-i chuan, "Engtin nge ka nu kha kum tamtak chhung coma-a awm tawh si choka lam a pan thei kha ka hrethiamlo a ni..engvangin nge khatia a tih..ka hrethiamlo a ni...ka enkawl tha ve viau asin le." tiin a tap zui hawm hawm a.

Gulsum-i chuan a kutah vuanin, "I thiamloh ani lo, ka fapa pawh khatiang chiah khan chhan awmlovin a inthat a, ka hriatthiam pui lutuk che." tiin a lo hnem a. Oznur-i chu Ceyda-i bulah chuan ava thu a, "Ceyda, room ah awm daih ang hmiang?" ava ti a. Mahse Ceyda-i chuan, "Hetah hian ka awm duh." a lo ti tlat mai.

**************

ZAN THUM-NA (May 12th, 2009)

Mi zawng zawng an haw rem hnu chuan Kudret-a pawh chu inchhung lama luh ve chu a tum ta a, meizial a zu zo chu kawngka chu a han pawt vak a. Mahse a inhawng ta hauh lo mai, "Nisa, Nisa..min kalh khum ania." tiin a au vak vak a, mahse tuman an chhang lo. Kawngka chu amahin a rawn inhawng a, inchhung chu a lo hnawk nuai mai.

A hmaa an inchhung awmdan a ni ta hauh lo, rei tak chhung luah tawhloh ang mai hian a chul rup mai a, maimawm ril a inzam nuai bawk. A hawi kual a, thutthleng leh dawhkan te chu puan var hian a lo inkhuh vek a. Chutah a fanu Ceyda-i aw a hre ta, "Pa..Apa.." a rawn ti lauh lauh mai. Kudret-a chu a hawi kual vak vak a, "Ceyda, ka fanu, khawnge i awm?" tiin a au vak vak a.

Chutah Ceyda-i aw ngei mai chuan, "Pa, nangmah vangin ka mit a del a ni. Ka hre vek, i thiam loh a ni." a rawn ti ta mai a. Kudret-a chuan mak a ti kher mai, thawm rawn chhuahna chu inchung lam atangin a ni. Inchungah chuan a chho a, "Pa..Apa.." tiin Ceyda-i chuan a khat tawkin a rawn ko sek bawk a, a ngaih a thalo kher mai.

A fanu bedroomah chuan  alut a, a thil hmuh chuan a ti hrilhhaiin a ti hlau kher mai. Puan var sinin mi panga hi a mah hnungchhawn zawng hian chhuatah an lo thu a, an lu an bu nghauh nghauh mai. Hlau chung chung chuan va pan hnaiin, "Ceyda, ka fanu.." tiin a va pan hnai zel a. Chumite lah chuan eng enge maw hi an chham rual thup thup a, inchhung lah chu a bal em em mai lenghal.

Chutah a hnung atang chuan a nupui Nisa-i a rawn lang thut a, a phu chiang kher mai. Puan var a sin a, a hmai a dang vek a, a hmui chu a ro vek bawk. A mit a var pup bawk a, "Iva rawn haw tlai ve..chhungkaw enkawl tur in nei asin. Enge i tih a, nula lepchiah tak takte i va tawmpui leh em ni?" a ti chhur chhur mai.

Kudret-a hlau lutuk chu a tawlh hnung dawr a, chutah a bul lawka chuan Oznur-i a rawn lang leh thut mai. Oznur-i pawh chuan kawr dum vek hi a ha a, a mit a eng vek bawk. Ring zet hian, "Kudret, min ngaidam rawh." a rawn ti ve bawk a, a phu nasa kher mai. Chutah le, Nisa-i chuan a kuahbet thut a, Oznur-i pawh chuan a rawn mabet ve nghal a.

Ceyda-i aw ngei maiin, "Apa..Apa.." hlauthawn hmel taka a rawn tih chuan Kudret-a chu a harh zawk mai. A bul vel chu a enkual a, tumah an awm tawh lo. A hma zawnah chuan a fanu Ceyda-i chu a lo ding reng a, "Enge thleng a? Engthil nge thleng?" tiina  lo rak chiam chiam mai a. Ceyda-i chu a va kuah vat a, "Ka fanu, engmah a nilo..hlau suh." tiin a hnem mawlh mawlh a.

***************

Zing a lo ni a, Nisa-i chuan puan a thlep fel mawlh mawlh a. Kudret-a chu a bulah va thuin, "I thil min hrilh kha, ka tawng ve a ni. Cleric (Puithiam) ka va hmu teh ang, min puih theih ngei ka beisei." a ti a. Nisa-i pawh chu a thu ve a, a pasal thil sawi pawh chu a pawmpui kher mai.

Kudret-a chuan Cleric chu a va hmu ta a, "Chibai le, ka pu." a va ti a. "Nangpawh chibai le, Kudret." tiin a lo chhang a. Puithiam bawk chuan, "I nupui chu enge a an a, a la tuar na viau em?" tiin a zawt leh a. "Hun ala mamawh deuh ang..englo ania, hun i neih chuan titi dun lawk teh ang. I puihna ka mamawh a, i buai loh chuan.." inthlahurng tak chuan Kudret a chuan a han ti a.

"Mitthi vui tur ka nei a, mahse a pawilo. Lo kal ve tawp mai rawh, tlai tawngtai inkhawm hma chu hun ka nei thei ang." tiin a lo chhang a, Kudret-a pawh a lawm kher mai. Chutih lai chuan Gulsum-i chu inlamah a lo tawngtai mawlh mawlh a, chutia thlamuang taka a tawngtai lai chuan a thutna bul dawhkana a fapa thi ta, Ali-a thlalak chu khawihtu awm miah silo hian a rawn keh ta thet mai. Mak ti tak chuan thlalak chu a en a, a lai takah chuan a lo keh a.

Kudret-a leh puithiam chu an thudun a, "Ka sawifiahna hi ngaihthlak a nuam dawn lemlo ania, i nupui hi thlarau sualin a man mek a ni." a ti ta mai a. "Aman a? Eng thlarau sualin maw?" Kudret-a chuan a lo ti vat a. "Djinns, Djjins thalrauvin nupui taksa hi an thunun mek a ni. Djinns hian mihring te hi a hmusit em em a, a haw takzet bawk." tiin a lo chhang leh a.

"Mahse tinge ka nupui kher? Tihsual kan nei em ni?" Kudret-a chuan a lo ti leh a. Puithiam chuan, "Tihsual in nei kher lo maithei e, mahse djinss hian nangmahni lakah buaina a nei tihna a nimai. Ngaithla rawh, nupui ka neih zan khan damlohna avangin chet pawh ka che thei lova. Thla 2 leh a chanve chhungzet chu ka tho chhuak thei lova, khumbetin ka awm reng mai a ni. Ka chhungte chu an mangang a, tichuan an hmelhriat puithiam pakhat chu puihna an dil ta tawp a. A tawpah chuan djinn ramhuai pakhatin ka nupui chu dawiin, amah a lo inngaihzawn tir tih ka hre chhuak ta a ni. Kan inneih atang khan keipawh min dawi a, ka thih phah tep hial a, chuvang chuan ka nupui kha ka khawih theilo a ni. Mahse chu puithiam chuan kan Quran thianghlim hmangin chu ramhuai chu a bei let a, darkar chanve chhung tehmeuh an inbei a ni. Ahnuah chuan  a hneh ta lova, a thi ta a ni. Mahse amah vang khan tun thleng hian ka thla amuang a, tun dinhmun hi ka thlen ve theih phah ta a ni." a ti a.

"Min tanpui thei angem?" tiin Kudret-a chuan a lo zawt leh a, "Allah puihna hmangin kan hneh theih ngei ka beisei." tiin a lo chhang a. Kudret-a chu a lawm kher mai, puithiam chu chibai a buk a, "Ka lawm e, ka pu...ka kal phawt ange." tiin in lamah a haw san ta a.

************

Zan  alo thleng leh ta a, Nisa-i chuan puan a thui mial mial a. Chutih lai chuan inhnuai lam atang chuan pitar khuh ri kharh kharh ri a hre ta tlat mai, a phu zawk mai a. Hlau chung chung chuan a tho a, muang chang chuan inhnuai lam a pan thla ta a. Khuh ri lah chu a ring telh telh mai a, bathroom atang ngeia lo chhuak a ni.

Bathroom chu muang chang chuan a han hawng a, a thil hmu duhloh leh tu mihring mah ina an hmuh chakloh tur chu a hmu ta. Toilet bulah tak chuan anu, ahma ni lawka intihkum ta chu a mutkawr var nen chuan a lo ding run mai. A cher em em a, a vunte chu a chuar hian a chuar vek bawk. Chhang tlawn seitak mai hi a keng a, chu chhang chu chemtein comode-ah chuan a ziat thla a.

Nisa-i hlau lutuk chu a t(r)e thawt a, chutah anu chu a rawn hawi thut mai. Comde-a a chhang ziah nawi chu a kut chuan a zu khawih a, an ekin comode a zu zen tihna a nih chu. Tichuan chu chhang nawi, a kuta kai luai mai chu a ei ta mawlh mawlh mai. Aw rapthlak zet hian Nisa-i melh reng chung chuan, "Nisa, ka ril a tam, chhang nawi ka ei leh duh ania." a rawn ti ta chhur chhuar mai.

Nisa-i hlau lutuk chu rang takin inchungah a tlan chho a, a tawngtai na pindan lam a pan vat a. A thingthi a, "Lalpa, min venghim rawh. Min pui rawh, Lalpa." tiin tap chungin a tawngtai nghal mawlh mawlh a. Chutih lai chuan Kudret-a pawh chu a rawn haw a, pindan a han lut chu a nupui lo tlusawp reng mai chu a hmu a.

"Min pui rawh, Lalpa, min pui rawh." a lo la ti char char a. "Nisa, enge awmzia?" tiin Kudret-a chuan a zawt a. Nisa-i chuan a pasal chu a han en a, "Kudret, ka dik lo..i sawi dik a ni ngei ang, mi a diktak ka ni tawh."  ati khur dar dar a. Kudret-a chuan a nupui chu vuanin, "Hlauthawng suh, puithiam pawh ka be tawh alawm. Min pui thei dawn e, naktukah kan va kal dawnnia." tiin a lo hnem a, room lamah a luhpui a, an mu ta a.

***********

ZAN LI-NA (May 13th, 2009)

Oznur-i chu a inbual zo a, towel-a a han intuam lai chuan current a rawn thim ta thut mai. Kawl a phe zuai zuai a, ruah a sur buan buan bawk a. Bati chu chhi alhin bathroom chhuahsan a han tum chu zai ri a hre tlat mai. Hmeichhe zai ri a ni a, naute awihmut tuma zai a ang ber.

Mak a ti em em a, zai ri lo chhuahna lam zawng chuan hlau tak chung siin bathroom chu a chhuah san a. Ama bedroom atanga lo chhuak a ni tih chu a hre nghal a, kawl lah chu a phe zuai zuai reng mai bawk si. A room a han luh chuan amah hnungchhawn zawnga Nisa-i lo thu chu  ahmu a, Nisa-i chuan naute a pawm bawk a, chu a naute pawm lah chuan thisen a kai nuai bawk.

Nisa-i hmel lah chu a rapawm takzet, a hmui a duk vek a, a hmai a dang vek bawk a. A mit a dum kuk mai bawk a, puan varin a lu a tuam bawk. Chutah aw nelawmloh zet hian, "I nutei fapa, i unaupa ngei, nupui nei tawh lehnghal chu i chet khawloh pui a..chuvang chuan a fanu chu a piansual phah ta a ni." tiin a naute pawm lai chu a bula chawhtawlh thisen hlira khatah chuan a thlak pawp a.

Oznur-i chu a rawn melh a, ava pan hnai ta mai. Oznur-i chuan a hlau em em a, a lo au vak vak a. Nisa-i chuan Oznur-i samah chuan a kek dak awrh mai a, patling 10 rual vel aw ang mai hian, "I chetsual pui hi tu pasal nge a nih i hria em?" tiin a au t(r)ial ta ruai ruai mai. Thawk leh khatah Nisa-i chu a bo thut a, Oznur-i chuan chhuatah chuan a thu hnawk mai.

**************

A tuk zingah chuan Oznur-i chuan Ihsan-a chu ava phone a, "Keimah Oznur-i ka nia.." a tih chuan Ihsan-a chuan, "Enge ni ta?" a lo ti vat a. Tap tuau hian, "Hodja zahawm, khawngaihin min pui teh. Thil mak deuh deuh ka hmu thin a, ka hlau thei lutuk." a ti nghal hluam hluam a. "Nisa-i te chhungkaw zingah mi engzat nge thi tawh?" tiin a rawn zawt a.

"A nu damlo chauh kha ala thi, mi zawng zawngin mahnni a inthat angah an ngai vek bawk, tuman  a chhan diktak an hrelo." a ti a. Ihsan-a chuan, "Enge i sawi duh?" tiin a lo zawt leh a. "Hodja, kha vawk dawi kha midang lakah i hmang ve em ni? Ka sawi awmzia chu, kha ramhuai Nisa-i tibuai mektu khan keimah pawh hi min tibuai ve thei tihna em ni?" tiin a zawt a.

"Nisa-i nen chuan thisen inzawmna in nei em?" Ihsan-a chuan a lo zawt leh a. "Aih neilo, hodja." tiin a lo chhang a. "Anih chuan hlau suh, ka thil sawi te kha i theihnghilh ta em ni?" a rawn ti khur khur a. "Theihnghilh love, Nisa-i leh a thisen zawmpuite chauh an thi ang tiin min hrilh." a ti a. Ihsan-a chuan, "Lungngai suh...thlamuang tak khan awm rawh." a ti a, phone chu an dah ta a. Kawngka bulah chuan Gulsum-i chuan engkim chu a lo ngaithla ru reng mai a, mak a ti kher mai.

**********

Ceyda-i kawr ban t(r)et chu Nisa-i chuan a  thuisak mawlh mawlh a, "Anu, api kha vanram ah em ni a awm?" tiin anu chu a rawn zawt thut mai. "Aw ni e, mahse tunah chuan ala awmlo pawh a ni mahna, ka duhthlanna a ni." tiin zawi sap hian a lo chhang a. Chutah Ceyda-i chuan, "Anih leh hremhmunah zawk kal ta se?" a ti ta mai a.

"Nilo, chutin sawi suh." a ti tham tiak a, Ceyda-i lah chuan, "Timaw? Hremhmuna awm chu a nuamlo viau em ni?" a la ti ta deuh deuh a. Nisa-i chuan a vuan bet a, "Ceyda, thu rawh." a ti a. "I thui zo tawh em ni?" tiin a lo zawt a. Vin zet hian, "Ceyda, thu rawh ka tih chu." a ti hlur mai a. A fanu chu a thutthlengah chuan a nam thlu lawp a, room lamah a tlan lut nghal a. 

Puan var ava la a, tichuan a lo chhuak leh a. A fanu chalah chuan a fawp a, tichuan thutthlengah a lawn a. An inchung light (chandelier) ah chuan puan chu a suih mawlh mawlh a, tichuan a nghawngah a vet a. A zuangthla ta thut mai, thutthleng chu a tlu ri bur mai a. Engmah hmu ve thei lo a fanu Ceyda-i chuan, "Nu..nu.." a lo ti a.

Nisa-i chuan a ke a leng vak vak a, a in khai ta vu vu mai. Kudret-a a lo lut a, a nupui lo inkhai  ahmu chu rang takin ava tlan pehi vat a. "Nilo, Nisa.." tiin a au vak a, a va vuan bet nghal a. "Pa? Apa?" tiin Ceyda-i chu a lo au ve chhen bawk a, an buai kher mai. Bakcheh chuh vatin Nisa-i inkhaina puan chu a chep chat thei hram a, chhuatah chuan a tlu hnawk mai.

"Anu, eng thil nge thleng a?" tiin Ceyda-i chu a lo mangang ve em em a. "Ceyda, i room ah lut rawh." Kudret-a chuan a han ti a. MAhse Ceyda-i lah chuan, "Pa, tinge ilo va haw hma ve.." a lo la ti zui. "Ceyda, i room ah lut rawh ka tih chu.." tiin a vin tuar a, Ceyda-i pawh chu a kalna tur dap chawpin a room ah chuan a lut a.

"Nisa, nisa...harh rawh." tiin a nupui chu a sawi vak vak a, Nisa-i chu a khur cher cher mai a, a thaw hrawk hrawk mai. "Nisa, lungngai suh..vawiin ah engkim kan ti tawp vek ang. Harh rawh, muangchangin thaw rawh...a tha vek e..engkim a tha vek e." tiin a nupui biangah chuan a chul sak a. Chutah Nisa-i chu a meng kawk a, a thaw vak vak a, a ziaawm ve thei ta hram a ni.

****************

Puithiam chuan Nisa-i kawchhunga ramhuai hnawh chhuahna tur hmun chu a lo buaipui mek a, Quran bu dahna atana siam, dawhkan x-shape chu pali a rem kual a. Quran bu chu a dah vek a, tichuan a lai takah chuan thutthleng a dah bawk a. A hmun vel chua tifai a, tichuan a kalsan leh ta a.

Zan alo thleng leh ta, Gulsum-i chu Nisa-i te inah chuan lengin chaw a ei ve nghal a. Kudret-a chu a kham vat a, a kut  a sil mawlh mawlh a. Ceyda-i leh Gulsum-i te erawh chuan an la ei mawlh mawlh thung a, Kudret-a chu rawn pheiin, "Bawihte, i nu nen kan chhuak lawk dawn ania." a ti a.

Gulsum-i chu va en leh in, "Pi Gulsum, ka fanu hi lo awmpui la, kan lo let leh hma chu lo haw suh aw.." a ti a. "Ka kal ve duh.." tiin CEyda-i chu a lo lungawilo nasa mai a, "Bawihte, a tlai tawh emai. Nakinah kan vaiin kan la leng ho zawk dawnnia, fel deuhvin lo awm rawh aw." tiin a chhuahsan ta a.

Nisa-i chuan mu leh mal pawh a hre tawh lo, a melh ngai  amelh tlawk tlawk reng tawh mai. Fimkhur tak hian muang changin Kutdret-a chuan a kalpui a, kawngsira thutthleng ah chuan a thutpui a. Nisa-i chu a khur cher cher reng a, a hmel en reng reng pawhin a pangngai tawhlo tih chu hai rual a nilo.

Oznur-i pawh chu in lamah amahin chaw a lo ei ve mial mial a, a inngaihtuah nasa kher mai. Chutia chaw a ei mawlh mawlh lai chuan a thleng chu a han en a, thlengah chuan thisen hlir a lo awm a, vangvat tam tak, lian pui pui an lo vak nuah nuah mai bawk a. A hlau lutuk chu a zuang tho vat a, a tawlh hnung nghal a.

Silhmun lamah kalin a va uak vak vak a, vangvat pakhat chu a chhak chhuak a. Chutah a uak leh tuar tuar a, pathum lai chu a chhak chhuak leh a. Sitting room lamah ava tlan a, a pum a rawn na vak mai. A pum dawm chung chuan a phone a phawrh a, chutah a phu zuk a, a kut chu a rawn khawng ta vek mai.

Chutah a kut pahnih chu a mahin a in elh vak a, a ri tuar mai. A tho thut a, a eu vak vak bawk a. Na a ti lutuk chu a au tuar a, a hnungzang ruh te chu a ri tuar tuar mai. A ke a rawn inthlep leh hnawk a, a taksa chu thununtu an awm a ni. A ke lehlam pawh chu a rawn inthlep leh hnawk a, chhuatah chuan a thal der mai. A mit a rawn var vek a, zau tak hian a ka a ang vak a, a thawk a tawp thut a, a thi der mai.

**************

ZAN NGA-NA (May 14th, 2009)

Zan tawp ber zan a ni ta, dawi zawng zawng tawp hun tur, zan pawimawh tak a ni. Ihsan-a pawh chuan Nisa-i thlalak them hnuhnug ber chu hmu nga ah pawt nawiin ui chu a pe leh ta a, Nisa-i leh a thisen zawmpuite tan chuan zan hnuhnung ber a ni tawh dawn a ni. Kudret-a te nupa pawh chu kawngsira thutthleng ah chuan thuin puithiam chu an lo nghak reng tawh a, reilo teah chuan a lo thleng ta.

"Assamualaikum, ka pu." tiin Kudret-a chuan chibai a buk a, "Waalaikumsalam, ka fapa." tiin a lo chhang let a. Puithiam beng bulah chuan, "Ka pu, thil hrilh tur che ka nei a, inbe lawk ang." tiin an kal hrang a. Nisa-i erawh a la thu reng a, a melh ngai melh rengin a lu a bu leh nghauh nghauh zel a, a kut chu a khal nuap nuap mai bawk a.

"Ka pu, ka nutei fanu Oznur-i kha i la hria em, hmanni lawka a pasal intihlum ta kha?" tiin a zawt a, "Hria e." tiin a lo chhang vat a. Kudret-a chuan, "A pasala nu Pi Gulsum-i kha vawiinah a lo kal a, Oznur-i'n phone-a mi a biak lai chu a ngaithla ru a. Min hrilh dan chuan Oznur-i hi Hodja pakhat nen an inthurual a, tichuan ka nupui hi an dawi a ni tiin a sawi a, min hrilh ang chiah khan...ka nupui a thih theih nan leh a thisen zawmpuite zawng zawng an thih thei nan a ti a nih thu a sawi bawk. Nisa-i nu, coma-a awm reng tawh, khatia a inthah ringawt nachhan pawh he an dawi vang hi a ni ngei ang." a ti a.

Puithiam chuan  alu a han bu nghauh nghauh a, "Umm...thlarau sualte nen an inthurual a nih ngei chu, kan hna hi a hautak dawn khawp mai." a lo ti a. Nisa-i chu an va kai tho a, Temple chhungah chuan an hruai lut ta a. An kal pah chuan puithiam chuan, "Kudret, tuna i thil hmuh tur hi nidanga i la hmuh ngailoh leh i hmuh duh ngai hauh loh tur a ni dawn ania. Mahse i beihlet angai, kan hmelma te beihlet theih dan awmchhun a ni miau si a." tiin  ahrilh mawlh mawlh a.

Quran bu pali inrem lai taka thutthleng bulah chuan an ding a, "A kawrlum hi phelh rawh le." a ti a, Kudret-a chuan Nisa-i kawrlum chu a phelh a. Thutthlengah chuan an thuttir a, "Vawikhat chu hmeichhe pakhat hian a fapa chu Mohammad-a hnenah a hruai a, a fapa chu ramhuaiin an tihbuai thin thu leh  rawng taka an ngaihsak thin thu te chu a hrilh a. Mohammed-a chuan naupang awmah chuan dawmin a tawngtai sak ta a, tichuan naupang chu a luak vak a, thil rimchhe em em mai, dum vek hi a rawn luak chhuak ta a. Tichuan a luak chu a rawn che a, ui note pian ang mai hian a luak chu a rawn inhlawm khawm a. Tichuan a per nawlh a, a bo ta daih a ni." tiin Puithiam chu a tawng mawlh mawlh a.

Nisa-i erawh chuan kawngka bula afanu Ceyda-i lo ding reng chu a en char char a, Kudret-a leh Puithiam erawh chuan an hmu ve hauh lo. "Kan tawngtaina te hi Pathian hian a duhkhawp lo thin fo maithei, chuvang chuan ka master-ina min hrilh dan angin ka ti dawn a ni." Puithiam chuan a ti a.

Nisa-i lu tuamna hijab chu a lakthlak sak a, puan dum dangin a lu chu a tuamsak leh a. Chutih lai chuan Nisa-i chu a nghik feih feih a, a zawi ngaui mai bawk a. Puan dum chuan a hmai chu an khuh a, tichuan Puithiam chuan Nisa-i luah chuan vuanin thu a chham tan ta a. Kudret-a chuan a lo vuan bet a, Nisa-i awmdan chu a diklo leh tan ta.

Nissa-i chu a che ngual ngual a, a thaw hrawk hrawk mai. Puithiam chuan tui thianghlim chu la in Kudret-a bulah chua, "Allah tawngtaina chham pahin tui thianghlim hian a chhip atang hian leih rawh." tiin tui bel chu a pe a. Kudret-a pawh chuan tawngtai mawlh mawlh pah chuan a nupui lu chu tui chuan a leih a, thu mak pui pui chham chungin puithiam chuan Nisa-i hmaite chu a lo nuai a.

Tichuan a lu an tuamna puan chu puithiam chuan a hlip a, thing tum lian tak hi a rawn keng phei a. Chutah Nisa-i chu tin in, "Allah ropui ber rawh se." tiin vuak a tum ta mai. Kudret-a chuan lo dang vatin, "Engthil nge maw i tih le?" a ti vak a. "Kudret, i hrethiamlo a ni. Hei hi i nupui anilo, a kawchhunga  djinn ramhuai hi kan hliam angai alawm, amah ana ve dawn lo." tiin a lo hrilhfiah vat a.

Chutah Nisa-i chu a rawn hawi thut a, rumzet hian apasal chu a rawn melh khur mai. "Kudret, tenawmpa. Engvangin nge i nupui i phatsan a? I nupui chungah hian Oznur-i chunga i thil tih ang chiah hian ka ti ve dawn.." a ti ta khur khur mai. Mahse Nisa-i aw a ni hauh lova, sawi tirtu midang an awm a ni. Nisa-i tawngdan leh a hmui phun ang chiah chiah chuan kawngka bula Ceyda-i chu a lo tawng ve zel a, Ceyda-i mit chu a sen vek lehnghal.

"He kawchhung atang hian chhuak rawh, Allah hmingin thu ka pe ache." tih pah chuan puithiam chuan Nisa-i chu vuak a tum a, mahse Nisa-i chuan chu thingtum chu a lo man chat mai. A nam tlu thuai a, tichuan Kudret-a chu ava melh leh ta. Nisa-i mitmu chi a lian em em a, a ha  adum vek a, a hmai a dang vek bawk.

Kudret-a chu a rek a, "Hetah hian i thi dawn.." a ti khur khur a, chutiang chiah chuan Ceyda-i pawh chuan a lo sawi ve bawk a. Kudret-a chu a han theh thuai a, a leng lawp mai. Kudret-a chhuata a let reng chu ava pan hnai leh a, a samah kekin, "In thi dawn, ka that vek dawn che u." a ti khawk rum rum mai.

Puithiam chu lo tho lehin puan dum a rawn la a, Nisa-i chu a rawn khuh a. A pawm a, thutthlengah chuan a thuttir leh a. Nisa-i chu a rak vak vak a, Biak In chhung chu a khawk rum rum mai. Nisa-i vawnbeh pah chuan, "Kudret, hrui rawn la vat rawh, ka phuarbeh angai." a ti a.

Kudret-a chuan hrui chu la vatin Nisa-i chu an phuarh bet a, tichuan puithiam chuan ringzet hian, "Allah hmingin chhuak turin thu ka pe ache." tiin Nisa-i lu ah chuan a han hlap pawp mai a. Nisa-i chuan na  atih hmelloh kher mai, thinrim tak hian puithiam chu enin, "Nang putar hmelchhe pa, i nupui ina a ngaihzawn djinn ramhuai kha ka unaupa a nih kha. Khumbeta i damloh lai khan, i nuipui kha a duhtawkin a khawsak pui thin asin. Mahse i nupui chuan a sawichhuak ngam silo, a dik em?" tiin a nui thler duai duai mai a.

Puithiam chuan, "Ramhuaite thiim thuneihna ata, Lapan eng rawn chhuah tir mawlh rawh se. He kawchhung atang chuan chhuak rawh, thu ka pe a che." tiin Nisa-i luah chuan a aia na hian a han hlap leh pawp mai a, Nisa-i chu a zal der mai. Kudret-a awmah chuan a bei thlawp a, "Nisa, duhtak...harh teh." tiin Kudret-a chuan a sawi vak vak a.

Mahse Nisa-i lu atang chuan thisen a lo chhuak a, Nisa-i chu thi der mai. Thinrim tak hian Kudret-a chuan puithiam chu melhin, "Nang putar, engthil nge i tih hi?" tiin ava rek ta vak mai a. "Kudret...min thlah vat rawh." tiin a lo beilet a, "Ka nupui i that a ni.." tiin Kudret-a chuan a rek na tulh tulh mai.

Chutah kawngka bula Ceyda-i lo ding reng mai chu Puithiam chuan ava hmu ta, "I nupui kha chu ramhuaiten an tibuai ringawt a, a kawchhungah eng ramhuai mah a lut lo. SAw nu zawk saw  ani, i fanu Ceyda-i kawchhungah zawk sawn a ni." tiin Ceyda-i chu ava kawk a. Ceyda-i chuan kawngka bula ding reng chung chuan alo melh reng a, a mit a sen phut mai lehnghal.

*************

THUDIK CHU?

Ceyda-i'n tap chunga anu bula a sawi, "Nu, thil thalo tak a thleng a ni, mahse apa hrilh suh aw.." tia a sawi kha eng thil thalo mah a nilo. Hmeichhe naupang zawng zawngina an neih thin, than thi (period) a lo nei ve tawh a, chu chu a lo hrethiamlo a ni. Anu chuan khami ni khan part a vuah sak a, a part hmanhnu chu bathroom dustbinah a paih sak a.

Chu chu Oznur-i chuan Nisa-i part hmanhnu emaw tiin a lo la a, Ihsan-a bulah a pe ta a ni. Tichuan dawi chu an tan ta a, Ihsan-a chuan Nisa-i nilovin, Ceyda-i zawk a lo dawi tihna a nih chu. Khatia Nisa-i nu mu lai zau taka rawn ang a, rawn thaw leh hlawp hlawp thinte kha Ceyda-i thil tih vek a ni.

Tin khum atanga Nisa-i nu rawn tho chhuak te pawh kha amah a thochhuak nilovin, Ceyda-i'n a hruai zawk a ni. Oznur-i pawh ramhuaiin a tihbuai ve nachhan pawh engdang anilo, a cousin Kudret-a fanu Ceyda-i, a thisen zawmpui ngei chungah dawi chu hman a ni miau a, chuvang chuan a bang biklo.

Khatia a chaw eilai mek vangvat-a arawn chan thut a, a hnua a thih tak daih nachhan pawh kha Ceyda-i kawchhunga ramhuai thil tih vek a ni. Oznur-i leh Nisa-i hian thisen inzawmna pakhatmah an neilo a, chuvang chuan ngaihtha takin Oznur-i chu a lo awm ve mai a, a thi ve dawn tih a inhre hauh lo. Mahse dawi atana a thisen lak kha Nisa-i thisen nilovin, a cousin fanu Ceyda-i, a thisen zawmpui ngei a lo ni si a, chuvang chuan a thi ve ta a ni.

*************

A TAK TAKA THIL THLENG A NI :

Turkey rama chhungkaw pakhat chuan thil rapthlak tak an tawk a, chhungkaw pa ber hi kum 42 mi a ni a, a nupui hi kum 33 mi a ni. An fanu hi kum 11 mi niin Muslim Biak In hlui pakhat a basement chhungah thi a hmuh a ni a, he basement hi tun thleng hian mi sawi sep ala kai a ni. Turkey ramah hian mi sangchuang laiin black magic hi an hmang thin a, thih phah pawh an tam hle.

Hetianga black magic hmanga mi nun tihchhiat tum hi sual lian tak a ni a, Islamic danah phei chuan khap bur a ni.

(THE END)