MERSA (A Mizo Dystopian Future Science Fiction Post-Apocalyptic Horror Story) Written by : Aaron Malsawmdawngzuala CHAPTER : 6

 MERSA

(A Mizo Dystopian Future Science Fiction Post-Apocalyptic Horror Story)

Written by : Aaron Malsawmdawngzuala

CHAPTER : 6

****************************************************

Hospital atang chuan Pu Muanpuia leh Inspector Tetea te chu an chhuak a, parking lot ah chuan an awm dun a. Tetea chuan meizial chu a han zu khu hlat hlat a, "Eng ang virus nge ni ngai? Khawi atanga lo chhuak nge maw ni ang le?" a han ti nuah nuah a. Pu Muanpuia chu muang chang chuan a han thaw hluai a, "Inspector, thil hrilh tur che ka nei a ni." a han ti a.

Tetea pawh chuan a lo melh nghal hu a, "Eng thil maw?" tiin a lo zawt vat a. Pu Muanpuia chu a hmel atang chuan hlauhthawnna a nei tih a chiang kher mai, "Ruata kha...kha tia a awm tirh khan an department atangin an rawn zawn chho va, Science department a nia. Dr. Bza'n virus awmdan a sawi khan, thil hriat chhuah ka nei a ni." tiin a han chawl det a.

Tetea chuan a lo ngaithla uluk khawp mai, "An department ami vek, hmeichhe pakhat a seh a ni. Dr. Bza'n inseh atangin a inkai chhawn theih a ti bawk si a, anih chuan kha hmeichhia, Ruata'n a sehnu khan a kai ve chu a rinawm khawp mai." Pu Muanpuia bawk chuan a han ti leh a.

Tetea chuan a lu a dawm vawng vawng a, "Tunah khawnge chu hmeichhia chu a awm?" tiin a han zawt a. Hnuailam melh reng chung hian Pu Muanpuia chuan, "HEalth Centre ah, kan University HEalth Centre ah." a ti zawi sap a. TEtea chu a meng phawk nasa kher mai, "Anih chuan, North East Vision University HEalth Centre ah i tihna em ni?" a han ti leh a.

"Aw ni e, a hming kha Hannah-i an ti in ka hria. Hri a kai ve a nih chuan midang a seh kual anga, a kai chhawng teuh ang tih ka hlau a ni. Tunah hian Hosteller hi 500 chuang an awm lehnghal a, MRSA hri leng avangin tumah an chhuak thei bawk si lo." tiin Pu Muanpuia chuan a lo chhang leh a.

Tetea chu a maimitchhing vang vang a, "Ka pu, keipawhin thil hrilh duh che ka nei alawm." a ti ve ta mai a. Pu Muanpuia chuan a lo melh hu mai, "Aizawl Police Station hrang hrang atangin call a rawn lut a, an thil sawi a inang vek mai bakah... in University atanga rawn call vek an ni bawk. Zombie an awm e an rawn ti a, ka naute ka tir mek... a hma in SI pakhat leh Constable pakhat kan tir tawh a, constable chuan midang sawi tho a rawn sawi veleh a, tunah hian mi pali vel chu tir leh mek a, kan chet vat a ngai a nih chu." TEtea bawk chuan a han ti leh a.

Pu Muanpuia chu a mangang kher mai, TEtea chuan a phone a phawrh a. Police HEadquarter lam chu ava phone a, "Hello, Inspector Tetea... tunah hian North East Vision University Health Centre ah check up neih nghal tur a ni. Keipawh Station-a va kal tawh lovin campus ah ka tlang nghal dawn, zirlai tuman gate an pel tur a ni lova, campus chhungah pawn lam mi tumah an lut tur a ni lo bawk." a han ti nghal zung zung a.

Phone atang chuan, "Copy... Khatla Police Station atangin a ni e. Sir, kan naute chu kan chhuah tir dawn mek e. Univerity atangin call tam tak kan dawng a, intibuai leh inseh an tam thu an rawn report sup sup a, station dang atang pawhin kan dawng nual mai." tiin a rawn chhang a.

Tetea chuan thil thleng tur chu a man thiam nghal a, "Anih case chu in confirm nghal em?" tiin a han zawt leh a. "Sir, a lan dan chuan network hi a jammed deuh a ni maithei. Vawi leh khatah call a tam lutuk a, Police station deuh vek a ni bawk sia, kan officer thenkhat te chuan campus lam an pan tawh zawk a, mahse..." a tawng chu a chiang ta hauh lo mai.

A rawn ri kiu vawng vawng mai a, "A tlang thei lo, kan kal ve mai a ngai a ni." tiin TEtea chuan a phone chu a dah a. Pu Muanpuia chuan a lu a dawm vawng vawng a, "Hannah-i chuan a kawi chhawng hlawm tawh a ni ngei ang, a awmzia chu... ka zirlai chanve deuh thaw chu an thi tawh ang." a ti tham tiak mai.

"Ka pu, nang chu hospital ah hian lo awm zawk rawh. I tan chuan lo let ve na chi a ni tawh lo, keimahin ka va kal ang." Tetea chuan a han ti leh a. Mahse Pu Muanpuia chuan a lo duh bik lo, "Nilove, Campus Head ka ni a. KA mawhphurhna alawm, ka kal ve dawn." tiin a car ah chuan a lut nghal a, TEtea pawh chu police motor ah chuan lutin campus lam chu an pan ta a.

****************************************************

David-a leh Dr. Samuel-a te pawh chu an kal zel a, field lam hnaih, English department awmna lam ah chuan an chhuak hlawl mai. DAvid-a chu a hawi kual a, "Hei hi...English ho building a niin ka hria." a han ti nuah nuah a. Samuela pawh chuan a lu a lo bu nghat a, "Aw a nih ngei hi, helamah chuan an la hre ve lo aniang." a lo ti ve bawk a.

Hosteller thenkhatte pawh chu kawtah chuan an lo awm a, a thenin puan an lo pho va. "HOD kan hmuh vat angai, a office awmna kan zawn nghal angai." Dr. Samuela bawk chuan a han ti leh a. DAvid-a chuan a han enkual hlawm a, "Zirlai dangte hi kan hrilh ve nghal dawn lo em ni? Khang mite ho khan an rawn zawng hmu ve vat dawn ania, arts ho lam phei kha chu an kai vek tawh hial ang." tiin a lo zawt a.

"Kan thusawi an awih i ring em ni? Kan ti chiai mai mai zawk ang, chu ai chuan HOD hmu ila thu chhuah siam se..." ti a Dr. Samuela'n a sawi lai chuan main door atang chuan English Dept HOD, Sir Zauva chu a rawn chhuak hlawl mai. Dr. Samuel-a leh David-a te chu a rawn hmu a, "Ehe, Dr. Samuel? Eng nge hetah in rawn tih a? Kha, i lu te chu a thi elaw?" tiin a rawn zawt nghal a.

Samuel-a chuan ava pan nghal a, "Sir, dinhmun hlauhawm takah kan ding a ni. Hri mak deuh mai tunah hian a awm a, kan naupangte hian an inkai chhawng mek a ni." tiin a han hrilh nghal bawrh bawrh a. Sir Zauva chuan lo pawt chatin, "NGawi teh, Arts department HOD khan min rawn phone a, police call turin min ti a. MAhse network a jam nasa lutuk a, enfiah turin ka kal dawn chiah a nih hi." a lo ti ve bawk a.

Chuveleh hlauhthawn hmel tak hian DAvid-a chuan, "Ni lo, Sir. Kal lovang, arts department lamah phei chuan an khat vek tawh. An inseh a, an inkaichhawng nasa lutuk." a lo ti a. "A sawi hi a dik, Sir. HEalth Centre atanga inkai darh chho an ni a, ka student leh ka staff zawng zawngte khan an kai vek a, Arts department lam an pan thla a ni awm e." Dr. SAmuela chuan a lo ti ve bawk.

Sir ZAuva chu a han ngawi vang vang a, "Science dept HOD pawh khan min rawn phone khan tiang lam khan a sawi a, engtin chiah nge an awm , hri kai ho chu?" tiin a han zawt leh a. David-a lah chuan, "Train to Busan ang kha animai." a lo ti khut a. Sir Zauva chuan a en hu mai, "Train to.. engmaw? Eng nge i sawi awmzia?" tiin a lo zawt hu mai a.

"Sir, a awmzia chu zombie movie a kan hmuh ang deuh hian, mak tak takin an khawsa a. Mihring tawh phawt chu an rawn bei mai zela , an inseh a, an inkaichhawng a, second 20 vel bak a ngai lo, an rawn kai ve zel mai a ni." tiin Samuela chuan a lo hrilh fiah vat a. Sir Zauva pawh chuan rang takin kawt laia awm zirlaite chu lut turin a ti a, an department bik information atang chuan thuchhuah a siam ta a.

Mic atang chuan ring tak hian, "Zirlai zawng zawngte, mahni room ah inkhung vek tura hriattir in ni e. Tumah pawn chhuak lo turin kan inngen e, zirlai zawng zawngte mahni room theuhvah lut turin kan inhriattir e." tiin Sir Zauva chuan a office atang chuan a puang a, zirlaite pawh chuan mak ti angreng tak chung si chuan thu chu an zawm ve mai bawk a.

***************************************************

Chhun dar 1 a ri tep tawh a, Hospital a duty pakhat, thaird year student nurse REbecca-i chu nurse station ah chuan a thu ngui bar a, sana chu a en a en a. ZAwi sap hian, "Minute 15 chiah a awm ta e." tiin ama hriat tham lek chuan a phun zawi sap a, a duty hun a zo tep tawh a ni.

Chutih lai tak chuan senior nurse pakhat, Sister Mary chu a rawn kal a. Rebecca-i bulah chuan rawn dingin, "Beki, i haw hma in he antibiotic hi room number 302 ah i va pek lawk dawn em ni? A in-delute vek tawh a, IV drip-a va kah luh a nimai, i hreh em?" tiin damdawi pakhat Cefrivan leh syringe hi dawhkanah chuan a rawn dah a.

Rebecca-i chuan nuam a ti chiah lo, isolated room a ni tih a hre ve kur bawk si. Inthlahrung tak hian, "Mahse, Miss... sawmi room te saw chu... quarantine mek a ni lawm ni, tukina an rawn hruai luh serious deuh kha a ni lawm ni?" tiin bah deuh nuai chuan a lo zawt let a. "Aw ni e, Dr. Bza pawhin bacterial infection tiin a sawi alawm. A mamawh tawh ania, va kap luit la, chuan i haw vat dawn nia." tiin Sister MAry chuan a lo chhang a.

Rebecca-i pawh chuan damdawi chu a la a, ward number 302 lam chu ava pan ta. Chu ward chu hri kai hmasa ber Ruata awmna ward niin Rebecca-i hian MERSA virus a kai a, a hlauhawm takzet a ni tih reng a hre ve hauh lo. Room chhungah chuan a lut a, Ruata pawh chu muhil ang tak hian khumah chuan phuarbeh reng a lo la ni a.

Beki chuan a han en deuh vang vang a, Ruata vun dang var pup mai leh nghet taka khuma phuar beh a lo ni mai chu mak a ti angreng hle a, a rap ru phian bawk. Tichuan a IV drip ah chuan damdawi chu a kan kap lut a, chutah Ruata chu a rawn meng thut mai. Beki chuan damdawi chu a kap lut zo chiah a, mahse Ruata chuan a rawn hap thut mai.

Beki kutah chuan a rawn seh thawi a, mahse a pilh hman hram. BEki chuan a thip a ti ngang mai, "Aiah... ana lutuk." tiin a tawlh hnung nghal a, Rauta lah chuan a rawn insiamchhiat khum nasa kher mai. A rum vak vak a, seh leh tum ni awm tak hian Beki lam hawi chuan a ha a thial ri bawp bawp a.

Beki chuan a rap takzet, "Tiang khawp hian a che rapthlak dawn tih an sawi lawk bawk si lo, mi te pawh warning ve awm ania." tiin a phun nuah nuah a. Mahse reilote ah chuan Ruata chu a zal riai riai a, nikhawhrelo chuan a awm leh nghal a. Khum bula sanitizer chu hmet chhuakin Beki chuan a hliamah chuan a hnawih a, tichuan badage in a tuam a, ward chu a chhuahsan ta a.

************************************************

Police HEad Constable Sanga pawh chu motor chhungah chuan a la biru reng a, pawnah chuan task force hri kai ho pawh chu an lo awm reng bawk. Police motor ri a hriat chuan a tho kang vat a, hnunglam tukverh atang chuan ava bih nghal a. A senior te chu an rawn thleng tih a hrethiam nghal a, a phone chu a phawrh vat a.

"Hello, siren kha off ru... heng zombie ho hian a ri an hriat chuan an rawn pan nghal che u a nimai." tiin a vin nghal vak vak a. SI pahnih leh Officer pakhat chu motor ah chuan an chuang mek a, chutia Sanga rawn mangang chiam an hriat chuan an in en hu hlawm ringawt mai. Siren pawh chu an off ve mai bawk a, "Silai in pai vek em?" tiin Sanga bawk chuan a rawn zawt leh a.

Officer pakhat, Hriata chuan zaidam tak hian, "Aw kan pai vek e, Sanga. Lo lungngai suh, tunah khan zombie i tihte chu khawiah tak nge an awm?" tiin a han zawt let ve a. "Ka awmna bulah, tunah motor chhungah ka biru mek, an lu ah tak zel in rawn kap dawnnia." tiin SAnga chuan a rawn chhang a.

Officer Hriata chuan a thiante chu a han melh kual a, anni pawh chu an hrilhhai hlawm kher mai. A aw a han thian kharh kharh a, "Sanga, chutia thah tawp chu a chi dawn em ni?" tiin a han zawt let a. Sanga lah hlau tawh si chuan a senior te pawh a zah zo tawh lo, "Rawn kap mai rawh u, mihring an ni lo. Ka thih in duh em ni, min ring lo em ni?" tiin a rawn vin vak vak tawh mai a.

"Awle kan hria e, kan lo kal zel e, hei.. kan rawn thleng dawn." tiin Hriata chuan a phone chu a dah a. Motor khalh mektu SI Martin-a chuan, "Engtin nge ni dawn, Sir?" tiin a han zawt a. Officer HRaita chu a han ngawi vang vang a, "I thleng phawt teh ang, pistol kha phawrh lawk ula. Thil serious tak niin ka hria, call lah report inang kan dawng hnem bawk a.. i fimkhur phawt teh ang u." tiin a chhang a.

MAhse call a dawng leh ta tlat mai, "Hello, DSP LAlhriatpuia... eng maw? Head quarter atangin maw?" a ti hu mai. Phone ami chuan, "Aw nie , Inspector Khuma ka ni a, Khatla Police Station atangin a ni e. Nichin lawk khan Aizawl Police Station duty ami, Inspector Tetea'n min rawn call a. North East University lam in pan mek a ni awm a. Khami campus chhungah khan zombie an awm thu report dawn a ni. Tukin khan call 20 chuag kan dawng tawh a, network a jam hial bawk. Tunah khawnge in awm aw?" a rawn ti ta mai a.

An in en hru hlawm mai, "Tunah hian main gate kan thleng mek a, report kan dawn dan chuan kan station ami, HEad Constable Sanga chu gate bulah, motor chhungah a biru mek a ni. Chumi enfiah tur chuan kan kal dawn a, aget bula task force dutyu zawng zawngte chu zombie ang maiin tharum nen chet an thawh a, kan SI pakhat pawh an seh hlum niin thu kan dawng." tiin Hriata chuan a chhang let a.

"Tunah hian kan naute kan rawn tir mek a, Aizawl huamchhung station dang atang pawhin campus lam an rawn pan mek zel e. Health Centre check turin Inspector Tetea'n min rawn ngen a, chu chu bawhzui nghal tur a ni bawk ang." tiin phone ami, Inspector Khuma chuan a rawn chhang leh a.

"Ngawi lawk teh, Health Centre kan pan nghal thei lovang. Gate bulah zombie te chu an awm a nih chuan, kan buaipui hmasak a ngai dawn ania." Hriata chuan a han ti leh a, mahse campus an hnaih telh telh a, network chu a jam leh ta tlat mai. Chutah motor chu a ding thut a, "NGati nge?" tiin Hriata chuan a zawt a.

Inspector MArtin-a chuan a hma zawn chu a kawk a, task force hri kai te chu an mahni lam pan chuan an rawn tlan mek a. Mak an ti kher mai, "Eng nge sawng ho saw an nih a? An awm tak tak tihna em ni?" tiin SI pakhat awm ve, Pu Mala chuan ka hau hian a han ti a. Chung hri kai zingah chuan a hma lawka Sanga kal pui, SI pakhat kha a lo tel ve tawh bawk.

Officer Hriata chuan a pistol a phawrh a, "Chhuak ang u, Sanga sawi ang khan an chalah tak kan kap zel dawn nia." tiin a chhuak a, midang ho chuan an zui ve bawk. Tichuan hri kai ho chuan seh tumin an rawn bei nghal a, mahse silai an nei avang chuan an lo kap thal siah siah hlawm mai.

An that fai ta vek a, chuveleh a bihrukna motor atang chuan Sanga chu a rawn chhuak a. A seniorte bulah chuan thil awmzia chu a han sawi a, chutih lai chuan gate bulah chuan Rintea chu a rawn lang ve leh thung a. Ring tak hian, "HElamah, lo kal ru." a rawn ti lauh lauh va, police te pawh chu an va phei a.

Rintea chuan gate chu a lo hawng a, "Task force zinga duty ve ka ni a, kei leh Pu Saia chiahin hri kan kai lo. Tunah hian Health Centre lam an pan a, security guard pakhat nen, mahse tun thlengin an rawn la let lo." tiin a han hrilhfiah hlawm a. Officer Hriata chu a han ngawi vang vang a, "Police dang pawh ralthuam nen an la rawn kal belh dawn a, mahse hetia lo nghah tawp chi chu a ni lovang." a han ti a.

"Sir, hetah hian he tlangval nen hian gate kan lo veng ang. HEalth Centre lamah chuan lo zu kal rawh u, keini hetah kan lo awm ang e." SI Martin-a chuan a lo ti a. "A tha e, tikhan police dang lo thlen nghak ula, keini HEalth Centre lam kan zu pan ange." tiin an kal nghal a, SI Martin-a leh Rintea te chuan gate chu an lo veng thung a.

********************************************************

REbecca-i chu a duty a zo tawh a, in lam pan chuan taxi ah a chuang mek a. Seat hnung lamah chuan a thu a, a lu chu a hai deuh muai muai a. Ruata'n a sehna hliam chu a en leh vang vang thin a, a na ut ut mai. A luak te chu a chhuak bur a, a rum leh deuh nghut nghut thin a.

Taxi driver chuan mak a ti deuh va, a front mirror atang chuan a han en leh zeuh zeuh thin a. Rebecca-i chu a thlan bawrh bawrh a, "Thiannu, i tha maw? I va nawm loh hmel ve?" tiin a han zawt a. Rebecca-i chu a khuh deuh kharh kharh a, "Ka.. ka tha, ka tha alawm, ka tha." a ti bah deuh nuai mai.

Mahse Mersa virus chuan hna a rawn thawk tan ta, a phu ta uih uih mai a. Taxi driver pawh chu a ngaih a tha tawh lo hle mai, "Thiannu, i tha takzet maw?" tiin a han zawt leh a. Mahse Beki chuan a chhang tawh lo, a kut zungtang te chu a rawn kawl ngul mai a. A lu chu a thle sawi bawih bawih a, a ruh te chu a chet pah chuan a ri thawk thawk mai.

A kun ngul a, taxi driver chuan be deuh chhen mahse a chhang tawh lo hrim hrim. Chutah le, nasa mangkheng hian a rawn eu ta vak vak mai a, a ruh te chu a ri tuar tuar mai. A mitmeng chu a rawn val kulh mai a, a vun chu a dang var pup bawk. Driver chuan rear view mirror atang chuan a lo hmu ve reng a, a hlau takzet.

Mahse rang lutuk tak mai hian Beki chuan driver ngawngah chuan a rawn seh ta thut mai le, driver na ti lutuk chu a au vak vak a, a kawi ta zawr zawr mai. A hma a motor awm te chu a su phei hmiah hmiah a, lock down lai a nih avangin motor leh mipui an tam lo hlauh zawk a. An hma lam zawna tlan mek, Pu Muanpuia leh Inspector Tetea te pawh chuan chutia accident a awm ta mai chu an ding ve nghal a.

Motor atang chuan Tetea chu a chhuk a, khawlaiah chuan mipui tam tak chu awm lo mahse kutzung tang chhiar tham vel chu an awm a. Hliam erawh an awm lo thung, accident-na lam chu an rawn pan khawm a, a bul hnai vela in atang chuan rawn chhuak an awm nual bawk. Pu Muanpuia pawh chu a rawn chhuak ve a, "Ka pu, motor ah lo awm rawh." tiin Tetea chuan a hrilh vat a.

Mahse taxi atang chuan a vah hian driver chu a rawn vak chhuak a, hri a lo kai der tawh. A bul hnaia lo awm pitar pakhat chu a bawh thlu nghal a, a hrawkah chuan a seh sak ta chiam mai le. Midang chuan an lo dang a, hmeichhe lo awm ve ho lah chu hlauvin an rak chiam chiam hlawm mai.

Tetea chu a va hawi phei nghal a, a thil hmuh chuan a barakhaih chiang kher mai. Rang takin ava tlan phei a, taxi driver, hri kai tawh chu a tham tho lawp a. Lamliana chuan a theh thal thuai mai, "Che tawh suh." tiin a pistol a phawrh a, a tin nghal a. Mahse driver chu a rawn tho leh a, Tetea chu rawn beih a tum ta nghal mai a.

TEtea chuan a ke ah a lo kah saka , driver chu a bawk thlawp mai. Mahse a la rawn rum nasa kher mai a, Tetea lam pan chuan a la rawn bawkvak tawk tawk mai. Chutah taxi seat hnung atang chuan Beki chu a rawn chhuak veleh a, a bul hnaia lo awm chua  seh ve leh ta. Driver-i'na pitar a seh zawh chiah pawh kha hri lo kai ve leh der tawhin a rawn tho va, midang chu a  rawn seh veleh bawk.

Khawlai chu a buai ta nuai nuai mai, thawm a rin em avang chuan in hran hran atang chuan mi an rawn chhuak zel a. Hri kai lah an lo tam tulh tulh nen, an in thleng thleng chuan an luh chilh ta hlawm a, second reiloteah chuan an pung ta tulh tulh mai. Tetea chuan a silai hmang chuan amah rawn seh ve tum te chu a lo kap thal tawp tawp zel a, mahse a mu chuan a daih tawh bik si lo.

A motor lam pan chuan a tlan phei a, Pu Muanpuia lah chu a lo khur chhe nasa tawh mai. "Ka pu, khawngaihin motor ah hian lut la, in inlamah let rawh. Mi zawng zawng i warning dawn nia, eng tin emaw tal ti teh. MEdia ah thlen la, hrilh pung rawh. Tunah khawngaihin...a tlai hma hian.." tiin motor ah chuan a nam lut rawk rawk mai.

Pu Muanpuia pawh chu a lut ve mai bawk a, mahse a thil hmuh chuan a ti zam chhe ngei mai. A khur hlawk hlawk a, "Khaitang a nih chuan, ka student te chu engtin tak awm ve ang maw? An thi vek tawh ang, an vaiin hri an kai vek tawh ang." tiin a tap pur mai. Motor bang beng vak vakin Tetea chuan, Tlan rawh, tunah tlan rawh.." a ti vak vak a, Pu Muanpuia pawh chu a tlan ta a.

Accident lah chu an rawn awm belh zel a, hri kai an pung zel bawk. A then chu inchhawng sang tak, tukverh atang te chuan an rawn tla thla tawp tawp mai a. Au ri nen, rum ri nen, thawm chu a rapthlak takzet. Tetea pawh chuan motor chhunga silai mu chu a lak belh a, mahse motor chhunga lut hman lo khawp chuan hri kai ho chuan an rawn bei zui zel mai bawk si.

****************************************

Arts building-a class room ruak pakhat ah chuan Miss Rosy, Elena-i, Faka, Joseph-a, Mama leh Elizabeth-i te chu an la tang reng a. Tih ngaihna an hre lo kher mai, "Tumah ka call tlang thei lo, network hi a jam vek tihna em mawni? Internet lah ka lut hleithei bawk si lo, eng nge maw awmzia ni?" tiin Miss Rosy chu a phun nuah nuah a.

"Wire leh eng emaw thil dang vel an pal chat a ni ngei ang, hri kai tawh hovin... hetia kan awm reng chuan a dik dawn lo, tanpuitu lah an rawn thleng der mai si lo." Mama chuan a lo ti a. Faka chuan mangan hmel tak hian, "Joseph, Fela leh DAvid-a hi i hmu tawh em? Khawnge an awm le, an la dam em ang chu maw?" a rawn ti chhuak hlawl mai.

Joseph-a chuan a lu a thing a, "KA hre bik lo, chaw pawh an rawn ei bawk si lova. Tunah phei chuan hmun dang dangah hri kai ho hi an kal kual anga, an kai darh hnem tawh ngawt ang." tiin a chhang a. Elena-i chu a rawn hawi chhuak thut a, "Hemi department ami, Arts student pakhat kha tukin khan a rawn kalin ka hria, chaw kan ei hma hret khan... a hming ka theihnghilh daih." a rawn ti chhuak ve leh hlawl mai.

Miss Rosy chuan a lo en hu a, "Eng a? Kan department ami a lo kal amaw?" tiin a lo zawt nghal vat a. Elena-i chu a han inngaihtuah vang vang a, "Aww... amah kha ka hria lawm, EMily a ni em kha le?" a han ti leh nuah nuah a. Chu veleh phawk hru hian Mama chuan, "Emily maw? Emily a lo kal amaw?" tiin a meng phawk hru mai a.

Emily hi Mama bialnu a ni mek a, Arts subject an la ve ve a ni. "AW ni e, Emily niin ka hria... kan inkawm ve thin.. i thiannu em ni?" tiin Elena-i chuan a lo zawt let a. Mama chu a mangan hmel kher mai, "Eng nge a rawn tih ang? In awmna ah daih daih a arwn kal, chupawh chaw ei dawnah lehnghal?" tiin a lu a dawm vawng vawng a.

Elena-i chu a han ngawi leh vang vang a, "Fela nen khan an inbia in ka hria, an serious dun hmel em em mai lehnghal." a rawn ti leh a. Mama chu a meng rum tawh ngei mai, "Eng a? Tunge Fela chu?" a ti leh khur khur a. Faka chu a lo khi suk a, "Kan thianpa mawle, kan class a mi." tiin a lo chhang ve leh a.

Mama chu a ngaih a tha chiah lo, "Henu hi min lo kawp reng em mawni le?" tiin ama hriat tham lek chuan a phun sup a. Tukverh ah chuan Joseph-a chu a han dak de de a, "Ka hmuh theih chinah chuan helai corridor ah tak hi chuan awm an awm lo, an kal darh tawh a ni mahna." a ti a.

"Anih chuan helai hmun atanga chhuah dan hi zawng phawt teh ang u, he class room ah hian kan tang reng thei lovang." Elizabeth-i chuan a rawn ti ve bawk a. MAhse Miss Rosy chuan, "Aih, kan kal huk chuan min seh ve animai. Ngun takin ngaihtuah ila, plan mumal tak i siam phawt teh ang u." a rawn ti ve thung a.

Chutah kawngka chu a rawn ri dawt mai, an phu nasa hlawm em em a. Kawngka chu pakhat hian a rawn beng vak vak a, "Hawng rawh u,  hawng vat teh u. Zombie ka ni ve lo, hawng vat teh u." a rawn ti chiam chiam mai. Miss Rosy chuan a han enchiang a, "Warden a nih hi." tih leh kawngka hawn chu a rual a.

"Nilo, luh tir suh." Elena-i chuan a ti hman tawk, mahse Warden chu a rawn lut hman ta tho va. A rawn bawk lut thlawp mai, "I tha maw? An seh hman che em?" tiin Miss ROsy chuan ava buaipui nghal a. Mahse Warden chu a rawn leh hawi a, a mit meng chu a lo sen vek mai. A nghawngah chuan sehna hnu hma a lo awm a, Miss Rosy kut chu nghet tak hian a vuan a.

Aw t(r)ial ruai hian, "A theih loh, ka duh ve lo. Min chhan ru, min chhan ru." a ti ta chhur chhur mai. Miss ROsy hlau chu a au vak vak a, "Ni lo, ka duh thei lo." tiin kal sawn a tum a, mahse warden chuan a vuan nghet lutuk tlat. Chutah seh ala tum zui a, mahse a mitah tak mai chuan Joseph-a chuan a rawn chhuih pawp mai.

Miss Rosy pawh chu a thlah a, Faka chuan a lo pawt sawn vat a. Chutah Warden chu a rawn tho va, a khur hlawk hlawk a. A ruh te chu a rawn ri tuar tuar a, hri chu a rawn kai ve ta. Elizabeth-i , Miss Rosy leh Elena-i te chuan an hlau takzet. "Engtin, engtin nge kan tih dawn?" tiin Mama chu a au vak vak ringawt a.

Chutah Warden chuan Joseph-a ber chu a rawn bei ta, seh tumin a rawn bawh rawk rawk a. MAhse Joseph-a chu a lo indang hram hram a, mipa dang ho lah chuan han puih mai nachang pawh an hre lo. "Pui ve ta che u, in mawl ami?" tiin Miss Rosy chuan a vin vak vak hlawm a.

Chutah Faka chuan chair pakhat chu a la lawk a, a ke lam zawng chuan warden chu a va nawr vak a. Tukverh zawnah chuan a nawr phei a, mahse warden hri kai tawh bawk si chu a chak lutuk tlat. A rawn nawr let ve ta vak mai a, chuveleh Mama chuan a rawn pui ve nghal a.

An han nawr dun ngat ngat a, Joseph-a chuan a rawn pui ve leh nghal bawk a. Mi pathum tha na na na chu a chak deuh bawk aniang, warden chu tuvkerh ah chuan an nawr chilh a, chutah Joseph-a chuan chair chu a han tlawh pawp a. Tukverh chu a keh chuai mai, chhawng 2-na a awm mek an ni bawk a, warden chu thluak baw nuai khawp chuan leiah chuan a insawh a, a thi chiang kher mai.

****************************************************************

TO BE CONTINUE