MERSA (A Mizo Dystopian Future Science Fiction Post-Apocalyptic Horror) Written by : Aaron Malsawmdawngzuala CHAPTER : 1

 MERSA

(A Mizo Dystopian Future Science Fiction Post-Apocalyptic Horror Story)

Written by : Aaron Malsawmdawngzuala

CHAPTER : 1

***************************************************

(He thawnthu hi hun lo la awm tur, kum 2030-a thil lo thleng tur anga ziah leh phuah a ni.)

2030

Zan dar 11 a ri tep tawh a, ruah a tla cherh cherh bawk. Pi Lalrinpuii chu sofa ah chuan a ke hlangin a thu a, an smart TV ah chuan Youtube chu a han hmet chhuak a. Video an upload thar apianga a en hmaih ngai reng reng loh, Zo News Channel chu a han hmet chhuak a. An video thar ber chu a play ta a, hmeichhe pakhat hmel pangngai ve tak chu microphone nen zahawm taka inthuam hian a lo lang a.

Aw fiah tak mai hian, "Chibai leh vek ule, Zo News Channel ah ka lo lawm leh vek a che u. Video hmasa a kan sawi tawh ang khan zanin pawh hian MRSA natna pung chho zel chungchang bawk kan rawn sawi leh dawn a ni. Antibiotics in hna a thawk mang lohna, MRSA superbug natna chu a pung leh nasa hle a. Ram 50 zet ah he natna hi hmuhchhuah leh inkaichhawn mek zel a ni." tiin thu a rawn puang a.

Video clip dang lo langin, damdawiin hrang hrang a, MRSA natna vanga damlo na tak tak te chu an rawn lang a. ICU pawh a full thak thak zel mai a, ram hrang hranga he natna kai ten buaina an tawh nasat zia chu clip tawi te te hian a rawn lang zel a. News puangtu bawk chu lo lang lehin, "He natna hi a rawn pun chhohna hmasa ber chu Europe ram lamah a ni a, Asia, Middle East leh Africa thlengin he natna hi a pung chho a ni. Kan doctor leh mithiam dangten nasa takin theihtawp chhuah mahse, tunah chuan India lai a rawn thleng ve leh ta der mai a. Tun dinhmunah hian Mizoram ah heng hri kai hi mi 200-250 vel an awm tawh ni a thu dawn a ni a, thi erawh pahnih chauh an la ni." tiin a rawn puan chhunzawm leh a.

Clip dang lo lang lehin Mizoram chhunga khaw hrang hrang a hospital leh, Aizawl khaw chhunga hospital hrang hrang chu a rawn lang leh a. Thenkhatin hming ziahna ah ringawt pawh intibuai lek lek khawp chuan an tamin an innek chep nasa hle a, damloh na em em te tuar lai chu Pi Rinpuii pawh chuan en hrehawm a ti kher mai.

"Kan hriat theuh angin Mizoram chu hetiang inenkawlna lamah hian kan la hniamin kan la rethei em em a, hospital tamtak pawh an buaiin ward inchanlo leh doctor te thleng pawhin indaihloh a na em em a. Mi thiam te chuan a damdawi siam chhuah vat emaw, vaccine tal siam chhuah vat a nih loh chuan Mizoram chu a buai hle dawn niin an sawi hial a ni." News puangtu bawk chuan a rawn ti leh a.

Clip dang lo lang lehin Dr. Lalthazuala, virologist chu rawn langin ram hrang hrangah pawh doctor hna thawka lo zin kual tawh, chutiang khawpa doctor thiam, kum 40 leka upa chu a rawn lang a. "MRSA lampum hi Methicillin-Resistant Staphylococcus Aureus a ni a, superbug tiin an sawi bawk a. Bacteria chikhat niin antibiotic hian hna a thawk nep bik em em mai a, he natna hian vun natnate, pneumonia te leh taksa chauh rawihna khawpa natna dang te a keng tel thin bawk a ni." tiin MRSA natna chu a rawn sawi fiah a.

"Vun pilh emaw, vun kha a pawp tawh hrim hrim chuan MRSA natna hrik te an che chak em em a. Damdawiin, Gym leh puipunna ah hian inkaichhawn a awl em em bawk a ni. Kum tamtak kalta pawh khan he natna hi a awm daih tawh a, mahse tun ang em em hian khawvel pum buaina tham erawh a ni ngai hauh lo. A hrik hi a insiamdanglam, a in mutate zel a ni tih hi a lang chian phah hle in ka hria. A damdawi hi siamchhuah an tum nasa tawh a, doctor hrang hrang pawh an beidawng a, MRSA natna that theitu damdawi hi tun thleng hian siamchhuah a la ni lo a ni. He damdawi siam chhuah ringawt pawh hi thil hlauhawm tak mai a la ni tho va, a chhan chu antibiotic hrang hrang kan hman pawlh emaw, kan test nasat lutuk chuan he hri hi ahma aiin a hlauhawm zual emaw, a ti chak zual thei zawk a ni." tiin a han sawi chhunzawm leh a.

News puangtu chu lo lang lehin, "He natna chungchangah hian kan sawrkar pawhin thuchhuah a rawn siam ve nghal a, state of emergency a puang nghal a ni. School, University leh college zawng zawng te pawh khar vek rih a ni thuai dawn niin an sawi a, hostel awm zirlai zawng zawng pawh chhuak rih lova, thuchhuah awm leh hma chu an hostel awmna a awm rih turin thu an chhuah bawk." tiin a rawn sawi ve leh a.

Clip dang lo lang lehin Mizoram Chief Minister chu a rawn lang ve leh a, "Zoram mipui zawng zawngte, kan thuchhuah anga thu in zawm phawt kan duh a. Theihtawp kan chhuah a, he natna hri hlauhawm tak mai laka kan lo him zawk nan pawn chhuah mai mai te, mask hreng lova chhuah mai mai te, han zin khawthawn ang chite kha ti rih lo turin kan inngen tak meuh meuh a ni. Tun atanga ni rei lo te ah zirna in zawng zawng leh office zawng zawng hi khar a nih thuai kan beisei a, fimkhur taka kan che lo a nih chuan kum 2020 kuma covid-19 vanga kan lock down ang khan kan awm leh a ngai dawn a ni." tiin thu a rawn sawi ve bawk a.

News puangtu chu a rawn lang leh a, "Lockdown thuai a nih dawn avangin mipui tam tak te eitur leh mamawh lei lawk a, dawr a inchuh leh intibuai pawh nimin leh nizan lam khan an tam hle a, CCTV TV footage tamtakah hmutheihin a awm bawk a ni." tiin clip dang a rawn lang leh nghal a, mipui bazar innek leh intibuaite chu footage tam tak a rawn lang chuai chuai a.

"Mizoram ina kan chhuan em em, leading virologist Dr. Lalthazuala leh virologist tamtak ten tunah hian a damdawi siamchhuah mek an tum a. Beiseina nen han thlir zel phawt ila, khati zawng kha tun tuma kan rawn tih chhuah theih te chu a ni e, mangtha vek ule." tiin video chu a tawp ta a.

****************************************************

Dr. Lalthazuala, Mazuala chu a lab chhungah chuan thu in damdawi chi hrang hrang chu a han chawhpawlh a, a ruk taka, midangin an siam chhuah hma a, MRSA hri thahna damdawi chu siam chhuah vat a tum a ni. Rei fe a beih hnu chuan a zo thei ta, beiseina zawng zawng nen a serum siam chhuah thar chu a han lek kang va a.

Tichuan a diary a phawrh a, "Zan sarihnaa, ka zo thei ta. Kum 3 chhung ka hlawhchham tawh a, hei hi vawi 87-na a ni ta. He MRSA natnahrik hi a tihlum theitu tur awmchhun chu virus dang siam chhuah a ni, genetically modified bacteriophages. Synthetic bateriophages ka siamchhuak a, chu chuan MRSA hrik a zu that dawn a ni. Mahse, mihring cell khawih pawi lo thei ang ber turin ka siam a ni. A hming chu MERSA-X a ni, E for Eliminate, chu chu E ka belh nachhan a ni. He MRSA virus hi nuaibo a nih ngei ka beisei, he hi ka last hope a ni." tiin a ziak a.

Syringe chu a la a, tichuan a damdawi chu a han hip ral thak a. A sazupui vulh pahnih, experiment a test-na atana a hman thin te awmna cage lam chu ava pan a. DAwhkanah chuan sazupui bawm chu a dah a, pakhat zawk chu a la chhuak a. Syringe chuan a tin ta vang mai, a han maimitchhing vang vang phawt a.

"Khawngaihin, khawngaihin tun tum chu...dik tawh hram ang che." tih pah chuan sazupui chu a chiu ta a. A chiu zawh veleh chuan bawmah chuan a dah leh a, tichuan diary lam pan chuan a va phei leh a. He sazupui a chiu hi MRSA hri kai ve tho a ni a, mihringa test hma in side-effect a nei angem tih te, sazupui hi a thisen emaw a chil emaw a test leh hunah negative a lo ni tawh angem tih enchhin nan a hmang phawt a ni.

Diary a lak hma hret chuan Dr. Mazuala chuan thawm a hre ta tlat mai, rang takin a va hawi let a. Sazupui a chiu zawh chiah chu na tih hmel tak hian a lo tal vak vak mai a, a khur cher cher mai. Rang takin ava tlan phei a, a han enchiang a. Sazupui chu a rawn meng sen ta rum mai, a inthing vak vak a.

MAzuala chuan mak ti tak hian a en reng ringawt, chutah sazupui chu a rawn tho chhuak thut a, sazupui pakhat zawk chu a va bei ta rinawt mai a. A la seh hrep zui a, Mazuala chu a tawlh hnung a, a hlauthawn hmel kher mai. Tichuan chu Sazupui, Mersa virus kai mek chuan sazupui pakhat zawk chu a sehhlum ta der mai a.

MAhse a la duh tawk lo, bawm chhungah chuan a kal kual chiam a, sehhlum leh tur zawng ang mai hian a hawi kual ruai a. A chetdan chu a mak em em bawk a, sazupui pangngai awmdan a ni hauh lo. Mazuala chuan a lu a dawm a, "Eng nge dik lo awm? Eng kha nge ka tih dikloh?" tiin a mangang em em a.

Muangchang chuan Sazupui awmna chu ava pan leh a, Sazupui virus kai chuan a lo melh run mai. Zawi muang chuan Mazuala chuan va khawih a tum a, mahse sazupui chuan rawn seh a tum leh nghal ta mai a. Mahse a kut a la sawn hman hlauh va, Mazuala chu a hlauhthawng takzet, a thil siam chhuah chu a rinloh zawngin hna a thawk ta daih mai chu pawi a ti em em a.

A virus damdawi siam chhuah chu rang takin a tichhe fai leh nghal vek a, a paih ta vek bawk a. Tichuan towel a la a, fimkhur takin cage chu a hawng a. Rang takin sazupui chu a rawn vak chhuak nghal a, mahse towel hmang chuan Mazuala chuan a lo man nghal a. Towel chhanah chuan tuboh hmang chuan a vaw ta chiam chiam mai a, thisen a per chuai chuai mai.

Vawi 20 dawn a vuak hnuah chuan towel chu a la sawn a, a lu chu a lo vaw sawp vek chu niin. Sazupui thi tawh chu phui takin a tuam tha a, puan pawh a thuah hnem khawp mai, tichuan thisen zawng zawng te chu damdawi hmangin a ti fai vek bawk a. Tichuan sazupui ruang chu pawn lamah a hal a, amah pawh chu fai takin a insil a.

Mahse thil tih hmaih ala nei tlat, sazupui pakhat zawk, virus kai zawkin a sehhlum tak kha cage chhungah chuan a lo la awm reng mai. A va kal hnai a, cage a hawng dawn chiah tih ah chuan a lab kawngka chu a lo kalh theihnghilh niin, a nupui Rinpuii chu a rawn lut thut mai. Rang takin puan chu Mazuala chuan a la lawk a, cage chu a khuh nghal a.

Rinpuii chuan a rawn hmu hman lo chiah chiah, a pasal lo phu deuh zuk chu mak ti tak chuan a en vung vung a. An han ngawih dun vang vang hnu ah chuan, "Dar 12 a ri mai dawn, lo mu tawh mai rawh." tiin Rinpuii chuan ava pan a. Mazuala chuan a thlan chu a han hru zeuh va, "E aw nia..hei, mut ka lo tum chiah alawm. Hawh...mu ang hmaing." tih pah chuan a chhuak nghal thurh mai a.

Rinpuii pawh chuan mak tih hmel tak hian a en zui vung vung ringawt, sazupui bawm puan a inkhuh chu ava en leh a. Mahse rei pawh a en lo, a pasal chu a zui ve leh mai a. ZAnkhua mai chuan MAzuala chu a muhil thei thak lo mai, khatia a damdawi, zan sarih lai mai a tlaivar pui thak, a thawh tur anga thawk ta miah lo mai chu a hrethiam thei thlawt lo a ni.

***********************************************

Zing a ni a, Rinpuii chu a rawn harh a. A mit chu nuai deuh nawk nawkin a bul vel chu a han dap a. Mahse a pasal MAzuala chu a lo mu ve tawh hauh lo, muangchang chuan a tho chhuak a. Zunram te a thiar zawh hnu chuan choka lamah a phei a, thingpui te chu a han in a. A mitthla chuan a hma zan lawk a, an pa laboratory-a ava luh laia, an pa lo phu zuk mai a hmuh te chu a lo lang a.

A ngaih chu a tha chiah lo, Mazuala tawng bah deuh nuai mai te chu a bengah chuan a ri nawn sek mai a. Tichuan lab lam chu ava pan ve ta tawp a, kawngka erawh a lo inkalh hmak mai. Nidangah pawh Mazuala hian a kalh thin fo avang chuan mak a ti teh chiam lo, mahse sazupui bawm, puana inkhuh mawlh mai chu a rilru ah chuan a awm a.

Chuvang chuan han finfiah ve hrim hrim pawh a duh a ni mahna, chahbi spare a dahna a hrechiang bawk a. Tichuan room lamah chuan let leh in lab chahbi chu ava la ta a, kawngka chu a hawng ta. Bawm pawh chu a lo la inkhuh reng a, Rinpuii chuan ava pan phei a. Bawm chhungah chuan thawm a hre tlat, uite ngur chhur chhur ri hi a ang ber.

Mak a ti em em a, a ding chat mai. A va pawh mai ngam lo, mahse a chhungah chuan engtak nge awm en ngei a duh bawk si. Hlau chung chung chuan ava pan hnai leh a, a huaisenna zawng zawng sawmkhawmin puan chu ava pawtthla thut mai, amah pawh chu a tawlh hnung lehnghal.

Cage chhungah chuan zan hmasa lama virus kai sazupui zawk ina a seh hlum, sazupui pakhat zawk chu mak tak maiin a lo dam leh a nih chu. Mahse bawm chhuatah chuan a let reng a, a khur cher cher bawk a. Rinpuii chuan a hrethiam lo kher mai, "Eng nge awmzia? Khawnge pakhat zawk hi?" tiin a hawi kual nasa hle mai a, cage chhungah chuan thisen a la baw nuai zui.

Sazupui chu ava pan hnai a, "Zawhte an lo lut tihna em mawni le? Awi thisen te chu avan tam em em?" tiin a phun nuah nuah a. Cage kaw kar atang chuan a kutzungtang chu a rawlh a, sazupui chu a han khawih chhin a. Mahse sazupui chu a awm ngaiin ala awm reng tho, "Harh teh..hey, harh teh." tiin a han be vei luam a.

Chutah sazupui chu a rawn tho chhuak thut a, a mitmeng chu a rawn sen vek mai. Rinpuii kut zungchal chu a seh pilh ta hlawk mai a, Rinpuii na ti lutuk chu a tawlh sawn nghal. Mak ti tak chuan sazupui chu a en a, chu sazupui lah chun a cage chu a seh vak vak a, a kawlh takzet.

***************************************************

Dr. Mazuala chu damdawi store pakhatah kalin sazupui pakhat zawk, hri kai zawk ina a sehhlum tak ruang tih faina turin dettol leh chemical dang dang, natnahrik that theitu tur chu lei khawmin zingkar atang khan a chhuak hi a lo ni. A thil lei tur a lei fel hnu chuan a motor lam chu a pan a, a thil lei vel te chu motor chhungah chuan a han dah tha hlawm a.

Chutih lai chuan a phone chu a rawn ri ral ral a, rang takin a phawrh a. A han en chu an nu, Rinpuii a lo ni. Rinpuii leh Mazuala te nupa hi kum 3 lai an innei tawh a, mahse chhul lam harsatna avangin Rinpuii hian nau a pau thei lova, ti hian kum 3 zet chu fa nei miah lovin an lo cheng dun ve tawh a ni.

"Hello, Nu-i eng nge ni ta?" tiin a han zawt nghal a. Chau hmel tak hian Rinpuii chuan, "A lum...a lum lutuk, ka lu a hai muai muai bawk si, ka awmdan hi ka hre thiam lo." a rawn ti nghal bawrh bawrh a. Mazuala chu a han thaw hak a, "Zan i mengrei thei lutuk a, i hrisel lo bawk nen. Vawiin chu ka day off dawn a, mu leh rih rawh." zaidam tak chuan a han ti a.

Mahse Rinpuii chu a thaw halh halh mai, "Nilo, nilo... chutiang a ni lo. Ka luak te hi a chhuak, tihian nidangah ka la awm ngai lo. Pa-a, a hrehawm. Ka thi dawn niang, ka sa pup pup mai." a rawn ti leh ta hluam hluam mai. Mazuala ngaih chu a tha ta chiah lo, "Rini, eng nge i sawi awmzia? Eng nge i chungah thleng a?" tiin a zawt nghal vat a.

Rinpuii chu a tawng tha hleithei tawh lo, "Ka hre lo, nichin...nichin khan i lab ah khan ka lut a...chuan...chuan.." tiin a tawng bah nuai tawh mai. Lab-a a luh thu a sawi chiah chu Mazuala pawh a phu zuk mai a, "Lab-ah i lut maw? Tinge? Ka kalh thlap sia, engvanga lut nge i nih?" tiin a vin lek lek mai.

Rinpuii chuan a chil a han lem dawk a, "Duhtak, sazupui kha....sazupui kha...pakhat zawk a bo, chuan pakhat zawk kha...thisen nen...ihh, ka awmdan hi a dik lo." thaw hlawp hlawp chuan a rawn ti leh a. Mazuala chu a hlauthawng tawh takzet, "Sazupui a? Chuan, engtin zel?" tiin a zawt leh nghal vat a.

Mahse Rinpuii chuan a chhang lo, a thaw hlawp hlawp ringawt. MAzuala chu a hlauthawng tan tawh hle mai a, "Rini, Rinpui? Min chhang teh...eng nge i chungah thleng?" tiin a au hian a au vak vak tawh hi a ni ber. Chutah Rinpuii chuan dang awk ang mai hian, "CAge-a sazupui kha....a mit a sen, min... min seh a ni. Min seh, chuvang chu a ni thei ang ngem? Duh... duhtak, eng thil nge i tih? Eng nge ka lakah thup i neih?" a rawn ti leh ta mai a.

Mazuala ngaih tha lo leh hlauthawng lutuk chu a thin a phu dup dup mai, a thlan a tla zawih zawih mai a. Motor chhunga luh pah chuan, "Tikhan, tikhan lo awm rawh. Ka lo kal, engkim ka siam tha vek ang." tih pah chuan motor chhungah chuan a lut a. Chak takin a tlan haw a, "Nilo ni lo... a ni thei lo.." tiin tlan pah chuan a phun mawlh mawlh mai.

*************************************

Zan dar sarih a ri a, mit sen rum chung chuan Mazuala chuan a diary ah chuan thil a ziak mawlh mawlh a, "Dar 12 a la ri lo, nizan khan khawvel ka chhanhim vat theih beiseiin a ruka research ka lo beih mek chu zawh fel ka tum a. MAhse tumah ka chhanhim ta lo, ka ti chhia, ka ti chhe vek a ni." tiin mittui tla phung chuan a ziak mawlh mawlh a.

"He ka serum siam, MERSA-X hi thilmak thlentu tur a nih ka ring thin a. MRSA natnahrik dotu tura ka siam a ni, he superbug hlauhawm tak, kan khawvel suat mektu hi tihbo nan he serum hi, he virus thar hi ka siam chhuak a, kum tamtak ka bei tawh. Hemi zan hi a zan sarihna a ni, subject 7, ka sazupui khawi ngei mai chu test nan ka hmang a..." a thil ziah lai chu a han chawl dat a.

A han thaw halh hlah a, dawhkan sira whisky no khat a dah chu a han tlak leh pawp a. A mittui chu a hru a hru a, "A tir chuan engmah danglamna a awm lo, mahse second engemaw zat a ral hnuah...ka sazupui chu...a inthlak danglam a ni. Ka sazupui khawi pakhat zawk chu bei thutin a sehhlum der mai a, ka virus thar siam chhuah chu a kalsual ta ngei a ni." tiin a ziah zawm leh a.

Chutah a bula file pakhat chu a han en a, tichuan diary chu a ziah zawm lehnghal a. "Thil thalo thleng thei tur ka ngaihtuah chiang lo a ni, ka duham vang... ka duham vang vek a ni. Hetiang khawpa kan ram mai ni lo, kan khawvel pum a buai lai hian hmingthatna bak ngaihtuah ka nei ngai lova, Pathianin kei hi min hrem a ni." tiin meizial chu a han tan leh te te phawt a, a mit te chu a bui luk tawh mai.

"He ka damdawi hian hna a thawh chak theih nan, a effective zual nan tiin aggressive bacteriophages hrang hrang atangin genes ka la chhuak a. Mahse he ka damdawi hman ho zingah hian phages pakhat chuan mutation thuhruk a lo nei a, ka lo hre tawh bik lo a ni. He virus, amaha lo insiam danglam hian MRSA natnahrik chauh nilovin, mihring leh ramsa cell thlengin a lo infect thei hi a lo ni." tiin a ziah zawm leh a.

Thil awmzia diktak, a damdawi siam kalsual dan diktak chu a ziah chhuak ta a, "Mutation Chamber ah virus thar ka siam chhuah hi ka dah hmasa phawt a, he device hi hun rei tak chhung hna a thawh chak nan tiin viral evolution tih ran(fast) nan ka design a ni. Mahse MRSA natna chauh target lovin, mihring emaw, ramsa emaw he natnahrik hian a host tu tur a mahmawh a ni." tiin.

****************************************************

ZING LAMA THIL THLENG

Dr. MAzuala chuan in chu a thleng a, kawngka chu hawng vatin inchhungah chuan a lut nghal a. A nupui chu zawng kual nghalin, "Nu-i? Duhtak... Rini?" tiin a au vak vak a. Mahse chhangtu an awm lo, room ah te chuan a lut kual a, mahse a nupui hmel reng reng hmuh tur a awm hauh lo.

Chutah choka lamah chuan hmeichhe na tuar rum ri niawm tak chu a hria a, khur ri hlawk hlawk hi a ang em em bawk. Rang takin choka lam chu a va pan a, a thil hmuh chuan a barakhaih kher mai. A nupui Rinpuii chu choka chhuat ah chuan a lo let reng mai a, a lo phu uih uih mai.

Mazuala chu a ding chat a, a ka hau mai. Sawi tur reng a hre lo, a nupui chu a lo tal vak vak a. A vun rawng te chu a lo dang vek tawh, a thisen zam chu maimawm ril ang mai hian a taksa pumah chuan a zam kual ruah mai a, a la dum kuk zui. A mitmeng a rawn sen rum a, nasa mangkheng hian a eu vak vak a.

Dr. Mazuala chuan a hrethiam nghal, a nupui chuan Mersa virus, a thil siam chhuah ngei mai chu a hri a kai ve a ni tih chu a man thiam nghal a. Mahse awih har a ti takzet, a thleng mek bawk si. Second 10 vel hnuah chuan Rinpuii hmel zawng zawng chu a inthlak danglam ta vek mai, zombie ang maia rapthlak a ni.

Thle deuh bawi bawi chung chuan Rinpuii chu a rawn ding chhuak a, a pasal chu a rawn melht a run mai. A ban a phar a, a rawn tlan ta thut mai le. Mazuala chu seh tumin a rawn bei ta chiam mai a, Mazuala chuan theihtawp chhuaha lo indangin a nupui kut chu a lo man beh sak a, ala chak em em zui.

Dawhkan tlu rum rum khawp chuan MAzuala chuan an nu, hri kai avanga a vek tawh chu a han thleh leng lawp a. Mahse reilote ah a rawn ding leh nghal a, rawn seh a tum leh ta. Mahse eng tin tin emaw chuan Mazuala chu a him thei zel a, a tawp a tawpah chuan hreh hle mahse choka chem chu chuh vatin a nupui, Rinpuii bekah chuan a vit tlum pawk mai.

Rinpuii pawh chu a thal tawp a, a thi chu a ni der mai. Mazuala chu a thingthi hnawk a, amah vang veka thil thleng a ni. A nupui ruang chu kuah in a tap zawih zawih a, "Ka tihpalh, ka tihpalh a ni." tiin a au t(r)ial ruai ruai mai. Rei fe a inngaihtuah hnu chuan a thil tawn chu tuman a hriat loh va, aman a thup vek chu thil tih tur tha ber niin a hre ta a.

An kawmthlang huan, mi hmuh theih lohna lai ber tura a ngaih ah chuan annu ruang chu a phum bo ta vek a, a kawr thler them, thisen la kai ho chu an inkawt bula khamah chuan a paih mai a. A thil tawn leh a damdawi siam sual chu thup bova, tuma beng a thlen loh chu a thil tum ber a ni.

**********************************************

MAzuala chu dawhkan bawh chuan a melh ngai a melh reng a, a mittui a tla zawih zawih mai. Whisky no khat chu a han tlak leh pawp a, "Ka tan, ka tan hian he khawvel hi hremhmun mai a ni. MERSA X, ka damdawi siamchhuah, ka beiseina tisang ve em em tu, hun rei tak chhung ka lo buaipui tawh chu ka siam zawh zan la la in ka tihchhiat chu a ngai ta mai si a, eng ang doctor nge maw ka nih le?" tiin diary chu a han ziah zawm leh nghal char char a.

"Mahse, thudik hi ka thup a ngai a ni. Engtin nge ka nupui thihna chungchang hi ka thup theih ang? Engtin nge a chhungte bulah ka sawi tak ang? Eng ang pawhin thup mah ila, ka nupui ber ka thah miau si chuan... min hriatchhuah hun an nei ngei awm sia.. Awww... he natnahrik hi ka va haw tak em.." ti a ziak zelin a han chawl deuh dat a.

A maimitchhing vang vang a, "Engpawh thleng se, jail ka tang thei lo. Ni e, kei doctor duham leh mawl lutuk hian ka duham man ka tel dawn chu a nih hi, Pathianin min hrem a ni. Ka nupui kawr a thisen kai te chu ka phili em avangin khamah ka paih ta ringawt kha ania, thisen atang khan a inkaichhawn zel theih em engmah ka hre der si lo."

"MERSA X virus ka siamchhuah kha...a kai hmasa ber, ka testna ber sazupui pakhat zawk khan a bula mi, sazupui ve tho kha a seh hlum a. Ka hmuh lai ngei khan a seh hlum a ni. Mahse zing lamah kha sazupui sehhlum hnu kha, MERSA-X virus chuan a thluak ti nung lehin, virus chu an inkai chhawng a ni. Mihring thlengin a thawk a, mihringah phei chuan a thawk chak bik a ni."

"Sazupui pahnihte kha ka that tawh a, ka hal ral vek tawh bawk. Ka nupui pawh ka phum bo tawh a, he khawvel hi ka tan hian anchhia mai a lo ni e. Engtin nge ka awm zel ang? Naktuk hi thleng thei lo se ka va ti tak em... ni e, tuna ka thil tawn mek hi mangchhia ai pawhin a rapthlak zawk a ni." tiin a diary ziah lai chu a tawp hmak a, lehkhabu chu a khup a.

A kawm chu a en vang vang a, chiang tak leh fiah tak hian 'MERSA' tih chu a ziak kuau mai a. Zawi muang chuan a tho chhuak a, a room atang chuan a chhuak a. Bathroom lam chu a pan leh a, tichuan bath tub ah chuan thawmhnaw ha chung reng si chuan a mu a. A ipte atang chuan chemte la chhuakin a ban chu a han zai kak duai a, mahni a inthah a tum a nih hmel khawp mai.

Thisen chu a ban rek atang chuan a far kauh kauh va, bathroom chhuatah chuan a kawi nuai mai. Mazuala pawh chu a chau telh telh a, a mitmeng a fiah lo telh telh bawk. A thih hun chu a nghak tawp mai a ni, khawvel pum ina an buaipui mek, MRSA natna tidamtu tur siam chhuah tumin zan rei tak tak a meng thin a, kum tamtak a bei tawh bawk.

Scientist tha rual leh virologist tha rual, MRSA damdawi siam chhuak tu tur thlankhawm zingah a tel ve a, mahse a duham vang leh hmingthat a duh avangin a cure lo siam thawt thawt a tumna lamah engkim a chan der chu a ni mai si. A sazupui khawi lai pahnih a chan a, a nupui duhlai chu amah ngeiin a thah a ngaih phah ta bawk si.

Amah ngei pawh hian eng ang chiahin nge MERSA virus hi a innaichhawn theih a la hre chiah bik lo, inseh atang chuan a ni ngei tih chu a chiang phawt a. Mahse thildang, eng ang chiahin nge a inkaichhawn theih a hre bik lo. A landan chuan MRSA superbug inkai chhawn dan ang tho chuan a nih duh hmel hle a, amaherawh chu chung zawng zawng hriat chhuah chu a tan chuan chakawm loh tak a ni, thih mai chu a tan chuan a thlanzawm zawk fu ang le.

Bath tub ah chuan a la mu reng a, a thisen pawh a hloh hnem tawh khawp mai. A taksa a chau tial tial a, a lu a hai muai muai bawk. Maimitchhing vang vangin a mitthla ah chuan a nupui nena an inngaihzawn lai te, an inneih ni te leh fa an neih huna an zin kual nasa tur thu an sawi laite chu a rawn lang zawk zawk a, a mittui a tla zawih zawih mai.

Phone call a dawng a, mahse chhang thei turin a taksa chakna in a tlin tawh lo. Che eih lo chuan bath tub ah chuan a mu ngawi reng a, a ban rek kak duai mai atang chuan thisen chu a la far kauh kauh reng bawk. A lungphu pawh chu a muang tial tial a, "Ka tihpalh, Nu-i." tiin a phun sap a, nikhawhrelovin a awm zui ta a ni.

*************************************************

TO BE CONTINUE