MERSA (A Mizo Dystopian Future Science Fiction Post-Apocalyptic Horror Story) Written by : Aaron Malsawmdawngzuala CHAPTER : 5

 MERSA

(A Mizo Dystopian Future Science Fiction Post-Apocalyptic Horror Story)

Written by : Aaron Malsawmdawngzuala

CHAPTER : 5

****************************************************

Rintea chu gate bul, security guard duty-na room ah chuan a la awm reng a. Chhunglamah chuan a inkalh khum tlat a, a bul lawk gate pawnah chuan hri kai tam tak an awm reng bawk si nen a khur dar dar mai. Chutah police motor, rawn ri vu vu chu a hre ta. Rang takin a tho va, tukverh lam chu ava en nghal a.

Police motor pakhat hi gate lam pan chuan a rawn tlan a, gate thlen hma deuh chuan a ding a. Police siren ri chu hri kai ho chuan an hre pha ta, an leh hawi thup a. Motor atang chuan police pahnih hi an rawn chhuk a, "Zombie an awm te rawn ti mai mai, eng ang fiamthu nge ni ngai?" tih nuah nuah pah chuan Sub-Inspector chu a han khi suk a.

A bula constable chuan an hma zawna hri kai ho lo hawi thap chu a hmu a, "Saw mite saw task force duty an va nih duh hmel ve?" tiin a kawk a. SI chuan a han thlir vang vang a, "Teh thap chuan, tinge maw an din tlar thup kher le? Hawh teh, eng zombie nge ni tehreng, va enchiang teh ang." tiin a va phei hmasa a.

Constable pawh chuan a zui ve mai a, chutah hri kai ho chu an rawn tlan phei ta huk mai le. Rintea chu duty room atang chuan a rawn tlan chhuak a, gate chu vuanin ring tak hian, "Motor ah khan let leh ru, khang ho kha zombie chu an nih kha." tiin a au vak vak a. Mahe SI leh constable chuan an hrethiam lo kher mai, "Eng thil nge maw awmzia le?" SI chuan a ti nuah nuah a.

Chutah an rawn hnai zel a, hri kai ho hmel chu a rawn lang chiang ta tulh tulh mai. "Sir, Sir... an ni tak tak, zom.. zombie an ni tak tak.." tiin constable chu a tawng bah nghal nuai mai. SI chuan a pistol chu a phawrh a, a lo thleng hmasa apiang chu an chal darah chuan a kap thal tawp tawp hlawm mai.

Mahse an tam lutuk tlat, constable pawh chuan a tiang hmang chuan a lo hlap ve siah siah hlawm bawk a. SI silai ken lai chu puak ruk chauh a nih avang chuan mi paruk a kah hlum hnuah chuan a mu a zo ta der mai, tiang a keng ve der si lo. Hri kai pakhat chuan a bawh thlu tawp a, a hmaiah chuan vun thler duai khawpin a seh ta ngawng ngawng mai le.

SI na ti lutuk chu, "Min pui ru, min pui rawh u." tiin a rak chiam chiam a. Constable lah chuan a chhan ngam chiah si lo, a vuak thluk tawh ho pawh chu an rawn tho leh zel a. A tih ngaihna hre lo leh hlau tawh bawk si chu motor ah chuan a lut leh tawp a, a inkalh hnan ta daih mai. SI erawh chu hri kai la dam, paruk vel chuan an seh rawn ta hrep mai a, an seh hlum ta der mai.

Constable Sanga chu motor chhungah chuan biru in a thaw hlawp hlawp a, hri kai ho chu rawn tho leh hlawmin motor chu an rawn bawr luai luai a. Sanga hlau lutuk chuan a phone a phawrh a, anmahni station ngei mai chu a phone ta. "Hello, keimah constable Sanga... North East Vision University ah ka awm mek, report kan dawnna kha...an awm, an awm tak tak." tiin a tap lek lek mai.

Station duty, phone lo chhangtu chuan awih loh hmel tak hian, "Uanna hun a ni lo, Sanga. Lo let mai mai teh u, hna thawh tur a tam ania." a lo ti daih mai. Vin zet hian Sanga chuan, "In awih loh chuan lo kal ula in hre ve mai ang, SI Sir pawh an seh hlum tak tak ania. Gate bulah ka awm mek, pistol rawn keng ngei ngei ang che u." a ti hlur tawh mai.

*************************************

David-a chu a room ah chuan a la thu ngui bar mai a, a thianpa Ruata vang khan a ngaih a la tha thei mawlh lo a ni. Chaw pawh a la ei lova, khatiang taka rapthlak a Ruata a awm thut mai khan a awm a la ti nuam thei mawlh lo. Chutia a inngaihtuah vung vung lai chuan a phone a rawn ri a, Commerce lama a thianpa, Didika a lo ni.

"Hello, Didik, eng nge ni ta?"

"Dave, ka khua a sik a, ka rawn chhuk peih thlawt lo. Please in lo chho lawk mai teh a, ka lehkhabu chhiar lai i kawl kha, ka chhiar zawm leh duh tawh a."

"Naa, i va ti peihawm loh tak. Tlai lamah ka rawn dah chho mai ang, chubakah tunah chuan security ho an strict si...min report leh zuah zuah anga, a ninawm alawm."

"An hmu teuh lo mai che, chubakah chhun chhunah an round peih tak tak lo... please, lo chho lawk mai teh, i kawl rei tawh lutuk hrim hrim... meizial ka lo khilai ang che."

DAvid-a chu a han thaw deuh hluai a, "Huiham, awle.. ka lo chho ang." tiin phone chu a dah a, peih loh hmel tak chuan khum atang chuan a tho tuah tuah a. Commerce building lam pan chuan a chhuak ta a, hostel corridor vel chu a han thlek a, zirlai ho chu an lo reh diak mai. Tichuan an building chu a chhuahsan ta a, a rilru ah chuan Ruata bak engmah ala awm thei chuang lo.

Building mawng ber hi Management building a ni a, a chung chiah hi Science building a ni thung. A chung leh chiah chu Arts building a ni a, a chung leh chiah chu Health Centre niin, a chung leh chiah chu Commerce building a a ni. Building leh building inkar hi a inhlat ve angreng hle a, ke a kal nan phei chuan thui ve tak a ni.

A scooty chu a han start nung hlarh hlar a, tichuan David-a chu a inkhalh chho ta a. Arts building a thleng tep tih ah chuan a hma zawna a thil hmuh chuan a ti ding chat mai, hosteller pathum, hmeichhe pakhat leh mipa pahnih te chuan security guard pakhat, lamliana lo let reng mai chu an lo thutchilh mek a.

Zingkara a thianpa Ruata'n zawhte ruang a lo hap bawrh bawrh ang mai khan chu security guard, nunna nei tawh lo tih hirat tak maia lo let reng chu a taksa an lo ei mek niin a lang. David-a mak ti lutuk chu scooty atang chuan a chhuk nghal a, chung hosteller te lah chuan an lo hap ri ang bawrh bawrh a.

Dave-a ngaih chu a tha lo khawp mai, "Hey, eng thil phiangsen nge maw in tih le?" tiin a han au ve ngawt a. Chutah chung hosteller pathum te chuan an thil tih lai chu an tawp chat a, an rawn ding chhuak a. David-a lam chu an rawn hawi ta thap mai, an hmel a han hmu chu David-a pawh a ding ngil nghal zawt mai.

Ruata hmel ang chiah khan an hmai chu a dangvar pup mai a, zau tak hian an ka chu an ang phuau va. Thisen an kai nual bawk, chung zirlai pathumte chu arts zirlai niin hri an lo kai ve tawh reng hi a lo ni. An rum nghut nghut a, David-a lam chu muang chang chuan an rawn pan ta. DAvid-a chuan a hlau kher mai, "Hey, eng nge tih in tum a?" tiin a tawlh hnung hret hret a.

Chutah an pathum chuan an rawn tlan thut mai le, DAvid-a chu a scooty ah chuan a lawn kai hman tawh lo. A tlanchhe ta ringawt a, hri kai pathumte chuan an rawn umzui nghal bawk. Rei pawh an inum hma chuan DAvid-a chu a inchhuih a, a tlanchhiatna lam chu kawng chhuk a lo ni bawk nen, a lum thla ta tual tual mai.

Mahse hri kai pathumte chuan an rawn man hma chuan a tho leh hman a, a hmeichhia ber chu rawn thleng hmasa in David-a chu a rawn zuan thlu nghal a. A bawhben ran a, seh a tum nghal bawk. Mahse theihtawp chhuah chuan DAvid-a chu a lo indang a, chunu chuan a seh mai thei bik lo.

Hri kai dang mipa pahnihte pawh chu an rawn thleng a, DAvid-a chu arwn beih ve an tum a. DAvid-a chuan theih tawp chhuahin chunu chu lo bei letin a leh thal thei ta hram a, mahse an piah lawk ramhnuai lamah chuan an lum thla dun ta tup tup mai. Vanneihthlak takin a awih lutuk lo hlauh va, ft 15 vel an lum hnu chuan a zawl lai an thleng thei ta.

DAvid-a chu rang takin a tho va, hri kai hmeichhia chuan a rawn zuan lehnghal a. DAvid-a chu a indang leh tang tang a, thingkungah chuan an inbam bet a. Mipa zawk mah nise David-a chuan a hneh ngang lo chu a ni e, chunu lah chu a chilthli a fan duai duai tawh mai si. Chutah hnunglam atang chuan hri kai hmeichhia chu a lu a rawn ri pawp mai, a thal tawp a.

Dr. Samuel-a chu thingtum nen a lo ding ran mai a, chunu tlu mek chu dimna tel hauh lo chuan a vuak zawm nghal siah siah a. A lu sawp vek khawp chuan a vaw nghek nghek a, thisen a per chuai chuai mai. Hri kai hmeichhia pawh chu a thi ta a, "Tu... tunge i nih?" tiin DAvid-a chuan hlauh hmel tak hian a zawt a.

Dr. SAmuel-a chuan DAvid-a chu a en vang vang a, "A seh hman che em?" tiin a lo zawt let daih mai. DAvid-a chuan a lu a thing a, "Aih, seh hman lo... mahse midang.." a sawi zo hman lo. Hri kai dang, zirlai mipa pahnihte chu an rawn thleng thla ve nghal a. An rawn thlen rual rual chuan Dr. Samuel-a chu an rawn bei ve nghal a, mahse Samuel-a chuan a thingtum ken lai chuan a lo hlap dun pawp pawp a.

REi fe an inbei a, mahse chung hri kai pahnihte chuan na an hre thei lo amaw tih mai tur hian vawi tam SAmuel-a'n a hlap hnuah pawh chuan an rawn tho leh zel a. DAvid-a pawh chuan lo thlir mai mai a tum bik lo, a bul vel chu a han melh kual a. Thing tum pakhat chu chhar ve in Dr. Samuel-a chu ava pui ve a, minute 2 dawn lai an inbeih hnuah chuan hri kai pahnihte chu an that thei ta.

*****************************************

Police station ah chuan Inspector Tetea chu a rawn thleng a, constable pakhat chuan a lo pan vat a. Hlauhthawn hmel tak hian, "Sir... head constable Sanga'n min rawn phone a... North EAst Vision "University ah ka awm a, zombie an awm tak tak, tunah gate bulah ka tang mek a rawn tia ." tiin a hrilh a.

Tetea chuan a hrethiam lo kher mai, "Zombie a? Eng zombie maw? A rui leh pek hi a ni lo maw?" tiin a lo zawt let nghal vat a. Constable chuan a lu thingin, "VAwi 3 min rawn call tawh, a mangang lutuk. Engtin nge kan tih ang? Kan va kal ve mai dawn nge?" a tih lai chuan Tetea phone chu a rawn ri a.

A chhang nghal vat a, "Hello...aw ni e, keimah Inspector Tetea.... engmaw? Khawi hospital.." a ngawi vang vang a, "Awle, awle..ka lo kal nghal e." tiin phone chu a dah a. Constable chu a en a, "Civil Hospital ah case thar a awm a ni awm a, min rawn kova.. ka va kal angai tlat mai. Sanga chu in lo buaipui dawn nia, police pathum vel va kal ula, in va ching fel thei mai ang, prank vel mai mai bak a nih ka ring nek love." a han ti a.

Chutih lai chuan conastable dang pakhat hi a rawn kal a, "Sir, kan thu hriat hi a serious angreng khawp mai." a rawn ti a. Tetea chuan mak tih hmel tak hian, "Eng nge i sawi awmzia?" tiin a lo zawt vat a. "Head constable Sanga khan zombie chungchang a rawn sawi a, mahse awih loh chi ngawt a nih loh hmel." tiin a chhang a.

"Eng nge i sawi tum ber sawi vat teh."

"Sir, North East Vision University atang vekin kan dawng, student call, security call leh Arts department HOD call te a ni hlawm a. Kan station chauh nilovin Bawngkawn Police Station, Kulikawn Police Station, Vaivakawn Police Station, Sairang Police Station, Sialsuk Police Station leh Darlawn Police Station thlengin call a rawn thleng a, an thusawi a in ang vek."

"Eng nge an thusawi chu ni a?"

"Saw University chhungah sawn zombie an awm tak tak an ti."

Tetea chuan mak a ti kher mai, "ZOmbie a? Ava mak awm ve... engpawh chu nise University lam chu kan pan a ngai a nih chu, thilo eng emaw tak chu a thleng a ni ngei ang. MAhse ka sawi tak ang khan va kal ula, Hospital ah ka va kal anga, chanchin min rawn hrilh zel dawn nia." tiin a chhang a, a kal ta a.

***********************************************

ZOnuna ruang, class room-a let reng mai chu Joseph-a, Elena-i leh Faka chuan an en reng ringawt a. Joseph-a chuan a hmai chu a han tuai nauh nauh va, "Elena, HOD chu han phone leh teh." a han ti a. MAhse Elena-i chuan, "Nichin lawk pawh khan vawi thum ka call tawh, a la thei lo." tiin a lo chhang a.

"Anih kan Campus HEad tal phone teh, kan dinhmun hi an hre ve reng reng em?" tiin Faka chuan a lo zawt ve bawk. Elena-i chuan zawi sap hian, "A number ka nei lo." tiin a lo chhang zawi sap a. Joseph-a chu a han ngawi vang vang a, "Group velah a awm mai lawng maw? Han zawng teh, HOD pawh hri a lo kai ve der tawh te hi a ni mai lawng maw?" a rawn ti ve leh a.

Elena-i chuan a group awmna te chu a han check kual a, chutih lai tak chuan kawngka chu a rawn inchum dawt dawt mai. An phu nasa hlawm kher mai, "HAWng rawh u, rawn hawrng vat teh u." tiin pawn lam atang chuan hmeichhe pakhat hi a rawn au tuar tuar a. Joseph-a leh Faka chuan hawn a tum hauh lo, hri kai ve tho an nih ringin chet pawh an tum eih lo.

Mahse Elena-i chu a rawn tlan phei a, "Miss.. Miss Rosy a nih hi, ka hmelhriat alawm." tiin hawn mai chu a han tum a. MAhse Faka chuan a lo dang a, "I mawl em ni? Hri kai pawh an ni thei asin, hawn reng reng suh." tiin a lo khap a. Elena-i chuan thinrim tak hian, "Hri kai chu nise hri kai dangte angin a awm ang chu, kal teh, ka hawng dawn." tiin a nam sawn lawp a.

Mahse Joseph-a chuan a lo dang ve leh a, "Ni lo, Elena. I hmelhriat a ih avang khan i hawnsak ngawt thei lo, saw en ta che. Zonuna pawh kan thianpa, kan hmelhriat tha lutuk a ni a, mahse hri a kai avangin loh theih lohvin kan thah a ngaih phah saw." tiin ZOnuna ruang chu a kawk a.

Chutah pawn lam atang chuan ring tak hian Miss Rosy chuan, "Hawng vat teh u, mimawl ho. Hri kan kai lo, in duh chuan min check dawn nia. Hawng phawt mai teh u, min rawn umzui mek ania." tiin a rawn au leh tuar tuar a. Elena-i chuan Joseph-a chu a nam sawn lawp a, kawngka chu ava hawng ta a.

Miss Rosy mai chu rawn lut lovin arts zirlai mipa pahnih dang, Elizabeth-i leh Mama te chu an rawn lut tel ve bawk. A tluk hian an rawn tlu lut hi a ni ber mai, chhuatah chuan an rawn bawk thlawp a. KAwngka chu Joseph-a chuan a khar leh nghal vat a, hri kai ho chuan an rawn nang hman teuh ther ther khawp mai.

Elena-i chuan Rosy chu a kai tho nghal a, "I tha em, Miss?" tiin a zawt a. Miss Rosy chuan Elena-i chu a en vang vang a, "Nang hi... Science department ami i ni lawm ni? Eng nge hetah i rawn tih a?" tiin a zawt hu mai. Elena-i chuan a chhang lo, Joseph-a leh Faka chu Rosy bawk chuan a han en leh a.

"Nangni pawh...subject dang tiraw in nih? Hetah eng nge in rawn tih a?" tiin a han zawt leh a. MAhse tumah chuan an chhang lo, "Engtin nge medical student ho kha an rawn luh theih? Tinge khatia an awm? Nangni hian in rawn hruai a ni lo maw?" tiin Elizabeth-i chuan a han vin nghal vak vak hlawm a.

Faka ngaihdan chu a ni lo kher mai, "Ngawi mai teh, thiannu. In nunna kan chhan zo chauh a ni a, tikhan min la tawng khum ngam amaw?" tiin a lo vin let ve hrep mai a. Chutah Mama chu thinrim hmel tak hian a rawn pen chhuak a, "I aw key kha ti sang vak duh suh aw, thianpa. Hei hi kan building a nih hi, i duh leh in bulding lamah zu inla pawr rawh." a rawn ti ve khur khur bawk a.

Rin leng lawng hian Miss ROsy chuan, "Ngawi vek rawh u, duhtawk rawh u." tiin a au tuar a, zirlaite pawh chu an ngawi thiap a. Miss Rosy bawk chuan ELena-i chu a en vang vang a, "Kar hmasa lawka ka scooty min nawr puitu, min tanpuitu kha i ni tiraw?" tiin a han zawt leh a. Elena-i chuan a lu a lo bu nghat nghat a, "Anih tunge i hming khah?" tiin Miss Rosy chuan a zawt leh a.

"Elena-i ka nia... Science department atanga lo kal kan ni. Hei hi kan class CR a nia, Joseph-a a nia, chuan hei hi kan classmate Faka a nia." tiin Elena-i chuan a han inhmelhriat tir hlawm a. An ngawi deuh thuap a, Mama chuan Zonuna ruang lo let reng chu a hmu a, a phu zawk mai.

"Saw saw tunge?" tiin a zawt nghal a, Elizabeth-i leh Miss ROsy pawh chuan an va hmu ve a. Joseph-a chuan a aw a han thian kharh kharh a, "Kan rawn kal pui ania, ihh.. ZOnuna a nia, midang ho ang khan a awm ve a. Loh theih lohvin kan that ta mai a nih kha, kan duh vang a ni bik lo." a han ti zawi sap a.

Miss ROsy chu a han thaw hak a, "Eng nge thil awmzia hi ni reng reng? Tinge medical student leh nurse ho kha an rawn kal? Tinge khatia an rawn awm rikngawt, engmah hi ka hre thiam lo?" tiin a phun nuah nuah a. Joseph-a chuan thawk a han la ve hak a, "Miss, keiman ka'n sawifiah ang." a rawn ti a.

****************************************************************

Arts building chu Pu Saia, Emily, SAngsangi, FEla leh security guard Dawnga te chuan an rawn thleng ve ta. Mahse Pu Saia ber chu dingin, "Lawk lawk lawk, ding lawk teh u." tiin a biru nghal a, midang pawh chu an biru ve nghal. Arts bulding kawt a hri kai ho lo vei nuai nuai chu an hmu a, "An luhchilh, hri an kai vek tawh a nih hmel." a han ti zawi sap a.

Fela chuan mangan hmel tak hian, "Ka pu, kan building lamah kan chhuk angai. KAn thiante kan warning loh chuan, an dinhmun a derthawng emai." inthlahrung tak chuan a han ti a. Pu Saia chuan a han melh hrawk a, "Kan kal tlang ang maw? Hri kai za chuang an awm dawn tih a hriat reng a, kan thawm hi hre ta se, min rawn bei mai dawn asin." a han ti deuh hlur a.

Emily ngaihdan chu a ni vak lo, "Ka pu, saw saw kan building a ni a. Ka thiante an awm ve loh bik i ring em ni? Ti hian tanpuitu kan nghak tawp dawn i tihna em ni?" a lo ti ve sak a. Pu Saia chu za lo tak chuan a khi suk a, "Eng nge i va tih vak ang a? I va chhanchhuak dawn em ni? I duh chuan va kal ta che, anmahni ang bak saw i ni dawn lo." a lo ti let zek mai.

Emily chu angaihdan a ni lo kher mai, va kal chu a tum ta tak tak a. MAhse Dawnga leh Fela chuan an lo dang a, "Emiy, ti suh. I thi a nimai, a atthlak lutuk." Fela chuan a lo ti a. DAwnga chuan Pu Saia chu a han melh vang vang a, "Eng nge kan tih chuan ang, ka pu? Tihian kan awm tawp mai dawn em ni?" tiin a han zawt ve a.

Pu Saia chu a han ngawi vang vang a, "Ka duty puite zing ami, Rintea kha a number i la tiraW?" tiin a zawt a. Dawnga chuan a lu a lo bu nghat a, "Police te chu an lo thleng tawn reng reng em? Chanchin han zawt teh, ani pawh kha hri a lo kai ve der tawh ang tih pawh kan hre der si lo." tiin a han hrilh leh a.

DAwnga chuan a phone chu a phawrh a, Rintea chu a call ta a. Rintea pawh chuan a lo la vat a, "Hello...Hello, tunge?" a rawn ti chiam chiam a. Dawnga'n a chhan hma hma chuan Pu Saia chuan phone chu a laksak a, "Rinte, keima Pu Saia. Eng nge chanchin? Polcie te chu an lo thleng tawh em?" tiin a zawt a.

Rintea chuan beidawn hmel tak hian, "Kal chu an rawn kal a, mahse pahnih chiah an rawn kal. Pakhat, silai keng zawk lah kha jan duty puite, hri kai ho khan an la seh hman zui a. Hri a kai ve daih tawh, silai keng lo zawk lah saw... ti sawn motor ah a inkalh khum a, a lo chhuak ngam lo." tiin a rawn chhang a, a la tap deuh pur zui.

Pu Saia chuan a lu a dawm vawng vawng a, "Anih leh in inbe pawp thei em?" tiin a han zawt leh a. "Kan awmna chu a inhlat ve angreng, hri kai hovin motor saw an hual reng bawk sia. Va biak tum pawh ni ila, ka thawm an hria anga, min rawn pan leh awm si a. SAw police biru mek sawn min rawn au dawn ta se, amah an pan leh tho awm si a, engtin nge kan awm dawn ka hre bik lo." tiin Rintea chuan a rawn chhang leh a.

Pu Saia chu a han ngawi vang vang a, "TIkhan lo awm phawt rawh, ngaihtuahna ka han seng phawt ang." tiin phone chu a dah a. DAwnga bulah chuan, "I phone hi ka kawl dawn, tanpuitu tur ka han phone kual ang e. Tikhan hetah lo awm ula, kei erawh building dang dangah ka kal kual anga, ka warning hlawm ang." Pu Saia bawk chuan a han ti leh a.

"Anih engtin nge keini hi awm se min tih a?" Sangsangi chuan a lo ti hu mai. "Thawm reh thei ang berin Science building ah chuan zuk chhuk phawt mai ula, in zu warning hlawm dawn nia, chuan in warden leh HOD pawh in hrilh dawn nia." tiin Pu Saia chuan a chhang a, a kal ta nghal daih a.

**********************************************

Damdawiinah chuan Inspector Tetea pawh chu ava thleng a, room ah chuan koh luh nghal a ni. Room chhungah chuan amah leh Campus Head, Professor Lalmuanpuia leh Dr. Bza te chu an ding hova. An hma zawna glass bang atanga lo lang, ward pakhata Ruata, khuma tawnbeh mek chu an en thap hlawp a.

Ruata lah chu a lo meng kur a, a phu leh uih uih thin a. A mitmeng te chu a eng sen phut a, a vun lah chu a dang var pup mai. A awmdan chu mihring pangngai awmdan a ni hauh lo, Tetea chuan a han en vang vang a. A thaw deuh hak a, "Doctor, engthil phiangsen nge ka en hi?" tiin a han zawt deuh thlawt a.

Dr. Bza chu a han ngawi deuh vang vang phawt a, "Inspector, hei hi ania kan rawn call nachhan che chu. Tuna i thil hmuh lai mek hi keipawn ka vawikhat hmuhna a ni, he patient hi a hming chu Ruata a ni a, thi daih tawh tur a ni." tiin a chhang a. Tetea chuan a hrethiam lo kher mai, "Thi daih tawh tur a? Mahse tinge a la dam si? A la che vak vak chu a nih hi, eng nge i sawi awmzia?" tiin a zawt hu mai.

Dr. Bza chuan Ruata mu mek chu a han en leh vang vang a, "Ni e, a la dam ngei alawm. MAhse mihring pangngai ang a ni tawh lo, a lungphu pawh a tawp vek tawh. A body temperature hi nungdama la awm tur chuan a hniam lutuk, a mar pawh engmah a awm tawh lo. Medical standard anga chhut chuan a thi tawh... mahse." tiin a han chawl deuh dat a.

Chutah Ruata chu a rawn eu vak a, ramsa hram ri ang mai hian a rak vak vak a. Mahse an phuarh ngheh em avang chuan a tal chhuak thei bik lo, a chezia chu a mak takzet. Chutah Pu Muanpuia chu rawn tawng chhuak ve in, "Thil dangin a la ti nung a ni." a rawn ti zawi sap a, hriatthiam loh hmel tak chuan Tetea chuan a lo en hu mai.

Dr. Bza bawk chuan, "A nung pawh a ni chiah lo, sawi thiam a har takzet. A taksa hi amah a nung a ni tawh lo, a taksa chhunga virus awm hian a ti nung zawk a ni ber. A thluak leh a nervous system hi a thunun vek a ni, he virus hian... a taksa hi amah thi tawh mahse tih luihna hmangin a chet tir a ni. A awmzia ber chu, tuna kan hmuh mek hi Ruata a ni tawh lo, Ruata taksa hi a kawchhunga virus hian a hmang ti ila kan sawi sual lo ber ang." a han ti leh a.

Inspector Tetea chuan a aia chiang zawk hian Ruata chu a han en leh vang vang a, "Anih leh, chu virus chu... a inkaichhawn theih em?" tiin a han zawt leh a. "AW, tehreng mai. Entirnan, tu emaw lo seh ta che, a seh a te chuan virus hi an kai ve nghal thei. A chak hle bawk ang, virus hi an thisen zamah a lut anga, an thluak a khawih hmasa ber ang. A tir ah chuan an lu a hai muai muai emaw a ni anga, an taksa a zawi vek ang a. Tichuan a rawn na em em anga, a rawn inthlak danglam anga, second reilote ah Ruata awm ang chiah hian an rawn awm ve ang." tiin Dr. Bza chuan a lo chhang leh a.

Chutah Pu Muanpuia chu thil hriat chhuah nei ni awm tak hian a phu zuk a, "Anih chuan doctor, Ruata hian tu emaw lo seh ta se, amah ang hian reilote hnuah an awm ve nghal dawn tihna a ni ang maw?" tiin a han zawt deuh thut a. Dr. Bza chuan a lu a lo bu nghat a, "Aw, second rei a ngai lovang." tiin a lo chhang a.

Pu Muanpuia chuan thil hriat chhuah zawk a nei, Hannah-i, a student zinga pakhat kha Ruata hian a seh thu an hrilh tlat, a thlan a tla nghal zawih zawih mai a, mahse engmah chu a sawi chuang lo. Inspector Tetea chu a han thaw hak a, "Anih Doctor, engtin nge Ruata hian he virus hi a kai theih?" tiin a han zawt leh a.

Dr. Bza chuan dawhkana plastic bag chu a la a, a chhungah chuan puan them var, thisen kai nuai hi a lo awm a. Tetea chu a hmuh a, "Ruata an rawn hruai luih tirh khan a ke veilamah he puan hi tawn beh a ni a, kan phelh khan a khupah hliam a lo nei a. A awmzia chu he puan them ah hian thisen a awm sa a, Ruata thisen nilovin. Chu thisen ah chuan he virus hi a lo awm lawk a ni, Ruata hliam a tuam a nih hma daihin he puan themah hian thisen a kai sa a, kan test nghal a, chuta tang chuan a kai a ni." tiin a hrilhfiah a.

Tetea chu a han ngawi vang vang a, "Tu thisen nge?" tiin a zawt leh a. Dr. Bza chu a han thaw hak a, "Kan la hre lo, mahse he puan hi test nawn leh theih tho a ni a. HE puana thisen kai atang hian Ruata thisen hi kan la hrang thei a nih chuan, virus leh a thisen neitu original hi kan then hrang anga, chuta tang chuan a hriat theih mahna, mahse thil har tak chu a ni ngei ang." tiin a lo chhang leh a.

Tetea chuan a lu a han bu nghat nghat a, "A nih chuan tunah han test nghal teh u, a result pawh kan hriat vat angai." a ti a, tichuan Dr. Bza chuan a staff te chu a ko khawm a, hna chu an thawk nghal a. Pu Muanpuia chu a kut kuan kuahin a inngaihtuah nasa kher mai, "Lo tlai tawh ta ila, midang lo kai chhawng teuh tawh ta se...engtin nge kan tih tak ang?" a han ti zawi sap a.

Inspector Tetea chu a ngawi vang vang a, "Kan ti tawp ang, kan tih tawp ngei angai. HE virus hi MRSA natna aiin a letin a ngaihtuahawm zawk dawn, engpawh thleng se, engpawh tawk dawn ila, he virus hi kan tih tawp ngei angai. Anih loh chuan keini ang ram rethei lutuk hian kan tuar zo lovang, kan thih thlengin kan bei tur a ni." a han ti chang deuh fak a.

*****************************************************

TO BE CONTINUE