MERSA (A Mizo Dystopian Future Science Fiction Post-Apocalyptic Horror Story) Written by : Aaron Malsawmdawngzuala CHAPTER : 2

 MERSA

(A Mizo Dystopian Future Science Fiction Post-Apocalyptic Horror Story)

Written by : Aaron Malsawmdawngzuala

CHAPTER : 2

*****************************************************

3 MONTHS LATER

Zanlai dar 12 leh a chanvel vel a ni a, University pakhat a hostel student pahnih, Vanlalruata leh David Lalliansanga te chu hostel hnunglam, mau hmun hnaih lam pan chuan thawm dim tak hian an kal mek a. An inbe pah reng a, "TAsk Force duty te hian min lo hmu riau riau ange tih ka hlau ania, tlaivar thak thakin an duty thin bawk si." Ruata zawk chuan a han ti nuah nuah a.

DAvid-a chu a lo chek hlur a, "Nangpawn i duh ve tho kha, kan incon laklawh tawh. Min hmu lovang, chubakah tuna kan lakna tur hi chu maw...a fimkhur lutuk, kan haw phei leh vat dawn lawm." tiin a lo chhang a. A awmzia chu hostel atanga chhuah ruk a, an ruih tur va lei an tum a ni.

MRSA natna avang khan Mizoram chu totel lockdown puan a ni a, a damdawi hmuh chhuah mai a la nih loh avangin ppawn chhuah chu khap tlat a ni. Hostel-a awm mekte pawh chhuahna chance a awm ta reng reng lo mai a, covid hunlai ang mai khan thil engkim mai chu a harsa vel vek a ni.

An hrui ken hmang chuan hostel bang sang tak mai ah chuan an lawn kai a, tichuan David-a zawk chu a han zuangthla hmasa a. Ruata a zuang thla ve chiah chu a vanduai ta hlauh mai, thingzar hriam lai chuan a chawnah a tai palh a, a kak ta duai mai. Thisen a luang nghal zawih zawih a, "A na lutuk, a na lutuk." tiin au rin hlau si chuan Ruata chu a si hlawk hlawk mai a.

DAvid-a chuan theih tawp chuan a buaipui nghal vat a, “Khai aww...engtin nge kan tih ang? Ava thi duh ve...rawmawl i pai em?” tiin a han zawt a. Then chawk chawk pah hian Ruata chuan, “Aih...pai lo, a thip lutuk.” tiin a lo chhang a. David-a chu a mangang kher mai, “Ava buaithla e awww....kan kalna tur ala thui sia..i kal thei angem?” tiin a han zawt leh a.

Ruata chuan a ke hliam chu dawm vawng vawng pah chuan, “Ka hre lo, engtin nge kan lawn liam leh theih ang tih zawk a ni ka ngaihtuah ni.” a lo ti daih mai. David-a chu a han ngawi vang vang a, “Hawh... tho teh, kal kan tum chhin teh.” tiin a thianpa chu a kai tho va. Mahse rei an kal thei lo, Ruata chuan na a ti lutuk tlat.

A tlu deuh hnawk a, “David, ka kal thei lovang. Hawh, let leh vat zawk ang, thisen hi a chhuah tam lutuk chuan a chi loh zawk.” tiin a thlan te chu a tla hluam tawh mai. DAvid-a chuan a ui ngei mai, “Hei leh chen kan lo tum ve laklawh tawh a, ava buaithlak tak.” tiin a phun nuah nuah a.

Ruata hliam atang chuan thisen chu a rawn chhuak tha duh em em mai lehnghal a, “David, engtin emaw, a tuamna tur ngaihtuah teh. Thisen hi a chhuak hnem tawh lutuk, ka awmdan hi a dik dawn lovin ka hria...ka hlauthawng ania.” tiin Ruata chuan a vin lek lek tawh mai. David-a chu a han hawi vel ruai a, a phone light chuan a bul hnai vel chu a han en kual a.

Chutah pawn them pakhat, kawr pawh t(r)eh hnu niawm tak chu ava hmu a, a thim em avang chuan thisen lo kai nuai mai pawh chu a hmu chiang tawh lo. Chubakah thisen kai chu a rei deuh tawh vang nge, a rawng a duk deuh tluk avang chuan rawng kai mai mai turah a ngai te pawh a ni chek ang chu.

A thianpa ke hliamah chuan a tuam a, nghet tak chuan a tawn a. A han thaw hluai a, “Ruata, tihian lo awm la, keimahin ka va kal mai teh ang. Ka rei lovang, ka va tlan zuai mai ang.” a han ti chu Ruata chuan a melhrum kher mai. Tap lek lek hian, “I mawl ami? Ka duh teuh lo mai, theihnghil rih teh. A nat vak hma hian lawn liam leh vat zawk ang, damdawi hnawih vat loh phei chuan a pun anga, ka duh bik reng reng hleinem.” tiin a lo chhang zek mai a.

David-a pawh chuan a thianpa han kalsan daih mai chu a ngai ngam chiah bik silo, “Hrep tak chuan le..” tih pah chuan bang chu a han chum ri dawt a. Tihngaihna dang awm hek lo, hrui hmang bawk chuan thei leh thei lo hian an lawn liam leh ta ringawt mai a. Hun pawh an duh rei khawp mai, mahse vanneihthlak takin him dam tak chuan an dorm chu an thleng ve leh thei mai a.

DAvid-a’n puanchhia, thisen kai a hmuhna bul lawk kha kham tawp a ni a. Kham chu chhui chhoh zel chuan kham pangah chuan in pakhat, lian ve pangngai tak hi a awm a. Chu chu Dr. Lalthazuala te in ngei kha a ni a, pawnchhe them David-a hmuh pawh kha Dr. Mazuala nupui, Mersa-X virus kai hmasa ber, Rinpuii kawr them ngei kha niin kha thisen kai pawh kha ama thisen ngei a ni bawk.

************************************************

Zing dar thum a ri tawh a, khua erawh a la thim em em a. Ruata chu a ke hliam chuan a ti muhil hleithei lo, a tur hian a tur ut ut mai a. A kawchhung chu a lum pup pup mai hian a hria a, a lu chu a hai muai muai bawk a. Khumah chuan a inlet a inlet a, a chang leh a han tho deuh hluai a.

Tui bottle chu ban in a in khawlh khawlh a, bur 3 a inzawhna a ni der tawh bawk. Mahse a tui hal chu a reh thei reng reng lo mai, amah ah chuan eng emaw diklo chu a awm tih chu a inhria, mahse eng ber nge a hre bawk si lo. Khum atang chuan a tho tuah tuah a, a roomate David-a chu a lo harh a.

A mit nuai nuah nuah pah chuan, “Khawnge i kal dawn?” tiin a lo zawt a. Thaw deuh hlawp hlawp chung hian, “A lum lutuk, pawnah ka va chhuak harh lawk.” tiin Ruata chuan a lo chhang a, a thlan lah chu a tla buah buah reng mai. DAvid-a chuan a han en hu a, “Kal pui i ngai em? Kha i ke kha a la na awm ropui si... fan khi on mai ila..” tiin a han zawt leh a.

Ruata chuan a lu thingin, “Aih, a ngai lo. Ka rei lovang, room chhung hi chu a uap ka ti tlat.” tih pah chuan a bai chhuak auh auh va, David-a pawh chu a mut a chhuah em avang chuan a muhil lehnghal mai a. Ruata chu pawnah chuan a chhuak tlang a, a thlan chu a tla nasa tawlh tawlh mai a.

Chutih lai chuan an dorm thlang chiah a, dorm dang ami, Lalnunfela chu pawn toilet atang chuan a lo chhuak ve chiah bawk a. A meizial zuk chu bangah chuan a han nawr hlum a, zik mar pah chuan a ham bai bai mai. Step lam a zu hawi thla zeuh chu a phu zuk mai, step-a Ruata bai thla uih uih mai chu a zuk hmu a.

Mak tih hmel tak hian a han en chiang deuh va, “Khu chu Ruata ava ang ve mawle..” a ti nuah nuah a. Mahse ngaih that lohna em em a nei lo, meizial zu tur emaw, a mu thei lo tei harh vel mai mai turah a ngai a. A dorm lamah chuan a let leh mai a, Ruata erawh chu step ah chuan a chhuk thui telh telh mai.

A awmdan chu a dik lo tulh tulh a, step tawp chu a thleng thei tawk mai. A awmna lai chu hostel mawng lam, tuichhe paihna lamah a ni. A khur hlawk hlawk a, “Tinge, tinge hetia ka awm?” tiin a phun mawlh mawlh a, a mangan hmel hle bawk. A kut zungtangte chu a kawm ngul hlawm a, a hmaiah chuan thisen zam dum nguk mai te chu a rawn lang ta thuah thuah mai le.

*********************************************************

Zing dar 6:30 velah chuan zing dang ang lo tak mai hian David-a chu a harh zawk mai, ham bai bai chung chuan a tho tuah tuah a. A sir lam chu ava melh a, Ruata khumah chuan tumah an lo mu hauh lo mai. Kawngka lam ava en leh a, zing dar 3 vela Ruata chhuak, kawngka a khar loh ang chiah chuan a lo la inhawng reng a.

A harh deuh kawk mai, rang takin a tho va. Room rim chu a chhe em em bawk a, thlan rim leh sazu thi rim niawm tak hi a nam rum rum mai. David-a chu pawnah chuan a va chhuak a, corridor vel chu a han en kual thuak thuak a. Mahse Ruata hmel reng reng a hmu lo, a ngaih chu a tha lo angreng kher mai.

Fela pawh chu a dorm atang chuan a rawn chhuak ve a, a han zi mar talh talh a. A balcony dinna zawna, building lehlama David-a lo hawi vual vhual chu ava hmu a. David-a hmelah chuan eng emaw dik lo a awm tih chu a hmu thei a, chutah zing khawvar hma a, David-a room mate Ruata, tui chhe paihna lama a kal thla lai a hmuh chu a hre chhuak zawk mai.

Rang takin step ah chuan a tlan thla nghal a, David-a te room awmna building lam chu ava pan vat a. David-a chu corridor ah chuan a lo la hawi vual vual a, “David, zawn nei i va ang ve?” tiin Fela chuan a rawn pan a. DAvid-a chu a phu deuh zuk a, “Aaa.. nia hei, Ruata mawle...ka hmu zo lova.” tiin a lo chhang bah deuh nuai mai a.

Fela chu a meng phawk hra mai, “Ruata a? A awm lo a mi?” tiin a zawt hu mai a. DAvid-a chuan a lu bu nghauhvin, “Zing lam a ni tawh zawk mah ang, dar engzat chiah nge ka hre lo. A thaw halh halh reng a, tichuan a rawn tho thut a. A lum emai a tia pawnah khan a chhuak a, ka muhil leh mai a, kei kha chu.” tiin a han chawl deuh dat a.

“Zing ka tho kha, a mutna bulah tui bur ruak panga vel a lo let phung a. Thlan rim leh thil rimchhe deuh deuh a nam rum rum bawk a. Amah lah a awm der mai silova, kawngka pawh kha khawvar hma a, a chhuahsan ang ang khan a la awm a.” tiin a han sawi chhunzawm leh a. “A lo la let miah lo i tihna em ni?” tiin Fela chuan a lo zawt leh vat a.

DAvid-a chu a han ngawi vang vang a, “A landan chuan a nih hmel, mahse khawvar hnuah chauh ka harh bawk sia.” a han ti nuah nuah a. Fela chuan thawk a han la deuh hluai a, “A tho hma anga, a ril tam hi choka lamah eitur ava zawng te hi a ni lo maw?” tiin a han zawt leh a.

David-a chuan a lu a thing a, “Aih, hetiang hunah Ruata hi ala tho ngai lo. Class kan kal pawhin ka kai tho ziah, chuvang chuan a lo la let lo a nih ka ring ber.” tiin a chhang a. Fela chuan a aw a han thian kharh kharh a, “Tukin zing khawvar hma khan ka hmu alawm, ka inthiar zo khan ka hmu a ni.” a han ti chu David-a chuan a melh hru mai.

“Eng a? I hmu maw? Khawiah nge i hmuh?” tiin a zawt nghal chung mai a. “Step ah khuan a kal thla a, tuichhe paihna lamah khuan...meizial zu tur vel mu thei lo, tei kual mai mai a nih ka ring a. Ka luhsan leh daih a, chuvang ania ka rawn zawh chiam che ni.” tiin Fela chuan a lo chhang a.

David-a chuan mak tih hmel tak hian, “Tuichhe paihna lamah maw? Anih chuan a la awm reng angem le? Tawh sual a tawk te hi a ni mai lo maw?” tiin a mangang nghal kher mai. Fela pawh chuan thutak zet hian, “A ke kha a bai uih uih bawk sia, hawh teh... zu en chhin teh ang.” a lo ti ve vat bawk a.

Tui chhe paihna lamah chuan an chhuk dun ta nghal a, “Tinge a ke kha a bai reng reng a, a hma in a bai em?” tiin an kal pah chuan Fela chuan a han zawt leh a. Hreh hmel tak hian, “Aw kha kha...nia, nimin tlai ah khan a inhliam a..” a ti bah deuh nuai a. An thleng tep tawh tih ah chuan an hma zawnah chuan hosteller dang hi an lo lang thut a, step ah chuan an lo chhuk ve mek a.

An hma chiah ami chuan, “Eng nge thleng a?” tiin a kal chak sauh sauh va. David-a leh Fela chu an in en a, an ngaih a tha lo kher mai. Rang takin an chhuk vat a, tuichhe paihna an va thlen chuan hosteller dang 10 rual vel hi an lo ding chip khup mai a. Eng emaw tak chu an en mek niin a lang, Fela leh David-a chu an va phei ve nghal a.

An zinga hmeichhe pakhat chuan, “Bawlhhlawh paih ka tum kha tihian a lo awm a, ka biak pawhin min chhang bawk si lova. Tunge a nih chiah ka hre lo, ka va pawh ngam bik chiah si lo a.” a lo ti nuah nuah a. Chuveleh David-a chu a va kal chak deuh va, Fela pawh chuan a rawn zui ve nghal.

“Khawi maw lawk, min lo hrethiam lawk teh u. “ tih pah chuan DAvid-a chu ava inzep zel a, a thil hmuh chuan a ti ding chat mai. Ruata ngei chu a ni, mahse hnunglam a hawi tlat a. A khur cher cher a, vawkin chaw a hap bawrh bawrh ri ang mai hian eng emaw chu a hap ri bawrh bawrh a ang kher mai.

Tumah chuan an pawh ngam chiah lo, chubakah mipa aiin chumi hmunah chuan hmeichhia an tam zawk hrim hrim bawk a. Fela pawh chuan a rawn hmu ve a, “Ruata a ni tiraw?” tiin David-a chu a han zawt a. David-a chuan a lu bu nghauhvin, “Ruata? Ruata... i tha em?” tiin muang chang chuan ava pan a.

Eng emaw ei chu Ruata chuan a nei chiang a ni, a hap ri buan buan mai a. A kapkar atang chuan thisen ni awm tak, tuihnang sen tak mai hi a far thluah thluah reng bawk. Hosteller dangte chu an rawn pun belh zel a, “Ruata, eng nge i tih? I tha em?” tiin DAvid-a chuan a pan hnai zel a.

Chutah Ruata chuan a thil hap bawrh bawrh lai chu a tawp thut a, muang chang chuan a rawn hawi ta. David-a chu a meng phawk nasa mai a, chutiang bawk chuan Fela pawh a ka hau mai. Ruata mit chu a var deuh pup a, a sen ang rum bawk a. A hmai chu a dang bel bawk a, a ka atang chuan thisen a rawn baw zawih zawih mai.

Eng emaw thial nuau nuau chu ala nei zui a, chutah David-a leh hosteller dangte lam chu a rawn hawi ta a. A kutah chuan zawhte thi, ril baw hnuang leh taksa bung lek lek khawpa sawisa hi Ruata chuan a lo keng run mai. Hmeichhe ho chuan an rap hle a, an tawlh hnung hret hret hlawm a.

Zawhte chu Ruata chuan a lo ei mek niin a lang, a thlah a, leiah chuan zawhte ruang chu a ri thlawp mai. Chutah muangchang hian a rawn ding a, a khur hlawk hlawk a. A awmdan chu mihring pangngai awmdan a ni hauh lo, a hmel te chu a rapawm em em mai a. David-a chu  a hrilhhai takzet, “Ruat... Ruata, tinge? Tinge khatia i awm?” tiin a dang te chu a awk vek tawh.

Chutah leh, Ruata chu a rawn tlan thut a. David-a chu a rawn zuan ta mai, leiah chuan a bawhthlu nghal a. A nghawngah chuan seh sak tum ni awm tak hian a bei ta chiam mai a, mahse David-a chu a lo indang hram hram a. Hmeichhe ho hlau chu an rak deuh chiam chiam hlawm a, mahse tu a te mah chu tlanchhiat an tum chuang lo.

DAvid-a te class-a an CR mipa pakhat, Joseph-a chuan a bula mi, Assistant CR Elena-i bulah chuan, “Warden emaw, tu emaw ber han hrilh nghal rawh...security te pawh rawn ko nghal ang che.” tiin a chah a, rang takin Elena-i pawh chu a tlan ve nghal mai a. Hmeichhe zinga pakhat chuan mangan hmel tak hian, “Tu emaw tal khan pui ta che u, tinge in en ringawt a?” tiin a au vak vak a.

Mahse an hrilhhai tlang a ni, mipa dang lo awm ve te pawh chuan han chet mai ngaihna an hre lo. Harh chhuak zawk ni awm tak hian Fela chu a phu deuh zuk a, Ruata chu kuah betin a han theh thal thuai a. Ruata chu grass ah chuan a lum phei tual tual mai, chuta a rawn eu vak vak mai a.

A awmdan chu hmuh a nuam lovin a rapthlak takzet, kawchhunga ramhuai lut ni awm tak hian a tal vak vak a, a ruh te chu a chetna lamah chuan a ri bawp bawp thei hial. Fela chuan David-a chu a kai thova, “I tha em..a khawih na che em?” tiin a zawt nghal vat a. Mahse David-a mak ti lutuk chuann a chhang tha hleithei lo, “Eng nge Ruata awmdan saw a awmzia?” tiin a tap lek lek mai.

Ruata chu a rawn tho chhuak leh a, chak em em hian a rawn tlan phei a. DAvid-a bawk chu a rawn pan leh ta, a rawn zuang vak a. Mahse Joseph-a chu rawn lang thutin thing tum hian Ruata bekah tak mai chuan a thlap ri pawp mai, Ruata chu a vir nawk a. Mahse na a hre thei lo emaw tih mai tur a ni, a rawn tho leh nghal vat a.

A bul hnaiah chuan vanduai thlak tak maiin hmeichhe pakhat a lo awm hlauh mai, Ruata chuan a zuan thlu nghal a. Chunu chu a t(r)e vak vak a, Ruata chuan a hrawkah chuan a darah chuan a seh sak ta. Chu nula na ti lutuk chu a au tuar tuar a, Fela chu va tlan vatin Ruata chu ava tlawh thal thuai mai a.

Hosteller dang, a bik takin hmeichhe ho lo awm ve te chu hlauvin an tlanchhe fai vek a.Mipa thenkhat erawh an la awm nual thung. Chu nula hliam tuar, a dar a sehna thla lang kuau mai leh thisen kai nuai mai chu na tiin a tap vak vak a. Joseph-a chu ava tlan pheiin a kai tho vat a, mipa dang lo awm ve pathum vel bulah chuan, “Kha... HEalth Care ah lo han kalpui vat rawh u.” tiin a chah hlawm a.

Anni pawh chu an kal ta a, Ruata erawh a la chau eih lo. A rawn tho leh ur ur a, David-a, Joseph-a leh Fela te chu a ngur chhur chhur hlawm mai. Chutah DAvid-a bawk chu va pan leh in a va rek chat a, chhuatah chuan an inbawh tlu leh rawp rawp a. Ruata chuan seh chu a han tum leh ngar ngar a, Joseph-a chuan a lo pawt let tang tang a.

DAvid-a chuan lung tum pakhat chu chharin Ruata lu ah chuan a vaw chawrh chawrh a, Ruata pawh chuan a thlah thei hram a. Mahse Joseph-a chu a bei ta zawk daih mai, seh tumin a bei leh ta chiam mai a. Fela chu rawn tlan vatin Ruata chu a rawn su thal tawp a, thing pakhat la in Ruata ka ah chuan a hnawh a, Ruata chuan a lo seh chat mai.

“A kut hi lo man bet teh u..” tiin Fela chu a au vak vak a, David-a leh Joseph-a te pawh chu rawn thovin Ruata chu nghet tak chuan an rawn manbet a, rei fe hnu ah chuan eng tin tin emaw chuan an phuar bet thei ta hram a. A thaw halh halh hlawm mai, Ruata lah chu thing seh vu chung chuan leiah chuan a la tal nasa mai.

********************************************************

Health care lam pan chuan hosteller mipa pathumte chuan Ruata sehna avanga hliam tuar mek hmeichhia chu an kuah chho mek zel a, zing tho hma dang, hosteller dangte chuan lo hmu in eng nge thil zawmzia an rawn zawt sap sap hlawm a. A kuahtu zinga pakhat, Faka chuan thaw hlawp hlawp chung hian, “Khutah...Science department lam building hnungah khuan, tuichhe paihnaah khuan mipa pakhatin a darah a seh sak a.” tiin a lo chhang a.

An hrethiam lo hlawm kher mai, a zawttu te zinga pakhat chu hmeichhe pakhat, Emily Lalhriatpuii chuan mak ti tak hian a lo en hu a. Science department building lam panthlakna chu a en vang vang a, midang melh kual zeuh zeuh pah chuan a chhuk thla ve nghal a. Hmeichhe hliam tuar mek, Hannah-i chu Health Care ah chuan an luhpui nghal a.

Medical duty lo awmte chuan a chhan te chu an han zawt a, Faka chuan thil awmzia a han hrilh ve leh a. Anni pawh chuan mak an ti kher mai, “Anih chuan security guard te in hrilh tawh em...Science department lama duty te in hrilh em?” tiin nurse pakhat chuan a zawt a. Faka chuan an hrilh tawh thu leh an chhuk mek thu chu a hrilh a, doctor Samuela chuan Campus Head, Proffessor Lalmuanpuia chu a phone nghal bawk a.

Health Care-a security duty te pawh chu Dr. Samuela chuan zu chhuk a, thil awmzia zu enfiah turin a chah ve nghal bawk. Tichuan Hannah-i chu khumah chuan mut tirin an han enchiang a, a dara hliam chu a thuk takzet, a vun chu a thler lek lek bawk. Hannah-i chuan na ti hle mahse a lu a hai em avang chuan a che tha thei lova, a thlan lah chu a tla bawrh bawrh mai.

Nachhawkna chuan an chiu nghal a, rei lo teah chuan Hannah-i chu a muhil thei ta hram a. Doctor Samuela chuan a pang te chu a han khawih chhin a, mak a ti kher mai. Hannah-i muhil lai chu a en vang vang a, “A thlan a tla bawrh bawrh bawk sia, engtin nge amah hi a vawh vek theih le?” a ti nuah nuah a.

*****************************************

Security guard thenkhat leh Elena-i te chu tuichhe paihna lam pan chuan an chhuk mek a, Elena-i chuan thil awmzia chu a sawi fiah mawlh mawlh bawk a. Ground ah chuan Ruata chu phuar behin a la mu reng a, tal chhuah a tum nasa kher mai. David-a chuan mittui tla phung hian, “Engtin nge a nih theih? Eng nge thil awmzia hi?” tiin a phun nuah nuah reng a.

“KA hrethiam bik lo, DAvid...a kawchhungah ramhuai a lut a ni thei ang ngem?” Fela chuan a han ti deuh hu a. Joseph-a chuan vin lek lek hian, “I mawl ami? Chutiang lam engmah a awm lo, eng emaw tak a rui a nimai. Damdawi eng emaw tak a rui sual aniang, ramhuai lut tih vel a nih ka ring lo nasa mai keichu.” tiin a lo chhang daih mai.

Security guard leh Elena-i te pawh chu an rawn thleng a, guard te pahnih pawh chuan Ruata awmdan an hmuh chuan mak an tih hmel kher mai. Pakhat zawk phone chu a ri a, “Hello, Sir? Aw hei an lo phuar bet thei a, police pawh kan phone tawh e.” tiin a han ngawi vang vang a, “Awle, Sir.. kan lo ti ang.” tiin phone chu a dah a.

“In room theuh vah han awm leh tawh rawh u, dorm danga han inlen pawh vel kha a la rem chuang lo ania..abak chu kan lo buaipui mai ang.” tiin security guard pakhat zawk chuan Fela te chu a hrilh a, anni pawh chu an let ve leh mai a. Guard pahnihte chuan Ruata chu an zawn a, an kalpui ta a.

David-a chu beidawn hmel tak chuan a room ah chuan a thu ngui bar a, Ruata mutna khum chu a en leh ngawih ngawih thin a. “Engtin nge a nih theih? Engmah ruih tur kan nei bawk si lova, tukin khua a la thim lai khan engtak nge maw a chungah lo thleng le?” tiin a inngaihtuah nauh nauh va.

FEla chu a rawn lut ve a, “David, eng emaw tak chu Ruata chungah khan a thleng a ni. A awmdan kha mihring pangngai awmdan a ni lo, nizan velah a awmdan a danglam em, a nih loh pawn eng emaw ruih in nei em?” tiin a bulah va thut pah chuan a zawt a. David-a chuan a lu thingin, “Aih, engmah kan rui lo. Ruih tur kan neih lohna a rei tawh lutuk, thla 2-3 vel lai a ni tawh.” tiin a lo chhang a.

Fela chu a han ngawi vang vang a, “Ngaihtuah chiang teh...nizanah, zantir vel lamah emaw, a mut hma velin a awm dan a danglam em?” tiin a han zawt leh a. David-a chu a han inngaihtuah vung vung a, “Danglam lo...zinglam dar 3 vela a thaw halh halh leh lum a ti em em kha a nimai, abak chu a awmdan a danglam lo hrim hrim.” tiin a lo chhang leh a.

An ngawih dun vang vang hnuah chuan, “Lungngai lo phawt la, a rawn tha chhuak ve leh mai turah ngai ang. Kan hmelhriat ngai loh thil mak a thleng angah i ngai phawt ila, a nih loh pawn eng hri emaw tak a kai aniang...mihring thluak khawih thei thil...aaa, ka hrethiam bik lo.. ka room lamah ka va phei phawt ang e.” tiin a kalsan ta a.

Chuveleh David-a chu thil hrechhuak niawm tak hian a phu zuk mai, “Hri a? MRSA hri chu a ni thei lo, khatin an awm ngai lo.” tiin a han inngaihtuah leh vang vang a, “A ke ah khan hliam a nei a, puanin ka tuam sak a..khami hnu khan... nilo, a ni thei lo. Thildang zawk a ni, mahse eng nge a chhan ni ta ang?” tiin a inbe mawlh mawlh a.

****************************************************

Security guard ho chuan Ruata chu main gate bul an thlen pui ta a, guard dangte pawh chuan an rawn pui ve nghal bawk. Campus Head Pu Lalmuanpuia pawh chu a rawn lang ve bawk a, Police te pawh an rawn thleng ve nghal bawk a. Main gate bulah hian Task Force duty 10 vel an awm ve bawk a, “Damdawiinah hruai vat ula, chanchin in rawn update leh dawn nia.” tiin Pu Muanpuia chuan a staff thenkhat te chu a chah hlawm a.

Chutia motor-a zawn luh an tum lai tak chuan Ruata chu a rawn tal thut a, police te chuan an thlah hman tlat mai. Leiah chuan a tal ta vak vak a, phuar beh mah nise eng tin tin emaw a ding thei tlat. Midangte chu seh tum ang mai chuan a va hap thuak thuak hlawm a, task force duty zinga mi pakhat chuan a manbet a.

Mahse vanduaithlak takin a kutah chuan Ruata chuan a lo seh sak ta hlauh mai, “Aiahhh... hrep tak chuan le..” tiin a tawlhhnung nghal a, mahse police ho chuan Ruata ka chu an hnawh sak thei ta hram a. “Ana em? A seh thuk viau em?” tiin task force duty dangte chuan chu pa chu an buapui nghal a.

“Na lem love, eng thil nge maw a ruih dawn le....” tiin chupa chuan a lo chhang a, Ruata chu an phur liam ta a. Task Force duty zinga an leader ber, Pu Saia chuan Ruata’n a seh hliam tak chu rawn panin, “MRSA inkaichhawn a hlauhawm dawn tlat mai, thianpa. Rang takin property house lamah i hliam kha lo zu silfai la, i zawh hunah i haw rih mai dawn nia, fimkhur tluk a awm lo.” tiin a hrilh a.

Chupa pawh chuan thuawih takin property house lam, an duty na atanga hla lo te a awm chu a pan nghal a. Pu Saia chu a han thaw hak a, “Engtin maw kha naupang kha a awm a, tinge khatia a awm nachhan?” tiin security guard pakhat lo la ding ve chu a zawt a. “Ka awm ve lova, student pakhatin a rawn sawi a. Zawhte thi a lo ei a, chuan va biak an tum a, seh a lo tum hlawm a ni awm e.” tiin a chhang a.

Duty zinga mi patling pakhat chuan, “Rabies chikhat a ni lo maw.. uiin a seh ang a, tichuan tikhan a awm a ni mai lawng maw?” a rawn ti chhuak hlawl mai. Pu Saia hu za lo tak chuan a khi suk a, “A nih pawh a ni mahna, engpawh nise... thingpui i in leh phawt mai teh ang u.” tih pah chuan thingpui chu a han thli ri karh karh a.

*******************************************

Emily chuan Science department lam building chu a pan thla zel a, a room lama Fela chho tur nen chuan an intawk thut mai. Fela chu a ding chat a, “Ehe..Em, Emily.. eng nge hetah i rawn tih dawn a?” a ti bah nuai mai. Emily chuan mak tih hmel deuh hian Fela chu a en a, “Engtin nge ka hming i hriat?” a ti hu mai.

Emily hi Arts lam ami daih a ni a, Fela erawh Science department lam a mi a ni. Emily hi BA zirlai a ni a, FEla erawh Bsc Chemistry zirlai a ni. Kum 2 chhung ngawt Emily hi a lo duh ru em em thin a, chuvanga a hming hre chat pawh a ni. Mahse Emily erawh in Fela chu a hmuh ngai loh mai bakah a piang ve tih pawh a hre lo thung, student leh hosteller sang chuang awmnaah chuan kawm ngai loh phei chu hriat a har ngawt ta ve ang.

An University hi a zauvin a lian em em a, Aizawl khaw chhunga veng pakhat tiah lawih a zau a ni a, a hmun pawh a nuamin building tam tak, department hrang hrang a tam hle a, student te pawh an subject lak a in an lo chuan an inhre mang lo a ni. Inthlahrung hmel tak hian Fela chuan, “Aa... ih, ka... ka hre ve tawp che.” a ti bah leh nuai mai.

Emily chu a han ngawi vang vang a, “Eng nge thleng a? Hmeichhe pakhat kha hliam tuarin an rawn chhoh pui a, in dept lam atangin a ni sia...eng nge thil awmzia?” tiin a han zawt leh a. Fela chuan a aw a han thian kharh kharh a, “Um, nia..kan thianpa pakhat kha nizan atangin a room atanga a chhuak kha zingah pawh a lo la let lova...chuan tukin khan tuichhe paihna lamah khan kan hmu a..” tiin an thil tawn te chu a hrilh a.

Emily chuan mak a tih hmel takzet, “Chuan... khanu, Health Care-a an rawn zawn chhoh kha, chupa chuan a seh maw?” a ti hu mai a. Fela chuan a lu lo bu nghatin, “Aw ni e, midang pawh kha min seh a tum nasa hlawm lutuk. Mahse midang chu tumah a seh lo, Hannah-i chu a nimai.” tiin a lo chhang leh a.

“Anih tunah khawnge in thianpa Ruata chu an dah?”

“Police an kova, chuan damdawiinah an kalpui hmasa dawn a nih hmel.”

“Tumaw i hming khah?”

Fela chu lai deuh tak hian a khi suk a, “E..aw nia, ihh, Fela ka nia, Lalnunfela.” a ti bah nuai mai. Thutak zet hian Emily chuan Fela chu a en a, “Ngaithla teh, Fela. A atthlak i ti maithei a, mahse i sawi hmang chuan... movie vela zombie a ang ka ti.” a han ti chu FEla chuan a melh hru mai a, “Zombie a? A awm ang lo emai, damdawi ruih eng emaw a neih vang a niang.” tiin a chhang a.

“Ka hria alawm, mahse zawhte thi a helin a lo hap bawrh bawrh i tia. Chuan seh che u a tum a, a vun a dang bal a, a chetdan pawh kawchhunga ramhuai lut ang mai i tia.. zombie awmdan chiah chiah a nih chu.” Emily chuan a lo ti leh a. Fela pawh chu a inngaihtuah vang vang a, “Anih chuan... Hannah-i kha a seh a, i sawi hi a dik a nih chuan..” tiin a ngawi ta vung vung mai.

Emily nen chuan an in en vang vang a, “Kan kal angai, vatin..” tih leh Emily chu kal a tum nghal mai a. MAhse Fela chuan lo tiding vat in, “Ngawi lawk teh, Emily. Kan duh duh naa kal kawi mai mai an phal lo ania, lockdown a nih hi. Security ten min hmu ang nge, tunlai phei chu ka mark a chhe teh mai ania.” a han ti deuh duah a.

Rum fe hian Emily chuan a melh a, “Min lo man a nih leh Hannah-i dinhmun a derthawng kan tia nga, engkim kan hrilh ve vek anga a ni mai alawm.” tiin a lo vin hrep mai. Fela pawh chu a ngawi ngal a, “Min lo zui dawn loh chuan ka kal dawn, keimahin ka kal mai ang.” tiin a kal nghal a, Fela chuan a zui ve nghal bawk. 

**************************************

TO BE CONTINUE