SHIVER (MIZO FICTION ANTHOLOGY HORROR STORY) Written by : Aaron Malsawmdawngzuala CHAPTER - 1

 SHIVER

(MIZO FICTION ANTHOLOGY HORROR STORY)

Written by : Aaron Malsawmdawngzuala

CHAPTER - 1

******************************************************************

Mihring pangngai, eng anga huaisen leh ramhuai te, thlahrang tih vel awih ve ngai lo emaw, hlau ve ngai miah lo ang chi hi he khawvelah hian kan awm nual ang. Mahse hmanlai kan mizo pasalthate, sipai huaisen te, police huaisen tak tak leh hlauh nei ve ngai lo emaw tih tur khawpa mihring huaisen te pawh hian, mihring mai ni lo, thil nung hrim hrim hian thil in ang pakhat kan nei a. Chu chu HLAUHNA hi a ni, he khawvela thil thaw thei tawh phawt chuan hlauhna hi kan nei vekin a rinawm.

Hlauh neih hi dawihzepna a ni lova, mi pangngai kan ni tih lan tirtu zinga pakhat ve mai a ni. Hnuchhui zui tur awm miah lova i taksa khawihtu an awm a, i hriat miah lova zuitu che an awm a. I ngaihtuahna ah tu emaw in a enthla reng che a, a nghak reng che angin i inhre thin em? Chutiang chu i tawng anih chuan, chu thil chuan hlau leh khurin a siam ngei ang che.

(He thawnthu hi thawnthu pakhat chauh ni lovin, thawnthu hrang hrang, in-relate na nei lem lo te an ni hlawm dawn a. Zirtir emaw, awmze thuk tak, ril tak pawh a nei dawn lem lo bawk. Mi hrang hrang, mize hrang hrang leh dinhmun in ang lo tak tak ten HLAUHNA chi hrang hrang an tawn dan leh an hmachhawn dan chi hrang hrang a ni ber.)

**************************************************

THAWNTHU PAKHATNA :

THE OTHER (PAKHAT ZAWK)

Zing dar 7 a ri a, Zorina alram chu a rawn ri ral ral a. Amah Zorina pawh chu rawn harh in megn mang hlei lo chuan a phone chu a han ban nghal a. Alarm chu a off a, peih loh hmel tak chuan a thu chhuak a. A ham deuh bai bai a, a phone a message te chu a han check ang thuak thuak a.

Zorina hi kum 30 mi niin tlangval ngawichawi ve tak, ngaihzawng nei ngai lem lo leh mi pawisawi khat tak mai a ni a. Huau huau lo lo ve tak a ni bawk, a hmel chu chhe lem lo mahse hmeichhia a hip lo nge, a ngaihsak lo zawk ni, a pian a hnu lamah bialnu pakhat chiah ala nei a.

Chutah kum khat em pawh an inzui hma in an inthen leh nghal daih a, a chhan erawh tu hriat mah va ni suh. A nun chu boring a ti ve hle thin a, thil danglam em em han thleng hi a awm ngai meuh lo. Nitin zing dar 7 ah a tho va, dar 9 rik hma in a hna a thleng a. Tlai dar 5 velah in a thleng leh a, chubak chu thildang han tih a nei ngai lem lo.

Aizawlah inluah in a khawsa a, amah chauhvin a cheng a. Thiante lah a hruai lut khat em em bawk a, chutih rual chuan a nun hi boring ti thin hle mahse bung dang han kai a tum em em lo a ni chek ang chu. Bank ah a thawk a, a hna pawh a tlin in a thawk tha thin hle a ni awm e. Chumi ni pawh chuan a ngai te ang bawk chuan hna a kal leh a, mahse tlai lam a lo nih chuan a haw tlai a ngai ta tlat mai.

Hna a tam deuh avang chuan a awm khaw tlai a, khua a thim meuh chuan a zo ve thei ta. A kawr lum chu la in haw zai rel a tum ve ta a, kawngka zawn a thlen dawnah chuan light chu a rawn phe deuh zuk zuk a. Engah vak chuan a ngai chuang lo, a kawrlum chu ha in office chu a chhuahsan ta a.

Pen 10 pawh a la pen lovang tih ah chuan thli a rawn thaw vuk vuk mai a, vawt a tih em avang chuan a kawrlum chu a han kilh pum a. A phone chu a ipte atang chuan a phawrh a, a ban rual rual chuan a phone chu a rawn vibrate ta hlarh hlarh mai. Message pakhat a dawng hi a lo ni, mahse a number hriat ngai loh a ni tlat.

Message chu a han chhiar a, 'Tun atanga rei lo te ah phone call i dawng dawn, offer tha tak an rawn hmuh tir dawn che. I hnial phal miah loh tur khawp a offer pui tak i dawng dawn, lo ngai reng rawh.' tih hi a ni a. Zorina chu a ding chat a, mak a ti kher mai. "Eng nge maw awmzia le?" a ti nuah nuah a.

A han inngaihtuah vang vang a, a thiante zinga mi tu emaw berin rawn bawl a tum emaw, scam vel mai mai a nih ringin a khi suk a. A phone chu a ipte ah chuan a ak tha leh a, tichuan a kal leh ta zel a. A in luah lam pan chuan a phei zel a, tlai dang ang lo takin khua chu a vawt vin tuk mai lehnghal.

Minute 10 vel hnu ah chuan a phone chu a rawn ri leh tang tang a, rang takin a phawrh chhuak a. A han en leh chu message dang a lo dawng leh a, a chhiar leh ta. 'Nangmah chauhvin i awm lo ania, tu emaw chuan a zui ru mek che a ni. I nunna, i nunna kha a duh.' tih hi a lo ni.

Zorina mak ti lutuk chu a ding leh chat mai, number chu chiang leh zual chuan a han en a. A meng phawk nasa kher mai, a thaw nghal halh halh a. A hrethiam lo takzet, a chhan chu message rawn thawntu phone number chu ama phone number ngei a nih vang a ni. A ngaih a tha lo nghal em em a, "Engtin nge, engtin nge ka number vek atangin message ka dawn theih?" tiin a phun leh ta nuah nuah mai.

A han hawi kual a, khua a thim vek tawh a. Tam si lo chuan ruah a hmi seng seng reng bawk a, khawlaiah chuan tumah an awm lo tluk a ni. A reh em em a, a khawt tawk a motor rawn tlan leh zuai zuai thin bak chu midang hmuh tur an awm bawk si lo. In lam pan phawt mai chu tha in a hria a, tichuan a haw ta a.

Mahse vanneihthlak tak maiin chumi zan chuan eng message dang mah a dawng zui lem lova, thlamuang tak chuan a muhil thei mai a. A tuk zingah pawh chuan eng message mah a dawng tawh lo, a thianten eng tin tin emaw tikualin an rawn tih thaih a nih chu a ring lui hram hram a, mahse a thinlung tak erawh chuan a ring hauh lo thung.

Hna thawk tur chuan bank lam chu a pan leh ta a, a thleng chiah, office chhung a lut chiah tih ah chuan a phone chu a rawn vibrate leh ta hlarh hlarh mai. Muang chang chuan a han phawrh chhuak a, ama number tho khan message dang a rawn thawn leh ta. Message chu a chhiar leh a, 'Helai hmunah hian a awm, fimkhur rawh.' tih hi a lo ni.

Zorina mak ti lutuk chu a meng phawk nasa mai a, a thiante fiamthu mai mai a nih chu a ring tawh hauh lo. A han hawi kual a, a thawhpui dangte chuan an mahni hna theuh lo thawkin tu a te mah chuan an rawn ngaihsak eih bawk si lo. Phone chu a ak a, tichuan a han chu a thawh chhunzawm ve leh nghal mai a.

Chumi ni chuan message chu a khat tawkin a dawng mawlh mawlh a, 'I la hre thuai ang', 'A rei tawh lovang.', 'Inveng fimkhur hle rawh.' tihte a ni hlawm a, mahse Zorina chuan engtin mah chuan a chhang let chuang lo, han tih vak dan tur a hre lo a ni ber mai. Hun a kal zel a, Zorina pawh chuan message chu a dawn chhunzawm zel a.

A hring a hranin tumah chuan an rawn tibuai chuang lo, mahse ama number ngei mai atanga dawng a ni bawk si chuan a hrilh a ti haiin a awm a nuam thei ngai reng reng lo. Rawn text tu lah chuan a hriat chian hmel em em mai lehnghal a, a mut dawna coffee a in ziah thin thute, chini fian engzat nge a tleh thin tihte leh a thil tih lai mek te chu a rawn hrilh thin a.

Mahse han tih vak ngaihna a hre lo, message thawn let ve a tum lahin amah tho chuan a dawng leh thin bawk si a. Call a tum lahin ama phone tho chu a rawn ri leh thin bawk si, police henah thlen dawn se an awih sak dawn der mai si lo. A rilru chu a ti hah ve takzet, engmah na tuar zawng leh thawm nei zawngin a rawn ti buai ngai chuang lo thung.

A ni 4 na chiah chiah a ni ta a, Zorina chu bank atang chuan a haw dawn mek a. Kawngka atanga a chhuak chiah tih ah chuan message a dawng leh ta, 'Ni 4-na a ni ta, a hun ta e.' tih hi a lo ni. Zorina chu a thin a phu dup dup mai a, rang tak chuan a in luah lam pan chuan a tlan haw nghal a.

Mahse a thleng chiah, inchhung a lut chiah chu a ding chat mai, mak tih hmel tak hian a melh ngai chu a melh vung vung a. Sitting room a sofa ah chuan mipa pakhat hi a lo thu vung mai a, Zorina chu a lo la melh khur zui. Zorina chuan mak a tiin a hlau takzet, a chhan pawh chupa, a sofa a lo thu mek chu ama hmel nen an in an chiah chiah vang a ni.

An thawmhnaw hak, an hair style, an an pheikhawk bun nen lam chuan a in ang vek mai a. Chupa, amah ang chiah chiah, a sofa a lo thu mek chuan mit khap miah lo hian a en run mai a. Zorina chu a thlan a tla nghal bawrh bawrh mai, a hlauh em avang chuan a khur thei hial a. Bah nuai hian, "Tu... tu nge, tunge i nih?" a han ti khur dar dar a.

Chupa, Zorina hmel ang chiah chiah chuan chhang lovin a la en reng a. Zorina ber pawh chuan han chet mai ngaihna a hre lo, a ding ngawi ve reng ringawt a. Chutah chupa chu a rawn tho chhuak a, Zorina lam chu a rawn pan a. Zorina chu a che sawn thei lo, a taksa chu a khawng vek ang hian a hria a.

Chutah Zorina hma zawn takah chuan a rawn ding a, "Nangmah thlak tur che a lo kal ka ni, i nunna hi ka ta a ni tawh." a rawn ti thum chhur chhur mai le. Zorina hlau lutuk chu zun a cheh lo chauh tawh, chutah an aw(voice) chu ala in ang chiah chiah zui. Chutah chupa chuan Zorina kut chu a rawn vuan thut a, ama lamah a pawt phei a.

Chiang fahran hian a mitah tak chuan a melh khur a, Zorina chu a che thei ta reng reng lo mai. Chupa chuan hnai takah, a beng bulah chuan zawi sap leh fiah em em tho si hian, "I thi tawh, Zorin. Nangmah thlak tur che a lo kal ka ni, kei hi....nangmah, pakhat zawk ka ni." a ti thum leh ta chhur chhur mai.

Zorina hlau lutuk chu au a han tum a, mahse eng thawm mah a chhuah thei ta tlat lo mai. Chupa, amah ang chiah lah chuan a mitah tak mai chuan a melh khur reng mai bawk si. Chutah Zorina chuan thil mak tak dang a hmu leh ta, chu a vuan tupa, amah ang chiah chu a mitah chuan hlauhna a lo awm ve tho hi a lo ni.

A awmzia chu a awmdan ang chiah chuan a lo awm ve a, a mitmenga hlauhna thuk tak mai chu chupa mitmengah chuan a lo awm ve reng a. Darthlalanga in en ang mai a ni, mahse thawk leh kahtah engkim chu a rawn pangngai leh thut a. Zorina chu a inluah ah chuan amah chauh hian a lo ding a, khapa, amah ang hmel pu kha a lo awm leh tawh miah lo.

A phone message ring tone chu a rawn ri leh ral ral a, a phu nasa kher mai. Hreh hmel tak leh khur dar dar chung chuan a ipte chu a zen a, a phone chu a han phawrh leh a. Ama number atanga message bawk chu a lo ni leh a, message chu a han chhiar leh ta. 'Mangtha le.' tih zawng hi a lo ni.

Chuveleh Zorina awmna chu a rawn thim riai riai a, amah pawh chu a taksa a chau hnawk a. A zawi tial tial a, chutah a khawhmuh chu fiah lo telh telh in a tawpah chuan engkim mai chu a thim ta hmak mai. Ni 2 lai engmah sawi lo leh chin hriat lohvin Zorina chu hna a rawn kal tawh lova, bank manager chu a ngaih a tha tawh lo takzet.

Phone lahin a ring quit thak thak a, message lah a chhang let thei bawk si lo. A hnathawk te zinga mi mipa pahnih chu Zorina in luah a va kal tur leh chanchin ve ngaihven tur chuan a tir ta nge nge a, bank emplyee pahnihte pawh chu an va kal ve mai bawk. Zorina in luah an thlen veleh chuan kawngka chu amahin a lo inhawng huau mai a, a chhungah chuan an lut a.

A lo ruak vek mai, pindan zawng zawng leh bathroom te, kudam te thleng chuan an en vek a. Mahse Zorina hmel reng reng hmuh tur a awm lo, kal leh mai an tum chu pakhat zawk chuan sofa bula mobile phone chu a hmu a. Zorina phone ngei a ni tih a hre nghal bawk, a chhar a, a han en a, message pakhat hi a lo awm a. Message chu a han chhiar a, 'A dawt leh chu....nangmah.' tih hi a lo ni.

THE END

************************************************************

THAWNTHU PAHNIHNA : 

THE MIDNIGHT TAXI DRIVER (ZANLAIA TAXI KHALHTU CHU)

Zan a rei deuh tawh tih chu hre tho mahse kum 21 lek a upa, Zualtei chuan an college Library ah chuan final exam a mi tur chu zirin ala bei ngawrh hle a. Dar zat pawh a en phal meuh lo, a phone lah chu a chhungten an rawn phone sek a hlauh vang nge ni, airplane mode ah a dah hmiah mai a.

Zualtei hi nula fel tak mai, mi introvert tak mai a ni a. Lehkha zir chu a hobby a maw tih mai tur ang chi kha niin school a kal lai atang tawh pawh a topper ni char char thin a ni a, thian a kawm ngai meuh lo bawk. Thingtlang atanga lo kal niin Aizawlah zirna avangin in a rawn luah a, a unaupa leh a nutei te nen an khawsa ho a ni.

An inluah atanga college hi a hla lutuk lova, ke a kal chuan minute 10 chhung vel bak kal a ngai lo. An college library ah hian amah Zualtei hi a tam thin hle a, lehkhabu chhiar a ngainat mai bakah thil thar hriat zel duhna in a khat a ni ber mai. Class ban tawh hnu a library-a lehkha zir a hrat thin hrim hrim avang hian a haw tlai thei hle a, hemi zan pawh hian an in a hnai tho bawk a, haw tlai huamin library ah chuan a awm tlai lui a ni.

Chutia a zir melh melh lai chuan library kawngka chu a rawn ri rak a, college security guard chu a rawn lut a. Zualtei erawh chuan head phone a vuah avang chuan engmah a lo hre lova, chubakah Zualtei hian hetia hla ngaihthlak pah a lehkha zir hi nuam a ti in a tih than dan hrim hrim a ni.

Security guard chuan rawn panin a han au va, Zualtei chuan a lo hmu ve vat a. Inthlahrun hmel tak hian a head phone chu la thla in, "Awi... ka tihpalh lutuk. Hla ka lo ngaithla a, eng nge ni ta?" tiin a lo chhawn vat a. Security guard chuan zaidam tak hian, "Thiannu, hei dar 11 leh a chanve a pel tawh a. Gate hi dar 12 ah kan khar dawn a, i zo thei tawh a ngem le ka rawn ti a." tiin a lo chhang a.

Zualtei chu a tho va, "E awle, kan indah fel lawk ange aw.." tiin a indah fel sawk sawk a. A phone phawrhin dar zat chu a han en a, a lo tlai tawh kher mai. A battery lah chu 5% chiah a lo ni tawh zui a, a intihfel zawh hnu chuan library chu a chhuahsan ta a. Pawnah chuan security chuan a lo nghak a, Zualtei pawh chu a rawn chhuak ve a.

"A tlai tawh si a, ke in ila haw dawn zui bawk sia. I hlau lo ami, thlah i ngai ang ngem?" tiin Security guard chuan a zawt a, Zualtei chuan a chhang mai lo. Khawlai chu a han hawi kual a, mihring hmuh tur an awm mang tawh lo. A duh ai chuan a haw tlai a ni tih chu a inhria a, mahse chutia hmelhriat ngai lem loh, an college security guard, mipa leh nghal han inthlah risk tir ngawt chu a ngam bik chiah lo.

A nui lui sen sen a, "Ka tha mai ang, a hla vak hleinem." tiin a chhang a, security guard pawh chuan a hnial zui ta lem lova. Ti chuan Zualtei chu a haw ta a, khua lah chu a vawtin thli a thaw vuk vuk reng mai a. Minute 10 vel chauh kal ni mahse darkar tam tak tho chhuak miah lovin a lo thu ngar ngar tawh nen, a kawng chu a kham em em a.

A taksa a chau bawk a, zanriah ei lovin chhang tlem te chauh a ei bawk nen a kal chak hleithei tlat lo. Khawlai chu a reh em em mai a, Zualtei pawh hmeichhe awmnem tih takah a thla chu a muang bik chiah lo a ni. A phone chu a en a, 3% chiah a ni tawh. A chhungte chu call a han tum deuh ut ut a, chutih lai tak chuan a hnunglam atang chuan motor rawn tlan thawm a hria a.

A va hawi let a, motor pakhat hi a rawn tlan mek a. Zualtei chuan ngaihsak zui lo chuan a hma lam pan chuan a kal leh zel a, mahse a ngaih a tha tlat lo. A chhan chu minute 1 dawn a ni tawh, a hnunglama motor tlan ri a hriat chu a rawn thleng har lutuk tawh tlat. A ding a, chuveleh boruak chu reh diakin motor tlan thawm pawh chu a reh daih mai.

Hnunglam a hawi vat a, eng motor mah a hmu tawh lo. Mak a ti angreng kher mai, chutia a din ngawih reng lai chuan a phone message ring tone chu a rawn ri ral ral a. A han en a, "TAXI A LO THLENG DAWN." tih message hi a lo ni. Unknown Number tih ringawtin message rawn thawntu hming chu a lang a, chuveleh a chhungte rawn miss call-na te, a whatsapp message te leh notification dang dang te chu a rawn thleng zuah zuah mai.

Message rawn thawntu chu en chiang tum chuan han hmeh chhuah a tum a, mahse mak tak maiin a phone chu a rawn thi ta hmak mai le. A hawi hru ringawt a, "3% kha ala awm ve sia, engtin nge hetia a rawn thih hmak theih le?" tiin a phun mual mual a. Chutah rawn lang thut emaw tih tur khawp chuan hnai takah hian taxi hi a rawn tlan phei a, Zualtei pawh chu a phu nasa angreng kher mai.

A hma lam, a hawna tur kawng chu ava hawi phei leh a. A thim phei ruih mai bawk si a, a la hla ve angreng bawk nen. Chutih rual chuan a taksa lo chau tawh bawk nen, lo phar din mai chu a tum ut ut tawh a. Mahse a message dawn, TAXI A LO THLENG DAWN tih message a dawn chu a hre chhuak leh a.

Taxi ah chuan a chuang dawn nge dawn lo tiin a rilru chu a insual nasa mai a, taxi pawh chu a rawn thleng hnai tawh khawp mai. Taxi light chuan a rawn en vut mai a, Zualtei chuan a rilru a siam fel hman lo. A ban chu a lo phar ta ringawt mai a, a zawn takah chuan taxi pawh chu a rawn ding chawpchilh ve nghal.

Zualtei chu a ding ngawi reng a, muangchang chuan taxi driver chuan tukverh chu a rawn ti thla a, mahse taxi chhung chu a thim vek avang leh, driver chuan lukhum hma thlawk a khum tlat avang chuan a hmel chu a hmuh chian theih loh va. Zualtei awm chu a nuam chiah lo ngei mai, "Khawi lamah nge?" tiin driver chuan a han zawt a, a aw te chu a thum ang chhur lehnghal a.

Zualtei chuan a phone chu a hum nghet vak ringawt a, a chil a lem dawk a. Hlauh hmel tak hian, "Chawng... Chawngthu colony bulah a ni mai." a ti khur dar dar a. Driver chuan a lu a lo bu nghut ringawt a, Zualtei pawh chu taxi hnunglamah chuan a chuang lut ve ta mai bawk a. A chhung chu a lum deuh pup mai a, a rim rui lem lo hle bawk.

Thir tuiek rim ang deuh hi a nam a, pawn boruak nen chuan in ang lo tak a ni. Tichuan taxi chu a tlan tan ta a, ala tlan chak em em zui. Zualtei thla chu a muang meuh lo, a hnung seat lamah chuan a thu ngawi reng ringawt a. Driver lah chuan biak a tum reng reng lo, a hma zawn chu enin ngawi reng chuan motor chu a khal zel a.

Khawlai lah chu a reh diak tawh mai bawk si, Zualtei chuan a phone chu switch on a han tum thin a. Mahse a nung thei reng reng tawh lo mai, tukverh lam chu a han hawi chhuak a. Mak tak mai hian an tlanna zawn a street light te chu an tlan pelh apiang chuan a phe zawk zawk zel ta mai a.

Hlauh rilruk tawh sa nen, Zualtei awm chu a nuam lo zual kher mai. Mahse thil thleng palh ve mai mai a niang tiin a ngaih a ti tha lui hram hram a, thil thleng palh a nih ring lo tuber chu amah bawk a ni lawi si. A thin a phu dup dup mai a, driver lah chu kawng a reh tawh vang nge ni, a tlan chak tulh tulh mai a.

Rei fe an tlan hnu chuan Zualtei chu tukverh lam a hawi chhuak leh a, an tlanna lai chu a hriat ngai a ni ta hauh lo mai. Kawng dang daih a ni tawh tlat, chubakah mihring mai nilovin, in leh dawr takngial pawh hmuh tur a awm ta mang hauh lo mai. Zualtei chuan a aw a han thian kharh kharh a, "Ka pu, ka pu. Helai kawng hi khawi lai nge, Chawngthu Colony ah ania kan awm. Tinge hetah kan kal daih a, helai hi kan in kalkawng a ni lovin ka hria?" tiin hlau rilru deuh tak chung chuan a han zawt a.

Mahse driver chuan a chhang miah lo, a motor khalhna kut bak chu che dang a awm lo. Milem ang mai hian a thu kun ngul a, a lu leh a taksa dang te chu a che miah lo mai. Zualtei chuan a hlau takzet, "Ka pu, kan in-turn angai a nia. Kawng dik lovah min kal pui ania, ka pu?" tiin han biak leh chu a tum viau va.

Mahse driver chuan a la chhang chuang miah lo mai, Zualtei pawh chuan tih vak ngaihna a hre bik lo. Ngawi reng hian driver chuan a khalh thui zel a, an tlanna lai vel chu a mak tulh tulh mai. Zualtei pawh a hlau tawh takzet, a thu ngawi ve reng ringawt a. An chuanna motor engine bak chu ri dang a awm lo amaw tih tur hial khawp chuan boruak chu a reh em em mai a, in hlui chhe bal tawk tak tak, rauh san tawh ang maia chul rup mai lo ding thluah na hmun chu an thleng ta a.

Mihring chu sawi loh, ui leh zawhte takngial pawh hmuh tur an awm lo. Kawng lah chu a chhe tulh tulh mai a, Zualtei thin chu a phu rang tulh tulh bawk. Tap tuau hian, "Ding rawh, ka chhuk duh. Khawngaihin min kal tir rawh, min ti na suh." tiin a ngen ta vak vak ringawt mai a, mahse driver lah chu a la ngawi reng mai si.

Zualtei chu a che ngam tawh lo, mittui tla zawih zawih chung chuan ngawi reng hian a chuang ve zel ringawt mai a. Minute 2 vel hnuah chuan motor chu a ding ta thut mai, Zualtei pawh chu rang takin a rawn thu chhuak a. An hma zawn takah chuan in lian tak mai, rauh san tawh tih hriat em em mai hi a ding luah mai a.

A chul rup mai a, a balh hmel em em bawk. Zualtei chuan a hrethiam lo kher mai, "Tinge hetah min hruai, hei hi kan in a ni lo." tap tuau chuan a han ti leh a. Mahse a ngai te ang bawkin driver chuan a chhang eih lo, che miah lo hian a thu ngawi reng ringawt a. Chutah a chuanna lam kawngka chu amah in a rawn in hawng ri rawk mai a, Zualtei chu a phu nasa kher mai.

Chhuah mai chu a hreh deuh va, a chhan pawh chulai hmun chu a hre ngai si lo. Chu mai ni lovin an hma zawna in chu en reng reng pawhin a hran duh hmel ngawih ngawih a, a che ngam mai rih lo a ni ber zawk. Second 10 vel lai chu che miah lo chuan a ngawi reng a, driver lah chu a che lo mai nilovin, milem ang mai hian thawk pawh a thaw lo hi a ang mah tawh zawk.

Zualtei chu muang chang chuan taxi atang chuan a chhuak a, a ke chu a khur hlawk hlawk mai. A chhuak chiah chu boruak a vawt leh ta ruih mai a, chhum a zing nasa em em bawk. In lam chu a en vang vang a, "Engtin nge ka tih tak ang?" tiin a phun sap a. Chutah a hnunglam atang chuan, a beng bula rawn phun ang maia hnai hian hmeichhe aw hian, "Heta lo kal tur hi i ni lo asin." a rawn ti thut mai.

Zualtei phu nasa lutuk chu a au tuar a, hnunglam chu rang takin a hawi let nghal vat a. Mahse tumah a hmu lo, chu mai nilovin taxi pawh kha a lo bo leh daih tawh. A mangang tawh lutuk chu a hawi kual ruai ringawt mai a, "Thih ka la duh lo asin." tiin a mittui chu a tla zawih zawih mai.

A ding ngawi reng ringawt a, eng nge a tih ang, engtin nge chulai hmun atang chuan a tlan chhuah theih ang, engtin nge in lamah him dam takin a haw leh theih ang tih lah a hre der si lo, a mangang takzet a ni. Chutah le, a hma a hmeichhe aw bawk khan, "Helai hmun hi thang(trap) a ni, a chhuahsan theih loh, i tang kum khua tawh ang." a rawn ti leh ta mai.

Zualtei hlau lutuk chua  t(r)e chiam chiam a, a tlan ta vak ringawt mai. Mahse kawng a hmu tha thei hauh lo, chhum a zing nasa bawk si, zan a ni bawk si nen. Khawi lam ber nge a pan tih pawh hre lo chuan a hma zawnah chuan a tlan vak vak ringawt mai a, rei fe a tlan hnu chuan a ding chat mai.

Mak tak maiin kha in lian tak mai, chul rup mai awmna bawk kha a thleng leh a. Mak a ti takzet, a tlan thui ve tawh viau khan a inhre si a. "Ni lo, a ni thei lo." tiin a let zawng chuan a tlan leh ta chiam chiam mai a, rei fe hnuah chuan kha in rauhsan awmna bawk kha a thleng leh ta mai a nih chu.

Zualtei mak ti lutuk chu a ka hau ringawt a, chutah a hnunglam atang chuan motor rawn tlan ri a hre ta hlauh mai. Rang takin a hawi let a, mahse a thil hmuh chuan a ti hrilhhaiin a ti mangang zual kher mai. Kha taxi, a chuanna taxi bawk kha a lo tlan leh a. Zualtei chuan ngawi reng hian a en ngawih ngawih ringawt mai, taxi chu a hma zawn takah chuan a rawn ding a.

Driver ngai bawk, taxi chhung thim em vang leh lukhum hma thlawk a khum tlat avanga a hmel lang chiang thei lo, kha driver bawk khan tukverh atang chuan a rawn melh leh khur mai a. Thum chher chhur hian, "Khawi lamah nge?" tiin a rawn zawt leh ta mai a, Zualtei chuan sawi tur reng a hre lo, mak a ti lutuk chu ka hau hian driver chu mit khap miah lo hian a en reng ta ringawt mai a ni.

A tuk atang chuan Zualtei bo thu chu college mai ni lo, an khua thleng chuan a lar ta hat mai a. Vengchhung YMA leh tlawmngaite chuan han zawng ve chiam mahse, hmuh tur a awm hauh lo. Chuta tang chuan Zualtei chu a khuangcher bo hmak mai a, tuman an hmu leh tawh ngai ta miah lo a ni.

THE END.

****************************************

THAWNTHU PATHUMNA

NEXT CHAPTER AH.....

To be continue