SHIVER (MIZO FICTION ANTHOLOGY HORROR STORY) Written by : Aaron Malsawmdawngzuala CHAPTER - 2

 SHIVER

(MIZO FICTION ANTHOLOGY HORROR STORY)

Written by : Aaron Malsawmdawngzuala

CHAPTER - 2

**********************************************************

THAWNTHU PATHUMNA :

LAST SHIFT (SHIFT HNUHNUNG BER)

Kum nga chhung teh meuh rinawm taka security guard hna lo thawk tawh, pa fel tak leh zaidam tak mai, Rama tan pawh chu office ah chuan a night duty hnuhnun berna tur a ni ve ta. A tuk ah chuan hmun dangah a insawn ve tawh dawn a, chumi zan bak chu kum 5 chhung a lo thawh tawhna office ah chuan a duty leh tawh ngai dawn lo a ni.

Pa huaisen tak, mahni a awm nuam ti chi leh ram riah te pawh hrat ve tak mai a ni a. Hemi zan pawh hian zan danga a tih fo angin, amah chauhvin chu office ah chuan a duty leh dawn a ni. A duty pui tur Liana erawh khawsik avangin a hman thei lova, amah chauhvin duty ngai dawn mahse Rama chuan a hlau lem lo.

Zan a lo rei deuh dawn ta a, office-a la awm thenkhatte pawh chu an haw darh zo ta a. Rama pawh chu security room ah chuan thu in computer chu a khawih mual mual a, CCTV te chu a han check kual den den a. A hna chu thil har a ni hran lo, vawi hnih khat vel floor zawng zawng han check kual leh pawn lam mi lo lut tur ven kha a ni mai a.

Mahse Rama chuan boring a ti ve thin khawp mai, sana a han en a. Dar 11 leh a chanve a lo ri der tawh mai, "Last nan han check kual thuak thuak ang hmiang." tiin a phun sap a. A duty-na room atang chuan a chhuak a, floor tin chu a han check kual a. Zan dang a ang lo tlat hian a hria a, a chhan chu building chhung chu a reh hian a reh lutuk tlat.

Zan dangah pawh reh thiap thin tho mahse thli thaw ri te, rannung hram ri te a la hriat theih tal thin a. Zanin erawh a ni tlat lo, building chhungah chuan boruak a awm lo emaw tih tur khawp hian thawm engmah a awm lo, a reh dan chu reh thiap thiap tak hi a ni ringawt. Thrid floor a thlen chuan hallway chu a han check leh thuak thuak a, a ke pen ri tih loh chu thawm dang a awm meuh lo.

A han en kual zel a, chutah elevator a kal pel chiah chu thawm a hre ta tlat mai. Elevator inhawng ri a ni, a ding chat mai a. Rang takin a hawi let a, a rin ang ngeiin elevator chu amah in a lo inhawng a nih chu. A va kal hnai a, "Ehe, engtin nge amahin a inhawn theih a? Chubakah ground floor ah khan ka dah reng sia, eng nge maw awmzia le?" tiin a phun nuah nuah a.

Khawl lam that loh vangah ngaiin chuti teh vak chuan a hlau lem lo, elevator chhungah chuan a lut a. Ground floor chu hmetin elevator pawh chu a inkhar a, hnuai lamah chuan a chhuk ve mai bawk. A ngaih bel nge pawh a hre lo, elevator chhung chu a vawt riau hian a hria a.

Mak a ti kher mai, chutah elevator chu nidang aiin a kal muang tlat hian a hre bawk. Chutia a chhuk mek lai chuan mihring phun sap ri niawm tak hi a hria a, a phu deuh zuk mai. Elevator chhung chu en kual nghalin a han hawi kual vak vak a, mahse amah lo midang tumah an awm der bawk si lo.

A beng chhe ri a nih ringin a ngaih chu a ti tha lui leh hram hram a, chutah thil dang a thleng leh ta. Elevator chhung light chu a rawn phe ta zawk zawk mai a, Rama chuan nidangah pawh a awm zeuh zeuh thin avang chuan a hlau vak rih lo. Mahse a phe rei ta lutuk leh ground floor a thleng har tawh lutuk erawh chuan a ngaih a ti tha tawh lo kher mai, reilote ah chuan light chu a rawn pangngai ve leh mai a.

Rama pawh chu a thaw huai mai, "Zanin zet chu eng nge maw awmzia ni?" tiin a han phun ri leh sap a. Second 5 vel bak a la ral lo, thil mak dang a thleng leh ta. Elevator chu a rawn tawp thut a, Rama pawh chu a phu leh zuk mai. A han hmet kual chiam a, mahse elevator chuan chet a tum tawh ta eih lo mai.

Rama pawh a mangang tan deuh ta, "Tinge maw ni le?" tiin a vin deuh hlur tawh mai a. Chutah a arwn nung leh thut a, chak mangkheng hian hnuailam zawng tho chuan a chhuk ta thut mai le. A chak em avang chuan Rama chu a hlauthawng takzet, a invuan tawng tawng a. Thawm lah chu a bengchheng em em mai lehnghal, chutiang chuan second 30 dawn chu a tlang thla par par mai a.

Light te pawh chu a phe leh ta zawk zawk mai, Rama chuan han au vak a tum a. Mahse thawm a chhuah hma chuan elevator chu amah in a rawn tawp leh ta thut mai le, Rama pawh a thaw halh halh mai a, a thlan a tla buan buan tawh mai. Thil dik lo eng emaw tak chu a awm a ni tih a chiang, zan dangah hetiang thil hi ala tawng ngai lo hrim hrim.

Mak a ti in a hrilhhai takzet, a chhan pawh elevator kha chak takin a hmah a tla thla vang vang kha a ni a. Mahse a duty-na office building chu chutiang em em a chhawng sang a ni der mai si lo, ground floor nena chhiar telin chhawng 4 chiah a ni bawk si. Engtin nge khatiang em em a thui khan a chhuk theih, a mumang amaw a ti tep hial a ni.

Kawngka chu muang chang chuan amah in a rawn in hawng a, Rama chu che miah lo hian a ding reng ringawt. Mak tak mai hian elevator-in a hruai thlenna floor chu a la hmuh ngai miah loh a ni, hun rei tak luah lum tawh loh tih hriat tak hian a bang te chu a khi nasa hle mai a.

Ceiling te lah a kau tuar hlawm mai bawk a, a hmun chu a bal hle bawk. Mahse hallway ve tho chu a ni bawk si, an office hall way nen a design chu a in ang chiah chiah bawk si. Hemi erawh hi chu a chul in a hlui tawh mai chauh a ni, a rimchhe em em mai lehnghal. Rama chuan mak a ti lutuk chu ka hau hian hall way phei chu a en reng a, a chil a han lem dawk a.

Kum 5 chuang he office building ah hian security guard hna thawkin zan tam a lo duty ve tawh thin a, a mah chauh va duty pawh vawi duai lo a nei tawh. Chutiang khawp chuan he office building hi a hre chiang ve a, mahse helai hmun erawh a la hre ngai hauh lo. Elevator atang chuan muang chang chuan a chhuak a, hall way ah chuan a kal phei zel a.

A torch light keng chung chuan chu a la hriat ngai loh, floor danglam tak mai ah chuan muang chang hian a pen ri thuk thuk a. Hall way tawpah chuan step chhohna hi a lo awm a, Rama chuan hlau rilru deuh chung chuan a pan zel a. Chutia zawi muanga a kal mek lai chu a hnuglam atang hian mipa aw ni awm tak hian, "Rama, kan lo nghak reng che a nia." a rawn ti thut mai le.

Rama phu nasa lutuk chu a zuang dawr mai a, a leh hawi rang kher mai. Mahse tumah a hmu lo, hlauhna namen lo chuan a thauvah a man a. Rang lutukin elevagtor lam pan tum chuan a inher a, mahse a kal thui lo hle mai. A ding leh nghal chat a, kha elevator, a chhukna ngei mai kha a lo awm tawh hauh lo.

A bo hmak hi a ni ber mai, "Khawnge, eng tin nge a bo theih?" tiin a hawi kual hru hru ringawt a. Chutah a aia chiang hian, "Rama..." tiin aw thum tak mai chuan a ro ko leh ta. rama chu a phu leh zawk a, hallway tawp lam chu ava en a. A thil hmuh chuan a hmul thi a ti ding sung sung mai, puan dum sin niawm tak, sang em em mai leh dum vek hi hallway tawpah chuan a lo ding khur mai.

Rama hlau lutuk leh mangang lutuk chu han chet mai ngaihna pawh a hre lo. Ka hau chuan chu thla mak tak mai chu a en reng ringawt a, "Tu nge, tunge i nih?" a ti khur dar dar a. Mahse chu mi mak tak mai chuan a chhang lo, ngawi reng chuan ama lam chu a rawn pan ta chhut chhut mai a.

Rama chuan a hlau takzet, rang takin a leh hawi a. Tlan a tum a, mahse thil mak tak mai a thleng leh ta. Mumang a tlanchhiat kan tum a, kan tlan hleih theih loh ang mai chuan Rama chu a tlan thei ta tlat lo mai. A ke chu a rit em em ang mai hian a hria a, a mangang lutuk chu a thlan pawh a tla buah buah mai.

Mahse theih tawp chhuah chuan a pen lui zel a, rei fe a beih hnu chuan a tlan thei ta. Mahse a duh anga chakin a la tlan thei chuang lo, chu thil mak tak mai chuan a umzui reng ang hian a hre tlat bawk a. Hmanhmawh tak chung si, tlan chak thei chuang miah si lo chuan hma lam chu a pan ve zel a.

Mahse hall way tawp lama step chhohna lo awm chu ava thleng thei reng reng lo mai, hnai te angin lang tawh mahse a thui lutuk tlat. Rei fe a tlan hnu pawh chuan a thleng thei chuang hauh lo. A hnung lamah chuan rawn um zui an awm ni awm tak hian pen thawm chu a hre reng bawk a, au chhuah a tum lahin a ka ah hnawhtu awm ang mai hian a au chhuak thei der bawk si lo.

Thui fe a tlan hnu chuan vanneihthlak tak mai hian bang sira kawngka pakhat lo inhawng chu a hmu hlauh mai, rang lutukin a tlan lut nghal a. Kawngka chu khar nghalin a thaw hlawi hlawi mai, a hah lutuk chu a thaw a chham hman tep hial a ni. Mahse a him tihna erawh a ni hauh lo, chu a tlan luhna room chu ala hriat ngai reng reng loh a ni.

A hma zawn takah hian tu emaw hi a lo ding reng a, Rama phu nasa lutuk leh mak ti lutuk chu ka hau hian a meng phawk hru mai a. Chu a hma zawn chiah a mi chu tudang nilovin, amah tho a ni. Mahse a hmel erawh a rapawm em em a, a vun a dang var pup a. Mitmu pawh a nei lo emaw tih mai tur hian a khuar duk mai a, a vun te chu a chuar em em bawk.

Rama chu a tawng hleithei lo, a ka a ang zuau zuau ringawt a. Chu amah ang tak mai, a form hak ang chiah chiah ha ve chu thawk leh khatah a rawn nui ta huah huah mai a. Rama hlau lutuk chu a hik chhuak vek a, engmah a sawi thei lo. Chutah chu pa rapawm tak mai chuan a rawn pan a, a din chilh ta run mai.

Chiang fek fawk hian, "Rama, khawiah mah i kal dawn lo. Helai hmun hi i in a ni tawh dawn, a ni kumkhua tawh bawk ang." tiin a tawng thum chhur chhur mai a. Rama hlau lutuk chu a hmul thi a ding vek a, a thlan a tla bawrh bawrh bawk a. Ring mangkheng hian a aw rawl chhuah meuh chuan a au vak vak a, building chhung chu a khawk rum rum mai.

A tuk zing dar 8 velah chuan staff thenkhatte chu hma takah an rawn thleng a, mahse security guard room ah chuan Rama chu hmuh tur a lo awm ta hauh lo mai. A kawr lum te, a wallet te leh a bag te chu a lo la awm vek thung a. A tir chuan a kal sawn lawk a nih ringin an ngai thutak vak lo, mahse tlai ban dawn thleng a biak tlang theih loh leh chin hriat lohva a reh vang vang avang chuan police hial koh a ni ta a.

Rama chu zawn a ni nghal a, mahse ni 7 chhung an zawn hnu pawh chuan hmuh tur a awm ta hauh lo mai a, a khuangcher bo chu a ni ta der mai. Hun a lo kal zel a, kar hnih lai chu a liam ta. Zankhat chu security guard thar chu duty tura ruat a ni ve ta, zan tir vel lam chu engkim a tha vek a, engmah buaina a tawk hran lo.

Mahse zing dar 2 a rik chiah chuan chu security guard thar chu monitor rawn ri tet tet chuan a ti harh ta thut mai a, rang takin a thu chhuak a. CCTV pakhat, 3rd floor ami chuan a mit a la ta tlat mai. A han enchiang a, tu emawni hi hall way ah chuan a lo kal phei chhut chhut a. Chupa chu tudang nilovin chin hriat lohva bo ta, Rama ngei kha a lo ni reng mai.

A mit khur a thuk duk a, a vun chu a dang var pup bawk. Hallway ah chuan amah chauh chuan a vei thurh thurh a, security guard thar pawh chuan mak a tiin a hlau kher mai. Chutah monitor chu a rawn thim thut a, second 2 vel hnuah amahin a rawn eng leh nghal a, Rama chu hmuh tur a lo awm tawh lo.

THE END

************************************************************

THAWNTHU PALINA :

SILENT COMPANION (THIAN REH)

Kum 35 lai chu a ni ve tawh, mahse Hlutei hian pasal a ngaihtuah lo nge, a duh tui lutuk tawh zawk tih chu tu hriat va ni suh. Nula senior ah pawh senior tak tak kan tih ang chi kha a ni a, mahse a la nalhin a pian pawh ala dik zak zak kher mai. Mahni in Aizawlah in a luah a, a ui vuh lai german shepherd Tommy-a nen chauh chuan an khawsa dun a ni.

Local Mart dawr pakhatah a thawk a, hlawh tam lem lo mahse a dinhmunah chuan a lungawi tawk viau mai. Thian a kawm tam lem lova, mahni a awm nuam ti chi a ni pawh a ni mahna. Hna a kal dawnin a ui Tommy-a chu inah a kalh khum mai thin a, Tommy-a pawh hian a hna a tih buai phah lem lo.

Ui fing tak leh thuawih tak a ni a, api thu lo chuan mihrangin an koh emaw eitur an pek dawn pawhin a kal ngai mai mai lo a ni. Tlai khat chu Hlutei pawh a ngai te ang bawkin dawr chu a nghak leh a, a haw a hun hnai tawh bawk a. Haw tur chuan a inseng fel mek a, chutih lai chuan dawr kawngka chu a rawn inhawng ri rak mai.

Putar pakhat, kawr bal tak mai ha leh sam thur bum mai hi a rawn lut a. Han en mai chuan kutdawh te pawh a ang lek lek zawk, dawr chhung chu a enkual a, a ka deuh hau mai a. Hlutei pawh chuan a lo hmuh veleh chuan, "Eng nge i duh, ka pu?" tiin polite tak hian a lo zawt vat a.

Mahse chu putar awmdan chu a mak angreng khawp mai, Hlutei chu a chhang mai lo. A en vung vung a, a han thle sawi deuh bawi bawi a. A chet dan vel chu Hlutei chuan a lo en reng a,a a rap angreng viau mai. Muang chang hian a rawn pan phei chhut chhut a, "Ka pu, eng nge i lei duh a?" tiin Hlutei chuan a lo zawt leh a.

Putar chuan a la chhang chuang lo, uluk faran hian Hlutei chu a chhip atanga a ke ler thleng chuan a han hlir leh vang vang a. Zawi sap hian eng emaw ni chu sawiin a phun bul bul mai, Hlutei chuan a hrethiam lo takzet. Hlau rilru deuh chung si hian, "Eng maw i sawi?" tiin a lo zawt leh vat a.

Chutah leh, putar chu a nui ta huah huah mai a. Mak tih hmel tak hian Hlutei chuan a en vung vung ringawt, han tih vak ngaihna a hre lo. Putar chuan a aia chiang fahran hian Hlutei mitah tak chuan a en a, "I hmu ang, i hmu thuai ang. A lo kal thuai ang, a rei tawh lovang." tiin a rum ta chhur chhur mai le.

Hlutei hlau deuh bawk si chu a tawlh hnung hret hret a, "Ka.. ka pu, eng nge i sawi awmzia?" a ti khur dar dar a. Mahse putar chuan a chhang tawh lo, lehlam a hawi thut a. Tichuan pawnah chuan a chhuak ta daih mai, Hlutei hrilhhai lutuk chuan a thlir zui vawng vawng ringawt a.

In a thleng a, a ngai te ang bawk chuan a ui Tommy-a chuan a lo lawm nasa lehpek kher mai, a lo zuan vak vak a. Hlutei pawh chu a han intifai a, tichuan zanriah a ei zawh hnu chuan Tommy-a nen chuan sitting roomah thu dunin TV a en a. Tommy-a chu a chul hliau hliau va, "Tommy, vawiina ka putar hmuh khan mi rap tawp. Awm la chu i bauh nasa ngawt ang, a mak lutuk." tiin a be mawlh mawlh a.

Kha putar che zia kha pangngai lo viau mahse Hlutei chuan mi ang chiah lo, rilru pangngai pu pha chiah lo a nih a ring a, a ngaihtuah zui lutuk chuang lo. Chutia ngawi reng a an awm dun lai chuan Tommy-a chu a phu deuh zawk a, a beng chu a rawn inthlep nghal vek mai. Thinrim ni awm tak hian a ngur chhur chhur a, kawngka lam chu a va pan nghal.

Hlutei chuan a en zui nghal a, "Tommy, eng thil nge i hmuh a?" tiin a zawt a. Tommy-a chu kawngka zawnah chuan va dingin ahma aia ring hian a han ngur leh chhur chhur a, Hlutei chuan a hrethiam lo takzet. A va zui a, kawngka chu hawn a tum a. Chuveleh Tommy-a chuan hlau niawm tak hian api chu a bauh ta vak vak mai a, Hlutei chuan mak ti hle mahse kawngka chu hawn a tum bik lo.

Tukverh ah chuan a han dak chhuak a, pawn lam chu ava en a. Mahse tumah a hmu der chuang si lo, "Eng nge maw a bauh vak vak le, tumah an awm si lova?" tiin ama hriat tham leh chuan a phun bul bul a. Reilote hnuah chuan Tommy-a pawh chu a ngawi ve leh thei mai a, Hlutei pawh chuan han ngaihthatlohna tur vak a hre lo.

Zan dar 11 velah chuan Hlutei chu a rawn harh zawk mai, thil eng emaw tla ri chuan a ti harh a ni. A thu chhuak nghal a, a room a han en kual chu Tommy-a a lo awm hauh lo mai le. Khum atang chuan a tho chhuak a, "Tommy, Tommy khawnge i awm?" tiin a au vak vak a. Room atang chuan chhuakin sitting room lam chu ava pan a, Tommy-a chu tukverh lam hawi chuan a lo thu ran mai a.

Hlutei chuan mak a ti angreng kher mai, "Tommy, khatah eng nge i va tih a?" tiin a han bia a. Mahse Tommy-a chu a thu ngawi reng a, api biakna chu hre awm pawhin a lang lo. Muang chang chuan ava pan a, "Tommy, lo kal teh." tiin ava be leh a. Mahse Tommy-a chu ala che sawn eih lo, a thut ngai chuan ala thu reng a.

Hlutei chuan a va pan hnai zel a, mahse a va thlen dawn tep ah chuan TOmmy-a chu a ding thut a, room lamah chuan ngawi rengin a tlan lut ta daih mai a. Hlutei chuan a hrethiam lo kher mai, "Eng nge maw a en vung vung le?" ti a phun bul bul pah chuan tukverh ah chuan a han dak chhuak ve a.

Mahse tumah a hmu bawk si lo, ngaih tha chiah lo chung chuan a let leh a. Room a han lut chiah chu Tommy-a chu a lo mu fel than tawh mai, Hlutei chu a han khi suk a. Tichuan ava mu ve a, a bengah chuan kha putar thil sawi kha a la cham reng a. Mahse ngaihtuah loh lui chu a tum ngar ngar a, reilote hnuah chuan a muhil ve thei ta a ni.

Hun a kal zel a, Tommy-a awmdan chu a mak tulh tulh hian Hlutei chuan a hria a. A chang leh chaw a ei duh miah lova, thawm a awm pawhin a bauh ngai ta miah lo mai. A aw(voice) a chhuah ta ngai meuh lo, a chang leh ngawi rengin bang kil lamah chuan a thu vauh vauh zel a.

A chang leh zan lamah choka lam thim ruih te chu tu emaw hmu ang mai hian a thlir reng thin a, mahse a bauh ngai chuang eih lo. A thaw ri leh a tlan ri te, a kal ri te chu a thawm neih awmchhun a ni tawh mai. Hlutei bulah chuan a mu ngai mang tawh lova, zanlaiah te hian ngawi rengin bang lam hawi hian a lo thu ngawi reng zel a.

Hlutei ngaih chu a tha tawh mawlh lo, Tommy-a chuan eng emaw tak chu a hmu thin a ni tih a ring thiam ve tan ta. Zan khat chu bang in thairang thawm ni awm tak hi a ri ret ret a, Hlutei muhil pawh chu a rawn harh hlawl mai. A room light, dim light zawk chu a han on eng vat a.

Tommy-a chu khum mawngah chuan bang lam hawi hian a lo ding vung mai a, a hma zawnah chuan hmelma an awm ni awm tak hian beih inring thlap ang mai hian a beng chu a lo inthlep vek a, a hmul te chu a ding sung hlawm mai. Hlutei chu khum atang chuan a chhuk a, bang chu a han en ve a.

Mahse engmah a awm der mai si lo, Tommy-a chu a zu en ve leh a. "Tommy, nga ti nge a?" tiin a bia a, mahse Tommy-a chuan thawm engmah chu a chhuah chuang lo. A mit a khap miah lova, che miah lo hian a ding reng ringawt. Bang chu Hlutei chuan a han en chiang leh a, chutah tin hriam tak maiin emaw, chemte leh thil hriam a thai ran ang mai hian a lo rang nasa hlawm mai.

Hlutei chuan mak a ti em em a, a thin a phu nghal dup dup mai. A hma zawngin a awm ngai bawk si lo, a thawm hriat lah kha bang thai ri a ni tih a hrechhuak leh a. A thlan a tla nghal zawih zawih mai, "Tommy, hei hi i thairan em ni?" tiin a ui chu a han be leh a. Mahse Tommy-a chu a la che chuang lo reng reng, Hlutei pawh chuan va biak zui chu a ngam chiah bik lo.

Room atang chuan a chhuak a, choka ah chuan va pheiin chemte a la a. Tichuan roomah a va lut leh a, Tommy-a chu pangngai deuh chuan khum mawngah chuan lo thu in a lo inliak hlep hlep mai. Chutia pangngai taka a lo awm leh mai chu mak a ti em em a, bang chu ava en leh a, thairanna zawng zawng te chu a lo la awm vek tho va.

Hlutei chuan mut leh mai chu a han tum a, mahse harsa a ti takzet. A awmna in chu a hrang ni in a hre tawh, a ui Tommy-a awm dan lah a mak sawt em em mai bawk si nen. Chemte chu humin khumah chuan a thu khur hlak hlak a, a mut lah chu a chhuak thei reng reng lo mai.

Darkar 3 dawn chutia mu thei miah lova a thut reng hnu chuan zawi zawiin ni a rawn chhuak a, a thla pawh a muang ve deuh ta. Chemte chu a khum sira dawhkanah chuan a dah a, a mut pawh a chhuak ve ta hle mai. Tommy-a pawh a hnar suk suk mai a, Hlutei pawh chu rei lo te ah chuan a muhil ve thei ta.

Mahse darkar tam a mu hman lo, hna thawk tur a kal leh nghal a ngai tlat. Chumi ni chuan Hlutei chuan dawr a khar tlai deuh va, a haw meuh chuan khua a thim chu a ni der tawh mai. Inchhungah a han lut a, a lo thim ruih mai. Light a han on eng a, Tommy-a chu a lo awm hauh lo mai.

A thawm a hriat hlek tawh chuan a lo lawm nghal chung chung thin kha a ni si a, mahse Tommy-a chu han zawng kual nasa viau mahse a hmu zo ta hauh lo mai le. "Tommy, tommy khawnge i awm?" tiin a au vak vak a, mahse inchhung chu a reh hian a reh diak mai bawk si. Chutia a zawn buai lai chuan living room lam ah chuan ui ngur chhur chhur ri niawm tak chu a hria a.

A va kal phei nghal vat a, Tommy-a chu a lo awm ngei mai. Mahse Hlutei chuan lawm a hnekin a rap angreng kher mai, Tommy-a chu nidanga a lan dan ang a ni tawh tlat lo. A hmul chu a hma ai zawngin a tam amaw tih mai tur hian a ding sung mai a, a dum deuh thul bawk. A mit chu a sen vek bawk a, api chu a lo melh khur mai.

Hlutei chuan zawi te hian, "Tommy, eng nge awmzia?" tiin a han phun sap a. Muang chang chuan ava pan phei a, mahse Tommy-a chuan a aia ring hian a lo ngur leh ta chhur chhur mai. A ha te chu a hma aiin a sei emaw tih mai tur hian a lawr vung mai a, a la sei em em mai lehnghal.

Chutah light chu a rawn phe ta zawk zawk mai a, inchhung boruak chu a rawn vawt deuh ruih mai. Hlutei mak ti lutuk chu a hawi kual ruai ruai ringawt mai a, thawk leh khatah kawngka chu amah in a rawn inkhar ri dup mai. Hlutei chu a phu nasa em em a, light phe zawk zawk chu a tawp nghal.

Mahse a eng tha lo takzet, a dim hian a dim ruih mai a. Hlutei chuan kawngka lam chu ava en a, "Tunge, awm in awm em ni?" tiin a han vin deuh thak a. Tommy-a ngur chhur chhur pawh chu a reh nghal hmak bawk, Hlutei chu a han hawi let leh a. Mahse a thil hmuh chu Tommy-a a ni tawh hauh lo, eng sakawlh nge tih pawh hriat lo, ui ang pian nei tho si, lian em em mai leh tihbaiawm em em mai chu ahma zawnah chuan a lo ding khur mai a nih chu.

Hlutei hlau lutuk chu a meng phawk nasa kher mai, chu sakawlh lah chuan a la rawn pan phei chhur chhur zui a. Hlutei chu ring tak hian a au chiam chiam a, kawngka lam pan chuan a tlan chhe nghal a. Mahse kawngka chu pawn lam atanga inkalh ang mai hian a hawng thei ta reng reng lo mai, chu sakawlh lah chuan a rawn pan phei zel mai si.

Hlutei chu a room lama luh tum chuan a tlan phei a, mahse sakawlh chu a rawn zuang vak a. A hma zawn takah chuan a awm a, Hlutei tan tlan chhuah ngaihna a awm ta lo. A bula thutthleng chu a la lawk a, a va vawm ta ringawt mai. Mahse sakawlh chuan eng atan vak a ngai lo, Hlutei chu choka lamah chuan ava tlan phei leh a.

Dawhkan hnuaiah chuan a biru thei hlauh mai, sakawlh chuan a rawn umzui zel a. Mahse dawhkan hnuaia a bihruk avang chuan sakawlh chuan a hmu mai lova, choka ah chuan a vei kual a, a hnim kual den den a. Tap chung hian Hlutei chuan, "Nilo, Tommy khawngaihin duhtawk rawh." tiin zawi te chuan a phun sap a.

Mahse Tommy-a, a ui hmangaih em em mai kha a ni tawh der mai si lo. Sakawlh chu choka atang chuan a chhuak a, Hlutei erawh a la che mai ngam lo. Minute 2 dawn vel chu a la biru ngar ngar a, mahse thawm a reh tak diak avang chuan fimkhur tak chuan a han vak chhuak a, choka ah chuan tumah an lo awm lo.

Sitting room lam chu bang phena bihruk pah chuan ava en dek dek a, mahse tumah a hmu lo. Living room lam te chu biru chung leh thawm nei lo thei ang ber chuan a han check leh a, mahse tumah a la hmu chuang lo. Inchhung chu a reh diak mai a, Hlutei chuan thin phu dep dep hian sitting room lam chu a va pan a.

Vanneih thlak takin tukverh pakhat lo inhawng chu a hmu hlauh mai le, rang takin ava pan a. Tukverh atanga a chhuak tur chiah chu a hnung lam atang chuan kha sakawlh bawk khan a rawn zuan ta thut mai le. Hlutei banah chuan a seh a, a hnuk ta chiam mai a. Hlutei chuan ring tak hian, "Min pui ru... khawngaihin min pui ru." tiin a au chiam chiam a.

Mahse sakawlh chuan nasa takin a sawisa a, a seh hliam nasa ngang mai. Thisen chu hmun tinah chuan a per chuai chuai mai a, bungrua te chu a let rem rum mai. Hlutei pawh chuan thisen a hloh hnem bawk a, au tur pawhin a chau tawh takzet. Thi hnuang chuan chhuatah chuan a let reng a, sakawlh lah chuan la duh tawk lo cheuvin a hrawkah tak chuan a seh a, bang kil thim lamah chuan a hnuk phei ta daih mai a.

Darkar hnih hnu velah chuan thenawmten Hlutei in atanga thawm nasa tak a chhuah avanga an phone call dawn chu bawh zuiin police pahnih hian Hlutei inchhung chu an enfiah mek a. Inchhung chu a hnawk rem rum kher mai, bangah te chuan thai ranna ni awm tak hi a lo la awm reng bawk a.

Mahse Hlutei leh Rommy-a erawh hmuh tur an awm hauh lo thung, inchhung chu a rimchhe em em bawk a. Thisen per nei nuai te erawh a lo reh vek tawh thung a, Hlutei phone pawh hmuh a ni chuang lo. Chumi zan atang chuan Hlutei leh Tommy-a te chu hmuh tur an awm ta miah lo mai a, an bo hlen ta chu a ni der mai.

THE END

************************************************

THAWNTHU PANGANA :

NEXT CHAPTER AH

'

To be continue