MERSA (A Mizo Dystopian Future Science Fiction Post-Apocalyptic Horror Story) Written by : Aaron Malsawmdawngzuala CHAPTER : 4

 MERSA

(A Mizo Dystopian Future Science Fiction Post-Apocalyptic Horror Story)

Written by : Aaron Malsawmdawngzuala

CHAPTER : 4

*****************************************

Sangsangi, Emily leh Fela te chu ward ruak pakhatah chuan hlauhthawn hmel tak hian an thu ho va, "A mak ka ti tawp thei lo, khang ho kha eng nge an nih?" tiin Fela chu a phun nuah nuah a. Sangsangi chuan a thlan chu hruk fai mawlh mawlh pah chuan, "Damlo an rawn hruai kha, tukin zinga mi khan virus eng emaw chu a rawn pu lut chiang a ni." tiin a lo chhang a.

Emily leh Fela chu an inen a, "Hannah-i chu a ni ngei ang." Emily chuan a han ti zawi sap a. Sangsangi chuan hriatthiam loh hmel tak hian, "Tunge chu chu?" a lo ti hu mai. "Tukin zinga damlo an rawn dah luh kha, a dar a hliam nei kha... kan class a mi Hannah-i a nia." tiin Fela chuan a lo hrilhfiah vat a.

Sangsangi chuan a lu a lo bu nghauh nghauh va, "A nih chiah chu...anih.. nangni pahnih pawh hi Science department lam in ni tihna em ni?" tiin a han zawt leh a. "Kei chu Arts lam ka nia." Emily chuan a lo ti vat a.Sangsangi chuan a han en leh hu a, "Anih chuan in building te chu khi lam dah a ni awm sia, engtin nge helai daih daih i rawn thlen theih a?" tiin a han zawt leh a.

Emily chuan a chhang lo, a tho kang a. Tukverh ah te chuan a han dak chhuak a, "Helai hmunah hian kan awm reng thei lo, tanpuitu kan hmuh vat angai." tiin Sangsangi chu a va pan a, ani pawh chu Fela nen chuan an rawn ding chhuak ve a. SAngsangi chuan inthlahrung tak hian, "Reception dawhkan ah ka dah daih a... hri kai kha an rawn pung thut bawk nen, ka va la ngam tawh bik lo a ni." tiin a chhang a.

FEla chuan tukverh lam chu va hawiin a phu zuk a, ava tlan vat a. Tukverh ah chuan a dak chhuak a, main door lam pana Elena-i, Faka, Joseph-a, William-aleh Zonuna rawn phei chu a hmu ta. A hlauthawng kher mai, "Khai aw... nilo, sawmite saw rawn kal an tum chiang mai." tiin a mangang nghal hle mai a.

Sangsangi leh Emily te pawh chuan an rawn hmu ve bawk a, "Tute nge an nih i hria em? Khawi department nge an nih?" tiin Emily chuan a lo zawt vat a. Fela chuan hlauthawn hmel tak hian, "Faka te an nih saw... Joseph-a pawh a rawn te. Hannah-i chungchang rawn ngaihven an tum a ni ngei ang, inchhungah hri kai an tam ropui sia..." tiin a lo chhang a.

Ring tak hian, "Thiante u... lo kal suh u, khawngaihin lo kal suh u." tiin Emily chuan a au vak vak a. Fela pawh chuan rawn zawm ve nghalin, "Faka... Elena, lo kal suh u.. inchhung kha a hlauhawm ania." tiin a au ve bawk a. Mahse Joseph-a te chuan an hre pha der mai si lo, building sir lam, hla ve deuh tak a nih avang chuan hmuh pawh an hmu lo hrim hrim a ni.

Faka te lah chu an rawn titi phei luam a, "Khawnge maw FEla hi a awm daih le awww? Chaw pawh a ei lova, David-a lah chuti bawk." Joseph-a chuan a han ti nuah nuah a. "Hannah-i chu a harh tawh em ang chu maw, a thuhrimin ava reh thuap thuap ve mawle.." Elena-i chuan a lo ti ve bawk a.

William-a leh Zonuna te thiandun chu an lo infiam a, William-a chuan Zonuna tukhum ah chuan hnunglam atang chuan a han beng pawp a, a tlanchhe zui nghal. Zonuna chuan a tukhum chu a tuai vut vut a, "Hmela le... ana lutuk." tih pah chuan a um ve nghal a. "Hey, infiam chintawk hre teh u. HEalth Centre a nih kha, an lo hau che u a nge aww..." tiin Joseph-a chuan a lo hau va.

William-a chu inchhungah chuan a tlan lut a, mahse a tlan rei lo kher mai. A ding nghal chat a, a hma zawnah chuan hri kai zirlai leh nurse tamtak chu an lo ding thup mai a. Williama thawm an hriat ve leh chuan an rawn hawi nghal thap mai, Zonuna pawh chu a rawn lut ve nghal a.

"Mawla, a na lutuk aww.." tih pah chuan William-a chu a hnunglam atang chuan a rawn nam pawp a. William-a chu a thil hmuh avang chuan a lo ding nghet chiah lo nen, a hma zawng chuan a tlu bawk thlawp mai a. Zonuna chuan hri kai ho chu ava hmu ve a, anni lah chu a rawn tlan phei nghal buan buan a.

William-a tlu mek chu a tho hman tawh lo, "Nilo... ka duh lo, kal bo rawh u."  tiin a rak vak vak a, mahse hri kai ho chuan an bawrh sup sup a, an seh rawn ta luai luai mai. Thisen a chik zawr zawr a, Williama chuan na a ti takzet. Elena-i, Joseph-a leh Faka pawh chu an rawn lut ve a.

Hri kai hovin William-a an seh rawn luai luai chu an rawn hmu ve a, Elena-i hrilhhai leh hlau lutuk chu a meng phar awn awn mai a. Joseph-a leh Faka chuan Zonuna chu an va pan a, "Eng nge thil awmzia hi?" tiin Joseph-a chuan a zawt a, mahse Zonuna chuan a chhang thei mai lo.

Chutah hrikai ho chuan an lam an rawn hawi leh a, an rawn pan ve leh ta. Chuveleh Faka chuan Zonuna chu a pawt a, "Tlan ang." tih leh tlan a rual nghal a. Joseph-a pawh chuan Elena-i kutah chuan vuanin pawnlamah chuan an tlanchhuak nghal a, "Kawngkhar, kawngkhar kha kalh rawh u." tiin Elena-i chu a au vak vak a.

An khar chiah tih ah chuan hrikai ho chuan an rawn su hman hram a, an rawn su hawng teuh em em mai lehnghal. Faka, Joseph-a leh Zonuna chuan theih tawp chhuahin an lo dang hram hram a. PAwn lam atanga kawngka kalhna hi herh thlak zeuh a ngai a, darthlalang dum atanga siam a ni kan tih tawh kha.

Mahse herh mai tur pawn hri kai ho chuan an rawn nek nasa tawh lutuk tlat, Zonuna chuan a herh hleithei lo. REi deuh fe an innawr ngat ngat hnuah chuan an kalh thei ta hram a, mahse hri kai zinga pakhat chuan Zonuna kut chu a seh hman hlauh mai. Midang erawh chuan an hmu lo va, kawngka an kalh fel hnu chuan an vai chuan an tawlh hnung nghal a.

Ward chhung atang chuan thawm chu FEla te chuan an lo hre ve vek a, an mangang kher mai. FEla chuan dawhkan pakhata surgical knife chu la in kawngka lam chu a pan ta mai a, mahse Sangsangi chuan a lo dang vat a, "I mawl a mi? Khawnge kal i tum?" tiin a vin hrep a. "Ka thianten buaina an tawk, ka puih a ngai alawm." tiin kal a tum leh a.

Mahse Emily pawh chuan dang ve in, "Chhan thei dinhmunah i ding lo, i va chhuak anih chuan khang hri kaite khan an lo seh ve ngei ngei dawn che. Anmahni ang bawkin i awm ve ang, chu chu i duh ami?" tiin a lo hau ve bawka. Fela chu a tap tep mai, "Mai mai chuan le...engtin nge kan tih tak ang?" tiin a lu a dawm vawng vawng a.

*********************************************************

"Engtin nge kan tih ang? Ka pu, engtin nge kan tih ang?" tiin Rintea chu a mangang kher mai. Pu Saia chuan security guard, DAwnga chu a han en vang vang a. "Gate bulah hian nangmah chauhvin em ni i duty a?" tiin a zawt a. "Nilove, ka pu. KA thianpa kha eitur lamin a chhuak lawk a, midang zawng chu zirlai pakhat, Ruata buaipui khan an kal ve bawk a, an lo la let lo." tiin DAWnga chuan a chhang a.

Pu Saia chuan hlauhthawn hmel tak hian, “Anih chuan i thianpa chu phone rawh, gate bulah hrikai tam tak an awm tih hi hrilh rawh...a lo let leh hma hian.” a ti vin deuh hlur a. Dawnga chuan a phone chu a phawrh a, a thianpa chu a call ta a. Loud speaker ah chuan a dah a, a thianpa pawh chuan a rawn la ve mai bawk a.

Mahse thawm chu a ri nasa em em a, “HEllo....Mapui, ka tawng i hre thei em?” Dawnga chuan a han ti vak vak a, “Hello ka rawn let mek a, bike ka khalh laklawh lutuk. I tawng engmah ka hre thei lo, Dawnga.” tiin Mapuia chuan a rawn chhang ta tlat mai. DAwnga chu a mangang takzet, “Mapui, lo let suh...gate bulah khan..” a sawi zo hman lo.

“Ka rawn thleng tep, ka dah mai aww... i tawng engmah ka hre thei bawk si lo.” tiin phone chu a dah ta daih mai. Pu Saia chuan a lu a dawm vawng vawng a, “A va buaithlak tak, call leh teh.. vatin.” tiin a han vin leh khur khur a. Mahse a call dawn chiah tih ah chuan, “Saw... saw saw a ni em?” tiin gate pawn lama bike rawn tlan phei mek chu Rintea chuan a kawk a.

Dawnga chuan a han en chiang a, “Aw a nih saw... a nih ngei saw.” tiin a thin a phu nghal dup dup mai. Pu Saia chu ava kal hnai a, mahse hrikai ho chuan an rawn ban nasa em avang chuan a kal hnai ngam chiah bik silo. Ring tak hian, “Mapui, let leh vat rawh... lo kal hnai suh.” tiin a au vak vak a.

DAwnga leh Rintea pawh chuan an rawn zawm ve nghal bawk a, mahse Mapuia erawh a rawn thleng hnai telh telh mai si. Bike chu a ti ding a, a hma zawna task force hrikai tamtak, gate lo bawr thap mai a hmuh chuan mak a ti ngei mai. VA kal hnaih pah chuan, “Eng nge thleng a? Pu te u, eng nge thil awmzia?” tiin a va pan zel a.

Chuveleh hri kai ho chuan a thawm chu an hria a, an rawn hawi ta thap mai le. An hmel a hmu chiah chu mak a ti kher mai, a hrilhhai takzet bawk. Hri kai ho chu an rawn tlan phei a, gate chhunglama a thianpa DAwnga leh, Pu Saia te chu ava hmu bawk. An ni chuan tlanchhe turin an lo hrilh lawm lawm a, mahse Mapuia chuan a thil tawn mek chu a hrethiam lo takzet.

A tawlhhnung hret hret a, mahse a tlanchhe hman lo. Hrikai ho chuan an rawn bawhthlu nghal rawp rawp a, thisen chik zawr zawr khawp chuan an seh rawn ta hrep mai le. “Nilo, Mapui...Mapui..” ti a au vak vak chung chuan Dawnga chuan gate chu hawn a tum a. Mahse Pu Saia chuan lo dangin, “Kan tlai tawh...Tlangval, kan tlai tawh..” tiin a man bet a, DAwnga chu a tap pur mai.

Pu Saia bawk chuan Rintea chu a va melh a, “I phone i pai em?” tiin a zawt a. Rintea chuan a lu a lo bu nghat a, “Police call la, kan chanchin hi hrilh vat ang che.” tiin Dawnga lam chu a hawi leh a, “Nangin student dangte zu hrilh la.... tumah an room chhuahsan lo turin zu hrilh rawh.” tiin a chah leh a.

Mahse Rintea chuan eng emaw a hrechhuak zawk mai, “Pu Sai... thil hriat chhuah ka nei.” a rawn ti deuh thut a. Dawnga leh Pu Saia chuan an en hu mai, “Ruata an tih kha, an rawn zawn phei khan...zirlai ve tho hmeichhe pakhat a seh an ti ania.” a rawn ti ta mai a. An ngawi thap mai, “Anih chuan... khawi department ber nge an nih ang le, an lo inseh pung teuh tawh hi a ni ange.” tiin Dawnga chu a meng phawk hru mai.

Pu Saia chu a han ngawi vang vang a, “Chu hmeichhia chu.... a hliam vel an buaipui ngei ang, khawiah nge an buaipui thin?” tiin DAwnga chu a zawt a. Ani chuan, “Health Centre ah, abak khawiah mah an hruai lovang.” tiin a lo chhang a. Pu Saia chuan a aw a ha thian kharh kharh a, “Police chu kan phone tho anga, mahse HEalth Centre ah chuan kan zu kal ve ngei a ngai ang.” a han ti a.

Hlauh hmel tak hian Rintea chuan, “Mahse Pu Sai, hri kai an lo tam tawh viang ange, kan pathum chauh chuan kan hneh lovang.” a lo ti khur dar dar mai. Vin lek lek hian Pu Saia chuan, “Anih heta awm reng hi a him dawn bikin i hria em ni? Hrikai an awm a nih chuan helam hi an rawn pan dawn tho, kan thi dawn tho tho. Police chu lo call la, lo nghak ang che.” a han ti deuh hrep a.

DAWnga chu a en leh a, “Tunge i hming?” tiin a zawt a. “DAwnga ka nia, ka pu.” tiin a lo chhang a. Chiang fek fawk hian Pu Saia chuan, “DAwnga, min ngaithla teh. KAn pahnihin kan zuk chhuk ang, HEalth Centre ah chuan... chumi pah chuan security dangte i ko khawm bawk anga, Rintea chu hetah hian police lo nghak rawh se.” tiin a han hrilh a.

DAwnga chuan a lu a lo bu nghat nghat a, tichuan security duty-na room ah chuan a han lut a, tiang pahnih hi a rawn lak belh a. Pakhat chu Pu Saia a pe a, pakhat chu Rintea a pe a. “Rinte, lo kalsawn miah suh aw, police te chu lo nghak la... kan dinhmun chiang takin sawi bawk ang che...securty duty room ah hian awm la, lo inkalh hnan tlat ang che.” tiin a chah ve bawk a.

*********************************************************

Health CEntre kawngka zawnah chuan Faka, Elena-i, Zonuna leh Joseph-a te chu an la ding reng a. Hri kai ho lah chuan glass door chu an rawn nawr vak vak hlawm bawk a, “Eng... engthil nge, engthil nge an nih a?” tiin Zonuna chu a tawng tha hleithei lo. Joseph-a chuan chiang deuh tak hian a han en chiang hlawm a, “Ruata, Ruata awm ang chiah khan an awm a ni.” a rawn ti a.

Chuveleh Faka chuan a thiante chu a en kual hru hlawm a, “A awmzia chu... Ruata khan Hannah-i kha a seh a, tichuan Hannah-i khan midang a seh ve leh a. Tichuan an pung ta zel tihna a niang maw?” a han ti thum bul bul a. Elena-i chuan hlauhthawn hmel tak hian, “Zom.. zombie an ni tihna a ni mai em?” a rawn ti tham tiak a.

Joseph-a chu a han thaw hak a, “A ni ber ang chu... an inseh chhawng zel a nih hmel.” a rawn ti chuai raih mai. Zonuna chuan a mittui chu a hru hul a, “A nih chuan Wiliam-a kha, anmahni angah a chang ve dawn tihna a nia. Ka mumang ni zawk se aww... engtin nge hetiang hi a takah a thlen theih?” tiin a lu a dawm vawng vawng mai.

Faka chuan a phone a phawrh a, “Police kan call vat angai, anih loh chuan keini pawh kan thi ve ngei ngei ang, anmahni ang bawk hian kan awm ve dawn.” tiin a dial nghal a. Mahse Joseph-a chuan a lo dang a, “Ngawi lawk teh, engtin nge i va sawi vak anga? Kan campus ah zombie an pung nasa lutuk, min rawn chhan rawh u i ti dawn mi? An awih che i ring ami?” tiin a lo zawt daih mai.

Faka chu a chek hlur a, “Engtin nge kan tih chuan ang nga?” a han ti bui bui a. Joseph-a chu a han ngawi vang vang a, “Hmun him kan pan phawt angai, midangte pawh kan warning a ngai, an vaiin. Kan building lama kan chhuk pahin midang hrilh kual hlawm ila, Elena.. nangin kan HOD lo phone ang che.” a han ti a.

MAhse an kal tur chiah chu darthlalang keh tur ni awm tak a ri tek tek hi an hria a, an hnunglam an va hawi chu Health Centre main door chu a lo khi thet thet mai. Hri kai ho chuan an rawn nawr na tawh lutuk tlat, an pathum chuan an tawlh hnung hret hret a. Chutah le, glass dawr chu a rawn keh ta chuai mai a.

Hri kai ho chu an rawn inbawh chhuak rum rum mai, an thawm pawh a ring narawh e. An lam chu panin an rawn tlan nghal sup sup a, Faka, Joseph-a, Elena-i leh Zonuna te chu an tlanchhe nghal a. Hri kai ho chuan an um ve nghal bawk, thui pawh an kal lo. Emily-i te subject, Arts building lam pan chuan an tlan phei ta ringawt a.

KAWtah chuan mi thenkhat, mi panga vel chu an lo thukhawm a, an lo titi nasa mai. Mahse Joseph-a te thian ho pali rawn tlan mek an hmuh chuan mak tiin an ding thup a, “Lut rawh u, inchhungah lut rawh u.” tiin Faka chu a rawn au phei vak vak a. Chumite chu an hrilhhai kher mai, “Tute nge maw ni dawn le?” an zinga pakhat chuan a han ti nuah nuah a.

Chutah an hnung lama hrikai ho, 30 vel zel rawn tlan chu an hmu ve ta. Mahse chet mai ngaihna an la hre lo, an rawn hnai tawlh tawlh mai bawk si. Joseph-a te chu an rawn thleng a, “Inchhungah lut rawh u, sawmite saw an hlauhawm ania.” tiin Joseph-a chuan a pawt rawk rawk hlawm a.

Anni lah chuan an hrethiam lo lutuk chu an lo en hu ringawt mai, hrikai ho an rawn tlan hnaih tawh em avang chuan an luhsan a. Main door chu khar tum mahse a lo  la indo tlat zui a, phelh dawn chuan hun a duh rei ve deuh hret bawk si. Hri kai ho pawh chu an rawn thleng ve ta, chung mi panga, pawna lo awm te chu an rawn bei nghal a.

An seh nghal bawrh bawrh mai, na tiin an rak tuar tuar hlawm a. Joseph-a leh Faka chuan main door chu khar an lo tum mek a, mahse zirlai dang pahnih an lo chhuak leh a. Inla pa tak hian pakhat zawk chuan, “Eng nge ni nuai nuai a, buaina a awm em ni?” a rawn ti vel pung pung a.

Mahse a sawi zawh rual rual chuan a ngawi nghal hmak mai, hri kai thenkhat chuan an rawn bei nghal a. Elena-i chuan Joseph-a chu a pawt a, “Hun a awm lo, lut vat ang.” tiin a kai dawr dawr a, Zonuna leh Faka te chuan an zui ve nghal bawkin inchhungah chuan an lut ve nghal bawk.

Hri kai dangte pawh chu an rawn lut ve zel a,  Arts hostel students 100 chuang lai mai chu an chaw eikham zo chiah a lo ni bawk nen, an lo vei deuh suau suau a. Hri kai ho chuan an luhchilh a, an seh ta chiam chiam hlawm mai. A then an tlanchhia a, a then an t(r)e tuar tuar bawk a.

An ri nuai nuai hi a ni ber mai, an seh zawh apiangte chu second 10 pawh tling lovah an rawn chang ve nghal zel tawh mai si a. Theih tawp chhuah chuan hmun him lam zawngin Faka te thian pali pawh chu an tlanchhe zel a, hri kai ho chu a theih dan danin mipa pathumte chuan an lo beilet ve bawk.

Chutah Elena-i chuan kawngka pakhat inkalh lo leh a chhung ruak chu a hmu hlauh mai a, “HE room hi a ruak, lo lut ru.” tiin a lut nghal a, mipa pathumte chuan an zui lut ve nghal bawk. Chhunglam atang chuan an inkalh hnan thei ta hram a, an thaw huai hlawm mai. Building chhhung chu a ri nuai nuai a, hri kai ho chu an pung hnem tial tial a.

***********************************************

Health Centre lama room pakhatah chaun Fela, Sangsangi leh Emlily te chu an la awm reng a. Thawm chu a reh deuh duak tawh avang chuan mak an ti angreng hle a, “Eng nge darthlalang keh chuai kha le? Pawn lama an tlan thla kha chu tukverh atang kha chuan ka hmu ngei mai a, an chhuak kim tawh ang ngem aw?” Fela chuan a han ti nuah nuah a.

“Main door kha an bawh keh a niang, helai atanga building hnai leh ber chu Arts ania, kan building ala ni zui.” Emily chuan a lo ti zawi sap mai. Sangsangi chu a thaw deuh hak a, “An vaiin hri kai zawng zawng kha an chhuak vek tawh angem le? Heta awm reng dawn chuan a dik dawn lo, puitu kan zawn vat angai.” a lo ti ve bawk a.

Fela chu a han hawi kual a, drip khaina stand bawk chu a han la leh a. Nghet tak hian a hum a, “Ka va enchhin ang, an lo la awm teuh chuan ka rawn let leh nghal ang. Kawngka hi min lo hawn vat dawnnia, min lo kalh hnan reng reng suh ang che u.” a ti a. “Ka lo kal ve dawn.” Emily chuan a lo ti vat a.

Mahse Fela chuan a lu lo thingin, “Aih, ka va en chiang ringawt dawn lawm. A him a nih chuan ka rawn ko chhuak zawk ang che u, tikhan lo awm rawh u.” tiin kawngka chu zawi te chuan a hawng a, a han dak de de a. A lo reh diak mai, tumah an awm lo ni awm tak a ni. A han pen chhuak a, main door lo keh vek chu a va hmu a.

A han hawi kual leh deuh va, mahse tumah a hmu tawh lo. SAngsangi leh Emily te chu a ko chhuak a, “TUmah an awm tawh lo, lo chhuak ru.” tiin a hrilh a. Anni pahnih pawh chu an rawn chhuak a, “Ka phone kha..” tih pah chuan Sangsangi chu reception desk lam pan chuan ava phei a.

Hmanhmawh taka a kal phei hlawk hlawk chu bang kil thim lai atang chuan tu emawni hian a rawn zuan thut mai, hri kai pakhat a lo la awm a ni. Hri kai chuan seh tumin a bei ngar ngar a, mahse theih tawp chhuah chuan Sangsangi chu a lo indang ve tang tang a. Rang takin Fela chu ava phei a, hri kai pa chu a bekah a va tlawh pawp mai.

Chu pa pawh chu a thal tawp a, Sangsangi chu Emily chuan a rawn kai tho nghal a. Mahse hri kai pa chu a rawn ding chhuak leh a, FEla’n a hmel a han hmu chiang chu a meng phawk nasa ngei mai. “Will.. William?” tiin a phun sup a, chu hri kai chu an class-a mi William-a ngei kha a lo ni.

A rawn tlan phei leh a, FEla chu a rawn bei ve ta thung a. Fela chuan drip khaina stand hmang chuan lo vuak a tum a, mahse a rih deuh avang leh a sei em avang chuan a duh angin a lek kang thei tlat lo. William-a lah a rawn che rang tawh si nen, an inbawh tlu rum rum mai a. Stand hmang chuan Fela chuan a lo nam let a, William-a lah chuan seh tumin a bei ngar ngar a.

Emily leh Sangsangi chuan William-a chu hnunglam atang chuan an lo pawt ve tang tang a, mahse an pawt hneh zo lo kher mai. Rum nghur nghur pah chaun William-a chuan SAngsangi zawk chu a han vai leng dawr a, bang a deng dawt mai. Emily chu a hrawkah rekin bangah a nam bet a.

Seh a tum ve leh ta mai a, mahse a tukhumah chuan tu emaw ni hian a rawn hlap pawp a. William-a chu a let tawp mai, a vawtupa chu Emily chuan a han en a, main gate security guard Dawnga kha a lo ni. Fela pawh chu a rawn tho va, Sangsangi chhuatlaia let mek chu ava buaipui nghal a.

William-a chu a rawn tho leh a, DAwnga chu a rawn bei lehnghal. MAhse DAwnga chuan a lo hlap pawp mai a, a vir nawk mai. Mahse a tlukna bul lawkah chuan Emily chu a lo ding hnai em em mai a, Williama chuan a bawh tlu leh ta nghal a. Seh a tum leh ta, au vak vak chung chuan Emily chu a indang hram hram a.

Chutah William-a lu ah chuan tu emaw hian tiang chang fek fawk hian a rawn hlap ri leh chawrh mai, William-a chu a dak awrh a, chhuatah chuan a thal tawp mai. A vawtu chu Pu Saia kha a lo ni, William-a rawn thawh leh hma chuan Pu Saia chuan a hlap nawn siah siah mai a, a thluak a per sawk sawk thei hial.

Pu Saia chuan chawl lo chuan a la vaw zel a, Williama chu a thi der tawh a, a thluak a virus pawhin hna a thawk tawh lo. Fela chuan Pu Saia chu ava dang a, “A tawk, ka pu... a tawk e.” a va ti a. Pu Saia pawh chuan a duhtawk ve thei ta hram a, “In tha em?” tiin a lo zawt a. Sangsangi chuan recpetion desk lam ava pan a, a phone chu a la nghal a, mahse a lo keh vek a, a on theih tawh reng reng lo mai.

*******************************************************

Class room ruak pakhatah chuan Joseph-a, Elena-i, Faka leh Zonuna te pawh chu an la tang reng a. Chhuah ngam chi zia zang a ni lo, corridor leh step ah te chuan hri kai hlir an awm. Mihring seh tur zawng chuan an rum nghut nghut hlawm a, “HOD chuan engtin nge a tih?” tiin Joseph-a chuan Elena-i chu a zawt a.

A phone hum ran chung chuan, “Lo chhuak suh u, tikhan lo awm ula... tanpuitu lo thlen hun in nghak dawn nia a tia...phone a dah daih.” tiin Elena-i chuan a lo chhang a. Faka chuan a lu chu a han tuai vut vut a, “Police chu call mai ang u, eng tin emaw kan sawi danglam deuh anga, zombie ti kher lovin misual pawh kan ti mai anga..” a han ti nuah nuah a.

Joseph-a chuan a lo melh no lo kher mai, “HOD hnen atang pawn kan hriat zawh chiah kha, thil awmzia an hre ve tawh tih a chian em chu. Tanpuitu an lo kal dawn an tia, chumi hma chu hetah hian kan lo nghak mai tur a ni.” a han ti deuh hmak hmak a. Faka chu a han chek hlur a, “An tam tulh tulh anga, keini chauh hi he building chhunga dam awmchhun kan nih phei chuan kawngka hi an rawn tichhe har dawn lo. Eng nge i ngaihdan, Zonun?” tiin Zonuna lam chu ava hawi a.

Midang pawh chuan an va melh ve thap a, mahse Zonuna chu anmahni hnungchhawn zawng hian thutthlengah chuan a thu tlat a, a la kun ngul zui. Faka chuan mak a ti deuh va, “Zonun, i tha em?” tiin a va zawt leh a. Chutah Zonuna chu a rawn hawi a, a hnar a lo thi phung mai. Faka chu ava kal hnai leh a, “Zonun, tinge i hnar kha? Engtik khan nge hliam i tawrh a?” tiin a zawt leh a.

Chutah Zonuna chu a rawn kal phei chhut chhut a, “Min... min pui ru, ka lu a hai lutuk. Ka thil hmuh hi, a eng(yellow) vek.” a ti bah nuai mai a. Joseph-a chuan va puih a tum a, mahse Elena-i chuan a banah a lo vuan ding nghal a. Joseph-a chuan hrethiam lo tak hian a en hu a, “A kut saw en rawh... a kut veilam saw.” zawite chuan a han ti sap a.

Joseph-a chuan Zonuna kut veilam chu ava en a, sehna hnuhma a hmu ta tlat mai. Faka lah chuan va puih a tum a, “I damlo em ni? Zonun, khawi lo awm rawh.. ka rawn kal.” tiin a va phei a. Mahse Elena-i, “Ni lo, Faka. Kal suh, va kal hnai suh.” tiin a au vak a. Hrethiam lo tak chuan Faka chu a rawn hawi let a, “NGa ti maw?” a ti hu mai.

Joseph-a nuna kut hliam chu ava kawk a, Faka chuan ava hmu ve ta. A meng phawk nasa kher mai, chutah Zonuna chu a rawn kal chhut chhut a. A tap pur mai, "Thiante u, min pui ru...eng nge ka chungah hian thleng..ka awmdan hi..." a sawi zo hman lo. A ring ruh ri thawt khawp chuan a thle bawih mai a, a kut zungtangte chu a kawm ngul hlawm mai.

A hmai chu a rawn dang var pup pup a, zau tak tak hian a ka chu a ang a. A thingthi hnawk mai, Joseph-a te thian pathum pawh chuan an en reng ringawt a. Chutah Zonuna a phu uih uih a, a rum chhur chhur mai. Muang chang hian a rawn tho chhuak a, chutah le... hri kai dangte ang bawk chuan a rawn insiam chhe ta vak vak mai a nih chu.

"Engtin nge kan tih ang? Engtin nge kan tih dawn?" tiin Faka chu a mangang nasa mai a. Elena-i chuan tap pur hian, "Kan chhuak mai dawn nge, kan beilet dawn?" a ti vin hlur tawh mai. Joseph-a chuan thaw hlawp hlawp chung hian, "A chi loh lutuk, pawn lamah an tam daih zawk." a lo ti ve bawk a.

Chutah Zonuna chu a rawn tlan thut mai, Faka chu a rawn bei hmasa ber a. Bangah chuan a va su phei dawrh a, Faka chu a mangang kher mai. Joseph-a chuan faculty dawhkana duster chu a la lawk a. Hnunglam atang chua Zonuna chu rek betin duster chuan a chhu pawp pawp a.

Zonuna pawh chuan a thlah ta, mahse Joseph-a chu a bin thal thuai mai. Seh tumin a bei ve leh ta a, mahse chair chuan Faka chuan a rawn nawr a, bangah chuan a nawr bet a. Joseph-a chu rawn tlanin duster hmang chuan a lu ah chuan a chhu chawrh chawrh a, vawi 20 vel hnuah chuan Zonuna chu lu hek huamin a thi ve thei ta hram a ni.

***************************************

TO BE CONTINUE