MERSA (A Mizo Dystopian Future Science Fiction Post-Apocalyptic Horror Story) Written by : Aaron Malsawmdawngzuala CHAPTER : 3

 MERSA

(A Mizo Dystopian Future Science Fiction Post-Apocalyptic Horror Story)

Written by : Aaron Malsawmdawngzuala

CHAPTER : 3

*******************************************************

Faka leh a thiante pahnih chu Health Centre chhunga, Emergency room bul pawn thutthlengah chuan an thu thap a. Dr Samuela chu a rawn chhuak a, "Eng nge Hannah-i chu a an?" tiin Faka chuan a lo zawt vat a. Dr Samuela chu a han thaw hak a, "Tunah chuan ala muhil hrih a, a taksa a vawt vek bawk a. Check up chian ala ni lova, a tha thuai turah ngai ang." tiin a chhang a.

Dr Samuela bawk chuan a sana chu a han en a, "Hei, dar 8 a ri dawn a... chaw ei te pawh a hun tawh ang. In building lamah zu chhuk tawh rawh u, in thiannu hi chu kan kutah dah mai rawh u." a han ti leh a. Faka te thian pathum pawh chu an tho chhuak a, an building lam pan chuan an chhuk ta a.

Ward chhungah chuan Hannah-i chu nikhawhrelovin a la mu reng a, a taksa chu a rawn che zeuh va. MERSA virus chuan a thluak chu a han thleng chho vek tawh a, a vun chu a rawn dang var pup pup mai. A bula awm, lehlam hawia damdawi vel lo en fel mek, nurse pakhat chuan engmah a hre der mai si lo.

Hannah-i vunah chuan chiang tak hian thisen zam chu maimawm ril ang mai hian a rawn zam tuah tuah mai a, a la dum kuk zui. Chutah a rawn meng kawk a, a mitmeng chu a rawn eng deuh pup mai. A khur dar dar a, a kut zungtang te chu a kawm vek bawk a. A hma lawka Ruata awm dan deuh chiah chuan a lu te chu a her ri sawk sawk a, a taksa chu a rawn insiam danglam ve tan ta.

Nurse chuan Hannah-i thawm chu a hria a, a va hawi a. A phu nasa kher mai, Hannah-i chu khumah chuan theihpa tawpa nasa hian a lo eu vak vak mai a, a chet vel pah chuan a ruh te chu a ri thawk thawk mai. Rang takin nurse chuan ava pan a, "Bawihi, BAwihi..tinge khatia i awm? Hahdam teh...hahdam hram teh." tiin a vuan bet a.

Mahse Hannah-i chu a che nasa tulh tulh a, nurse pawh chu a mangang takzet. Ring tak hian, "Doctor... Doctor, khawngaihin lo kal teh u." tiin a au ta vak vak ringawt mai a. Chutia a au buai lai tak chuan Hannah-i chu a rawn thu chhuak thut a, nurse chu a bawh thlu ta thut mai. Nurse chu a au vak vak a, Hannah-i lah chuan a hrawkah a seh sak ta bawrh bawrh mai a nih chu.

Chuveleh Dr. Samuela leh mipa nurse pahnihte chu an rawn lut a, an thil hmuh chuan a ti hrilhhaiin a ti hlauthawng ve khawp ang le. Dr. Samuela chuan Hannah-i chu a pawm kang lawp a, mahse a lo tal chhuak rang kher mai. Doctor chuan Hannah-i hmel a han hmu chu mak a tiin a rap takzet, ani lah chuan seh tumin a rawn beih chhunzawm nghal a.

Mahse mipa tha nge nge, Dr. Samuela chuan a hrawkah a lo rek a, dawhkan tlu rum rum khawp chuan a theh thal thuai mai. Mahse Hannah-i chu a rawn tho leh nghal, Dr Samuela chu rawn beih a tum leh nghal a. Mahse nurse mipa pakhat zawk chuan a lo man bet a, "Sir... nurse hi lo hruai chhuak zawk teh u, hei chu ka lo buaipui mai ang." a ti a.

Mahse Dr. Samuela chuan chutia student nurse mai mai, dunhmun hlauhawma din tir a duh bik lo. Hannah-i chu ava pan leh a, mahse a rawn tal chhuak thut mai. Male nurse pakhat lo awm ve zawk chu ava zuan thut a, a nghawngah chuan a seh sak ve leh ta. Samuela leh student male nurse pakhat zawk nen chuan Hannah-i chu man beh an han tum leh a, chutih lai chuan kha nurse, Hannah-i'n a seh hliam zawh chiah kha a rawn tho kang ta ur ur mai a.

MERSA hri a kai ve tawh avang chuan ani pawh chu a hmel leh awmdan zawng zawng a danglam ve ta vek mai, chhuata Hannah-i an nam beh mek lai chuan hnunglam atangin a rawn che ve ta. Male nurse, hliam la tuar ve lo awmchhun chu a bengah a rawn seh thut a, chupa na ti lutuk chu a zuang tho zawk mai.

Thisen a chik tuar a, "Ana lutuk... hrep taka.." tiin a beng chu a dawm vawng vawng a. Dr Samuela pawh chu a han leh hawi a, nurse hri kai chuan a lo melh khur mai. Chutah eng emaw thial nuau nuau ala nei zui a, doctor hma takah chuan a la rawn chhak zui. Male nurse beng vei lam zawk chu a seh thla hlawk hi a lo ni, Samuela rap lutuk chu chhuatah chuan a thu hnawk a, a tawlh hnung nghal a.

A beng chu hup nghalin male nurse pawh chuan, "Eng nge thil awmzia? Tinge, tinge hetia an awm a?" tiin a tap pur mai a, thisen lak chu chhuatah chuan a kawi hian a kawi nuai tawh mai. Hannah-i chu a rawn tho ve leh a, male nurse beng lo hup mek chu ava zuan leh ta, a nghawngah chuan thisen chik zawr zawr khawp chuan a seh sak a.

A thil tawn chu Samuela chuan mak a ti kher mai, chutah hri kai nurse hmeichhia chuan a rawn pan a, seh a rawn tum leh ta. A theih tawp chuan a indang a, vanneihthlak takin surgical knife a ban fuh ta hlauh mai. Nurse bekah tak chuan a han vit tlum pawk a, nurse chuan na a ti ngang aniang, a thlah nghal.

Chhuatah chuana  thal tawp a, a thi chu a ni der mai. Mahse Dr. Samuela chu a la him hauh lo. Room chhungah chuan hri kai pathum, Hannah-i leh male nurse pahnihte kha an la awm tlat. Khang male nurse pahnihte pawh khan hri chu an lo kai ve tawh a, th(r)en th(r)u chung chuan Samuela chu beih an tum ve leh ta.

Surgical knife hmanga tin pah chuan, "Security.. Security.." tiin a au vak vak a. Mahse security te chu Ruata buaipuiin an kal vel bawk si, an la rawn let mai si lo. Kawngka chu a rawn inhawng thut a, medical duty hmeichhe pakhat a lo ni. A rawn hawn rual rual chuan a phu zuk a, engmah a sawi hman lo.

Hri kai male nurse pakhat zawk chuana  zuan thlu nghal a, Hannah-i leh pakhat zawk chuan an va seh pui ve nghal bawk. Chu chu remchangah la in Samuela chu a chhuak nghal a, "Tlanchhe rawh u, in vaiin chhuak vek rawh u." tiin a au tuar tuar a, medical duty dang te leh student nurse dangte chuan an hrethiam lo kher mai.

"Sir.. Sir, eng nge awmzia ni a?" tiin an lo zawt a. Tlan pah chuan, "Sawifiahna hman a awm lo, a hlauhawm. Chhuak vek rawh u, hemi building hi chhuahsan rawh u." tiin a hrilh hlawm a. Mahse an hamhaih em avang chuan an ding ngawi thup ringawt mai, chutah a rawn tlan chhuahna ward lam chu an va hawi a.

Chutah le, Hannah-i leh hri kai dang male nurse pahnihte chu an rawn lang ta. Midangte pawh chu hlauvin an tlanchhe nghal a, mahse seh an ni hman nual tho mai. MERSA virus chu a in mutate chak tawh bawk nen, second 20 vel hnuah chuan seh thar apiang te chuan hri chu an kai belh zel a.

Dr. Samuela erawh building atang chuan a tlanchhuak thei hlauh mai a, mahse a inchhuih a. Lehlam hnimbuk, awih ve angreng tak maiah chuan a lum thla ta daih mai a. Second 10 vel lai a lum hnu chuan thingkung pakhat chuan a lo dang hlauh mai, mahse a lu a sawh avang chuan nikhawhrelovin a awm phah ta tho a ni.

******************************************************

Joseph-a leh Elena-i chu dining hall ah chuan an awm a, chaw ei tur chuan an inbuatsaih mek a. Hosteller dang tam tak pawh chuan chaw chu an ei ve mek bawk a, an vaiin 50 chuang chu an ni ang. Joseph-a chu a hawi kual deuh sek a, Elena-i chuan mak tih hmel tak hian a lo en a.

"Eng nge i hawi kual vak vak a?" tiin a zawt a. Za lo tak hian Joseph-a chu a khi suk a, "Fela mawle? DAvid-a nen khan ka hmu ta miah lova, kan chhoh hnu khan...chaw an ei dawn lo em mawnile ka ti mai mai." tiin a chhang a. Elena-i pawh chu a lo khi ve suk a, "Eng nge maw i ngaihtuah vak le? Nidangah zawng ngai mah si lo, an ei peih lo aniang chu." tih pah chuan chaw chu a han bar mawlh mawlh a.

Joseph-a chu a ngawi vang vang a, "Ruata kha tinge khatia a awm le? Hannah-i pawh kha eng tak ang zel ang maw? Damdawi ruih chu a nei chiang a ni, a hmel lah kha a danglam em em mai bawk si.." a han ti nuah nuah a. Chutia an ti ti lai chuan an bul deuh lawkah chuan Faka leh a thiante pahnih, Zonuna leh William-a te chu chaw ei tur chuan an rawn thu ve a.

Joseph-a'n a hmuh veleh chuan, "Faka, eng nge Hannah-i chu a an a?" tiin a lo zawt vat a. Faka chu a han thaw deuh hak a, "Kan la hre chiah bik lo, nikhawhrelo khawpa awm phahna tur chu niin ka hre si lova. Nikhua a hre lo an tia, a taksa a vawt vek bawk a...tunah chuan a la muhil a ni awm e." tiin a lo chhang a.

Mak tih hmel tak hian Joseph-a chu a meng hru a, "Nikhaw hrelovin a awm a maw? Ava mak awm ve? Natnahrik eng emaw a kai chhawng te a ni mai lo maw, Ruata khan?" a han ti nuah nuah a. William-a pawh chu rawn tawng chhuak ve in, "Chu chu keipawh ka ngaihdan chiah ania, tawng thu chhe lovah Ruata awm ang khan Hannah-i kha a awm ve phah angem le?" a lo ti ve bawk a.

Zonuna chu a lo nui huk mai, "In ti awm ang lo emai, Ruata khan a sehna ve bawk em alawm. Thisen pawh a chhuah ve nual kha, chubakah Hannah-i khan a hlauhtawng anga, khavang khan nikhawhrelovin a awm pawh a ni ve mahna." a lo ti sam et mai. Faka chuan a han nghawk sawk a, "I ngaih a sam thei lutuk, thil tha lo zawk thleng ta se a buai ber ber tur i nih kha." tiin a lo vin zek mai.

*********************************************

University main gate chu security guard te chuan an hawng a, motor nen chuan Campus HEad, Prof Lalmuanpuia chu a car nen chuan a rawn inkhalh chhuak a. Task force duty leader, Pu Saia chuan a rawn pan nghal a. Pu Muanpuia pawh chuan motor chu a lo ti ding vat a, "I kal dawn ta em ni, Pu Muanpui?" tiin Pu Saia chuan a lo zawt a.

"Nia... doctor khan a sawi serious em a, tunah hian Civil ah a awm mek a. Ka va kal ve mai loh chuan, ka zirlai te a ni ve bawk sia." tiin Pu Muanpuia chuan a lo chhang a, Ruata chungchang an sawina a ni. "Awle, nia.. va kal teh khai, kha.. Pu Rama pawh kha insilfai turin kan tia, haw nghal a, quarantine nghal ni mai se kan tia...property house lamah ala awm." tiin Pu Saia chuan a lo chhawn ve leh a.

Pu Muanpuia chuan a lu a han bu nghat nghat a, "Ni e, fimkhur tluk a awm lo. Kha.. ka student Ruata pawh infection a ni e an tia, a serious hmel sia ka va kal phawt ang nge." tiin motor chu a ti nung a, a tlan ta a. A kal liam hnu chuan Pu Saia chuan property house chhukna lam chu a zuk en vang vang a, "Bawiha... Pu Rama kha a rei riau mai, zu en teh... a haw vat angai a nia." tiin tlangval pakhat, duty ve tho, BAwiha chu a tir a.

Bawiha pawh chu property house lam pan chuan a chhuk nghal a, inchhung a lut chu silhmun lamah chuan Pu Rama, Ruata'n a seh hliam tak kha amah hnungchhawn zawng hian a lo ding run mai a. A kun ngul a, a taksa chu a khur deuh der der mai. Bawiha chuan pangngai tak hian, "Pu Ram, i tha maw kha?" tiin a han zawt a.

Mahse Pu Rama chuan a chhang lo, a awm ngai chuan a awm reng a. Bawiha chuan mak a ti angreng kher mai, "Pu Ram... Pu Ram, eng nge i an, i tha maw?" tiin a han zawt leh a. Mahse Pu Rama chuan ala chhang chuang lo, a awm ngai chuan a awm reng a. BAwiha pawh chuan tih ngaihna vak a hre lo, let leh mai chu a tum a.

Chu veleh Pu Rama chu a rawn che hrut mai, Bawiha pawh chu a ding leh nghal chat a. Chutah le, Pu Rama chuan a taksa chu a rawn ti che hrut hrut a, a inherh ri thawk thawk hi a ni ber mai. A kut zungtang te chu a rawn kawm ngul a, a thaw ri hruk hruk mai. Bawiha chuan a hrethiam lo takzet, a aw a han thian kharh kharh a.

"Ihh... Pu Ram, i haw vat angai an tia, Pu Saia'n min rawn tir a." inthlahrung tak chuan a han ti leh a. Pu Rama chu a thle sawi bawi bawi a, BAwiha pawh chu a awm a nuam tawh lo kher mai. Chutah muangchang chuan a rawn hawi a, a hmel a rawn ti lang chiah chu Bawiha pawh a meng phawk nasa kher mai.

Pu Rama hmel chu mak tak a ni, Ruata ang chiah khan a vun a dang var pup a. Thisen zam chu maimawm ril ang mai chuan a lang tuar a, a dum kuk bawk. Zau tak hian a ang a, a mitmeng te chu a eng pup mai. Bawiha mak ti lutuk chu a ding ngawi reng ringawt, chutah Pu Rama chu a rawn tlan thut a.

BAwiha chu a rawn zuan ta thut mai le, chhuatah chuan an inbawh thlu nghal a. Tiang a ken hlauh avang chuan Bawiha chu a indang thei hram hram a, Pu Rama chuan a tiang ken lai chu a seh ngawng ngawng a. Ring tak hian, "Min pui ru...Pu Sai.. min pui ru." tiin a au ta vak vak ringawt mai.

An thawm chu hria in Pu Saia pawh chuan property house lam zuk en nghal a, "Eng nge thil awmzia, tu emaw khan zu en teh u." tiin a tir hlawm a. Patling pakhat chu a zu chhuk a, mahse a thleng tep tih ah chuan hri kai tawh, Pu Rama chu a rawn tlan chhuak thut mai le. Chupa chu a lo zuan thlu nghal a, a hrawkah chuan thisen chik tuar tuar khawp chuan a seh sak ta.

Pu Saia chuan a thil hmuh chu a awih thei lo, ka hau hian a en vung vung ringawt a. Duty dangte chuan Pu Rama chu an zuk pawt sawn nghal a, mahse a lo beilet rang kher mai. A seh zawh chiah, duty pakhat chu leiah chuan mu in a tal vak vak a. Thisen chuan a bual huh vek hi a ni ber mai, Pu Rama chu eng tin tin emaw chuan leiah chuan an nawr bet thei hlauh mai.

Mahse buaina chu a intan dawn chauh, property house atang chuan Bawiha chu a rawn tlan chhuak ve thut mai a. Ani pawh chuan hri a lo kai der tawh chu niin, midang ho chu a rawn bei ve nghal bawk a. Pu Saia chuan a thil tawn mek chu awih harsa a ti kher mai, a naute chu han puih mai ngaihna pawh a hre lo.

Property house atanga a rawn tlan chhuah hnu a Pu Rama'n a seh hmasak ber, patling pakhat, thisen nena inchiah piah nuai chunga mu reng mai chu an buai luai luai lai chuan Pu Saia chuan a zuk pan a. Zu buaipui a tum chiah chu ani pawh hri a rawn kai thar ve leh chiah a, a rawn tal tak vak vak mai.

Pu Saia pawh a ding chat a, chupa chu a rawn tho kang a. Midang ang tho chuan a hmel chu a rapawm takzet, Pu Saia chu a rawn bei ta. Seh tumin a rawn pan a, mahse a lu ah tak mai chuan Pu Saia chuan a tiang ken lai chuan a hlap pawp a. Chupa pawh chu a thal tawp mai, mahse duty dangte chuan hri chu an lo inkai chhawng nasa tawh lutuk tlat, amah leh tlangval pakhat, Rintea chauh chu an bang ta.

Theih tawp chhuah chuan an bei let hlawm a, mahse chung hri kai ho chu an chak lutuk tlat. Security guard pakhat chu rawn tlanin hri kai ho chu a rawn beih pui ve a, a hlap thal tawp tawp hlawm mai. Chu security guard hming chu DAwnga a ni a, palian lam leh chak ve pangngai tak a ni.

"Gate chhungah tlan lut rawh u." tiin Pu Saia leh Rintea te chu a hrilh a, anni pawh chu campus chhungah chuan an tlan lut nghal. Dawnga'n gate kalh a tum lai chuan hri kai te chuan seh tumin an la rawn ban tawk tawk a, Pu Saia leh Rintea chuan an kut ruh te chu an lo hlap tliak hmawk hmawk mai.

"Hmanhmawh rawh, hmanhmawh rawh." tiin Pu Saia chuan Dawnga chu a vin tuar tuar a, a tawp a tawpah chuan a kalh thei ta. An pathum chuan an hnungtawlh nghal a, hri kaite chu an rak vak vak hlawm a. Sawi mai tur an hre lo, mak ti tak leh thaw hlawp hlawp chung chuan an en vung vung ringawt mai a ni.

********************************************************

FEla leh Emily te pawh chuan HEalth Centre chu an thleng hnai dawn ta, Emliy chu a han hawi kual a. Mak tih hmel tak hian, "Lock down a ni sia, security te ho pawh hi nidangah chuan an round ziah tawh sia. Tumah an awm bawk si lo, a mak ee.." a han ti nuah nuah a. Fela erawh chu a ngawi reng a, tichuan Health Centre chu an thleng ta.

A lo reh thiap mai a, an ngaih chu a tha lo kher mai. An va pan hnai zel a, Health Centre main door hi glass dum, lang tlang thei lo ang chi kha a ni a. A hma zawn takah chuan an ding a, "Eng emaw dik lo chu a awm a ni." tiin Emily chu a han phun sap a. Fela chuan a chil a han lem dawk a, "Kan lut dawn em?" tiin Emily chu a zawt a.

Emily chuan rum fe hian a melh a, "Kan luh lohvin... eng ti tura kal nge kan nih?" a lo ti deuh zek a. Fela chuan bah nuai hian, "Ihh... Ha.. Hannah-i, zombie ah a chang nge chang lo kan en dawn a ni lawm ni?" tiin a lo la zawt let hu zui. Emily chu a han thaw hak a, "Aw.. ni e. Lut ang, hma hruai rawh." a la ti zui.

Fela chuan kawngka chu a hawng a, a lut a, Emily pawh chuan a zui lut nghal. Mahse Fela chu thui pawh a kal lo, a ding chat a. Emily chuan a la sut phah zui, "NGati nge? Tinge i din a?" tiin a zawt vat a. Mahse Fela chuan zaizirin bengchheng lo turin a hrilh a, reception counter chu a kawk a.

Emily pawh chuan counter chu a en a, thisen a lo awm nuai mai. ZAwi te hian Fela chuan, "Eng emaw, mahni invenna tur hmanrua chuh vat rawh...dik lo a awm." tiin a han phun ri sur sur a. Hallway chu a ruak huai a, mahse thisen erawh chhuatah te, bangah te chuan a kai nuai thung.

Emily chuan, "Phone i pai em?" tiin a zawt a. Fela chu a han indap thuk thuk a, "Aih, pai lo. I pai zawk lo em ni?" tiin a lo zawt let a. Emily chu a thaw hak a, "Ka pai loh vang alawm ka zawh che... engpawh nise, kal zel phawt ang." tiin kawngka bula drip khaina stand chu inven nan a han chuh nghal a.

Fela pawh chu a han hawi kual a, dawhkana forcep, doctor ten surgery tih nana an hman thin, bakcheh ang tak mai chu a la ve nghal bawk a, a bak hmanraw dang awm hnai hek lo le. Tichuan hallway ah chuan an phei zel a, thawm chu an dim dun kher mai. An kal zel a, mahse thawm an hre ta tlat.

An ding chat a, hallway tawp, vei lam penna lam atanga rawn chhuak ni ngeiin an hria. An ngawi dun vang vang a, "I hre ve em?" tiin Fela chuan a han zawt a, Emily pawh chuan a lu a lo bu nghat mai. An hmanraw ken chu an han hum nghet sauh sauh va, tichuan fimkhur tak chuan an kal zel a.

Hallway tawp lam chu an thleng ta, bang phen atang chuan Fela chuan a han bih dek dek a, veilam, thawm lo chhuahna lam chu ava hawi a. A meng phawk nasa ngei mai, hri kai 10 chuang chu amah hnungchhawn zawng chuan an lo ding tlar thup mai a, an su ang dulh dulh lehnghal.

Mahse veilamah chauh an lo awm hauh lo, dinglam chu ava hawi phei ve leh a. Hri kai dang 10 aia tam fe hi an lo awm a, "Eng thil phiangsen nge?" tiin a phun sup a. Emily hrethiam lo chu a rawn dak ve a, a au chhuak teuh kher mai. A hmui chu a hup hman hlauh va, mahse an tlai te hret a ni.

Dinglama hri kai awm te chuan Fela tawng ri chu an hre pha a, an rawn hawi ta thup mai. Fela leh Emily chu an rawn hmu ta, chutih rual chuan veilama awm hri kaite pawh chuan thawm chu an rawn hria a. Anni pawh chu an rawn hawi thup mai a, an rak vak vak hlawm a. Fela leh Emily te lam pan chuan an rawn tlan a, hri kaite zingah chuan Hannah-i pawh chu a lo tel ve ngei mai.

Ring tak hian Fela chuan, "Tlan ang.." tih leh Emily ban chu a kai nghal a, hallway ah chuan a tlan let pui nghal a. Kawngka pui lam an pan lai mek chuan a sir a ward pakhat kawngka chu a rawn inhawng thuai mai a, student nurse hri kai dang pathum an rawn chhuak hlawl mai. Fela leh Emlily chu an ding leh chat a, "Awi, ka duh thei lo... engtin nge kan tih tak ang?" tiin Emily chu a mangang nasa tawh mai.

An bul hnaia ward dang kawngkhar chu hawn an tum a, mahse a lo inkalh vek mai bawk si. Hri kai ho lah chuan an rawn hnaih tulh tulh mai bawk nen. Mahse vanneihthlak takin ward pakhat chu a rawn inhawng thut a, hri kai ve lo student nurse pakhat, SAngsangi chu a rawn lang a.

"Helamah, lo lut vat rawh u." tiin a a kut chuan a hui a. Rang lutukin Emily leh Fela te pawh chu an lut nghal a, kawngka chu chhunglam atang chuan an kalh vat a. Hri kai ho chuan an rawn bawh rawn luai luai a, mahse vanneih thlak takin hliam an tuar lo hlauh. Kawngka hnungchhawn chuan Fela chu a thaw hlawp hlawp a, "Kan.. kan lawm e." tiin a tawng thei tawk tawk hi a ni ber.

Sangsangi chuan Emliy leh Fela te chu a han en dun vang vanga , "An seh che u em?" tiin a zawt nghal. Emlily chuan a lu a thing a, "Aih, tuman min seh hman lo. Min pui a kan lawm e, mahse eng nge thil awmzia hi?" tiin a lo zawt let a. Sangsangi chu khumah chuan a thu hnawk a, "Hri chikhat, insiam danglam a awm niin ka hria. MRSA chu a ni lo, natna hrik in mutate chak tak a nih ka ring, ka hrethiam bik lo." tiin a chhang a.

Fela chu muangchanga rawn tho chhuakin, "Eng thil nge thleng hi, thiannu? Engtia intan nge a nih?" tiin a lo zawt ve leh a. Sangsangi chuan tap lek lek hian, "Science dept building lam atanga hliam tuar an rawn dah chhoh kha, khanu khan hri chu a rawn pu lut a ni. Kan doctor ber, Dr. Samuela pawh khawnge a awm ka hre lo, hri kai zingah a tel ve a nih ka ring. Tikhan an inseh a, an kai chhawng zel a nih hmel." a ti tham tiak a.

Emily chuan Fela chu a va melh zeuh va, "Tikhan min awih tawh em?" a han ti deuh kher a, mahse Fela chuan a chhang lo. Hriatthiam loh hmel tak hian Sangsangi chuan, "In hre lawk tihna em ni? Khanu kha khawi dept ami nge ni reng reng?" tiin a lo zawt dun ve bawk a. Fela chu a kun ngal a, "Keimahni dept a nia, sawi dawn chuan a thui lutuk." tiin a lo chhang zawi sap a.

********************************************************

Pu Lalmuanpuia pawh chu Civil hospital ah chuan a awm mek a, Dr. Bza nen chuan an ding dun a, an bulah chuan senior nurse leh medical staff thenkhat te chu an awm ve bawk a. An hma zawnah chuan ward dang a awm a, chutah chuan Ruata chu khuma phuarbehin a awm a, hri kai ho dang ang bawk khan a chetdan chu mak tak a ni.

A tal deuh reng a, a vun chu a la dang var pup reng bawk a, nghet taka khumah chuan phuar beh a ni. A bang chu glass chhah tak atanga siam a nih avang chuan Pu Muanpuia leh Dr.Bza te chuan Ruata che vel chu an hmu thei reng bawk a. Pu Muanpuia chu a han kuankuah a, "Doctor, thudik tak min han hrilh teh. Ka zirlai Ruata chungah hian eng thil nge thleng hi, tinge hetia a awm?" tiin a zawt a.

Dr. Bza chuan zawi sap hian, "A nihna takah chuan, a thi tawh a ni." a ti ta mai a. Pu Lalmuanpuia chuan phawk hru hian a melh a, "Eng a? I fiamthu em ni? I hmuh ve reng saw, ala che a, a la thaw bawk a, a lungphu pawh.." a tih lai chuan Dr. Bza chuan a lo pawt chat vat a, "Aih nilo, Sir. Mihring pangngai lungphu ang a ni lo. A taksa temperature a hniam em em a, nung dama awm thei a ni lo hrim hrim. Chuan a thisen hi mihring thisen pangngai aiin a hraw in a chhah em em bawk a, a cell zawng zawng hian hna a thawk tawh lo. Chuan, a thluak hian..." tiin a han chawl dat a.

Ruata chu a han en leh vang vang a, "A thlauk hi darakr tam tak kalta khan tawp daih tawh tur a ni, a function tawh lo." tiin a han sawi chhunzawm leh a. Pu Muanpuia chu a han maimitchhing vang vang a, "Anih tinge sawtia nungdam anga a la awm si, tinge a la chet vak vak si?" tiin a vin lek lek mai.

Dr. Bza chuan thawk a han la hak a, "A taksa chhunga virus hian nungdamin ala siam a ni." tiin a chhang ta mai a. Pu Muanpuia chuan a en hu mai, "ENg a? Eng nge i sawi awmzia?" tiin a zawt leh nghal vat a. Dr. Bza chuan a bula monitor chu a han hung hnai a, "Cerebal Cortex, mihring ina kan ngaihtuahnate, kan hriatrengnate, kan miziate... heng zawng zawng hi a mah ah hian a awm lo a ni. Mahse, a brainstem leh a hypothalamus thenkhatte hi a la nung reng a ni." tiin monitor chu a han entir a.

Pu Muanpuia chuan sawi tur reng a nei lo, a chil a lem dawk a. Dr. Bza bawk chuan monitor chu a kawk a, "Helai area bik hi primitive survival function thunun tu ber a ni a. Lungphute, thawk kan laknate, kan ril a tam a ni tih lantirnate leh kan thinrim ani tih lantirnate a ni a. He virus chhuakthar hian a taksa hi a siam danglam a ni ber mai. A awmzia takah chuan he i zirlai hi Ruata ni lovin,  Ruata chu a thi tawh a, a ruang chu he virus hian a rawn ti nung leh a ni ber mai." a han ti leh a.

Pu Muanpuia chuan awih harsa a ti kher mai, "Mithi tawh rawn nung leh i tihna em ni?" tiin a han zawt leh a, a aw key pawh a vin tawh kher mai. Dr. Bza lah chuan a lu a lo bu nghauh va, "Aw ni deuh mai e, he virus hian a nervous system a khawih nasa hle a ni. A brainstem ah hian electrical sign kan hmu a, a tihrawl hi a tiharh leh a ni, ka sawithiam chiah bik lo. Tunah hian nikhua a hre lova, mithi ang mai a ni. Kei leh nang ang hian nungdamin awm lo mahse, he virus lo chhuak thar hian a thluak a ti function chawp leh a, a taksa a la tiche tihna a ni." tiin a chhang leh a.

Pu Muanpuia chu a han inngaihtuah vang vang a, Rauta chuan a classmate pakhat, Hannah-i a seh tih thu a dawn chu a hre chhuak thut mai. Phawk hru hian Dr. Bza chu a en a, "Anih leh, entirnan... Ruata hian midang, a ha hmangin lo seh ta se, he hri hi a kaichhawng thei ang em?" tiin a han zawt leh a.

Dr. Bza chu a han inngaihtuah vang vang a, "A theih tho mai." tih ringawt chuan a chhang a. Pu Muanpuia chuan vin lek lek hian, "Khatiang nilovin, thudik takin min chhang rawh." a han ti deuh hlur a. Dr. Bza chuan zaidam tak hian, "A chil(saliva) ah hian virus chu a awm dawn chiang sa a, a thisen ah a awm bawk ang. I sawi ang khan tu emaw lo seh ta se, a seh thuk viau va, vun pawp thlenga a seh a nih chuan a kai chhawng thei ang." tiin a chhang ta mai a.

Pu Muanpuia chu a mangang ta hle mai, "Anih chaun i sawi awmzia chu..." a han ti tham tiak a. Dr. Bza chuan hreh hmel tak hian, "An immune system in a do hneh lo a nih chuan amah ang chiah hian an awm ang. Hetiang khawp hian Ruata taksa ah hian virus in hun reilote chhungin hna a thawk thei an nih chuan, midang a seh vaih chuan an kai rang khawp ang." a han ti leh a.

Pu Muanpuia chuan a lu a dawm vawng vawng mai, "Anih chuan doctor, engtia he virus infection hi kai thei nge a nih?" tiin a han zawt leh a. Dr. Bza chuan thlalak pakhat chu ahan hmuh a, "Ruata hian a ke veilamah hian hliam a nei a, a vun a pawp a. Chuan a ke a hliam hi puana tuam a ni a, puanah hian ama thisen nilo, thisen dang a lo kai sa a, chu thisen ah chuan virus chu a lo awm sa a ni." tiin a chhang a.

"Eng a? He a ke tuamna puanah hian virus chu a lo awm sa amaw?"

"A landan chuan a ni alawm. He virus hi inseh atang chauh nilovin, thlan(sweat) emaw, thisen emaw atang pawhina inkai theih niin a lang a. A vun pawp ah hian virus chu lutin, a nervous system chu muangchangin a khawih tihna a ni." tiin Dr. Bza chuan a lo chhang leh a, Pu Muanpuia chu a mangang tawh takzet.

************************************************************

TO BE CONTINUE