THE CRAWLING WOMAN (Spanish : Repente Mulier) MIZO SUPERNATURAL HORROR STORY Written by : Aaron Malsawmdawngzuala Chapter - 5

 THE CRAWLING WOMAN

(Spanish : Repente Mulier)

MIZO SUPERNATURAL HORROR STORY

Written by : Aaron Malsawmdawngzuala

Chapter -  5

********************************************

Hotel chhungah chuan Sarah-i chu a lut a, receptionist chu ava pan nghal a. Receptionist-in a lo hmuh chuan, "Eng nge ni ta, ka pi?" tiin a lo zawt vat a. SArah-i chu a han nui lui deuh suk a, "Enteh thiannu, hotel hnunglam atang sawn..emaw hei, hotel chhunglam hrim hrim rawn luhna tur awm ang kawngka dang a awm em?" tiin a han zawt deuh tawp a.

Receptionist chuan hriatthiam loh hmel tak hian a lo en hu a, "Awm love, choka lam short cut a luhna chu a awm a, chuzawng chu a ni mai." tiin a chhang a. SArah-i chu inngaihtuah muk hmel tak hian a melh ngai melh rengin a han ding ngawi vang vang a, "Ngati nge, ka pi?" tiin receptionist bawk chuan a lo zawt leh a.

Sarah-i chu a khi leh suk a, "Aaa.. engvak ni love, ka zawt mai mai che mawle." tiin hotel pawn lamah chuan a chhuahsan leh daih a. Pawnah chuan a vei kual a vei kual a, hotelo hnung lama lei zawl lai taka kawngkhar lo awm a hmuh chu a rilru ah chuan a awm reng a. A chhungah engemaw tak, Lily kaihhnawih thil engemaw tak a awm a ring tlat a ni.

Maruata lo haw huna hrilh chu a duh viau nangin a nghak thei thlawt lo, a phone chu a phawrh a. MAruata chu a han call a, mahse a la thei lo. Vawi nga vel a call hnuah pawh chuan a ring quit thak thak mai si, a tei kual a tei kual ringawt mai a. A khat tawk chuan hotel hnunglam chu ava en leh vang vang thin a, hotel lun tak a ni lem lo bawk nen a reh phian mai lehnghal.

Minute 5 vel a tei kual leh hrep hnu chuan hotel hnunglam pan chuan a va phei leh ta nge nge a, a kal zel a. Kawngkhar lo awm na chu a va thleng leh ta, a en vang vang a. Thu hniamin a kalhna chain lianpui leh tala hrawl tak mai chu a en a, "Hotel chhunglam luh theihna ti dawn ila hotel awmna nen a inhlat em em mai bawk si a, chubakah tinge tiang khawpa nghet hian an kalh kher le?" tiin a phun nuah nuah a.

A chhunglama thil awm nia a rin chu en a chak em em a, a nghak thei hlawl lo a ni ber mai. A ding a, kawm dawm meuh chuan a han inngaihtuah vang vang a. Hotel lamah chuan a va let leh a, mahse a chhungah chuan a lut lo. Lung a zawng a, lian tha ve nelh nawlh tak mai chu a hmu hlauh mai.

Miin an hmu nge hmu lo tiin a han hawi kual leh zuk zuk phawt a, a awmna lai chu a lo ramhnuai ve deuh bawk nen a reh takzet. Tichuan a lung ken lai chuan tala chu chhut chhiat a han tum a, a theih patawpa na chuan a han chhu ve thuai thuai nangin tala chu a nghet lutuk tlat, a chhu chhe zo tlat lo.

Tih ngaihna hre lo tak chuan a ding ngawi leh vung vung ringawt a, "Engtin nge niang aw...khawiah tak chuan a chahbi hi awm ni maw?" tiin a han pjhun leh nuah nuah a. Chain lah chu a hrawlin a lian em em mai a, tala pawh a lawk tha ber bur bawk a, han chhut chhiat mai chu a harsa ve khawp ang.

Chutah thil ngaihtuah chhuak thut niawm tak chuan a han meng deuh kawk a, rang lutukin kawngpui lamah ava tlan phei a. Minute 2 vel taxi a chan hnu chuan a rawn kal hlauh mai, a lo phar ding nghal vat a. Tichuan Siamtea te in lam pan chuan a kal nghal a, Siamtea puihna dil tawp mai chu a tum ta ringawt mai a ni.

********************************************

Sarah-i chuan Siamtea te in chu a thleng a, kawngka chu a han kik nghal a. Siamtea chuan a rawn hawng a, Sarah-i a hmu chu a phu deuh zawk mai. Mak tih hmel tak hian, "Ehe, Sarah...enge i rawn tih dawn a?" a lo ti hu mai. Sarah-i chu a thaw hak a, "Siamte, khawngaihin ka lo leng lut lawk thei angem?" tiin a lo zawt let a.

Siamtea pawh chuan, "E..aw, lo kal rawh, lo lut rawh." ti bah deuh nuai chung chuan a luh tir a, sitting room lamah chuan an thu dun a. Siamtea bawk chuan, "Enge ni ta, i rawn lang leh deuh thut a, min rawn call lawk bawk si lova?" tiin a han zawt nawn leh a. Sarah-i chuan a chhang mai lo, a han ngawi deuh vang vang phawt a.

Chutah Siamtea chu en in, "Kum 10 kal ta khan Hahdamna Run ah sawn i thawk thin tiraw?" tiin a lo zawt let leh daih mai a. "Aw...aw..thawk e..tinge?" Siamtea chuan a lo ti leh hu mai. Sarah-i chu a han thu tha sauh sauh va, "Anih engtiang chiahin nge i thawh khah?" tiin a han zawt leh a.

"Ihh..mistiri helper ang deuhvin a nimai."

"Enge in siam chutih lai chuan?"

"Bathroom thar kan siam a, chumi pah chuan an thil hlui dahna kha bathroom ah zawk kan siam a, bathroom kha a awmna a hla deuh hlek a."

"Anih bathroom hlui chu khawilaiah sawn nge a awm a?"

"Hotel hnung lamah khan, stepa chhuk ngai a nia, mahse khapawh kha an lai tha a, an siamtha leh vek a. Thil hlui dah nan an hmang a, an hmang leh tawh lo zawk hial ang."

Sarah-i chu a ngawi leh vang vang a, "Nih leh ngati nge bathroom chu an thlak nachhan?" tiin a zawt leh a. Siamtea chu a han thaw hluai a, "Ka sawi ang khan staff ho bathroom ania, a awmna a hla deuh va, chuvang chuan an siksawi kual ta a nih kha." tiin a lo chhang leh a. Sarah-i chu a phur tulh tulh mai, "Anih chuan i sawi awmzia chu an bathroom hlui chu an lai tha a, an thiat a, tichuan thil hlui dah nan an siam chawp i tihna em ni?" tiin a zawt leh a.

"Aw ni e, tah pawh chuan ka la thawk alawm. Mahse keichu bathroom kan khawih zawh kha chuan ka patea te inah ka thawk leh daih a, chubakah saw hotel ah sawn ka leng gnai vak lova, ka la thleng bawk hek lo."

"Anih bathroom thar chu tuna hotel chhunga mi saw a ni em, staff bathroom saw?"

"Aw ni e."

"Anih leh chutih lai vel chuan Lily ala thawk em?"

"Thawk e, chuta tang chuan alawm amah pawh ka hriat chian deuh ni. A bo pawh khan thil hlui dahna thar an siam ah chuan a kal hnuhnung ber an tia a hmu hnuhnung ber tuten, mahse an zawn hrep hnu pawh khan an hmu zui ta miah lo kha ania."

Sarah-i chuan chu thil hlui dahna kudam rauh san tawh, a hmuh chhuah thar chhunga luh chu a chak zual em em a. Lily a bo hma a, a kalna hnuhnung ber a ni tih a hriat leh ngat hnu phei chuan chhui chian a chak lutuk chu a thu tha hleithei tawh lo. Siamtea chu a en vang vang a, "Siamte, i puihna ka mamawh a ni." a ti deuh tawp mai.

"Engtia puih maw?"

"Nang lo chu ka thusawi awih thei tu tur an awm lo, chuvang chuan engkim ka hrilh ang che. Chu i thil sawi, kudam chu ka hmu a ni."

Siamtea chu a meng kawk mai a, "Eng a? Khawiah, engtin? An rauhsan tawh kha ania, leiin an vur vek tawh ang.. a awm tawh lovang tia kan ngaih thin kha ania, enge i sawi awmzia?" tiin mak a ti em em mai a. "Saw hotel sawn thuruk lian tak a nei a ni, Lily nen pawh hian a inzawm ngei bawk ang." tiin Siamtea chu a thil hmuhchhuah thar chu a hrilh ta vek a.

Chumai nilovin Sarah-i chuan a mumang zawng zawng te, Lily a hmuh dan nen lam chuan a hrilh fai ta vek bawk. Siamtea chu a ngawi vang vang a, "Mi sawi ka hriat danah chuan kudam thar an siam pawh kha kum khat tak ngial pawh an hmang lo, Lily bo hnu khan an rauh san ta daih a ni awm e." a han ti zawi sap a.

******************************************

Sarah-i leh Siamtea chu bike-ah inphurin hotel kawtah chuan an ding a, Siamtea chuan bag lian pui hi a ak bawk a. Tichuan security guard te hmuh loh hlan chuan hotel hnunglamah chuan an phei zuk a, kudam kawngkhar awmna chu an va thleng ta. Siamtea chuan a en vang vang a, "Aw..ka chiang, helaiah hian alawm zunin hlui chu a awm." tiin kudam kawngkhar, leia mi chu a kawk a.

Siamtea chuan a han en leh vang vang a, "Tah hian step chhukna a awm a, a hnuaiah khuan zunin chu a awm thin. Tichuan bathroom thar kan sak lai khan helai hi an thiat a, an lai tha vek a. Tichuan ka thawh zawh hnu, hmun danga ka thawh hnu khan kudam atan an lo siam leh bawk a, Lily bo hnu khan an rauh san leh daih a, chuzawng chu a ni ka hriat chu." a han ti leh a.

Tichuan a bag chu hawngin bolt cutter lian tak mai hi a phawrh chhuak a, chain chu a chep chat ta nghauh nghauh mai. Chutih lai chuan midang lo kal an awm nge awm lo tiin Sarah-i chu a lo hawi kual sek bawk a, minute 4 vel dawn hnuah chuan, "Ka zo ta e." Siamtea chuan a rawn ti ta hlauh mai.

Kawngka chu an hawng ta, an hawn rual rual chuan lei nawi a tla ri nghal sap sap bawk. Thing atanga siam step chhuk hi a lo awm a, a chhung chu a thim ruih mai a. Thil hmuar rim a nam huam huam bawk a, bak(bat) tlem azawng an lo thlawk kual nghal sap sap bawk a. Siamtea chuan a hnar a hup a, "Kan lut dawn mi, miin min hmu ange aw...kan case chu a rit viau ang." a ti nuah nuah a.

Sarah-i chuan Siamtea chu enin a khi suk a, "Ni reng e, chuvang chuan min lo veng ang." a ti ta daih mai. Siamtea chuan hrethiamlo tak hian, "Engmaw i sawi a? Ka lo veng ang che maw? Nangmahin i lut dawn mi, a chi loh reng reng." a lo ti nghal chiam chiam mai. SArah-i lah chuan a ngai pawimawh lo nasa, "Keima investigation neih alawm, nangte chu i puihna ka dil mai chauh alawm." tiin chhuk chu a tum ta mai a.

Siamtea chuan a lo dang nghal, "Lut suh, keimah zawk ka zu lut ang. Hmeichhia zawk i nih kha, a awm ang lo emai, min lo veng zawk rawh." a han ti leh hram a. Mahse Sarah-i chuan a lo phal chuang lo, "Min lo veng la a nimai." tiin a chhuk ta a. Siamtea chu a hlauthawng kher mai, "Mahse, mi lo kal ta se, min rawn zawt ta se, engtin nge ka tih ang?" a ti leh hu mai a.

Sarah-i chu a khi leh suk a, "Chungte chu chhuanlam i lo ngaihtuah ve tawh mai aniang chu." tiin a chhuksan ta tak tak mai a. Siamtea chu a tap lek lek mai, "Sarah... Sarah, ava buaithlak tak." tiin a lu a dawm vawng vawng a. A hawi kual sek a, "Rei suh aw...hei kawngka a inhawng huau a nia." tiin a zuk au deuh chhen bawk.

******************************************

Kudam hlui chhungah chuan SArah-i chu a awm ta vang mai, a thimin a rimchhe em em bawk a. SArah-i chuan a phone torch chu a on a, kudam chhung a rimchhiat em avang chuan a rawmawl chuan a hmai a tuam bawk. A chhung vel chu a han en kual a, puanchhia tam tak, rawng bur ruak, chanchinbu hlui, lehkhabu chhe tak tak leh dawhkan bung rem rum te chu a lo awm a.

Rei tak chhung chu mihring luh tawh lohna a ni tih a hriat hle mai, SArah-i chuan light a han zawng a. Mahse eng light mah a awm lo, plug te chu on mahse engmah a kal lo. A han enkual leh zel a, lehkhabu hlui te chu a han enchiang hlawm a. Megazine hlui te, paper hlui te, file hlui te leh register hlui te a lo ni hlawm a.

A hlui tawh em avang chuan a lo eng(yellow) deuh hlui tawh hlawm a, SArah-i chuan a en zel a. File hlui velah chuan Lily file a lo awm ve takin tiin chiang tak chuan a mal te te hian a en a, mahse Lily hming reng reng a hmu lo. A hai deuh bawrh bawrh a, chutah lehkhabu pakhat a ti tla palh hlauh mai.

Chhar tura a zu kun, lehkhabu a han enchaing chu a tawp chat mai. Rang lutukin a chhar a, a aia chiang leh zual zawk chuan a han bih a. Lehkhabu kawmah chuan MY DIARY, MY LIFE tih hi chiang lo ruai hian a lo inziak a, Sarah-i chuan a han beng fai sawk sawk a. A hnuaiah chuan LILY ZOTHANPARI tih inziak chu a hmu leh ta.

A meng kawk a, "Hei.. hei hi, Lily, Lily Diary maw? Lily Diary ka hmuchhuak amaw?" tiin a phun sap a, a lawm rilru kher mai. A keu nghal a, mahse a thim em avang leh chu diary chu a hlui tawh em avang chuan pentui te chu a lo pherh deuh nuai tawh a, a hawrawp pawh chu chhiar a har takzet.

A jacket ah chuan a ak nghal hmak a, tichuan thildang hmuh chhuah tum chuan a han en kual leh vak vak a. Chutah bang kil thim lai atang chuan engemaw ri rek thawm hi a hria a, a phu nasa kher mai. A bula chhuar pawh chu amahin a rawn insawi nghing deuh dawt bawk a, mahse second hnih vel bak a ni lo.

****************************************

Pawn lamah chuan Siamtea chu a lo la mangang nasa mai a, a hawi kual chhen tawh mai. Chutah a awmna atanga hla vak lovah chuan au thawm a la hre zui, "Tah khan awm in awm em? Awm in awm em ni?" rawn ti lauh lauh ri chu a hria a, a thinphu a rang nghal kher mai. Rang takin ava tlan phei a, hnim kar atang chuan ava bih a.

A hma zawn atanga hla vak lova hotel security guard pakhat rawn kal phei mek chu a hmu ta, a meng phar nasa ngei mai. A hawi kual ruai a, "Engtin nge niang, engtin nge niang?" tiin a phi chung tawh mai a. Kudam kawngka bulah chuan thingthi in a zu dak thla a, "SArah, mi an lo kal ania. Sarah, security guard pakhat a lo kal ania." tiin a zu au va.

Mahse SArah-i chuan a rawn chhang hauh lo, kudam chhung chu a reh vung vung mai. Chutia Sarah-in a lo chhang thei bawk si lo chu a hlauthawng tawh hle a, chhuk ve ngawt lah thil tih chi niin a hre bawk si lo. A thlan a tla bawrh bawrh a, security guard lah chu a rawn thleng tep tawh mai bawk si.

Tih ngaihna dang a hre tawh lo, "Sarah, ka khar lawk mai aw.." tiin kudam kawngka chu a khar a, tichuan chain chu a han huikhawm nawk nawk a, a bag ah chuan bold cutter chu a thun leh vat bawk a. Tichuan hnimbuk ah chuan theh phei tawp, hnah ro ho chu chhar khawm leh thuak thuakin kudam kawngkhar hliah tur chuan a vur leh ang mawlh mawlh a.

A zo fel chiah tih ah chuan security guard pawh chu a rawn thleng nghal, Siamtea pawh  a ding ngil nghal deuh at mai. Security guard chuan rum fe hian Siamtea chu a han melh a, "Hetah enge i tih? Tunge i nih?" a han ti vin deuh thak a. Hlauh vanga za lo taka nuih suk pah hian, "Eng..eng tilove, hei...ka tei kual mai mai a." a lo ti bah nuai mai.

"Hotel guest zinga mi i ni em?"

"Aih nilo ka pu."

"Chuti si hetah enge i tih a, hotel hnunglamah hian pawn lam mi tan kal kan phal hleinem?"

"Aa.. a nih chu, ka lo hre lova."

"Enge i tih reng reng a, mawh?"

"Mei..meizial ka zu a, ka kal mai mai mawle."

Security guard chuan rinhlelh hmel tak hian hnai set sawtah chuan a en vang vang a, "Khawngaihin kal sawn vat rawh, helai ah hian awm kan phal lo." a han ti chang deuh fak a. Siamtea pawh chuan inthlahrun hmel tak hian, "Awle, ka.. ka tihpalh." tiin a kal ve mai bawk a. Mahse a kal thui lo, security guard chuan kudam kawngka awmna zawn chu a en vang vang a.

Chutia a hawi sawn zawk hlan chuan Siamtea chu thingkung pakhat phenah chuan a biru a, security guard chu a bih thla a. Guard chuan hnah ro vel chu a kut chuan a han ti fai thuak thuak a, kawngkhar chu a lo lang ta. A han enfiah leh vel a, chain chu a lo awm kawkalh nuai avang chuan cheh chah a ni tih a hriat lioh hlauh mai.

Thingkung phen atang chuan Siamtea chuan hlauthawng tak leh thlan tla bawrh bawrh chung chuan a lo la engthla ve reng a, a chil a lem deuh khawlh khawlh a. Security guard chu a tho va, hnah ro chuan kudam kawngkhar chu a vur leh a. Siamtea pawh a thaw huai mai, tichuan security guard pawh chuan hotel lamah chuan a let phei ve leh mai bawk.

***************************************************

Sarah-i chuan Siamtea au ri chu a lo hre lo reng reng a, a hma zawn wardrobe hlui, thing atanga siam. Hmuar vek tawh leh bal em em mai chu a en reng a. A chhungah chuan mi an awm ang mai hian a che leh dut dut thin, hlau chung chung chuan Sarah-i chuan ngawi reng hian a en a.

Wardobe chhung atang chuan tap ri a hre ta, a inhnit ri feih feih a. A huaisenna zawng zawng sawm khawmin Sarah-i chuan ava pan hnai t(r)alh mai, "Lily.. nangmah i ni em?" a han ti deuh tawp a. Chutah tap thawm chu a reh ta daih a, Sarah-i pawh a ding chat mai. Boruak chu a reh em em mai a, Lily, puih che ka duh a ni. Nangmah i nih chuan rawn inlan rawh, engkim ka bulah sawi rawh." a han ti ve leh ringawt a.

Mahse boruak chu a reh ngaiin a la reh reng thung a, SArah-i thlan fim chu a tla bawrh bawrh tawh. Muang chang chuan wardrobe lam pan chuan a va pen hnai leh a, a thaw dep dep mai. Chutah wardrobe bang chu chhunglam atang tih hriat tak hian a rawn inchum ri leh dup dup mai a, Sarah-i phu nasa lutuk chu a zuang dawrh mai.

Second 10 dawn lai mai chu a inbeng ri vak vak a, SArah-i pawh thaw hlawp hlawp chung chuan a ding ngawi reng ringawt. Mahse a hma ang bawk chuan thawm chu a tawp leh daih a, boruak pawh a reh leh ta thiap mai. Sarah-i chuan thawk a han la leh te te a, wardrobe lam chu a va pan leh t(r)alh mai.

Hlau hle mahse thudik hriat chhuah ngei a duh a, Lily chu lo la dam pawh nise, lo thi tawh pawh nise. A tihnat duh bik chu a ring lova, a pan lui zel a. Wardrobe bul takah chuan a ding a, a han thaw leh deuh hluai bawk a. Tichuan wardrobe chu a hawng thut mai, bak panga vel an rawn thlawk chhuak nghal sup sup mai a.

Sarah-i phu nasa lutuk chu a petek dawrh a, a thal tawp mai. Rang lutukin a tho va, wardrobe chhung chua  enfiah nghal vat a. Mahse engmah a awm lem lo, a thaw deuh huai a. A phone chu a en a, tlai dar 3 a lo pel duai tawh. Eng eng emaw chu a han en kual leh ang thuak thuak a, mahse a hnuchhui mekna a pui thei tu tur awm ang chi thil pawimawh a hmu tawh lem lo.

***********************************************

Security guard kal liam veleh chuan Siamtea pawh chu a tlan phei leh nghal vat a, kudam kawngkhar thlunna chain chu a phelh leh sawk sawk a. A phelh zo fel chiah tih ah chuan kawngka chu a rawn innam hawng a, Siamtea chu a phu nasa kher mai. SArah-i chu a rawn chhuak a, "Tumah an rawn kal lem lo em ni? Tinge i lo khar daih a?" tiin a rawn zawt nghal a.

Siamtea chu a lo chek hlur a, "Kal ang chu, ka au che a..i hre thei bawk si lova." tiin a lo chhang a. Sarah-i chuan a en hru a, "Min au maw? Min auh lai ka hre lo reng reng. Tunge lo kal a?" tiin a zawt leh nghal. "Security guard mawle, ka khar tawp a. Mahse min man lo hlauh, enge i zu tih a?" tiin Siamtea chuan a lo zawt let ve leh a.

Sarah-i chu a thaw hak a, "Thil hlui vel hlir a ni, i sawi ang chiah khan." tih ringawt chuan a chhang a. Siamtea chuan en deuh hu in, "Chuan enge i rawn hmuhchhuah?" tiin a lo zawt leh a. Sarah-i chuan a lu a thing a, "Engmah min pui theitu tur ka hmu lo, a rimchhe hle a...chuzawng chu a nimai." a lo ti sam leh et a.

Siamtea chu a han thaw deuh hak a, "Ava ho mai mai e aw...min man phah tep asin le." a ti nuah nuah a. SArah-i chu a inbeng fai sawk sawk a, "Kal phawt teh ang." tiin kal mai a tuma . Siamtea chuan lo ti dingin, "NGawi lawk teh, hei hi ti hian kan kalsan tawp dawn tihna em ni?" tiin kudam kawngkhar, leia mi chu a kawk a.

Sarah-i chuan chhang lem lo chuan hnah ro chuan a han khuh tha leh ang thuak thuak a, "Tikhan a nimai, ka la kal leh thut duh maithei a." a la ti zui. Siamtea chuan a en leh hu a, "Engmah i zu hmuh chuan loh kha, an man zawk ang che..kal tawh suh." a lo ti vat a. Sarah-i chuan chhang lo chuan a kalsan daih a, Siamtea chuan ava zui ve nghal bawk a.

Security hmuh loh tur bawk chuan hotel lam chu an pan leh a, "Tumah, engmah hrilh lo la...tuman an hre lo a nimai. He case hi ka chhui chhuah hunah chuan engmah buaina a awm dawn chuang lo, lo lungngai lo phawt rawh." tiin Siamtea bike lam an pan pah chuan Sarah-i chuan Siamtea chu a thlamuan char char a. '

*********************************************

SArah-i chu a roomah a chho tlang nghal a, diary chu a han keu leh a. Pen tui pherh nuai mai chu chhiar a har ngang mai, mahse eng chiah nge Lily hian a diary ah chuan a ziah a hriat ngei a ngai si. Tih dan tur a ngaihtuah vang vang a, minute 5 dawn a ngaihtuah hnuah chuan a hrechhuak ta.

Diary chu chhiar a han tum nawn leh a, chhiar chu chhiar theih ruai ruai mahse a pherh lai vel chu eng tak nge a nih hriat a har takzet. Dawhkanah chuan ama diary chu a chhawp a, a bulah chuan Lily diary chu a dah ve bawk. Tichuan phek khatna atang chuan a han copy thla char char a, a chhiar theih loh lai, pen tui pherh lai pawh chu a thu(words) tur awm ang chu a hriat theih phah ta zel a.

Phek hnih lai mai chu a ziak zo thei ta, ziah teuh law law chu tha ti viau mahse Sarah-i chuan a nghak thei tawh hlawl lo. Paper phek hnih chu a en vang vang a, a chhiar dawn chiah tih ah chuan t(r)ek a rawn tla ri dur mai. Sarah-i pawh chu a phu nasa em em a, ruah a rawn sur chhunzawm nghal chiam bawk.

Maruata lah a lo la haw der mai si lo, ruah chu mak tak maiin a rawn tam thut lehnghal a. A pasal hual Maruata chu a ngaihtuah takzet, phone phawrhin a call nghal a. Mahse a la tlang thei lo zui, signal pawh a bo nghal deuh duak mai. SArah-i chu a ngaih a tha lo hle a, mahse tih theih dang a nei si lo. Lily diary a copy chhawn, paper phek hnih chu a chhiar ta a -

'Ka hming chu Lily Zothanpari a ni a, Hahdamna Run hotel ah hian ka thawk ve a. Diary hi ka ziak ngai lova, han ziah vak dan pawh ka thiam lem lo. Mahse ka rilru ah a awm reng a, zik tura min tur tu hi an awm tlat a ni. He diary ka ziah chhan chu ka nuna ka hlim ber tum ka tawng ve a, chuvang chuan tawngkam thiam lo takin ka han ziak ve ta thawr mai chu a nih hi.'

'He Hotel HAHDAMNA RUN hian ka nuna ka mipa tawn tawh a, ka hmangaih ber mai min hmuh tir ka ti lo thei lo. A hming chu Fela a ni a, kan hotel guest a ni thin. He kan khaw te tak te, in 100 tlin tawkna khua ah hian kei fahrah, rethei ve tak mai min rawn thlang daih mai hi ka phu lovin ka va hlim si em.'

'A nui hmel mawlh mai kha, ka mitthla ah hian a cham reng mai. Pehhel kual duah lovin ka han sawi tlang law law ange, U Fela hi ka vawikhat hmuhna atang khan ka mit a la em em a. MAhse anni ang khawpui mi, tlangval hausa tih hriat tak mai chu keini ang mi rethei tan chuan chance a awm dawn lo tih chu chiang sa ah ka dah.'

'Rin loh tak maiin min ngaina em em a, ka thawhpuite zingah pawh min be zing ber ang. Duty ka nin theih thin tehreng nen, U Fela a lo thlen tawh hi chuan a cham chhung chu nilenga duty mai pawh ka duh rum rum hial thin. Kan inhmu zing phian lehnghal a, a chhan pawh room service-a ka awm vang a ni.'

'A room zawn ka thlen hian ka zam thei em em a, a room ka tihfai chhung ringawt pawh hian ka lai lutuk hi ka thaw a chham hman tep tep zel. Vawikhat phei chu kawr ha lovin a lo awm a, khatiang em em khan ka taksa kha a lum pup pup theih ka ring ngai lo. Engtin emaw tak hian ka awm, ka duh ngawih ngawih hi a ni ber mai.'

'Kan innel telh telh a, mahse rei tak awm thei a ni si lo. A haw a ngai leh thin a, a lo thlen leh hun beiseiin nitin hian ka lo nghak thin. Kan manager hi hotelah hian a rawn kal vak ngai lova, chuvang chuan a thawka te pawh hi mikhual neih tlem chang phei chuan kan free ve thei ham ham khawp mai.'

'Tum khat chu mikhual kan neih tlem lai a ni a, room 3 vel bak hman a ni lo. Front Desk-a kan titi khawm laiin rin loh tak maiin U Fela chu a rawn lut thut mai a, kan khuaah kar 2 chhung a awm tur thu a rawn sawi mai kha chu ka lawm lutuk kha ka zuang lo chauh. Min rawn be hmasa ber leh ngei bawk, min nuih sen sen a.'

'Khawvel mipa ah hian ani ai tha hi ka mitah chuan an awm leh tawh lovang chu ka ti ngam lova, mahse an vang khawp ang le. Tichuan chumi tuk atang chuan a room chu ka tifai leh ta thin a, kan inpawh telh telh mai. Mahse ka duh thu chu hrilh ka tum loh mai bakah hrilh pawh ni ila min duh ve dawn chuang lova, hetia a ruka lo star em em hi a him berin ka hria.'

'Morning shift ka neih lai a nih avangin zing lamah hlir chuan a room chu ka tihfai sak a, a chang phei chuan la thu rih tur te hian min sawm thin. KA hmu zing tulh tulh a, a ni tel mai chuan ka duh tial tial a. Kan inpawh tial tial mai bawk nen, duty chu nuam ka ti thin takzet. Chhun lamah a chhuak bo daih zel a, a lo haw hma in ka shift a zawh tawh chuan min rawn thlak daih zel thin bawk nen.'

'Ka haw pah hian ka hmuh thut takin tiin ka zawng ru nasa thei lutuk, mahse ka hmu ngai lem chuang lo. In ai chuan hotel hi nuam ka ti zawk, U Fela awm vang chu ni tho mahse. Nu leh pa nei tawh lo ka ni a, tette atanga fahrah ka ni. KA nu hian cancer vangin kum 8 ka nih khan min boral san a, kum 14 ka nihin ka pa in nupui dang neiin min tlan bo san daih bawk.'

'Ka pa nau te inah ka awm ta ringawt a, ka pa nau, ka patea nupui lah hian min ti duhdah thei bawk si. Ka thawh chhuah ve te pawh hi cheng khat pawh ka chang ngai lo, hlawh kan lak rualin min chhuhsak nghal vek zel. Ka mamawh te ka dil ve lah hian pawisa heh min ti a, min hau daih zel lehnghal.'

***************************************

A chhiar lai chuan kawngka a rawn ri rawk a, Sarah-i chuan rang lutukin Lily diary chu a thukru nghal vat a. Maruata a lo ni, a rawn huh deuh pur lehnghal. SArah-i chuan diary chu a dahtha nghal vat a, tichuan Maruata chu ava buaipui a. Maruata lah chu inphelh sawk sawk pah hian, "Khai... a vawt lutuk." tiin a khur bauh bauh va.

Towel la in Sarah-i chuan a lo hru hul a, "I huh hman tho alaw, i van lo haw har reng reng ve?" tiin a lo zawt nghal a. Maruata chu a inthlah nghak sawk sawk a, "Nia, kan titi tui deuh mawle...mahse good news erawh a awm vak hmel chuang lo." a ti ta daih mai. SArah-i chuan a en hu a, "Eng nge awmzia? Engtin nge i va biak reng reng a?" tiin a zawt leh a.

"A tir chuan ka rin ang ngeiin dawt mai mai a nih thu in min chhang a, mahse eng tin tin emaw a awih turin ka sawi chho zel a. Ka hriat chhun chu kan khaw tlangval pahnih, Siamtea leh Nunmawia te rui leng haw khan an hmu e an tia, khatih lai khan kan hnathawkte an lungawi lova, hlawh lamah...an nuar a, hotel kan khar hrih kha ania. Khami hnu khan sawi a awm leh zauh zauh va, keipawn vawi tam ka fiah a, keimah chauh pawn, mahse engmah a awm ngai tak tak lo tiin min chhang a, ka sawi zawm pawn a sawi tha duh tawh lo." tiin Maruata chuan a chhang a.

Sarah-i chu a lungawi hmel vak loh, "Ka sawi mawlh mawlh kha, ka lo kal ve ang ka tih kha. Awm ila chu ka sawi belh tir thei awm e, min ring tlat lo a nih kha." tiin a tum deuh bur a. Maruata chu a lo khi suk a, "I hre lo a nih kha, putar ti kher kher, phunchiar, duh khirh leh mahni thuduh ang chi ka ania e, biak a har lutuk." tiin a chhang leh a.

"Chuti si enge in titi tuina chhan, biak har viau si. I rawn haw tlai phah lehnghal a, ka ngaihtuah hman zia che hi hre rawh."

"Aww...amak bawrh bawrh thin, thinrimna tur a awm hleinem. Thildang min sawipui chiam a, chuvang alawm."

Sarah-i chuan a chhang tawh lo, a thu ngawi reng a. Maruata chu bathroom ah lutin, "Ka han intleuh ve zuai zuai ange, zanah kan sawi chhunzawm dawnnia." tiin a inbual san ta daih a. Sarah-i chu a han thaw deuh hak a, kudam hlui a hmuhchhuah chungchang pawh chu engmah a la hrilh duh rih lo.

***********************************************

TO BE CONTINUE