THE CRAWLING WOMAN (Spanish : Repente Mulier) MIZO SUPERNATURAL HORROR STORY Written by : Aaron Malsawmdawngzuala Chapter -3

 THE CRAWLING WOMAN

(Spanish : Repente Mulier)

MIZO SUPERNATURAL HORROR STORY

Written by : Aaron Malsawmdawngzuala

Chapter -3

*************************************

Room ah chuan Sarah-i chu a rawn lut a, Maruata pawh chuan a rawn zui ve nghal. Sarah-i chuan khumah chuan Maruata chu a pawt thu titih nghal a, "Enge ni a?" a lo ti hu mai. Sarah-i hmel chu a serious takzet, "He hotel a thawk pakhat, Lily tih hmingpu.. a bo, kum 10 kal ta tho khan a bo." a han ti a.

Hriatthiam loh hmel tak hian, "Chuan.. chu chu ngati nge?" Maruata chuan a lo ti leh hu mai. Sarah-i chu a han thaw hak a, "Maruat, ngaihtuah chiang ta che. Kha thla an hmuh lai, a lar hunlai vel kha chanchinbu a kan hmuh ang khan 2011 kum a ni a, October thla a mi a ni. Chuan Lily bo kum pawh 2011 March a ni a, co-incidence ni theiin ka hre lo." a han ti deuh chiam a.

Maruata chuan Sarah-i chu a en vang vang a, "Chuan... enge ni vak a? March ah a bo va, Octorber ah thlahrang an hmu a. Enge chu chu a inzawmna? Thlahrang an hmuh pawh chu tak tak a ni nge ni lo pawh kan hre lova, Lily bo nen inthlunzawmna tur a nei em ni?" a lo ti daih mai.

SArah-i chuan rum fe hian a melh a, "Hemi hotel bulah hian kha thlahrang kha an hmu a, Lily hi hemi hotel a thawk a ni. A duty lai rengin a bo va, kum 10 chuang a bo tawh chu a ni der a. Kha thla an hmuh kha Lily chu lo ni ta se, chuan engvanga Lily kha bo nge, engtia bo nge tih pawh tuman an la finfiah lo." a han ti vin deuh hlur a.

Maruata chu a han thaw deuh hluai a, "SArah, Lily chauh hi mi bo awmchhun a ni lo. Mizoramah hian mi engzat nge chin hriat lohva bo hlen hmak awm tawh? Tam tak an awm, kan pian hma daih atang tawh in. Kan ram chu sawi loh, America ah pawh kumtin mi sang chuang an bo ziah a, keini aia ram changkang leh fing zawk te pawhin an chhuichhuak vek seng lo anih hi. A thuhrimin tinge thlahrang tih vel pawh chu i buaipui em em a, i awih reng reng em ni?" tiin a lo zawt leh daih mai.

SArah-i chuan Maruata chu a en vang vang a, "Aw.. a chhan chu Lily hmel, Lobby-a an tar khu, banga an tar khu maw.. ka mumanga ka hmuh thin hmeichhia kha a ni." a ti chang ta fak mai. Maruata chu a meng deuh hrawk a, "Eng a? Lily thlalak chu Lobby-ah an tar amaw?" a ti hu mai a.

Sarah-i chuan a lu a lo bu nghat a, "Tar e.. ka hmuh vang alawm hetah ka hruai luh nghal che." tiin a lo chhang a. Maruata chu a ngawi vang vang a, room atang chuan a chhuak deuh thut mai. Lobby lamah chuan a chhuk ve a, a thlen thlak veleh chuan a hawi kual nghal ruai mai.

Lily thlalak chu a hmu ve ta, a en vang vang mai. A han ngaihtuah chiang a, amah ngei pawh khan engemaw thil mak tak chu a tawng ve tawh ngei a nih kha. A mitthla ah chuan a chhang funna chanchinbu hlui, an awm mekna Lawirang Khua a thlahrang an hmuh thu ziahna lai ngei mai inziahna a hmuh te chu a rawn lang a.

Chu mai bakah khatia chanchinbu a en lai khan thingpui dawr sira zunin phena tu emaw bawkvak phei zawk a hmuh te kha a hrechhuak ve leh bawk a, Sarah-i hian dawt a sawi chu a ring ta bik chiah lo. Mahse thlahrang leh ramhuai tih vel awih ngai lo leh mahni tawka inla huai ve tak a nih avang pawh a ni mahna, a la awih pumhlum duh bik thak lo.

*****************************************************

Sarah-i chu room ah chuan amahin a awm mek a, khumah chuan thu in a inngaihtuah muk hmel hle mai. Chutia ngawi renga a thut lai chuan bathroom lam atang chuan thawm a hre ta tlat mai, tui inherh haw ri a nih hmel. Mak a ti hle mai a, bathroom lam chu ava en nghal vat a.

Mak tak maiin bathroom kawngka chu a tlem te chuan a lo inhawng reng hi a lo ni a, a hma khan a inkalh thlap khan a hre bawk si a. Engtik laiin nge a hawn a hre der mai si lo, mak a tih rual chuan a thla a muang chiah lo. Maruata ber lah a chhuk ve daih mai si a, a lo la let der mai si lo.

Khum atang chuan a tho chhuak a, zawi muang chuan bathroom lam chu ava pan a. A chil a lem dawk a, tui inherh haw ri lah chu ala hriat reng mai bawk a. A va pan hnai zel a, chutah bathroom chu a han hawng thut a. Tumah an awm lo, tui inher haw ri pawh chu a tawp chawpchilh nghal daih mai.

Mak a ti lutuk chu a ding ngawi reng ringawt, bathroom kawngka chu a khar tha a. A thaw deuh huai mai, a ruk tak chuan hlau viau mahse a thil buaipui mek lai chu a hlawhtling dawn ni a hriatna chu ala nei fan a. Maruata pawh chu rei a ti tawh khawp mai, sana a han en a. A lo tlai tawh phian lehnghal, darthlalangah chuan a in en a.

Chutia a hmai vel a tuai mawlh mawlh lai chuan darthlalang atang chuan a hnung tukverh pawna, hmeichhe pakhat lo ding reng chu a hmu thut mai. A mumanga a hmuh thin, Lily hmel ang tak kha a ni bawkin a hria. A ding nghal vat a, tukverh lam chu ava hawi nghal. Mahse tumah a hmu leh tawh lo, mak a ti kher mai.

Tukverh lam pan chuan ava kal a, a hawng nghe nghe bawk. A dak chhuak a, tumah a hmu bawk si lo. A inngaihtuah vang vang a, "Amah kha a ni, kha hmeichhia tho kha a ni." tiin ama hriat tham lek chuan a phun sap a. Chutah room kawngka chu a rawn inhawng thut a, ava phu nasa tehreng em.

A leh hawi nghal vat a, Maruata a lo ni. Sarah-i chuan vin lek lek hian, "Khawnge i bo daih a, i va rei thin ve?" tiin a lo zawt nghal a. Maruata chu a thaw hak a, "Lily i tih kha, a thlalak chu ka zu en ve a." tiin a chhang a. Sarah-i pawh chu a thaw huai a, khumah chuan ava thu leh a. Maruata pawh chu a bulah chuan ava thu a, "Chuan.. nih leh enge i ngaihdan?" tiin Sarah-i chuan a han zawt leh a.

Maruata chu a ngawi leh deuh vang vang phawt a, "Inzawmna a neih ka la ring chuang lo, inzawmna a lo nei a nih leh i tan a tha a nimai a." tih ringawt chuan a chhang a. Sarah-i chuan a chhang let lo, a ngawi reng a. Maruata chuan a han en vang vang a, a kutah chuan a vuan a.

Nuih deuh suk pah hian, "Lungngai suh, hei leh chen ka zui ve tawh che a. Ka pui em em ang che, i tan ka awm alawm." zaidam tak chuan a han ti a. Sarah-i pawh chu a lungawi ve leh ta deuh va, a lo nuih let ve sak mai. REi vak lo an titi dun leh hnu chuan beer la bang te chu an lem zova, tichuan mu tur chuan an inbuaitsaih ta a.

***************************************

Zanlai ah chuan bathroom lama tui haw ri chuan SArah-ui chu a ti harh leh a, a meng deuh kawk mai. A bulah chuan Maruata chu a lo mu tawh hauh lo, bathroom lamah a awm a nih ringin engah vak chuan a ngai lova. Muthilh leh mai chu a han tum a, mahse a thei tawh rih tlat lo mai.

A mu meng kur ringawt a, inchung ceiling chu a en vung vung a. Tui haw ri chu a rin ai tak chuan a rei a, a ri atang chuan bucket pawh a khat liam tawh tih a hriat hle bawk. Mak a ti deuh chu, "Maruat, tui kha off ta che, a liam pur pur tawh kha?" a han ti deuh lauh lauh va. Mahse chhangtu an awm lo, "Maruat, Maruat... amak e aw.." a ti nuah nuah ringawt a.

Tui haw lah chu a la ri reng a, a ngaih tha lo chu a tho chhuak a. Bathroom lam chu ava hawi a, a hma ang bawk khan bathroom kawngka chu chhe te hian a lo inhawng leh a. Mak a ti kher mai, "Maruat, kawngka pawh i kalh nange?" tiin a han be leh a. Mahse chhanna a la dawng chuang lo, khum atang chuan a tho chhuak a.

A pasal hual chu a hming lamin a han ko leh lauh lauh va, mahse a la chhang chuan der mai bawk si lo. A ngaih a tha tawh lo takzet, bathroom lam chu ava pan ve ta a. Tui haw ri lah chu a la ri reng a, bathroom kawngka bul chu a huh deuh dup bawk. Sarah-i chuan ava pan hnai zel a, bathroom atang chuan tui a rawn luang chhuak tawh hial mai.

SArah-i chuan a mumang a nih leh ngei a ring a ni ngei ang, a han insik vel thin a. MAhse a tak tak ni ngei chuan a hre bawk si, mak a tihna chu hlauhna chuan a rawn thlak a. A thlan fim a rawn tla bawrh bawrh mai, tichuan ava kal hnai zel a. A thaw dep dep tawh, bathroom chhung chu hlau tak chung chuan ava bih a.

Mahse mak tak maiin tumah an awm lo, tui chu amah in a lo la haw reng a. Khum lam chu ava en leh a, Maruata chu hmuh tur a lo la awm chuang lo. Bathroom chhungah chuan a lut a, tui chu a va off a. A off rual rual chuan bathroom kawngka chu a mah in na em em hian a rawn inkhar thut mai a, Sarah-i chu a phu nasa kher mai.

Rang takin ava tlan phei a, kawngka chu hawn a tum ngial a. Mahse bathroom pawn lama kalh hnan ang mai hian a hawng thei thak lo, a chum vak vak a. Ring tak hian, "Maruat, Maruat...tu emaw tal in awm em? Lo hawng teh u, khawngaihin lo hawng ru." tiin a rak chiam chiam a, a mangang takzet.

Chutah mak tak maiin bathroom kawngka chu amahin a rawn inhawng thut mai a, Sarah-i pawh chu a ding ngawi reng ringawt. Bathroom atang chuan a han chhuak a, a room chhung chu a lo thim deuh ruih mai. Light a off lai a hre si lo, engkim mai chu mak a ti em em tawh mai a.

Chutah kawngka a la rawn inkik thut zui, a phu leh deuh awrh mai. Kawngka inkik ri chu a ring tial tial a, SArah-i chuan a hawng ngam mai lo. Chutah inkik mai a ni tawh lo, a chum hian a rawn inchum ri bur bur hi a ni ber tawh zawk. SArah-i chuan muang chang chuan ava pan hnai a, "Tunge, tunge ni? Maruat, nangmah i ni em?" a han ti khur dar dar a.

Mahse chhanna a dawng lo, a chhanna dawn chhun chu kawngka inchum vak vak ri chauh chu a ni. A chil a lem dawk a, hlau chung chung chuan ava pan hnai leh ta a. Kawngka inchum ri lah chu a rei telh telh a, a ring telh telh bawk. Sarah-i chuan hlau hle mahse ava pan hnai ve zel a, chutah hawn a tum, a va ban chiah chu room light chu a rawn eng pup mai le.

MAk a ti lutuk chu a ding chat a, a hawi kual hru mai. Chutah khum lam ava en leh a, Maruata chu khumah chuan a lo thu reng a, light a lo on chu niin. Mak tih hmel tak hian Sarah-i chu a en hu a, "Ehe, enge khatah i tih a?" tiin a zawt a. SArah-i chuan mak a ti lutuk chu chhan mai ngaihna pawh a hre lo, Maruata chu a en vung vung ringawt mai.

"Ma.. Maruat, i awm... i awm reng amaw?" Sarah-i chuan a ti bah nuai mai a. Maruata chuan mak ti tak hian, "Enge i sawi awmzia, hetah hian ka mu reng alawm. Sarah, enge khatah khan itih a?" tiin a lo zawt nawn leh a. SArah-i chu a tap lek lek tawh mai, "Maruat, ka hlau... kawngka rawn inchum vak vak ri hi i hre ve lo em ni?" tih pah chuan ava pan phei a.

Mahse Maruata bul ava thlen hma chiah chuan kawngka chu a rawn inhawng ri rawk a, SArah-i pawh a ding leh chat mai. Kawngka lam chu ava hawi phei a, chutah khanu, Lily hmel ang chiah, rapawm tak mai leh sam thur bum mai chu kawngka zawnah chuan a lo ding reng mai a, Sarah-i lam chu rawn hawiin zau em em hian a ka(mouth) chu a ang ta vak mai.

*********************************

SArah-i chu a meng kawk a, rang lutukin a thu chhuak nghal. A thlan fim chuan a lo bual huh vek a, a han hawi kual chu khumah chuan a lo awm reng a. Khua lo var tawhin sava chiap nak nak ri pawh hriat tur a awm bawk, a mumang a ni tih a hriat chuan a thaw huai mai a. DArthlalang hmaah chuan Maruata chu a lo inen mek a, "Khai, iva harh chiang em em ve mawle.." tiin a lo khi suk a.

SArah-i chuan mak tih hmel tak hian Maruata chu a en a, pheikhawk pum a lo bun at mai. Track jacket a lo ha bawk a, "Khawnge i kal dawn?" tiin SArah-i chuan a zawt hu mai a. A pheikhawk hrui suih that mawlh mawlh pah chuan, "Kan walk ve zuai ang e, tlan a nawm hmel emai lamlian khu... i chauh ka ring a, ka kai tho duh lo che anih kha." tiin Maruata chuan a lo chhang a.

SArah-i chuan a mit chu a han tuai a, "Nizanah... ih... ka tawngvai nasa em? Ka sawi awmzia chu, ka mang a chhe viau em? KA tho a hial lo maw... engtin emaw ka awm em?" a han ti bah deuh nuai a. MAruata chu a khi leh suk a, "Tho a love, i tawngvai lem lo bawk. Mahse i rum nasa, i che deuh hrut hrut bawk." tiin a lo chhang leh a.

"Chuzawng chu em ni? A bak engtin mah ka awm lo tak tak maw?"

"AWm lo, ka mut tlem phah alawm. I rum ring lutuk a, i taksa chauh vang an ni ngei ang."

SArah-i chuan a melh ngai chu a melh run a, "Ni lo, ka mumang that loh vang zawk." a ti zawi sap a. MAruata chuan a rawn melh a, "Mangchhia i mang leh tawh a nimaw...ka ring reng a, i phu deuh uih uih bawk sia." a rawn ti ve ta chiah a. SArah-i chu a thaw deuh hluai a, "Amak lutuk, a tak ang chiah hian ka feel ziah mai lehnghal a, a hrehawm zawk." a ti nuah nuah mai.

Maruata chu a insiam zova, "I tawngtai tlem vang a nih chiah chu, haha. Engpawh nise, i lo walk ve duh em? Duh leh ka lo nghak ang che, han insiam ve thuak thuak la?" tiin a sawm a. Mahse Sarah-i chu exer lak mood ah pawh a awm thei lo, "Aih.... nangmahin zu tlan rawh, mut ka kham lo, ka mu leh dawn." tiin a lo chhang a.

Maruata pawh chuan chhang let tawh lem lo chuan a chhuahsan ta a, Sarah-i chu khumah chuan a han let leh tual a. A mumang hlauhawm tak mai chu a ngaihtuah let leh a, "Henu hi tu chiah nge maw  anih le, Lily chu a ni thei mai angem le?" tiin a inzawt mawlh mawlh a, a thla chu a muang mawlh lo.

**********************************************

Chawhma dar 11 vel a ni a, thingpui dawr pakhatah chuan SArah-i chu thu in a diary ah chuan thil a ziak leh mawlh mawlh a. A hma zan lawka a mumang mak tak mai leh rapawm tak mai te pawh chu a ziak chhuak tel bawk, chutih lai chuan dawr chhungah chuan Maruata a rawn lut a.

SArah-i chu rawn signal zeuhvin, "Kan kal thei e." tih leh chhuah a rual lehnghal a. Sarah-i pawh chu a tho va, Maruata chu a zui chhuak ve bawk a. Motor lam an pan pah chuan, "Engtin nge i va zawn reng reng a?" tiin Sarah-i chuan a zawt a. Maruata chu a khi suk a, "A mak lutuk, an sawi tha duh vak miah lo mawle, hemi chanchin hi. Ka zawt kual nasa, bazar nu pakhatin min hrilh tawk a nimai." tiin a lo chhang a.

"Tunge ang hming?" tiin SArah-i chuan a zawt leh a. Maruata chuan thawk deuh halh pah hian, "Siamtea tih chiahin a sawi a, a thianpa, a hmu ve tu pakhat zawk kha chu Nunmawia a nia, nikum khan a boral tawh an ti." tiin a lo chhang leh a. Motor chu an thleng a, "Khawilai nge an in chu i hre chiang amaw?" tiin a han zawt leh a.

Maruata chu a han ngawi vang vang a, "YMA Hall hnuaia kawng tereuhte ah khan in tlan anga, in palina, assam type, a hring(green) tih ringawtin min hrilh kha ania. Kan zawng hmu thei mai ang, mi kan zawt zel mai dawn nia." tih leh motor chhunga luh chu a rual nghal a. Sarah-i pawh chu a lut ve a, tichuan an tlan ta a.

An tlan mek lai chuan an inbiak chhunzawm reng bawk a, "Min lo chhang tha duh ngut ange maw, Siamtea an tih pawh chuan...a khaw mi te reng reng khan an sawi tha duh der mai silova." Maruata chuan a han ti deuh nuah nuah a. Sarah-i chu a han thaw deuh hak a, "An hmuh dan vel i zawt tel em?" tiin a lo zawt leh a.

"Zawt tel ve bawk ang chu, an thiandun rui haw kha... hotel ah khan hmeichhe bawkvak ang deuh kha an hmu a, an va fiah kha thlahrang chuan a lo um haw tih vel a ni."

"Nunmawia zawk chu engtia thi nge i zawt em?"

"ZAwt miah lo, Siamtea te in kha ka zawt ngawrh khawp mai. Ka hrethiam lo, a tu a te mai pawh hian an sawi tha duh der mai silova.. amak ka ti angreng."

"Siamtea leh Nunmawia te hian Lily lakah hian engemaw tak an lo ti tawh anga, chuvang pawh chu a nimaithei asin."

"Aa.. chutiang a ni lovang, keichu ka la ring thei chiah chuang lo."

SArah-i chu a ngawi deuh vang vang a, "E taka, nizan ka muthilh laiin bathroom ah i lut em?" tiin a zawt deuh thut mai. Maruata pawh chuan a en deuh hu a, "Lut nang, nga ti teh thut nge?" tiin a lo zawt let ve nghal a. Mahse SArah-i chuan a zawt zui duh ta lem lova, "Eng ni love.. ka mumang nen ka hriat pawlh nuai a." tiin a chhang a.

*************************************************

Siamtea te in ni a an sawi chu an thleng ta, motor atang chuan SArah-i leh Maruata te chu an chhuak a. SArah-i chuan in chu a thlek deuh vang vang a, "Ngati vung vung nge, i mumangah i lo hmu leh der tawh em ni?" tiin Maruata chuan a han fiam hram a. SArah-i chuan a lu thingin, "Chutiang lam a ni lo, a rawng hi a nalh lo ka ti em a, chuvang mawle." tiin a lo chhang daih mai.

Maruata chuan kawngka chu a han kik karh karh a, rei deuh fe hnuah chuan pa pakhat hian a rawn hawng a. Polite tak hian Maruata chuan, "Siamtea te in a ni em?" a han ti a. Chupa chuan Sarah-i leh Maruata te chu a han en deuh vang vang phawt a, "Ni e, tute nge aw?" tiin a lo zawt let a.

SArah-i chuan a aw a han thian kharh kharh a, "Englo, ka pu... journalist ka nia. Ka project chungchangah Siamtea hi biak lawk kan duh a, a rem thei angem? Amah inah a awm em, kan va hmu duh em.." tiin a dil a. Chupa pawh chuan a lu a bu nghauh va, "Lo lut rawh u, Siamtea u ka nia. Bathroom ah a awm lawk a, tikhan lo nghak rawh u,  lo thu rawh u." tiin a sawm lut a.

Minute khat vel hnuah chuan bathroom atang chuan Siamtea chu a rawn chhuak a, "Mama, kha...an hmu duh che a." tiin a u chuan Sarah-i te chu a lo kawh hmuh vat a. Siamtea chuan a en vang vang a, a hriat ngai mi an ni der mai silo chu mak tiin a ding ngawi reng ringawt. SArah-i leh Maruata te chu an ding a, "Siamtea maw i nih?" tiin Sarah-i chuan ava chibai a.

Lo chibai let pah chuan, "Aw ni e, tute nge in nih a?" Siamtea chuan a ti deuh hu mai. SArah-i chuan a aw a han thian leh kharh kharh a, "Journalist ka nia, ihh..i ngaihdan enge kan hre lo nangin, kawm che kan duh deuh a ni." tiin a chhang a. Siamtea chuan a la hrethiam chiah lo kher mai, "Engthilah maw?" a han ti leh hu a.

Hreh hmel tak hian SArah-i chuan, "HAHDAMNA RUN Hotel bula.. kum 10 kal ta a i thianpa Nunmawia nen, thla inhmuh kha.. khami chungchang kha zawh chiang che kan duh a." a ti zawi sap a. Siamtea hmel chu a danglam nghal vek thei, chhang lo chuan a nui sak a. Sarah-i bawk chuan, "Enteh Siamte, chhan tha tak nena he thil hi hrechiang duh ka ni a. Intih lar nan, mahni hlawk nana ti angah min ngai ngei ang ka ring. Mahse chutiang chu a ni hauh lo ania, khawngaihin min ring rawh." a han ti leh a.

Za lo tih hriat tak hian Siamtea chu a nui lui sak a, "Nangmahni ang tho hian mi tam tak an lo kal tawh, mahse an awih loh em avangin fiamthu titihin min zawt kual vak vak a. Vengchhungte pawn khatih hunlai khan Nunmawia nen khan dawt sawiah min puh asin, ka zak zozai tawh lutuk. Min ngaidam ula, khawngaihin min chhuahsan rawh u." a ti ta daih mai.

Sarah-i chuan a lu a bu nghauh nghauh va, "AWle, kan kal em em ang. Mahse Siamte, hei hi han en teh." tih pah chuan a ipte atang chuan lehkha them hi a rawn phawrh a, Siamtea chu a pe a. A han en chian chuan chanchinbu phek a lo ni a, 2011 October thla a chhuak ngei, Lawirang Khua a thlahrang hmuh a nih thu ziahna phek ngei mai kha a lo ni.

SArah-i bawk chuan, "Kha kha hmanni ah in ka tih faina lamah ka hmu chhuak a, ka rilru ah a awm zui nghal reng a. Hriatchian ka chak takzet a ni, ka mumang thleng thlengin ka hmu asin. Chuan intihlar ka duh vang angah chuan lo ngai ta pawh ni la, hrang lampang kher kher hi chu intih lar duh nan chuan hmundanga mi ka pan thei lutuk. Mahse Aizawl atangin helai thleng thleng ka lo thlen phah hi, zana min ti mu thei lo khawpa ka vei leh ka ngaihtuah a ni asin." a han ti deuh chiam chiam a.

Maruata pawh chu lo inrawlh ve in, "Thianpa, kan awih leh awih lo emaw chu thuhran ni rawh se, a tak a ni emaw ni lo emaw, kum 10 lai a liam tawh. A hunlai bak khan sawi zui a awm lo, tunah kan hre thar ve chiah a, helai thleng thleng a intih lar duh vanga kan rawn thar thawh i ring reng reng em ni?" a lo ti ve bawk a.

Siamtea chuan a chhang chuang lo, hnuailam melhin a la ding ngawi reng a. SArah-i chu tawng ve leh in, "Thudik hriat kan duh mai chauh a ni, chuan..kha thlahrang in hmuh pawh kha Lily ngei a ni, Hotela thawk thin bo ta kha... a bo atang thla ruk hnuah a thla kha inhmu, a dik em?" a ti ta mai a.

Siamtea pawh chuan mak a ti kher mai, Sarah-i chu a melh hru mai a. Mahse engmah ala sawi chuang lo, "I rilru i thlak a, min hrilh duh te i nei a nih chuan hei hi ka card ania, min rawn call mai dawnnia." tiin a card chu Sarah-i chuan a pe a, chhuah chu an tum ta a. Mahse Siamtea chuan lo ko dingin, "Lo ding lawk teh u." a ti deuh vak a.

SArah-i leh Maruata te pawh chu an ding a, "Enge in hriat hmasak ber duh?" Siamtea chuan a ti ta nge nge a. Sarah-i pawh chu a lawm kher mai, Siamtea chu ava pan hnai a. "Engkim, i thil tawn zawng zawng... chuan Lily background hi ka hre duh bawk." tiin a chhang a. Siamtea chuan a lu a bu nghauh va, "Ka room lamah min lo zui rawh u." tiin a kal a, Sarah-i te chuan an zui ve nghal bawk a.

************************************************

Siamtea room ah chuan SArah-i, Siamtea leh Maruata te chu an thu a, "Min han hrilh teh le, Siamte? Khami zan khan engtin chiah nge in hmuh, amahin a rawn in bulah a rawn inlar tawp tihna em ni?" tiin Sarah-i chuan a zawt tan ta a. Siamtea chuan a lu thingin, "Ni lo, keimah vang vek kha alawm. Ka inla pa lutuk a, ka lo rui tawh bawk nen." a ti nuah nuah a.

"Enge awmzia, enge nangmah vang a nih na?"

"Khami zan khan Nunmawia nen nuthlawi kan rim a, duh aiin kan in hnem deuh va. Kan haw lam kha Hahdamna Run saw ka va hmu a, kan veng kalkawng a awm a ni hrim hrim bawk nen. An sak that lai khan ka thawk ve zuai bawk a, inhlawh nan tiin...ka han ding khawmuang a, kan kal leh tur chiah kha Nunmawia zawk khan Hotel hnunga mihring ni awm tak bawkvak phei zeuh ka hmu a tia."

"Chuan engtin zel, sawi zel rawh."

"Nunmawia kha chuan a hlau lutuk, mahse ka hmu ve der si lova. Ka lo rui phur tawh bawk nen, fiah kha ka va tum ta talh a. Nunmawia pawh khan kal lo tur chuan min ti nasa, a khur zawih zawih thei hial. Mahse ka va kal lui a, hreh tak chung khan min rawn zui a. A tir chuan kan hmu mai lo, mahse kan kal leh tur kha Hotel hnung atang khan a rawn vak chhuak a..hmu chiang tak kan ni, nizan ang mai khan ka la hria."

"Anih leh chu thla chu Lily ngei chu a niin i hria em?"

Siamtea chuan a lu a bu nghauh va, "Aw.. ka chiang, Lily ngei a ni." tiin a chhang a. Sarah-i leh Maruata te chu an inmelh hu mai, "Lawk aw.. Thianpa, engtin nge Lily a ni ngei tih i hriat theih? Ka sawi awmzia chu Lily hmel chu i hrechiang ngei anga, mahse Lily a bo hnu deuh lawk anih avang khan Lily turah in ngai mai mai a ni lo maw?" Maruata chuan a rawn ti hram a, Lily chuan a lo nghawk deuh sawk mai.

Siamtea chu a khi sak a, "Lily kha ka hrechiang em em lo, mahse a hmel erawh hrechiang tak ka ni. Hotela a thawh hnu khan kan khuaah hian a lar ve hat a, a hmel pawh a tha. A luck ve thawkhat a, rimtu pawh an tam thin khawp mai. Khami zan erawh kha chuan a hmel kha a rapawm takzet, mahse Lily ngei chu a ni tih ka chiang." tiin a chhang a.

Sarah-i pawh chuan lo tuihnih ve in, "Keipawn ka mumangah ka hmu a, chuvang alawm ka hriatchian em em." a lo ti ve bawk a. Chutah Maruata bawk chuan, "Anih leh engtin chiah nge in hmuh, Hotel hnung atanga a lo chhuah chuan?" tiin a zawt leh a. Siamtea chu a thaw hak a, "A rawn bawkvak, kan lam panin a rawn bawkvak phei." tiin a chhang a.

Sarah-i mitthlaah chuan a mumang te chu a rawn lang zawk zawk mai a, "A hmai a khem nuai a, a kawr a tet hnuang bawk. A sam a thur bum bawk a, rapawm tak a ni. A mitmeng lah a sen vek a, kan lam panin min rawn ban ang thuak thuak bawk a.." tiin Siamtea chuan a sawi chhunzawm zel a.

Maruata bawk chuan, "Anih leh sawi a nei em, a bia che u em?" tiin a zawt leh a. Siamtea chuan a lu a bu leh nghat nghat a, "Aw bia e, na tuar ni awm tak hian a rum vawng vawng a. Kan lam hawiin a ban a phar a, tichuan..." a sawi zawh hma chuan SArah-i chuan, "Min pui ru...khawngaihin tu emaw tal khan min tanpui ru.." a rawn ti deuh thut a.

Siamtea chuan mak a ti kher mai, "Aw...tiang khan, tiang chiah khan a tawng." tiin Sarah-i chu a en hu mai a. Maruata pawh chuan mak a tih hmel kher mai, "Eng.. engtin nge, engtin nge i hriat?" Siamtea bawk chuan a ti leh hu mai a. Sarah-i chu zawi muang chuan a rawn hawi chhuak a, "Ka mumangah ka hmu thin ka tih kha, tiang khan alawm, i sawi ang chiah khan a rawn ti thin." tiin a lo chhang a.

Siamtea chu a ngawi vang vang a, "A mak hle mai, a nih chuan Lily thlarau hian he khawvel hi ala chhuahsan miah lo a ni thei angem le?" a ti nuah nuah mai. "Anih leh Siamte, Lily chungchang hi enge hriat i nei em?" tiin Sarah-i chuan a han zawt leh a. "KA hre em em lo, an inah pawh ka leng ve ngai lova, ka rim ve ngai lem lo. Mahse khawlai velah chuan ka hmu ve zeuh zeuh thin a, hotel sak that a nih laia ka thawh lai pawh khan ka hmu fo. Hmeichhe zaidam tak leh fel tak a ni chuan ka hria, chuan... a bo hma khan a rai mek bawkin ka hria." tiin Siamtea chuan a chhang a.

"Tu fa nge a pai?" Maruata chuan a rawn ti ve leh a, mahse Siamtea chuan a hriat bik loh thu leh tuman an hriat loh thu chuan a chhang a. An ngawi deuh thap a, "Nunmawia kha engtia thi nge?" tiin SArah-i chuan a han zawt leh a. Siamtea chu a han thaw deuh hluai a, "Ani kha chu zu heh lutuk kha ania, keipawh hehv e tho mah ila. Zu tha lo a in nasa lutuk a, a cancer chhunzawm a, zu vanga  ni deuh ber mai." tiin a chhang a.

**************************************************

TO BE CONTINUE