THE CRAWLING WOMAN (Spanish : Repente Mulier) MIZO SUPERNATURAL HORROR STORY Written by : Aaron Malsawmdawngzuala Chapter - 6 (LAST)

 THE CRAWLING WOMAN

(Spanish : Repente Mulier)

MIZO SUPERNATURAL HORROR STORY

Written by : Aaron Malsawmdawngzuala

Chapter -  6

(LAST)

******************************************

Sarah-i leh Maruata te chuan room chhungah chuan zanriah an ei dun mek a, "Vawiin lam enge i lo tih reng reng?" tiin Maruata chuan a han zawt deuh thut a. SArah-i chuan a aw a han thian kharh kharh a, "Keima tawkah ka lo ngaihtuah chhunzawm ve nasa hle a, chuzawng chu a nimai." tih ringawt chuan a chhang a.

Maruata chu a khi suk a, "Hei leh chen kan kal ve tawh a, engvak mah hre lo leh rilru nuam lo deuhva kan haw hi ka hlau ber mai a ni. Kha.. hotel neitupa lah khan min lo be tha duh lo em em mai leh ta nghal a." a han ti nuah nuah a. SArah-i chu a ngawi vang vang a, "Kei chu ka donfi tulh tulh zawk asin." tiin a lo chhang daih mai.

Nuih deuh huk pah hian MAruata chuan SArah-i chu a en hu a, "Eng nge i sawi awmzia, engtia confi in maw?" tiin a zawt nghal a. Mahse Sarah-i chuan a chhang hman lo, a phone a rawn ri ral ral mai. A han en a, a nu a lo ni. A pick up nghal a, "Aw nu, eng nge ni ta?" a han ti dek dek chu a nu chuan, "Tinge min rawn call nachang i hriat miah loh, reh hmak zel ringawt mai?" tiin a rawn ang nghal chiam mai.

Sarah-i chu a ner deuh sak a, "Aw nu...ka thil tih laiah hian ka buai em alawm, min hrethiam teh." a han ti deuh hlur a. Mahse Pi Seni chu a ang tui laklawh tlat, "Chupawh nise, ka duh aiin in cham rei tawh. Ni 3 lai a ni tawh, khatiang thlahrang tih vel mai mai a buai tawh lo khan lo haw vat teh u." a rawn ti vin leh deuh vak vak a.

"Kan awm rei tawh dawn lo, chuan heta kan kal pawh hi ka inchhir lo khawp asin."

"Sarah, inneih ni a hnai tawh. Thil tih fel tur a tam si, khatiang mai mai a buai hman kha i ni tawh lo."

"Nu... engkim ka peih fel hman vek ang. Hun rei a ni tawh dawn lo, min lo nghak hram hram teh."

"A mak talh talh thin... thu lah hi i awih lo si amaw?"

Chutia an inbiak lai chuan Maruata chuan chaw a lo ei kham tawh a, a lo insilfai mek a. Sarah-i leh anu chu an inhnial thui viau dawna a hriat avang chuan ava kal hnai a, "Khawi maw, ka nu chu ka lo bia ange." tiin phone chu a laksak a, "Aw nu keimah, MAruata..." tiin pawnah chuan a chhuak daih mai.

SArah-i mood chu a fuh loh phah hle a, "Ninawm lutuk, duhzawng leh chak zawng engmah tih ve theih reng reng loh mai." tiin a phun nuah nuah a. Chaw chu a eikham a, a insil fai ve nghal bawk a. Minute 10 vel hnuah pawh chuan MAruata chu a lo la let miah lova, a phone lah a keng chhuak daih mai bawk si.

A tih tur hre lo chu a tei kual a tei kual ringawt mai a, chutah Lily diary chu a hrechhuak leh ta zawk mai. Maruata nghah pahin tiin room chu chhunglamah chuan a inkalh hnan a, tichuan Diary chu  phawrh leh ta. A hma a a tih ang bawk chuan a copy chhawng leh a, phek khat chu a ziak zo leh ta der mai.

********************************************

'Tumkhat chu morning shift ka neih ni a ni a, ka senior chiah hi a dam loh avangin keimah veka room ka tihfai a ngai dawn a. KA peih lo hle mai, mahse U Fela room ka tihfai ngei ngei a ngaih avang chuan hahthlak viau dawn mahse tlem chuan phurna ka nei ve deuh. Kan lo innel ve tawh bawk nen, a ruka lo duh ngawih ngawih nena han innel chhoh vel chu nuam tak a ni.'

'Zing dar 6 ah, t(r)an hma chiah chiah in ka thleng a, tihfel tur awm apiangte chu ka ti fel zung zung a. Dar 7 velah chuan tukthuan kan ei a, kan eikhamk hnu deuh lawk chuan breakfast ei turin U Fela pawh lobby lamah chuan a rawn chhukthla a. A zing tho hlim hmel pawh tha tak a ni, ka mitah chuan...'

'Eitur pawh ka va pek nghe nghe kha, minj lo nuih leh sak mai. Tichuan chawmhma dar 10 a rik chuan room lam tifai turin hmunphiah nen, chhuat nawhna nen ka bawr chho leh tawh khawp mai. Room occupied kan nei hnem lo hlauh zawk a, hah pawh a zia deuh ve. Minute 20 vel hnuah chuan U Fela room zawn chu ka thleng ta, ka zam leh nghal vek mai.'

'Kawngka chu ka han kik karh karh a, mahse min chhang miah lo. KAn hotel danah chuan chahbi spare hi kan keng ngei ngei zel a, vawi thum kik hnu leh auh vak vak hnu pawh a, an lo la hawn loh chuan keimahni thu in chahbi spare hmangin kan lut thei thin a ni. Vawi thum ka kik hnuah pawh chuan min la chhang mai si lova, tichuan chahbi spare hmang chuan a room chhungah chuan ka lut ta a.'

'A lo thim ruih mai a, khum lam chu ka en vat a. Rizaiin a lo la inkhuh hlun mai, kaih thawh ka han tum a. MAhse a mawi chiah lova ka hriat avang chuan tifai lova, chhuah leh mai chu ka tum ta a. KA let leh tur chiah chu light a rawn in on eng ut mai, khum lam chu ka va en leh vat a.'

'U Fela chu khumah chuan a lo thu a, kawr a lo la ha lo zui. A pian mawi tak leh a tawk chiah a sek te chuan min ti zauthau ve tlat nia mawle, mahse ka en tha ngam chiah lo thung. Min rawn pan a, "Sorry lutuk, i lo kal a nimaw?" tiin min nuih leh suk a. Ka lai chhe hle mai, "AW hei, tihfai ka lo tum a. VAwi thum ka kik tawh a, i lo hawng thei si lova...ka lo, ka lo lut tawp." ka ti khur deuh dar dar a.'

'Hnai set sawtah hian min rawn en a, "Anih han tifai la, ka lo en ang che." tiin a rawn thaw lum deuh huam huam mai. Amak lutuk, ka za chhuak vek thei. Tichuan a room chu ka tifai a, mit khap lek lo hian min en ngawih ngawih nia mawle. Ka lai lutuk chu ka mit sir pawhin ka melh tha ngam lo, rei vak lo hnuah phei kha chuan ka melh ngam tawh lo tawp.'

'Chhuat ka nawt zo va, wardrobe chiah tihfai a ngai ta. AWArdrobe darthlalang chu ka hru mawlh mawh a, darthlalang atang chuan ka hnung zawnah thu in min la en ngawih ngawih tih chu ka hmu thei reng, ka lai chhe lutuk chuan ka melh let ve ngam mang lo a ni ber mai. Chutah a la rawn ding deuh thut zui, ka phu deuh zuk nghe nghe.'

'Chu mai ala ni lo, min la rawn pan ta deuh deuh va. Ka tha a khur zawih zawih tawh, ka en ngam tawh lo hrim hrim. Wardrobe darthlalang ka hruk pawh chu a ngai ka hru nawn ka hru nawn tih pawh ka hria, mahse ka che sawn ngam tawh ngang lo a ni. Ka thin  aphu dep dep a, ka nghawng zawn velah chuan a rawn thaw lum ham ham mai.'

'Ka taksa hi a hik chhuak vek a, awm ngaihna reng ka hre lo. Chutah hnunglam atang chuan min rawn kuah a, ka za deuh chuai mai. Ka beng bulah hian, "Lily, ka duh che. Nangpawn min duh ve tiraw, khawngaihin thudik min hrilh rawh?" a rawn ti ta mai a nih chu. Ka mumang amaw ka ti hial zawk, a nuam ka tih rual rualin ka hrilh a hai takzet.'

'Ka chhang mai thei lo, "Mawh.. Lily, min duh ve tiraW?" tiin min zawt nawn leh a. Chhan mai dan tur ka hre lo, "U.. U Fel, ka..ka hrethiam lo." ka ti bah nuai mai a. A aia nghet hian min kuah a, "Khawngaihin min chhang teh." a han ti zawi leh sap a. Ka zak bawk si, nuam ka ti bawk si.'

'Zawi sap hian, "Um.. ka duh che alawm." tiin ka huaisenna zawng zawng sawm khawmin ka chhang ve ta a. KA sawi zawh rual rual chuan ka zak lutuk chu ka sa nghal pup pup thei, ka lai hle bawk. Chutah a lam hawi zawng chuan min kuai her sawk a, "Ka hria alawm, hman atang khan ka hre tawh a ni." tih pah chuan min kiss ta mai a.'

'Hemi ni atang hian a ni, a ruka ka lo duh em em leh ka hmangaih em em nen kan hringnun chu bul kan tan chhoh ve tak ni. Ka hlim a, a mak ka ti hle bawk. Ka mumangah takngial pawh ka man phak loh a ni a, mahse a takah a thleng ngei bawk si. KAn dinhmun inthlau hle mahse, kan inhmangaih ve hle chuan ka hria.'

***************************************

Phek khat chu a chhiar zo leh ta der mai, Sarah-i ngaihtuahna chu a kal thui takzet. Khabe dawm meuh chuan a melh ngai chu a han melh vung vung a, "Fela hi tunge ni ta ang, hepa hi ala dam angem? Amah hi ka zawn hmuh angai, thuruk tam tak a hre ngei ang." tiin a han phun mawlh mawlh a.

Chutah kawngka a rawn inkik dut dut a, "Sarah, tinge i kalh a? KEimah MAruat, lo hawng vat teh." tiin Maruata chuan a rawn au lauh lauh va. Chuveleh a diary ziah lai mek chu a dahtha sawk sawk a, tichuan kawngka chu ava hawng ta a. MArauta chuan mak tih hmel deuh hian, "Tinge i kalh kher a?" tiin a han zawt deuh hu a.

Sarah-i lah chuan en pawh en lo hian, "Ka hlau alawm." tih ringawt chuan a lo chhang a. Maruata chuan a en zui vung vung ringawt, a phone chu a pe a. Khumah chuan thu in ama phone chu phawrh ve thungin a khawih mual mual a, "Enge ka nu chuan a sawi a?" tiin Sarah-i chuan a zawt a.

Maruata chu a han thaw deuh hak a, "Huiham, a buaithlak khawp mai. Nanglah i la laklawh bawk si nen, haw turin min duh taw lutuk a. Mi hriatah pawh a mawi lo, in zun dun hi. Nupa em pawh inla ni lova, miin an hriat tam hma in lo haw rawh u a tia.” tiin a chhang a. Sarah-i chu a ngawi vang vang a, “Kan la haw thei lo, chu chu a ni tawp.” a ti deuh hmak mai.

Maruata pawh chu a nui suk a, “Nia, ka hria alawm. Lungngai suh, i bulah ka awm reng dawn alawm.” tiin a lo chhang a. An pahnih chuan an thu ngawi leh vang vang a, “Tunge he hotel neitupa hi a hming ni reng reng?” tiin Sarah-i chuan a han zawt a. “Pu Joel-a tih chiahin ka hria, an kawngka chungah khan a hming a inziak awm reng sia, chhiar nachang pawh ka lo hre miah lo.” tiin Marauta chuan a chhang a.

SArah-i chuan zawhna tam tak chu a han zawt leh a, mahse Maruata chuan ho deuh deuh bakin a chhang duh hauh lo. An titi thui zel a, Maruata chuan zu a in pah reng bawk a. SArah-i pawh chuan khap viau mahse a in hnem telh telh mai, a hlauh ang ngei ngeiin a chatthla ta nge nge a.

************************************************

Zan dar 10 chauh ala ri a, Marauta erawh a hnar kuk kuk tawh mai. A lakah chuan SArah-i chu a lungawi lo hle a, room chhungah chuan a tei kual a tei kual ringawt a. Rum mangkheng hian MAruata chatthla mek chu a han melh leh run run thin a, “Lak tlak loh lutuk mai.” tiin a phun zawi deuh sap mai.

Chutia a duh ang pawh  ahriat hma a, Maruata berin a chahtlak san leh tak daih si ah chuan Sarah-i chuan diary bawk chu a phawrh leh ta a. A han ziak thla chawp leh a, a chhiar leh ta ngar ngar a. Fela leh Lily inngaihzawn chhoh dan te, an hun hman dan te, manager hriat hlau tak chung si a, a ruka an inhmuh dan te chu a chhiar chho zel a.

An innhmangaihna thawnthu, an induh chhoh dan vel chu SArah-i chuan a chhiar tui hle a. A lan dan chuan a thinlung zawng zawngin Lily hian Fela hi a hmangaihinin a duh hle niin  alang. A atchilh a ni deuh ber mai, SArah-i pawh chuan ngaihnawm ti takin a chhiar chhunzawm zel a.

Fela pawh chuan a duat thiam hle a, an hlim dun hmel khawp mai. A phek dawt leh chu SArah-i chuan ziah chhuah leh a han tum a, mahse mak tak maiin pentui pherh a lo awm vak tawh lo. Chiang deuhva han bih chiana chhiar theih mai a lo ni tlang pui tawh a, Sarah-i chuan a chhiar chhunzawm ta zel a.

Nuihzatthlak lai lah a tam, pakhat staff a ni bawk si, pakhat lah guest a ni bawk si nen. Midang hriat hlau tak chuan an lo inhmu ru ve nasa thin hi a lo ni a, an thawnthu chu a cute phian mai. Tum khat chu an pahnih chuan thawm an nei tih velin complain a lut hlauh mai a, manager pawh chuan Lily chu a office ah ko hrangin a zilh deuh hrep nghe nghe.

Mahse Lily pawh a insawifel thei hram a, Manager pawh chuan Fela pawh chu a ko ve nghe nghe bawk. Amaherawh chu an insawifel dun thei a ni chek ang chu, chumi vanga buaina dang an tawh thu erawh diary ah chuan a inziak lo. Sarah-i chuan a chhiar zel a, chutah Siamtea thawh lai, bathroom an siam that lai chu a chhiar fuh ta nge nge a.

***********************************************

'Kan hotel staff bathroom hi pawn lama awm a nih avangin zun ram thiar vel a buaithlak thei hle a, duty lai lo nih phei chuan harsatna a tam phah thin khawp mai. Staff te pawhin Manager bulah kan complain nasa thin hle a, chuvang pawh chu a ni mahna, sak that a ngai ta hlauh mai.'

'Thla khat dawn chu sak that nan hun an hmang a, zunin hlui pawh chu hotel bungraw hlui dahthat nan kan hmang ta nge nge a. Chutih lai chuan U Fela pawh Aizawl lamah a let leh rih a, engkim sak zawh a nih hnu, thla hnih hnu velah chuan a rawn thleng leh ta a. Aizawl lama min awm bo san hlan pawh khan sms hmangin kan intext nasa thin khawp mai, reilote chhung pawh nise ka ngai hman takzet.'

'Tichuan hotel ah chuan a rawn thleng leh ta ngei mai a, a ruk chuan kan inhmu leh nghal char char a. A tawi zawngin sawi ta mai ila, room service ka nih avang chuan vawi tam tak U Fela nen hian a room ka tihfai chang hian kan chesual ta thin a. Mahse kei chuan pawi tihna ka nei tam em em lo, a chhan chu amah ngeiin min neih a intiam tawh a ni.'

'Kar hnih vel a riah hnu chuan ka duty-na hmun chu thlak a ngai tlat mai, kudam thar kan siam chu enkawl hna ka chang ta tlat mai a. Ni hnih thum vel chu U Fela nen pawh kan inhmuh loh phah nghe nghe a, mahse rei a ni lo. Kudam chu kan hmang tangkai dun leh ta char char thin a, tuman min man ngai lo.'

'Vanduaithlak takin ka dam lo ta hlauh mai a, than thi nei tur ang deuh hian ka awm a. Chawlh ka lak phah nghe nghe, U Fela pawh chuan min ngai thei hle a. Kan intext nasa khawp mai, mahse dam lam ka pan thei reng reng lo thung. Ni thum vel a liam a, ka awm dan chuan ka ngaih a ti tha ta hauh lo mai.'

'Ka rai ni ngei hian ka hre ta tlat mai a, rang lutukin U Fela pawh ka hrilh nghal. U Fela chuan a rang lama zun test-na lei a, in-test vat tur chuan thurawn min pe a, leina tur pawisa pawh min pe thlap bawk. Ka zun chu ka han test ta cheng a, ka hlauh ang ngei ngeiin ka lo rai ta reng bawk a.'

'U Fela pawh ka hrilh nghal bawk, ka mangang takzet. Mahse ani chuan zaidam tak hian lungai lo tur leh ka chhungte bula hrilh rih lo turin min ti a, a thu chu ka awih ngei bawk. Ka rai tih ka hriat ni chuan inhmuh puiah min sawm a, hmun dangah chuan kan inhmu ngei bawk a.'

'Min hmangaih thu leh min neih ngei tur thu chuan a intiam a, ka rai thu erawh la zep rih turin min ti bawk. Duat takin min kuah a, hlauthawng lo turin min hnem bawk. KA thla a muang hliah hliah a, ka taksa na zawng zawng te pawh a dam nghal vek mai hian ka hria. Ka pasal tur, U Fela hi Pathian min pek a ni ka ti lo thei lo.'

'Hemi ni hian a vawikhatna atan thla kan la nghe nghe a, hemi tlai la la hian kan print tir bawk. Kar khat vel chiah a awm tawh tur thu min hrilh a, chumi hma ngei chuan kan chhungte ve ve bula inpuang turin inring rawh min ti bawk a, huphurhawm viau mahse ka pasal tur U FEla a ni hrim hrim hi ka lawm.'

 

***************************************

SArah-i chuan a phek lehlam chu a keu va, mahse a lo awl ta tlat mai. Mak a ti hle a, a keu zel a. MAhse engmah inziak a lo awm tawh lo, "Ehe, tikhan a zo der maw? A van tlem em em, enge thleng zel ang le?" tiin a phun nuah nuah a. Hun kal tawh chhiar nawn leh mai mai ni mahse a ngaih a tha lo hle a, eng thil nge thlen chhunzawm a hre chak takzet.

Rin dan pawh a nei, mahse rindan neih ngawt khan kawng ro a su si lo. Lily'in U FEla a tih hi tunge a nih a hriat ngei a ngai, mahse engtin nge a hriat tak ang? Tin, Lily chungah khan enge thleng ta zel? A thu hriat dan kha chuan a rai lai ngeiin a bo hlen ta hmak ka a ni a, a ruang takngial pawh hmuh tur a awm bawk si lo.

Fela tia a sawi, a pasal hual anga a sawi chu a ringhlel takzet. Mahse engtin nge Fela chu a zawn hmuh tak ang, tunge a nih a, eng ang hmel nge a put pawh a hre bawk si lo. Zan rei tawh viau mahse a rilru ah chuan a kap reng a, thudik hriat vat chu a duh takzet. MAruata chu a han en a, ani lah a lo la mu ang phuah mai si.

Engkim hrilh ve vek a, thurawn lak te pawh a duh ve bawk si nen. Chutah Maruata chu a sawi ta nawk nawk a, "Harh teh, Maruat. Thil serious deuh a awm ania, tho teh." tiin kaih thawh a tum a, mahse MAruata chu a lo rum tuah tuah ringawt. Sarah-i chuan a aia na chuan a han sawi leh vak vak a, mahse MArauta chua  rui viau ni tur a ni.

A tho thei chuang lo, a ban a vei vak a. Sarah-i'n a kuta a ken mek, Lily Diary chu a la vai tla zui leh ta nghal a. Chhuatah chuan a tla ri thlawp mai, mahse chu diary bu chah tak kar atang chuan thlalak pakhat, a kara lo inzep reng mai chu a rawn tla chhuak tel ta tlat mai. Sarah-i pawh chu a tawp chat a, Marauta chu a thlah a.

MAruata lah chu a hnar chhunzawm bawrh bawrh a, SArah-i chuan thlalak chhuata tla chu a en vang vang a. Mak a ti hle mai, "Thlalak a lo inzep amaw, a tir khan ka hmu miah si lova." tih nuah nuah pah chuan ava pan hnai a. Thlalak chu a chhar a, a en ta. A meng bial kawk kawk mai, "Ehe..." a ti zawi sap ringawt.

Mak a ti takzet, a chhan chu thlalak ah chuan Lily leh mipa pakhat hi an lo ding dun a. Inngaih hmel tak hian an inkuah a, an hlim dun hmel hle bawk. Sarh-i'n mak a tihna chhan ber chu, chu a mipa lo lang ve chu tudang nilovin a pasal huan Maruata a ni tlat mai. MAruata ang tak mipa dang a lo ni zawk ang a tiin a han en chiang leh deuh va, mahse Maruata ngei a ni bawk si.

Chhuatah chuan a thingthi hnawk a, Maruata chu ava en a. Ani lah a lo la hnar ring ropui zui, Sarah-i chu a hrilh hai takzet. A han ngaihtuah vang vang a, "Maruata maw? Mahse engtin nge a nih theih? Ani chu Fela a ni lo, Maruata alawm." tiin ama hriat tham lek chuan a inbe mawlh mawlh a.

Mahse a han ngaihtuah chiang zel a, Maruata hmingpum chu a han hrechhuak zawk a. Lalruatfela a ni a, Fela tih hming a lo pu ve tho mai. Sarah-i chuan a man thiam ta uar uar a, an kohdan a lo in an loh vang mai mai chu a lo ni tih a hrethiam ta. Engtia han awm tur nge pawh a hre lo, mittui tling teuh chung chuan Maruata muhil lai chu a en vawng vawng ringawt mai a ni.

******************************************************

Ruah a sur nasa em em a, khawpui a ri dur dur bawk. A khat tawk chuan t(r)ek a tla leh chuai chuai thin bawk a, kawl phe zuai zuai chuan a ti harh a. A rilru chuan thildang a ngaihtuah thei lo, a bula mu mek MAruata, a pasal hual ngei mai chu a en leh vang vang thin. Mipa inzep thei leh daw thei tak mai chu a pasal hual a lo ni reng mai chu a awih thei ngang lo, mahse thudik ngei a ni bawk si.

A han ngaihtuah thui zel a, Maruata'n Lawirang khuaah vawi hnih thum vel chu project neiin ka kal tawh tia a sawi lai te chu a ngaihtuah chhuak uar uar a. A khaw awmdan te, a kalkawng te a hriat chian em em danah te chuan Lily-i'n U Fela tia a sawi thin chu a mah ngei a ni tih a chiang zual tulh tulh mai bawk si.

A rilru a na takzet a, Lily chungchang, engtia bo nge, enge a chungah thleng zel tih chu a pasal hual, a nihna thup char char tu, Maruata chuan a hriat ngei pawh a ring. Mahse kai thova, han zawt nghal bawrh bawrh tur pawhin chet mai nachang pawh a hre lo, a rilru a na ngawih ngawih hi a ni ber mai.

Chutah thawm a hre tlat mai, hmeichhe tawng ri ni awm tak a ni. A ngaithla chiang a, hmeichhe phun mawlh mawlh ri chu a ni tih a chiang ta. Khum atang chuan a tho chhuak vat a, thawm chu a ngaithla zel a. Room atang chuan a chhuak a, thawm chu a chhui zel a. An mahni awmna floor hnuai chiah a ni tih pawh a hre thei nghal, thawm chu a ngaithla chiang leh a.

Second 30 vel a ngaihthlak vang vang hnu ah chuan Lily aw ngei a ni tih a hre thei ta, a hriat theihna chhan pawh a mumangah khan Lily khan MIN TANPUI RAWH tiin a biak fo vang a ni. Chutia Lily aw meuh a hriat takah chuan hlauh nachang pawh a hre tawh lo nge ni, an awmna hnuai chiah floor lam chu a pan thla ta mai a.

Room pahnihna vel a kal pelh hnu chuan thawm chu a ri chiang ta hle mai, kawngka chu tlem a lo inhawng bawk. Thawm chu a han ngaithla chiang leh a, "Tiang mai mai tur hian em ni min lo kawp a, kha kha chhuanlam a tling lo. U Fel, ka taksa chauh hi ilo duh a nih hi." ti a Lily ang bawrh bawrh chu a hre pha a.

Room chhungah chuan a han lut ve thawr a, Maruata leh Lily chu an lo awm dun a. Mahse Sarah-i chu hmu ve ang pawhin an lang lo, an inhauh chhunzawm zel a. Maruata chu a ding hluai a, "I hrethiam lo a ni, ka hmangaih che alawm. Mahse ka nu leh pate, ka chhungte hian engtikah mah an pawm thei dawn chuang lo che. Chuvang chuan kan innei thei lo, naute chu ti tla mai rawh. Pawisa pawh ka pe ang che, chuan kan inkar hi tawp nghal mai rawh se." a ti deuh hmak mai.

Lily chu a lungawi lo takzet, "Engmaw i sawi a, a sawi pawh kha i zak na nge? Min hmangaih thu kha i sawi chamchi thin a ni lawm ni? Ka rai thu ka hrilh tirh che pawh khan lungngai suh, kan innei em em ang i tia, tunah tiang hian min ti leh si amaw? A teuh lo mai, U Fel. Ka pai tlagn ang, chuan thudik hi ka puang vek bawk ang." tiin a chhuahsan ta hmak mai.

Maruata chu a ngawi reng a, khumah chuan thu in a lu a dawm vawng vawng mai. Rilru hah hmel tak hian a thaw leh hluai a, Sarah-i chuan huat hmel tak hian a en reng a. Tuna a thil tawn mek hi a mumang a ni tih pawh a hrethiam, a chhan chu Maruata nen khan roomah khan an mudun tlat a ni.

Mahse a mumangah Lily a hmuh fo avang chuan a mumang a ni tih chu a hai mawlh lo, Maruata chu a rum deuh that a. Tichuan a tho thut a, Lily chu a zui chhuak ve nghal. Chu veleh Sarah-i pawh chuan a zui ve nghal a, pawnah chuan an chhuak ta vek a. Pawn a  chhuak chiah chu chhun en lai a lo ni daih mai, a mumang vek a la ni tih chu a chiang tulh tulh a.

Lily chu kudam lam, hotel hnung lam pan chuan a phei a. Maruata chuan a zui ve zel bawk. Sarah-i chuan thinrim tak hian, "Mi tenawmpa leh... i lo rapthlak hle mai." tia phun vak vak chung chuan a zui ve zel a. SArah-i chu kudamah chuan a chhuk a. Maruata chuan a zui thla ve nghal bawk, Sarah-i chu chhuk ve a tum a. Mahse a khaw hmuh chu a rawn thim deuh thut mai a, a bing nghal mup mai.

**************************************************

A mumang ram atang chuan Sarah-i chu a harh chhuak hlawl mai, a thu chhuak nghal a. A ngai te ang bawkin a thlan chu a lo tla leh bawrh bawrh tawh mai a, khua a lo var tawh bawk. Sana a en a, zing dar 6 a lo pel tawh, a bul chu a han en leh a. Mahse Maruata chu a lo awm tawh lo, zing a tlan a nih ngei ringin khum atang chuan a tho chhuak vat a.

Inphih fai sawk sawkin room atang chuan a chhuak a, receptionsit chu a va pan nghal. A va thlen chuan, "Thiannu, ka thianpa kha a lo chhuk em?" tiin a zawt nghal a. Receptionist chuan nui sang chung hian, "Aw...exer ka la dawn tiin a chhuak ta a nih kha, dar 5 leh a chanve vel khan." tiin a lo chhang a.

SArah-i chu pawnah chuan a chhuak a, security te pawh an lo la awm lo. Remchangah la in hotel hnunglam chu a pan nghal vat a, a han hawi kual leh te te phawt a. Tuman an hmu lo tih a hriat veleh chuan kudam kawngka, leia mi chu a hawng leh ta. A chhungah chuan a lut a, a inrinlawk ang ngeiin bang kil tinah chuan a hma tlaia a lo lei lawk, bati chu a chhi thliah thliah a.

Kudam chhung pawh chu a eng ve ta ut mai, tichu7an a hma aia nasa leh uluk zawk chuan a han dap leh ta tak tak a. Minute 10 vel lai a dap a, a enkual hnuah pawh chuan a hnuchhui mekna a pawimawh tur thil engmah ala hmu thei chuang lo. Chutah a hma a, a kal tuma ri ruk ruk, a chhunga tu emaw awm ang maia che dut dut, wardrobe chu a en ta vang vang mai.

Tichuan a va pan hnai a, a chhung chu a hawng ta. Chukchu an lo vang nuai nuai a, a rimchhe deuh huk lehnghal. Wardrobe hi bang si a dah a ni a, a chhung chu a ruak vek mai. SArah-i chu a chhung chu ngun leh zual chuan a han en chiang a, chutah kutzung te tiat vel lek kua a hmu ta tlat mai.

Wardrobe chhung bang tihna a nih chu, a en chiang a. A han nam vak chhin a, plywood chu a lo mawih tawh kher mai. A phone light on meuh chuan a han en chiang leh deuh va, bang rawng chu wardrobe kawngka rawng nen chuan a inang ta hauh lo mai. A han enchiang leh deuh va, a khawih chhin vel a.

Chutah wardrobe chhung bang chu vuah chawp a ni tih a hre ta, a plywood pawh a in ang lo hrim hrim. Bang chu a chhuih pawp a, a keh ta hawk mai. Mihring leng tawk tur vel chuan a kaw huau a, rannung vak sup sup ri pawh a hriat theih hial. A rim chu a tak hle mai, hmuar rim zawng zawng nen chuan thawk a har hial a.

A thim em em a, a khu deuh luih bawk. SArah-i chuan a hnar a hup a, "Ehe.. bang hi a kua maw?" a ti hu mai. Bang kaw chhung thup nan wardrobe nen kuda bang chu chilh zawm mai mai a lo ni tih pawh a hrethiam nghal bawk. A phone torch chu a on a, a chhung chu a zu en ta.

SArah-i chu a meng pawng hlawt hlawt mai a, a lu a hai em em bawk. A thil hmuh chuan a barakhaih takzet, a chhan chu kum 10 chuan zet tuma hrait lohva thuhruk, Lily Zothanpari ruang, ruhro vek tawh chu a hmu ta mai a nih chu. Tuman Lily ngei a ni an ti lo, mahse SArah-i chuan Lily a ni ngei tih chu a hrechiang em em mai bawk si.

A khur zawih zawih a, bang kil velah chuan thisen ni awm tak, kai luai mai chu a hmu bawk. A rei tawh em avang chuan thisen pawh a ang tawh lo, rawng sen duk, khir vek tawh hi a ang mah zawk. Chutah mak tak maiin a mitthla ah chuan thil a rawn lang zawk zawk mai, a hmunah awm ve ang mai chuan a rawn lang a.

A tawng miah lo, mit ngeiin a hmu ve lo bawk. Mahse a mitthla ah chuan chiang tak hian Lily mangang taka a bawkvak tawk tawk chu a hmu thei a, a hnungah chuan kawnghren vuan chunga Maruata ding chu a lang zawk zawk bawk. Lily chu a thi phung a, "Khawngaihin, khawngaihin min kaltir rawh. Min tina rawh suh, U Fel?" tiin a ngen lawm lawm a.

Mahse Maruata hmelah chuan zahngaihna reng a awm lo, a meng sen rum a, a thinrim hmel hle bawk. Vin zet hian, "Ka thu i awih lo amaw, nang hian min vau ve amaw?" tiin Lily chu a kawnghren chuan a hlap nghek nghek a, a chhuih zui chiam bawk. Nasa mangkheng hian a sawisa a, Lily hnar ruh chu a tliak bawih thei hial.

Chutah Sarah-i chu a harh chhuak zawk a, engkim a hrethiam ta. Lily hi a bo a ni lova, a pasal hual ngeiin kum 10 kal ta khan thatin a ruang chu kudam bang chhungah a lo thukruk char char chu niin. A thawng lutuk leh rilru na lutuk chu a thingthi hnawk a, a tap zawih zawih mai.

*****************************************************

Chutih lai tak chuan kawngka a rawn ri rak a, Maruata ngei mai chu a rawn chhuk ta mai a. Rang lutukin SArah-i chu a tho nghal a. Maruata chuan a kutah Lily diary ngei mai chu a lo keng a, thlalak pawh a lo keng tel bawk. Sarah-i chuan rum fe hian a melh a, Maruata hmel chu zamna hlirin a khat.

Sarah-i chuan ava pan hnai a, "Sa...Sarah, hei hi... khawi atanga i hmuh nge?" tiin diary leh thlalak chu Maruata chuan a lek kang a. Mahse SArah-i chuan a chhang lo, a pan phei zel a. MAruata chu a zam tawh khawp mai, "He..helaiah enge i tih reng reng a, kal phal a ni lo ania." a han ti khur leh dar dar a.

Rum zet hian SArah-i chuan a en a, "MAruat... nge Fela ka ti zawk dawn che?" tiin a melh khur mai a. MAruata chuan a hrethiam uar uar mai, "Eng.. enge i sawi awmzia?" a han ti bah nuai a. Maruata chu a thaw hak a, "Enteh, ka sawi fiah thei." a ti dek dek chu Sarah-i chuan na em em hian a beng hawi sawk mai.

Vin zet hian, "Engmah i sawi fiah a ngai lo, bumhmang pa. Ka lakah i lo inthup char char amaw, i lo va tenawm ve? Tualthattu hi ka pasal hual a lo ni reng amaw, engtin nge i theih zawk?" a ti ta hrep hrep mai a. MAruata chuana a chil a lem dawk a, "Engmah thu bul bal i hre lo..." a ti zawi sap ringawt a.

Sarah-i chu a thinrim takzet, "Anih chuan min hrilh vat ta che, he ka hnuchhui laia a bul tan tu ber chu nangmah lek maw lo ni? I lo inthup thei hle mai, Maruat." a han ti vin leh thak a. Maruata chuan a chhang tawh lo, a kun reng ringawt. SArah-i chu a thaw hak a, "Awle, min chhang suh. Hremna chu i hmu khawp ang, lo ngawi tak rawh." tiin chhuah a tum a.

Chuveleh Maruata chuan a man bet a, a hnek thal tawp mai. A hmel chu thinrimna in a rawn thlak nghal a, "Ni e, ka that a lawm. Engkim ka hrilh ang che, a chhan chu heibak chu hre tur pawhin i damkhaw chhuak tawh lo maithei." a ti ta mai a, Sarah-i chuan a hlau rilru kher mai.

MAruata chu ngeiawm tak hian a khi suk a, "Lily nen khan kan dinhmun a inthlau lutuk, ka chhungte hian neih an phal dawn chuang lo. Sex kan hmang a, a lo rai khanglang a nih kha. Min vau ve khanglang bawk a, pawisa tam tak pek ka tum hnu ah pawh a nau pai kha a ti tla duh lova. Min hnial zel a, khatia ka tih mai lohvin...engtin nge ka tih vak anga, min hrilh ta che..." tiin a vin let ta hrep mai a.

SArah-i chuan chhan ngaihna pawh a hre lo, mittui tla zawih zawih hian a en reng ringawt. Maruata chuan sawi chhunzawm zelin, "A tir pawh khan ka hlau reng a, mahse min rinhlelh loh nan tiin ka inzep tang tang a. Lily chungchang hi hre leh ta nghal a, chuvang alawm hotel neitu Pu Joela pawh i hmuh ka phal loh ni, a chhan chu kha putar khan min hrechiang em a ni." tiin a inpuang zel a.

A ngawi vang vang a, "Lily kha.. ni e, keima thah a ni. A tir chuan hrehawm ka ti, mahse ka thinrimna kha a nasa em a, ka in control zo ta lo a ni. Ka thlenna room ah khan khami ni, ka thah ni khan ka ko lut a. Tichuan pai luih a tum ta kha a ni a, a titau va. Helai hmunah hian a chhuk a, a chhan chu khatih hun lai khan helai kudam hi a enkawl ber a ni. Tichuan ka zui lut a, ka thlem leh a. Ka thu a awih lova, tichuan ka thinrim insum zo lovain ka sawisa, a ka rek hlum ta a ni." tiin tei kual pah chuan Maruata chu a inpuang zel a.

Chutih lai chuan a ruk hian darthlalak keh, zum tak mai chu Sarah-i chuan a la ru zal zal a. A hnunglamah chuan a thukru a, "A ruang kha put chhuah a chi dawn bawk si lova, tichuan bang kha ka ti chhia a, ka thukru ta a ni. An man chhuah loh nan tiin wardribe nen hian ka chilh hnan a, a rukin ka chhuak leh a, tuman min man lo." tih pah chuan SArah-i chu a kek tho lawp a.

Bangah chuan a nam chilh a, "Kum 10 chhung, Sarah.. kum 10 chhung tehmeuh tuman min hrechhuak lo. Nun bul ka tan thar leh a, ka tawng che a. Ka hmangaih che a, tichuan nupui atan pawh ka duh che a, kan inhual ngei bawk. MAhse i chanchinbu hlui pakhat chhiar mai mai atangin ti hian min manchhuak a, chuvang chuan nang pawh hi a tul chuan ka dahtha law law ang che." tiin a vau ta khur khur mai.

Chu veleh Sarah-i chuan a darthlalang keh them hum mek lai chuan a darah chuana vit pawp mai, Maruata na ti lutuk chu a tawlh hnung nghal a. Chuveleh SArah-i chu chhuah tumin step ah chuan a tlan chho nghal a,  mahse Maruata chuan a dara darthlalang keh bur vu mai chhua  phawi a, a rum hak mai.

SArah-i chu a um zui a, a ke ah a man hman ta tlat mai le. A theh thla tawp a, a chhuih zui hrep mai. SArah-i chu a hliam nasa hle a, Lily a sawisak ang chiah khan a sawisa ve ta. Marauta thinrim insum zolo chuan a thut bet a, a rek ta vak mai. Mahse mak tak maiin Sarah-i hmel chu a rawn danglam thut a, Lily hmelah a rawn inthlak ta daih mai.

Maruata chuan mak a ti em em a, a mitthlaah chuan kum 10 liam ta a, Lily a sawisak lai chua  rawn lang nghal zawk zawk mai a. A hlau lutuk chuan a thlah a, Sarah-i, Lily hmel pu tawh chu a rawn tho va. MAruata hlau lutuk chu a tawlh hnung a, "Nilo.. Lily, ka.. ka tihpalh." a ti khur ta dar dar mai a.

Lily chu a mengsen rum a, "U Fel, nang hian kei leh ka pum chhunga naute, ka fa, i fa ngei chu a rualin min tihlum asin. KA hmangaih che a, i fa pawh ka pai a. Mahse nang chuan ka taksa bak i duh lo, i thil tih man hi vawiin hian i hmu dawn." tiin ava pan hnai ta mai a. Maruata hlau lutuk chu tlanchhiat a tum a, mahse a inchhui a.

Tukhum vaw chawrh chuan a thla thuai mai a, chutah a bul chhuara lungral intung, lian tak mai chu a rawn tla a. Maruata thin zawnah tak mai chuan a inchek bur ta va mai, a thaw hrawk hrawk a. A thaw muang telh telh a, Maruata chu a thi ta der mai. Lily hmel chu Sarah-i hmelah a inthlak leh nghal a, Maruata ruang chu a en vawng vawng ringawt.

A va pan hnai a, a thingthi a. Chutah a kun ngal a, chhuak em em hian a tap ta hawm hawm mai. Thawm chu an lo hria a ni ngei ang, security te chu an rawn chhuk a. Sarah-i chu an rawn buaipui nghal a, zawhna zawt hnem hle mahse engmah a chhang thei lo. Maruata ruang pawh chu an buaipui nghal a, reilote hnuah chuan thil awmzia engkim hriat a ni ta.

******************************************

1 MONTH LATER

SArah-i chu a roomah thu in diary chu a ziak leh mawlh mawlh a, Lawirang khuaa a thil tawn te, Lily chungchang a hriat chhoh dan te chu lehkhabu 2 lai a chhuah tawh. A hralh thei phian a, a hlawk hle bawk. A ziah zawm zel a, a bu thumna tur a ziak mek a ni. Tin, kawng engkima puitu, Siamtea nen chuan an inngaizawng chho ta daih bawk a ni awm e.

Maruata chu misual tak a ni tih hre mahse, ala theihnghilh thei bik lova. A lo hmangaih hman em em mai bawk si a, mahse a tana tha tur zawk a ni tih a hre hma hlauh chu vannei a inti letling hle bawk. Sarah-i chu hemi a thil tawn hnu atang hian a lar zual phah hle a, journalist chhuanawm leh tum ruh tak a nih zia a lang chiang zual hle awm e.

A ziah lai mek chuan kawngka a rawn inkik a, Siamtea a lo ni. SArah-i chuan a lo nuih sang a, "Ehe, i lo va thleng hma ve, in tluang em?" tiin a lo zawt nghal a. Siamtea chu a khi suk a, "Tluang animai, mahse nang nilova i nu zawkin min lo hmuak hi ka hrethiam lo." tiin a han fiam zeuh va.

SArah-i pawh chu a nui sen sen a, "Keichu min hriat kha, ka thil tih tawh ah chuan eng dang mah ka.." a sawi zawh hma hma chuan, "Aw ka hria, ka va inthlak ange." nui chung hian Siamtea chuan a lo sawi khalh vat a, an nui dun bawk bawk a. Siamtea chuan a chhuah san ta a, Sarah-i pawh a thaw hak mai.

A paragraph tawp berah chuan ti hian a ziak a, "Thian chauh nilo, kawppui thlan hi fimkhur a lo ngai takzet a nih hi. Mi hi kan lan dan ang ngawta teh hi a fuh lo khawp mai, Maruata hian min hriat chian lehzual tir takzet a ni. I kawppui kha a hmel chauh nilovin, enge a nun hlui te, eng ang mi nge a nih, a rintlak em tih thlengin chik thin ang che." tiin.

***************************************

THE END