THE CRAWLING WOMAN (Spanish : Repente Mulier) MIZO SUPERNATURAL HORROR STORY Written by : Aaron Malsawmdawngzuala Chapter - 4

 THE CRAWLING WOMAN

(Spanish : Repente Mulier)

MIZO SUPERNATURAL HORROR STORY

Written by : Aaron Malsawmdawngzuala

Chapter - 4

*********************************************

Motor ah chuan tlan pahin Sarah-i leh Maruata te chu an thu ngawi dun kar a, Hotel lam an pan leh mek a ni. Maruata chuan thawk a han la deuh hrawk a, "Engtik lai khan nge kha chanchinbu them kha i lo chehthlak reng reng a? I paih daih tawh ang chu tia, ilo chep thla deuh thlap mai chu ania?" tiin a han zawt deuh tawp a.

SArah-i chu a lo khi var var a, "Nia...ka vei em bawk a ni. Hrehawm ka ti thin keimah pawh hi, thil ka vei tawh chu ka vei bur zel bawk sia. Ka paih vek tawh a, mahse hemi khua a kan zin dawn hma ni chiah khan ka hai chhuak leh alawm." tiin a lo chhang a. Maruata chuan a lu ahan bu nghauh nghauh va, "Anih leh Siamtea kha, a thu sawi kha i awih em?" tiin a han zawt leh a.

Sarah-i chu a ngawi vang vang a, "Lily bo dan khan engemaw thuruk chu a nei chiang a ni, a bo mawl tawp thei lo reng reng." a han ti nuah nuah a. Maruata chu a han thaw leh deuh hak a, "Keichu ka awih lo tihna ni lovin, thlahrang chungchang a sawi tak kha chu awih a harsa ve a ni. Lily bo danah thil diklo, thuruk inthup chu a lo awm a ni mahna." a lo ti daih mai.

SArah-i chuan a melh hrawk a, "MAruat, i awih loh ka hlau em a, ka sawi lo mai mai alawm." a han ti chu Maruata chuan a melh hru mai. Hriatthiam loh hmel tak hian, "Eng chu maw, eng maw i sawi duh loh chu?" tiin a zawt hu mai a. Sarah-i chuan a chhang mai lo, a ngawi deuh vang vang phawt a.

Chutah a han thu tha deuh va, "Nizan khan...Lily thlalak en tur a Lobby lama i chhuk khan, khami hlan khan engemaw ka tawng a ni." tiin a chhang a. Maruata chuan mak tih hmel tak hian, "Enge i tawn a?" a ti leh hu mai. Sarah-i chuan sawi mai chu a hreh ve viau, a pasal hual MAruata chuan a awih sak loh a hlau pawh a ni mahna.

MAhse Maruata chuan a zawt lui zel a, "Nizana Lily thlalak en tura i zu chhuk khan roomah keimahin ka lo nghak che a, bathroom lamah khan thawm ka hria a. Tui inherh haw ri ni ngeiin ka hria, chuan kawngka kha tlemin a lo inhawng bawk. A hma khan ka kalh reng sia, tu lo hawn nge ka hre lo. Chuan ka va lut a, ka luh rual rualin a tawp bawk. Khami hnu khan darthlalangah ka inen a, ka hnunglam tukverh ah khan hmeichhe pakhat lo dak ka hmu bawk." tiin a chhang ta nge nge a.

Maruata chuan mak a tih rual rual chuan a awih chiah lo, "Animaw? Eng ang hmel pu nge, i ti tak tak em ni?" tiin a en hu mai a. SArah-i chuan lungawi loh hmel tak hian a han melh hrawk a, "DAwt ka sawi peih i ring em ni? Hei leh chen kan thleng tawh a, dawt mai mai ni se helai thlegn thleng ka thleng peih teuh lo mai." a lo ti zek mai.

MAruata chu a ngawi vang vang a, "Anih leh chunu, hmeichhia i hmuh chuan engtin zel?" tiin a han zawh chhunzawm leh a. SArah-i chuan sawi chhunzawmin, "Ka va hawi phei kha, a lo bo leh daih a. Tukverh hial te ka va hawng a, mahse tumah ka hmu lo. Tichuan i rawn let ta kha a ni a, min awih loh ka hlau va engmah ka sawi duh lo a nih kha." tiin a chhang a.

**********************************************

Hotel chu an thleng a, "SArah, lo han lut la... motor hi ka han park tha lawk ange." Marauta chuan a ti a. SArah-i chuan a chhang lem lo, hotel chhungah chuan a luhsan ta a. Maruata pawh chuan motor chu a park tha a, tichuan garage chu a chhuahsan a. Hotel chhung lam a pan ve tur chiah chu Hotel hnung, bang phena tu emaw bawkvak phei zuk chu a hmu leh ta.

A ding chat mai a, a en vang vang mai. A mitthla ah chuan an zin hma lawka, thingpui dawr bula chhang a ei laia zunin phena tu emaw bawkvak phei thut a hmuh te chu a rawn lang nghal zawt zawt mai. Second khat pawh nilo, a phe zuai chauh kha ni mahse, an pian erawh a in ang chiah chiah tih a chiang hle thung.

A ngaih chu a tha tawh bik lo kher mai, fiah ngei chu a duh a. Chhun ni en lai tak a lo ni bawk nen,  han hlauh vakna chhan tur a hre bik lem lo. Tichuan huaisen tak chuan hotel hnung lam chu ava pan a, a thleng tep tih ah chuan thawm a hre leh ta tlat mai. Leith(r)il a mihring bawkvak ri hruap hruap ri hi a ang ber, kal tlang mai lo chuan a han ding ngawi vang vang phawt a.

A thawm hriat chuan a rap ve ta deuh, a ri lah chu a rawn hnai tawlh tawlh mai si a. Chhe te chuan Maruata chu a han tawlh hnung ve hret hret a, bawkvak ri hruap hruap thawm pawh chu a rawn ring ve tulh tulh bawk. Maruata chu a thlan a tla buah tawh a, a hma zawn chu mit khap lek lo hian a en ran tawh mai.

Chutah le, a darah chuan tu emaw hian a rawn vuan thut mai a. Maruata phu nasa lutuk chu a thlarau a thlawk chhuak lo chauh, a zuang deuh dawrh mai. A t(r)e deuh that bawk a, hotel sweeper lek chu lo niin. Maruata chu a thaw huai a, "Min va ti phu nasa ve, thawm rawn nei hmasa ta che." tiin a la vin deuh vak zui a.

Sweeper chuan inthlahrung tak hian, "Ka tihpalh ka pu, ngawi rengin i lo ding vung vung sia. Lo ko tur che ka nia, ka tihpalh takzet." tiin ngaihdam a dil nghal mawlh mawlh a. Maruata chuan a hma zawn chu ava en leh a, bawkvak thawm ni awm tak a hriat pawh kha a reh hmak mai.

A va kal hnai a, hotel hnuglamah chuan ava phei a. Mahse tumah hmuh tur an awm lo, a let leh nghal vat a. Sweeper bawk chuan, "Bawlhhlawh hi ka dah chhuak dawn a, tikhan che miah lo khan i lo ding vung vung bawk sia. Mamawh i nei em ni, ka pu?" tiin a han zawt a. Maruata chu a thaw hak a, "Nei love." tih pah chuan a kal ta daih a, hotel chhungah chuan a lut tlang nghal a.

*************************************

Tlai dar 5 a pel tawh a, khua pawh a thim dawn tan ta. Khua chu a dur deuh khup mai a, ruah erawh ala sur chiah lo thung. Boruak pawh a hma khan lum viau mahse, chumi tlai kher kher chuan a vawt ve deuh ta vur mai. Coffee in pah chuan SArah-i chuan thil a ziak leh mawlh mawlh a, Siamtea an kawmna vel te chu a ziak thla a.

Maruata erawh khumah thu in a melh ngai a melh vung vung a, a hma ah chuan beer un khat leh sehhmeh tlem azawng a inchhawp bawk a. Chhuna a thil tawn, hotel hnunglama a thawm hriat te leh a thil hmuh te chu a ngaihtuah let a. A tirah khan awih lo viau mahse, tunah chuan a dan a dang ta deuh.

Sarah-i chu ava en a, ani lah chu a lo la ziak tui nasa mai. Beer chu novah chuan a thli ri karh karh a, a tlak deuh pap a. Sehhmeh han hmawm zeuh pah chuan, "SArah, thil ka lo zawt lawk che." a han ti a. SArah-i chuan en miah lo hian, "Aw...tikhan sawi la." tiin a thil ziah lai ziah chhunzawm zel chung chuan a lo chhang a.

MAruata chu a han thaw leh deuh hluai phawt a, "Tukin khan, ngatinge nizanah ka tawngvai em, ka tho a em, engtin nge ka awm tia min zawh chhen a? Mangchhia i mang leh tawh em ni?" tiin a han zawt a. SArah-i chuan a thil ziah lai dah meuh chuan a rawn en a, "Ehe, engtin nge chutiang zawhna chang te min hriat zawk a?" tiin a nui lui deuh sak a.

"Enge i sawi awmzia?"

"Aa.. ka beisei lo lutuk a, a tira ka zawh che pawh khan i uksak vak si lova, chuvang mawle."

"Anih ka zawhna chu min chhang tawh la?"

"Umm i ring dik alawm, mumang tha lo tak ka nei leh a ni."

"Enge i mumang chu, enge i hmuh?"

SArah-i chuan a mumang zawng zawng chu a hrilh ta vek a, MAruata chuan a ngai serious ve tan tawh kher mai. A ngawi vang vang a, "Vawiin khan, nizana Lily thlalak ka en hlan khan tui inherh haw ri ka hria i tih kha, kha chu i mumang a ni lo tiraw?" tiin a han zawt leh a. "Ni nang, ni nang. Ka mumang chu nichina ka sawi kha a nimai, tui inherh haw ri tho chu ka mang chhunzawm leh a nih ber chu." tiin SArah-i chuan a lo chhang a.

An ngawih dun vang vang lai chuan kawngka a rawn inkik a, Sarah-i chuan ava hawn sak a. An zanriah tur a lo thleng chu niin, "Ka ril pawh a tam nek lo ve a, ka ngaih a tha vak tawh lo riau mai." Maruata chuan a ti nuah nuah a. SArah-i chuan a en hu a, "Enge awmzia, eng chuan nge i ngaih ti tha lova?" tiin a lo zawt nghal vat a.

Maruata chuan a thil tawn te chu sawi ve mai chu a han tum a, mahse Sarah-i a ti hlau zual ang tih a hlauh vang pawh a ni mahna. Sawi loh chu a thlang ta zawk a, "Nakinah.. chaw eikhamah kan la sawi dawn nia." tiin a chhang ta daih a. Sarah-i pawh chuan a zawt chhunzawm bik tawh lem lo, tichuan zanriah chu an kil dun ta a.

*************************************************

Zan a ni a, Sarah-i chu Lobby lamah chuan a chhuk thla a. Receptionist pakhat chauh hi a lo awm a. A va pan phei a, "Thiannu, ka lo be buai lawk thei che angem?" polite tak chuan ava ti a. Receptionist pawh chuan nui sang hian, "Aw thei e, enge ni ta?" tiin a lo chhawn a. SArah-i chu a han hawi kual zeuh zeuh phawt a, "Ihh...inzawh chi a ni em chu ka hre lova, hemi hotel neitupa hi ala dam em?" tiin a han zawt deuh thut a.

Receptionist pawh chuan mak a ti rilru angreng hle mai, "Ihh..aw, la dam e. Nga.. ngatan nge i tih?" a ti deuh hu mai. Sarah-i chu za lo tak chuan a nui lui suk a, "Englo ania, aaa.. hemi hotel chungchang hi zawh chian ka duh mawle. Chubakah thil dangah biak ka duh bawk a, a number emaw, a address tal min hrilh theih chuan ka lawm ngawt ang." tiin a chhang a.

Receptionist chuan a en deuh vung vung phawt a, "Ka pi, hemi hotel hi a enkawl tawh lova. A neitu hming chauh a pu tawh, midang kutah a hlan tawh a. Hotel chungchangah chuan biak i duh chuan kan GM number ka pe ang che, pawi i tih lo chuan.." tiin a lo chhang leh a. Mahse Sarah-i chuan a duh hauh lo, "Hotel chungchang lovah pawh, mimal thilah pawh ka be duh a. Chuvang chuan biak pawh theihna tur ka dil che a, enge harsa viau awm a?" a ti deuh ta sak sak mai.

Chu receptionist nu pawh chuan chutia Sarah-i a han ri deuh thak chu a hlau ve deuh va, "Lo... lo nghak lawk aw, ka pi.." a ti bah deuh nuai a, paper eng eng emaw chu a hai kual a. Tichuan lehkha themah hian thil a ziak a, "Kha le." tih pahin Sarah-i chu a pe a. Sarah-i chuan paper chu a han en a, address zawk a lo ni.

Receptionist chu a han en leh a, "Inah a awm angem?" tiin a han zawt leh a. Inthlahrun hmel tak hian, "Aw..ka hre lo. Awm ang, mahse tunah chuan a kal chi tawh loh maithei. A tar ve reuh tawh lutuk a, a muhil tawh ang." tiin receptionist chuan a lo chhang a. Sarah-i chu a han thaw hak a, "Anih leh naktukah a awm angem?" tiin a zawt leh a.

"Ka hre lo, ka pi. A awm mai chu ka ring, ka hrechiang ve vak lova." tiin a lo chhang leh a. SArah-i chu a khi suk a, "Ka lawm e." tiin chhohsan a tum a. Mahse banga Lily thlalak tar a hmuh chuan a ding leh chat a, a en deuh vang vang mai. Receptionist pawh chuan a lo en ve reng a, Sarah-i chuan thawk a han la leh deuh hrawk a, room lam pan chuan a chho ve leh ta a.

***************************************

Roomah chuan SArah-i chu a lut a, Maruata chu khumah chuan a lo thu a. SArah-i rawn lut chu lo enin, "Khawnge i kal daih a?" tiin a lo zawt nghal a. SArah-i chu a bulah chuan a thu a, "Receptionist bulah hotel neitu diktak zawk biak pawh theihna ka zu zawt a...chuan hei hi min pe." tih pah chuan paper chu a pe a.

Maruata chuan a han en a, "Address maw? Hei hi hotel neitu address tihna em ni?" tiin a lo zawt leh a. SArah-i chuan a lu lo bu nghauhvin, "A ni mai ang chu, ka zu dil alawm." tiin a chhang a. Maruata chu a han thaw hak a, "Engatan nge i tih? Tinge i zu dil kher a?" tiin a lo zawt veleh a.

"Engatan vak nge ni ang, Lily chungchang kan zawt chiang ang."

"Lily chungchang a?"

"Aw ni e, kan hriat tur pawimawh ber chu Lily hi tu chiah nge a nih tih hi a ni. Nizanah pawh Manager ka zawt tawh a, mahse a hre ve vak lo. A chhan chu Manager a nihna a la rei lova, Lily bona erawh kum 10 lai a liam tawh. Chuvang chuan hotel neitu diktak hi kan zawt anga, min hrilh tur a nei teuh ang ka ring."

Maruata chu za lo tak chuan a khi suk a, "Chuan...engtianga va zawh nge i tum? Ka pu, journalist ka nia. Lily bo dan kha ka chhui mek a, thu zawh duh che ka nei a... i va ti dawn em ni? Sarah, kum 10 lai a liam tawh a. Ani phei chuan a lo theihnghilh then hman tawh maithei asin, chubakah a sawi tha vak duh lovang." tiin a lo chhang daih mai.

SArah-i chuan lungawi loh hmel tak hian, "Engvangin maw? Kan sawi tir mai dawn lawm, kan zawt zela nga...engvangin nge maw kan sawi tir theih loh teh lul ang le?" a lo ti let hlur mai a. Maruata chuan a lu chu a han dawm vang vang a, "Ngaihtuah ta che, tu vak mahin an sawi that duh miah loh hi. Hotel neitu tan phei chuan ama hotel mualpho theihna ania, a sawi tha duh teuh lo mai. Pa ti kher kher, luhlul ngur ang chi a loh nih phei chuan kan tan chance a awm lo. Chubakah midanga  enkawl tir tawh a, a hming chauhvin a neitu a ni mai a, hotel lam tak phei hi chu a rawn ngaihtuah a rinawm tawh loh hrim hrim." a ti deuh chiam mai.

Sarah-i chu a ngawi vang vang a, "Anih leh tihdan dang i hria em ni?" tiin a zawt a. MAruata chuan paper chu a han en leh vang vang a, "Kan kal a nih pawhin, hei chu keimahin ka ti ang." a ti ta daih mai. SArah-i chuan hriatthiam loh hmel tak hian, "Eng nge i sawi awmzia?" tiin a zawt hu mai.

"Ka sawi awmzia chu kan kal a nih pawhin, hotel neitu hi chu keiman ka hmu ang."

"Engvangin maw, tinge ka tel ve lohvang?"

"I zawt phawng phawng zel a, engtin emaw pehhel kual vel duah te a ngai ve alawm."

"KA zawh mai lohvin, engemaw mi rin loh deuh thut le? Journalist ka nihna a rei tawh, mi ka kawm hnem ve tawk tawh. Ka thiam ve alawm, ka kal ve awm emai."

"Mi kawm i thiam lo ka ti lo, ni e.. kei ai chuan i thiam daih zawk ang chu. Ka sawi awmzia i man lo a nih kha, Sarah. Hemi case ah kher hi chuan i zia a danglam alawm, hriat i duh tut tut lutukna lamah mi hian an chhang tha duh lo zawk ang che tih ka hlau."

Sarah-i chu a khi sak a, "A nimaw...tunge min chhang tha duh lo awm tawh reng reng a? Helai kan thlen atang khan Siamtea chiah kha kan la kawm, ni e.. a tir chuan min chhang tha duh lo, mahse ka han sawifiah tak tak hnu kha chuan tha takin min chhan kha...i va theihnghilh hma ve?" tiin a thinrim lek lek mai.

MAruata chuan SArah-i chu a en vang vang a, "Siamtea kha chu a tawngtu a ni a, chuvang chuan a chhang tha che a nih kha. I theihnghilh zawk em ni, kan thlen tirh pawn hotel kawta tlangval pahnih bulah pawh eng sawi hmasa set set lovin thlahrang chungchang i zawh nghal thawr kha. An nuih put put kha i la hria em, dawt thuleng vak vel mai mai a nih thuin an chhang che a, an kal ta a nih kha." a lo ti ve sak sak mai a.

SArah-i chuan a chhang tawh lo, a tum bur mai. Rum zet hian Maruata chu a en a, "Anih leh nangpawh va kal ta la, engvak nge i va zawh chuan anga?" a ti vin deuh hlur a. MAruata chu a thaw deuh halh halh a, "Naktuk zingah khua var se... kan ngaihtuah tha dawn nia." tih chauh chuan a chhang a.

SArah-i chu a lungawi chiah lo, chutia an inhnial phah ta hrep mai pawh chu nuam lo a ti hle a. MAruata pawh chu tul lem lova a hau deuh chiam pawh chu a inthiamlo hnuhnawh leh hle. Mahse engmah an sawi chhunzawm tawh lo, "Tha a nih chu, ka mu dawn." tiin a mu hmak mai.

**************************************************

Zanlaiah chuan ruah chu a sur ta nge nge a, a ngai te ang bawkin SArah-i chu a harh leh ta tlat mai. T(r)ek tla ring tak chuan a ti harh a, a meng kawk mai. A mumang bawk a nih ringin muthilh leh mai chu a han tum a, mahse a thei thak lo. Lehlam a hawi phei a, Maruata chu a lo mutui nasa mai.

A lo hnar ri bawrh bawrh a, a mumang chu niin a hre lo. A thaw deuh huai a, ruah lah chu a tla hnem em em mai lehnghal a. Khawpui a ri dur dur reng bawk a, kawl a phe deuh zuai zuai reng bawk. Boruak chu a vawt angreng hle bawk a, SArah-i chu a muhil leh thei tawh hauh lo.

Chutia meng kur chunga a mut reng lai chuan tukverh chu vawm ni awm tak hian a rawn ri deuh dup a, a phu nasa kher mai. A va hawi vat a, mahse engmah chu a hmu lem lo. Ngaihsak loh luih chu a tum a, mahse a ngai te ang bawk chuan tukverh bawk chu a rawn ri leh dup mai.

SArah-i chu ava hawi leh vat a, mahse engmah chu a hmu chuang lo. Chumai bakah parda a inzar tlat a, engmah hmuh tur a awm lo. Maruata chu a sawi vak vak a, "Harh teh, tukverh saw tu emaw in a rawn vawm ania." tiin tih harh a tum a. Maruata lah chu a rum tuah tuah a, "Ummhh... a ninawm.." ti nuah nuah chung chuan rizai chu a sin tha sawk sawk a, lehlam a hawisan daih mai.

Sarah-i chu a chek hlur a, "Ninawm lutuk." tiin khum atang chuan a tho va, tukverh lam chu amah chuan ava pan ta ngat a. Parda chu a han hlim a, mak a ti kher mai. Tukverh chu hmun hnih ah, tereuh te hian a lo bal(dirty) a. Lunga rawn vawmna ni awm tak chuan a lang ngei bawk si, tukverh chu a han bih chhin a.

Hnuailamah lah engmah hmuh tur a awm lo, khawlai reng em em mai leh ruah sur avanga kawngsir vel kawi dup bak chu hmuh tur vak a awm lo. Parda chu a zar tha leh sawk sawk a, mahse a zar phui hma chiah chuan engemaw hmuh a nei ta. A tawp chat a, tukverh lam en chuan a hawi thla a.

Chutah le, a mumanga a hmuh thin ngei mai, Lily ang tak mai kha lamlianah chuan kawr bal em em mai leh t(r)et hnuang nen hian a lo bawkvak a nih chu. Chunlam atanga en a nih avang chuan a hmel a hmu thei lo, mahse a pian atang chuan a mumanga a hmuh thin ngei kha a ni tih chu a chiang.

Na tuar ang mai hian a vak tawk tawk hi a ni ber, kelawngin a awm bawk a. A kehnuai te chu a kak nasa em em a, amah chu a thi phung bawk. SArah-i mak ti leh hlau lutuk chu a meng phar awn awn mai a, Maruata kaih thawh tum chuan a han hawi let a. Chutah a hma zawn takah mai chuan Lily chu a lo ding run mai a nih chu, a phu nasa lutuk chu a hnungtawlh dawr a, tukverh chu nek hawng palhin Sarah-i chu tukverh atang chuan a tla ta mai a.

************************************

Sarah-i chu a harh zawk a, a awmna hmun chu mak a ti kher mai. Ramhnuai niawm tak hi a ni a, ruah sur hnuaiah chuan a lo mu reng mai a nih chu. A tho vat a, a hawi kual vak vak a. A awmna hmun chu a hre ta hauh lo, "Maruat, Maruat.... khawnge i awm?" tiin a au vak vak a, mahse chhangtu a nei der mai si lo.

Ruah lah chu a sur hnem em em mai a, amah pawh chu a huh zawr vek tawh. Mangang tak hian a tlan kual vak vak ringawt a, "Khawngaihin, min pui ru. Khawngaihin, Maruat.. min pui hram rawh." tiin a au vak vak a, mahse chhangtu an awm der mai si lo. A tap pur tawh a, kelawngin ala awm zui bawk si.

Rei fe a kal kual hnu chuan ral khat atang chuan light eng ava hmu ta hlauh mai, "Min.. min pui ru... khawngaihin.." tih pah chuan light eng awmna lam chu panin a tlan phei nghal a. Mahse mak tak maiin a thleng mai thei tlat lo, a kal chak poh leh light awmna chu a hla ve zel amaw tih mai tur hi a ni.

A tlan zel a, a thleng hnai ve deuh tan ta. Light pawh chu a rawn eng lian telh telh a, mahse a thlen dawn tepah chuan a sira Lily lo ding reng mai chu a hmu thut a. A phu nasa lutuk chu a petek dawrh a, a thal thuai nghe nghe. Rang takin a tho lehnghal a, Lily chu a va en a. Lily lah chuan hmai khem nuai chung leh mitmu sen vek chung chuan a lo melh run mai a, a sama  thur vek bawk.

Sarah-i chuan hlau leh mak ti tak chung chuan a en reng a, a chhan pawh ruah sur nasa viau mahse Lily chu a huh ve miah loh vang a ni. Lily sam chu a thur chhup mai a, a huh ve miah lo. Chutah a bula lei(ground) chu a kawk a, kawngka ni awm tak, lei hnuai lam luhna tur niawm tak chu a lo awm a.

SArah-i chuan a en reng a, a hrethiam lo kher mai. A hlauh em avang chuan a tlan leh nghal a, tichuan light awmna chu a thleng hnai zel a. A thlen dawn tep ah chuan t(r)ek a tla ri leh dur mai a, a hma zawn takah a ni lehnghal. A t(r)ek chuai mai a, a eng pup bawk. Sarah-i chu a au vak a, a thal nghal tawp bawk.

*************************************

"Sarah, Sarah..i harh em? Sarah, harh teh." tia be mawlh mawlh thawm chuan SArah-i chu a ti harh a, a rawn meng kawk mai. Maruata chuan kaih thawh a lo tum mek chu niin, SArah-i chu harh chiang tak a ni. A thu chhuak nghal a, a thlan chuan a lo bual huh vek tawh. Maruata chu a thaw huai a, "Khai aw... min ti mangang hman alawm." tiin SArah-i chu a en vung vung a.

SArah-i chu a hawi kual a, "Ma.. Maruat, ka mumang, ka mumang a ni lo tiraw?" a ti bah nuai mai a, ala hlauthawng takzet. Maruata chuan a samah lo chulin, "AW.. i mumang a ni lo. I bulah ka awm tawh e, Sarah. Hlauthawng tawh suh, mangchhia i mang leh a nih dawn kha...ava han buaithlak thin e aw.." a ti vawng vawng mai.

SArah-i pawh chu a han insik leh vel chhin a, a mumang a ni tawh lo tih chu a chian ve thei ta chauh va. A thaw huai mai, "Amak lutuk, a tak a ang bawk si. Enge awmzia pawh ka hre lo, a mak lutuk." tiin a tap lek lek mai a. Maruata chuan a khawngaih hmel hle mai, "Engtia han tih chi nge maw ni dawn le aw...tih ngaihna vak ka hre bik si lova." a han ti nuah nuah a.

SArah-i chuan Maruata chu a en a, "Engtin nge ka awm a?" tiin a zawt a. Maruata chu a thaw hak a, "Ka tho hma deuh va, ka workout zo kha roomah hian ka rawn lut a. I lo tal vak vak a, ka hlauthawngin kaih thawh che ka rawn tum mawle." tiin a chhang a. SArah-i chuan hrehawm a tih hmel kher mai, mahse engmah a sawi chhunzawm lo.

Chutah Maruata bawk chuan, "Enge i hmuh reng reng a?" tiin a zawt leh a, Sarah-i chuan a chhang mai lo. A maimitchhin vang vang hnuah chuan rawn meng deuh kawkin, "Ka sawi peih rih lo, chhunah kan sawi dawnnia. Engmah min zawt rih suh, ka mitthlaah ka la hmu reng mai." tiin a lo chhang daih mai.

Maruata pawh chuan a hrethiam em em a, engmah a zawt zui tawh lem lo. SArah-i chu a tho va, a inphih fai a. Maruata pawh chu inthlakin tukthuan an ei turte chu a han order a, Sarah-i inphih fai zawh veleh chuan a inbual fai ve nghal bawk a. Sarah-i erawh work out lam a ngaihtuah tawh lo, a melh ngai melhin a thu ngawi leh vung vung ringawt mai.

************************************************

Chaw an eikham hnu chuan Maruata chu a insiam mawlh mawlh a, Sarah-i chuan a en reng a. Minute 2 vel chu inbe lo chuan an awm reng a, "Khawnge i kal dawn?" tiin SArah-i chuan a zawt ta nge nge a. Maruata chuan insiam mawlh mawlh pah chuan, "Nizanah kan sawi vek tawh kha." tiin en pawh en lo chuan a chhang a.

"Enge kan sawi?"

"Hotel neitu kha..ka va hmu ang, keimahin."

"Enge nangmah kher a ngaihna, ka lo kal ve dawn lo mi?"

"Sarah, min ring rawh. Keimahin ka kal ang, nang chu hetah lo awm rawh. Zan i mu tha awm bawk silo, i chau lutuk ang, i in-concentrate thei lovang."

"Enge ka lo tih anga, chubakah tinge nangmah a kal kher a ngaihna?"

"Thil ka hre zau thei zawk ang, nangchu i chau, i harhfim dawn chuang lo."

"Engtik lai khan nge he ka thiltih ah hian min tuipui ve tak viau a?"

A sam a khuih mawlh mawlh lai chu Maruata chuan a dah a, SArah-i bulah chuan ava thu a. Thutak zet hian, "Ni e, a tir kha chuan ka tui pui lo che. Chumai a ni lo, he khua a zin pawh hi ka duh hek lo. Mahse tunah chuan ka tui pui che angai, a chhan chu eng emaw chu ka tawng ve tawh alawm." a han ti chu Sarah-i a meng kawk mai.

A thaw nghal halh halh a, "A.. a nimaw, eng... enge i tawn ve?" tiin a zawt a. MAruata chuan a sawi hreh viau, mahse a sawi ta vek a. Lawirang khua a an zin hma a, petrola  la zo thingpui dawra a chawlh laia a thil tawn te, a chhang funna chanchinbu a thil inziak te thleng chuan a hrilh ve ta vek a.

SArah-i chuan mak a ti takzet, "Tinge a tirah khan min hrilh loh, kan zin hma daih tawh pawn i lo tawn ve tawh tho chu?" tiin a lungawi lo lek lek mai. Inthlahrung tak hian Maruata pawh chuan, "Ni e..a dik alawm. A tir kha chuan ka lo awih lo che a, mahse tunah chuan eng emaw chu a awm ve tih ka chiang tawh tlat a ni. Chuvang chuan hetah lo awm la, ka va kal anga, chanchin kan inhrilh leh dawnnia." tiin zaidam tak chuan a  han hrilh a.

Sarah-i pawhn chuan Maruata thuthlukna chu a rem ti ve ta, Maruata chu a insiam zova, a chhuak ta a. Sarah-i erawh roomah chuan a tawm reng a. Chhun dar 2 a ri a, SArah-i boring ti lutuk chu a diary ziah lai chu a dah a. Hotel bul vel fang kual mai mai tur chuan a chhuak ve ta nge nge a, hotel compound vel chu a han fang kual a.

Chutah hotel hnunglam pangah chuan a kal zel a, chutah a kal hla zel a. A chhan pawh chulai vel chu a hriat hnu a ang tlat a ni, a hawi kual ruai a. Minute 3 vel lai a kal zel hnu chuan a hre ta, a hma zan lawka a mumanga a hmuh, ruah sur hnuaia a lo awmna lai ngei kha a ni tih a hre ta.

Chuveleh rang lutukin a tlan nghal phut a, Lily ruah sur hnuaia huh ve miah lova lo ding run a hmuhna lam pan chuan a kal nghal a. A thleng ta, a mumanga Lily'n lei a kawh kha a en a. Hnahro tam tak bak a awm lo, mahse enchian tum chuan a pan zel a. Hnahro tam tak chu a han hui fai a, mak tak maiin kawngkhar a lo awm tak tak a.

Leihnuai lamah chuan pindan eng emaw chu a awm a ring nghal vat a, mahse chain lian tak hian a inkalh tlat thung. Tala lah chu a lian em em bawk a, hawn ngaihna a awm lo. Sarah-i chuan hawn tumin lung te chuan a han chhu a, mahse a thei chuang lo. Maruata rawn haw veleh hrilh ngei a ngai chuan a hria a, room lam pan chuan a let leh ta zawk a.

******************************************

TO BE CONTINUE