A HANDSOME CREATURE - 7 VICTOR RETURNS Written by : Aaron Malsawmdawngzuala WARNING - 18+ (A sequel to A Handsome Creature - 6) Chapter - 5

 A HANDSOME CREATURE - 7

VICTOR RETURNS

Written by : Aaron Malsawmdawngzuala

WARNING - 18+

(A sequel to A Handsome Creature - 6)

Chapter - 5

***************************************

Police Station ah chuan Pu Remliana leh Pi Pari te chu an awm a, ZAra bo thu report an theh lut a ni. Mangan hmel tak hian Pi Pari chuan, "Tlai khaw thim hnu velah kan lo thleng ang a tia, a kal hman khan. Mahse hei, nizan atanga tun thleng hian kan be tlang thei tawh miah lo a nih hi." tiin a inhnit deuh hlap hlap a.

Inspector Muana chuan Pu Remliana chu a en a, "Ka pu, in huanah chuan in va check tawh hrim hrim em?" tiin a zawt a. "Kan huan enkawltute, mi pali lai mai kha chu ka tir a. Mahse anni pawhin chanchin an la rawn nei bawk si lova, kan lo kal tawp mai a ni." tiin a chhang a.

Chutih lai chuan nupa pakhat hi an rawn lut a, "Ka pu, kan fanute an bo va...khawngaih takin min pui teh u." a nupui zawk chuan a rawn ti lut nghal a. Pu REmliana te nupa chu an va hawi rual a, an ding nghal at mai. Zara bialnu, Abby leh a nau SAngzuali te nu leh pa an lo ni reng mai.

Constable pakhat chuan, "Hahdam teh, ka pi. Engtia rei nge an bo tawh a, hetah hian lo thu phawt teh u." tiin kawngka bulah chuan a thut tir a, "Nimin zing atanga chhuak tawh an nia, thian ho kan picnic dawn a, kan riak nghal dawn e an tia. Nizan atang khan kan phone tlang thei miah lova, a thiante kan phone a, kan picnic lo an ti bawk sia..kan mangang emai, ka pu.." tiin Abby nu, Pi Duhi chuan a han chhang leh a.

Inspector chu a ding a, ava phei a. Pi Duhi chuan a va pan ve a, "Ka pu, khawngaihin min pui hram teh.." a tih lai chuan Pu Remliana te nupa chu ava hmu thut mai. A ding chat a, "Ehe..Pu Remlian, hetah enge in tih ve?" tiin a zawt hu mai a. Pi Pari chu ava kal hnai a, "Pi Duh, i fanu chuan kan picnic dawn a ti a maw?" a ti hu mai a.

Abby pa, Pu Vuana pawh chu a rawn phei ve nghal bawk. "AW ni e, enge hetah in tih?" tiin Pi Duhi chuan a lo zawt nawn leh a. Mak tih hmel tak hian Pi Pari chuan, "Ka fapa Zara nen i fanu te chu a nau Sangzuali nen, an pathumin kan huanah riak turin an chhuak alawm. Chu chu i fanu chuan a hrilh lo che amaw, ava mak awm ve?" a ti ta hu mai a.

Pu Remliana erawh a ngawi reng a, hlauthawng tak hian thlan tla bawrh bawrhin a lo ding ngawi reng mai. Inspector chuan Pi Duhi bulah chuan, "I fanu chuan engtiangin nge chhuanlam a siam a?" tiin a zawt ve a. Mahse a chhan hma chuan Pu Vuana chu rawn tawng chhuakin, "Kan bulah chuan a thiante nena picnic tur angin a insawi a, riah pawh chu a sawi ve ngei. A nau Sangzuali kan hruai tir ve bawk, tu a te mah kan phone thei si lo a, chuvanga heta lo kal kan nih hi." a rawn ti deuh fak fak mai.

"Chutiang chuan Zara te nen thlama riah tih vel te chu hre lawk ila chuan kal kan phal teuh lo mai." Pi Duhi chuan a lo ti ve leh bawk a. Inthlahrun hmel tak hian Pi Pari chuan, "In phone number kan nei bawk silova, rawn phone che u chu kan duh lutuk, in inah kan rawn phei dawn emaw ni kan ti hial a, mahse police station ah hian kan kal hmasa zawk ta mai a nih hi." a lo ti zawi sap a.

Inspector Muana chuan a lu a han bu nghat nghat a, "In fanu chu tumaw a hming?" tiin Pu Vuana chu a zawt a. "Abby a nia." tiin Pu Vuana chuan a lo chhang a. Inspector Muana chu a thutna lamah chuan a let leh a, "Abby chuan dawt a sawi tihna a nih chu, engpawh nise report ziak fel ula. Pu Remliana te thlamah chuan kan zu kal dawnnia." tiin constable te leh midang te chu inring nghal turin a hrilh hlawm a.

**********************************************

Tlang atang chuan an inhnawh puar hnuah chuan Mamuana te thianho pawh chu an chhuk leh a, engtia han chet chhunzawm tur nge pawh chu an hre mai bik lo. An kal zel ringawt a, "Kan kalna kawng hi kan hre reng reng em, ti hian kan kal vak vak ringawt a...khua a var har tawh dawn miah lo ania." Lucas-a chuan a han ti nuah nuah a.

Mamuana chu a ding chat a, midang pawh chu an ding ve a. A ngawi vang vang a, "Ti hian ti teh ang u, chhak lamah hian Dina nen kan kal anga, Lucas-a leh Henry-a ding lamah hian va kal ula, tichuan tuna kan awmna laiah hian kan intawk khawm leh dawnnia, khawvar hunah...tichuan a tha angem?" a han ti a.

"Inthen hrang kher hi a tul amawni le? Tihian kan vaiin kal khawm zel zawk ila, pawisa zawng ve dang an awm a rinawm bawk a, Victor-a hi khawiah tak hian nge a awm a hriat bawk siloh nen, kalkawng pawh kan hre thei dawn em ni?" tiin Henry-a chuan a lo hnial a.

Mamuana chu a khi suk a, "Enge maw i hlauh em em le, silai kan neih vek hi..ka sawi ang chuan ti ila, tichuan a fuh zawk ang. Hetia kan pali a kan kal khawm zel chuan a hlawk lovang, phone pawh a awm a, kan inphone kual zel mai dawn alawm." tiin a lo chhang a.

An ngawi thup a, "Umm.. a tha e, anih chuan kal hrang ila nimai lawm." tih pah chuan a kal deuh hmuk a, Henry-a chuan a zui ve nghal a. Mamuana chu a han thawk hak a, "Keini pawh i kal ang hmiang...khua a var hma ngei hian, kan rei lutuk palha nge." a han ti a.

Tichuan an kal ta a, "U Mamuan, keichu tumah hi ka ring vak lo ania. Henry-a leh Lucas-a khan pawisa kha lo hmu hmasa zawk ta se, min hrilh lova an pahnih-a an tlan bo pui daih ania ka rin ni." a han ti nuah nuah a. Mamuana chu a lo nui leh suk a, "Chuvang alawm, ka duhsak che a...ka bulah ka awm tir zawk reng che ni." tiin a lo chhang daih mai.

Hriatthiam loh hmel tak hian Dina chuan, "Eng a? Enge i sawi awmzia?" a ti deuh hu mai. "Keipawn nangmah ang chiah khan khamite pahnih kha ka ring reng reng hleinem, Lucas-a phei kha chu mi rinawmloh lutuk an tia lawm. Mi sawi sep sep hi a hlawh nasa ania, chuvang chuan keimahni pahnih hian pawisa chu kan hmu a nih phawt chuan kan nei hmak ang." tiin Mamuana chuan a chhang leh a.

************************************************

SAmmy-a leh Peka te chu an kal zel a, pawisa a rit bawk nen, an hah dun tawh khawp mai. Chutah Sammy-a chu a ding thut a, Peka pawh chu a ding ve nghal a. Mak tih hmel tak hian Peka chuan, "Tinge, enge i din thut a?" tiin a lo zawt nghal vat a. SAmmy-a chuan a han ngaithla chiang a, "Lui luang ri niawm tak ka hria." tih leh tlan a rual nghal a.

Peka chuan a um ve nghal bawk, an kal zel a. Chutah thlam chu an thleng ve ta, "Ehe.. saw chu thlam ava nih hmel ve?" Peka chuan a han ti nuah nuah a. Sammy-a chuan a en vang vang a, "Mi tu emaw an awm ngei ang, tanpuina iva dil teh ang." tih leh kal a tum nghal mai a.

Mahse PEka chuan a lo dang a, "NGawt a che, Nghaka leh Zualtea thattu kha a lo ni maithei asin." tiin a chelh tlat a. Mahse Sammy-a chuan, "A nih chuan tiang hian kan kal pel mai dawn mi, en ta che...thlam nawm hmel tak a nih saw... assam type lehnghal ania, light pawh a in off vek alawm. Mi chu awm se light pawh a eng ut ang chu, hawh teh va kal teh ang." a lo ti sam et mai.

Peka chu a han thaw hak a, "He pawisa hi mi tam takin an zawng, nangpawn i hria. Saw thlamah sawn min lo chang reng pawh an awm thei, i kal pel zawl mai teh ang." a la ti fan a. Sammy-a chu a han ngawi vang vang a, "Anih chuan tihian ti teh ang, ka va check anga, a him chuan ka rawn ko ang che." tih pah chuan pawisa bang chu a ak a, a chem chu kengin ava pan ta mai a.

Peka pawh chuan a dang hman tawh lo, "Sammy, kal suh...ava mawl tak." a ti hman tawk, Sammy-a chuan thlam chu ava pan phei zel a. Peka erawh a la biru reng thung, SAmmy-a chuan thlam chu ava thleng a. KAwngka chu a lo invih kalh ringawt a, a hawng a.

A chhung chu a lo thim mup mai, light a on a. A chhung chu a han melh kual a, dawhkana Victor-a in bang, zu chu ava hmu a. A hawi kual zeuh zeuh va, room lo awm hrang chu ava hmu leh a. A va lut tlang leh tawp a, chhuat lo awng huai te chu a hmu bawk a.

A en kual leh deuh va, tichuan room atang chuan chhuak lehin choka lam ava pan leh a. Dawhkana zu chu novah chuan a han thli karh karh a, tui pawh pawlh lem lo chuan a tlak deuh pawp mai. A then chawk chawk a, "Tak ve mawle.." tiin a phun sup mai. Chutih lai chuan Peka chu ngaih tha lo tak chung hian a lo la biru reng a, "Ava rei ve mawle..." a ti nuah nuah mai.

Chutah Sammy-a chu a rawn chhuak a, "Lo kal rawh, tumah an awm lo...ka enkual vek." a rawn ti phei lauh lauh mai. Peka pawh chu a ngaih a ngam ve ta deuh va, a bihrukna atang chuan a rawn chhuak ve a. Chutah tawng mur mur thawm an hre tlat mai, torch light eng tam tak rawn chuan an bul vel chu a rawn chhun sup sup bawk a.

An rawn thleng hnai tawh hle tih pawh a hriat khawp mai, "Nilo... Sammy, rawn tlan rawh. An hmu che ange, rawn tlan vat rawh." tiin Peka chuan a au vak vak a. Sammy-a chu ava tlan a, mahse a ding leh thut mai. Tawng ri mur mur pawh chu a ri a lo hnai zel a, "Enge i la din, an lo thleng dawn ania?" tiin Peka chuan a vin nasa tawh mai.

Thaw hlawp hlawp chung hian Sammy-a chuan, "Pawisa, pawisa bag kha...ka dah daih, thlam chhungah khan ka dah daih." a ti ta mai a. Peka chu a chek hlur tawh a, "Pawisa chu theihnghilh rawh...hei bag pakhat zawk ala awm.. pawisa nge i duh i nunna, an that ngei ngei ang che. Lo kal mai rawh, pawisa ngaihtuah hun a ni lo." tiin a mangang tawh kher mai.

Sammy-a chu a tah a chhuak hial thei, mahse a nunna chan em chu a duh bik si lo. Ring tak hian, "HRep tak chuan le.." a ti vak a. Peka lamah chuan a tlan ve ta a, tichuan ramhnuai lamah chuan an tlan chhe leh ta a. Chutih rual chuan police leh Pu Remliana te pawh chu an rawn thleng ve ta chiah a, mahse an zinga chuan Siamtea a awm ve lo thung.

*******************************************

Police pali, Pu Remliana leh Inspector Muana te chuan thlam chu an hmu ta. An ding chat hlawm a, an vai chuan mi paruk an ni. Thlam chu an en vang vang a, "Saw saw em ni, thlam chu?" tiin Inspector Muana chuan a han zawt a. Pu REmliana chuan a lu a lo bu nghut ringawt, "AWm chu an awm ngei mai, saw..inchhung light pawh a in on eng ut alawm." tih pah chuan pistol chu a phawrh nghal a.

Pu REmliana chu a ngawi vang vang a, "Tute nge an nih ang, rin ngaihna pawh ka nei lo." a han ti zawi sap a. Inspector Muana chu a han thaw deuh hak a, "Pu REmlian, Zara leh Abby te chu an lo la awm reng te hi a ni mai lo maw?" tiin a han zawt leh a. "Ka hre lo, awm pawh nise min rawn phone awm tak ania...hetah chuan signal a awm vek a, net signal a awm lo animai a." tiin a lo chhang a.

Inspector Muana chuan a pistol chu a han load ri rak a, "A tha e, ka hnung lamah lo kal la, kan cover phei ang che." tih pah chuan a nau police dangte chu, "Nangni'n min cover ve thung bawk ula." a han ti leh a. Tichuan an paruk chuan an kal phei ta a, Pu Remliana chu tlem chuan a han kal fal lui deuh va.

A phone a phawrh a, Siamtea chu a call zeuh va. Siamtea chuan a rawn pick up vat a, mahse a t(r)awng ri eih lo thung. ZAwi sap hian Pu Remliana chuan, "Rinring rawh le, kan lut dawn e." a han ti tham tiak a. Siamtea chu lui ral lehlam, mau hmun, a hma a hmaikawr vuah pathumte bihrukna ah ngei mai chuan sniper gun nen a lo awm reng mai.

An kal hnai zel a, "Police kan ni e, thlam chhungah khan awm in awm anih chuan in ban chung lamah phar chungin rawn chhuak rawh u." Inspector Muana chuan a han ti lauh lauh va, mahse chhangtu an awm lo. An kal hnai zel a, "Ka sawi nawn leh ang, police kan ni e. Thlam chhungah khan awm in awm anih chuan lo chhuak rawh u, anih loh chuan kan kap ang che u." a han ti leh lauh lauh va.

Mahse a ngai te ang bawk chuan chhangtu an awm lo, "Sir, kan lut tawp mai dawn em ni?" police zinga pakhat chuan a han ti a. Kawngka bulah chuan an ding thap a, "Vawi thum chhiar la, chuan i tlawh hawng thuai mai dawnnia." tiin Inspector Muana chuan a chhang a.

Tichuan police zinga pakhat chuan kawngka chu a tlawh hawng pawp mai, a chhe chiang hle bawk. A chhungah chuan an lut a, silai chuan an tin nghal. Inspector Muana erawh pawnah chuan Pu Remliana a lo awmpui thung a, "Sir, engkim a clear vek e, tumah an awm lo." police zinga pakhat chuan a rawn ti lauh lauh va.

Inspector Muana leh Pu Remliana te pawh chu inchhungah chuan an lut ve ta a, choka lama air bag pakhat lo awm chu Inspector Muana chuan a han en vang vang a. A va pan hnai a, bag zipper chu a hawng a. PAwisa tam em em mai chu a lo khat nuk mai, Pu Remliana'n a rawn hmu ve chiah chu a chil a lem nghal dawk a.

Inspector chuan a han khawih chhin a, "Pawisa tak tak vek a ni, a tam hle mai." a ti zawi sap mai. A ding a, Pu Remliana chu a han en vang vang a. Pu Remliana lah a thlan fim a lo tla leh der hman tawh, "He pawisa hi i ta a  ni mial em? A chinchang i hria em, engtin nge i thlamah a awm rikngawt theih? tiin a zawt ta mai a.

Mahse Pu Remliana chuan a lu thingin, "Aih... hetiang zat zat pawisa khawi atangin nge maw ka neih teh lul ang ni...ka ta a ni lo." tiin a chhang ve tlat mai. Chutih lai chuan room atang chuan police pakhat chuan, "Sir, hetah hian lo kal lawk teh." a rawn ti a.

Inspector chu ava kal a, police chuan chhuat awng chu a lo kawhhmuh a. Inspector chuan ava pan nghal a, chhuat awng chu a han bih vang vang a. Thir tiang hmanga chhut chhhiat a ni tih chu a hrethiam nghal a, "HEtah hian pawisa chu a awm anga, an la chhuak a ni ngei ang." police pakhat chuan a lo ti a.

"Anih chuan hetah hian pawisa hi an hnutchhiah ringawt mai si a, an rawn let leh ngei ang." police pakhat chuan a lo ti ve bawk a. Rinhlelh hmel tak hian Inspector Muana chuan Pu REmliana chu a melh leh ta run mai, "Pu REmlian, he pawisa hi i ta a ni lo tak tak maw?" tiin a han zawt nawn leh a.

Pu Remliana chuan hlauhthawn hmel tak hian, "Aih, ka ta a ni lo. Eng... engtin nge hetah a awm ka hre lo... engmah ka hre ve lo." a ti bah nuai mai. Inspector Muana chu a han thaw hak a, "Police Station-a in nupa a in lo kal pawh khan ka lo en ru reng che a, Pi Pari kha chu a mangang takzet a ni tih ka hre thei. MAhse nang kha chuan in fapa bo kha i ngaihpawimawh vak hmel loh, thildang zawk a ni inngaihtuah ni. Helai hmunah hian, he thlamah hian ZAra te kha an kal a, tichuan an chanchin in hre zui ta lova. Mi pali i tir a, an chinchang i hre ta bik lo va. Pu Remlian, vawikhat chiah ka zawt nawn leh ang che. Dawt min hrilh suh, he pawisa hi khawi ami nge?" tiin a zawt leh ta khur khur mai.

Chutah Pu Remliana chuan muang chang chuan a ban a phar a, a tum deuh hmuk bawk. Inspector Muana leh a nau te chuan silai chuan an tin nghal a, "Enge tih i tum, thil atthlak ti reng reng suh ang che....Pu Remlian, kan kal hreh dawn miah lo che ania." tiin Inspector chuan a vau khur khur mai.

Chutah Pu Remliana chuan a ban kut chu a han hui zeuh va, an awmna atanga hla vak lova lo awm ve reng, Siamtea chuan a sniper rifle hum lai, Sako TRG 42 ngei mai chu a hmet puak ta. A ri chu a ring lo, a ri deuh set rignawt. Mahse Inspector Muana bula ding, police pakhat chal chu a rawn pawp hawk mai.

A thal chiang khawp mai, chuveleh tukverh lah chu Inspector chuan ava hawi nghal a. Sniper chuan a awmah a rawn kap fuh ve a, a thal ve tawp mai. Midang pathum te pawh chu rang lutukin a kal hlum ve vek bawk, mahse Inspector ber chu a la thi ve lo. Pu REmliana chu a khi suk a, Inspector chu ngaihnep hmel tak hian a han en vel a.

Inspector chuan na tih hmel tak hian Pu Remliana chu a rawn melh ve tawk tawk mai, Pu Remliana chuan ava pan hnai a. A kun hniam a, "Ni e...he pawisa hi ka ta a ni. KA ta tur, a chhan chu he pawisa neitu diktak zawk chu a that tawh a ni." a ti ta mai a. Mak tih hmel tak hian Inspector Muana chuan, "Eng... eng a? Tu.. tunge i nih a?" a ti hu mai a.

Pu Remliana chu a han nui deuh huah huah a, "Pari hi ka duh vanga nei ka ni lo, he pawisa vang zawk hian a ni. Zara kha ka fapa tak tak a ni lo bawk, ka naute ka tir a, Zara leh Abby leh Sangzuali te kha, an pathum khan turin ka tir a ni. Kei hian he pawisa neitu diktak, Zara pa diktak zawk, Pu Jacoba kha ka that a, tichuan tunah chuan, he pawisa hi ka ta a ni tawh." a han ti leh a.

Inspector Muana chuan a chhang lo, rum tak hian a melh vang vang ringawt. Pu Remliana chuan sawi chhunzawm zelin, "Pu JAcoba hnuaiah hian ka thawk thin a, a hausak zia pawh ka hria. HE pawisa chungchang pawh hi min hrilh a, min ring tawk a ni. Damdawi tawlh ru thin kan ni a, hei hi Pi Pari pawhin a hre hauh lo. Pu JAcoba hi mi hrisello ve tak a ni a, cancer natna a vei a. Chu chu kei chuan ka hre reng a, a ro zawng zawng hi Zara'n a nei vek dawn tih pawh ka hria. Chuvang chuan Pu Jacob-a chu ka that ta a ni, hemi huan, hemi thlamah ngei hian a kal dawn t(r)umin a motor break ka ti fail a, tichuan a thi ta a ni. Motor ah khan a rukin bomb ka dah bawk a, a ruang chu hmuh tlak loh khawpin a chhe hneh a, a sawm hian a sawm deuh vek a ni. Accident angin kan lantir a, thlamah khan a pawisa eiruk leh damdawi tawlhna atanga a neih ho zawng zawng kha a dah tih min hrilh reng a, mahse Zara pawh dahthat law law ka duh a, a chhhan chu engkim hi neih sak vek ka duh a ni. Pi Pari hnenah chuan dawt sawiin Pu Jacoba khan ka thih hma ngeiin kan nu hi lo enkawl ang che min ti a tih velin ka hel kual a, tichuan tihian nupa kan lo ni ta mai a ni." a han ti deuh duah a.

Thei leh thei lo hian Inspector Muana chuan, "I him rei lovang, thudik chu puan chhuah ala ni thuai ang." a la ti fan a. Pu Remliana chu a khi suk a, "Mangtha le, Pu Inspector. Ka thuruk hi nang thi mai tur hnea ka puan chhuah vek nachhan tur ka hre lo." tih pah chuan a hmaiah chuan a chhuih pawp a.

Inspector Muana chu nikhaw hrelovin a awm nghal a, Pu Remliana phone chu a rawn ri a, a han en chu Siamtea a lo ni. A la nghal a, "Hello SIamte, i lo phei nghal em?" tiin a zawt nghal a. "Aw ka pu, ka lo phei mek e. Ka lo thleng tep, buaina dang a awm tawh lo maw?" tiin Siamtea chuan a rawn zawt let ve a.

Pu REmliana chuan choka lam a pan a, "Aw, mahse rawn hmanhmawh rawh. Thlam chhungah hian pawisa hi lakchhuah sa in a awm a, a ru tute hi an rawn let thuai maithei ania. Thlam lah hi inkalh miah lovin a lo awm sa bawk a, light a in on eng vek bawk." tiin a chhang a.

"AWle, ka lo thleng a nimai." tiin Siamtea chuan phone chu a dah a. Pawisa chu a han en vang vang a, "A va awlsam thin em, tihian phawrh chhuah sa thlapin in lo dah a. Ti hi chuan keiman ka zawn buai a ngai tawh dawn love, ka duh duh danin ka che thei tawh ang." tiin a nui var var a.

Pawisa chu a en vang vang a, chhiar ve hrim hrim chu tha in a hria a. A chhiar ta a, a chhiar tan dawn chauh tih ah chuan Siamtea chu a rawn thleng a, "Ehe Pu REmlian, pawisa chu i hmu chhuak nghal elaw?" a rawn ti hu mai. Pu REmliana chu a lo nui suk a, "Lak chhuah sa in a lo awm mawle, kan tan a awlsam khawp mai." tiin a lo chhang a.

Hriatthiam loh hmel tak hian Siamtea chuan, “Lak chhuah sa a, tu nge lo la chhuak a?” a ti hu mai a. Pu Remliana chu a han thaw hak a, “Huiham, thawnthu thui tak a ni. Engpawh nise nuai 20 vel kha  a ni a, min han chhiar pui teh.” a lo ti daih mai a. Thildang zawt tawh bik lem lo chuan Siam tea chuan a chhiar pui ve mai a, a tam tham bawk nen, an chhiar rei dun ngei mai.

******************************************

Pawisa bag khat la keng reng chung chuan Sammy-a leh Peka te hu an tlan zel a, a pawisa ak tu zawk Peka chu a chau ve deuh ta. A ding a, “Duhtawk ang, min rawn uzui lem lovin ka hria. KA chau lutuk, pawisa a rit bawk si.” tiin a thaw hluam hluam a.

Samy-a pawh chu a ding a, a lu dawm vawng vawng chung chuan a thu hnawk mai. Tap tuau hian, “Pawisa kha, tinge ka rawn ken chhuah loh? Ka ui emai, engtin nge ka tih tak ang?” tiin a mangang nasa mai. Chutah rum fe hian Peka chuan a han melh hrawk a, “Enge maw i hriat le? Tinge pawisa pawh chu ila ngaihtuah reng a? I nunna i chan lova lawm zawk ta che, pawisa hi i tan a pawimawh ber em ni?” tiin a lo vin hrep mai.

Sammy-a lah chuan, “I mawl em ni? Nuai 10 lai a nih kha, a cash vek lehnghalin... tunah chuan nuai 10 chauh kan kawl tawh, cheng nuai 20 chuang kan nei dawn amaw kan tih laiin... huiham, keimah thiam loh vek a ni.” tiin a lu chu a han dawm leh vang vang a.

Peka chuan a chhang tawh lem lo, a thaw hak ringawt. Zing dar 3 a ri tawh a, khua pawh a var har tawh lo tawp ang. Peka chuan a sir vel chu a han enkual a, motor a en fuh ta. A han en chiang a, an motor ngei mai a lo ni. A ding thut a, “Sammy, saw kan motor...kan motor awmna kan thleng der ania.” a han ti vak a.

Sammy chu ava hawi ve a, “Hawh..vatin, helai hmun hi i chhuahsan vat teh ang.” tih pah chuan a tlan a, Peka chuan a zui ve  nghal bawk. Motor chu an va thleng a, “Peka, khawi chahbi..” tiin Sammy-a chuan a dil nghal a. RAwn tlan ve mek pah chuan PEka chuan a ipte atang chuan chahbi chu a phawrh a, Sammy-a lamah chuan ava theh phei a.

SAmmy-a chuan pawisa bag chu seat hnung lamah chuan a dah a, kawngka chu  akhar leh nghal vat a. Peka rawn tlan mek chu a han melh vang vang a, chutah a rawn thleng tep tih ah chuan a awmah chuan a lo tlawh siah mai. Peka chu a thal tawp mai a, “Tihpalh thianpa, mahse nuai 10 lek chu insem atan chuan a tlem emai. Min hrethiam dawnnia, mangtha le.” tih pah chuan a hmaiah chuan ava pet leh pawp mai.

Peka chu a dak awrh a, a ka atang chuan thisen a rawn chhuak a. Chu veleh rang lutukin Sammy-a chu motor ah chuan a chuang a, chak takin a tlan ta daih a. Peka chu a la tho mai thei lo, a hmui chu na a ti takzet. A la kak deuh zui a, “Zawnga mai mai chu le..” tiin a phun nuah nuah mai.

*********************************************

Pawisa chu Pu Remliana leh Siamtea te chuan an chhiar zo va, mahse cheng nuai 10 chiah a ni ta mai. Pu REmliana chu a ding thut a, “Nilo, a kim lo. Ka hrechianga n ni, nuai 20 ngei a ni.” a ti khur khur mai a. Siamtea chu a ngawi vang vang a, “Nuai 10 dang chu tu emaw chuan a kawl mek tihna a ni.” a lo ti zawi ve sap bawk.

Pu Remliana chu a vei kual ang thuak thuak a, “Ka naute, mi pathum ka tirh hmsak ber te pawh khan min rawn phone a. Cheng nuai 20 ngei an ti alawm, air bag pawh pahnih lai ka ken tir tuna airbag pawh hi ka ken tir ngei kha a ni. Nuai 10 dang chu kan zawn hmuh angai, kan hmuh angai a ni tawp mai.” a han ti vin deuh khur khur a.

Siamtea chuan pawisa chu khung tha leh in a zip phui thlap a, “Pu Remlian, engpawh nise he pawisa hi he thlamah hian tu in nge dah kan hre si lova. A lo awm tawp kha a ni bawk si a, hetah awm reng hi kan tan a him lovang. Khang kan naute, mi pali kan tirh te pawh kha khawnge an awm kan hre bawk si lo. I chhuak phawt teh ang, motor ka dahna lam va pan vat teh ang.” a ti a.

Pu Remliana pawh chu a ding a, pawisa chu an ak a. Thlam atang chuan a chhuak ta a, an chhuah hnu minute 3 vel hnuah chuan Inspector Muana chu a rawn harh thut mai. A rawn thaw hrawk hrawk a, rang takin a tho nghal. Pu REmliana’n a chhuihna, a hmai chu a thi deuh ser ser a, a kamsir chu a kak deuh bawk.

A kawr chu a phelh a, bullet proof vest a lo ha hlauh chu niin. Vest chu a phelh a, tichuan a kawr chu a ha tha leh a. A then deuh chawk chawk mai, room atang chuan a chhuak a. Choka lam chu a pan vat a, mahse pawisa chu a lo awm tawh lo. Room lamah chuan a let leh a, chhuata lo let reng a pistol chu a chhar a.

A nau thi tawh te pistol chu a chhar vek bawk a, a mu(ammo) chu a la khawm a. Tichuan a ak tha a, “Pu Remlian, i cho loh tur i cho a ni. I cho sual hle bawk ang, ka kut ngei hian ka man dawn che.” tiin a phun zawi sap a. Tichuan thlam atang chuan a chhuak a, ramhnuai thim lai chu a torch light nen chuan a pan phei ve ta a.

**************************************

“A upat ber avang khan a thu ber amaw a intia, mi duh duh danin mi han tir kual vel chu a nia. PAwisa hi kan hmu hmasa a nih phawt chuan, Dina leh Mamuana khan cheng khat pawh chang suh se.” tiin Henry-a chu a ang buan buan mai. Lucas-a chu a lo khi suk a, “Kan hmu hmasa dawn alawm, ka ei lohna a rei tawh bawk a. Mamuana hi chu, cheng khat mai i nang, dere khat pawh an chang ve lovang.” a lo ti ve bawk a.

NGawi reng chuan thui ve chu an han kal leh a, “Thlama kan hmuh kha, khapa kha Victor Lalthanmawia chu a nihi ring ve reng reng em?” tiin Henry-a chuan a han zawt a. Second nga vel a ngawih vang vang hnuah chuan, “A ni kher dawn em mawni le ka tia, Mamuana hi chu thil inla hre ve hrim hrim hi ania. Pawisa zawngte zinga mi bak va nih suh, a hmel thup nan buara in a khuh vel mai mai a nih kha.” a lo ti sam et mai.

Henry-a pawh chu a khi suk a, “A thuhrimin helai ram hi a zau ve angreng ropui si a, pawisa kawltu ber hi a tu a pawh chu lo nise, a lo tlanbo pui thu tawh viau lo amw le te ka ti mai mai.” a han ti nuah nuah a. Lucas-a chu a thaw hak a, “a tlan bo thuii bik awmlo emai, khua  a thim bawk si nen. Keini pawh hei, khua a var loh chuan tunah hian pawisa chu lo hmu ta pawh ni ila, haw kawng kan hre dawn miah lo ania.” tiin a lo chhang leh a.

An ngawi dun leh vang vang a, “Silai kan kawl bawk a, tuman engmah kan la kap lo bawk. A mu chu ala tam thaw kaht bawk a, kan kawng dal tu chu kan kah hmiah hmiah....” Henry-a chuan a sawi zo hman lo, a ding chat a. Mak tih hmel tak hian Lucas-a chuan a en hu a, a ding ve nghal bawk.

"NGa ti gne, enge i din thut a?” tiin a zawt a. Henry-a chuan ngawi reng chuan a hma zawn chu a kawk a, Lucas-a pawh chu ava hawi phei ve nghal. Chutah a phu ve zuk mai, an hma takah chuan Hmaikawra chu a buara hmaikawr siam chawp nen chuan a lo ding khur mai a, a hreite chu a kut dinglam chuan a van reng bawk.

*************************************

TO BE CONTINUE