A HANDSOME CREATURE - 7 VICTOR RETURNS Written by : Aaron Malsawmdawngzuala WARNING - 18+ (A sequel to A Handsome Creature - 6) Chapter - 6 (LAST)

 A HANDSOME CREATURE - 7

VICTOR RETURNS

Written by : Aaron Malsawmdawngzuala

WARNING - 18+

(A sequel to A Handsome Creature - 6)

Chapter - 6

(LAST)

*****************************************

Lucas-a chuan a pistol a phawrh nghal a, Henry-a chuan a phawrh ve bawk. Hmaikawra chu an tin dun a, "Tunge i nih?" Lucas-a chuan a han ti vin thak a. Mahse Hmaikawra chuan a chhang lo, a hreite chu a vai vir vut vut a. Lucas-a bawk chuan, "Ka kap dawn che ania, tunge i nih sawi rawh." a han ti leh a.

Mahse Hmaikawra chuan a chhang chuang lo, a rawn pan hnai ta mai a. A silai keng zawk, Lucas-a leh Henry-a te thian dun chu an tawlh hnung hret hret mai. HEnry-a pawh chuan, "Ding rawh...ding rawh ka ti." a ti vak vak a. Hmaikawra erawh din a tum lo, a hlauh loh hmel hle bawk.

Chutah Lucas-a chuan Hmaikawra dar veilamah chuan a kap ta, Hmaikawra chu a eu zawk a. A thingthi hnawk mai, chutah Henry-a chuan a rawn kap ve leh a, a hnute ding lamah chuan a kap fuh a. Hmaikawra chu a thal tawp mai, Lucas-a chuan a va pan hnai a.

Kah leh a han tum a, mahse Henry-a chuan lo dangin, "Ni lo, Lucas. Thah kher a ngai lo, tihian a na tuar lo hian thi zawk rawh se... a rawn tho tawh hauh lovang." a lo ti vat a. Lucas-a chu a thaw hak a, a pistol chu a ak tha a. Henry-a pawh chuan a ak tha ve bawk, "A hmai khuhna kha hlip te, Victor-a chu a ni ngei em i han en ang hmiang." Lucas-a chuan a han ti a.

Henry-a chu a zu kun hniam a, Hmaikawra hmai khuhna buara chu hlip tumin a zu ban a. Chutah Hmaikawra chu a rawn meng thut mai, Henry-a kut chu a lo man chat a. A kut lehlam chuan a hrawkah a rek ta thut mai le, "Lu..Lucas, min chhan rawh." tiin a rak nghal chel chul mai a.

Lucas-a chu a rawn hawi a, pistol chu a phawrh leh nghal. Hmaikawra chu rawn tho lehin Henry-a chu a rek kang ta vu vu mai a, "Hey, thlah rawh... Zawnga, thlah nghal rawh." tiin Lucas-a chu a au vak vak ringawt a. Mahse Hmaikawra chuan thlah a tum loh hmel khawp mai, Lucas-a chuan silai chua  hmet puak leh ta.

Mahse Hmaikawra chu a kap fuh lo tlat, a thianpa Henry-a ke ah zawk chuan a fu ta tlat mai le. Henry-a na ti lutuk chu a t(r)e th(r)awt a, chuveleh Hmaikawra chuan a thlah a. Lucas-a chuan silai chu vawi li lai mai chu a han hmet puak leh a, mahse Hmaikawra erawh chuan Henry-a chu indan nan a lo hmang hmiah mai.

A hma zawnah chuan rek betin silaimu chuan Henry-a hlir chu a fuh ta mai a, a zawi hnawk mai. Lucas-a chuan silai chu hmeh puah leh a han tum a, mahse a mu a zo tawh tlat. Henry-a chu Hmaikawra chuan a thlah a, leiah chuan bawk thlawpin a che tawh eih lo.

Chutah Hmaikawra chuan a hreite chu a chhar leh a, Lucas-a lam chu ava pan ve ta. Lucas-a chu a lo hlau kher mai, "HEy, min rawn pan tawh suh. Kal bo rawh, min khawih hlek suh." tiin a khur dar dar mai. Hmaikawra chuan a pan hnai zel a, chutah a ke chu HEnry-a chuan a la rawn man hram hram a.

Thei leh thei lo hian, "Lucas...tlan.. tlan rawh." a rawn ti tawk tawk a. Hmaikawra chu a ding a,  Henry-a chu enin a han kun hniam deuh va. Chutah Henry-a ban veilam chu a hreite ken lai chuan a chek chhum hmawk mai, Henry-a na ti lutuk chu a au t(r)ial nasa ngei mai.

Lucas-a rap lutuk chu a ding ngawi reng a, a thlan a tla zawih zawih mai. Hmaikawra lah chuan a la duh tawk lo, Henry-a ban dinglam zawk chu a han chek chhum leh hmawk a. Thisen a chik zawr zawr mai, Lucas-a chu a tlanchhe nghal bawk. Henry-a chu a zawi vek tawh a, mahse a la thi lo cheu.

Hmaikawra chuan a hreite chu a han lek kang leh a, Henry-a hnungzangah chuan a chek leh ta siah siah mai. VAwi 10 vel lai a chek a, Henry-a hnungzang ruh pawh a lang thei hial a. A thi chiang ngang mai, Hmaikawra chu a han thaw deuh hak a. A hawi let a, Lucas-a lo tlanchhe mek chu ava hmu pha a.

A va um ta, ala tlan chak em em zui lehnghal. Lucas-a chu a tlan zel a, a thaw hlawp hlawp mai. Hmaiakwra chuan a um pha tep a, mahse a ding deuh thut. A hreite chu a han en vang vang a, tichuan Lucas-a tlanna lamah chuan a va vawm phei a. Lucas-a tukhumah tak mai chuan a bur chat mai a, Lucas-a pawh a ding chat mai.

A hmai ah chuan thisen a rawn luang zawih zawih a, a bawk thlawp mai. Hmaikawra chu a rawn thleng chawp chilh ve nghal bawk, Lucas-a lu a hreite bur vu mai chu a phawi ri hrawk a. Chutah dim lo tak chuan a chek leh vak vak a, Lucas-a lu chu a sawm hian a sawm nuai a ni ber mai.

Lucas-a pawh chu a thi ve leh ta, Hmaikawra chu a thaw halh halh mai a. Van lam chu a hawi chho va, khua pawh a var ve tep tawh ngei ang. Lucas-a ruang chu a en vang vang a, tichuan a ke ah chuan vuanin a hnuk ta mai a. Thlang lam kham ah chuan a theh liam ta daih mai, Lucas-a ruang chu a lum thla tual tual mai a.

***********************************************

Pu REmliana leh Siamtea te chu pawisa bag ak chuan an kal zel a, "Ka motor dahna kan thleng tepin ka hria, helai vel hi chu a ni chiang alawm." Siamtea chuan a han ti nuah nuah a, "I va chiang lo ve aw....ke a haw tauh tauh hi a ngai ange aw.. pawisa hi a rit si, chubakah nuai 10 dang a la bo bawk, ngaituahna siam thiam a har ka ti teh ania." tiin a lo phun deuh hrep a.

Chutah motor tlan ri niawm tak hi an hria a, "Chu..motor ri a ni em, ngaithla chiang teh." Pu REmliana bawk chuan a han ti leh a, an ding dun a. Siamtea pawh chuan a han ngaithla vang vang a, "Ava ang ve..a rawn hnai tual tual lehnghal." a lo ti ve bawk.

Motor ri chu a rawn hnai zel a, chutah an bul lawkah chuan motor light chuan a rawn chhun eng ta pup mai. A arwn tlan chak bawk sin nen, an chet sawn hman lo. Motor chuan a rawn su thuak a, Sammy-a a lo ni reng mai. Chutia Pu REmliana te a han hmu thut chu a phu nasa mai a, a kawi deuh zawr zawr mai. Thingkung pakhat chu a su tep a, mahse a break hman hlauh.

Chuveleh Pu Remliana leh Siamtea chu an va phei a, "Lo chhuak rawh.. tunge i nih?" tiin a silai ken chuan Siamtea chuan a tin nghal a, Sammy-a chu a hlauthawng kher mai. Pu Remliana chuan thinrim tak hian, "Tu phaingsen nge i nih a, motor atang khan rawn chhuak rawh." a rawn ti ve khur khur bawk a.

Sammy-a chuan hnial ngam hek lo, silaiin an tin tih a hmu ve kur bawk si nen. Hlau chung chung chuan a ban phar chung hian a rawn chhuak a, "Min kap suh u, engmah tih sual ka nei lo. Khawngaihin min kap suh u, ka lo chhuak e." a rawn ti nghal zuah zuah a.

Siamtea chuan a tin reng a, "Tunge i nih? HEtah enge i tih?" tiin a vau khur khur mai. Sammy-a chuan a chil a lem dawk a, "Ihh.. ram ka riak a. Chuan..ka haw mek a nih hi, ka lo hmu mai lo che u a, ka tihpalh a ni." a han ti tham tiak a. Motor chu Pu REmliana chuan a en vang vang a, "NAngmah chauh in em ni i nih?" tiin a han zawt ve a.

"Aw, kei... keimah chauh, ka pu." Sammy-a chuan a ti bah nuai mai. A seat hnung chu Pu Remliana chuan a hawng a, air bag chu a hmu ve ta. Rum tak hian Sammy-a chu a melh a, "Hei hi enge?" a ti vin khur khur a. Sammy-a chu a thlan a tla bawrh bawrh mai, "KA...ka thawmhnaw.." a ti zawi sap ringawt.

AWih loh hmel tak hian Pu REmliana chuan, "Hei hi i thawmhnaw maw?" tih pah chuan air bag chu a hnuk chhuak a, leiah chuan a nghat a. A han en chiang leh deuh va, chu air bag chu an air bag ken lai nen chuan a lo in ang chiah chiah mai. Pu Remliana chuan anmahni ken lai air bag chu a bulah chuan a dah a, zipper chu a hawng ve ve a.

PAwisa tam em em mai chu a lo lang ta, Sammy-a pawh chuan pawisa bag pakhat zawk a hmu ve chiah chu a  meng phawk nasa kher mai. Siamtea chuan a rawn en ve a, "Kha ngei kha a nih kha kan zawn chu.." tiin a khi suk a. Pu REmliana pawh chu a nui var var a, "Zawn rei a ngai lo hle mai." a ti zawi sap a.

Chutia silai kengtu ber, Siamtea hawi sawn hlan chu remchangah la in Sammy-a chuan silai chu ava chuh thut a. Mahse Siamtea chuan a lo thlah mai bik lo, an inchai ta rap rap mai. Thingkung deng dawn chuan Sammy-a chuan Siamtea chu a nawr bet a, silai pawh chu a chhuhsak thei ta.

Mahse hnunglam atang chuan Pu Remliana chuan a lo manbet ve a, an inchaina lamah chuan tum loh deuhvin silai chu a puak ta palh hlauh mai. Siamtea chal darah tak chuan ala fuh zui a, a thal nghal tawp mai. Chuveleh Sammy-a chuan silai hmang chuan Pu REmliana chu a khawng tlu tawp a, Pu REmliana chu an bul lawka kawng chhuk, awih vak lovah chuan a lum thla ta tual tual mai le.

Sammy-a chuan rang lutukin pawisa bag pahnih chu a la a, motorah chuan a khung sawk sawk a. Silai pawh chu a la a lemlo, leiah chuan a dah tawp. Tichuan motorah chuan a lut leh a, chak takin a tlan leh ta daih mai. Pu REmliana chu a lu a hai muai muai a, nikhaw hrelovin a awm ta der mai.

****************************************

Peka pawh chu pan tur ber hre lo chuan a kal kual a kal kual ringawt mai a, kawngpui lam panna kawng nia a rinna lam ah chuan a kal zel a. Chutah kawng pengthuam pathum lai chu a hmu ta mai a, a ding chat mai. Khawi ber nge kawngpui pawhna chu a hre der bik si lo, "Huiham, ka thi ngei dawn a nih hi." a ti zawi sap ringawt.

A laiah tak chuan a kal risk hmiah mai a, a chho zel a. Chutah kawng chhuk deuh a lo awm leh daih mai, a ding tawp. MAngan hmel tak hian, "Ka kal dik lo nge mawni, ka va ning tawh tak." tiin a phun nuah nuah a. Chutah kawng chhuk tak mai chu a han en thla a, thlam niawm tak, a chhung lo eng ruih mai chu a hmu a.

A ngaihtuah vang vang a, "Khulaia thlam kha chu a ni lo, mahse engtin nge thlam dang a lo awm theih? Khawi khawiah nge maw ka kal kual le..." a ti nuah nuah a. A zu pan ta nge nge a, a chhuk zel a. A hmu chiang tawlh tawlh a, thlam chu a lo ni ngei mai.

A thleng hnai zel a, va luh mai chu a ngam bik lo. Zara te thlam ai mah pawh chuan a lo lian zawk a, a en vung vung ringawt. Hmanrua emaw, invenna pakhat mah a nei si lo. A hawi kual a, thing hmawr zum a hmu fuh hlauh mai. A chhar vat a, tichuan thlam lam chu ava pan a.

A kal hnai zel a, a zam ve khawp mai. A thlan a tla bawrh bawrh a, a thing bung ken lai chu a hum nghet sauh sauh va. Thlam kawngka chu tlem a han nam chhin a, alo inkalh miah lo. A inhawng ta huau mai, mahse chutin a lut mai ngam bik lo. A aw a han thian kharh kharh a, "AWm in awm em, khawngaihin in mi tanpuina ka mamawh a ni." a han ti lauh lauh va.

Mahse tuman an chhang lo, a huaisenna zawng zawng sawmkhawmin a lut ta thuai mai a. A chhungah chuan tumah an awm lo, a hawi kual a. Tu emaw tak chu an khawsa mek a ni tih a hriat theih, inchhung bungrua te pawh a lo kim deuh thlap mai. Silhmun te a lo awm ve thlap a, chhuar te, dawhkan leh thutthleng te, thuk te a lo awm kim vek.

Chutah room atang chuan thawm a hria a, a phu nasa kher mai. Putar khuh ri berh berh ri ni tlatin a hria, "Tunge, awm in awm em ni?" a han ti vin deuh thak a. Mahse a rawn chhang let lo khuh ri chuan a chhunzawm reng a. "AWm in awm em, tunge ni?" Peka chuan a han ti leh a, mahse chhanna a la dawng chuang lo.

Room ah chuan a lut a, a lo thim deuh ruih mai. Dim light hi a lo inchhi eng ve tawk tawk a, ala sen deuh rum zui leh ta nghal a. Khum a lo awm a, a bul chair ah chuan amah hnungchhawn zawng hian putar sam tuak vek tawh hi a lo thu kun ngul mai a. PEka chuan mak a ti kher mai, "Ka pu, ka pu... ka tawng i hre thei em?" tiin a han bia a.

Mahse chu putar chuan a chhang miah lo, ala ngawi reng tho. A la khuh bawrh bawrh tho va, Peka chuan a hlau ru angreng khawp mai. A thing bung ken chu ala hum reng a, "Ka..ka pu, i tha em?" tiin a zawt leh a, muangchang chuan ava panhnai zel a. Chutah putar chu a rawn leh hawi thut a, tuboh a lo keng reng chu niin.

PEka inrin hma chuan a bekah chuan a rawn chhu chawrh a, PEka lu chu a hai chhawk mai. A bek chu a dawm nghal a, a thing bung ken pawh chu a thlauh nghal a. Chutah Putar bawk chuan a bekah bawk chuan a chhu leh pawp a, Peka chu a thal ta tawp mai. A lu a hai muai muai a, nikhaw hrelovin a awm ta der mai a.

**********************************************

Dina leh Mamuana te chuan pawisa chu an lo la zawng ve zel a, "Tiang reng reng chuan hmuh a har dawn ngei mai, ramhnuai hi a zau em em mai si a. Ka rindan chuan pawisa zawngtute zinga tu emaw ber hian a lak bo daih tawh ka ring, keini chuan kan hmuh pawh ka ring tawh lo." DIna chuan a ti nuah nuah mai.

Rum tak hian Mamuana chuan a melh hrawk a, "Nepa, ngawi mai mai teh. Ka duhsak vang che in ka bulah ka kal tir che a, Lucas-a te bulah chuan kal la chu eng tin tin emaw an bum che ang a, an that duh hial ang che mawle." a lo ti hrep mai. Dina pawh chuan a chhang tawh lem lo, an kal zel a.

Chutah eng emawni hi Dina chuan a chhuih a, a bawk thlawp mai. Mamuana chu ava hawi phei a, "Enge ni a?" a rawn ti vat a. Dina chu a tho leh nghal vat a, "Thil nem nuak ka chhuih, amak lutuk." tih pah chuan a thil chhuih chu a torch light ken chuan a han en a.

Chutah le, a rak ring kher mai. A tawlh hnung nghal dawr a, Mamuana pawh chuan a rawn en ve bawk. An thil hmuh chuan a barakhaih hle mai, an hma zawnah chuan Lucas-a ruang, lu sawm nuai mai, hmel hmuh tlak awm tawh lo khawpa sawisak hnu chu an hmu ta.

A hmel chu hmu lo mahse, a thawmhnaw hak atang chuan Lucas-a a ni tih an hre thei nghal. Dina hlau lutuk chu a thaw hrawk hrawk a, "Lu... Lucas-a  a ni em, U Mamuan.. Lucas-a tiraw?" tiin a tap tep hial a. Mamuana chuan a chhang mai lo, "Dina..hawh teh, kal vat teh ang." tih leh tlan a rual a.

Dina chuan a umzui ve nghal bawk, hla deuh fe an tlan hnu chuan an ding a. Thingkung hnuaiah chuan Mamuana chu a thu hnawk a, a bulah chuan Dina chua  thu ve bawk a. Mamuana chuan a melh ngai chu a melh vang vang a, "Victor Lalthanmawia, ama tih ngei kha a ni. An tawng fuh a ni ngei ang, Henry-a pawh a dam ka ring tawh lo." tiin a phun zawi sap a.

Tap pur hian Dina chuan, "U Mamuan, keichu ka duhtawk tawh. PAwisa kha ngatan mah ka ti tawh lo, helai hmun atang hian nung dama chhuah ka duh zawk.... i haw mai teh ang." a ti tuau mai. MAhse Mamuana ngaihdan a lo nilo nasa mai a, Dina chu a kawr awmah a tham a.

Vin zet hian, "Silai i neih kha...i hria em? Tlangval, mizo tlangval i ni ani lawm ni? VAwikhat pawh tikhan han sawi leh teh... pawisa vanga heta kal hi kan ni." tih pah chuan a hnek siah mai. Dina chuan a khawih let ve ngam si lo, a ngawi reng a. Mamuana bawk chuan, "A tirah pawh kan sawi, tual thah huamin hetah hian kan kal. Kan thianpa Lucas-a chu a lo thi tawh a ni maithei, mahse keichuan pawisa ka hmuh hma leh Victor-a ka thah hma loh chu helai hmun hi ka chhuahsan dawn lo." a ti vin khur khur a.

Dina mangang lutuk chu a hmai a hup a, a tap zawih zawih ringawt. Rum tak leh nep tih hmel tak hian Mamuana chuan a en reng a, "I silai kha min rawn pe rawh, keimahin ka chhunzawm mai ang. Tichuan i duh leh i haw dawnnia, i thei a nih phawt chuan...i duhthlanna a ni e." a han ti leh a.

Dina chu a ding a, silai chu a pe duh bik lo. A mittui chu a hru hul a, "Nilove, ka lo zui ang che.." tiin a chhang ta nge nge a. Mamuana chu a thaw hak a, "Lungngai suh, ka awm alawm. KA that vek ang, tupawh nise... pawisa chu kan hmu bawk ang." tiin a kal a, Dina chuan hreh tak chung chuan a zui ve bawk.

*******************************************

Pu Remliana chu a rawn harh a, a ban chu a sawh na deuh va. A then chawk chawk mai, a rawn tho tual tual a. Van lam a hawi chho va, khua a eng hnai tawh tih a hriat kher mai. Thim chu ala thim viau nang a, thim lutuk pawh kha a zia deuh tawh e. A thaw hak a, "Mai mai chuan le...ka pawisa kha ka zawng hmu tho tho ang." tiin a phun nuah nuah a.

A kal leh ta hnak hnak a, khawilam ber nge pan tur pawh a hre bik lo. Mahse rei pawh a kal lo, hnunglam atang chuan thawm a hria a. A ding chat mai, chutah a hnung lam atang chuan, "Che tawh suh." ti ri a hria a. Pistol in load ri rak a hre bawk, a che ngam tawh bik lo.

Chutah pistol keng tu ber chuan a rawn kal hnaih a, Inspector Muanawma a lo ni reng mai. Pu Remliana chuan mak tih hmel tak hian a en hu a, "Ehe.. ila.. ila dam maw?" a ti hu mai. Muanawma chu a khi suk a, "Min kahna lai, ka awm kha ka hup tlat kha i hre lo em ni? A chhan chu bullet proof vest ka ha a, ka thisen a chhuak ve reng reng hleinem." tiin a chhang a.

Pu REmliana chu a ngawi reng ringawt, "Pu REmlian, i cho miah loh tur i cho a ni. Kei hi Inspector Lalmuanawma ka nih hi, engkim ruahman lawk sa thlapin alawm helai hmunah hian ka kal. Ka bulah, ka beng hriatah ngei i inpuang nual tawh mai si a." Muanawma bawk chuan a han ti leh a.

Rum tak hian Pu Remliana chuan a melh a, "Enge i duh?" a ti hmuk mai. Muanawma chu a khi suk a, "Enge i duh a? Pu Remlian, khawnge pawisa kha a awm? Chuan khawnge, khawnge i thianpa, min lo kap tu kha a awm?" tiin a zawt ta khur khur mai. Pu Remliana chu a ngawi ngul a, "I sawi lo a nih chuan i ke ah hian ka kap dawn nia." tiin Muanawma bawk chuan a han vau leh a.

Pu Remliana chu a thaw hak a, "Mi pakhatin a la, ka thianpa Siamtea pawh kha a that." tiin a chhang a. Muanawma chuan a awih loh hmel kher mai, "DAWt sawi reng reng suh, khawiah nge i thuhruk sawi rawh." tiin a vin leh thak mai a. MAhse Pu REmliana chuan thutak zet hian, "Dawt ka sawi lo, pawisa dang pawh.. a kim lo zawng pawh kha a kawl vek, avaiin ala vek." tiin a chhang leh a.

"Anih chupa chu tunge?"

"KA hre lo, tunge a nih ka hre ngai lo."

"PAwisa kha ala kim lo tihna maw, a dang a la awm maw?"

"AW awm e, nuai 20 a nia. Thlama kan hmuh kha nuai 10 a nia, chupa chuan nuai 10 dang a lo kawl reng a. Tichuan kan hmu a, mahse min beilet a. Kan pawisa ken lai pawh ala vek, khawilamah nge a kal ka hre lo."

"Engtin nge in inhmuh?"

"Motor lam kan pan lai kha ania, motor vekin a rawn tlan a, min rawn su tep alawm."

Inspector Muana chu a ngawi vang vang a, "Engapwh nise, lehlam hawi la i kuthnung suih rawh." a han ti a. Thu awih mai loh chu Pu Remliana chuan tih theihd ang nei hek lo, lehlam hawi chuan a kuthnung chu a suih a. Muanawma chuan hand cuff phawrhin a bun tir a, "Thlam lamah kan chhuk leh ang." a ti ta mai a.

Hrethiam lo tak hian, "Thlam lamah a, enge min tih tir dawn?" a ti hu mai. Muanawma chu a khi leh suk a, "Back up ka ko tawh a, an lo thleng vat ang. Chumi chhung chuan khu lai thlam ngeiah khuan i inpuang ang, video in ka la bawk ang che." a ti leh ta mai a.

Pu REmliana chuan a hnial ngam si lo, silai chuan Muanawma lah chuan a tin reng mai bawk si. Tichuan a kal ta hnak hnak a, "Ka pawisa kha.." a han ti dek dek chu vin zet hian, "Ngawi reng khan kal rawh, i pawisa a ni bawk lo. Theihnghilh rawh, i buai ve a ngai tawh lo." tiin Muanawma chuan a lo vin zek mai.

**************************************************

A tlan mek zel lai chuan Sammy-a motor chu a rawn thi thut mai, start a han tum a. MAhse a nung thei hauh lo, "A va buaithlak thin tak em." tiin a phun sup a, motor atang chuan a chhuak a. A hma chu hawngin han en fiah chu a tum ve a, mahse a khalh thiam a ni mai a, engvak a hre ve der si lo.

A awmna chu a han  en a, khua chu var tep tawh mahse a la thim deuh em avang chuan kawng chu a la bo hu mai. A thaw deuh hluai a, "Kawngpui pawh chhohna lamah ka kal mek em tih pawh ka hre lo e a, ka kalna chin pawh hi ka hre miah lo chu ania." tiin a han phun leh nuah nuah a.

Motor chu tih nun leh a han tum a, mahse a nung thei tawh tlat si lo. A rilru a hah kher mai, seat hnunga pawisa bag pahnih chu a la a. Ke in a kal ta hnak hnak a, a rit bawk si nen, a chau hma khawp mai. A chawl a, "Tiang chuan kan va rei duh dawn ve leh." tiin a thaw hlawi hlawi a.

Pawisa bag pahnih chu ak leh in kal leh a tum chiah a, mahse a hma zawnah tak mai chuan Dina leh Mamuana a hmu ta thut mai (Inspector Muanawma leh Mamuana hi hriat hran hram hram kan tum dawn nia.). Sammy-a chu a ding chat a, Mamuana leh Dina chuan an melh rum khawp mai.

Chiang fek fawk hian Mamuana chuan, "PAwisa kha dah rawh, kan ta a nih kha." a han ti khur khur a. MAhse Sammy-a chuan dah a tum bik lo, "A teuh lo, ka chhar a nih hi. In ta a ni bik lo, ka pe dawn chuang lo che u." a ti ve tlat mai. Chutah le, Mamuana leh Dina te chuan an pistol pai chu an phawrh ta mai a.

An pahnih chuan Sammy-a chu an tin dun ta ran mai, "VAwikhat chiah ka sawi nawn leh ang, pawisa kha leiah dah la, i ban phar rawh." Mamuana bawk chuan a han ti leh a. SAmmy-a chuan a hlau ve kher mai, pawisa chu leiah chuan a dah a. A ban chu a phar a, "Tawlh hnung rawh, pen sawm velin tawlh hnung rawh." Mamuana bawk chuan a han ti leh a.

Mahse Sammy-a chu a che mai lo, pawisa chu a pe phal bik ngang lo a ni. A ngawi vang vang a, chutah pawisa chu a ban thut a, motor phenah chuan a biru ta daih mai. Mamuana chuan silai chu a kap puak nghal a, mahse a fu lo hlauh. Motor side glass chu a keh darh chuai mai a, motor hma lamah chuan Sammy-a chu a biru a.

Vin zet hian Mamuana chuan, "Lo chhuak vat rawh... a nih loh chuan kan kap hlum khawp ang che." a ti khur khur mai a. MAhse Sammy-a chu a chhuak duh tawh bik thak lo, "Dina, va phei la, va en teh...a tul chuan i kap siah dawn nia." Mamuana chuan a ti ta daih mai.

Dina chu a va phei hreh ve deuh bawk si, MAmuana chu a hnial ngam bik chiah si lo. Hreh tak chung chuan ava kal phei a, chutih lai chuan a kal lohna lamah Sammy-a chu motor phena inhliah zel chung chuan a biru phei zel a. Chutah motor tukverh atang chuan zei tak mai hian a lut a, Dina'n motor kawngkhar zawn a thleng chiah chu chhunglam atang chuan motor kawngka bal tla thawk khawpin Sammy-a chuan a rawn pet a.

Dina chu a thal tawp mai a, a silai ala thlauh zui. Mamuana chuan motor chu a rawn kap vak vak ringawt a, mu ruk chiah a nei bawk nen. A kap zo nghal vek a, Sammy-a lah chu motor-a a dah, chempui nen chuan a rawn chhuak ta mai a. Mamuana lam chu ava pan ta chher chher mai, MAmuana lah invenna dang lo nei tawh bik si lo.

Mahse hnunglam atang chuan thing bung hian a tukhumah tak chuan Dina chuan a rawn hlap ri pawp mai, nikhaw hrelovin Sammy-a chu a let der mai a. Chuveleh inla pa tak hian Mamuana chu a rawn kal a, Dina pistol tla chu a chhar a. Sammy-a chal darah tak chuan a kap pawp mai a, Sammy-a chi a thi chiang takzet.

Dina chuan motor hma lama pawisa bag pahnih chu ava la vat a, a han check chiang a. Lawm hmel tak hian, "U Mamuan, pawisa chu a kim thlap e. A awm e, hei kan hausa dawn ta." tiin a au vak vak mai. Lehlam ava hawi a, a nui hmel chu a tawp chiang takzet.

Mamuana chuan pistol chuan Dina chu a lo tin ve reng mai, "U Mamuan, enge maw i tih le?" Dina chuan a ti hu mai a. Mamuana chu a lo khi suk a, "A pawi ka ti khawp mai, mahse Dina.. he pawisa hi ka ta a ni." a ti ta hmak mai a. Dina chu a lungawi lo kher mai, "A va fair lo ve, hetia min tih..." a sawi zo hman lo.

Mamuana chuan silaimu zo thak khawp chuan Dina chu a kap ta siah siah mai a, Dina pawh chu a thi ve ta. Mamuana chuan pawisa bag pahnih chu a khai a, a kal ve leh ta a. MAhse thui pawh a thleng lo, engemawni hi a rap a. A au tuar mai, a na ti lutuk chu a tlu hnawk a.

A ke chu a han en a, savawm thang (bear trap) a lo rap chu niin, a ke ah a lo chilh hi a lo ni. A ke chu a bung tep hial a, a ruh pawh a lang hial mai. A na ti lutuk chu a au t(r)ial ruai ruai a, "Min pui ru... khawngaihin min pui ru." tiin a au vak vak ringawt mai a. Chutah le, a hma zawna Hmaikawra lo kal phei mek chu ava hmu ta.

A hlau kher mai, "Nilo... nilo, pawi.. pawisa hi nei rawh. Khawngaihin min ti na suh, khawngaihin.." a ti chel chul mai a. Hmaikawra chuan a chhang lo, a rawn pan hnai zel a. Mamuana chu a tap pur tawh mai, chutah Hmaikawra chuan a hmaiah tak mai chuan a tlawh siah mai a.

Mamuana chu a mu zangthal der mai, dimna tel hauh lo chuan a awmah tak chuan Hmawikawra chuan a rap leh pawp mai a. A ke na bawk nen, Mamuana chu a che hleithei tawh lo. Thei leh thei lo hian, "Khawngaihin, khawngaih takin... min ti na suh." a la ti tawk tawk a.

Mahse Hmaikawra erawh chuan a ngaih pawimawh loh hmel takzet, a hawi kual vual vual a. Chutah lung lian tak pakhat, kg 50 vel dawn laia rit chu a chawi nawlh a. Mamuana hmai zawn takah chuan a thlak thla ta mai a nih chu, a lu chu a pherh vek hi a ni ber mai.

A thluak te chu a per nuai mai a, thisen a luang dul dul mai. Mamuana taksa chu a khur cher cher a, a zawi tial tial a, MAmuana pawh chu a thi ve leh ta. Boruak chu a reh ta diak a, Hmaikawra chuan pawisa bag pahnih chu a la a. A ban lehlam lehlamah chuan a bat a, thlam lam pan chuan a kal thlak pui ta daih mai a.

**********************************************

Peka chu a rawn harh a, thuthlengah phuar hlawm a lo ni. A awmna hmun chu a en a, putar in a chhut thlukna hmun, kha thlam ah tho khan a lo la awm a. A hma zawn chu ava en a, Hmaikawra chuan silhmun ah chuan a hreite, thisen kai nuai mai chu a lo tifai mek a.

PEka'n a han hmu chu a hlau takzet, "Nilo... khawngaihin, min ti na suh. Thianpa, pawisa kha ka kawl lo. Ka ta a ni lo, khawnge a awm pawh ka hre lo tak tak." a ti nghal chiam chiam mai. MAhse Hmaikawra chuan a ngaih pawimawh vak hmel loh, a chet chet chuan a che chhunzawm miah miah a.

Peka bawk chuan, "Ram riak tur chauhvin kan kal, ka pu. Pawisa kha kan ruk a ni lo tak tak, ka thianpa SAmmy-a'n min bum a, motorin a kal daih. Ihh.. lui bula thlam ah khan, tah khan pawisa chu a awm ang, bag khat chu. Bag khat dang leh kha chu SAmmy-a'n a tlan bo pui, min ring rawh." tiin a insawifiah leh chiam a.

Mahse Hmaikawra chuan a la uksak chuang lo, a hlaim te chu puan them chuan a dep a. PEka chu a mangang takzet, "Ihh.. heta, heta ka lo kal nachhan chu... kalna tur dang ka hre silova, min pui theitu an awm takin tiin ka lo lut ta mai a ni. Min ngaidam rawh, ka pu. Khawngaihin, min chhuah hram rawh. PAwisa ka kawl lo, ka kawl lo tak tak." tiin a ngen leh lawm lawm a.

Chutah Hmaikawra chu a tho thut a, Peka pawh a ngawi chiang kher mai. Hmaikawra chuan dawhkan hnuai chu a ban a, pawisa bag pahnih chu rawn la chhuakin dawhkanah chuan a nghat ta bur mai. PEka chuan mak tiin a en vung vung ringawt a, "Ehe.. pawi..pawisa, nangman i kawl maw?" a ti hu mai.

Hmaikawra chuan Peka chu a en vang vang a, muang chang chuan a hmaikawr chu a hlip ta a. Chutah Victor-a hmel diktak a han hmu chu PEka a meng phawk nasa mai, a chhan chu Victor LAlthanmawia hmel hi chanchinbu leh news ah a lo hmu ve nual tawh vang a ni.

Thi tawh tura a ngaih, kum 7 chuang bo tawh, Victor-a a han hmu leh chu mak a tih rual chuan a hlau hle bawk. A hmai lehlam lo kang ser vek te chuan a ti rap zual em em a, "Vic..Victor?" a ti zawi sap mai. Chutah kawngka a ri rawk a, putar pakhat, a hma a Peka lo chhu thlu tu kha a rawn lut thut a.

***************************************

Khua a var tan tawh a, ni zung pawh a rawn lang dawn tan tawh a. Inspector Muanawma leh Pu Remliana te pawh chuan thlam chu an thleng ta a, a chhungah chuan Muanawma chuan a luhpui a. Pu REmliana chu a thut tir a, a hma zawnah chuan a phone camera chu a lek kang bawk a.

A khi suk a, "LE, inpuang rawh le.." tih pah chuan pistol chuan a tin pah reng bawk. Pu REmliana chu a ngawi vung vung a, "Inpuang rawh, Pu REmlian... a nih loh chuan ka  kap ang che." tiin Muanawma chuan a lo vau leh a. Hreh hmel tak chuan Pu REmliana chu a thaw hak a, "Ka hming chu LAlremliana a ni a, Pari pasal boral ta, Pu Jacob-a kha ka thah a ni. A hnuaiah ka thawk thin a, min ring em em bawk. Damdawi vawrh thin kan ni a, amah Pu JAcoba hi officer a ni bawk a, a hausa hle a. Tichuan ka itsik a, a sum zawng zawng neih theih dan ka dap ta a. An nu, Pi Pari chu awmze nei tak takin ka hel kual tan ta a, Pu Jacoba hi cancer natna vei mek a lo ni bawk nen. He thlamah hian a sum eiruk leh damdawi tawlhna atanga a sum hmuh zawng zawngte chu dahthat nan a hmang a, mahse khawiah tak hian nge a dah that ka hre bawk si lo. Zawh lahin min hrilh duh ka ring bik si lova, chuvang chuan thah mai chu ka rilruk ta a. VAwikhat chu thlam lama a kal tur chu a hriat loh hlanin a motor break ka ti dik lo lui a, tichuan time bomb ka dah bawk. A accident phah ngei a, khamah a tlan liam a ni. Vanneih thlak taka a dam chhuah ka hlauh avang khan bomb kha ka dah tel a ni, tichuan bomb pawh chu a puak ngei bawk. A ruang hlawm tur mang a awm lova, a taksa a darh vek a ni. Tichuan thlam chu ching let ila, pawisa chu ka hmu mai ang tiin ka rilru ka siam a. MAhse a fapa ZAra hming hian engkim a lo dah a, chu chu ka thik leh ta a. Tichuan Pi Pari bulah chuan dawt sawiin Pu Jacoba khan a thih hunah lo enkawl turin min chah angin ka hrilh a, a rilru ka hneh hnuah Zara rem ti lo chung chungin Pi Pari chu nupuiah ka nei ta a ni." tiin a inpuang ta a.

A chawl deuh dat a, "Tichuan Zara chuan vawikhat chu a bialnu Abby leh a nau, Sangzuali te nena thlama riah chu anu a dil a. A phal lo, mahse Zara ka thah theihna hun remchang a ni tih hria in ka lo phal sak ta a. Tichuan ka naute pathum ka tir a, an ni chuan an va that ta a. MAhse chung ka nau pathumte chu hmuh tur an awm tawh lova, an ruang takngial pawh kan hmu ta lo. KA naute dang pali ka tir leh a, mahse anni pawh a ngai te ang bawkin an bo hmak a ni." tiin a sawi chhunzawm a.

Muanawma chuan a lo record vek a, Pu REmliana'n sawi zawm leh a tum chu pawn lamah chuan thawm an hre ta tlat mai. Pu REmliana pawh a ngawi hmak a, pawn lam chu a va melh a. Inspector Muana pawh chu ava hawi ve a, chu chu remchangah la in Pu REmliana chu a rawn tho thut a, a kut hnung hand cuff-a la inhling reng chung chuan Muanawma chu a va su pawp mai.

Muanawma pawh chu a tawlh dawr a, bang a su tawp a. A pistol leh phone a la thlauh zui, Pu REmliana chu a tho leh vat a, a zawi hnawk thlengin Muanawma chu a chhuih siah siah mai. Muanawma na ti lutuk chu a che tha hleithei tawh lo, a pum chu a dawm vawng vawng mai a.

Pu REmliana chuan thei leh thei lo hian Muanawma kawnghren ami, chahbi chu a la thei hram a. Tichuan a inphelh a, pistol chu a chhar a, mahse Muanawma a rawn tho leh hman tlat. Kah a tum a, Muanawma chu room ah chuan a lut hman, vawi li vel lai chu a kap a, mahse a fu lo vek.

Pu REmliana chuan va luh chilh a tum tawh lem lo aniang chu, pawnah chuan a chhuak daih a. MAhse a kal thui hman lo, thlam kawtah chuan Hmawikawra a lo ding leh reng tawh mai. Pu REmliana chu a tawp chat a, a thaw halh halh mai. Chuveleh Muanawma chu a rawn chhuak ve hman chiah a, Pu REmliana chuan a lo kap leh a.

Muanawma banah a fu ta hlauh mai, a thal tawp a. Pu REmliana chuan Hmaikawra lam chu ava tin ve leh a, a kap ve leh ta. Hmaikawra banah chuan a fu a, a che hrut ringawt. Pu Remliana chuan kah leh a han tum a, mahse a mu a zo ta tlat mai. Hmaikawra chuan a rawn pan zel a, "Nilo..ka.. ka tihpalh, min ti na suh. Enge i duh, pawisa tam tak ka pe ang che, i duh zah zah ka pe ang che." Pu Remliana chuan a lo ti nghal chiam chiam a.

Muanawma pawh chu a rawn bawk vak chhuak titih a, Hmaikawra chu a rawn hmu ve bawk. Chutah Hmaikawra chuan a hmaikawr chu a hlip leh ta, Pu Remliana leh Inspector Muanawma chu an meng phawk dun nasa kher mai. ZAwi sap hian Pu REmliana chuan, "Vic.. Victor, Victor-a maw?" a ti tham tiak a.

Muanawma pawh chuan mak ti tak chuan a lo thlir ve reng a, Victor-a chu a rawn hawi chhuak a. Chiang fek fawk hian, "Ni e, kha kha ka hming a ni. Victor-a... Victor LAlthanmawia ngei kha a ni, ka la thi lo." a ti thum chhur chhur mai. Chutah a hnungah chuan putar pakhat leh Peka chu an rawn inzui a, Victor-a bulah chuan an rawn ding a.

Putar chu a zang a kul angreng hle a, a kal tha thei chiah lo bawk. PEka chuan a rawn kai phei a, puan a bat hlun a, a hmui a tuam tlat bawk a, a hriselloh hmel hle. Pu Remliana leh Muanawma chuan che miah lo hian an lo thlir reng ringawt a, putar leh PEka te chu an rawn thleng a.

Chutah putar chuan a hmai tuamna a phelh a, Pu REmliana chuan thlahrang a hmu amaw tih mai tur a ni. A meng phawk zual nasa bik ngei mai, "Pu... Pu Jacob?" a ti ta hu mai a. KAwngka bul atang chuan mak tih hmel tak hian Inspector Muana pawh chuan, "Pu Jacob-a a?" a lo ti ve hu bawk.

Chu putar chu ZAra pa diktak zawk, accident vanga a thi amaw an lo tih, Pu Jacob-a ngei mai kha a lo ni reng mai. A khi suk a, "Ni e, Jacoba ngei chu ka ni. Remlian, ngati nge, mak i va ti awm ve?" a han ti deuh kher a. Pu REmliana chu a thlan a tla bawrh bawrh a, "Mah.. mahse, engtin nge a nih theih?" a ti bah nuai mai.

"Ka ruang kha hlawm tlak loh khawpin a chhe hneh tiraw, a sawm nuai tiraw? Nia... Police DSP pakhat nen inthurualin ka ruang pawh kha in post mortem lo kha a ni a. In lo ti fuh khawp mai, a chhan chu kha ka ruang, ka taksa them amaw in tih kha zawng taksa zawk a ni. Ka accident hnu khan nikhua ka hre lova, ka hriat leh hmasak ber chu he tlangval, Victor Lalthanmawia hian min lo enkawl mek a ni. KA kut ruh veilam hi a tliak a, mahse tunah chuan zawi zawiin ka hmang thei tawh e. Victor-a hian min chhar a, min enkawl a, tichuan ka awm dan leh ka accident dan engkim min hrilh veka  ni. KA chhut chiang a, nangma thil tih bak a ni thei dawn lo. A chhan chu kan huan enkawltute zinga mi khan a rinhlelh thu che hi a sawi a sawi tawh a, chuan i awmdan kha a rinhlelh awm tual tual bawk. Remlian, mi a ka ni hleinem. Ka car chhungah khan bomb a awm thu Victor-a hian min hrilh bawk a, ka time bomb siam ngei kha a ni tih ka hre bawk. Tichuan nangma thil tih a ni tih ka hre ta a, chuvang chuan thlamah hian ka pawisa kha i rawn ru chhuak dawn tih ka hre bawk a, in lamah ka rawn haw duh ta lo a ni. ZAra te in thah zan khan, Victora hian a rawn chhan hman ta lo a. Khang i naute, i rawn tirh te, an bo zel nachhan chu ka fapa thar, ka nunna chhanhimtu Victor-a hian a lo that zel a ni. Pawisa kha a la nghal thei, mahse la lo turin ka ti a nih kha. A chhan chu nangmah ngei i lo kal theih nan  tiin mi hmuh turin kan dah lui a, hetiang hi kan thleng ta a nih hi." tiin thudik chu a puang chhuak ta vek mai.

Pu REmliana chuan sawi tur reng a hre lo, a ding ngawi reng ringawt. Pu Jacoba bawk chuan, "Keipawh ka ti diklo, sawrkar hnathawk, officer ka ni a. Ka ei ru teuh teuh a, nang hian min pui bawk. Damdawi kan tawlh ru ve bawk a, ka rin ber i ni thin asin. MAhse min itsik a, ka fapa Zara hial i that a. Kha kan thlam kha e, ka luah lum nghal duh loh nachhan chu nangmah ngei hi rawn kal la ka tih vang a ni. Remlian, ka nupui min chhuhsak a, ka fapa leh a bialnu i that a, tunah chuan i hun a thleng ve ta." a han ti leh a.

Chutah Pu REmliana thinrim chu  a au vak ringawt a, Pu Jacob-a chu sawisak tumin a rawn pan ta mai. MAhse Hmaikawra chu va tlan thutin Pu REmliana chu a va rek chat a, chiang tak hian a melh a. A hreite chu lek kangin Pu REmliana chhipah tak chuan a chek siah mai, a thingthi hnawk a.

A khur cher cher a, tichuan a thi ta der mai. Inspector Muana chu a rawn phei a, "Ka pu, i duh chuan min man thei ang. Ka thil tihsual ka hria a, ka inpe e." tiin Pu Jacoba chuan a kut a rawn dawh a. Victor-a chuan a lo melh hraw a, "Ni lo e, Victor. Ka kal angai, min dang suh." a ti tlat a, a che zui ta bik lo.

Pu Jacob-a bawk chuan, "A bak chu a chiang zawkin Police Station ah ka la sawi dawnnia, mahse thil pakhat ka ngen duh che. Victor-a hi kal tir rawh, helai ramhnuai hi a tan chuan a in ang a ni. Thlam khu a sak chawp vek a ni a, keiman ka pui bawk. Sawi duah lo mai ang, khawngaihin kal tir rawh." tiin a ngen a.

Inspector Muanawma pawh chuan a lu a bu nghauh va, Jacoba chuan Victor-a chu ava en leh a. A hma zawnah chuan dingin, "KA lawm e, ka fapa. Midangte tan chuan tualthattu rapthlak, tihbaiawm i ni maithei. MAhse ka nunna i chhanhim a, ka thu i awih zel bawk a, ka lawm takzet. Kal tawh rawh, kal bo vat rawh." a ti zawi sap a.

Victor-a chuan a en vung vung a, a hreite chu kengin a kal ta a. Pu Jacoba, Inspector Muanawma leh Peka te chuan an en zui vawng vawng mai. Khua pawh a var ta,  reilote hnuah chuan police dang ho pawh chu an rawn thleng a, "Engtin nge kan awm dawn?" Peka chuan a lo ti hu mai.

Inspector Muanawma chu a khi suk a, "Tunge i nih ve a?" a han ti a. Pu Jacob-a chuan, "Mi fel a nih kha, kha chu kan pawl." tiin a lo nui bawk a. Muanawma chu a han thaw hak a, "Engpawh chu nise, enge ka sawi fiah dawn ka hre bik lo. KA kutah dah rawh u, engkim a tha leh vek mai ang." a ti ta ringawt mai.

Tichuan Pu Jacob-a chu man a ni a, a la thih loh thu te pawh chu puan zar a ni a. Peka pawh nung damin a haw thei a, Pu Jacob-a chuan pawisa tha hnem tak pek a tum a, mahse a la duh hauh lo. Chulai hmun chu an vai chuan an chhuahsan ta a, mahse... Victor LAlthanmawia erawh ala dam, a la thi reng reng lo.

********************************************

THE END