A HANDSOME CREATURE - 7 VICTOR RETURNS Written by : Aaron Malsawmdawngzuala WARNING - 18+ (A sequel to A Handsome Creature - 6) Chapter - 3

 A HANDSOME CREATURE - 7

VICTOR RETURNS

Written by : Aaron Malsawmdawngzuala

WARNING - 18+

(A sequel to A Handsome Creature - 6)

Chapter - 3

***********************************

Peka chuan phone chu a chhar a, mahse a lo chhe hneh tawh hle. Switch on chu sawi loh, vuah khawm takngial pawh a theih tawh loh a ni. Sammy-a chuan thawm a hre tlat hian a hria a, "Ngawi lawk teh u, chu... thawm chu inhre ve em?" a han ti a, a thiante pawh chu an rawn hawi rual thap mai.

An han ngawi deuh thap hlawm a, "Engmah ka hrelo keichu?" Zualtea chuan a rawn ti a, mahse rang takin Sammy-a chuan bengchheng lo tur chuan zaizir hmang chuan a hrilh nghal vat a.Thawm chu a lo awm ta tak tak a, tawng ri an hre chhunzawm nghal bawk.

"Ehe..mi an lo kal, engtin nge kan tih dawn?" tiin Peka chu a hawi deuh hru a, thawm lah chu a rawn hnai zel mai si. An rawn thleng har tawh dawn lo tih pawh an hria, mahse an bul hnai lawkah pawisa tam tak, nuai chuang fe chu a awm hnur mai bawk si nen.

Che lo chuan an ding thap ringawt mai, chutah Sammy-a chuan pawisa bag chu, a pahnih chuan a la, a tlan ta thut mai. A thian dangte pawh chu an hrilhhai hman hle a, mahse chutia Sammy-a ber a tlan daih mai chu tih vak ngaihna an hre bik lo. An tlan ve ta ringawt a, SAmmy-a chu an umzui a.

Sammy-a chu a tlan hla lo, motor awmna bul, a thlang deuh lawka chhukna awmah chuan a ding a. Hnim buk leh thing kung vel chu inhliah nan hmangin a biru a, Peka te pawh chu an rawn thleng ve nghal. Sammy-a chuan zawi te hian, "Kun rawn u, biru rawh u." a ti a.

An vai chuan an biru ta a, tichuan hnimbuk kar atang chuan motor awmna lam chu an en vang vang a. Thawm chu a rawn hnai zel a, "Min ring ngam a, min kal tir alawm mawle... a ho emai, kan nei vek dawnnia, kan hmuh hlauh chuan.." tia mi pakhat tawng ri lung lung chu an hre pha chiang hle.

****************************************

Motor awmna bul chu an rawn thleng ta, chumite chu tudang nilovin Pu Remliana'n a pawisa bo zawng tura a tirh mi pali, Lucas-a, Henry-a, Mamuana leh Dina te kha an ni. Motor an han hmu chiah chu an ding ve nghal chat mai, chutah hmaikawr vuah pathumte ruang, rapthlak leh en hrehawm tak tak te chu an hmu ve bawk.

Lucas-a chuan motor chhung chu a han check a, mahse eng pawisa mah a hmu der lo. Dina chuan ruang lo let reng te chu ner deuh nung chung chuan a en a, "A che rapthlak hle mai maw, pawisa chu tualthattu hian a tlan bo pui chiang a ni." a han ti nuah nuah a.

Henry-a pawh chuan a lu lo bu nghat nghatin, "A nih hmel hi, a thleng hla tawh zek lo maw le... chubakah helai thleng thleng motor a lut thei tih hria ila lo tlan tlang ve law law tur ania." a lo ti ve nuah nuah bawk. Lucas-a chu motor atang chuan a rawn chhuak a, "Eng pawisa mah ka hmu love, tualthattu hian a ru chiang a ni. Pawisa vang kha a nih dawn hi, kan hna chu a tough dawn rem rem khawp mai." a rawn ti ve bawk a.

Mamuana chuan Lucas-a dar chu a beng thak thak a, "Thianpa, enteh khu khu..." tiin lei chu a kawk a. LEiah chuan kuhva hring fun hi a lo awm a, Lucas-a chuan a chhar nghal. A en vang vang a, "A awmzia chu..." a sawi zawh hma hma chuan Mamuana chuan kuhva chu a lak sak nghal a.

A han khi deuh suk a, "He inthahna hi tukin zing, dar 1-3 vel a ni awmin a rinawm a, Pu REmliana sawi dan hmang kha chuan.. anih chuan he kuhva hi hetah, ramhnuaiah hian kan chhar a, chutah pawh ruang awmna bulah lehnghal." a han ti deuh charh charh a.

Lucas-a chuan, "AW...i sawi tum ber chu han sawi vat teh, ka tawng lai i rawn pawtchat ringawt lehnghala.." a lo ti deuh hlur mai. Mamuana chuan a aw a han thian kharh kharh a, "Kuhva hi han en la, tulathattu kuhva emaw, heng mithi ho kuhva hi lo nita se chu....tukin khawvar tirh vel khan ruah a sur vak kha a ni a, kuhva hi helai ramhnuaiah hiana  awm char char bawk a, mahse a bal eih lo...a rawng pawh hi..a la tak tha var var, chuan sarang te pawh hi en ula, ei lai mek, an ah lai mek tihna a ni." a han ti leh a.

Dina chu a lo nui huk a, "Anih chuan kha kuhva kha tu ta nge ni chuang anga, tualthattu, pawisa tlan bo puitu kha a ni mai alawm, midang tumah an awm lo hi.." a lo ti ve leh a. Mamuana chu a han thaw hak a, "KA sawi tak ang khan, a theih loh hulhual. A awmzia chu hei zawk hi a ni, helai hmun kan thlen hma hret emaw, darkar rei pawh ala ni lovang, hetah hian mi tu emaw an lo kal hmasa chiang a ni." a han ti a, a thiante chu an in en hu hu ringawt mai.

Henry-a chu a han ngawi vung vung a, "Anih chuan chupa chu, chunu chu, a tu a pawh chu lo ni se, a la thlen hlat dawn loh tawp chu." a rawn ti chhuak ve leh a. Mahse Dina chuan, "NGawi teh u, a thlen hlat leh hlat loh a hriat ngawt loh. Chubakah kha kuhva vang ringawt khan a awmna chin kan hre thei dawn ngawt lo, a thlauh pawh a lo nilo maithei sin." a lo ti ve leh tlat mai.

An ngawi thap hlawm a, "Umm.. engpawh chu nise, kan hmazawn zelah sawn i kal leh phawt teh ang u. Kan hmu em em ang, kan hna kan hriat kha. A tul a nih chuan kan inthen hrang anga, signal hi awmna lai bik a awm si a, fimkhur takin kan che dawnnia... kal phawt teh ang u." Mamuana chuan a han ti leh a, tichuan an kal ta a.

**********************************************

An kal liam veleh chuan Peka te thian ho chu an bihrukna atang chuan an chhuak a, Lucas-a te kal liam chu an thlir zui vawng vawng a. Sammy-a chu a han thaw hak a, “Tunge kuhva lo thlauh pek che u a?” a han ti vin deuh nghal hlur a. Inthlahrung ru deuh tak chung chuan, “Keimah ka nih kha..” Zualtea chuan a lo ti vat a.

Sammy-a lah chuan, “Fimkhur ve tur che lawm, kha..kan bihrukna kha rawn en phei se chu kan buai nuai nuai dawn a nih kha..” tiin a hau deuh zek mai. Zualtea pawh chu a lungawi chiah bik lo, “An rawn kal dawn tih ka hre bik hleinem mawle, chubakah ka thlauh palh ve a nimai lawm.” tiin a chhang let ve sak mai a.

Peka chu rawn inrawlh vatin, “Duhtawk rawh u, kha... min hmuh chuan loh kha.” a rawn ti chhuak a. Chutih lai chuan Nghaka chu a lo ding ngawi vung vung a, “Khamite kha tute nge an nih reng reng, a pawisa neitute kha tihna em ni ang le?” a rawn ti chhuak deuh hlawl mai.

“Nih loh kha...an thusawi dan atang kha chuan a pawisa neitu berin a tir a nih hmel kha, an pali khan..” Sammy-a chuan a lo ti vat a. “Nia, a hming pawh an sawi.. Pu Remliana an tih kha, ka rindan chuan hemite hian tlanbo pui an tum anga, chu chu zawng turin a ti aniang.” tiin Zualtea pawh chuan a lo zeldin ve bawk a.

Nghaka chuan a lu thak lo pui chu a hiat nauh nauh va, “Mahse...hemite hi an thi leh vek bawk sia, tu chu nge tualthattu hi ni ta ang le?” a rawn ti ve leh a. Sammy-a chuan a lu a han bu deuh nghauh nghauh va, “Hemi ruang pathumte zinga mi tho, an thianpa ve tho aniang nga, a duham em avangin a bum a, a that ta vek pawh a ni thei tho mai.” a han ti ve leh nuah nuah a.

Peka chu a thaw hak a, “Engpawh chu nise, heng pawisa zozai te hi... engtin nge kan tih tak ang. Police hnenah kan hlan mai dawn nge, a neitupa chu pek let dan kan ngaihtuah dawn?” a rawn ti daih mai. Sammy-a chu a khi suk a, “Peka, i a em ni? A neitupa chu tunge pawh i hria ami?” a lo ti nghal deuh hrep mai.

“Aww.. kha, nichina mi te pawh khan an sawi kha, Pu Remliana an tih kha..”

“Pu REmliana ta a ni bik lovang, engtin nge a ta a ni ngei tih i hriat?”

“Nangpawh engtin nge a ta a nilo tih i hriat?”

Za lo tak chuan Sammy-a chu a khi suk a, “Helai daih daih, ramhnuaiah lehnghal. Engvangin nge hetiang zata tam pawisa, air bag hnih khat t(r)ana tam hi a awm theih ang? A ta tak tak nise hengte hi chu bank ah a dah mai ang chu, enge hetah ramhnuaiah daih daih a dah ang?” tiin a zawt leh a.

Zualtea pawh chuan, “Nia... ka rindan chuan a sum eiruk a nih ka ring, helai bul velah hian huan a nei anga, tichuan he pawisa hi a dahtha ta a ni ngei ang.” a lo ti ve bawk a. Nghaka chu a han thaw deuh hluai a, “Anih chuan khamite kha, khang mi pali te khan pawisa hi an zawng zel awm si a, keinin hetah kan kawl reng mai chu ania, enge kan tih chhunzawm zel ang?” a rawn ti ve leh a.

Peka lah chuan, “Aww.. chutia Pu Remliana ta a nilo in tih leh, chutia in hlauhthawn leh police hnenah pe ila a nimai lawm.” a rawn ti leh khut mai. Sammy-a chuan rum fe hian a melh a, “Peka, police hnena kan pekin enge kan tan hlawkna awm ang?” a han ti deuh khur khur a.

PEka chu a sa ve deuh zak mai, a ding chhuak a. Sammy-a chu a melh ran a, “He pawisa hi kan chhar a ni a, mahse kan ta a ni lo. Dik taka police hnena kan pek chuan a lawmman pawh kan hmu ve em em ang, min pe em em ang. Mahse hetia kan ruk tawp chuan buaina tawk tur chu keimahni bawk a ni, a ruk ang kha chu ngaihtuah lo mai rawh, keichu ka duh lo.” a ti ve ta hmak mai.

Sammy-a chu a khi deuh sak a, “Police te hi i ring em ni, a eiru nasa ber ber an nih hi. Inspector chin lahin eiruk dan awlsam an ngaihtuah chho char char a, Officer chin phei chuan mi retheihnate chu engah mah an ngai tawh lo, mipui chanai sum an ei a, politician thil tithei em em ho, eiruk hrat ho an tlawn a, chutiang vel mai mai an nih laiin kei nin hetah kan eiruk tir belh leh ang maw, chu chu i duh em ni?” a han ti leh khur khur a.

“NGawi teh u, inhnial lo phawt teh ang u. Engpawh chu nise, kan pawisa a ni emaw ni lo emaw, heta dah tawp chu a chi loh hrim hrim. Kan riahna tur tlangah khan han kal leh phawt ila, pawisa hi chu kan keng hrih zel mai dawnnia. Khamite kha chuan min hmu dawn chuang lo, an kalna leh kan kalna lam a in ang chuang lo.” zaidam tak hian Nghaka chuan a rawn ti a.

Peka leh Sammy-a te pawh chu an inhnial chhunzawm ta lem lo, “Nih chuan kal phawt ila nimai, tihdan engemaw kan ngaihtuah chu a ngai a ni. Han thleng chho phawt ila, kan sawi leh dawnnia.” Zualtea chuan a lo ti ve bawk a. Tichuan pawisa chu an khai a, an kal ta a.

*************************************

Lucas-a te thian pali pawh chuan lui luang ri an hre ta, "Ehe..chu in hre ve em? Pu Remliana te thlam chu an thleng hnai dawn a ang khawp mai, mahse fimkhur takin kan kal dawnnia, thlam chhungah khuan tualthattu hi a lo awm reng mai thei ania." Mamuana chuan a han ti a.

An zingah hian Mamuana hi a upa ve ber a, chuvang chuan a inla thu ve deuh ber a ni. A naupang ber chu Dina a ni a, kum 25 chauhva upa niin Mamuana hi kum 36 a ni tawh thung a ni. An pali chuan an chhuk zel a, tichuan thlam pawh chu an hmu thei ta. Mahse an va pan mai lo, thingkung phenah chuan an biru phawt a.

Pu Remliana khan an pali hian puakruk silai, pakhat theuh a pe a ni. Minute 5 vel an en reng hnu chuan, "Tumah an awm lo aniang, awm pawh nise kan va kal loh chuan heta chan tawp chuan awmzia a awm lo ania." Dina chuan a rawn ti chhuak a. Mamuana chu a ngawi vang vang a, "Lucas.. hma hruai la, ka rawn zui ang che." a tih lai tak chuan thawm an hre ta.

Thlam kawngka chu a rawn ri ta rak rak a, rang lutukin an pil nghal vek a. Thlam kawngka chu a rawn inhawng a, an pali chuan an han bihthla leh dek dek a. Victor-a chu a buara hmaikawr nen bawk chuan a rawn chhuak a, muang chang chuan hmai chu a tuam a.

A hlat em avangin a hmel chu Lucas-a te thian ho chuan an hmu chiang thei lo, Victor-a chuan hreite a keng bawk a, a hriam hmel em em mai lehnghal. Tichuan Lucas-a chuan a pistol chu a phawrh a, midang chuan an phawrh ve nghal vek bawk. Lucas-a chuan kal a tum a, mahse Mamuana chuan a lo dang vat.

La che hrih lo tur chuan zaizir chuan a hrilh a, Lucas-a pawh chuan a thu a awih ve mai bawk. Victor-a chu Mamuana te awmna lo lam, mau hmun lam pan chuan a kal phei nghauh nghauh va. Lucas-a lah chuan, "Tikhan kan kal tir ringawt a, silai kan neih hi... mipakhat chauh a nih kha, tualthattu kha a ni awm emai." tiin a phun nuah nuah mai.

Mahse Mamuana chuan a chhang lo, Victor-a kal fe hnuah chuan an bihrukna atang chuan an chhuak ta hlawm a. Dina pawh chuan, "Ni e, U Mamuan...amah kha i hria em ni?" tiin a lo zawt ve bawk a. MAmuana chuan a thiante chu a han en a, "Victor-a... Victor Lalthanmawia a ni. Khapa kha Victor LAlthanmawia a ni, Hmaikawra ngei chu a nih kha." a ti ta mai a.

Mahse Lucas-a chuan a awih loh hmel kher mai, "Engtin nge i hriat ngawt, a hmel pawh i hmuh chian loh kha..." a lo ti zek a. Rum fe hian Mamuana chuan Lucas-a chu a melh a, "Kum 10 chuang kalta khan...Victor Lalthanmawia hi Sawibuang khaw putar pakhatin luiah a hmu a, a hruai haw a. Khatih lai khan SAwibuang khuaa ka ni te inah ka awm a, Victor-a kha ka hmu ve tawh a ni." tiin a chhang a.

Dina pawh chuan, "Keipawn ka hria, ka patea'n min hrilh thin. SAwibuang khuaa Victor-a chetdan leh tual a thahte kha, ka hre tawh alawm." a rawn ti ve bawk. Mamuana bawk chuan, "Chuvang chuan a hmel kha ka hrechiang a ni, a damchhuak ngei a ni. A hmai kang eng ang mahse, a pian zawng zawng leh a kaldan zawng zawng nen, ala danglam lo." a han ti zawi leh sap a.

"Anih chuan...chupawh chu lo nise... mihring ve tho alawm. Silaia kah chuan a thi ve thovang chu, tichuan a pawisa ruk te pawh chu awlsam deuhvin kan la chhuak thei mai dawn alawm." Henry-a chuan a rawn ti ve leh a. Mahse Mamuana chuan a lu thingin, "Nilove, keimah ngei hian.... ka kut ngei hian ka that dawn alawm, ka that khawp ang." a ti khur khur mai.

******************************

A Office ah chuan Pu Remliana chu rilru hah hmel tak chuan a vei kual deuh chhen mai a, a dawhkan hmaah chuan Siamtea pawh chu a thu ve bawk. Pu Remliana chu a thaw deuh hak hak reng a, "Han call leh teh... engmah chanchin an rawn sawi lo nghal ringawt pawh hian ka rinhlelhna a ti zual.." tiin a thlan te chu a tla bawrh bawrh a.

Siamtea chuan Lucas-a te chu call leh a han tum a, mahse OUT OF SERVICE a inti tlat zel mai si. Ner nung chung hian, "A tlang thei lo, an awmna laiah signal a awm tha lo aniang." a ti a. Pu Remliana chu a thu hnawk a, "Min bum han tum vaih teh se, an chhung leh khatte hi ka sawisa nasa khawp ang, ka that vek ang." a ti khur khur mai.

Siamtea chu a ngawi vang vang a, "Pu Remlian, kan kal ve mai dawn em mawnile... innu bulah pawh engemaw chhuanlam zawng la, tichuan i kal ve mai teh ang." a lo ti a. "Ka hriselna in a tlin ve tawh lo a nih hi mawle, chubakah tunah.." a sawi zawh hma chuan a phone a rawn ri a, a nupui Pi Pari a lo ni.

Pu Remliana chu a thaw deuh hluai a, "Aw Hello.." a han ti a. Chutah Pi Pari chuan hlauhthawn hmel tak hian, "Duhtak, Zara hi ka call tlang thei miah lo ania.. nizan dar 8 vela min rawn call bak kha chu ka be leh thei tawh miah lo, ka ngaih a tha lo riau mai." a rawn ti nghal chiam chiam a.

Pu Remliana chuan a lu chu a han dawm vawng vawng a, "Aww... signal a awm lo aniang chu mawle, chubakah kawnga an thang lai te a ni ve thei a. I lungngai a nih kha, zanah kan lo thleng chauh ang a tih kha amah pawn." tiin a chhang a, phone chu a dah deuh hmak.

A han thaw leh halh halh a, "Khatiang vel kha ania, tunah tikhan Zara a rawn ngaihtuah tan tawh a. Zaninah a rawn haw lo a nih chuan keipawh lemchanga ka buai ve a ngai dawn, chuvang chuan zu kal ve hman hi kan nilo reng reng." a han tih zawm lehnghal a.

Siamtea chu a ngawi vung vung a, "Engtin nge kan tih tak ang?" tiin a beidawn hmel khawp mai. Pu Remliana chuan a lu a han bu nghauh nghauh va, "Engpawh chu nise...ti hian i ti phawt teh ang. Zara te ruang pawh huanah ala awm reng a, naktuk velah chuan police te chuan an hmu tawh ngei ang. A chhan chu kan nu hian police hnenah a report dawn, zanin hian.. chu chu chiangsa a ni. Chumai nilovin Abby-te chhungte lam pawh an rawn mangang dawn...chuvang chuan hei hi nghak law law phawta teh ang, thleng vek phawt teh se." a han ti deuh fak fak a.

"Mahse Pu REmlian, engtin nge keini kan awm ve ang?" tiin Siamtea chuan a lo zawt leh a. Pu Remliana chu a han ngawi deuh vang vang phawt a, "A tul a nih chuan keipawh ka kal ve ang, lem ka chang dawn ta rau rau. Police te rualin kan kal ve anga, abak chu i tihtur chu ka la hrilh zel dawn che nia." tiin a chhang a.

*************************************************

Lucas-a te chuan thlam chu an va pan ta a, a chhungah chuan an lut a. Thlam chu an han dap chiam a, mahse eng pawisa mah an hmu lo. "Khawiah nge maw  a thuhruk ang le, motor te hi a nei ve te a ni lo maw a hranpa hian?" Dina chuan a ti nuah nuah a.

Mahse Mamuana chuan a zawng ve lo, engemaw hriat nei awm tak hian a ding gnawi vung vung a. A thiante pawh chuan mak tiin an en thap mai, "Victor-a hian pawisa hi engatan mah a ti lo, a duh ber leh a tum ber chu mi thah a ni tawp. Chu chu a hlimna a ni ber zawk, tualthat tura piang a ni." Mamuana chuan a rawn ti chhuak a.

"Enge i sawi awmzia chu?" Lucas-a chuan a lo ti vat. Mamuana chu a rawn hawi chhuak a, "Kum 7 chhung a bo va, a ruang pawh chhar a ni lo. Tichuan vawiin ah ala dam tih kan hria a, engatan nge pawisa a tih ang. Engatan nge pawisa a tih ang, ramhnuaiah hian dawr a awm hleinem. Mahse kum 7 chhung tehmeuh ramhnuaiah hian a awm char char a, khawi dang mah kal a tum chuan loh hi.." tiin a chhang a.

Henry-a chuan room pakhat atang chuan, "HElai hi en lawk teh u." a rawn ti a, a thiante chu roomah chuan an va lut nghal a. Hmaikawr vuah misual pathum ten pawisa an lak chhuakna, chhuat awng, thing phek hlai taka Victor-a'n a phah mai mai chu Henry-a chuan a kawk a, "HEtah hian a dah ani ngei ngei ang, a vuahna a la rei lo tih a chiang, hei perek te hi ala thar lutuk." a han ti a.

Mamuana chuan a han enchiang ve a, choka lamah va pheiin hmanrua a zawng nghal chuk chuk mai. Thirtiang a hmu ta hlauh va, tichuan la pheiin chu thing phek, Victora phah chu an kar chhe ta a. Mahse engmah a lo awm chuang lo, "Ava ho e aw..." Lucas-a chuan a ti nuah nuah mai.

Mamuana chu a thaw hak a, "Ka rin dan ang vel tho a ni, helai hi chu Victor-a'n awmna tur a duh avangin a phah mai mai a ni. Pawisa hi chu hetah hian a awm ngei anga, mahse a ru chhuaktute erawh Pu Remliana mi tirh, keimahni hma a kal, mi pathum a tihte kha an ni ngei ang. Tichuan an ruang kan hmuhna laiah khan an inchapchar anga, tahkhan Victor-a chuan a that a ni ngei ang."  a han ti nuah nuah a.

Henry-a pawh chuan, "ZAra te thattu pawh hi Victor-a zawk pawh a lo ni thei asin, hemi thlam ah hian an riak ngei awmsia? Victor-a hian a zana zanin a that anga, khamite pathum kha chu a ram kalna vel emaw ah a that leh aniang." a lo ti ve bawk a. "Tuna kan hmuh kha Victor-a a lo ni lo thei bawk, amah ang tak a lo ni ve thei tho ania. PAwisa pawh chu a dahtha anga, hmun dangah...chuan Pu Remliana hrechiang tak hi a nih ngei ka ring." Lucas-a chuan ala rawn ti talh mai.

Mamuana chuan a melh nghal hrawk a, "Victor-a ngei a ni, pawisa chu hetah a awm lovang. A mamawh lo, nang aiin ka hrechiang." tiin a vin deuh khur khur mai. Lucas-a pawh chuan a lo hlau vak bik lo, "Anih chuan tinge pawisa kha a awm si loh, mamawh lo nise chu a la miah nang...tinge a awm si loh?" a lo ti let ve sak mai a.

Mamuana chu a khi suk a, "I mawl ami, nangpawn i hmuh zawh chiah kha. Kuhva kan chhar atang te khan ngaihtuah ta che, midang la an awm... lo kal ve an awm, mahse Victor-a chu a ni lo tih ka chiang." a han ti leh a. Henry-a chu rawn inrawlhin, "Inhnial lo teh ang u, engtin nge kan awm zel dawn tih hi ngaihtuah zawk a tha. Engtin nge pawisa chu kan zawn chhunawm dawn, chu chu ngaihtuah zawk ang u." tiin a rawn khap dun a.

Dina pawh chuan, "Ni e, thlamah hian kan awm reng dawn nge, Victor-a chu kan lo chang tawp mai dawn?" a lo ti ve bawk a. Mamuana chu a han thaw leh deuh hak a, "Chhuak phawt ang u." tiin a chhuak nghal daih mai. Midang pawh chuan an zui chhuak ve nghal a, Lucas-a chuan a mil vak tawh lo tih a hriat hle bawk.

*************************************

Peka te thian ho pawh chuan an riah tumna hmun, tlang chu an thleng ta a. Pawisa pawh chu an la kawl reng bawk, an thukhawm a. Khua pawh a thim tan deuh tawh a, tlai dar 5 a pel tawh. PAwisa chu an en vang vang hlawm a, "Police kan pe emaw pe lo emaw, a neitu kan pe emaw pe lo emaw...keini hian kan lo nei ngawt thei lovang." Peka chuan a rawn ti chhuak hlawl mai.

SAmmy-a chu a han thaw deuh hak a, "He pawisa hi tu ta mah a ni lo, tunah keimahni hian kan chhar a. Kan ta a ni e chu ka ti lo, amaherawh chu police hnenah chuan kan hlan lo chiang khawp ang." a la rawn ti t(r)alh mai. Nghaka chuan a aw a rawn thian deuh kharh kharh a, "Police hnenah pe ila, kan mit var man te chu kan hmu em em ang." a lo ti ve leh a.

 

Chuveleh Peka chuan, "Ni reng e, kha chiah kha alawm nichinah pawh, khutah pawh khan ka sawi. Chubakah helai ramhnuaiah hian kan kawl reng thei lovang, sum hian kan mit ti del lul suh se." a rawn ti ve nghal vat bawk. Sammy-a chuan Zualtea chu a han en a, "Nang enge i ngaih ve dan?" tiin a zawt a.

Zualtea chu a ngawi vung vung a, "Pawisa ringawt hi kan ngaihtuah a, mahse thildang kan theihnghilh hmak ania. Pawisa hian kan mit chu a ti del der tawh, chu chu tunah khan ka hmuchhuak chiah." a rawn ti ta daih mai. Sammy-a phei chu a thinrim lek lek mai a, "Enge maw i sawi awmzia chule? Engthil nge sawi i tum a?" a ti nghal deuh hlur mai.

Zualtea pawh chuan Sammy-a chu a han melh hrawk a, "Pawisa kan bulah a awm a, khawnge kan dah ang, kan nei ang nge police kan pe ang tih vel bak kan sawi lo. MAhse he pawisa kan hmuhna kha han ngaihtuah teh u, a bul lawkah ruang pathum lai a let reng a nih kha. He pawisa ai chuan kan nunna a hlu zawk, tualthattu hi kan bul hnaiah hian a awm nge awm lo kan hre reng reng hleinem." tiin a lo chhang let hrep mai.

Peka pawh chuan, "Ni e, ka sawi tawh a, ka sawi nawn leh ang. Chhuna heta zu kan in lai khan buara a hmai khuh, a mit zawn pahnih kua, palian deuh kha ka hmu chiang alawm, ka hmu chiang lutuk tlat." a lo ti ve leh nghal vat a. SAmmy-a chu a thaw hak a, "Umm...engpawh nise rawng bawl ila, chaw ei vat ang u...ka ril a tam tawh." a ti ta dauh mai.

Nghaka chuan a dul chu a zut a zut a, "Ka va inthiar lawk ange, ka pum a nuamlo emai." tiin chempui chu a la a. A kal hma chuan, "Fimkhur rawh aw...kal hla suh ang che. Ka sawi zawh chiah kha hre reng rawh, kan fimkhur angai ania." tiin a lo chah nghal a.

Sammy-a lah chuan, "Pan hla ve deuh rawh, rawngbawl dawn lai lai lehnghal. A rim te kha a rawn nam ange, tumah an awm lovang." a lo ti sam leh et mai. Beer um khat chu Nghaka chuan a la a, "Ka va kal ange, ka rei lovang." tiin a kal ta a. Peka pawh chuan, "Fimkhur rawh aw..." a ti zui lawm lawm a.

*************************************

Nghaka chu a kal zel a, beer chu a in phei zeuh zeuh va. A hma a, a lo in tawh vang nge ni, beer chuan a charge tha angreng phian mai a. A nuam tawk angreng phian a, a kal pai deuh chhuih chhuih bawk. Ti chuan thingkung phenah chuan a inthiar ta a, beer chu a la in zo lova.

A inthiar zo va, beer chu a la kang leh a. A let leh ta, mahse a hnungah chuan thawm a hre tlat mai. A beer ken lai chu a hmuia chuktuah reng chung chuan a hnunglam chu a han hawi a, a hmaah tak chuan Hmaikawra a lo ding reng mai. Chet pawh a la ve hman eih lo, Hmaikawra chuan a beer glass bottle hmuam lai mek chu a nem chilh pawp a.

Thingkungah chuan nam betin Nghaka ka(mouth) chhungah chuan nam luh a tum ta mai. Nghaka lah a tha a lo zawi sa nen, Hmaikawra ban tha chak tak mai chu a hneh lo kher mai. Hmaikawra chua a nem lut zel a, Nghaka chuan theih tawp chhuah mahse a hneh ngang lo a ni.

Thuk takah a nam lut a, Nghaka chu a au thei bawk si lo. A hrawkah chuan a hnawh thla zel a, a hrawk vun a rawn tawn puar thei hial a nih chu. Chutah Hmaikawra chuan a chhipah a tham a, thingkungah chuan a hmai chu a tauh tir siah mai a. Bottle chu a keh chuai mai, mahse a chanve chiah a keh.

Bottle mawng lam, a chan ve chin chu leiah chuan a tla a. MAhse a chanve dang zawng erawh Nghaka hrawkah chuan a tang a nih chu, glass keh them a dawn teuh bawk ngei ang. Glass keh hriam chuan Nghaka hrawk vun chu a rawn chhun pawp thei hial a, thisen a chhak chhuak bawrh bawrh a.

Mahse a au thei lo, thisen chuan a ka a hnawh mai bakah a hrawk thler atang chuan thisen a chhuak zawih zawih a, a tal vak vak ringawt. Mahse a chau telh telh a, a che pawh chu a zawi telh telh. Hmaikawra chuan a la duhtawk lo, a hreite ken chu a phawrh a.

Nghaka chu ala thi chiah lo, a la phu ve deuh uih uih a. A bawkvak tawk tawk a, mahse a che hleithei tawh bik lo. A mit atang te chuan thisen a rawn chhuak thei hial mai, Hmaikawra chuan a hreite chuan a tin ran mai a. Chutah dim baksak lo chuan a hnungzangah chuan a chek ta siah siah mai.

Nghaka chuan na a ti kher mai, mahse a che thei tawh si lo. Hmaikawra chuan vawi 8 vel lai chu a chek a, tichuan Nghaka chuan a na chu a tuar thei tawh bik lo. A thi chiang kher mai, thisen chu a bawi nei nuai hlawm mai a. Hmaikawra chuan Nghaka ruang chu a en vung vung a, tichuan a kal leh ta daih mai.

***********************************

TO BE CONTINUE