A HANDSOME CREATURE - 7 VICTOR RETURNS Written by : Aaron Malsawmdawngzuala WARNING - 18+ (A sequel to A Handsome Creature - 6) Chapter - 4

 A HANDSOME CREATURE - 7

VICTOR RETURNS

Written by : Aaron Malsawmdawngzuala

WARNING - 18+

(A sequel to A Handsome Creature - 6)

Chapter - 4

*********************

Khua a thim tawh a, thla lah chu a eng angreng phian lehnghal. Nghaka lo la let lo chu Peka ngaih chu a tha viau tawh lo, "Nghaka hi tinge a lo la let miah loh le, hei...darkar chanve a liam tawh ania." a ti nuah nuah a. Sammy-a lah chuan, "A lo let mai ang, hei chaw pawh a hmin tawh e. Kan ei thei chu a nimai, min rawn join ve nghal anga nimai lawm." a lo ti sam et mai.

Mahse Peka ngaih chu a tha mawlh lo, "Chaw ei pawh a lang hrih lo, keichu ka ngaih a tha lo ania. Ka va zawng teh ang, min lo eisan mai rawh u." tiin a tho nulh a, chem chu la in ramhnuai thim lamah chuan a kal phei ta daih mai. "Aw.. ava buaithlak thin.." tiin Sammy-a chuan a thlir zui vawng vawng a.

Peka chu a kal zel a, light chuan a han enkual a. Ring tak hian, "Nghaka, i va rei ve? Khawnge i awm?" tiin a au lauh lauh va. Mahse Nghaka hmel awm ang reng reng a hmu lo, a kal hla zel a. Khawpui lah chu a ri leh rum rum thin a, Peka chu a ding a, "Helai chen chen hi chu a thlen ka ring si lova, khawiah tak chuan awm ang maw?" tiin a phun sap a.

Chutah a hnungah chuan thawm a hre ta, rang takin a hawi phei nghal vat a. A chem chu a hum nghet nghal sauh bawk, mahse tumah a hmu lo. A en kual leh a, hnim kar vel chu a che hrut hrut hian a hria a. A va pan hnai a, chutah ui pakhat hi a rawn chhuak hlawl mai.

Peka chu a phu nasa em em mai a, "Chu ui mai mai chuh." tiin a phun zui chiam mai. Ui lah chu a tlan nghal vang vang a, nui suk chung chuan Peka chuan a en zui vawng vawng mai. Kal leh a tum chiah chu eng emawni hi a chhuih a, a thal tual mai. A rawn tho chhuak tur chuan a hma zawna mi chu a light ken chuan a en fuh a, a rak nasa kher mai.

A thianpa Peka ruang lo let reng, hrawk vun thler duai mai leh a hmel pawh hmuh tlak loh khawpa thisenin a bual chu a va hmu ta. A hlau lutuk chu a tawlh hian a tawlh hnung nghal char char a, "Nilo... nilo, Nghaka..ka duh lo." tiin a thlan chu a tla nghal zawih zawih mai a.

A thianpa ruang chu ava pan hnai ngam lo, rang lutukin a tho va, a tlan nghal vang vang mai. A kalkawng pawh a en tawh lo, hnim te chu a pal phei buan buan a. Chutah mi pakhat nen an insu bur a, an thal dun chiang kher mai. Peka chu rang takin a tho leh nghal a, Sammy-a leh Zualtea an lo ni hlauh mai.

Sammy-a chuan a dul chu dawm vawng vawngin, "Enge i rawn tlan chiam a? In rei lutuk a, rawn koh che u kan tum alawm." tiin a tho va. Peka pawh chu a rawn tho ve a, mahse engmah a sawi thei lo. Zualtea chuan Peka chu a en vang vang a, "Khawnge Nghaka pawh chu?" tiin a zawt a.

Mahse Peka chu a thaw halh halh a, a hlauthawng bawk nen ala tawng mai thei rih lo. A awm chu a dawm a, "Ngha..Nghaka." tih chiah a sawi thei. Sammy-a chuan ngaih tha lo tih hriat tak hian a en a, "Peka, khawnge Nghaka?" a han ti chang deuh fak a. Thaw deuh hlawp hlawp chung chuan Peka chuan, "Nghaka...a thi. Tu emawni in a that aniang, a thi..ka hmu." a ti bah nuai mai.

Sammy-a leh Zualtea chu an meng phawk nasa mai a, "Eng a? Nghaka a thi a, i fiamthu lo maw?" Sammy-a chuan a lo ti vat a. Peka chuan a lu thingin, "Aih, ka fiamthu lo...a ruang pawh ka hmu." tiin a lo chhang leh a. Zualtea chuan mak tih hmel tak hian, "Tunge... tuin nge that a?" a rawn ti ve bawk.

Sammy-a leh Peka chuan Zualtea chu an en a, chutah Zualtea lu chu a rawn bung hmawk mai. Thisen a chik nghal zawr zawr bawk a, Sammy-a leh Peka te chu an ding ngil at mai a, chet ngaihna pawh an hre lo. Zualtea, lu nei tawh lo chu a thingthi hnawk a, leiah chuan a bawk thlawp mai.

Chutah Hmaikawra chu a hnungah chuan a lo ding reng chu niin. Peka chuan chiang tak chuan a en a, "Aw...he.. hepa ngei hi a ni." a ti zawi sap mai. Hreite hriam hmel zet, thisen kai nuai mai chu Hmaikawra chuan a hum ran bawk a. Peka chem ken lai chu Sammy-a chuan ava chhuhsak a, Hmaikawra chu a tin ve ran mai.

"Peka, tlanchhe rawh.." tiin Sammy-a chuan ava pan hnai a. Mahse Peka chu a tlanchhe duh bik lo, thing bung pakhat chu a la ve a. Hmaikawra chu a tin ve ran a, Sammy-a chuan Hmaikawra chu va sah a tum a. Mahse Hmaikawra chuan a chem chu a hreite ken lai hmang chuan a lo vai thlak sak a, Sammy-a bekah tak chuan hreite chuan a hem pawp mai.

A ri chawk a, Sammy-a chu a thal chiang kher mai. Mahse vanneihthlak takin a hriam lo lam, a hnunglam a ni hlauh va. Sammy-a pawh chuan na ti hle mahse a hmaia thisen luang zawih zawih chung chuan rawn thawh leh a tum a. Mahse Hmaikawra chuan a awmah a lo tlawh leh pawp a, a thal leh tual mai.

Hmaikawra chuan ava kal chilh a, hreite chu lek kangin cheh a tum ta mai a. Mahse a hnungzangah tak chuan Peka chuan a thing tum ken lai chuan a rawn vaw ve pawp mai a, Hmaikawra pawh a thingthi ve hnawk mai. Chutah Peka chuan a luah chuan a thing bung ken phelh phawk khawp chuan a han hlap leh chawrh mai a.

Hmaikawra pawh a bawk ve ta thlawp mai, a hreite chu a thlauh va. Rang takin Peka chuan chhar a tum a, a ban chiah chu Hmaikawra chuan a rawn vuan ve ta tlat mai. A rawn tho nghal bawk a, Peka chuan a han pawt vak vak a. MAhse a hneh ngang si lo, chutah Hmaikawra chuan a pawt thut mai.

Peka chu a va tlan phei titih a, chutah Hmaikawrah chuan Peka chalah tak chuan na em em hian a lo tauh pawp mai le. PEka lu chu a hai nghal chhap a, a thal tawp mai. Hreite chu Hmaikawra chuan a lek kang leh ta, mahse Sammy-a chu rawn tho leh vatin hnunglam atang chuan Hmaikawra chu a rawn zuan thut a.

Theih tawp chhuah chuan Sammy-a chuan a han rek ve a, mahse Hmaikawra chu a chak lutuk tlat. Sammy-a hnungzang ri dawt khawp chuan thingkung pakhat lo awm hnai berah chuan Hmaikawra chuan a sawh tir a, Sammy-a chuan a thlah chiang kher mai.

A thla thla deuh thlawp a, bawkkhupin a khuh kharh kharh mai. A hnang deuh awl awl lehnghal a, Hmaikawrah chuan Sammy-a chu a din chilh ta ran mai. A hreite chu a han hum nghet sauh sauh va, a lek kang leh ta ur ur mai. Mahse Peka chu rawn tho chhuakin chemte chu a chhar a, Hmaikawra nakah tak chuan a sah hian a va sat chawrh mai.

Hmaikawra pawh chuan na a ti ve kher mai, mahse Peka'n chem a phawi leh hma chuan Peka chu a kiu chuan a hnarah a nghawk sak pawp a. Peka chuan chem chu thlahin a tawlh hnung nghal, rang takin Sammy-a chu ava kai tho nghal a. Hmaikawra chun a nakah chuan chem a bur ta vu mai, na ti chung chung chuan a phawi a.

Thisen a rawn baw chhuak ve deuh hawk a, "Tlan ang." tiin Peka chuan Sammy-a chu a kai a, an tlan chhe ta daih a. Hmaikawra chuan a jacket chu a phelh a, a pawt thler a. Tichuan a hliamah chuan a dawm a, a rum ve vawng vawng mai. A ban te pawh chu kanna(burnt) hnuhma a lo tam khawp mai, a hliam dawm reng chung chuan a kal bo ve ta a. 

************************************************

Sammy-a leh Peka te chuan an riahna tur hmun chu an thleng chhuak hlawl mai, Peka chuan chempui pakhat lo la awm leh motor chahbi chu a la a, a ken lai chu Sammy-a a pe a. Hnung lam hawi zeuh zeuh pah chuan, "Hawh tlan leh nghal ang, kan motor dahna lamah khan kal ang." tiin kal a tum a.

Mahse Sammy-a chu a la ding tlat mai, "Enge i la tih, Sammy? Kal vat ang, min rawn um phak ange?" tiin Peka chuan a vin lek lek a. Sammy-a chuan pawisa bawk chu a lo en leh ngawih ngawih mai, "Pawisa saw ka la tel dawn." tih leh phei a rual nghal a. Peka ngaihdan a ni lo kher mai, "I a em ni, kha pawisa khan min chhan dawn lo. Kan nunna a pawimawh zawk, pawisa khan kan nunna min pe let dawn lo." a ti khur khur mai.

Mahse Sammy-a chu a luhlul tlat, "Tunge kan thi dawn ti? He pawisa hi kan chhar alawm, i duh leh kalhrang mai rawh." tiin air bag pahnih chu a khai a, a kal daih mai. Peka pawh chuan tihngaihna a hre bik lo, a zui ve tawp a. An kal zel a, "Khawi pakhat kha ka lo khai ve ang." Peka chuan a ti ve leh ta tho va.

Tichuan fimkhur tak chung chuan an kal zel a, "Khapa kha maw i hmuh chu, buara a lu tuam tlat i tih chu?" tiin Sammy-a chuan a zawt a. "Aw ni e, ka hmu leh hman tawh miah lo ka tih kha..khapa kha alawm." tiin a lo chhang a. Sammy-a chuan hnunglam chu a han hawi leh zeuh zeuh thin a, "Min la rawn umzui angem le, tunge maw a nih le?" a ti nuah nuah a.

Pawisa a lo tam tham bawk nen, a rit ve ngang aniang nge. Peka chu a ding a, "Chawl teh ang, ka hah lutuk." a ti a. Sammy-a pawh chu a ding a, thingkung lian tak mai hnuaiah chuan an thu a, "Tawng ring suh aw...min lo la umzui reng maithei ania." Peka chuan a han ti zawi sap a.

Sammy-a chu a thaw deuh huai a, "A nakah i sat a, thisen a hloh hnem dawn sia, a rawn kal mai hrih lovang." a lo ti a. Peka chu a maimitchhing vang vang a, "Nghaka leh Zualtea kha...engtin nge a chhungte bulah kan sawi tak ang? Tu phaingsen nge maw a nih reng reng le, khapa kha?" tiin a insehruh nasa mai a, a mittui chu a tla hial bawk.

SAmmy-a chu a ngawi vang vang a, "Enteh, keichu he pawisa zawng ve tho hi a nih ka ring. Pawisa vang hian a ni ngei ang, kan kawl tih a hriat vang hian min that a nih ka ring." a rawn ti chhuak deuh hlawl mai. Peka chu a han thaw hak a, “Kan motor awmna kha kan thlen vat angai, khaw hnai ber kan thlen hunah puihna kan dil dawnnia.” a lo ti zawi leh sap a.

Sammy-a chu a indap ruk ruk a, “Ehe..ka phone ka keng miah lo lehnghal. Torch light lah kha ka thlauh daih bawk sia, nang i ak em, i phone?” tiin Peka chu a zawt ve a. Peka lah chuan a lu lo thingin, “Aih, keipawh torch light nen chiah alawm Nghaka kha ka va zawn.” tiin a lo chhang a.

An han ngawi dun leh vang vang a, rannung hram ri tih loh chu thawm dang hriat vak tur a awm lo. A reh ngawih ngawih mai, “Sammy, pawisa hi a zawng ve a nih chuan dah mai ila. Kan mamawh em ni, kan ta a ni lova, rukru kan ni dawn asin. Amah te chu police hnenah kan report dawn tho alawm, pawisa hian min tibuai mai mai a nih hi tun dinhmunah chuan..” Peka chuan a han ti a.

Sammy-a chuan a melh deuh hrawk a, “Engvangin nge kan hnutchhiah ang, a ta a ni bik hleinem. A teuh lo mai, tu pawh chu lo ni rawh se. A nei bik tur a ni lo, kan tan he pawisa hi a tangkai dawn zia i hre mai ang.” a lo la ti fan mai a. Peka chu a chek deuh hlar a, “Helai hmun atang hian damin kan chhuak bik angem, khapa kha ala thi hleinem...chuan pawisa zawng dang mi pali an la awm tih i hmu ve reng bawk. Khami te chauh lo pawh kha, midang pawh zawng ve an lo la awm maithei asin.” tiin a han hau leh deuh chiam a.

MAhse Sammy-a chuan a ngai pawimawh duh lo, “Chupawh ni rawh se, a zawng ho zingah ti hian kan tel ve tihna a nimai. Competition angah ngai rawh, a chak ber neih a nimai alawm. Kan thiante pahnih that meuhvin he pawisa hi a duh a nihte chuan, keini ala dam pahnihte hian kan pe bik tur a ni lo.” a la ti ngat ngat a.

Chutah light eng zeuh zeuh chu an bul hnaiah chuan an hmu a, rang takin an biru nghal a. Tawng mawlh mawlh ri an hre chhunzawm nghal bawk a, pakhat ai chuan an tam tih pawh a hriat bawk. Peka chuan a han ngaithla chiang a, “VAwiin tlaia mite kha an nih hmel, an aw chu ka hre tawh tlat.” a han ti zawi sap a.

Sammy-a chuan pawisa bag chu a ak nghal a, “Ak ve rawh, kal nghal ang.” tiin a kal nghal daih a, Peka chuan a zui ve bawk. Thawm chu a lo hnai zel a, Sammy-a leh Peka te erawh lehlamah zawk chuan an chhuk thla daih a, mahse motor an dahna lam a ni lo tlat, an bihruk ngei a ngai bawk si.

*****************************************

Hmaikawra chuan thlam lam chu a lo pan leh daih tawh a, a thisen a chhuak hnem ve tawh bawk nen, a chau ve tawh takzet. A hliam pawh chu ala dawm reng bawk, thlam chhungah chuan a lut a. A ding deuh chat mai, a chhan chu thlam chhung chu a lo hnawk nuai vang a ni.

Khang mi pali, Lucas-a, Henry-a, Dina leh Mamuana te khan pawisa an zawnna lamah khan an ti hnawk nuai a, Hmaikawra pawh chuan mi lut an awm tih chu a hrethiam nghal. A hmaikawr chu a phelh a, roomah chuan a lut a. Chhuat awng a phah pawh chu a lo inkar hawng vek a, a lungawiloh hmel kher mai.

Khum te pawh chu a lo inlip se vek a, engkim mai chu a hnawk hian a hnawk nuai a ni ber mai. Khumah chuan a thu a, a hliam chu a han en a. A vun chu a kak thuk deuh angreng khawp mai a, a vanneihna ber pawh chem kha  alo bil hlauh va, nilo se chu a tuar zo bik kher lo maithei a ni.

A han rum leh vawng vawng thin a, thisen chu a rawn chhuak tawp thei bawk si lo. Tichuan a thian ang tawk chuan hook hmangin a thui ta siah mai, puan thianghlim lo tak chuan a dawm bet a, tape-in a char leh deuh hmiah. MAhse sawi tawh ang khan ramhnuaia khawsa thang leh mi danglam bik a nih avangin a vawikhatna a ni lem lo bawk a, a hliam dangte pawh tiang tho chuan a thui thin a, buaina a nei zui ngai lem lo.

Muang chang chuan a han tho tial tial a, choka lamah chuan ava phei a, chhuar chu a han ban a. Zu um khat hi a rawn la chhuak a, a nachhawk nan tiin dawhkanah chuan dahin tui nen a pawlh a, a in deuh khalh khalh mai. Chu zu chu a hma a Zara te rawn ken kha a ni a, a dang pawh an lo la inbang nual a ni.

Victor-a chu dawhkan hmaah chuan thu in a melh ngai chu a melh vang vang a, a han maimitchhing leh a. A mitthlaah chuan mei sa takin a taksa a kan lai te, chumi lai hmun atanga a chhuah lai zawng zawngte chu a rawn lang chuai chuai mai. Kum 7 chhung zet damchhuah tuma ramhnuaia a vahvaih laite, sa hel leh eitur awm ang ang a ei thin laite nen chuan a ingaihtuah a, a rawn meng leh kawk mai.

Zu chu no 2 dang chu a tlak leh pawp a, a ding deuh thut mai. A thaw deuh halh halh a, tichuan a hreite chu a ban lehnghal a. A kawr thisen lai nuai mai chu a phelh a, a taksa danga thisen kaite pawh chu a han hrufai thuak thuak a. Tichuan kawr dang a ha a, thlam atang chuan a chhuak nghal hmak a.

************************************

Lucas-a te thian pali pawh chu an kal zel a, “Victor-a intih pawh chu kan hmu thut anga, tualthah hmang ani bawk si a, silai hi kan chelek hman miah lo mai ang tih te pawh a hlauhawm alawm le..” a han ti nuah nuah a. Ding meuh chuan Mamuana chuan a han melh hrawk a, “I va dawihzep ve a, silai kan keng theuh va, mi pakhat lek pawh i hlau amaw?” tiin a hau deuh zek mai.

Dina pawh chuan a thusawi chu a inchhir leh hnuhnawh khawp mai, “Aa.. hlau tihna pawh a nilova, rawn lang thut ta se, kan zinga mi tu emaw ber hi chu a khawih hman awm sia tih ka lo ngaihtuah mai mai mawle..” inthlahrung tak chuan a han ti zawi sap a.

Mamuana lah chuan, “Nangmah kha a khawih hmasa ber ang che, dawih lutuk mai. Tinge i lo kal ve, tual thah huamin a nih hi hetah hian kan kal. Cheng 200-300 lek vang pawn miin tual an that ngam, heite chu a nuai fe.. nuai 20 chuang zet a nih hi an zawn ni, dawih a hun lo.” tiin a vin leh hrep mai a, Dina pawh chu a ngawi reng ringawt.

An din thup takah chuan an bul hnai vel chu an en kual a, Lucas-a chuan a bula chhohna kawng chu a en chho zel a. A chung ber chu a han en thleng hial a, tent ni awm ta, puan in niawm tak chu a en fuh ta. “Ehe en teh u, khi... tent a ang lutuk.” tiin a han tawlh hnung deuh va, a en tha leh a.

A thiante pawh chuan an han en ve nghal sap sap hlawm a, torch light pali meuhva an han en rawn takah chuan tent a ni tih chu chiang tak chuan an hre thei nghal. Sammy-a te khan an puan in kha an lo kaih hman a, chumi chu Lucas-a te hian an hmu chiah tihna a ni.

Bengchheng lo tur chuan Mamuana chuan a naute chu zaizir hmang chuan a hrilh nghal a, “Muangchangin chho ang u, kan thawm an hre tur a ni lo.” a han ti zawi sap a. Lucas-a pawh chuan, “A tu a te pawh chu nise, khimite khi pawisa kawltu chu an ni chiang khawp ang.” a lo ti ve bawk.

Mamuana chu a han thaw hak a, “Hma ka hruai anga, in pistol theuh kha phawrh rawh u. Thawm an neih ve ngei pawh a rinawm a, kan bengchhen chuan an insaseng hman a nih loh pawhin min rawn beilet ve thei tlat ania, thawm dim thei ang ber khan min rawn zui ang che u.” a ti a, hma a hruai ta a.

Fimkhur tak leh thawm siam lo thei ang ber chuan an pali chuan an chho zel a, mahse thawm engmah an hriat loh avang chuan mak an ti angreng hle. An chho zel a, an thleng ta, mahse tumah an lo awm lo. An pali chuan silai hum reng chung chuan tent chu an va panhnai a, tumah an lo awm chuang lo.

Chaw leh chawmhmeh, ei theih mai a inchhawp sa chu a lo awm bawk. Mamuana chu a han hawi kual a, “An awm hla miah lovang mawle, hei..chaw pawh ei miah lovin tihian an dah sa thlap a.” a ti nuah nuah a. Henry-a chu rawn tawng chhuak ve in, “Chaw ei hma khawiah emaw an kal lawk mai mai te hi a ni lo maw, an lo let leh thuai ang ka ring.” a rawn ti ve bawk a.

“Pawisa chu i zawng phawt teh ang u.” Mamuana chuan a han ti leh a, tichuan an zawng chiam a. MAhse an hmu zo ngang bawk si lo, an ding ngawi leh deuh thap a. Dina chu a han thaw hak a, “Midang tute emaw, outing mai mai te pawh hi an lo niang nge...a diklo zawk hi kan lo vau chiam ang tihte pawh a hlauhawm.” a rawn ti ve leh khut mai.

Lucas-a chu a ngawi vang vang a, “A thu hrimin, a hmaa Pu Remliana’n a tirh, khang mi pathumte kha, anmahni ruang kha chu kan hmu mai a. Mahse khawnge Zara leh a bialnute unau ruang kha a awm ve tak ang tih hi ani ka lo ngaihtuah chu, kan hmu ve miah lo ania.” a rawn ti chhuak hlawl mai.

Henry-a pawh chuan, “Ni e, kan hmu miah lo.” a lo ti ve bawk a. Mamuana chu a han thaw leh deuh hak a, “Engpawh nise, an sulhnu vel en atang hi chuan hemite hi an rawn let leh vat a rinawm a. Tihian ti phaw teh ang, a thim deuh laiah sawn chang ila, an lo kal hunah, tichuan kan va thawng pawp dawnnia.” tiin thu chu a khaikhawm ta a.

***************************************

Thutna rem deuh lai hi Sammy-a leh Peka te chuan an thleng a, “Hawh tah hian chawl leh phawt ang.” Sammy-a chuan a ti a, an pahnih chuan an thu a. An thaw hlawi hlawi mai, “Khawilai nge kan awmna hi i hria em, a kalkawng ila hre thei em?” tiin Peka chuan a han zawt a.

Sammy-a chuan a lu lo thingin, “Aih...khawnge kan awm pawh ka hre tawh lo.” tiin a lo chhang a. Peka chu a hawi kual a, “Tah hian khawvar kan nghah mai a ngaih hmel, a thim ropui mai si a. Tiangte chuan kan bo tulh tulh zawk ang, kan kal luih zel chuan.” a han ti leh a.

Sammy-a lah chuan, “Aww...kan hre zel mai ang, bona tur a awm lo. Huan kalkawng vek alawm, a hma pawh kan kal tawh alawm mawle.” a lo ti sam leh et mai. An ngawi dun vang vang a, “He pawisa hi khawi ami nge, engtia heti zat zat lo awm nge a nih kan hre si lova. Mi engzat chiahin nge zawng pawh kan hre lo, a tu a te mah hian tual thah an hreh dawn hauh lo ania aw.." Peka chuan a rawn ti chhuak leh a.

Nin hmel tak hian Sammy-a chuan a melh deuh hraw a, "Ih e, pawisa hi hetah hniah hnutchhiah ngawt mah ila, pawisa zawngtute zinga mi a tu emaw ber hian min hmu a nih chuan, pawisa engmah kawllo mah ila, min tina dawn, min that thovang. A chhan chu tumah an inring tawh dawn lo, chuvang chuan tihian keimahni hian kan kawl law law ang, chu chu a nimai." tiin a chhang hmak a.

Peka chu a han thaw hak a, "I ngaihdan hi aww.. pawisa vang hian i a zo tawh, i mit a ti del tawh a nih hi. Anih chuan he pawisa hi hawn thei ta ila, lo damkhaw chhuak ta ila, neih vek i tum em ni?" tiin a han zawt deuh ngat a. Sammy-a chu a ngawi vung vung a, "Bag khat ve ve hian kan insem dawnnia, tuman an hre dawn hleinem." a lo la ti zui.

Peka pawh chuan a chhang phei tawh lo aniang nge, za lo tak chuan a khi suk ringawt. An ngawi dun leh vang vang a, "Zualtea leh Nghaka thattu kha, pawisa lo zawng ve pawh lo ni mahse, tinge khatia a hmai a tuam tlat le?" Peka bawk chuan a rawn ti chhuak leh hlawl mai.

Sammy-a lah chuan, "AWw... a hmel a thup a nimai alawm. Tikhan a hmel thup chung khan pawisa zawngin a hmaa awm ho chu a that hmiah hmiah tihna ania, lo dam chhuak pawh awm se a hmel kha an hre dawn lova, chu chu a ni mai alawm." tiin a lo chhang leh mai a.

"Kei chu pawisa zawng a nih ve pawh ka ring lo."

"Engvang chuan maw, pawisa zawng ni lo se engvangin nge kan thiante pahnih kha a thah ang?"

"Nghaka ruang kha ka hmu thut a, a thah dah kha a rapthlak lutuk. Nghaka hrawah khan beer bottle keh ka hmu a ni, a hrawk kha  a thler vek bawk. Chuan kan intawh khan, Zualtea lu kha eng saw set set lovin a rawn fik hmawk bawk kha ania."

"Chu chuan engtin nge pawisa zawng a ni ve lo tih a hraittir che?"

"A chhan chu tinge khatia a rawn chet buan buan, kan pahnih khan min thah a tum ve ve bawk. Tinge a tawng miah loh, tinge pawisa awmna te min zawh tal loh."

"Keimahnin kan bei miau va, thah min tum loh ten. Keini pawn tihnat tumin kan bei a, min bei let ve bawk ang chu...."

Peka chu a han ding deuh hluai a, "Chulam ka sawi lo, ngaihtuah chiang rawh. Keini kha min that ve thei ta se, a zo der dawn. Tinge pawisa awmna min zawh miah loh, chutia pawisa vang a nih si chuan? A chetdan kha en la, min sah hlum a tum ngei a nih kha...i hmu ve reng lo em ni?" a han ti vin deuh hlur a.

Sammy-a pawh chuan a han ngaihtuah a, a dik a tih ve hmel tho mai. A ding a, "Engpawh nise, kal leh phawt ang. Helai phei hi chu a zawl angreng si a, hla deuh atang pawn min hmu thei dawn tlat. Kawng chu kan bo lovang, khawvar nghah tih vel kha hun a hek." tiin a kal leh ta daih mai a, Peka pawh chuan a zui leh ta nge nge a.

***************************************

DArkar chanve dawn an enthlak hnu ah pawh chuan tumah an lola kal si loh avang chuan Lucas-a chu a chhuak a, "Lo chhuak ru, tumah an lo kal dawn lo aniang." a ti ringawt a. Midang pawh chu an rawn chhuak ve a, "Ka ngaih a tha chiah lo, tinge tumah an rawn kal si loh le?" Henry-a pawh chuan a rawn ti phei nuah nuah mai.

An pali chuan tent bul chu an va pan hnai leh a, "Ni e, chaw ei theih maiin an kalsan a. Ti em em a han rei leh si te chu, buaina engemaw an tawk chiang aniang." DIna pawh chuan a lo ti ve bawk. Lucas-a chu a han khi deuh suk a, "Chaw kan la ei bawk si lova, kan ei daih dawn mawnile." a han ti fiamthu a.

MAhse Dina chuan, "An thil plan vek hi a lo ni mai anga, tihian min lo zuiru reng zawk anga. Tur te hi an lo pawlh vela nge aw, kan eitur atan an siam hrim hrim hi lo ni ta se.." a rawn ti daih mai. Mamuana chu a khi suk a, "Keichu rindan ka nei..chaw leh chawhmeh a tur pawlh tih vel kha chu a ni lo rapthlak lutuk ringwat." a rawn ti ve leh thung a.

Lucas-a chuan a han melh khur a, "Enge i rindan chu, han sawi la.." a lo ti hmuk a. Mamuana chuan thawk a han la te te a, "Victor-a. helai hmunah hian Victor-a a kal anga, an buai anga, an chaw ei tur hi an tlanchhiat san a ni ngei ang, nilo se rawn kal a hun tawh, hei chaw leh cahwhmeh ho pawh a dai vek tawh ania." tiin a chhang a.

Henry-a pawh chuan a lu a lo bu nghauh nghauh va, "A ni ve thei tho mai, ticfhuan Victor-an a zawng kual mek hlawm dawn tihna nimaw tunah hian.." a lo ti ve nuah nuah bawk a. Lucas-a chuan chawhmeh vel chu a han hawng a, "Arsa an siam tlat mai, kan ei tak tak mai dawn em mawni le?" a han ti deuh bul bul a.

Mamuana chu a khi suk a, "Eir awh u, keipawh ka ei dawn. A ho emai, tihian keimahni tan vek, kan inbawl chawp angai lo tihna nimai lawm, arsa kha han chhuanglum teh kha, an meichhemnaah khan..nang, Henry.. silai kan nei alawm mawle, ho lutuk, hei.. zu te pawh a awm anih hi." tiin zu chu a lek kang a.

An in hova, Henry-a pawh chuan chawhmeh chu a han ti lum leh a. MAhse Dina erawh a ngaih a tha lo, a hawi kual leh hu hu thin a, hlauhthawnna a nei tlat a ni. Midang ho lah chuan zu chu an in chhunzawm zel a, chawhmeh chu a sat deuh hnu chuan an ei ta hlawm a.

Dina chu ngawi rengin a thu a, a thiante chu a en reng ringawt. Mamuana chuan a va melh a, "I ei ve dawn lo mi, hei thleng pawh pali chiah chiah a awm ania?" tiin a zawt a. Dina chu a thaw hak a, "Ka ngaih a tha chiah lo mawle, hetia mi chaw siam sa lo ei ve tawp chu. Khawnge an mahni an awm kan hre bawk si lo, mi chhungkaw intihlim satliah, khawiah emaw kal zawk te hi an lo ni ang tih ka hlau ber." tiin a chhang a.

Mamuana chu a nui huah huah a, "Bawiha leh...darkar khat dawn kan chan tawh kha. Chawhmeh dai thak khawpin an kalsan lovang, ka sawi kha a dik, Victor-a'n a tibuai a, chuvang chuan an tlanchhia a nimai." a han ti deuh zek a. Lucas-a pawh chuan, "Hlau suh, lo ei rawh, Dina. A ho lutuk, pawisa zawng vek kan nia, tualthah huama kal kan ni tih i hriat kha..pa deuhvin awm rawh." a lo ti ve bawk a. 

Dina chu a ngawi vang vang a, chhan let leh a han tum zet a. Mahse a chhang let ta chuang lo, zu chu a han tlak ve deuh pap pap a. "Tikhan kha, chaw ei huaina i in tawh bawk a, ei ve thuai mai rawh." Lucas-a bawk chuan a lo ti leh a. A ril a tam ve tho avang chuan Dina chuan thleng chu a ban a, chaw chu a ei ve ti ringawt a.

*******************************************

TO BE CONTINUE