USAGI (ENGLISH : DARK BUNNY) [MIZO SLASHER/HORROR FICTION STORY] Written by : Aaron Malsawmdawngzuala WARNING : 18+ CHAPTER : 6

 USAGI

(ENGLISH : DARK BUNNY)

[MIZO SLASHER/HORROR FICTION STORY]

Written by : Aaron Malsawmdawngzuala

WARNING : 18+

CHAPTER : 6

*********************************

Joseph-a chu a harh deuh zawk mai a, a bulah chuan Isaka chu a lo mu ang phuah mai. A hnar nasa em em mai lehnghal a, an mutna room chhung a han enkual chu Petera a hmu hauh lo. A ngaih a tha vak lo hle mai a, "Ehe...Petera hi, a lo la lut ve miah lo em mawni le?" a han ti nuah nuah a.

Chutah room tukverh zawna tu emaw kal phei fua a hmu chu a phu nasa kher mai, tukverh lam pan chuan a va tho chhuak nghal vat a. Tukverh chu a hawng a, "Peter, Peter nangmah em ni?" tiin a han au vak vak a. Mahse chhanna a dawng lo, a reh hian a reh tlawk tlawk mai.

Room atang chuan a chhuak a, inchhung chu a en kual leh a. Bathroom thleng a check hnu pawh chuan Petera reng reng a hmu lo, "Hmeichhe mutna lamah a lo va phei em mawni le?" tih nuah nuah pah chuan hmeichhe mutna lam chu ava pan a. Fimkhur tak chuan kawngka chu a han hawng a, a va dak a.

Mahse Zonuni, Esi leh Ruatfeli te chauh chu an lo awm a, an lo mutui ngang hlawm mai. Josepha ngaih chu a tha tawh lo kher mai a, "Hepa hi khawnge maw a kal le aww.." tiin room lam chu a pan let leh a. ISaka chu kaih thawh tumin a sawi vak vak a, "Hey...Isak, Saka...harh teh." tiin a hmaiah te chuan a beng nawk nawk a.

Mahse ISaka erawh a harh thei lo, a rawn rum leh nghut ringawt zel. Joseph-a chu a thaw hak a, "Ava buaithlak e aww.." tih bul bul pah chuan room chu a chhuahsan leh a. ZAwn mai a tha in a hria a, pawnah chuan a chhuak ta a. Kal a tum chiah chu hmeichhe ho a ngaihtuah leh deuh bawk si, let lehin kawngka chu pawn lam atang chuan a kalh ta a.

Tichuan Petera zawng tur chuan a chhuak phei a, motor awmna lam a va pan a. A chhung te chu a han bih a, mahse tumah an lo awm der mai si lo. Motor hnunglam chu a han en leh a, chahbi lo invuah sa a hmuh chuan a ding chat mai. Chahbi chu a phawi a, "Ehe...enge awmzia ni ta ang?" a ti nuah nuah mai.

Chutia a ngawih vung vung lai chuan a hnungah chuan RSa chu a hreite nen a rawn kal mek a, Joseph-a lah chuan a hre der si lo. Chutah a hnungah chuan a rawn ding ta run mai, a hreite chu a han lek kang leh a. A chek tur chiah chu Joseph-a chuan motor hnung glass atang chuan Rsa thla chu a hmu ta hlauh va, a awm sawn hman ta hlauh va.

Rsa chuan motor hnung chu a chek ri ta bur mai, Joseph-a phu nasa lutuk leh hrilh hai bawk si chu a la tluk phah thelh zui. Rsa chu a rawn hawi phei leh a, a zasupui hmaikawr, thisen kai nuai mai leh khak bal zet mai te chu a rapawm takzet. Joseph-a chu a ding vat a, "Tu..tunge i nih a?" tiin a a tawlh hnung hret hret a.

Rsa chuan a hreite chu a rawn vai leh ta fua fua mai a, mahse Joseph-a chuan a lo bum theih hlauh zel a. A sat fuh teuh thei fia fia khawp mai, Joseph-a mangang chu ramhnuai lamah chuan a tlanchhe ta tawp a. Hmanhmawh lem lo tak chuan Rsa chuan a zui ve zel a,  Josepha mangang chu a thaw hlawp hlawp mai.

Thui fe a tlanchhiat hnuah chuan a chau ve ta, a ding a. A han thaw leh hlawp hlawp a, "Khawnge...khawnge a awm, khapa kha?" tiin a thlan chuan a bual hi a ni ber mai. A hawi kual a, a awmna pawh chu a hre tawh lo. "Tunge...tu phiangsen nge? Tu phiangsen nge khapa kha ni ta ang?" tiin a han inbe leh mawlh mawlh a.

Chutah hriatchhuah nei ni awm tak hian a meng kawk a, "Nilo..ka thiante, hmeichhe ho." tiin a phun sup a. Hmeichhe pathum leh Isaka chiah inah an awm bawk si, Isaka lah harh thei bawk si lo nen. A lo va lut anga, a lo va that vek ang tih hlauvin let leh a tum a.

Mahse khawi ber nge kalkawng a hre tawh si lo, in lam panna kalkawng nia a hriat chu a pan risk tawp ringawt mai. A kal zel a, chutia a tlan lai tak chuan a hmaah tak chuan Rsa chu a rawn lang leh ta thut mai le. A phu nasa lutuk chu a ding chat a, Rsa lah chuan a hreite chu a la keng reng bawk.

Joseph-a chu a hnung tawlh leh hret hret a, "Nilo..tunge i nih? Enge i duh a...mawh, tunge i nih?" tiin a vin vak vak a. Mahse Rsa chuan a chhang der mai si lo, "ZAwnga, tunge i nih ka tih chu?" tiin Josepha bawk chuan a han vin leh hrep a. RSa chuan a hreite chu a lek kang leh ta ur ur mai, Joseph-a chu cheh a tum leh ta mai a.

Mahse Rsa chuan a cheh thelh leh ta hlauh mai, thingkung lian tak maiah chuan a chek tlum thawih a. A tang ta tlat mai, chu chu remchangah la in Joseph-a chuan a va bawh phei a. Rsa pawh a tlu ve ta, Joseph-a chuan thutbetin hmaikawr chhanah chuan a hnek siah siah mai a.

Mahse Rsa chuan a lehthal rang ngang mai, Joseph-a chu a thut bet ve thung ta. A kut veilam chuan a hrawkah a rek a, a kut dinglam chuan chemte a phawrh a. Joseph-a dar ah chuan a vit ta, "Ana lutuk." tiin Joseph-a pawh chu a rak tuar a. Dim hauh lo chuan Rsa chuan chemte chu a han phawi ri leh hrawk a, vih leh a tum a.

Mahse silai a rawn puak dur a, Rsa chu a eu zawk mai. Joseph-a a rehna chu a thlah riai riai a, leiah chuan a tlu zangthal tawp a. Joseph-a chu rang lutukin a thu chhuak nghal a, a hma zawn ava en chu kha putar kha silai nen a lo ding run mai a. Rang takin ava pan a, "I tha em?" tiin putar chuan a lo zawt a.

"Ka tha e, ka darah hian a vit a..a na lutuk." tiin Joseph-a chuan a lo chhang a. Putar chuan rawmawl a phawrh a, joseph-a hliamah chuan a nem bet a. Joseph-a bawk chuan, "Tunge...saw saw tunge?" tiin Rsa mu reng chu a va kawk a. Putar chu a thaw deuh hak a, "Ka hre lo, mahse Rsa chu a nih ngei ka ring." tiin a chhang a.

Joseph-a chuan mak tih hmel tak hian, "Rsa maw? I sawi Rsa kha maw?" a ti hu mai. Putar chuan a lu a bu nghauh va, "Aw ni e, ka hlauh ang ngei ngei in helai hmun hi a rawn pan ta a nih hmel." tiin a chhang leh a. Joseph-a chu ava hawi phei leh a, mahse Rsa chu a lo awm tawh hauh lo.

"Pu...ka pu..ka pu..saw, a bo daih." a ti bah nuai mai a. Putar pawh chu ava hawi ve a, "Ehe..a tha dawn lo tawp mai. Lo kal teh, i hliam ah te khan damdawi kan hnawih dawnnia." a ti a. "Ka thiante..ka pu, ka thiante.." Joseph-a'n a tih lai chuan, "Aw..kan ngaihtuah ang anni pawh...kal phawt ang." tiin putar chuan a chhang a, an kal ta a.

***************************

Zonuni zun chhuak chu a harh a, bathroom lam panin a va zung a. A chhuah pah chuan, "Petera pawh chu min rawn kai tho dawn amaw tia, a muhil tlang daih animaw?" tiin a phun nuah nuah a. Choka lamah chuan va pheiin beer a zawng a, mahse engmah a lo awm tawh lo.

Motor lamah a awm tih a hria a, Petera chahbi dil tur chuan mipa riahna lam chu ava pan a. A han kik karh karh a, mahse tuman an chhang lo. "Peter...Peter.." tiin a han au va. Mahse tuman an la chhan tak si lovah chuan ava lut ta a, Isaka chauh a lo mu a hmuh chuan a hrilhhai angreng kher mai.

Isaka pawh chu a rawn harh a, "Enge ni aa...Zonun, nangmah em ni?" meng mang lo chuan a rawn ti a, ala ham ang bui bui a. Zonuni chu ava lut a, "Khawnge Petera leh Joseph-a?" tiin a zawt a. Isaka chuan a mit a han nuai leh phawt a, a han enkual a. "Ka hre nang, an zung aniang chu.." a lo ti sam et mai.

Zonuni chu a han chek deuh hlur a, "Bathroom atangin ka rawn chhuak chiah alawm, an awm lo." a han ti leh deuh khur khur a. Isaka chu a han zi mar kual leh te te a, "Ka hre lo, aa..pawnah an chhuak aniang." a lo ti leh mai a. Zonuni chu a han thaw deuh hak a, "Min va zawn pui teh, motor ah beer a awm a, ka in duh." a han ti leh a.

Peih loh hmel tak hian Isaka chuan, "Aw...nangmahin va kal mai la. An awm hla lovang, verandah velah khan an awm mai ang." a lo ti leh a. Vin lek lek hian Zonuni chuan, "Ka hlau alawm mawle, lo awm hla ta se...lo tho mai mai teh." a han ti leh hlur a. Isaka pawh chu a tho ta nge nge a, "Ninawm mange aww..." tiin a la phun nuah nuah zui.

Room atang chuan an chhuak dun a, kawngka hawn an han tum chu a theih ta tlat loh mai. Zonuni chuan a han sawi vak vak a, "Ehe ngati nge a?" tiin a han nam leh vak a. Isaka pawh chuan mak a ti kher mai, "Khawimaw ka lo hawng ang." tiin hawn a han tum a.

Mahse a thei bik lo, "Ehe, pawnlam atangin tu emaw in min kal khum a ni ngei ang." a han ti bul bul a. "Ava buaithlak, tu in nge min kal khum anga?" Zonuni chuan a lo ti vin leh hlur a. "AWw...in pa leh Sepa bak midang tunge ni se i tih a?" tiin a lo vin let ve hlur mai.

Hmeichhe room atang chuan Esi leh Ruatfeli te pawh an rawn chhuak a, "NGati bur bur nge, in thawm ava ring ve?" tiin Esi chuan a zawt a. "Hei Sepa leh Petera an bo daih a, kawngka hi pawn lamah an kalh daih bawk si a nih hi." tiin Isaka chuan a lo chhang a.

Esi chuan mak tih hmel tak hian, "An bo a? Engtia bovin maw?" a lo ti hu mai a. "Motor ah zu an in dun bak a ni lovang." Ruatfeli chuan a lo ti hmuk a. "Khawnge kal in tum hrim hrim a?" tiin Esi chuan a han zawt leh a. Isaka chu a khi suk a, "Hei Zonuni hi motor a beer va lak belh a duh a, chuvang mawle." tiin a lo chhang a.

Chutih lai chuan pawn lam atang chuan kawngka kalna hawng ri chu an hria a, "Chu an lo let leh alawm." Isaka bawk chuan a han ti a. Kawngka zawn takah chuan Zonuni chu a ding a, "Kan vin hrep teh ang." a la ti zui. Kawngka chu a rawn inhawng a, Peter awzawng a ni lo, Joseph-a pawh a ni lo bawk.

Rsa chu a sazupui hmaikawr nen chuan a lo ding khur mai a, chemte a hum ran bawk. Zonuni te thian ho chuan an en vung vung a, an hrilhhai kher mai. An ngawi thap hi a ni ber mai, chutah Rsa chuan Zonuni chu a vit ta thut mai a. Midang ho pawh chu an tawlh hnung nghal a, Esi leh Ruatfeli phei chu an au nghal deuh tuar tuar mai.

Rsa chuan chemte chu a phawi leh a, Zonuni chu a tlu tawp mai. Chutah midang ho chu ava pan leh ta a, "Tunge..tunge i nih a?" tiin Isaka chuan hlau tak chung si chuan a han vin khur dar dar a. Isaka hnungah chuan Esi leh Ruatfeli te chu an awm a, an hlau kher mai.

Zonuni chu a lo la thi lo, "Isak...Isak.." tia a rawn tawng tawk tawk ri chu an hria a. Rsa pawh a tawp chat mai, Zonuni chu a dul dawm chung chuan a rawn bawkvak phei a. Rsa chu ava hawi a, a va pan leh ta mai. Chu veleh Isaka chuan bang kila tuboh intung chu a va la a, Rsa hnungzangah chuan a chhu pawp mai a.

Rsa pawh a thingthi dawt mai, "Zawnga, tunge i nih ka tih chu?" tih pah chuan a aia na chuan a han chhu leh deuh pawp pawp a.Vawi 5 vel a chhut hnu chuan Rsa pawh a bawk ve ta thlawp mai, Esi leh Ruatfeli te chuan Zonuni chu an va buaipui nghal vat bawk a.

Isaka thinrim chuan a han chhir zui hrep a, amah zawk pawh chu a chau hnawk thei. A thinrim lutuk chuan, "Ka han that law law teh ang che.." tiin a lu ah chuan chhut a tum leh a. Mahse Esi chuan lo dangin, "Ni lo...Zonuni saw kan buaipui angai. Police kan call zawk dawn nia, tual i that duh em ni?" a lo ti a.

Isaka pawh chu a insum hman hram, "Hmanhmawh rawh u...vatin.." tiin Ruatfeli chu a rawn vin tuar tuar a. Esi leh Isaka chuan an va pan phei a, mahse a hnung zawka kal ISaka malah chuan chemte a rawn tlum thawih mai. A na ti lutuk chu a t(r)e tuar a, a thingthi ve ta hnawk mai a.

Rsa chu a rawn ding kang leh ta, Esi te chu an au nasa mai a. Zonuni chu kaih thawh an tum a, mahse a tho thei mai bik bawk si lo. Chemte chu Isaka malah chuan a la bur vu mai a, Rsa chuan a tham tho va. Choka lamah chuan a vawm in a vawm phei hi a ni ber mai, dawhkan chhe vek khawp chuan Isaka chuan a va delh ri rum rum mai.

"Zonun..Zonun khawngaihin tho rawh." tiin Esi chu a tap nasa tawh mai. Zonuni chuan thisen a hloh hnem tial tial a, a chau tial tial mai bawk si. Ruatfeli lah chuan, "Esi tlan ang, tlan ang.." a ti chhen tawh mai a. Chutah RSa chu a rawn hawi leh ta, Esi te thiandun chuan an hlau takzet.

Zonuni ber pawh chuan, "Tlan rawh u..tlanchhe rawh u." a ti ta ringawt a. Hreh tak chung si chuan Esi leh Ruatfeli chu pawnah chhuakin an tlan chhe ta a, Rsa chuan Zonuni na tuara vial mek chu khawih chhunzawm lovin a kal kan daih a. MAhse a ke ah chuan Zonuni chuan thei leh thei lo hian a la rawn vuan hram a, Rsa pawh chu a ding a.

Zonuni samah chuan a zu tham a, a thingthit tir ran mai. Chutah chemte chu lek kang leh vu in Zonuni chhipah tak mai chuan a vit tlum leh ta pup mai, thisen chu a chik zawr zawrh mai a. Zonuni pawh chu a meng bial kawk a, a ka atang chuan thisen a baw chhuak hawk hawk bawk.

Rsa chuan a la duhtawk mai lo, chemte chuan a han vih thuk belh leh a. Chemte lah sei tha bawk nen, Zonuni hrawk vun atang chuan chemte hmawr zum chu a rawn lawr hial thei. Chutah a han phawi leh hrawk a, Zonuni chu chhuatah chuan a bawk thlawp a, a thi chiang ngang mai.

Chutah a hnung atang chuan a lu chu a rawn ri pawp mai a, a tlu teuh ngei mai. Dawhkan ke bung hum ran chung chuan Isaka chu a lo ding reng mai a, Rsa chu a rawn hawi phei leh a. Isaka chuan thinrim leh mittui tla teuh chung hian, "Zawngsen, thi rawh." tih pah chuan Rsa lu ah chuan a han hlap leh pawp mai a.

Mahse Rsa chu a la tlu lo, a pai deuh khat khat ringawt. Isaka'n vuak leh a han tum chu Rsa chuan a kut khingkhat chauh chuan a lo man chat a. Isaka dulah chu a vit ve leh a, mahse sir zawng deuhva a lo awm avang chuan a nak ah zawk chuan a vit a. Isaka chuan a tiang(dawhkan ke) ken lai chu a thlah a, chhuatah chuan a tla a.

Rsa chuan a rek a, tukverh keh chhuai chuan a theh chhuak leh ta daih mai. Tichuan in chu a chhuahsan leh a, pawnah chuan a ding vang vang mai. A hawi let leh a, kum 9 tehmeuh a lo chen ve na, a in chu a han thlir vang vang a. Tichuan a han thaw deuh hluai a, ramhnuai lam pan chuan a kal phei leh ta a.

**************************

Motor chhungah chuan Ruatfeli leh Esi chu an lo biru reng chu niin, motor hnunga chahbi, Joseph-a'n a thlauh tak kha an lo chhar a, bihruk nan an lo hmang hi a lo ni. A ruk in Rsa chu an lo en thla reng a, ramhnuai lam pana a kal phei chiah chu an thaw huai mai.

Motor khalh thiam lo ve ve an ni bawk si a, an tan chuan khawvar nghah a, puitu zawn mai loh chu tihtheih dang an nei lo. An dak chhuak ve ngam ta a, "A kal tawh tiraw...a kal bo tawh em?" Ruatfeli chuan a han ti khur dar dar a. Tukverh ah chuan hlau tak chung si chuan Esi chu a han dak dek dek a, Rsa chu a hmu tawh lo.

"Aw a kal tawh..." a ti zawi sap a. Chutah chhuak em em hian Ruatfeli chu a tap ta hawm hawm mai. Esi chuan kuah in, "Tap ring suh...a lo la awm hnai thei ania. Ruatfel, huaisen takin awm rawh. Khua a var anga, tanpuitu kan ko dawn nia." tiin a hnem a.

Mahse thinrim tak hian Ruatfeli chuan a kut chu a lo paih thlak sak a, "Nangmah vang vek...nangmah vang vek i hria em?" a ti ta hrep mai a. Esi pawh chuan hrethiam lo tak hian, "Ruatfel, enge i sawi awmzia? Enge ka thiamloh a nihna, khapa kha tunge a nih ka hre bik lo." a lo ti hu mai.

Rum tak hian Ruatfeli chuan a melh a, "Ka kal lovang ka ti mawlh mawlh a, ka kal duh lo ka tih mawlh mawlh kha. Ka rawn sawm ang che i tia, ka chhungte bulah dawt i rawn sawi bawk a. Ka chhungte thu kha awih ila chu, hetiang thil hi kan tawng lo tur." a ti leh khur khur mai.

Esi pawh a ngaihdan a ni ta bik lo, "Animawww...keimah vang vek maw lo ni a...i kal ve chak tho kha. Hetiang thil hi a thleng dawn tih ka hre bik hleinem, chutia nangmah vang ti a inpuh hun pawh a nih loh hi.." a ti let ve ta hrep mai. Ruatfeli chu a tum hmuk a, "Khapa kha tunge a nih ang? Engvanga khatiang thil rawn ti nge a nih?" a han ti bul bul a.

Esi chu a ngawi vang vang a,"Nilo...Ruatsanga..Ruatsanga kha..zanina Sepa sawi kha.." a ti nuah nuah a. Ruatfeli lah chuan, "Tu Ruatsanga maw?" a lo ti hlur mai. Esi chuan phawk hru hian a melh a, "Kan awmna in a kum 15 liam ta a lo cheng thinte kha, Pi Rinawmi fapa Ruatsanga, mi a dahna in atanga tlanchhuak tih vel kha.." a han ti chu Ruatfeli pawh chuan a hrechhuak ve ta.

"Ruatsanga...putar in min warning an tih kha, khapa kha..nichina mi kha a ni tihna em ni?" a lo ti ve leh a. "KA hre lo, mahse a ni thei tho mai." tiin Esi chuan a chhang a. Chutih lai tak chuan Ruatfeli awmna lam zawk motor tukverh glass chu a rawn keh chuai mai a, an au nasa dun kher mai.

RSa chu a lo let leh chu niin, an titi pawh a lo ngaithla vek hi a lo ni. Ruatfeli chu a rawn rek a, motor tukverh chep tak atang chuan pawh chhuah a tum ta mai a. Ruatfeli hlau lutuk chuan, "Esi..Esi, min pui rawh." tiin a au tuar tuar a. Esi chuan a theih tawkin a thiannu ke ah chuan a lo pawt ve bawk a, mahse a pawt hneh lo kher mai.

Rsa chuan a pawt chhuak ta a, motor hma lamah chuan a kek phei a. Chutah motor hma chu dim hauh lo hian a tauh tir ta chawrh chawrh mai a, Esi chu motor atang chuan a rawn chhuak a. Mahse a hlau lutuk tlat, a huaisenna in a tlin ngang lo. "Nilo..Ruatfel..ka duh thei lo." a ti vak vak ringawt a.

A tawp a tawpah chuan a tlan chhe ta ringawt a, ramhnuai lam pan chuan a tlan risk ta tawp mai. Rsa chuan vawi 20 vel lai chu a tauh tir a, Ruatfeli hmai pawh thisenin a bual huh vek tawh. A lu chu a hai muai muai a, mahse a la thi lo thung. Leiah chuan a thal tawp a, Rsa chuan a ke pahnih chu vuanin a hnuk a.

A han siam rem ang ren rawn a, motor ke zawnah tak chuan a lu chu a dah ta mai a. Ruatfeli chuan engkim chu ala hre vek a, mahse a hliam a nat em avang chuan a che sawn hleithei tawh lo. RSa chuan motor chu hnung lam atang chuan a nawr ta a, a nawr lir ta mai.

Ruatfeli chu thei leh thei lo hian a va hawi tawk tawk a, a zawn taka Rsa'n bolero lian tak mai a rawn nawr phei a hmu chu a hlau em em a. MAhse a che sawn thei lo, au pawh a au chhuak hleithei tawh lo. Rsa lah chuan a nawr kal mai pawh a ni lo, a rawn lir chak lutuk chu khalhtu an awm ang mai hi a ni.

"Khawngaihin.." Ruatfeli chuan a ti zawi sap a, a bak engmah a sawi thei tawh lo. Motor ke hma chuan a lu ah tak a rawn chil a, Ruatfeli mitmu pakhat zawk chu a pawk chhuak nawlh mai. A ke hnung zawk in a rawn chil leh meuh chuan a lu chu a pherh titih hial mai a, a thi chiang ngang mai.

***************************

Minute 10 vel hnuah chuan Putara leh Josepha pawh an rawn thleng hlawl mai a, kawng an bo rei em avang leh Joseph-a hliam na ti lutuk, an chawlh deuh sek avangin an rawn kal chal hleithei lo a ni. "Kan thleng e, kan thleng e.." tiin Joseph-a chu va tlan luh a tum deuh nghal mai a.

Mahse Putara chuan a lo dang a, "Ngawi lawk teh, Mama...saw enteh." tiin Ruatfeli ruang, lu pherh vek chu ava kawk a. Joseph-a chuan ava en a, a thingthi tawp. A mittui a tla nghal zawih zawih a, "Nilo...saw saw..." tiin a han en vang vang a. A kawr hak atang chuan Ruatfeli a ni tih a hre thei nghal, "Ruat..Ruatfeli a nih saw, ka pu...Ruatfeli, ka thiannu.." tiin a tap nghal zawih zawih mai.

Putar chu a ngawi vang vang a, "Min thlen khalh, min thlen khalh a ni." a han ti zawi sap a. Chutah Joseph-a chu thinrim tak hian a rawn hawi chhuak a, "ZAwnga mai mai chu, ka chhuah dawn hauh lo." tih pah chuan inchhung lam panin a  tlan phei ta thut mai a, Putar pawh chuan a dang hman tawh lo.

"Mama..Tlangval...kal suh." a ti hman tawk a, mahse Joseph-a chu ava tlan lut ta tho va. Kawngka a hawng chiah chu a ding nghal chat mai, Zonuni ruang chu a hmu leh ta. Thisen nen a inchiah piah nuai lehnghal a, a rap takzet. A chhip atang chuan thisen chu chhe te a la rawn luang chhuak a, "Zo..Zonun..Zonun." tiin Joseph-a chuan a sawi vak vak a.

Putara pawh chu a rawn thleng ve a, a lu a dawm vawng vawng mai. Joseph-a chu a au chiam chiam a, "Zawnga, i va han chak dawn lo tak em." tiin a inhrosa nasa mai a. Mipa room leh hmeichhe room te chu a check kual leh a, mahse tumah a hmu lo. Tukverh lo keh lam chu ava pan lehnghal a, a han dak chhuak a.

Mahse Isaka kha hmuh tur a lo awm tawh miah lo, "Estheri..Estheri leh Isaka leh Petera...an pathumin an awm ve lo. Khawiah emaw an awm a ni ngei ang, an biru aniang." a han ti leh chiam chiam a, Petera chu an zinga thi hmasa ber a ni tih Joseph-a chuan a hre hauh si lo.

Putara chu a rawn kal phei a, "Tlangval, engpawh chu nise kan in lamah kan phei a ngai." a rawn ti a. Mahse Joseph-a chuan a lu lo thingin, "Nilo..ka thian dangte pathum ka hmuh hma chu khawiah mah ka kal dawn lo." a ti tlat mai. Putara chuan zaidam tak hian, "Kan zawng dawn alawm, kan in lamah phei phawt ang. I hliam kha kan buaipui dawnnia, kan zawng em em ang i thiante chu.." a han ti dam diai a.

Chutah vin zet hian Joseph-a chuan, "Ka tha, ka na lo. Ka dam tha...engmah na ka nei lo. Ka thian dangte hi an la dam dawn tih ka chiang, chuvang chuan ka zawng dawn." a han ti leh khur khur a. Putara pawh chu a ngaihdan a ni ta vak bik lo, "I thiante i ngaihtuah, ka hria...mahse keipawn ka fanu ka ngaihtuah ve tho. KA chhuahsan tawp a, tunah inchhungah a awm mek. Ka kalh hnan ringawt, kha ramhuai khan a lo va luhchilh angem ka hre bik hleinem." a ti vin ve ta thak mai a.

Joseph-a pawh chu a inbeng dai thei hram a, "A tha e, anih chuan kan kal ang. MAhse ka pu, ka thiante chu khawngaihin min zawn pui rawh." tiin a ngen a. Putar chuan a lu lo bu nghauhvin, "Kan zawng ang, lungngai suh...kan zawng em em ang." tiin a chhang a, tichuan Putara te in lam pan chuan an phei ta a.

*************************

Esi chu khawi lam ber nge a pan pawh hre map lo chuan a tlan char char a, a tap char char bawk. Chutah a la inchhuih zui a, a bawk thlawp mai. A han meng chu a bul lawkah chuan Petera ruang, a taksa chanve zawk chu a hmu thut mai a. A au ring nasa mai, "Nilo..Peter, ka duh thei lo." tiin a tho nghal vat a.

A tlan leh nghal char char a, thui ve a tlan hnu chuan tu emaw nen hian an insu pawp a, an thal dun tawp mai. A sut chu a han en a, vanneihthlak takin Isaka a lo ni. Isaka chu thovin, "Ding rawh...Esi, i tha em?" tiin a zawt a. Esi chu tap nghalin ISaka chu a kuah thlawp a, "Isak...ka hlau lutuk, ka hlau lutuk." a ti hluam hluam mai a.

Isaka chuan lo kuah letin, "Esi, khawnge Ruatfeli...khawnge Ruatfeli a awm?" tiin a zawt nghal a. Esi chuan tap chung chuan, "Ka chhan hman ta lo, ka chhan hman lo. Kha...kha pa khan a man a, ka ngam hlawl lo a ni. Ka tlan chhe tawp, a that ngei ngei ang." a han ti leh hlawp hlawp a.

Isaka chuan a lu a dawm vawng vawng mai, "Keipawh in hnung lam atang khan ka tlanchhe ve nghal daih a, ka nakah hian min vit a." tih pahin a hliam chu a hmuh a. Esi chuan a han en sak a, "AWii..enge maw kan chungah hian thleng ta mai le? Engtin nge kan tih ang, engtin nge kan haw tak ang?" tiin a mangang takzet.

Isaka chuan a biangah chuan a vuan a, "Esi, min ngaithla teh. Engpawh nise kan let leh angai, Petera pawh kan la hmu lova, Sepa pawh kan la hmu lo. An la dam maithei asin, motor lam kha kan va pan leh angai." a han ti chu Esi chuan a lu a thing a. A sawi hleithei lo, "Pe...Petera, Petera a thi, a ruang ka hmu...a rapthlak lutuk, a chan sawm vek ni maiin ka hria." a han ti leh chu Isaka a meng phawk nasa mai.

"Petera a thi maw? Khawnge, khawnge a ruang chu a awm?"

"SAwtah..sawlai lawkah sawn a awm."

"Hawh..va kal teh ang."

"Nilo Isak, ka duh tawh lo. Ka kal duh tawh lo, ka ngam tawh ngang lo a ni."

Isaka chu a ngawi vang vang a, "Anih chuan kha putar kha..an in lamah kan kal mai angai ang. Anni khan min pui thei maithei asin." a han ti a. "An in i hria a mi?" tiin inhnit feih feih pah chuan Esi chuan a lo zawt a. "Ka hre lo, kan awmna lai hi ka hre bik lo. MAhse kan zawng dawnnia, hawh..kal phawt ang." tiin Isaka chuan a chhang a, an kal ta a.

********************************

Putara leh Joseph-a pawh Putara te in chu an thleng a, vanneihthlak takin RSa chuan Madiki chu a lo luhchilh ve lo a ni ngei ang. A lo la inkalh tha thlap mai, inchhungah chuan an lut a. "Va thu hahdam rawh, damdawi ka rawn la ang." tiin Putara chuan choka lam a va pan a.

MAdiki chu a rawn chhuak a, "Ehe..ka pa, ngati nge..ngati nge thianpa, i va thi nasa ve..enge awmzia?" tiin a rawn hrilhhai kher mai. Damdawi rawn lak pah chuan Putara chuan, "Tu emaw in a rawn tibuai a, thawm ka hriat avangin ka va phei a...sawi tur a tam...nakinah kan sawi dawnnia." tiin Joseph-a bulah chuan a thu a.

MAdiki chuan mak ti tak hian, "Tunge tu emaw chu...enge awmzia ni reng reng?" tiin a han zawt leh a. Putara chu a han ngawi vang vang a, "Ruatsanga...RuatSanga a nih ka ring." a han ti chu Madiki a meng phawk nasa kher mai. "Ruatsanga a?" a ti hu mai a.

Chutah a dinna zawn tukverh chu a rawn keh ta chhuai mai a, bar an lo dah bawk si lo nen. Tukverh lah mihring lenna tawk leka zau a lo ni bawk nen, Rsa bawk chu lo niin. Joseph-a pawh a au nasa kher mai, "KA pa...min chhan rawh." tiin Madiki chu a au nasa mai a.

Rsa chuan tukverh hnuai a darthlalang keh, zumah chuan Madiki bek chu a nem tlum thawih mai a, a bek lehlam atang chuan darthlalang hmawr zum pawh a rawn lawr tut mai. MAdiki chu a thi nghal, "ZAwnga leh...i va chak dawn lo." tih pah chuan Putar chuan a silai chu a chuh nghal a, mahse a mu a lo thun lo chu niin.

Joseph-a lah a chiai nasa mai a, chet han lak dan mai pawh a hre lo. Putar chuan a silai ah chuan mu a han thun leh te te a, a che muang ropui bawk si. Joseph-a tih ngaihna hre lo chu choka lamah a tlan phei a, hmanrua ava zawng nghal. Chemte chu a la a, ava pan phei leh nghal a.

Putar chuan a mu chu a thun hman ta lo, RSa chuan a dulah a rawn vit nghal siah siah mai. Putar chu a tlu bawk thlawp a, Rsa chuan a thutchilh ran mai a. Dam baksak lo chuan Putar hnungzangah chuan a vit ta siah siah mai a, thisen chu a chik hian a chik zawr zawr mai.

Joseph-a rap lutuk chu chet ngaihna pawh a hre lo, Rsa lah chuan a vit mawlh mawlh mai a. Putar na ti chu a au ring ngang mai, vawi 10 vel a vih hnuah chuan a thi a. Mahse Rsa chuan ala vih chhunzawm char char a, a duhtawk mai lo reng reng. Putara hnung zang ruh pawh a lang thei hial tawh, Joseph-a tih ngaihna hre lo leh hlau lutuk chu pawnah chuan a tlan chhuak ta ringawt mai a ni.

*********************************

TO BE CONTINUE