USAGI (ENGLISH : DARK BUNNY) [MIZO SLASHER/HORROR FICTION STORY] Written by : Aaron Malsawmdawngzuala WARNING : 18+ CHAPTER : 4

USAGI

(ENGLISH : DARK BUNNY)

[MIZO SLASHER/HORROR FICTION STORY]

Written by : Aaron Malsawmdawngzuala

WARNING : 18+

CHAPTER : 4

Mipa luhmehna dawr pakhat chhungah hian nula leh tlangval hi an lo inha tha malh malh a, a mipa zawk chu a dawr neitu Ropuia a ni a, kum 30 vela upa a ni.

Hmeichhia chu KS pakhat ve mai a ni a, a hmeltha phian lehnghal. A kawnghren hak that mawlh mawlh pah hian, "Lo va chhuak hmasa rawh aw, eng eng emaw hi ka'n ti fel lawk anga ka rawn chhuak ve nghal ang." Ropuia chuan a han ti a.

Hmeichhia chuan a han melh run a, "Min thlah dawn lo mi, ka thlah ang che i tih kha?" tiin a lo vin deuh hlur mai. Ropuia chu a han thaw halh a, "Aww ka thlah ang che, motor ah min lo va nghak rawh." tiin a han vin let ve deuh hlak a.

Hmeichhia chuan a melh rum ngang mai, "I motor t(r)awn t(r)awn nen, ka hmelhriat ten min hmu ang tih hlauh mah nak alaia." tia phun nuah nuah chung chuan a chhuak tau a, kawngka chu ala khar bur lehnghal.

Ropuia chuan a ngei kher mai, "A ve khanglang chuan a, KS mai mai lehnghal. Ka money vak loh lai ania a tlawm ber pawl ka dawr ve hram hram che a....khatia mi tih ve khanglang le.." tiin a phun ve nuah nuah bawk a.

An sulhnu te chu a han tifai thuak thuak a, "Ka dawr hi chu aw....zimte mah nise ka va han hmang tangkai thiam tak." tiin amah leh a mah chu a inbe mawlh mawlh a, a han nui leh vur vur thin a.

Chutia a tih fel lai tak chuan kawngka a rawn ri rak rak a, tu emaw hi a rawn pen lut a. Ropuia chuan kha KS bawk kha a nih ringin en miah lo hian, "Motor ah min lo va nghak rawh ka tih kha, tinge i rawn luh leh a..." tih pah chuan ava en a.

Mahse kha hmeichhia awzawng kha a lo ni lo, palian tak, rawmawl var bal leh ung zet, thisen kai nuai a hmai tuam, lu buk zet mai hi a lo ni a. Ropuia chuan mak a ti kher mai, "Tunge i nih? Dawr kan khar tawh....chhuak rawh." a han ti vin deuh hlur a.

Mahse chupa chu a ngawi reng, tudang nilovin chu palian tak mai chu Rsa kha a ni. Security guard ho a thahna a thisen te kha a kawrah chuan a la kai hnuang mai a, a kawr hak lah chu damdawiin damlote hak thin, a var fual kha a la ni reng bawk.

Ropuia ngaih chu a tha hauh lo, "Enteh thianpa, min tihthaih i tum a nih chuan i ti fuh lo khawp ang. Chuan ka dawr atang hian chhuak nghal rawh, lu meh i lo duh tak2 a nih pawhin tun ang zan rei tawhah chuan ka met thei tawh lo...a chiang em?" a han ti deuh fak fak a.

Mahse Rsa chuan a melh run ringawt a, a thlek leh deuh hu thin bawk. Ropuia thinrim chu a han thaw leh deuh hak a, "A tha e, tharum thawh kher angai animaw...." tih pah chuan bakcheh chu a la a, Rsa chu tinin a va pan phei a.

Thinrim tak hian, "Enteh, buaina ka duh lo ania. Tunah hian i chhuak vat lo anih chuan kut ka thlal hreh dawn hauh lo che ania, hei hi ka last warning ni rawh se." a han ti vin leh khur khur a.

Mahse Rsa chu a la che sawn duh eih chuang lo, "Ngaithla rawh Hmela, khati kha chuan min tihthaih tum miah suh aw...ka hlau chhe te eih lo che ania. Ka insum zawh loh vaih chuan he ka dawrah ngei hian ka vit hlum che anga, i ruang hi tuma hmuh lohvin ka phum bo ang...i hria em?" tiin Ropuia thinrim chu a hmai a sen vek tawh mai.

Chutah Rsa chuan a chemte pai chu a rawn phawrh lang ve ta mai, "Ehe...ehe...tikhan maw kan tih dawn a?" tiin a bakcheh ken chu a hum nghet sauh sauh va. Rsa chu ava kal phei ta, Ropuia pawh chuan a pa len em avang leh a chemte ken hriam hmel tak a hmuh avang chuan a hlau leh deuh tan a.

Tawlh hnung hret hret pah chuan, "Hey...tunge i nih a? Mawhh...engvanga min thah tum ringawt nge i nih?" tiin a au vak vak a. Chutah Rsa chu a va tlan thut a, Ropuia phu nasa lutuk chu a bakcheh ken lai chuan a lo vai ve chiam a.

Rsa darah tak chuan a vit bur a, mahse Rsa pawh chuan a dulah a lo vih sak ve hman tlat mai. Ropuia na ti lutuk chu a dul thler chu a dawm a, thisen a rawn baw chhuak hawk hawk mai. Rsa darah chuan bakcheh chu ala bur vu bawk a, a en vang vang a.

Bakcheh chu a vuan ang ren rawn a, a phawi ta pawp mai. Na a ti deuh nge ni, a rum ve deuh that a. Chhuatah chuan thisen a baw nuai mai a, Ropuia na ti lutuk chu a thu deuh hnawk a. Rsa chu a han melh chho tawk tawk a, ani lah chuan na ti hmel pawh a pu ve hauh lo.

A rawn pan hnai leh a, Ropuia chu din tumin a inbeng kang tawk tawk a. Rsa chuan a bakcheh ken lai chuan a malah a va vit tlum leh thawih mai a, Ropuia na ti lutuk chu a rak nasa mai. Bakcheh chu a bur vu mai a, mahse Rsa chuan a la duh tawk mai lo. Kha hmeichhe KS lah khan Ropuia chu rei a ti tawh ngang mai, a va call ta tawp a.

Dawhkana Ropuia phone chu a rawn ri ta ral ral mai, mittui tla zawih zawih leh na ti tak chung hian Ropuia chu a phone lam panin a bawkvak phei tawk tawk a. A thaw hrawk hrawk tawh, a dul thler lah chu na a ti em em mai bawk si. Rsa chuan chemte hum chungin a rawn pan leh a, Ropuia samah chuan a th(r)am ta mai a.

A kek tho lawp a, darthlalang keh chuai khawp chuan a lu chu a tauh tir a, darthlalang dang awm zawng zawng chu a tauh keh tir vek mai. Ropuia pawh a thal tawp a, a hmaiah chuan darthlalang keh them te chu a bur fur mai a, thisenin a bual huh vek tawh. Mahse Rsa chuan a la duh tawk hauh lo, Ropuia chu a han thut bet leh a. Chutah dik hauh lo hian a awmah chuan a vit ta siah siah mai a, Rsa mangang leh na ti bawk si chu a au t(r)ial ruai ruai ringawt mai.

Vawi 7 vel a vih hnu chuan au tur a awm tawh lo, a thi chiang tawh kher mai. Mahse a thih tawh hnu pawh chuan Rsa chuan a la vit mawlh mawlh mai a, thisen chu dawr chhungah chuan a kawi khat vek tawh. Vawi 15 vel zel a vih hnuah chuan Rsa pawh a tawp ve ta a, a thaw hrawk hrawk mai. Chutah pawn lam atanga motor horn lo ri tuar tuar a hriat chuan a phu ve deuh zuk a, tukverh atang chuan a han bih dek dek a.

**********

Hmeichhia khan motor ah chuan a lo la nghak reng a, engemaw ri bur bur a hriat hnu leh call a lak theih bawk siloh vang chuan a ngaih a tha chiah tawh bik lo. "A rei eee....ka ning, pawisa pawh min la pe bawk si lo." tiin a phun nuah nuah a. Motor horn chu a hmet vak vak ringawt a, mahse Ropuia chu a lo la chhuak thei der bawk si lo. A ning tawh lutuk chu motor atang chuan a chhuak a, "Ka va han ning tak em....vawikhat mah min dawr tawh lovang." tia vin deuh hlur pah chuan dawr lam chu ava pan leh a.

Mahse a luh dawn tep ah chuan kawngka bula thisen farna hnu a hmuh chuan a ding chat mai, "Ropui...Ropui a chhungah khan i awm em? tiin a han au phawt a. Mahse tuman an chhang lo, boruak chu a reh hian a reh diak mai. A chil a lem dawk a, "Ropui....min prank i tum a nih chuan a nuihzatthlak loh khawp mai." a han ti vin leh hlur a.

A lut ngam mai lo, "Ropui, ka uang lo ania. Khawnge i awm, lo chhuak vat teh." a han ti leh vak vak a. Mahse a ngai ang bawkin chhanna ala dawng chuang lo. Hlauthawng tak chung chuan zawi muang hian a lut a, thisen chu a hmu tam tulh tulh mai. A lut thui zel a, bangah te leh tukverh ah te chuan thisen a lo kai pherh nasa hlawm khawp mai. A hlau lutuk chu a thaw hrawk hrawk a, chutah Ropuia ruang lo let reng mai chu ava hmu ta. A dul vun thler atang chuan a ril a lo chhuak pur a, a awm zawn lah a khuar deuh duk bawk a, chemte a vawi tam tak vihna tih hriat reng hian a chik nuk bawk.

Chu nula hlau lutuk chu a au ta vak vak mai a, tlan chhuak leh mai tumin lehlam a han hawi chu Rsa a lo ding run mai. A tawp chat a, a au leh hma hma chuan Rsa chuan a chemte ken lai chuan nula hmaiah chuan a thai pawp a. Chunu pawh chu a bawk khup thlawp mai, A biang chu a thler kak thui em em mai lehnghal a. A na ti lutuk chu a t(r)e vak vak a, "Min pui ru, khawngaihin min pui hram ru." tiin a rak chel chul mai. Thawh a tum a, mahse chhuata thisen kawi nal avang chuan a tawlh thlu leh thin a, a mangang takzet.

Rsa chuan a sir thutthlenga hollow guitar chu a chuh lawk a, na tuara pawn lam pana lo bawkvak phei mek, chu nula hnungzangah chuan a vaw ta siah mai a, nula pawh chu a bawk leh thlawp a, a hnang awl awl mai. A thaw tha hleithei lo, guitar lah chu a darh chuai a, a bung phel rem rum mai. Chutah guitar string chu la in chu nula hrawkah chuan a vet ang nawk nawk a, a rek ta vak mai a. Nula chu a hmai a sen nghal vek a, a bekah te chuan thisen zam a lang nghal tuar tuar mai. Rsa lah chuan theih pa tawp chuan a rek a, guitar string sin leh hriam bawk si chu nula hrawk a ti pilh tan ta a. A ngawng vun pawh a thler tan, a mit pawh a var hian a var pup tawh mai.

Rsa lah chuan a rek nghet zual sauh sauh va, chutah le...guitar string chu nula hrawk chhunga chuan a lut tlang ta zawk a, a lu a bung titih hial ta mai a nih chu. Thisen a baw zawih zawih a, chawp leh chilhin a thi nghal. Rsa chu muang chang hian a tho chhuak a, thisen hlirin amah pawh chu a khat vek. Towel fai ho chu la in a inhru fai ve ang thuak thuak a, tichuan darthlalangah chuan a in en vang vang a. Lu mehna machine chu la in a han en vang vang a, plug ah chuan a thun lut a, a on ve mai bawk a.

Tichuan darthlalang keh nuai mai a in en chung chuan a lu buk chhup mai te chu a nawr kawng ta vek a, a rawmawl pawh chu rawmawl faiin a thlak a, banga raincoat fual hnek hnawk chu a kekawr nen chawp chuan a ha a, a lukhum chu khumin a chemte chu a la leh bawk a, Ropuia leh nula ruang chu a chhuahsan ta a ni.

*****

Hospital kawtah chuan police motor a tam hle mai, Hospital Dean pawh a awm ve bawk a, an ri deuh nuai nuai hlawm mai a. Police thenkhat chuan Nelsona te ruang chu an han hmu a, an bulah chuan Rempuii, Heleni leh Siama te an awm ve bawk. Rempuii leh Heleni te chuan ruang chu rapthlak an tih em avang chuan an en tha hleithei lova, chutiang bawkin Siama pawh chuan a rap ve hle mai. 

Police inspector pakhat, Fakawma leh Dean chu an inbe mek a. "Gate duty pahnih a that bawk a, guard pahnih pawn lama duty te a that bawk. Chuan in staff pakhat a that bawk a, chutiang khawpa mi hlauhawm leh thah hreh nei lo chu he Hospital ah hian doctor bik pawh nei lovin i kawl reng amaw? Ka pu, mitthi chhungte hian nangmah hi an puh thei che asin." tiin Inspector Faka chuan Dean chu a hau deuh hrep mai.

Dean chu a han thaw hak a, "Chuvang alawm he Hospital hi kan din reng ni, Rsa te ang hian tanpui an mamawh a, chuvang chuan alawm hetah kan kawl." tiin a lo chhanglet a. Za lo tih hriat tak hian Pu Faka chu a khi suk a, "Anih leh thil thleng hi han en teh, heta awm mamawh tak leh puih ngai i tih hian i hnuaia hnathawk te chu dim hauh lovin a that anih hi...mihring thil tih atan pawh a rapthlak em em alawm mawle." a han ti leh hlur a.

"Enteh Inspector, a rilru a buai vanga ti a ni reng alawm. Rsa hi kan hmuh ngei angai, enkawl nasat a ngai tih pawh kei tluka hrechiang an awm lovang."

"Enkawl a? Heta dah leh maw.....tupawhin an hlau tawh ang chu. Natna nei satliah chu nise heti em em a rawng hian a che lovang, mahse heng tiang te hi chu mihring chetduh dan pawh a ni lo, ramhuai chetna a ni ringawt alawm."

"Medical condition nei sa a ni a, chu chu i hriatthiam phak pawh a ni ve lovang. Rsa hian damlohna nasa tak a nei a, a rilru a buai bawk a ni. Enkawl nasat a ngai a, nung damin in hmu ngei tur a ni."

"Chuti maw...nia, kan hmu ngei ang. Mahse hetah chuan a rawn let leh tawh lovang, mitthi chhungte ngaihdan tur dawn ta che. Jail ah a tang anga, a phutawk hremna pawh a hmu ngei bawk ang."

Rum tak hian Dean chuan Pu Faka chu a melh a, "A chhungte a? Mitthi chhungte a? Ka staff te, nurse te leh cook te thleng hian ka chhungte vek anga ka en an ni asin. Tunah hian ka chhungte laka tual thihna a thleng mek a, ka rilru a na lo bikin i ring em ni?" tiin a vin let hrep mai.

Pu Faka chu za lo tih hriat tak hian a khi suk a, "Animaw? Anih te chuan han inngaihtuah chiang teh, he tualthattu Rsa laka i chhungte dang an him zel i duh anih chuan helai hmunah hian Rsa hi a rawn let tawh lovang, tunah chuan midang zawng zawng pawh ralmuang lovin a awm tir vek tawh ang chu. Enteh ka pu, mi nunna tana hlauhawm khawpa an che anih chuan eng anga medical condition eke bal e pawh ti mah ula, kah theihna dan kan nei ania aw..." a han ti ve leh khur khur a.

"In nei lo ka ti lo, ni e...in kap thei mawlh mai. Mahse ani chu damlo a ni a, ka patient a nia, nang aiin ka hrechiang zawk. Anti Social Disorder nei a ni a, a bul hnaiah mihrang an awm ve a duh lova, mahni a awm duh mi a ni.." Dean-i'n a tih lai chuan vin zet hian Pu Faka chuan, "Anih leh chutiang natna nei chuan rapthlak tak takin tual an that thin tihna em ni? Rsa ang hian....pawisawilo leh a natna vang tiin i la tan char char dawn em ni? Nihleh chutiang natna lo nei pawh chu nise, kum 15 chuang a awm tawh a, in va enkawl tha awm lo ve?" a lo ti leh hrep mai.

Dean chuan thinrim tak hian, "Inspector, i tawngkam kha fimkhur deuh rawh aw...ka patient te hi ka hrechiang a, kum 30 chuang ka enkawl tawh he damdawiin hi. Khatiang lam ah kha chuan kei aiin inti fing vak lo mai rawh, nang aiin ka hre hnem zawk." a han ti ve leh khur a.

Pu Faka pawh a lo lungawi bik lo, "Ka tawngkam ka fimkhur ang maw...keichu police ka nih angin ka hna ka thawk thin. Mitthi chhungten FIR an thehlut a, nanga patient pawh lo ni eng ang mahse a phutawk hremna chu a hmu tho tho tur a ni. Ka pu, nang hian khawngaihna i ngah viau tih ka hria, mahse thil thleng thei dang hi i ngaihtuah thleng phak lo a ni." a han ti ve leh a.

"Enge ka hriat loh chu ni a?"

"Rsa hi hmu in lo man pawh ni ila, heta i dah let leh chuan mi zawng zawng an ralmuang tawh lovang. Security guard tur pawh i hmu zo tawh nang, tumah an tang ngam tawh lovang."

Dean chu a khi suk a , "Tumah ka hnuaia hna thawk ngam an awm tawh lovang maw...awm e, an tam lutuk. Nang anga police ni ve si, dawihzep ang ni lo hi mi tam tak, huaisen tak tak an tam alawm." a han ti deuh kher a. Pu Faka pawh a sa zak mai, "A ni maw...nihleh thil pakhat min han hrilh teh. Ka staff te leh ka hnathawk te hi ka hrechiang i ti tiraw? Anih chuan Nelsona leh Guard pakhat hi zanrei ah, mut hun tawh ah, CCTV camera kuai sawn meuhvin enge RSa te ang mi hlauhawm, a ward pawh fal deuh va dah ngai, a kawngka pawh thira siam ngai...enge an han tih Rsa ward ah khan?" a ti ve leh ta siah siah mai.

"Chu chu ka hre bik hauh lo, mahse Rsa hi misual a ni lo. A natna avangin a duh loh pui pui a ti thin a, chu chu ka sawifiah thiam dan ber a ni."

"Misual a ni lo maw....i guard zinga hmeichhe pakhat ruang phei saw chu enteh, a lu a bung hial asin. Tiang khawpa nunrawng chu a ni a, pawisawilo tiin ila tan dawn amaw? Chuan nihleh i staff te kha...nurse Rempuii chuan min pawngsual an tum a tih si.."

Dean-i'n a chhan hma chuan constable pakhat a rawn lut a, "Sir, km 2 a hla ah ruang pahnih chhar a ni. Luhmehna dawr a ni a, ROPUIA HAIR CUTTING SALOON a nia a hming chu. Mipa leh hmeichhe ruang a ni a, thah an ni ngei bawk niin a lang, report kan dawng zo chiah." a rawn ti a.

Pu Faka chuan a lu a han bu nghauh nghauh va, "I lo hria em? Rsa nilovin midang tih a nih theih te i ring em?" tiin Dean en chung chuan a han zawt deuh kher a. Dean pawh chu a rilru a hah takzet, "Engthil nge maw thleng ta hi le?" tiin a thaw deuh hak ringawt.

***************************

Khua a var tep tawh a, ni zung pawh a rawn lang tan tawh. Rsa chu raincoat suit dum leh a hmui rawmawla ruam reng chung chuan ka kal chhut chhut a, mel lung pakhat a hmuh chuan a ding chat mai. Chu mel lung ah chuan BELENG KHUA km 70 tih hi a lo inziak a, a han thlek vang vang a.

Chutia a en reng lai chuan truck lian tak pakhat hi a rawn tlan a, Rsa zawnah chuan a rawn ding a. Driver chu rawn dak chhuakin, "Hey thianpa, khawiah nge i kal duh a? Khawi lam nge i pan dawn?" a rawn ti lauh lauh mai. Rsa chu muangchang chuan ava hawi phei a, "Kalna tur i nei lo em ni? Khawnge kal i duh a?" tiin driver bawk chuan a han zawt leh a.

Rsa chuan mel lung chu a kawk a, "E...Buleng khua maw? Lo kal rawh..bungrua ka dah dawn a. Lo kal ve nghal daih rawh, a awlsam zawk." Driver bawk chuan a han ti leh a. MAhse RSa chuan a chhang lo, a en vung vung ringawt a. Chutah Driver chu a khi suk a, "Lungngai suh, pawisa engmah ka dil dawn lo che. A remchang em a, ka lo phur ang che ka ti mai ania, i thu thu a ni mai." a han ti leh a.

Rsa pawh chu a va phei a, a chuang ve mai bawk. Driver chuan inla polite tak hian, "Richarda ka nia, nang tunge i hming ve?" tiin chibai a han tum a. Rsa chu lehlam a hawi daih a, a maimitchhing a, a mu ta siai siai mai. Richarda pawh chu a hrilhhai hle mai, "Aaa..ihh, a nih chuan...kal mai ang aw.." a ti bah deuh nuai a, an tlan ta a.

Richarda chuan a biak chhunzawm nghal mawlh mawlh a, mahse Rsa chuan a chhang hauh lo. A va en a, a lo hnar suk suk mai. Richarda pawh a khi suk a, "Khawilam kutdawh nge mawni, mi lah chu a han chhang duh lo khanglang a." tiin a phun nuah nuah a, an tlan zel a.

************************

Rsa chu a harh chhuak zawk mai a, a awmna vel a han en chu ramhnuai pilril tak a lo ni a. Thingkung a tam em em a, thla eng lo chu eng dang pakhat mah a awm lo. A mangang chu a hawi kual ruai a, a bulah chuan lui kawr tereuhte hi a lo awm a. A va pan a, tui chu a in bawrh bawrh mai.

A in zo chu a han thaw deuh halh halh a, a thla chu tuiah a zu hmu a. A meng phawk nasa ngei mai, kum 9 mi a nih laia a hmel chiah chiah kha a lo ni. A taksa te chu a han en a, naupang kum 9 mi chauh a lo ni chu mak a ti kher mai. Chutia rilru buai taka a awm lai chuan a hnung atang chuan, "Ruatsang, ka fapa.." tia rawn ko ri chu a hria a.

Rang takin ava hawi a, a nu..Pi Rinawmi a lo ni reng mai. A vun chu a var dang pup a, mahse a hmel erawh a tha hle thung. Rsa chu a mittui a tla zawih zawih a, "Nu..Anu...i..ila dam maw?" a ti bah nuai mai. Pi Rinawmi chu a han nui sang a, "Lo kal teh, BAwiha..i nu hi min rawn kuah rawh." tiin a ban chu a phar a.

Rsa chuan ava kuah nghal, "Anu...i thi an tia, ka hlauthawng lutuk a. Tinge min kal san daih a, khawnge i awm daih a..mawh.." tiin a tap zawih zawih mai. Anu chuan a biangah chuan vuanin chiang tak hian a en a, "Bawiha, phuba min laksak rawh." a ti ta mai a.

Rsa chuan a hrethiam lo kher mai, "Eng..eng phuba maw?" a ti hu mai a. Anu chu rum tak hian a meng sen rum mai a, "Min that a ni....Buleng khaw mipui ho sawn min that a ni. Min hmusit a, min sawisel a. Min diriam a, chu chu i nu hian ka tuar thei lo. Ka phuba chu min laksak rawh, Ruatsang....i nu phuba chu i la dawn em?" a ti ta khur khur mai a.

Rsa pawh chuan a hlau ta, a tawlh hnung nghal a. Khur zawih zawih hian, "Nu...eng..enge i sawi awmzia?" a han ti bah leh deuh nuai a. Pi Rinawmi chu a ding hluai a, a mitmeng te chu a rawn dum ta nghulh mai. A vun te chu a rawn chuar vak a, a mit atang chuan tuiril dum vek, hnang tak mai hi a rawn luang chhuak nguai nguai a.

Rsa chu a melh ta run mai, "I thiannu Remremi te nu leh pa saw that rawh, Buleng khaw mipui ho zawng zawng saw that rawh. Anmahni vanga thi ka nih hi...ka fapa i nih chuan that chimit vek ang che." tiin a au tak vak vak mai a, a ka atang chuan thisen a rawn baw chhuak hawk hawk bawk.

**************************************

A mumang ram atang chuan Rsa chu a rawn harh chhuak hlawl mai, a meng kawk a. A thu chhuak nghal a, truck chhungah chuan a lo la awm reng mai. Truck driver chu a lo nui huk a, "I rawn harh ta maw...hei khua pawh a var vek tawh ania." a lo ti a. Rsa chu ala hamhaih hrih tlat, a han hawi kual hru a.

"Good Morning Thianpa, min la be ve miah lova, tunge i hming?" Richarda chuan a lo ti leh a. Mahse Rsa chuan melh dang a nei, chu chu an hma zawna in pakhat, kum 1996-a a chenna in ngei kha a ni. Muang chang chuan a ban a phar chhuak a, an in chu a kawk a.

Richard-a pawh chu a ding a, a kawhna zawn chu a han en a. A nui khi deuh suk a, "Thianpa, he in hi chu kum tam tak a ruak tawh. Enge tih tur i neih a? Hetah hian maw kal i tum?" tiin a han zawt a. Mahse RSa chuan a chhang lo, rang tak chuan motor atang chuan a chhuak ta daih mai.

Richarda chu a hrilhhai takzet, "Khawnge i kal dawn?" tiin a au zui a. Mahse RSa chuan a ngaithla tawh lo, an in hlui lam chu a pan zel a. Richarda lah a hmanhmawh tawh bawk si, "Hey..thiana, ka hman rei lo ania aw...kha kha i kalna tur diktak a nih chuan ka kalsan nghal mai dawn che ania." tiin a han au zui leh lawm lawm a.

Mahse RSa chuan a ngaipawimawh tawh lo, inchhungah chuan a luhsan ta daih mai. Richarda ngaihdan chu a ni lo nasa mai a, "Ava buaithlak e aw....khawilam mi ang lo nge maw ka lo phur le...ka inla tlawmngai ve em em a." tiin a phun nuah nuah a. Minute 10 dawn a nghah hnu pawh chuan a lo la chhuak mai silo, "Ninawm..zing dar 10 a ri mai dawn, ka ril a tam, ka kal mai ang e." tiin a tlansan ta daih a.

**************************************

RSa chuan inchhung vel chu a han thlir kual a, a naupan lai a hre chhuak zawk zawk mai. MAhse a lo bal in a lo chul rup tawh a, chhuat te pawh a then chu a lo awng huau tawh hlawm mai. Current pawh engmah a infit loh avang chuan khaw en lai mah nise a thim ruih mai a, thil hmuar rim a nam nasa hle bawk.

Choka lamah chuan a phei a, engkim mai chu maimawm ril hian a lo zam nuai mai a. A mitthla chuan a nu dam lai a, an chaw ei lai te, an infiam laite chu a lang zawk zawk mai. A mittui a tla hial a, chaw ei dawhkan te pawh chu ala awm vek bawk. Thleng sila te pawh chu hun rei tak hman tawh loh tih hriat tak hian a lo khi thuah hlawm a, rannung an vak nuah nuah hlawm bawk.

A en kual zel a, chutah bedroom lam ava pan a. KAwngka pawh a lo tla bal tep tawh a, khum erawh a lo la awm. Mahse mattress, bed sheet leh luhkham vel engmah a awm tawh lo. Maimawm ril chuan a lo zam nuai tawh bawk a, Rsa chu ava lut a. A han en kual vang vang a, anu hmel chu a suangtuahnaah a hmu leh zawk zawk thin bawk.

*******************

Ropuia leh KS ruang chu Inspector Faka te chuan an lo en fel mek a, "Phuba lakna ti dawn ila, a tualthattu hi Rsa a nih hmel bawk sia. Mahse hetiang em em a han sawisak hi zawng, a rapthlak lutuk mah mah deuh chu a ni." Pu Faka chuan a han ti nuah nuah a, a han en kual zel a.

Chutih lai tak chuan constable pakhat chu bathroom atang chuan a rawn chhuak a, "Sir, hei thawmhnaw ka hmu...thisen a kai hnuang lehnghal." tiin thawhmnaw pakhat chu a rawn khai lang a. Pu Faka chuan ava ban nghal a, a han en vang vang hnu chuan eng form nge a nih tih a hrethiam nghal.

An chhuahsan tak chiah, Mental Hospital a an patient te hak thin uniform nen a in ang chiah chiah. A han enkual zel a, a awm zawna LALRUATSANGA tih inziak a hmuh chuan a khi sak mai. Constable chu a en a, "Ka rin ang chiah, Rsa a ni." a han ti zawi deuh sap a.

Constable pawh chu a han thaw hak a, "Tunah khawnge a awm ang, khawi lai nge a thlen tawh ang?" a han ti nuah nuah a. Pu Faka chu a han ngawi vang vang a, "Ngawi lawk teh u...helai kawng hi.." tih pah chuan pawnah a tlan chhuak nghal a. A nau te chuan an zui chhuak ve bawk, "Ngati nge, Sir...enge awmzia?" tiin an han zawt a.

A hma zawna kawngpui chu Pu Faka chuan a han melh vang vang a, "Helai hian Buleng khua a pawh em?" tiin midang ho chu a han zawt a. Constable pakhat chuan, "Aw..Buleng khaw kalkawng a lawm." tiin a lo chhang nghal vat. Pu Faka chu a nui sak a, "An khaw lam a pan mek a ni, Buleng khua.." a ti zawi sap a.

**********************

Chhun dar 12 a ri a, motor ri chuan Rsa muhil lai chu a ti harh zawk mai. "Zing kar hma taka chhuah kha a fuh zawk ka tih mawlh mawlh kha, hei kan thleng vat mai alawm." tia Petera tawng bul bul ri chu a hria a. Rsa chuan fimkhur tak hian bang awng chu a han bih a, Estheri te thian ho bungrua lo la thla mek chu ava hmu ta.

A en reng a, "AWii....ka rin ai daihin a nawm loh hmel, a hran duh hmel ka ti." Ruatfeli chuan a lo ti nuah nuah a. "Aaa..ngawi mai mai teh. In fal deuh hlek kan zawng a, kan hmu reng bawk a. A fal deuh avnaga hrang amaw i tih zel te chuan, khawi lai pawh nise hrang turah i ngai vek ang." ISaka chuan a lo ti deuh hlur mai.

"Khai le, current a infit awm silova. Hmeichhe ho khan inchhung lo tifai ula, in hnai ber te current pawh kan han dila nge." Joseph-a chuan a han ti ve leh a. Current a infit lo tih an hriat lawk avangin current fit theihna turin bulb te, wire te an keng lawk vek a ni.

Thenawm hnaite current va pawh mai an tum a, a man pawh an chawi mai tur thu pawh an sawi lawk vek bawk. Joseph-a leh Isaka chu thenawm hnai ber te in zawng tur chuan an kal nghal a, a dang zawngin inchhung lam chu an pan thung. KAwngka bul chu an thleng a, "Nang Esther, a hmun hma min kawhhmuhtu ber i ni bawk a, han hawng hmasa ber ta che." ZOnuni chuan a han ti a.

Estheri chu a khi suk a, "Tehreng e...ka han khuh hawng ange." a han ti uang ve bawk a. Kawngka chu a han hawng a, a ri tuah tuah mai. A chhung chu a lo ruak vek a, tumah hmuh tur an awm lo. Petera chu a han khi dweuh vur vur a, "Ummm...kan thleng hma bawk a, tifai tur hna a tam deuh bawk nen, khuanu remruat a ni ngei ang." tiin a han nui huah huah a.

Tichuan tihfai hna chu an tan ta a, an buai nak nak hlawm khawp mai. An ruahman sa ang thlapin parda te, bedsheet te, hmunphiah te leh chhuatnawhna thleng chuan an intuituah lawk nasa bawk a, an che rang hlawm kher mai. Tukverh ah te pawh chuan darthlalang thar an vuah tha a, Esi phei chuan phur thak a kai nghal der mai.

A inhiah mawlh mawlh lai chuan tukverh chu a han bih a, inkawt lawka mipakhat lo ding, a hmuia rawmawl tuam tlat chu ava hmu ta. A en vang vang a, chupa lah chuan che miah lo hian uluk tak hian a lo melh run mai. Ngaihthat lohna em em chu nei lo mahse a awma ti nuam tlat lo, "Esi...enge i en vung vung a?" Ruatfeli'n a rawn tih chuan a phu deuh zuk mai.

Ruatfeli chu a en hu a, "AAa...eng nilove.." ti bah nuai chung chuan tukverh lam chu ava hawi leh a, mahse kha pa, lo melh reng tupa kha a lo bo daih tawh. Esi chuan mak a ti em em a, "Enge ni ta? Hmuh i nei em ni?" tiin Ruatfeli bawk chuan a han zawt leh a. Esi chu a khi suk a , "Aih nei love, ka lo oinngaihtuah muk deuh va, chuvang mai mai chu mawle." tiin a chhang ta ringawt a.  

*****************************

TO BE CONTINUE