USAGI (ENGLISH : DARK BUNNY) [MIZO SLASHER/HORROR FICTION STORY] Written by : Aaron Malsawmdawngzuala WARNING : 18+ CHAPTER : 5

 USAGI

(ENGLISH : DARK BUNNY)

[MIZO SLASHER/HORROR FICTION STORY]

Written by : Aaron Malsawmdawngzuala

WARNING : 18+

CHAPTER : 5

*************************************

Josepha leh Isaka te chuan current han pawh mai na tur thenawm hnainchu an zawng a, mahse an awmna tur inruak bul hnaiah chuan eng in mah a lo awm lo. Isaka chu a han ding dat a, "Va buaithlak dawn ve....current tel lo chuan a thim awm sia, bati engmah kan lei lawk bawk si lo." a han ti nuah nuah a. 

"Kal thui leh deuh ila, saw lai velah sawn an lo awm mial mahna." Josepha chuan a lo ti a. Isaka chu a han chek deuh hlur a, "Hetiang te chuan....engtin nge current kan pawh zawm theih ang? Sawlai velah sawn in lo awm pawh ni ta se, kan wire ken pawhin a daih nang." tiin Isaka chu a han vin leh hlur a. Josepha pawh chu khi sukin, "Nia, ni tho mai." a han ti zawi sup a. 

An ngawi dun vang vang a, chutia an inngaihtuah lai tak chuan mipa pakhat aw hian hnung lam atang chuan, "Tute nge in nih?" a rawn ti thut mai. An phu nasa lutuk chu an tawlh hnung dun dawrh a, "Ekhai...min ti phu alawm." tiin Isaka chu a thaw hrawk hrawk a, a ipte atang chuan a inhaler chu a phawrh chhuak a, a hip hrawk hrawk mai.

"I tha maw, bro?" Josepha chuan a lo ti vat a. Chupa chu an han en a, putar kum 60-70 vel daih a upa tawh a ni hial ang. Khabe hmul buk chhup mai hi a ni a, a hmel lah chu a serious em em lehnghal. Isaka pawh chu a ziaawm leh vat a, "Ka tha e..ka tha e." tiin a thaw deuh huai a. 

Chu putar chuan Isaka te thiandun chu rum fe hian a han melh leh a, "Enge hetah intih ka tih chu...." a han ti vin leh hlur a. Isaka chuan a aw a han thian deuh kharh khar a, "Ihhh ka pu, englo....thian ho intihlim turin kan lo kal a. Saw...sawlai in ruak ah sawn ni 3 ni 4 vel kan riak khawm dawn a. Englo, current han pawh mai tur a awm takin tiin thenawm hnai kan rawn zawng a nih hi." polite tak chuan a han ti a.

Putar chuan a chhang lo, ngawi rengin an pahnih chuan a en duh leh vang vang a. Josepha pawh chu lo tawng ve in, "Nia...anih ka pu, nang enge hetah i tih a? Helai hnaiah hian i cheng em ni?" tiin a han zawt let ve a. Putar chuan ala chhang chuang lo, Isaka leh Joseph-a pawh chuan tih ngaihna an hrelo kher mai, an in en leh hu ringawt zel a. 

Chutah putar chuan a ipte atang chuan sahdah hi a rawn phawrh a, a kuta nuai nawk nawk pah chuan, "Current in fit thiam dawn mi?" a han ti vin leh hlur a. Josepha te thiandun chu an in en a, an nui huk ringawt. "Thiam ve e, kan to thei ve mai ang." uang thuang deuh tak chuan a han ti a. 

Mahse putar erawh chu a nuih a za ve hauh lo, Joseph-a pawh chuan Isaka chu a nghawk zeuh va. Isaka pawh chuan hrethiamin, "Aahhhh...a nih leh ka pu, kan kal phawt mai ange." tiin kal an tum a. Pen thum vel an pen tih ah chuan, "Saw laia inruak saw tu chenna nge in hria em?" a rawn ti chu an ding dun chat mai. 

An leh hawi nghal a, "In ruak a ni lawm ni, tumah an chen loh saw.." tiin Isaka chuan a chhang a. Putar chuan an pahnih chuan a va pan phei a, "Ni reng e, in ruak a ni.  Mahse kum 15 kal ta khan saw inah sawh chhungkaw pakhat an cheng thin a, vanduaina namen lo an tawh avangin a ruak ta a ni." a han ti charh charh a. 

Josepha chu a ngawi vung vung a, "Enge awmzia, ka pu. Eng vanduaina maw an tawh a?" tiin a lo zawt vat a. Putar chuan sahdah chu a han hmuam pawng pawr a, "Kum 1996, March ni 12 khan saw ina cheng, naupang kum 9 mi chuan an thenawma hmeichhe naupang, kum 9 mi ve tho chu a that a. Tichuan HOME ah dah niin thla khat chuang a awm hnuah, anu Pi Rinawmi chu a room ah thi a chhar a ni bawk." tiin a chhang leh a.

Isaka pawh chuan mak tih hmel tak hian, "Naupangin maw? Kum 9 miin tual a that amaw?" a lo ti hu bawk a. Putar chu a khi suk a, "Aw ni e, naupang...kum 9 mi lek." tiin a lo chhang leh a. "Tunge a hming ni reng reng?" tiin Josepha chuan a lo zawt leh vat a. Putar chuan chiang fek fawk hian, "Ruatsanga, LALRUATSANGA." tiin a chhang leh a. 

Isaka chu a lo nui vur vur a, "Pawl 10 kan nih laia kan class a mi hming ang chiah chiah." a lo ti hman pek a. Josepha chuan a nghawk deuh sawk mai, "Anih engvanga that nge a nih?" tiin a zawt leh a. Putar chu a ngawi vang vang a, "Sazupui....sazupui vang a ni." a ti zawi sap ringawt. 

Isaka te thiandun chuan an hrethiam lo kher mai, an in en leh hu ringawt. "Sazupui a? Enge awmzia?" Isaka chuan a lo ti hu mai a. Mahse putar chu lehlam hawi pahin, "Current pawh in duh a nih chuan min rawn zui rawh u, sawlai deuhah sawn kan in a awm." tiin a kal ta daih a. Isaka te thiandun pawh an hrilhhai ngang mai, khi dun suk chung chuan an zui ve mai bawk a. 

Assam type in pakhat, ung zet leh hlui ve tawh tak hi an va hmu ta. Putar chuan chahbi chuan kawngka chu a hawng a, "Hei hi kan in ania, ka fanu nen chauh kan awm a....lo lut ru." tih pah chuan a lut a, Isaka te thiandun pawh chuan an zui lut ve bawk. Inchhung chu a zim viau nangin a felfai thlap reuh va, engkim chu a kim ve biai tho. 

Room atang chuan nu pakhat, kum 30-35 bawr vel, hmelchhe lemlo tak hi a rawn chhuak a. Isaka te thiandun a hmuh chuan a en deuh hu a, "Ehe ..ka pa, hei khawilam tlangval te nge ni?" tiin apa chu a zawt nghal a. Putar chuan thingpui siam tuih tuih pah hian, "Saw lai in ruak ah sawn an intihlim dawn a ni awm e, hei ..current pawh min rawn dil a." tiin a lo chhang a. 

Chu nu hmel chu a dang nghal ruih mai, "Mama te u, hei hi ka fanu neihchhun Madiki a nih hi." Putar bawk chuan a han ti leh a. Isaka chuan lo chibai vatin, "Isaka ka nia, hei hi ka thianpa Josepha a nih hi." polite tak chuan a lo ti vat a, Josepha pawh chuan a chibai ve bawk. 

Madiki chuan ngaihthat loh hmel tak hian, "Engzah nge in nih, hmeichhia in tel em?" tiin a han zawt a. "Aw tel e, mipa pathum leh hmeichhe pathum " tiin Josepha chuan a lo chhang a. Madiki chuan a pa chu a en a, "Current chu i pawh tir dawn mi?" tiin a zawt a. Putar chuan Isaka te chu thingpui pek pah hian, "Heta tang te chuan engtin nge maw an pawh theih ang ni.." tiin a fanu chu a chhang a.

Isaka chu lo inrawlh ve vatin, "Nia ka pu, chu chu keini pawhin kan lo ngaihtuah a. Mahse a theih loh chuan a pawi chuang lo ania, hei...thingpuite min siam a, in fel khawp mai." a han ti vel luam a. Putar chu an bulah chuan muangchang hian a thu a, 'Inhnuaiah khuan generator a awm a, in peih chuan in zawn phei dun dawnnia. Mahse a rit ve reuh ania aw, a khawih dan in thiam loh chuan ka rawn tihsak ang che u." tiin a chhang a, Isaka te thiandun pawh an lawm kher mai. 

Madiki erawh lungawi lem loh hmel tak chuan room ah a lut leh daih a, "Kan va lawm dawn ve ka pu, engzat nge kan pek ang che?" Josepha chuan a lo ti nghal vat a. Mahse putar chuan, "A man a ngai lovang....ti chhe lo ula a nimai." tiin a chhang ta daih mai. Isaka chuan inthlahrung tak hian, "Chutiang ngawt a ni thei lo, engemaw zat tal chu kan pe ang che. Chuan tih dan pawh kan thiam mai ang, cheng 2000 tal hi la rawh." tiin pawisa chu a phawrh a. 

Putar chuan a la ve mai bawk, "Anih ka pu, kan kal phawt ange ....kan lawm khawp mai, thingpui pawh a tui e." tiin Josepha chu a ding deuh hluai a, Isaka pawh chu a rawn ding ve bawk. Putar chuan pawn thleng chu a thlah a, "Inhnuaiah khuan a awm a, puih in ngaih loh chuan tikhan in zawn phei dun mai dawn nia." a han ti a. 

"Awle, kan haw dawn hunah kan rawn dah leh thlap dawnnia." tiin Isaka chuan a chhang a, kal an tum chiah chu putar chuan, "Ding lawk teh u." a ti a, an ding leh a. Chutah putar chu a thaw deuh hak a, "Fimkhur ang che u." a ti zawi sap mai. Hriatthiam loh hmel tak hian Josepha chuan, "Ngati maw, ka pu?" tiin a lo zawt nghal vat a. 

Putar chuan chiang tak hian a en dun ran mai a, "Ruatsanga hi ala dam a, mi a dahna atangin nizanah a tlan chhuak bawk a .....sawlaia in awmna tur in saw, saw bak saw in a nei lo." tiin a chhang ta mai a. Isaka te thiandun chu an in en a, an khi dun suk mai. Nui deuh put put chung hian Josepha chuan, "Anih chuan....i sawi awmzia chu....Ruatsanga chu a rawn let leh i ring tihna em ni?" tiin a han zawt let ve deuh kher a. 

Mahse Putar chuan nui hauh lo hian, "Ka hre lo, mahse a tlanchhuah pah khan security guard leh staff paruk lai a that a ni. Tunah police in an zawng mek a, an la hmu lo bawk." tiin a chhang leh a. Isaka ten an chhan let ve hma hma chuan inchhungah chuan a luh san ta daih mai a, anni pawh chu an in en leh hu ringawt.

******************************

Chhuat awng thenkhat te chu Petera chuan a kilh tha mawlh mawlh a, pawn verandah lam chu hmeichhe ho chuan an lo phiat fai mek bawk. Estheri chuan Isaka leh Josepha generator, rih tih hmel taka an rawn zawn tuih tuih chu a hmu a. In chhung lamah tlan lut nghalin, "Peter..Peter, saw va zawn pui rawh Isaka te saw." tiin Petera hu a au nghal vak vak a.

Petera pawh chu a rawn tlan chhuak a, "Ehe...khawi ami nge a?" tih pah chuan ava zawn pui ve nghal bawk. Kawtah chuan an dah a, "Saw lai deuh ah sawn putar a lo awm a, hei...min rawn supply a nih hi." tiin Isaka chuan a lo chhang a. Joseph-a chu chauh deuh vanga thawk hluam hluam pah chuan, "A mizia kha ka nel loh zawng tak, a hmel a serious si." tiin a han khi deuh suk a.

"Eng a? Engtia nelawm loh maw? Hei a fel em hi....generator pawh a rawn hawh tir ngat che u hi...tunlaiah mi in thil hawh tir mai mai an phal tawh loh laia.." Petera chuan a lo ti bul bul mai. Isaka pawh chu nui sukin, "I hmu ve lo anih kha..tiraw Sepa?" tiin Josepha chu a han nghawk zauh va.

An han infiam leh deuh bawrh bawrh hnu chuan hna chu an thawh chhunzawm leh a, current te pawh chu fit tha in inchhung pawh chu a eng ve thei ta. Hmeichhe ho chuan rawng an bawl nghal mawlh mawlh a, mipa ho chuan zu an phawrh tan nghal der bawk. Hlim tak chuan titi in an nui bawk bawk a, hmeichhiate pawh chuan zu chu an in ve thei phian lehnghal.

*************************

Tlai dar thum a ri a, police ho pawh chuan Buleng khaw tawn tirh chu an rawn thleng ve ta. Mahse Inspector Fakawma ber erawh a tel lo thung a, report dang a rawn luh avang chuan a naute chu a tir phawt a. Ani erawh Aizawl lamah a la awm a, mibo case dang a buaipui a ngai hlauh mai.

SI Muana leh constable pakhat, Opa te chu an kal thung a ni. A khaw tawn tirh an thlen thu chu Fakawma an hrilh a, "A tha e, Pi Rinawmi te in hlui kha va enfiah nghal ula. Mahse fimkhur tak khan aw, a chhungah khan a lo awm sa reng tawh angem pawh a hriat miah loh ania." Pu Fakawma chuan a rawn ti a.

SI Muana lah ngaihsam leh inla pa chi a lo ni bawk nen, "Lungngai suh, Sir...kum kha leh chen mi a dahna inah a awm a. Motor a khalh thiam lo tih chu chiang sa ania, engti kawng mahin ke in km 70 chuang hi a la kal thleng hman teuh lo mai." tiin a lo chhang ham ham a.

Pu Faka pawh a khi suk a, "Engpawh chu nise, thil thleng thei tam tak a awm. Pi Rinawmi te in ah khan tupawh lo awm se, tleirawl ho emaw...tupawh nise, Rsa a a nih loh chuan inthiarfihlim turin in hrilh nghal dawnnia. Chanchin kan inhrilh leh anga, ka phone call lo ngaichang ula, engemaw a thlen hlauh chuan min rawn call nghal dawn nia." a rawn ti leh a. 

"Awle Sir, kan lo buaipui dawnnia." tiin Muana chuan phone chu a dah a. "Kalkawng tluanin an zawng phei a, a hmel hmuh tur awm bawk si lo. Motor a lo phar ding te a nih ngawt loh chuan khawiah hian ala thleng dawn lo hrim hrim, han chet vak dan tur leh hma han lak mai dan tur pawh kei chu ka hrethiam lo." constable Opa chuan a lo ti nuah nuah a.

Muana chu a han thaw deuh hak a, "Niang chu, Sir Fakawma hi chu a inla fing ve sia, a che vut vut zel bawk nen. Zu in lah hi a han khap bur a, a in ve ngai loh avang hian mi hriatthiamna a nei hlawl lo." a lo ti ve bawk a. An tlan zel hnuah chuan RSa te in hlui panna lam, kawng hnuaiah chuan an chhuk ta a.

A reh ta ruih ruih hle mai, ramhnuai deuh reuh a nih tawh avang pawh a ni mahna. "Helai kawng hi a ni tih engtin nge i hriat a, Sir?" tiin Opa chuan Muana chu a zawt a. Intihtheih hmel tak hian, "1996 kum a thil thleng lar lutuk kha ania, keini ang SI ngat ni tawh tan chuan hriat loh tur a awm hleinem....i la naupang a, hre lo mah la a awm ve tho." Muana chuan a han ti deuh duah kher a.

Opa pawh chu a khi suk ringawt, motor seat hnunglam chu ava en a. SArang fim chhunga sazupui hmaikawr ni awm tak, var sar mai leh quality tha ve angreng tak mai lo inpack thlap chu ava hmu a. "Ehe...Sir, saw chu khawia i lei nge...engatan nge i tih a?" tiin a zawt a.

Muana chuan nui vur vur chung hian, "Aaa...ka fanu tan mawle. Kum 15 lai a ni ve tawh a, a buaipui hi ala ho ania. Sazupui hmaikawr ka duh, a ti deuh tlat a. Fate zinga naute ber ni ta na na na chu ka han leisak a nih kha, mahse han nula nghal viau se chu ngaih a tha lo zawk daih maithei a ni." tiin a han nui vel huah huah a. 

An thlen dawn tepah chuan kawng sir atang chuan palian tak pakhat hian kawng a rawn cross thut mai, motor khalhtu ber Muana lah a titi tui lai a lo ni bawk si. Kawng a lo en tawh lo, "Sir...saw.." tiin Opa chu a au tuar a. Muana'n a va en leh chuan an tlai tawh lutuk, chupa chu an su ta.

Lamlianah chuan a thal tawp mai a, a che zui eih lo. Muana chu a mangang hle mai, "Khai aww.....ava han pawi tak." tih pah chuan motor atang chuan a chhuak a, Opa chuan a rawn zui chhuak ve nghal bawk. An sutpa chu an va en chiang a, rain coat dum suit a lo inbel a, a hmai chu rawmawlin a lo tuam bawk.

BAwkkhup zawngin a mu tlat bawk a, "A thi em ni?" tiin Opa chu a thlan a tla nghal buah buah mai. Muana chuan a han en vang vang a, "Op, car hnunglamah khan First Aid box a awm ang, va la teh." a ti a, Opa chuan ava la nghal a. Muana chuan a han kuai zangthal a, "Ehe..Rsa ava ang ve.." a ti ta nuah nuah mai a.

A hmui tuamna phelh sak a tum chiah chu Rsa chu a rawn meng thut a, Muana chu a rawn rek ta thut mai. Muangchang chuan a rawn tho chhuak a, Muana chu a rek kang vak a. A thaw tha hleithei ta der lo mai a, a hmai chu a sen nghal vek bawk. First Aid box nen Opa chu a rawn let leh a, mahse chutia Rsa'n Opa a lo rek kang vu a hmuh chuan a ding chat a.

A box ken lai pawh chu a thlauh nghal a, Rsa chuan ava en ve a. Opa hlau lutuk chuan motor dashboard chhunga Muana pistol chu ava la nghal, "Hey..thlah nghal rawh." tih pah chuan pistol chuan a tin nghal a. Rsa chuan Muana chu a dahthla ve mai bawk, mahse a la kal tir duh bik hauh lo.

Hnunglam atang chuan a hrawkah a ban chuan a rek leh a, "Kap...kap rawh, kap vat ta che." tiin Muana chu a lo mangang hle mai. Opa lah chu a hlauthawng em em a, "Sir, ka..ka kap fuh dawn che asin." a han ti hluam hluam a. Muana lah a mangang tawh, "A lu ah...Mawl..Mawla, a lu ah...k...kap mai ta che." a han ti leh tawk tawk a.

Chutih lai tak chuan Rsa chuan a kut lehlam chuan a chemte pai chu a phawrh a, Muana hnung ah chuan a vit ta siah mai. Muana chu a khur der der a, Rsa lah chuan chemte chu  a la tuai vir zui a. Thisen chu lamlianah chuan a far ta kauh kauh mai, Opa hlau chuan a kap ta ringawt a.

Mahse Muana hlir chu a kap fuh a, Rsa chuan indanna a nei tha lutuk tlat. Mu ruk(6) zo thak khawp chuan Opa chuan a kap a, mahse Muana taksa ah hlir chuan a kap tlum thawih thawi mai. Muana pawh a thi chiang ngang mai, Opa chuan kah leh a han tum a, mahse a mu a lo awm tawh si lo.

RSa chuan ava pan ta mai a, rang lutukin motor chhungah chuan Opa chu a lut nghal. Motor chu start vat a tum a, mahse a la nung thei lawk lo zui. Rsa lah a rawn hnai zel bawk si, "Nilo...ni lo, nung vat teh." tiin Opa chu a tap pur tawh mai. Chutah hma lam a va en leh a, RSa chu a lo awm tawh miah lo.

A hawi kual chiam a, motor atang lah chuan a chhuak mai ngam der bik tawh si lo. Motor chu start leh a han tum a, chutah a rawn nung ta hlauh mai. Mahse a tlan hman lo, driver seat tukverh chu a rawn keh chuai mai a. Opa phu nasa lutuk chu a au ring ngei mai, Rsa chuan chemte chuan Opa ka(mouth) chhungah chuan a vit tlum ta thawih mai a.

A seat thleng chuan chemte chuan a vit tlang vek a, Opa chu a khur chur chur a. Rsa chuan chemte chu a han phawi leh pawp a, Opa ka atang chuan thisen a rawn baw chhuak hawk hawk mai. A thi chiang nghal khawp mai, muangchang chuan motor chahbi chu a phawi a.

Tichuan seat hnung lam chu ava hawng a, sazupui hmaikawr a hmu chu a en ta vang vang mai. A la nghal vat a, sarang atang chuan a phawrh chhuak a. A kuta thisen a kai nasat em avang chuan chu sazupui hmaikawrah pawh chuan thisen chu a kai nual a, hmaikawr chu a han vuah ta a.

Motor side glass ah chuan a han in en vang vang bawk a, tichuan SI Muana ruang chu ava pan leh a. A pu lawp a, motor chhungah chuan a dah ve leh a. Chutah le, motor chu a nam ta vak vak mai a. A in sawi nasa ngang mai, a theih patawp chuan a chawi kang a, lehlam khamah chuan a nam lum ta daih mai.

************************************

Zan a lo ni a, Estheri te thian ho pawh chuan chaw an eikham tawh a. Chhuatah chuan thu bialin zu an in chhunzawm leh a, an titi nasa khawp mai. An hlim tlang bawk aniang, an nui leh dar dar zel a. Chutia an titi tui lai chuan, "E taka, ISak...vawiina putar sawi kha, i la hria em?" Josepha chuan a rawn ti chhuak hlawl mai.

Isaka lah chu a lo kai tawh nen, "Engmaw? Tu putar maw?" a lo ti hu a, an han nui leh dar dar hlawm a. "Uang lo teh, a thil sawi kha min tihthaih mai mai nge, a thutak viau niang le..ka rilru ah a awm ve reng mai." Josepha chuan a han ti leh a. Petera chuan no khat tlak pup pah chuan, "Enge a sawi a? In cho lo mi? Kan va beng dawn mi?" a lo ti zuah zuah a.

Vin deuh hlur hian Joseph-a chuan, "Chutia cho leh cho loh lam a ni lo, sawtiang putar engah nge ka hlauh ang ni!" a lo ti khur khur mai. Estheri pawh chuan, "Engthil nge a, Sepa? Engthil nge a sawi a?" tiin a lo zawt ve bawk a. Joseph-a chu a han thu tha sauh sauh va, "Tuna kan awmna in hi, 1996 kum a an rauhsan kha a ni e a tia. Tunge a hming a sawi kha aw...nu ber kha?" a han ti nuah nuah a.

"Pi RInawmi." Isaka chuan a lo ti vat. Joseph-a pawh chuan a lu a bu nghauh nghauh va, "Aw...ni tak e, ni tak e. Pi Rinawmi...a fapa in an thenawm naupang a that a. Chuan a hnu thlakhat hnuah anu chu an inah thi in an chhar thu kha a sawi bawk a, a hmel lah kha a serious em em mai lehnghal." a han ti leh a.

Petera chu a nui ta vak vak mai, "In dawih lutuk, a tihthaih vel mai mai che u a nih chu. A hrang anga lan tir a tum vel a nih chu, enge maw inhriatthiam loh le.." a lo ti leh ham ham a. Ruatfeli lah dawih bawk nen, "Ehe..a hrang tak tak ange..keichu ka hlau nghal der ania." a lo ti nghal tuau ringawt a.

Zonuni chuan a han nghawk deuh sawk a, "I va han dawih tak, kum 20 i pelhna pawh a rei ve tawh. DAwih thei bik lutuk mai, kha...zu hi in leh la i zia mai ang." tiin a han tulh lui deuh nawk nawk a. Estheri chu a ngawi vang vang a, "Anih chuan Sepa, enge thildang a sawi?" tiin a han zawt leh a.

Isaka chu a rawn hawi chhuak deuh hluai a, "Keiman ka'n sawi ange...Petera kha i lo uang ringawt a. A sawi awmzia zawk chu maw...kha putar khan min tihthaih a tum ni em em pawhin ka hre lo. A hlauthawng zawk a ni mahin ka hria, min ngaihtuah vang zawk a nih hmel." a han ti kual deuh duah a.

Petera chu a lo ner suk a, "Awww...ava mak. Sawi mai la, enge i sawi tum chu?" tiin a han vin hlur a. Isaka chu a han thu tha ve sauh sauh va, "A fapa hming kha Ruatsanga a nia, an thenawm naupang thattu chu. Chupa chu tunah hian ala dam a, chu vel chu a ni.." a han ti kawi leh daih a, a kai ngang a niang nge.

Estheri bawk chuan, "Anih leh chumi hunlai chuan Ruatsanga chu kum engzat nge, an thenawm hmeichhe naupang a thah lai chuan?" tiin a han zawt leh a.Joseph-a chuan lo chhangin, "Kum 9 lek...a thah naupang pawh chu kum 9 lek tho." a lo ti a. Petera chuan kai deuh phel phual hian, "Anih chuan...kum 1996 ah kum kua a nih chuan..." tiin a han chhut mual mual a.

Second 10 vel hnuah chuan, "Hmm...kum 24 chauh ala nih chu...kan inrual deuh reng alawm, hlau bik lo emai, lo kal nghal teh se." a han ti leh khur khur a. "Ka la sawi zo lo, nizan khan Ruatsanga chu mi a dahna atangin a tlan chhuak a, tunah police ten an zawng mek a tia. A tlan chhuahna lamah damdawiin staff leh guard paruk lai a that bawk a ti." a rawn ti leh chu an ngawi ta thap mai.

"Anih...Ruatsanga chu helaiah, kan awmna hmunah hian a rawn let leh i ring tihna em ni?" tiin Ruatfeli chuan a lo zawt ve a. "Ka ring lam a ni lo, kha putar zawk khan a ring a ni ngei ang." tiin Joseph-a chuan a lo chhang a. Petera chu a rawn nui chhuak leh vak vak mai, "In ho emai, intihlim tura kal kan nia, chutiang sawi angai lo. Chubakah khawiah hian km 70 chuang hi ke in a rawn kal peih lo tawp ang, police zawn mek lai a nih phei chuan tuman an phur duh dawn lo bawk." a rawn ti leh lung lung a.

Isaka pawh chuan, "Nia..sawi tawh lo teh ang u. Kei phei chu ka mut a chhuak, ka lo va chatthla mai ange." tiin a tho va, room ah chuan a lut daih mai. Ruatfeli pawh chu a tho chhuak a, "Keipawh ka mut a chhuak, hawh...Esi, mu ang..ka duh aiin ka kai." a han ti leh a.

"Aih, lo va mu rawh...ka in zo law law dawn, ka rawn mu vat ang." tiin Esi chuan a lo chhang a, Ruatfeli chuan a mut san ta a. Petera chu a tho chhuak a, "Zonun, hawh...rei deuh va zung lawk ang." tih pah chuan a han siai zeuh va. "In va han tenawm dun tak, sawwtah va ti ru aw.." tiin Joseph-a chu a lo nui suk a.

Zonuni leh Petera te chu an inzui chhuak ta a, Joseph-a leh Estheri te erawh an la awm thung. Zu chu an inchhunzawm a, a tuka an awm dan tur vel te chu an sawi a, lui hnai bera tui zuk chen te, bazar te leh mamawh dang an leitur vel chu paper ah chuan ziakin an list thla nghal a.

**************************

Deborah-i muhil lai chu a rawn harh thut a, a thu chhuak hlawl mai. A au chhuak a, a thaw hlawi hlawi mai. Rang lutukin Pi Sangkimi a rawn tlan lut nghal a, "Bawihi..Debo..enge awmzia, enge ni ta?" tiin a rawn thutchilh nghal a. Deborah-i chuan ala sawi thei mai lo, a thaw hrawk hrawk ringawt mai.

Pi Sangkimi bawk chuan, "Mawhh..han sawi teh. Engthil nge ni a, mang tha lo i mang em ni?" tiin a han zawt leh a. Deborah-i chuan a awm a dawm vawng vawng a, "Umm..mangchhia...mangchhia mai mai a ni...mahse...a..a rapthlak lutuk." a han ti bah deuh nuai a.

"Enge i hmuh a?"

"Ihh...mipa naupang, mipa naupang ka hmu."

"Mipa naupang a? Tu mipa naupang maw?"

"Ka hre lo, ka hmelhriat a ni lo. Mahse..hmuh tawhna chu ka nei tlat hian ka hria."

"I mumang mai mai a nia, ngatan mah ngai suh. Mu leh tawh rawh, naktuk class kal hma i ngaih kha."

"Aih...nu, ka mumang kha a rapthlak lutuk. Ihh...ka hma zawnah hian chu mipa naupang chu a ding a, sazupui dum hi a pawm a."

Pi Sangkimi chu a meng phawk nghal hrawk mai, "Sa....sazupui...sazupui dum a?" a ti ta hu mai a. "Aw nu, chuan...chu naupang chuan sazupui chu a dulah a vit thut a, a ril te a phawrh chhuak a, a ei bawk a. A rapthlak lutuk, ka mitthla pawh hian ka la hmu thei..tunah pawh." Deborah-i chuan a han ti khur leh dar dar a.

Pi SAngkimi chu a ngawi ta vung vung mai, a ngaih a tha lo takzet. Mahse Deborah-i ngaih a tha lo zual ang tih a hlauh avang chuan a tho va, "Mu tawh rawh, mumang mai mai a nih chu....ka chhuak ania." tiin a chhuahsan ta a. Mahse a rilru a nuam lo takzet, a muthilh chhunzawm thei tawh mai bik lo.

**************************

Petera leh Zonuni pawh hnimbuk phenah chuan an lo in chu e kha nasa mai a, an inkiss bawrh bawrh lai chuan Zonuni zawk chuan thawm a hre tlat mai. A tawp nghal chat a, "Tinge duat, ngati nge i tawp daih a?" tiin Petera chuan a lo zawt vat a. "Thawm kha i hre ve lo  em ni?" tiin Zonuni chuan a zawt let ve nghal a.

"Engmah ka hre lo ea...a ho lutuk, zawhte vel mai mai an ni ang." Petera chuan a lo ti mai a, "Hetah eng zawhte mah a awm lovang." Zonuni chuan a ti deuh hlur mai. Petera chu a ner suk a, "A ho emai, kan tan dawn chauh va...a ninawm, khawi..chhunzawm ang." tiin an infawh chhunzawm leh a.

A ngai te ang bawk chuan thawm chu a rawn ri leh ta, Zonuni chu a tawp leh chat mai. Petera kham lutuk chuan, "Enge aaaaa? Tinge ni leh ta, enge awmzia?" tiin a vin hlur tawh mai. Zonuni chu a han hawi kual a, "Thawm ka hre chiang alawm, ka ngaih a tha lo." tiin a chhang a.

"Isaka te an niang...anih loh pawn thehlei vel mai mai an niang, a nuam dawn chauh ania." tih pah chuan fawh a tum leh a. Mahse Zonuni chuan a duh tawh hauh lo, "Ka awm a nuam lo vek, chubakah thosi a tam si. Hawh lut ang, min seh nasa tawh lutuk." tiin kal a tum a.

A banah chuan Petera chuan lo vuanin, "Hei hi alawm kan kal chhan...ni 3 vel bak kan riak dawn lo. Chance dang a awm lo, inchhungah lah ti chi ni hek suh." a ti vin hlur a. Zonuni chuan a vawnna chu paih thlak sakin, "Ka hria, i chak viau chuan nakin deuhvah bathroom velah pawh kan ti thei. Ka lut dawn, min rawn zui dawn em?" a lo ti ve thak thak mai.

Petera chu a han thaw hak a, "Va lut rawh, ka zung phawt dawn. Fair lo thei emai, zun chhuak tawk lekin alawm le min siam le.." a han ti nuah nuah a, Zonuni chuan chhang tawh lovin a luhsan hmak. Inchhungah chuan Estheri leh Joseph-a pawh an lo la awm a, "Ehe...tinge nangmah chauhva i lo luh a, khawnge Petera?" tiin Esi chuan a lo zawt a.

"A zung lawk a, ka rawn luhsan daih." tiin Zonuni chuan tum hmuk hian a lo chhang a. Josepha chuan nui deuh put put chung hian, "Eheu, in inhau animaw? In intithiam lo nimaw, intihthiam hi a ngai asin." tiin a lo fiam a. Zonuni chu za lo taka khi sukin, "Ka mu dawn...a lo lut ve mai ang, nghak duh su, mu ang u." tiin roomah a lut daih a.

Joseph-a pawh chu a tho va, "A lo lut ve mai ang, Esi...nangpawh mu tawh rawh. Keipawh ka mu dawn, muttui aw.." a han ti a. Esi pawh chu a tho va, "Nia, mu teh ang. Muttui le...Petera chu lo ngaihven tho la." tiin room ah chuan a lut a. Mipa leh hmeichhia hi an mu hrang ve ngei a, room awmna pawh a inhlat angreng hle bawk.

***************************

Petera zung zo chu meizial tan leh te te in a han zu khu hluah hluah a, "Ngaihzawn man awm lo thei si...thosi a han chhuanlam velah." tiin a phun nasa kher mai. Chutih lai chuan a hnunglam atang chuan pen thawm a rawn ri a, ani lah chuan Zonuni a nih ringin, "Tinge i lo let leh si a? I duh lo a ni lawm ni?" tiin en miah lo chuan a lo vin vel vak vak a.

Mahse a chhan mai tak loh avang chuan Petera chuan, "Mawhh..tinge i lo let leh si." tih pah chuan a han hawi let a. Zonuni awzawng a lo ni lo, Rsa chu kha sazupui hmaikawr vuah reng chung chuan a lo ding khur mai a. A palen em avang chuan Petera pawh chuan a chhoh en vang mai, Rsa chuan thingtum lian tak mai hi ala keng zui.

Petera chuan a chil a lem dawk a, "Tuu..Tunge i nih?" a ti tham tiak a. MAhse Rsa chhanlet dan chu a dangdai khawp mai, a thingtum ken lai bung hmawk khawp chuan Petera bekah chuan a hlap pawp mai. Petera pawh a thal chiang ngang mai a, nikhaw hrelovin a awm nghal bawk.

RSa chuan Petera ke veilam chu a vuan a, motor an dahna lamah chuan a hnuk phei zel a. A kawnghrena chahbi chu la in motor hnung chu a hawng a, hriamhrei eng eng emaw chu a lo awm nual. Chutah hreite a hmu fuh ta hlauh mai, rang takin a la nghal a, hruaihrual sei tak mai chu a la tel bawk a, motor hnung chu a khar ve leh mai bawk.

Chahbi erawh ala invuan reng thung a, Petera chu ramhnuai pilril lamah hnuk phei leh in chahbi chu invuah reng chung chuan a kalsan daih a. Petera rawn harh leh chu a awmdan a han en chuan mak a tiin a hlauthawng kher mai, thungkung pahnih inhnaih tak karah chuan a letling zawng hian a lo inkhai reng mai a nih chu.

A ke pahnih chu hruai hian nghet taka phuar niin thingkung zarah suih beh a lo ni a. a kut pawh thingkung mawng lamah che sawn thei lo turin suih beh a ni bawk. Amah lah chu boxer nen chauh a lo awm lehnghal a, a hlauthawng kher mai. A tal vak vak a, "Min pui ru, khawngaihin...ISAK...SEPA...min pui hram teh u." tiin a au vak vak a.

Mahse chhangtu reng a nei lo, a mangang lutuk chu a tap nasa tawh mai. Chutah a ma zawn chu ava en a, sazupui hmaikawr, thisen kai hnuang nena RSa rawn phei chu a hmu ta. "Nilo..nilo, ka duh lo. Min pui ru..thiante u, min pui teh u." tiin a au vak vak a, a tap nasa mai.

Rsa lah chuan hreite chu a la keng reng a, a kut lehlamah lungtum a keng bawk. Lung ah chuan hreite chu a tat hriam mek bawk a, a tlet hian a tle var tawh mai a, en reng reng pawhin a hriam tha tih a hriat takzet. A rawn pan hnai zel a, Petera chu a tap nasa tawh khawp mai.

Tih theih reng a nei si lo, Rsa chu a hma zawn takah chuan a ding run tawh mai bawk si. Tap chung hian, "Nilo..ni lo. Tu..tunge i nih? Enge i duh a? Khawngaihin, khawngaihin min tina lo hram rawh." tiin a ngen mawlh mawlh a. Mahse Rsa chuan a chhang der mai si lo, lungtum chu a paih a.

Chutah Petera kap zawn chu hreite chuan a tin ta ran mai, "Nilo..hey, ti suh. Ti suh, khawngaihin ti suh. Min chhuah rawh, ka duh lo." tiin Petera chu a mangang takzet. Rsa chuan a ban chu a phar ta, hreite chu a vuan nghet sauh sauh bawk. "Aih..ka duh lo. Ti suh, ka duh lo." tiin Petera chu a rak vak vak tawh mai a.

Chutah le, Rsa chuan a theih tawp chuan Petera chu a kapkar ah chuan a chek ta mai a. Petera chu a chanve takah a phel phawk mai a, leiah chuan a ril te chu a tla pherh nuai hlawm mai. Hrui pawh chu a dukl nghal ruih a, muang chang chuan RSa chuan hrui chu a zai chat a, Petera ruang chu a kalsan ta a ni.

*******************************

TO BE CONTINUE