NATHAN SEASON-4 Written by : Aaron Malsawmdawngzuala Episode-16 (V-3)

 NATHAN SEASON-4

Written by : Aaron Malsawmdawngzuala

Episode-16

(V-3)

**************

Vickey-a, hotel atanga kan man chu zawhna kan zawt ta a. "Sir, Prasad-a leh Malik-a te kha misual tak an ni. Mallik-a khan ka ram min chhuhsak a tum a, ka phallo a nih chuan Prasad-a khan min thah a tum a ni. Tichuan thah ka tum ta a, mahse chutiang khawpa sual ka nilo. Chuvang chuan ka thulh leh thin a, bar ah pawh khan ka kal ziah reng alawm. Min ring rawh,Sir..ka thah an ni lo." tiin a pha nasa mai a.

"Mi tu emaw talin Prasad-a leh Malik-a chungchang hi i bulah an sawi tawh em?" tiin Nathana chuan a han zawt a. "Tuin nge maw min hrilh ang le?..E taka, tu emaw chuan barah khan min rawn kawm tak e...ka hre leh si. Ka bulah a rawn thu a, a tawng duh phian lehnghal. Prasad-a leh Malik-a chungchang pawh min zawt nual bawk." a han ti leh a.

"Amah chu i la hre thei angem?"

"A hmel kha ka hmu chiang lutuk lova."

"Anih leh engemaw tal hriat i nei em?"

"A thim lutuk a, Sir."

Nathana chuan a phone a phawrh a, tualthattu aw(voice)..a record sa pakhat chu a play a. A ngaihthlak vang vang hnu chuan, "Aw a ni e, hepa aw chiah chiah hi a ni." a ti ta hlauh mai. Nathana chuan, "Bar CCTV footage..tun thla chhung ami ho kan en angai dawn anih chu. A rang thei ang berin..Rinawm, lo buaipui rawh aw." a ti a.

********************

A tukah chuan NAthana pawh a office ah a thu leh khar tawh mai a, a phone a rawn ri a. A han en a, Apoorva-i a lo ni. "Hello, rawn phone che ka tum chiah a...enge kan an zel?" tiin a han zawt a. "Tualthattu hi Hyderabad-ah hian a awmlo a nih hmel, state dangah pawh tualthahna hi a thlen belh zel dawn niin a lang." tiin a rawn chhang a.

"Tak tak maw?"

"Umm..a next crime scene address hi puzzle ang deuha chhui chi ania, mahse code langnguage angin a awm niin ka hria."

"Anih chu...a address chu khawilai nge?"

"Chumi hre tur chuan a hmunah i kal angai ang?"

"Nia, chu chu khawilai nge?"

"104, Sagar Society, Srinagar colony."

"Chute chu in in awmna alawm."

"Haha ni e, vawiin hi ka birthday ania."

"Aww..animaw, Happy Birthday."

"Ka lawm e, keichu cake zai tih vel hi ka duh ve vak lova. Zaninah chaw lo ei la, chutah chuan kan sawi dawnnia."

"MAhse he case vang hian ka buai bawk si a.."

"Ka hria alawm, kan pahnihin he puzzle hi kan solve dun thei dawn lawm."

"Awle, ka lo kal dawnnia."

******************

Zanah chuan Apoorva-i te inah chuan Nathana chuan chaw ava ei ta ngei a, Apoorva-i pa chuan an nu nen an intawn dan te sawiin a titi tui suah suah kher mai. "Tichuan roomah chuan kan awm dun a, Vijay Sethupati movie 96 kha i en tawh em, khtiang deuh hlek khan solid bachelor hi ka ni ringawt. Chuan kan nu Sreela-i (Apoorva-i nu) hi kha sakeinu ang deuh khan a sa seh tur zawngin a ril a tam em em mai bawk a." tiin a sawi nasa ngei mai.

"Hey, i mawl thei lutuk..sawi vak vak suh." tiin a nupui chuan a lo khap a. MAhse ala duhtawk mai lo, "Varak thu hle hle ang mai hi ka ni, khami zana kan tihsual lian ber chu Apoorva-i kan nei saw a ni. Kan inneih hma thlakhat ah khan.." a tih lai chuan Apoorva-i chuan, "Paaa...i mawl thei lutuk..a zahthlak." tiin a lo khap ve bawk a.

Nathana erawh chu a chaw ei lai a tawp hmak a, "Varak..varak thu hle hle ang mai..Ekhai aw.." tiin a ding ta hluai mai. Tukverh lam pan chuan ava kal a, "Nathan, enge awmzia?" tiin Apoorva-i chuan ava umzui a. Apa chuan, "Sawi sual ka nei em ni?" tiin a lo inthlahrung kher mai. Nathana chuan lawm hmel tak hian, "Yes...yes.. fuh lutuk." a ti vawng vawng mai.

"Enge ni a?" tiin Apoorva-i chuan ava zawt leh a. Apa chuan, "Bawiha, ka thil sawi vang a nih chuan tihpalh aw.." a lo ti ve chhen bawk a. "Nilo ka pu, chutiang lam anilo.." Nathana chuan a han ti leh a. Apoorva-i chu a en a, "Bombay duck an tih thin hi i hria em?" tiin a zawt a. "Bombay duck maw? E...sangha kha a nilawm ni?" tiin a lo zawt let a.

"Aw ni e, sava..mahse sava ni si lo..a awmzia chu Bombay duck hi varak nilovin sangha daih a ni ta, a mei(tail) tan rawh a ti leh a...Bombay duck tih ah khan duck tih lai kha paih ta ila, enge niang?" tiin Nathana chuan a han zawt leh a. "Bombay.." tiin Apoorva-i chuan a lo chhang a. "Thim zingah chuan ni eng zawng rawh a ti leh a...anih leh Bombay ah hian night an tih hi khawi hmun nge..min han hrilh teh?" tiin a zawt leh a.

"Zan..zan..ihh..enge khah?" a tih vawng vawng lai chuan Nathana bawk chuan, "Andheri mawle..anih leh khawiah nge ni a chhuah?" tiin a zawt leh a. "Aw..khawchhak lamah." tiin a lo chhang leh a. Nathana chuan a nuih var var a, chutah Apoorva-i pawh chuan a hrethiam ta. "Ehe..a awmzia chu..Andheri East ah tihna maw?" a ti leh a.

"Ni chiah e...chuan Lalpa sakawr chuan a sawm che a tih leh a....anih chuan...khawimaw, i laptop ka lo hmang." Nathana chuan a han ti leh a, rang takin Apoorva-i pawh chuan laptop chu ala a. Google ah chuan Nathana chuan  Maharstra-a Lal lar zual hote chu a han zawng kual a, a lar ber chu Shivaji a ni.

Shivaji sakawr tiin a han zawng leh a, VISHWAS tih an hmu ta. Nathana chuan forensic doctor chu a phone vat a, "Hello doctor, thlalak ka lo thawn nual che anga. Evidence puan them kan hmuh nen khan inmil a awm em lo check rawh aw, vatin.." a ti a. Doctor pawh chuan, "Tehreng mai, Sir." tiin a lo chhang a.

*******************

Ka phone a ri a, NAthana a lo ni. "Hello Rinawm, Mumbai lamah kan kal a ngai, ticket lo book ang che. Chuan Andheri East Police Station lam lo va be pawp bawk ula, Vishwas-a tih hming hotel emaw lodge emaw, Vishwas tih hmingpu mihringin emaw a book em tih lo zawng chhuak bawk ang che u. A lo book anih chuan khami hotel emaw, lodge kha kan raid nghal angai bawk ang. Andheri SP pawh biak pawh ka lo tum ang, vatin aw.." a rawn ti a. "Awle Sir." tiin phone ka dah a, ka buapui nghal vat a.

**********************

Apoorva-i bulah chuan NAthana chu ava let leh a, "I sawi dik e, a clue min pek hian hmun a tar lang a ni. A tual thah leh tur chu Mumbai hotel ah a awm a ni ngei ang, tunah chuan ka man tawh ngei ang. Ka kal mai ange, ka lawm lutuk e." tiin a chhuahsan nghal a. Hmanhmawh takin Nathana chu Station lamah chuan a let leh a, Mumbai lama kal tur chuan a inpuahchah ta nghal a.

********************

Motor-a  atlan lai chuan doctor chuan a rawn phone leh a, "Hello Sir, thlalak zinga pakhat nen hian a inmil e. A lan dan chuan Hotel logo a ang khawp mai, mahse google ah pawh a hotel hming hi ka zawng hmu thei lo." a rawn ti a. "Email ah thlalak chu min lo thawn rawh." tiin Nathana chuan a lo chhang a.

********************

Zanah chuan Nathana te nen chuan Mumbai chu kan va thleng ta a, Andheri Police te nen chuan Vishwas Hotel lam pan chuan kan kal ta nghal a. KAn va thleng chu Hotel hlui, luah tawh loh ni awm tak hi a lo ni. Nathana chuan Andheri SP bulah chuan, "Hei hi em ni Vishwas Hotel chu?" tiin a zawt a.

"Aw ni e Sir, enge case hi ni hrim hrim a?" tiin SP chuan a lo zawt veleh a. "I la hre thuai mai ang." tiin Nathana chuan a lo chhang a. Hotel gate bulah chuan mi pakhat lo ding run chu Nathana chuan ava hmu a, chupa chu a lo faifuk hlarh hlarh mai. Chutah a han enchiang a, a rawn vai lauh lauh mai.

"Khai..sawpa saw a nih saw.." tiin Nathana chuan a pistol a phawrh a, a kap nghal vak vak a. Mahse tualthattu chu a tlanchhe hman hlauh mai a, Nathana chuan a um nghal a. Inchhungah chuan a tlan lut leh a, keini pawh chuan kan um ve nghal a. Tualthattu chu tukverh ah a zuang chhuak leh a, "Building hi hual rawh u." tiin ka au vak vak a.

NAthana pawh chu tukverh ah chuan a zuang thla ve leh a, an in um ta chiam mai a. Keini erawh chuan an tlanchak dun em a, kan hmu hman talo. Hotel chhungah chuan ruang kan chhar tlat mai a, a thihna a la reilo hle tih pawh a hriat. Nathana erawh kan la nghak a, a man ta nge talo pawh kan hre bawk silo. 

Reife kan nghah hnu chuan Nathana chu ka va phone a, "Sir, i man hman em?" ka va ti a. "Man hman lo, a tlan bo hman khanglang alawm mawle." tiin a thinrim hmel kher mai.

"Sir, lo let leh lawk teh..hei ruang kan chhar a nia." tiin ka hrilh a, reiloteah a lo let leh nghal vat a. Ruang chu Nathana chuan a han en vang vang a, a hrawkah chuan nghawng kawl niawm tak hi a lo inhreng a, lehkha them alo awm leh a. "A lehpek ah chuan kan golden boy hian wine man to tak a in tawh ngei ngei tur a ni." tih hi alo inziak a.

"Clues team leh forensic team te an lo kal mek e, Sir." tiin ka hrilh a, chutah a phone  a rawn ri leh a. Number hriatloh bawk a ni, "Hello.." tiin Nathana chuan a han chhang a. Phone ami chu tudang nilovin tualthattu bawk kha a ni, "Min va man teuh ve tiraw? Ganja hi ka zuk tawh loh angai a ni, min ti chau tlat. Ka rin ang i nilo tawp mai, ilo huaisen phian mai. Sai Sri Lodge a ka hmuh che khan ka hrethiam chiah a ni.." a rawn ti ta mai a.

"Eng maw?" Nathana chuan a ti hu mai. "Vickey-a tih hmingpu in man lai khan mawle, a room dawt chiah ah khan ka awm reng alawm. Biak che pawh ka tum reng a, mahse min nam sawn daih a nih kha." a ti leh ta mai a. Khami lodge-a Vickey-a kan man lai a, mipui lo awm kan hnawhkiang zingah khan he tualthattu hi a lo awm ve reng tihna a nih chu.

Thinrim tak hian Nathana chuan, "I hun hi a tlem tawh ania, ka man ngei ang che." a ti khur khur a. "Engtikah maw? Engtin? Haha min man lovang, i tuan a muang emai. Bonus clue ka pek belh ang che aw, tha i ti ngawt ang. Ilo en dawnnia, mangtha phawt aw." tiin phone chu  adah leh ta daih mai.

Chutah NAthana message a rawn ri ral a, a han en chu thlalak pakhat a lo ni. School naupang tamtak thu tlar thup lai hi a ni a, tlar hma bera naupang pakhat leh a hnunga mi chiah chu an lu zawn takah a inthai bial bik a." Nathana bulah chuan kalin thlalak chu ka va en ve a, "Enge awmzia? A target dawttleh chu naupang tihna em ni?" tiin ka va zawt a. 

"Nilove, he mipa naupang, tlar hmasa zawk ami hi tunge a nih i hria em?" tiin min zawt daih mai. "Tunge a nih a?" tiin ka zawt a. Nathana chuan, "Keimah ka nih hi." tiin min chhang ta daih mai. "Nangmah maw?" ka ti hu mai a. "Aw ni e, ka naupan lai thlalak a nih hi." tiin min chhang leh a. Message a lo thleng leh a, "Min hre tawhlo em ni?" tih hi  alo ni a. Nathana chuan mak tih hmel tak hian, "KA classmate te zinga mi  anih ngei dawn hi." a ti sap a.

*********************

A tukah chuan Vizag lamah kan kal lehnghal a, Nathana naupan laia, Fahrah Run-a a awm laia a school luhna thin, Government Higher Secondary School of Bheemili lam pan chuan kan kal a. Principal chu kan va hmu a, Nathana chuan thil awmzia te hrilhin thlalak te chu a hmuh a, "Tlar hmasa ber ami hi keimah ka nia, midang ho hi chu ka hre tawh lo. Ka hnunga mi khi Vishnu-a a niin ka hria, a chanchin i hre mial em?" tiin a zawt a.

"Engtin nge maw ka hriat tawh ang le, nangpawh hi ka hre tawk che ania." tiin Principal chuan a lo chhang a. Anih leh kha tih hunlaia kan zirtirtu te kha thawk an la awm em?" tiin a zawt leh a, putar pakhat a lo awm hlauh mai. Chu putar teacher leh Nathana chu an inbe leh ta a, "Hepa hi a hming chu Yendluri Vishnu ania, D section ah a awm thin a, sport lam ti thei zet mai hi ania. Sport leh lehkhazir lamah chuan topper hi a ni ringawt, i hre tawh lo em ni?" tiin a zawt a.

"Tlem chuan ka la hre ve deuh, tunah khawnge a awm?" tiin Nathana chuan a han zawt veleh a. "Ka hre bik lo, 10th grade anih lai khan chhan awm lovin a rawn kal tawhlo tawp ni khan ka hria. An chhungkua kha pawisa lama harsat vang leh ba an neih nual avang khan an khua atangin an hnawtchhuak tih an sawi thawm kha chu ka hria, khami hnua Vizag a kan zin leh hian vawikhat chu ka hmu a, school dangah a lo kal daih tawh a. A pass out hnu khan sipai a ni a, khami hnu khan ka hmu leh tawh lo. Vizag-a cheng tho, Rathnakumar-a'n sipaiah a thun an ti" tiin a lo chhang leh a.

***************

NAthana nen chuan Rathnakumar-a address lam chu kan v apan leh a, a hmun kan thlen chuan nu pakhat hian kawt a lo phiat mek a. Nathana chuan ava pan a, "Ka pi, hei hi Ratnakumar-a te in a ni em?" tiin a zawt a. "Aw ni e." tiin a lo chhang a. "Kan hmu thei angem?" tiin a zawt leh a. "Thei e, lo lut ru." tiin kan va lut a.

Inchhung kan lut chiah chu mipakhat, wheel chair-a thu, a ke pahnih bul hi a lo awm reng mai. Chupa chu Ratnakumar-a ngei chu a lo ni a, Nathana nen chuan an inkawm ta a. "Vishnu-a leh kei hi unit khatah kan awmdun dawn maw ka ti a, a tir chuan kan innel lutuk lo. Kum 3 kal ta khan Kupwara ah operation neiin hel ho te nen kan inkap chiam mai a, terrorist ten kha khua kha awp an tum niin thu kan dawng a ni. Vishnu-a huaisen zarah hnehna kan chang a, amah pawh a kaisang nghal bawk." tiin Vishnu-a chanchin chu min hrilh dun ta a.

******************

Vishnu-a hi kum 15 lek a nih laiin a nu leh paten an boral san a, chuvang pawh chu  ani maithei, a duh ber chu chhungkaw din a nih thu min hrilh fo thin ni. Vawikhat chu chawlh kan nei hlauh mai a, Vizag lamah kan zin a. Hyderabad-a kan thianpa pakhat tlawh kan tum a, present tur leiin dawr pakhat ah chuan kan lut a.

Chu dawra staff pakhat, Saheba-i nen chuan Vishnu-a chu an intawng ta a. Rei tak an inzui hnuah chuan an innei a, reilote ah Saheba-i pawh chu a rai ta a. Mahse kan chawlh a zo ta a, kan pute hnen atangin kohna kan dawng leh ta a. Hreh tak chung chuan an inkalsan a ngai ta a, mittui nen an inthlah ta a ni.

MAhse Saheba-i chuan Vishnu-a chu a ngai thei em em a, a mamawh ngawih ngawih bawk nen. Kan pute bulah chuan chawlh a dil leh ta a, mahse an lo phal ta tlat lo. A ngenna hnawl a nih tuk chiah ah chuan kan unit chuan emergency call kan dawng a, Kupwara khua ah chuan hel ho thenkhatte an biru niin thu kan dawng a.

A risky em em a, hun kan nei tlem hle bawk. Kan kalkawngah chuan dublicate bridge a tam em em a, mahse kan kal lui zel a. Khatih laia Vishnu-a hmel ka en khan a phurloh hmel em em a, thil engemaw thalo tak a thleng dawn ang tlat hian ka hria a. Chutah ka rinna chu a dik ta ngei a, ka tlan lai chuan kan chuanna motor chu  apuak ta pup mai.

Thlanglam khamah chuan kan motor chawp chuan kan lum thla a, kham mawnga tuiah chuan kan tawp hram a. Ka lu a haiin chet pawh ka che tha theilo. Ka awmna chu ka han en a, lui sira lungpui tam tak awmnaah chuan kan lo let phung hlawm a, ka ke pahnih hi a ruk a tliak hnawp bawk a ni.

Ka bul lawka nikhawhrelova let reng Vishnu-a chu ka en a, tui fawn chuan a la ta a. Chu chu Vishnu-a ka hmuh ni hnuhnung ber a ni, keipawh chu nikhawhrelo chuan ka awmzui ve leh ta nghal bawk a. Kar 2 chhung teh meuh chu mumal ka hrelo, kan commander chuan kan unit-ah sipai pali lai mai an bo thu min hrilh a, Hyderabad ah Vishnu-a nupui, Saheba-i chu a boral tih min hrilh bawk a ni.

**************

Mak tih hmel tak hian Nathana chuan, "Saheba-i a thi maw?" a ti a. "AW thi e, khatia tawhsual kan tawh hnu ni nga naah khan khawlaiah buaina chhuak ah a thi a ni awm e...Hyderabad ah, thla 3 kal ta khan...ISlamic ceremonial ah.." tiih a chhang ta mai a. Nathana nen chuan kan in en a, rang takin kan chhuak nghal a.

Saheba-i thihna hmun chu thla 3 kal ta a, Hyderabad a buaina chhuah vak na, keini pawh kan va kal ve na hmun ngei kha  a ni. "Ravi, Hyderabad riot kha..file zawng zawng check leh vek la, Saheba-i tih hmingpu mitthi zingah an awm em tih lo check rawh aw." tiin Nathana chuan SI Ravi-a chu a phone a, keini pawh chu Hyderabad lamah chuan kan let ve leh ta nghal a.

*********************

TO BE CONTINUE