NATHAN SEASON-4 Written by : Aaron Malsawmdawngzuala Episode-17 (V-4)

 NATHAN SEASON-4

Written by : Aaron Malsawmdawngzuala

Episode-17

(V-4)

*********************

"Sipai a? Kashmir lam maw?" tiin DIG chuan Nathana chu a zawt a. "Aw ni e, sir." tiin Nathana chuan a lo chhang a. "Evidence a nei em? Thlalak te? A phone call log te? I class mate hlui a ni thin a, chu chauh chu evidence atan a tawk lo. Tualthattu chu amah ngei hi a ni em tih pawh a chiang chuanglo, evidence a tling zo dawn em ni?" tiin a zawt leh a. 

"Sir, a tualthahna te hian chhan tha tak a nei a ni." tiin Nathana chuan a lo chhang a. "Buaina chhuak vangin a nupui a thi a, chuvang chuan police  ahaw ta em em a, abikin nangmah...chu chu em ni a chhan? Kha thlalak a rawn thawn che pawh kha i classmate hlui tuten emaw FB ah an post pawh a ni thei. Khami lek hmang pawh khan a vir kual tir char char che pawh a ni thei, phone a ru khawm a, a call thin che a. Mahse figer prints engmah a hnutchhiah chuang lo. Pathian chauhin a DNA min pe thei, clue engmah a hnutchhiah ngai bawk silo. Mi a ang maiah min chhuah ta a nih hi, engmah tih theih kan nei lo chu a nih hi." tiin DIG chu a ang bawrh bawrh mai.

A ding hluai a, "DGP pawhin min vau nasa tawh lutuk, DCP Sathya pawh keimahni min rin avangin a awl der a, a awm mai mai saw. MEdia hmaah kan nep zia te, kan hlawhchhamna te hi a sawi vak vak thin asin." tiin  ahan phun leh bul bul a. Inthlahrun hmel tak hian Nathana chuan, "Ka tihpalh a ni, Sir. Ka theih tawp ka chhuah ang." a ti a, a chhuak ta a.

*************************

CCTV footage, thla thum kal taa Hyderabad-a buaina chhuak video chu Nathana te team chuan an en leh ta a. "Sir, i sawi ang ngei khan he CCTV footage hi vawi tam tak uluk takin kan lo en nawn leh tawh a. Hei hi vawi 10 kan enna a ni tawh, mahse Saheba-i awm ang tumah kan hmu lo a ni." duty pakhat chuan a ti a.

SI Ravi-a a lo kal  a, "Sir, Saheba-i detail kan nei tawh e. A hmu hnuhnung ber tu chu mechanic pakhat, Rashid-a a ni." a rawn ti ta hlauh mai. Rang tak chuan kan chhuak nghal a, SI Ravi-a sawi, mechanic RAshid-a workshop lam pan chuan kan inkhlah phei ta nghal a. Reiloteah chuan Nathana nen kan va thleng a, thu kan zawt fiah ta nghal a.

"Sir, Saheba-i leh Vishnu-a te hi ka thiante em em pawh an nilo, ka hmelhriat satliah te mai chauh an ni. Gokul Chat-a bomb puak ah khan ka unaupa leh Saheba-i nu leh pate hi an thi a, chuta tang chuan Saheba-i chu ka hria a ni. Tumah chhungte a nei lova, Fahrah Run ah a seilian a ni. Chuta tang chuan lehkha a zir a, naupangte dangte chu lehkha a zirtir ve zel bawk a. Kan inah te pawh lo kalin kan fate min rawn awmsak thin a, kan nupa a kan chhuah dawn pawhin kan fate chu a kutah kan dah mai thin. Kan fate pawhin an ngaina em em a, u ang chiahin an en thin. Ka hmuh hnuhnun ber chu Muharram procession neih lai khan ania, pangngai takin kan inbia a. Khami hnu kha chu ka hmu leh ta miah lo, khami ni vek khan buaina a chhuak a. Keini erawh inah kan tawm thap a, kan chhuak ngamlo a ni. SAheba-i chuan hmundang awmna tur a nei tawh aniang tiin kan ngaih kan lo ti tha ve ngawt pek a, enge a chungah thleng reng reng a?" Rashid-a chuan a han ti charh charh mai a.

"A kalna tur a sawi em?" tiin Nathana chuan a lo zawt leh a. "A sawidan chuan Vishnu-a a ti amawni, chupa chu  alo haw dawn e atia, thi(necklace) a lei sak tur thu a sawi a. Tappachabutra Centre-a KC Jewellers ah a kal ta ani awm e. Abak chu engmah ka hrelo, Sir." tiin a lo chhang leh a. Rang takin KC Jewelers hmun lam chu kan va pan leh ta nghal a, dawr chhungah chuan kan lut a.

*****************

"Muhharam..Semptember 21st..aw ni tak e, thla thum kalta kha..buaina chhuah ni kha. Khatih lai khan maw, kan dawr hi chu chhe hneh tak a ni. A siamthat nan pawh thla khat lai alawm kan hman." Manager chuan a han ti deuh chiam chiam a. Nathana chuan Saheba-i thlalak chu a hmuh tir a, "A hming chu Saheba-i ania, khami ni khan, buaina chhuah ni khan i dawr ah hian i hmu em?" tiin a zawt a.

"Nitin customer tamtak an lo lut a, keilah ka office ah hian ka awm deuh chawt thin bawk nen. Ka hre ngai hauh lo, ka pu." tiin a lo chhang a. "CCTV footage ka hmu duh a ni, khami ni ami kha.." Nathana chuan a han ti leh a. "Sir, thla tin hian kan footage hi kan delete thin a, paih thawl nan." tiin a lo chhang leh a.

"Restore kan lo tum ange, kan inbe leh dawnnia." tiin dawr chu kan chhuahsan ta a. "Footage chu kan hmuh theih ka ring lo, a detail lo chhui chuak la, phone emaw, email emaw pawh nise, chuan police pahnih ko la, enthla turin ti ang che." Nathana chuan a han ti a. "Awle Sir, khapa kha mi mak tak niin ka hria. Comedian Search velah tel se a inhmeh ngawt ang, film star nih chu  a hlat khawp ang." ka han ti deuh kher a, "Haha, a hlawh a tlem ngawt ang." tiin Nathana pawh chu a nui suk a.

********************

Zan a lo thleng leh ta a, Nathana phone chu a rawn ri leh ta ral ral mai. "Hello.." tia Nathana'n a han chhang chu phone ami chuan, "Hello, changtupa..." a rawn ti ham ham mai. Phone ami chu tudang nilovin, tualthattu Vishnu-a ngei a ni. "Vishnu-a chu nang hi i ni tih ka hria, ngun takin ka thusawi hi lo ngaithla ang che. I nupui Saheba-i kha communal riot vanga boral a ni tih ka hria a, a pawi ka ti takzet. Pawikhawihtute chu tute nge a nih min hrilh la, keiman hremna ka pe ang." NAthana chuan a han ti a.

"Thianpa, hmanlai film a director ten actor te duhlo chung dialogue thing deuh deuh an sawi luih tir i ang khawp mai. Duhtawk teh, ka ngaina hauh lo ania." a rawn ti leh ham ham mai. Thinrim tak hian Nathana chuan, "Hey, i cofi sual ange aw.....tha takin ka hrilh che a nih hi. Hetia i awm zel chuan i tan a tha lovang aw.." tiin a vin khur khur a.

"Awhaww..tak tak maw, ka va hlau ve." tiin Vishnu-a chu a nui huah huah mai. "Hmela, duhtawk rawh. Hei hi sipai indona ang anilo, duh duh thah a, kah hlum ang kha a ni ve lo, keini chuan evidence kan mamawh." Nathana chuan a han ti leh hlur a. "Evidence i neih veleh misualte chu i hrem thin ni awm fahrana i rawn tawng vel le...in police force te hian wotness leh evidence in mamawh kher nachhan i hre duh em? Case tih tawp vat nan te leh police ropui zia tihlan duh vang mai mai a ni." a rawn ti leh a.

"Enteh Hmela, sipai te pawn tihsual an nei ve thin asin." a tih lai chuan ring zet hian Vishnu-a chuan, "I sawi dik alawm, eng system ah pawh tihsual a awm vek. Mahse kan thil tih hi  apawimawh ber alawm, thianpa..ka system ah hian tihsual a awm anih chuan, ka thih thelng pawhin ka ngawi lovang. I system ah tihsual i neih te i siamthat dan min han hrilh ve la, han sawi ta che. Thamna i lak zat ho i chhiar thin em ni?" a rawn ti vak vak mai a.

Thinrim tak hian Nathana chuan, "Hey..ngaithla teh.." a ti vak a. A aia vin hian Vishnu-a chuan, "Ngaithla zawk teh, i aw key kha san hlek suh. DGP leh Home Minister te ui vulh i nih kha, helai hmunah hian dikna rawn kenglut tur anga i inngai anih chuan kei chu i fan ka nilo anga, i thusawi ah kut ka beng hek lovang. I ngam anih chuan min dan i tum dawnnia, goodluck." tiin phone chu  a dah daih mai.

****************

NAthana leh Apoorva-i te chu an titi a, "Sadik-a leh Chandana te kha kan record-a alan dan chuan Muharram riot tichhuaktu ber an ni a. Chandan-a khan SAdik-a kha a that a, Chandan-a chu kan man ta a. Chuan..case chu kan close ta a. Mahse...kha riot ah khan thuruk inphumru engemaw tak chu a awm a ni. Chupawh ka hriat loh a ni bawk...chu thuruk leh Saheba-i thihna hian inzawmna a nei tlatin ka hria a ni. Chuan..Vishnu-a hian he thilah hian ka inrawlh ve a ring a ni ngei ang. Ka thil huat em em corruption hi kei hian ka tih thin a ring a, chuvanga min bei a ni. Police hna hi ka duh taka join ka ni a, ka chaklo a nih vaih chuan ka hming chhe dawn lutuk. Min challeng a, ka chak ngei a ngai a ni." Nathana chuan a ti nuah nuah a.

"Nathan, i chak em em ang. I chak dawn tih hi ka hria alawm, ka ring che a ni." tiin Apoorva-i chuan a lo chhang a. Chutih lai chuan keini chuan kha Jewelery dawr manager kha kan la enthla ru reng a. Mi in kawta nu pakhat, thau deuh nena an lo inbia chu kan va hmu ta a. An la mangan dun hmel em em zui, Nathana chu thlalak ka va thawn nghal a.

Min rawn call a, "Hello Rinawm, tunge a hming kha nu kha?" a rawn ti a. "Ramani ania.." tiin ka lo chhang a. "Ka hmuh tawh hnu a ang riau mai, engpawh chu nise uluk lehzualin lo enthla reng ru aw.." a ti leh a, "Yes Sir." tiin ka chhang a, phone chu kan dah ta a. 

*****************

RAmini te in bulah chuan Nathana chu kan lo nghak a, reiloteah a rawn thleng a. Manager chu kan man a, Ramini te inah chuan kan lut ta a. Tlanchhiat ngaihna a awm lo, kan inman chiang kher mai. Nathana chu Ramini hmaah chuan a thu a, "Fahrah Run a ni tak tak em?" tiin a zawt a.

Hlauhthawn hmel tak hian Ramini chuan, "Hostel a ni mah zawk, hmeichhia kum 10-25 vel awmkhawmna ania. Kum nga kal ta a ka din ania, a hming chu Kalpataru Women's Hostel a ni. A tam zawk kha chu fahrah an ni a, a then chuan school an kal a, a thenin college. A then chuan hna eng eng emaw an thawk ve bawk a, kan din tirh atanga tun thleng hian client hausa tak tak an lo kal thin a. Hmeichhe naupang deuhte chu ka thawn liam ta thin a, a then chuan an duh ve mai zel. A then erawh chuan an duhlo thin a, tharum hmangin kan duh luih tir thin a ni. Inspector Prasad-a khan he hna ah hian min pui nasa hle a bawk." a han ti hluam hluam a.

"Prasad-a chu engtin nge in hriat?" tiin Nathana chuan a zawt leh a. "Function pakhatah kan inhmu a, ka buai em avang khan min pui nasa thin em em a. Min ngaizawng a, a bula cheng ve turin min sawm thin a ni. Min duat em em a, min ngaihsak bawk. Mahse ni khat chu hmeichhe pakhat a tlan chhuak ru a, a hming chu Ayesha a ni. Kut ruakin a tlan chhe tlat lo, thuruk pawimawh tak a hre tel tlat a ni. Khami hma zan khan a thiannu Kalyani chu mi pathumin an pawngsual rawn a, Ayesha-i chuan lo hmu ru in video in a lo la vek a ni. Evidence tha tak nen chuan Hostel atang chuan a tlanchhuak ta a, ahnu deuh khan Prasad-a khan Ayesha-i leh Sadik-a an inhmuh thu min hrilh a ni.  Tappachabutra a misual hming thang tak a ni a, miretheite a tanpui thin vanga hria ka ni. Politician leh police ten an haw hle tih pawh ka hria, video chu Ayesha-i chuan a hmuh ta a. Sadik-a chuan Ayesha-i chu a veng ta tlat a, a tanpui tur thu pawh a tiam a ni. Mahse thil thleng kha ka rin loh lam daih a ni ta si a, kha video-a mipa zing ami pakhat kha Home Minister fapa Ranjit-a a ni tlat si a ni. A en zawh hnu chuan Sadik-a chuan a thusawi chu a thlak leh ta daih mai a, SAdik-a chuan Home Minister chu a vau ta a. Hyderabad ah hian government project, chen billion 500 man chuang plan an nei mek a. Chutah chuan 25% share a phut ta tlat mai a, video chu social media lama thehdarh ah a vau ta a ni. Rnajit-a chuan apa bulah chuan SAdik-a chungchang chu ngaihtuah vat turin a ti a, Minister chuan Sadik-a chu thah a tum ta a ni. Election hmaa SAdik-a thah tawp mai chu thil risky lutuk tak mai a ni tih a hria a, chuvang chuan Muharram ah buaina siam a, chuta Sadik-a thah chu an tum ta a ni. Local gang leh khaw pawna rowdy thenkhatte chu chutah chuan tel ve turin a sawm a, chung gang te zinga an lead chu Chandan Kumar a ni. Tin khaw pawn lama rowdy te hotu erawh KK-a..Mumbai ami a ni. An plan ang chiah chuan thil a thleng ta a, SAdik-a te inchhungah chuan lutin an chhungkua in an bodyguard te nen an that fai vek a. Ayesha-i erawh a tlanchhia a, buaina chhuah mek lai a ni bawk nen. Chutia a biru kual lai vel chu Prasad-a duty chuan a lo hmu fuh a, chutih lai tak chuan nangpawh i lo thleng ta chiah a nih kha. Prasad-a chuan i lo thlen tawh thu phone hmangin min rawn hrilh a, Chandan-a bula hruai tur che in min ti ta a ni. Tichuan Prasad-a nena in lo inbiak lai chuan ka rawn kal a, min that mai ang..min pui hram rawh...tiin ka rawn hruai hrang ta che a nih kha. Khami hnu khan Ayesha-i chu an man a, an that ta a ni." tiin Ramini chu a tap hluam hluam mai.

Nathana chuan a lu a dawm vawng vawng mai a, "Khami ni khan henu hi i hmu em? A hming chu Saheba-i ania." tiin Saheba-i thlalak chu a han hmuh leh a. "Hmulo." tiin a lo chhang a. "Ayesha-i video a record ah khan Home Minister fapa Ranjit-a nilo kha tunge midang tel ve?" tiin a zawt leh a. 

"Mallikarjun-a ania...chuan JC Jewelery Chairman Sharath Chandra.." tiin a lo chhang leh a. "SArath Chandra..JC Jewelers Chairman maw?" Nathana chuan a ti hu mai. Manager chuan, 

"Kan dawr, KC Jewelers leh JC Jewelers te hi kan in zawm deuh a." tiin a lo chhang ve bawk a. Muan fan raih hian Nathana chuan, "Prasad.....Malik....KK.." a han ti charh charh a.

Thil pakhat ka lo zep leh lawk, Muharram an tih hi muslim hovin an mahni leh an mahni, hruia an invuah vak vak thin ang hunpui sawina kha a ni. Chuan KK-a an tih hi chu Mumbai kan kal a, Hotel hlui tawh taka ruang kan hmuh, Nathana'n Vishnu-a a man hman loh, an in um chiam zana mi kha a ni.

Nathana bawk chuan, "Vishnu-a hian mi pathum a that tawh anih chuan a la bang te chu Sharat-a leh Ranjit-a te chu an ni ngei ang, hemite pahnih chiah hian Saheba-i chungchang chu an hre dawn. Vishnu-a clue min pek kha chu GOLDEN BOY tih a ni a, a awmzia chu a next target chu Sharat-a  ani ngei ang." a han ti leh nuah nuah a.

Chutah a ding thut a, "Sharath-a chu kan hmuh vat a ngai." a ti a, midang ho chuan "Yes Sir." kan lo ti rual thup a. Ramini bulah chuan NAthana bawk chuan, "A number i nei em?" tiin a han zawt leh a. "Aw nei e.." tiin number chu min pe a. Rang tak chuan kan chhuak a, Sharath-a te in lam pan chuan kan kal leh ta nghal a.

In kan va thleng a, mahse a nupui chiah  alo awm. A nupui kan kawm lai chuan SI Ravi-a'n min rawn call a, "TS 10 EJ 0001 car ah ruang chhar a ni a, Sharath-a ni ngei a rin a ni." a rawn ti ta mai a. "TS 10 EJ 0001 hi i pasal car number a ni em?" tiin Sharat-a nupui chu ka zawt a. "Aw ni e." tiin min chhang ta mai a.

******************

Crime Scene kan va thlen meuh chuan khua a lo var der tawh, mipui an lo tam em em a. Car chhung chu kan han en a, a driver seat ah chuan Sharath-a chu phuar hlawm a lo ni a, a hmui leh khabe zawng zawng chu  akang sawr vek mai. A khabe ruh a lang thei hial a, tichuan chilphuan eng(yellow) tam tak a awm nuai bawk.

A chalah chuan paper them hi a lo in bel leh a, "Nghapui(whale) chiah a bang ta." tih hi a lo inziak a. Nathana chuan a lu a dawm vawng vawng mai, motor lam pan chuan  alet leh a. Media ho an lo kal khawm a, zawhna an rawn zawt sup sup hlawm mai. Nathana chuan a lo vai kiang hlawm a, a thinrim hmel kher mai.

**************

DIG bulah chuan Nathana chuan, "Sir, Vishnu-a nupui Saheba-i kha Muharram-a buaina chhuak ah khan  a thi a. Engtia thi nge engtia thleng nge a nih erawh kan hrelo, kha buaina chhuak a a bul tumtu ber pali te chu Vishnu-a hian a that vek tawh. A clue min hnutchhiah hnuhnung ber chu NGHAPUI CHIAH A BANG TAWH tih a ni. A sawi awmzia hi han sawifiah dawn chuan Ranjit-a hi midang te aia rapthlak a thah a tum a, a target lian ber a ni tihna pawh a ni thei. Ranjith-a hian private thliarkar pakhatah a birhtday party a nei dawn a, tualthattu sawi awmzia tak nia lang chu luiah nghapui a pel(hunt) dawn angin a tehkhin ni berin ka hria. Ranjith-a hian private bodyguard tamtak a nei a, mahse min ring rawh, Sir. Vishnu-a hi an hneh chuang lovang, anti-terrorist operation expert diktak a ni. Witness prove theih awmchhun chu kha buaina chhuak-a thuruk inthup kha a ni, Ranjith-a hi a ni. Mimal buaina avanga thah a nih chuan he thuruk inthup hian awmzia a nei dawnlo, thudik kan hre thei lo bawk ang.”  a han ti a.

“In hlauh ang chiah in kan ram hi lo chhuahsan fel der tawh ta se, enge in tih tak ang?” tiin DGP chuan a han zawt a. “Special team ka mamawh a ni, kei hi leader ah min dah bawk la. Undercover Operation nei turin Thailand ah chuan kan kal angai a ni, khawngaihin Sir..phalna min pe hram rawh.” tiin Nathana chuan a dil ta a.

An bula lo thu ve DCP Sathya chuan, “Idea tha tak chu a nilo mawle, Chandana leh Ramini leh Manager te inpuanna atang hi chuan Ranjith-a hi man tawp mai tur kan ni in ka hria.” a lo ti a. “Chutiang i ti anih chuan Ranjit-a hi India ah a rawn let duh lo tawp ang, anih loh pawhin  atlanbo hman daih ang.” tiin Nathana chuan a lo chhang a.

DGP chu en leh in, “Sir, kan tih theih awmchhun chu Undercover Operation neih chu a ni.” a han ti leh a. DGP chu a han thu tha sauh sauh a, “Nathana sawi hi ka pawm e, idea tha tak a ni. A hrim hrimin kan department hmingthatna leh hmingchhiatna ah a innghat miau va, Nathana hi eng ang taka changtupa nge a nih kan en ang chu. HE tualthattu hi man la, ka hnenah rawn hruai ngei ang che.” a ti a, Nathana chuan, “Ka lawm e, Sir.” tiin a chhuahsan ta a.

*********************

Ni rei lo teah chuan Thailang chu kan thleng ta a, Ranjit-a birthday party ah chuan kan va kal a. Lui kam(beach)  ani a, music a lo ri dup dup mai. Thai nula pian nalh leh ngo tak tak te an lo lam suau suau a, sap nula an tel ve nual bawk. Ranjith-a ber pawh a nuam ti ber ber ah a tang a, a lam nasa ngei mai.

Ranjit-a chu kan veng pah reng a, ama private security te pawhin silai nen an veng reng bawk. Kil tin ah chuan silai nen an ding vung hlawm a, a tam zawk phei chu thai mi an ni bawk. Chutah music chu a rawn tawp thut a, silai  apuak nghal pup mai. Security zinga mi pakhat chu a thal tawp mai a, thisen a baw nghal zawih zawih bawk.

Kan va hawi phei chu gate bul lawkah chuan pistol pahnih keng hian Vishnu-a ngei mai chu a lo ding ran mai a, silai chu a hmet puak ta pawp pawp mai. Pistol phawrh vatin Nathana nen chuan kan inthen hrang ve ta nghal a, Vishnu-a chu a tlan kual zak zak mai. Security ho chu a mal te te in a kap hlum zel a, an kap fu ve hleithei hauh lo.

Keipawh chuan ka hmu hman mang lo, a pil leh zuk zuk zel a. Mipui lah chu an tlan dar sup sup a, nula te ho lah an au tuar tuar bawk. Ranjit-a ber chu a security thenkhat te leh kei leh Nathana nen kan hruai hrang a, ramhnuai lamah chuan kan tlanchhiat pui ta a. Chu ramhnuai thim tak, thingkung tam em em karah chuan kan in umkawi ta zak zak mai.

Silai a puak leh dur thin a, security te chu khawi khawi atang emawniin an rawn thla leh tual zel mai a. Thla a muang lo duh kher mai, Vishnu-a lah ka hmu hman tawk chauh, a pil leh daih zel. NAthana chuan security pathum la dam te bulah chuan, “Hmun him lamah lo va hruai rawh u, hetah kan lo ti khawtlai ange.” a ti a, an kal ta a.

Vishnu-a chu kan hmu fuh ta, Nathana nen chuan kan um a. Mahse a tlan kual vak vak a, kan kap fu hleithei thak lo. Ani pawh chuan a rawn kap let ve a, mahse kan um reng amaw kan tih lai chuan a bo leh ta daih mai. Boruak a reh deuh tak hnuah chuan Ranjit-a au vak ri kan hria a, kan va pan ta nghal a.

Police dang pali vel te nen chuan kan intawk hlawl mai, tichuan thawm lo chhuahna lam chu kan pan zel a. Thingkung pakhatah chuan RAjit-a ruang chu kan va hmu ta, rapthlak tak a ni. A lo thusawp nuai a, a lu a lo bung bawk. Thisen a kawi nuai a, a lubung chu a malchungah a lo awm bawk a.

A chalah chuan paper them a lo awm leh a, Nathana chuan a va pan hnai a. Paper ah chuan, “KAN LA INHMU LEH DAWNNIA.” tih hi a lo inziak a. Nathana chu a thinrim hmel kher mai, a thlan a tla zawih zawih a. A thu hnawk a, maimitchhingin a pistol ken lao chuan a han intin vang vang a. Chutah van lam hawi zawngin a lek kang a, a kap ri vak vak mai.

****************

A tuk zingah chuan Press Meeting koh  ani a, an hma takah chuan NAthana chu a thu a. Dawhkanah chuan a medal dawn tawh hote chu a han chhawp hlawm a, mipui chuan an thlir thap mai. Inthlahrun hmel tak hian, “Good Morning, min challenge tu, min hneh ngei tura insawi..kha mihring khan mi panga lai a that a. Mahse keichuan engmah tihtheih ka nei silo, ka hlawhchham a ni. Chuvang chuan he ka gallantry medal te hi ka phu lo, ka tlawm a ni. Police Officer tha tak ni turin ka tling tawk lova, ka chaklo a ni.Tin, he police hna pawh hi ka bansan e...Mangtha u.” tiin a tho a, a kal daih mai.

News ah chuan NAthana ban thu chu  alar leh vet vet khawp mai, keipawhin hrehawm ka ti takzet. A thutiam a ding nghet mi a ni a, Vishnu-a lakah khan a chaklo a nih chuan a medal dawn te chu pek let leh a, police hna pawh ban a intiam tawh kha ania. A chak ta lova, a thutiam ang ngei chuan  a bang ta a ni.

Mizoram lamah kan haw leh a, Nathana pawh a ngui kher mai. Mahse Mizoram lam erawh chuan a ban mai chu an lo phal lova, DGP chuan a ngen tak te hian a ngen a. NAthana pawhin join leh a tum thu a sawi ta nge nge a, mahse thla khat tal chawlh a dil hram a. DGP pawh chuan a phal ve mai a, kan inhmu lo rei ta vang vang kher mai.

******************

20 DAYS LATER

NAthana chuan a room ah lehkhabu a chhiar mel melh a, Sanvi a lo lut a. “Nathan, News saw lo en ve teh.” tiin a ko chhuak a. Telanghana News Channel ah chuan, “Tualthattu rapthlak tak, ni reilote kal ta a mi panga lai mai thattu, Home Minister fapa Ranjit-a leh midang pali te thattu Vamsi-a chu police encounter hmanga thah a ni. He Operation hi DCP Sathya kaihhruai a ni a, thla hmasa a Mizoram Police Officer, SP Nathana chanllenge tu tho kha he tualthattu hi a ni tiin police te chuan an sawi a ni.” tiin an lo puang a.

DCP Sathya pawh chuan media hmaah chuan thu sawiin, “SP NAthana a tlawm hnu a, a in resign hnu khan team thar din a ni a, technique thar hmangin encounter-in he misual hi kan kap hlum ta a ni.” a han ti deuh charh charh a. Reporter chuan sawi zawm lehin, “Misual hi lodge pakhatah a biru a, police te chuan luhchilhin an va nang ching ta a. Misual hian police te chu lo kah  atum a, police te chuan sel defence hmangin encounter-in an kap hlum ta mai a ni.” tiin a puan chhunzawm leh a.

Chutih lai chuan Nathana phone a rawn ri a, private number bawk a ni. Nathana chu pawnah a chhuak a, phone chu a chhang a. Chutah Vishnu-a aw ngei mai chuan, “News-a an thil puan kha i awih em?” a rawn ti a. “Vishnu, nangmah em ni?” Nathana chuan a han ti a. “Ka hming te kha an lo thlak vel a...Vamsi an ti daih a. Haha, police te khan an zahawmna humhim nan pick pocket pakhat an that a, keimah angin an sawi mai mai a nih kha.” a rawn ti leh a.

Nathana chuan, “Khawiah nge i awm?” tiin a zawt a. “Min hmuh hnuhnun berna...a hmun ngaiah.” tiin a lo chhang a. Nathana chu a thaw hak a, “Kan inhmu dawn mi niang?” a han ti leh a. “Ranjit-a chala ka lehkha bel kha i chhiar lo em ni? Kan la inhmu leh ang ka tih kha...” a rawn ti leh a. Nathana chu a nui suk a, “A tha e, ka thlen veleh ka lo be dawn che nia.” tiin phone chu a dah a.

Thailand lamah bawk chuan Vishnu-a hmu tur ringawt chuan Nathana chu a zin leh ta a, a hmun ngaiah bawk chuan a va kal leh a. Beach bula restaurant ah chuan Vishnu-a chu a nghak ta char char a, reife a nghak hnuah chuan Vishnu-a ngei chu a rawn kal ta. Ft 5’9 vel bak a sang a nilo, a hmel erawh a chhe hran lo.

Nathana hmaah chuan a thu a, Nathana chuan a lo en reng a. “Enge i duh? Coffee em ni?” tiin Nathana chuan a han zawt a, “Thingpui..” tih ringawt chuan a lo chhang a. Nathana chuan thingpui chu a han order sak thlap a, Vishnu-a chuan a en vung vung a. “School kan kal lai a i cher theih tehreng nen, i sa ava tha ta ve.” a han ti a.

Nathana chu a han nui deuh suk a, “Nangmah ka hnaih theih nan che ka lo thanglian ve deuh ta aniang...thil pakhat ka zawt ang che aw...min chhang duh angem?” a han ti leh a. “Sawi la.” Vishnu a chuan a lo ti a. “Hmanni khan...i inkah puite, i hmelma te kha an tam mah mah i ti lo maw?” tiin a zawt daih mai.

“Zep lo chuan...ka vannei khawp mai. I team te pawh kha an thawk tha ka ti, ka duhzawng tak an ni.” tiin a lo chhang a. Nathana chu a nui ta huah huah mai a, “Thianpa..han ngaihtuah let leh vang vang teh. Min rawn kah tan tirh khan nangmah nilovin Ranjith-a security te zawk kha ka kap char char asin, ka tanpui che  a ni. Eng angin nge min ngaih a? Professional ka nih hi, khami ni khan ka hmuh phat atang che khan ka kap hlum nghal thei che. Chu chu buaina ber a nilo, thudik chu maw....ka thawhpui, ACP Rinawma khan Home Minister leh DGP ten kha special team ah khan min pui turin officer dangte kha a ti lo, kan pahnih a min that tur zawkin rem an lo ruat ani tih a lo hrechhuak a, min hrilh lawh vek a ni. Tichuan i tlanchhuah theihna turin ka team te zinga min thah tum tute pawh chu a mal te te in ka that a, kawng ka siam sak che a ni. Ranjit-a pawh kha security guard tlem te nen chauh ka hnutchhiah a, chuan i that theih phah ngei bawk. I thah hnu a a ruang kan va hmuh khan ka team te zinga officer te hmuh tur ngei chuan mangan hmel em em in ka awm der vel a, ka thinrim der bawk a. Chu chu thil thlen dan diktak zawk chu a ni, ka thian.”  a ti ta mai a.

Vishnu-a chuan Nathana chu  ahan en vang vang a, “Min ringlo ani tiraw?” Nathana bawk chuan a han ti leh a. “Rin che chu ka duh khawp mai, mahse ka theilo a ni. Enge min puih avang khan hlawkna i neih a?” tiin Vishnu-a chuan a lo zawt a. “Medal..larna zawng zawng..pawisa..dinhmun sang...hetiang vel hi engatan man ka ti ve lo. Mi tenawm tak tak panga te chu an thi a, hmeichhe tamtak an him phah bawk. Chu chu ka tan a tawk, ka hlim takzet a ni. Mahse thil hriat duh pakhat ka la nei, kha buaina chhuak ah khan engtin nge Saheba-i kha a thih tih hi ka hre duh a ni. Khang mi panga te nen khan enge inzawmna a neih> Chu chuan minla tibuai a ni.” tiin Nathana chuan a chhang a.

Vishnu-a chuan Nathana mitah tak chuan a en a, “Kha luia kan tlak hnu khan tui luang chuan min len sawn a, khaw pakhatah hian min len chhuak hlawl mai a. Ka lo thi tep hman a, mahse khaw mite chuan min hmu a, min chhan hman ta hlauh a ni. An bulah chuan ka awmna sawi darh lo turin ka ngen a, kha khuaah khan ni engemaw zat ka awm hman a ni. Kan unit te kha chuan ka thi ah an ngai vek a, chu chu remchangah la in ka nupui Saheba-i bula awm ka tum ta a ni. Khaw mite zing ami pakhat chuan smart phone a lo nei ve hlauh mai a, chumi phone atang chuan Saheba-i chu biak ka tum ta a. Vawitam ka try a, mahse switch off a inti zel a. Saheba-i hian email hmanga min biak hi  a hrat thin hle a, check ve hrim hrim tha in ka hre ta a. Ka account ah chuan ka log in ta a, chutah chiah chuan thil thleng chu ka hre ta a ni. Inspector PRasad-a kha a thih hma khan engkim a sawi vek a ni, khami ni khan Saheba-i chu KC Jewelery dawr bathroom ah a awm a. Buaina a nasat em avang chuan a chhuak thei lova, a sa himna zawngin bathroom lamah chuan let leh a. Chutih lai tak chuan Ayesha-i pawh a lo lut a, Saheba-i chuan  abihruk pui a, an inkalh hnan ta a ni.  Prasad-a khan Ayesha-i dawr chhunga a lut kha a hmu hman a, KK-a bulah chuan a signal zeuh a. KK-a te gang chu dawr chhungah chuan an lut ta a..kha..hei hi en rawh." tiin Nathana chu phone a pe a.

Nathana chuan phone chu la in video chu a en a, video ah chuan hlauh hmel tak hian Saheba-i leh Ayesha-i te chu an lo ding khur zawih zawih mai a. Tap chung hian Saheba-i chuan, "Vishnu, he video hi i hmuh hunah chuan ka la dam ang nge ka thi tawh ang ka sawi theilo. Ka bula mi hmeichhia hian video pakhat min en tir a, ka rawn thawn tawh che. Video ka en khan ka thinlung hi a kehchhe vek a ni, Vishnu. Video kha en la, khang mipa pathumte kha an hming chu RAnjit-a, Home Minister fapa leh real estate dealer Mallikarjun-a leh JC Jeweler chairman Sharath Chandra te an ni. Thil sual tak leh tenawm tak an ti a ni, Inspector Prasad-a leh senior officer dang tamtak te pawh an inrawlh ve a ni. He buaina chhuak hi Sadik-a thah an tum vanga plan lawk a ni a, evidence tihchhiat sak an tum a ni. A awmzia chu, he ka bula hmeichhia pawh hi thah an tum tihna a nih chu. He naupang chhan tur hian ka theih tawp ka chhuah ang. mahse ka theilo anih chuan..ka theilo anih chuan...nangman that vek ang che, chhuah reng reng suh. Vishnu, min tiam ang che.." a tih lai chuan bathroom kawngkhar chu a rawn inchum ri ta vak vak mai.

SAheba-i bawk chuan, "Ka hmangaih che, Duhtak." a ti a, video chu a tawp ta nghal a. Nathana chuan phone chu a dah a, Vishnu-a chu a han en leh a. Vishnu-a chu a mittui  alo tla zawih zawih mai, "Video min thawn zawhah phone chu an tichhia a, hmeichhe fing tak a ni. ..tiraw...a fing i ti ve em?" a han ti a.

"Um, a dik alawm, a fing khawp mai." tiin Nathana chuan a lo chhang a. "Kha video ka en zawh hnu khan enge ka tih dawn tiin ka buai nghal chung chung a, tichuan ni a liam zel a. Vawikhat chu chanchinbu ah i thlalak hi ka hmu a, mi zawng zawngin an ngaisang che a, hero angin kan ngai che tih ka lo hria a. Kha buaina chhuakah khan mi 30 lai nunna i chhan tih ka lo hre bawk a, medal tamtak an hlan che tih ka hre bawk a. Chu chuan min ti thinrim a ni, officer dang ang bawka corrupt i ni turah ka ngai a. Kha i larna te, changtupa ang maia an chhuahna che kha, i corrupt vang leh i thil plan vek angah ka ngai a, i hmingthat duh vanga tih angah ka ngai che a ni. Tichuan thla thum lai mai chu inngaihtuahin khang mi tenawm ho thah dan tur kha ka ruahman ta a, medal i dawn ni chiah kha ka mission ka tan ni atan ka ruat a, Prasad-a ka that ta a nih kha. Ka cho che a, indo puiah ka sawm ta che a ni. Mi nep tak i nih zia pholan ka tum a, i police force te khan an zahawmna humhim nan fake encounter an siamchawp dawn tih pawh ka hre lawk vek.Min that ta angin an insawi anga, ka rin ang chiahin a thleng dik ta reng bawk a. Video chu ka release ang ka ti hman vek tawh a, mahse ka rin loh ang tak i lo ni si a nih hi." Vishnu-a chuan a han ti leh charh charh mai a.

Nathana chuan phone chu a lek kang a, "Kha la raw..i phone." a ti a. Mahse Vishnu-a chuan, "Nilove Nathan, kha kha i ta tur a ni. Mi zawng zawng hmuh tir ang che, nang ang mi dik leh rinawm hi kei ang mai mai lakah hian i tlawm tur a nilo. I chak e, ka hneh lo che a ni." a ti ta daih mai.

"Nilove Vishnu, nang hian hnehtu ah min siam zawk a ni. He i thil min pek hi ka medal dawn ropui ber a ni, ka lawm e." tiin Nathana chuan  alo chhang a. An ding dun a, "A lehpekah kan inhmu leh dawnnia." Nathana bawk chuan a han ti leh a. "Lehpek a awm leh dawn mi?" tiin a lo zawt a. Nathana chu a nui suk a, "Ka hre biklo, kan la inhmu leh maithei asin." a lo ti a. Vishnu-a chuan Nathana chu  achibai a, "Good luck...anih phawt le." tiin a kalsan ta a.

***************

Kar khat hnuah chuan Nathana chu Hyderabad-ah a zu zin leh a, press meeting a ko nghal a. Media leh mipuite chuan an en thup a, "Good Morning...helai hmuna ka ngenna ngaipawimawh a inlo kal avangin ka lawm e. Media te u, he pendrive hi in tana ka rawn ken a nih hi." tiin pendrive chu a lek kang a, media zinga pakhat chuan ava la a.

Video chu an play ta a, "Tappachabutra-a buaina chhuak leh state pumpui sawi nghing lawih khawpa tualthahna thleng te khan inzawmna an nei a, chu chu vawiin hian in en dawn a ni. In enzawhah thil dik leh diklo chu inthliarhran thiam theih ngei ka beisei." a ti a, video chu an en ta thap hlawm a.

***************

A TAWP TA