NATHAN SEASON-4 Written by : Aaron Malsawmdawngzuala Episode-14 (V-1)

 NATHAN SEASON-4

Written by : Aaron Malsawmdawngzuala

Episode-14

(V-1)

***************

(A hmasa in thil pakhat sawi lawk ang, comment-na lamah Nathana hi Mizorama a hnu chhuina lam ka ziah apiang hian rin aiin a ho, a pui vak lo tih emaw a inhmeh lo, a mawl hmel, a fing lo tih te ka hmu nual mai a. Ka lungawilo miahlo, in sawi dik reng. Chuvang chuan tun tum ah pawh hian ramdanga a hnuchhuina zawk kan tarlang leh ang, ramdanga a hnuchhuina ho hi a ngaihnawm in ti tlang zawkin ka hria. Chutih rual chuan Mizoram lama a hnuchhuina pawh kan ziak zel tho anga, a lo fing vak tawhlo a nih pawhin a tar ve tawh angah inlo ngai mai dawnnia. Mizorama hnuchhuina hautak deuh han ziah te hi kan society nena tehkhin tawk in awm a, a awihawmloh thin a. Mizoramah case chhui hautak em em, misual fing tawrawt lutuk an awm kan ringlo theuh thin a. Tun tum pawh ramdang/state dang ah hnu chhui leh mai rawh se.)

**********************

Rinawma sawi a nih loh chuan a ho zo vek inti fo thin a, a awm ve tho. Ka sawi thiam em a, ka hmel leh ka nihna in a lo zir bawk nen. Mahse Nathana hnuchhuina ah hian ka awm vek kher lo thin a, ACP lo nih ve takah phei chuan keimaha case han chhui leh buaipui hi ka ngah ve bawk nen.

Police Officer ah pawh a ber kai ka lo ni ve a, NAthana kalna apianga zui dut dut reng kha a hun tawh biklo. Chubakah Nathana pawh SP lai  ani tawh a, hnuchhui hna chu la thawk tho mahse a che chhuak ber a ni tawh lemlo. Diktaka sawi duh chuan e, keimah ber hian hnu ka chhui hnem hrih zawk hial ang.

A puihna ka dil ngai lo, keimah pawhin ka ti thei ve tawk. Ka duhdan phei chuan ka hnuchhuina vel hi han ziak zawk ta ila, ka tan pawh a nuam daih zawk ang. Mahse Nathana chanchin kan sawi miau si a, ka hnuchhuina ve hi zawng tuman in chhiarin in ngaithla peih awm der silo.

Engpawh chu nise hnuchhuina lamah lut leh tan ang aw..a pui lem rem rem viau maithei a ni. Tun tum chu ka sawi angin ka ziak tho anga, mahse ka tel vek dawnlo ania. Hemi case ah pawh hian ka tel ve ringawt a, Nathana kalna apiangah ka kal ve kher zel tawh lo tih kha lo hria ula. Ka tellohna leh ka awmvelohna pawh ka sawi lang tel zel dawn a, Nathana min hrilh leh dan ania. 

*****************

Vawikhat chu Crime Branch ho vairamah kan zu kal leh alawm mawle, Hyderabad ah buaina a chhuak a. Nathana, kei leh Liantea kan zu kal a, chu buaina chinfel tuma kal pawh kan nilo. Anihna takah chuan Nathana chawimawina a kal tur zawk kan ni a, kan awm awl lai a lo ni hlauh nen. Hyderabad lam Police ten ahmaa a hna thawhthat te avang khan chawimawina an nei dawn a, chawimawina an neih hma ni chiah a thil thleng ani, tuna ka sawi mek hi. 

Tawng pawh ka thiam ve sawih sawih tawh a, Liantea erawh reilote a awm hnuah chhungkaw buaina avangin a haw leh nghal daih. Kan thlen tuk deuh lawkah chuan khaw pakhat ah buaina a chhuak chiam mai a, TElanghana police te nen kan va thleng ve nghal vat a. Vai ho tih takah an rapthlak hlawm khawp mai, Nathana lah a lo la thleng mai bawk silo nen.

In thenkhat phei chu a kang hluah hluah a, Mizoram lam a ngaihawm duh ngei mai. A thenin motor te an hal a, gas a puak leh pup zel mai a. Inspector pakhat a lo kal a, "Sir, saw SP NAthana a lo thleng." tiin min rawn hrilh ta hlauh mai. Ka va pan nghal a, "Sir, a rapthlak lutuk..back up kan mamawh." tiin ka va hrilh a.

"RAF ho ka hrilh tawh, khawnge Prasad-a hi a awm?" tiin Nathana chuan min lo zawt let a. "Soukath ali Street ah, buaina a chhuak nasa ber.." tiin ka lo chhang a. "A tha e, lo buaipui ru aw..." tiin kan inthen darh leh nghal a, khawilai mai pawh chu a khu chum chum mai. Nathana chu mipui awmna lamah ava kal phei a, "Sir, helam chu ka lo buaipui mai ang...min ring rawh." Prasad-a chuan a lo ti a.

"I chiang chiah maw?" tiin Nathana chuan a zawt a, "Aw Sir..ka lo buaipui mai ang." tiin a lo chhang leh a. Nu pakhat hi tap zawih zawihin a rawn tlan a, "Ka pu..lo kal teh, min that mai ang." tiin a rawn au nasa mai. "Awle Prasad, lo buaipui rawh aw.." tiin a kalsan ta a. Mipui ho chuan glass bottle, khawnvartuia khat vek chu an rawn vawm a, a alh puat puat mai.

Mipa thenkhatte chuan hmeichhia kut an thlak a, a thenin an vaw bawk a. Mipa pakhatin nu pakhat vih a tum chiah chu Nathana chuan ava hmu hman a, chupa banah chuan pistol in a kap a. Chutah buaina siamchhuak tute ber, mipa rual ho chu an rawn tlan khawm ta mai a. Pakhat chuan Nathana chu a rawn bawh tlu a, Nathana pawh in a pistol chu a thlauh a.

Mahse rang takin a leh thal lehnghal a, a chhuih zui hrep mai. Midang ho pawh chu an rawn tlan khawm a, Nathana chuan a lo thal hmiah hmiah hlawm mai a. An vai mai chuan a sawisa hrep hlawm a, pahnih thum vel tlan chhe hman kha chu an awm tho chuan ka hria. Buaina pawh a reh ta deuh a, press mite pawh an rawn thleng ta.

******************

Nathana chu a lar leh ta vet vet khawp mai, OUR HERO IS BACK tih ten chanchinbu ah chuan an chhuah leh ta chuai chuai mai a. Hyderabad ah mai nilo, Mizoram lamah pawh a darh chak leh ta khawp mai. SUPER COP tih hial ten a hming an phuah sak a, an Pathian biak lo chauh a ni.

Hyderabad lama Police hna a thawh laite kha an han sawi thar leh a, case tamtak a chhui chhuah tawh te nen lam an sawi leh a, a lar thar leh ta vet vet hle mai. In hre tawh tho anga, mahse ka han sawi leh hrim hrim ange. NAthana hi Hyderabad-a seilian a ni a, fahrah a ni. Anu leh pate anga kan sawi thin kha a chhungte, a patea te nupa daih an ni. Chutah pawh an inchhung hnai lutuk lo lehnghal niin ka hria, a patea ka han ti ngawt tak nanga, a chhungte an nih avangin Mizoram lama a rawn thawh khan chen nan a rawn hmang mai chauh a ni.

Tin Hyderabad ah khan Fahrah Run ah a awm thin a, chuta an warden chuan naupang sial tak a nih avangin a duhsak hle a, Police ASI ni turin a enkawl chho a ni. A tir kha chuan Nathana hi corrupt vet vet tak mai kha ania, ASI a nih khan Hyderabad Police Station ah a thawk char char a ni.

Tichuan SI a rawn ni leh a, thamna a la char char a, hausak pawh a hausak phah hle kha. SI a nih lai khan Vizag ah an transfer a, khatah khan misual tawrawt Voltaire Vasu nen an va intawng ta anih kha, a thawnthu pawh in hriat vek tawh kha. Khami hnu khan Inspector ah a kaisang a, Tamil Nadu ah an transfer leh a ni. Kum fe a awm leh hnuah a thisen zawmpui, Mizoram lam ami, tuna a nu leh pate anga kan sawi te nen hian an inhrechhuak ta ani awm a, tichuan ACP ah a kaisan khan Mizoram lamah a lo kal ve ta chauh a ni, chuzawng chu ka hriat dan a ni e.

***********************

Nathana hian Medal tamtak a dawng bawk a, chu chu a larna ber a ni. Nathana chawimawina ni chu a lo thleng ta a, anuam khawp mai. Zanah after party kan nei bawk a, ekhai..vai nula chhelo tak tak te chu e, chhelo tak an ni. Ka hmu fo tawh nangin, party naah kher hi chuan ka la kal vak ngailo bawk nen, mit a tla lek lek thin mai.

Nathana chuan dawhkanah a mah chauh chuan beer a in a, chutih lai chuan nula pakhat, la naupan hmel tak hi a rawn kal a. Abulah chuan ava thu ve a, "Hello..SP Nathan i ni em?" tiin ava zawt a. "Aw ni e." tiin a lo chhang a. "Apoorva ka nia, i fan number one ka nih hi." tiin chunu chuan a chibai a.

Apoorva-i bawk chuan, "I medal dawnte avang khan...congratulation." a han ti leh a. Nathana chu a lo nui suk a, "Ka lawm e, enge i tih thin a?" tiin a lo zawt ve leh a. "Engemaw tihpui che ka duh a." tiin Apoorva-i chuan a lo chhang a. "Eng thil maw?" Nathana chuan a ti hu mai.

"Kum 2 kal ta khan Master of Psychology ka zo va, thuziah lam hi ka tui lutuk a. Crime novel ziah ka tum a, a changtupa chu nangmah anga huaisen hi nise ka tia."

"Haha, tinge keimah ang kher? Changtupa chu ka ni reng alawm."

"Tak tak maw? Buaina i nei lovang maw?"

"Changtupa tura min sawm te anih chuan, engvangin nge ka lo hnial teh lul ang? A hrim hrimin ila naupang hmel si a, crime novel lamte tinge i tuipui teh tlat a?"

"Tinge...hmeichhia zawng zawngte hian hmangaihna lam te, teddy bear te leh make-up chauh te hi kan buaipui vek in i ring em ni? Diktak chuan maw, nikhat tal thisen tharlam tak ka hmuh phawt loh chuan engmah ka ei duh ngailo." tiin Apoorva-i chu a nui hak hak a. "I va bawn em em, Psycho i ni ringawt." tiin Nathana pawh chu a nui huah huah a.

"Ehe...ka hre ta...kha kha ka novel ziah tum mek a ka opening line atan a tha dawn lutuk. Changtunu chu Ananya nise, changtupa hming chu DCP Akshay ni bawk se. Changtupa khan changtunu bulah khan...PSYCHO I NI RINGAWT...han ti vel se."

"Umm...engpawh chu nise, i novel ziah ah chuan ka lo pui dawn che nia. Ka nupui hi Telanghana mi ve tho ania, Vizag atangin Hyderabad ah hian an insawn a. Amah chu Mizoram lamah a awm a, an inah hian ka awm hrih a. Hei hi ka number ania, tah hian min rawn call dawnnia." tiin Nathana chuan a card a pe a, an in kalsan ta a.

*****************

Atuk lawkah chuan Inspector Prasad-a ruang chhar a ni a, anmahni chenna inah ngei a ni. Nathana nen chuan zing dar 5:30 velah chuan kan va thleng a, mipui pawh an lo tam leh tawh khawp mai. Sanvi te inah hian Nathana nen hian kan thleng dun a, Sanvi nu hian tunlai tak chu Nathana hi a eilo angreng khawp mai, a chhan awm ang chu in hriat mai ka ring.

"Hyderabad Police Force zawng zawng an awm vek amawnile, anva tam em em ve." Nathana chuan a ti nuah nuah a. "Crime Branch ami DCP Sathya leh ACP Raghava te pawh inchhungah sawn an awm, va lut ve ang hmiang." ka ti a, inchhung lam chu kan va pan a. Kawngka bulah chuan DCP leh ACP te chu an lo ding a, DCP SAthya chuan eiloh hmel tak hian Nathana chu a lo en a.

"Nizan nuam i ti bawk a, saw le..va en ve ta che." a han ti deuh kher a. Nathana chu  anui suk ringawt a, inchhungah chuan kan va lut a. Prasad-a chu thutthleng ah phuar hlawmin a lo awm a, a hmui chu plaster-a tuam a ni. A hrawkah zaina hnuhma a awm bawk a, a banah hliam a nei nual bawk.

A chalah chuan paper them a inbel a, telugu tawngin engemawni hi a inziak bawk. Chhuatah chuan thisen a kawi nuai bawk a, hmuh hrehawm tak a ni. Nathana chuan ava pan hnai a, paper them, Prasad-a chala lo inbel chu a han enchiang a. "SP NATHAN...I WANT YOU.." tih hi a lo inziak a.

"A chemte hman chu te leh mahse, a hriam hle thung. A ban tha a zai chat a, a hrawkah a zai bawk. A thisen zawng zawng deuhthaw a chhuah tir a ni ber, victim hi hreawm taka a thih theih nan chuan tihdan tur a hre khawp mai. A hun pawh a hria, plan tha tak a siam hmasa a, tichuan a that a ni." tiin Nathana chu zawi te te chuan  aphun nuah nuah a.

DCP Sathya chuan, "Hey Mr. Task Force, Investigation hi i tih tur anilo, keimahni hna zawk anih hi aw.." a lo ti khur khur a. Nathana chu a nui suk a, "Sir, he tualthattu hian love letter min hnutchhiah a, ka bawhzui angai alawm." tiin a lo chhang a. Thawk a han la leh te te a, "Witness a awm em?" a han ti leh a.

DCP chuan, "Darkar chanve vel liam ta khan a nupuiin ti hian a hmu thut a ni awm a, witness dang a awmlo. Forensic Team ho pawh an lo thleng tep ang, minute 5 hnu velah chuan an lo thleng mai ang. In hi kan hual chhuak vek tawh a, pheikhawk hniak kan hmu nual bawk. Hemi area zawng hi kan block tawh a, vengdang mi luh phalloh a ni tawh bawk." tiin a chhang a.

Nathana chuan min rawn en a, "Rinawm, nizan kan party naah khan Prasad-a hi a tel ve em?" tiin min zawt a. "Aih tello." tiin ka lo chhang a. "FAte an nei em?" tiin min zawt leh a. "Aih neilo, Prasad-a hian account tam tak a nei a, mahse deposit engmah a awm lo." tiin ka chhang leh a. Nathana chu a han hawi kual a, "Rinawm, hawh teh...i chhuak teh ang." a ti a, kan chhuak ta a.

*****************

Press meeting koh a ni a, media ho chuan zawhna an ngah khawp mai. DGP chuan thu sawiin, "Kan department hian Inspector Prasad-a tual thihna hi kan ngai serious hle a, he tualthattu hian kan department mai nilovin kan department fapa duatlai ni thin, Mizoram Police Department-a min kalsan ta, Senior Superintendent of Police, Mr. Nathana a cho hi a ti sual hle a ni. Chuvang chuan he case hi SP NAthana hnenah hlan a ni anga, aman a buaipui ang." a ti lauh lauh mai a.

Press mite zinga mi pakhat chuan a ban a rawn phar chhuak a, "Mr Nathan, zawhna ka zawt thei che angem?" a rawn ti a. "Thei lutuk e." tiin Nathana chuan a chhang a. "Inspector Prasad-a ruang ah khan tualthattu khan lehkha a hnutchhiah niin kan hria a, enge awmzia?" tiin a zawt a.

Nathana chu  akhi suk a, "Nia, media te hnena invawrh lar a tumna pawh a ni mahna.." a han ti a, mipui te chu an nui deuh hak hlawm a. Nathana bawk chuan, "He tualthattu hnenah hian thil sawi ve ka duh a, alo ngaithla anih chuan uluk takin lo ngaithla rawh se. Thil tih sual lian tak pahnih anei a, pakhatna chu Inspector Prasad-a a that hi a ni a. A pahnihna chu kei min challenge hi a ni, reilote ah a thil tihsual pahnihte avang hian hrem  ani thuai ang. Chuzawng chu a ni e, ka lawm e." a han ti leh a, kut an beng dur dur mai.

*******************

Nathana chuan he case a amah pui tur hian vai ho nilovin kei Mizo tlangval senior ACP Lalrinawma ngat hi min thlang leh ta a, ka lawm khawp mai. DGP phalna thlapin Hyderabad Police Station ah chuan chumi ni atang chuan dawhkan hran ka nei ve ta a, Nathana vang hi chuan thil thlawn pek hi ka va dawng nasa thin em.

KA theihtawpin information ka khawn khawm a, Sanvi zarah tawng ka lo thiam ve sawih sawih tawh bawk nen, harsa viau mahse a challenging ka ti khawp mai. Nathana chu a rawn kal a, "News awm em?" a rawn ti a. "Dr Rajesh-a leh Shekar-a, forensic department lam ami te chu ka be tawh a, report pawh an peih thuai ang. Hei hi Inspector Prasad-a phone atanga a call log ho an ni a, an hming te nen lam a inziak vek e." tiin file chu ka pe a.

Chutih lai chuan SI pakhat a lo kal a, "Sir, Prasad-a call log ah khan hemi number hi a tel ve a, i hriat hnu a nih ka ring." tiin number chu Nathana a rawn pe a, number neitunu thlalak pawh chu a rawn tilang a. Thalak ka han hmu chiah chu ka phu zawk mai, "Ehe, henu hi nizan party naah pawh ka hmu." ka lo ti vat a.

Nathana chuan number chu a en vang vang a, "Apoorva-i maw?" a ti vang vang mai a. Chunu chu tudang nilovin party naa Nathana betu, novel ziak thin anga insawi. Nula chhelo tak, la naupan hmel tak leh hmaifang tha tak..Apoorva-i ngei kha a ni. Nathana chuan, "An inah ka va kal ange, tha takin hna lo thawk ang che." tiin min kalsan ta a.

*********************

Apoorva-i te in kawngka chu Nathana chuan a han kik karh karh a, Apoorva-i chuan a rawn hawng a. Mak tih hmel tak hian, "Ehe...hello?" tiin a lo nuih sang a. Nathana chuan Apoorva-i chu a han en vang vang a, a kut veilamah naute lem hi a lo keng a, ding lamah chemte a lo keng bawk a.

"Mi i that mek em ni? Nakin deuhah ka lo kal leh zawk dawn mi?" nui chung chuan Nathana chuan a han ti a. "Nilove, lo lut rawh." tiin a luh tir a. Apoorva-i chuan ring tak hian, "Nu..nu..pa..lo kal teh u." tiin anu leh pate chu a ko vak vak a. Anu chu chemte kawng bawk hian choka atang chuan a rawn chhuak a, fanghma lian tak hi a rawn keng tel bawk a.

"Nu, hei hi SP Nathan a nih hi, Task Force leader, crime branch..Mizoram a mi kha.." tiin a inhmelhriat tir a. Anu chuan nui chung hian, "E..hei hi maw Nathan an tih chu...ava hmeltha ve. Changtupa ber kha nimaw?" a lo ti nghal chiam chiam a. "Nuuu..i mawl ami?" tiin Apoorva-i chuan a lo khap vat a.

"Aww...i novel ziah a changtupa tur kha alawm ka sawi." tiin anu chu a han nui leh huah huah a. "Hei hi ka nu a nih hi, Sreelatha-i  anih hi." tiin Nathana nen chuan a in chibai tir a. Chutah apa alo kal leh a, hnim chehna bakcheh lian tak, hriam hmel em em mai hi a rawn keng a.

"Pa hei hi.." atih lai chuan apa chuan, "Ka hria alawm...Vanakam Sir Nathan.." tiin a chibai ve bawk a. "In chhungkua ka hmu thei che u chu ka lawm hle mai." Nathana chuan a han ti a. "Coffee ka va siam ange.." tiin Apoorva-i nu chu choka lamah a phei leh a, apa pawh chuan, "Keipawh hnim ka va chep fai ange." tiin a kalsan ve ta bawk a.

"I pa khan tinge Vanakam a tih daih a?" tiin Nathana chuan a zawt a. Nui chung hian, "Aaa..Tamilian ania, Telugu tawng a thiam lutuk lova." tiin a lo chhang a. "Anih chu, mi lu tan bun a thiam hmel thung alawm...hehe, a hrim hrimin kha...chemte leh nautelem te kha..engatan nge i tih a?" tiin Nathana chuan a zawt leh a.

"E hei hi maw, siamthat ka tum mawle.." tiin dawhkanah chuan a dah a. Nathana chuan, "Hmanrua i keng vek sia, psycho chhungkua in nih duh hmel hle mai." a han ti leh a. "Kan ni reng alawm, i fans te vek kan nih hi. Taka..news atanga ka lo hriat dan chuan misualte zingah pawh nangmah ngaisangtu an awm tho a ni awm a..tu emawni in Inspector Prasad-a a that a, tichuan nangmah hi a target che an ti bawk a...a dik em?" tiin a zawt leh a.

"Um, mahse mipa nge hmeichhia a nih ka la hrelo, ka chhui mek."

"Chuan engtin zel?"

"Aaa..ka hre lo, in in hi ka fang kual thei angem?"

"Umm, inhnuai hi chu tizawng hi animai, inchung lamah ka room a awm a, han kal ila."

"A tha alawm."

Apporva-i chuan Nathana chu a room ah a hruai lut a, "Hei hi ka room chu a nih hi." a han ti a. Nathana chuan a en kual a, bangah te chuan lehkha a lo intar khat vek mai. Scientist ropui tak tak thlalak te, misual turu tak tak thlalak te leh chanchinbu-a crime chungchang bik an ziahna te chu a lo in tar chuai mai a.

Chutih lai chuan Apporva-i chu anu in a rawn ko va, "Bawihte, coffee a in theih e." a rawn ti a. "Coffee ka rawn chawi chho ang, lo awm rawh." tiin a chhuk san ta a. Chuveleh Nathana chuan room chu a dap tan ta a, pawhdawh pakhat a hawng a. A chhungah chuan hmanraw hrang hrang, pizza cutter te, chemte te leh thirzai te a lo awm nuai mai.

Pawhdawh pakhat a hawng leh chu lehkhabu tamtak a lo awm a, paper pahnih a lo awm tel bawk a. Paper chu a la a, pakhat zawkah chuan pen tui sen hian "THAT VAT RAWH" tih a lo inziak kuau mai a. Bang chu a han en leh vang vang a, a sira pangpar khawna hnung a awng lo awm chu ava hmu ta a. A va pan hnai a, bang awng chu a han kuai phei a.

Bang chhungah chuan chemte bawk a lo awm leh a, "A va mawi lo ve." Apoorva-i chuan a rawn ti thut mai. Nathana chu a hawi let vat a, "Midang thil khawih vak vak te chu thil mawi lo tak a ni lawm ni?" tiin coffee no 2 chu a rawn chawi phei a. "Just curious, that's all." tiin Nathana chuan a lo chhang a.

Thutthlengah chuan an thu dun a, "Heng ho hi enge awmzia?" tiin Nathana chu a hawi kual a. "Research anih hi...crime novel ka ziak dawn ka tih kha i hre tawh lo em ni?" Apoorva-i chuan a ti a. "Hria e." tiin a lo chhang a. "Tualthahna hrang hrang, mi rilru buai chanchin te.." a tih lai chuan Nathana chuan, "Nihleh Prasad-a kha rilru buai em ni?" tiin a zawt ta mai a.

"Tu maw?"

"Inspector Prasad..nizana boral ta nen khan engtin nge in inhriat?"

"Ihh...enge awmzia?"

"I number hi Prasad-a call log ah a awm ve a ni."

"Aw..kha kha...anih chuan min ringhlel tihna em ni? Awii a van nuam dawn.."

"Apoorva uang lo teh, he thil hi a serious viau ania."

"Ka hmu duh che a, tichuan ka hmelhriat pakhatin Prasad-a number hi min pe a. Kar hnih liam ta khan kan inhmu ngei bawk a, mifel tak a ni. I medal party ah pawh khan kal ve turin min sawm a, tichuan nang ka hmu ta che a ni."

Chutih lai chuan Nathana phone a rawn ri a, "Hello?" Nathana'n a han tih chuan phone a tang chuan aw tham tak hian, "Hi Nathan.." a rawn ti a. "Tunge aw?" Nathana chuan a han ti leh a. PHone ami chuan, "Min theihnghilh tawh em ni? Tukin zing khan thilpek ka pek che kha." a rawn ti ta mai a, Nathana chu room atang chuan a chhuak nghal a.

Phone ami bawk chuan, "Press meet pawh kha TV ah ka lo en ve a, thil ka tisual angin i sawi bawk a. Pakhatna chu PRasad-a ka thah vang kha ania, pahnihna chu ka challenge vang che tiin i sawi a. Khai a...movie te pawh a ang zawk alawm le." a rawn ti leh a. Chutih lai chuan Nathana chuan chupa phone number chu track turin message min rawn thawn a, SI Ravi-a nen chuan kan chhuak ve ta nghal a.

"Min man ang maw?" tiin phone ami bawk chuan a rawn cho leh nasa mai. "Tinge, i ring chiah lo em ni?" tiin Nathana chuan a lo zawt let a. "Haha, he Police Officer ka biak mek hi tunah hian nula pakhat nen roomah an awm dun a ni tih ka hriat chuan engvangin nge ka rin teh lul ang che? A hrim hrimin i nula awmpui mek kha a chhiat loh kha, nizan party naah khan ka hmu a." a rawn ti leh ta mai a.

Rang takin Nathana chu a chhuk thla a, Apoorva-i chuan a um bawk a. "NAthan, tinge? Enge awmzia?" tiin a zawt vak vak a, mahse Nathana chuan a chhang lo. Pawnah a chhuak a, a hawi kual vak vak a. "Min zawng kual em ni? Khatah ka awm lo, kha nula te ina i lut lai kha ka hmu a ni. Engpawh chu nise victim dang in nei leh tawh ania, Murgi Chowk ah..lo kal ula, a ruang hi rawn la ru. Location chu ka rawn share ang che, anih phawt le." tiin phone chu a dah daih mai a. Message a lo thleng a, location chu a rawn thawn ngei bawk a.

******************

Nathana chu ka phone a, "Aw enge ni ta?" a rawn ti a. "Sir, call chu kan trace dawn e..tunah." tiin ka hrilh a, phone chu kan dah leh nghal a. Kei leh Ravi-a leh officer dangte nen chuan kan chhuak a, tracing chu kan bei tan ta. Nathana kal a tum chiah chu Apoorva-i chuan, "Nathan, enge awmzia?" tiin a zawt leh a.

"Khua hi lo chhuahsan lo hram ang che u, ka hriatpuina lo chuan.." Nathana chuan a ti a. "Ka lo kal ve thei angem? Ka research neih mek nen a inzawm tho sia." tiin a lo zawt heu mai. "Nilove..ka kal phawt ange." tiin Nathana chu a kal ta a. Location chu a chhui zel a, Murgi Chowk a thlen meuh chuan khua  a thim der tawh mai.

***********************

TO BE CONTINUE