NATHAN SEASON-3 Episode - 9

NATHAN SEASON-3

Episode - 9

CINDERELLA'S TWIN SISTER

(Part-4)

Written by : Aaron Malsawmdawngzuala

***********

Hmanhmawh em em hian Lily chu a rawn tlan phei hlawp hlawp a, Rinawma bulah chuan ava ding chat a. Hlauhthawn hmel em em hian, "Rinawm..Rinawm..Opa an man. Sentei thah a tum an tia, an man.." a ti hluam hluam a. Rinawma chuan, "Kal vat ang." a lo ti a, Station lam an va pan ta nghal a. Station ah chuan IG chuan OPa chu alo dawp mek a, "Op, tun chiah ka zawt tawh ang che, thudik chu sawi mai rawh." a ti a. Opa chuan IG chu melh pawh a melh duhlo, thinrim hmel em em hian a melh ngai a melh reng a. Zawi sap hian, "Thudik alawm ka sawi, engmah ka tisual lo." a ti tlat mai si a. IG chuan, "Baseball bat kha i bulah a awm a, Sentei pawh kha i bulah nikhaw hrelovin a let reng bawk. Chumai ala nilo, baseball bat ah khan i finger prints kan hmu bawk a ni. Tin, doctor sawi dan chuan Sentei thisen ah khan herbal substance hmuh a ni leh bawk a, chupawh chu in ina kan rawn man chhuah windflower damdawi nen khan a in ang chiah chiah bawk." a ti a. Opa chuan, "Ka tih a nilo, ka nau ani a, thah ka tumlo hrim hrim. I duh chuan ka Whatsapp message te hi check la, Sentei'n message min rawn thawn a, ware-house ah lo kal vat rawh a ti a. Ka va kal a, Sentei chu tikhan a lo let reng a, chuzawng chu a ni." a ti a. IG chuan, "Dawt i sawi ka ti lo, ni e..Sentei chuan a ko che a, tichuan in inhau a, i vaw ta mai a ni..a dik em?" a han ti leh a. Opa chuan, "Tunchiah ka sawi tawh ang...min koh avangin ka va kal a, mahse Sentei chu a lo let reng tawh. Ka kal hma khan tu emawni chuan a lo vaw tlu hman tawh tihna a ni, chu chu thu dik a ni." tiin a tang ve tlat mai bawk si a. IG chuan, "Sentei chu a thilo hlauh a, mahse ala harh chhuak lo. A harh thuai anga, thudik kan hre tho tho ang." a ti a. Opa chuan, "Ni e, a harh chhuah vat theih nan ka lo tawngtai ang." a ti ve ngat a. IG chu a nui huk a, "Tawngtai a? Pathian awm te hi ilo ring ve a nimaw? I lemziah en chuan ramhuai leh thlahrang bak i ngaihtuah loh hmel si a.." a han ti vel a. Opa chuan, "Ilo buaina tur a  awmlo, Sentei chu a lo harh chhuak anga, pawisawilo ka nih zia a rawn sawi vek mai ang." a ti a.

Atuk zingah chuan Olivia-i chu dining hall ah chuan thingpui sen a lo in mek a, chutia thingpui a chawk a chawk chu a chawk per palh a, a bula napkinah chuan a far a. Napkin chu a val ta kulh mai a, thisen ang tlat hian a hmu lehnghal. Chungte mai mai chuan a awm a ti nuamlo a, a khur leh ta der mai. Nathana chu a lo kal a, Olivia-i rilru hah hmel taka a lo thu kun ngawih ngawih chu a hmuh chuan mak a ti kher mai. Nathana chuan a darah vuanin, "Olivia.." a ti thut mai chu Olivia-i chu a phu chiang kher mai. A lo hawichhuak vat a, NAthana hmel a hmuh chuan a thaw huai mai a. Nathana chuan, "I tha maw?" tiin a zawt a, Olivia-i chuan, "Aw, ka tha e...englo ania, kar khat chhung lekin ruang pahnih ngawt mai chhar a ni a, keini ang hmeichhe tan chuan a ralmuang lo em a ni." a ti a. Nathana chu a bulah chuan a thu a, "Nimin khan function lai khan i chhuak daih kha ka lo hmu a, khawnge i kal a." a ti a. Olivia-i chuan, "Bakery ah, cake lam turin ka kal a. Birthday lawmna tan hma khan hun ka nei silo a, i duh chuan staff te pawh i zawt thei ang." a ti a. Nathana chuan, "Angailo..ka ring che alawm. Nihleh i lo haw lamah engemaw thil danglam deuh tawn i nei em?" a ti a. Chutih lai chuan Simona alo kal a, "Misual chu man a ni tawh e, a lawmawm khawp mai." a rawn ti a. Nathana chuan a lo hrethiamlo kher mai, Simona chuan Nathana bulah chuan, "Atawp atawpah chuan an hrechhuak ta e, Nathan..i ti tha khawp mai." a ti a. Nathana chuan, "Keimah maw...aaa, hehe ka lawm e." a ti ringawt a. Olivia-i kutah chuan a vuan a, "Hlau tawh suh, duhtak..rin ang ngeiin Opa chu tualthattu a ni e. Chuan maw Nathan, i man chhuak dawn tih hi ka ring reng a  ni." a ti a. Nathana erawh ala ngawi reng thung a, Simona bawk chuan, "Olivia, hawh teh...hall a mi tur parda va en ang hmiang, va bazar dun teh ang." a ti a. Nathana chuan, "Ni e, va bazar ru." a lo ti a. Simona te nupa chu an kal a, NAthana erawh a ngaih a la thalo hle thung a.

************

Sentei awmna Private Hospital ah chuan Rinawma chu ava kal a, Sentei an dahna ward ah chuan a lut tlang tawp a. Chu veleh indicator chu a lo ri rut rut mai a, doctor pakhat a lo tlan lut a. Doctor chuan, "Enge awmzia?" a rawn ti a. Rinawma chuan, "Ka hrelo, ka luh veleh khan ti hian a awm nghal." a ti a. Doctor chuan indicator chu a han check a, "Indicator a lo in off palh a nih dawn hi, a hlui ve deuh hlek tawh a, a tha tawh e." a ti a. Rinawma chuan tukverh lo inhawng chu a en vang vang a, "Doctor, tu emaw alo lut a ni ngei ang, hei tukverh pawh a inhawng alawm." a ti a. Doctor chuan, "KAn kalh lo a, chuvang chuan a inhawng aniang chu..a hrim hrimin damlo chhungte chiah kha kan hrilh si a, tunge i nih a?" a ti a. Rinawma chuan, "Police ka ni, ASP." ati a. Doctor chuan, "Khawngaihin min chhuahsan rawh Officer, damlo hi a serious ania." a ti a. Rinawma chaun, "Doctor, ka thusawi kha a dik angah ngai la, Sentei thah tumtu khan ala thilo tih a hria anga, rawn thah a tum leh a ni ngei ang." a ti a. Doctor chuan, "Officer, khawngaihin chhuak phawt teh." a ti a. Rinawma chuan, "Enteh, a thisen exam result ka hre duh a ni." a ti a. Doctor chuan, "Chutiang kan pe chhuak ngailo, private hospital a nih hi.." a ti a. Rinawma chuan, "Anih leh zawhna ka zawt che anga, aw leh aih chiahin min chhang dawnnia...a thisen ah hian herbal substance in hmu a, a hming chu Pusatilla Vulgaris a ni tiraw, a dik em?" a ti a. Doctor chuan, "Aw.." a lo ti a. Rinawma chuan, "Ka lawm e." a ti a, a chhuak nghal daih a.

Nathana pawh Lodge bul velah chuan a teikual a, Rinawma chuan a rawn phone a. NAthana chuan phone chu la in, "Hello, Rinawm...khawnge i awm a?" a ti a. Rinawma chuan, "Sir, khawnge i awm zawk? Ramhnuaiah te khan ilo muthlu ve ange aw?" a rawn ti a. Nathana chuan, "SAwi vat teh..signal a chhe si." a lo ti a. Rinawma chuan, "Sentei thah tum tu an awm leh a ni. Hospital atangin ka lo chhuak chiah a, Opa hi Sentei thah tumtu kha ni ta se, Hospital ah hian engtin nge a rawn kal leh theih ang? Station ah a awm daih si a?" a ti a. Nathana chuan, "Nia, ka hre biklo. Opa chungchang hi ka hraitbelh a, pharmacy pakhatah ka va kal a, chuta mi chuan Opa hian ama drugs siamchawp a lo zuar thin a ni awm e. Han ring chhin teh, eng hmanga a siam nge ni ang?" a ti a. Rinawma chu a nui sak a, "Windflower." a lo ti a. Nathana chuan, "Ni chiah e, mahse a customer te chu tute nge an nih hriat a ni talo a. Mahse thil pakhat hriat ka nei leh a, a customer pakhat chu hmeichhia a ni. Chuan ka hriat leh dang bawk chu maw...damdawi siamna recipe a zaihna kan hmuchhuak leh a. Ka la hre belh zel bawk...chumi hawrawp hria chu an lo awm leh a, an sawi dan chuan VAnlalchhuanga, Opa pa hawrawp ngei a ni an ti." a ti a. Rinawma chuan, "Mahse a thi tawh si a..." a lo ti a. Nathana chuan, "Nia, kum 10 kalta khan a thi tawh. An inah ka kal dawn mek a, chanchin ka lo hrilh leh ang che." a ti a. Rinawma chu Sentei hmu tur chuan Hospital chhungah chuan a let leh a, kawngka a lut tur chiah chu titi thawm a hre ta a. A han ngaithla chiang a, George-a leh a bialnu, IG nupui te kha an lo ni a, IG nupui hi Angela-i  ani. Angela-i chuan, "George, engkim hi hrilh vek mai ang..kan inzep reng theilo ang." a ti a. George-a chuan, "I mawl em ni? Crime-scene ah an va man a, Rita-i kha a thah nilo mahse Sentei thah a tum nia.." a tih lai chuan Angela-i chuan, "Mahse, keimahni pahnih vangin a tihsual ni miahlo ah a tuar dawn asin." a ti a. George-a chuan, "Keimahni vang a nilo...enteh Bawihte, hrilh chu ka hreh miahlo, mahse tun dinhmun ah hi chuan i pasal sawn min manchhuak chiang lutuk ang." a ti a. 

Rinawma chu ava lut thut a, an hmaah tak chuan ava thu a. An lo hlauthawng nghal em em a, Rinawma chuan, "George, nang chuan min hria a...chuan, Angela..kei hi ASP Lalrinawma, Crime Branch ka ni e. Enteh u, engemaw min hrilh tur in nei in ka hria." a han ti a. Angela-i chuan, "Min lo ngaithla ru reng a ni tiraw? Thudik kan sawi mai loh avangin kan tihpalh a ni e. Ka pasal hi Police a ni a, ka thuruk hi a hriat hunah chuan engti kawng mahin min ngaidam dawn lo tih ka hria a ni." a ti a. Rinawma chuan, "Opa chungchang chauh ka ngaithla duh, nangni love-story mai mai nilovin."a  ti a. George-a chuan, "Angela-i nen hian Angela-i pa te inah kan in hmu ru thin a, khami ni khan ina kan awmdun lai khan thawm kan hria a. Thawm chu kan ngaithla chiang a, inchhung lam pana lo kal niawm tak a ni. Room ah chuan kan biru a, inchhunga lo lut chu tudang nilovin Opa a lo ni a. Opa chuan a bungrua te a rawn keng a, tichuan lem a ziak nghal char char a, dar 7 thleng a awm a ni. A haw hnu ah party naah kan kal ve ta chauh a, chuvang chuan ania ka lo thlen tlai em em nachhan..." a ti a. Rinawma chuan, "A awmzia chu Rita-i kha Opa thah a nilo tihna animaw?" a ti a. Angela-i chuan, "Aw, a thah a nilo tawp ang." a ti a. Rinawma chuan, "George, a sual thlak khawp mai. In khata cheng ho in ni a, hetia tih chu..." atih lai chuan George-a chuan, "tualthattu...mi hlauhawm a nih saw." a ti a. Rinawma chuan, "Anih nang kha...mi nupui a ruka ngaizawng i nih kha..enge i nih vak bik?" a tih chuan George-a pawh a ngawi hmak mai. Rinawma chuan, "Ka lawm e, ka kal ange." a ti a. Angela-i chuan hlauthawng tak hian, "Officer..ihhh.." a tih lai chuan Rinawma chuan, "Ka sawi chhuak lovang, lungngai suh u." a ti a, a chhuahsan ta a.

*************

Rinawma chu Lodge ah chuan a let leh a, room a luh chuan Nathana chu a lo awm leh daih tawh a, thlalak a lo enkual mek a. Rinawma chuan a thil tawn te chu a sawi mawlh mawlh a, "Tichuan...sawi chhuah sak loh mai chu a tha in ka hre ta a.." a tih lai chuan Nathana chu a en a, alo ngaihsak loh hmel hle mai. Rinawma chuan, "Sir, min ngaithla em?" a ti a. Nathana chuan thlalak pakhat chu a han hmuh a, hmeichhe thlalak, hnima alo mu lai hi a ni a. NAthana chuan, "Enge a an?" a ti a. Rinawma chuan, "A hmel chu a that kha, mahse ka type a nilo." a lo ti a. Nathana chuan, "Rinawm, tualthattu hian hmeichhia te zingah pawh target bik a nei a ni." a ti a. Rinawma chuan, "Ni e, victim te kha an in ang hlawm em em a, an chhelo em em bawk, abak enge awm vak?" a lo ti hlur a. Nathana chuan, "Opa thlalak kawl ho ah te khan hmeichhia zawng zawng te kha an sam a buang vek a, a sei vek bawk. Mahse Annie kha...a sam a dum a, a tawi bawk." a ti a. Rinawma chuan, "Rita-i pawh sam dum a ni a, a hang deuh bawk." a lo ti a. Nathana chuan, "Rita-i kha a thih hma darkar khat kha chuan a sam a dum a, Opa hi tualthattu kha ni ta se, Rita-i kha a that lovang a, midang zawk a target ngei ang. Mi danglam bik a thlang lovang, mi pangngai chauh a thlang ang. Chubakah witness te pawhin an sawi a, Opa khan Rita-i kha  athat lovang an tih vek kha." a ti a. Rinawma chuan, "Rita-i thattu chu Opa pawh lo ni tehreng se...tunge Sentei ward-a khawl kha lo off ta ang?" a ti a. Nathana chuan, "Kalna tur ka nei." ati a, a tho thut a, a chhuak ta daih mai a.

Opa chu cell atang chuan an hruai chhuak a, room pakhatah an luhtir a. Roomah chuan dawhkan hma ah Nathana alo thu a, "Hello Op, i lawyer tur ka nia, lo thu rawh." a lo ti vel a.  Opa chuan, "Ngatinge nang kher?" a lo ti hmuk a, Nathana chuan nui chung hian, "Thil tha tih chakna thlipuiin min nuai ani ngei ang, tu emaw tal chhanhim ka chak tlat a." a ti a. Zalo deuh hian Opa chu a nui suk a, "Fiamthu nuihzatthlak tak a ni." a lo ti leh hmuk a. Nathana chuan, "I nuih a za a, a lawmawm e...Op, misual chu ini lo tih ka hria...mahse he thalak hian min ti hrilhhai takzet a ni." tih pah chuan thlalak pahnih in ang chiah, nichin lawka Rinawma a hmuh tak, hmeichhe pakhat hnim zinga mu, a awm zawna lily pangpar awm , Opa ware-house atanga a chhar chu a han lek kang a, Opa hma zawnah chuan ava dah a. Opa chuan Nathana chu rum zet hian a melh a, "Hei hi khawi atanga i neih nge?" a ti a. Nathana chuan, "Khawi atanga ka neih nge tih chu i hria, sawi vat mai teh." a ti a. Opa chu a zam ta hle mai, "Ni e, heng thlalak te hi keima lak ngei ani. Dawt ka sawi a, ka tihpalh. Ka model te hi ka hrai rui thin alawm, ka pa hi biologist a ni a. Damdawi thar a siam chhuak a, herbal drug a ni a, a recipe a zaihna ka ruksak a ni. Tichuan thingpui ah te ka pawlh a, ka model te chu ka in tir ta thin a ni. Tichuan an muhil a, thla ka laksak a, abak engmah ka ti ngailo." a ti a. Nathana chuan, "Thalak chu engtin nge i tih?" a ti a. Opa chuan, "Ka en a, a lem ka ziak thin." a ti a. Nathana chuan, "Nihleh ipa nen khan engvangin nge in inhuat?" a ti a, Opa chuan, "Ka thlalak zinga pakhat a lo hmufuh a, a recipe kha ka ruksak ti a hrechhuak a, kan insual phah nghe nghe. Tichuan Annie a thih khan, keima thah angah a ngai tlat bawk." a ti a. Nathana chuan paper pakhat a phawrh a, "Hei hi em ni recipe chu?" a ti a. Opa chuan tap tep hian, "Aw..khawi..khawi ami nge i hmuh a?" a ti khur dar dar a. Nathana chuan, "Chu erawh chu ka zawnchhuah ala ngai a ni...ka haw viau che nangin, ka chhuah zalen ngei ang che, ka tiam ache." a ti a, a chhuak ta a. Opa chuan zawi te hian, "Ka lawm e." a ti sup a, a tap zawih zawih mai.

**********

Lodge bulah chuan thudun in Simona te nupa chu an lo tit mek a, Olivia-i chuan, "Ka ziaawm tawh,ngaihtuah ka ngai tawh lo." a ti a. Simona chuan, "I hna atang hian hun engemaw chen tal chu chawlh i lak hrih a ngai a ni." a ti a. Olivia-i chuan, "Bansan mai ka duh tawh zawk." a ti a. Simona chuan, "I hna tello te chuan i awm thei nang." a lo ti a. Olivia-i chuan, "Engvangin maw? Ka enkawl che anga, ahma ang khan kan awm leh ang. Inhmangaih taka kan awm lai te, tleirawl kan nih laia inngeih taka kan awmdun ang khan...duhdang i neih hma a, keimah chauh min hmangaih lai ang khan." a ti ta mai a. Simona chuan phawk hru hian a melh a, "Enge i sawi awmzia?" a ti vat a. Olivia-i chuan, "Ka hre vek alawm, ka hriatna pawh a rei tawh..mahse hun kal tawh a ni a, ka thinrim lo. Bul tan that leh ka duh a ni..a bul atangin.." a ti a. Simona chu a ngawi vang vang a, "Ni e, min ngaidam rawh. I sawi dik e, ka tihpalh a ni." a ti a.

Lodge pawnah chuan Nathana chuan Lisa-i fanu chu Cinderella-i thawnthu alo hrilh mek a, Rinawma chu lo kalin, "Marcus-a leh Brandon-a te lo len huna thawnthu hrilh dan tur ilo zir lawk em ni?" tiin a rawn fiam a (Marcus-a leh Brandon-a te chu tute nge an nih in hriat nghal mai ka ring). Nathana chuan Lisa-i fanu Baby bulah chuan, "Tikhan Cinderella-i chu a kawr hak a danglam apiangin an hre hrang ngailo tih i hrethiam tawh em?" a ti a. Baby chuan, "Aih, a hmel te chu a ngai reng a. Eng ang pawhin inchei danglam se, a hmel a ngai reng tho." a ti tlat a. Nathana chuan, "Anih leh tihian i sawi dawn teh ang, hmeichhe pahnih an awm a, pakhat hming chu.." a tih lai chuan Baby chuan, "Cinderella." a lo ti vat a. Nathana chuan, "Umm..Cinderella-i chu lo ni ta se, pakhat zawk erawh chu lalfanu a ni. A fel em em a, a hmeltha bawk a, Cinderella-i nen chuan an hmel a in ang chiah bawk. Tichuan nikhat chu an dinhmun an inthleng ta a, Cinderella chu lal inah chuan a awm ve ta thung a, nuam a ti em em a. Tichuan lalfanu erawh chuan lalfapa hmeltha em em mai hi alo tawng thar a, a hmangaih em em a, lalfanu pawh chuan a hmangaih em em bawk a. Tichuan...alehpek ah enge thleng i hria em?" a ti a. Baby chuan, "Hre nang." a lo ti a. Chutih lai chuan Lisa-i a rawn kal a, "Baby, lo kal rawh le, chaw ei a hun." a ti a, a hruai lut ta daih mai. Rinawma chuan, "Sir, ka lo ngaithla tui lutuk a, min hrilh zo law law teh.." a ti vel a. Nathana lah chuan sawi chhunzawm ve zelin, "Tichuan Cinderella-i chu a thinrim ta em em a, lal fanu chu thatin a dinhmun a luah ta a. An in chu a chhuahsan a, tuman an manchhuah theihloh nan achhungte nena an inlaichinna chu a chhu chat vek bawk a. Tichuan lal fapa pawh chuan a hre hrang tawh silo a, achhan chu vawikhat chauh ala hmuh vang a ni." a ti a. Rinawma chuan, "Anih chuan..Cinderella chuan lalfanu ruang chu pangpar in a cheimawi a, kawr chhe tak tak te hak tirin amah Cinderella amaw an tih theih nan.." a ti a. Nathana chu a lo nui sak a, "Naupang thawnthu..." a lo ti a. Rinawma chuan, "Olivia-i thawnthu a nih i ring em?" a ti leh a, Nathana chuan, "Ring ele...mahse finfiah erawh a har ang." a ti a.

*******

Rinawma chuan Lily a phone a, inhmuh puiah a sawm ta a. Rinawma leh Lily chu an inhmu leh ta a, Rinawma chuan, "Lily, min puih angai a ni." a ti a. Lily chuan, "Engthil ah nge?" a lo ti vat a. Rinawma chuan, "Annie leh Rita-i thattu chu kan hre tawh a." a ti a. Lily chuan, "Ehe..tunge?" a lo ti vat a. Rinawma chuan, "Min hrethiam la, ka hrilh thei rih lo che a ni." a ti a. Lily chuan, "Apawi love, engtin nge ka puih theih ang che?" a ti a. Rinawma chuan, "Olivia-i lodge chhungah sawn kan thil duh a awm a, a pass-key a dahna kan hre duh a ni." a ti a. Lily chuan, "Drawer hnuai berah a awm ang, Lisa-i'n min hrilh tawh." a ti a. Rinawma chuan, "A tha e, ka lawm e." a ti a. Lily chuan, "E taka, i thusawi kha ka ngaihtuah a. KA zirlai te zir chhunzawm leh ka tum a, Opa hi then ka tum ta bawk a ni. BA hi 3rd Semester thleng chauh ka kal a, Opa hian tih luihna hmangin min chawlh tir a. Mahse ka zir zawm leh ang, upa tawh viau mah ila." a ti a. Rinawma chuan, "I ti tha e, zirna ah tlailuat a awm hleinem, zir zel la, hna tha tak hmu ang che." a ti a, an inthlah liam ta a.

Chhun alo ni a, Lisa-i pawh Nathana a hmuh leh thut besei tak chungin a lo inchei leh hliau hliau tawh mai. A beisei ang ngeiin Nathana chu a lo kal ta a, Lisa-i chu a lai chhe leh nghal der a. NAthana chuan, "Lisa, thil min tihsak thei angem?" a ti a. Lisa-i chuan, "I tan te chuan engkim animai.." a lo ti vel a. Nathana chuan, "Naktukah hian kan haw tawh dawn a, mahse resort chhung hi minla fankual pui miahlo ania. In din tan dan te, engtia ruahman nge tih te ka hre chak ania." a ti a. Lisa-i chuan phur takin, "Awi...kal nghal ang, main-hall atangin tan ang aw.." tih pah chuan NAthana chu a kai nghal dawr dawr a. Chuveleh Rinawma chu a lo kal a, Front-Office pawhdawh hnuai ber chu a hawng a, Olivia-i pass-key chu a la a, a hawi zeuh zeuh a, a chhuak leh ta nghal a.

Lisa-i leh Nathana te pawh chuan an fang zo ta a, Nathana chu Olivia-i te in lamah a phei a. An inkawta Olivia-i te nupa car chhunga an chuang dawn mek lai chu a hmu a, a enthla reng a. Tichuan an tlan liam a, an inah chuan a lut ta a. A dap kual chiam hnu ah chuan dressing table hnuai pawhdawh chu a hawng a, Olivia-i diary a hmu hlauh mai. Diary chu a han keu a, a personal doctor (psychotherapist) hming leh address inziahna chu a hmu hlauh mai. Nathana chu doctor te in lam chu ava pan a, he doctor hi a hming chu Amuana a ni.

*********

"Thu ka lo tiam tawh a, engmah ka hrilh thei lo che. Ka damlo te harsatna ka hrilh theilo che a, ka damlo lo ni tawh thinte pawh nise, engmah ka hrilh theilo che." Doctor Amuana chuan a ti tlat mai a. Nathana chuan, "Enteh, he kan case chhui mek ah hian min pui thei a ni." a ti a. Amuana chuan, "Police dang pawh nangmah ang hian an rawn kal fo a, documents te rawn kengin tihian an rawn ti ve fo thin. Enteh, ila naupang a, Police Officer ah pawh Juinior ila ni bawk a, ka report lo mai ang che." a ti vel a. Nathana chuan, "Awle a tha e, kei Officer Junior hi Police Station hnai berah ka va kal anga, Psychotherapist pakhat Amuana chuan a damlo te chu damdawi diklo leh thawkchak tak, thlauk leh taksa tibuai thei khawp damdawi a chawh thin tiin ka va sawi ang e." a ti ta mai a. Thinrim tak hian Amuana chuan, "Enteh...nanghi.." a tih lai chuan NAthana chuan, "Adang ila hre duh em ni?" a han ti leh a. Amuana chuan, "AWle, a tawk e. Enge i duh?" a ti a. Nathana chuan, "Olivia-i natna hi ka hre duh a ni." a ti a. Amuana chuan, "Multiple Personality Disorder...mak tihna ka nei hran lo a, mahse Olivia-i chuan he natna a nei tih hi a inring duhlo lui a ni. Dam tha pangngai angin a inngai tlat a, a pasal Simona sawn a rawn hruai thin a ni. A case hi a danglam bik em em a, midang daih nih hi a tum a ni ber mai. A mizia ni miahlo ang te hian a awm a, achang leh tunge a nih a inhre ngailo." a ti a. Nathana chuan, "A lawmawm e." a ti a, a chhuahsan ta a.

Rinawma pawh George-a hmu tur chuan damdawiin lam a pan a. George-a chuan Sentei chu alo awmpui mek a, Rinawma a hmuh chuan a tum nghal bur mai. Rinawma chuan, "Lungngai suh, ka man dawn hleinem che.." a ti a. George-a chuan, "Nia, engmah ka tisual hleinem." a lo ti vel ham ham a. Rinawma chuan, "Anih chuan IG bulah kalin a nupui leh nang hi.." a tih lai chuan George-a chuan, "Heu, nilo..." a lo ti nghal chul mai a. Rinawma chu a nui a, "Ka fiamthu nih kha...enteh George, theatre ah i thawk thin tiraw?" a ti a. George-a chuan, "Kum 10 vel ka thawk hman." alo ti a. Rinawma chuan, "Anih leh a thawkte zingah sawn i thiante an awm em?" a ti a. George-a chuan, "Awm dawnlawm ni." alo ti leh a. Rinawma chuan, "Min pui duh angem?" a ti a. George-a chuan, "Pui duh tehreng e." tiin alo chhang a.

Tlai a lo ni a, Olivia-i chu lodge lam pan tuma a chhuah mek lai chuan a car chunga lily pangpar lo awm ringawy chu a hmu a, a han enchiang a. Engemawni hrechhuak thut ang mai hian a au vak a, pangpar chu a paih a, inchhungah a tlan lut leh nghal a. Room ah chuan tlan lutin, "Simon, Simon...tualthattu kha khutah khuan a awm." tiin a rawn tap lut nghal a. Simona chuan a lo kuah a, "Enge awmzia?" a lo ti vat a. Olivia chuan, "Ka car chungah lily pangpar a lo dah alawm, ka hmu alawm...min that mai ang." tiin a tap vak vak a. Simona chuan nghet takin a kuah a, "Hahdam rawh...ka awm hi duhtak, engkim a tha e, a tha vek e." tiin a lo hnem a.

*********

Zanah chuan Olivia-i chu anmahni Lodge ah chuan a hlauh em avang chuan Simona chuan a riah tir ta tawp a, anmahni in ah erawh a hlau tlat a ni. Simon-a chuan a in turah mutduhna damdawi chu a pawlhsak a, tichuan a intir a. Olivia-i pawh tui takin a muhil a, Simon-a erawhin bar lamah a kalsan ta daih thung a. A muhil lai chu a harh zawk mai, tukverh chu a rawn in khawng ri dat dat a. Olivia-i chu a tho a, tukverh lam chu ava pan a. Parda phenah chuan pawn lama lo ding niawm tak hi a hmu a, parda zar a hlim chiah mai chu a phu chiang kher mai. Hmeichhe pakhat, hmai dang vek, sam thur vek leh kawr var vek ha hi alo ding run mai a. A hlau lutuk chu a tlan chhuak a, "Min that dawn, min that turin a lo kal ani." tiin tap chungin reception lamah a tlan thla nghal a. Lisa-i pawh a lo indah fel mek a, Olivia-i chuan, "Lisa..khawnge Simona...min pui rawh..min pui rawh." a ti chiam chiam mai a.

Darkar 1 hnu velah chuan Olivia-i chu doctor chuan a chiu muhil thei ta hram a, Doctor chuan Simona bulah chuan, "Hahdam a mamawh a nih hi..a harh chian hunah minlo hmu rawh se." a ti a, doctor chuan a chhuahsan ta a. Simona chuan call a dawng nghal a, "Hello, enga? Naktukah a theih mai loh em ni?....awle ka lo kal e." a ti a, a insiam mawlh mawlh a, a chhuak ta a. Simona chu Police Station ah chuan ava kal a, kawngka hawn an tum chu a lo inkalh tlat mai. Kawngka chu a kik a, mahse a thim vek a, a reh thiap mai bawk si. Station bulah chuan a vei kual sek a, "Min rawn ko bawk sia, enge maw awmzia ni?" a ti nuah nuah mai a.

Olivia-i chu a harh leh ta thut mai a, tukverh lam bawk chu a rawn ri leh ta. A tho a, tukverh lam chu a va pan leh a. Parda zar chu a han keu leh chu ahma a ahmuh bawk, kha hmeichhia bawk kha  alo ding leh run mai. Chu nu rapawm zet chuan Olivia-i chu a rawn kawk a, Olivia-i chuan a hlau ngang mai. Chutah tap chung hian, "Thah che kha ka tumlo, i thiamloh vek a ni. That lo theilo che in min siam a ni...engkim min laksak a, chuvang chuan ka that che a ni." tiin a au vak vak a. Chuveleh chunu hmaah chuan Nathana a rawn ding ta thut mai a, Olivia-i chuan mak a ti kher mai. Room chu chhuahsan a tum a, mahse Rinawma a rawn lut thut a, "Ehe, Annie Lallawmzual, khawnge i kal dawn a?" a rawn ti lut a. Olivia-i chu a thu a, Rinawma bawk chuan, "Tikhan thu la, titi lawk ang aw...zankhua in kan titi dawnnia." a ti a. Nathana pawh a lo lut a, "Annie, sawi rawh le, engtin nge i unaunu Olivia-i kha i thah?" a rawn ti a. Olivia-i chuan, "Tumah ka that lo." a ti a. 

Nathana chuan, "Ka'n hrilh ang che aw...i unaunu kha i hua a, i thik a ni. Achhan chu mi zawng zawngin an ngaina a, fel an ti a, thian siam pawh a thiam bik em em a. Mahse nangchu an ngei rawn che a ni, aww..Cinderella khawngaihthlak tak a ni. I unaunu Olivia-i leh Simon-a te chance nei lai kha, khami ni khan i enthla reng a. Simon-a nena an inkalsan hma kha chu i nghak reng a, birthday party naa lo nghak tur zawk i ni a. Tichuan zan alo thleng a, party na a rawn zawng tur che a alo kal lai chu ilo chang a, tichuan in inhnial vak a, atawpah base-ball bat hmangin i vua a, i that ta a. A ka chhungah damdawi i thunlut teuh bawk a, tichuan mi a pakhat, ramhnuaiah hian a awm tiin i sawi ta daih a. A ruang chungah chuan lily pangpar i dah a, a sirah bati i chhi kual bawk a. In hmel a in an em avang hian i nu meuh pawhin in sam rawng atang lo chuan a hre hrang lo che u a, nang chu i sam a buang a, a sei bawk a. I unaunu Olivia-i erawh chu a dum a, a tawi bawk. Tichuan i sam chu i tan a, i dum nghal bawk a, tichuan i unaunu sam pawh i tan then a, i hawn nghe nghe bawk a, achhan pawh nang hi Annie nilovin Olivia-i anga an hriat theih nan che. I ruahmanna te chu a tha khawp mai, mahse tihsual i nei a ni. Olivia-i i ni miau lova, Simona pawhin a hrechhuak vat dawn che tih pawh i hria. I mizia a danglam a, a ngaih a thalo bawk. Tichuan Rita-i a lo lang leh a, chuan engtin nge i tih khah? I hmangaih ber tan i unaunu ngei pawh i that a, Rita-i pawh i that ve leh ta mai anih kha tiraw, Annie Lallawmzual?" a ti ta phiar phiar mai a. A awmzia chu Olivia-i anga kan sawi char char hi Olivia-i nilovin, a phirpui Annie, 1995 kuma boral ta zawk emaw an tih kha a ni. 1995 kuma boral zawk chu Annie nilovin, Olivia-i zawk a ni.

Annie chuan, "Min la hmangaih reng a ni." tap chung chuan a la ti hram a. Rinawma chuan, "Engmaw...engmaw i sawi a?" a lo ti vak vak a. Annie chuan, "Min la hriat pawlh deuh a, a buai a ni...ka tanpui angai a ni." a la ti talh mai a. Chutih lai chuan Simona a rawn lut a, thil thleng mek a hmuh chuan a hrethiamlo ngei mai. Hrilhhai zet hian, "ENge awmzia?" a ti a. Nathana chuan, "Simon, hahdam rawh...min ngaithla teh.." a ti a. Simona chuan vin zet hian, "Enge thleng ka tih chu..tinge Olivia-i kha a tah a?" a ti vin tuar mai a. Annie lah chuan, "Simon, heng mite hian min man an tum a ni..Annie kha ka thah angin an sawi a ni." tiin a lo tap vak vak bawk a. Simona chuan thinrim tak hian, "Chhuak rawh u." a ti vak a. RInawma chuan, "Simon, kan thusawi hi ngaithla phawt teh." a ti a. Simona chuan, "Chhuak rawh u.." tih pah chuan Rinawma kawr chu a rawn tham a. Rinawma chuan, "Huiham...a va buaithlak tak." tih pah chuan Simona kut chu a elh vak a, Simona pawh a au tuar mai. Khuma chuan a nam thu a, Nathana chuan, "Simon, kan bulah pawha inpuang vek tawh, i nupui hi Olivia-i a nilo, Annie zawk a ni." a ti a. Simona chuan a hrethiamlo kher mai, "Enge awmzia?" a la ti hu mai a. Rinawma chuan voice recorder chu rawn phawrhin, "Hei hi ngaithla rawh." tih pah chuan a play a. Annie aw ngei mai chuan, "KA duh vang che a that che ka nilo, engkim min laksak a, ka thah ngei che a ngai a ni." a tih lai chu a rawn in play ta a. Simona chuan mak a ti kher mai, Annie chu a en reng a. Nathana chuan, "A tir atang khan i nupui hi ka ringhlel tawh a, mahse finfiahna ka neih loh avangin ka sawi ngam hrih lo a ni. Pakhat naah chuan khati taka i hmangaih ni thin si kha, i hmangaih tawh loh thu min hrilh khan a mak ka ti em em a. Tichuan a pahnih naah chuan, a doctor hnena ka va kal khan, engkim ka hrechiang ta a ni." a ti a. Simona erawh in ala man chiah lo, "Enge doctor chuan a sawi a? Ka hmangaihna a tawp hleinem, nupa inhau pangngai leh kan inkara khi lo awm ve mai chauh vang alawm. A thleng fo alawm, midang te chungah pawh a thleng fo alawm." a ti a. Nathana chuan, "Ni e, a dik alawm. Chuan maw, kum 20 kalta khan police uisathiam hruai te khan an pute kha Olivia-i te inah hian an hruai thleng let leh a, achhan chu khang uite khan tualthattu hnu kha an chhui thei tlat a ni." a ti a.

Simona chuan, "Ka hrethiam chuang lo.." a la ti talh mai a. Nathana chuan, "Ni e, chuvang alawm Cinderella thawnthu pawh ka hrilh duh loh che. I nupui personal doctor hian min hrilh vek alawm, a inpuan theih nan chuan thil dangdai tak kan tih angai dawn a, chuvang chuan kan tih thaih ta a nih hi. Lemchanthiam pakhat kan ruai a, Olivia-i tleirawl lai hmel ang ber tur kan thlang a. Tichuan kan tihthaih a, tihian a inpuang ta a ni." a ti a. Simona chuan rum zet hian Annie chu a melh a, "Thudik a ni em?" a ti a. Annie chuan tap chung hian, "Kan pahnih tana tha tura ti ka ni, ka hmangaih vang che a ni. Nunbul tan turin min tiam tawh kha, helai hmun hi chhuahsan vat ang Duhtak." a ti hluam hluam a. Rinawma chuan, "Tunah chuan i kal theihna hmun awmchhun chu jail a ni." a ti a. Nathana chuan, "Annie, min han hrilh teh. Engtin nge Opa damdawi recipe kha i neih theih?" a ti a. Annie chuan, "Ka ru a ni..an inah ka va kal a, apa nen an lo inhau vak a. Tichuan chu chu remchang ah la in recipe leh damdawi dawhkana lo awm chu a ru ta a ni." a  ti a. Nathana chuan, "Olivia-i kha thah i tum lawk biklo em ni?" a ti a. Annie chuan, "Tum lawk bik lo, ka tumlo hrim hrim." a  ti a. Nathana chuan, "A tha e, lo kal rawh le...Police Station ah i kal ang hmiang."  a ti a. Annie chu an man ta a, Simona erawh ngawi rengin a la thu char char thung.

***********

Sentei pawh a lo harh ve ta a, Rinawma chuan ava tlawh a. Rinawma chuan, "Sente, engkim min han hrilh teh le." a ti a. Sentei chuan Rinawma chu melh pawh a melh tha ngam lo a, "Olivia-i in man tih ka lo hria a." a ti a. Rinawma chuan, "Annie zawk." a lo ti a. Sentei chuan tap tep hian, "Ka inthiamlo ngawih ngawih, motor neih ka chak em em a, car neih ve hi ka dream ber a  ni thin. Rita-i thih ni khan ramhnuaiah khan ka kal a, phun ri sep sep hi ka hria a. Thawm lo chhuahna lam ka va en chuan Rita-i chu a lo let reng a, a bulah chuan Olivia-i a lo awm a, pangpar tam deuh mai hi a awm zawnah chuan alo dah teuh a. Mak ka ti em em a, ka haw leh nghal vat a. Tuma bulah ka sawi lo a, tichuan Rita-i kan vui ni khan Olivia-i bulah chuan pawisa ka dil a. Min pe lo a nih chuan sawichhuah ah ka vau ta a, mahse an sumdawnna tlakchhiat lai a nih avangin pawisa chu tlem te te a min pek zel tur thu min hrilh ta a. A hmasa ber atan cheng 20,000 min pe phawt a, thingkung bung, rawngsena lo inthai bial bulah purse nen a lo dah tur thu a sawi a. Tichuan ka va la ta a, chuan nimin piah khan, party lai khan, pawisa ka mamawh zat avaia min pek tur thu min hrilh a, tichuan ramhnuaiah chuan ka va kal ta a. Min vaw thlu ta a, abak engmah ka hre tawh lo. Message pawh kha ama thawn vek a ni, Opa thiltih anga a lan theih nan." a ti a. Rinawma chuan, "Min hrilh ang zawng zawng hi Police te hnenah i hrilh leh thei angem?" a ti a. Sentei chuan, "Jail ka tan phah angem?" a ti a. Rinawma chuan, "Tang lovang..i tang miah lovang." a ti a, a chhuahsan ta a.

Opa pawh chu jail atang chuan a lo chhuak ta a, an inkawt ah chuan Pi Puii chuan a lo hmuak a. Pi Puii chuan, "Op...enteh, Lily inchhungah a awm mek a. Aizawl lamah a fapa bulah a awm tawh dawn a, dang reng reng suh aw...hahdam tir ve tawh rawh, inhau lo hram ang che u." a ti a. Opa chuan, "Awle, Petera enge a an?" a ti a. Pi Puii chuan, "A tha a nimai, eng thesis mah a lo buaipui reng reng hleinem, hetah a lo awm tawh dawn a, a ziaawm ve tawh mai ang." a ti a. Opa chu room ah chuan a lut a, Lily pawh a lo in pack fel vek tawh a. Kumah chuan a lo thu a, Opa chu a va thu ve a. Inthlahrung tak chuan Opa chuan, "I kal dawn maw?" a ti a. Lily chua, "Aw." a lo ti hmuk a. Opa chuan, "Ihh..engtik thleng?" a han ti leh a. Lily chuan, "Kumkhua in." a lo ti leh hmak a. Lily chu a ding a, a bag te chu a ak a. Opa chuan hnuk ulh teuh hian, "Lily, thil pakhat chiah ka lo sawi leh lawk. Ihmaw...lock up a ka tan lai khan  thil tamtak ka ngaihtuah a. Nang leh kei, leh kan fapa Freddy-a. I chungah ka sual thei em em a, ramhuai ang mai ka ni thin tih pawh ka hria. Min ngaidam rawh, ka thiamlo a ni." a ti a. Lily chu ava pan a, "Ka nundan ka thlak anga, ramhuai lem pawh ka ziak tawh ngai lovang. Doctor ka hmu anga, ka tha leh vat mai ang. Lily, min kalsan suh, khawngaihin, ka hmangaih che asin." tiin Lily kut chu avuan a, a thingthi a, a tap zawih zawih a. Lily chuan, "Ka ngaidam che, mahse i bulah ka awm thei tawhlo." a ti a. Opa chuan tap chung hian, "Rinawma vang kha em ni?" a ti a. Mahse Lily chuan a chhang tawhlo, a chhuahsan ta a.

**********

Lisa-i pawh a hnuk a ulh teuh mai, tap insum tak chung chuan, "Nathan, hei ka number aw...minlo be ve thin dawnnia. Inlo kal leh hunah lo sawi ula, room tha ber ka lo pe ang che u." a ti a, a inhnit feih feih a. Rinawma lah chuan, "Avan lawmawm thin tak...alo call ngei ngei ang." a lo ti deuh chhen a, an chhuahsan ta a. Bus ah chuan Lily thawmhnaw vel chu Nathana leh Rinawma te chuan an hlan kai pui a. Lily chuan Rinawma chu a kuah vawng vawng a, "Rinawm, ka thian tha tak i ni...nang chu awmlo la, hrehawm takin ka awm anga, huaisenna pawh ka nei lo anga..ka lawm e aw.." a ti a. Rinawma chuan, "Keipawh ka lawm e, i fapa nen chuan hlim takin awm ang che u." a ti a. Lily chuan Nathana chu a en a, "Officer, nangpawh i chungah ka lawm e, ka pasal i chhuah zalen avangin." a ti a. NAthana chuan, "Keipawh le." a lo ti a. Lily chuan, "Mangtha ule, kan inhmu leh thin dawnnia, mangtha u.." tiin an in vai liam ta a.

Nathana te pawh an motor ah chuan an chuang a, Nathana chuan, "Lalrinawm, khawiah mah kan zin tawh lo ang... i hria em? a ti khur khur a. Rinawma chuan, "Nia, keipawh zin ka ngam tawh lo..hnuchhui tur hlir bak a awm chuanglo keini tan ve hi chuan.." a han ti vel a, an nui dun bawk bawk a. Tichuan motor chu an start a, chak mangkhengin Aizawl lam an pan leh ta a ni.

THE END