NATHAN SEASON-3 (Episode-4)

NATHAN SEASON-3 (Episode-4)

SCYTHIAN KNIFE (Pt-4)

Written by : Aaron Malsawmdawngzuala

*********

Zing alo ni a, Nathana leh Rinawma te pawh chu Investigator hmu tur chuan hma takah Station-ah anva kal leh a. Investigator chuan Nathana chu file alo pe a, "Hei hi expert te conclusion siam chu a ni e. Tualthattu hmanraw hman kha a ngai tho a ni, Scythian knife tho." a ti a. Rinawma chuan, "ACP Sir, ila hria em? Duhsaka kha chu special blow hmanga thah a ni a, nangpawn i sawi kha, jail tang ho inthah dan a ni i tih kha. Ka rindan chuan tuathattu hi jail tang ve thin a nimai lo maw..enge i ngaihdan? Crime-scene ah te chuan thildang inva hmu em" a ti a. Henry-a chuan, "Hmulo, engmah kan hmulo. Evidence emaw, clue emaw, sikret bung leh chewing gum takngial pawh hmuh tur a awm lo. Nathana chuan Henry-a chu file a pelet leh a, "Kha...hei hi nangman kawl zawk rawh, i mamawh zawk ang." a ti a. Rinawma chuan, "ACP Sir, Mickey-a chungchang sawi tum zawka lo kal kan ni a. Amosa unaupa angin a insawi a, chuan nimin piah lawk khan Mawitea room ah alo lut ru bawk a ni. Chuan Mickey-a leh Scythian chemte te hian inzawmna an neih kan ring bawk a ni." a ti a. Henry-a chuan, "Mickey-a pawh chu WANTED angin thu ka lo chhuah ange, kan zawng anga, mahse kan hlawtling angem tih erawh ka sawi theilo." a ti a. Nathana chuan Henry-a chu a han en a, "ACP, nang chu ni ila pitar pakhat, thuzawh fiah tur ka nei ngei anga, ka va hmu ngei bawk ang." a ti a. Henry-a chuan rum zet hian Nathana chu a melh a, "DCP Nathan, min tihthaih vel i tum em ni? Tualthahna pahnih lai a thleng tawh a, rinhlelh mek kan nei bawk a. Kan mi rinhlelh te pahnih lah kan zawng mek bawk a, tunah nangin min puih a hnekin min lo deuhsawh vel amaw?" a ti khur khur a. Rinawma chuan, "ACP Sir, Mickey-a an man vawihnihna kha file atang khan han check chiang leh teh." a ti a. Henry-a chuan file chu a han en leh a, "A nu apartment ah khuahkhirh a ni a, chuan enge nivak a?" a ti a. Rinawma chuan, "Han chhiar zel phawt la.."  alo ti leh a. Henry-a chuan chhiar zelin, "A nu sawi dan chuan a birthday lawm turin a fapa chu  alo kal a, mahse painting chungchang erawh engmah a hre hauh lo thung." a ti a. NAthana chuan, "Khata thil chiang em em mai chu Mikey-a kha a nu nen an in close hle tihna a ni. A nu bithday a theihnghilh ngai lo, a birthday kha engtik nge han en leh teh." a ti a, Henry-a chuan a en a,"Naktuk.." tih ringawt hian a lo chhang a. Nathana chuan, "A tha e." a ti sap a.

"Eric, ilo kal avangin ka lawm e aw." Pi Hriati chuan a ti a. Erica chuan, "Sangtei vanga lo kal mai chauh ka ni, nangmah vang nilovin. Chuan, kum 10 a liam hnuah min hmu leh ta chu ania, i lawm ngei pawh ka ring. MAhse Sangtei bula ka chungchang i sawidan kha i la hria em? SANGTE, ENGA TAN NGE I TIH, SAWTIANG MI RETHEI, LAK TLAK LOH.. i tih thin kha."  ati a. Pi Hriati chuan inthiamloh hmel tak hian, "Ka thiamlo  ani." alo ti sap a. Erica chuan, "Ni e, hun kal tawh alawm. Sangtei chungah hian enge thleng a? Min be duh bawk silo, ka mitah tak pawh min en duhlo a, kalbo turin min ti zel bawk si." a ti a. Pi Hriati chuan, "Thil sual lian tak kan ti ani, mahse Sangtei chuan ama thiamloh angah a ngai bawk si." a ti a, Erica chuan, "Thil engkim, a chul atangin han sawi vek teh." a ti a. Pi Hriati chuan, "Sangtei hian Sammy-a hi a piansualna avang hian enkawl turin Children's Home ah a dah a, chuan a thawktu te chuan eng paper emawni hi Sangtei chu an pe a, formality a ni e an ti a. Sangtei chuan a sign ta a, an sawi dan chuan Sammy-a hi an patient ngei a ni tih chianna a ni e an tia. Mahse kan hrechiang a, minlo bum reng a ni." a ti a. Erica chuan, "Ka la hrethiamlo, Sangtei chuan Sammy-a chu Children's Home ah chuan ava dah ta a, a damloh avanga enkawl tur ringawtin...chuan anlo bum che u a..Sammy-a chuan treatment engmah a lo dawng leh silova, a dik em?" a ti a. Pi Hriati chuan, "Aw..Sangtei khan a dikna (maternal rights) hmangin Sammy-a a hlan chhawnna lehkha zawk a lo signed a nih chu. A awmzia chu Sammy-a va hmu tur hian dikna pawh a nei tawhlo a, a fapa chungah hian thuneihna engmah a nei tawh lo. VA kidnap a tum thin a, mahse an lo man zel bawk si." a ti a. Erica chuan, "Awle, tihtur pahnih i nei. Pakhatna chu, Sangtei hi khawiah mah chhuahbo tir tawh lo la, a pahnihna ah chuan Sammy-a chu ka va hruaichhuak anga, ka hruaichhuah thei nan detail engkim min pek angai ang." a ti a. Pi Hriati chuan, "Mahse, engtin?" a lo ti a. Erica chuan, "Lo buai suh, ka kutah dah rawh. A hrim hrimin Sammy-a chu Children's Home-a dah turin tunge sawi reng reng a?" tiin a zawt a, Pi Hriati chu inthiamloh hmel takin a thu ngawi ta reng mai.

**********

Robert-a leh Sarah-i te pawh chu tukthuan an ei mek a, Robert-a chuan chaw bar mawlh mawlh pah chuan, "District Investigator alo thleng a, min ko a, darkar 2 chuang thu min zawt fiah a. Engtik nge Mawitea ka hmuh hnuhnun ber tih te, engtik khan nge kan in a chhuahsan tihte, ka hne zia chu." tiin a phun nuah nuah a. Sarah-i chuan hlauthawng ru deuh tak hian, "Engtin nge i chhan?"  a lo ti vat a. Robert-a chuan, "Thrusday kha ka hmuh hnuhnun ber anih thu ka sawi a, kan inchung sak that lai mekah min pui a ni tiin ka sawi a. A zawt ve che a nih pawhin chutiang chiah chuan chhan ve ang che, i hria maw?" a ti a. Sarah-i chuan, "Mahse Robert..." a tih lai chuan Robert-a chuan, "Mahse..mahse tih angailo. Engmah sawi belh angailo, engmah kan hmulo a, engmah ka hre lo bawk. Nimina Duhsaka lo kal thu pawh kha engmah sawi suh ang che, i hria maw?" a ti leh khur khur a. Sarah-i chuan, "Dawt sawi a thalo, thilsual a ni." a lo ti a. Robert-a chuan, "Tual thah kha thilsual liantak zawk chu a ni, sawiloh tur ka tih chuan sawiloh tur a ni mai. Police Stationa va kal i duh em ni? Buaina tawk turin min duh em ni?" a ti a. Sarah-i chuan, "Engvangin nge buaina i tawh ngawt ang? Tualthattu i ni hleinem." a lo ti a. Robert-a chuan, "Nilove, mahse ka tunhma nun an hre vek a, min ringhlel anga sin." a ti a, Sarah-i pawh chu a ngawi ta a. Robert-a chuan, "Khawimaw, salad kha minlo ban lawk teh." a ti a. SArah-i'n salad a ban tur chiah chu Robert-a chuan a kutah a lo vuan a, "Ding teh." a ti a. Sarah-i chu a ding a, Robert-a chuan a lamah a pawt hnai a, a malchungah a thuttir a, a kuah vak a, "Ka nupui han hmelthat zia hi chu.." tih pah chuan fawh a tum a. Sarah-i chuan a nam sawn a, a ding thut a, "Robert, a hunlo emai. Tihtur ka nei, ka kal vat angai." a ti a. Robert-a chuan, "Enge i tih dawn a?" a lo ti a. SArah-i chuan, "Ka thiannu te inah ka kal angai." tiin a chaw ei lai chu a kalsan ta daih a. Robert-a chuan rum zet hian a en zui a, aphone a phawrh a. Tu emawni chu phone-in, "Hello, thianpa. Sumdawnna chungchang ania, passport leh visa lo buaipui ang che. Kei leh ka nupui ta tur aw...pawisa pawh ka pek belh ang che. Airport ah minlo nghak la, kan lo kal thuai ang." a ti a, phone chu a dah a. 

Chumi khua a Police Force ho te pawh chu an che chhuak ta, Mickey-a zawng tur chuan an chhuak khawm ta a. Henry-a chuan SI Ruata bulah chuan, "Task Force ho pawh ko tel ang che, entrance zawng zawng khar vek ula, Mickey-a kan hmuh hma chu kan haw theilo ang. Chuan midang ho pawh kha hrilh lawk vek la, Mickey-a hi chu lo khawihna lo turin, a nung chung ngeiin ka hmu duh a ni." a ti a, an kal ta a. Address an hmuh zinga pakhat chu anva thleng ta a, Police ho te chu chhuak khawmin chumi in lam chu an pan a. Mickey-a chu a rawn chhuak ta hlawl mai, Police te a hmuh chuan a phu zawk mai a. Henry-a chuan va panhnaiin, "Thianpa, hei hi house number 18 a ni em?" tiin hrelo awm ang tak chuan ava zawt vel a. Mahse SI Ruata chu a lo inla pa fal deuh nge ni, hnuglam atang chuan Mickey-a chu pistol chuan a tin a, "Mickey, che tawh suh, man i ni e." a ti a. Chuveleh Mickey-a chuan rang em em hian Ruata pistol chu a benthlak sak a, a hnek thal tawp mai. Henry-a chet hma chuan a dulah a tlawh bawk a, Henry-a pawh chu a thal tawp mai a. Tlanchhiat a tum chiah chu Police dang ho chuan silaiin an lo tin a, an man thei ta hram a ni. Chutih hunlai vel chuan Mawitea pawh vawt ti takin khawlaiah a lo tei kual a, a khur beuh beuh a. Sarah-i ama lam pana lo kal phei chu a hmu thut a, ava pan nghal a. Sarah-i chuan, "Mawite, hun ka nei tamlo ania." a ti a. Mawitea chuan, "Sarah, min hlau em ni? Pi Muani kha ka thah a nih i ring em ni?" tiin a zawt a. Sarah-i chuan, "Ka hre lo, Duhsaka pawh thah a ni." a lo ti a. Mawitea chuan, "Anih chuan tinge min rawn pan si a, Police hnenah min report siloh?" a ti a. Sarah-i chuan,"Chuvang alawm ka rawn pan che, heta hi i lehkhabu ziah ho kha aw..i dawhkana mi ka rawn la a." tih pah chuan MAwitea lehkhabu ziah mek te chu a pe a. Mawitea chuan, "Hengte hi ka nunna tluk zeta hlu an ni, he lehkhabu hmingchhal hian ka sawi ang, tualthattu ka nilo. Min ring tiraw?" a ti a. Sarah-i chuan, "Aw, ka ring che alawm." a lo ti a. Mawitea chuan SArah-i chu kiss a tum a, mahse Sarah-i chuan a lo dang vat a, "Nilo, hetah nilo...miin min hmu ang. Ka pasalin min hmuh vaih chuan min that duh mai ang." a ti a. Mawitea chuan, "Thu phawt teh ang." a ti a, an thu dun a. Mawitea chuan, "Sarah, a tawp vat mai ang. I pasal chu i kalsan anga, ka bulah i awm thuai ang, i pasal chu i kalsan vat ang tiraw?" a ti a. Sarah-i chuan, "Engmah ka sawi theilo." a ti a. Mawitea chuan, "Ani kha chu ngaihtuah duh suh, kan hmahun tur chauh ngaihtuah rawh. Sarah, ka ngen ache, he ka lehkhabu ziah te hi nangman kawl la, a him zawk ang." a ti a. Sarah-i chuan, "Ni e, ka lo kawl ange. Him takin ka kawl ang, chuchiah chu tun dinhmunah chuan ka tiam thei che a ni." a ti a. Mawitea chuan Sarah-i chu kiss leh a tum a, mahse Sarah-i chu a ding thut a, "Ka kal vat angai." a ti a, a kal ta daih a.

*********

Tluangtei leh Rinawma te pawh chu inah chuan dawhkan kilin thingpui in pahin an lo titi a, Tluangtei chuan, "U Rin, tinge Margareth-i saw i rinloh em em a?" tiin a zawt a. Rinawma chuan, "Ka ringlo a ni hleinem, ka hlauthawng deuh mai chauh alawm." a ti a. Tluangtei chuan, "U Nathana a bum thluk i hlau a ni tiraw?" a ti leh a. Rinawma chuan, "Aaa..a chhelo reuh sia, a lo khuai khem ang tih ka hlau alawm." tih pah chuan a nui suk a. Tluangtei chuan, "Ehe, ka hmelchhe zawk i tihna em ni?" a han ti vel a. Rinawma chuan, "Khai...i chhelo feee zawk, MArgareth-i te chu nangma lakah chuan Tuarpuii ang vel a ni." a ti a, an nui dun bawk bawk a. Rinawma chuan thingpui chu a in a, a ner nung mai a, a chhak chhuak lehnghal vat a. A tep chuap chuap a, "Enge a, ava tuilo ve." a ti nuah nuah a. Tluangtei chu a nui vak vak a, "Herbal Tea a nih kha, a kha viau ami?" a lo ti a. Rinawma chuan, "Luak a ti chhuak zawk alawm." tih pah chuan a ner nung mai. Nathana pawh a lo haw a, Rinawma chuan phur zet hian, "Ehe, sir, ilo haw ta maw? Lo kal teh, Herbal Tea hi han in ve teh, a tui ania." a ti a. Nathana chu a rawn thu ve a, "In ila nimai lawm.." tih pah chuan a han in ve ngawt a, a lem khawlh a, a uak tuar mai. Rinawma leh Tluangtei chuan an lo nuih tiah tiah mai a, Nathana chuan, "Ava tuilo ngai vele." a ti vawng vawng mai. Tluangtei chuan, "Coffee ka va siam ange." a ti a, a kal ta a. Rinawma chuan, "Sir, enge i va hmuhchhuah le?" a han ti a. Nathana chuan, "Mawitea thian kawm thinte ka va bia a, mi mak tak a ni an ti vek. Comperati Literature Analysis exam naah a fail a, phuba lak nan an zirtirtu suitcase ah choak thi, uih vek tawh hi a lo dah a ni awm e." a ti a. Rinawma chu a nui suk a, "Phuba lakna bawn tak a ni." a lo ti a. Chuan maw, Mihring taksa lam zirmi pakhat a hmelhriat bawk a, autopsy neihnaah pawh a tel ve thin a ni awm e. A thiamna hmang te chuan hmeichhe bem te a tum ve thin a, mahse a hlawhtling ngai lemlo." a ti a. Rinawma chuan, "A ngaihnawm kher mai, mahse kan hnuchhui a ti awlsam dawn chuang hauh lo. Ka ngaihtuahna luahtu ber zawk chu khawnge Mawitea hi tih leh engtin nge kan zawnhmuh dawn..tih mawlh mai hi a ni. Engtin nge hma kan lak zel dawn, Sir?" a ti a. Nathana chuan, "Coffee in phawt ila kan ngaihtuah zawm dawnnia." a ti a.

Tlai ah chuan Nathana pawh chu a thu hriat ang ang te hrilh turin Margareth-i te inah chuan ava kal leh a, an titi a. Margareth-i chuan, "Nathan, engtik ah nge ka nau Ropuia hi an chhuah theih ang le?" mangang tak chuan a ti a. Nathana chuan, "Ka hre biklo." tiin a chhang a. Margareth-i chuan, "Tinge i hriatloh? Duhsaka thattu leh ka nu thattu te kha mi pakhat an ni a, an hmanraw hman pawh a in ang chiah chiah i ti ani lawmni?" a ti a. Nathana chuan, "A hmanrua chu a in ang a, mahse an thahdan style erawh a in anglo a ni. A landan chuan hepa Mickey-a an tih hian chemte kha a zawng mek a ni." a ti a. Margareth-i chuan, "Amah chu em ni..Robert-a te ina lo bei thut tu che kha?" a ti a. Nathana chuan, "Aw ni e, an man tawh an tiin ka hria, engkim a chiang uar mai ang." a ti a. Margareth-i chuan, "Nathan, khawngaihin i thu hriat ang ang te chu min hrilh zel rawh aw?" a ti a. Nathana chuan, "Awle, ka client i ni a, ka hrilh zel che angai hrim hrim alawm." a ti a. Station lamah chuan Henry-a chuan Mickey-a chu thu a zawt fiah ve mek bawk a, "Mickey, i vawikhatna a nilo bawk a, han inpuang tawh ta che." a ti a. Mickey-a chuan, "Ka hria alawm, inpuang mah ila ka chan tur chu damchhung zel tan bak a ni dawn chuanglo. Chubakah evidence engmah in neilo a, min man ngawt theilo." a ti pang pang a. Henry-a chuan, "Mawitea room ah khan hmanni khan enge i tih? Chuan DCP Nathan Malsawmkima a lo luh khan engvangin nge kut ilo thlak, chumai nilovin a partner ASP Lalrinawma pawh kut ilo thlaktel bawk a. Witness te sawi dan chuan Duhsaka kha Mawitea chungchang i zawt tih an sawi bawk, Wine-Shop bulah." a ti a. Mickey-a chuan, "Duhsaka a? Chutiang mi ka hre ngailo." a lo ti hmuk a. Henry-a chuan Duhsaka ruang thlalak hmuh pah chuan, "Duhsaka i hrelo amaw, he thlalak hi enteh...Duhsaka chu hepa hi a nih hi. Enteh, Duhsaka hi thi-a chhar a ni a, thah a ni. Chuvang chuan inla ngeng vel lo la, ka zawhna che hi min chhang vat teh." a ti vin khur khur a. Mickey-a chuan, "Eng zawhna maw?" a lo ti a. Henry-a chuan, "Engvangin nge MAwitea room ah khan i luh ruk?" a ti a. Mickey-a chuan, "Biak ka duh ani." a ti a. Henry-a chuan, "Enga tan?" a lo ti leh a. Mickey-a chuan, "Ti hian sawi ta ila, Mawitea hian ka bialnu chu a lo vau thin a, chuvang chuan titi pui ka duh a ni...tikhan i lawm em?" a han ti vel a. Chutih lai chuan kawngka a rawn in kik karh karh a, SI Ruata a lo ni a. Ruata chuan Henry-a bulah chuan, "Sir, Department of Economic Crime te zinga an Officer pakhat alo kal a, pawnah sawn a awm. Chuan, Mickey-a hi an department lama hruai phei an duh thu an sawi a ni." a ti a, Mickey-a chu a lo nui sak a.

*************

Nathana chu Margareth-i te inah chuan ala awm reng a, phone a be mek a. Phone a biak zawh chuan Margareth-i chuan, "Engthil nge ni a?" a lo ti a. NAthana chuan, "Mickey-a chu an man tawh a, mahse awmzia a awm chuanglo. Tualthahna thlen lai khan Mickey-a chuan hmun dang daiha a awm thu a sawi a, a buaithlak khawp mai." a ti a. Margareth-i chuan, "Chemte chu an hmu em?" a lo ti vat a. Nathana chuan, "Chemte chu an hmulo a, a car te, a chenna in te leh a thawmhnaw te pawh an dap vek a, mahse eng chemte mah an hmulo. Enteh Margareth, ahma pawhin ka zawt tawh che a, ka zawt nawn leh ang che. Amosa leh Pu Zohminga te chungchang hi i hre ngailo hrim hrim em ni? I nu pawhin a lo sawi thin reng anga, i hre tawhlo a ni zawk lo maw?" tiin a zawt a. Margareth-i chuan, "Ka hrelo tak tak, min zawh tawh kha." a ti a. Nathana chuan, "Enteh, Pu Zohminga hi thil hlui leh tlereuh vel hmanga diklo taka sumdawng mi a ni a. Mickey-a hi a assistant a ni a, Amaosa kha a expert chhuanvawr ber a ni. Amosa workshop ah khan Scythian chemte lemziak a awm teuh a, ka rindan chuan Pu Zohminga hian restore turin chemte kha Amosa hnenah hian a pe a ni ngei ang." a ti a. Margareth-i chuan, "Chupawh chu nise, tinge kan hua ah kher hian chu chemte chu a rawn awm daih theih ang?" a ti a. Nathana chu a thaw hak a, "Chutak chu kan zawnchhuah a ngai a ni, Amosa car kha in inbulah an hmuh thu an sawi bawk a. Restorer ve tho i ni a, nangmah hmu tura lo kal pawh a ni thei tho asin." a ti a. Margareth-i chuan, "Aih, a nilo...restorer chu ka ni a, mahse metal lam ka khawih ngailo. Keichuan icon lam chauh ka khawih thin a, ka diploma pawh ka entir ang che, i awihloh chuan." a ti a. Nathana chuan, "A ngailove, ka ring che alawm, enga tan nge chemte chu i tih teh lul ang ni." a ti a. Margareth-i chuan, "Mickey-a leh Amosa te hi an lo inthurual reng pawh a ni maithei asin." a ti a. Nathana chuan, "Chutiangah chuan lo buai duh suh...ka zawngchhuak em em ang. Ka zawnchhuah hunah chuan ka hrilh hmasa ber dawn che nia. Ka haw tawh phawt ange, a nih phawt le." a ti a, a haw ta a.

Nathana haw veleh chuan Rinawma nen chuan an thudun a, an titi a. Nathana chuan, "Rinawm, thudik awmsa a kan ngaih ho hmang hian i han sawi dawn teh ang. Duhsaka kha jail tang tlanchhuak emaw, jail lo tang tawh thin emaw in a that angah lo ngai ta ila, chuan Mickey-a thah chu a nilo phawt a. Mawitea a bo hnu hian Duhsaka kawm thin chu mi pakhat chiah a ni a, chu chu Robert-a a ni. A nupui kha chuan tualthahna a thlen laiin hmun dangah a awm thu a sawi a, chuan abana thil kha ilo hmu ve em?" a ti a. Rinawma chuan, "A tattoo kha maw?" a lo ti a. Nathana chuan, "Aw ni e, jail a tan laia a chhut tir a nih ka ring. Ahnuah tih reng a tum a, mahse a thei talo a. A tattoo atang khan a chiang vek alawm, a chiang vak tawh lo." a ti a. Rinawma chuan, "Anih chuan Robert-a chu kan va kawm leh angai dawn anih chu." a lo ti a.

****************

Robert-a chuan phone a lo hmang mek a, "Enteh thianpa, a hlu lutuk ringawt. Inhmun tamtak a lei theih ang, tiang khawp chu a ni. Inngaituah vat vat la, ka lo hmu vat ang che. Kan lo chhuak tep ania aw, ka dah ania..minlo call leh mai dawn nia."  ati a, phone chu a dah a. A thawmhnaw te chu air-bag ah a khung mawlh mawlh a, chutih lai chuan Sarah-i a lo haw a. Sarah-i chuan hrethiamlo tak hian Robert-a che vel chu a en hu mai a, Robert-a chuan, "I thawmhnaw va pack fel vat rawh." a lo ti nghal a. Sarah-i chuan hrilhhai tak hian, "Enga tan maw?" a lo ti hu mai a. Robert-a chuan, "Kan pem dawn, hmun nuam tawkah. Hmanhmawh rawh, dar 7 ah chuan Airport kan thlen angai dawn ania." a ti a. Sarah-i chuan, "Dar 7 ah a? Khawnge kan kal dawn?" a ti a. Robert-a chuan, "Goa ah...Goa ah nuamsa takin kan awm ang." a ti leh ringawt a. Sarah-i chuan, "Goa ah a? Chutiang kalna tur pawisa kan nei em ni? Chubakah nuamsa taka va awmna tur pawisa pawh kan neilo bawk." a lo ti leh a. Robert-a chuan, "Zawhna min zawt tawh suh, hmanhmawh la a nimai...Sarah, inisam vat rawh."  a ti chel chul mai a. Sarah-i chuan, Robert, hetah pawh hian kan awm pangngai em hi, engemaw i tih le?" a ti a. Robert-a chuan, "Pangngai a? Kan inchhung hi enteh, mi rethei mai kan nih hi. Chubakah thingtlangah kan awm lehnghal, ka thusawi hi ngaithla la, insiam vat la a nimai." a ti a. Sarah-i chu a lungawilo kher mai, "Robert, min tiam ani lawm ni? Hetiang hian i awm tawh lo ang tiin min tiam anilawmni? Daw heh lutuk." tiin Robert-a chu a beng siah mai. Robert-a chu a thinrim kher mai, Sarah-i chu a beng tlu tawp mai a. A samah chuan kekin, "I zak em? Min beng ve ngam amaw? Kut min han thlak leh vaih teh, a nung chungin ka phum ang che..i hria em?" a ti khur khur a, SArah-i chuan a hlau ngei mai, a tap zawih zawih mai a. Sarah-i bag chhuata let reng chu Robert-a chuan a chhar a, a chhungah chuan Mawitea lehkhabu ziah mek chu a hmu ta mai a. A la chhuak a, a chhiar ta a. Thinrim em em hian a meng sen rum mai a, "A sam rangkachak ang maia mawi leh a awmbawr a tawk chiah a kawh lah mai te chuan a ti hmeltha zual em em a, mahse he hmeichhe hmeltha leh duhawm zet mai hian engvanga pasal hmelchhe tak, piangsual lehnghal, mi-te (midget) tak, fit 5 pawh tling mang lo chu a thlan tlat mai le tiin a inzawt mawlh mawlh thin." tiin a chhiar mual mual a, a thinrim kher mai. Rum zet hian Sarah-i chu ava melh a, Sarah-i erawh hlauvin sofa ah chuan a lo thu a, a khur dar dar mai. Robert-a chuan lehkhabu chu a paih thuai a, "He thil hi Mawitea ziah a ni tiraw? Kei hi piangsual maw ka nih a? Mi-te mai mai, ft 5 pawh tling phalo, pasal hmelchhe tak maw ka nih a?" a ti a, a thinrim lutuk chu a meng sen vek mai. Sarah-i chu a han en leh a, "Hei vang hi em ni ka bula i lo kal duhloh nachhan? Mawhhh.." a ti ta khur khur mai. Sarah-i chuan hlau tak hian, "Ro...Robert...nilo, khawngaihin ti suh." a lo ti lawm lawm a. Robert-a chuan Sarah-i chu a kek tho lawp a, "Kha mihringpa bulah khan i awm duh em ni? I hmangaih amaw? Kei aiin i thlang amaw?" a ti vak vak a. Sarah-i chuan, "Nilo...thawnthu mai mai a ni, kawl tha turin min ti a, ka kawlsak mai mai alawm." tiin a tap zawih zawih a. Robert-a chuan sofa ah chuan Sarah-i chu a namtlu thuai a, "Anih chuan va awm ta che..i tenawm zia te, i tunhma nun rapthlak zia te kha hrilh nghal law law ang che. I thil tuk vanga an man che kha, ka pawisa neih zawng zawnga ka rulh let sak che te kha sawi vek ang che. Mi hausa tak tak in rawk tura min fuihpawrh thin lai te, lawmman atan min mutpui thin thute kha hrilh vek ang che." a ti hrep a, Sarah-i chu a tap zawih zawih mai. Robert-a chuan a air-bag chu a khai a, "Keilo chu tumah mipa dang i phu lo, minute-5 hnua ka motora ilo lut lo a nih chuan ka that ang che." tiin a chhuahsan ta a.

**************

Rinawma chu a lo haw a, Nathana thingpui inlai chu ava thutchilh nghal a. Rinawma chuan, "Sir, khami te nupa kha, kan rin ang chiah a ni." a rawn ti lut nghal a. Tluangtei chu lo chhuakin, "Enge awmzia?" a rawn ti hu mai a. Rianwma chuan, "Sarah-i leh Robert-a te saw mawle. Chuan Robert-a saw a hming tak tak chu Robert-a a ni hauhlo, Victor-a zawk a ni." tih pah chuan Nathana chu file a pe a. Nathana chuan file chu a han en a, "Hei vang chiah hi a nimaw Henry-a pawh khan engmah a hriatloh ni?" a lo ti a. Rinawma chuan, "Ni chiah e, ka mi zawh te ho zinga thenkhat pawhin an hrelo alawm." a ti a. Nathana chuan file chu a han chhiar a, "Sarah-i hi Call-Girl a ni thin a, Robert-a erawh Rukru a ni bawk. In an rawk thin a, tlereuh dawr an rawk bawk a, chuan Robert-a hi tualthah thubuai leh rukruk case vangin kum 10 lai jail ah a tang tawh bawk a, parole-a chhuah tir a ni." a ti nuah nuah a. Rinawma chuan, "A tualthah dan atang khan a chiang mai alawm, a lung-ah tak a vit ania." a lo ti ve bawk a. Tluangtei chuan, "Awiiii....a rapthlak emai. engtin nge a nih theih? Mifel tak turah ka lo ngai a, an inah pawh ka lenglut fo asin." a lo ti nuah nuah a. Nathana chuan, "Hawh teh Rinawm, iva kal nghal teh ang." a ti a, an kal ta a. An kal pah chuan an titi phei mawlh mawlh a, RInawma chuan, "Robert-a hian Duhsaka chu thatin a hnuhma a thup angin kan ngai maithei a, chuvang chuan Police te pawhin an chhuichhuak theilo a ni a..mahse engvanga that nge a nih ang? A sim vek tawh a, nun pangngai takin a nung tawh tiin record ah khan a inziak si a?" a ti a. Nathana chuan, "Rinawm, zurui thin te nen danglamna  a awm lo. Zurui te pawhin an sim tak tak theilo ang chiah hian hetiang mihring te pawh hian an sim tak tak theilo." a ti a. Rinawma chuan, "A chhan kan hriat a ngai animai." a lo ti a. Nathana chuan, "Anih leh kha Scythian chemte kha? Kha chemte nen khan inzawmna a nei ngei ang."  ati a, Rinawma chuan, "Va lut ila, a chiang mai ang." a ti a. Robert-a te in chu an thleng a, an lut ta a. Inchhungah chuan tumah an awmlo a, dawhkan ah chuan thingpui in zawhloh hi alo awm a. Sofa ah chuan Mawitea lehkhabu pawh alo la awm bawk a, chhuatah chuan paper a darh nuai bawk. Rinawma chuan thingpui chu a han la kang a, "Sir, ala lum deuh..an kalna a la reilo tawp ang. Khua hi a dur bawk si a, ruah a sur ngei anga...anih chuan kan la nang hman em em ang." ati a. Nathana chuan sofa a MAwitea lehkhabu chu  ahmu a, a la kang a, "Rinawm enteh, Mawitea hming a inziak a nia..hawhteh..i kal vat ang." a ti a, an chhuak ve ta nghal a.

Sarah-i leh Robert-a te pawh chu Airport lam panin motor chuan an kal mek a, Sarah-i chuan Robert-a chu lungawiloh hmel zet hian a melh a, "Duhsaka kha i that a ni tiraw?" a ti a. Robert-a chuan, "I hriat ve angailo, i hriat loh kha i tan a tha zawk." a lo ti vin hlur a. Sarah-i chuan, "I that tiraw...min chhang rawh." a ti leh a, mahse Robert-a chuan a chhang lo. Sarah-i chu a tap a, "Min tiam anilawmni? Tualthat tawh lo turin min tiam a ni lawmni?" a ti a. Robert-a chuan, "Tun atangin ka sim nghal dawn lawm, ka thil neih hi ka hralh anga, pawisa ka nei anga tichuan Goa ah kan kal ang. Nun bul kan tan leh anga, nuamsa takin kan awm tawh ang. Hei hi i duh a nilawmni, i dream ani lawm ni?" a ti a. Chutih lai chuan an hnungah chuan motor a rawn tlan a, Robert-a chuan, "Hmel ho chuh...tute nge mawni?" a ti nuah nuah a. A hnunga um mektu te chu Nathana leh Rinawma te an ni. Nathana chuan, "Rinawm, tlan chak rawh.....kan man ngei angai ania." a ti a. Rinawma chuan, "Lungngai suh Sir, ka man khawp ang." a ti a. Robert-a chuan thinrim tak hian, "Kha mikual police te pahnih bawk kha an ni leh ang, an chak dawnlo." a ti vak vak a. Pistol a phawrh a, motor chu a ti ding a. Nathana te pawh chuan motor chu tidingin an chhuk a. Robert-a chu rawn chhukin pistol chuan Nathana te chu a tin a, "Ka kham tawh khawp mai che u. Nathana leh Rinawma te chuan ban an phar a, Rinawma chuan, "Robert.....silai kha dahthla rawh. Titi pui tur chauh che a lo kal kan ni...tihnat che kan tumlo." a ti a. Robert-a chuan, "Engmah sawi tur ka neilo..kal bo rawh u." a lo ti vin hlur mai a. Rinawma chuan, "Enteh, silai engmah kan pai velo, tihnat che kan tum lo tak tak." a ti a. Chuveleh Sarah-i chuan lungtum lian tak mai hi a la a, Robert-a lu ah chuan a chhu pawp mai a. Robert-a chu a thal nghal tawp a, nikhaw hrelovin a awm zui nghal.

***********

"Sangtei khan a maternal rights hmangin a fapa kha kan home ah hian a hlan fel tawh a, a hming pawh a sign tawh a ni. Chuan pawisa pawh kan dawng lo, chu chu a nimai." tiin Pi Mawii, Children's Home Director chuan a Erica chu a vin vak vak a. Erica chuan, "Finfiahna dang ka la nei ania aw...nikum khan naupang 12 te chu food poisoning vangin an damlo tih pawh ka hria." a ti a. Pi MAwii chuan, "Kha te chu institution lam te endik a ni a, hetah chuan engkim a tha vek." a lo ti khur khur a. Erica chu a nui suk a, "Endikna dang te pawh ala awm ang chu Pi Mawii, ei leh in tur inva leina company neitu chu i fanu a ni tih hrechhuak ta se...engtin nge i tih ang? Chuan, khawnge Cheng nuai 40 budget fund te kha...playgroud siam that nana in tih te kha? Pawisa zawng zawng te kha inhmun pathum vel lei nan i hmang a nilawm ni? Chuan pawn lama Scorpio dum nalh tak mai khu i lei thar a ni bawk tiraw khah? a ti ta phiar phiar mai a. Pi Mawii pawh a pawr ngam ta lo, "Enge i duh?" a ti ta ringawt mai a. Erica chuan, "Zosangzeli (Sangtei) hian a maternal rights te kha a hmu let leh tur a ni a, chuan Sammy-a hi a nu bulah a rang thei ang berin in pe let leh tur a ni. Anih loh vaih chuan, Police Station hi heta tang hian a hnai tehmai a nia. Hmelhriat tam tak ka nei bawk a, Minister te beng a thleng anga, jail bang i zut bawk ang. Min ringlo em ni? Hmannia boral ta Pi Muani nena in inremsiamna tenawm takte pawh kha ka hre vek, cheng nuai 3 i pe ve a, a dik em? A dik tiraw....ka thusawi hi i pawm dawnlo a nih chuan Police Station lam ka pan nghal mai ang." a ti leh ta siah siah mai a. Pi Mawii chuan, "Awle awle, a tha e. Pawisa chu kan insem alawm, a chanve in kan insem. Mahse Pi Muani khan naupang kha a nu bulah chuan a himlo a ni a ti a, chubakah a nu kha rilru buai a ti bawk a. I thusawi te kha a dik e, engkim kha a dik vek e. Mahse Sangtei hian a dikna  ahmuh let leh theih nan chuan hun kan mamawh deuh ang." a ti a. Erica chuan, "Atha alawm, kan lo nghak ange. Mahse kan nghak rei thei lovang, Sammy-a kan rawn hruai theih dawn hunah minlo call dawnnia, hei hi ka card aw.." tih pah chuan card chu a pe a, a chhuahsan ta a.

Erica chu a hlim ngei mai, eitur te leiin Sangtei te inah chuan a va leng nghal a. Sangtei bulah chuan eitur te chu dahin, "Kha eirawh." nui sen sen chung chuan a ti a. Sangtei chuan, "Enge ilo tih leh dawn a?" a lo ti hmuk a. Erica chuan, "Ka hmu chak che a, chuan thu lawmawm deuh a awm bawk a." a ti a. Sangtei chuan, "Engmah ka ei peihlo, chuan ka hmu peihlo che. Chuan thulawmawm i tih pawh chu ka ngaithla peih lo, haw tawh rawh." a lo ti leh hmuk mai a. Erica chuan, "Min ngaithla ve phawt la." a ti a. Sangtei chuan, "Eric, duhtawk rawh. Thian pawh kan ni thei tawh lo ang, engkim a tawp vek tawh." a ti a. Erica chuan, "Vawiinah Children's Home ah khan kava kal a." a ti a. Sangtei chuan, "Keipawh ka kal fo alawm, engmah tihtheih kan neilo a ni." a ti a. Erica chuan, "Director nen kan inbia a, i maternal rights te kha i hmu let leh thei a ni tiin min hrilh a." a ti a. Sangtei chuan, "Thil theihloh tawp a nih chu." a lo ti a. Erica chuan, "Hun tlem chu an mamawh deuh dawn a, karleh ah chuan Sammy-a pawh i hruai haw thei tawh ang." a ti a. Sangtei chuan mak a ti hle mai, "Ngawiteh, ka hmuh hnuhnun ber kha chuan Police min mantir hial kha a ni a, ava mak ve." a ti nuah nuah a. Erica chu  a nui huk a, "Ka bulah chuan chutiang a ti ngam ve hleinem, ka sawifel nghal vek alawm. Kha...eitur te hi ei teh, i ril a tam ang." a ti a. Sangtei chu a hrilhhai hle mai, eitur te chu a ei ve ta mai bawk a.

****************

Police Station ah chuan Henry-a chuan Robert-a chu a dawp mek a, a bulah chuan a nupui Sarah-i pawh chu a awm ve bawk a. Henry-a chuan, "Engkim min hrilh rawh, jail pawh ilo tang fo tawh lehnghal a, i chan a chhe teh ania. Thudik tak min hrilh la, i tan a tha zawk ang." a ti a. Robert-a chu a ngawi reng a, a melh ngai a melh vung vung mai. Henry-a chuan a dawhkana sarang chhunga Scythian chemte nalh tak, rangkachak atanga siam leh lunghlu tam tak inbel tle neuh neuh mai chu a han lek kang a, "I ngawih reng avang khan i him dawn hauh lo ania, Robert. He chemte hi i suitcase atangin kan hmu a, kan expert ten an enchian zawh hnuah chuan tualthahna hmanrua ngei kha  ani tih an hmuchhuak vat ang. Mi pahnih i thahna hmanrua ngei mai kha...Pi Muani leh Duhsaka i thahna ngei mai kha.." a ti a. Robert-a chuan a lu chu a han dawm vawng vawng a, "Awle, ka hrilh ang che. Mahse ka insawi fiah nilovin, ka inpuang angin i ngai dawnnia. Ni e, Duhsaka kha ka thah a ni. Kha kutdawh, kha zu ngawl vei ve mai mai khan min insawitheih khum vel a. Kei aia tha nih a tum vel a, ka that ta a nih kha." a ti khur khur a. Henry-a chuan, "Robert, i tawngkam kha fimkhur rawh. Hei hi i pa in anilo, Police Station a nih hi." tiin a vin hrep mai a. Robert-a chuan, "Awle, a tha e...Duhsaka nen khan December ni 19 ah inhmu turin kan inbe lawk a. A sawi dan chuan kha chemte, Pi Muani an thahna chemte ngei kha a hmuh thu min hrilh a. Kawngsir ah a hmu a ni awm e, puanin a lo infun a ti a. Chu chemte chu hralh ta ila, a man a to dawn lutuk tih pawh ka hria. Mahse Duhsaka chuan chutiang chuan tih ve nachang a hrelo, tichuan khami hmun, a riahna thin building hluiah chuan min hruai a. Chulai hmunah chuan a lo dahtha thin hi a lo ni a. Police te hnena pek a, Police te chuan lawmman atan pawisa in pek a ring a. Tichuan chemte chu ka han enchhin a, a inrinloh hlanin ka vit ta a ni. Ka nupui nena nuamsa taka kan awm nana ti ka ni, kan hma hun atan vek a ti ka ni." tih pah chuan SArah-i chu a va en a. Sarah-i chuan rum zet hian alo melh a, "Nang nen hian hmahun kan neilo, ka engmah i ni tawh lo. ACP Sir, ka haw thei tawh angem?" a ti a. ACP Henry-a chuan, "Awle, naktukah dar 3 ah lo kal leh ang che."  ati a. Robert-a chuan, "Sarah, Sarah, kal suh."  alo ti vak vak a. SI Ruata alo lut a, Henry-a chuan, "Ruata, Sarah-i hi pawn thleng va thlah rawh." a ti a, Sarah-i chu a chhuak ta a. Robert-a chu a thinrim kher mai, a mittui a tla hial a. Henry-a chu a en a, a nui suk a, "ACP Sir, ani nen khan kum 10 chuang kan chengdun tawh a, mahse ka mitah tak pawh hian min enduh ngailo." a ti a. Henry-a chuan, "A lo nih tak chu....nihleh kan sawizawm thei angem?" a han ti vin deuh thak a. Robert-a chuan, "Awle." a lo ti a, Henry-a chuan, "Nihleh Pi Muani i thah dan kha han sawi teh le." a ti a. Robert-a chuan, "Thilsual dang ka ti leh ngam tawh lo hrim hrim, ka thah a nilo. Pi Muani kha ka khawih eih lo, mahse Duhsaka kha chu ka thah a ni a, ka zep lo." a ti a. Henry-a chuan, "Anih leh Duhsaka chuan chemte chu kawngsirah chuan puana intuamin a va hmu tawp tihna em ni?" a ti a. Robert-a chuan, "Aw ni e, a sawi dan ania, mahse a ni tak tak em chu ka hrelo. Police i ni a, i chhuichhuak ngei ang chu."  alo ti a.

Nathana chuan MAwitea lehkhabu ziah mek, Sarah-i te in atanga a lak chhuah chu a en leh ta melh melh a, chutah thil hriatchhuah thut nei niawm tak hian a tho thut a, a tlanchhuak nghal a. Margareth-i te inah chuan ava lut a, Margareth-i chuan, "Ehe, Nathan, iva hmanhmawh vel em em ve." alo ti a. Nathana chu a thu a, a thinrim hmel kher mai. A bulah chuan Margareth-i chu ava thu a, "Enge ni a?" a lo ti a. Nathana chuan lehkhabu chu a chhiar ri ta a, "A kut mawi leh no nalh tak mai chu a hmang tangkai thiam ngang mai a, a sam lah a dum nalh zar mai bawk si, hmeichhe hmeltha tak chu ava ni em. Chu chemte chu la in a nu chu a vit ta mai a, chu nu tar tawh tak mai chu chhuatah chuan a let ta reng mai. Tichuan chu nula chuan a shawl bah lai, Chinese-Shawl ngei mai chu a pawtthla a, chemte-a thisen kai te chu a hrufai ta a....i hriat tawh hnu a ni em?" a ti a. Margareth-i chuan, "Novel tenau deuh deuh ho zinga thawnthu pakhat a ang hle mai." a lo ti a. Nathana chuan, "A sam dum hlarh mai leh a Chinese Shawl....nangmah a sawina a ni. Chuan kha Chinese-Shawl kha i nei tih ka hre bawk." a ti a. Margareth-i chuan, "Enge awmzia?" a lo ti hu mai a. Nathana chuan lehkhabu chu hmuh pah chuan, "Hei hi inthenawmpa Mawitea Novel ziah mek a ni a, i nu i that angin a ziak ani. Enge awmzia, Margareth?" a ti a. Margareth-i chu a tho a, room ah a va kal a. A lo let leh a, Chinese-Shawl chu a rawn la a. Nathana pek pah chuan, "He shawl hi em ni i sawi chu? Nikuma China a ka zin khan ka nu ta tur leh ka ta turin pahnih ka lei a, mahse ka nu chuan a duhlo a, midang a pe a ni." a ti a. Nathana chuan, "Anih chuan i nu chuan shawl dang chu tunge a pek?" a ti a. Margareth-i chuan, "Ka hrelo, Mawitea sawn engtik lai pawhin binocular hmangin min enthla thin a, amah sawn ka nu chu a that a niang chu. Chemte kawltu pawh amah i ti ani lawmni?" lungawilo deuh tak chuan a ti a. Nathana chuan, "Chemte chu hmuh a ni tawh a, ACP Henry-a kutah a awm mek." a ti a. Margareth-i chuan, "Nathan, min ringhlel em ni?" a ti a, Nathana chuan, "Engtik laiin nge ka rinhlelh che a, ringhlel che ila ka rawn man nghal ang che chu mawle." a ti a. Margareth-i chuan, "A tha a nih chu." a lo ti deuh hmuk a. Nathana chuan engmah a sawi tawh lo, a chhuak leh nghal a.

***********

Atuk tlai ah chuan Nathana chuan Mawitea novel ziah mek chu Henry-a a chhiar tir ve ta a, Henry-a chuan tlem azawng chu a chhiar a, "Ummm, a ziak thiam kher mai. A thawnthu te hian tualthahna nen khan inzawmna a nei tlatin ka hria, he chemte hi a atchilh a nih ber hi. Han chhui chiang deuh ila, tualthattu diktak pawh alo ni thei maithei asin." a ti a. Nathana chuan, "Tualthattu emaw, mita hmu tu emaw pawh nise, enge a danglamna? Kan hmu zolo chu a ni a, khawnge a awm pawh kan hre silo." a ti a. Chutih lai chuan Sarah-i a rawn lut a, Henry-a chuan, "Lo thu rawh SArah, engemaw kan hriat belh dawn e." phur tak chuan a ti a. Sarah-i chuan mak tih hmek tak hian, "Eng chu maw in hriat belh dawn?" a lo ti hu mai. Henry-a chuan, "Sarah, khawnge in inluah tu Mawitea kha a awm? Tualthattu ber ni a rinhlelh  ani a, Pi Muani thattu kha amah niin ka hria a ni." a ti a. Sarah-i chuan, "A tih a nilo, tumah a that lovang. Chutiang mi anilo, ka hre chiang ani." a lo ti vat a. Henry-a chuan, "Amah biak kan duh ani, tichuan a that nge thatlo tih chu a chiang mai ang. A address i hria em, a number te?" a ti a. Sarah-i chuan, "Hrelo, engmah ka hrelo. Mawitea khan engmah a sawilo a, amah contact theihna tur engmah a awmlo." a ti a. Nathana chuan, "ACP, ka lo zawt ve lawk aw?" a ti a. Henry-a chuan, "Awle DCP Sir, i thu vek alawm." a lo ti deuh kher a, a chhuahsan ta a. Nathana chuan Sarah-i chu a en a, "Sarah, Mawitea hi i veng him reng a ni tih ka hai miah lo ania, i ngaihtuah em em a ni tih pawh ka hria. A himna tur i duh takzet anih chuan a awmna min hrilh rawh, ka ngen a che. A bihruk rei poh leh Police te hian an ringhlel tulh tulh a nimai. A awmna min hrilh la, pawisawilo a nih zia pawh ka tarlang thei bawk ang." a ti a. Sarah-i chuan, "Tualthattu anga puh i tum, ka hre vek. Anih chuan tunge tualthattu tak tak zawk chu zawng ta ang?" a ti a. Nathana chuan, "Ka zawng ang, ka zawng anga, ka hmuh hma chu ka zawng zel ang. He khua hi ka chhuahsan lovang, ka zawng hmu ngei bawk ang, ka tiam ache. Mahse Mawitea hi, a damchhunga biru reng reng a ahun  ahman ral i duh em ni? In pahnih tan zawk a nih chu, i hmangaih tih pawh ka hria. Min hrilh rawh, khawngaihin?" a ti a. Sarah-i chu a ngawi vang vang a, atawpah chuan a address chu a hrilh ta nge nge a.

Nathana chuan Henry-a a hrilh veleh a, tichuan Henry-a nen chuan address lam chu an pan dawn ta a. An kal tur chiah chu Nathana phone a rawn ri a, Margareth-i alo ni. Nathana chuan, "Hello, MArgareth...enge ni ta?" a rawn ti a. Margareth-i chuan, "Nathan, enge chanchin?" a rawn ti vat a. Nathana chuan, "Mawitea address chu kan hre tawh a, ACP Henry-a nen kan kal dawn mek e." a ti a. Margareth-i chuan, "Tualthattu anih i ring em?" a ti a. Nathana chuan, "Ka la chiang ngam biklo, kan hre thuai ang." a ti a. Margareth-i chuan, "Awle..NAthan, nimin tlaia khatia ka tih che avang khan min ngaidam dawnnia." a rawn ti a. Nathana chuan, "A pawilove, engatan mah ngai suh." a ti a. Margareth-i chuan, "Ka lawm e, i haw veleh lo leng la." a han ti vel a. Nathana chu a nui suk a, "A chi loh, min kiss i tum leh palh ang. Thinrim an tam phah ropui sia, ka thiamloh ang vekah an ngai leh nghal." a ti a. Margareth-i chuan, "Umm..kha chu ka thiamlo takzet ani, ngaihdam minlo dilsak hlawm dawnnia, i luck bik sia." a ti a, a nui har har a, phone chu an dah ta a. Nathana leh Henry-a te pawh chu Mawitea address nia an hriatna hmun chu an va thleng ta a, Henry-a chuan, "Keichu Mawitea awmna a nih tak tak pawh ka ring nek love, Sarah-i khan min bum mai mai ani ang." a ti nuah nuah a. Nathana chuan, "MAwitea hian Sarah-i chu dawt a hrilh lo tawp ang, a hmangaih em mai." a ti a. Henry-a chuan, "Aww...Mawitea zawk hian min bum thei asin." a ti a. Nathana chuan, "I lut phawt teh ang." a ti a, inchhungah chuan an lut ta a.

***********

Rinawma chu meizial zu in kawtlai ah chuan a tei kual a, Margareth-i alo kal a. Present bawm lian deuh mai hi a rawn keng a, Margreth-i chuan, "Rinawm, Nathana a awm em?" a rawn ti a. Rinawma chuan, "Awmlo, a chhuak a..enge ni ta?" a ti a. Margareth-i chuan, "Eng nilove, nimin tlai ah khan ka lo vin vak a, kan inhau deuh a. Ngaihdam dil nan hei hi pek ka duh a, minlo peksak thei angem?" a ti a. Rinawma chuan, "Tlaiah chaw lo ei la, tah chuan i pe mai dawnnia." a lo ti a. Margareth-i chuan, "Ka chhuak dawn a, ka thiante inah ka riak dawn a. Chuvang chuan minlo peksak mai la, ka lawm ngawt ang." a ti a. Rinawma chuan present chu a la a, "Awle, ka lo pe ang." a ti a, MArgareth-i chu a nui sen sen a, "Ka lawm e." a ti a, a kal ta a. Margareth-i chu Police Station ah chuan ava kal a, Station ah chuan SI Ruata chauh hi alo awm a. MArgareth-i chuan, "ACP Henry-a i ni em?" a ti a. Ruata chuan, "Nilo e, a chhuak a, puih theihna che ka nei em?" a lo ti a. Margareth-i chuan, "Tunge i nih?" a han ti leh a. Ruata chuan, "Sub-Inspector Ruata ka nia, a case chhui mek ah hian ka pui a." ati a. Margareth-i chuan, "Pi Muani case kha a ni em?" a ti a. SI Ruata chuan, "Engtin nge i hriat a?" a ti hu mai a. Margareth-i chuan, "A fanu ka nia." a ti a. SI Ruata chuan, "Lo thu rawh, khawngaihin." a ti a. Margareth-i chu a thu a, "I fel hle mai, ka lawm e. Ihh...tiang em em a mi polite leh fel hi Police te zingah hian an awm ka ring ngailova, nang chu i danglam hle mai." a han ti deuh luam a. SI Ruata chu a nui sak a, "Nilove, ACP Henry-a pawh hi mi polite tak a ni asin." a ti a. Margareth-i chuan, "Nia, mahse nang ang em em a polite leh hawihhawm chu  anih ka ringlo. Ihh, englo...he case chungchang hi hrechiang tura lo kal ka nia. Mahse ACP a awm silo a, ka haw leh mai ange." a ti a. SI Ruata chuan, "Lo nghak la, darkar chanve vel hnuah chuan an lo let mai ka ring. I nghah pahin duhleh case file vel te hi han en ve chhin la, kha le." tih pah chuan file chu a pe a. Margareth-i chuan, "Awi, ka lawm e aw...ka rawn luh tirh atang khan mi fel tak i nih kha ka ring sa reng a ni. Hmeichhia te hi chuan mipa diktak leh fel deuh te hi chu kan hre nghal chat thei ania, i fel takzet." a han ti leh vel a. Ruata chuan lai lek lek hian, "Ka lawm e, hna thawh lawk ka ngai a." a ti a. Margareth-i chuan, "Enteh, chemte kha inkawl mek tiraw?" a han ti leh a. Ruata chuan, "Aw, tun atanga darkar khat velah expert te hnena thawn a ni ang." a ti a. Margareth-i chuan inthlahrun hmel tak hian, "Ka lo enchhin thei angem?" a ti a. Ruata chuan chemte sarang chhunga an dah chu a la chhuak a, "Kha le." a ti a. MArgareth-i chuan chemte chu a han en a, "Ihh...kha..kha chemte hmang khan ka nu an vithlum a, kha chemte kha.." tiin a thaw halh halh mai a. Ruata chuan, "I tha em?" a lo ti vat a. Margareth-i chuan a awm a dawm vawng vawng a, "Tui...tui minlo pe." a ti a, a thaw hlawp hlawp mai a. Ruata chuan, "Tikhan lo awm rawh, tui ka va la ange." a ti a, a chhuahsan ta a.

Nathana leh Henry-a te pawh chu in atang chuan an rawn chhuak leh a, Henry-a chuan, "Employee ho zingah khan Mawitea chu a awm ve lo phawt a, tuman an hrelo bawk a." a ti a. Nathana chuan, "Nia, damlo te zingah a awmlo bawk a, damlo te zingah khan a chhungte tumah an awmlo bawk." a lo ti ve bawk a. Henry-a chuan, "Kan beiseina neih hnuhnung ber pawh engmah a ni leh talo, hawh teh...i haw teh ang." ati a. An kaltur chiah chu Henry-a phone a rawn ri a, "Hello, aw kan lo haw dawn mek e.....ENGMAW??? ENGTIN??? HUIHAM....kan lo kal e." a ti a, phone chu a dah a. Nathana chuan, "Enge a?" a ti a. Henry-a chuan tum hmuk hian, "Expert te zinga pakhat ania, SI Ruata'n Scythian chemte chu a thawn a.." a ti a. Nathana chuan, "Enge a sawi a?" a lo ti leh a. Henry-a chuan, "Chemte chu an enchiang a, tualthahna hmanrua a nilo....a lem a ni an ti. Chuan thisen amaw kan tih kha, rawng sen mai mai a ni." a ti ta mai a.

********

Zan alo ni a, Margareth-i chu motor chhungah chuan a thu ran mai a. Phone a phawrh a, number pakhat chu  adial a, "Hello, chemte chu ka nei tawh e, naktukah kan inhmu dawnnia. Account number kha i hria tiraw...pawisa chu zingah ka la mai ang." a ti a phone chu a dah a. Motor chu a ti nung a, chak takin atlan ta a.

(TO BE CONTINUE)