KA THIANNU SIAMI KHA!

KA THIANNU SIAMI KHA!

Written by : Aaron Malsawmdawngzuala

"Bawiha, tho vat rawh...i thiannu Siami kha a boral an ti ania." tiin ka nu chuan min rawn sawi vak vak a, ka harh chiang ngei mai. Thawh phan pawh ka nei lo, ka thu hriat chuan min thawng takzet a ni. Rang tak chuan ka tho nghal vat a, "Engtin maw i tih a? Siami a thi amaw?" tiin phawk zet chuan ka nu chu ka melh a. Ka nu chuan, "A zialo khawp mai, nizanah a chhungten a lo haw miahlo an tia. An phone pawhin a tlang thei silo a, a thiante inah a riak anih an ring a. A thiannu Rinrini te inah a riak a ni awm a, tukin zing khan an bathroom ah a lo in awkhlum an ti a, chubak engmah ka hrelo." a ti a. Min va barakhaih tak em, ka awih thei mawlh lo a ni. Ka nu bulah chuan, "Anih keh a chhan awm ang an sawi em?" tiin ka han zawt leh a. Ka nu chuan, "Ka hre lo, Rinrini te inah kha chuan a riak ngei e an tia, mahse zingah an bathroom ah tikhan an hmu ta mai si a, ka hrethiam biklo." a lo ti leh ringawt a.

Lalnunsiami hi ka bialnu chu a ni hauh lo nangin vengkhat kan ni bawk a, tette atanga inkawm kan ni a. Kan inzui reng thin a, nau ang chiah hian ka en a, ani pawhin u ang chiahin min en thin. Chutia a thi ta mai chu amak ka ti a, min thawng takzet a ni. School kan lut dun char char a, kan in class mate chho char char bawk. Class 10 kan nih khan school dangah kan lut ta ve ve a, mahse veng khata awm kan nih vangin kan inkawm char char tho. Siami hian a ngaihzawng chungchang te, an chhungkaw chungchang te thlengin engkim min hrilh vek zel a. Chutiang bawkin keipawhin engkim ka hrilh ve bawk thin a, engkim kan in-share tawn thin. Kan veng ho pawhin min chhaih thin a, kan inzui ngun ve bawk thin em a ni. Mahse sawi tawh ang khan Siami nen hian thian chauh kan ni a, keipawhin bialnu ka nei a, amah pawhin bialpa a nei ve tho bawk.

A thih ni la la hian vui liam nghal a ni a, keipawhin ka tuar na khawp mai. A ruang pawh kha ka en ngam tha manglo hial a ni. Thlan mualah pawh ka kal velo, ka la awih thei hlawl lo a ni ber mai. Siami thih thu ka hriat khan mak ka tih zia leh ka ham haih zia hi ka sawichhuak thiam lo a, ka bing mup a ni ber mai. Rilru hahna a neih awm ka hrelo a, a bialpa Rsa nen lah an hlim dun viau khan ka hre bawk si. Rsa pawh a tuarna ngang aniang, tumah be duh lovin a room ah a inkalh hnan hmak a ni awm e.

Siami thih tuk hian khawhar inah ka kal ve a, zai tui a har ngang mai. Achhan pawh engdang anilo, Siami boral ta mai hi ka la tuar na em a ni. Sawi tawh ang khan ka thiantha ber a ni a, he khawvela a awm ve tawh lo tur chu ka ngai ngam thlat lo a ni. Ka ngai nghal em em a, a thlalak chu ka en ngawih ngawih reng mai. Ka rilru ti nuamlo tu ber chu khatia Siami inawkhlum ta mai kha a nih bakah, mahni inthat duh tur khawpa rilru hahna a neih awm ka hrelo tlat. Siami hian a lungngaihna te, a harsatna te leh a hlimna te engkim min hrilh vek zel a, mahse engvanga inawkhlum nge ni ta ang tih chu ka inzawt mawlh mawlh reng mai a ni.

Chutia khawhar ina kan zai tui lai tak chuan ka phone a rawn ri a, Siami bialpa Rsa a lo ni. Pawnah chuan ka chhuak a, phone chu ka pick up a, "Hello, Rs enge ni ta?" ka ti a. Rsa chuan mangan hmel zet hian, "Sangte, khawnge i awm?" a rawn ti chel chul mai a. Hrethiamlo tak chuan, "Hei khawhar inah ka awm a, enge ni ta?" tiin ka zawt a. Rsa chuan, "Khawngaih takin kan inah ilo phei vat thei angem?" a rawn ti ringawt a. Ka hrethiamlo kher mai, "Ngawiteh Rs, hei khawhar inah ka kal a, kan bang tep ang." ka ti a. Mahse Rsa chua vin lek lek hian, "Aih, tunah lo kal rawh...a pawimawh lutuk." a rawn ti tlat mai bawk si. A ngaihna ka hrelo kher mai, "Rs, hei kan bang tep ang, ban veleh ka lo kal dawnnia." ka han ti leh a. Mahse Rsa chu a thinrim amaw tih mai tur hian, "Nilo, tunah lo kal rawh. Ka be duh che a ni...Siami chungchang ania." a rawn ti ta mai a.

Chutia Rsa'n mangan hmel taka min rawn ngen lawm lawm takah chuan khawhar in lamah pawh chuan lut tawh lo chuan an inlam ka pan nghal a, ka ngaih erawh a tha zan lo. Rsa te in chu ka thleng vat a, inchhung ka luh rual rual chuan Rsa chuan, "Ka roomah lo kal rawh." a lo ti nghal a. Rsa nu leh pate pawh chuan min lo en hu ringawt a, room ah chuan ka lut ta a. Rsa bulah chuan, "Rs, enge ni a...iva mangan hmel ve?" ka han ti a. Rsa chuan thutak em em hian min han melh a, "Enteh, Sangte...Siami hian vawikhat tal a duh thu che a sawi tawh em?" a ti ringawt a. Ka nui huk nghe nghe, Rsa chu ka han en a, "Engemaw i sawi le? Siami nen chuan thian chauh kan ni tih i hriat kha.." ka ti a. Rsa chu a han maimitchhing vang vang a, "Sangte..min chhang teh,, a duh thu che a sawi tawh em?" a ti leh a. "Rs, i mawl em ni? Tinge chutiang te min zawh a, Siami te chu ka thiannu ania, in inhauh chang pawhin nang ngei pawh ka bulah thurawn i la thin a, i hriat vek kha. Chutiang zawhna atthlak lutuk te tinge min zawh a?" lung awilo deuh tak chuan ka ti a.

Rsa chu a ngawi vang vang a, "Enteh Sangte, vawiin tlai atang khan zu ka in a, chaw pawh eilovin ka chatthla a. Ka mumangah Siami ka hmu a, a rukin alo duh reng che a ni tih min hrilh a." a han ti mai chuh. Nuihzat ai mah chuan ka thinrim lek lek zawk, "Mawla, i mumang avang chuan khawhar in atangin min rawn ko chhuak amaw?" ka han ti deuh hrawk a. Rsa chuan a lu a thing a, "Nilo..enteh Sangte, ka fiamthu lo. Ka mumang chu a ni ngei a, mahse chiang takin ka hmu a ni. Rilru nat hmel em em hian min melh a, a mittui a luang zawih zawih a. Ngaihdam min dil bawk a, a hmangaih thu che a sawi char char bawk asin." a la ti ta deuh deuh a. Ka thaw hak a, "Anih chu..Rs, chutiang mai mai vangin buai duh suh, ka haw dawn." tih pah chuan ka chhuak hmak a.

Ka haw hnu pawh chuan Rsa chuan minla rawn call reng a, ka ning takzet. A bialnu boral avang hian a buai zo vek ni berin ka hria, min ringhlel hial maw ni zawk ni! A call pawh chu ka la duh lo a, vawi 5 vel lai chu missed call a awm nghe nghe. Whatsapp message pawh a tam hle a, mahse a sawi ngai bak chu engmah dang a rawn sawi chuang lo. Siami hian engti kawng mahin kei hi min duh dawnlo tih ka chiang a, naupan lai, hnap tawlh pir per kan nih lai daih tawha inkawm kan ni a, kan inhre chiang em em a, a duhzawng ka nihloh thu pawh vawi tam ka hmaichhan ngeiah pawh a sawi fo bawk. Chutiang bawkin keipawh in ka duh lo a, hmeichhe pangngai angin ka en ngailo. Chubakah bialnu ka nei a, a bialnu pawh ama thiannu ngei Melody a ni nghe nghe.

Zan ka mu chu ka muhil thei thak lo mai a, sihal u chuah chuah ri niawm tak hi ka hre reng mai. Kan in awmna lai hi chutia fal em em pawh a ni si lova, kawngpui bula awm ve tho kan ni bawk si. Ka room thlang lam hi kan huan chu a ni ngei a, mahse khawiah hian sihal an awm dawnlo hrim hrim. Ui an ni ang tidawn ila, kan thenawmte leh kan inbul vel ami te hian tuman ui an vulh ka hre bawk silo, khawlai ui vakvai, enkawltu neilo ho an nih ka ring a, ngaihthatlohna engmah ka neilo. Mahse an bengchhengin min ti mu thei hlawl lo chu a ni ber mai, an u chuah chuah reng mai a ni.

Reiloteah chuan thawm chu a reh ve mai bawk a, keipawh chu a tawp atawp ah chuan ka mut a rawn chhuak ve deuh ta a. A lum ka tih em avang chuan rizai chu ka tlawh hlim a, rizai sinlo chuan ka mu ta a. Ka muhil siar siar tawh tih ah chuan ka ke hmawr chu a rawn za mer mer a, kan ui Jimmy-a a nih ringin meng mang hlei lo chuan, "Jimmy...kalsawn teh." tih pah chuan ka ke chu ka dah sawn a. Chuveleh na em em mai hian tu emaw hian ka ke chu a rawn pawt vak mai a, khum mawngah chuan ka tawlh dawr mai. Ka harh chiang teh kher asin, ka hawi kuala tumah an awm silo.

Ka thinphu a rang nghal em em a, "Tunge..tunge ni?" ka han ti vak vak ringawt a, mahse ka room chhung chu a reh hian a reh thiap mai. Sana ka en a, zinglam dar 1 a lo ri tawh hial a. Chutah sihal u ri chu a lo ri leh ta chuah chuah mai a, ka thlan a tla bawrh bawrh mai. Chutah ka khum hnuai atang chuan hmeichhe tap ri niawm tak hi ka hre ta a, thla a va muanglo kher em. Ka huaisenna zawng zawng ka sawm khawm a, khum hnuai chu zawimuang hian ka zu bih a. Mahse tumah ka hmulo, a thim em vang pawh a ni mahna. Ka han hawichhuak leh chiah mai chu ka khum ah chuan hmeichhe pakhat, hmai dang vek leh mit pual vek mai hi a lo thu ve reng anih chu. Ka phu nasa lutuk chu ka au vak a, khum atang chuan ka tla tawp mai.

Bang kilah chuan ka tawlh phei nghal a, khum lam ka va hawi leh a, kha hmeichhia kha a lo awm tawh lo. Ka hlau lutuk chu ka mittui a tla hial a, ka thaw hlawp hlawp mai. Chutah ka khum chu a che ta luih luih mai a, chet pawh ka che ngam tawh lo. Ka khum hnuai atang chuan Siami, ka thiannu, nimin lawka boral ta kha arawn vak chhuak a nih chu. Ka lam pan chuan a rawn vak phei a, ka khawng vek thei hialin ka hria. Chutah ka hma zawnah chuan a rawn ding a, ahmel mawlh kha ka rap a ni. A sam a thur bum a, a birthday a ka present, kawr pawl dal lam deuh, ahmaa Best Friend Forever tih inziak ngei mai kha a ha lehnghal. A mit a var vek a, a mai chu a dang vek bawk.

Chutah hnai set sawtah hian min rawn en a, ka che theilo. Tlanchhiat ka duh, mahse ka khawng vek. A rim lah chu a chhe em em mai a, ka lu a hai muai muai thei hial a ni. Mit khap miahlo chuan min en a, "Sangte..." a rawn ti ta mai. Ka thlanfim a tla zawih zawih a, ka mittui pawh a tla hialin ka hria. Ka hlauh dan em em kha ka sawi fiah thiamlo a ni ber, ka tiril a fan a, ka ding khawng reng ringawt. Hlauh tawh sa nak alaiin, a la rawn nui zui a nih kha. A ka reh zau dan em em kha, a ha pawh a dum vek lehnghal. Siami, ka thiannu, ka best friend, hmeltha tak ni thin kha, tunah zet zawng, a rapawm in a hmel hmuh ava hrehawm tak em.

Chutah bangah chuan min nambet thut a, a rawn tawng chhuak ta. Mahse Siami aw a ni hauh lo, mipa aw daih ani, "Sangte, ka hmangaihna che kha i hrethiam duhlo lui a ni tiraw?" a rawn ti ta mai a, chhan pawh ka chhang ngam lo. Zun ka cheh thawt thawt tawh hialin ka hria, a kut vawt tak chuan ka hmai a rawn khawih a, "Theih tawp khan ka duhna che ka lan tir a, mahse i hrethiam duhlo a. Hunrei tak chhung ka duhzia che ka lantir char char a, mahse nang chuan engatan mah min ngai silo. Kei ai chuan Melody kha i duh zawk miau si a tiraw? Enge kei aia a that vak bikna? Mawhh...min hrilh teh." tiin min vin ta khur khur mai a. Chutah ka luah chuan nghet takin a vuan a, min rawn fawp ta mai a nih kha.

Ka khum atang chuan ka tla tawp a, ka va harh chiang tehkher em. Ka mumang vek maw lo ni a? Ka lawm kher mai. Mahse ngaih chu a tha zan chuanglo, mumang pawh a ang ka tilo. Zun pawh tlem chu ka lo cheh tak tak lehnghal, ava chet khir theih ngai em. Ka thlan pawh a lo luang zawih zawih mai, ka mumang a ni hlauh chu ka thaw huai mai. Ahma zana Rsa thil min hrilh kha ka hrechhuak ta zawk mai, Siami khan Rsa pawh kha a mumangah tho min duh thu a hrilh anih kha. Tuk thuan eikham veleh chuan Rsa te in lam pan chuan ka phei nghal a, Rsa pawh chuan min lo en hu mai.

Rsa bulah chuan ka mumang chu ka hrilh ta vek a, ani pawh a lo bu ngat ngat mai. "Engtin nge i mumangah chuan Siami chuan alo tih ve che a?" ka han ti thawl mai a. Rsa chuan, "Ka room tukverh atang hian a rawn vak lut a, ka hlau lutuk chu tlanchhuah ka tum a. Mahse ka room kawngkhar chu ka hawng thei miah lova, thawk leh khatah ka khawng nghal vek a. Tichuan ka lamah lo vak pheiin ka hma zawnah chuan a rawn ding a, tichuan min hrilh ta a ni." a ti a, a sawi pah pawh chuan a la hlau ve hle tih chu hai rual a nilo. Keilah chuan, "Engchu maw a sawi?" ka lo ti leh hlur mai a. Rsa chuan, "Sangtea hi ka duh a, hman atang khan ka hmangaih tawh a ni. Mahse a ni chuan thian ang bakin min kawm ngai silo a, kei ai chuan Melody a thlang zawk a ni. Chuvang chuan ka hmangaih em em leh ka thiannu an lengdun tur leh ka hmangaih ber ka chang velo kumkhua tur hi ka ngai ngam lo a, he khawvela dam ve reng hi ka peih tawh lo a ni. Rs, min ngaidam rawh, Sangtea ka theihnghilh theih nan chauh a chhang ta mai che ka ni....tiin min hrilh a." a ti a, ava mak ngai em.

Siami chuan minlo hmangaih reng amaw? Ka awih theilo. Ani kha chu ka thian a ni a, min lo duh ru reng chu amak ka ti takzet. Mahse chu chauh erawh ka la duhtawk lo, a inthah chhan dik tak hriat ka duh a ni. Chumi vang mai mai chuan a inthat hauh lovang, hmeichhe inring tawk tak leh mi huaisen tak kha  a ni a, kei min chanloh avang ngawtin a inthat hauh lovang. Rsa bulah chuan, "Nizanah i mumangah chuan i hmu leh em?" ka han ti leh hram a. Rsa chuan, "Aih hmu tawh lo, keimah in ka mu ngam tawh reng reng hleinem, ka nau bulah ka mu tawp alawm." a ti khur dar dar a. Reife kan titi hnu chuan keipawh ka haw veleh ta nghal a, ngaihtuahna ava buai tak em.

Zan a lo thleng leh ta a, dar 9 vel a rik chuan assignment ti turin sitting room lam ah ka laptop nen chuan ka inchawi phei a, ka chhungte erawh an mengrei ngailo tih takah an mu leh vek tawh. Chutia laptop ka khawih mual mual lai chuan ka chhak lawka wardrobe chu a rawn che luih a, a chunga tennis ball kan dah pawh chu a rawn tla a. Tennis ball chu a lir phei a, choka thim laiah chuan a lir bo daih mai a. Ka mumanga Siami ka hmuh tawh vang nge, ka hlau chhe leh nghal deuh der hian ka hria. Mahse chutia tlangval ve uai tawh, wardrobe lo che deuh hlek vang mai mai a lo hlauh chu ka tlawm la ve deuh a, ngaihtha zan lo mahse ka ngaih ka ti tha lui a. Tennis ball choka lama lir phei ta daih pawh kha va chhar pawh ka tum lemlo, ka assignment tih lai chu ka tih chhunzawm mial mial a.

Chutia ngaihtha taka ka laptop ka khawih malh malh lai chuan choka atang chuan kha tennis ball ngei mai kha miin an rawn vawm pawp ang mai hian a rawn thlawk vua mai a, ka dak awrh mai. Ka mitah tak ani lehnghal, ka mit dawm pah chuan ka tho nghal a. Ka va han phu chiang tehkher em, thinphu a rang duh ngei mai. Ka mit lah chu a na em em mai lehnghal a, choka lam chu ka phone light chuan ka va en a. Mahse ka awmna a hlat deuh vang nge ni, engmah ka va hmu chiang theilo. Hlau tak chung chuan muangchang hian ka va pan phei a, "Tunge..tunge min rawn vawm?" ka han ti vak ringawt a. A reh hian a reh tlawk tlawk mai a, choka chhung vel chu ka han enkual a, tumah an awm lo.

Choka light ka on chiah chu engemawni var vek, choka tukverh-a rawn zuang lut thut mai chu ka hmu a. Ka au chhuak hman teuh ngei mai, kan thenawmte zawhte var, kan ar lo la ziah tu lek alo la ni zui. Ka thaw huai mai a, mahse minla ti hlau tu leh ka ngaih la ti thalo em em tu chu nichina ka mita tennis ball-a min rawn vawm tu mawlh kha a ni. Choka light chu on chung chuan ka kalsan ta a, sitting room lam ka pan leh tur chiah chu kawngka a rawn in kik dawt dawt mai. Door bell kan nei ve reng a, chutia kawngka kher rawn kik ta chu tunge mawni dawn ni? Sana ka en a, dar 9:30 a ri tawh a, "Ala hma em bawk a nih hi.." tiin ka thiante an nih ringin kawngka lam chu ka va pan a. Mahse kawngka rawn kik tu chuan a rawn kik satliah tawh hauh lo, a chum hian a rawn chum bur bur a ni ber mai.

A hmaa ka thil tawn tawh te vang bawk chuan chutia kawngka rawn chum bur bur mai te pawh chuan min ti hlau leh zo ta vek mai a, ka thin a phu leh nghal dup dup mai. Ka pa va kaihthawh mai chu ka tum deuh uai hman a, mahse dawih min ti ang tih ka hlau si, chubakah tlangval ka ni ve a, ka hawn ngam lohna tur bik ka hrelo tiin ka va pan ta a. Kawngka chu ka hawn hawng chiah mai chu ka rinloh tak mai ka hmu tlat, ka bialnu Melody nu, Nu Madiki a lo ni reng mai. A thlan hluam a, a hlauhthawn hmel em em lehnghal. A thaw hlawp hlawp a, a hah ngang aniang, a tawng mai thei rih tlat lo.

"Nu Madik, enge ni ta?" tiin ka han zawt a. Nu Madiki chuan a awm chu dawmin, "Ih..Sangte..Melody..Melody." a ti hluam hluam ringawt a. Ngaihthalo tak chuan, Tunge..Melody chu engtin nge a awm a?" ka lo ti nghal vat a. Nu Madiki chuan, "Sangte, Melody sawn i hming alam alam a. A roomah lehkha a zir a, a rawn te chhuak vak a. Kan va luh chuan bang kilah a lo tawm a. A hlauh hmel lutuk a, thil awmzia kan zawh lahin a sawi duh bawk silo." a ti a. Nu Madiki chu a tawng ring bawk aniang, ka nu leh pate pawh chu an lo tho chhuak a. Ka pa chuan, "Engthil nge ni a?" a rawn ti a, Nu Madiki chuan, "Melody saw mawle, SANGTEA KA HMU DUH, SANGTEA BULAH MIN HRUAI RU tiin a rak chel chul mai a. A awmzia kan hre silo, ka rawn pan tawp mai che a ni." a ti a, a mangan hmel kher mai.

Ka pa nen chuan Melody te in lam chu kan va pan ta a, Melody chuan min hmu chiah chu a rawn tlan phei a, nghet tak hian minlo kuah nghal a. Ka bulah ka pa a awm a, a chhungte an awm thap bawk si nen, chutia Melody-i'n min han kuah tawp chu ka zak ru angreng hle mai. Melody chuan min en a, tap chung hian, "Sangte...Siami Siami ka hmu.." a ti ta mai a. Melody chhungte pawh chu an in en hrek hrek hlawm mai a, Nu Madiki chuan, "Bawihi, tu Siami maw?" a ti a. Melody chuan, "Nu ka hmu lawm...ka lekha ziah mawlh mawlh laiin ka hma zawn tukverh ah hian a rawn dak thut alawm." ala ti ta deuh deuh a. Kei kha chuan Siami kha ka mumang chauh ah khan ka hmu a, Rsa pawh khan a mumang ah chauh a hmu bawk. Mahse mak deuh mai chu mumang mah nise, a tak a ang em em a, a rimchhe tak pawh kha zing ka harh pawh khan ka hnar ah hian a la cham tlata hriatna ka nei hial a ni.Choka atanga Tennis ball a min rawn vawm tu kha tunge a nih ka hrelo a, Siami thlarau pawh chu lo nise tumah ka hmu velo.

Mahse Melody erawhin a hmuh thu a sawi tlat mai chu mak ka ti em em a, "I muhil anga, i mumangah i hmu anilo maw?" ka han ti ringawt a. Melody chuan, "Ka muhil lo hrim hrim, ka hmu alawm, dawt ka sawi lo." a ti ve tlat mai bawk si. Chutah Melody chuan min en a, min pawt tlat bawk a, "Sangte, a falin in be lawk ang." a han tih chuan Nu Madiki te hmai zah  ana duh khawp mai, ka pa pawh chu ka zah hle bawk. Mahse ka pa ber chuan, "Ni e, Melody duh ang chuan han inbe teh se." a ti a, min chhuahsan ta hlawm a.

An chhuah rual rual chuan Melody chuan min kuah leh a, a tap hawm hawm mai a. Ka theih ang tawk chuan ka lo hnem a, "Melody, enge awmzia, chiang deuhin min han hrilh teh." ka ti a. Melody chuan, "Sangte, Siami kha ka hmu chiang alawm. Dawhkanah sawn lehkha ka ziak mawlh mawlh a, tichuan ka hma zawn taka tukverh saw a rawn che dut dut a. Thli thaw mai mai a nih ka ring a, mahse vaw lehkhatah a rawn in hawng thut a. Siami chua  rawn dak alawm, ka hlau lutuk...a mit avar pup a, a sam a thur vek bawk a. Chiang tak hian min rawn melh a, SANGTEA HI KA TA A NI a ti vak a, ka hlau lutuk chu ka au chhuak ta vak a ni." a ti khur dar dar a.

Chutia min hrilh mawlh mawlh lai chuan light a rawn thim thut mai a, Melody chu a au tuar a. Tu emawni hian a rawn pawt tho lawp ang mai hian Melody chu a perh nawlh mai, chutah dim light chu a rawn eng hring ta vut mai. Dim light hnuai zawn chiah ah chuan Siami ngei mai chu a lo ding run mai a, ka va han hlau tehkher em. Chutah le...min rawn pan a, a su nghauh nghauh mai a. Ka zawn a rawn thleng a, "SANGTE, KA THIAN I NIH KHA...INKAWM ANG HMIANG." a rawn ti tial ruai mai.

(A TAWP TA)