NATHAN SEASON-3 (Episode-5)

NATHAN SEASON-3 (Episode-5)

SCYTHIAN KNIFE (Pt-5)

Written by : Aaron Malsawmdawngzuala

**********

"Engkim kha min hrilh ang thlapin ka ti vek alawm Sir, ka pack a, ka seal vek bawk. Chuan statement te pawh ka thil tel a, engki  kha ti tura min hrilh ang thlapin ka ti vek." tiin SI Ruata chu a insawifiah zung zung a. Henry-a chuan, "Anih leh i thawn hma khan tunge Station ah hian lo kal?" tiin a zawt a. Ruata chuan, "tumah an lo kal lo, ee...Pi Muani fanu Margareth-i alo kal a. Case file te kha a chhiar duh thu a sawi a, ka chhiar tir a. Chuan chemte a hmuh khan a lu a hai thut a, tui ka in tir a, chumi hnuah chuan a kal leh ta a nih kha." a ti a. Thinrim zet hian Henry-a chuan, "Vanlalruat, i mawl em ni a? Darkar chanve hnuah ka dawhkanah in inbiakna engkim ziaksa thlapin dah la, i hming sign bawk ang che." a ti vin khur khur a. SI Ruata chuan, "Yes Sir." a ti a, a kal ta a. Henry-a chuan Nathana chu  ahan en a, "Nangpawh hi ka khuah khirh ve law law dawn che amawni le.." a ti leh khur khur a. Nathana chuan rum zet hian alo melh a, "Enga? Engvangin maw?" a lo ti a. Henry-a chuan, "Evidence rukna ah i inhnamhnawih ve avangin...Mawitea address i hmuh thu i sawi a, mahse a dik chuang silo.Station atangin min chhuahpui a, chumi hlan chuan chemte chu ruk chhuah a lo ni a." a ti hrep a. Nathana chuan, "Ve mai mai che chua, chemte bo ringawt chhan hi chu nangma chhuichhuah tur zawk a ni. Address diklo te kha chu ka thiamlohna a awm lo, duhleh SArah-i pawh kan ko leh thei a, thil awmzia kan zawt leh thei mai a, mi han puh ve khanglang chule.." a ti ve ta ngat a, amah aia Junior zawkina, an Station anih avang maia chutia inla thunei taka a han tawngkhum vel chu  a dawhthei tawh biklo. Henry-a chuan, "Nangman i bia a nih kha, Mawitea zawng tura kan chhuah hma khan.." a lo ti leh hram a. Nathana chuan, "Ni e, ka duty a niacase chungchang kha ka hrilh angai miau alawm, ka client a nia." a ti a. Henry-a chuan, "A tha e, DCP Nathan Malsawmkim, tun atang chuan he case ah hian ka mamawh tawh lo che. Ka hmu leh che emaw, ilo kal leh anih chuan ka thuneihna leh ka thiltihtheihna hmang hian lock-up ah ka khung ang che." a ti a. Nathana chuan, "Henry, enteh...kan vai hian Margareth-i khan min bum a ni. Kan tanrual chuan chemte kha kan hmu let leh em em ang, kan tih hmasak ber tur chu Pi Muani te in dap chhuak vek a ni." a ti a. Henry-a chuan, "Enge kan va zawn ber anga? Chemte chu a dahlo tawp ang, a tlanbo daih tawh ang." a ti a. Nathana chuan, "Ka hria alawm, mahse clue eng emaw kan hmu maithei asin." a ti a, Henry-a chuan a phone a phawrh a, "Hello, Margareth Lalchhanhimi kha WANTED angin thu chhuah rawh u, misual zawn mek a ni tiin thu chhuah ang che u."  ati a, Nathana pawh chu a haw ve ta a.

Zan dar 11 velah chuan in chu a thleng a, Nathana chuan Rinawma hnenah chuan thil engkim mai chu a hrilh ta vek a, Rinawma pawh a thinrim kher mai. Tluangtei a lo lut a, Margareth-i'n present bawm Nathana tana a siam chu  arawn chawi lut a. Tluangtei chuan, "U Nathan, hei Margareth-i'n present  a rawn pe che a, ngaihdam dilnan che a rawn pe che a nih hi." tih pah chuan Nathana hma a dawhkanah chuan ava dah a. Nathana chu thinrim tak hian a tho thut a, pawna chhuah pah chuan na em em hian kawngka a khar thuai mai. Tluangtei chuan mak a ti kher mai, "U Rin, tinge a, ava thinrim hmel ve..in inhau ami?" a ti a. Rinawma chuan, "Margareth-i a tlanbo, Scythian chemte kha a ru a, a tlanbo a ni." a ti a. Tluangtei chuan, "A awihawmloh...a theihloh." a lo ti tlat a. Rinawma chuan, "Ni e, thil awihawmloh tak leh thil theihloh nise chu ka ti, mahse a ni tlat si a ni." a ti a. Tluangtei chuan, "I hresual a ni ang, chutiang mi a nilo hrim hrim."  ala ti talh mai si. Rinawma chuan, "Nathana pawhin a sawi a, Police te pawhin an sawi. Police Station ah kalin chemte chu ava ru chhuak a ni, dawt nise ka ti khawp mai, mahse a ti miau si a ni." vin lek lek hian a ti a. Tluangtei chuan, "A ru lai an hmu kher em ni? Thil hriatsual palh vang mai mai aniang." a la ti hram a. Rinawma chuan vin zet hian, "Anilo, i thiannu mi fel tak anga i sawi MArgareth-i sawn anu an thahna hmanrua chemte ngei mai kha a ru chhuak a, a tlanbo a ni. Mi zawng zawng a bum vek, nang leh kei pawh min bum a, Police te a bum a, tichuan Nathana ngei pawh a bum ta a nih hi. Ka hlauh ang ngei ngeiin thil a thleng ta a nih hi...saw MArgareth-i mi tenawm tak sawn Nathana hi a thlem kual a, chemte a neih theih nan tiin a tlawn char char a ni." a ti ta vak vak mai a. Tluangtei chu a tap tep mai a, "Enge khatia min vin vak kher a?" tih pah chuan pawnah a chhuak a, kawngka chu a khar ri ve ta bur mai. Rinawma pawh a rilru a hah ngei mai, "Ni e..ni e...a hman hman khan kawngka te kha khar ri bur bur rawh u...hrep tak hian.." tih pah chuan dawhkan a chum bur mai.

************

Atuk zing chaw eikham velah chuan Nathana chu amah chauh chuan a thu a, thingpui a in a. Margareth-i'n a pek Present bawm chu hawn ve reng reng tha in a hria a, a hawng ta a. Pangpar hi alo ni a, abulah chuan lehkha them hi a lo awm a. Lehkha chu a chhiar a, "Nathan, min hua  ani tiraw? Ka hria alawm, min hua pawh ni la ka phu takzet. Dawt ka hrilh che a, min ngaidam dawnnia. Mahse ka thil tih hian chhan a nei a, nakinah chuan ila hrethiam ve mahna. Chuan maw, ka duh che, ka hmangaih che ka tih kha dawt a ni velo, information kimchang tak ka hriat nan ka hnaih lui zel che a, mahse i bula awm kha nuam ka ti takzet. Min rawn zawng suh aw..i nupui leh fanau te nen hlim taka awm zel turin duhsakna ka hlan ache." tih hi alo inziak a. Rinawma alo lut a, paper chu a ak tha nghal vat a. Rinawma chuan, "Le..kan kal thei e. Mawitea chu iva hmu ang hmiang, kan mizawn mek chu." a ti a. Nathana chuan, "A address i hre tawh em ni?" a ti a. Rinawma chuan, "Dak-pu (postman) pakhatin min min hrilh a, a post chu nursing home lam a lo ni awm e. Patient emaw doctor emaw pawh nise, an mail chu ward atangin kan zawng hmu thei ang." a ti a. Nathana chuan, "Mahse Mawitea te chu Doctor a ni si lova, eng hna mah a thawk silo a." a lo ti a. Rinawma chuan, "Lo nilo pawh nise, hmanah chuan male-nurse a ni thin e an tia lawm." a ti a. Nathana chuan, "Anih chuan a mail te chu chumi home atang tho chuan ala dawng thin a animaw?" a lo ti a. Rinawma chuan, "Nia, kal vat ila, kan hmu em em ang." a ti a. An kal tur chiah chu Rinawma chuan Margareth-i pangpar chu a en a, "He thil hi i paih bo dawnlo em ni?" a han ti a. Nathana chuan a han en vang vang a, "Umm...ti hian lo nung ve mai mai teh se." a ti a, an kal ta a.

Nursing home kawtah chuan motor chhungah chuangin darkar thum zet chu an nghak ta a, mahse Mawitea hmel reng reng anla hmu lo. Rinawma chuan, "Tluangtei sand-wich siam chu a tui hle mai, alo siam hlauh chu a tihzia e. Nilo se chu kan ril atam tawh awm si a, chhuah lah chu a chiloh bawk si a." tih pah chuan sandwich chu a ei tuam tuam a. Nathana chuan, "Kha sandwich ai kha chuan kan case chhui mek hi ngaihtuah zawk la ka va ti em." a han ti deuh kher a. Chutih lai chuan nursoing home lam pana Mawitea lo kal phei chu an hmu ta a, Nathana chuan, "Saw le...MAwitea chu alo kal e." a ti a. Nursing home chhungah chuan a lut a, Rinawma chuan, "Umm..kan sava veh lai mek chu a bawm chhungah a lut ta." a ti a, motor atang chuan an chhuak a. Kawngka bulah chuan an lo chang ta ran mai a, minute 2 hnu velah chuan MAwitea chu a rawn chhuak ta. Nathana chu a hma zawn takah chuan a lo ding a, "Mawite, inbe lawk ang hmiang." a ti a. Tlanchhiat a tum a, Rinawma chuan hnunglam atang chuan alo manbet a, "Hahdam rawh Mawite....kal ang le." a ti a. Mawitea chuan, "Tumah ka that lo." a han ti nghal ringawt a. Nathana chuan, "I that kan tilo, nat i duh loh chuan thuawih tak khan minlo zui mai rawh." a ti a, an hruai ta a. Mawitea chu kawngsira waiting-shed ah chuan an thut tit a, hand-cuff an bun tir bawk a. Nathana chuan, "Pi Muani kha i thah a nih siloh chuan engtin nge an chanchin kha i hriat chian em em theih?" a ti a. Mawitea chuan, "Writer ka nih hi, ka ngaihtuahna te hi a hausa a, midang ang ka nilo." a han ti vel a. Rinawma chuan, "I ngaihtuahna mai mai ni tur atan chuan thil thleng in ang a tam mah mah a ni. Anih leh i thawnthu ziah lai a achangtunu leh in thenawm ami Margareth-i te mizia leh pianzia te kha ava in ang si ve, i phuahchawp a ni tak meuh maw?" a han ti a. Mawitea chuan, "Zan rei tak thlengin hna ka thawk thin a, ka mu mang ngailo. Pi Muani te hi an mut dawn hian light an off thim vek zel a, mahse Margareth-i room erawh a eng bik thin. A chhungte lakah hian zep a nei a nih ka ring a, chu chuan idea thar min pe ta  a ni. Tichuan Margareth-i chu ka thawnthu ziah laiah hian misual anga lantir ka tum a, an mizia in ang chiahin ka ziak ta mai ani." a lo ti leh a. Nathana chuan, "Anih leh kha Scythian chemte kha?" tiin a han zawt a. Thinrim tak hian Mawitea chuan, "Ka sawi tawh kha, ka zirchiang a, research ka bei mek alawm." a han ti khur khur a. Rianwma chuan Mawitea darah chuan a han beng thak thak a, "Hey..hahdam teh hahdam teh." a lo ti mawlh mawlh bawk a.

Mawitea chuan sawi zawm zelin, "Margareth-i hi changtunu ber angin ka ziak ta a, nitin mai chuan ka binocular hmangin ka enthla ta thin a ni. Achang chuan min man teuh thei hle a, tichuan zan khan chu an inkawta paper tam deuh a lo hal lai hi ka va hmu a. A kalsawn hnu chuan ka va phei a, paper kang zinga mi pakhat chu ka la a, ala kang chhe ve vak hmanlo. Chuan chu paper ah chuan hmanlai a chemte pakhat, nalh tak mai lemziak hi alo awm a, tichuan idea thar ka nei leh ta a ni. Kha chemte lem kha tualthahna hmanrua ah a hmang angin thawnthu ah chuan ka ziak leh ta a, mahse kha chemte chungchang kha ka zirchian phawt angai a, chuvang chuan lehkhabu te ka la khawm a, ka ziirchiang ta a ni." a ti a. Nathana chuan, "Anih chuan Mawite, Pi Muani te in i enthlak ruk chuan enge i hmuh thin?" tiin a zawt leh a. Mawitea chuan, "Ka enthla ru pawh anilo, ka zirchiang zawk alawm." a lo ti vin hlur a. Rinawma chuan, "Khai, hahdam rawh ka tih kha.." tiin a darah a lo beng leh thak thak a. Nathana chuan, "Anih chuan Pi Muani thih ni khan, a thihhma hret khan, Ropuia luh hma khan midang lut an awm em?" a ti a. Mawitea chuan, "Aw awm e, hmeichhia  ania. Mahse a hnunglam atanga ka en avangin a hmel ka hmu theilo a, mahse shawl a bat a. Chu  a shawl bah chu Margareth-i shawl bah thin ang chiah kha a ni, chumi hnu hretah chuan Ropuia chu a lo lut veleh a ni.  Chuan chumi hnuah i lo kal veleh a, abak chu ka hre tawhlo." a ti a. Rinawma chuan, "Sir, hawh teh...titi lawk teh ang."  ati a, an kalhrang ta a. Rinawma chuan, "Sir, engkim hi  a inmil thlap vek a ni. Margareth-i khan Ropuia hi anu thattu a nihloh thu a sawi a, achhan chu Margareth-i khan a nu kha amah ngeiin a thah vang a ni." a ti a. Nathana chuan, "Nilove Rinawm, shawl kha a in ang chiah chiah pahnih a awm a ni. Margareth-i'n min hrilh a, pakhat chu a ta a ni a, pakhat erawh Pi Muani'n mi a pe a ni. Police ten chemte an hmuh hma khan chemte chu puan dangin a infun a, Robert-a ta kha." a ti a. Rinawma chuan, "Anih chuan shawl dang zawk chu tuin nge kawl tih kan zawn chhuah angai a nih chu." a ti a. Nathana chuan, "Chu chu thudang nita se, MAwitea hi engtin nge kan tih ang?" a ti a. Rinawma chuan, "Henry-a bulah hruai ila, evidence te pe ve se." a lo ti a. Nathana chuan, "Awle, Henry-a bulah lo va hruai la, kei chuan shawl pakhat zawk neitu chu ka lo zanwg ve thung ange." a ti a, Nathana chu a kal ta a. 

*************

Pi Hriati chuan inchhung a lo ti fai mawlh mawlh a, chutih lai chuan Nathana a lo lut thut mai. Pi Hriati chuan, "Ehe Officer, enge ilo tih dawn? Sangtei i hmu duh em ni?" a lo ti vat a. Nathana chuan, "Nangmah hmuh tum che a lo kal zawk ka nia." a ti a. Pi Hriati chuan, "Engthil nge ni a?" a lo ti leh a. Nathana chuan, "Pi Muani nen khan thiantha tak in ni tiraw?"  ahan ti a. Pi Hriati chuan, "Aw ni e...enge ni ta?" a lo ti leh a. Nathana chuan, "Khawnge a shawl pek che kha a awm?" a ti ta mai a. Pi Hriati chuan, "Eng shawl maw?" tiin a han zawt a. Nathana chuan, "Chinese-shawl kha...Margareth-i'n China atanga a rawn hawn kha, pahnih a rawn hawn a, pakhat zawk kha khawnge?" tiin a zawt leh a. Pi Hriati chu a thaw hak a, "Tinge i din reng a, lo thu phawt teh." ati a, Nathana pawh chu a thu ve ta a. Pi Hriati chuan, "Eng shawl chungchang nge i sawi a? Min han hrilh chiang deuh teh.." a ti a. Nathana chuan, "Margareth-i khan shawl chu pahnih a rawn hawn a, pakhat chu aman a nei a. Pakhat leh chu  anu a pe a, mahse Pi Muani chuan  a duhlo a, midang a pe tiin min hrilh a ni." a ti a. Pi Hriati chuan, "Ni e, kha shawl kha chu a duhlo a, thing a ti tlat pek a. A ngainat zawng a nilo aniang, mahse tinge min zawh a?" a ti a. Nathana chuan, "Witness pakhatin min hrilh a, kha shawl kha tualthattu khan a bat a, tichuan Pi Muani te inlam panin a kal a ni a ti a. Tichuan Pi Muani thisen pawh chu shawl ah chuan a tatfai a, finfiahna pawh a awm vek a ti a ni." a ti a. Pi Hriati chuan, "Margareth-i shawl aniang chu.." a lo ti a. Nathana chuan, "Margareth-i chuan shawl chu ala kawl mek a, ka hmu bawk a ni. Pi Muani'n chu shawl a pek chu nangmah hi i ni ngei ang, midang a pe hauh lovang. Tualthattu ni a kan rinhlelh te hi tunah chuan an tlem tulh tulh a, mi pahnih chiah an ni tawh. Zawhna pakhat chiah ka zawt ang che, tu zawkin nge shawl kha khami ni khan kengchhuak che u? Nang nge i fanu Sangtei?" tiin a zawt leh a. Pi Hriati chu a han thaw leh hak a, muangchang hian, "Enteh Officer, khawngaihin Station lamah min hruai thei angem?" a ti a. NAthana chuan, "Ka zawhna che chu min chhang phawt rawh." a ti a. Pi Hriati chuan, "Ka hmanhmawh, kal vat zawk ang. Officer, ka inpuang duh ani." a ti ta mai a.

Chutih lai chuan park-ah chuan Sangtei leh Erica te chu an lo lengdun a, Erica chuan, "Amak ka ti, kum 10 lai mai chu kan inhmulo a, tihian kan lengdun leh thei ta chu ania. Sangtei chuan, "Ni e tiraw, ka nu thusawi te kha ka lo awih a, ka lo hnawl vel che a. Ka nu kha chu Pi Muani thu thu khan a awm thin a, Pi Muani khan a fuihpawrh char char zel kha ania." a ti a. Erica chuan, "Sangte, midang min neihsan daih tawh ani tiraw, Sammy-a pa a ni em?" a ti a. Sangtei chuan, "Sammy-a pa te kha chu mi tenawm tak a ni..Sammy-a  alo pian veleh min tlanbo san nghal daih alawm." a ti a. Erica chuan, "Anih leh a tlanbo san nachhan che chu Sammy-a hi rualbanlo a nih vang em ni?" tiin a han zawt leh a. Sangtei chuan, "Aw ni e, chuan nupui dang a  nei bawk a. Ka theihnghilh phah theih che ka ring a, mahse.." a tih lai chuan Erica phone chu a rawn ri a. Second 10 vel a biak hnu chuan a dah a. Sangtei chu a en a, "Sammy-a chu kan hruai haw thei dawn e." a ti a. Sangtei chu a lawm rual rualin a zam hle mai, "Mahse Eric, min lo duhlo ta se. Ahma pawh khan tunge ka nih pawh a hrelo a, tawng nachang pawh a hre lo. Min chhang duhlo a, kut te min thlak a. A au vak vak a, ka rilru na lutuk inthah ka tum hial kha  ani a. Nilo Eric, engtin nge kan tih ang?" a ti nghal chel chul mai a. Erica chuan Sangtei kut chu a vuan a, "Hahdam teh Sangte, kan enkawl dawn alawm. PAwisa chu lungngai suh, ka tum vek ang. Engkim atha leh vek mai ang, min ring rawh." a ti a.

********

"U Muani khan Sammy-a kha enkawl turin Children's Home ah khan dah turin min hrilh a, pawisa tam tak pawh kan seng nghe nghe a. Pawisa kan pelo anih chuan kum khat hnuah kan hun alo thlen ve hun tur chu kan nghah leh angai dawn si a, U Muani khan Childrens Home Director nen an in remsiam thu pawh a sawi a ni." tiin Pi Hriati chuan Henry-a chu a hrilh a. Henry-a chuan, "Children's Home Director kha thamna i pe zawk a nilo maw? Engzat nge i pek?" a ti a. Pi Hriati chuan, "Pawisa tam tak a ni, nuai 3 lai ani. Ka lo rindan chuan Sammy-a chu a ziaawm phah anga, Sangtei pawhin hahchawlhna hun a nei ang tiin ka lo ngaihtuah a. Pawisa ka nei mai bik silo a, mi pawisa te ka puk kual a. Ka pawisa khawnkhawm te chu U Muani ka pe a, tichuan U Muani chuan Director chu a pe ta a. Mahse ahnuah minlo bum reng tih ka hre ta a, tichuan Sammy-a pawh kan chan dawn ta a ni tih ka hrethiam ta vek a ni." a ti a. Henry-a chuan, "Anih leh Sangtei'n a maternal rights hmanga a fapa a hlanchhawnna a sign kha a lem a ni tih i hriat?" tiin a zawt leh a. Pi Hriati chuan, "U Muani thusawi apiang kha  ka ring mai thin a, tichuan ka va pan leh a, a puihna ka va dil a. MAhse engmah tih theih a neih bikloh thu minlo hrilh a, chumai nilovin Sammy-a khatia Home-a kan dah kha lawmthu kan hrilh lala phut zawk zui a ni. Ka sawi tum ber zawk chu maw..ka va pan a, a tanpuina ka va dil a. Tichuan envelope hi ka hmu a, ahmaa pawisa ka pekna envelope ngei kha. Tichuan engkim ka hre ta vek a ni.." a ti a. Henry-a chuan, "Tinge Police i koh loh? Tinge Statement i file mai loh a? FIR thehlut la, Pi Muani chu kan man mai dawn lawm." a ti a. Pi Hriati chuan, "Engtin nge ka sawi chuan anga? Home-a ka va kal lahin engkim kha dan hmanga ti kan nih thu leh ka pawm thlap a, kan sign thlap angin an lo sawi zel bawk si a. Tichuan Sangtei chu a rilru a hah em em a, inthah hial te a tum ta a. Director lah chuan min vau reng bawk a, Sangtei chu Mental Hospital-a dah ah min vau reng bawk si a ni." a ti a, a thaw ta vak vak mai. A awm a dawm vawng vawng a, na a tih hmel kher mai. Henry-a leh Nathana chuan an en reng a, Henry-a chuan, "I tha maw?" a ti a. Pi Hriati chuan, "Tui...tui minlo pe." a ti a. Nathana chuan tui chu a in tir a. Tichuan a sawi zawm leh a, "Tichuan...tanpuina dilin ka va kal leh a, mahse min lo chhang tha duhlo a. Dawhkanah chuan chemte ka hmu a, tichuan ka la a...ka la a...ka vit...ka vit ta a ni." a ti tawk tawk a, a thaw vak vak a, nikhawhrelovin a awm ta der mai. Nathana chuan, "Henry, lo buaipui la, Ambulance ka'n ko vat ange." a ti a.

Sangtei chu a hlim hle mai, Erica chu a kuah ngawih ngawih mai a. Erica chuan, "A vawt i ti em?" a han ti a. Sangtei chuan, "Aih, vawt lo." tih pah chuan a nui sen sen a. Erica chuan, "Vawt i tih pawh ka ringlo, i hlim emai." a ti a. Sangtei chuan, "Hun rei tak chhung ka hlim lo tawh a, mahse tunah chuan ka nui leh thei ta. Nangmah vang ani, ka lawm e aw, Eric?" a ti a. Erica chuan, "Enteh, i bazar teh ang...Sammy-a kawr tur te, a toys tur te kan lei anga." a ti a. Chutih lai chuan Sangtei phone a rawn ri a, phone chu pick up nghalin, "Hello, aw..keimah Zosangzeli...ENGMAW? Awle ka lo kal ang." tiin a phone a dah a. Erica bulah chuan hlauhthawn hmel tak hian, "Eric, ka nu Police Station ah a awm a, Heart-Attack a nei thut an tia." a ti a. Erica chuan, "Kal ang...kal vat ang." a lo ti ve bawk a. Police Station kawtah chuan Pi Hriati chu an lo zawn mek a, Ambulance lam an panpui mek a. Sangtei chu va tlan vatin a nu kutah chuan ava vuan a, "Nu, enge awmzia? Min hre thei em?" a ti a. Pi Hriati chu a rawn meng tawk tawk a, "Bawihte..ka hre thei che...engkim a fel vek tawh ang." a ti zawi sap a. Sangtei chuan, "Heart-attack i nei an ti a, tinge min hrilh veloh a?" a ti a. Pi Hriati chu a mittui a luang zawih zawih mai a, "Bawihi..Sangte, ka fanu, min ngaidam rawh aw. I nun zawng zawng ka tichhe vek a, i chungah ka sual em em a. Ka va han inchhir tak em..min ngaidam rawh aw." a ti lawm lawm a. Sangtei chuan, "Nu, chutiang sawi suh...engkim a tha vek tawh e. Ka bulah Erica a awm a, naktuk ah Sammy-a pawh kan hruai haw tawh dawn e. Nu, i dam anga, i tupa chu i hmu let thei tawh dawn asin." a ti a. Pi Hriati chuan, "Ka va han lawm tak em, bawihi..Erica kha nei ang che, fa nei bawk ula, tichuan Sammy-a pawh tha takin enkawl ang che u. I hriatchhuah hunah chuan engkim i man thiam vek mai ang." a ti a. Sangtei chuan, "Nu, engmaw ka hriatchhuah dawn?" tiin a zawt a. Pi Hriati chuan, "I hre mai ang, Sangte, ka fanu ka hmangaih che." a ti a, Sangtei chuan, "Nu keipawn ka hmangaih che alawm..enge i sawi awmzia kha?" a ti leh a. Mahse Pi Hriati chu a meng tawh lo, Sangtei chu a mangang hle mai. Anu chu a sawi vak vak a, "Nu..nu..min chhang rawh." a ti lawm lawm a, mahse a chhang tawh lo, Ambulance ah chuan an zawn lut ta a.

********

Ropuia chu Lock-up atang chuan an hruai chhuak a, Henry-a Office ah chuan an luh tir a. Ropuia chuan tum hmuk hian, "Khawnge min dah leh dawn? Central Jail lamah em ni?" a han ti hmuk a. Henry-a chuan paper pek pah chuan, "Tah hian..Protocol ah hian sign la, i haw thei ang." a ti ta mai a. Ropuia chuan phawk hru hian, "Enga? Tuathattu chu inman tawh em ni?" a ti a. Henry-a chuan, "I nu thattu chu Pi Hriati a ni, in inbul lawk ami kha." a ti a. Ropuia chuan, "A theihloh, Pi Hriati te chu ka nu thiantha ber ania, athat lo tawp ang." a lo ti a. Henry-a chuan, "A inpuang alawm." a ti a. Ropuia chuan, "Ka awih chuanglo, ka be duh ani." a ti a. Henry-a chuan, "A theihloh ang...darkar 3 kalta khan Pi Hriati chu a thi tawh a ni. Damdawiin panpui mek laiin a thi a, heart-attack vang a ni. Protocol hi sign la, haw vat mai teh." a ti a. Ropuia pawh chuan a sign a, a haw ve ta a.

Zan alo ni a, Nathana pawh a rilru a hah kher mai. Tichuan pawnah chuan a tei chhuak a, Margareth-i te inchhung lo eng va va mai chu a hmu ta. Ava lut ta tawp a, Ropuia alo awm a. Nathana chuan, "Ehe Ropui, ilo chhuak ta maw?" a ti a. Ropuia chu a lo nui sang a, "Aw...hei, ka han tifai vel a nih hi inchhung hi...naktuk hian ka nupui leh ka fapa an lo haw dawn a. Lo thu rawh, thingpui i in duh em?" a han ti a. Nathana chuan, "Aaa..a ngailove. Khawnge i u hi a awm a? Inla inhmu lo em ni?" a ti a. Ropuia chuan, "La inhmulo, ka phone ka on chiah khan minlo call nghal a. A zin thu a sawi a, a damthat thu min hrilh bawk a. Nichin deuh khan phone leh ka tum a, mahse switch off a inti a, tinge min zawh a?" a ti a. Nathana chuan, "Englo ania, Scythian Knife chungchang ah information thenkhat te min hrilh tur thu a sawi a. Alo zin daih si chuan a theihnghilh a ni ngei ang, apawimawh si a, a room ah ka va zawng lawk thei angem?" a ti a. Ropuia chuan, "Tehreng mai, va zawng rawh. Khawi khawi amaw khan a dah ang, thingpui ka lo siam ange." a ti a. Nathana chu Margareth-i roomah chuan a lut a, a hai ta chiam mai a. Minute 5 vel a hai hnuah chuan paper tam tak pakhat hi a hmu a, a chhunga thil lo inziak chuan a mit  ala ta tlat mai. Paper te chu a ak tha a, a haw nghal a. Inchhung aluh rual rual chuan, "Rinawm, hei ka thil hmuh hi han en ve teh. Kar hmasa lawk khan Margareth-i chuan Bank Account a hawng anih hi..." tih pah chuan paper chu ava pe a. Rinawma chuan alo en a, "Chuan...engtin nge hei hian min puih ang?" a lo ti a. Nathana chuan, "Khai a, min pui thei tehreng mai. He account hi kha Scythian chemte a harlhna pawisa a dawn theih nana a hawn anih hi." a ti a. Rinawma chuan, "Pawisa chu he account ah hian a lut dawn tihna em ni?" a ti a. Nathana chuan, "Ni chiah e." a lo ti a. Rinawma chuan, "Henry-a khan WANTED angin thu a chhuah tawh si a, a awmzia chu  document te pawh a thar a lei vek angai dawn tihna animaw?" a ti a. Tluangtei lah chuan, "Enge in sawi awmzia chu...ka hre ve thiamlo reng reng. Puih theihna che u ka nei ve em?" a lo ti hu mai a. Nathana chuan, "Bank ah hian khawi branch berah nge pawisa hi a dahluh dawn tih kan hre thei anih chuan kan man thei dawn ani." a ti a. Rinawma chuan Aizawl lama an department ami, Cyber crime expert te leh hacker te chu a phone ta nghal vat a.

************

 Bank bulah chuan a tuk zingah chuan Nathana leh Rinawma te pawh chu an awm ta ran mai a, motor chhung atang chuan Margareth-i lo kal hun chu an chang mek a ni. Rinawma chuan, "Sir, Henry-a hrilh ve a tha in ka hria." a ti a. Nathana chuan, "Nilove, hacker kan ruai tih a hria anga, a inla police officer ropui si, min man ve palh ang." a ti a. Rinawma chuan, "Min man awmlo emai, bank attack tur pawh kan nilo a, infiltration mai chauh a nih hi." a ti a. Nathana chuan, "Saw le...alo kal e." a ti a. Margareth-i chu lo kalin bank chhungah chuan a lut ta a, Rinawma chuan, "Henry-a ka han call dawn em ni?" a han ti leh a. Nathana chuan, "Henry-a ti reng suh, keimahni hian kan buaipui thei. Pawisa chu la fel phawt rawh se, Police ve tho alawm kan nih. Kan man anga, tichuan zawhna te kan zawt anga, chumi hnuah Henry-a bulah kan hruai chauh dawn ania." a ti a. Darkar 2 hnu velah pawh chuan alo la lang mai silo a, Rinawma chuan, "Pawisa engzat chiah nge maw a  lakchhuah dawn le awww...darkar 2 kan nghak tawh ania." a ti nuah nuah a. Nathana chuan, "A tlanchhuak ru leh daih anilo maw?" a ti a. Rinawma chuan, "Ka va en dawn em ni?" a ti a. Nathana chuan, "Nia, va en mai teh." a ti a. Rinawma chu ava kal a, reilote hnuah bag pakhat khaiin a rawn let leh a. Car chhungah chuan rawn luhpuiin, "Sir, han en ve teh." a rawn ti a. Nathana chuan bag chu a hawng a, a chhungah chuan Margareth-i incheina, a kawrlum te, a lukhum te alo awm a. Rinawma chuan, "Staff te sawi dan chuan pawisa chu a la a, toilet ah a kal a, alo la chhuaklo an ti a. Ka va lut ve a, khami bag chiah kha a lo awm tawh a ni." a ti a. Nathana chuan, "Anih chuan kan hmu thei dawn talo a va ang ta ve.." a ti a. Rinawma chuan, "Nilove Sir, kan hmu em em ang." a ti a, inlam pan chuan an haw leh ta a.

Sarah-i chuan an inchhung chu a lo tifai mawlh mawlh a, lehkhabu te chu a rem tha a. Chuveleh kawngka a rawn inhawng thut a, "SARAH..SaRAH.." tiin Mawitea chu a rawn tlan lut hlawk hlawk mai a. Sarah-i pawh chu a phu chiang kher mai, MAwitea lam chu a va hawi vat a. SArah-i chu a thaw huai mai a, "Awii..Mawite, min ti phu nasa lutuk. Robert-a amaw ka ti che alawm, ka hlau lutuk." a ti a. Mawitea chuan, "Sarah, Robert-a chu i la hlau em ni a?" a ti a. Sarah-i chuan, "Ka kalsan a, jail atanga a tlanchhuak anih caih chuan min chhuah hauh lovang." a ti a. Mawitea chuan, "Sarah, ka tiam ache, ka venghim em em ang che. Ani lak atang chauh nilovin, tuman an tibuai leh tawh lo ang che. Min ring rawh...Sarah." tih pah chuan a kuah vawng vawng mai a. Sarah-i pawh chuan a lo kuah let a, a fawp vawng vawng a. Sarah-i chuan, "Mawite, helai hmunah hian ka awm thei tawh lo. Min hruai bo rawh, tlanbo daih ang." a ti a. Mawitea pawh chuan, "Ni e, kan tlanbo daih dawnnia." a lo ti ve bawk a. Sarah-i chuan, "I lehkhabu te pawh kha kalo dah tha hlawm a, avaiin.." a tih lai chuan Mawitea chuan, "Engatan mah ngai suh, khang ho kha ka mamawh tawh lo." a ti a. Sarah-i chuan mak ti tak hian, "Mahse, i thawnthu ziah lai pawh ila zo si lo a, i zo law law dawn lo em ni?" a ti a. MAwitea chuan, "Ka zo tawh, ka zo vek tawh. Publishing House ah ka thawn vek tawh alawm, naktuk hian Chief- Editor nen meeting ka nei dawn." a ti a. Sarah-i pawh a hlim ngei mai, an pahnih chuan lungchim tak hian an infawp ngawih ngawih mai a.

*********

Inah chuan Rinawma leh Nathana chuan bank kawta CCTV camera footage record an lak khawm te chu computer ah chuan an han en chiang leh a, Nathana chuan a han en vang vang a, "Dar engzatah khan nge bank kha a thlen khah?" a han ti a. Rinawma chuan, "Dar 11:45 ah." tih pah chuan note ah chuan a ziak thla nghal zel a. An han forward leh deuh a, Rinawma chuan, "Lawk Sir...lawk lawk lawk...pause teh.." a ti a. Nathana chuan video chu a han pause a, "Umm..amah ngei a ni." a ti a. Rinawma chuan, "A hmel pawh a lan loh hi, a pian atangin i hre thei ami?" a lo ti hu a. Nathana chuan, "Nilove Rinawm, a inchei dan hi, hetiang hian tumah bank kal tur ringawtin an inchei lovang." a ti a. Margareth-i taxi a a lut lai chu an hmu leh a, Nathana chuan, "Awle, taxi number hi han zoom teh ang." a ti a, tichuan a number chu an en a, paper ah chuan an ziaklut ta a. Tichuan chu taxi number chu an chhui leh ta a, a tawpah chuan driver chu an hmu ta hlauh mai. Nathana chuan, "Ka pu, thu tlem zawh lawk che kan duh a, kei hi DCP Nathan Malsawmkima ka ni a, ka bul ami hi ASP Lalrinawma a ni." a ti a. Driver chuan, "Min han zawt ta che u." a ti a. Nathana chuan, "VAwiin zing khan hmeichhe pakhat passenger i nei a, bank bulah khan. Hmelchhe lemlo tak a ni a, sang pangngai ve tak. Coat dum a ha a, a sam a dum a, a kir deuh bawk." a ti a. Driver chuan, "Passenger te chutin ka chhinchhiah thlap thlap ngai lo, meizial zu lo tur leh pawisa min pe kim hram thin turin ka hrilh thin a, chuzawng chu animai." a lo ti a. Rinawma chuan Margareth-i thlalak hmuh pah chuan, "Henu hi ania.." a ti a. Driver chuan, "An hmel pawh ka chhinchhiah ngailo, passenger tamtak nitin ka phur thin a, hriathran an har lutuk."  alo ti leh a. Nathana chuan, "Navigating System i hmangin ka hria." a ti a. Drver chuan, "Hmang e, aman a to asin." a lo ti vel a. Nathana chuan, "Ka lo check lawk ang chu." a ti a, Driver pawh chuan a remti ta a. Nathana chuan a han check a, "Rinawm, engtik khan nge bank kha  achhuahsan khah?" a han ti a. Rinawma chuan, "Dar 12:05 ah." a lo ti a. NAthana chuan a han check zel a, "DAr 12:05 ah chuan PI Siami Road (Phuahchawp) ah tiin a inziak a.." a tih lai chuan driver chuan, "E ka hre leh si e..khalai kawngah khan kan kual tluan lo. Hmun dangah zawk a kal daih alawm, khami kalkawng ah khan quarter 4 lai a awm alawm." a ti a. Nathana chuan a han en a, "LOWER STREET...kal nghal ang." a ti a, driver chu lawmthu sawi nan Nathana chuan cheng 100 a pe a, an kal ta a.

LOWER STREET chu anva thleng ta a, apartment hrang hrang a lo awm a. Motor atang chuan an chhuk a, Rinawma chuan, "Khawiah ber hian nge kan zawn tak ang? Apartment te hi kan check vek mai dawn em ni?" a han ti a. Nathana chuan, "KA hre biklo." a lo ti a. Rinawma chuan, A phakar reuh sia, heta tang hian motor dang pawh a phar leh daih ve thei tho a. Hemi Veng tawp achiah hi khawdang kal kawng ania, chutah pawh chuan akal daih ve thei tho asin." a ti nuah nuah a. Nathana erawh chuan a phone a khawih mual mual a, Rinawma chuan, "LOWER STREET tih hi ka hriat tawh hnu avan ang...E ka hre leh si, database ka check lai khan ka hmu tawh ani. A nu pasal zinga vai awmchhun, Mohan-a kha...khami unaunu pitar kum 80 kha..hetah hian apartment a nei ve tak e." tih pah chuan car chhunga lehkhabu chua  la chhuak a, a keu a, "Aw...heta hi..House Number 15, Apartment 350." a ti a. Nathana chuan, "Atha e, Rinawm tah hian lo awm rawh, keimah in ka han kal ang." a ti a. Rinawma chuan, "Sir, keini chu kal love. Henry-a call ila, aman buaipui zawk rawh se." a ti a. Nathana chuan, "Rinawm, ka han kal ang, ka tiam ache...Henry-a bulah ka rawn hruai ngei ngei ang." a ti a, a kal lui ta a. Inchhung a luh dawn tep ah chuan a phone a rawn ri a, "Hello, tunge aw?" a han tih chuan Margareth-i aw ngei mai chuan, "Floor 12-na, room no.7 ah ka awm."  alo ti a, phone chu a dah leh nghal a. Nathana chu a lut ta nghal a, Floor 12-na a thleng a, room no.7 kawngka chu a han kik karh karh a. Margareth-i chuan a lo hawn sak a, Nathana chu a lut a. Margareth-i chuan, "I lo dam maw, NAthan?" tih pah chuan kuah rikngawt a han tum chu Nathana chuan alo namsawn vat a. Thinrim tak hian, "A ruka rawn hmu tur che emaw, ka ngaih em avang che a lo kal ka nilo. Min hmangaih thu i sawi avang khan ka hmangaih ve ta che tihna a nilo a, ka duhzawng pawh i ni hek lo. Min hrilh vat rawh, khawnge chemte chu a awm?" a ti khur khur mai a. Margareth-i chuan, "A awmna tur diktak ah a awm tawh e. Mi fing tak i ni anilawm ni? I hriatthiam mai ka lo ring a." a han ti vel a. Nathana chuan, "Engtin nge kha Scythian Knife kha in inah  a awm daih theih?" a ti a. Margareth-i chuan, "Icon chauh hi ka thil khawih a ni hleinem, ralthuam te pawh ka khawihtel thin. Amosa'n min lo phone a, hna min rawn offer a. Kha chemte original kha alo chhuah tan dan an hriatchian theihloh avangin an workshop ah khan official restoration an kalpui thei lova. Restore turin min ti a, tichuan chemte chungchang chu ka zirchiang ta a. Ka chance neih that ber hunlai a ni tih hria in hmanhmawh thei ang berin ka che ta a, pawisa tam tak pawh ka hlawh thei dawn a ni tih pawh ka hria a. A awmzia chu kha in kan dahkham pawh kha tuman an khawih che thei dawnlo tihna a ni. Tichuan Ropuia nupui pawh alo kir leh anga, hlim takin an awm leh ang." a ti a.

NAthana chuan, "Animaw? Tichuan i ru ta a, a ni em?" a ti a. Margareth-i chuan, "Enga? Enteh Nathan, Pu Zohminga khan engtin nge kha chemte kha a neih theih i hria em ni? Tunge a nih i hria em? "  a ti a. Nathana chuan, "Ka hre chiang khawp mai, thil hlui leh tlereuh hralh ru thin a ni a, dan pahhlovin." a ti a. Margareth-i chuan, "Engtin nge hna a thawh thin i hria em ni? A thawhpui thin te pawh zawt la. Eng atan mah pawh a tih tak tak loh te chu a ru chhuak tho a, painting te, thil dang dang te pawh." a ti a. Nathana chuan, "Thil rukbo tawh chu ruk chhawn leh i tum tihna em ni?" a ti a. Margareth-i chuan, "Engtin nge ka tih vak anga....ka nu khan chemte ka dahthat chu a lo hmuchhuak a. Pawisa lawm tak leh incheina buaipui reng mai a ni a, chemte a lunghlu te, rangkachak te chu a hmu a, pawisa siamna tha lutuk a ni tih hria in aman a dahtha chhawng veleh a ni. Tichuan ka nu chu thah a ni a, chemte pawh chu a bo nghal a. Ka nau Ropuia an man a, chua nang...nang chuan tualthattu zawng hmu turin min tiam a. I zawng hmu ta em? Min chhang ta che?" a ti a. Nathana chuan, "Ka thutiam ka hlen lo ngailo, i nu thattu chu kan hre tawh e. Pi Hriati a ni, in thenawmnu.." a ti a. Margareth-i chuan, "Aih, a theihloh, anilo ang." a lo ti a. Nathana chuan, "A inpuang vek alawm." a ti a. Margareth-i chuan, "A theihloh, Ropuia'n ka nu ruang a hmuh hnu minute 15 velah ka lo haw a. In ka theln dawn tep khan Pi Hriati nen chuan kan intawk a, kan inbe nghe nghe asin. A bazar zo chiah tih a chiang em em a, achhan pawh chawhmeh a khai teuh a ni. A bazar pahin ka nu chu ava that zuai tihna em ni? Chawhmeh nen a in keng bawr teuh chungin ka nu chu ava that dawn em ni? A theihloh, a nilo."  ati a. Nathana chuan, "Adik maithei, chemte thuruk nen, hun  anei tam lo hrim hrim. A rawn haw a, engmah thlenglo angin a awm leh bawk a." a ti nuah nuah a. Margareth-i chuan, "I thutiam i hlen lo ani, Nathan." a ti a. Nathana chuan thinrim tak hian, "Enge ni vak a, nangte chuan chemte ringawt kha alawm i buai pui chu ni." a ti a. MArgareth-i chuan, "Nilo, nangpawh ka buaipui che alawm." a tih lai chuan Nathana chu a ding thut a, "Atha e...chemte chu a awmna hmun tur takah i dah a, a tha e. Pawisa pawh tam tak i nei a, i hlim tawh ang chu...Ropuia te saw, i nau Ropuia te, a nupui leh a fapa te saw tha takin chawm ang che. Margareth, ka ngaidam che." a ti a, a chhuahsan ta a.

***********

"Min duhlo ta se, min lo hlau ta se...engtin nge ni ang?" tiin hlauthawng tak chuan SAngtei chuan Erica chu a kuta vuan meuhin a zawt a. Erica chuan, "Lungngai suh, a hre em em ang che."a  ti a. Tichuan Pi Mawii chuan Sammy-a chu a rawn kai chhuak ta a, Sangtei chuan Sammy-a chu va panin, "Bawiha, i nu ka nih hi...min hria em?" a  ti  a. MAhse Sammy-a chu a lo tawlh hnung a, lehlam a hawi daih mai. Pi MAwii chuan, "Thil thleng te hi engmah awmzia a hre ve lo a, a kut ah hian vuan reng ang che u." a  ti a.  Erica chu file a pe a, "Hei hi Sammy-a file ho te a ni a, statement tlem in sign a ngai dawn ania. Chuan document tlem in lak angai anga, Sangtei maternal rights restore turin.." a ti a. Erica chuan, "Awle, kan lo buaipui ange." a ti a. Pi Mawii chuan, "Hriatthiamloh thil inla nei anih chuan minlo call mai dawnnia." a ti a. Erica chuan, "Awle, kan lo call ang che." a ti a. Sangtei leh Erica chuan Sammy-a chu an kai a, Sangtei pawh a hlim ta khawp mai, hun rei tak chhung hrehawm taka a awm hnuah, a nui ve leh thei ta. Nathana pawh chu in lamah a haw a, inkawta SAngtei leh ERica ten Sammy-a hlim taka an lo infiampui chu ava hmu a. Sangtei'n Nathana a va hmuh chuan ava pan vat a, "Puih theihna che ka nei em?" a va ti a. Nathana chuan, "Saw saw i fapa chu em ni?" a ti a. Sangtei chuan, "Um, a nih saw..vawiin khan kan hruai haw a. Ka bulah a awm tawh tur hi ka la ring theilo hial zawk a ni, Home-a ka lo thawn bo te kha ka inchhir a, ka inzahpui leh hnuhnawh khawp mai." a ti a. Nathana chuan, "Nia, mahni inzahpui hi a awm chawk ania. Mahni kan inzahpui a nih tawh hi chuan thil diklo tak kan ti tihna a nimai a, entirnan i nu chuan a thiltih sual ni miah lovah, i tan Police te hnenah a inpuang a. A dik em?" a ti ta mai a. Sangtei chu  ahlauthawng kher mai, "Inchhungah inbia ang." a ti a. Inchhungah chuan an lut a, Nathana chuan, "Pi Muani khan i fapa chu Home-a dah turin i nu a fuihpawrh a, i fapa i chan phah a. I thinrim a, i that ta a ni...a dik em?" a ti a. Sangtei chuan, "Aih, chutin engtin nge i ngaih theih zawk a?" a ti a. Nathana chuan, "A landan chuan a ni si alawm, evidence kan hmuh atang pawhin..tualthahna hmanrua chemte kha Pi Muani'n i nu a pek, Chinese-shawl ngei mai khan a intuam a ni." a ti a. Sangtei chuan, "Ka nu khan khami ni khan Pi Muani te ina a kal dawn khan shawl kha a bat pawh a ni maithei asin." a lo ti a. Nathana chuan, "Anilo...witness pakhatin min hrilh dan chuan tualthahna thlen zawh khan i nu chu a bazar a rawn haw ve chauh tiin min hrilh a ni." a ti a. Sangtei chuan, "Witness i sawi chuan dawt a sawi a nih chu." a lo ti a. Nathana chuan, "Dawt a sawi lovang, witness chu Pi Muani fanu Margareth-i a ni." a ti a.

Sangtei chuan insawifiahna tur reng a nei ta lo, hnuailam a melh reng a. Chutah zawi sap hian, "Awle, engkim ka hrilh ang che." a ti ta a. Nathana chuan, "Han sawi ta che." a ti a. Sangtei chuan a sawi ta a, "A chhan bulpui ber chu Pi Muanin Sammy-a Childrens Home-a dah tura ka nu  afuihpawrh vang kha a ni a, ka nu lah chuan a thu a lo awih zel bawk si. Sammy-a hmuh ka va tum a, mahse an lo phallo a, min lo hnawtchhuak a. Ka thinrim em em a, Pi Muani va ankhum hrep tur chuan an inah ka va kal a. Inchhung ka va luh chuan chemte mawi em em mai hi a lo en a, ka va lut chiah chu a phu zuk a, chemte chu a thlauh ta a. Min hmu veleh chuan a thaw huai a, 'Nang i ni maw?' a ti ringawt a. Tichuan keichuan Home-a ka va kal thu leh Sammy-a min pek phalloh thu te chu ka va hrilh a, ka maternal rights min pe kir leh turin ka va dil ta a. Mahse min ngaithla duh lo a, ka thinrim chuan ka va sawi nawk nawk a. Chuveleh MI A NU tih pah chuan min beng hrep a, ka thinrim lutuk chuan chemte chu la in ka tin a. Thah ka tum lo, tihthaih ringawt ka tum. Mahse min namthlu a, chutah amah zawk chu a inchhui a, minrawn bawh a, Tumloh deuhin chemte ka ken lai chu a rawn bawh fuh ta a ni. Ka hlauthawng em em a, tichuan ka shawl bah lai chu phelhin chemte tuam nan chuan ka hmang ta a ni. Kawngkhar hnung lam atangin ka chhuak a, ka haw ta a ni." a ti a. Nathana chuan, "Tichuan i nu chu engkim i hrilh a, a khawngaih che a, i tuar ai a tuar ta a ni. A dik em?" a ti a. Sangtei chuan, "Aih, engmah ka hrilh lo hrim hrim. Ka nu khan ka awmdan kha a hmu vek a, engemaw diklo a awm tih chu a hre ve a ni ngei ang. Heart-attack alo nei tih pawh ka hrelo a, a damlo tih pawh ka hre ngailo hrim hrim. Ka nu duh ber chu nun thar nena bul ka tan a, hlim taka ka awm hi a duh ber a ni. Pi Muani ka va pan khan ka nun chu a chhe vek tawh angah ka ngai a, engmah thil tha a thleng dawnlo nii ka hria a. Thil lo thleng tur ka hre lawk miau lo a ni...ka hlim ve dawn chauh a, tunah Erica leh Sammy-a te pawh ka bulah an awm dawn chauh a, mahse hei kei mi vanduai hi chu ka hlimna chu a tawp leh nghal dawn chu a nih hi. Ka tihsual man chu ka hmu dawn a nih hi, tualthattu chu ka ni e." a ti a, a tap zawih zawih a. A mittui chu a hru a, "I kal ang le, ka inpeih e." a ti a. Nathana chuan Sangtei chu a en vang vang a, "Khawiah maw kan kal ang?" a lo ti daih mai. Sangtei chu a ding a, "Police Station ah, ka inpuang vek ang. Ka tuar ang, ka nu tal chu pawisawilo a ni tih an hre dawn a, a tha tho e." a ti thawp sat a. Nathana chu a ding ve a, "Pi Muani khan i nun a ti hrehawm a, ka pawm thlap e. Chanvo i nei a, i chanvo chu i chhungte enkawl a ni, i chhungte...Sammy-a leh Erica te hi...hlim takin awm ang che u." a ti a, a chhuahsan ta daih mai. Sangtei chuan mak a ti em em a, phawk hru hian Nathana chu a en zui vawng vawng mai.

*********

Tluangtei chuan, "U NAthana chu ka ngaihtuah e, enge a an ang le?" a ti a. Rinawma chuan, "Khai, ngaihtuah suh, ani te chu a tha mai ang." a lo ti a. Nathana chu a rawn haw ta a, Tluangtei leh Rinawma chuan an lo en reng a. Nathana chuan, "Ehe, tinge khatia min en reng a?" a ti hu mai a. Rinawma chuan, "Sir, i tha maw?" a han ti a. Nathana chuan, "Ka tha e..tinge?" a ti a. Tluangtei chuan, "I tha takzet maw?" a ti leh a. Nathana chu a thaw halh a, "Thil tha pakhat tal ka ti a, ka lawm tawk em em tho e."  a ti a, an nui ta dar dar hlawm a. Nathana bawk chuan, "Rinawm, thawmhnaw pack la, i haw tawh teh ang. He thingtlang khua ah hian nikhat lek pawh ka awm leh anih chuan ka a thei mai dawn...chubakah ka nupui leh ka fate pathum ka ngai tawh emai." a ti a. Tluangtei chuan, "Ni e...pawilo mai rawh se, Kumthar pawh hmang thleng lo mai rawh u...he khua hian a ngeihlo che u a nih hi." tiin a lo nui ve bawk a. Rinawma chuan, "Tluangtei chu ka van ngai leh dawn che ve...mahse chaw ei phawt ila, kan inngaihtuah leh dawnnia." a ti a, an nui ta dar dar hlawm a.

(A TAWP TA)