SUNRISE SWEETS Written by : Aaron Malsawmdawngzuala (A MIZO FICTIONAL FAMILY SAGA STORY) Chapter - 6

 SUNRISE SWEETS

Written by : Aaron Malsawmdawngzuala

(A MIZO FICTIONAL FAMILY SAGA STORY)

Chapter - 6 

****************************************

ZAn khat chu Lawma chu a khumah chuan thu in a melh ngai a melh ngut ngut a, a video viral chungchang bak chu a ngaihtuahna ah thildang ala awm thei mawlh lo. A zak em em a, an chhungakw tan chuan mi hnawksak, an chhungkaw ti mualphotu ang mai chuan a inhria a.

A tho thut a, a tei kual a tei kual a. A u Ethana khan a ngaihdam thu pawh a la sawi miah lo tih chu a hrechhuak deuh thut a, chu chauh pawh chuan a ngaihtuahna a tibuai hneh kher mai. A inthiam lo em em a, chutih rual chuan a unau ten, tuman an ngaihdam thu an sawi lo chu a lungawilo tel bawk.

Room atang chuan a chhuak a, a u Ethana room lam chu ava pan ta a. Zawi te chuan a han kik karh karh a, Ethana'n a lo chhan hma hma chuan ava lut nghal deuh thawr mai. Ethana chu a khumah chuan lo thu in a phone a lo khawih mual mual a, Lawma chu en pawh a  en lo.

Lawma chuan a aw a han thian deuh kharh a, "U, ihh... a hrehawm ka ti lutuk a. Khaw.. khawngaihin min ngaidam hram teh. KA inthiamlo lutuk, zanah pawh ka mu thei lo. Min haw viau ang tih ka hria,l mahse ka tihpalh takzet a ni." tiin inthlahrung deuh tak chuan ngaihdam chu a han dil nawn leh a.

Ethana chuan a phone chu khumah chuan a han dah deuh hmak a, Lawma chu va melhin a tho deuh thut a. Thawk a han la te te a, "Lawma, theihnghilh rawh. Hun kal tawh a nih kha, sawi chhuah reng a ngai lo." a ti deuh hmak mai. Lawma chuan lungawi loh hmel tak hian, "Kha ringawt kha a tawk lo, min hua a nih kha. HE thil hian keipawh min tihnat zia hi i hrethiam ve duh lo, kan unau tan hian ka hnawksak a ni tiraw?" tiin a tap tuau mai.

Thinrim tih hriat tak hian Ethana chuan, "Lawma, i tawnghnem thin khawp mai. I roomah va lut rawh, ka ning zozai tawh lutuk." tiin a vin hrep mai. Lawma lah a thinrim zual tulh tulh mai, "Nang hian kei hi min hmangaih lo, ka u May-i leh Sangtei pawn, mi hi in en hrang ngawih ngawih. Ka hre vek, ka tisual ve a nimai a. KA inthiam lo ve tho, enge min ngaihdam pawh chu a harsa viau em ni?" tiin a ang ta bawrh bawrh mai a.

Ethana chuan chhan let ngaihna pawh a hre lo, a ngawi reng ringawt. An thawm a rin em avang chuan Sangtei leh May-i te pawh chu room ah chuan an rawn lut ve a, "Enge ni vak vak a? Lawma, tinge i au vak vak a?" tiin May-i chuan a rawn hau va. Lawma lah chuan thinrim tak hian, "Nang kha lo inrawlh ve ziah suh, ka lungawi lohna ka sawi chhuak ve a nimai." tiin a lo vin let hrep mai.

Ethana erawh a la ngawi reng, "Au LAwm, i rapthlak thei lutuk. Nang chauh hi hrehawm ti leh lungawi lo i ni lo, kan vaiin hrehawm kan ti mek a nih hi." tiin Sangtei chu a rawn tawng chhuak ve a. Lawma chuan vin zet hian, "Lo inrawlh reng reng suh, nang kha. School naupang te te si, i lo sawi ve tur pakhat mah a awm lo." tiin a vin khur khur mai a.

Sangtei pawh chu a ngawi chiang hle mai, Ethana chu khumah chuan a thu hnawk a. A melh ngai a melh vung vung ringawt mai. A lu a dawm vawng vawng a, chu ringawt pawh chuan Lawma thinrimna chu a ti zual kher mai. Ethana chu rum takin a melh a, "Tawng ta che, unau zinga upa ber i ni lawm ni? Hei chhungkuain buaina kan tawk a nih hi, chingfel ta che." a la tih khum hrep zui a.

May-i chu a thinrim takzet, "I tawngkam kha fimkhur rawh aw, Lawma. Tuna kan chhungkaw mualphona chhan leh buaina chhan hi tu vang nge? Nangmah vang a ni lawm ni? Khatia i la tawng ngam chu le? I rapthlak khawp mai, ka nu leh pate kha la dam se chuan an vaw hlum hial duh ang che." tiin a insum zo lo chu a tawng ve ta bian bian mai.

Ethana chuan rang tak hian, "May, ngawi rawh." a lo ti vat a. Lawma chuan ngeiawm tak hian, "Engvangin? Engvangin nge a ngawih ang? A sawi dik alawm, ka nu leh pate kha awm se min vawhlum ang. Nangni pawn tunah hian min vawhlum ve nghal law law ta che u. Au Ethan, ka nu leh pate kha nangmah vanga accident an nih kha i hria em? Tinge nang zawk hi i lo thih zawk loh?" a ti ta bian bian mai a.

Ethana insum zo lo chu a ding a, "NGawi rawh, Hmela!" tiin a tin nghal uai mai. Lawma chuan a mittui chu a khap per sak a, "A tha e, ka chhuak ang. Ka chhuak khawp ang, min mamawh lo a nih hi." tiin a khi lui deuh suk a. MAy-i chuan lo dan tumin, "A tul lo, Lawma. Thil atthlak engmah ti suh, khawnge i kal chuan anga?" tiin a lo pawt ding a.

Lawma chuan a u kut chu paih thlak sakin, "Duh leh khawlaiah ka riak mai aniang chu, hetiang inchhungah ka cheng peih lo. Min mamawh lo bawk a, ka rawn let tawh ngai lovang,." tiin a roomah chuan a lut a. A thawmhnaw tlem azawng chu a pack mawlh mawlh a, room atang chuan a rawn chhuak leh a.

Ethana erawh chuan dan a tum lo, a khumah chuan thu in a ngawi reng a. SAngtei chuan zawi sap hian, "Au Lawm, kal suh..khawngaihin." tiin a inhnit feih feih a. Lawma chuan Ethana chu a zu melh leh hram a, "Ka chhuak e, tikha chuan in hlim tawh ang. Chhungkaw tana hmelma nih reng hi ka duh bik lo, tikahn hlim deuh khan awm rawh u." tiin a chhuak ta daih mai a.

Sangtei leh May-i te unau chuan an enzui vawng vawng ringawt a, Ethana lah chua  che eih bawk si lo. Zawi sap hian Sangtei chuan, "Engtin nge kan tih tak ang?" a ti tham tiak a. Mittui tla zawih zawih chung chuan, "Ka hre bik lo." tiin May-i chuan a chhang a. Ethana chu a roomah chuan mit khap lek lo hian a la thu ngar ngar a, a rilru a hah kher mai.

************************************************

ZAn dar 11 a pel tawh a, Office chhungah chuan Pu Jacob-a te pafa chu an thu dun mek a. A zu no chu Pu Jacob-a chuan a han thing kual vel a, "Thla khat aia tam a liam mai dawn, Ethana lah chuan min arwn be chuang miah bawk si lo." tih pah chuan a han tlak pup a. Victor-a chu a han thaw hluai a, "Ka hria alawm, Pa. Mahse a rilru a nuam dawn chuang lo, kan nghah deuh ala ngai a ni." a lo la ti fan a.

Pu Jacob-a chuan a thutthleng chu a han ngheng ar ar a, "Ka hrilh che kha, Bawiha. Ethana hi vawi hnih lai ka hmu tawh, a luhlul lutuk." tih pah chuan meizial chu a zu khu tulh tulh a. Victor-a chu a lo khu suk a, "Lungngai suh, tlema nawr deuh ala ngai tihna a nimai alawm. Mihringte chuan chak lohna lai kan nei theuh alawm, ala duh belh a nih dawn hi." tiin a lo chhang a.

Pu Jacob-a chuan a fapa chu a han en deuh hu a, "Enge thildang tih ila tum a? Tunah heti khawp hian kan ti mualpho tawh a, engdang nge tih vak tur la awm?" tiin a zawt a. Victor-a chu a han thaw hak a, "Plan ka nei sa vek alawm, a luhlul tihte chu i sawi hmasak ber atang khan ka hrethiam ve tawh tho alawm." tiin a lo chhang leh a.

Pu Jacob-a chu a han khi suk a, "Anih chuan i plan chu han ngai thla ila." tih pah chuan a thutthleng chu a ngheng leh ar ar a. Victor-a chu a han thu tha sauh sauh va, "An chhang supplier tute hi kan chhawr daih thei alawm, pawisa kan pe anga. Ethana tan an chhang ingridient original ho kha neih a harsa sawt ang a, an bakery saw Health Violation angin kan thehdarh leh thei bawk. Tichuan hei ai hian an dawr saw a tla chhia anga, an hawng ngam tawh lo hrim hrim anga, an duhthlan tur chu hralh a ni tawh mai." tiin inti fing tak chuan a han sawi zuah zuah a.

Pu Jacob-a chu a ngawi vang vang a, "A risky teh mai ania aw, min manchhuah chuan kan chhe vek animai." a ti nuah nuah a. Victor-a chu a han deuh chek hlur a, "Nang pawn min hrilh thin kha, ka pa. A chang chuan kan duh tak te kan neih theih nan chuan risk lak a ngai thin i tih kha, kan thil tih tur hi a hlawhtling leh a nih chuan Ethana chuan duhthlan tur dang a nei tawh dawn lo hrim hrim." tiin a lo chhang let a.

Pu Jacob-a chu a nui deuh var var a, "I nu i chhun ve khawp mai, i beidawng duh lo ve khawp mai. A tha e, i duh ang chuan i ti dawn nia. Mahse BAwiha, fimkhur ang che. I chesual hlek a nih chuan a pawi dawn ania, kan mualpho ve thung a nimai." tiin a darah chuan a beng thak thak a.

Victor-a chuan confi tak hian, "Ka hria alawm, Pa. Mahse saw bakery-a thawk tlangval satliah mai mai sawn kei hi min hneh ka phal dawn lo hrim hrim, saw bakery saw kan hnenah hian a hralh dawn tho tho." tiin a nui var var a. Pu Jacob-a chuan a lu a bu nghat nghat a, "A tha e, i kutah ka dah e." tiin a chhang a, Victor-a pawh chu a chhuak ta a.

***************************************

Ruah a sur buan buan a, Sangtei leh May-i te chu an mu thei meuh lo. Lawma chu an ngaihtuah takzet a, an room ve ve ah chuan awmin a khat tawkin an tawngtai leh mawlh mawlh thin. Ethana erawh inah a awm hauh lo, a unaunute hrait lohvin Lawma zawng turin a lo chhuak chu niin, ruah sur hnuaiah chuan ke in a kal kual a.

Lawma chu a au vak vak a, hmun tin mai chu a en a. A mangang takzet, chutah thlanmual lamah chuan a zawng leh a. A nu leh pa thlan chu a hmu fuh hlauh mai, a va pan hnai a. A nu leh pate thlan hmaah tak chuan a thingthu hnawk a, a tap ta zawih zawih mai. Inhnit hlawp hlawp chung chuan, "Min ngaidam rawh u, nu..pa, min ngaidam rawh u." tiin a kun ngawih ngawih mai a.

"In fapa hi ka beidawng tawh a ni, engtin nge ka tih dawn ka hre tawh bik lo. Ka va han mamawh tak che u em, in tello chuan ka tlin ve ngang lo a ni." tiin a tap khur zawih zawih mai a. A mitthlaah chuan a nu leh pate, a motor khalh ngeia an accident laite chu a rawn lang zuai zuai a.

Nichin lawka Lawma'n tap chunga, "Ka nu leh pate boralna chhan pawh nangmah vang a nih kha, i motor khalah anih kha. Tinge nangmah zawk hi i lo thih loh?" tia a ankhum lai te chu a bengah chuan a ri nawn awn awn a. Hrehawm a ti takzet, "Ni e, keimah vang a ni. Khami ni kha, ka thiamloh a ni." tiin a lu chu a dawm ngawih ngawih a.

Kutsuih meuh chuan van lam hawiin a tawngtai a, "Lalpa, enge ka tihsual? Ka dik lo em ni? Ka naute ka venhim vang hian ka dik lo em ni? KA khuahkhirh mah mah em ni? Mawh?" tiin a au vak vak a. Leiah chuan a bawk leh thlawp a, "Khawngaihin Lalpa, min pui rawh. I tello chuan, keimah chauh chuan a harsa em mai." tiin a tap khur zawih zawih a.

***************************************

Ni thum a liam a, Lawma chu rawn haw ala tum chuang lo. A thianpa Biaka te inah chuan a awm tawp a, college pawh a kal lo char char bawk. May-i leh Sangtei chuan an call deuh sek thin a, mahse Ethana erawh chuan a call ngai eih lo thung. Biaka chuan May-i bulah chuan a inluahah a awm thu chu a hrilh tawh tho va, mahse Lawma chuan a unaunute phone call chu chhan a tum ngai eih lo.

Tlai khat chu Biaka college bang chu a rawn haw a, roomah chuan a lut tlang nghal a. Lawma chuan a phone chu a lo khawih mual mual a, "Lawma, i haw vat a ngaiin ka hria." tiin khumah chuan a thu a. Lawma lah chuan en miah lo hian, "Engvang ngawtin maw?" tiin a phone la khawih reng pah chuan a lo ti deuh hlur a.

Biaka chu a thaw deuh hak a, "I unaunute sawn vawiinah ringawt pawh vawi 5 chuang min rawn call tawh, lo sawipui hram teh an tia. Nang lah i luhlul reng bawk si, chubakah hetah ka bulah hian i awm reng thei dawn chuang lo." tiin a hrilh a. Lawma chu a lo ner sak a, "Min ngaihtuah tak tak lo, min haw vek an vai sawn." a lo ti leh hmuk a.

"Enteh, i tan a harsa tih ka hria. MAhse i unau neih chhunte an nih saw, hetia awm reng hi a tha lo ania."

"Ka hria alawm, Biaka. Keipawn hrehawm ka ti ve tho, mahse Ka u Ethana ber sawn min rawn call ve hleinem. Amah sawn min rawn call se, min ngaihdam thu sawi mai se...harsa a awm hleinem, min haw ngawih ngawih alawm sawpa sawn."

"Nangman buiana i siam belh zel aniang chu mawle."

"Eng buaina mah ka siam lo, khami zan khan ngaihdam ka dil nawn leh a. Mahse a vawihnih nan min la ngaidam duh chuang lo, khami zan atang khan min la rawn call ve eih lo bawk."

"Tinge i indah pawimawh em em le aw? I tihsual a ni tih i hre ve vek a, i u Ethana dinhmunah sawn han inchan teh, i thei bik angem?

Lawma chu a khi suk a, "A nau ka nia, thil ka tisual ve animai a. Min ngaidam duh lova, chuvang chuan ka let dawn bik lo reng reng." a la ti fan mai. Biaka chu za lo tak chuan a khi ve suk a, "I chhungkuate an nih saw, Lawma.May-i leh Sangtei sawn min rawn call nasa, nang lahin i la duh bawk si lo. An mamawh che, i luhlulna kha dahtha ve hrih teh." tiin a thiam ang tawk chuan a han zilh a.

Lawma chu a ngawi vang vang a, "Kar khat dang ka lo awm leh ang, kar khat chiah a nimai. Abak chu keimahin ka inbuaipui mai ang, kar khat chiah a nimai." tiin a chhang a. Baika pawh chuan a zilh kual vel peih tawh lo, a thaw deuh hak a. Ding deuh hluaiin, "A tha e, ni rawh se." tiin a chhuahsan daih a.

************************************************

Zan a ni a, Lawma chu Biaka inluah ah chuan sitting roomah thu in ngawi reng hian phone a khawih mual mual a. Kawngka chu a rawn ri rak a, Biaka chu a rawn lut a. Lawma chu a en vung vung a, "Enge khatia mi en vung vung a?" Lawma chuan a lo ti hu mai. Biaka chu a khi deuh suk a, "Hei... inleng i nei a?" tiin pawn lam chu a kawk a.

A rinloh tak maiin inchhungah chuan May-i leh Sangtei chu an rawn lut a, Lawma chu a meng phawk nasa kher mai. Mahse lehlam a hawi nghal daih a, Biaka chu a thaw deuh hak mai. Lawma bulah chuan ava thu a, "Thianpa, khatin awm tlat tawh lo teh. I unaunute hian an mamawh takzet che anih hi, hei ka in thleng thlenga an rawn kal tak hi." tiin hrilhfiah a tum a.

Mahse Lawma chuan a chhang lo, en pawh a en duh lo. May-i chuan ava pan hnai a, "Bawiha, khawngaihin lo haw rawh. U Ethana hian min ngaihtuah em avangin min lo khuahkhirh nasa deuh pawh a ni mahna, mahse min hmangaih vang zawk alawm." a han ti zawi sap a.

Lawma chuan ala chhang chuang lo, "I hmu thiam lo a ni mahna, mahse kan tana a inpumpek zia hi tinge i hriatthiam duh miah loh va?" May-i bawk chuan a han ti leh a. Sangtei pawh chu lo tawng chhuak ve in, "Au LAwm, Manuna'n a hnek tum che kha ila hria em?" a rawn ti deuh thut mai.

LAwma chu a phu deuh zuk a, Biaka chu a han en a. Biaka lah chu lehlam a lo hawi daih a, "SAngte, engtin nge i hriat a?" a ti hu mai. Sangtei chu a nui sen sen a, "Khami zan khan Manuna kha zirtirna a pe hlak alawm, vawikhat mah tibuai tawh lo tur che in a hrilh bawk asin." a han ti leh a.

Lawma chuan Biaka chu a han en leh a, "A tukah MAnuna chu kan hmuh kha, a mit a lo duk chur kha i la hria em? A cho loh val a tawng ve ta a nih saw tiin i sawi a, kha a choloh val kha i u Ethana a ni." a lo ti a. LAwma chuan mak a ti kher mai, a mitthla chuan a hmu nghal a, MAnuna khan khata tang khan a tibuai leh tawh miah lo tih chu a hrechhuak chhunzawm nghal bawk.

May-i chuan a rawn thut hnaih a, "Chuan keipawh, kan painting school ah khan ka zirtirtu pui pakhat DAvid-a hian min tibuai thin a. Vawikhat chu ka thianpa Thantea nena kan haw dun lai min rawn bei chiam a, kut min thlak nghe nghe bawk. Police Station ah hial kal a ngai a, U Ethana khan min rawn lam a. Case a file duh miah lohva, a chhan chu David-a kha amah ngeiin zirtirna pek a duh vang a ni. Khami hnu khan DAvid-a hian ngaihdam min rawn dil a, U Ethana'n a lo khawih nual a ni awm e." a han ti ve leh a.

Sangtei pawh chuan lo sawi chhunzawm velehin, "Chumai ala ni lo, kan school-a kan Sir John-a hian min duhsak thei lutuk a. Ka classmate te zinga mi Nanu-i ten tlai khat chu an entawn avangin an hrem a, min mawhpuh a. Sir John-a nen inngaizawng ru ang ten min chhuahchhal a, mahse Au Ethana khan min rawn chhan asin." tiin Ethana'n an thlanvang a hauh thinna zawng zawngte leh fee chungchanga an buaina thleng te chuan an unau chuan an hrilh ta vek a.

Lawma pawh a inthiam tawh bik chiah lo, mahse ala ngawi reng a. Biaka chu rawn tawng chhuak velehin, "Thianpa, i video a viral hnu khan ka khawngaih em em che a. Midang zawng zawngin an kawm duhloh lai che pawh khan keichuan ka kawm ngar ngar che. Mahse engvangin nge ka hmuh loh der thin che a, ka hlat zeuh zeuh che? A chhan i hre duh em? A chhan chu i thiam loh a ni chung khan, i ka(mouth) atang hian Ethana demna hlir ka la hre fo va. Chuvang chuan kei i thianpa ngei pawh hi i lakah khan ka lungawi vak bik lo a ni, ka hmuhsit vang che a ni reng reng lo." a lo ti ve leh a.

May-i chuan Lawma darah chuan a vuan a, "Bawiha, khawngaihin lo haw rawh. Chhungkua kan nia, unau kan nia, kan tangrual tur alawm. Kan ngaidam che, mahse nangman min puih ve angai. U Ethana hian kan unau thum hian min ngaihtuah takzet a, keini hian kan rulh let ve angai a ni." a han ti dam thlup a.

Lawma chu a ngawi reng a, a mittui chu a hru deuh chhen bawk. Sangtei leh May-i chu a en a, "Ka tihpalh takzet a ni, ka tum a ni bik lo." tap tuau chuan a han ti a. MAy-i chuan duat tak hian a kuah a, "Kan hria alawm, U Ethana pawn a ngaidam vek tawh che. Kan gnaidam che, khawngaihin lo haw tawh rawh." tiin a chhang a.

****************************************

Ethana chu inah awmin chaw ei dawhkana hmaah chuan a thu a, a ngaihtuahna a kal thui kher mai. Engtia an mualphona chu han hliah khuh tur nge a hrethiam tawh bik lo, sana a en a. Dar 9 a pel tawh, "Khawnge maw an chhuah daih le?" tiin a phun sup a, a unaunute chhuak chu a ngaihtuah kher mai.

Chutih lai tak chuan kawngka a rawn inkik karh karh a,a unaunute a nih ringin rang takin ava hawng a. Mahse Victor-a a lo ni reng mai, "Tu nge i nih? Enge i duh a?" Ethana chuan a ti deuh hu mai. Victor-a chu zam map lo hian a rawn lut tlang a, "Ethana maw i nih? Kan inhmu ve ta, Victor-a ka nia." tiin chibai a han tum a.

Mahse Ethana chuan a lo chibai let lo nasa mai, "Pu Jacob-a fapa kha maw? Enge hetah i rawn tih?" a lo ti hlur mai a, a melh rum kher mai. Victor-a chuan hlauh loh hmel tak hian, "Eng dang ni love, ka nihna ka sawi atang khan i lo hriatthiam ve mai ka ring a. Bakery, i bakery chungchang kha mawle. I sumdawnna neih chhun liau liau kha, kha..ava zia lo ve aww.." ngeiawm tak chuan a han ti vel a.

Ethana chuan a melh no lo kher mai, "I sumdawnna a ni lo, ka sumdawnna zawk a ni. I lo buai angai lo, enge i duh ka tih chu?" a lo ti leh hmuk mai. Victor-a chu a han thaw deuh hluai a, "Ni e, Ethan. Tunah chuan i bakery tla chhe tawh lutuk leh sum pawh i lak luh theih tawh lohna dawr chhe te hi e, sumdawng hausa zawng zawngte sumdawnna nimai tur a nih hi." tiin a hmusit kher mai. 

Za lo tak chuan Ethana chu a nui lui sak a, "Anih chuan hei hi ka hrilh ang che, kan hralh phal chuang lo." a lo ti leh deuh hmak mai. Victor-a chuan a han en vang vang a, "Ka pa sawi kha  a dik a nih hi, i luhlul ngang ngang hle mai maw.. mahse lungngai suh, engtiang chiahin nge i luhlul kan en ang chu." tih pah chuan an in chu a en kual vel a.

Chutah thinrim deuh tak hian, "Kan sum offer che hi a tlem chhe lo ania, a tlem lo mai nilovin hausakna tham lawih a ni. Ethan, i tang rei thei chuang lovang. Zaidam taka ka hrilh lai che hian pawm mai rawh, in mualphona zawng zawng hliah khuh vek thei tur khawp pawisa, sumdawnna dang, a thar hlak, hei aia hlawk zawkin bul in tan thei dawn asin." a han ti deuh khur khur a.

Rum tak hian Ethana chuan a melh a, "I duhtawk i sawi zawh tawh chuan chhuak tawh rawh." tiin a lo chhang bung leh hmuk mai a. Victor-a pawh a nui tawp, "I luhlul hle mai, Ethan. Enge i tih theih chuan a? Tumah puitu tur i neih loh hi, in chhungkua in kehchhe mek lehnghal." tiin a deuh sawh vak vak mai a.

Chutah kawngka chu a rawn ri rak a, "Puitu chu la nei ve a, a unaupa ka la dam alawm." Lawma aw ngei mai chuan a rawn ti a. Ethana leh Victor-a te chu an va hawi rual a, kawngka bulah chuan Lawma leh Sangtei leh May-i te chu an lo ding a. LAwma chu va lutin, "Kan inah enge i rawn tih a?" tiin Victor-a chu ava pan hnai a.

Ethana chuan mak ti tak hian Lawma chu a lo melh hu mai a, a lawm rilru hle bawk. Victor-a chuan Lawma chu a nuih deuh vak vak a, "Khai a, a changtupa a lo thleng e. I video viral kha enge a an? Ka la thiam ve tho em?" tiin a deuh sawh ve leh hrep mai a. MAhse Lawma chu a zam bik lo nasa mai, "Tuna i tawngkhum kha ka u a ni tih hre rawh, a unaupa neih chhun ka nih hi. Ka pui ang, chuan kan unau za hian theih tawp chhuahin kan do bawk ang che." a ti khur dar dar mai.

Victor-a chuan nui chung hian Ethana chu ava en a, "I lo hria em? Ethan, i nau Lawma, in chhungkua ti mualphotu, buaina siam chhuaktu ber leh mi tangkai lo hian a rawn chhan vel che a nih hi.." tiin a hmuhsit hmel kher mai. Thinrim tak hian Ethana chuan, "Aw ni e, kha kha ka nau a ni. Ka chhungkua, ka unaupa neihchhun a ni. A chiang em? Hre rawh, Victor. Bakery hi kan hralh dawn chuang lo, i duh duh chu ti rawh." tiin a lo chhang let hmak mai a.

Victor-a chu a ngawi vang vang a, "Kan hria ang chu, kan inhmuh leh vat ka beisei." tiin a khi suk a. A chhuak ta a, inthiamloh hmel tak hian Lawma chuan a u Ethana chu a en a, "U, ka tihpalh." a ti zawi sap mai. Ethana chuan a lo nuih sang a, "Nilove, LAwma. Min ngaidam dawnnia, tun atang chuan in vaiin ka veng him tawh ang che u." tiin a chhang a.

*************************************************

 Chumi zan vek chuan Ethana te unau chu an chaw ei dawhkan chu kilin an thu bial thap a, "Awle, tihian kan ti ang. Bul kan tan tha leh ang, pawisa ah kan harsa tawh em em bawk si. Tireng hi chuan kan t(r)am mai ang, chuvang chuan mi min sawina hi kan theihnghilh thiam angai." Ethana chuan a han ti a.

"Anih, enge kan tih hmasak ber ang." tiin SAngtei chuan a lo zawt a. Ethana chu a ngawi vang vang a, "Bakery saw kan hawng tha leh ngat ang." a han ti a. May-i chuan a lo en hu a, "Mahse U, ti khawp hian miin kan bakery an la troll nasa ania. Customer pawh kan hmu zo dawn em ni?" a lo ti vat a.

Ethana chuan thawk a han la te te a, "Ka hria alawm, mahse kan tawp san thei ngawt hleinem. Kan hawng leh anga, customer nikhatah pakhat leh emaw, tumah min dawr tu awmlo pawh nise kan beidawng tur a ni lo. Chuan..May, nangpawh naktuk atang chuan painting class i kal leh ang. I hna thawk tan leh tawh rawh, sawiselna kha chu hriat loh der zel mai tur." tiin a chhang a.

May-i pawh chuan a lu chu bu nghatin, "AWle, ka kal ang." tiin a chhang a. Ethana chuan Sangtei chu en lehin, "Bawhhi, nangpawh lehkha tha deuhin zir la. Kan buaina neih mek hi i u te hian kan chingfel em em ang, lungngai reng reng suh. Miin an lo chhaih che a nih pawhin, hre lo der zel ang che." a han ti leh a.

Sangtei pawh chuan tha taka lehkha a zir tur thu in a lo chhang a, "Chuan Lawma, nang pawh college ban veleh dawr lamah min rawn pui thin anga. Assignment in nei a nih chuan sawi hreh lo la, mahse an inpuih tlan dial dial angai dawn ania." tiin Ethana chuan Lawma chu a hrilh a.

Lawma chuan a lu bu nghatin, "Tehreng mai, engpawh ka ti ang." tiin a lo chhang ve bawk. Chutia an unau inlungrual ta em em mai a hmuh chuan Ethana chu a hlim takzet, "A tha e, kan inpuih tlan dial dial chuan kan hlawhtling leh em em ang. Sunrise Sweets hi Mizorama Bakery tha berah kan siam leh thei ania, kan thawh hona a that phawt chuan." tiin a han fuih phur sauh sauh hlawm a.

*************************************

Pu Jacob-a chu a room ah chuan a thu a, zu a in mek a. Kawngka a rawn inkik karh karh a, "Lo lut rawh." tiin a lo chhawn vat a. A fapa victor-a a lo ni, "Pa, thil kan sawiduna ngai." a rawn ti lut nghal a. Pu Jacob-a chuan a zu no chu a han tlak leh pap a, "Enge ni ta?" tiin a lo zawt a.

Victor-a chu inthlahrung hmel tak chuan a pa hmaah chuan a ding a, "Ethana chu ka va hmu a, i sawi ang ngei khan...mahse..." a sawi zo hman lo. Pu Jacob-a chuan a hrethiam nghal, "Ka rin ang chiah, a phal lo, a dik em?" a lo ti nghal vat a. Victor-a chu a ngawi deuh dat a, "A mak lutuk, Lawma pawh a lo awm a. An unau khan, Ethana lamah an tang vek. Chuan...an intan hlawm lutuk. Lawma ber lah kha a tawng pawr em em a, Ethana khan engtin nge a tih pawh ka hrethiam tawh bik lo." a ti nuah nuah mai.

Pu JAcob-a chu a ding hluai a, "Ka hrilh mawlh mawlh che a ni lawm ni? I confi over leh lutuk a, an phal lo a nih chuan lei ngaihna a awm bik miah lo ania, kan tan hian.." tiin a vin lek lek mai. Victor-a chu a han maimitchhing vang vang a, "Ka pa, hahdam rawh." a han ti zawi sap a.

"Hahdam rawh a? Enge kan tih vak ang nga? Victor, vawi tam ka hrilh che. Ethana sawn a unaute mai nilo, saw dawr saw a venghim hneh lutuk. Pawisa a tih lungawi chi a ni ve lo, tunah lah a unauten an t(r)an leh vek tawh lehnghal." tiin Pu Jacob-a chu a phun nasa mai a. Victor-a chu a thinrim hmel kher mai, "KA hria alawm, PA. MAhse hetia kan tawpsan mai chuan a dik lovang. Kha leh chen kan thleng tawh a, ka plan ang pawh khan ka la kal dawn tho tho. Engtiang chiah a thil tithei nge kan nih tih hi Ethana saw ka hmuh tir dawn khawp alawm, saw bakery saw kan tan a pawimawh em kha." a ti khur deuh dar dar a.

Pu Jacob-a chuan a fapa chu a han melh deuh hru a, "Ka hria, ka hria. A location zawng zawng nen, a hmunhma a nalh bawk a. Kei tak hian ania duh ni, mahse kan ta a ni lo. A neitu kan ni lo, kan lei a ngai. Mahse a neitute chu Ethana te saw an ni, an phal miau loh chuan tilui a, nawr lui thei kan ni ngawt bik hleinem." tiin a vin deuh hlur mai a.

Victor-a chu a ngawi vang vang a, "Ka plan ang khan ka kal leh phawt anga, chumi pawh ala hlawhtling lo a nih chuan thil dang ka ngaihtuah leh thovang. Ka tlawm dawn lo, ani ai sawn ka luhlul fe zawk." a han ti pung pung a. Pu Jacob-a chu a thaw hak a, "Thil mawlmang leh atthlak engmah ti suh ang che, mahse saw bakery saw kan nei ngei tur a ni." tiin a chhuahsan deuh hmak a, Victor-a chu thinrim hmel tak hian a ding ngawi reng ringawt a.

**********************************************

TO BE CONTINUE