SUNRISE SWEETS Written by : Aaron Malsawmdawngzuala (A MIZO FICTIONAL FAMILY SAGA STORY) Chapter - 7 (LAST)

 SUNRISE SWEETS

Written by : Aaron Malsawmdawngzuala

(A MIZO FICTIONAL FAMILY SAGA STORY)

Chapter - 7

(LAST)

************************************************

A tuk zingah chuan Ethana chuan an dawr, Sunrise Sweets Bakery chu a hawng leh ta a. Thla khat vel lai a lo khar tawh ve bawk nen, han tihfai tur chu a tam khawp mai. Ethana chuan a han tifai nghal zung zung a, a hma zana an lo siam lawk chhang te chu a han pack nghal sawk sawk a.

Khawlaia kal thenkhatte pawn chutia Ethana te bakery rawn inhawng leh ta mai chu an en hu hu a, mahse va dawr tum erawh an awm lem chuang lo. Chutia Ethana'n a pack mawlh mawlh lai chuan kawngka chu a rawn ri rak a, "Lo leng rawh, enge i duh?" tiin Ethana chu a ding a.

Mahse a rin loh tak maiin Jenny a lo ni tlat mai, "Ehe, Je..Jenny nang elaw?" a ti bah nuai a. Nui sang hian Jenny chuan, "I hawng leh tan tawh dawn animaw?" tiin a lo zawt a. Ethana chu a han khi deuh suk a, "Nia, thla khat lai te a ni tawh sia. HEi lo ei bel dang kan nei si lova, kan hawn leh mai loh chuan." tiin a chhang a.

Jenny chu a thu a, "In chanchin hetia a nilo lutuk a, a thang ta vak mai hi pawi ka lo ti thin lutuk a. Mahse tupawn thil tih sual palh chang chu kan nei vek a, insiam that nan hun a la tlai hleinem tiraw?" tiin Ethana chu tih lawm a tum ve nasa kher mai. Ethana chu a han thaw hak a, "Nia, a harsa thin khawp mai. Video lah kha a la viral nasa ropui mai si a, theihnghilh tum pawhin hmuh tur a tam em em mai si a. A buaithlak a nih hi, internet lo awm kher kher te hi ka hua ania." tiin za lo tak chuan a nui lui sak a.

"Ethan, mi chak tak i ni tih ka hria alawm. Kum 20 chuang kan inkawm tawh a, kan naupan laite kha, kan school kal lai te kha ngaihtuah teh. I thiante tana i inhuam thui ziate kha, home work ti reng si, i thianten an tih ve loh avanga i inhrem tir ve ringawt thinte kha...mi i pui nasa thin a, chuvang chuan i tuar chhuak thei em em ang." tih pah chuan Jenny chuan Ethana kut chu a vuan a, Ethana lah chu a lo la phu deuh uih zui a.

A aw a han thian kharh kharh a, "Kei chuan ka tuar chhuak thei maithei, mahse ka unaute hian an tuar chhuak ve kher angem tih zawk hi a ni, Jenny. Kan bakery pawimawh ziate, an hrethiam pha ve thin si lo bawk nen...mangan chang a tam thin khawp mai." a han ti zawi deuh sap a.

Jenny chu a nui a, "Mi zawng zawng i lamah an tang lo angah ngai suh, i uanute saw i lamah an tang a, an hmangaih che a. Chuan keipawh i lamah ka tang ania, zam reng reng suh ang che." tiin a han fuih ve mawlh mawlh a. Ethana chuan lawmthu a hrilh a, chhang chu a pack pui nghal bawk a.

****************************

Lawma chuan college chu a thleng a, a thianpa Biaka zawng chuan a hawi kual hu hu mai a. Main building lam a pan lai tak chuan kawng sira Manuna leh a thiante lo titi chu a hmu a, a u Ethana'n a lo khawih hrep tawh tih a hre bawk si nen. Hlau rilru tak chung chuan, "Vawiin chu intibuai lo phawt ang." tia phun supin chak tawk chuan a kal phei a.

Mahse MAnuna chuan a lo hmu hman tlat mai, "Lawma, lo ding lawk teh." tiin a au vak a. Mahse Lawma chuan hre lo derin a kal tlang zel a, Manuna chuan ava um phak ta tho va. A darah va vuanin, "Lo ding lawk teh, Lawma.." a ti dek dek chu vin zet hian Lawma chuan, "Intih buai ka peih lo ania." a lo ti hlur mai.

Inthiamloh hmel tak hian Manuna chuan a thlah a, "Ka hria alawm, keipawn intihbuai ka duh lo." a lo ti daih mai. Lawma chuan a en hu a, "Anih chuan enge i duh a?" a han ti leh deuh khur khur a. MAnuna chu a ngawi deuh vang vang phawrt a, "Nizanah zu ka in hnem deuh va, ka rui lutuk a. Ka wallet ka ti bova, ka bike min ruksak bawk nen.." a han ti te te phawt a.

LAwma chuan a en vung vung a, "Chuan engtin zel?" tiin a zawt leh a. Manuna chu a khi deuh suk a, "Mangang takin khawlaiah ka tei ka tei ringawt a, ka awmna a hla si a. Ke a haw chi zia zang a ni bawk silo, ka rui bawk nen. Pawisa ka nei si lova, mahse i u hi a rawn kal a. Min hmu a, min lo hre nghal chat bawk a. Ka harsatna ka sawi hnuah taxi pharin kan in thleng min thlah a, ka bike bo avanga ka mangan thu ka sawi ka sawi vang nge ni, kan inchhung thleng min luhpui a, ka thianpa anga insawiin ka nu te bulah engkim min sawi sak vek a, chuan ngawi rengin a haw leh daih a." a tih chuan Lawma chuan mak a ti hle mai.

Phawk hru hian Manuna chu a melh a, "Au Ethana'n, chutiang chuan a ti maw?" a ti leh hu mai. Manuna chuan a lu lo bu nghatin, "Aw, ka lawm takzet. Chuan a hma a, aman min sawisak avang khan ngaihdam min dil nghal bawk a, i u hi mifel tak a ni, Lawma. MAhse lawmthu pawh ka sawi ve hma hma in a kal leh daih a, chuvang ania i bulah lawmthu sawi ka duh nachhan.  Ihhh...puih ve in ngai a nih chuan, ka awm reng ania." tiin a lo chhang a.

LAwma chuan sawi mai tur pawh a hre lo, "E...awle, kan lawm e." a ti bah nuai ringawt a. Manuna chu a thaw hak a, "Engtin nge ka puih ang che u ka hre lo, mahse puih che u hi ka hnial miah lo ania. Min lo hrilh tawp dawn nia, a nih phawt le." tiin kal mai a tum a. LAwma chuan engemaw hre chhuak zawk ni awm tak hian, "Leh lawk..." tiin a va pan phei a.

Manuna pawh chu a lo ding nghal chat a, Lawma chuan ava pan hnai a. A han inngaihtuah vang vang phawt a, "Thil pakhat min tihsak theih chu i nei." a han ti a. MAnuna pawh chuan phur tak hian, "Aw eng nge? Sawi rawh, ka ti em em ang." a lo ti vat a. Mahse Lawma chuan, "Lunch Break ah min rawn hmu dawnnia, ground ah." tiin a kalsan leh daih mai a.

******************************************

May-i pawh chuan painting school ah chuan a zirlaite chu a lo zirtir leh mek a, a hma zan a lo mengrei deuh bawk nen a lu chu a na deuh ut ut mai. Inphih harh tumin bathroom lam chu a pan a, mahse Thantea nen an intawk ta hlauh mai. David-a'n a tih buai dun t(r)um, Police Station hial an thlen zan atang khan May-i leh Thantea te pahnih hi an la inbe miah lo a ni.

May-i chuan a hmu lo der a, kal tlang mai a tum a. MAhse Thantea chuan a lo pawt ding a, "Hrilh tur che ka nei." a tih chuan May-i pawh chu a tal lui lem lo, "Eng nge sawi la?" a ti deuh hmuk ringawt a. Thantea chuan thawk a han la te te a, "Nizan khan i u in min rawn call a, engtin nge ka number a neih erawh ka hre lo." a ti ta mai a.

Mak ti tak hian May-i chuan, "Eng maw? Ka u in a rawn call che maw?" tiin a en hu mai. Thantea chuan a lu bu nghatin, "Aw...min hmuh a duh thu a sawi a. Chuan tukin khan kan inhmu a, ka zing walk pahin kan inhmu a." tiin a chhang a. May-i chu a thin a phu dup dup mai, "Eng nge in sawi?" a han ti zawi sap a.

Chutah Thantea chu a kun deuh ngal a, "Ngaihdam min dil a, police station-a min vin vak zan kha... khami vang khan ngaihdam min dil a, chuan a ngaihtuah lutuk vang chauh che a insum zolo a nih thu a sawi a." tiin a chhang leh a. MAy-i chuan mak a ti kher mai, "Ngaih... ngaihdam a dil che maw?" tiin a lawm kher mai.

Thantea chuan a nuih sang a, "Chu lo pawh thil dang ala sawi." a lo ti leh a. May-i chuan hriat chak hmel tak hian, "Eng? Eng chu nge a sawi?" tiin a zawt leh vat a. Hlim hmel tak hian Thantea chuan, "Ka unaunu tan hian mi tha tak i nih ka ring a ti, makpa atan min pawm nghal thlap aniang." tiin a nui bawk bawk a.

May-i pawh chu a hlim kher mai, "Animaw? AWii ka van lawm.." tiin a insum zo lo chu a kuah thlawp a. Thantea pawh chuan lo kuah let ve in, "Lungngai suh, tunah chuan i u pui turin ka awm ve tawh alawm." tiin a lo chul hliau hliau va. Chutah hre chhuak thut niawm tak hian an inthlah thut a, nui put put chung chuan an inkalsan ta a.

*************************************

Tlai lam a ni a, Victor-a office bulah chuan car pakhat hi a ding reng a. Chu chu Manuna car a ni, a chhungah chuan ngawi rengin Manuna leh Lawma te chu an chuang dun. An hma zawn, Victor-a office chu an en dun reng a, Manuna chuan a nih tawh hmel hle mai. A han thu tha deuh va, "Ava rei ve, LAwma. A lo chhuak har tawh e, hmundangah a awm te a ni lo maw?" tiin a phun nuah nuah a.

"Aih, a lo chhuak ang. Tun ang hunah hian ka hmu ziah alawm, ka ngei em avangin melh rum tur ringawtin tlai tin helai kawng atang hian ka haw ziah alawm. A lo chhuak tep ang, lo nghak rih rawh." tiin LAwma chuan a lo chhang a. Minute 20 vel lai an nghah leh hnu chuan Victor-a chu a lo chhuak ta, "Saw...sawle, a lo chhuak e." Lawma chuan a ti nghal chul mai.

Manuna pawh chuan a lo en ve ran a, "Khawi, khawi tarmit kha." tiin LAwma bawk chuan MAnuna chu a tur nghal vut vut a, Manuna pawh chuan tarmit chu a pe a. A sira hmehna tereuhte chu kawkin,. "Hei hi hmeh tur aw, chuan a in-record nghal animai." tiin Lawma chu a hrilh a.

LAwma chuan tarmit chu a vuah a, motor atang chuan a chhuak a. Victor-a chu ava pan a, a tarmit sir chu a hmet zeuh va, Victor-a chuan a car lam a lo pan mek a. Ring tak hian, "U Victor." tiin Lawma chuan a ko vak a. Victor-a pawh chu a ding a, a rawn hawi let vat a. Lawma hmel a han hmu chiah chu a nui huk a, "Eheu, thianpa. Nang i ni maw?" tiin a hmuhsit hmel kher mai.

Lawma chuan a va pan hnai a, "Khawngaihin U Victor, he thudiklo i vawrh darh mek hi dawt a nih thu sawi rawh, mipui hmuh ah hian...khawngaihin ka ngen a che." tiin a zam bawk si chu a khur dar dar thei hial a. Victor-a chu a lo ner sak a, "Engvangin maw? Eng vang tehlul chuan nge chu chu ka tih anga?" a lo ti zek mai.

"Hei hi infiamna a ni lo, U Victor. Kan chhungkaw zahawmna i ti chhe vek tih i hria em? Khawngaihin ka ngen a che, ka u Ethana vekin a tuar asin."

"LAwma, thudik lo theh darhtu chu nangmah hi a ni lawm ni? Kei ka ni em ni? Video-a Sunrise Sweets bakery chhang an hman saw expire a nih thu sawitu kha keimah ka ni em? Nangmah zawk i nih kha, Bawiha."

"Eng ang mihring nge maw i nih le? Hetianga mi chhungkua zawng zawng tichhe vek duh tur khawp hian a nimaw i rilru hi a lo tenawm a?"

Victor-a nui hmel chu a tawp hmak mai, rum tak hian LAwma chu a melh a. Vin deuh tak hian, "Ngaithla rawh, naupang. He in mualphona leh in buaina atanga fihlim in duh takzet a nih chuan haw nal nal la, i u Ethana hnenah bakery hi hralh turin va hrilh rawh. A nih loh chuan ka kal thui zel ang, in bakery chungchang saw a chhe lam zawngin ka post dar zel bawk ang." a ti ve ta khur khur mai le.

LAwma chu a thinrim takzet, a insehruh nasa mai a. Mittui tling teuh chung chuan, "Ka thianpa angin ka ngai che a, ka kawm nel che a. Ka harsatna min hriatthiam pui angah ngaiin ka lo ring ve hman em em che a, mahse min bum a ni. KAn college ah motivational speech rawn sawiin ka lo ngaisang ru ve em em che a, mahse nang chuan ka chhungkua tih chhiat nan min lo hmang lek amaw?" tiin rum tak chuan a melh a.

Victor-a chu a han thaw deuh halh halh a, "Aw, ka hmang tangkai che alawm. Ka plan sa vek a ni, hrai ruih che a, inpuan tir che ka tum a ni. A chiang em? Engkim kha ka plan sa vek, tichuan ka record bawk che. Chuan maw, LAwma. I u Ethana sawn engtikah mah min hneh dawn lo, in bakery kan rawn lei fel hunah kan inhmu leh dawnnia." tiin a kalsan ta daih a.

Lawma chuan a en zui vang vang a, a khi suk mai. Victor-a lah chuan deuh sawh tak hian tlan liam pahin ala rawn bye-bye zui a. A tlan liam veleh chuan Lawma chu car ah chuan a let leh a, "Enge a an?" tiin Manuna chuan a lo zawt nghal vat a. LAWma chu a nui leh sak a, "Kan hlawhtling e, a inpuang vek." tiin a lo chhang a.

**********************************************************

Khua a la thim lo deuh va, Ethana te inah chuan Ethana te unau, SAngtei, Lawma leh May-i te chu an thu thap a, an bulah chuan Manuna a awm ve bawk. Chaw ei dawhkan chu an kil thap a, Manuna Laptop atang chuan Victor-a inpuanna, Lawma'n a tarmit hmanga a lak ruk video chu an en thap hlawm a.

"Ka tum lawk sa vek alawm, ka plan vek a ni." tia Victor-a tawng vel ham ham te leh Ethana a ngaihnep zia a sawi te chu Ethana te unau chuan thinrim tak chung chuan an en a, Sangtei phei chu a mittui a lo tla leh hmanhmawh a. Ethana chu za lo tih hriat tak chuan a khi suk mai, "Min hnuaichhiah hle mai, a hre ve khawp ang." May-i chuan a lo ti khur dar dar a.

Sangtei pawh chuan thinrim hmel tak hian, "Kan theh darh ve a hun chiah animai lawm tihian, a tam thei ang berin hmu rawh se." a lo ti ve pang pang bawk. Ethana chuan a lu a bu nghauh nghauh va, "A nihna diktak kan tarlang ve ang, a thil tih man chu a hmu khawp ang." tiin a thusawi ah chuan a chian hmel takzet.

Lawma lah chuan intithei deuh tak hian, "Tarmit bak ka hmang miah lo ania aw, Manuna chu thil i nei tha hle mai." tiin a lo la khi deuh vur vur zui a. Manuna chu rawn tawng chhuak ve in, "Thlalak hi ka tui a, a hmingin photographer chu ka inti ve a. Model thlate, inneih thlate leh inkhawmpui thalte la in IG ah ka post ve thin a, followers pawh 10k lai ka nei ve asin. Keiman ka post anga, a viral hma deuh ka ring." a rawn ti a.

Ethana chuan a lo pawm nghal thlap, "A tha e, instagram mai nilo....social media zawng zawngah, Facebook a ni emaw, whatsapp a ni emaw...theih tawpin kan ti darh ve thung ang." a han ti a. LAwma pawh chuan phur tak hian, "Keipawh ka AC ah ka han dah ve hrim hrim ange, ka thiante ka lo thawn kual bawk anga." a lo ti ve bawk a.

Ethana chuan Manuna bulah chuan, "A caption kha chiang deuh takin i ziak thei ang tiraw, a context kha mipuiin an hriatthiam angai dawn teh a nia?" tiin a zawt a. Manuna chu lo nui sakin, "Tehreng mai, ka kutah dah rawh." tih pah chuan a laptop ah chuan thu chu a han type nghal zat zat a, hmun hrang hrang leh group hrang hrangah chuan a upload tel nghal bawk a.

Ethana chuan thawk a han la te te a, "A zawh veleh theih tawpin kan share nghal ang, comments zawng zawngte pawh kan chhiar kim vek angai dawn ania." a han ti leh a. "Kan painting school network lamah pawh ka lo post ve ange, a active deuh reng alawm." May-i chuan a lo ti ve bawk.

"KEipawh kan class ho group ah ka lo post ve ang, thudik an hriat hunah chuan kan lam an tang vek mai ang." Sangtei pawh chuan a lo ti ve bawk. Ethana chuan LAwma bulah chuan, "Chuan BAwiha, nangin Victor-a te lam atangin comment a awm em tih a khat tawkin i check deuh reng bawk dawnnia. Chuan min tan lo zawnga rawn comment an awm anih pawhin keini unau bik hi chu insum hram hram ila, mipui te hian tunge dik zawk chu an thlang mai ang, lo chhan let zuah zuah loh tur ania." tiin a hrilhfiah a.

LAwma pawh chuan a lu a lo bu nghat mai, "KA zo e, a in upload zo ve.." tiin Manuna chu a rawn au deuh thut a. Tichuan reilote hnuah comment a rawn awm nghal taur tuar mai, a then chuan eng nge awmzia tiin an rawn comment a, a thenin mak an tih thute, viewer pawh an pung chak nghal hle mai.

Chuveleh Ethana te unau pawh chuan an share nghal ta char char a, minute 5 vel chhung lek chuan video chu a darh chak takzet. Ethana pawh chuan beiseina a nei ve deuh ta, "Hei hi a bul tanna chauh a ni, mi tam zawkin thudik tak an hriat hma chu kan theh darh char char tur a ni." a han ti zawi sap a.

*****************************************************

Zan a ni a, video lah chu a lar tawh vet vet khawp mai. Thenkhat lahin Lawma video hmasa nen te chuan rawn dah dunin an lo edit hman thul, youtube lamah lah youtuber thenkhatte chuan video siam nan an lo hmang leh hman nual tawh bawk. Pu Jacob-a te company chu an dem hle a, comment pawh an duh tui lo hlawm khawp mai.

Thenkhat lahin, 'A tir atang khan keichu Sunrise Sweets neitute hi ka ring daih zawk reng a ni.' te an tia, a thenin mi dem hma a thudi hriat chian phawt a that thute an rawn sawi bawk a, viral nasa hem hem tak a ni. Ethana te unau pawh chuan an lo en ve zel a, a theih anga tam an thawn darh ve zel bawk.

Pu Jacob-a pawh chuan a lo hmu ve ngei a, a zakin a thinrim kher mai. A fapa Victor-a room lam chu panin a hawng nghal thuai a, Victor-a lah chu tlai lam zu rui chatthla chu a lo la hnar nasa nghang mai. Pu Jacob-a chuan a sawi vak vak a, "Victor, harh teh. Harh vat teh, tho rawh." tiin a vin tuar tuar a.

Lu nat hmel tak hian Victor-a chu a rawn tho va, "Eng nge ni vak vak a?" tiin a la ner nung zui. Pu Jacob-a chuan video chu a hmuh ta a, Victor-a'n video-a a hmel a hmu chiah chu inphih harh a ngai lo chiang kher mai, a meng nghal kawk kawk a. Vin zet hian, "I hmu em? A viral nasa tawh lutuk, mipuiin kei leh ka company hi an dem nasa teh mai ania. Engtin nge i mawl em em theih a?" tiin Pu Jacob-a chuan a hau hrep mai a.

Victor-a chuan a han ngaihtuah vang vang a, "Lawma, kha naupang kha... a tarmit kha camera a ni, min lo bum ve khanglanga maw?" tiin a thinrim nasa mai a. A lu a dawm vawng vawng a, "A hma pawhin tarmit a vuah ngai miah lova, engtin nge maw rinhlelh nachang ka lo hriat vat loh le?" tiin pawi a ti takzet.

Pu Jacob-a thinrim chu a thaw halh halh mai a, "Ni reng e, mawl hek che mawle? Engtin nge ti khawp hian i fimkhur loh theih a? Kan chhe vek dawn a nih hi, i insawi pawr ve tehreng nen." tiin a beng lo chauh hi a ni ber mai. Victor-a chuan thinrim hmel tak hian a melh ngai a melh vung vung a, "Engkim ka siam tha ang, PA..min ring rawh." a ti thum chher chher mai.

Mahse apa erawh chuan a rin tawh loh hmel takzet, "Ni e, i siam that vat chu a ngai a ni. Chuan fimkhur tawh ang che, hetiang thil atthlak tak tak hi saw bakery vang mai mai saw chuan ti tawh suh." tih pah chuan a kawk sawk sawk a, room chu chhuahsan pah chuan kawngka chu a khar ri thuai mai.

Victor-a chu a tho va, a tei kual vak vak a. A khum tlangah chuan a thu a, video chu a han en ve leh a. Comments te chu a chhiar thuak thuak a, an company demna lam hlir a ni. Amah Victor-a pawh chu mihring tenawm leh sual tak a nih thu an comment te chu chhiarin a thinrim kher mai, "I la hre khawp ang, Lawma....i inchhir dawn chiang alawm." tiin a inhrosa khur khur a.

***********************************************

Ni engemaw zah a liam a, video chu a la viral reng a. A hma ai zawngin a lar tulh tulh emaw tih mai tur a ni, Pu Jacob-a te company lah chuan tlak chhiat lam a pan zel a. Victor-a mangang chuan tihdan kawng a zawng a, a dap a dap a. MAhse tih theih vak a nei lo, amah ber chu a mualpho lutuk tawh tlat.

A chang leh video siamin kha video viral kha amah a nih loh thu leh edit mai mai a nih thute chu an han post ve leh thin a, mahse tumah chuan an ring tawh si lo. Dawt a heh zia thute, bum hmang a nih thute bak comment dang a dawng ngai lo, a thenin fiamthu thawh nante hmangin influencer thenkhatte phei chuan a lem te an lo chang vel hial a.

Ethana te dawr erawh customer an tam chho zel a, Ethana pawh a buai thei khawp mai. Theih patawp chuan an bakery chu a chei mawi belh bawk a, Jenny chuan a pui zeuh zeuh thin bawk. Nikhat chu Victor-a chu a office-ah chuan thu in a inngaihtuah nasa kher mai a, "Engtin nge heng thil zawng zawng hi ka thlen tir theih le?" tiin ama hriat tham lek chuan a phun bul bul a.

A khat tawkin email a dawng reng bawk a, phone call lah a ri sek bawk. Chutih lai chuan a secretary chu a rawn lut a, "Sir, kan comapny partner dang pakhatin kan contract kha an rawn terminate leh a." a rawn ti a. Victor-a mangang chu a sa pup pup mai, "Eng zat chiahin nge maw min phatsan dawn le awww..." tiin a han vin khur khur a.

"KAn regular customer tam zawk hian min dawr duh tawh lo bawk, min ring zo tawh lo a ni ber mai, Sir." secretary bawk chuan a han ti leh a. Victor-a chuan a chhang lo, chhuak tur chuan zaizir chuan a hrilh a. A tho hluai a, "Min ti mualpho khawp mai, Ethan..LAwma, in unau khan in chak dawn lo." tiin a insehruh nasa mai a.

*******************************************

Victor-a video viral atangin thla khat a liam ta a, Ethana-te dawr SUNRISE SWEETS pawh a changtlungin a lar leh zual sawt khawp mai. Sangtei exam chawlh lai a lo ni bawk nen, Ethana nen chuan nileng mai chuan an buai thei em em a. Lawma pawh college a ban veleh bakery ah chuan rawn tlangin a unaute chu a rawn pui ve thin bawk a, May-i erawh a ban veleh in lamah ei rawng a lo bawl thin thung.

An sum dinhmun pawhin zia lam a pan ve telh telh zel a, Jenny, Manuna leh Thantea te pawh chuan an hunawl neih chang chuan hlawh cheng khat pawh phut miah lovin an rawn pui ve thin bawk. Jenny leh Ethana te pawh chu an inhnim hnai tial tial a, mahse Ethana erawhin a duh thu chu ala hrilh ngam chuang hauh lo.

Thla hnihna a liam leh ta a, video lah chu hmuh tur a la awm zeuh zeuh tho mai. Pu Jacob-a te company lahin tlakchhiat lam zawi zawi chuan a pan zel a, sumdawnna lama an thawhpui thinte pawh chuan an kalsan belh zel bawk a. Pu Jacob-a chu a office ah chuan thu in financial report hnuhng ber chu a en a, a lungngaih hmel takzet.

Chutah Victor-a chu a rawn lut thut a, "Heng thil hi kha bakery phiangsen vang vek kha a ni, eng emaw tal chu kan tih angai a ni." tiin a rawn ang lut nasa bian bian kher mai. Pu Jacob-a chu a lo thaw hak a, "Bawiha, kan theihnghilh mai angai tawhin ka hria." a lo ti daih mai. Victor-a ngaihdan a ni lo nasa mai, "Engtin nge theihnghilh se min tih a? Eng nge maw i sawi tak le?" tiin a lung ni lo kher mai.

Pu Jacob-a chuan zaidam tak hian, "Victor, kan tlak chhiat belh hma hian duhtawk tawh teh. Anmahni saw an na lo, keimahni zawk hi a nih hi na mek chu." tiin a lo chhang leh a. Victor-a thinrim chu a thaw halh halh mai, "Kan tlawm ang i tihna maw? Engtin nge i sawi theih zawk?" tiin a tap tuau tawh mai.

Pu Jacob-a chu a ngawi vang vang a, "Kan chak lo a ni, BAwiha. Ka sawi tawh kha, Ethana saw mi namai a ni lo. Tunah chuan engmah tih in awmzia a nei lo, tuman min ring tawh chuang lo." tiin a lo chhang leh a. Victor-a chu a sap pup pup tawh, na em em hian apa dawhkan chu a chum ri thuai a.

Ring tak hian, "Ka pawm lo, ka pawm thei lo. Aih, kan tlawm tur a ni lo." tiin a vin nasa mai a. Pu Jacob-a ngaihdan a ni ta lo, a ding hluai a. Vin tak hian, "Min ngaithla rawh, Victor. Tih theih kan nei lo, kan chak lo chu a nih hi. Kan cho loh val kan tawng ve ta angah ngai rawh, hna dang buaipui tur kan ngah lutuk." tiin a hau hrep mai a.

Chutah le, Victor-a chuan apa awm chu a tham thut a. Bangah chuan a nam bet ta mai a, "NGaithla rawh, ka pa. Nang hian i remti emaw ti lo emaw, phuba chu tun hunah ngei hian, vawiin ni ah ngei hian ka la ang. I ngam anih chuan min dang dawn nia, ka pa pawh ni mahla ka dim bik lovang che." a ti ta khur khur mai le.

Pu Jacob-a mak ti lutuk chuan a fapa chu a en vung vung a, "Engthil phiangsen nge i tih hi i hria em? Eng chu nge maw i chungah hian thleng ta le? Tiang khawp a rapthlak mihring hi engtin nge i nih theih a?" a ti ve hial mai a. Victor-a chuan rum taka a pa melh chung chuan, "Eng angin nge min ngaih ka ngai pawimawh lo, zanin ngei hian ka chingfel ang." tiin a chhuahsan a.

*********************************************************

Khua a thim tawh a, Ethana leh LAwma te pawh chuan dawr chu an khar fel mek a. "U, lo va haw la...keichu naktuk project ami tur thil lei kawi a ngai a, ka rawn haw vat ang." Lawma chuan a ti a. Ethana chuan pawisa a pe a, "Anih chuan kha pawisa hi la rawh, taxi in lo haw ang che." a ti a.

"AWle, lo va haw rawh. Dawr hi chu ka lo kalh fel mai ang, min ngaihtuah suh." tiin Lawma chuan a chhang a, tichuan Ethana chuan a chhuahsan ta a. Taxi a chang a, a phar ding a. Tichuan Lawma chu a haw san ta a, taxi a tlan liam chiah tih ah chuan kawngsir motor atang chuan Victor-a chu a rawn chhuak a, Ethana taxi chuanna chu kawng kawia a liam thleng chuan a en vang vang a.

Chutah Bakery lam chu ava hawi phei leh a, LAwma chuan hmunhma vel a lo tifel mek a. Victor-a thinrim lutuk chu a puak keh lo chauh, a hawi kual a. A bul hnaia dawrte pawh chu an inkhar fel vek tawh avang chuan mi an tlem angreng hle a, a ipte atang chuan pocket knife hriam em em mai hi a phawrh a.

Tichuan dawr lam chu ava pan ta chhur chhur mai le, a hawi kual zeuh zeuh reng bawk a. Tichuan a chhungah chuan a lut ta, Lawma lah chu lehlam hawiin hmun a lo phiat mek a. En miah lo hian, "Kan khar tawh a, naktukah lo kal leh mai ta che." a lo ti sam et a. Victor-a a ni tihreng a hre lo, Victor-a chuan engtin mah a chhang lo bawk.

Chutah Lawma chu ava hawi a, Victor-a a hmu thut mai chu mak tiin a ding ngil nghal at mai. Victor-a chuan rum zet hian a melh a, "I thil tih man chu i hmu dawn khawp mai, naupang." tiin a thinrim lutuk chu a khur dar dar thei hial a, Lawma chuan ngawi rengin a en reng ringawt.

Chutah kawngka chu Victor-a chuan a khar hmak a, chhunglam atangin a kalh hmak bawk. Lawma chu a va en leh a, "Nang naupang khan ka bum e min ti ve amaw? Video vekin min bum ve ngam amaw?" tiin a vau khur khur mai a. Chutah a chemte ken chu a lek kang ta mai a, LAwma chuan a chil a lem dawk mai.

*******************************

Ethana chu taxi ah chuan a chuang mek a, chutah message a dawng a. A han en chu a phu nasa kher mai, thlalak a rawn thawn tel bawk. Ring tak hian, "Ka pu, ding lawk, ding lawk. Khawngaihin let leh lawk teh, khawngaihin.." a ti chiam chiam mai a. Hrilhhai tak hian driver pawh chu a in-turn a, a let ve leh mai a.

Message chu Lawma number atanga a dawn a ni, mahse a textu erawh Lawma a ni lo. Victor-a a ni, hliam nei nual leh chauh hmel taka Lawma chhuata tlu sawp reng thlalak a dawng tel bawk a. Victor-a chuan tumah hrilh lova, amah ngeia lo kal turin a hrilh a, police hnena a report emaw midang a rawn hruai tel a nih vaih chuan Lawma chu a thah nghal tur thu a thawn bawk hi a lo ni.

A dawr thlen hma hret chuan taxi chu Ethana chuan a din tir a, tichuan fare pe in rang takin a chhuak nghal a. DAwr chu ava thleng ta, a hawi kual a. A kik karh karh a, mahse mak tak maiin a lo inkalh lo. A hawng a, a thil hmuh chuan a va thawng tak em. Lawma chu a lo thingthi a, a bulah chuan chemte in Victor-a chuan a lo tin reng bawk a.

Ethana chuan hlauthawng tak hian, "Vic, Victor, tumah ka rawn hruai lo. Keimahin ka lo kal, khawngaihin Lawma kha tina suh." tiin a ngen nghal mawlh mawlh a. Victor-a chuan rum taka melh chung hian, "Kawngka kha kalh rawh." tih ringawt chuan a lo chhang a. Ethana pawh chuan thuawih takin a kalh ve mai bawk, va pan hnai a tum a.

Mahse Victor-a chuan Lawma hrawkah chuan chemte chu chuktuahin, "LO kal hnai hlek suh, a nih loh chuan ka zai nghal a nimai." tiin a vau nghal khur khur a. Ethana pawh chu a ding a, "Ni lo, Victor. Hetia i tih hi a tul miah lo ania, khawngaihin inngaihtuah chiang rawh." tiin a ngen leh lawm lawm a.

Victor-a chu a nui ta huah huah mai, "Ngun taka ka inngaihtuah hnuah he thuthlukna hi ka siam a ni, Ethan. Nangmah vang hian ka pa meuh pawh kut ka thlak asin, ka nun hi i tichhia asin, Ethan." tiin a ankhum ta nghek nghek mai a. Ethana chu a mangang takzet, "Enteh, Victor, Lawma kha kal tir rawh. Chuan bakery hi ka hralh ang, in lei em em ang. Tlawm deuhvin in lei dawnnia, a tha em?" tiin thlem a han tum chhin a.

Chutah Victor-a hmel chu rawn danglamin a mittui a rawn tla ta hial mai, "He bakery phiangsen hi ngatan mah ka ti tawh lo, ka koh chhan che i hre duh em ni? Ka that ve ve dawn che u, engmah dang ka duh lo." a ti ta mai a. Chutah Lawma hrawk chu zai a tum ta mai, Ethana mangang chu ava tlan phei a.

Victor-a chu a va zuan nghal a, chemte chu an inchuh ta. Lawma erawh hliam a neih nual avang chuan a chau takzet a, a let nghal tawp mai. Ethana leh Victor-a chu an insual nasa mai a, bungrua pawh an ti chhe rum rum mai a. Eng tin tin emaw chemte chu Ethana chuan a phih thlak sak a, chhuatah chuan a tla a.

Tichuan Victor-a nen chuan an insual leh ta tiah tiah mai a, mahse Ethana chuan a hneh tha thum lo tlat mai. Victor-a chuan chemte chu a chhar a, Ethana lam chu a pan leh ta chhur chhur mai a. Lawma chuan a chakna zawng zawng sawm khawmin Victor-a chu hnunglam zawng chuan a va zuan ve a, mahse a lo leh thal rang kher mai.

Chhuatah chuan a paih ri thlawp a, "Nang naupang hi, thih hmasak zawk i duh a nimaw?" tiin vih a tum a. MAhse Ethana chuan a rawn dang a, bangah chuan a nam bet a. MAhse vanduaithlak takin Victor-a chuan Ethana chu a dulah a vit hman ta tlat mai. Ethana na ti lutuk chu a che tha thei lo, "Ni lo, U...U.." tiin LAwma chu a au vak vak a.

VAwi hnih dang chu Victor-a chuan a han vit nawn leh siah siah mai a, Ethana chu chhuatah chuan a thingthi hnawk mai a. Thisen a far nghal zawih zawih bawk, Victor-a chuan chemte hum ran chung chuan LAwma lam chu ava pan leh ta. Mahse kawngka chu a rawn insu hawng thuai a, police an rawn lut a.

Pu Jacob-a hlauthawng chuan police a lo phone chu niin, a fapa chu bakery lam a pan a rin avangin police chu a rawn hruai risk tawp hi a lo ni. Victor-a chu man a ni nghal bawk a, Lawma leh Ethana chu an buaipui nghal a. Ethana chu thisen a hloh hnem em avang chuan a lu a hai em em a, thil engkim mai chu a mang hriat ruai ruai mai.

Bakery atanga an zawn chhuak lai chu a hre ruai ruai a, mangan hmel taka LAwma'n a au vak vak ri chu a hre ruai ruai bawk. A chang leh nikhaw hrelovin a awm a, damdawiina an kal pui laite, a unaunu May-i leh SAngtei te tap ri pawh a hre leh zeuh zeuh thin a. "Lawma, Lawma kha..a hliam ania." tih chauh chu a sawi thei.

**********************************************

NI 4 HNUAH CHUAN

Damdawiin ward pakhatah chuan Ethana chu a mu mek a, doctor chuan a lo be mek a. Vawiina an chhuah theih tawh tur thu leh, a hliam pawh a thuk em em loh avanga a dam vat an beisei thu chu doctor chuan a hrilh a. Chutih lai chuan a unaute pathum, May-i, Lawma leh Sangtei te chu an rawn lut a.

Doctor chhuah veleh chuan, "U...nikhat vel chu la awm la ka ti ngawt mai, dam vervawrin chhuak law law la." May-i chuan a ti nuah nuah a. Ethana chu a khi suk a, "Chemte hraim tak leh sei tak chu nise ka damchhuah ka ring lo hrim hrim. Mahse pocket knife ania, a zai kak nasa em a thisen ka hloh nasat vang mai maiin nikhawhrelovin ka awm thu min hrilh a, doctor khan. In lamah kan in enkawl thei em em ang, chubakah maw.." a tih lai chuan kawngka chu a rawn ri rak a.

An beisei loh lutukin Pu Jacob-a a lo ni reng mai, Ethana te unau pawh chuan mak ti tak hian an lo en thap a. Inthlahrun hmel tak hian a kun ngal a, Ethana khum chu a rawn pan hnai a. A aw a thian kharh kharh a, "Ahh.... Ethan." a han ti zawi sap a. Ethana chuan ngawi reng hian a en a, "Ka tihpalh a ni, min ngaidam hram rawh u. KA duham vangin ka fapa ngei pawh jail ah ka tan tir phah a, ka lo ngainep che a. MAhse nang leh i unaute hi ka ngam lo che u a ni, ka tihpalh takzet." tiin a inhnit feih feih a.

Ethana chuan han chhan mai ngaihna a hre lo, a kut chu May-i chuan a rawn vuan a. Ethana chu enin a lu a bu nghat a, "Ka fapa Victor-a thil tih kha dik ka ti bik lo, mahse keimah vang vek a ni. Engtin nge in chunga chhiatna ka thlen zozai hi ka rulh ang che u ka hrelo, mahse min ngaidam hram ang che u." tiin Pu Jacob-a bawk chuan a ngen leh ngawih ngawih a.

Ethana chuan Pu Jacob-a chu a inchhir takzet a ni tih a hrethiam a, mahse engmah ala sawi chuang lo. Pu Jacob-a chuan a tu a te mah chu an mitah pawh a en tha ngam lova, "I damdawiin awm man, senso zawng zawng leh in bakery tih changtlunna tur zawng zawng pawh ka tum vek ang. Min ngaihdam theih phah dawn a nih chuan, ka neih zawng zawng pawh ka pe vek huam che u." a han ti leh a.

Ethana chuan zawi sap hian, "Kan lawm e, mahse angai kher lo asin." tiin a lo chhang a. JAcob-a chuan a mittui chu hru in, "Engpawh ka ti ang, ka inchhir takzet zet a ni. Ka kal phawt ang nge, lo inenkawl tha ang che." tiin kal mai a tum a. Ethana chuan a ko ding leh a, "Pu Jacob?" a tih chuan a lo ding nghal chat a.

Ethana chu a nui a, "Ka lawm e, chuan...kan vai hian kan ngaidam bawk che aw..." zaidam tak chuan a ti a. Pu Jacob-a pawh a lawm kher mai, "Puih in ngaih apiangin ka awm reng ania, Ethan. Unau zinga upa ber nih i tlin takzet e, i naute i hmangaih ang hian midang hian an unaute an hmangaih ve theih pawh ka ring lo. In enkawl tha ula, hlim reng ang che u." tiin a kalsan ta a.

A kal veleh chuan Lawma chuan, "Ka pheikhawk man tur tal ka lo tum tir lo a ni." ti a fiamthuin a han khi suk a. Ethana chu a han thu tha sauh sauh va, "Lungngai suh LAWma, ka lei ang che. Pu Jacob-a kha chu thildang kan tum tir dawnnia, tlema hautak deuh." a han tih chuan mak tiin a naute chuan an en thap a.

"Eng thildang maw?" LAwma chuan a ti hu mai. Ethana chu a nui huk a, "Inneihna?" a ti leh a, "Ehe, ngangmah maw? Tu?" Sangtei chuan a lo ti ve leh vat a. Ethana chuan a lu a thing a, May-i lam chu a en ta mai. May-i chuan mak a ti takzet, "U...i ti tak tak ami?" a ti hu mai a. Ethana chuan nui chung hian, "I senior tawh alawm, Thantea pawh ka hrilh vek tawh." tiin a chhang a.

May-i lawm lutuk chuan, "Ka hmangaih che, U." tiin a kuah thlawp a, Lawma leh Sangtei pawh chuan an kuah ve a. Ethana chuan a unaute chu a han en kual a, "Tihpalh naute u, Jenny hi ka la bem ngam chuang lo. Hmeichhe lamah chuan ka nep ve em a ni, sorry guys." a rilru chuan a ti nuah nuah a.

*************************************************

THE END